مسافير
يقول أنا برحل وأخليك وأنساك
وأقول أنا يالله عساها (( مسافير ))
قلبي سعيد ويبغي اليوم فرقاك
كم أنتظرها في سنين معاسير
أرحل وأنا بمسح من البال ذكراك
وابغا اشطب اسمك دون رحمه وتفكير
وأنسا سنين ماضيه كنت وياك
أوفا حبيبه لك وأقرب من الغير
كنت الظلال اللي من الشمس يحماك
وكنت القنوف المقبلات المزابير
كنت السند في يوم كلن تبراك
مديت لك كفي وأنا نيتي خير
كنت السعد يوم السعد حيل جافاك
وكنت الخزامى والنفل والنواوير
كنت العطايا والوفاء كنت مركاك
كنت الدلال الزاهيات المباهير
كنت الأمان اللي على الوقت خاواك
يوم أظلم الواقع وعشت التحاسير
رسمت لك لوحه أمل عبر دنياك
وسطرتها بالطيب والصدق تسطير
خليت لك قيمه وتقدير وادراك
والكل ينظر لك بحشمه وتقدير
وصلتك اللي قاصره عنه يمناك
وكبرت في عين البشر وأنته صغير
مانيب ندمانه على كل ما جاك
أنا أحمد الله عيشتي طيب وبخير
وأنا أحمد الله يوم بانت نواياك
ويوم أنكشف لي ماتوقعت بيصير
واليوم أنا مليت عطني مقفاك
أرحل وفارق ماأبي زود تبرير
|