.. ماوجه سهومه الا لي !! ..
صاحبي ماوجه سهومه الا لي = اكتب اسمي بالقلم تحت توقيعه
كل ماسجيت طروك يالغالي = وانجرح قلبي وزادت مواجيعه
من عذلني في محبة هوى بالي = والله اني ياهوى البال ماأطيعه
بالعيون اللي بكاها برى حالي = أشتري حب أريش العين ماأبيعه
عقب ماني يافهد دالهٍ سالي = صرت والله خاتمٍ بين أصابيعه
من غلاه أرخصت دمعي وهو غالي = ماقويت أجامله وقت توديعه
فضحتني دمعتي بين عذالي = وافترق هاك الشمل عقب تجميعه
دمعي ياللي فوق الأوجان همالي = يسقي الشوكي ويروي ترابيعه
أشهد ان فراق الأحباب قتالي = يذبح العاشق ويحرق مداميعه
كم شجاعٍ يضربون به الأمثالي = صارت الفرقى من أسباب تشييعه
|