أول شي سمعته في حياتي .. من بعدها سمعت صوت دقات قلب أمي وأنا في حضنها و شميت ريحتها .. وبعد هذا سمعت أسمي اللي كانوا اهلي محتارين فيه .. ليلى أو بدرية .. هذي بدايتي مثل أي شخص عادي .. بعدها بديت أمسك الرموت و احطه في فمي .. و بعدها بفترة صرت ازحف في الأرض و اروح لأمي أو أبوي .. بعدها خطيت أول خطوة اللي هي مسافة قصيرة بين أمي و أبوي .. حياة سعيدة صح ؟؟

بس عشان خطأ صار في حياتي .. خطأ عرفوا فيه البنات .. صفحة قديمة و طريتها من حياتي .. ندمت و تبت .. صليت و تصدقت و دعيت عشان الله يسامحتي .. سكت و تحملت و تجاهلت واايد واايد .. كانوا يقصدوني في السوالف لكن احلى شئ التجاهل بس مشكلته يتعب القلب و يخليك انسان كتوم و منعزل عن الناس .. بس التجاهل للقلوب القوية مب للقلوب الضعيفة .. وأنا اعترف ان قلبي الضعيف هو نقطة ضعفي ..

مر على خطأ خمس سنوات .. اقدر اقول خطأ الطفولة .. ولكن الكل رافض تكون صديقتي بعد ما تعرف بالمشكلة .. ومحد معاي الحين .. اشخاص وايد كنت اتمنى انهم يوقفون معاي ولكن خذلوني و صدقوا الناس اللي تحاول تجنني و تخليني وحيدة .. ياخي يحسسوني مذنبة .. ولكن اذا الله يسامح عباده نحن منو عشان ما نسامح .. او اقل شي نستر عشان الله يستر علينا ...

الين ارتحت للبنت اللي اعتقدت انها اخر وحدة راح تساعدني او حتى توقف معاي .. اول ما بديت اتكلم معاها قلتلها عن المشكلة اللي الكل ذلوني فيه .. اول ما قلتلها قامت من الصدمة بدون اي تعليق .. انا هني خاب ضني و قلت في خاطري انتي مثل غيرج راح تخليني وحيدة .. لكن في اليوم الثاني انصدمت ان اسلوبها ما تغير معاي .. ولا تحاول تبتعد عني كانت عادية جدا .. ولما طلعت معاي في الفسحة قالت : انا معاك .. فرحتج من فرحتي و حزنج من حزني .. هني انا وثقت فيها حسيتها صدق غير عن البنات .. و عن المشكلة قالتلي انا ما علي من ماضيج انا على بالإنسانة اللي قدامي الحين .. و كانت تسمع كلام بس تطنش و كانوا حتى هي يتكلمون عنها بسوء بسبب خطئي .. ولكن الين اليوم ما تخلت عني ..

كل هذي القصة من وحي الخيال
منقول