التفتوا لفتون الي واقفة بنص الدرج والضحكة شاقة وجهها
عبير : بسم الله متى جيتي ؟؟
فتون وهي تنزل : ومن قال اني رحت اصلا .. واقفة ورى الدرج أسمعكم
خالد : أجل رحنا فيها

فتون وهي تنط على الكنب لتوصلهم .. ماكن في أرض تمشي عليها وبالآخر قعدت بقوة جمب خالد وهي تقول بضحك : اجل انجنيت ياخوي !!
ضرب خالد راسها من الخلف وهو يقول : انطمي !
خلود :ههههههههههههههههههههههه ياحظي باخوي مجنون واو وناسة
عبير : ههههههههههه مب صاحية يافتون اسكتي اهلي فوق
خالد : مب هذا الي أنا خايف منه .. (( ويدف كتف فتون وهو يقول : هذي فضيحة ومصيبة الله يفكنا من بلاويها
فتون : حبوه أنا والله بريئة وبعدين انت لا تستقوي علي الحين عشان وحده ماتحبك ولا تدري عنك !!
خالد : عاد الا إنتي مو ماخذ على كلامك !!
فتون وهي تهز كتوفها : بكيفك أنا اقولك الحين عشان لا تنصدم بعدين
عبير : خلك عنها ياخالد هذي خرابة بيوت
فتون :هههههههههههههه على الاقل يكونلي خدمة بالمجتمع
خالد : أدري أنها أكبر نصابة وبتروح الحين تقول لمرام ترا خالد يكرهك ومايطيقك
فتون :هههههههههههههههههههههههههههها ي شلون عرفت ماشاء الله تقرا أفكاري؟؟
خالد وهو يمشي للدرج : أعوذ بالله من هالافكار بس
فتون : أعوذ بالله منك
عبير تضربها : بس انتي أوص !!
فتون تفرك إيدها : آآآآآآي إيدي !!
عبير : من جد فتون اركدي خلاص وربي انتي مصدر ازعاج وخراب وبلاوي
فتون : ههههههاي ومصدر ضحك ومرح
عبير : اي مره المهم قومي الحين نرتب غرفتنا حوستك بكل مكان
فتون اتمدت على الارض ورجولها على الكنب وتقول : وليه ان شاء الله نرتب الغرفة ؟؟ مو بنقعد بالصالة ؟؟
عبير : ولو بغينا نطلع الغرفة لأي سبب لازم تكون مرتبه
فتون : رتبيها انتي عبير والله مافيني اطلع
عبير : قومي اطلعي مره وحده عشان تلبسين
فتون : خلاص انا لابسة

طالعت عبير لبس فتون الي كانت لابسة بنطلون أسود .. وتيشرت أحمر ماسك ومخصر نص كم .. ومكتوب عليها بخط انجليزي خطوط كبيرة سودا .. كان لبسها حلو بس عادي ومو مثل ملابس البنات النعومات الرايقات .. وقالت عبير : لا يافتون لاتقولين بتستقلبين صديقاتي بهالبس !!!
فتون : الا بهالبس شفيه ان شاء الله !
عبير : لا فتون صديقاتي متحمسين يشوفونك أبيك تكونين بأروع شكل
قعدت فتون وهي تقول : شقصدك يعني وانا طبيعية مو حلوة
عبير : أقول اهجدي تدرين ان البس والمكياج وهالحركات تحلي أكثر
فتون : وتدرين اني ماطيق المكياج ولا أحبه
عبير : بس لازم تحطين هالمرة بليز فتون أمنيتي اشوفك مكيجة وبتنورة نعومة وبلوزة كت وربي تطلعين جنان
فتون :ههههههههههههههههههههههههههههه أنا ألبس تنورة مستحيل !!
عبير : عشان خاطري فتون هالمرة بس !!
فتون : عبير خاطرك على عيني وراسي بس لا تقوليلي ألبس تنورة وأتمكيج والله ما أسويها
عبير : فتون ترا إنتي بنت !!!
فتون : هههههههههه إحلفي بس !!!
عبير وهي توقف : انقلعي .. انا باطلع ألبس وخليك انتي بهالشكل

رجعت فتون تتمد على الأرض إلا رن التلفون !
استثقلت تقوم وطنشته لين فصل .. وبعد مافصل ضرب عرق الفضول فيها وراحت تشوف مين المتصل ولقته بيت خالتها ..
دقت على بيت خالتها وبعد أول رنة رفع الخط : ..............
فتون : ألو
: ................
فتون : الو مين رافع السماعة وساكت !!
: شتبين انتي ؟؟؟؟
فتون عرفت صوت فيصل وقالت : وانت ليه ساكت ليه ماترد ؟؟؟
فيصل : أولا السلك خربان وكنت أصلحه ثانيا ياماما كيفي أتكلم أو ما أتكلم ؟؟
فتون : لا مو على كيفك ماترد ! اذا دق جوالك سوي الي تبي بس تلفون البيت لازم ترد !
فيصل : لا والله بتعلميني شلون أتصرّف زين اذا رديت وش أقول ألو ولا السلام عليكم ؟؟
فتون تجاريه : لا حبيبي انت قول ألو والمتصل يقول السلام عليكم
فيصل : اوكي ماسمعناك سلمتي وانتي المتصلة !!
فتون : لانك ماقلت ألو قلت شتبين انتي !
فيصل : أها يعني بدون ألو ماينفع نسلّم !
فتون بضيق : الحين انت وش تبي ؟؟؟؟؟؟؟
فيصل : انا الي وش أبي والا انتي الي داقة ومزعجتنا !!
فتون : لا تكذب انت الي داق وشفت رقم بيتكم واتصلت !
فيصل : لا مادقيت وشالي يخليني أدق على بيتكم وأطيح فيك اللهم ياكافي ؟؟
فتون : لا تكفى عاد أنا الي ميتة عليك وأبيك تكلمني !
فيصل : تتمني انتي أصلا يالمطفوقة
فتون بعصبية : ليه كارهة عمري عشان أتمناك ؟؟ وبعدين كم مره قلتلك لا تقولي هالكلمة انت ماتفهم ؟؟؟
فيصل متونس : والله هذي الحقيقة مطفوقة مطفوقة مطفوقة ..
فتون : فيصل أكرهك أكرهك أكرهك

انرفعت السماعة هالحظة وطلع صوت مرام : الو
فيصل : جيتي بوقتك مروم فكيني من لزقة هالمطفوقة .. باي
فتون وهي شوي وتبكي : يع والله مالقيت الا انت الي أتلزّق فيك ياكريه
لكن فيصل سكر وماسمعها

مرام : فتون أدق عليكم ماتردون أبي أعرف شالقصة ؟؟؟؟
فتون : بسم الله شوي شوي انتي الثانية سلمي أول !!
مرام بحمق : أقول فهميني شالقصة ؟؟؟؟
فتون : وشو .. وش قصته ؟؟؟؟
مرام بعصبية : تو أمي جتنا تقول الحين تروحون بيت خالتكم لأن فيصل بيطلع اهو وخالد !! ودام فيصل رايح لخالد تبينا نروح مره وحده وبلاش السواق يودينا بعدين
فتون : غريبة تو خالد عندنا ماقال شي !
مرام : شلون ماقالكم شي ؟ هالعيال يخطون واحنا نتورط !!!
فتون : اوكي وش المشكلة لو جيتوا الحين ؟؟
مرام : توني والله ماخلصت ولا لبست ولا سويت ولا شي
فتون : طيب يالذكية عادي جيبي لبسك وعفشك واجهزي عندنا
مرام : مافيني يافتون والله حوستي كثيرة وباقي آخذ شاور .. ليش مو اخوك الي يجي وياخذ فيصل ويخلينا نروح براحتنا مع السواق
فتون : وش دارني عن خالد يامرام والله مادريت عن خطتهم الا تو الحين منك

" وش السالفة ؟ "

التفت فتون لتشوف خالد لابس وعاقد حواجبه باستفهام من الكلام الي سمعه
فتون والسماعه باذنها : خالد انت بيجيك فيصل الحين وتطلعون ؟؟؟
خالد بصوت تسمعه مرام : اي وش المشكلة ؟؟؟
فتون : هذي مرام معصبة تقول خالتي قالتلهم يروحون مع فيصل مره وحده وهي للحين ماجهزت
خالد بابتسامة : اها .. والمطلوب !
فتون بدهاء : تقولك مرام انت تعال وخذ فيصل وخلهم يجون براحتهم مع السواق بعدين
خالد : ايه ! بس انا خلاص اتفقت مع فيصل ان هو يجيني !
فتون : الله وأكبر وهالاتفاق صار بالمحكمة يعني ؟؟ عادي كلم فيصل وغيّر !
خالد : ما أغيّر الا اذا جتني أوامر موجهة لي أنا
فتون : هههههههههه سامعة مروم ! حاجتك عند خالد يالله انتي قوليله
مرام وقلبها يضرب طبول : فتون يبيلك ذبح ياحماره !
فتون : هههههههه كيفك عاد ترا بيطلع
مرام : يوه وش أقوله يعني ماحب كذا يافتون من جد ماحب !
فتون : والله عاد براحتك انتي وخالد كل واحد أعند من الثاني وذي مشكلتكم

خالد ضحك ومشى للحوش واهو يقول : اذا عندها شي خليها تدق على جوالي
فتون : مراموه سمعتي ؟؟؟
مرام : اي سمعت الله ياخذ العدو
فتون : دقي على جواله خلاص انا وراي أشغال مرام باي
مرام : باي .. وسكرت السماعه بحمق !!

مسكت جوالها وهي معصبة ومرتبكة وماتدري وش تدق تقول ! وشوي لغت الفكرة وقالت مو داقة عليه ولاشي هذا يبي يستغل وضعي بس ويذلني خليني بس كذا مو داقة لو يموت ..
وقامت لغرفتها الا شافت فيصل نازل الدرج ويقول : يالله جاهزين ؟؟؟
مرام : لا اصبر شوي ومنى نايمة اصلا ماقامت ولاجهزنا
فيصل : يعني شلون خلاص انا متواعد مع خالد الحين نطلع وينكم ماجهزتوا من أول !!
مرام برجاء : خلاص فيصل بليز انت روح واحنا نجي مع السواق بعدين !!
فيصل : أبوي لو درا اني رايح بيت خالتي الحين وبعد ساعتين انتوا رحتوا بالسواق بيوريكم الويل !! تدرين خالتي بيتها وش بعده عن بيتنا !!!
مرام : اي أدري يافيصل طيب كلم خالد هو يجيك وخلاص احنا نروح بالسواق بعدين
فيصل : لا والله مو مكلمه لأني انا الي مشتهي الروحة والمشوار الي نبيه قريب من بيته !! لا والله فشلة مو مكلمه !!
مرام وهي شوي وتبكي : حرام عليكم تربشونا بهالشكل !
فيصل : 5 دقايق يامرام لو مانزلتي انتي واختك والله لامشي
مرام : يوه !

وطلعت الدرج معصبة ودخلت غرفتها وسكرت الباب
تأفت بضيق وهي تدور بالغرفة وتطالع جوالها وحست ان خلاص لابد انها تكلم خالد وتطلبه لأنها لو ماسوت كذا معناه لازم تسحب اي لبس قدامها من الدولاب وترج أختها وتصحيها ويروحون مع فيصل لبيت خالتهم محيوسين وهم يحبون يظهرون بأبهى حلة !

قعدت على طرف السرير ودقت على جوال خالد وأول مارفعت الجوال لاذنها جاها صوت خالد : يا هلا
مرام بصوت فيه نبرة الضيق : هلا خالد شلونك
خالد : تمام .. انتي شلونك مرام
مرام : الحمدلله عايشين ..
خالد : شفيه صوتك ؟؟
مرام : أبد سلامتك .. ها خالد ممكن تجي انت لفيصل ؟؟؟
خالد : ام .. مشوار علي يا مرام !
مرام انحرجت وقالت : أجل خلاص لاتعب نفسك لاتجي
خالد : انتي تبيني أجي ؟؟؟
مرام ماحبت يفهم انها تبيه يجي عشانها وقالت : أبيك انت تجي لفيصل عشان ترضى أمي نروح بالسواق بعدين .. ولو مابي هالشي ماطلبتك !!
خالد : انت ماتطلبين مرام .. (( وضغط على الحروف وهو يقول : انتي تامرين أمر !!
انصبغ وجه مرام بالحيا وقالت بهمس : ما .. مايامر علي ك عدو
خالد : تامريني بشي ثاني بعد ؟؟
مرام : لا أبد مشكور خالد
خالد : أكيد ؟؟ فكري ترا الفرصة ماتجي كل مره !
مرام بحرج : مافي شي خالد بس هذا كان أهم ماعندي
خالد : ماتبيني أكلم فيصل اقوله ينتظرني ومايجي ؟؟؟
مرام انتبهت لهالشي : إلا إلا صح كلمه !!
خالد : هههههههههههههه شفيك ماقلتي طيب ؟
مرام : راح عن بالي
خالد : الي ماخذ عقلك يتهنابه !
مرام : محد ماخذ عقلي لاتخاف
خالد : اوكي وقلبك أحد ماخذه ؟؟؟
تسارعت دقات قلب مرام وحست الجوال بيطيح منها .. ماتدري تقول لاء ولا ايه ولا وش تقول ! وظلت ساكته ماردت لين قال خالد : وين رحتي مرام !
مرام : هنا معاك مارحت مكان
خالد : اوكي جاوبيني طيب
مرام : ماعندي جواب مناسب لسؤالك صراحة
خالد : يعني أفهم ان في أحد ماخذ قلبك مو ؟
مرام : م ....
قطعت كلامها يوم سمعت صوت فيصل يصارخ برا السيب :

" مرام ومنى أنا ماشي والله مو منتظر أحد "