منتديات قصايد ليل - عرض مشاركة واحدة

02-06-2014

((الفصل الثاني))
اليوم اللي بعده .. (( يوم العزيمه ))
عبدالله يدق على الشباب .. ويشوف ليش تأخروا !!
عبدالله يدق على سامي : هلا سامي ها وينكم ؟
سامي : نصلّي ونمشي
عبدالله : تعالوا وصلّوا ف المسيد حق حارتنا دامه قريب من البيت ..
سامي : خلاص دقايق ونكون عندك
عبدالله : وائل وياكم ؟
سامي : لا والله أنا معاي مازن ويوسف وابراهيم شوف خالد يمكن معاه ..
عبدالله : اووووكيك سلام ..
ويرد ويدق على خالد
عبدالله : خالد هلا والله ها وينك ؟
خالد : في الطريق
عبدالله : يلا عاد لا تأخر .. ماقلتلي وائل معاك ؟
خالد : لا والله معاي رامي بس قال بيلحقنا بسيارته .. خذ رقمه ودق عليه ودلّه عالبيت
عبدالله: اوك يالله لاتتاخروا ..
عبدالله يدق على وائل : هلا وائل وينك ياخوي ؟
وائل : بالحاره بس مب عارف وين البيت ..
عبدالله : أوكي اسمع ......
وصل وائل لبيت عبدالله ..
عبدالله : يا حيّا الله من يانا تفضّل ..
وائل : الله يحييك أخيراً وصلنا البيت هههههههه ها وين الشباب محد وصل ؟
عبدالله : هههههههههه زي منت شايف للحين ماحد يا ..
وائل : لا يكون بدري ؟
عبدالله : لا والله إلا الشباب تأخروا .. تشرب شي ؟
وائل : ايه ماي لو سمحت ..
عبدالله : اوك عن إذنك دقيقه وراد ..
جمانه تنزل من دارها وتروح للمرايا اللي قبال الميلس اللي فيه وائل وطبعا ً
ماتدري إنه في أحد يا من أصحاب عبدالله وقامت تصلّح بشعرها الأسود والحرير قدّام المرايا ..
وائل يناظر في أرجاء الميلس وفجأه انتبه لوحده واقفه قبال المرايا
وقال ف نفسه : يا الله وش حلاتها هالبنيه .. ودّي أعرف اسمها ؟؟
شوي إلا عبدالله ينادي : جمااااااااانه .. جماااااااااانه يالخبله وينج ؟
جمانه : هييه وش فيك تصارخ أنا هني قدّام المرايا..
عبدالله : وش تسوّين ؟
جمانه : أصلّح شعري وألبس حجابي طالعه من البيت ..
عبدالله : ماتدرين إنه في أحد ف الميلس ؟
جمانه : وش درّاني .. هييه لايكون شافني ؟
عبدالله : لا ماأعتقد وائل محترم ومايناظر وخصوصا ً إذا عرف إنه في أحد هني ..
جمانه : طيب عبود يلا توصّي شي ؟
عبدالله : سلامتج ..
عبدالله دخل الميلس , وائل يلف ويهه عن الباب
عبدالله : تفضّل ..
وائل : مشكووووور ,, أقول كن الشباب تأخروا ؟
عبدالله : ايه والله .. خلّيني أدق عليهم ..
عبدالله يدق على سامي : ها سامي وينكم ؟
سامي: قوم وفج الباب بسرعه ..
عبدالله : يلا ..
قام وفتح الباب وجا يسكّره إلا خالد يمسك الباب بيده ويقول هيي لحظه ..
عبدالله :.. ههههه معليش مانتبهت لك ..
خالد : ههههه عادي ماحصل إلا كل خير
وفي الجلسه الشباب ضحك ومزح ووناسه ووائل .... في عالم ثااااااني يفكّر بجمانه .. سحرته من أول مره
ابراهيم : هيييه يالطيب .. وين وصّلت ..؟
رامي : اللي ماخذ عقلك يتهنّابه .. ههههه
وائل : ها هههههه لا معكم ..
مازن بابتسامه : منهو اللي ماخذ تفكيرك ؟
وائل : ولا أحد بس كنت أفكّر بشي ..!
يوسف : علينا هالحركات ههههههههه خلّي التفكير وفرفش ويّانا هههههه
وائل ماعرف وش يقول ضحك وسكت ..
ــــــــــــــــــــــــــــــــــــــــــــــــــ ــ
جمانه راحت هي ومروه للميمع اللي اتفقوا عليه .. ود ونوره كانو بنفس الميمع
جمانه : مروه تعالي نروح لهالكوفي نقعد ترى وااااااايد عطشانه ..
مروه : يلا وأنا بعد مثلج ..
وعند باب الكوفي شوب ..
تتصادم مروه وجمانه بود ونوره ..
ود ونوره : آسفين والله ماشفناكم ..
مروه : لا حنا اللي آسفين ..
جمانه : ههههه بنقعد طول اليوم نتأسف يلا أنا عازمكتم في المقهى ..
ود : شنو ؟ واشلون تعزمينا وانتي ماتعرفينا حتى ؟
جمانه : مو مشكله نتعرف مااعتقد بترفضون ..
دخلوا وتعرّفوا على بعض
ـــــــــــــــــــــــــــــــــــــــــــــــ
وفي بيت أبو محمد //
عبدالله : يلا شباب زوروني مره ثانيه
الشباب : إن شاء الله ولا يهمك
الشباب وطلعوا وائل قاله عبدالله اقعد شوي خلّنا نتعرف على بعض أكثر
وبعد الشباب بساعه طلع وائل وفجأه إلا هو وجمانه يتصادمون
وائل : احم نعم أقصد آسف ماشفتك ..
جمانه : ههههه لا أنا اللي آسفه ماشفتك وانت طالع
وائل يبي يطوّل السالفه عشان يسمع صوتها .. : خلاص عيل أنا مسامح
جمانه تضحك بشويش وتدخل البيت مستحيه وسكرت الباب وقالت : ياربي مينو ذا ؟
وائل دخل السياره وباله مب وياه ومب عارف وش يسوّي مرتبك ويقول والله بجد قمر
شغّل الراديو وطلعلته أغنية رابح صقر:
وش هالجمال اللي بدا .. زينك أبد ماله مدى
جمالك أجبرني أقول .. نعم نعم انتي كذا
أبسألك وش هالجنون .. وش هالدلع ياذا الحنون
بالله قلّي من تكون؟ .. ياورد وياعطر وشذا
الكل يشوف ينظرون .. لعيونك اللي يقتلون
إلا أنا قلبي معاك .. من يوم شفتك ماهدا
ــــــــــــــــــــــــــــــــــــــــــ
في بيت أم أحمد
ود رجعت من السوق وراحت لم أمها وتقولها وش صار ف السوق ..
ود : يمه تدرين اليوم ف الميمع كنت أنا ونوره ماشين وتصادمنا ويّا بنتين وحده اسمها مروه والثانيه اسمها جمانه
وماشاء الله عليها جمانه على طول اعزمتنا وتعرّفت علينا وبالحيل طيبين
الأم : زين والله باقي بنات فيهم خير بهالزمن
ود : ايه صج ..
دخل وائل وهو طاير ومسرّح .. لا سلام ولا كلام على داره على طول ..
ود : يمه ؟!! وش فيه وائل لا سلام ولا كلام ؟؟
الأم : مدري عنه جنّه تعبان ..!
ود : مدري عنّه .. يمكن !!
وعلامات الإستغراب على وييهم
وائل اللي مايدري وين الله حاطه .. جالس يفكّر بجمانه !!
وجمانه ؟ بنفس الحاله وقالت بروح أسأل عبدالله عن ذا اللي تصادمت وياه ..
جمانه : عبدالله أقول ؟
عبدالله : قولي خلصينا ..
جمانه : يلا عاد اسمع مين خوّيك اللي يومني دخلت وهو طالع ؟
عبدالله : وليه تسألين ؟
جمانه : ولا شي بس أول مره أشوفه ..!
عبدالله : ذا وائل ..
جمانه بصوت منخفض يقرب للهمس : عيل هذا وائل اللي يا أول واحد
عبدالله : شنو قاعده تهذرين فيه؟
جمانه : ها لا ولاشي .. ايه صح محمد وصل مادريت عنّه ؟
عبدالله : صج محد قالي .. يلا أنا طالع عنده ..
جمانه ترد لدارها ..
ــــــــــــــــــــــــــــــــــــــــــ
وفي الصباح ..
وائل ينزل من داره وراح للصاله ..
وائل : صباح الخير يبه
أبو أحمد : صباح النور تعال ياوليدي أبيك ف موضوع ..
وائل : هلا يبه آمر وش بغيت ؟
أبو أحمد : يبا مايصير جذي يوم تيي ويوم تغيب وش يقولون الناس
مخلّي ولده على كيفه وقت مايبي يشتغل يشتغل ووقت مايمل يطلع لأنها شركة أبوه
وأنا والله ماودّي إلا مصلحتك وماتكلّمت إلا عشانك وعشان مستقبلك ها وش قلت ؟
وائل : على آمر يبه وهذاني أحب راسك
أبو أحمد : الله يوفقك ياوليدي
طلع وائل وراح للشركه وصاير منتظم بدوامه ومايغيب إلا للضروره ..