الشاعره نبض الحياري

حديث قلبين





يقول .. ابعتذر منك عن اللي ناوي احكيلك
أحبك .. بس ما اقدر اكمل دربنا مسدود

أحبك .. للأسف مجبر اقول الكلمه لغيرك !
أحبك أي نعم والله أحبك وش بغيتي زود ؟!

أنا بساير ظروفي واذا لي عمر با جيلك
ولكن لا تخليني على رجوى الوصل موعود

رد ..
......

حقيقه حب ما يوصف مزجت القسوة بلينك
أمل مسلوب والاعظم سعاده حسها مفقود

في عيني صرت وياهم تعادل شرك وخيرك
ما عاد الحلم يجمعنا ولا عاد الغلا مشهود

أحبك .. كلمة ن أجمل من اللي بيني وبينك
أحاسيس ن تبعثرنا عبث ما جمل المقصود

تقول الوصل وانت اللي قطعت الحبل بيدينك
تقول الحب وانت اللي خذلته والجروح اشهود

خل الزعل .. ماله على وصلنا حقوق
ياللي تساوي ضي هالعين خله

تدري بقدرك ما يوازيه مخلوق
وتدري لك بقلبي وطن تستحله

من لي سواك يبعثر الهم يا ذوق
روف بضرير ن ما لقى من يدله

دنيا فسيحة لكن بعيني تضوق
أصبح وامسي ضيم قلبي محله

ليت الليالي مأضرمت حزمة الشوق
ولا غربتني اسهر الليل كله

وليت الفضاء يوسع تناهيت مخنوق
لا صاح جرحه يشتكي ما حصل له

ياصبح بدري



البارحة جابك عنا الحظ يا شوق
وقمت ارتجي ليلي على الصبح بدري

احضنك في عيني ولا ودي افوق
مدري حقيقه كنت .. أو حلم مدري ؟

العالم الله جفت لوصلك عروق
ماغير أردد معك يا طول صبري

اخطف من أبواب الأمل حظ مسروق
وارسم من أحلامي على اللوح وابري

واعيش بك قصة وله غير مسبوق
لين امتلي بك يا مباهيج صدري

تدري بحبك ما يعادله مخلوق
ولا غبت عن بالي لجل فيه تطري

وتدري بقلبي لا تباطاك مخنوق
وكل حرج في زود المواجيع يثري

تعال لي مزن ن لها رعد وبروق
ارو الضمايا حبك العذب وسري

تغيب ارزقنا لكن .. لنا خلاق يكفلها
ونحكي للبشر وأثر البشر بالضيق شماته

يلومونا على الأقدار كنّا من يشكلها
كأن القلب مستطيب لحزنه والفرح فاته

ضحيه للأسف كنا نعزي أرواحنا تلها
وهم دايم يحدون المعنى يعيش مأساته

عليم الله بأوجاع ن عجزنا لا نتغافلها
نكابر والألم يكبر ويخون القلب دقاته

نبكي من الفرقاء ونركض عليها
كن التناقض ميزه بطبع لإنسان

اللي في يده حاجته يحتويها
عمر الندم ماعوض بيوم حرمان

انا الذي اقفيت والعين فيها
أشياء كثيرة ضاعت بكف خذلان

وبقيت في صمتي كسير احتريها
وعيا الزمن ما ردني حيث ما كان

اكذب وأقول النفس طابت مابيها
ولا طاب لي خاطر ولا تم نقصان

تعال وشوف وش حالي
أخايل بعدك ظلالي

وحيد بدنيتي مهمل
وغاب الضحك يالغالي

انام الدمع في عيني
على اللقيا تمنيني

ويضيع الحلم مايكمل
والاقي واقعي خالي

تعال أسكن وسط جوفي
تغذا حبي و خوفي

من أكواب الغلا اثمل
وخلي نجمنا عالي

عزتي لمن هو مثيلي مالقى شط الأمان
كل درب ن يسلكه يرده لنفس المصير

ضايع ن مني دليلي عاثر بنفس المكان
كل يوم اقول باكر يقبل لعيني بشير

طال ليلي والزمن يأخذ ياليت الصبح بان
ولا احزاني توارت .. ( قالت تلاقين خير )

اه يامصعب شعوري قسوة من رحم الحنان
زحمة إحساس ن تلخبط يرسل لقلبي نذير

قلب ن يحبك ما نساك
لو بان لك باسي قوي

معهم وتفكيري معاك
وحدي وطيفك لي خوي

عليت قدرك من غلاك
والغير من عيني يهوي

حر ن مقيد في مداك
ماضنتي وضعي سوي

وحدك .. ولا همي سواك
يا كاوين قلبي كوي

خذني معك نور لمساك
اضوي لك العتمة ضوى

فرحه اذا همك غزاك
املاذك اللي به تأوي

تعكس مرايانا الخفايا وتزري
و الأسئله تبقى في بروازها تدور

لو عين حالي قالت الوضع مزري
القاء بوجهي من صفا نيتي نور

كنت الوحيد اللي في دنياي مغري
واليوم وينك .. غصن الآمال مبتور ؟

في بعثرة وقتي والأيام تجري
اقول يا نفسي ترى الصبر مقدور

آرخي جناح الذل لله واسري
اللي بعفوه ينجبر كل مكسور

إِمرأَةٌ أنا .. يا سَيِّدِي
ٌ هَجَّرْتُ الْأهْلُ .. و الْأَحْبَاب
قَطَعْتُ عَرِقَ الْوُصَلُ
.... أَدميتُ يدَيْ
و عِشْتُ وَحَدِيَ
.... خَلْفَ أَرَوْقَةُ الْغِيَاب
قَدْ حَانَ لِلْقلبِ الْمُعَنَّى .. يَهْتَدِي
مَا الْحَبُّ إلا كَذْبَةٍ
تُدْخِلَكَ أَبَوَّابُ السَّرَاب
اُحْجُبْ عُيُونُكَ .. عَنِ الْهَوَى
و أَنْأَى بِفِكَرِكَ لآ تهَاب
كَمْ غَارِقٍ فِيهِ اِكْتَوَى
كَمْ مِنْ سُؤَّالٍ بِلَا جَوَاب
أَقدَارُنَا تَمَضِّي بِنَا
تَمَضِّي لَمَّا لَا نَشْتَهِي
لَمْ يَبْقَى لِلرّوحِ قوَّى
وَطَرِيقُنَا لَا يَنْتَهِي
مَا الْحَبُّ إلا كَلِمَةٍ
فِي شِقِّهَا الْأكْبَرعَذَاب