 |
 |
 |
 |
|
 |
||||||||
 |
 |
| …»●[دواويــن الشعــراء والشاعرات المقرؤهـ المسموعهــ]●«… { .. كل ماهو جديد للشعراء والشاعرات من مقروء و مسموع وتمنع الردود .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[دواويــن الشعــراء والشاعرات المقرؤهـ المسموعهــ]●«… { .. كل ماهو جديد للشعراء والشاعرات من مقروء و مسموع وتمنع الردود .. } |
|
|
|
|
أدوات الموضوع | انواع عرض الموضوع |
|
#1
09-19-2011
|
||||||||||||||||||||||||||||||||
|
||||||||||||||||||||||||||||||||
|
ديوان الشاعر خالد الوقيت
الشاعر / خالد بن صالح الوقيت من شعراء القصيم ولد في مدينة الرس من أسرة تنتمي للتومان من قبيلة شمر تدرج في السلك التعليمي حتى حصل على البكالوريوس وتعين معلمًا في احدى مدارس مدينة الرس .. يعد الشاعر خالد الوقيت من الشعراء المميزين الذين ينتهجون الاسلوب السلس والسهل الممتنع مع أخذهم بمجامع الإبداع في كثير من طرحهم وكان جده لأبيه من شعراء الرس المشهورين وعنه ورث الشعر كما يقال .. يتميز شاعرنا بقصائد الصيد والرحلات التي يعشقها من صغره حيث كان أبوه رحمه الله من كبار الصقارين في مدينته.. ولا يعني هذا أنّه لم يبرع في غيرها من الأغراض بالعكس فله في الغزل قصائد رقيقة ممزوجة بالشجَن تأسر القلوب .. كما أنّه ضرب في الوصف والحكمة بسهم وافر يشهد له الجميع شاعرنا له مشاركات كثيره في الصحف والمنتديات وفي أروقة الأناشيد والشيلات وهذه أخي القاريء مجموعة من قصائد الشاعر في أغراض متعددة حصلت عليها من المنتديات التي يشارك فيها كالنداوي وغيره وأرجو أن تلقي هذه العجالة بعض الضوء على سيرة هذا الشاعر المظلوم اعلاميا ً كتبه /ابوعبدالله التميمي &شمعات الرجا & شبّيت شمعات الرجا في دجى الخوف ــــــــــــــــــــــــــ وابحـرت مـع همّـي بليّـا جـدايـف وسهرت افتّش للأسـى كـل مظـروف ــــــــــــــــــــــــ واعيـد دولاب السنـيـن الطـوايـف يارب عبـدك حايـر الفكـر ملهـوف ـــــــــــــــــــــــــ يسألـك وانتـه بالمخالـيـق رايــف هذي دموعه سطّـرت جملـة حـروف ـــــــــــــــــــــ ترجم بهـا غيـب الضلـوع النحايـف غنّى بها قلـبٍ مـن الهـم مشعـوف ـــــــــــــــــــ على صدى الحـادي بـروس النوايـف في راس رجمٍ يالفـه متعـب الحـوف ـــــــــــــــــــــ وقفـت والغربـي هبوبـه صـــلايـف وقفت وقفـــه دونهـا يقصـر الشـوف ــــــــــــــــــــ ولا طافها قبلـي مـن النـاس طــايـف لي مدّة اعـوامٍ وانـا حيـل مشغـوف ـــــــــــــــــــــ قلبـي ولمّــــاع الـبــــوارق ولايــف واليوم يوم انه بـدا الصبـح معـروف ــــــــــــــــــــ يـارب جيـــتـك والمـــدامـع ذرايــف يارب جيتـك حافـي الرجـل مكتـوف ـــــــــــــــــــ تقودنـي يمّـك مـــطـايـا الحســـــايـف يـارب جيتـك والنـدم كنّـه سيـوف ـــــــــــــــــــ قطّـع شراييـن الجــــروح الرعـايـف جيتك ولاني بغيـر رضـواك مكلـوف ــــــــــــــــــــ الـى رضـــــيـت الـفـــانيـه للـذلايـف يارب عندك غيب الأسرار مكشـــوف ــــــــــــــــــــ وتدري عن اللي ماحكته الشــفـــايف وهمومي اللي عسكرت داخل الجوف ــــــــــــــــــــ عندك خبر عنها وسامــع وشـــــايف يارب مابي من صروف الدهـر خـوف ـــــــــــــــــ لكنّْ من عقـــب الخطــــا صـرت خايـف & في حرة الشملي & في حرّة الشملي وهاك الشخـــاقيق ..........اللي بها الضـــــــايع يــــودّع حــــــياته سريت واظنون الندم والتــــواهيق .......... تقول حــظك يابن الأجـــــواد هاته وانا الى مـني تحــــــيزمت مـــالــيق .......... آطى علــى صلّ الخــــــلا في صفاته دامي خويٍّ للرجال المــــــــطاليق .......... عندي عــــلى فعل الصعاب استماته معهم تهون المشكله وانطح الضيق .......... واسعد خــــفوقي لا تــــمادت شكاته وامشي دروبٍ ما مشتها الطــــواريق .......... في ماقعٍ تــحــتار وســـــــطه قــــطاته مبطي وحب الصيد وسط المعاليق .......... من عادني طفــلٍ على اول شقـــاته اقنص مع الشيــبان يمّة ســـــواحيق .......... يوم القنـص تضــــــفي علــينا عـــباته واليوم والمقناص ينـــشف به الريق .......... مازلت احبــّــه واســـــــــــتهيــم بفلاته لا ضـــاق صدري بالهموم المخانيق .......... تليت جيـــــبي للشـــــمـــال وجــهـاته يمّ الصــليبه والجبال الشــــــــواهيق .......... اللي بــــها قـــلبي يجمـــــــــــّع شــتاته اسلى مع الـمغرب واعاف المشاريق .......... واحب تكـــيات العِــــــصـير وطـــراته كم ليـــلةٍ فــيها قـــــــهرت التــــعاويق .......... يـــوم الخــلي متهنــــــــيٍّ في مـــباته وكم مــــاقعٍ عسرٍ يغثّ الســــــــواويق .......... أدركت فيه الـــصــيد لحـــظـــة فواته لاقالوا الاصحاب هالــــدرب توهيق .......... كشفت عن عـــــــزم الجــسور وثــباته وسجلت في يومين حـــظ التوافيق .......... وخليت غيري ضـــــايق من ســـواته واليوم لا من شفت لـــــمع البواريق .......... يفــزّ داعي لـــــوعـــــتي مـن ســـباته واغيب عن وعيي من الشوق وافيق .......... ماهـــمّني لو يكـــــثرووون الشــماته مادام قلبي مثل وصـــــــف الزماليق .......... لابـــدّ له مع الهبـــوب التــــــــــفــاته لو اتمنّى طبع بعــض المــــــــخاليق .......... اللي مع الـماضي دفن ذكريــــاته & دربك طوويل & دربك طويل ولاحقَك مع التعب جوع وضما ,,,,,,,,, يالطرقي اللي حدّته على النوى سود الــــظروف إسر ونديمك وحشتَك و الليل و نجوم السما ,,,,,,,,,, وسحم الذياب اللي تربّص من حواليك وتحوف دام ارتمت ضيقة زمانك فوق راسك وارتمى ,,,,,,,,,, من وقعها دمعك على طرس المعاني والحروف بعدك ولا نار العيون اللي تلفّع بالعمى ,,,,,,,,,,, يالشاعر اللي من نشا عن موطن الذلّه عزوف وانا ولو عشت الشقا والدمع من همّي همى ,,,,,,,,,,,, في ساحة الشكوى لهم ماني مفكّر بالوقوف راضي بحكم الله واحفظ ماء وجهي لو زمى ,,,,,,,,,,,,, سراب حظّي والتمع في ناظري لمع السيوف آمنت إن قوس النوايب لا تقصـــّدك ورمى ,,,,,,,,,,,,,, ما ردّته عنك الجيوش اللي عددها بالألوف لكنـــــــــــّها كرّة زمانٍ تبتـــــليــــك وربما ,,,,,,,,,,,,,, تكاملت شمس السعاده عقب غابت بالكسوف ياوجد حالي لليتـــــيم اللي بحر حزنه طمى ,,,,,,,,,,,,,, لاصكّته غبر الليالي وافخت القلب العطوف في ضحكة اصحابه طعونٍ تنتزف منها الدّما ,,,,,,,,,,,,,,, تضطرّه أحيانا يجنّب عن مخالطة الصفوف يستلهم الصبر الجميل ودمعته حـول الحمى ,,,,,,,,,,,,,,,, لا شاف صورة والديه تلوح من فوق الرفوف & لا ياخذك عطف & اهــجر فديـــتك بليّا ذنب وازعــجني .......... واكتب عليّ العـــــــذاب المرّ بفــــراقي وإن كان ودّك مـع الهجـران تحرجــنـي .......... تعال واكشـف خفــــــايـه وانثـر اوراقـي وقل للمخاليـق عـن عيبي وفــــرّجـــنـي .......... لا ياخذَك عطف .. تكفى كمّل الباقي وكفّن معي تضحيات الحب وادرجــنـي .......... في ملحد البين واجعـل رملـي اشواقـي وْلا تلتفت لي مع الداعيـن واسهــــجنـي .......... لا لتفّت الساق يامـــــــــضناي بالســـاقـي واكتب على القبر هذي دعـوة المجنـي .......... بالجاني اللـي قهرنـي وفـــــــــوّر اخلاقـي وعشْ عقبي العمر واقطف زهرته واجني .......... واشرب كؤوس الهوى من مـدّة الساقـي وإنْ ساقتك ذكريــــــــات أيامي لسجني .......... واشتقت عقب البطا والخافـق اشتاقـي عوّد على القبر يالمجمـــــول واخرجنـي .......... وانفث بريقـك وتحــيـي ميّـت ارمــــــاقـي واعرف تراني إليك اليــــوم مـا احوجنـي ..........أنت الوحــــيد الوحـــــيد بداخل اعماقـي & طرّادة الصيد & انا ليا من شفت طرادة الصيد على الجيوب محمّلين العفوشي أجرّ من بين الحنايا تناهيد وأحسّ راسي بالهواجس يدوشي ودي بخوتهم ولو راحوا ابعيد انا غرامي في مخاوى الطروشي لو لامني بعض الرجال المقاريد أهل النميم مثلّمين العروشي ناسٍ تبدّي في قفا الناس ... وتعيد تدور من كثر الهذاريم بوشي وانا احمد الله ماعليّه مناقيد الجيب جيبي والدراهم قروشي ولا عِلْتْ بالدنيا على زيد وعبيد مغنيني الله عن خطاة الدفوشي عذروبي اللي اعترف به هوى البيد هذا الذي لاطراف جاشي ينوشي لا هام غيري بالبني المناهيد هيف الخصاير ضافيات الرموشي فانا هيامي وسط هاك الجراهيد من حرة عويرض الى ام الحنوشي مداهلٍ لو هي وعور وتناكيد ناطى بها سود الحصا والفروشي إلاّ انْ حبـــّه داخل القلب ويزيد حيثه مساريح الظبا والوحوشي اسلى بها لاجيتها باوّل العيد مع رفقةٍ للصيد مثلي عطوشي اهل المودّه ... صادقين المواعيد ما فيهم اللي لاختلفنا يهوشي لو جيت أحسّبها سنينٍ سراميد وانا عليها آسوق غرّ الجيوشي ناخذ عليها بالخرامس تراديد ونرمي بها فوق القفوش القفوشي آثارنا في خدّها والمطاريد مثل الوشوم الثابته ... والنقوشي واختامها ياجِعْلها للرواعيد وعسى عليها ما تكف الرشوشي & ذلول الهمّ & كل ما غمّضت عيني عـن بـلاوي هالزمـن ـــــــــــ واتجهت بعكس ذلك هــاربٍ لاقصـى مــــداي طاردت ظلي ذلـول الهـم تركـض بالرّسَـن ــــــــــــ وابركت قدّام وجهي واشّـرت لي في عصـاي واركبتني فوق نعش اليـاس وظروفي كفـن ـــــــــــ وعوّدت بي مع تباريحي علـى نـــــغمـة عـزاي والمصيبه في رجوعي ينكشف فجر العلَـن ـــــــــــ وانا في حزّة خــــروجي لابـسٍ ستـرة دجـاي اتذرّى عن هـل النمّـات واصحـاب اللِّسَـن ــــــــــ كلمةٍ منهـم تســــــــــوّي مـالا يقوونــه اعـداي وانت ياللي فاتك الأسلوب واغـواك الحسـن ــــــــــ ماطمعت من المكاسب غير في لقمـة شقــاي مارحمت الضايق اللي جاك في ثوب الحـزن ـــــــــــ يشتكي لك وانــــت داله كن همّه كـاس شـاي جيتك اضوى من شعاع البدر وانـوار المـدن ــــــــــ اتبعـــــثر في غلاتك وانـت مـا سِلْـتْ بغــــــلاي شِدْت لك عمري حديقة ودّ واحساسـي فنَـن ــــــــــ وقمت اظلّك من لهيب الشمس في دوحة وفاي باغترابك في شبابك صرت لك احلـى وطـن ــــــــــ تشرق أطياف السعاده في ركونه مـن دفـــــــــاي الوله والـشوق وانفـاس الصبابـه والشجـن ــــــــــ سقتها لك كل ابوها وانت تبخل فـي عـــطـاي بس تدري ! كنت سـاذج يـوم افكّـر بالثمـن ــــــــــ قبل اقارن لـو دقيــــقـه محتـواك بمحـــــتـواي تعشب الارض الغليظه من تهاتيـف المـزن ـــــــــ وانت قلبك مانبت مره رغــــــــــم ديمـة سمـاي ما الومـك والطبايـع قشـر والدنيـا فتـن ــــــــ بالتمس لك عذر وارجِع ماحصل منك لــرداي واعتبر هذا وفـا منـي اذا ماحسنـت ظـن ــــــــ وان اسأت الظنّ فيني عدّ هـــــــذا مـن غبــاي ماني قايل لا رحلت : الصيف ضيعـتَ اللبـن ــــــــ الأكــــــيد اني بقـول اليـوم وينـك يــا هـــــوااي & أنا نديم الليل والذيب والجيب & بايمن وتد وايســـــار حــــمر المراقيب ........... للكيف عندي ياهل الكيـــــــــف طاري متكى ربوعي مدركـــــين المواجيب ............ قطاّعة البــــيدا ازحول الصـــــــــحاري شبّوا لهم نارٍ غدالـــــــــه لــــــواهيب ............ ريح الرتــم فيها كما طيب شــــــــــاري في محجرٍ صكّت عليه الغـــــياهيب .......... ما دوجت به كود ســــحم الضـــــــــواري وصفّوا بها الرسلان كيف الشواريب .......... اللي تنسّيك الغــــــــــثا والعـــــــــــــــزاري وعقب الطرى ساقوا علوم التعاجيب ........... وانا عن الاحــــــــزان مانيـــــــــب داري يروق جوّي عقب الاكدار ويطيب .......... قلبي وكنّي داخـــــلن لاستـــــــــشـــــاري انا نديم الليل والـــــذيب والجيب .......... والصاحــب اللي للمقانيـــــــــص ضــاري مضّيت عمري بين هاك الجواذيب .......... مبـطي وهــــــذا بالحـــــياة اخـــــــتياري تعال واسألني وانا اخبرك وآجيب ........... جواب حـــرّيفٍ بهــــاك المــــــــــحاري من حد تيما تيما هدّاج لكتيب ............. للساحل اللـــي تهتـــــــــــويه القمـاري مثلثٍ كثرت عـــــــــليه المـــــناديب .......... مربّ صـــيدٍ مــــن قديــــــــم العصــــاري ميناس روحي في لــــــــــيال التطاريب .......... اللي على حبّه اجـــــــــادل وامــــــاري ياما سريت بعزّ لـــــيله كما الذيب .......... مالي دلــــــيل الاّ النجوم الســـــــواري من فوق جي إكسٍ يجوب المساهيب .......... والى انتوى صمّ الحـــــــــصــا مايداري نظيف ما سمـــــــكر ولا جاه توظيب .......... ابيض مثل لــــون البرد بالغـــــــــداري يشيل عفشك والحطب و المطاليب ......... وترتـــــاح به لا ضاق راع الســـفــــاري انا زبون مـــــــــــعرّبـــين المناسيب ......... الى نخــــــــوني منتــــــوين المـــســاري خطو الرجال اللي تقافوا على الطيب ........ اللي نبــــــــــاهم بالشــــــــــرايـــــين جاري هم أدّبوني بالمقانيــــــــص تأديب ......... وأخذت مــــــنهم طبــــــــعهم بالــــــبراري وهم لقّنوني من دروس التجاريب .......... مازاد في عـــــــرفي وزاد اعــــــتــــــباري & زمان القساوة & لله درّك يـازمــان الـقــــــــــســاوه .......... علّمتني بقلوب الأصحـاب وشْ لـي كنت أحسب إنّ العمر معهم طـراوه ......... .واليوم ياوقتي كشفت الغَشَــــشْ لـي واجوّي اللي كـان بسـط وحـلاوه .......... وش فيك ما تنعش ولا تنتعـــشْ لـي أوّل وانـا بيـن السّهـــا واللّهـاوه ........ لكنّْ طـرّاش النوايـب طـــرشْ لـي هِبِّيـتْ يالمبلـي بطبـع الشـــــقـاوه ........ .يا ضاحكٍ لي كـل ماجيـتْ هَشْلـي أبْد الوفا .. واخف الجفـا والعـداوه ..... وسِقْ لي مجاهيم المودّه .. وحِشْ لي ورتّل على سمعـي سـواة التـلاوه ....... آيات وحي مسيلمه .. وانتفشْ لـي شرواك لـو زيّـفْ عليّـه ومـاوه ........ .لابد مايمســـي مـن العيـب فَشْلـي عهد النقا .. مـادام جيتـك نقـاوه ....... يوجب عليك بنقوتـك تبتهـشْ لـي لكـن مثلـك مثـل ذيـخ الضّـراوه ...... لهّــــــــــاث مرتـاحٍ .. ولهّـاث مَشْـــلـي ابنتـزح لـو جـزتْ بِيـد السّمـاوه .... واسري دجاها لو يبيت الوحَشْ لـي فقدك تباشيـرٍ .. وقربـك عمـاوه ........ مـا دمـت لفّـاقْ لكيـعٍ ونَشـــْلـي & سفن الهوى & جيتك على مركب الاحـزان ملـــــتاعي .......... عساكر الهم خلـــــــفي والأمـــــــل قِدمي لولاك بحري وتحــــضن بالغلا شراعي ......... احرقت سفـــن الهوى لو سبّبت عدمي يابدري اللي يمدّ بنـــوره اشعـــــاعي ......... انا من الليل مستاحـــــــــش ومنصدمي ياغيمة الحب شــــلّ القيــــــظ مرباعي .......... فيضي على جدبي الملهــوف واحتــدمي ابغى زهور الأمـــــــــاني تنبت بقاعي .......... وتردم على خافـــــقي بسيـاجــها ردمي ملّيت عزف الأسى بقــــــيثارةاضلاعي ......... لاقام يرقـــــص عليها الجــــــاهل الفدمي الله عطاك الحلا من كل الأنواعي .......... ياغاية الحسن يالمطـــــــنوخ يالادمي طرفك ذبحني تراه وشتّت اوضاعي ........... يدمي بنظره ونظــــره يبري المـدمي كل الخـــــيالات غيرك مالها داعي ............تجيني تبني واجــــــــيها بمعول الهــــدمي الحق فديتك قــــــــبل ينعيني الناعي ............ عساكر الهم خلـــــــفي والأمل قِدْمي &أنا دخيلك & في غبّة ابحور القصيـد اللـي يهيـم ابهـا الخيـال ..........أبحرت وهمومي نديمـي .. والهواجـس مركبـي أبحرت والنيّـه جنـوب .. أبحـرت والرغبـه شمـال ......... أبحـرت ودمـوع الـوداع اللـي جبرنـي تسكـبـي أبحـرت مـن سبّـة وليـفٍ يحسـده بــدر الكـمـال .......... عينه مثل عين المها .. وجيده مثل جيـد الظبـي ماينقـصـه عـنـد التحـقّـق لاكـمــال ولا جـمــال ......... كنّـه مخيّـر يـوم خلـقـه وش يـحـب ووش يـبـي لــولاه يستـاهـل غــلا أهــل التغـلّـي والـــدّلال .......... ماقمـت اصفّـق فـي يدينـي لا ذكرتـه وانـدبـي يامتلـفٍ وهـو الضعيـف اقلـوب عزميـن الـرجـال ......... وش بـك تلـذّذ فــي عذابـاتـي .. وتهـنـا بتعـبـي لا طايـلٍ عـمـرك بـهـا .. ولا محـصّـل راس مــال ......... غيـر النّدامـه والـحـزن الـلـي يصيـبـك بسبـبـي قلبـي علـى لامـاك صايـر كنّـه الـجـرف الهـيـال ........ لا ذعـذعـت مـنّـك هـبـوبٍ بالمـشـاريـه يـهـبـي مشتاق لك شوق الغريب لديرتـه عقـب ارتحـال ......... مرّت عليه سنين عايش عيشة الفاقه .. صبـي ناحيه عن موطن هله ضيم الدّهر مع قـلّ حـال ........ ملفـاه بالكربـه وبـي .. ومسـراه بالغـربـه وبــي لاهفهفـت نفسـه علـى نُـود التلاقـي والوصـال ........ شفته على رجـم الأمـل معظـم نهـاره محتبـي انـا دخيلـك مـن غـيـابٍ عــذّب الخـافـق وطــال ........ كنّـه مضالـيـل الجـبـال الـلـي تـوطّـت منكـبـي ماعاد باقي بي صبر .. ماعاد باقي بي احتمـال ........ كلّتْ خطا عزمي .. وعوّم في عيونـي مذهبـي أوّاه لو هبّت رخا .. عقـب القسـا .. سـود الليـال ........أوّاه لـو بـيّـن صبـاحـك يالغـضـي مــن مغـربـي هي امنيـه لـو انّهـا عنـدي مثـل وصـف المحـال ....... الاّ انّـهـا مـاهـي عـلـى ربــي تـراهـا تصـعـبـي سبحان ملاّك الخليقه .. منشي السحب الثقـال ........ ناصر على فرعونها واهل الطّغى موسى النّبي شاحتبـي همـوم الزمـان لوجهتـك يـاذا الـجـلال ......... وجيتـك علـى كفّـي رجـايـه ياكـريـم ومطلـبـي أمرك يسهّلها علـي لـو هـي تحـت ردم الجبـال ........ لو قامت جيوش الشقا قدمي تعسكر .. وتعبي . & ياليت الأيام & ياليت الايـام تاتينـي علـى كيفـي .........أو ليت كيفـي مـع الأيـام متْـــــوافـق يمكنّي ارتاح من بعـض السواليفـي .........اللي يكـدّر شقاهـا هـدوة الخـــــافـق اشوف الايـا م حبلـى بالعجاريفـي ..... في سوقها كسرة الــــــطيّب هو النافـق تعبت فيهـا وانـا فاهــــم وحرّيفـي .......أدرى مشاريـه راع اللـــــــوم وآرافـق لاجيت ابيها على منهاجـي اتحيفـي .......حيفة سريع القنَــــص من رمية التافـق هي اكسرت لي وانا مبحر مجاديفـي .......والليل داجي وموج اهوالـــهـا صافـق وهي اجبرتني على هجر المواليفـي .......وتشبيكة اللي عليــــهم مانـي ابشافـق وهي الزمتني أباسم صاحب الزيفـي ......واسكت عن الميــل بعض احيان وآنافق وهي البستني ثياب البـرد بالصيفـي ...... وخلتني ابدو وانا الهادي كما الـطافـق ضرورة العصر في فقـه العواريفـي ...... لاجله اوافق وقبــــله كنـت مـا اوافـق قالوا لي فتره لما تجلـي الصواديفـي ......ويطيح من عينك الملفــــوق واللاّفـق واقول بعده عسـى غـرّ المراديفـي ...... يبرد حرارة حشـــــايـه وبلهـا الدافـق واقوم اغنّي علـى روس المشاريفـي ........اليـوم كيفـي مـع الأيــــــــام متْوافـق & العيـــــــــــد & الــــناس تفــــــرح نهــــــــار العيـد بالعــيـدي ـــــــــــــــــ لكــــن مثلي تبــــــاعد عن مــــــدى الفــرحـه انا خــــديني بـيــوم الـعـيـد تـــنــــهيـــــــــدي ــــــــــــــــــ واشطون قـــــــــلبٍ تطاول سبّتــــك جــرحه الليل ليــل الأسـى يمــضـــي بــتــسـهـيــــدي ــــــــــــــــــــ والصبح نــفـــسي على الضيقــــات منــطرحه لا تشــــب جمــــرة قســـاك وتجعله بايـــدي ـــــــــــــــــــ يكفيــــــك حالي عن التـــــطـويل في شرحه لا صرت في دنيتك فرحــــــــــــان واسعـيدي ــــــــــــــــــ اشفق على اللي شكى عقبك شقا الــترحـــــــه شمس الجفا غــوّرت بــــــــاقي مــواريــــدي ـــــــــــــــــــ وانا بقـــيظـك ولا دوحــــــــه ولا ســـــــــــرحه معلّـــــق لك قـــــلايد وصـــلك بــجــــيـــدي ـــــــــــــــــــ انت الغــــلا كل ابوه وشــــاعرك صـــــــــرحه لكنّــــــــها بيّـنتْ يافـــــاتن الغيـــــــــــــــدي ـــــــــــــــــ اخطيت في جمعـك اشـــواقــي وفي طـرحـه واليوم والــناس تفـــرح في ضــــــحى العيدي ـــــــــــــــــ يـا وين خالد ..ووين البســط والفــــــرحــه & أهل الهرج & الله يقــــــلع رمســـــكم ياهل الهرج ................ قلعة طمــــــــية من جنوب الجويّه قلعة ودَر ابعد من طـــــريف للخرج ................ يغلق بها معـــــــــــــكم ملف القضيّه ياللي تعنّون الــسوالــــف بلا سرج ................ وتقفون بالقصــــــــــيا جميع البريّه كم خيِّرٍ سقتوه بالمــــــــاقف الحَرْج ................ وكم حـــرّةٍ منــــــــكم دهتها البليّه خطْرٍ بعضـــكم يكسر الباب والدرج ................ لاْخلتْ جــيوبه من كــلام الأذيّه خطا اللسان يفوق نوبٍ خطا الفرج ................ ويصبح خـــطيّه ما وراهــــا خطيّه & الله من ليلٍ & الله مــــــن ليـــــــــــلٍ ســــــريته لحالي .......... متنطّـــــحٍ ســود اللـــــــيال المجاهيم يوم الخـــــليّ في لذة الـــــــنوم سالي .......... وانا كــما السرحان وســــط المعــــاتيم شيٍ من الضـــــيقه وداعٍ طـــــــرى لي .......... خلاّني أسري في دجى الليل واهيم مـــــتعـــــوّدٍ لا كـــــــدّر الوقـــــت بــالي .......... ما ابقى دقيقه في مـــــكاني ولا اقيم أسجّ مافـــــكّرت كيف التــــــــــــــوالي .......... مادامني متضـــــــــايقٍ بالمـــــــقــاديم أعتاض في زهر النــــجوم العــــــوالي .......... اللي بسمايه عن جميع المـــــــناديم الى اعتدل دربي وصـــــارن اقـــــبالي .......... عدّيتهن عدّ البخيل المـــــــــــــــلاليم ياما وراهن سقت طــــــاغي خيــــــالي .......... وسبحت ببحور الشعــــــــور الملاطيم وذكرت لذّات الســــــنين الخــــــوالي .......... اللي غدن عقب الحقــــــيقه هذاريم عايشتهن يوم أقــــــشر العــــــــمر حالي .......... وفارقتهن وأحلى الليـــــــــالي علاقيم راحن وبشفــــــاتي بقــــــايا ســـــؤالي .......... ليش الصحاري تشتكي قســــوة الغيم وليش العيــــون اللي تحـــــبّ الليالي .......... ماتجني الاّ البهذله والمغــــــــــــــاريم كلــــــمة وداع وقلتها بانــــــفـــــعالي .......... لو كنت ظالم في ثيــــــــــاب المظاليم والرجل لو يمشي طريق الـــــعــدالي .......... لابدّ ما ياطى بساط المــــــــــــــلاويم والشاعر اللي خافــــــقه باجتـــــــوالي .......... ماظنتي يبقى مدى العــــــمر ما ليم مادام دربه فــــوق جرفٍ هـــــــــيالي .......... عادي يمسّه من قسا الوقت تثـــــليم والشعر لو هـــو من عزيز الجـــــــلالي .......... وِهْبه ويلقى له من النـــــاس تعظيم الاّ انّ نظــــمي للبيوت الجــــــــزالي .......... ماهو أكيد يحطّم الهمّ تحـــــــــطيم بعض الهمـــــوم أوزانهن كالجــــبالي .......... ما تبيد من نحت القــوافي ولا تريم مبطي أواجه ضيقـــــها باحتـــــــمالي .......... واصبر ما دام الصبر ما ياصل الضيم واقوم أعبّرها جنــــــوب وشمــــــــالي .......... وأشتّت جيوش الهمـــــوم المعاريم مرّه تلاقيني بهـــــاك الطــــــــــــــوالي .......... غرب البريكه بين ســــــود المراجيم أطرد على جيبي خـــطاة الجــــفالي .......... والصيد سلوى للزحول الشـــــغاميم ومرّه تلاقيني بـــــوسط الرجـــــــالي .......... في مجلسٍ ما يجتــــــــويه المعازيم سوالفٍ تحــــــكى وعلمٍ يقــــــــــــالي .......... منها اتّـعلّم سلم الأجــــــواد تعـليم ومـــرّه تلاقــــيني بهاك الســــــــــهالي .......... جنوبي الرس لا عــــــدته المـرازيم أسجّ في دوٍّ مــــن النــــــاس خـــالي .......... وابدع من الضيقه بيوت المـناظيم واقــــــــول ياربي عليـــــــــك اتكالي .......... من شر غيبات الليـــــال المجاهيم & أبشع شعووور & أبشع شعور تحـــسّّ به في حياتك ................... اذا ظلـــــــــمك اللي تحــبه وتغليه يضيق فيك الكــون باربع جهاتك .................. وتشوف عمـــــــــرك واقفٍ عند تاليه مذهول واحزانك ورعشة شفاتك ................. تكشف رغم صمـــتك حكاية تجنّيه ترجيه يلطف بك ويسمع شكاتك .................... ويضيع صوتك في غياهب شقاويه عارف بضعفك لو ظلمك وشتاتك ................... تبكي من اسبابه وترجع وتبكيه لاجل كذا قام ايتــــــشفّى بشقاتك ................... ويكبّر الغلطــــــــه على شان تشفيه قاسي وجرحه بين الأضلاع فاتك .................... يسمّ قلبك بأيّ لحظه ويدميه وانت اتّودّد له بأعــــــذب صفاتك ................ وتحاول تــــــــنال الرضا من معاليــــه اذا طلب له حاجة قلــــت جاتك ................. واذا دعا باسمـــك تنهــــــــضّت لبّيه ياما على شانه زهدت بمـــــــباتك ............... و سهرت ليلك بالســــــوالف تناجيه وياما على شانه تركت امنــــــياتك ................. واجهدت نفسك لاجل يلقى أمانيه لكن مصيبه نســــيته تضــــــحياتك ................. وانك شربت الـمرّ من شان ترضيه وانه خذا من كل عمـــرك طراتك ................ والقى البقيه في جحــيم المشاريه وانك جعلت الأمر في مقـــبلاتك ................ واللي مضى كله رهيـــــنه بأياديه يعني جعلته في حـــــياتك غناتك ............... ومصيرك اللي صعب تــــقدر تخلّيه واليوم وادموعـــــك تبيّن خفاتك ............... من يشفق لجـرحك بقلــبك ويبريه من سبّته عندك تســـــاوى مــماتك .............. وحسّيت عـمرك واقـفٍ عنــــد تاليه تدري متى من جدّ تكره حـياتك ................ اذا ظلـمك اللـي تحبه وتــــــــغليه & مرّ أربع سنين & مرّ أربع سنـــــين ( يايمّــه ) على الفرقى ................... وأحـــــزان قلبي على فقدك مثل ماهي يحرقني البين لاطــــــــال المدى حرقا ................... واجيك والشوق يحيي عزمي الـواهي آقف على القبر هـــــــايم دمعتي غرقى ................... يروي مطرها حشـــــاي ويابس اشفاهي تطوف بي ذكريـــــــــــات ايامنا وارقى ................... على سما الوجد في جوّ الفضا الراهي واعيــد قصـــّة ( يتيمٍ) دمـــــــعته زرقـــــا ................... في مــــوتة (امّه ) تلاشى حلمه الزاهي لـــو يجــــمع الغرب في كفّيــــه والشرقا ................... ما عوّضه عن حـــــنان اشعورها الاّ هي اكبر رصــــيد بحـــياته وانســــــرق سرقا ................... واليــــــوم حزنه عليـــــها غير مـــــتناهي لا هبّت النّـــــــود جـــــاوب نايح الورقا ................... حـزّة غروب الشفَق في طرفه السّـــاهي & هو منوتي & في راس رجمٍ منفرد شرق مـاوان ................... عدّيـت وهمـوم الليالـي تهـاوى وحيد ماعندي من النـاس خِـلاّن ...................غير الطيور اللـي تجـرّ الغنـاوى بعض العرب مرتاح بالـه وهنيـان ...................عن سكّة دروب الرخـا مايـلاوى يبيت متهنّي وانـا ابيـت شقيـان ...................الله لكم ياهـل القلـوب الشقـاوى ماشافني في ليل ساحوق سهـران ...................ملهود وذيـاب الحميمـه تعـاوى من غيبة النجمه الى وقـت الاذّان ...................وانا ونومي ساعةٍ مـا انتخـاوى في وسط جوفي للشقا ألف عنـوان ...................ترفّ بـي رفّ الطيـور النـداوى لا قمت اصدّرهـا تعـود و تبـلاّن ...................كن بيننـا ثـارٍ قديـم وشكـاوى لكن عسى اللي ورّث القلب الاحزان ................... يحنّ من بعـد القسـاوه ويـاوى هو منوتي من بدّ دعجات الاعيـان ...................وهو الحقيقـه والبقيّـه دعـاوى معطيه ربي من الحلا دون نقصـان ...................لمـا تكامـل بالجمـال وتسـاوى اشتاق له شوق الجلاوي للاوطـان ...................لو كان ساكن بالضلـوع الحنـاوى قولوا له اني لشوفته حيل شفقـان ...................كل يوم اجـدّد ذكريـات الرجـاوى متى يواصلني عقب طول هجـران ...................متـى يـداوي عـــــــــــلّـةٍ مـا تـداوى & بعيد المطاريش & يابو سعد ودّع بعــــــيد المـــــــــــطاريش .......... لو كنت مثلي ما تحب الــــــــــــوداعي لكــــــــنّ قلّي لو قنصـــــــــــــنا على ويش ......... والوضع من كل الجـــــــهات امتداعي زودٍ على بعد المــــــــدى ها لـــــتفاتيش ......... اللي تورّيك الغثا والصـــــــــــــــداعي واذا وصــــــــلنا وابترمنا المــــــــــــغابيش ......... ما تلمح الحــــــــذرات لو كنت واعي كنّك ا تدوّرهن بروس المنـــاقـــــــــيش ......... بالليل في هاك الديار الوســـــــــــاعي ما بالشمال اليوم للـــــــــقلب تنــــــعيش .......... وْلابه لذربين الأيـــــــــــــــادي متاعي ما دام ما يسخن حـــــــديد النــــواتيش ......... من الرمي ولا تزين الطـــــــــــــــباعي حتى مداهيــــله رسومٍ معــــــــــــــاطيش ......... عقب الحيا ومخــــــــــضّرات المراعي منوّلٍ نقـــــنص ونعـــــــــــــــــتاش ونعيش ......... على الشبب مهـــــــــــما تقلّ المساعي واليوم في راسي من الوضـــــع تشويش ........ مادام غابت لذتي وانتــــــــــــــــفاعي والذكريات اللي غزنّي كــــــما الجيش ........ زادن دواعي ضيــــــــــــقتي والتياعي الصيد لأهل الصـــــــــيد من لذّة العيش ......... لو راحت الأعــــــــــمار لاجله ضياعي شفهم على الساحل ســــواة الدراويش ......... من قلّة القمـــــــــــــري وكثر النزاعي من ضيقة الخاطر تهلــــفوا على الريش ........ وساقوا على صيد الطيـــــور الدواعي يرشون عمّال الغنم بالبخــــــــــاشيش ........ ويشـــــــــــــترونه بأي مــــــــبلغ يباعي لكن عسى المولى يسوق المراهــــيش ........ ويحيي مداهييل الشمال الجياعي وتعود لذّات المــــــــــقانيص وتـــجيش ........ مشاعر القنّــــــــــــــاص عقب امتناعي & البساااط الأحمدي & ما بقى لك من طرى الدنيا ترى ............ غير راحة بال بالعـــــــــمر المدي عانك الله يوم مـــــــــثلك مادرى ............ عن تباريح البـــــساط الأحمدي ماتوقعـــــــــت المضـــــــيعه بالعـرا ............ وانت لو تســـــري بليلك تهتــدي طيبتك من جد ساقتـــــــــك لورا ............ عند خلقٍ تستــــــــــغلّ الأجــودي جيتهم مثل الغــــريب اللي سرى ............ ضايقٍ وسط الـــــــظلام الــسرمدي ما ارتجي غير التحــــفّي والذرى ............ في حَرا من ذاق نفعي واسعـــدي كنت أظن الناس بالطيب اخشرا ............ والمعاريف الكريمـــــــــه ما تـــغدي لكن الأيـــــــام ما فيــــــــــــها افترا ............ تكشف القلب النقاوي والصــــدي غيّبوا من جيتــــــهم ماقد جـــــرى ............ وانكروا فضـــلي وما مــــدّت يدي أنكــــــروا يوم البـــــــــهاذل والزّرا ............ تقــــتفيهم في شـــــقاهم وتـــحدي وانا مثل الذيب مطغــــــيه الضّرى ............ دونهم يرقب ويرهـــــف ويعــــدي لا نخوني ما اتهــــــنّى بالكـــــرى ............ اتــــحيزم للــــــّوازم وافتــــــــــدي والخـــــتام المـــــرّ من دون امترا ............ طيحتي للقاع من علو الجــــدي كافئوني عن وفــــــــايه بالــــــــبرا ............ واحرموني طيبة امسي في غــدي واتركوني سلـــــــــعةٍ ما تشـــــترى ............ كاسده في سوق حزني وانكــــدي قانعٍ في هــــــدوتي عقب اجترا ............ ناسيٍ ماكان قـــــبلي وابعــــــــــدي أتسائل بعـــــــدها ياهــــــــل ترى ............ كنت أنا المخطي أو الحظ الردي 
 
|
|
| مواقع النشر (المفضلة) |
| الكلمات الدلالية (Tags) |
| الشاعر, النقيب, خالد, ديوان |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| ديوان الشاعر / محمد ابن الذيب "المقروءهـ" المكتوبه | نادر الوجود | …»●[دواويــن الشعــراء والشاعرات المقرؤهـ المسموعهــ]●«… | 54 | 07-23-2011 06:15 PM |
| قصة مؤثر جدا | ضحكة خجوله | …»●[الرويات والقصص المنقوله]●«… | 4 | 03-21-2009 03:17 PM |
| ديوان الشاعر الكبير خلف بن هذال العتيبي | غربة الروح | …»●[دواويــن الشعــراء والشاعرات المقرؤهـ المسموعهــ]●«… | 2 | 02-12-2009 05:02 PM |
| دراسة تحليلية لانشوده المطر | سراب | [ابكتب من قصيدي الوزن وغيرهـ من شعر منثور] | 4 | 01-01-2009 10:45 AM |
| ديوان الشاعر / محمد بن جار الله السهلي "المقروءهـ" المكتوبه | نادر الوجود | …»●[دواويــن الشعــراء والشاعرات المقرؤهـ المسموعهــ]●«… | 0 | 12-18-2008 01:40 AM |
 |
العرض العادي
