رواية / غالبا مايكون الحب قدر لاخيارا/ البارت السابع

-7-


عند رهف

رن جوالها برساله واتس اب

رقم مجهول : السلام عليكم رهف
معك سلطان ال.......

رهف ارتااااعت وقبل ماترد عليه اتصلت على الهنوف وماردت
واتصلت على وجدان

بعد ماردت وجدان
رهف بحماس : وجدااااااان ارسل لي ارسل لي
وجدان بروعه : مييييييين ؟
رهف : سلطاااان
وجدان : مييين سلطان !
رهف طقت راسها بقوه وتذكرت انها ماقالت لوجدان شي : بعلمك السالفه بعدين بس علميني وش اقول
وجدان : بلا استهبال وش اعلمك وانا ماعرف شي وبعدين مين سلطان
رهف : سلطان ال......
وجدان عدلت جلستها : شعرررررررررررفك فيه !
رهف بقلة صبر : يالله وجدان ( وقالت لها السالفة كاملة )
وجدان : شرايك بس تعطيني رقمه اتفاهم معه ؟
رهف : كلي تبن مو وقتك
وجدان :لا لا جد ردي عليه قولي وعليكم السلام اخ سلطان
رهف : لا مابي ارد بسرعه بيحسب اني ميته عليه
وجدان : هههههههههههههههههه ماطق خبرك ردي بس متحمسه اعرف وش بيقول
رهف : اكيد بيعطيني حسابه احول له مبلغ تصليح سيارته نسيتي ان الغلط على سواقنا
وجدان : لامستحيييل ماراح يسويها
رهف : وليه مايسويها
وجدان : احس كذا مره عيب
رهف : لا من حقه انه يطلب عادي
وجدان : طيب ماتلاحظين انك سحبتي عليه
رهف : ايي والله صح يالله برد عليه

ببيت ابو عبدالله

الهنوف من بعد ماكلمها عبدالعزيز وحالتها منقلبه فوق تحت
للان ماحست بأي شعور اتجاه عبدالعزيز
داخلها مليون فكره ولاتدري وش الصح وتحس غلط انها تستشير احد لان هالموضوع مستقبلها ويخصها وحدها
قررت انها تتبع عقلها
ومسكت الجوال فتحت على محادثة عبدالعزيز
وتكتب وتمسح تكتب وتمسح لين قررت ترسل


عبدالعزيز من الجهه الثانيه
ببيت جدته بالملحق جالس فيه لما يلقى شقه

منسدح ويشوف مباراة برشلونة وريال مدريد

رن جواله بنغمة رسالة

الهنوف : مرحبا
عبدالعزيز فز من مكانه وخذ الريموت يقصر عالتلفزيون

عبدالعزيز : اهلين
الهنوف : كيف حالك
عبدالعزيز بأبتسامة : بخير وانتي كيف حالك
الهنوف : الحمدلله

صمت لمدة دقيقة

عبدالعزيز : فكرتي ؟
الهنوف بخوف وهي ترتجف : ايه
عبدالعزيز : طيب اقدر اعرف وش قرارك
الهنوف : اممم عبدالعزيز
عبدالعزيز : عيونه
الهنوف بربكه : ما اقدر ماعليش..
عبدالعزيز : وش ماتقدرين ؟
الهنوف : مافيه نصيب ياولد عمي
عبدالعزيز بعد ماسكت شوي : تامريني على شي يابنت عمي ؟
الهنوف : سلامتك

قفلت المحادثة ونزلت دموعها
انسدحت وتكورت على نفسها وهي تفكر اللي سوته صح ولاغلط

وبالجهة الثانية عبدالعزيز اللي قفل جواله وهو مقهور
هو يشوف انه سوا كل اللي عليه اعتذر منها وش تبي اكثر من كذا ؟
رمى جواله على جنب وطول على التلفزيون على امل ان الصوت يعلى على صوت افكاره



يوم الخميس في بيت الجده عبدالعزيز الضحى قاعد يتقهوى مع جدته وجده

الجد توه يعرف بخبر خطبة عبدالعزيز للهنوف من الجده وعبدالعزيز ساكت مايدري وشلون يفاتحهم بموضوع انه تكنسل

الجد (ابو محمد) : كلم ابوك يجي يخطبها رسمي
عبدالعزيز : ....
الجده ( ام محمد ) : ايه واستعجلو بالزواج نبي نشوف عيالكم
عبدالعزيز بعد صمت : غيرت رايي
ام محمد : هااو ! لييش ؟
عبدالعزيز بكذب : استخرت ربي ومارتحت
ابو محمد : والبنت تدري عن شي
عبدالعزيز يستمر بالكذب : ايه قلت لها وحتى هي قالت لي استخرت ومارتحت
ام محمد: يالله ماتدري وين الخيره فيه
ابو محمد : حاط عينك على وحده ثانيه نخطبها لك ؟
عبدالعزيز : لا
ام محمد : الا ياوليدي بنات عمك وش كثرهم وانت متوظف مابقى لك الا الزواج

بهاللحظه دخل العم خالد

عبدالعزيز : متى ماقرر عمي يتزوج اوعدكم بتزوج
خالد : يالله صباح خير وش زواجه ووش عمك
ابو محمد : ايه والله ياخالد ليه ماتتزوج وتفرح قلبي انا واميمتك
خالد يناظر عبدالعزيز بحقد
ام محمد وهي تمسح دموعها : ايه وانا امك طاابتك انت اشر بس على البنت وابشر الحين اقوم اخطبها لك
خالد : استهدي بالله يمه انا مابعد لقيت وظيفة هنا ولابعد استقريت
ابو محمد : وظيفتك موجودة بالشركه من اول ماتخرجت بس انت تدور التعب رحت كملت برا
خالد : لايابوي انا بتوظف بشهادتي وبالمكان اللي اطمح له
ام محمد : طيب ميخالف نخطب لك والملكة والزواج عقب ماتتوظف
خالد يحاول يغير الموضوع : الحين فكرو بزواج عزوز وهنوف بعدين لاحقين علي
عبدالعزيز نزل راسه بحزن كل ماحاول ينسى الموضوع يرجعون يذكرونه فيه
ام محمد : ماعاد فيه زواج
خالد : ليييه ؟
عبدالعزيز بعصبيه : صلينا استخاره ومارتحنا كلنا خلاص !
خالد : الله يعوضك ويعوضها لاتضيق صدرك
عبدالعزيز يقوم وهو ينفض ثوبه : بطلع انا تامروني على شي ؟
كلهم : سلامتك
عبدالعزيز : فمان الله

طلع ومافيه الا كلمة هنوف في راسه مو قادر ينساها

ركب سيارته ومشى للمجهول ,,


يوم الخميس الليل كالعادة الكل مجتمع ببيت الجده

بغرفة الجلوس كل البنات قاعدين والصاله فيها الحريم

وجدان وهي ترقص على اغنية راشد وبنشاز : ان حكككى غصب عليييييهم يسكتووون وان سكت تسكت معه كل الرياااااض
الهنوف بصراخ : اسكتيي اسكتي خلاااااااااص ذبحتييييينا والله بيهج ان سمع صوتك
وجدان تكمل : يااااااااااجمااااااعه يوم سلهمممم بالعيوووووون
الهنوف تطب عليها وتسكر فمها والبنات يضحكون
غدي : حرام علييييك خليها تغني طفش مافيه فعاليات
جمانة : من جد ليت مشاعل وهيوف فيه يغيرون جونا شوي
نوره : من جد او ليت عمتيييييي نورة ترجع من امريكا مشتاقة لها ولبناااتها
وجدان : يووووه نسيت ان عندي عمه اسمها نورة

عمتهم نورة ام فهد من 10 سنين مغتربه لظروف عمل زوجها ودراسه عيالها
وتجي السعودية بالاجازات بس

عيالها

ماجد 29
سيف 26
سعود 25
ريناد 23
ريوف 21
ريما 19


الهنوف : شرايكم نتصل عليهم ؟
جمانة : تتوقعون كم الساعة عندهم ؟
وجدان : يمكن 1 الليل كذا
الهنوف : بتصل واشوف يارب مو نايمين

اتصل الهنوف على ريوف مكالمة فيديو
ردت ريوف بسرعة وهي تصاارخ

ريوف بحماس : اهليييييين
البنات كلهم تجمعو على جوال هنوف
الهنوف : هلاااااا والله كيفك
ريوف : تمااام انتم كييفكم اشتقققت لكم وربي
وجدان : وحنا اشتقنااالكم والله
نورة : شخباار رنودي وريموو
ريوف : تمااام يسلمون عليكم
الهنوف : متى تجوووون والله اشتقناا لكم مرة مرررة
ريوف : الحين اختبارات عندنا يعني كذا شهر او شهرين
وجدان : يوووو والله من زمااان عنكم
ريوف : والله ودييي انا ارجع بس شسوي , اي انتم شخباركم بعد وينكم الحين ؟
نورة : ببيت جدتي
الهنوف تحط الكاميرا الخلفية وتصور لها الغرفة والبنات
ريوف : اخخخخخ مرره مشتاقه
نورة : ويين ريناد وريما
ريوف : نايميين

يدخل ماجد على ريوف

ماجد : شتسوين
ريوف : اكلم بنات عمي
ماجد : يسمعوني الحين ؟
ريوف : اييي
ماجد : شخباركم يابنات العم
البنات بأصوات متفرقه : تمام ,بخير
الهنوف : انت شخبارك
ماجد : والله تمام بس مين انتي ؟
الهنوف : انا هنووف
ماجد : الله الهنوف اخر مره شفتك كنتي كبر اصبعي
الهنوف ماتت ضحك : ههههههههههههههه ياشيينك
ماجد : هههههههههه شخبار جدي وجدتي واعمامي
الهنوف : بخيررر يسلمون عليييك
ماجد : شفيهم سكتو اللي عندك
الهنوف : مستحييين منك
ماجد : الله يالدنيااا كنت اجمعكم واوديكم البقالة والحين تستحون مني

كملو مكالمتهم مع ريوف وماجد


بعد ماصارت الساعة وحدة الكل جالس يتجهز عشان يرجع بيته
والبنات قررو ينامون عند جدتهم

بجهه غدي وجمانة يتابعون يوتيوب
ووراهم نورة نايمة
وبالزاوية الثانية وجدان وهنوف يسولفون بصوت واطي

الهنوف : انا خايفه اكون جرحته
وجدان : احس انك تسرعتي بالقرار مره خصوصآ انه كلمك وفهمك كل شي
الهنوف : مادري وجدان مره خايفه واللي خوفني اكثر انه بالرياض الحين يعني بصير اشووفه كثير
وجدان بضحك : تدرين انه ينام بملحق جدتي
الهنوف بصدمه : كذاااااااابه
وجدان : والله
الهنوف : يالييتني مانمت هنا
وجدان تطقها : كلي تبن بس ( وتحاول تغير السالفة ) تدريييييين من كلم رهف واتس اب ؟
الهنوف : مييين
وجدان : سلطااان ال....
الهنوف : احللللفي
وجدان : والله تخيلي سواقهم الغبي صدم سيارته واخذ رقمها عشان تصلح سيارته
الهنوف : يععع قال لها تصلح سيارته ؟!!
وجدان : لاااا هي اجبرته ياخذه عشان تصلحها وتخيلي كلمها واتس اب
الهنوف تحط يدها على قلبها بخقه : ياقلبييييييي حب من اول صدمه
وجدان : الحين بيلزخها كم الف وانتي تقولين حب
الهنوف : عادي يرجع لها الفلوس بالمهر
وجدان : ههههههههههههههههههههههههههههههههه

نرجع لرهف اللي دارت بينها وبين سلطان هالمحادثة

رهف : اهلا اخ سلطان
سلطان : اهلا فيك
رهف : اذا ماعليك امر ممكن تعطيني رقم حسابك عشان احول المبلغ
سلطان : لا رحت اليوم اشيك على السيارة مافيها الا مجرد خدش بسيط وعدلته انتهى موضوعه
رهف : ولو بكم سويته عشان احول لك المبلغ
سلطان : والله مايسوى
رهف ماحبت تطولها معه : اوكي فمان الله
سلطان تحطم : فمان الله

بعد 3 ايام مرت على ابطالنا سريعة

بالشرقية ابو سلمان وصله خبر ان زواج عبدالعزيز تفركش ومعصب

ابو سلمان : الرفض منه ولامنها ؟
ام سلمان : كلهم مارتاحو
ابوسلمان : ولدك كان مبسوط وطاير ويقول ابي الزواج بدري وشلون فجأه مارتاح !!
ام سلمان : والله مادري يابوسلمان بس يقول انه استخار وما ارتاح
ابوسلمان : كان اكثر واحد فرحان وقايل لي انه مستخير ومرتاح وش غير هالكلام ؟
ام سلمان : يمكن استخار مره ثانيه ومارتاح
ابوسلمان : ارتاح مارتاح مايهم ياخذ بنت عمه يعني ياخذ بنت عمه وش موقف اخوي مني اذا درى بهالموضوع
ام سلمان : لاتغصبه على شي يابو سلمان الزواج قسمه ونصيب
ابوسلمان : ان ماتزوجها ماراح اكون راضي عليه لادنيا ولا اخره
ام سلمان جلست تصيح بقله حيله
اتصل ابوسلمان على عبدالعزيز

نروح لعبدالعزيز اللي قفل من ابوه وضايقه فيه الدنيا
كلمه ابوه ترن براسه ( ان ماخذت هنوف لانت ولدي ولا اتشرف انك ولدي)
كان راح يقول له ان الرفض جاي منها بس خاف انه يصر على الموقف اكثر وسكت

مسك جواله وارسل لهنوف : مساء الخير بنت عمي اذا فضيتي فيه موضوع ابي احاكيك فيه

الهنوف كانت فاتحة موقع تسوق وتحوس فيه
جاها صوت رسالة قامت اخذت جوالها

الهنوف بقلبها : وش يبي هذا

ردت عليه
الهنوف : سم
عبدالعزيز اللي استغرب من ردها السريع : اقددر اتصل عليك ؟
الهنوف : بصفتك مين ؟
عبدالعزيز : بصفتي ولد عمك
الهنوف : مانكلم عيال عمنا الساعة 11 الليل
عبدالعزيز : الموضوع مايتحمل تأجيل وصدقيني ماني شفقان على مكالمتك بس لازم تعرفين لانه شي يخصك
الهنوف انقهرت من جملة ( ماني شفقان على مكالمتك ) وسكتت دقيقة بعدين كتبت : بتصل عليك
عبدالعزيز سبقها واتصل

دقات قلبها وصلت مليون وهي تشوف اسمه على الشاشة
اول مره تكلمه

ردت

عبدالعزيز بهدوء : السلام عليكم
الهنوف بصوت واطي : وعليكم السلام
عبدالعزيز : مابي اطول عليك بس ترى ابوي قال بتاخذ الهنوف ولا ماراح اكون راضي عليك واتوقع انه بيكلم ابوك هذا اذا ماكان كلمه وخلص
بيحطونا بموقف بايخ لذلك خلينا نوحد كلمتنا انا مابيك وانتي ماتبيني
الهنوف جرحتها كلمة مابيك وسكتت تنتظره يكمل كلامه
عبدالعزيز يسترسل : فيه حل اني اتزوجك واطلقك وهالحل اسهل من الاول بالنسبه لي
الهنوف : م ا ا ب ي ك
عبدالعزيز : حتى انا مابيك ترى لاتتوقعين اني متصل اقنعك مااتصلت الا لان ابوي زعل وصراحه مايسوى اني ازعله عشان موضوع تافه كذا
الهنوف بدت تبكي من كلامه
عبدالعزيز سمع صوت شهقاتها وحس انه وقح شوي وسكت
الهنوف : مابي اتزوج الحين
عبدالعزيز : لو تبين ملكه بس بعدين اذا نسو الموضوع ننفصل
الهنوف بقله حيله : تمام .. بس لو سمحت ممكن نأجل المووضوع لبعد شهر لين اخلص اختبارات
عبدالعزيز : اوكي .. فمان الله
سكرت بدون ماترد عليه

عبدالعزيز مستغرب من رفض الهنوف له وبنفس الوقت مقهور لان الموضوع اخذ اكبر من حجمه
والهنوف برضو ماتعرف ليه هي رافضته
قامت تصلي وتدعي ربي انه يكتب لها اللي فيه الخير

من بكرة

ببيت رهف عازمه الهنوف ووجدان ويتناقشون بموضوع عبدالعزيز

رهف : ياربيه عبدالعزيز على كثر ما اسمع طاريه ماقد شفته عندكم صورته ؟
وجدان بضحك : يمكن عند هنوف مدري
الهنوف : وجع من وين تجي عندي بس تراه ببيت جدتي غريبه ماشفتيه !
رهف : جدددد ( بعدين تذكرت ) اييييه امس تركي يمدحه يقول خلص اشتراك سيارته وفزع له وعزمه عالقهوة بس قهر مادريت انه هو نفسه عزوز هنوف
الهنوف : صار عزوزي ماشاءالله
رهف تجاهلتها : ماقلتو لي طيب حلو ولالا
الهنوف : حليو
وجدان : لاوالله حلو فيه شبه من ماجد ولد عمتي
رهف : شعرفني بماجد ولد عمتك اتوقع ماقد شفت الا عمك خالد وعبدالله اخو هنوف
وجدان : فيه شبه شوي من عمي خالد بس هو احلى
رهف : سوري هنوف بس وش بيصير اذا كان احلى من خالد ؟؟
تكفين ارفضيه باخذه انا
الهنوف : ممكن تقفلون على موضوعه
وجدان : طيب شرايكم نطلع عشان هنوفه تغير جو وابي اغراض شوي من السوق
رهف : يلا اي مول
الهنوف : مادري مالي خلق بصراحه
وجدان : يلا عاد هنوفه عشاني
رهف : يلا وبعزمك عالغدا على حسابي وش تبين اكثر من كذا ؟
الهنوف وهي تحاول تخفي حزنها : ههههههه يالله اذا كذا اوكي
رهف : اووف ماتوفر ههههههههههههههههه

لبسو عباياتهم وطلعو عند الباب ينتظرون السواق يشغل السيارة

وجدان : شررايكم نسلم على جدتي
الهنوف : لا روحو لحالكم
وجدان : لاخلاص اذا ماراح تروحين مابي اروح رهف روحي لحالك
رهف :هيه ركزو جدتكم مو جدتي معكم
الهنوف : هههههههههههههههههههههههههههه
وجدان : بس والله امي بتضربني لو درت اني جايه قريب من بيتها وماسلمت عليها
الهنوف : خلاص اوكي نروح ومنها تتعرف جدتي على رهف وتشوفها

راحو لبيت جدتهم وكالعادة كان مفتوح قليل يسكرونه

كانت جدتهم وخالد بالصالة يتقهوون

دخلو وجدان والهنوف ورهف رجعت ماقدرت تدخل لان خالد موجود

خالد : حيا الله بنات اخواني
الهنوف ووجدان سلمو عليه وعلى جدتهم وجلسو
خالد : اخبااركم
وجدان والهنوف : تمااام
وجدان : وانت اخبارك

قعدو يسولفون ربع ساعه

خالد : صح غريبه وش جايبكم !
وجدان تطق راسها : رهففففف نسيتهااا
الهنوف : ايييييي والله صح ويينها !
خالد : الله يقلعكم جايبين معكم احد ؟
وجدان : والله كانت ورانا جايه بتسلم على جدتي بس مدري وين راحت
خالد قام : جيبوها الله يفشلكم بطلع انا
ام محمد : ياويلكم من ربي اكيد انها بالحر
الهنوف قامت وطلعت تدورها
كانت رهف جالسه بالحوش على كرسي
الهنوف : اسفففه وربي
رهف : لااا بدري !
الهنوف : والله شفنا عمي خالد ونسيناك
رهف : عذر اقبح من ذنب
الهنوف : تعالي ندخل
رهف : وعمك ؟
الهنوف : قايم بيطلع

بهاللحظة طلع خالد من الباب وشافهم جالسين
خالد وهو منزل راسه : حيا الله صديقه الهنوف ووجدان اعذرينا بناتنا قليلات ادب مادرينا انك فيه والله
رهف منزله راسها ومستحيه
خالد يسترسل : انا بطلع خوذو راحتكم يالله فمان الله

طلع خالد

رهف بصوت واطي : عمك حلوو
الهنوف ماتت ضحك : هههههههههههههههههههههههههههههههههه نسيتي الحر يوم شفتيه ؟
رهف : لاوالله مانساها لكم تعالي بس ندخل
الهنوف دق جوالها بهاللحظة : ادخلي بكلم بعدين اجيكم
رهف : تمام


دخلت رهف

الهنوف ردت على صديقتها

الهنوف : هلااا والله بهالصووت .. تماام طمنيني عنك انتي ؟ .... والله مدري بس ماتوقع اداوم خلاص الاختبارات قربت بعتكف بالبيت ... ايه خلينا نجتمع بآخر يوم اختبارات لان اتوقع ماراح نكون بالرياض بعدها ... مادري اتوقع نروح المزرعه لان عمتي بتجي الرياض ... عندك نيوف ؟ عطيني اكلمه تكفين ... هلااا حبيبي ... والله انا اشتقت لك بعد ... والله كنت مشغوله ولامانسيتك وانا اقدر انسى نايف ؟ ( وهي تضحك )

طبعآ هنوف ماكانت تدري بالشخص اللي واقف عند باب الشارع بيطلع وسمع مكالمتها من لما قالت ( انا اشتقت لك بعد ) فتح الباب وطلع ورقعه بقوه
هي فززت

الهنوف : نيوف حبيبي بسكر الحين قل لريهام بتصل عليها الليل .. يلا باي

الهنوف قفلت وهي تدعي على اللي سكر الباب بقوه
الهنوف بقلبها : حسبي الله عليه روعني
ودخلت عند جدتها والبنات


ماتدري عن عبدالعزيز اللي ركب السيارة وهو مصدوم
عبدالعزيز بقلبه : يعني كل هذا عشان اللي تحبه ! ونايف بعد ! ماحترمت اللي اسمه تقريبا مرتبط بأسمها ! انا اوريك يالهنوف اورييك

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

جزاك الله خيراً على هذاالمجهود الرائــع
سلمت أناملك لروعة ذووقك
يسعدك ربي ويحقق أمانيك
🌼🍂🌼🍂🌼🍂🌼🍂

يسعدك الله على الموضوع
وعلى اختيااااره الا كثر من رووووعه

شكرا يعطيك العااافيه

نجمكم

حضورك شرف لي
نورت أخي الكريم
مجنون قصايد

حضوركي شرف لي
نورتي عزيزتي
شموخ

حضورك شرف لي
نورت أخي الكريم
نجم الجدي

سلمت الآكف ومَاجلبت
إبداع دآئم وتميز مُستمر
لا عدمنَاك
قوافل شكري وتقديري لك

حضوركي شرف لي
نورتي عزيزتي
ملاك

سلمت يمنآكـ على مآحملتهـ لنآ
موضوع عآلي بذوقهـ ,, رفيع بشآنه
مودتي