 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
05-04-2019
|
||||||||||||||||||||||||||||||||
|
||||||||||||||||||||||||||||||||
رواية/ وأني عن بحر هواكِ نازح/البارت التاسع
9
مدخل "إذا تـــبـــدّل قـلـبٌ كـنـــتَ تـألـفــه فارفقْ به , ولاتزدْ في اللوم والعتبِ من جار في البعد فالأشواق تُرجعه لو يصدأ القلب يبقى الشوق كالذهبِ" -د.محمد المقرن """""""""""" دخل الإستراحة وراه وهو الي ماتكلم معه طول الطريق طارق التفت له :لاتقولي انك مصدق انك ولده عقيل :لا طبعًا ..امي قالت لي ان لي اخوين واختين متزوجين كلهم وعيالهم بعمري ..وهالشي ماينطبق على عبداللطيف هز راسه بارتياح ومشى بيدخل المجلس :مشكلتنا الحين ودق ..ماهي راضية تستوعب ..راحت صدقته هو دخل وراه :ما وريتها الشهادة ؟ طارق :الا شافتها وصدقت ..لكن حط ببالك ان عبداللطيف غاسل مخها ومخ العايلة كلها ..كان معها بكل وقت وبصفها دايم ويعادي أي احد يأذيها تتوقع يوم اجي انا من برا وانت الي توك تطلع ونقنعها انه غلط بتصدق ؟ لا طبعًا ..بنتعب معها شوي ..المهم شفت الأوراق الي جبتها معي ؟ بنمسكها كلها ونقراها عدل ونشوف وش تطلع ..اكيد بنفهم كل شي عقيل :يلا اجل ابتسم واشرله على شنطة بجمب الباب :جبها تكفى قام بسرعة وجابها له فتحها وطلع الأوراق كلها والاختام وكل شي ونثرها قدامهم حاول طارق يفهمها ويقراها بس ماقدر ..مصطلحاتها كانت كبيرة عليه خصوصًا وتعليم امه كان اساسيات فقط انتبه له طارق انه مو فاهم :عقيل لو حاس انك ماتقدر تمسكهم رح تفرج التيفي ..ضيع وقتك شوي حس بضعفه وعجزه ..ترك كل شي بهدوء وقام للتيفي يشغله مثل ماعلمه خورشيد قبل """""""""""" وقف قدام الاستراحة وتأكد من اللوكيشن الي ارسله محمد ثم راح يدور موقف لسيارته وقفها قريب وطلع وتكى على الكبوت وهو ينتظر خمس دقايق وجاه واحد وقف قدامه ناظر فيه من فوق لتحت لابس شورت جنز وتيشرت احمر بدون محد ينتبه حرك رجوله وسوا دائرة بالأرض والي قدامه ناظر بعيونه وحط يدينه بجيوبه وسو برجله اكس فهم انه واحد من القروب الي مرسلهم حسان بهدوء :أبو ماهر وينه :اسمك مشيول من المهمة ..فهمت انك هنا بشكل غير رسمي رص على اسنانه :المهمة محد متممها غيري ..عندك إعتراض هز راسه :لا عمر :حلو ..ابدخل انا وادخلوا وراي ..مايحتاج ارجع انبه ان سألوك من موجهك قل عمر :حاضر تركه ومشى داخل للإستراحة دخل وهو حاط يدينه بجيوبه كان لابس بنطلون اسود سكيني وتيشيرت ابيض وفوقه جاكيت جلد جملي وبوت جملي ولام شعره بربطة ومعدل بالعوارض وقف عند الي واقفين بالبارتي ومد يده كانو مسوين حركة انهم يختمون على يد الي يدخلون اذا كان موجه له ختم احمر واذا كان لا فيدفع مبلغ ويدخل بختم ازرق ويذكر اسم موجهه قبلها دخل وهو يتأمل بالختم الي على ظهر يده ورفع راسه يناظر حوله نفس وضع البارتي الي راح الفرق ان هذا صاخب اكثر مطفين اللمبات ومشغلين الليدات ولونها بنفسجي وبينك وأجهزة تطلع دخان ومشغلين الأغاني لأخر حد كان ازعاج لأخر مدى تلفت حوله يدور محمد وحس بأحد يدقه من ورا التفت وشاف سحر ابتسم لها وهي ابتسمت زيادة قربت منه ولصقت فيه وسحبت ياقة جاكيته ناحيتها وقالت بأذنه : ماتوقعتك بتجي ..تأخرت لف عليها و وقرب من اذنها :انشغلت شوي لكن لحقت لفت عليه :امش معي بعرفك على خوياي ..وترى محمد يحتريك ناظر بيدها الي مدتها ناحيته ومسكها بدون تردد سحبته معها وراحت لغرفة واقفين عندها بودي قارد وخروا لها ودخلت وهي باقي ماسكة يده الغرفة كانت عبارة عن مجلس بكنب ابيض جلد ومن عند الباب طاولة بيضا نص دائرة وعليها المشروبات والاكواب ..ولفت عمر الحشيش المحطوط مع المشروبات ناظر باللي جالسين كانو محمد واخوياه وعماد بعد كان موجود وقف له محمد :تأخرت ..فاتتك فعاليات البداية :وش فاتني محمد :تحدينا الشباب الي يشرب اكثر بدون مايفقد يفوز عمر :اشوى فاتتني اجل ضحك :ليه عمر :يخرب بيتك توي جاي من المستشفى بعد مشروبك ذاك اليوم وانا غارق بالمراجعات سحر :محمد لو سمحت ..اتركه براحته محمد ناظر بعمر :انت واسطتك صارت قوية ..سحير ماشاركت بالتحدي لأنها كانت تحتريك ابتسم والتفت لها :ايش مقابل هالانتظار محمد ضحك :اننتتت كذاا تعجبننني..والله محد عرفلك غيره رفعت سحر حواجبها :كذا وضعكم اجل ؟ تركت يد عمر وتكتفت :يلا انقلع معد بنتظرك محمد :اوووه ..بسرعة راضيها بسسسرعة سكت يوم شافهم جادين محمد يترقب شلون يراضيها وهو مبوزة ولافة وجهها توتر واحتار ..شيسوي يعني التفت لعماد شافه مو معه والتفت للطاولة بسرعة توجه لها وسحب سيجارة حشيش ورجع لها بسرعة ومدها ناحيتها وطلع لها من جيبه ولاعة صفر محمد وهو يشوف سحر تبتسم وتاخذ السيجارة وتحطها بفمها وتقرب من عمر عشان يولعها لها ولع لها وابتسم محمد :خلاص نقول تم التشبيك ؟ سحر :يا كلب ماتقولها قدامي محمد :انا صريح حبيبتي عمر :لاا ..هنا احا محمد ناظره من فوق لتحت:بدينا؟ ترا توكم يا كلاب بهاللحظة اختفت أصوات السماعات من برا ودخلوا البودي قارد من برا باتجاه محمد :فيه مداهمة ياطويل العمر على طول عمر توجه للباب يبييقيم الوضع بس كان فوضى لدرجة ان في ناس دخلوا الغرفة لهم بسرعة التفت لسحر الي مرعوبة ومع الزحمة ضيعت ركض لها وسحبها معه وركض ورا محمد ورجاله الي طلعوه من الشباك ركض لسيارته وصرخ عليها :بسرعة اركبي ركبت ورا وهو ركب وحرك بسرعة وهو يرجع ورا بالريوس """""""""""" بعد الاحداث الي تفجرت بالمجلس اخذوا عبداللطيف للمستشفى وهناك كانت ودق ملازمته ولا رضت انها تفارقه ابد بالرغم من الدلائل الي عرضها عليها طارق الا انها ماتبي تصدق شي ابد وشي بداخلها يقولها اوقفي معه حتى لو كان ظالم ..اكيد له مبررات باللي حصل انتبهت له يوم فتح عيونه بهدوء والتفت يناظرها قربت منه ومسكت يده :الحمدالله على السلامة ..ماتشوف شر ابتسم لها وشد على يدها :الشر مايجيك يارب ودق :وش تعبك هالكثر ..لهداالدرجة شوفة ولدك اثرت عليه فز وتلتفت :هو وينه ؟ ودق :مشى مع طارق وماعرف وين راحو زفر بتعب والتفت لها :ودق ..انا اعتمد عليك اكثر من اعتمادي على راكان ..خذي مفتاح سيارتي وابيك تروحين تجيبين لي عقيل ..تكفين طارق مهبول واخاف يجرم فيه هزت راسها :ابشر ..من يفج الفجر بروح اجيبه لك لا تخاف ابتسم لها ورجع يناظر السقف :من يتوقع اني بألقى ولدي اخيرًا ..بعد هالـ19 سنة الي فارقته فيها ناظرها وعيونه مدمعة :قرت عيوني اخيرًا ..والله يسامحه ابوي ودق :امين يارب رجع يناظر السقف :الحمدالله حمدًا كثيرًا طيبًا مباركًا فيه ناظرته بتردد :ممكن تفهمني ..طارق قالي شي والي اسمعه منك شي ثاني التفت لها بحدة :وش قالك هالمخثرد بلعت ريقها من نظرته :قالي ان عقيل اخوي التوأم وانه شاف شهادة ميلاده بعزا ابوي الله يرحمه وسألك وقلت له انه اخوي وانه توفى بوقت ولادتنا مع امنا رفع نفسه وعدل جلسته :انتبهي من طارق ياودق ..هذا نجس ووصخ ..انتي تدرين انه ماراح برا يدرس ؟ استغربت :اجل؟ عبداللطيف :كان يتعالج من المرض النفسي الي فيه ..شهادته وصورته بالروب كان مجرد غطا حتى الناس مايتكلمون ..انتي تعرفين هنادي شلون ماتحب الحكي ينقط عليها بالشينة انصدمت :صدق ؟؟ مو باين عليه عبداللطيف :لأن مرضه النفسي اجتماعي ..حقود هالولد مايحب يشوف احد مرتاح ..والله ياقبل مايسفرونه كان ملعوّز الدنيا معه ومتعب اهله كلهم ..وامه مثل ماتشوفين مرتاحه وهمها انه هو مرتاح ودق حست انها فهمت تسلطه عليها :بس مايصير كذا ..ذا ورا ماينحط بمصحة ممكن يقتل لا قدر الله عبداللطيف :لاهو جبان لا شافك قوية وما راح يقدر يمد يده ..لكن بنعلمه شلون يلعب عليك ..خليك معي ومارح يقرب منك صدقيني ضحكت :الحين اروح له اجيب عقيل ولا ما اروح عبداللطيف بنظرة :لا خلاص..انتظري شوي..ببالي أوقف المهزلة الي هو فيها ..خليها بعد بكرا :وش بتسوي التفت لها :انتي معي ولالا ودق:الا معك ..لين اخر نفس بالسالفة ابتسم :اجل خلاص..ببلغك بكل شي دخل راكان عندهم وبدون مايعطي ودق وجه :يبه سامحني طولت عليك ..بس وصلت العنود والعيال البيت وجيتك قام عبداللطيف من السرير:مايخالف ..عطني جوالي ادق على هنادي ..خربنا حفلة بنتها ولازم نعتذر طلع جواله من جيبه وناظر ودق بطرف عينه ثم التفت لأبوه انتبهت له ودق بس ما دققت ..اخر اهتمامها راكان :عمي عبدالباري مصر تجي عنده ..يقول يا تجيه او يجيك عبداللطيف:كلمه يجينا .. نجلس ونفطر مع ودق وش نبي زود دامها عندي """""""""""""" اول ماحس انه ابعد عن المنطقة وقف السيارة على جمب رفعت راسها برعب :بعدنا خلاص؟ التفت لها :بعدنا ..وين بيتك اوصلك له ؟ هزت راسها :لا ..ودني بيت محمد ..هناك بنتجمع بعد الي صار حرك السيارة :وين بيته سحر :حي الزخم بيت العميد عبدالله الفليجي بلع ريقه من الاسم ..هذا اسم عميدهم الي ماسك الموضوع معهم مسك الخط السريع الي يودي الضايروتنحنح وهو يحاول مايبين ذهوله :مانتي متعودة على المداهمات ؟ سحر برفعة حاجب :ليش انت خبرة ؟ عمر :ايه الحمدالله ..خلاص صرت قبل ادخل أي مكان اقيمه من فوق لتحت واشوف شلون الزبنة بتصير اذا صارت فيه مداهمة سحر :ذكي مرتب وضعك عمر :افا عليك سحر :انا توي ..مالي خبرة الا ان محمد يوجهني عمر :شلون تعرفتي على محمد سحر :معي بالسفارة يشتغل رفع حواجبه وتذكر رائد :ورائد ؟ ضحكت :وصلتك الاخبار من عماد ابتسم :تحريات عسل سحر :رائد كان قسمه غير وانا قسمي غير اشوفه بأوقات البريكات اما محمد قسمي وقسمه واحد ومكاتبنا بجمب بعض عمر :انا مستغرب شلون رائد ما حس ووشلون محمد يشتغل بالسفارة يعني وابوه مثل ماتعرفين من اسمه سحر :اول شي رائد ماهو من اوساطنا ابد ..يعني ماله بسوالف البارتيات مسكين بريئ وحاله حال نفسه ..يمكن لو درى كان انجلط بس خله على عماه ..للحين المحه يناظرني بحسافة حب يتعمق بالسالفة حتى يتأكد من رائد ويتطمن من طرفه :ليش سحبتي عليه اجل ؟ سحر :عندهم عادات متخلفة مثل وجيههم ..يعني مزوجينه بنت عمه غصب واخوه واخته قبله غاصبينهم ..سوري مستحيل أعيش مع مجتمع عائلي متخلف مثل هذا ..اساسًا كنت حاسة انه بيسحب علي لأنه هو بعد خاف ينحد ويتركني وماكان يبي علاقتنا تكون نهايتها مجهولة ..مبدأ بريئ من ناحية تفكيره لكن بنفس الوقت يجرح استغرب :وانتي سكتي وتركتيه !! ضحكت :لاااا وين ..كلمت محمد ينتقم لي منه وحبيبي ماقصر عمر :وش سوى ؟ سحر :الخبل اخوه متورط بقضية قتل أتوقع ..المهم اني كلمت محمد يرسل له كم واحد يطعنونه ويجيبون له طاري اخوه على أساس انه انتقام من الي متورط معهم اخوه فهمت ؟ عمر :اها ..والله حبكتيها برافو سحر :شفت ؟؟ قسم بالله على قد ماكنت مبسوطة معه بس كان قاهرني غبائه وبرائته ..ماهي متماشية مع وضعي وبيئتي..هو حاط حدود وانا انسانة فري شوي عمر :اصلًا المتخلف هذا بيجي يوم وينكبك..زين ماسويتي فيه ..المهم على محمد قاطعته :ايه ايه ..محمد مجرد صديق يعني ..تعرفت عليه لأنه خاوى لولا صديقتي الي تعرفها ..وكلنا بقسم واحد وهو موظف معنا لأنك تعرف ابوه يقول ان اهم شي عنده المسؤولية المجتمعية وان ابنه يكون مثل مثل الجميع يبدا من الصفر..وهذا كفر قدام الناس بس كذا ولا كذا هو مضبط المدير وهو مضبط امورنا كلنا عمر :استغربت لأن الوضع مع راشد كان غير..يعني هو ابوه متوفي وعمه تارك له كل الصلاحيات ويموله بعد ..فالوضع كان فيه اريحيه -وعشان ماتشك بأسالته-ماقد حضرتي لراشد ؟ سحر :نو ..لأني ماكنت ميانة مع لولا ..توني متعرفة عليها عمر :جديدة بالمجال انتي ولا وش ..كم لك سنة ضحكت سحر: كنت عضوة حالي حال نفسي لين هالسنة صرت اموّل عمر :الواحد يكون عضو بعدين موجه بعدين ربي يفتح عليه ويصير ممول ..شهالنطة ماشالله سحر :ورثت ابوي ..وهالمجال استثماره يبي له صبر ..بس بعد هالصبر بتكسب هز راسه وهو يقاوم رغبته بأنه يفتح باب السيارة ويقطها منه """"""""" الصباح الساعة 7:30 طلعت من الحمام وهي تعدل تنورتها بصراخ وسماعات الايربودز بإذنها :خلاص ياحمارة بقوم اشوف مطلق ..ان شالله ماداوم باقي بسرعة اخذت عبايتها ولبستها وسحبت شنطتها وراحت لم شيلتها الي فوق السرير واخذتها وطلعت تركض من غرفتها لغرفة مطلق فتحت باب غرفته بقوة :ممطللللقققققق ومالقته موجود بسرعة نزلت الصالة تدوره وهي تناديه :مطلللللللللق ..مطلللققق ...ياااا مطللللللققق شافته بالصالة جالس يشرب شاهي وبيده مذكرته :مممططلللق مالتفت لها ولا ناظرها واضح انه مورايق لها قربت منه :توصلنا الجامعة ؟؟ الباص سحب عليييناا هز راسه بالنفي :جامعتك بعيدة عن جامعتي بعد المشرق عن المغرب ..مارح اوديك ..محد قالك تتأخرين عن الباص نور بقهر :تكفى مطلق ..والله اسويلك الي تبيه مطلق :مابي شي ..يلا انقلعي طلعت جوالها ودقت على ابوها :ابوي لو كان موجود كنت بتودينا طرق عن خشمك لكن نشوف الحين وقف بسرعة قبل ماتكمل اتصالها ومشى طالع وهي ركضت وراه تلحقه رد عبدالباري على بنته نور :هلا يانور نور بسرعة :يبه تأخرت على الباص ومشى ومطلق معيي يوصلني رفع صوته :عطينياه هالورع وقف بقهر ومشى ناحيتها بسرعة وسحب الجوال وهو يناظرها بقوة ووده يفقلها :سم يبه عبدالباري :ود اختك مطلق بطواعية :سم نور بسرعة :معنا حورية بنت عمتي عبدالباري :ود البنات يا مطلق مطلق بالرغم من انه بيتأخر على محاضرته بس ابوه امره:سم سكر منه ومد الجوال لنور :امشي قدامي مشت قدامه وهي تربط الشيلة :صدق مايمشيك الا عبدالباري مطلق :امشي وانتي ساكتة بالله طلعت معه وركبت السيارة وحرك متجه لبيت عمته :دقي عليها اننا بنوصل بعد خمس دقايق مابي أي تأخير دقت عليها :حور بعد خمس دقايق بنوصل تجهزي رفع صوته :انزلي خلاص وانتظرينا عند الباب سكرت نور :لوسمحت ترا حور تنحرج لا تكلمها مطلق :انا متأخر وانتي همك لا تنحرج هي؟ نور :حور غير بأي موقف كان لا تكلمها مطلق :خير ليش؟ نور :من وفاة ابوها وهي حساسة وهالشي يأذيها مطلق :روحي بس انتي وهي ..قال حساسة قال عشر دقايق ووصل البيت ولقوها بالفعل واقفة برا تنتظرهم ركبت ورا وهمست :السلام عليكم ردوا السلام بهدوء وحركوا بصمت للجامعة حس مطلق بسيارة تلاحقه بس مو متأكد عشان كذا قرر يمشي بالحواري ومايطلع للدايري حتى يتأكد وبالفعل من حارة لحارة لين تأكد بالفعل ان الكامري الكحلية تلاحقه توتر لأن البنات معه ..واكيد الي ملاحقينه دارين بهالشي وعنده احتمالين يا انهم ينتظرونه ينزلهم ويحاولون يحدونه او انهم متعمدين بس لاحظهم يلاحقونه من بعيد لبعيد اخذ جواله ورفعه بسرعة على رقم معاذ الي مغبر ومن سنين مادق عليه رد باستغراب :نعم مطلق بتشفير يعرفه معاذ عدل :وراك راسل الطلب يلحقن معاذ :ما أرسلت احد ولا لي علم مطلق :انت راسلهم من البداية ولالا ؟ معاذ :لا ما ارسلتهم مطلق : ولا طلب رائد ؟ معاذ :لا والله ولا طلب رائد ولالي يد ولا اعرف حتى مطلق سكت ثواني :اهلي معي يا معاذ قام من مكانه :وينك انت مطلق :بالطريق بوديهم جامعتهم معاذ :ارسلي لوكيشنك لايف بالواتس ..بشيل الحظر عنك وارسله مطلق :تم سكر منه وهو يحس بخطر اتصاله بمعاذ ارسله اللوكيشن .. وهو ماهو متأكد منه اذا هو معه او ضده بس ماله الا هو خصوصاً ومحد يعرف بالسالفة غيره ولا يبي احد من اخوانه او عيال عمه يدرون شي بداخله قاله انه ممكن ينوثق فيه طلع الشارع العام خصوصاً وهم مقربين من الجامعة والسيارة قربت منه وصارت وراه حاول يلمح السايق بس ماقدر قرر يركز انه يوصلهم بدون مايحسون نور :خلاص ننزل هنا مطلق :خلاص قربنا ..اوقفكم عند البوابة وتنزلون ..هنا لا نور :مابقا شي على المحاضرة وتبدا ..تكفى الدكتورة قشرا من اول كلاس بتحطنا براسها رفع صوته :انا وش قلت ؟؟؟ كلامي واضح حورية تدخلت :انا بطلع التفت لها :اطلعي وشوفي وش بيجيك حورية عصبت :حنا مسوين هالقلق واللوية عشان لا نتأخر اخرتها مستقعدلنا على مترين ؟؟ مطلق رص على اسنانه :ايه بستقعد على مترين فتحت الباب :استقعد فيهم بسيارتك طلعت من السيارة ونور تحت الباب بتطلع معها لكنه مسك يدها وحرك ناحية البوابة وتركها وقف قدام البوابة وطلعت نور بس شوي انتبه للكامري تشخط من وراه بسرعة التفت لورا وماشاف حورية انصفق وجهه ودعس يلحق السيارة رفع جواله واتصل بنور :نور ادخلي الجامعة ولا تطلعين ابد ..حور معي سكر منها واتصل بمعاذ يستنجده :معاذ معاذ وهو بالسيارة :وينك ..اشوفك حركت من عند الجامعة مطلق :الكلاب خذوا بنت عمتي معهم الـ#### الـ##### معاذ انصدم :انا وراك ..شايف سيارتهم ؟ مطلق :ايه انا وراهم ..بياخذون المخرج بعد شوي وبلحقهم معاذ :بلغ راكان ومنذر..ضروري يعرفون مطلق :بلغهم انت ..انا مو ملحق معاذ :خلك على الخط معي اجل وبجواله الثاني اتصل بمنذر الي رد عليه وبلغه كل شي وطلب موقعهم ووتفاصيل السيارة """"""""""""""" نامت ودق بغرفتها الي ببيت عبداللطيف وكالعادة عيال راكان صحوها بصراخهم قامت غسلت وجهها واخذت لها شاور ولبست ترنق اديداس اسود وتيشيرت ليموني ماسك اخذت جوالها وسماعتها والشاحن المتنقل وطلعت من الغرفة انتبهت لماهر ووراه ثامر وسيرين وجالسين يلعبون بالمكعبات قدام غرفة امهم وابوهم :ماشالله خلصت الأماكن ؟ التفت لها ماهر :ابوي جالس يهاوش امي وقالنا العبو برا سكتت ..عورها قلبها على كلامه ..مهما صار هم صغار ونفسياتهم تتعب اذا كانوا امهم وابوهم علاقتهم مو كويسة ومتكهربة :انزلوا معي نسلم على بابا عبداللطيف قام معها ماهر وثامر وسيرين قلدوه ومشوا معه انتبهت للمكعبات قدام باب الغرفة ..ابتسمت بخبث وراحت لم سيرين :تعالي اشيلك يا ماما -شالتها وبرجولها قلبت المكعبات بالعكس-ان شالله يدعسونك الي ببالي ضحك ثامر ومافهم وهي سلكت له ونزلوا اربعتهم للمجلس دقت الباب ودخلت شافت عبدالباري وعبداللطيف جالسين يتقههون ويسولفون ابتسمت من قلبها ..دايم تلفتها علاقة اخوانها ببعضهم ووشلون محد يخرج عن كلام الثاني ومايختلفون ابد :صبااح الخير انشرحت صدورهم من شوفتها عبداللطيف :ارحبي يابنت نايف ..صباح النور عبدالباري :هلا والله ..ارحبي ياعين اخوك حطت سيرين وراحت تسلم عليهم وقعدت بجمب عبداللطيف :ياعساني مانحرم ..بشرني عنك وشلونك الحين عبدالباري:مثل ماتشوفين ..اسد ..قلت له يابن الحلال تعوذ من ابليس وقم تقهو وعين من الله خير وبتزين الأمور ان شالله ودق: ان شالله بإذن الله ..اهم شي صحتك وغيره مايهم عبدالباري : وعقيل ان شالله بيرجع وبتقر عيونك فيه عبداللطيف تنهد :ان شالله يارب ..العصر ابمشي اقضي لي كم مشيوير عبدالباري :ودي اخاويك ..لكن رائد يقول يبيني بموضوع مهم وخطير انتبهت ودق لأسم رائد وتذكرت انه اليوم يبي يقول لأبوه عن سالفة عقمه زفرت بضيق تحس رائد مهبول ..بيضر نفسه وبيضر خولة بعد ترددت انها تدّخل بس حست انه ضروري تنقذ علاقتهم الغريبة :اليوم صارت سالفة غريبة لوحدة من صديقاتي التفتوا لها بإهتمام وناظرتهم :وتقولي هل تقدر ترفع قضية على المستشفى ولالا استغربوا عبدالباري وعبداللطيف عبدالباري :وش صار ؟ ودق :صديقتي انخطبت وسوت التحاليل وطلعت سليمة الحمدالله وتملكت ..بعد فترة تعبت حمى وترجيع وراحت المستشفى وطلعت انها ارتفاع درجة حرارة بسيطة لكن التحاليل طلعت انها عقيم عبدالباري تضايق :لاحول ولا قوة الا بالله عبداللطيف :اشوى قبل عرسهم كملت هي :مو هنا المشكلة ..السالفة انها تطلقت وقعدت ببيتهم وكنهم بعزا من الي صار ..بعد فترة طويلة تعبت واخذوها أهلها يعالجونها وسووا لها تحاليل من جديد بمستشفى ثاني حتى يشوفون اذا تقدر تتعالج هنا ولا برا عبدالباري :طيب؟؟ وش صار ودق : التحاليل طلعت سليمة مجرد انه خطا طبي من المستشفى السابق تضايق عبدالباري من السالفة جدًا :لا حول ولا قوة الا بالله عبداللطيف : وطليقها بيرجعها ولالا ؟ يقرب لها هو اصلًا ؟ تورطت ..خافت تقول يقرب لها ويشك عبدالباري اذا كلمه رائد :لا مايقرب لها عبداللطيف :عرفتي ليش نزوج عيالنا لبعض ؟؟ لان الاهل ستر وغطا وحتى الدم مايروح بعيد ..الله يستر عليها ويرزقها الزوج الصالح ودق :الي مضايقني ان السالفة كثرانة تصدقون قريت بجريدة ان نسبة الخطا الطبي بسالفة العقم منتشرة جدًا يعني من خمس عوائل تصير بعائلتين بسبب انها دقيقة مرة يعني وتحتاج مستشفى معروف عبدالباري :الله يصلح الحال ويحفظ عيالنا من هالسوالف عبداللطيف :خليها ترفع قضية عليهم ..خربو سمعتها بسبب خطا؟؟ ودق :قلت لها لكن ماكنت اعرف اذا من حقها او لا عبداللطيف :لا من حقها ..هذي فيها اعراض ناس دخل راكان وهو مكشر :السلام عليكم ردوا عليه السلام وقرب يسلم عليهم عبداللطيف :وش فيك معصب من الصبح راكان :دعست على لعبة العيال ..جت بنص رجلي ضربت بالنخاع كتمت ضحكتها وتذكرت الي سوته التفت لعياله الي يلعبون بالمراكي وجلس :ورا مالميتوا العابكم ؟؟ الحين امكم بتشيلها وتقطها بالزبالة فز ماهر بخوف :لالاا اسفف وثامر الي شوي ويصيح طلع من المجلس :بنروح نلمها خلاص سيرين راحت لأبوها وجلست بحضنه بهدوء لمها له والتفت لأبوه :شلونك الحين يبه عبداللطيف :بخير الحمدالله ..احسن من اول بكثير راكان:الحمدالله.. انتبه على عمرك يبه-سكت وهو يتلفت كل شوي للباب عبداللطيف :تكلم وش بخاطرك يا ولد ناظره بضيق :كلمت امي يبه بعد الي صار امس فهم وش يبي :امك ماشفتها ..رجعت من المستشفى وهي ماهي موجودة بالبيت راكان بضيق :وديت لو انك خبرتها بخصوصية وماتركتها تعرف مع الجماعة عبدالطيف :شفت شلون جية عقيل ماكانت بخصوصية ..طارق حطه قدامنا قاطعه بصدمة :طارق؟ تنهد :ايه الـ#### راكان عقد حواجبه:طارق وش دخله ؟ ليش تصرف من راسه ؟ عبداللطيف :منفصم الولد هذا ..حاقد علي وكارهني ويظن أنه بكذا راح يكسر راسي عصب راكان ووخر سيرين عنه ووقف :راح اتفاهم معه الان وفورًا عبداللطيف رفع صوته بحدة :اتركه انا بتصرف معه ولا اشوفك انت او أي احد من العيال متدخل بالسالفة ابدًا بقهر :حاضر..بروح دوامي الحين بالاذن قام بعد ماحب بنته وطلع من عندهم وهو منقهر من طارق وحركته عند منذر اتصل براكان الي رد عليه :نعم منذر :فيه مستجدات بقضية مطلق ومعاذ ..ابيك ضروري الحين راكان :انا توي طالع ..ربع ساعة وانا عندك بالفعل ربع ساعة وجاه ودق الباب ودخل منذر وقف وقرب منه :معاذ ومطلق يلاحقون سيارة مجهولة خذت بنت عمتكم فتح عيونه :الحين ؟ هز راسه واخذ اللاسلكي وطلع من الغرفة ومنذر معه :أرسلت فريق البحث الجنائي وبيحددون مكانهم ..ضروري نلحق عليهم وعلى البنت مشى معه وهو شبه يركض :انا مشغول بقضية عمر ..لكن ينتظر طلعوا من المركز ومنذر رفع اللاسلكي :طلع لي جيب الحين برا بسرعة لي ومعي الضابط راكان الجالك بالفعل وقفت قدامهم السيارة وركبها منذر يسوق وبجمبه راكان ولع لمبات السيارة وشغل السفتي وحرك بسرعة ثبت الجوال قدامه وفتح على اللوكيشن الي ارسله معاذ ناول راكان اللاسلكي :توصل مع فريق البحث الان ..شف مستجداتهم اخذ اللاسكلي وهو يتواصل مع الي يالمكتب حتى يحددون السيارة :وش مستجداتكم :طال عمرك السيارة مبلغ عنها انها مسروقة ..وارسلنا فريق البحث يعترضهم راكان:ارسلنا احداثياتهم الان :حاضر طال عمرك التفت لمنذر :منذر زد السرعة ..البنت معهم..عرضيي معهم زاد من السرعة وهو يشوف السيارات توخر عنه منذر :فريق البحث الجنائي معهم ..وقربوا منهم ..لا تخاف بإذن الواحد الاحد مو صاير لها شي شبك معهم حسان باللاسلكي :راكان راكان :سم ..وش صاير حسان :محمد اخلى استراحته امس بشكل مفاجئ راكان :ايه عارفين حسان :جاتني اخبار انه شاك بعمر وعشان كذا اخلاها راكان :لا تخاف عمر بيثبت نفسه لكن البلا بعماد الي معه ..انتظر مستجداتهم لحدود بكرا وبعدها تدخل حسان :تم """"""""" طلعت من سيارة مطلق معصبة وقهرها لما حرك وتركها مشت ناحية الجامعة وهي تتوعده عند ابوه وقفت بجمبها سيارة وطلعوا منها اثنين ماهتمت وكملت مشي لكنها ارتاعت وطاح قلبها يوم واحد كتم فمها والثاني شالها ودخلوها السيارة انتفض جسمها من الروعة وهي تشوفهم يحركون بالسيارة بكل سرعتهم حاولت تقاوم بس هم ماسكينها بقوة وسادين حلقها ومانعينها من الحركة بكت من قلبها وهي ميتة خوف وحاسة برعب فضيع خصوصاً وهم ماسكينها بطريقة سيئة مخليتها تقاوم بقوة صرخ عليها واحد منهم :اهجدي ولا ورب البيت اذبحك يا#### الي معها شد عليها زيادة وهي زادت بالمقاومة همس للي بجمبه :هذي ماينفع تنتظر لين نوصل المستودع ..مثل ماوجهنا أبو لافي هو مبسوط اننا مسكنا اخت مطلق وشرهتنا بتكون كبيرة..خلص عليها ثم ارميها بالشارع ..ودام مطلق يلاحقنا فحنا بأمان اللي يسوف صرخ فيهم :اخلصوا بسرعة معاذ مع مطلق اثنينهم وراي الي بجمبه عصب :من متى معاذ واقف معه الكلب ؟؟ التفت للي ورا :خلصوا بسرعة ..اكيد مداه مبلغ علينا صرخت بقوة بعد ماعضت الي ماسك فمها لكنه باغتها بضربة قوية افقدتها الوعي وماقدرت تقاوم وتدافع عن نفسها وبدون رضاها خسرت اغلى شي تملكه بسبب ثأر قديم """"""""" دخل الشقة ومشى الحمام غسل وجهه وطلع الصالة انسدح على الكنبة بتعب بنفس اللحظة سمع باب غرفتها ينفتح التفت له وهو يشوفها تطلع ناحية المطبخ بدون ماتعطيه وجه قام على حيله ولحقها لين وصل لها :زين التفتت له بخوف :انت جيت بدون نفس :لا هذا خيالي ماردت عليه ومشت للثلاجة اخذت لها قارورة موية ووقفت قدامه :وخر رفع حواجبه :ماني متحرك عصبت :لو سمحت عمر وخر ..ممكن ولالا :ماني متحرك ..لين نتفاهم عدل تكتفت :بأيش تبي تتفاهم؟؟ انا قلت لك الي عندي وانت رفضت مارد على كلامها :بكرا باخذك المحكمة عشان نصدق على الزواج وبيكون فيه عماد وابوك ..بيتسجل زواج رسمي ناظرته :بس انا مابي اقابل الي اسمه ابوي ولا ولده ..مرتاحة كذا هز راسه ورجع الصالة بدون اهتمام:اوكي اجل ..مارح اجبرك على شي ماتبينه رجعت طلعت وراه :ابي أغراض للمطبخ عمر :ليش ان شالله ؟ مو شايفك تطبخين لي زين : مو لازم اطبخ لك انت ملزوم فيني وهالشي يجبرك تلبي طلباتي ..وماشالله من قعداتك بالبيت حتى اطبخ لك عمر انسدح على الكنب وغمض عيونه:خلاص اجل ..اذا فضيت وديتك ..انا الحين راجع وحاس بتعب ..اعذريني زين :مالي دخل عمر الحين بروح فتح عيونه :وش وراك انتي استحت تقوله :ابي شي ضروري عمر :شي ماينتظر يعني ؟ هزت راسها عمر :بس دامي بنام خله ينتظر زين :لا ماينتظر تكفى والله ابيه ضروري رحمها وهي اول مرة تطول بالترجي :اوكي خلاص..البسي عبايتك ويقوم البس ثوبي بسرعة طارت غرفتها وقام هو يبدل ثيابه بالمجلس طلع بعد ما اخذ بوكه واغراضه وشافها جالسة بالصالة بنقابها تنتظره طلع من الشقة وهي وراه :وش تبين بالضبط ؟ زين :أشياء خاصة وكم غرض للمطبخ جست عمر :وش المقابل اذا سويته ؟ زين :اطبخ لك الي تبي عمر بدون تفكير :صينية بشاميل كتمت ضحكتها :واضح كانت بخاطرك من امس عمر ناظرها :بتسوينه ولالا ؟ زين :لا خلاص بسويه هز راسه وسبقها للسيارة قربت وركبت جمبه وحرك متجه لأقرب سوبر ماركت وقف السيارة بالمواقف وطلع وطلعت معه دخلوا السوبر ماركت وسحب عربية وصار يمشي معها وهي تحط بالعربية الأغراض صدور دجاج مجمدة صلصة بهارات جبنة موزريلا واغراض كثير وهو ماغير يتأملها شلون تختار وتحط وتشيل وصلت لأماكن المستلزمات الصحية والتفتت له بحرج :ممكن تجيب شطة نسيت هز راسه بحسن نية ومانتبه ومشى يجيبه وهي سحبت العربية ودخلت اخذت لها الي تبيه وطلعت مكانها بكل هدوء جا لمها وحط الشطة بالعربية وانتبه للأكياس ..كتم ضحكته على حركتها ورفع راسه لها :خلصتي ؟ هزت راسها :أي خلصت الحمدالله سحب العربية وناولها المفتاح:روحي السيارة وانا بحاسب واجيك اخذته منه وطلعت وهو مشى يحاسب نس ساعة وخلص وطلع وهو شايل الاكياس انتبهت له من السيارة وفتحت له الشنطة ..حط الأغراض وركب اخذ منها المفتاح شغل السيارة وحرك راجع للبيت زين :متى تبي اسويلك البشاميل ؟ عمر :اليوم مشغول ..برجع انام واقوم عندي شغل خليه بكرا الغدى زين :اوكي تمام دق جواله برقم غريب اخذه ورد :هلا سحر :هلا عمر وينك ؟ عمر :راجع البيت ؟؟ شفيه ؟ سحر :لا بس محمد يبينا ..ضروري تجي الحين الاستراحة عمر :ارسليلي اللوكيشن ..تمام ؟ التفتت له يوم سمعته يقول ارسليلي وهو حس فيها بس ماعلق ولا رد وهي حاولت انها ماتهتم وقف قدام البيت :يلا ..خذي الاكياس المهمة وانا وانا راجع بطلع الباقي هزت راسها وطلعت اخذت الاكياس المهمة الي اخذتها واكياس الأشياء الباردة الي تحتاج تبريد وطلعت رجع ريوس بالسيارة وحرك وهو متحسف على وضعها معه ..حاس انه ظالمها """""""""""" رائد وقف قدام بيت عمه واتصل بأبوه بلغه انه برا طلع له وركب السيارة ..حب يده :شلونك يبه عبدالباري باستغراب :بخير اللهم لك الحمد ..و شصاير بكل هدوء اخذ ملف من فوق الطبلون وعطاه :تفضل اخذه :وش هذا رائد بوجه مايتفسر :اقراه وشوف فتحه وطلعه كانت أوراق تحليل مستشفى ..تفيد بأن رائد عبدالباري الجالك عقيم نزل الوراق بصدمة وناظر برائد ورائد مايناظره وهو عيونه بخاتمه ناظر باسم المستشفى وناظر فيه من جديد وطلع من السيارة طلع وراه رائد باستغراب :يبه ؟ قرب منه :وخر انا بسوق ..اتصل بخولة خلها تنزل الان ضروري رائد :لا تقولها يبه مابيها تدري ناظره بحدة :رائد ..سو الي اقولك عليه هز راسه ودق عليها :انزلي تحت انا بالسيارة خولة :وش صاير؟ رائد :ماعرف انزلي عشان اعرف سكر منها وركب بجمب ابوه عبدالباري :ليش سويت هالتحليل؟ رائد :لاني تعبت قبل فترة وسو لي تحاليل شاملة ..وهي النتيجة الي طلع ناظر لأبوه بتمثيل :يبه !! معقولة ؟ ..خولة لا تدري تكفي كرمش الورق وحطه تحت الطلبون :ماعليك ياولدي ..بنتظمن ثم نشوف وش نسوي نزلت خولة وركبت السيارة :السلام عليكم ..خير ياعمي حرك عبدالباري السيارة :خير يابنتي ..لا وصلنا بتعرفين التفت رائد لخولة ورجع يناظر قدامه ناظرت بجوالها وكتبت له "وش السااالفة ؟؟ معقولة كشفنا ؟؟ " كتب لها :ماعرف ..بالبداية انصدم بس الحين وش بيسوي مادري" كتبت "الله يستر والله خفت" رد "مو اكثر منك" اخذهم للمستشفى خولة بسرعة مسوية ترقع الموضوع :عمي ترا رائد ماله دخل باللي ..هذي حكمة ربي التفت لها رائد وفتح عيونه بقوة انتبه لهم عبدالباري :توهه يقولي لا تقولها ..شلون دريتي رائد بلع ريقه :كنت اقصد انه لا تقولها الي بتقوله انت رفع حواجبه :وش كنت بقول ؟ رائد :خفت تهاوشها عبدالباري تذكر كلام ودق الصباح سبحان الله وش هالصدفة الغريبة !! وقف سيارته بالمواقف :خلوكم بالسيارة وطلع منها التفت رائد لخولة :خبلة انتي ..الحين شك فينا خولة ماردت عليه كفاية توترها عبدالباري دق على ودق الي ردت :ارحب عبدالباري :سالفة خويتك الي من الصبح صدق ؟ ودق :ايه ليش؟ عبدالباري :اسئلك بالله صدق ؟ سكتت عبدالباري :كنتي تعرفين يعني بخطة رائد وخولة ووقفتي ضدهم ! ودق بسرعة :لا تفهمني غلط بس هم يبون بعض ..وماهم متأكدين من بعض بسبب كم مشكلة حصلت ..قلت ضروري يعطون بعضهم فرصة وجيت لمحت لك ..تكفى لا تقولهم اني لمحت لك سكت دقيقة استغربت :الو ؟ عبدالباري :ماهو من حقهم يرفضون الزواج بهذي الطريقة القذرة ..لي تفاهم معك بعدين سلام سكر منها وركب السيارة :امشوا وراي يلا طلع من السيارة وهم لحقوه وهم منطمين رائد همس لخولة :الله يستر جابنا لمستشفى ولد عمه خولة :مدام جابنا مستشفى الجالك شكله يبينا نسوي التحاليل من جديد ..والله انكشفنا وبروح وطي رائد :ترا بروح معك وطي مب لحالك خولة :انت موظف بتعرف تكفل نفسك لكن انا ؟؟ دراستي بتروح ماتذكر سمر رائد :ايًا كان عقابهم ..ان شالله بنتجاوزه لا تخافين ماردت عليه وهو مسك يدها بنوع من التطمين مايدري انه قهرها زيادة يطمنها انهم بيتفارقون ؟؟؟ هزلت يا رائد سحبت يدها وسوت انها بتطلع جوالها ورائد حاول يطنش صدها """""""""" عبداللطيف المغرب طلع لم غرفة ودق ودق عليها الباب ودق :تفضل فتح الباب ودخل بابتسامة :شلونك ودق :زينة الحمدالله ..شصار قرب منها وحط قدامها الأوراق :هذي هي جاهزة اخذتها تناظرها مجموعة تقارير طبية من مستشفى اجنبي ومترجمة تفيد بأنه مريض انفصام شخصية وموثقة بالاختام بعد وفيه تقرير من مستشفى الضاير التخصصي ..بلعت ريقها من الصدمة ..شلون كذا عبداللطيف :انا ببلغ عنه وابيك انتي تروحين تاخذين عقيل من عنده ..الحين انزلي نتقهوى واقولك كل شي تسوينه ..وبعد صلاة العشا نتحرك هزت راسها وقامت معه نزلوا تحت المجلس وشرح لها الخطة كاملة بالتفصيل وعلمها عن مكانة استراحة ابوطارق الي سأله عنها وعطاه مكانها وودق ماكانت مقصرة جلست تقترح عليه حلول للمشاكل الي ممكن تصير وعبداللطيف مبسوط وماخذ كلامها بجدية :اجل اسمعي ..انا طالع مشوار الحين ضروري وانتي ابدي نفذي ..مثل ماتفقنا هزت راسها :ابشر .. اهم شي طارق تفكنا منه عبداللطيف :ماعليك ..بدفعه ثمن كل الخراب الي كان ناويه..يلا اذا تبين شي اتصلي فيني ودق :خلاص تمام ..بتصل فيك وابلغك بكل المستجدات قام من عندها وطلع كلم سواقه يجي ياخذه وأول ماركب :حرك للمرزعة ..الحين وبسرعة """""""""""""""""" مستشفى الضاير التخصصي بالطوارئ كان معاذ ومطلق قدام غرفة العلميات وركان ومنذر جوو لمهم بعد فترة وقف مطلق لراكان بخوف :ياراكان رمووها بالشارع وانحاشو ..ماقدرت الحقهم ووقفت لها هز راسه راكان وربت على كتفه :فريق البحث بيطلعونهم من تحت الأرض مطلق كان منهار لدرجة ان ربتة راكان على كتفه خلته يقرب منه ويحضنه ..مصدوم شلون ماقدر يحمي بنت عمته من الي الكلاب الي اعتدوا عليها التفت منذر لمعاذ :وش الي صار بالتحديد منهم هذولا؟ معاذ :اخوان سعيد الله يرحمه ..شفت واحد منهم بعد مارموا البنت بالشارع قبل مايسكرون الباب منذر :وليش مالحقتهم معاذ : اخذوا السيد الثاني بالعكس ودخلوا للحواري ولاقدرت الحقهم هز راسه :ماقصرت يعطيك العافية جلس مطلق على الكرسي وهو حاس بيدينه ترجف عمته تتصل عليه ولاقدر يرد ..وكلم نور تقولها ان حورية عندها وماجاوب نور على ولا شي طلع الدكتور من غرفة العمليات والتموا حوله الدكتور بهدوء بسبب هول الحادثة :هي بخير الان .. ونايمة من التعب والارهاق الي صارلها مو قليل ..اول ماتصحى بتكون عندها دكتورة من الطب النفسي تقيم حالتها ..اتمنى محد يدخلها الى ان تتقيم الحالة مطلق بتردد :يعني هم فعلًا ؟ هز راسه :للأسف ..حصل معها نزيف ولكن قدرنا نوقفه ونعالج الموقف ..الله يكون بعونكم وتركهم ومشى جلس على الأرض بحسرة وخوف من الي صار ..حس قلبه يحترق ونار بكل عروقه ناظر براكان الي كان مقفي عنه واكيد حاله مو اقل منه ..شلون بيقولون لأمها شلون بيقولون لابوه وعمه السالفة ..شلون هو بيواجهم ويقولهم انا ماقدرت احمي بنت عمتي معاذ ماتحمل حالة مطلق واشر لمنذر انه يبي يطلع ومنذر هز راسه والتفت لراكان :بوقف على راس فريق البحث لين نطلعهم وبإذن الله مايفج الفجر الا وهم تحت رجلك مارد عليه راكان لأنه كان اخر واحد يتمناه يشهد هالموقف الفظيع معه وتركه منذر وطلع مع معاذ بعد ماحط مفتاح الجيب مع راكان واخذ اللاسلكي واتصل بودق يحاول يشوف وينها """""""""""""""""" بعد اربع ساعات دق باب الاستراحة وقام طارق يفتح الباب :مين ودق بصراخ :انا فتح الباب باستغراب وتفاجئ يوم دخلت وهي تصرخ وتبكي ترك الباب وقرب منها بصدمة :ودق وش صار لك كان شعرها منفوش وعبايتها مشققة وفيه علامات ضرب بوجهها وجسمها :من سوى فيك كذا صرخت من قلبها وهي تبكي :وخرر عني ماسويت لك شي ..وخر عنيييي ابعد شوي عنها والتفت لعقيل الي يناظر بصدمة وهو الثاني موفاهم وودق مازالت تصارخ وتبكي وهي منهارة لين سمع طارق صوت سيارة الإسعاف قرب منها عباله انه صارلهم حادث:وين خالي عبداللطيف ..صار له شي وهو جاي هنا ناظرته وعيونها محمره :سوري طارق ..بس هالشي لازم يصير بهاللحظة دخلوا المسعفين ومسكوا طارق بقوة الشي الي صدمه وناظرهم بصدمة:هيه مو انا ودق ببكا :هذا هو امسكوه ..هذا هو بالفعل سحبوه وهو يحاول يقاومهم واخرته معهم ضربوه ابرة منومة طيحته وخلتهم يشيلونه بهدوء قرب منها واحد من المسعفين وهو يحاول يعالجها:الى أي مدى اذاك ؟ ودق طاحت بتعب على الأرض :بس كم كف ..كدمات بسيطة بعد ..ماعليك اتركني هز راسه بعد ماقيمها نظريًا وطلع من عندهم التفتت لعقيل الي يراقب كل شي بهدوء وابتسمت له :عقيل؟ رجع لورا ودخل داخل ..اخذ شنطة معه وطلع استغربت ووقفت قربت منه صرخ بوجهها :بعدي ..بعديييي ارتاعت ووقفت مكانها قرب منها بحذر ورماها بالشنطة على راسها طاحت واغمى عليها وهو اخذ الشنطة وهرب بدون مايعرف وين يروح ولمين يروح """""""""""" مخرج "ستغلبك الأيام إن كنتَ واهنًا وإن كنت صبارًا فذو الصبرِ أغلبُ" 
 
|
|
05-04-2019
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
سلمت الأنااامل وماجاابت لنا
من جماال وروووعه في الطرح يعطيك العااافيه شاكره لك
|
|
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
