 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
02-27-2022
|
||||||||||||||||||||||||||||||
|
||||||||||||||||||||||||||||||
رواية صغيرات على الحياه البارت التاسع
حنين:ألووو وافي:هلااااا أخيرا طرينا عالبال! حنين:حسيت بالعبرة تخنقني يوم سمعت صوته!وبكيت! وافي تكفى تعاااال مالقيت أحد يوديني المستشفى وافي:بسم الله عليك شفيك؟ حنين:الظاهر ولادة أنا بشقة أهلي بسرعة تكفى. وافي:يلا البسي عباتك جاي الحين حنين:تسحبت بشويش لاتدري أمي وخذت شنطة البيبي وصل وافي وساعدني أركب السياره وطول الطريق إذا حسيت بطلق شديت بقوة على يد وافي وافي:تحملي شوي وصلنا وعلى الطواري على طول. حنين:فكو مني ساعتي وسلسالي وخواتمي حتى جوالي خذوه عطيت النيرس خمسين ريال عشان أخلي جوالي معي وأقفله طبعا وافي:مو قادر أجلس أروح وأجي وأنا قلقان وطار قلبي لمن سمعت صراخها يارب هون عليها،يارب يسر ولاتعسر،يارب فرج لها،شفت نيرس طالعه من الغرفه وسألتها ماعطتني وجه تقول لسا، حنين:أول ماطلعوني من غرفة الولادة فتحت جوالي وأول واحد دقيت عليه وافي وافي:دق جوالي رفعته بعطيه مشغول بس شفت عالشاشة(حنيني يتصل بك)رديت بلهفهة: بشري؟ حنين بصوت تعبان : ابشرلك بولدين، وافي:لحظات مارديت بس استوعبت قلت: صادقة وإلا تمزحين! حنين بتعب:مو وقت مزح مرهم بالحضانة شفهم وافي والضحكه شاقة الوجه :كفو والله،بس بتطمن عليك أول، اتصلت ابشر أمي وأبوي وعمي وعمتي وأرسلت لخواني وخواتي رسايل أبشرهم أكيد ألحين قايمين، حنين:شفت وافي داخل علي وباينة الفرحة بعيووونه ووجهه قرب مني وباسني (مبروك يأم الشباب يتربون بعز والديهم إن شاء الله)بعدين قرص بعيوونه لي وحط يده على رقبتي كنه بيخنقني أجل بنت ها!وأنا طول هالشهورأهوجس باسمها وشكلها ومن بزوجها!وأنتي مرتاحة! حنين:ماقدرت أمنع ابتسامتي اللي طلعت غصب وبعدت يده عني:كيف العيال؟ وافي:مابعد شفتهم قلت أطمن على أمهم بعدين أشوفهم، وتوني بقوم بس دخلت بهم النيرس ووراها الثانية وكل وحدة معها ولد قمت أشوفهم ياربي يدنووون كل واحد أحلى من الثاني ياربي أممممواااااه وبستهم على خدودهم النيرس:يلا مدام رضاعة بيبي حنين:استحيت أرضع ولدي قدامه، وافي أطلع برا برضعهم وافي:وأنا معييك؟أعين وأعاون، انتشر خبر التوأم وطلعت حنين للبيت ووافي مسنتر عند أهلها بحجة شوفة عياله وحنين تطلع له العيال وماتطلع بحجة الزوار وأحيانا يمسي عندهم على أمل يسهر وياها لو ليلة، وافي:قاهرتني سافطتني على جنب ماكني أبوعيالها وأهم من كل الناس تطلع لي العيال لحالهم بس هين باقي عشرة أيام وتطلعين من الأربعين وأخذك وأصك عليك سنة ماتشوفين من يقول ربي الله عقابا لك،آه بس متى تقضى هالأربعين ياطولها، جواد "]خزنت صورة وسن بحافظة شخصية وما حذفتها مدري ليش!مع إني ناوي أزحلقها، اتصل علي وافي وبشرني بعياله وكان باين عليه الفرح يستاهل والله من زمان مافرح الله يوفقه مع هالحنين وترجع له، بشار:من دريت أن حنين حامل وزعلانة عند أهلها انتابني شعورين بنفس اللحظة فرح لانها زعلانة وطالبة الطلاق،وقهر لأنها جابت شي يربطهم بعض طول العمر تنهدت ودخلت أسلم على خالتي اللي كثرت جياتي لهم بسبب حنين آه بس لويصير اللي ببالي، عساف:على البركة أبوتركي وإلا أبو جسار؟ وافي:ههه كلهم خير وبركة أبوهم كلهم، عساف:هب عليكم،متزوجين بعدنا بشهر وتسعة شهور وجبتو اثنين مو واحد لايكون داخل عليها ياولد قبل زواجكم؟ وافي قام وزنطه بحلقه:اذكر الله على مرتي وعيالي لايجيهم شي!والله لأذبحك! عساف:كح كح كح وجع إن شاءالله من زينكم نحسدكم! تف عليكم ماشاء الله تبارك الله. تركه وافي وهو يبتسم :إيه كذا تعدل. عساف:ياالخايس بغيت تموتني تبيع أخوك عشان مرتك وعيالك تراي أقرب لك قبلهم. وافي:هههههه أبيعك وأبيع طوايفك بعد عشانهم. حمد:اسمع أنت وياه جواد بيجينا زيارة شهر وقال لأبوي بيجي الخميس الجاي ويبي يرجع بمرته معه. وافي:داري أجلت تمايم عيالي عشانه بس والله البنت توها صغيرة أم خمس طعش وعوبا وجواد مهوب ساكت لها إن عاندته. حمد:الله أكبر!هذا أنت خذت أختها أم سبع طعش وجابت اثنين ماشاء الله ما ضرها وأنت نفس طبايع جواد وبعد هو أوسع منك خاطر. وافي:يا هالولدين اللي بتنقزونهم بعيونكم كن محدن جاه توأم إلا أنا ... سولف بس لاتطري عيالي على لسانك! حمد:هههههه يارجال وسع صدرك!هذا اللي يهاوشنا لا قلنا بنقرا على عيالنا من العين ويقول شيحسدونهم عليه!وين حكيك!وألا عيالك غير! وافي:هذا إنت قلتها عيالي غير! حنين: e بكرة بطلع من الأربعين وتركي وجسار هالكيني بالسهر وقدم لي وافي على مربية. وافي:بكرة بتطلع حنين جبت عمال ينظفون البيت ويمسحون الجدران وأنا توليت تنظيف غرفتنا وغيرت مفرش السرير بمفرش أورنج حرير بما أنه يمشي مع ديكور الغرفة السكري نوعا ما!وأتفقت مع مطعم على طلبية الغدا بكرة ومريت حلويات سعد الدين وطلبت تورتة وكتبت عليها>كل الحب لك<أبوجسار ومريت الرميزان وخذت طقم ألماس حلو وفخم وغلفته. وطلعت ثيابي الجديدة لأن القديمة صارت واسعة بعد مانحفت في الستة شهور اللي ما كانت حنين عندي. وفتحت غرفة العيال قربت لسرايرهم آآآه اشتقت لهم تلفت حولي وابتسمت ولأمهم بعد!وأرسلت لحنين إني بجي آخذهم بكرة العصر. وافي:بكرة الصباح قمت الساعة عشر وفزيت بسرعة أخذت ثوبي وغترتي البيضا للكواي ورحت للحلاق ضبطت السكسوكة ونظفت بشرتي وطلعت للبيت كانت الساعة وحدة انسدت نفسي من الفرحة شربت كابتشينو وخذت شور ولبست وتعطرت ولبست كبكاتي الفضيه وجزمتي الجديدة طالعت نفسي بأعجاب وااااو كني عريس طالعت الساعة ثنتين ونص حلو اوصلهم ثلاث ونص ركبت سيارتي ومشيت.. حنين:أووف هاالأربعين تطفش كنها سجن اليوم إفراج طبعا شفت مسج وافي وطنشته مو عشانه عارف إني أحبه يخليني ملطشة ويشوف نفسه علي ويهيني تشيكت عالآخر وأحترت وين أروح خذت عيالي وشغالتي ووسن وطلعت للملاهي كلمت زميلاتي بالكلية وأتفقنا نطلع سوا، وافي:دقت أمي تبيني أجي للغدا قلتلها مشكورة ياالغلا رايح أجيب مرتي وعيالي تامرين شي، أم حمد:الله يبشرك بخير وبكت عشان حال ولدها اللي مايسر،وبشرت أبوه اللي فرح، في >المطار< جواد:ماصدق صار لي قريب من السنة ماشفت أهلي مشتاق لهم شفت عساف وعيوونه تدور شكله ماعرفني جيته من ورا وخبطته عصب التفت بيهاوش بس بسرعة تبدلت نظرته لاستغراب دهشة عساف: جواد؟ جواد:شكلك ماعرفتني؟ عساف:يلعن شكلك بجد ماعرفتك وووين الشحوم واللحوم ههههه.. جواد:خليتها بلندن هههه عساف:الحين أمك بتفكها مناحة على هالشحوم اللي راحت..وإلا نزلتها عشان المدام،بس ياولد تغيرت كليا لعنبو الزين..ليتنا مزوجينك من زمان.. جواد:ههههه إذا مانزلتها عشان المدام من أنزلها عشانه..وين الخايس وافيوه ماجا يستقبلني. عساف:هوووهوووه مب يمك رايح يجيب المدام بعد النفاس. جواد:عسى زين رجعت المياه لمجاريها! عساف:أظن.. وافي:ضحكت على نفسي كيف تطلع مني هالحركات وأنا قبل احتقررها هههه قلبتي راسي ياحنونتي!! دقيت الجرس محد فتح لي دقيت على حنين ماردت!دقيت على عمي:صدمني أنهم كلهم بالرياض ليش ماقالت حنين! يمكن تحسبني بمرها بشقتهم! رجعت بخيبتي ووصلت لشقتهم على المغرب طلع لي تركي ووجهه مايبشر بخير ونظراته لي غريبه وبعد السلامات وافي:لاهنت تركي نادلي أم جسار. تركي:والله مدري شقولك البنت رافضة ترجع لك نهائي وطالبة الطلاق وعجزنا نقنعها أنا وأمي وأبوي واقف بصفها يقول لاتغصبونها على شي ماتبيه قلنا وش بينكم!يمكن نقدر نقرب وجهات النظرونحل المشكلة وتصالحون. وافي:سكرت عيوني وضاقت بي الدنيا ومرت علي اللحظات اللي عشتها اليوم بسعادة وحماس وضحكت بحسرة على نفسي هه..خفت أتكلم وأندم طلعت ومارديت عليه حتى عيالي ماشفتهم... ماقدرت أرجع البيت وأشوف اللي سويته عشانها مابي أعذب نفسي أكثر بدون وعي مني رحت لمكتبي وقفلت جوالي وجلست أفكر بحالي مع أنها ماعاشت معي أكثر من أربعه شهور بس موقادر أنسى هالشهور وكيف كنت فيها!! بس إذا ماتبيني كيفها تسوي اللي تبي والله أن تموت وهي على ذمتي وماتجيب عيال غير ماجابت إلامني إن ماجت ترجاني أرجعها هين وأنا أبوجسار .. وابتسمت على طاري جسار وأخوه ياالله أن تلم شملنا! جواد:والله هالوافي بايعنا بقشرة بصلة كل ذا عند المدام حتى جواله مقفله..! أم حمد:لاتدقون له تزعجونه الله يهنيه له ست شهور ماأمسى معها.. العنود وهي داخلة الصالة سمعت كلام أمها:ومن قال أنه مع مرته؟ تركي توه جايب خواته من الملاهي وهي معهم. أ م حمد:وراها مهوب أمس تمامها. العنود:إلا بس سمعت من تركي إنها رافضة ترجع أم حمد :ول حسبي على شيطانها وش صار لوليدي؟طالعن مني طايرن من الفرحة يقول بجيب عيالي وأمهم دقو شوفو وينه؟ يارب أعقل علي وليدي يارب. جواد:هدي أعصابك بندوره الحين وان شاء الله بنلقاه. أم حمد :يارب سترك يارب سترك. العنود:قالت لي وحدة من زميلاتي أن هالدعاء يقال عند أي شي تشيلين همه لأن الله يكفيك ماأهمك (لاآله إلا أنت سبحانك إني كنت من الظالمين)سبع مرااات 
|
|
02-27-2022
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
قلائد أمتنان لهذة
الذائقة العذبة في الانتقاء لروحك الجوري
|
|
 
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
