ديوان إحساس الغروب للشاعرة إحساس الغروب

لوحت شمسي بيدها ثـم غابـت
وأتركت لون السماء بلون إشتياقي
للذي حبه بوسـط القلـب نابـت
نابتٍ طلعه على عذب المسا قـي
صاحبي له وسط خفاقي منابـت
ذكريات وأمنيـات وزرع راقـي
فيه روحي من قديم الوقت ذابـت
ومعه قلبي متعبٍ فالدرب ساقـي
من فراقه اذبلت عينـي وشابـت
وأنحت بالروح جرح وحزن باقي
مات حلمي فيه والآمـال خابـت
وما أخذت من الزمن إلا أحتراقي
ياغروب الشمس نفسي لو تغابت
وأرسمت آمالهـا ليـوم التلاقـي
كل يوم مع غيابك مـا أستطابـت
تذكر أنه ضاع منها درع واقـي
وتيقن إنه ماعلى الدنيـا ثوابـت
وكلنا في هـذي الدنيـا طراقـي

تخيل كان لي مره حبيب ٍ من خيـال ونـور
عطيته من ربيع العمر ونبض القلب سميتـه
يصد القلب عن غيره وقلبي لو يصد معـذور
تمر وجيـه لكـن غيـر وجهـه ماتحريتـه
علشانه ثرى قلبـي ربيـعٍ بالغـلا ممطـور
تسيد في خفوقـي يـوم ربـي سكنـه بيتـه
تخيل كان قلبي في مرابـع عالمـه مأسـور
تخيل كـل نجـمٍ بالسمـا لجلـه مخاويتـه
علشانه كتبت اصدق حروفٍ عطرها منثـور
تخيل كل احسـاس ٍ لغيـره مانكتـب بيتـه
سقيته من نبع حبي وكان اصدق شعر وشعور
مقلطته وسط صدري ومن التحنـان مسقيتـه
احس ان الذي حبوا هواهم طيش كذب وزور
وانا حبي له اعظم من حكاية حـب قاريتـه
احبه كثر مابكاني وبعثـر دمعتيـن الحـور
احبه كثر مشقانـي واحبـه كثـر معطيتـه
احبه كثر ماغرد على غصن الشجر عصفور
احبه كثر ونات الخفوق ف. ليـل مامسيتـه
تخيل كل هذالحب وهو حلم وخيـال ونـور
ترى اعطيت لك اكثر من اللي كنت معطيتـه

أن كان به ناسٍ علّـي زعلانـه
مادامني ماخطيت وش زعلها!!؟
تزعل علّي العالـم المرضانـه
ويزعل علّي من العرب جاهلها
وإلا الأوآدم تدري إنـي دانـة
والجوهرة مابه أحـد يجهلهـا
الغدر ماله فـي حياتـي خانـة
والكذبة أعرف عاقبـة قايلهـا
كلي ثقة في نفسـي الرويانـه
بكل الخصال الطيبـة وأجملهـا
هويانـة ٍ أقولـهـا هويـااانـه
وأعيدهـا وأزيـد وأعللـهـا"
لأن لـي قلبـه فتـح بيبـانـه
ومن بعد ماسكنـت بـه قفلهـا
مافيه غيـري ساكنـه وجدانـه
ومافيه غيري بالنظـر شايلهـا
مابي وطن للقلب غير أوطانـه
هو عالمي ,هو دنيتي بكملهـا"
موضوعكم ذا أقطعوا شريانـه
هذي قراراتي أنـا أتحملهـا .

اسرح بتفكيري بحلم الليل جبت الكـون جـوب
رجعت من رحلة خيالي شوق وهمـوم وضنـا
اهرب من الواقع ولكن مانفـع حلـم الهـروب
ابعد وألاقي قلبـي المشتـاق مـن طيفـك دنـا
جيتك انا بإحساس صادق يكتسي وجهي شحوب
جيتك من الغربـه مشاعـر هدهـا ليـل العنـا
جيتـك ولكـن مالقيـت إلاسنـا حلـمِ كـذوب
ورجـعـت اردد كلمتـيـنٍ قلتـهـا الله لـنـا
رجعت أكفكف دمعتي:رجعت بإحساس الغروب
بيـن الضيـاع وظلمتـه كفنـت حلـمِ ضمنـا
حسيت بأمواج الألم تهزني مـن كـل صـوب
وصوت الحزن في داخلي شيد له أقصور وبنـا
مشيت بإحساس الغريب والهم في قلبي يـذوب
عجزت أكمل رحلتـي جلسـت أناظـر دربنـا
يادرب هاذيك القلـوب الباكيـة كانـت قلـوب
واليوم يادرب التعاسة مـن عليهـا قـد جنـا؟
أقلوبنا ذيـك الطيـور اللـي تقاذفهـا الهبـوب
أحلامهـا ماتـت كمـا وردٍ تفتـح وانحـنـى
يادرب كيف أسامحه ؟ماهو على الفرقا مغصوب
ماكنـت أظنـه ينهـزم: ويقتـل بقايـا حلمنـا
كيف اعذره وأنا الذي أهديت له قلـبٍ عـذوب
سكن بريضانه وحيـد وصـار حلمـه والمنـى
ضويت له شمعة وفى و نورت له كل الدروب
حسسته انه غير:كل النـاس فـي عيونـي أنـا
ماهمني حكم البشر:ماهمني خـوض الحـروب
ماهمني لوكـان عمـري دون حبـي لـه فنـا
يادرب من عقب العطا بصد: وعن حبه بتـوب
مـدام قلبـه ابتعـد وش ينتظـر قلبـي هـنـا
قررت أكمل رحلتي وان كان لي عمر أمحسوب
رحلة حزينِ عـاش فـي دنيـاه عمـره ماهنـا
يمكن تطوّل رحلتي وأنسى غدر قلـبٍ لعـوب
ويمكن :ويمكن والأكيد انـه سكـن فينـي أنـا

لاتنشدين الغصن وش فيـه ذاوي
مليت اجاوب كل من صاح نشـاد


هذي مـواري علتـي والبـلاوي
وهذي مواري دمعتي حزن وحداد


هذي جروحٍ مبطيـة يامضـاوي
دايم عليها تنزف اجـروحٍ اجـداد


جرحٍ عطيبٍ وازرق الدمع كاوي
وليل الشقى يضرب على خافقٍ باد


جرح الزمن اصبح لقلبي مخـاوي
مثل الرفيق اللي عن الدرب ماحاد


اسير قلبي في همومـه شقـاوي
كنه سجينٍ سيـق للمـوت منقـاد


لاعاد له ضحكٍ ولالـه غنـاوي
ولا له مع العالم تباشيـر واعيـاد


بين الضلوع يجر صوته خـلاوي
يغني اجروحه شقى/هم واسهـاد


وش حيلته لاصار طيـره نـداوي
والوقت جايـر والمخاليـق نقـاد