روآيه غموض خآلد كآمله

العصر

صلينا انا وخلود بالحرم ,,, وتركنا معاذ نايم عند ام عبد الله بالفندق ,,, وسالم وسلمى طلعوا قبلنا مع خالد

بعد الصلاة طلعت انا وخلود للمحلات المنتشرة حول الحرم

خلود = خالد ابي اشتري لامي هديه

كنت عارف انها اذا راحت مكة بتزيد طلباتها واخذت احتياطاتي وتسلفت الفين مع الالفين اللي معي وصاروا اربعه ,, يكفّون

مسكينة خلود ,,, ليت امي تفكر فينا زي ماتفكر خلود بأمي,,, انا الى الحين زعلان من امي ومن تخليها عنا ,,, ولا قدرت امنع نفسي اكتم اللي بصدري

انا بسخرية = هه هدية ,,, ولمن لامي .؟ ,,, خليها تتذكرنا اول ,,, وبعدين قولي ابي هديه لها ,,, وش قالت قالت هدية

التفتت خلود لي وبعدها لفت وجهها عني

خلود = امي ماتخلت عنا ,,, زوجها هو اللي يمنعها

عصبت بس وش الفايدة ,,, اعكر مزاجنا بس على الفاضي وحاولت امسك اعصابي

انا = امشي ,,, تحركي قدامي اشوف


خذنا نص ساعة وحنا نتمشى ونلف وندور ونتفرج ,, فجأة رن جوالي والقيت نظرة عليه

( ناصر يتصل بك )

اففففففففففففف وش يبي ذا ,, ماني راد خله يولّي

رن رن رن لين سكت

خلود = خااااالد احم ,,, ابقول شي بس لا تعصب

رفعت حواجبي مستغرب ,,, وش عندها

انا مستغرب = خير

خلود = ابي اشتري لاب تووووب ,,, خالد الله يخليييك ابي لاب توب

طيرت عيوني فيها

انا = لاب توب .؟ مجنونة انتي .؟ ,,, من وين لي ,,, انا مامعي الا اربع الاف ونصهم متسلفهم ,,, وفيه اشياء اهم من الاب توب نحتاجها

خلود = بس خالد كل الناس عندهم الا حنا ,,, وبعدين قهر عندنا انترنت بس ماعندنا كمبيوتر ,,, خالد الانترنت يسليني وقت فراغي

تنهدت وسكت ,,, انتظرت خلود مني رد ,,, ويوم شافتني طوّلت ساكت وهي تنزل راسها ومشت

ادري ياخلود اني مقصر معكم واجد بس مابيدي حيلة ,,, وش تبيني اسوي ,,, اسرق .؟

شرت خلود اللي تبي ,,, بس ظلينا نتمشى ونتفرج على الرايح والراد ,,, رن جوالي مرة ثانية ,,, افففففففف هذا اكيد نويصر ,,, والقيت نظرة عليه

( ابراهيم يتصل بك )

ابتسمت ورديت

انا بابتسامة = هلاااا والله

ابراهيم = هلا فيك ,,, السلام عليكم

انا = وعليكم السلام والرحمة

ابراهيم = وينك يارجااال ,,, غايب يومين

ابتسمت ياحليلك يابراهيم كل ماغبت سأل عني

انا بابتسامة = انا بمكة الحين

سكت ابراهيم شوي

ابراهيم = مكة .؟ وش القصة كل الناس رايحين لمكة ,,,, صالح يقول ان خالد و ابو عبد الله واهله بعد معتمرين ,,, والحين انت بعد

انا = ههههههههههه برهوم ,,, انا وخالد بسيارة وحدة

سكت ابراهيم شوي

ابراهيم بمزح = ايها الخالدان الخائنان ,,, ويحكم وويح وجيكم المتنفخة ,,, ليش ماعلمتوني اروح معكم .؟

انا = هههههههههههههه حلوة وجيهنا المتنفخة

ابراهيم = انت وخالد صايرين ثنائي مشاء الله عليكم ,, بس ثنائي غير شكل ,,, تمشون مع بعض وتسافرون مع بعض واسماءكم مثل بعض حتى التكفخ تتكفخون مع بعض ههههههههه

ابتسمت

انا = ماسألت صالح ليش ماراح مع ابو عبد الله وعمته .؟

ابراهيم = الا سألته ,,, يقول ابوي عيا ههههههه ,,, ابوه صاير متشدد عليه بعد سالفة خالد

انا بحزن = على الاقل عنده اب يخاف عليه

ابراهيم = امممم اقول خالد انا اتصلت عليك ابي اسألك عن خالد ,,, انت متأكد انه يبي يروح للرياض خميس وجمعه ,,, اشوف الرجال راح لمكة وانا هنا اهوجس وافكر

انا = ايه متأكد

ابراهيم = تراك من يوم ماعلمتني عن توعده للشباب وانا بس اهوجس

انا = تدري ليه اعمترنا بوسط الاسبوع .؟

ابراهيم = ليه .؟


انا = عشان يمديه يروح للرياض خميس وجمعه

تنهد ابراهيم وسكت

انا = ماقلتلي وش سويت ,, تقدر تروح معه للرياض .؟ ,,, ابراهيم مانبي نتركه لحاله ,,, الرجال طافح الكيل معه وانا الصراحة خايف يصيرله شي

ابراهيم = يصير خير ان شاء الله ,,, اجل ابروح للضابط الحين واعلمه

انا = وشوله تروح للضابط ماراح يفيدينا بشي ,,, بالعكس يمكن تورط خالد اكثر ويعلم ابو عبدالله ,,, وبعدين انا مابي خالد يعرف اني علمتك ,,, اخاف يزعل مني ,,, انا بس ابيك تروح مع خالد للرياض وكأنك رايح معه كذا لشغلة لك

ابراهيم = واذا الضابط علّم ابو عبد الله .؟

انا = والله مدري انا محتار ,,, من جهه ابي ابو عبد الله يدري ومن جهه مابيه يدري ,,, ابو عبد الله هو الوحيد اللي يقدر يمنع خالد انه يروح ,,, بس المشكلة اهل خالد هناك ,,, امه واخواته يحترونه ,,, واذا الضابط علم ابو عبد الله بيمنع خالد اكيد ,,, وخالد عنيد ,,, واخاف تصير بينهم مشكلة ,,, وغير كذا خالد بيزعل مني لانه ماعلم احد الا انا

ابراهيم = خالد درء المفاسد مقدم على جلب المصالح ,,, ايهم احسن نخليه يروح عشان اهله ويمكن يصير له شي والا نمنعه عشان سلامته

انا بحيرة = والله مدري

ابراهيم = خالد فرصتك الحين مدام انك مع ابو عبد الله

انا مستغرب = فرصتي ,,, وشلون .؟

ابراهيم = حاول بابو عبد الله تقوله يمنع خالد يسافر للرياض الاسبوع هذا

انا مستغرب = وشلون

ابراهيم = مدري شفلك طريقة واقنع ابو عبد الله يمنع خالد يسافر للرياض,, وصح كلامك الضابط ماراح يفيدينا بالموضوع هذا خاصة ان استراحة خالد بالرياض ( تنهد وكمل ) ليت استراحته هنا كان قدروا يمسكونهم من دون كمين وبالراحة بعد لأنهم الحين داخلين استراحته بالغصب ,, اخ بس ليت الاستراحة هنا

تنهدت وسكتت

ابراهيم = طيب اخليك الحين ,, متى بتجون .؟

انا = مدري الصراحة ,, الشور عند ابو عبد الله

ابراهيم = توصلون بالسلامة ان شاء الله ,,, يله اتركك الحين ,, مع السلامة

انا = مع السلامة

وسكرت عنه

خلود = الحين حنا اعتمرنا بوسط الاسبوع عشان خالد .؟ مو تقول اللي اقترح عليكم ابو عبد الله .؟

انتبهت لخلود وضربت جبهتي ,,, صح انا وشلون نسيت انها تسمعني ,,

تذكرت معاذ وقلت عشان انسيها

انا = صح خلود خلينا نرجع يمكن معاذ قام الحين ,,, والا تبينا نصلي بالحرم اول .؟

خلود = لا ,, نبي ننزل الاغراض بالفندق وابي اروح معك للحرم ,, صح خالد شف

وطلعت من شنطتها جوال بس مثل جوالات الشيبان ,,, استغربت من وين لها هالجوال

انا مستغرب = من وين لك هذا .؟

خلود = من خالتي ام عبد الله ,,, عطتنياه تقول خليه معك اخاف تضيعين من اخوك ويمكن تحتاجينه

ابتسمت وبعدها ضحكت ,,, شكل ام عبد الله تحب خلود ,,, الحمد الله

خلود = ابي اضيع منك عشان استعمله

مت ضحك عليها وعلى خبالها ,,, وعجزت امسك نفسي عن الضحك لين دمعت عيوني


المغرب

صلينا بالحرم بس مامدانا ننزل اغراضنا بالفندق ونزلناه في مكان شوي آمن وبعد الصلاة رجعنا لاغراضنا والحمد الله لقيناهن موجودات

وحنا بالطريق رايحين للفندق ,,, رن جوالي والقيت نظره عليه

( ناصر يتصل بك )

تضايقت ورديت

انا بضيق = خير

وتفجأت فيه معصب

ناصر بعصبية = اسمع خويك بيضيّع العيادة بسبب جهله وعناده

انا = وانت وش عليك منه ,,, العيادة عيادته وهو حر

ناصر بعصبية = لا ماهي عيادته ,, اكثر الموظفين رافضين العمل احتجاج على تأخر الرواتب ,,, اسمع ولا ابي اكثر الكلام معك ,,, ابي اقابلك بكرة وضروري

انا بملل = انا الحين مسافر متى مارجعت قابلتك

ناصر = ومتى ترجع .؟

انا = مدري بس يمكن بكرة

ناصر = خلاص اجل اذا جيت اتصل علي

انا = انت وين الحين .؟

ناصر = بالقصيم ,,, خلاص بكرة اقابلك .؟

انا = لا ,,, اشوف يوم الخميس واتصل عليك

ناصر = اسمع انا وسعت صدري على خويك ومالي خلق اوسع صدري عليك ,,, تفهم .؟

وسكر بوجهي ,,, فاااارق مالت عليك وعلى وينلي من وراك

رجعنا الفندق ,,, ودخلت خلود لقسمها ورحت انا لقسمنا ودخلته ,,, واعترض طريقي سالم فرحان ,,,

سالم = خاااااالد شف

لابس بنطلون جيشي وفنيلة سودا ,,, طلع خالد من الغرفة الثانية وهو يضحك ووقف بجنب سالم

ابتسمت توني افهم سبب فرحة سالم ,, خالد بعد لابس بنطلون جيشي وبلوزة سودا

خالد = نشبه بعض صح ههههههههههههههههه

انا بابتسامة = ايه تشبهون بعض حتى بالعقل سبحان الله هههههههههه

ومشيت متخطي خالد ابي اروح للغرفة الثانية ,, بس تعرقلت بشي وطحت على الارض

جلست اشوف اللي تعرقلت فيه ,,, وكانت رجل خالد ,,, ماد رجله بطريقي وطحت

انا بعصبية = ياااااحمااااار

خالد = تستاهل

راح سالم يناقز مستانس على طيحتي بالارض

انا اصلا تعبان من الفرفرة مع خلود والحين عاجز اقوم ,,, اجلس بالارض احسن

انا بمزح = اصلا انا كنت ابجلس بالارض ,,

ضحك خالد وجلس بجنبي على الارض ,,, انتبهت انه معلق يده اليسرى برقبته ,,, خالد من المقيات الى اليوم العصر ماعلق يده

انا = ليه يدك تعورك.؟ ( واشرت عليها )

حط خالد يده اليمنى على عضده الايسر

خالد = ايه ,,, تراني قلت لخالي بنتعشى اليوم برا الفندق ووافق ماعنده مانع بس يقول بنطوف الفجر طواف الوداع ونمشي قل لاهلك يتجهزون

انا = اهاااا


بعد صلاة العشا

طلعنا من الفندق وركبنا السيارة وكل واحد اخذ مكانه

مرينا المطعم اول ونزلنا انا وخالد وشرينا عشانا ورجعنا للسيارة

خالد = رح لعرفة

انا = لا مزدلفة

خااالد = لا عرفة

انا = مزدلفة

خالد = عرفة

انا = طيب نسأل البقية ونشوف رايهم ,,, هاه ياعم تبي عرفة والا مزدلفة .؟

ابو عبد الله = والله ياولدي التمشية هذي لكم ,,, شوفوا انتم وين تبون وانا معكم

طالعنا انا وخالد بعض

انا = مزدلفة

خالد = عرفة

طالعت قدام

انا = مزدلفة ابرد واوسع

خالد = بس عرفة احسن ( وطالع قدام ووجه الكلام لخالته) هاه خاله تبين عرفة والا مزدلفة .؟

ام عبد الله = على كيفكم انتم

انا بتنهيدة = مزدلفة وخلاص

خالد = عرفة وخلاص

انا = ياااخي وش تبي بعرفة ,,, وبعدين انا مابي البزارين يركبون الجبل

= الا انا ابي

رفعت نظري للمرايا الامامية اشوف خلود اللي تكلمت فجأة ,, متغطية ماشوف منها شي بس شفتها حاطة يدها على فمها

ضحكت ام عبد الله وشفتها تضمها وهي تضحك ,, الخبلة خلود انا قلت مابي البزارين يركبون الجبل وهي قالت الا انا ابي ,,, الا اذا كانت تعتبر نفسها بزرة هذا شي ثاني

التفتت لخالد ولقيته يطالع دريشته ويحاول يمسك نفسه عن الضحك ,,, وحاط يده على صدره بمكان الخياطة ,,, شكله عوره الجرح

انا = يعورك صدرك .؟

حرك خالد راسه باية وهو ماسك ضحكته

انا = احسسسسن

وكأني قلت نكته ,,, زاد بالضحك ,,, مالت عليه وعلى خلود

ام عبد الله = روحوا عرفة ,,, خلاص نبي عرفة

انا = إن شاء الله

خالد بابتسامة عريضة = كان تكلمتي من زماااااان ,,, من الصبح وانا احاول فيه


وصلنا عرفة ونزلوا ورحت انا اوقف السيارة بمكان مناسب ورجعت لهم ولقيت ابو عبد الله وزوجته جالسين يسولفون وخالد جالس عندهم ويسمعهم وسالم وسلمى ومعاذ راحوا يلعبون بعيد عنا شوي

وخلود كانت جالسة لحالها على صخرة تحت الجبل ,,, رحت لخلود وجلست عندها

انا = السلام عليكم يابزرة

خلود = مانتبهت لنفسي

انا = انا قلت البزارين ,,, الا اذا كنتي تعتبرين نفسك من البزارين .؟

خلود = وش اسوي فيك ,,, انا ابي عرفة وانت تبي تودينا مزدلفة


رحنا نتمشى شوي انا وخلود ,,, وانا افكر وشلون اكلم ابو عبد الله يمنع خالد عن السفر للرياض ,,, المشكلة خالد دايم يامعي يامع ابو عبد الله ,,, مافيه مجال نكون لحالنا ,,,, شسوات الحين وشلون اصرفه

شرا خالد للبزارين اسكريم وهالمرة الكل صار بزر حتى ابو عبد الله شراله خالد اسكريم

تعشينا بعرفة ورجعنا للفندق والكل خلد للنوم




قمت من النوم ابي اروح للحمام لكن انصدمت بخالد اللي جالس بسريره وحاط راسه على ركبه ,,, ظليت منسدح ولا قمت ,,, وصرت اطالع خالد ,,, وش فيه ليه ماينام ,,, اليوم وش زينه يضحك ويسولف

ايه صح تذكرت ,,, هو دايم يقولي انا ماانام الليل ( طيرت عيوني ) معقول يجلس كذا يوميا طوال الليل يفكر ويهوجس ,,, والا فيه سبب ثاني .؟

اخذت جوالي بشويش من تحت المخدة وحاولت القي نظرة بس الغرفة مظلمة ,,, واخاف اولع نورالجوال وينتبهلي خالد ( غطيت راسي باللحاف ) وشغلت نور جوالي والقيت نظرة على الساعة

الساعة 3

3 آخر الليل ,,, متى ينام هذا اجل ,,, ووش يفكر فيه بالضبط بوينلي والا بناصر والا ببدر وربعه

توكلت على الله وقمت من سريري وجلست على سرير خالد ,,, انتبهلي خالد ورفع راسه يطالعني

خالد بتعب = خالد ,,, ليه قمت .؟

استغربت تغير صوته

انا = ليه مانمت .؟

نزل خالد راسه

خالد بهمس = ماجاني نوم

انا = وش تفكر فيه .؟

خالد = بكل شي

حطيت يدي على ركبته

انا = الله بيخلصك منهم كللللهم ان شاء الله ,,, كلهم ياخالد ,,, خلنا نروح للحرم يمكن ترتاح شوي

خالد = ماقدر مصدع مرة ,, راسي يعورني ,,, اخاف افقد وعيي وانا بالحرم

انا = اكلت علاجك .؟

خالد بتنهيدة = ايه ( حط راسه على ركبه ) رح نوووم ماعليك مني

قمت وجلست بجنبه ملاصق له ولفيت يدي على اكتافه

انا بابتسامة = طار عني النوم ابجلس معك

خالد بهمس = خالد

انا = سم

تكلم خالد بكلمات ماسمعتها بسبب صوته الضعيف ولانه حاط راسه على ركبه

انا = وش تقول ارفع صوتك ماسمعتك

رفع خالد راسه والتفت لي ,, ولقرب وجهه مني شفت ملامحه بوضوح ,,, شكله حزين ,,, حزين مرة ,,, هالات وشحوب وعيونه ناعسة

خالد = ابي اقولك سر بس اوعدني ماتعلم احد

تفاجأت منه ,, و مدري ليه خفت ,, سر ,,, سترك ياارب

انا بخوف = آآآ ,, اوعدك ,, سرك ببير ياغالي

خالد = لا تعلم أي احد ,,, احس ابنفجر اذا كتمت بصدري اكثر

انا = فضفض ياخالد قل اسمعك

طيرت عيوني فيه لما شفت الدموع تجتمع بعيونه تبي تنزل ,,, غمض خالد عيونه ونزل راسه وسكت

انا بصدمة = خااالد

خالد = خلاص انسى انسى ( وحط راسه على ركبه ) رح نوم ,, رح خالد خلني بحالي

انا = قل اللي بخاطرك ياخالد يمكن اقدر اساعدك

وكأني جرحته بهالكلمة

بكى بصمت

انا بخوف = خالد وش فيك خوفتني ياشيخ

انسدح خالد على ظهره وغطى نفسه بلحافه

خالد = خلاص رح نوووووم

انا = خالد قلي وش فيك ,,, وينلي سوا شي .؟

مارد علي

حاولت اسحب اللحاف عن راسه بس تمسك فيه اكثر

انا = وش تبي تقول ,, اسمعك ,,, فضفض

ساكت ولا يرد

تنهدت و سكتت وظليت جالس عنده وانا افكر وخايف وش كان يبي يقولي وليش غير رايه ,,, لا يكون متورط بشي بعد وماحد يدري ,,, حياتك متعبة ياخالد وتتعب اللي معك

قمت ورحت للحمام وبعدها جلست على سريري وانا اشوف خالد يتقلب بفراشه ,,, حاولت فيه مرة ثانية يتكلم يقول اللي بخاطره وعيا وحاولت فيه يروح للحرم وانا معه وعيا

لين آذن الفجر وهو على هالحال ,,, وشلون الحين شكله تعبان مدري مهموم مدري وش قصته ,,, والمشكلة بعد صلاة الفجر بنطوف طواف الوداع ,,, بالله وشلون بيطوف هذا وهو على هاالحال

طلعنا انا وابو عبد الله وخالد نصلي الفجر والحريم جلسوا عند البزارين النايمين

طوال وحنا بالحرم وانا ملازم خالد ,,, وبعد مانتهينا من صلاة الفجر

ابو عبد الله = نبي نوادع الحين بس لازم ارجع انا وخالد للفندق وناخذ الحريم ( والتفت لخالد ) خالد اكلك علاجك وجهك ماهو عاجبني

خالد بهمس = ايه اكلته ,,, خلاص روحوا وانا احتريكم

ابو عبد الله = نبيك توادع الحين وترجع للفندق عشان تجلس مع البزارين مانقدر نتركهم بالفندق لحالهم

خالد بهمس = طيب

ابو عبد الله بخوف = خالد فيك شي .؟ تعبان .؟

خالد = لا بس مانمت امس

ابو عبد الله = الله يهديك كم مرة اقولك اترك عنك السهر

التفتت لخالد ,, وشلون بيطوف لحاله وهو تعبان ,,, لازم ارافقه بالطواف

التفتت مرة ثانية لبو عبد الله

انا = عم انت رح الحين وانا بوادع مع خالد

ابو عبد الله = واختك .؟

خالد بتعب = لا ,,, روحوا للفندق وانا بوادع واجيكم

انا بخوف = ايه بس انتـ

خالد = خلاص قلتلك رح

مسكت يد خالد وجريته بعيد شوي عن ابو عبد الله

انا بعصبية = انت خبل والا خبل

تأفف خالد وسكت

انا = ياخي شف شكلك وشلون صاير تقول طالع من قبر ,,, وشلون بتطوف لحالك .؟

خالد = انا بخير واقدر اطوف عادي ,, واخذت مسكن قبل اطلع من الفندق والحين الصداع خف ,,, وماهي اول مرة يجيني صداع ياخالد ,,, رح مع خالي

انا = خلني اوادع معك ونرجع مع بعض

خالد = واختك

انا = اطوف بعد معها مرة ثانية مو مشكلة

خالد بضيق = خالد ماهي اول مرة يجيني صداع ,,, صدقني انا بخير لا تخاف ,,, رح لخالي تأخرت عليه

وراح متوجه لصحن الحرم ,,,

عنيييييييييييييد

* 25 *























رجعت لبو عبد الله ومشينا متوجهين للفندق ,,, معقول خالد هذا ليله كل يوم يقضيه في السهر ,,, ماينام الليل كله يفكر ومهموم ,,, حسبي الله على هالوينلي وناصر فعلا معيشينه بخوف وهم ,,, مايكفيه مرض الصداع اللي فيه ,,, حسبي الله على عليهم بالذات ناصر ,,, احس هموم خالد كلها من تحت راسه ,,, حاااااااااسد خالد حسد ماهو طبيعي ,,, كل هذا بس عشان خالد رافض يبيع عيادته ,,, طيب هو حر ان شاء الله يحرقها ,,, صدق حسووووووووود



وصلنا الفندق انا وابو عبد الله ,, ورحـ



ايه صح ماكلمت ابو عبد الله عن سفر خالد للرياض ,,, من اليوم امشي معه وحنا ساكتين كان يمديني اكلمه ,,, اف يعني ما اتذكر الا يوم وصلنا الفندق



التفتت بسرعة لبوعبد الله



انا = احم ,,, عمي ,,, آآآ ,,, انا سمعت ان خالد بيروح للرياض الخميس



التفتت لي ابو عبد الله ووقف



ابو عبد الله = بيروح لحاله .؟



انا = آآآ ,,, مدري بس اكيد



ابو عبد الله = يبي يروح للرياض ويسلم على اهله يروح بس مايسوق هو ,,, لو اوديه انا بنفسي ,, انا قايله لا يسوق لين تتشافى يده



التفتت عنه بضيق ,,,ابو عبد الله همه ان خالد مايسوق وبس ,,



( تنهدت ) ياربي وشلون الحين ,,, اقوله ان ولده متوعد الشباب ويمكن مايطلع منها سالم هالمرة والا اسكت



ركبنا المصعد



انا = آآآ ,, عم طيب ليه ماتمنعه ,,, يعني احسن عشان يرتاح اكثر



ابو عبد الله = والله ياولدي انا ابيه يرتاح بس خالد الله يصلحه فاجأني بالعمرة وهو توه طالع من المستشفى ,,, حاولت فيه يأجلها بس الله يهديه عنيد والحين أمه بعد تسأل عنه وتشوفه ابطى عليها وحنا ماعلمناها باللي صار فيه ,,, والله ياولدي مانبي نخوفها ومدام انه سافر للعمرة اكيد يبي يسافر لها بس اذا مالقيت احد يخاويه انا الله يعينّي اوديه



ياربي مافيه طريقة امنعه ,,, ابو عبد الله مو فاهم شي على نياته



انا = عم حاول تمنعه ,,, لا يروح للرياض



ابو عبد الله = ليه .؟



انا بترجي = بس كذا امنعه



ابوعبد الله = لو خالد ماراح للعمرة كان اقنعت امه مايزورها هالاسبوع هذا بعد ,,, بس مو معقول يروح لمكة ولا يروح للرياض يزور امه ,,, وبعدين ياولدي امه دايم تتصل علي وتسأل عنه ,,, شكلها والله اعلم انها حاسه ان ولدها فيه شي



انا بحيرة = خله يتصل عليها طيب بس لا يروح



ابو عبد الله = خالد دايم يتصل عليها وهي تتصل عليه ,, بس قلب الأم ياولدي شكلها حست ,,, الله يحفظه لها ويخليه ويصلحه



تنهدت وسكتت ,,, وشلون يعني ,,, خالد بيرووووووح لبدر وراكان ,,,,



لازم ابلغ ابراهيم ,,, لازم ابراهيم والا انا يروح معه ,,, لازم



دخلنا انا وابو عبد الله قسمنا وكل واحد راح يرتب اغراضه ,,, انا ارتب اغراضي واغراض سالم وابو عبد الله يرتب اغراضه ,,,



خلص ابو عبد الله ترتيب اغراضه وجلس على احد الاسرّة ,,, التفتت له ولقيته يفكر وعلى ملامحه الخوف



استغربت وش فيه



تركت اللي بيدي وجلست عنده



انا = عسى ماشر ياعم اشوفك مانت مرتاح



التفتت لي وعلى وجه الخوف



ابو عبد الله = ليتني رحت اوادع مع خالد ,,, شكله تعبان واخاف يغمى عليه



انا = انا قلتله ابوادع معك وعيا ,,, وبعدين لا تخاف عليه ياعم هو كان سهران امس كذا بس ,,, ماعليه شر ان شاء الله



قلت كذا عشان اطمن ابو عبد الله بس



تنهد ابو عبد الله وقام متوجه لسرير خالد وبدا يرتب اغراضه



قمت ورحت اكمل شغلي ,,, انا بعد اخاف يغمى عليه وهو يطوف ,,, هو امس قالّي مايقدر يروح للحرم لأنه مصدع ( تنهدت) الله يستر عليه



ماندري وين بيوصلك عنادك ياخالد ,,, احيان تعاند نفسك واحيان تعاند بدر وشلته واحيان تعاند وينلي وذيله على قولتك ,, حتى ابوك تعانده





مرت علينا ساعة وحنا نحتري خالد ,,, بدا ابو عبد الله يرتبك ويهوجس اكثر بسبب تأخره ,,, حاولت اهديه واقوله الحين يجي وانه ماعليه شر لكن مافيه فايدة



انا = الحين ابتصل عليه ونشوف وينه



طلعت جوالي واتصلت عليه



ثواني ورد



خالد = هلا خالد



صوته ثقيل وانفاسه مسموعة كأنه يركض ,,,



انا = وينك ,,, ليش تأخرت .؟



خالد بتعب = ماتأخرت



رفعت حاجب واحد ,,, مرت ساعة عليه ويقول ماتأخرت ,,, ترا كل الدعوة طواف ومافيه زحمة بعد ,,, لكن سكتت عنه ,,, ابو عبد الله بجنبي ولا اقدر اقول شي



انا = اهااا طيب ,,, وينك الحين .؟



خالد = باقي ماخلصت



طيرت عيوني ,,, وش اللي ماخلص ,,, يحج هذا والا وش يسوي



ابعدت شوي عن ابو عبدالله ,,, وهمست لخالد



انا بهمس = وشلون ماخلصت ,,, صار لك ساعة ,,, كم تطوف انت .؟



خالد بتعب = مصدع وشمس وحر ,,, جلست شوي ارتاح ,,, يله يله الحين اخلص



وسكر بوجهي



طالعت الدريشة مستغرب ,,, فيه شمس بس خفيفة الحين مابعد احترّت ( رفعت حواجبي بسخرية ) ياااي يالناعم بنوته على غفله ماتتحمل حرارة الشمس





وبعد نص ساعة وحنا نحتريه دخل علينا خالد ووجه احمر من التعب والشمس والحر



تنهد ابو عبد الله بارتياح يوم شاف خالد وسمعته يحمد الله ويشكره ,,, انسدح خالد مباشرة على احد الاسرّة بتعب



ابو عبد الله = وش فيك ياولدي تأخرت ,, خوفتني عليك



التفت خالد لخاله وهو منسدح



خالد بتعب = ماتأخرت واجد ,,, يله الحين دوركم ,, وانا ابقعد عند البزران



قام ابو عبد الله وجلس على السرير بجنب خالد وحط يده على صدر خالد



ابو عبد الله = اكلك دواك .؟



خالد = سألتني اليوم الفجر ,,, ايه اكلته



ابو عبد الله بخوف = اشوفك تعبان ووجهك ماهو عاجبني ,,, صدرك يعورك والا يدك ,,, خلني اوديك المستشفى .؟



تأفف خالد متضايق



خالد بضيق = مايعورني شي ,,, يله خال رح ولا عليك مني ,,, انا بنوم لين تجون



سكت ابو عبد الله وطالعه شوي بتشكك وبعدها قام





رحت لقسم خلود وشلت سلمى النايمة وحطيتها على سريري بجنب سالم



اما معاذ اخذناه معنا مع انه نايم ,,, ماقدرت اخليه عند خالد اخاف يزعجه وهو بنفسه تعبان



اخذنا ساعة وحنا نطوف ,,, ابو عبد الله وام عبد الله بطيئين بالحركة خاصة ابو عبد الله حركاته بطيئة



خلصنا ورجعنا للفندق وعطيت خلود معاذ ودخلوا قسمها



وقف ابو عبد الله وام عبد الله بين القسمين يتكلمون وكأني سمعت كلمة جدة بينهم



تركتهم و دخلت قسمنا ,,, لقيت خالد جالس بالارض ويفطر وهو مازال عليه بنطلونه الجيشي



وسلمى جالسه بحظنه ويعطيها خالد من الفطور ويلقمها والاخت تاكل وهي مكسله



أما الاخ سالم حاط راسه على فخذ خالد ونايم



التفتت لخالد اللي يعطي سلمى و ابتسمت ,, لاه شكل خالد الحين تمام



وقفت قدامهم وحطيت يدي على خواصري



انا = هيه انت قاعد تفطر ,,, قم يله بنمشي



رفع خالد راسه لي



خالد = انا جايب لنا وللحريم فطور ,,, اجلس خلونا نفطر الحين وبعدين نمشي



انا = امممم الصراحة انا جوعاااان ,,, يله نفطر نفطر وش ورانا ( وجلست قباله)



طالعت سالم واستغربت ,,, شكله نام وهو يبكي



انا باستغراب = وشفيه سالم .؟



خالد = من اليوم وهو يصيح يقول ليش راحوا عني



انا = اوووه سويلم عليه طلعات ( والتفت لخالد ) شكله ازعجك اجل ,,,, انت من دون صياح مصدع وشلون عاد مع صياح سالم



خالد = لا ,,, اكلت مسكن مرة ثانية والحين احس نفسي احسن ,,, وين خالي .؟



أشرت له بيدي للباب وانا أكل ,,, لاحظت على سلمى انها متساندة على صدر خالد بكسل



انا = بتعورك البنت مع جرحك ياخبل ( والتفتت لسلمى ) قومي سلمى



خالد = لا خلها مـ



= وش تسوون .؟



التفتنا لبوعبد الله اللي دخل علينا الغرفة



خالد = ابد ياخال نفطر ,,, تعال الحق على الفطور لا ياكله عنك هالمشفوح ( وأشر علي )



ابتسم ابو عبد الله وهو يشوف خالد يكلمه بصحة زينة



ابو عبد الله بابتسامة = نفطر بالطريق ,,, مكروه الجلوس بعد طواف الوداع من دون حاجة ضرورية ,,, يله قوموا ( وراح للغرفة الثانية )



التفت خالد لي



خالد = يله قم ,,, من اليوم اقولك قم قم ,,, وتقول لا ابجلس افطر



التفتت له وانا رافع حواجبي



انا = ياسلام اجل من اللي قالي اجلس وافطر( ورميت عليه كرتون المناديل ) قم وقوّم سالم معك



ورحت عنه وانا ابتسم



طلعنا من الفندق و كل واحد اخذ مكانه بالسيارة وحركنا ,,, بس تفاجأت بقرار ابو عبد الله



ابوعبد الله = خالد وانا عمك نبي نمر جدة



طالعنا انا وخالد بعض مستغربين



خالد مستغرب = جدة !



انا = ليه ياعم .؟



ابو عبد الله = اعرف واحد بجدة وابي خالد يتعرف عليه



خالد مستغرب = خالد انا والا خالد هذا ( واشر علي )



ابو عبد الله = لا انت



قطب خالد حواجبه مستغرب ,,, انا عن نفسي كأني فهمت من هالواحد هذا اللي يقصده ابو عبد الله



خالد = من هذا اللي تبي تعرّفني عليه .؟



ابو عبد الله = ابعرفك على واحد اعرفه بيساعدك ويدور لك شقة مناسبة لك ,,, النصف الثاني ابيك تكمل دراستك بجدة



التفت لي خالد معصب من خاله ,,, طالعت خالد وانا متضايق من ابو عبد الله وتفكيره وخوفه الزايد على خالد



خالد بعصبية = لا تدخل جدة ,,, قلتلك ياخال دراسة بجدة ماني دارس



ابو عبد الله = ليه ماتدرس وش فيها جدة .؟



خالد بعصبية = مافيها شي ,,, بس دراسه فيها ماني دارس واذا كان قصدك اللي صار لي من بدر وربعه اوعدك ماراح يتكرر



مسكت الدركسون بقوة ,,, يهدد بشكل غير مباشر قدام خاله



ابو عبد الله بترجي = بس انا خايف عليك منهم ياولدي ,, اذا كنت تبي راحتي ادرس الفصل الثاني بجدة ,,, انا ابي اتطمن عليك انت وحيدي اذا ماتطمنت عليك اتطمن على من



خالد بعصبية = اتطمن ( وكمل بصوت هامس ) اصلا ماراح تجي العطله النصفية الا وانت مرتاح من بدر وراكان ياخال



سكت ابو عبد الله شوي



ابو عبد الله بحزن = وشلون اتطمن والضابط قال انهم طلعوا من السجن



ام عبد الله = خاالك خايف عليك ويبي مصلحتك وامك بعد خايفه عليك ياخالد ,,, اسمع كلامه لين الله يفرجها ويخلصك منهم



خالد بعصبية = انتم الحين مكبرين السالفة ليش ,,, اول شي الترم الثاني توه باقي عليه ,,, ثاني شي قلتلكم اللي صارلي ماراح يتكرر مرة ثاني ,,, والا مستعجلين تبون ترتاحون مني ياخالة



ام عبد الله = ليه تقول هالكلام ,,, انت زي ولدي والله عوضني بعيالي فيك



التفتت ورا ولقيت ابو عبد الله منزل راسه وساكت وام عبد الله كذالك



لا حول ولا قوة الا بالله شكلهم تذكروا عيالهم ,,, التفتت لخالد ولقيته يطالع قدام ومقطب حواجبه بعصبية وواضح على ملامحه التحدي ,, قبل يهددعشانهم اعتدوا عليه ودخلوا استراحته والحين مو مستقر بسببهم ( تنهدت ) اكيد بيروح للشباب ,,, عاد الحين معصب زيادة منهم ,,, وشلون امنعه وشلون



وقفت السيارة عند المحطة اعبي بنزين قبل نطلع من مكة ,,, نزل خالد وراح يشتري اغراض ورجع



عبينا السيارة ووقفت ماطلعت من المحطة محتار ,,, وشلون الحين امسك طريق جدة والا الطايف



انا = احم ,,, آآآ ,,, عم ترا ابمسك طريق الطايف



خالد بعصبية = ايه امسك طريق الطايف بعد تشاور ,,, انا وراي سفر للرياض متى يمديني اوصل



التفتت لخالد معصب



انا بعصبية = انت انطم واسكت



ابو عبد الله بحزن = سو اللي تبيه ياولدي مالي شور الا على عيالي



طير خالد عيونه والتفت لي منصدم,,, طالعته شوي وانا متأثر وبعدها نزلت راسي وسكتت ,,, فجأة نزل خالد من السيارة وفتح باب خاله



خالد = شورك على عيني وراسي ( وسلم على راس خاله ) انا خادم عندك وعند خالتي ,,, والله ياخال لو تقول ادرس برا وريحنا منك اقولك سمعن وطاعة ,,, انا ولدك وشورك يمشي علي ( وانحنى يسلم على يد خاله )



لف ابو عبد الله يديه حولين راس خالد وضمه لصدره وهو يجاهد الدمعة



ابو عبد الله = الله يرضى عليك ويحفظك لي ,,, انا كل اللي اسويه من خوفي عليك مالي بهالدنيا الا انت واخواتك



= فيه مشكل بابا ,,, يلا روح امشي ,,,



انتبهت للهندي اللي واقف عند دريشتي ويكلمني ,,, بسم الله الرحمن الرحيم منين طلع ذا ,,



انا مستغرب = هاااه



عامل المحطة = هادا فيه سيارة تاني ورا انته يبي يجي ,,, يله روح روح



اوووووووه صح نسيت اني واقف عند المحطة وماحركت السيارة



انا = طيب لا تدف



التفتت ورا مرة ثانية اشوف خالد وخاله ,,, ولقيت خالد يراضي خالته ويكلمها



انا = خالد يله اركب ,,, السيارات جوعانه ورانا تبي تاكل



التفت خالد للسيارات ورجع يلتفت لخالته بسرعة



خالد = حقك علي ياخاله ماكنت اقصد



وركب بمكانه بسرعة



اشر لي خالد بيده يعني خذ طريق الطايف ,,, نفذت الكلام وانا ساكت ,,, جدة الحين مانبي نروح لها ,,, اصلا مالها داعي الحين ,,, ابو عبد الله مايفكر بعقله يفكر بعاطفته



وحمدت الله ان ابو عبد الله ماعارض ولا شي بالعكس ساكت ,,, او مدري يمكن الى الحين ماخذ بخاطره من خالد



افطرنا بالطايف وكملنا المشوار



ساعة



ساعتين



وبديت انعس وانا اسوق



اففففففففففففف ودي انام



التفتت لخالد ولقيته رافع رجلينه على الطبلون ويلعب بجواله



انا = قاعد تلعب بجوالك ,,, سولف معي ابي أي شي يطير النوم عني



التفت لي خالد



خالد = تبي تنوم .؟



انا = لا ابي انام



ابتسم خالد



خالد = طيب ,,, تبي تنام .؟



انا = لا ابي انوم



ضحك خالد واعتدل بجلسته



خالد بابتسامة = سلملي الطارة وانا اسوق عنك



التفتت ورا لبو عبد الله ولقيته نايم ,, اما ام عبد الله ماشوف منها شي ولا ادري عنها نايمة والا لا ,,, طالعت المرايا الامامية ابي اشوف خلود ونفس الشي ماشوف منها شي ولا ادري بعد هي نايمة والا لا



التفتت لخالد مرة ثانية



انا = لا شكرا مانبي منك شي بس سولف معي



خالد = اسولف معك وش اقول ,,, شغل أي شريط وتسمّع



انا بملل = اللي ورا شكلهم نايمين



ماسمعت من خالد رد والتفتت له ,, لقيته الحمار يلعب بجواله ومطنشني



افففف لازم اجيب سالفة عشان يسولف معي ,,, امممم وش اقول وش اقول ,,,

فجأة سمعت جوالي يرن



القيت نظره عليه ( ابراهيم يتصل بك )



ابتسمت مالي الا ابراهيم يسولف معي



انا = انا اقووووووووول ماحد بيسولف معي الا ابراهيم ,,, هلا والله



ابراهيم = اسولف معك ,,, وش تقول انت



انا = هههههههههه لا ولا شي ,,, وشلونك



ابراهيم = ابد الحمد الله طيب ,,, اخبارك انت ,,, شف حتى نسيتني اسلم ياللي ماني بقايل



انا = ههههههههههه وعليكم السلام والرحمة



ابراهيم = اممم خويلد لقيها نقدر نمنع خالد مايروح للرياض



سكتت فرحان ,,, انا اقول مالها الا ابراهيم ,,, بس لحظة خالد بجنبي ماقدر اتمادى مع ابراهيم بالكلام ,,, بيشك خالد فينا



التفتت لخالد ولقيته رافع رجليه على الطبلون ويلعب بجواله



ابراهيم = الوووو



انتبهت لابراهيم



انا = ايوة معك ,, كيف .؟



ابراهيم = عندي فكرة ماتخش الميّا



انا = اولا اسمها ماتخرش الميّا ماهو ماتخش الميّا



ابارهيم = هي فكرتي والا فكرتك ,,, انا ابيها ماتخش الميّا ,,, عندك مانع



ابتسمت



انا = لا ابد سلامتك ماعندي مانع ,,, بس وشي



ابراهيم = فكرة انما ايه عشان تعرف اني ذكي



انا = ايه انت اذكى واحد بس وشي .؟



ابراهيم = فكرة ماتخطر ببال احد ,,, ماتخطر الا ببال النجباء امثالي



انا بملل = ايه اخلص وشي .؟



ابراهيم = عشان تعرف ان أي مشكلة مايحلها الا الذيابه امثالي



انا بملل = لا إله إلا الله ,,, بتكلم والا وشلون .؟



ابراهيم = اصبر ,,, خلني اعلمك وشلون يفكرون الاذكيا عشان تتعلم مني



انا = اففففففففف يامصلك



( وسكرت بوجهه ) ,,, ابلشنا ذكي وذكي



اتصل ابراهيم مرة ثانية ورديت



انا بعصبية = بتكلم والا وشلون .؟



ابراهيم بزعل مصطنع = خدشت ذكائي



انا بصراخ = ياشييييييييييييييخ



التفتت لي خالد مستغرب ,,, وأشر لي بيده يعني شفيك



احم ,,, الله يقلع ابليسك يابراهيم رفعت ضغطي



ابراهيم = ههههههههههههه طيب طيب ابقول ,,, امزح معك يارجال وش فيك .؟



انا = طفشتني ,, يالله قل وش عندك



ابراهيم = الخميس وانتم هنا صح .؟



انا = ايه



ابراهيم = اسمع ,,, اليوم الاربعاء وانتم بعدكم ماجيتوا من مكة



انا = بالطريق حنا الحين



ابراهيم = المهم ,,, وبكرة احتمال خالد يروح للرياض صح .؟



التفتت لخالد ,,, اخاف يسمعني ويفهم علينا وش نقول



انا = ايه اكيد



ابراهيم = انا قلت ابسوي عزيمة شبابية يوم الخميس اللي هو بكرة بمناسبة خروج خالد من المستشفى ,,, طبعا العزيمة لخالد ولازم يجي ,,,



سكتت افكر ,,, ومن اليوم يقول ذكي وذكي واخر شي عزيمة على شرف خالد



انا = بس .؟



ابراهيم = ايه بس ,,, ابي ادبسه بالعزيمة وخليتها يوم الخميس عشان مايروح



انا = طيب يمكن يعتذر عنها



ابراهيم = افاااا اقولك العزيمة له وشلون يعتذر ,,, اذا اعتذر ابزعل منه وبعدين ابقوله حجزت استراحه وعزمت الشباب وكل شي جاهز



سكتت افكر ,,, طيب ويوم الجمعة اكيد بيروح يوم الجمعة بس وشلون افهم ابراهيم وخالد بجنبي ,, بس يالله فكرة حلوة نحاول وعلى الله



انا بابتسامة = صح



ابراهيم مستغرب = وش اللي صح



التفتت لخالد وانا ابتسم



انا = كلامك صح



ابراهيم = خلاص ابتصل عليه الحين



اووووب لا اذا اتصل عليه الحين وهو توه مكلمني بيشك فينا خالد اكيييييييد



انا = لا مو الحين



ابراهيم = ليه .؟



انا = بس مو الحين



ابراهيم = ابي اقوله الحين عشان يمديني احجز الاستراحة



انا = طيب بعد شوي



ابراهيم = ليه .؟



انا = بس



سكت ابراهيم شوي



ابراهيم = هو عندك .؟



انا بابتسامة = ايه



ابراهيم = اهااا قل كذا من اليوم ,,, طيب مع السلامة



انا = مع السلامة





العصر



رن جوال خالد قبل نوصل الديرة بنص ساعة تقريبا



القى خالد نظرة على جواله ورد



خالد = هلاااااا ,,, وعليكم السلام هلا والله ابراهيم



( ابتسمت يااارب يوافق خالد على عزيمة ابراهيم يااارب )



خالد = كيف الحال والاحوال ,,, طيب طاب حالك ,,,, هههههههههههههههه ايه ايه افااا عليك بس ,,,,,, هلا ,,, وشلون .؟ ,,,, ووش بمناسبته .؟ ( ابتسم ) تسلم والله احرجتني ,,,, مايحتاج يابراهيم تعزم وتخسر نفسك ,,,, تسلم والله تسلم ,,, افااا عليك فالك طيب ,,, ومتى تبيها .؟ ,,,, وشلوووون الخميس .؟ ,,,, لاااااا ابراهيم الخميس ماقدر ,,,, والله ماقدر ,, الخميس مشغول ,,, والله اني عندي شغل بالرياض ,,, أجلها تكفى ,,, والله انا مابي اردك بسـ ,,,, ( التفت لي وكنه متورط مع ابراهيم ) بس الخميس مشغول ,,, طيب خله السبت ,,, الجمعة طيب ,,, وليش تحجز قبل تقولي وتشوف انا مشغول والا لا ( تنهد وكمل ) ماعاش اللي يرد عزيمتك ويفشلك ,,, خلاص ان شاء الله ,,, تسلم ,,, هلا مع السلامة



وسكر عنه وهو يفكر



ابتسمت مستانس ,,, كفوووو يابراهيم



انا بابتسامة = وش فيك .؟



رفع راسه والتفت لي متضايق



خالد بضيق = ابراااااهييييييييم



انا = وش فيه .؟



خالد = ياااخي يقول مستاجر استراحة وعازم الشباب بمناسبة طلوعي من المستشفى ومدري ايش ,,, والمشكلة يوم الخميس ,,, وشلون الحين ودي اروح للرياض ,, وعدت امي والاهل اني اجيهم الاسبوع هذا ( وزفر بضيق ) اففففففف



ابتسمت اكثر ,, لمصلحتك هذا ياغبي



انا = احم ,, طيب اعتذر منهم .؟



سكت ومارد ,,, وقعد يفكر ,,, بالتالي سكتت عنه



دخلنا الديرة وخالد مازال ساكت ويفكر ,,, فجأة سمعته يكلم بالجوال



خالد = الووووه ,,,, هلا يمه وشلونك ,,, انا بخير دامك بخير ,,, ابد الحمد الله ايه قربنا نوصل للديرة ,, منا ومنك ,,, امممم اقول يمه وش رايكم تجون انتي واخواتي عند خالي خميس وجمعة ,,,



( طيرت عيوني ,,, وشلون بيجون وهم ماعندهم محرم غيره ,,, لا يكون هو بيروح الغبي )



خالد = الصراحة يمه واحد نشب بحلقي الا يعزمني الخميس لين وافقت



( ابتسمت ياحليلك يابراهيم صاير علقم بحلق خالد )



خالد = ,,, ايه ,, هاه وش رايك ,,, لا الحين حنا داخلين الديرة تونا واصلين ,,, لا مافيه تعب علي ولا شي ,,, والله يمه مافيه تعب ,, اصلا ابسافر على الجماعي وبالجية مع اسلام يعني لا تعب علي ولا شي ,,, ( وابتسم ) خلاص اليوم الفجر وانا عندكم ,,, تجهزوا ,,, وانا ابقول لاسلام يجهز الموتر ,,, طيب ,,, يله مع السلامة يالغالية





ووصلنا الديرة اخيرا ,, نزلت اول اخواني عند شقتنا وبعدها رحت للحارة عشان انزل ابو عبد الله واهله واوقف السيارة عندهم



دخلنا الحارة وشفت ابراهيم وماجد وصالح واقفين وشلكهم على وشك يطلعون من الحارة بس وقفوا لما شافونا



نزل ابو عبد الله وام عبد الله ودخلوا البيت ,, نزلت من السيارة وتوجهت للشباب اسلم عليهم



صالح = هلا والله ,,, حيا الله من شافك ,, الحمد الله على السلامة



انا بابتسامة = الله يحييك ويسلمك



وسلمت عليهم ,, وابتسمت اكثر لما سلمت على ابراهيم



جانا خالد وسلم على الشباب وبعدها التفت على ابراهيم



خالد بحيرة = الى الحين ملزّم .؟ انا اقول مايحتاج



ابراهيم = خلاص عزمت الشباب



تنهد خالد وسكت



ماجد = شسالفة .؟



انا بابتسامة = ابراهيم مسوي عزيمة لخالد بكرة والاخ زعلان



خالد = ماني زعلان بس والله اني مشغول



صالح = مانت وجه عزايم ( والتفت لبراهيم ) معطيه وجه تراك



طنشه ابراهيم والتفت لخالد وسأله بشك



ابراهيم = ليه وش عندك مشغول .؟



خالد = واعد الاهل اجيهم هالاسبوع والـ



انا = الاهل انت توك متصل عليهم وبتجيبهم هنا ,, لا تكبر السالفة



طير ابراهيم عيونه فيني



ابراهيم = وشلون .؟



التفتت لابراهيم متملل من عناد خالد



انا = يقول بيروح للرياض الفجر عشان يجيب اهله



التفت ابراهيم بسرعة وقال لخالد يلزّم عليه عشان يضيق عليه الوقت



ابراهيم = ايه صح نسيت اقولك ترا الشباب بيجون من العصر للاستراحة ,,, لا تتأخر علينا



خالد بضيق = ان شاء الله اجيب الاهل واجي



انا بتأكيد = تجيب الاهل وبس مشاورك الثانية لا تروحلها



ماجد = وش فيكم على الرجال ,,, قالكم خلاص يجيب واهله ويجي



مانت فاهم شي ياماجد



ابراهيم = ايه ادري بس اذكّره



خالد = ابراهيم طيب خله الجمعة ,,, تكفى انا مشغول



ابراهيم = ودي بس عزمت الشباب خلاص ,, وبعدين وش عندك مشغول وش وراك



سكت خالد وهو متضايق



اكيد مايقدر يقول لهم انه بيروح لبدر وربعه ,,, بس الصراحة بديت اصدقه انه مشغول يمكن فعلا عنده شغل هناك وحنا محجرين عليه



انا = يله انا استاذن ,,, بروح ارتاح شوي



والتفتت لخالد ومسكت ذراعه وسحبته معي اكلمه بعيد عن الشباب ,,, ( ومديت له مفتاح السيارة )



انا = خذ ,,, متى بترجع السيارة للشركة .؟



خالد = الحين ,,, وعلى طريقي ابروح احجز بالجماعي عشان اروح للرياض



طيرت عيوني فيه



انا بصدمة = الحين .؟ توك جاي من مكة وبتروح للرياض على طول



زفر خالد بضيق



خالد = وش اسوي بابراهيم انا اصلا كنت ناوي اروح الخميس وارجع الجمعة



انا = ايه صح تعال ,,, انت صدق مشغول .؟ ,,, والا تقول كذا بس



خالد = ودي امر العيادة واشوف الوضع هناك بعد تأخر الرواتب عنهم



انحرجت منه يعني صدق مشغول



انا بحرج = يعني مانت مار استراحتك مثل ماقلتلي .؟



سكت خالد شوي وبعدها رد علي بتحدي



خالد بتحدي = الا طبعا بمرها ,, هذا وجهي اذا خليتهم يسرحون ويمرحون فيها ,,, والله اني منقهر منهم ياخالد وماراح اتركهم



مالت عليك وعلى وجهك ,,, الشرهة علي اني صدقتك انك مشغول ,,, شوي وكنت بقول لابراهيم يكنسل العزيمة عشانه ,, لكن مع توعده هذا العزيمة صايرة صايرة ان شاء الله ورجله فوق رقبته



انا بعصبية = وتمرها وش بتسوي فيها ياثور ,,, واذا صادفوك هناك وش بتسوي ,,, بتاخذ المسدس وتثوّر فيهم



خالد بضيق = الحين ماينفع الكلام ,,, امش خلني اوصلك الشقة عشان يمديني احجز قبل يذن



انا مستغرب = انت بتسوق .؟



خالد = ايه يله امش



وراح عني ,,, يسوق ويده معلقه برقبته وماتشافت الى الحين ,,, ركضت له واخذت المفتاح منه ورحنا ,,, سلمنا السيارة وحجز خالد بالجماعي ,, والرحلة الساعة 11 في الليل



وحنا بالليموزين راجعين للبيت



انا = الرحلة الساعة 11 متى يمديت تنام وترتاح ,, تراك امس ليلك كله سهران



خالد = انوم بالباص



انا = خالد تكفى طلبتك ,,, اكسر الشر ولا تروح لاستراحتك الحين ,,, على الاقل لين الضابط يلقى حل معهم



خالد = ترضى احد يدخل بيتك ويقتحمها وانت تتفرج عليه



انا = والله اني فاهم عليك وحاس فيك ,, بس تحمل لين تتعاون مع الشرطة وتمسكونهم ,,,, اذا رحت لهم بنفسك الحين والله ينتفونك تنتيف ,,, هذولي مابقلوبهم رحمة عليك خاصة اللي اسمه بدر كنه شايل عليك



سكت خالد ومارد علي ,,, كملت بترجي احاول اقنعه مايتهور ويتمادى معهم



انا بترجي = تكفى خـ



خالد = ماهو وقته الكلام الحين ,,, ماتشوف ابراهيم وعزيمته اللي مدري وش تبي ,,, هالاسبوع ماقدر اسوي شي حتى العيادة مايمديني امرها ,,, مع ان سلطان يشتكي من وينلي ويحتريني اجي للرياض



انا مستغرب = ليه ,,, وش فيه سلطان .؟



خالد بتنهيدة = يضايقه وينلي بكل شي ومايخليه يشوف شغله



انا = هذا دليل انه يخبي شي وخايف سلطان يكتشفه



خالد = اكيد ويمكن تكون المخالفات اللي يهددني فيها



وصلني الليموزين اول للشقة وبعدها وصل خالد



دخلت الشقة ولقيت اخواني كلهم نايمين مع اننا باخر العصر ,,, شكلهم من التعب ناموا



قومت خلود لصلاة المغرب ,,, صلت وبالقوة صبرت لصلاة العشا ,,, وماصدقت صلت وعلى طول نامت



انا صليت العشا و طواااااالي على السرير





يوم الخميس



قمت الظهر وانا مكسل ,,, اخذت جوالي القي نظرة على الساعة ولقيت 6 مكالمات لم يرد عليها ورسالتين ,,, طيرت عيوني بالساعة اوووووووه الساعة وحدة ماصلييييييييييت



نقزت من السرير ورحت اصلي وبعدها طلعت من الغرفة ادور خلود الحمارة اللي ماقومتني ,,, ولقيت الاخت نايمة بالصالة



افففففففففف ماتشبع نوم هذي نامت قبلي والى الحين نايمة



شميت ريحة شي يحترق ,,, رحت ادور مصدر الريحة وشهقت



الغداااااااا



ركضت للمطبخ وطفيت عن القدر ,,, مااااااااالت عليك ياخلود احرقتي غدانا ,,, وشلون الحين انا جوعااان



رحت لها وقومتها معصب





اخر شي اخذت جوالي وطلعت من الشقة اجيب غدا احسن من غدا خلود ألف مرة



وانا انتظر طلبي فتحت المكالمات والرسايل



3 مكالمات من ابراهيم ومكالمة من فيصل ( زميل لي بالمدرسة ) ومكالمتين من ناصر



شهقت ناصر صح اليوم الخميس انا قايل له ينتظر مكالمتي واقابله ,,, اففففففف مالي نفس له الحين ,,, وبعدين صح خالد وينه بالرياض والا جا والا وينه بالضبط



فتحت الرسايل وكانت وحدة من فيصل والثانية من ناصر



فتحت رسالة فيصل



( خالد كيف الحال



غايب ثلاث ايام عسى المانع خير



اتصلت عليك اسأل عنك ولا رديت )



وفتحت الرسالة الثانية اللي من ناصر



( اتصلت على خالد



وواضح انك ماكلمته بموضوعنا



اليوم العصر اشوفك



ومابي اعذار



والا تصرفت مع خالد تصرف ثاني )



اففففففففففف شسوات مع هالناصر ذا



اخذت طلبي بضيق ورجعت الشقة



بعد الغدا



اتصلت على خالد اشوفه وينه



انا = الووو ,, السلام عليكم



خالد بهمس = هلا وعليكم السلام



استغربت صوته المتغير



انا مستغرب = وشفيه صوتك .؟



خالد = تعبان شوي



اكيد بيكون تعبان ,,, مرهق نفسه ,, اول سفره لمكة وبعدها على طول سافر للرياض من دون مايرتاح



انا = وينك الحين ,,, بالرياض .؟



خالد = لا ,,, جيت من الرياض اليوم الصباح



انا = يعني انت الحين ببيت خالك .؟



خالد = ايه



انا = صوتك تعبان مرة



خالد = الصداع بيفكك راسي ,,, توني اكلت مسكن وان شاء الله اكون احسن



صاير يكثر من المسكنات ,,, امس اكل حبتين ,,, واليوم بعد



خالد = اقول خالد تقدر تجي العصر .؟



انا = اجي وين .؟



خالد = عندنا ببيت خالي وهات سالم وسلمى معك



انا مستغرب = ليه .؟



خالد = ابي رولا ورولين يشوفون اخوانك ودي اشوف وشلون سلام البزران على بعض



وضحك بتعب



ابتسمت ,,, رولا هنا ,,, سبحان الله هالبنت اعجبتني بهدوءها وصمتها المستمر



انا بابتسامة = ان شاء الله ,,, بس بعدها على طول نروح لاستراحة ابراهيم عند الشباب



خالد = ان شاء الله



سكرت عن خالد ,,, واتصلت على ناصر وقلت له اني مشغول اليوم وعشان مايسوي شي يضر خالد وعدته اشوفه الجمعة الساعة 11 الصباح واشوى وافق

* 26 *


العصر
اخذت سالم وسلمى ورحت لبيت ابو عبد الله ,,, وانا داخل الحارة لاحظت الاندكروزر سيارة عايلة خالد واقفة بالشارع بس ماشوف اسلام فيها ,,, ضربت الجرس وطلعلي خالد يهلي ويرحب ,,, تفاجأت من شكله واضح عليه التعب والشحوب والهالات ,,, وكل يوم احسه اكثر من قبل بس سكتت عنه ولا علقت على شكله

لابس بنطلون جنز وبلوزة بيضا

خالد بابتسامة = هلا والله خالد

انا بابتسامة = هلا فيك ,,, هااااه زي ماقلتلك جبت اخواني

نزل خالد نظره يشوف سالم وسلمى وابتسم

خالد بابتسامة عريضة = ياااهلا والله بسلومي وسلومتي هاااه كيييفكم بعد السفر.؟

لاحظت عليه انه منزل الشاش اللي يعلق يده فيها ,,, وابتسمت

انا = زين والله ,,, اشوفك شايل الشاش عن يدك ( واشرت على يده اليسرى ) ان شاء الله انها احسن الحين .؟

التفتت لي خالد

خالد = شلت الشاش عشان اهلي مايحسون

انا مستغرب = الى الحين مايدرون باللي صار

خالد = لا ماحد علمهم

عجيب معقول مالاحظوا الكدمات والخدوش اللي بوجهه بعضها توها ماختفت

انا مستغرب = معقول امك ماشافت اللي بوجهك ( ومديت يدي ورصيت متعمد اكبر كدمة بخده ,, اذكره فيها )

تألم خالد من رصتي المتعمدة له

خالد بألم = آآآه طيب شوي شوي عورتني ( وابعد يدي ) شافتها امي بس قلت تهاوشت مع واحد بالمدرسة ,,, اما الخياطة اللي بصدري ويدي والحرق اللي ببطني ماشافتها

تفاجأت بيدين صغيرة تلفتف على بطن خالد ,,, وطل راس تطالع وجه خالد من تحت بعيون باكية

= عيت مامااا

ابتسمت هذي اخت خالد بس ماعرفت هي رولا والا رولين بسبب التشابه الكبير بينهم

نزل خالد نظره لاخته وشد شعرها على خفيف

خالد = انتي ماتفهمين .؟ ,,, اقولك مايصير تروحين

انا = هذي رولا والا رولين .؟

خالد = رولين

نزلت لمستواها وسلمت عليها وبعدها سألت خالد

انا بابتسامة = وش فيها تبكي .؟

خالد بملل = تبي تروح معي لاستراحة الشباب

انا = هههههههههههههههههه

نزل خالد نظره لاخته مرة ثانية

خالد = رولين شوفي من جا ,,, روحي سلمي على سالم وسلمى والعبي معهم

ابتعدت رولين عن خالد وراحت لسالم وسلمى

سلمى = تعالي نلعب معهم هناك ( واشرت على عيال صغار يلعبون بالشارع )

رولين = لا ابي نلعب بالحوش

سالم = شوفي هذولي اصدقاي تعالي نلعب معهم

طالعت رولين العيال والبنات الصغار اللي يلعبون شوي وبعدها طالعت اخوها و بتردد راحت مع سالم وسلمى

دخلني خالد للملحق ودخلنا غرفته

انا = يله خلنا نروح للاستراحة يحترونك

جلس خالد بتعب على السرير ومسك راسه بين يديه

خالد بهمس = توه بدري

جلست بجنبه وحطيت يدي على كتفه

انا = وشفيك خالد ,,, شكلك تعبان .؟

خالد = راسي ,,, ماني قادر اتحمل اكثر ,, حاولت انوم عجزت

طيرت عيوني بصدمة

انا = انت من اخر ليلة بمكة الى الحين مانمت .؟

رفع خالد راسه والتفت لي بتعب

خالد = حاولت بس عجزت واصلا ماكان عندي وقت انوم ,,, من مكة رحت للرياض ومن الرياض رجعت على طول وبكرة الجمعة لازم اوصل اهلي للرياض مرة ثانية ,,, عزيمة ابراهيم المفاجآة لخبطت وقتي ( وكمل بضيق ) يعني مايعزم الا يوم الخميس

انا = وليش عجزت تنام .؟ ,,, خالد صارحني وش اللي مطير النوم عنك .؟

نزل خالد راسه بحزن وسكت ,,, الصراحة خوفني اكيد يخبي شي عني غير عن مشاكله مع وينلي وناصر وبدر

انا بترجي = خالد تكفى قل وش اللي يخليك ماتنام .؟

ساكت ولا يرد

تنهدت وابعد يدي عن كتفه

انا = براحتك انـ

دخلت رولا علينا ومعها لاب توب خالد ,,, ووقفت عند الباب متفاجأة مني ,,, شكلها ماكانت تدري ان فيه احد عند اخوها

خالد = تعالي رولا ,, هذا خالد تذكرينه ,,, اللي جا عندنا بالرياض

التفتت رولا لاخوها وتقدمت لين وصلت عند الطاولة ونزلت الاب توب وبعدها توجهت لاخوها وارتمت بحضنه ,, كل هذا بصمت

لف خالد يديه حلوينها شوي وبعدين ابعدها عن صدره عشان ماتعوره بالجرح

خالد = خلصتي .؟

رولا = رولين وينها .؟

خالد = برا تلعب ,,, روحي العبي معها

لفت ذراعيها على رقبة خالد ,,

رولا = ماااابي خايفة

طيرت عيوني مستغرب ,, خايفة .؟

انا مستغرب = خايفة من وش .؟

التفت خالد لي وابتسم

خالد = من صالح ,,, رولا تخاف من صالح مع انه ماعمره قالها شي

انا مستغرب = تخاف من الناس كلهم يعني .؟

خالد = لا بس من صالح

التفتت لها وسكتت ,,, حاول خالد يبعدها عن صدره بس هي ناشبة فيه

همست له اذكره

انا = وخرها عنك بتعورك

خالد = رولا اجلسي ,, خلاص مو لازم تلعبين بس اجلسي

جلست رولا على فخذ خالد وتساندت على صدره وقعدت تطالعني

شكلها ماخذه راحتها معه ,, وخالد ماغصبها على شي+ ,,, انا ماعمري ضميت سلمى اوسالم لصدري وانا بكامل صحتي والحين خالد مع انه تعبان ورغم الجرح العميق اللي بصدره ويده الا انه صدره مفتوح لاخته ولا نهرها عشان تبعد عنه متحملها وساكت ,, لو اني بمكانه كان هاوشتهم يبعدون

نزلت راسي اتذكر يوم كنا بالرياض وكيف شفت خالد يضم اخواته ويقبلهن ويداعبهن ,,, انا ماذكر اني ضميت سالم او سلمى ,, يادوب اتحمل معاذ اذا جلس بحظني ولا اخليه يطوّل بعد

= خاااااالد فيه واحد يبيك

انتبهت من سرحاني ورفعت راسي لسالم

انا = انا والا خالد .؟ ( وأشرت على خالد )

سالم = لا انت ,,, واحد جاني وقال انت سالم قلت ايه قال وين اخوك

طالعنا بعض انا وخالد مستغربين

انا مستغرب = لا يكون عمي .؟

قمنا انا وخالد نشوف من هذا اللي يبيني

انا = وينه .؟

أشر سالم على شاب في العشرين من عمره تقريبا اول مرة اشوفه وواقف عند بيتنا القديم ,, رحنا له انا وخالد وسلمنا عليه

انا = آمر يالطيب .؟

= انت خالد .؟

انا = وصلت خير

= جيت امس هنا بس ماحد طلعلي

انا = ايه يالطيب انتقلنا عن البيت هذا

= انا سعود ولد حمد سعود

حمد سعود ,,, مر علي الاسم هذا ,,, شهقت هذا واحد من الديانة اللي يطلبون ابوي ومبلغ كبير بعد من وين اجيب له الحين

انا مرتبك = هلا فـ ,,, فيك ,, آآآ ,,, آمر

سعود = مايامر عليك عدو ,, ابوي توفى الله يرحمه قبل ثلاث شهور والحين جاي اخذ حقنا ,,, لكم سنتين ماسددتوا الدين اللي عليكم

انصدمت حمد سعود مات ,,, اذكره يوم كان يجي عند ابوي

نزلت راسي بحزن الحين راحوا وتورطنا حنا بامورهم اللي صارت برقبتنا

خالد = عظم الله اجرك ,,,

سعود = أجرنا واجرك ,, جزاك الله خير

خالد = كم اللي لكم على خالد .؟

رفعت راسي وقلت بسرعة عشان خالد مايتدخل

انا = ان شاء الله احاول قريب اسدد لك ولو جزء منه

سعود = لك سنتين وانت تقول هالكلام مع ابوي الله يرحمه ,, وانا الحين بانتقل لمدينة ثانية ومحتاجها

خالد = كم اللي لك على خالد .؟

سعود = سبع الاف

خالد = اهاا

سعود = متى تسدد اللي عليك .؟

سكتت مادري وش اقول ,,, الحين ماعندي الا 2500 ريال بس

انا = آآآ ,,, راح اعطيك الفين الحين وان شاء الله الباقي اجيبهم لك

سعود = بس .؟

نزلت راسي بحزن

انا = هذا اللي عندي الحين

سعود = بس انا ابنتقل الاسبوع هذا

اقوله هذا اللي عندي ويقول ابنتقل ,,, انتقل احد مانعك

سعود = طيب هات الالفين ,,, قبلت بالالفين الحين لاني مستعجل ,,, بس ابعطيك رقم حسابي وتحول الباقي باسرع وقت وياليت ماتماطل مثل عادتك مع ابوي الله يرحمه

طلعت محفظتي ,, دين يسد دين ,,, هالالفين دين والحين يسدن دين سابق ,,, والله حاله

حط خالد يده على محفظتي والتفت لسعود

خالد = خلاص هات رقم حسابك ومالك الا اللي يعطيك حقك

سكت سعود يطالع خالد مستغرب وبعدها التفت لي يحتري رد مني

وخرت يد خالد عني وطلعت الالفين من المحفظة بس خالد اخذهم مني وحطهم بجيب بنطلونه وطلع جواله

خالد = كم رقم حسابك .؟

سكت سعود شوي وبعدها عطاه رقم حسابه وانا منزل راسي وساكت لاني عارف اني مابيدي حيله

اخذ سعود رقم جوالي وركب سيارته وراح ,,, حط خالد الالفين بالجيب الامامي لثوبي

خالد = كل مشكلة ولها حل يالغالي لا تشيل هم

انا بحزن = لو كان الفقر رجلا لقتلته

حط خالد يده على ظهري

خالد = ولو كان المرض رجلا لقتلته

رفعت راسي وطالعته بحزن

انا = ابوي راح وتركني بحالي اتخبط بهالدنيا القاسية

وطلعت دموعي غصب عني

خالد = وابوي تخلى عني وحرمني من حنانه ( وضمني ) خالد مافيه احد مرتاح ومو بس انت اللي تعاني


لفيت يدي حولينه ورصيته بقوة ادور الراحة والامان ,,, ماهتميت لجرحه ,, ماهتميت اعوره والا لا ,,, المهم ارتاح من الهم اللي انا فيه

انا بصوت باكي = استاجرت الشقة لي والحين سددت عني الدين ,,, ليه تسوي معي هذا كله لييييييه .؟ وليه انا .؟ ليه ياخالد

ابتعد خالد عني وابتسم

خالد بابتسامة = امش البزارين صاروا يطالعونا ,, يله تأخرنا عن الشباب قرب يذن المغرب

ركبت سيارة خالد بمكان السواق وانا متضايق ,,, ركب خالد وسالم وسلمى وطلعنا من الحارة ,, وصلنا الشقة اول عشان انزل سالم وسلمى ونزلت معهم اوصلهم لباب الشقة ودخلناها ,,, علمت خلود اني معزوم

ورجعت للمصعد عشان ارجع لخالد بس سالم تمسك فيني

سالم = ابروح معكم .؟

اففففففففف فاضيله ,,, يكفي متضايق يجي هذا يزيد علي

انا بضيق = سالم اذلف لعطيك كف الحين ( ودفعته على ورا ) يله ادخل

وانا بمصعد تذكرت معاملة خالد لاخواته ومعاملتي انا لاخواني ,,, شهقت وش هالصدفة

انا بنفسي شفت رولين يوم تمسكت بخالد تبي تروح ,,, وسالم تمسك فيني يبي يروح

خالد مادفع اخته ولا شي بالعكس حاول يقنعها ونساها اللي تبي بهدوء من دون لا يدفها ولا ينهرها ,,, وانا دفيت سالم ونهرته

طلعت من العمارة وانا افكر وشفت خالد بسيارته يحتريني ,,, ركبت بمكان السواق بصمت وحركنا متوجهين للاستراحة

طوال الطريق وانا اشوف خالد كل شوي يمسك راسه بألم

تنهدت وانا اشوفه على هالحال ,,, خالد رغم مرضك والمشاكل اللي تلفك الا ان ابتسامتك مافارقتك ومعاملتك لاخوانك من احسن مايكون ,,, رغم الاصابات والجروح اللي تعاني منها الا انك ضميت اختك لصدرك بصدر رحب

انا = خالد ليه ماوخرت رولا عنك

انتبهت لنفسي ,,, طلع هالسؤال غصب عني بصوت عالي

التفت خالد لي بتعب مستغرب مني

خالد بتعب = وش .؟ رولا .؟ وش فيها .؟

زفرت بضيق مدري وش فيني اليوم متضايق

انا بضيق = لا ولا شي

خالد مستغرب = اوخر رولا عني ,,, وشلون يعني مافهمت

انا = خلاص خلاص ولا شي

خالد = لا قل ,, وش فيها رولا .؟

انا = ياخي مافيها شي ,, خلاص انسى

خالد = خاااالد

تنهدت بحزن

انا = ليه ماوخرت رولا عنك

سكت خالد وهو يطالعني مستغرب

خالد = اوخرها عني وشلون ,,, ياخي مافهمت عليك وضح

انا = ليه ما وخرت رولا عن حضنك ,, وانت عارف انها يمكن تعورك بالجرح اللي بصدرك

خالد = رولا ماتدري اني متعور

انا بضيق = ادري بس انا اقصد يعني ليه ماهاوشتها مثلا ليه ماوخرتها عنك غصب عنها

ماسمعت منه رد والتفتت له ولقيته يطالعني مستغرب

طالعت قدام بضيق اتهرب عن نظراته

انا ماعمري ضميت اخواني واحتويتهم وانا صحتي زينه ,,( حطيت يدي على صدري اتحسسه ),,, صدري سليم مافيه ولا خدش وللحمد الله ,, ليه ماضم اخواني لصدري .؟ وش السبب .؟

فجأة سمعت رد خالد

خالد = رولا محرومة من حنان ابوها تبيني احرمها من حنان اخوها بعد ,,, جربت الحرمان ومابي اخواتي يجربونه

رولا غايب ابوها بس حي وموجود ,,, بس سالم وسلمى ابوهم مـ

طلعت دموعي غصب عني ,,, سالم وسلمى هم اللي بحاجة للحنان ,,, ( غمضت عيوني بألم ) ليه احرمهم من حناني ,,, ليه احرمهم من حنان اخوهم ,,, ليت عندي قلب مثل قلبك ياخالد

خالد = خالد وش فيك ,,, اليوم مانت طبيعي ,,, فضفض يالغالي اسمعك

سكتت ولا رديت عليه وكملنا طريقنا ساكتين

على آذان المغرب وصلنا الاستراحة

وماشاء الله على ابراهيم ماخلى احد الا عزمه

هناك شباب يلعبون كورة واللي يسبحون واللي قاعدين سواليف

بعضهم من عيال مدرستنا وبعضهم عيال عم ابراهيم وبعضهم ربع فايز هذا غير عيال الحارة كلهم

تفاجأ خالد من عدد الشباب اللي بالاستراحة خاصة انه اكثرهم مايعرفهم ,,, مايعرف الا عيال الحارة بس

خالد بصدمة = ابراهيموووه عازم شباب المملكة والا وش .؟

ابتسمت ومسكت يده واللي نمر من عندهم اعرفه عليهم

ابراهيم = هلا والله هلا

التفتنا لابراهيم اللي جانا يرحب ويهلي فينا وكان معه ماجد

انا = هلا فيك

ابراهيم = لماذا تأخرتما أيها الخالدان المعفنان .؟

انا مستغرب = وش عندك انت كل ماشفتني انا وخالد تكلمت فصيح

ماجد = وياليت يتكلم فصيح سنع مثل الناس يحرف الفصيح وابو ابو الفصيح

خالد بسخرية = ابراهيم شف لا يكون ناسي احد ماعزمته

ابراهيم = انا ناسي احد ( وقعد يتذكر ) منهو .؟

ضحكت على ابراهيم ,, خالد يتطنز عليه وهو يحسب خالد يتكلم جد

خالد = ماخليت احد ماعزمته ,,, ليش مجمّع هالشباب كلهم كان عزمت عيال الحارة بس

فهم ابراهيم عليه اخيرا

ابراهيم = ايييييييه قل كذا ,,, لا وازيدك من الشعر بيت بعضهم اعتذر وماجا

انا وماجد = هههههههههههههههههههههه

جانا فايز وبعد السلام والسؤال ,,, التفت فايز لاخوه

فايز = تراك انت اللي بتصلي فينا المغرب

ابراهيم = حلى هو ,, صليت فيكم العصر ,, الحين دورك

فايز بابتسامة = انت مطلووووووووووب

ابراهيم مستغرب = انا مطلوب .؟

فايز = الشباب طالبينك تصلي فيهم

سكت ابراهيم شوي وبعدها نفخ صدره بفخر

ابراهيم = احم احم ,, اذا كان كذا مايخالف

ابتسمت ابراهيم صوته حلو ونخشع معه في الصلاة

صلينا المغرب ورحنا انا وخالد وماجد وابراهيم وصالح وفيصل للمسبح وراح بعض الشباب يكملون لعب الكورة

واول ماشفنا المسبح ماقدرنا نمنع نفسنا عن السباحة ,, نزلنا ثيابنا وطبينا كلنا الا خالد مايقدر

ابراهيم = خالد طب معنا

خالد = ودي بس ماقدر الحين ان شاء الله مرة ثانية

فيصل = هذا جزا من يماشي اصدقاء السوء

طالع خالد فيصل شوي وبعدها نزل راسه

خالد = خلاص تركتهم

فيصل = اكيد انت ماسك عليهم شي ,,, والا وش اللي يخليهم يسوون فيك كذا .؟

سبحت لين وصلت عند فيصل

انا بهمس = فيصل وشفيك على الرجال ,,, اتركه بحاله

قرب فيصل مني وهمس

فيصل = الصراحة مارتحت لخالد هذا ,,, انصحك تبعد عنه

عصبت عليه ودفيته

فيصل من زملاء المدرسة ولا هو من حارتنا ,,, هو ما يعرف خالد ولا خالد يعرفه

انا بعصبية = واحد ماتعرفه لا تتكلم عليه كلام فاضي

فيصل = بس اعرفك انت ,,, انت طيب وعلى نياتك وهذا شكله داهيه ,,, انا نصحتك وانت كيفك

وسبح عني بعيد ,, التفتت لخالد ولقيته يكلم ابراهيم ,,, فيصل يهذي بالكلام ولا يحسب حساب لكلامه الطايش

سبحت لين وصلت عند خالد وابراهيم

ابراهيم = طيب نقلل كمية الماء

خالد = مايحتاج

انا مستغرب = وش تقولون .؟

التفت لي ابراهيم = احاول اقنعه يسبح اقوله نقلل كمية الماء وعيا

التفتت لخالد ولاحظت عليه التعب اكثر ,,, عيونه ناعسة كنه يبي ينام وانفاسه سريعه ويعرق

انا بخوف = خالد وش فيك

خالد بتعب = مافيني شي ,,, هنا كتمة ( وابتسم بتعب ) اروح للملعب اشوف اللي يلعبون كورة احسن

وطلع متوجه للملعب

ولأول مرة في التاريخ صالح يسأل عن خالد

صالح = وش فيه شكله تعبان

فيصل = الا قل مغرور

التفتت لفيصل معصب

انا بعصبية = انت وش فيك عليه .؟ ماكل حلال ابوك

سكت ولا رد علي

ابراهيم مستغرب = وش فيكم .؟

انا بضيق = مافيه شي

دخل علينا سعد وطب بالمسبح من دون مقدمات

سعد = يازييييييييين السباحة بعد الكورة ,, شييييييييي

صالح = وش رايكم نشوف منهو اطول نفس

فيصل = واللي يفوز وش له .؟

سعد = له عشـ

فجأة سمعنا ازعاج واصوات عالية من الشباب اللي بالملعب كأنها هوشة

صالح بفرح = هوشة هوشة ,,, ابروح الحق عليها قبل تخلص

وطلع من المسبح ومعه فيصل ولبسوا ثيابهم بسرعة وطلعوا

طلعنا انا و سعد وابراهيم نشوف سبب الهوشة

وشفنا الشباب مجتمعين على شي

قربنا منهم وحشرنا نفسنا بينهم عشان نشوف ,,, وانصدمت باللي شفته

خالد طايح بالارض مغمى عليه ,, رفع احد الشباب راسه يحركه ويحاول يقومه وفايز جالس بالجهه الثانية من خالد

انا بصدمة = خاااااااااااااااالد

وقربت منهم اكثر وجلست بجنب فايز وانا مصدوم

حطيت يدي على فخذه وحركته

انا بخوف = خالد وش فيك ,,, قم

رفعت راسي للشباب المجتمعين عليه

انا بخوف = وشفيه وش صار .؟

= ماندري عنه فجاة طاح

خالد طوال اليوم وهو تعبان شكله ماتحمل التعب واغمى عليه

= شيلوه خلونا نوديه المستشفى

رفع احد الشباب رجليه ومسكه واحد ثاني من عند صدره وشالوه ,,, بس صرخ محمد وفايز عليهم يمنعونهم

محمد بعصبية = نزلووووووووووووه ,,, لا تشيلونه بهالطريقة ,,, نزلوه نزلوه بسرعة

نزلوه وهم مستغربين

احد الشباب = ليه .؟

فايز = الولد توه مسوي عملية بصدره تقومون تشيلونه بهالشكل ,,, ابعد اشوف ( ودفعه وجلس بجنب خالد )

= وشلون تبينا نشيله اجل .؟

فك فايز ازارير بلوزة خالد يشوف الخياطة اللي بصدره اذا كانت متضررة من شيل الشباب له قبل شوي والا لا

فايز = الحمد الله سليمة

قمت وانحنيت على خالد المتمدد

انا = انا بشيله بنفسي

فايز بعصبية = اصبر انت الثاني ( دخل فايز يده تحت ظهر خالد ودخل اليد الثاني تحت رجليه ) سو مثلي وتمسك بيديني خلنا نشيله من دون مانعوره

انحنيت على خالد ودخلت يدي تحت ظهره وتمسكت بيد فايز ودخلت يدي الثانية تحت رجلينه وتمسكت بيد فايز الثانية وشلناه

سعد = ابروح اشغل السيارة

محمد = لا ماحنا مودينه للمستشفى حطوه بأي غرفه يرتاح لين يقوم

صالح = ايه ماهي اول مرة يغمى عليه ,,, ماله داعي المستشفى

ماعترضنا انا وفايز ودخلنا اقرب غرفة ونزلناه على الارض وجلسنا عنده وبعض الشباب مجتمعين

احد الشباب = انا اقول لو تودونه المستشفى احسن

محمد = خالد دايم يغمى عليه ومتعودين

صالح = ايه واذا وديناه المستشفى يمكن ينومونه ولا يطلعونه الا بعد اسبوعين

احد الشباب = احسن عشان يرتاح

بدوا يتناقشون ,,, ودوه لا لا تودونه ,,

وانا ساكت واتأمل خالد بألم ,,, طوال اليوم وهو يشكي راسه وتعبان وفوق هذا له يومين مانام مهموم والله اعلم وش مهموم منه بالضبط

مغمض عيونه وانفاسه هادية ولا يدري باللي حوله وعن اللي يتناقشون ويتكلمون عنه

ماجد = اطلعوا شباب عطوه هوا

طلع بعض الشباب وبقي انا وفايز وماجد وصالح ومحمد وفيصل وابراهيم وسعد واخوه

انا بحزن = هو طوال اليوم وهو تعبان و من اخر يوم لنا بمكة الى الحين مانام

التفتوا الشباب لي مستغربين

فايز = ليه .؟

صالح = وش دراك انه مانام .؟

انا بحزن = هو قالي بنفسه انه عجز ينام واصلا ماكان له وقت يرتاح ,,, ضغطنا عليه ,,, من مكة راح للرياض ومن الرياض رجع هنا على طول وفوق هذا يقول عجزت انام ,,, حنا ماخلينا له فرصة يروح لاهله ويشوفهم واضطر هو يجيبهم هنا ,,,

محمد مستغرب = ضغطتوا عليه .؟ من اللي ضغط عليه .؟

نزل ابراهيم راسه

ابراهيم = انا

انا = انا ماكنت ابي خالد يروح للرياض وقلت لابراهيم ,, وعشان نمنعه سوا ابراهيم العزيمة وخلاها يوم الخميس عشان خالد مايروح للرياض ونضيق عليه الوقت

التفت فايز لابراهيم معصب

فايز بعصبية = وانا اقول وش هالكرم اللي نازل عليك ,, تشوف حسابك بعدين بالبيت

انا = ابراهيم ماله دخل ,,, خالد كان متوعد الشباب وحنا خفنا عليه

صالح مستغرب = متوعد الشباب .؟

ابراهيم = متوعد بدر واللي معه ويبي يروح لهم

وعلمناهم بكل شي

محمد بتنهيده = زين سويتوا اجل

فايز بتفكير = والله مادري وين الصح ,,, خالد غلطان وانتم غلطانين بعد

طلعنا من الغرفة اللي فيها خالد وحنا متكدرين باللي صار

جلسوا الشباب شوي وطلعوا من دون مايتعشون ,, بعضهم انسدت نفسه وخاصة المقربين لخالد وبعضهم استحى يتعشى واللي العشا له مغمى عليه وبعضهم احترم الموقف وطلع من الاستراحة بدري

جلست على العشب بعيد عن الشباب ,,, وصورة خالد مسيطرة على تفكيري

= خالد

انتبهت لفيصل اللي جاني وقطع علي تفكيري ,, رفعت راسي له اطالعه ,, جلس فيصل بجنبي وفاجأني بسؤاله

فيصل = ابسألك واتمنى تجاوبني ,,, وش سالفة خالد .؟

التفتت عنه بضيق

انا = ماعنده سالفة

فيصل = طيب وش عنده بالضبط ,, محمد يقول ماهي اول مرة يغمى عليه ,,, عنده الصرع صح .؟

انا بضيق = لا ,, ورجاءا فيصل خلني بحالي

قام فيصل وراح عني ,, انا بنفسي مدري وش فيه

مر وقت وانا جالس لحالي ,, لين مليت ورحت للشباب

جت الساعة 2 وخالد بعده ماقام

محمد = وشلون الحين لازم نقومه

ابراهيم = خاله ابو عبد الله بيسأل عنه اذا تأخر ,,, ابو عبدالله واعرفه زين

قام ماجد

ماجد = فيه عطر بسيارتي ابروح اجيبه

صالح = ايه رح

محمد = صاحي انت ,,, ريحة العطر مضره للجرح كيف عاد بخياطة

ماجد = اجل وشلون .؟

انا بحزن = خلوه يرتاح شوي على الاقل لين تجي الساعة 3 ,,, هو مانام له يومين

صالح = نصبر ونشوف


جت الساعة 3 ونص وخالد بعده ماقام لين تضايقنا من الوضع

دخل فايز ومحمد على خالد يقومونه ومنعوا البقية يدخلون

مر عليهم ساعة الا ربع وهم داخل عنده

واخيرا طلع خالد لنا بمساعدة فايز ومحمد

قمت فرحان بشوفته سالم ورحت متوجه له

ولا قدرت امنع نفسي اضمه

انا بفرح = الحمد الله على سلامتك ( وضميته بفرح )

سند خالد جسمه بالكامل علي بتعب ,, لفيت يدينه حولينه وصرت كني شايله

خالد بتعب = الله يسلمك

فيصل = الحمد الله على سلامتك خالد

ابتعدت عنه ومسكت ذراعه اسانده على الوقوف

التفت خالد لفيصل

خالد = الله يسلمك ( والتفت لابراهيم متفشل ) خربت عزيمتك

فايز = تفداك

ابراهيم = ماعليك عادي ,,, هي اصلا لك ,, خذ راحتك هههههههه

ورجع كل واحد لبيته


الجمعة

طلعت من الشقة الساعة 10 الصباح رايح اقابل العلة ناصر

ازعجني بالاتصالات من الساعة 9 وهو يتصل علي

اروح اشوف وش يبي وليتنا نفتك منه للأبد

* 27 *








دخلت الفندق اللي اخذت عنوانه من ناصر وتلتفتت ادوره ,,, وقبل اتوجه لموظف الاستقبال

= خااااااااااااالد

التفتت لمصدر الصوت وكان ناصر جالس على كنب في صالة الاستقبال ويلوح بيده لي

مشيت لين وصلته وبعد السلام وبدون السؤال عن الاحوال جلست مقابله على كنب فردي

انا بضيق = خير ,,, اخلص قل اللي عندك لأني مستعجل

رفع ناصر حواجبه بسخرية

ناصر = ليه مستعجل ,,, وراك دوام .؟

رفعت حاجب واحد متعجب ,,, ويتطنز بعد

انا بسخرية = وراي صلاة الجمعة والا مادريت ان اليوم جمعه

ابتسم ناصر ابتسامة استهزاء على اسلوبي

ناصر بابتسامة = وش تشرب .؟

نزلت نظري للطاولة اللي قدامنا وشفت فيها قهوته وبجنب كوب القهوة ظرف ,, رفعت نظري وطالعته وانا متضايق

انا بضيق = شكرا ما ابي منك شي

وسكتنا ,,,

واخذنا وقت وحنا ساكتين

افففففففف ليه مايقول اللي عنده ويخلصني ,,, انا جالس على اعصابي ابي اعرف وش يبي وهو قاعد يشرب قهوته ببرود ان شاء الله تحرق لسانه


انا بعصبية = انت مزعجني ابي اقابلك وابي اقابلك ويوم قابلتك سكتت ,,, وش عندك وش تبي ,, اخلص ,,, والا ترا بروح الحين

ناصر بغرور = عادي تقدر تروح ,,, بس قبل تروح ياليت تتفرج معي على هالصور

ونزل قهوته واخذ الظرف اللي على الطاولة وطلع صور منه

سكتت مستغرب ,,, صور ! وش صوره .؟

مد ناصر علي وحده من الصور واخذتها منه

صورة مبنى متوسطة الحجم من دور واحد وبوابته كبيرة وفخمه واشوف الاشجار واضحة من داخل المبنى ,,, وشكله مو بيت شكله مثل الاستراحات

رفعت راسه لناصر وسألته

انا مستغرب = وش هذا.؟

ابتسم ناصر ابتسامة جانبية ,, الله يستر من اللي بعدها

ناصر بابتسامة = استراحة

انا = ايه ادري انها استراحة من شكلها ,,, بس ليه توريني صورتها .؟

ناصر بابتسامة = معقول ماعرفتها ,,, وماعرفت من راعيها

انا مستغرب = وانا وش يدريني ,, اول مرة اشوفها

ناصر = ههههههههههههههه هذي استراحة خالد تركي ,,, وباسمه ,,, حط مليون خط تحت اسمه

نزلت راسي اشوف الصورة ,, وابتسمت هذي استراحة خالد ,,, الصورة ماتظهر الا واجهة الاستراحة وجانب واحد منها يبين مساحة الاستراحة ,,, بس لحظة ليش مصورها هذا وش يبي

رفعت راسي اطالعه وانا ماسك اعصابي منه

انا = طيب واذا كانت استراحة خالد .؟ ليش تورينياها انت ,,, وش عليك .؟

ناصر بابتسامة = ماعمرك دخلتها .؟

انا بعصبية = مالك دخل

ناصر = هههههههههه اكيد ماعمرك دخلتها والدليل انك ماعرفت صورتها ,,, امممم اكيد الاستاذ خالد ماراح يدخلك فيها

قطبت حواجبي مستغرب ,,, بس مسكت اعصابي وسكتت ,, وش يهذي هذا وش يقول .؟

ناصر = تدري ليه ,,, انا اعلمك

ومد علي صورة ثانية واخذتها منه اشوفها

صورة لغرفة بابها مفتوح ,,, رفعت راسي له مرة ثانية مستغرب

انا = وش تبي انت الحين فهمني ,,, تراني ماني فاهم شي

ومد علي صورة ثالثة وهو يبتسم ,,,

ناصر = هذي صورة للي داخل الغرفة ,,, تمقله زين

اخذت منه الصورة الثالثة وانا اقول ياليل ماطولك

صورة الغرفة من الداخل ,,, متوسط الحجم مأثثة اثاث بسيط جدا ,, الارض مفروشه وفيها طاولة مثل طاولة المدارس بس الغريب واللي لفت انتباهي الغرفة فيها براميل زرق حوالي 4 او 5 براميل

سألته وانا عيني على الصورة

انا = هذي الغرفة داخل استراحة خالد .؟

ناصر = ايه ,,, شف وش اللي داخل الغرفة

انا = براميل وطاولة وحدة ( ورفعت راسي له اطالعه )

ضحك بسخرية

ناصر = معقول انت ساذج لهالدرجة

قطبت حواجبي معصب

انا بعصبية = نعم .؟ ساذج .؟

ناصر بابتسامة = استراحة خالد ماهي مجرد استراحة ,,, تدري اني لو اعطي هالصور للهيئة وش بيصير .؟

انا مستغرب = هيئة .؟ أي هيئة .؟

ناصر = هيئة الامر بالمعروف والنهي عن المنكر

رفعت حواجبي مستغرب وسكتت

ناصر = البراميل هذي براميل خمر

شهقت مصدوووم

انا بصدمة = وووووششششششششش

ناصر = خالد محول استراحته لمصنع خمر ( وابتسم ابتسامة عريضة )

طيرت عيونه بناصر ونبضات قلبي وانفاسي سريعة من الصدمة والخوف

انا بصدمة = وووششش ,,, خـ (حطيت يدي على راسي احاول امنع كلامه يدخل براسي ) ,, خمر

,,, معقول اصير مخدوع بخالد ,,, لا لا مو معقول ,,, لا يمكن اصدقه هذا كذااااااب

انا بخوف = أأأ ,,, أنت تكذب ,, بتضحك علي بكلامك ياسافل

ناصر = احترمك نفسك وثمن كلامك ,,, اكيد مانت مصدق ,,, شغل البلوتوث ( وطلع جواله ) عندي مقطع فيديو يثبت كلامي واسأل خالد اذا بغيت

معقول,,, لا ماني مصدق ,,, نزلت نظري مرة ثانية للصورة ,,, مومعقول هذي ماهي استراحة خالد ,,, انا متأكد ,,, خالد صاحب الابتسامة مايعرف هـ

ناصر = عندك بلوتوث .؟

انتبهت لناصر ,,, اخذت شوي استوعب وبعدها طلعت جوالي وشغلت البلوتوث ,,, وارسل ناصر لي المقطع ,,, وشغلته على طول

شفت ببداية المقطع اللي يصور واقف عند البوابة الخارجية للاستراحة ومشى لين دخلها وتعدى ثلاث غرف على اليمين ودخل ممر بين اشجار على اليمين واليسار وصار يمشي بالممر وانا اسمع خطوات رجلين المصور لين وصل غرفة على يمين الممر نفس الغرفة اللي شفت صورتها قبل شوي ,,, ودخلها ونفس الطاولة ونفس البراميل اللي شفت بالصورة ,, قرب المصور من احد البراميل وطل على اللي داخل البرميل ,,, شفت داخل البرميل سائل غريب واحسه سائل وسخ ,, ترك المصور البرميل وراح للبرميل الثاني وطل عليه يشوف اللي داخل ونفس السائل اللي بالبرميل الاول ,,, وبعدها قعد يصور الغرفة من الداخل وطلع منها وهو الى الحين يصور ,,, وانتهى المقطع وهو يمشي بالممر رايح للبوابة

اخذت نفس عميق احس اني انطعنت من خالد ,,, معقول ,,, رفعت راسي لناصر وسألته ,,, احاول القى أي شي يخليني اكذبه

انا = من اللي صور الفيديو .؟

ناصر بابتسامة = انا ,,, عرفت ان خالد يصنع خمر ويبيعه واستغليت غيابه عن الرياض ودخلت استراحته

شوي وابكي ,,, جرحتني ياخالد ,,, اثرك خاين بعت نفسك ودينك ووطنك ووخنتني

انا بألم = انت تكذب ,,, اكيد هذي ماهي استراحة خالد

ناصر = طيب المقطع عندك والصور بعد خذها معك واسأله ,,, على فكرة عندي صور غيرها تقدر تحتفظ بالصور هذي ,,, هااااه وش رايك ارسل الصور والمقطع للهيئة ,, وابعطي الشرطة نسخة بعد ,, وش رايك .؟

هيئة وشرطة ,,, لو على الهيئة ارحم تتعامل مع القضايا بسرية تامه ,,, بس الشرطة تفضح تخلي اللي مايدري يدري ,,, ليش ياخالد وش حادك على الحرام وانت غني وعندك عيادة تعيشك ملك ,, طالعت ناصر احاول ادور الكذب بعيونه بس شكله واثق من اللي يقول ,,, معقول ,,, ولا ويقول اسأل خالد ,,, واثق وبقوة

اخذت الصور وانا شوي وابكي من الألم والصدمة وطلعت بصمت من الفندق

ليه ياخالد ليه ,,, مصنع خمر عاد ,,, ولا ويكذب علي ويقول تبت ,,, يبي يشرب خمر يشرب كيفه بس ليه يصنع ليه ,,, اللي يشربه حرام وشلون اللي يصنع

اخذت ليموزين ابي اروح لخالد الكذاب الخاين ,,, فعلا اني ساذج ,,, وعلى نياتي واثق فيه ومصدقه ,,, ان ماكفختك ياخالد ان ماوريتك وشلون تخدعني وتكذب علي ماكون خالد

خدعني بابتسامته العذبة ,, يمثل قدامي طيب ويحب الخير ويساعد

شهقت

لحظة هو ساعدني واجد ,,, ( التفتت للدريشة اللي بجنبي بصدمة ) الشقة هو اللي دافع اجارها ,,, 28 الف مدري 27 الف مدري كم بالضبط هو اللي دفعها ,,, هذا غير دين سعود ,, ومدري هو حول لسعود شي والا لا .؟

اهااا الحين فهمت ليش يساعدني انا ,,, دايم اتسأل ليه انا بالذات وليه يساعدني ,,, اثره يبي يورطني واصير مديون عنده عشان يستغلني وابيع له الخمـ

اعوذ بالله ( وحطيت يديني على راسي ) لااااا ,,, لاااااا

مو معقول خالد يسوي كذا ,,, اكيد فيه ان ,,,

بس وشلون ,,, ودي القى مخرج واحد يبري خالد واكذب ناصر بس الصور وشلون تكذب ,,, لو ان الصور بالكمبيوتر قلت الصور مفربكة بس هذي صور فوتوغرافيه هذا غير الفيديو ,,, دليل قاطع ,,,

وشلون ياربي ,,, وشلون باستراحته ,,, معقول خالد مايدري عن استراحته ووش فيها ووش مافيها

طالعت قدام افكر ,,,

تذكرت يوم يلحقنا بدر وربعه بالسيارة قال خالد وقتها ان الاستراحة بعيدة عن الانظار وياخذون راحتهم فيها ,,, ( طيرت عيوني بخوف ) وش معناه هذا ,,, يقول ياخذون راحتهم يعني اكيد عارف ان استراحته فيها هالخمـ ( زفرت ) حتى نطقها يخوّف

معقول عارف وراضي ,,, ومو بعيدة انه هو اللي مدبر كل شي ,,, ايه ايه هو بنفسه قال انا اجهز كل شي لهم يقصد بدر وربعه ,,, وانا الغبي مانتبهت على بالي يقصد انهم ياخذون راحتهم بالرقص والغنا صح الغنا حرام بعد ,, بس ماجا ببالي انه خمر ومصنع خمر

نزلت راسي بألم ,, ليه ياخالد ليه ,,, وش حادك ,,, عيال الفقرا ماسووا سواتك

حطيت يدي على راسي ,,, اخ احس بصداااع

اييييييييه وانا اقول ليه بدر وراكان يلاحقون خالد من مكان لمكان يبون الاستراحة منه ,,, شكلهم تهاوشوا وحط الله حيلهم بينهم ,,, أخ يالقهر وانا على نياتي مصدق خالد وعاذره

( شهقت) صح وشلون نسييييييت ,,, خالد دايم يبي يقول لي شي ويغيّر رايه ,,, واخرها يوم كنا بمكة دايم يبي يقول شي ,,, اثره عنده بلاوي وانا على نياتي ,,, المشكلة الحين صرت متورط عنده ومديون له

يارب رحمتك يااارب خلصني ,,, انا كاف خيري شري عن الناس ,,, وش يبي فيني خالد ,,, حسبي الله ونعم الوكيل ,,, حسبي الله ونعم الوكيل

وصل الليموزين عند الحارة ونزلت وانا عقلي مو معي ,,, وضربت باب ابو عبد الله

بعد شوي سمعت صوت رولا مدري رولين ورا الباب

= ميييييييييين .؟

انا بألم = ناديلي خالد ,,, خليه يطلع

سمعت خطواتها تركض رايحه تناديه

نزلت نظري للصور اللي معي اتأملهن ,,, ياليت ناصر يكذب علي ,,, ياليت خالد يقول هذي ماهي استراحته ,,, يارب يارب ,,, انا حبيت خالد ووثقت فيه وحبوه اخواني ,,, وتعودنا عليه وصرت اعتبره مثل اخوي واكثر ,, خالد صاحب الابتسامة الحلوة يطلع منه هذا مو مقعول ,,, اكيد هذي ماهي استراحته ,,, ( نزلت راسي بحزن ) بس ناصر واثق وبقوة ويقول اسأل خالد ,,, واثق الاخ ,,, لا مو معقول ,,, اكيد ناصر مضيّع


( شهقت ) صح تذكرت ,,, خالد مرة قال لي ,,, ليه ماتجرب التجارة ويوم قلت ماعندي شي,,, قال خل كل شي علي وغمز لي بعينه ,,, هه وانا على نياتي احسبه يقصد تجارة عادية مثل خلق الله

بتورطني ياخالد يتلوثني بوساختك ( وضربت الباب بعصبية وبقهر) ان ماطحنت عظامك ياخالد ,,, ان ماشربت من دمك ماكون خالد

انتبهت للباب ينفتح ويطلع منه خالد ووراه رولا

عليه ملابسه اللي امس بنطلونه الجنز وبلوزته البيضا ,,, والهالات والتعب واضحة على وجهه كالعادة ,,, من صحتك هذي واردى ياخالد ,,, ياحسافة خوفي عليك

خالد بابتسامة = هلا خالد

انا بعصبية = لا هلا فيك

طير خالد عيونه فيني منصدم

انا بعصبية = دخلني غرفتك ياكلب مابي خالك يسمع و ينصدم فيك والا انت حسـ ( وسكت ماسك اعصابي ) دخلني غرفتك

خالد بصدمة = خالد وش فيك معصب ,,, صاير شي .؟

انا بعصبية = دخلني غرفتك

رفع خالد يده اليمنى بيني وبينه

خالد = هد اعصابك طيب ( وفسح الطريق لي وهو مستغرب ) تفضل

مشيت وانا معصب ودخلت غرفته على طول ووقفت عند سريره

دخل خالد الغرفة ورولا تمشي معه

طالعت رولا شوي وبعدها رفعت نظري اطالع خالد

انا = طلع اختك

نزل خالد نظره لرولا وبعدها التفت لي

خالد = وش فيك .؟ ليش معصب ,,, صاير شي خالد

جا ووقف عندي واخته تمشي وراه

طالعته بألم ,,, مو معقول ,,, اكيد الاستراحة هذي ماهي له

توجهت لباب الغرفة وسكرته ,,, ورجعت له ووقفت مقابله مباشرة

انا بحذر = خالد الصورة هذي صورة استراحتك .؟

ومديت الصورة اللي توضح بوابة الاستراحة من الخارج ,,, اخذ خالد الصورة مني والقى نظرة عليها

انا بترجي = ماهي لك صح .؟

رد علي خالد ونظره على الصورة

خالد = الا هذي استراحتي ,,, بس مين هذا اللي مصورها ( وقلب الصورة يشوف ان كان مكتوب عليها شي )

طيرت عيوني فيه

انا بخيبة امل = لك .؟

خالد = ايه ( ورفع نظره لي ) من عطاك الصورة هذي .؟

لك ,,, يعني كلام ناصر صح ,,, يعني انخدعت فيك وكذبت علي

خالد = خالد وشفيك .؟

رميت الصور الباقية بالارض بعصبية وقهر ,,, وهجمت عليه ومسكته من ياقة بلوزته ولصقته بالجدار بعنف

نقزت رولا واقفة على سرير اخوها مبتعده عنا وصارت تطالعنا بخوف

انا بعصبية = وتعترف انها لك ,,, ياكلب ياحقير ,,, وش حادك قلّي وش حادك

حط خالد يده السليمة على يدي يحاول يهديني وهو منصدم

خالد بصدمة = خالد شسالفة ,,, وشفيك ,,, فهمني

انا بصراخ = الله وقعك بشر اعمالك ,,, ماتخاف ربك ,,, ماتخاف على سمعتك ,,, تصنّع خمر يالكلب ( ورفعت يدي وعطيته كف اقوى ماعندي ) لييييه ,, وحنا صدقناك ووثقنا فيك ,,, ياليت بدر مخلص عليك ياسافل ياحقير

ورصيت جسمي على جسمه والصقته بالجدار اكثر

انا بقهر وبصراخ = مافكرت بخالك مافكرت بامك مافكـ

حط خالد يده اليمنى على وجهي وحاول يدفعني عنه

خالد = ماني فاهم عليك ولا كلمة ,,, ياخي اهدى وفهمني شسالفة

اصارخ واتكلم بسرعة وبانفاس سريعه وفوق هذا قهرني اهذر من اليوم وصوتي انبح من الصراخ واخر شي مافهم علي وش اقول

ابعدت جسمي عنه بعصبية ومسكت متعمد عضده الايسر بمكان الجرح ,,, ابي اعوره ,,, ابيه يحس ان كان فيه قلب يحس

انا بقهر = تعال وانا افهمك

وسحبته من عضده ,,,

خالد بألم = أأأه خالد تكفى يدي ,,, آآآه يدي مابعد برت تكفى ,,, آآآآه عورتني

وحط خالد يده على يدي اللي ماسكته ويحاول يحرر عضده من مسكتي وهو يتألم

انا بعصبية = امش وانت ساكت

ورصيت يدي اكثر وسحبته عشان اخذ الصور الباقية اللي رميتها بالارض ,,, مشى خالد معي وهو يتألم ويترجاني افك عضده

ورولا واقفة على السرير وحاطه يديها على فمها بخوف وهي تبكي وتشاهق

انحنيت على الصور وانا الى الحين ماسك خالد ,,, انتزعت الرحمة من قلبي من القهر ,,, سمعت صرخت خالد بألم يوم انحنيت

خالد بألم = آآآه ,, خالد يدي يدي

انا وانفاسي سريعة = خذ ,,, شف ,,, مصنع خمر باستراحتك ,,, ياراعي الاستراحة ( والصقت الصور على وجهه بعنف )

اخذ خالد الصور وقعد يطالعها وهو يغمض عيونه بألم ,,, وانا اراقب ملامح وجهه ومازلت ماسك عضده

ركز خالد على الصورة اللي فيها براميل وشهق وطير عيونه فيها وسمعته يهمس ويسأل نفسه

خالد بهمس = منين جت هذي .؟

رصيت يدي اكثر على عضده بقهر وهزيتها عشان اعوره اكثر

انا بعصبية = تعرف هالبراميل هذي وش ( وكملت بسخرية ) هه بكم تبيع الواحد يا,, ياحقير ( وكملت بعصبية ) وتكذب علي وتقول تبت ,, تبي تخدعنا

مارد علي ومازال مطير عيونه بالصورة

فجأة حسيت بسائل يبلل يدي ,,, تركت عضد خالد وطالعت يدي

دم !

التفتت اشوف يد خالد ,,, ولقيت كم بلوزته البيضا فيها بقعة دم كبيرة بمكان مسكت يدي على الجرح
اووووه شكل الخياطة اللي بيده انفكت ( اخذت نفس عميق ) ماني راحمه مايستاهل الشفقة

رفعت نظري وطالعت خالد ولقيته الى الحين مطير عيونه على الصورة وشكله سرحان يفكر

انا بعصبية = وش فيك سااااكت ,,, لا تسوي لي فيها وتقول مادري عنها

التفت لي خالد وهو مازال منصدم وانفاسه سريعة

خالد = والله مادري ,, والله العظيم مادري عنها

انا بصراخ = لا تحلف بالكذب

خالد = والله مـ

هجمت عليه مرة ثانية وطرحته بالارض وركبت فوقه ,, صاحت رولا اكثر وجلست على السرير وهي تصارخ بخوف

رولا وهي تبكي = مااااااماااااا

انا بعصبية = لا تحلف كذب ,,, وانت بنفسك قلتلي ناخذ راحتنا بالاستراحة ,,, انت بنفسك اعترفت بهالتجارة ,,, بس انا بغبائي مانتبهت

خالد بألم = قسم بالله مادري عنها ( وغمض عيونه بألم ) آآآه خالد صدري عورتني قم ( وفتح عيونه ) صدقني انا ماكذب ,,, والله والله الغرفة هذي اعرفها واذكرها مافيها هالبراميل صدقني مدري من وين جت

انا بصراخ = اقولك لا تحلف كذب

خالد بألم = آآآه خالد صدري قم ,,, تكفى ماقدر اتحمل ثقلك قم ,,, تكفى خالد ,,, آآآه

اعتدلت وجلست على بطنه بعصبية ورفعت يدي وعطيته كف بمكان الكف الاول ومسكت ياقة بلوزته وحاولت اخنقه من القهر

انا = لا تكذب ,,, تذكر يوم تقولي جرب التجارة ,,, وش تفسرها هذي ,,, لا تقولي صدفة

خالد = أي تجارة .؟

شف بينكر بعد ,, سحبت بلوزته بس انقطعت الازارير الاولى من البلوزة ,,, تركتها بعصبية ومسكت شعره

انا بعصبية = بتنكر ,,, وانا اقوووول ليش بدر وربعه يلاحقونك اثرهم عارفين وش فيها الاستراحة وانا الثور مصدقك انك تايب وتبي تتركهم

حاول خالد يطرحني بالارض بس كنت مسيطر عليه

خالد = والله والله مادري عن شي ,,, اتركني يادب قم عن بطني ياااحمار

ودفع وجهي بيده اليمنى ,,, تركت شعره ومسكت يده وحطيتها تحت ركبتي

انا = دايم تبي تقول شي وتغير رايك ,,, قل وش كنت تبي تقول يوم اننا بمكة ,, كنت تبي تعترف ان عندك مصنع خمر ياكلب ومتردد صح .؟

طالعني خالد شوي

خالد = لا والله ,,, قسم بالله كان بنفسي شي ثاني والله العظيم ماهو هذا ,,, انا مادري وشلون جا استراحتي ,,, خالد لا تظلمني والله مادري عن شي مادري عن شي

يحلف انه مظلوم

انا بحيرة = احلف ان الاستراحة ماهي لك

خالد = الاستراحة لي ,, بس والله هالبراميل مادريت عنها ,,, اصلا استراحتي من زمان ماطبيتها ,,, من يوم درست هنا مادخلتها

سكت وانا اطالعه ,,, من زمان مادخلها

انا بهدوء = من زمان مادخلتها .؟

خالد بألم = ايه من يوم جيت هنا انشغلت عنها ,,, تكفى قم العملية اللي بصدري مابعد برت ,,, تكفى وخر احسها بتنفك الحين

اكيد له عمال بالاستراحة وطالب منهم يسوون كل شي ,,, ايه صح اكيد ,, مابي انخدع فيه مرة ثانية

انا بعصبية = اكيد مكلف عمالك يصنعون لك هالحرام ,,, ادري تبي تخدعني وتكذب علي

خالد بصراخ = والله والله اني ماكلفت احد ولا ادري عن شي ,,, ليه تبي تلصقها فيني غصب ,,, انا الدخان مادخن ولا اشرب خمر وتقول تصنع ,, وخر عني عورتني

احترت ودي اصدقه بس الصور والفيديو يثبت عكس كلامه

انا بحيرة = احلف انك ماتدري عن هالبراميل .؟

خالد بصراخ = قسم بالله مادري ,, ماااااادري

سكت شوي اطالعه وبعدها قمت عنه ووقفت

جلس خالد وحط يده على صدره وبعدها رفع راسه يطالعني

خالد بانفاس سريعة = انا اعرف الغرفة اللي بالصورة بس اذكرها مافيها هالبراميل ( وحط يده اليمنى على عضده الايسر بألم ) آخ يدي

طيب وشلون ابي افهم

انا بتنهيدة = قل كلام يدخل العقل ,,, يعني هالبراميل لها رجلين تدخل استراحتك وانت ماتدري ,, ماحد بيدخل شي خطير مثل هذا الا بعلمك ,,, انت صاحب المكان واكيد تدري

مدد خالد رجليه قدام وهو مازال جالس بالارض ( مثل جلسة الشيبان )

خالد وهو شوي ويبكي = والله مادري ,,, مادري

وكنه تذكر اخته ,,, بسرعة التفت ورا عشان يشوفها

خالد بهمس = رولا

الاخت دموعها اربع اربع ووجها احمر من الصياح ,,, اول مالتفت خالد لها وهي تنقز من السرير وركضت له وجلست بالارض بين رجلين خالد وتعلقت برقبته

رولا وهي تبكي = ابي مااامااا

لف خالد يديه حولينها وضمها

خالد = بس رولا ,,, خلاص لا تخافين انا معك ( ورفع راسه لي معصب ) تكلمني بموضوع مثل هذا قدامها

انا = آآ ,,, قلت لك طلعها ,,, بـ

خالد بعصبية = نسييييييييت انها معنا اول ماوريتني صورك اللي زي وجهك نسيتها ( وضم رولا اكثر ) لا يكون فهمت شي ,, ( وحاول يبعدها عنه بس رولا ميته صياح ومتمسكه فيه ) رولا حبي روحي لامي ,,, شوفيها يمكن تبيك ,, رولا خلاص لا تبكين

نزلت راسي ,, شكلي استعجلت بالحكم عليه بس والله اول ماوراني ناصر الصور طار عقلي واللي جنني اكثر انه واثق

فعلا
} ليس الشديد بالصرعة ؛ إنما الشديد الذى يملك نفسه عند الغضب {

رحت وجلست على السرير ,,, ليتني ماتسرعت ,,, كفخته لين قال بس وهو يمكن مظلوم ,,, هذا غير ,, آآآ ,,, ( ورفعت راسي اشوفه هو واخته ) هذا غير يده اللي جرحتها اكثر وامتلى كمه دم بسببي

رولا بصوت باكي = ابي بيتنا ,,, ابي اروح بيتنا

انتبهت من سرحاني لرولا وهي تترجى خالد

خالد = ان شاء الله اليوم نروح لبيتنا ,, يله روحي لامي الحين

سمعت الجامع القريب يخطب ,,, اوووه صح اثرنا الجمعه

قمت ومشيت لين وقفت قدام خالد

انا بحرج = احم ,,, خالد والله اني اسف ,, تصـ ,, تصرعت

رفع خالد نظره لي وبعدها نزل نظره لاخته متجاهلني

خالد = رولا وش اقول انا

تركت رولا اخوها وجلست على الارض والتفتت ورا تطالعني بخوف ,,, ويوم شافتني وهي تلصق بخالد اكثر

رولا بصوت باكي = خايفة هذا يضربني

كل هذا خايفة مني وش سويت لها انا

قام خالد واقف وهو حاط يده على صدره بألم وقوّم اخته واخذها للحمام يغسل وجهها عن اثار الدموع ,,, اخذوا شوي وطلعوا

خالد = رولا خلاص لا تبكين ,,, ولا تعلمين احد هااه

تطالعني بخوف ولا ردت عليه

مسك خالد وجهها ولفها عشان تشوفه

خالد بترجي = رولا,,, ماصار شي هاااه ,, لا تعلمين امي وخالي تكفين ,,, هاااه رولا

هزت رولا راسها بأية ,,,

التفت خالد لي وهو محتار

خالد بحيرة = وشلون اعرف انها فهمت شي والا لا .؟ ( ونزل نظره لأخته ) رولا خالد يمزح هااه ,,, والكلام اللي قاله مزح ,,, ان فهمتي شي لا تصدقين ,, هاه رولا

التفتت رولا لي وهي خايفة ومبرطمة

خالد بترجي = رولا حبي ترا بزعل منك اذا علمتي امي هااه ,,, تبيني ازعل منك

تطالعني الاخت خايفة ,,, مسك خالد وجهها ولفها عشان تطالعه

خالد = تبيني ازعل منك .؟

رولا وهي مبرطمة = لا

خالد = اجل لا تعلمين امي وخالي ,,, واذا سألوك ليش تصيحين قولي أي شي بس لا تعلمينهم والا ترا بزعل منك

طلعها خالد برا الملحق ورجع وسكر الباب علينا

احم ,, شكله جا دوري

انا بارتباك = خالد ابروح تأخرت عن الصلاة

خالد بعصبية = من وين لك هالصور .؟

اخذت نفس ,,, فعلا اني غبي وشلون نسيت ان خالد مايدري اني اقابل ناصر من دون علمه

انا بارتباك = الصـ ,, الصور من ناصر

قطب خالد حواجبه باستغراب

خالد مستغرب = من ناصر .؟

انا بخوف = ناصر ماغيره

سكت خالد شوي وحرك راسه يعني منهو .؟

انا = ناصر ذيل وينلي ,,, ماغيره ,,, خويك

طير خالد عيوني فيني

خالد = عمرك شفته ,,, تعرف شكله .؟

سكتت ومارديت

خالد = ومتى رحت للرياض ,, اربع وعشرين ساعة وانا اشوف خشتك ,, متى رحت .؟

انا بخوف = انا مـ ,, مارحت ,, ناصر هنا .؟

شهق خالد

خالد = هنا هنا عندنا

هزيت راسي بأيه

خالد = وانت وشلون عرفت انه هنا .؟ ,,, وكيف عرفت شكله اصلا .؟ انا بنفسي ماعمري شفته ,, وشلون عرفته انت .؟

انا بارتباك = هو ,,, هذا ,,, انا ,, وشسمه,,, ( وسكتت خايف منه )

خالد بصراخ = وشلون عرفته قلّي .؟

انا بخوف = هو اتصل علي وقال ضروري اقابلك ,, وقابلته اليوم وعطاني هالصور

سكت خالد شوي يستوعب

خالد مستغرب = ووشلون عرفته ,,, انا بنفسي ماعرفه وشلون عاد انت .؟

الله يستر وشلون افهمه اني قابلته بالرياض وهو معصب الحين

اخذت نفس وتوكلت على الله

انا بخوف = انا شفته قبل هالمرة بالرياض يوم اروح معك ,,, تذكر .؟

ساكت ويطالعني مستغرب

انا = اتصل علي وانا عندك وقابلته فجر الجمعة وحنا بالرياض و,,,

فجأة هجم علي خالد ولصقني بالجدار

خالد بعصبية = تكلم ناصر من وراي ,,, وتشوفه كل يوم ,,, اثرك معهم وانا حسبتك واقف معي ( ورفع يده وعطاني كف وبحركة سريعة طرحني بالارض وجلس على بطني ) ليه ماعلمتني انك تكلمه وتقابله ,, ووش يبـ ,, ( وحط يده على صدره وغمض عيونه بألم ) آآآه

بذل مجهود عشان يطرحني واكيد تعور زيادة ,,, انا اقدر اطرحه عني وبسهوله بس ساكت عنه ,,, انا الغلطان المفروض احكم عقلي قبل اصدق ناصر ,, بس والله الفيديو والصور طيروا عقلي والى الحين مادري وشلون جت البراميل باستراحته

خالد بألم = وش يبي منك الزفت ناصر ,, وليش ماعلمتني من زمان انك تقابله ,,, هذا بدل ماتوقف معي ياخالد ,, توقف ضدي ,,

ورفع يده وعطاني كف ثاني بس كل كفوفه ضعيفة وماتعور

انا = انا ماني واقف ضدك ,,, افهم اول وبعدين احكم

خالد بعصبية = وش افهم .؟

انا = وحنا بالرياض جاني اتصال من ناصر وطلـ

خالد بعصبية = من وين جاب رقمك

انا = مدري

رفع خالد قبضته بتهديد

خالد = كمل والا ببكس الحين

انا = جاني اتصال منه وطلب مني اقابله ,,, وقابلته فجر الجمعه وانت ماتدري كنت ابي اعرف وش يبي منك واعلمك بعدين

خالد مستغرب = طيب وليه ماعلمتني

انا = قم عني عشان اكمل

خالد بعصبية = ماني قايم ويله كمل

انا بتنهيدة = يبي منك العيادة

خالد بصدمة = العيادة .؟ عيادتي انا .؟

انا = ايه بس انا ماقدرت اعلمك لانه الكلب عرض علي مبلغ كبير اذا اقنعتك تبيع عليه العيادة ,,, رشوة يعني ,,, ولا حاولت اقنعك تبيع ولا علمتك ,,, وعلى فكرة تراك شفته انت

خالد مستغرب = ماعمري شفته ولا عرف شكله

انا = لا انت شفته ومرتين بعد على حد كلامه ,,, ماتذكر واحد جاك وانت بالعيادة وطلب منك تبيعها عليه وانت عييت .؟

قعد خالد يتذكر

خالد = ايه اذكر واحد جاني وطلب مني العيادة

انا = ايه هذا هو ناصر

طير خالد عيونه بصدمه وبعدها سرح

سكتت عنه احتريه يقول شي او يقوم عني

ويوم شفته طول

انا = واليوم شفتـ

وشهقت,,, تذكرت ناصر يوم يقول برسالة جوال انه يقدر يورط خالد بتهمه تنتهي حكمها بالقصاص ,,, معقول يقصد الخمر والا فيه شي غيره ,, ياربي ياهو انا غبي ,,, وشلون نسيت هذا قبل اصدقه و اتهم هالمسكين واكفخه

فجأة قام عني خالد بسرعة وراح للطاولة وفتح الدرج واخذ المفتاح منها وطلع مسرع من الملحق

انصدمت وين بيروح هذا ,, قمت بسرعة ولحقته

شفته يفتح باب الشارع ويطلع من البيت ولحقته ,,, ولقيته متوجه لسيارته

شهقت وين بيروح هالغبي ,,, ركضت بسرعة الحقه قبل يفتح السيارة ,,, جيت من وراه ولفيت يديني حولين بطنه وسحبته ارجعه للبيت وانا اسمعه يصارخ ويسب ويحاول يحرر نفسه مني ,,, خالد صاير ضعيف كفوفه اللي قبل شوي ضعيفة والحين قدرت اسحبه بسهولة ,,,

سحبته لين وصلت عند باب الشارع وتمسك خالد بالباب

خالد بصراخ = اتركني ,,, برووووح ,,, والله ماخليهم ,,, قسم لافجر فيهم ,,, خلني ,,, معيشيني بخوف بس عشان العيادة ,,, قسم لافجرها فيه

رفعت يدي وضربت يده اليمنى بقوة عشان يترك الباب ,, وفعلا انفلتت يده بسبب الضربة

وسحبته للملحق ,, ونفس الشي عند باب الملحق تمسك خالد بالباب وهو يصارخ ويسبني

خفت اهل البيت يسمعون وحطيت يدي على فمه

انا بانفاس سريعة = خالد اهلك بيسمعون ياخبل ,, اهدى شوي

وجريته بعنف عشان يترك الباب ,,

فجأة ترك خالد الباب وانا اجره ,, وطحت على الارض وطاح خالد فوقي

تألمت من طيحته علي ودفعته على الارض عشان يبعد عني

وجلست وانا ماسك بطني بألم ,,, التفتت على خالد لقيته متمدد على الارض على بطنه ويئن ,,, خفت وش فيه هذا المفروض انا اللي اتعور ,, هو اللي طاح علي ماهو انا اللي طحت عليه

قربت منه وقلبته على ظهره

انا بخوف = خالد وش فيك .؟

حاط يديه الثنتين على صدره ومغمض عيونه بألم

خالد بانفاس سريعة = صدري ,,, آآآه يعورني

ابعدت يديه عن صدره عشان اشوف بس خالد دفع يدي عنه معصب

خالد بتعب = وخر

وقام ببطئ متمسك بالجدار يتساند عليه

انا = وين بتروح ياخبل .؟

وسكرت الباب برجلي وخليت رجلي على الباب عشان خالد مايفتحه

التفت خالد لي وسند ظهره على الجدار بتعب

خالد بانفاس ثقيلة = خالد والله مالي قوة اواجهك ,,, المرض هد حيلي وماترك لي قوة ,,, خلني اطلع

انصدمت اول مرة يقول المرض هد حيلي ,,, امس اغمى عليه واليوم يوم جيته معصب كان عليه التعب وفوق هذا ضربته وكفخته لين قال بس

انا بتنهيدة = وين بتروح .؟

خالد = مالك دخل ,,, وخر رجلك عن الباب خلني اطلع

انا = لا ( انتبهت انه ماسك المفتاح بيده اليسرى المجروحة فرصة اخذ المفتاح منه ) هات المفتاح والا اخذته منك بالقوة

حط خالد المفتاح بجيب بنطلونه وانحنى ونتف كم شعره من رجلي

انا بألم = اح ,,, ياحمار

خالد بتعب = وخر

انا بعصبية = قلي وين بتروح .؟

خالد بتعب = ابروح اشوف هالبلاوي اللي بالاستراحة ,,, والله اني مادريت عنها ابي اعرف من اللي دخلها باستراحتي

طيرت عيوني منصدم

انا = بتروح للرياض الحين

خالد = ايه ,,, وخر

هذا صاحي والا مجنون ,,, بيروح للاستراحة وشلة بدر وراكان فيها والله يسلخونه ان شافوه

قمت وقربت من خالد وحاولت ادخل يدي بجيب بنطلونه عشان اسحب المفتاح منه ,,, دفعني خالد وحط يده اليمنى على جيبه يمنعني ادخل يدي وهو يصارخ ويسب

رصيت جسمي على جسمه ورصيته على الجدار وبصعوبة دخلت يدي بجيب بنطلونه الضيق ,,, عاد بنطلون جنز وجيوب الجنز تصير ضيقة اكثر واكثر

سحبت المفتاح اخيرا ,,, ورفعت يدي وضربت راسه بخفة

انا بعصبية = ثاني مرة البس ثوب ياخي

ماسك صدره ويئن

انا بخوف = اوووه خالد لا يكون عورتك .؟

خالد بتعب = عطني المفتاح

حطيت المفتاح بجيبي ,,, ومديت يدي ووخرت يد خالد عن صدره عشان اشوفه

شهقت بخوف ,,, اوووه بلوزته من عند الصدر فيها بقع دم خفيفة

الله يستر لا يكون انفكت الخياطة بسببي بعد ,,,

قربت منه عشان اسنده

انا = رح انسدح على السرير انت تعبان

دفع خالد وجهي بيده اليمنى

خالد = مالك دخل فيني عطني المفتاح

هذا وهو تعبان عنيد

اشرت على صدره

انا = شف فيك دم بصدرك ,,, رح انسدح على السرير ارتاح

نزل خالد نظره يشوف بلوزته اللي نصها انقطعت ازاريرها بسبب الهوشة

قربت منه وسندت خالد وطلبت منه يروح ينسدح على السرير وهالمرة اشوى ماعارض

انسدح على السرير ورفعت رجليه اساعده يتمدد وجلست بجنبه

انا بسخرية = ماشاء الله بتروح لبدر وربعه وانت كذا

خالد بتعب = عطني المفتاح

سمعت صوت باب الشارع يسكر

قمت وفتحت باب الملحق بشويش وشفت ابو عبد الله يمشي بالحوش بيدخل البيت

اووووه جوا من صلاة الجمعة وانا ماصليت

سكرت الباب ورحت لخالد وجلست بجنبه

انا = ابو عبدالله جا من المسجد

خالد وهو شوي ويصيح = خالد والله مادري عن شي ,,, عطني المفتاح خلني اروح اكيد ناصر هو اللي مدبرها

انا = يمكن ناصر ويمكن بدر انت نسيت انهم يدخلون استراحتك غصب عنك

خالد = ابي ابلغ عليهم

انا = ايه صح على طاري التبليغ ,,, يقول ناصر بيبلغ الهيئة والشرطة

شهق خالد بخوف
خالد بصدمة = أي هيئة .؟

انا = هيئة الامر بالمعروف ,,, الصور والفيديو معه والاستراحة باسمك ,,, كملت

خالد = أي فيديو .؟

تنهدت بملل تأخرت ولازم ارجع البيت اصلي

قمت من السرير

انا = العصر امرك ونكمل لازم اروح الحين

خالد وهو شوي ويصيح = أي فيديو بعد ( وحط يده على راسه ) ماني ناقص مصايب ,,, القاها من وين والا من وين يااربي

رحت للدولاب

انا = خالد غير بلوزتك المليانة دم هذي وصل وانت على سريرك فاتتنا صلاة الجمعة بسببك

التفت لي خالد معصب

خالد بعصبية = مالك دخل فيني وعطني المفتاح

انا بعصبية = عشان تروح لبدر صح ,,, ماني غبي اعطيك المفتاح

وفتحت الدولاب واخذت فنيلة ورميتها على وجه خالد

انا = خذ بدل

خالد = مانبي مبدل ,,, بروح لناصر الزفت عطني المفتاح ,,

انا = ناصر بنروح له ان شاء الله بس العصر مو الحين انت تعبان ومالك حيل حتى تمشي ( وجلست على سريره ) ويله غير ملابسك اشوف

ومديت يدي ابفتح الازارير الباقية من بلوزته بس خالد دفع يدي معصب

خالد بعصبية = وخر ,,, عطني المفتاح ياتيس اليوم لازم اودي اهلي للرياض ولازم اخذ سيارتي معي عشان ارجع ,, هات المفتاح

صح وشلون نسيت ,, اكيد اذا ودى اهله للرياض بيمر الاستراحة وهناك يمكن يشوفونه بدر واللي معه ( زفرت بضيق ) والله بلشنا بخالد ومشاكله

مديت يدي بصمت وفتحت ازارير بلوزته غصب عنه

انا = يله بدل وصل لا اتوطى ببطنك الحين

جلس خالد على السرير ونزل بلوزته وهو يسبني

خالد = انت جحش هايج يبي لك واحد يوديك افريقيا ويخلصنا منك ( واخذ الفنيلة ورماها بوجهي ) خذ هاتلي بلوزة مابي تي شيرت

مسكت الفنيلة اطالعها مستغرب ,,, ويتشرط بعد

انا = وليه تبي بلوزة ,,, وش الفرق .؟

خالد = يدي ماقدر ارفعها واذا لبست التي شيرت لازم ارفع يدي اما البلوزة مايحتاج فهمت ياجحش

انا = اهااا فهمت ياثور

وقمت وجبت له بلوزة بيضا مخططه ورميتها بوجهه

انا = عندك شاش عشان الف عضدك ,, شفه ينزف

خالد = الحين ماعندي ,,, العصر وانت جاي هات معك

انا بعصبية = وشلون بتصلي ياغبي وهو ينزف بهالشكل

خالد = ايه صح ,,, اففففففف كله منك

فكرت شوي وتلفتت بالغرفة ادور أي شي الف يده ولو الف لسانه بعد احسن

شفت شماغي طايح بالارض واخذته

انا = هات بلف يدك بشماغي

خالد = بشماغك عاد ,,,, كبير

انا بملل = نشقه مو مشكلة يله اخلص علي ابي اروح للبيت ,, تأخرت

خالد بضيق= افففففففففف

رحت عنده ولفيت يده ,,, على الاقل مؤقت لين نشتري شاش

خالد = خالد وش الفيديو اللي قلته قبل شوي لا يكون مصيبة ثانية

انا = لا هو نفس الصور بس بالفيديو

لبس خالد بلوزته ,,, وقام رايح للحمام

انا = صدرك يعورك .؟

خالد = مالك دخل

انا بعصبية = اوووه كيفك

وطلعت من البيت معصب ,,, اروح للشقة احسن من مقابل وجهه

دخلت الشقة وحمدت الله ان خلود بالحمام مالي خلق تحقيقاتها ,,, خاصة ان شكلي متبهذل لا شماغ ولا شي ومتأخر ,,, دخلت غرفتي وتسبحت على السريع وصليت

بعد صلاة العصر

وبعد تفكير طويل بمشاكل خالد ووشلون امنعه يودي اهله ,,, الحين لازم نلقى حل ونطلع بدر وربعه من الاستراحة وماحد يقدر يطلعهم الا الكمين اللي قال عنه الضابط ,,, هم اجلوا الموضوع لين يتشافى خالد ,,, والحين خالد مايقدر يأجله لازم يتخلص من البراميل باسرع وقت ,,, بس وشلون امنعه يروح للرياض وشلون

ماقدامي الا ابو عبد الله ,,, لازم اتصل عليه ,, طلعت جوالي من جيبي واتصلت عليه

وبعد السلام والسؤال

انا = آآآ ,, اقول ياعم اليوم خالد بيودي اهله للرياض .؟

ابو عبد الله = ايه اليوم لازم يرجعون ,, مايقدرون يجلسون وبكرة مدارس

انا = وخالد اللي بيوديهم .؟

ابو عبد الله = والله ياولدي انا ماودي انه يروح بس عيا اللي يصلحه

اخذت نفس ,, هين ياخالد يعني مصر تروح للاستراحة عند الشباب

انا = عم ,,, ترا خالد بيروح لبدر وربعه

سكت ابو عبد الله ,,, حسيته انصدم المسكين

ابو عبد الله = ليه ,, وش جاب طاريهم الحين ,,, هو ساكت عنهم وهم ساكتين عنه

انا = جاك العلم ياعم ,,, هو قال بنفسه انه بيروح لبدر وربعه ومتوعدهم بعد ,,, نصيحتي ياعم انك انت اللي تروح

ابتسمت اضرب عصفورين بحجر منها امنع خالد يروح للرياض ومنها نغيّب ابو عبد الله عن الديرة ونخلي خالد يسوي الكمين وابو عبد الله مايدري وان شاء الله يمدي مع اني ماعتقد ,, ابو عبد الله اكيد بيجلس يوم هناك ويجي

ماسمعت رد من ابو عبد الله

انا مستغرب = الووو

ابو عبد الله = يصير خير وانا عمك ,,, مع السلامة

انا = مع السلامة

احسسسسسن خله يكسر راسه هالعنيد ,,, القيت نظرة على الساعة وكانت 4 العصر

الحين ماقدر اروح لخالد ,,, اكيد ابو عبد الله عنده

= ابراهيم وصالح ومحمد يبونك

رفعت راسي لسالم اللي دخل علي الغرفة فجأة

انا مستغرب = وش .؟

سالم = ابراهيم وصالح ومحمد يبونك

غريب ,,, جايين عندي من دون مايتصلون ولا شي

قمت ودخلتهم المجلس

ابراهيم = حنا الصراحة جايين نصلح بينكم

محمد = افااا والله الصراحة انصدمت يوم شفتك انت وخالد

فتحت فمي مستغرب ,, وش يقولون هذولي

انا مستغرب = وش السالفة .؟

ابراهيم = محمد شافك انت وخالد يوم تتهاوشون بالشارع ,,, افااا ياخالد انتم اللي دايم مع بعض تتهاوشون

التفتت لمحمد منصدم متى شافنا هذا

انا = متى شفتنا انت .؟

محمد = وانا طالع من المسجد شفتك تسحب خالد وداخلين بيت عمتي ,,, بس ماقدرت اتدخل

صالح = ليه ماعلمتوني اتهاوش معكم

محمد بعصبية = اسكت انت بدل ماتصلح جاي تتهاوش

انا = سوء تفاهم صار وانتهى

ابراهيم = بس خالد ماطلع من بيته ابد ,,, دخل عليه محمد قبل نجي عندك ويقول كان متضايق ,, اكيد بسبب الهوشة اللي بينكم

محمد = وش المشكلة بينكم علمنا يمكن نقدر نساعد

انا بضيق = مافيه مشكلة ولا شي ,, تهاوشنا مثل أي ثنين يتهاوشون وتراضينا

ابراهيم = يعني الحين مانتوا زعلانين من بعض

انا = لا ابد ,,, خالد عزيز وغالي علي لا يمكن ازعل منه وانا بعد العشا يمكن امره

صالح = المهم خالد اذا بغيت افزع معك ضد خالد ابد مايردك الا لسانك

ضربه محمد على راسه معصب

محمد بعصبية = انت وبعدين معك

جلسوا عندي الشباب شوي وبعدها قاموا

محمد = يله بنمشي الحين

طلعوا ووقف ابراهيم عند الباب لين وصل محمد وصالح عند المصعد والتفت لي

ابراهيم بهمس = خالد انت وخالد احلى ثنائي شفته بحياتي مابي اللي صار بينكم يتكرر

ابتسمت

انا = ماراح يتكرر ان شاء الله

ابتسم ابراهيم وراح

* 28 *





















بعد صلاة العشا

رحت للحارة عشان اشوف خالد وش وضعه

وصلت هناك وشفت ابراهيم وصالح ومعهم ماجد واقفين بالشارع كاالعادة وطاقينها سوالف ,,, رحت لهم وسلمت على ماجد

ابراهيم بابتسامة = هاااه جاي لخالد ,,, صح .؟

التفتت لابراهيم وهزيت راسي باية

ابراهيم = اجل حنا بعد نبي نروحله ,, ماندري وش فيه ,, ماطلع ابد من البيت حتى بالصلوات ماشفناه

استغربت بس سكتت ولا علقت

صالح بقهر = اخ يالقهر عمتي عندنا بعد ماسافر عمي للرياض والحين خالد ماخذ راحته بالبيت

ابراهيم مستغرب = طيب واذا

صالح بقهر = اقولك ماخذ راحته ببيت عمتي

ابراهيم = بيت عمتك يصير بيت خاله

ماجد = صالح مافهمت عليك ,,, طيب واذا خالد صار بالبيت لحاله يعني انت ماتقدر تدخل بيت عمتك ,,, وبعدين تراك مانت محتاج للبيت ياخي ,,, بيت ابوك هذا هو ,,, اما خالد اهله بديره وهو بديرة واكيد يحتاج للبيت

ابراهيم بطرف عينه = صويلح اشم ريحة نذاله

صالح = عمتي ماتاخذ راحتها ببيتها ,,, واضطرت تجي عندنا عشان هالعلة ,,, المفروض هو اللي يطلع لين يجي ابو عبد الله ,,, مو هو اللي يقعد وهي اللي تطلع

ماجد مستغرب = اكيد ,,, مايجوز يجلسون بمكان واحد ,, هو مو محرم لها وهي ماهي محرم له ,,, وابو عبد الله ماهو موجود

صالح = ياخذ شقه يذلف يدبر عمره ماعلينا منه

ماحد فاهم صالح كثري

انا بعصبية = عمتك اشتكت لك من خالد

صالح بضيق = لا ,, بسـ

انا بعصبية = خلاص اجل انطم واسكت ادري فيك تبي تنغص على خالد وبس ,,, ياخي كم مرة اقولك اتركه بحاله اللي فيه كافيه

صالح بسخرية = وش اللي فيه كافيه ,,, أكل ومرعى وقلة سنعه

هذا الكلام معه ضايع ,,, رحت متوجه لبيت ابو عبد الله وابراهيم وماجد معي ولحقنا النشبة صويلح ,,, ضربت الجرس وانتظرنا يفتح ولا فتح ,,, ضربت مرة ثانية وانتظرنا ولا فتح

انا مستغرب = وش فيه ليه مايفتح .؟

ماجد مستغرب = مدري اتصل فيه شف

صالح = اكيد ماخذ راحته بالبيت

ابراهيم بضيق = اسكت انت اسكت

طلعت جوالي واتصلت بخالد ولا رد ,,, اتصلت مرة ثانية ولا رد ,,, خفت وش فيه لايكون مغمى عليه

انا بخوف = مايرد

طلع ابراهيم جواله واتصل عليه اخذ شوي وبعدها جاه الرد

ابراهيم = الووو ,,, هلا خالد

استغربت يرد على ابراهيم ولا يرد علي ,,, نزلت راسي بضيق ,, شكله ماخذ بخاطره مني بسبب التهمة والضرب اللي اليوم هذا غير اني فتنت عليه عند ابو عبد الله ( تنهدت ) لا حول ولا قوة الا بالله ,,, والله ماعلمت ابو عبد الله الا عشانه

ابراهيم = وينك افتح الباب ,,, ايه انا اللي اطق ,,, يله يله افتح ,,,, ليه وشفيك ,,, ( تنهد ) ماحنا مطولين ,, يله

وسكر الجوال

ماجد = ليه وش فيه .؟

ابراهيم = يقول تعبان .؟

شكلي لو ارجع احسن خالد ماراح يستقبلني اكيد ,,, بس لازم اشوفه واعتذر منه ,,, وبنفس الوقت مابي اعتذر قدام الشباب ,,, مابيهم يعرفون اللي صار لانهم اكيد راح يتهمونه مثل ماتهمته انا

انتبهت للباب ينفتح ويطل خالد علينا

وجهه حزين والهالات واضحة اكثر وواضح عليه التعب وصدره يرتفع وينزل كأنه يحس بكتمه وعيونه ناعسة ,,, وعليه ملابسه ماغيرها

اول ماشافني خالد طالعني شوي وبعدها لف عني والتفت للبقية

خالد بتعب = هلا ,,, حياكم

ابراهيم وماجد = الله يحييك

صالح بقهر = هيييه انت ,,, المفروض انا اقولهم حياكم هذا بيت عمتي

كشر خالد بضيق من غثاثة صالح وفسح الطريق لنا عشان ندخل ,,, الصراحة ترددت ادخل والا لا ,,, بس لما شفتهم دخلوا دخلت ,, ودخلنا المجلس وجلسنا

ماجد = خالد وش فيك شكلك تعبان مرة

ابراهيم = تبينا نوديك المستشفى .؟

خالد بتعب = مايحتاج

صالح = هذا دايم تعبان اصلا ,,, ودي مرة بس يقول ماني تعبان

التفت خالد لصالح وطالعه شوي وبعدها نزل راسه بحزن

ابراهيم = خالد ماعليك منه ,,, دخل الكلام من هنا وطلعه من هنا

ماجد = ابو خلّود ماعـ

وسكت منصدم من حركة خالد وانصدمنا حنا بعد

يمسح دموعه بيده وهو منزل راسه بشكل محزن

انا بصدمه = خالد

قام ماجد وجلس بجنبه

ماجد بصدمة = خالد وشفيك ,, لا يأثر عليك كلام هالخبل

يمسح دموعه ويشاهق ويحاول مايبكي اكثر

خالد بصوت باكي = صالح معه حق ,, انا مريض ( وحط راسه بحضن ماجد بشكل يائس) انا مريض ,,, مريض

انصدم ماجد اكثر ورفع راسه وهو متأثر من حركة خالد ,,, التفت ابراهيم لصالح واشر على رقبته ,, يعني حسابك بعدين ,,, صالح لف وجهه عنا وسكت ,,, التفتت لخالد مرة ثانية وهو الى الحين حاط راسه بحظن ماجد ويبكي بصمت ,,, وش فيه صاير يائس كذا اذا كان عن مشكلة الاستراحة فمشكلتها محلولة ان شاء الله ,,, خالد صاير دايم حزين دايم تعبان ايه صالح ماكذب خالد دايم تعبان ,, ودي اعرف وش المرض اللي فيه ,,, ابو عبد الله يقول عنده صداع مزمن وخالد مرة قالي وحنا بمكة مرضه مرض صداع عادي ,,,

( نزلت راسي ) صح ,, اسماء ادوية خالد مسجلها عندي بالجوال عشان اسأل بس انشغلت ولا سألت

اخذ خالد شوي وبعدها رفع راسه عن حضن ماجد منحرج منا

خالد بحزن = آسف ياشباب ,, بس ,,, ( وسكت )

ماجد = ماعليك خالد

ابراهيم = كل داء وله دواء ,,, وانت الحمد الله مستمر بعلاجك وان شاء الله تتشافى من هالصداع اللي دايم يجيك

منزل راسه وساكت

صالح = خالد والله ماكنت اقصد ,,, انت تعرفني احب اتهاوش مع أي احد ومعك انت بالذات ,,, من يوم ماعتدوا عليك الشباب وانا ساكت عنك عشان العملية اللي فيك بس والا انا احتريك تطيب عشان نتهاوش ,,, والله اني اشتقت لهاوشنا ودي انك تتشافى ونرجع نتهاوش زي قبل

طيرت عيوني بصالح ,,, وش صاير بالدنيا ,, صالح بشحمه ولحمه يعتذر من خالد

ماجد مستغرب = احلى يعرف يتأسف

ابراهيم بضيق = امحححححق تأسف ,, وش قال قال ودي تتشافى ونرجع نتهاوش

ابتسمت صالح طيب وشري بنفس الوقت ,,, التفتت لخالد ولقيته سرحان ( تنهدت بحيرة ) كله سرحان ويفكر ودايم مهموم,, ودي اعرف وش يفكر فيه ,, بمصيبة الاستراحة والا بوينلي والا بكلام صالح والا بأيش بالضبط

اخذنا شوي عنده وبعدها قمنا

ابراهيم = يله نستاذن ابو خلّود ,,, بكرة مدارس

ماجد بضيق = اففف ياحياة الشقا

طلعنا للحوش وخالد معنا وانا امشي وراهم احتري الشباب يطلعون ,, ودي اكلم خالد لحالنا

لما شفت الشباب طلعوا للشارع وانا اوقف عند الباب والتفتت لخالد

انا = خالد ادري انك ماخذ بخاطرك مني ,, انا آسف والله ,,, ادري اني تصرعت وظلمتك

رفع خالد راسه وطالعني

خالد بحزن = ظلمتني وماخليت لي فرصة ادافع عن نفسي

قربت منه وسلمت على راسه محاولة اعتذار

انا بحرج = خالد والله الصور اول ماشفتها طيرت عقلي ,, آسف ,, سامحني ياغالي والله اني آسف

خالد بضيق = عطني مفتاح سيارتي

انا مستغرب = ليش .؟

خالد = وش اللي ليش ,, سيارتي

انا = ادري ,, بس اقصد وين بتروح .؟

خالد = مالك دخل فيني ,,, اروح وين ماروح

انا بتنهيدة = حقك

وطلعت المفتاح وعطيته اياه

خالد بتنهيدة = ليش كذبت على خالي وقلت اني بروح لبدر

انا = وانا ماكذبت ,, انت فعلا بتروح لبدر

خالد = انا قلت ابروح للاستراحة ماقلت ابروح لبدر

انا = وبدر وينه ,, انت بنفسك قلت انهم ياخذون راحتهم باستراحتك

خالد بعصبية = جاني خالي العصر وهاوشني وحلف علي اني ماودي اهلي للرياض ,, كله منك

مديت يدي ومسكت يده اليسرى بترجي

انا = لا تعصب ,, انا والله ماعلمت خالك الا لمصلحتك ,, مشكلة الاستراحة لازم بكرة نلقى لها حل ,, بكرة لازم نروح للضابط ,, على فكرة هو وش اسمه .؟

طير خالد عيونه فيني

خالد بصدمة = بتبلغ علي ياخالد .؟

قطبت حواجبي مستغرب

انا = ابلغ عليك .؟

خالد بخوف = ليش تبي تروح للضابط .؟ تبي تعلمه عن الاستراحة واللي فيها .؟

انا = لا ,,, نبي نستعجله ويعلمك وشلون تسوي الكمين لبدر واللي معه ,, هم كانوا ساكتين لين تتشافى والحين مافيه فرصة نأجل الموضوع اكثر

خالد = انا ماني فاضي لبدر الحين

انا = مو تبي تروح للاستراحة .؟

خالد = الا

انا = خلاص اجل ,,, لازم تفتك من بدر اول عشان تقدر تدخل الاستراحة

خالد = ياسلام استراحتي هذي ,,, ادخلها بأي وقت ماعلي من بدر وغيره

رفعت يدي وحطيتها على راسه

انا = هالراس وشلون يفكر .؟

نزل خالد يدي بضيق

خالد = ماني فاضي لبدر الحين ,, ناصر معه الصور واخاف يبلغ علي ,,, من العصر اتصل بناصر ولا يرد

استغربت وليه مايرد عليه ان شاء الله ,, لا يكون بيسويها فعلا ,,, الله يستر

انا بخوف = خالد لازم نستعجل وتسوي الكمين باسرع وقت ,, خالد افهم علي الله يخليك ,, انت لازم اول تتخلص من بدر وربعه عشان مايتعرضون لك مرة ثانية وتقدر تدخل استراحتك ,,, قسم بالله ماراح يرحمونك ان شافوك

سكت خالد ولا رد علي

انا = وش اسمه الضابط ,, بكرة لازم نروح له

خالد = أي ضابط .؟

زفرت بضيق وش فيه هذا مخه مقفل اليوم

انا بملل = الضابط اللي كان متابع قضيتك وانت بالمستشفى

خالد = ابو سامي

انا = اهاا ( ونزلت نظري اشوف عضده ) وشلون يدك الحين .؟

خالد = مالك دخل

اخذت نفس احاول اهدي نفسي

انا = العصر طلبت مني اجيب شاش ونسيت ,,, لفيت يدك بشاش نظيف والا بعده على قطعه الشماغ

خالد = لا

طيرت عيوني فيه

انا = وش اللي لا ,, لا تقول قطعة الشماغ ملفوفة بيدك الى الحين

خالد = ماني فاضي اغيرها

انا = من الظهر الى الحين .؟ صاحي انت ,,, الشماغ ماهو مثل الشاش ياغبي

خالد بملل = خالد والله اني تعبان مالي حيل اوقف عند الباب اكثر ,, ممكن تطلع .؟

رفعت حواجبي مستغرب مالك حيل حتى توقف ,, لازم اروح للصيدلية واسأل عن ادوية خالد ,, الفضول بيذبحني ,, ومنها اجيب لهالغبي شاش

انا = بطلع ,,, بس لا تنام بمر الحين الصيدلية واجيبلك شاش الف يدك المعفنه

خالد = انت المعفن

طلعت من البيت وتفاجأت بالشباب واقفين يحتروني

ابراهيم = تعال خالد تعال

جيتهم مستغرب ووقفت عندهم

انا مستغرب = هلا

ماجد = خالد انت اقرب واحد لخالد واكيد تعرف وش عنده

ابراهيم = اول شي قل لنا تصالحتوا .؟

انا = قلتلك خالد عزيز وغالي علي لا يمكن ازعل منه

ابراهيم = لا بس استغربت قبل شوي رد علي بالجوال ولا رد عليك ,, قلت يمكن الى الحين متزاعلين

ابراهيم مايفوته شي ماشاء الله عليه

ماجد = خالد وش المرض اللي عنده ,,, هالخبل اسأله ويقول مدري ,, كنه مو قريبه ( وأشر على صالح )

صالح = وانا وش يدريني ,,, يقول عندي صداع وعمي ابوعبد الله يقول عنده صداع بسبب الحادث اللي صارله قبل سنه

ابراهيم = ليش ماترد

التفتت لابراهيم وانا بالي ماهو معي

انا = وانا بعد مدري

ابراهيم = علينا

انا = والله يابراهيم اني مدري سألته مرة وقال نفس مايقول دايم ,,, عندي صداع

ابراهيم بتفكير = انا غير أسأل واشوف ,,, بس وشلون أسأل مدري ( والتفت لصالح ) تعرف اسم الطبيب اللي يتعالج عنده او المستشفى او أي شي نسأله

صالح = وانا وش يدريني

ماجد بعصبية = انت وش تعرف بالله قلّي وش تعرف ,,, لا بالمدرسة فالح وتعرف شي ,, ولا عن اهلك تعرف شي ,,, قلّي وش تعرف هاااه قل

رفع صالح يده لماجد بتهديد

صالح بعصبية = بتسكت انت والا الفعك الحين

ابراهيم بملل = هدوا اللعب شباب

انا بملل = انا مشغول الحين ,, مع السلامة

ورحت عنهم رايح للصيدلية مشي ,, بعدها مشوار ربع ساعة عن الحارة مشي

وصلت الصيدلية وشريت شاش وبعدها طلعت جوالي وفتحت على اسماء الادوية اللي كاتبها بالملاحظات ومديتها على الصيدلي

انا = معليش يالطيب ودي اعرف هالادوية تصرف لأيش

استغرب الصيدلي اللي كان مصري واخذ الجوال يقرا الاسماء وبعدها رفع راسه لي

الصيدلي = الادوية ليك .؟

انا = لا

الصيدلي = لمين .؟ وعمرو كام .؟

اخاف اقول لصديقي ويقول هذي خصوصيات واخاف اقول لاخوي ويسألني اسأله خاصة ماعرفها عن خالد ويكتشف بعدها هالصيدلي اني اكذب

انا بتردد = مو ,,, مو لحد

الصيدلي = وبتسأل ليه .؟

انا = آآآ ,, لا بس كذا ,, انا وشسمه ,,, ايه ,, انا بسنة اولى جامعة وابي اتثقف بس

ابتسم الصيدلي

الصيدلي = آآه يعني انته بسنة اولى صيدله او تمريض او ايه بالزبط

والله البلشة يعني لازم التحقيق ,,,

انا = باقي ماشسمه ,,, أأأ ( وسكتت مدري وش اقول )

الصيدلي = بتئول ايه .؟

انا = بسنة اولى صيدله

الصيدلي بابتسامة = ماشاء الله تبارك الله ,,, حازر يابني

وراح شوي وجا معه مجموعة ادوية ,, لايكون صدق اني ابتثقف

الصيدلي = انا بئولك هوا الصراحة بعض الادوية اللي بتسأل عنها مش عندي دلوئدي الصراحة ,,, بص ,, ده مهدئ ,, وده كمان مهدئ بس ده ائوى مفعول من ده وهوا مايستخدمش الا عند اللزوم ولو تبص على تركيـ

انا بملل = اختصر يرحم والديك ,,, ابي اعرف الادوية لأي مرض وبس وكثر الله خيرك

الصيدلي = يابني لازم تعرف تركيبات ده وفرئو عن ده ,,, انته بالمستئبل بـ

انا بملل = ادري ادري ,,, بس اختصر ,,, فهمنا ثنين منهم مهدئ ,,, الباقيات لأيش .؟

الصيدلي = أمرك عجيب يابني ,, حازر حئولك ,,, ثنين مهدئ ,, واحد حبوب منومة ,, وواحـ

انا بصدمة = وش ,, حبوب منومة .؟

الصيدلي = آه حبوب منومة تصرف لبعض المرضى النفسين مش كلهم يعني

انا = بس هو مافيه مرض نفسي

الصيدلي = ايه .؟ ,,, من هوا اللي مافيه مرض نفسي

انا مرتبك = آآآ ,, معليش كمل ,,, ثنين مهدئ وواحد حبوب منومة طيب والباقي .؟

الصيدلي مستغرب = فيك ايه اتخديت كزا ليه .؟

انا = لا ولا شي ,, ماكملت الباقي لأيش .؟

اخذ الصيدلي الجوال وأخذ يأشر على كل اسم

الصيدلي = ده وده مهدئات بس بيختلفوا من ناحية التركيب والمفعول والاستخدام وغيرو ,,, وده حبوب منومة ,, وده علاج مايصرفش الا يعني بعيد الشر بعيد الشر عني وعنك وعن جميع المسلمين مايصرفش الا لمرضى السرطان وده عـ

شهقت وطيرت عيوني فيه ,, واقل من الثانية تجمعت الدموع بعيوني لا شعوريا

انا بألم = وش ,, ســ

ونزلت دموعي غصب

انصدم الصيدلي

الصيدلي منصدم = ايه مالك ,, فيه ايه .؟

انا بصوت باكي = من متى ,,, وشلون صار و من متى .؟ ماحد قال لنا ,,, دايم اسأله يقول عندي صداع ,, بس ماعمره قال عندي سرطان ,,, انت مانت متأكد صح .؟ من متى قلّي .؟

الصيدلي مستغرب = ايه هوا اللي من امتى ,,, فيك ايه

انا = سرطان ( وبكيت غصب عني )

الصيدلي = بتبكي .؟ ايه مالك يابني ,, آه ده علاج للسرطان معئول انته حساس كدا ,, ئول ربنا يشفيهم ,, انته الصراحة ماتصلحش تدخل لا صيدلة ولا تمريض ولاحاجة ,,, انته رئيئ بشكل

اخذت الجوال ولفيت عنه

الصيدلي = ايه مالك ,, مش عاوز تكمل والا ايه

طلعت من الصيدليه و انا اسحب رجليني سحب

آآآآه ياخالد

آآآه ياغالي

توني افهم الحزن اللي اشوفه بعيونه ,, توني افهم مدى التعب اللي يحس فيه

( المرض هد حيلي وماترك لي قوة )

جلست على الرصيف يوم تذكرت كلمته ,,, توني افهم معناها ,, المرض هد حيلك ياغالي ,,, من متى قلّي ,,, وليش ماعلمتنا ,,, ابو عبد الله ماعمره جاب سيرة السرطان بلسانه معقول مايدري ,,, او المرض جديد معك ومايمدي احد يدري

( حطيت يديني على راسي ) لا مو معقول ,, طيب سرطان وين بالضبط

( رفعت راسي بخوف ) لا يكون الصداع اللي يعاني منه هو السرطان ,, اعوذ بالله معقول السرطان براسه ,,, ( بكيت بألم ) يعني المرض مو جديد عنده طيب من متى .؟

ابو عبد الله وصالح يقولون جاه الصداع من الحادث اللي صار له قبل سنة ,,, معقول المرض معاه من سنة وساكت

معقول ياخالد كاتم هالخبر بصدرك من سنة ولا علمت احد حتى خالك ,,, او هو جديد وانت بنفسك ماعرفت عنه

انتبهت على جوالي يرن وطلعته من جيبي وانا مالي نفس لشي

( البيت يتصل بك ) اففف اكيد خلود

انا بهمس = هلا

خلود = خالد وينك ,, ترا بنتعشى عنك ,,, من الصلاة ماجيت ,, وينك .؟

انا = تعشوا لا تحتروني

سكت خلود شوي

خلود = خالد وش فيه صوتك

بغيت ابكي اكثر يوم سألتني ,,, اخذت نفس اهدي نفسي

انا = مافيني شي

وسكرت بوجهها

( المرض هد حيلي وماترك لي قوة )

( حطيت يديني على راسي ) مابي اتذكرها مابي ,, كل شوي ترجع كلمته ببالي

هالصيدلي مايدري ,, ايه اكيد مايدري ,, لا خالد ولا ابو عبد الله ولا حتى صالح جابوا كلمة سرطان بلسانهم

بس وشلون ,,, يقول واحد من الادوية تصرف لمرضى السرطان ,,, معقول دكتور يصرف لخالد علاج مو له

قمت وطاح الشاش بالارض ,,, اففف مالي نفس اروح لخالد الحين ,,, مابي اشوفه

اخذت الشاش ورحت مرغم لبيت ابوعبد الله ,,, اكيد يحتريني الحين عشان هالشاش ,,, ليتني مارحت للصيدلي ليتني بقيت على عماي

ضربت الباب وطلع لي خالد

مديت الشاش له بصمت

خالد = مابتلفه لي ,, ماعرف لحالي

انا بهمس = هاااه ,,, ايه

خالد مستغرب = وشفيك خالد ,, عيونك حمر .؟

سكتت عنه ولا رديت

فسح خالد الطريق لي عشان ادخل

ودخلني غرفته بالملحق ,,, نزل خالد بلوزته وجلس على السرير وانا الى الحين واقف

وين السرطان بالضبط ومن متى ,,, وليه ماعلم احد ,, معقول ابو عبد الله يدري ,,, بس خاله ماعمره جاب سيـ

خالد = خالد وش فيك واقف ,,, يله تعال ,,, ابي انوم بكرة مدرسة

جلست بجنبه على السرير بصمت وفكيت قطعة الشماغ اللي لفيتها له اليوم الظهر ,, كانت مليانه دم وبصعوبة فكيتها

انا بهمس = تبيني اوديك المستشفى ,,, انفتك كم غرزة ولازم يرجعون يخطونها

خالد = ومن اللي فكها غيرك ,, يقالك خايف علي الحين يالجحش

نزلت راسي واخذت الشاش اللي بحظني وبديت افك القرطاس عنه بصمت

خالد = خالد وش فيك .؟

رفعت راسي وبديت الف عضده بصمت

خالد = مارديت علي

انا = ارد عليك وش اقول

خالد = قلتلك ياجحش بالعادة ترد علي ياثور

انا = زعلان لاني ماقلت لك ياثور ,,, شكله صالح اعداك

خالد = متى تبينا نروح لابو سامي ,,, الصباح انا ماقدر عندي مدرسة وضروري اروح ماقدر اغيب اكثر

انا = من ابو سامي .؟

خالد = وش فيك نسيت ,, الضابط

انا بضيق = صدق انك فاضي

طير خالد عيوني فيني مستغرب

خالد = الحين انا اللي فاضي والا انت ,,, من اللي قبل شوي يقول لازم نروح لابو سامي عشان الكمين ومادري ايش ,,, والا انا مابي اروح للضابط ولا غيره ودي اروح للاستراحة باسرع وقت واطلّع هالبلاوي اللي فيها ,,, بس انت علمت خالي علي وخليته يمنعني

انا = ايه لاني مابيك تروح للاستراحة الحين وبدر فيها

خالد = اييييه بتجنني انت ,,, توك تقول صدق انك فاضي

انا بضيق = اوووه خالد كلمة قلتها وانا متضايق وخلاص

خالد = طيب متى تبينا نروح .؟

انا بضيق = العصر يعني متى ,,, الصباح مدارس

انتهيت من لف عضده وطالعت صدره بمكان الخياطة ,,, الحمد الله مافيه ولا غرزة انفكت

انا = وشلونه صدرك .؟

حط خالد يده على صدره يلمس الخياطة

خالد = تعورني شوي ,,, وخاصة اذا اخذت نفس تنشد اكثر وتعورني

انا = طيب وشلون بتسوق السيارة بكرة ويدك تـعـ

خالد بضيق = اوووه خالد ,,, الحمد الله ان خالي مو هنا والا كانت علوم ,,, اقدر اسوق عادي

انا بضيق = طول عمرك عنيد

انسدح خالد على السرير من دون مايلبس بلوزته

خالد = سكر باب الشارع اذا طلعت

قمت وطلعت للحوش ,,, انتبهت ان بيت ابو عبد الله كل لمباته طافيه ماعدا الملحق والحوش

رجعت لغرفة خالد اسأله

انا = خالد البيت مافيه الا انت .؟

التفت خالد لي مستغرب من رجوعي المفاجئ

خالد = شوفت عينك ,, خالي بالرياض وخالتي عند اخوها ابو محمد

انا = ومن سوا عشاك اليوم .؟

خالد = ماشتهي شي

انا = يعني ماتعشيت .؟

خالد = مابي ,, مالي نفس

جيت وجلست على سريره

انا بابتسامة = طيب بكرة غداك عندي

خالد = آآ ,,, لا مايحتاج مابي اكلف عليك

انا بابتسامة = لا كلافة ولا شي ,, بكرة تطلع من مدرستك على شقتي على طول

خالد = خالد والله مايحتاج ,,, امر أي مطعم صدقني مايحتاج والله

حطيت يدي على بطنه وانا ابتسم له بحنان

انا = نحتريك بكره على الغدا لا تتأخر

ابتسم خالد وهز راسه باية

قمت وطاحت عيني على الادوية المتنثرة على طاولته ورجع لي الالم ,,, دايم اشوف الادوية على طاولته وعادي عندي ,,, كنت على عماها ولا ادري وش فيه ,,, والحين كل ماشفت علاجاته تألمت

خالد = خالد وش فيك .؟

انا = هاااه لا ولا شي ,,, مع السلامة

طلعت من البيت ورحت للشقة ولقيت اخواني يحتروني على العشا

وبصعوبة تهربت من اسألت خلود

انا = خلود بكرة زيدي في الغدا ,,, خالد بيتغدا عندنا بكرة

سكتت ولا ردت علي

يوم السبت

ماكان لي نفس لشي ابد ومانمت الا ساعتين قبل الفجر ,,, طوال الليل وانا افكر بخالد وكل يوم ترجع لي كلمته ( المرض هد حيلي وماترك لي قوة )

حتى الشباب تهربت منهم ولا تمشيت معهم ولا كلمتهم

ياليت الصيدلي غلطان ,, ياليتني ماسألته اصلا

الظهر

جانا خالد للشقة بعد ما اتصل علي يتأكد انا موجود والا لا

وهالمرة عليه ثوب وشماغ بس ما اخفى التعب الواضح فيه

( تنهدت بألم ) الله يشفيك ياغالي

دخلته المجلس وانا اهلي وارحب فيه اشجعه ,, مدري وش فيه مستحي ,, مع انه ماهي اول مرة يدخل شقتي وكل شوي يقول مايحتاج تكلف على تفسك ومادري ايش

فرحوا فيه اخواني الصغار لما عرفوا انه بيتغدا عندنا

جلس سالم بجنبه وسأله

سالم = خالد رولين وينهي .؟

خالد بابتسامة = راحت للرياض

سالم = ليه .؟

خالد = هي تدرس هناك ,, هي بثالث اكبر منك بسنه

سلمى = وانا ابي ادرس

انا = لاحقه على الغثا

خالد = قل ان شاء الله

انا = ان شاء الله

بعد الغدا

جلسنا نشرب الشاي

خالد = اسمع خالد لا تعلم خالي اننا بنروح لابو سامي ,, تكفى

انا = من ابو سامي .؟

خالد بعصبية = اييييييييييييه ابو سامي الضابط وش فيك دايم تنسى

انا = آآآ ,,, ايه صح نسيت ياخي ,, لا وش اعلم خالك ادري انه بيعيي

خالد = مدري عنك ,, انت بكل شي تعلم خالي

انا بعصبية = ياخي انا ماعلمت خالك الا لمصلحتك لاني اعرفك عنيد ,, ومايعرف يجيب راسك الا خالك ,, فهمت والا افهمك

خالد = افففف والله اني على اعصابي ابي اروح للاستراحة الحين ,,, والله اني خايف ياخالد خايف ,,, ناصر مايرد علي ,,, دايم اذا اتصلت عليه يرد علي بسرعة اما الحين لا

انا = وهذا مايرد عليك ليه ,,, لايكون بيبلغ .؟

زفر خالد بضيق وسكت

انا = ابتصل عليه الحين واشوف

وطلعت جوالي واتصلت على الزفت ,, شوي ورد

انا = الووو

التفت خالد لي بسرعة وقام وجا عندي

ناصر = هلا ابو خلّود

انا = ناصر بالمختصر وش تبي .؟

سكت شوي

ناصر = عيادة الاستاذ خالد تركي وينقل كل شي باسمي

التفتت لخالد بضيق

انا = طيب وليش ماترد عليه

ناصر = خالد تركي اعرفه ,,, لسانه طويل ولا يحشم احد

انا = وانت تعرف الحشيمة

ناصر بتهديد = وين تبيني اروح اول للهيئة والا للشرطة

انا = لا ناصر اصبر ,,, طيب لك اللي تبي ( شوي ومادريت الا ببكس على بطني ) آآآه ( والتفتت لخالد اللي عطاني بكس ونزلت الجوال عن اذني وكلمت خالد بعصبية ) وش فيك .؟

خالد بهمس = ليش تقولّه لك اللي تبي .؟

انا بعصبية = اصبر ( ورفعت الجوال لاذني ) الووو

ناصر = هو عندك اجل

سمعنا ,,, ضربت فخذ خالد بقهر على تسرعه وغبائه

انا = اسمع ناصر قلتلك لك اللي تبي بس اصبر عليه شوي خالد يدرس وماهو فاضي نقل ملكية والخرابيط هذي والامتحانات ماباقي لها شي

ناصر = العب غيرها حبيبي ,, انا دكتور مايقدرون يضحكون علي بزارين توهم بالثانوي

مسكت اعصابي ولا رديت عليه ,,, شكله فعلا داهية ,,, انا ابيه يصبر لين نروح للاستراحة ونطلع البلاوي منها

انا = ماحد ضاحك عليك بس اصبر علينا شوي على الاقل ثلاث اسابيع على الاقل يعني ,,, امتحانات ومدارس وانت تعرف نقل الملكية ماتمر بيوم والا يومين ,,, اصبر

سكت ناصر شوي حسيته يفكر

ناصر = طيب نصبر ,, اسبوعين بس ,,, الاسبوع الثالث يجي للرياض ونتفق على كل شي ,,, انا ابعطيه حقه وبالمبلغ اللي يبيه ,,, انا حقاني واعرف الحق

ايه واضح حقاني وبقوة

انا بضيق = مع السلامة

وسكرت عنه

فتح خالد فمه بيتكلم ,,, بس سبقته

انا = اصصص ولا كلمة ,,, كل اللي قلته له تسليك ,,, لين نلقى حل

طالعني خالد شوي وبعدها قام

انا = وين رايح .؟

خالد = للبيت

مسكت ثوبه وجريته اجلسه غصب

انا = اجلس بس اجلس ,,, الصلاة ماباقي لها الا ساعة وبعدها بنروح لابو سامي ,, اقعد هنا

خالد = بس والله تعبان ابرتاح

التفتت له وسألته بحذر

انا = ليه من وش تعبان.؟

خالد = توني جاي من المدرسة وابنوم ,,, وانت ماتبي تنوم بعد .؟

انا = اقولك ماباقي الا ساعة ,,, اذا نمت وقمت بعد ساعة بتعبني هالساعة ماتريحني ,,, وبعدين وشوله تروح للبيت ,,, البيت فاضي مافيه احد ,, تروح هناك وش تسوي

نزل خالد شماغه وقام وجا عند الكنب الكبير وتمدد عليه

انا = الحين يذن لا تنوووم ( وانتبهت لنفسي) اقصد لا تنام شفت اعديتني (وابتسمت)

ضحك خالد وهو يفكك ازارير ثوبه

خالد بابتسامة = مابنوم

فجأة سمعنا صوت قدوم رسالة بجوال خالد

طلع خالد جواله من جيبه وبدا يقرا الرسالة

خالد = شف النذل

انا = وش .؟

خالد = ناصر يقول كم سومك على العيادة .؟

انا = رد عليه تسليك

خالد = لا والله ماني براد عليه ,,, وخله يسوي اللي يسوي

انا = بيبلغ

خالد = انا ماسويت شي ,,, واللي حط البراميل بالاستراحة اكيد ناصر

انا = يمكن ناصر ويمكن بدر ويمكن بعد عامل الاستراحة ماحد يدري ,,, بس كله بيطيح على راسك انت ,,, انت ماعندك دليل واحد تثبت براءتك اما ناصر عنده صور وفيديو تضيعك

سكت ولا رد

انا = رد عليه ياخي تسليك ,,, عطه امل انك خلاص بتبيعله العيادة عشان مايتهور ويبلغ عليك

اخذ خالد الجوال بضيق وقعد يكتب

انا = ماكلمت وينلي .؟

خالد = اوووه ماني فاضيله الثاني ,,, خلني افتك من ناصر اول

انا = ناصر ووينلي هدفهم واحد

خالد = اكيد بس توني ادري انهم طمعانين بالعيادة ( ونزل الجوال على بطنه )

انا = وش كتبت

اخذ خالد الجوال ورماه علي ومسكته

فتحت الرسايل المرسله

ولقيته مرسل هالغبي

( اسومها بعشرة مليون تبيها والا فارق )

رفعت راسي بصدمة

انا = بعشرة مليون

رد علي يكمل

خالد = تبيها والا فارق

ضحكت عليه

انا = والله انك خبل ,,, تعتقد بيشتريها بعشرة مليون صاحي انت ,, بيبلغ عليك على طول بس عشان يضغط عليك تنزل

خالد = العيادة تدخل ودخلها في الشهر ماتقل عن 200 الف ,,, العيادة مشهورة وبحي مشهور وفيها احدث الاجهزة وكل شهر يفتحون غرفة العمليات وتجرى اكثر من عمليتين او ثلاث عمليات بالشهر

انا بصدمة = مشاء الله تبارك الله 200 الف بالشهر ,,, خاااالد حرام تبيعها

تنهد خالد وسكت

انا = حسبي الله عليه عارف عنها كل شي ,,, عشان كذا خطط ودبر ,,, اجل اكييييد هو اللي حط البراميل بالاستراحة ,, ماهو بدر ولا العامل

خالد بهمس = اكيد

انا = خالد ليه ماعمرك ذكرت ابوك ولو مرة ,,, خالد قل لابوك يمكن يلقالك حل

طالعني خالد شوي وبعدها غمض عيونه وتنهد وسكت وطول وهو ساكت

بالتالي سكتت عنه بس فجأة رد

خالد = محتاجله ,,, ( وفتح عيونه وطالع السقف بحزن ) محتاج لحنانه ,,, محتاج لتوجيهاته ,,, ( ورفع يده اليمنى حسيته يتخيل ) ابيه يضمني ,,, ابي احس بوجوده ( وتغير صوته ) خالد والله اني تعبان محتاجله ,,, تعبت من الهم ,,, ابي اشكيله ,, ابي اقوله عن وينلي ,,, ابي اقوله عن ناصر ,,, ابي اعلمه عن بدر وراكان ابي ارتاح ( طالعني وعيونه تلمع ) تكفى قلّه خالد محتاجلك ,,, قلّه ابيه يضمني ولو مرة ,,, خالد انا محتاجله بس هو وينه ( وبكى ) وينه .؟ خالد والله اني تعبان ,,, تعبان ابي ارتاح ,,, خالد تكفى طلبتك ,,, ذكره فيني ,,, طلبتك خالد قلّـ

بكيت غصب عني وقمت وجلست بالارض عنده ودخلت يديني تحت ظهره وضميته

انا بصوت باكي = بس خلاص اسكت لا تكمل

لف خالد يده اليمنى على ظهري ورصني ولأول مرة اسمعه يبكي بصوت مسموع

خالد وهو يبكي = مقهوووور مقهوووور ياخالد ,,, ماني قادر اتحمل اكثر ,,, متى يغمى علي متاااا ,,, ماحس بالراحة الا اذا اغمى علي ,,, خالد تكـ

رصيته اكثر

انا بصوت باكي = بس خلاص اسكت

سكت بس اسمع صوته وهو يبكي بألم

اخذت شوي ورفعت راسي عنه اطالعه وسلمت على راسه

انا = لو اخليك تنام احسن ,,, وبمرك بعد شوي اقومك ( وابتسم له بحنان )

هز خالد راسه باية وعلى طول غطى عيونه بذراعه عني

قمت وطلعت من المجلس ودخلت غرفتي ,, هذا وانا ماسألته عن المرض هو صحيح والا لا ,,, وشلون اسأله ,, الولد يائس كاره الدنيا ,,, تعب من كثر الهم والمشاكل


بعد صلاة العصر

رجعنا انا وخالد للشقة بعد ماصلينا بالمسجد ,, دخل خالد للمجلس وانا رحت لخلود

انا = خلود بطلع ,,, تبين شي اجيبه معي

خلود = نوووو ,,, بس لو تاخذ اخواني معك وخاصة معاذ تسوي خير ,,, بكرة علي امتحان انجليزي ومادري وشلون بذاكره افففففف

انا = سالم وسلمى اقدر ابعدهم عنك ,,, ارميهم بحارتنا يلعبون لين اجي واخذهم بس معاذ وين تبيني اوديه ,,, احسن حل نوميه

خلود بضيق = شبعان نوم

انا بمزح = اضربيه لين يبكي ,, واذا بكى اكيد بينام

خلود = هههههه حلوة ,,, اجل كل يوم بضربه

سكتت ,, لو امي فيها خير لك ياخلود كان ماتخلت عنك وانتي بأمس الحاجة لها

ابتسمت يوم تذكرت ان فيه عامل مشترك بين خالد وخلود

خلود مستغربة = وش فيك تضحك .؟ ضحكنا معك

انا بابتسامة = تدرين ,,, اكتشفت شي مشتركين فيه انتي وخالد

خلود = خالد خويك .؟

انا = ايه

خلود مستغربة = وشي .؟

انا بابتسامة = خالد محتاج لابوه وابوه لاهي عنه ,,, وانتي محتاجة لامي وامي لاهيه عنك

سكتت خلود ولا ردت

طلعت من عندها ورحت للمجلس ولقيت خالد جالس بالارض ويلاعب معاذ

انا = يله انت الثاني امش .؟

قام خالد

خالد = ليه من الاول .؟ ( وابتسم )

انتبهت لنفسي ,, اقصد بالاول خلود ,,, لفيت وجهي عنه ,,, ابتسامته هذي اكيد عرف اني اقصد اختي

انا = امش وانت ساكت

طلعنا من الشقة وتوجهنا لمركز الشرطة قاصدين ابو سامي

وصلنا عند مكتبه ودخلنا عليه وبعد السلام والتعريف

انا = يوم كان خالد بالمستشفى قلت مافيه حل الا الكمين ,,, وخالد مستعد الحين

التفت ابو سامي لخالد مستغرب

ابو سامي = تشافيت من العملية ,, مامر عليك الا اسبوعين

خالد = ايه تشافيت ,,, مستعد اسوي اللي تبونه مني والحين

ابو سامي = معاك تقرير من المستشفى .؟

خالد مستغرب = وش تقريره ,,, ووش دخل المستشفى

ابو سامي = نشوف راي الدكتور ان كان صحتك تسمح والا لا .؟

خالد مستغرب = ليه وش نوع الكمين

انا مستغرب = مو انت تقول خالد ماعليه الا انه يستدرج الشباب يجون للمنطقة هنا وانتم تقبضون عليهم

ابو سامي = صح بس على أي اساس نقبض عليهم ,,, لازم يكون فيه سبب

انا = سالخين الولد قدامك ,,, هذا مو سبب

خالد = وش سالخينه انت الثاني ,,, شايفني خروف عندك

التفتت لخالد

انا = اسكت انت ( والتفتت لابو سامي )

ابو سامي = سلخوه صح بس قبـ

خالد = ايييييييه تراي بديت اشك اني خروف صدق

ابتسم ابو سامي وهو يمسك نفسه مايضحك يحافظ على هيبته

ابو سامي بابتسامة = نقصد اعتدوا ( والتفت لي ) هم اعتدوا عليه صح بس قبض عليهم لهذا السبب بالرياض,,, بس المعتدى عليه اللي هو خالد ماتابع القضية ,,, لا هو اللي تابعها ولا احد من اقاربه تابعها ,, صار هالشي والا لا .؟

خالد = مارحت لاني اعرف انهم عندهم واسطة بتطلعهم

ابو سامي = فاهم عليك ,,, بس انا اقصد قضية الاعتداء انتهت بتنازل المعتدى عليه اللي هو انت

انا = خالد ماتنازل

ابو سامي = خالد ماتنازل ,, بس ماتابع قضيته وما طالب بحقه يعني كأنه متنازل ,, يحاكمون الطرف الثاني وهو مافيه طرف اول اصلا

التفتت لخالد معصب

انا بعصبية = انت ليه مارحت لهم وقتها وطالبت بحقك منهم

خالد = لاني عارف اني بخسرها من البداية

انا بعصبية = انت مشكلتك هاليائس اللي انت عايش فيه ( والتفتت لابو سامي ) دبرنا تكفى ,,, الشباب داخلين استراحته بالقوة

شهق خالد بخوف ونادى باسمي بهمس

خالد بهمس = خااالد

استغربت وش فيه خاف

انا مستغرب = وش .؟

التفت خالد لابو سامي

خالد بخوف = لا استراحتي مافيها شي ,, بس ابي افتك منهم ,,, استراحتي مافيها شي ابد

ابتسمت عرفت ليش خايف ,,, خاف ابو سامي يعرف عن اللي بالاستراحه ,, الغبي نسى ان استراحته بالرياض وابو سامي هنا والرجال يبي يقبض عليهم هنا يعني ابو سامي ماهو مستخدم الاستراحة للقبض عليهم ابد ,,, ماله داعي هالخوف

ابو سامي مستغرب = عندك استراحة .؟

خالد بخوف = لا

انا = بالرياض ماهوب هنا

ابو سامي = وش الفايدة انا ابي اقبض عليهم هنا ,,, حنا نقدر نقبض عليهم بالرياض بس ماراح نستفيد شي بسبب واستطهم المعتمدين عليها هناك

تنهد خالد بارتياح ,, واشر لي بيده يعني اوريك

انا = وش بتسوي اجل .؟

ابو سامي = لكم عليهم قضية ثانية ومانتهت الى الحين ,, يعني مثلا سارقين سيارة منكم ,, او أي شي ثاني

انا = لا

التفت ابو سامي لخالد

ابو سامي = انا ودي انك تستدرجهم هنا وتخدعهم بكمين بسيط كسرقة سيارتك مثلا ونقبض عليهم

خالد = ايه اقدر استدرجهم ابشوف واحاول

انا = اصبر انت ( والتفتت لابو سامي ) وشلون يعني مافهمت عليك وشلون كسرقة سيارتك مثلا ,,, وش نوع الكمين اللي تبي خالد يسوي

ابو سامي = حنا عشان نقبض عليهم ,, لازم نورطهم بتهمة يإما بتهمة سرقة سيارته او بالاعتداء عليه مرة ثانية

انا مستغرب = وليه هذا كله ,, هو عليه يستدرجهم وانتوا اقبضوا عليهم ,,, ماهي صعبة

ابو سامي = ونقبض عليهم بتهمة أيش ,,, انهم دخلوا القصيم ,,, كل الناس يدخلون القصيم ماهي بتهمة هذي

انا = بتهمة الاعتداء عليه اللي قبل اسبوعين ,, والا هذي ماتعتبرونها شي

ابو سامي = اللي قبل اسبوعين انتهت ,,, قبض عليهم وطلعوا منها وانتهت بتنازل خالد

انا = خالد ماتنازل

ابو سامي = بس سكت عنهم ولا راجعهم ,,, يعني كأنه متنازل

انا = وش السوات اجل .؟

ابو سامي بضيق = اروح ارجع اعيد الكلام مرة ثانية

سكتت افكر ,,, وشلون يعني يبي خالد يطيح معهم بهوشة ثانية والا وشلون

انا = وشلون يعني ,,, يتهاوش معهم مرة ثانية عشان تقبضون عليهم .؟

ابو سامي = او يسرقون سيارته مثلا

انا بسخرية = ياسلام ,,, تبيه يتصل على بدر ويقول تعال بالله اسرق سيارتي

والتفتت لخالد معصب

انا بعصبية = ماتقول شي ,, ليه ساكت

خالد = وش تبيني اقول ,, انا مستعد لأي شي

انا بسخرية = اجل اتصل على بدر وقله تعال اسرق سيارتي ,, بيقبضون عليك الشرطة

ابو سامي = يأخ ممكن تهدى شوي ,, وشوله اسلوب الاستهزاء هذا

انا = مدري عنك ,,, قل كلام يدخل العقل

ابو سامي = خالد عنده حلين ,,, يإما يتعارك معهم ,,, او يدبر كمين يخليهم يسرقون سيارته ,,,, واذا تعارك معهم حنا بنراقبهم من البداية ونقبض عليهم على طول يعني مافيه خطر على خالد ان شاء الله ,,, بس المشكلة بالعم ابو عبد الله رافض الفكرة نهائي

خالد = ماعليك من خالي اصلا هو الحين بالرياض

انا = كلها يوم وبيجي ان شاء الله ويمديه بالطريق الحين مايمديك تسوي الكمين بدون علمه

ابو سامي = يوم كان خالد بالمستشفى جا عندي وكان معصب يقول شيل الفكرة من راسك ,,, حاولت افهمه بس للأسف الخوف مسيطر عليه

انا بهمس = مسكين اكيد بيخاف على خالد ,,, ماله عيال غيره

التفت ابو سامي لخالد

ابو سامي = انت خلاص تشافيت ,,, يعني تقدر مثلا لو اضطرينا انك تدخل معهم بهوشة ,, تقدر تواجهم

خالد = ايه اقدر ,, انا تشافيت خلاص ,,, ومستعد لأي شي

( المرض هد حيلي وماترك لي قوة ) كلمتك هذي ياخالد

ماقدرت تواجهني وانا واحد ,,, بتواجهم وهم اربعه

انا = لا ماتشافى ,,, وماهو مستعد

خالد بعصبية = خاااالد

سكت ابو سامي مستغرب من تصرفنا بس سكت يجارينا

ابو سامي = اجل لازم نلقى طريقة يسرقون سيارته هنا

وسكتنا

نزلت راسي افكر ,,, طيب ليه انا مادخل معهم بهوشة ,, ايه ليه لا ,, وهو يقول بيكونون مراقبينهم من البداية ,,, يعني ببداية الهوشة بيتم القبض عليهم ,,, يعني مافيه خطر

رفعت راسي والتفتت لابو سامي

انا = طيب انا بدخل معهم بهوشة واقبضوا عليهم

خالد = لا

ابو سامي = يعرفونك .؟ ,,, يعني بيجون للرياض بس عشان يتهاوشون معك

خالد بعصبية = انا صاحب المشكلة وانا اللي احلها ,,, انت مالك دخل ,,, انت عندك اخوانك يحتاجونك

انا = مافيه خطر مثل ماقال ابو سامي

خالد بعصبية = قلت لا يعني لا

ابو سامي بملل = صح انت صاحب المشكلة واصلا الشباب يبونك انت حسب مافهمت من اسباب الاعتداء الاول عليك ,,, بس انت تشافيت تماما عشان تقدر تبدا

خالد = ايه تشافيت

انا = لا ماتشافى

خالد بعصبية = الا اقدر

انا بهدوء = لا مايقدر

ابو سامي بعصبية = بس انت واياه ,, ( والتفت لخالد ) ورني مكان العملية

خالد مستغرب = وش .؟ ليه .؟

ابو سامي = ابشوف الاصابة برت والا لا

خالد = برت ,,,, انا ابخص

ابو سامي = ورني اشوف

لف خالد وجهه عنه بضيق وسكت

ابو سامي = مو معقول طعنه تبرى خلال اسبوعين هذا غير الجرح العميق اللي بصدرك

انا = والحل .؟

ابو سامي = يستدرجهم خالد يسرقون سيارته مثلا ,, اقول مثلا ,,, او فعلا مثل ماقلت تدخل انت معهم بهوشة اذا كنت انت متأكد انهم بيجون للرياض عشانك ,,, واكرر ترا مافيه خطر عليك ان شاء الله ,,, حنا بنراقب المكان وببداية الهوشة بنقبض عليهم

انا = خلاص اجل ,, حليناها

خالد بصراخ = لا مو خلاااااااص ( وقام معصب ) انت مالك دخل ,,, بدر وراكان مشكلتي انا مو مشكلتك انت ,,, وانا اعرف ادبر نفسي معهم ( والتفت لابو سامي ) خلاص بتصل عليهم استدرجهم ,,, وارد لك خبر ( وطلع معصب )

التفتت لابو سامي وسكتت

ابو سامي = برت الاصابات اللي فيه .؟

انا = لا

ابو سامي = العم ابو عبد الله ماهو راضي ,,, واخاف يصير لخالد شي ويشتكي

انا = خل خالد يستدرجهم ويصير خير ( وقمت )

ابو سامي = ليه ماتصبرون شوي

انا بتنهيدة = نبي ننهي السالفة بس ,,, مع السلامة

رجعنا انا وخالد للحارة وطوال الطريق كل ماحاولت اكلمه يسكتني بالتالي سكتت عنه

وصلنا بيت ابو عبد الله ودخلنا غرفة خالد وطاحت عيني على الادوية مرة ثانية

خالد = ابروح ابدل

واخذ بنطلون من الدولاب وراح للحمام ,,, اخذت احد الادوية وجلست على السرير ,,, وشلون اسأله الحين ,,, وشلون ابدأ معه الكلام اصلا

شوي وطلع خالد وعليه بنطلونه الجيشي اللي شراه من مكة وراح للدولاب مرة ثانية عشان ياخذ بلوزة ,,, وشلون اسأله الحين وشلون

انا = خالد

خالد = خلاص اسكت بدر وشلته مالك دخل فيهم انت

تنهدت بضيق

انا = مابي اكلمك عن موضوع بدر ,,, عندي موضوع ثاني ابي اكلمك فيه

التفت خالد لي مستغرب وسكت

انا بحزن = خالد وش المرض اللي فيك ,,, تكفى ريحني

رفع خالد حواجبه بسخرية

خالد بسخرية = الحين هذا موضوع

انا = وش المرض اللي معك

خالد = صداع عادي

انا = لا مو عادي ,,, لو عادي ,, ماكلت كل هالادوية عشانه

خالد بسخرية = صاير دكتور على غفلة ( ولبس بلوزته )

انا بحزن = لا يكون ( وتنهدت ) لا يكون السرطان

رفع خالد راسه لي وطير عيونه فيني وسكت

انا بحزن = ليه ماترد ,, السرطان .؟

يطالعني وساكت

انا = رد الله يخليك ,, قل لا

نزل خالد راسه

خالد = لا

انا = خاااالد أسألك جد انا

خالد = انت قلت قل لا وقلت لا

انا = خاااالد

جلس بجنبي على السرير وسكت

انا = رد علي

خالد = الحمد الله على كل حال ,,, بس وشلون عرفت

شهقت بصدمة وطيرت عيوني فيه وغصب عني تجمعت الدموع بعيوني

انا بصوت باكي = خالد وشلون ,,, من متى ,,, خالد قل كلام غير هذا

خالد بحزن = المرض تمكن مني خلاص ,,, لي سنة وانا اعاني منه ياخالد ,,, كل يوم واضعف اكثر ,, كل يوم ويزيد المرض علي اكثر ,,, العلاج اللي تشوفه مجرد مسكنات وعلاج لايودي ولايجيب ,,, ونسبة نجاح العملية قليلة ,,, مالي علاج ( والتفت لي ودموعي على خدي ) لا تبكي ,,, بكيت انا على نفسي ايام وشهور ,,, ادع الله يشفيني بس ,,, يمكن دعواتك مستجابة ( ونزل راسه )

بصعوبة طلع صوتي

انا بصوت باكي = وامك وابو عبد الله .؟

خالد = ماحد يدري عني ,,, ماعلمت امي ولا علمت خالي ,,, من يوم الحادث جاني المرض بعده بشهر او شهرين ماذكر بالضبط بس تكتمت الخبر عنهم ,,, كل ماحاولت اعلمهم اتراجع ,,, اصلا وشوله اعلمهم

انا = وين .؟

أشر خالد على راسه

خالد بحزن = بالراس ,, والصداع كل يوم يزيد ,,, حتى نظري ضعف

سكتنا وانا ماني قادر اقول شي ,,, آآآه ياخالد من سنة

قمت بصمت وطلعت من البيت ورحت لشقتي

توني افهم سبب اليائس اللي انت عايش فيه ياغالي ,,, توني افهم ليه ماتحملت كلمة صالح لك اليوم ,,, توني افهم

ر

* 29 *

















يوم الاحد

وانا في الفصل والاستاذ يشرح اهتز جوالي دليل على قدوم رسالة ,,, طلعت جوالي بحذر عشان الاستاذ ماينتبه علي وفتحت الرسالة وكانت من خالد

( خالد خبر مرضي لا يدري عنه احد

تكفى مابي الخبر يوصل لخالي )

تنهدت ودخلت الجوال بالدرج ,,, يوم يغمى عليه ببيتي عيا يخلينا نوديه المستشفى الحين فهمت ليش كان مايبي احد يعرف عن مرضه ويخاف اذا وديناه نتكشف

الله عليك ياخالد كل هذا خايف على خالك ابو عبد الله ,, صح على طاري ابو عبد الله ,, خالد هالايام ساكن في البيت لحاله

اخذت الجوال وارسلت له رساله

( طيب

بس ترا غداك عندي اليوم

وياويلك اذا قلت لا )

شوي وجتني رسالة منه

( اعذرني والله

مشغول

اليوم حطيت بدر وشلته براسي

وماني فاضي )
صح وشلون نسيت ,,, مرض خالد نساني بدر وراكان والبقية

ارسلت له

( وش قررت عليه )

رفعت راسي للاستاذ وانا كل شوي اهز راسي بأيه يقالي منتبه ... تسليك

انتبهت على اهتزاز جوالي وفتحت الرسالة بلهفة

( اذا طلعت من المدرسة باتصل

على بدر وراكان واتحرش فيهم

واشوف وش يطلع معي )

قطبت حواجبي افكر ,,, يعني وشلون ,,, اخاف يتعرضون له وابو سامي مايدري عنه ,,, لازم أأكد عليه يجيني البيت منها يتغدا ومنها اراقب العملية معه واذكره بأي شي يمكن ينساه

( خلك على اتصال مع ابو سامي

وتتغدا معي اليوم غصب عنك

ومن ورا خشمك )

( يصير خير

اذا ماجا خالي اليوم

مريتك

بس ياجحش قبل شوي كان بيوقفني الاستاذ

والسبة رسايلك بس عدت على خير )
ابتسمت وسكتت عنه

الظهر

رجعت الشقة ومالقيت احد ,, ربع ساعة وجا سالم وبعده خلود وشلتها ( سلمى ومعاذ ) جايبتهم من عند جارتها

اتصلت على خالد الح عليه يجي بعد ماشفته تأخر

انا = الوووو وينك يارجال .؟

خالد = هلا خالد ,,, توني طلعت من المدرسة

استغربت صوته بس سكتت

انا = توكم تطلعون ,,, حنا طالعين من زمان ,,, يله تعال نحتريك

خالد بهمس = يله جاي

وسكرت عنه

ثلث ساعة ووصل خالد للشقة ,,, فتحت له الباب وتفاجأت من شكله

انا بخوف = وش فيك خالد ,,, عسى ماشر

شكله تعبان ,, والشماغ على كتفه وازارير ثوبه مفتوحه ,, ويسحب انفاسه سحب ,, ومتساند على الجدار يحتريني افتحله

خالد بتعب = وش فيني بعد ,, خلني ادخل مالي حيل اوقف

تنهدت بحزن ,, دايم كنت اسمع منه هالكلمة وماكنت افهم منها شي ,,, والحين فاهمها وبوضوح ,,, الله يشفيك ياخالد

ساندته ودخلته المجلس ,, وجلس على اقرب كنب وجلست بجنبه وسألته وانا عارف الجواب

انا = وش فيك .؟

خالد بتعب = صداع عادي

انا = لا تقول عادي ,,, قبل كنت تكذب علي وتقول عادي ,, الحين لا تكذب

حط يده على راسه وجر شعره

خالد بألم = راسي راااااسي ,,, آآآآه بصعوبة سقت ,,, احس راسي ثقيل ( والتفت لي ) على قد ماني مستغرب وشلون عرفت عن مرضي الا اني فرحان

قطبت حواجبي مستغرب

انا مستغرب = فرحان .؟

ابتسم خالد بس بسرعة اختفت ابتسامته بعد ماحس بألم

خالد بتعب = فرحان ,, الحين اقدر اشكي لاحد واتكلم عن مرضي وعن الي احس فيه

انا = انت اللي جبت هذا لنفسك ,,, ليش كاتمه ,,, قل لخالك قل لامك ,,, على الاقل قل لاخواتك

خالد = ماقدر ,,, حاولت بس ماقدر ,,, كل ماشافتني امي ,, قالت هلا بسندي ,, هلا بعزوتي ,, هلا بالغالي ,,, وخالي نفس الشي كل ماشافني قال انا مالي غيرك انت واخواتك ,,, تبيني بعد كل هالترحيب اقول شوفوا تراني مريض مرض يمكن ماقوم منه

نزلت راسي وسكتت

خالد = وشلون عرفت انت .؟

انا بتنهيدة = انت تعبان الحين اقولك وقت ثاني ( وقمت ) اروح اجيبلك ماء

طلعت ورحت للمطبخ وجبتله ماء بعد ماطلبت من سالم وسلمى انهم مايدخلون علينا

ولقيت خالد متمدد على الكنب ولما دخلت جلس واخذ الماء مني وجلست بجنبه

انا = اتصلت على الشلة اللي ماتخاف الله

خالد = لا ,,, بعد ماطلعت من المدرسة كنت تعبان اقولك بصعوبة سقت السيارة ,,, بعد الغدا باتصل

انا = خله بكرة انت تعبان مالك حيل لهم

خالد = لا ,, ابي اتخلص منهم باسرع وقت ,,, انا على اعصابي ياخالد ابي اروح للاستراحة الحين

بعد الغدا

وحنا نشرب الشاي ,,, طلع خالد جواله

خالد = ابتصل على بدر الحين

سكتت ولا رديت

خالد = هم اشوى انهم كانوا يراسلوني بس ماكنت ارد عليهم تصدق اخاف يشكون الحين باتصالي عليهم

انا = لا ماراح يشكون ,, اصلا وش اللي يخليهم يشكون ,, انت بس خلك معصب ويعننك تبي تهاوشهم على اللي سووه فيك

خالد = لا انا ناوي اتحرش فيهم على اساس اني معصب انهم داخلين استراحتي ,,, خلني اتصل واشوف

ضغّط خالد جواله ورفعه لاذنه ,,, شوي وجاه رد

خالد = ايه حي ,,, ليه مستغرب ,,,, اسمع يابدر التبن ,,, تحسبني خايف منك انت واللي معك ,,,, لا لا اعرف وشلون ادبركم ,,, اصلا ماني ساكت لكن شف وبلغ الي وراك ,, ان طبيتوا القصيم مرة ثانية قسم لاسوي فيكم مثل ماسويتوا فيني واشد

( كان يتكلم وهو كل شوي ويعصب اكثر وانفاسه سريعة )

خالد بعصبية = ايه اخوفك ,,,, علمتك عاد خلني اشوفك بالقصيم بس ,,,,, فارق بس فارق ,,, ايه ودي واذا كنت رجال تعال للقصيم وواجهني ,,,, هه قصدك انا اللي بحرقك ,,, اجل تعال واجهني بالقصيم ياجبان والا خايف .؟ ,,,,, اقول اذلف بس

وسكر الجوال بوجهه

انا بتنهيدة = زين سويت

خالد بعصبية = ابتصل براكان الكلب الثاني

انا = لا لا لا تتصل ,,, بيشكون كذا

خالد مستغرب = ليه .؟

انا = اصبر شوي لا تتصل الحين ,,, خلنا نشوف ردة فعل بدير وبعدها يصير خير

طالعني خالد شوي وبعدها هز راسه باية

خالد بتنهيدة = طيب

وتمدد خالد على الكنب

فجأة جاه اتصال

خالد = هه هذا بدر ( ورفع الجوال لاذنه ) وش تبي يالتبن ,,,, راكاااااان مسرع ماعلمك ولد عمك الجبان

تفاجأت توني ادري ان بدر وراكان عيال عم

خالد = ياحليييييييييييييييييك وتحسب اني ابخاف منك ,,,,,,

وطولوا على هالحال

طوال الظهر وانا ماسمع منه الا سب وشتم لهم ,,, يسكر عنهم ويتصلون ويسكر عنهم مرة ثانية ويتصلون وهكذا واذا طولوا ماتصلوا عليه هو اتصل عليهم وطوال المكالمة سب وتحدي وشتم

وعلى هذا الحال لين اذن العصر

وبعد الصلاة عيا خالد يرجع الشقة معي

انا = امش بس امش

خالد = والله خالد لازم ارجع للبيت الحين

انا = وليش ترجع البيت مافيه احد

خالد = ببدل

انا = رجلي على رجلك اليوم ,,, لا يمكن اخليك

خالد مستغرب = ليه .؟

انا بعصبية = وش اللي ليه ,,, اخاف يتعرضون لك

خالد = هم الحين بالرياض ,,, مابعد جو

انا = ولو رجلي على رجلك ,,, اتصلت على ابو سامي .؟

خالد = لا ,,, اليوم مادري عنهم هم بيجون والا لا

انا = استمر بالتحرش فيهم لين يعصبون زيادة

خالد = ايه اكيد

وطوال اليوم وانا مع خالد وجواله اللي ماسكت ابد ,,, يتصل فيه بدر ويشتمون بعض ويسكرون ,,, ويتصل عليه راكان ويشتمون بعض ويسكرون ,, واذا سكتوا عنه رجع خالد يتصل عليهم ,,,

هذا غير اتصالاته مع ابو سامي اللي متابع معه خطوة بخطوة

واذن العشا وانا معه بس ماقدرنا نتكلم عن أي شي بسبب اتصالاته ,, كل ماتكلمنا شوي قطع علينا جواله بين بدر وراكان وعلي ومرة عبد العزيز وبين ابو سامي وخاله اللي عرفنا انه بالطريق وبين اتصالات امه تطمئن عليه وبين رسايل ناصر


يعني خالد كان فعلا مشغول مع الشباب وفوق هذا كان تعبان بسبب المرض

وانا طوال الوقت متوتر مدري ليه خايف

وعلى الساعة عشر في الليل ملّ خالد منهم وقفل جواله وانسدح على سريره بتعب واضح

خالد بتعب = نعسااااااااااااااان ابي انوووووووووم

انا = خلاص ارتاح الحين ,,, راح اليوم وماستفدنا شي

خالد بتعب = بدر وراكان معصبين وحسيت انهم ودهم يجون بس الكلب علي اذب عليه وعادي كأني ماقوله شي

انا = طيب واذا جو وش بتسوي .؟

خالد = اذا جو الديرة اكيد بيتصلون علي

انا = خالد تكفى انت بس استدرجهم بس لا تواجههم وجه لوجه ,, تكفى خالد

خالد بتعب = خلهم يجون الحين ( وزفر بضيق ) لو اعرف متى بيجون بالضبط

فجأة رن جوالي ,,, القيت نظرة عليه

( ض ابو سامي يتصل بك )

انا = الووو

وتفاجأت فيه معصب

ابو سامي بعصبية = خاااااااااالد وينه ,,, ليه مقفل جواله .؟

بسم الله الرحمن الرحيم ,,, توه قفل جواله الولد

انا مرتبك = خالد تعبان الحـ

ابو سامي بعصبية = خله يفتح جواااله ,,, يوم بدا الشغل يقفله ,,, خله يفتح الجوال بسرررررررعه

انا = بس يابو سـ

وصارخ باذني

ابو سامي = اقوووووووول خله يفتح جواله بسرعة ,,, نسيتوا ان اكثر الشباب مايسافرون الا اخر الليل ,,, خله يتابعهم يله

وسكر بوجهي

زفرت بضيق ورفعت راسي لخالد وتفاجأت فيه

ماسك راسه ويئن بصوت واضح

انا بخوف = خالد

خالد يئن = راسي راسي آآآآه ,,, صدااااااااااااااع ,, راسي بينفجر رااااسي

انا = حـ ,, حاول تنام ( وقمت ولحفته ) نام خالد وارتاح

يتقلب بفراشه ويئن ويتألم

خالد بتعب = ابي انوووم ماني قادر

انا بحزن = اكلت علاجك .؟

خالد بصراخ = ماااابي ,,, ابي ارتاح ,, آآآآه راسي راااااسي

وصار يتقلب بفراشه

انا = ابروح اجيبلك ماء صحة من البقالة تاكل علاجك

بس مارد علي

طلعت من البيت ورحت للبقالة وشريت الماء ورجعت بس تفاجأت فيه نايم

او

او

مغمى عليه

مدري


بس والله صعبة اقومه الحين ,,, الولد تعبان وطوال اليوم والتلفون باذنه ومانام

ابخليه ينام شوي ,,, والله مابقلبي رحمة اذا قومته الحين

طلعت من البيت ورحت للشقة وانا منقهر ان اليوم راح وماطلعنا بنتيجة ,,, اتصل علي ابو سامي مرة ثانية وبصعوبة قلت له خالد تعبان ونايم وبعد مد وجزر وصراخ قال قومه بعد ساعة وخله يتصل عليهم

بس انا غلبني النوم ونمت

الفجر

قمت مفزوع وبعد ماستوعبت انقهرت انها راحت علي نومة ,,, لقطت جوالي ولقيت 16 اتصال من المسكين ابو سامي ,,, وانا من التعب ماقومني رنين الجوال

اتصلت بخالد ولقيت جواله مقفل ,,, افففففففف شسوات ,,, اتصل بابو سامي الحين اخاف يهاوشني او يمكن نايم ,,, طيب الشباب وش صار عليهم والأهم خالد وش صار عليه

اتصلت بخالد مرة ثانية ومقفل

قمت وصليت وبعد شوي قومت خلود واخواني وكل واحد طلع من الشقة رايح لمدرسته

اما انا طلعت من الشقة وبدل ماروح للمدرسة عكست طريقي ورحت للحارة بس بطريق ثاني عشان ابراهيم وصالح وماجد مايشوفوني بطريقهم

وصلت بيت ابو عبدالله وضربت الجرس ,, شوي وطلع لي خالد وشكله مبهذل

خالد مستغرب = خالد

انا = زين انك صاحي,,, افتح جوالك ,,, ابو سامي حرق جوالي باتصالاته

خالد = وش صار .؟

انا = تسألني .؟ ,,, اذا قفلت انت جوالك حنا مانقدر نسوي شي ,,, افتح جوالك واتصل على الشباب شف وينهم

خالد = طيب ادخل ( وفسح لي الطريق )

دخلت وانتبهت على سيارة ابو عبد الله بالكراج

انا = ابوعبدالله هنا .؟

خالد = ايه جا ,,, بس الى الحين ماشفته ,, توني قمت

انا = انت نمت امس والا وش قصتك رحت شوي للبقالة ولقيتك ,, آآآ ( وسكتت )

خالد = نمت البارح بس كان نومي متقطع ولا نمت زين

ودخلنا غرفته

خالد = ابروح اصلي

ودخل الحمام توضى وطلع و صلى الفجر وبعدها توجه لجواله وفتحه وانهالت عليه الرسايل

خالد = اووووووووووه الله يعيني على ابو سامي ,, شكل الرجال شاب ضو

انا = المهم فيه رسايل من الشباب .؟

خالد = لا كلها من خدمة موجود

انا = اتصل فيهم الحين شف وينهم

خالد = بيشكون كذا ,, فيه احد يتصل الساعة 7 صاحي انت

انا بتنهيدة = الله يستر والله اني خايف

فجأة دخل علينا ابو عبد الله واستغرب من وجودي

انحرجت منه وسلمت عليه وسلم خالد على خاله ,,, وحاولنا نكون طبيعين ,,, سأل ابو عبد الله سؤاله المعتاد لخالد وبعد ماتطمن عليه طلع وتركنا

انا = يله انا تأخرت عن المدرسة لازم امشي

خالد = اصبر ابوصلك

انا = لا ماله داعي

خالد = الا امش بس

واخذ مفتاحه وجواله ومحفظته وطلعنا وكل واحد راح لمدرسته

وطوال الدوام بالمدرسة وانا اتابع اخبار خالد بالرسايل ,,

لين اخر حصة ومافيه شي جديد ,,, يتصل خالد عليهم ويدخل معهم بالسب والكلام والشتم ويسكرون عن بعض,,, افففف مادري ليه خايف ,, الاوضاع ماشية صح ,,, ابو سامي متابع خالد بكل شي ,, طيب ليش الخوف اللي احس فيه ,, يمكن لأننا الى الحين ماندري وينهم الشباب ووش مخططين عليه ,, ربي سترك

الظهر وانا طالع من المدرسة اتصلت بخالد ولا رد علي ( تنهدت ) يمكن عنده حصة الحين ,,, انا شرعي و خالد طبيعي وحصصنا تصير اقل من حصصهم ,,, ارسلت له رساله نصها

( اذا خلص دوامكم اتصل علي )

وصلت الشقة وهالمرة خلود هي اللي وصلت قبلي ,,,

وفرحانه الاخت انها جت من المدرسة قبل اجي انا

خلود مع اني اعتبرها مثل امي باهتمامها فينا ,,, الا ان عقلها بعض الاحيان يتعطل عن العمل ,,, او يمكن تنساه بمدرستها ,,, الله اعلم لكن الحمد الله على كل حال

دخلت غرفتي وانا بالي مشغول بخالد ,, ماتصل علي معقول مانتهت الحصة عندهم الى الحين

اتصلت فيه مرة ثانية ولا رد

جلست مع خلود واخواني والجوال بيدي احتري خالد يتصل يرسل أي شي

خلود = وش فيك كل شوي تطالع جوالك ,,, فرحان فيه

انا بضيق = افففففف خلود ماني فاضي لـ

وفجأة رن جوالي ,, وبلهفة القيت نظرة

( ض ابو سامي يتصل بك )

تفاجأت ابو سامي متصل علي الحين سترك يارب

انا = الووو

ابو سامي = محتاجينك الحين تعال لمدرسة خالد تركي بسررررعة ولا تبطي

قمت مفزوع

انا بخوف = ليه وش فيه خالد

ابو سامي بعصبية = تعال انت الحين ونعلمك بكل شي ,,, بسرررررعة تعال

وسكر بوجهي

ضربات قلبي سريعة من الخوف ,,, مدرسة خالد الحين ,,, طيب وش جاب ابو سامي لمدرسة خالد بهالوقت وخالد ليه مايرد علي من اليوم ,,, لايكون صاير فيه شي ,,, ربي سترك الولد من اليوم مايرد علي

خلود مستغربة = خالد بسم الله وش فيك .؟

طلعتني خلود من افكاري والخوف مسيطر علي

انا = بعدين خلود بعدين

وطلعت بسرعة من الشقة واتصلت على ابراهيم واخذت سيارته منه وتوجهت لمدرسة خالد

وطوال الطريق وانا اتصل بخالد ولا يرد ,,, الله يستر ليه مايرد علي ,,, طوال الدوام بالمدرسة وهو يرد علي بالرسايل وش معنى الحين .؟ وليه ابو سامي اتصل علي بالوقت اللي مايرد خالد علي فيه

تفاجأت بجوالي يرن والقيت نظرة عليه ( ض ابو سامي يتصل بك )

انا = الووو

ابو سامي = وينك ابطيت .؟

انا = هذا انا على وصول

ابو سامي = المدرسة قبالها دكان تعال تلقانا متخبين فيه

انصدمت ,,, متخبين مرة وحدة

انا مرتبك = ان شـ ,,, ان شاء الله ,,, بس خالد وينه مايرد علي

ابو سامي = مب وقته الحين تعال ونلعمك بكل شي

وسكر بوجهي مرة ثانية ,,, اففففففف ليه مايقول ويريحني

دعست على البنزين اكثر وانا بالي مشغول ومرتبك

شوي ووصلت المدرسة ,,, ولاحظت بالمواقف مافيها الا كم سيارة تقريبا خمس سيارات كل وحدة بعيدة عن الثانية

وشفت من ضمن السيارات سيارة خالد واقفة ويدور حواليها واحد متلثم

حاولت ادقق فيه من بعيد ,,, عجييييب هذا مب زول خالد

انتبهت على جوالي يرن ورفعته من دون ماشوف المتصل

انا = الووو

ابو سامي = انت راعي اللومينا .؟

اللومينا سيارة ابراهيم

انا = ايه

ابو سامي بصراخ = وليش واااااااقف تعااااال ولا يشوفك احد بسرررررعة

بسم الله الرحمن الرحيم ,,,, اللهم سكنهم مساكنهم ,,, توجهت للبقالة حسب اوامر العصبي ابو سامي

دخلت الدكان ولقيت ابوسامي ومعه ثلاث رجال وكلللللهم لابسين مدني ( ثوب وشماغ )

ابو سامي بعصبية = تعااال ,, ( ومسك يدي وجرني عند باب الدكان ) تشوف المرسيدس هذيك ,,, هذي سيارة خالد حسب الوصف ,,, صح .؟

انا = ايه هذي سيارة خالد ,,,, بس هو وينه .؟

ابو سامي = تعرف اللي يدور حوالينها .؟

انا = متلثم وشلون اعرفه .؟

ابو سامي = طيب شف هناك ( وأشر على سيارة كامري واقفة برا المواقف )

دققت النظر فيها وبالشخص اللي جالس على كبوتها ,,, وشهقت

انا بخوف = هذا ,,, هذا راكان ,,, وهذي نفس الكامري اللي اخـ

ابو سامي = ايه قاعدين يحترون خالد يطلع من مدرسته

انصدمت ,,, الكلاااااااب وش هالحقارة

حسبي الله ونعم الوكيل وشلون نسينا انهم يدلّون مدرسة خالد

ابو سامي = ابيك تطلع لهم وتحارشهم بس اسمع ,,, حارشهم وبس انت لا تبدا بالهواش مفهوم عشان تصير بداية الهوشة منهم هم ,,, مفهوم خالد .؟

انا = ان شاء الله ,,, طيب واذا سألوني عن خالد شاقول .؟

ابو سامي = خالد ماهو بالمدرسة الحين

التفتت لابو سامي متفاجئ

انا = اجل وينه .؟

ابو سامي = طلعناه من الباب الخلفي للمدرسة وقلتله يروح لبيت ابو عبد الله عشان يوهم خاله ان كل شي تمام ولا ينكبنا وهوعلى وصول الحين

ابتسمت الحمد الله

ابو سامي = خالد يوم طلعناه كان واضح عليه تعبان وصعب نكلفه بشي ,,, عشان كذا اتصلت عليك ,, حاول تحارشهم بسرعة قبل يجي خالد ,,, انا ابتصل فيه الحين اشوف وينه .؟

وطلع جواله ورفعه لاذنه شوي وجاه رد ,,, قطبت حواجبي معصب ,,, انا من اليوم اتصل فيه ولا يرد والحين يرد على ابو سامي

ابو سامي = وينك ,,, طيب طيب ( وسكر والتفت لي ) بسرعة رحلهم

طلعت من البقالة وتوجهت لسيارة خالد ولقيت اللي كان يدور حوالين السيارة جالس على كبوتها

مشيت لين وصلته

انا = وش قاعد تسوي ,,, ومن انت .؟

التفت وطالعني شوي وبعدها نزل من الكبوت وأشر على اللي بالكامري يعني تعالوا

التفتت ورا وشفت راكان ينزل من الكبوت بسرعة وحرك بالسيارة ووقف عندنا ونزل منها هو وعلي وعبد العزيز ,, التفتت مرة ثانية للي عندي

انا = انت بدر .؟

راكان = هلا هلا

التفتت لراكان اللي يهلي بسخرية

عبد العزيز = هذا اللي كان مع خالد

بدر = وهو على ما اذكر اسمه خالد بعد ههههههههه

جا علي ومسك ذراعي ,,, هذا شكله مغناطيس لذراعي كل ماشافني مسكني والمشكلة شوي ويدخل اظافره

علي = وين خالد .؟

انا = مالك دخل

بدر = هالخواف مزعجنا من امس والحين مندس بمدرسته ( وفك اللطمة عنه ) رح ناده

انا = الخوافين انتم ,,, جايين اربعتكم على واحد

علي = انت شكل الضرب اللي جاك مارباك

هذا اللي ابيه

انا = ايه مارباني ربني الحين

التفت علي لبدر

علي = وش نسويبه هذا الحين ,,,, ناخذه معنا والا نحتري الخواف خويلد

راكان = وهذا وش نبيبه ,,, انا ابي اللي مزعجنا امس ,,, شكله مشتهي طعنة ثانية

بدر = انا ماخليت فيه شي

عبد العزيز = خلصونا ملينا وحنا نحتري

بدر بعصبية = بتصل فيه اشوف وينه هالكلب ( وطلع جواله وراح مبتعد عنا يكلم )

علي بعصبية = ادخل المدرسة ورح هاته ( ودفعني )

انا بعصبية = ماني رايح ,,, تبي تروح رح انت

تلفت علي شوي يمين ويسار وبعدها طالعني بعصبية

علي = والله لو الناس مب حولنا كان تعاملت معك تعامل ثاني

انصدمت وشلون يعني ,,, ماحنا متهاوشين ,, تلفتت يمين ويسار وفعلا فيه شباب شويين اللي عند البوابه واللي عند سياراتهم يسولفون

جا بدر وهو معصب

بدر بعصبية = مايرد علي ,,, بس ارسل تو يقول عندي حصة اضافية ,, لا ويهدد يقول اذا كان فيكم خير احتروني ,,, وش نسوي الحين ,,, ذبحنا الحر

علي مستغرب = حصة اضافية ( والتفت للمدرسة ) كل الطلاب طلعوا ,, معقول فيها احد يدرس الى الحين .؟

راكان بضيق = واحد يروح يشوف

فجأة حسيت بضربة على راسي

بدر بصراخ = وين خاااااالد .؟

انا بعصبية = ماااااني قايل وورني وش بتسوي

مسك علي ذراعي مرة ثانية وقربني منه بعنف

علي بعصبية = انا حاس ان فيه شي ,, الطلاب كلهم طلعوا الا هو ,,, وييييييييينه .؟

راكان بعصبية = بتعلمنا وينـه والا وشلون .؟ ( وعطاني كف )

علي بعصبية = راكان اصبر اخاف احد يشوفنا ,,, اصبر شوي

تلفتت ولاحظت ان السيارات كلهن راحن ومابقي الا سيارة وحدة واظنها للحارس لأنه قاعد يطالعنا

اففف وشلون اخليهم يعصبون اكثر انا المشكلة ماعرفهم زين ولا اقدر ابدا وامد يدي على واحد منهم حتى ماتصير بداية الهوشة مني

راكان بضيق = ذبحنا الحر ,, وهذا ماطلع

علي = انتم مصدقين انه عنده حصة اضافية

شكل علي اذكاهم ,,, الله يستر اخاف يلاحظ على ابو سامي واللي معه

بدر = سيارته هنا ,,, وين بيروح يعني .؟

علي = هذا اللي مستغرب منه ( وضغط على يدي ) بتكلم والا وشلون .؟

انا = انتم وش تبون ,,, تبون هوشة .؟ يله وش تحترون

راكان بعصبية = نحتري خالد ,,, قلّنا وينه والا بكف الحين

عبد العزيز = شوفوا شوفوا ,, هذاك مو خالد .؟ ( وأشر بيده )

التفتت وشفت خالد نازل من سيارة مكسيما ومتوجه لنا ,, وعليه بنطلون جنز اسود وبلوزة سودا

قرب عندنا وعيونه علي ,, حسيته متفاجئ

علي مستغرب = من وين جاي هذا .؟ مو يقول عنده حصة اضافية .؟

بدر بعصبية = شفت الكذوووب

وراح لخالد قبل يوصل عندنا ومسك ذراعه وسحبه بعنف لين وقفوا عندنا

راكان = من وين جاي انت .؟ مو تقول عندك حصة اضافية .؟

خالد بغرور = ولعبت عليكم

فعلا مثل ماقال ابو سامي واضح عليه التعب وصدره يرتفع وينزل بسبب صعوبة تنفسه

عصب بدر من كلمته ولصقه بعنف على سيارة خالد قريب مني

بدر بعصبية = لاطعنا بالحر واخر شي تقول لعبت عليكم

علي بعصبية = بدر اصبر شوي البيوت لها درايش

اخذت نفس متضايق من علي هالداهية ,,, يقدر يمسك اعصابه بشكل رهيب مو مثل راكان وبدر

= ليه واقفين هنا ياعيال

التفتنا كلنا للحارس

علي = لا ابد ياخال ,,, قاعدين نسولف

راكان = وليه تسأل انت والا ممنوع .؟

بدر = يحسبنا قاعدين بمدرسته

طالعنا الشايب شوي وبعدها توجه لسيارته ومشى

جا راكان ومسك ياقة خالد ولصق جسمه بجسم خالد يرصه على السيارة اكثر

راكان بصراخ = مزعجنا امس بالاتصالات والرسايل ,,, والحين تسحب علينا وش شايفنا قدامك ,,

رفع خالد يديه ومسك راسه

خالد بألم = قصّر صوتك ,, اسمعك من دون ماتصارخ

شي طبيعي المصدع مايحب الاصوات العالية ,, كيف بخالد اللي يعاني من مرض براسه

سكت راكان شوي وبعدها قرب فمه من أذن خالد وصرخ باعلى صوت عنده

شهقت ,,, الحقيييييييييييييير

جلس خالد على الارض وهو ماسك راسه

خالد بألم = أأأه لاااااا ,,, رااااسي ,,, رااااااسي بينفجر

سحبت ذراعي من علي ودفعت راكان معصب

انا بعصبية = اسلوبك اسلوب بزارين يالتيس

جاني علي ومسك ذراعي مرة ثانية

علي = لاحق على الاسلوب اللي يحبه قلبك ,,, لاتستعجل

بدر = علي فكنا منه هالبزر ( وراح ومسك ذراع خالد وقوّمه ) انت وش ينفع معك ,,, تبيني اعيد معك اللي صار .؟

راكان = ايه صح بدر ذكرتني ( وقرب من خالد ) ورني اشوف ( ومسك بلوزة خالد يبي يفك الازارير )

مسك خالد بلوزته

خالد بتعب = وش تشوف .؟

بدر بسخرية = نبي نشوف تربيتنا فيك هي نفعت والا تبي بعد .؟

وتعاونوا بدر وراكان عليه وفكوا ازارير بلوزته غصب عنه ,, واول ماشافوا الخياطة اللي بصدره وهم يبدون بالاستهزاء والضحك

بدر = ههههههههه مرقعينه

راكان = كان طلبت منهم يحطون سحّاب احسن

وماتوا ضحك عليه حتى علي اللي حسبته اعقلهم

افففففففف ليه مايضربون ويبدون بالهواش ,, ذبحنا الشمس و الحر ,,, قاعدين يستهزؤن وبس ,, والمشكلة مانقدر نبدا

خالد = والله اللي يمد يده علي والا على خالد قسم لايشوف شي ماشافه

وجا بيزرر بلوزته بس راكان مسك يده اليمنى ولواها ورا ظهره

راكان بعصبية = انت يالخواف تهدد

قرب بدر من خالد وتحسس ذراعه اليسرى

بدر = راكان انت هذاك اليوم طعنت يده هذي صح .؟

راكان = نزّل بلوزته نشوف

وتعاونوا عليه مرة ثانية يحاولون ينزلون بلوزته بالكامل حاول خالد يمنعهم بس ماقدر عليهم وجردوه من بلوزته غصب عنه

خالد بعصبية = ياكلب هات بلوزتي بالشارع حنا

مسك راكان الجرح اللي بعضده

راكان = انت مزعجنا وماخليت كلمة الا وقلتها لنا ,,, تحمل اللي يجيك

خالد وهو يتلفت منحرج = هات بلوزتي تكفى بالشارع حنا

علي بصراخ = ياجماعة مب الحين ,,, البيوت لها درايش وش فيكم انتم ,, عطوه بلوزته وخلونا ناخذهم للبر وبعدين سووا اللي تبون

اوووه هذا بيخرب علينا

انا = انت اسكت ولا كلمة

ضرب علي راسي من ورا بقوة

علي بعصبية = انت اللي تسكت مب انا

عبد العزيز = الشارع فاضي علي وبعدين ماحد عارفنا

علي بعصبية = ماحد يعرفنا بس ياخذون لوحة سيارتنا

راكان بعصبية = علي صادق ( ولصق خالد بسيارته مرة ثانية ) عطني مفتاح سيارتك

خالد = ليه .؟

رص جسمه بجسم خالد اكثر وهو معصب وطلع المفتاح من بنطلون خالد غصب ,,, وخالد ساكت حتى مافتح فمه بكلمة

راكان بعصبية = يله امشوا خلصونا ( والتفت لبدر ) وانت عطه بلوزته ( وراح يفتح سيارة خالد )

حذف بدر البلوزة على خالد ولبسها بس مامداه يزرر ازاريره الا وراكان ساحبه من يده

راكان = يله اركب

خالد بعصبية = ماني راكب وورني وش بتسوي

راكان بملل = بدر عليك فيه

مسك بدر ذراع خالد اليسرى

بدر بعصبية = اركب خلصنا ذبحنا الحر

خالد = شكلكم ماتفهمون

بدر بعصبية = انا اللي ابفهمك

ومد يده وفرك الجرح اللي بصدر خالد بعنف

خالد بصراخ = آآآآآآآآآآآآآآه

شهقت بخوف ,,, وسحبت ذراعي من علي ودفعت بدر بقوة ابعده عن خالد والتفتت له

انا بخوف = خاااالد

حاط يديه على صدره وهو شوي ويبكي من الألم

جاني علي ولف يديه حوليني

علي بصراخ = انت اركب وانت ساكت

انا بعصبية = خلني ( وحاولت احرر نفسي منه )

بس تفاجأت بخالد يتساند علي وقرب وجهه من وجهي وهو الى الحين يتألم من حركة بدر وهمس

خالد بألم = لا تركب

علي بعصبية = يركب غصب عنك

دفعني بدر وهو معصب ورفع يده وعطى خالد كف

بدر= راكان خلنا نشيله ونركبه غصب

التفت خالد للبقالة وهو ماسك خده بمكان الصفعة وبعدها التفت لي وبعدها التفت لعلي وبحركة جريئة فاجئتنا

تفل بوجه علي

سكتوا شوي يستوعبون وباقل من الثانية تركني علي معصب وهجم على خالد وطرحه بالارض وركب فوقه وماقصر بدر جا وركب على خالد بعد

وانا ماسمع الا صراخ خالد

توجهت لهم وحاولت ابعدهم عنه بس دفعني احد من ورا وطحت عليهم فوق خالد وبعدها طحت بالارض وركب راكان فوقي ,,, وبدا يعطيني من هالكفوف وانا احاول ادافع عن نفسي

ما اقدر افتح عيوني من اشعة الشمس واضرب راكان بشكل عشوائي

فجأة سمعت صوت ابو سامي واللي معه يصارخون علينا ويطلبون منا نوقف وتجمعوا علينا

وقوموا راكان عني ,,, وبدر وعلي عن خالد

جلست والتفتت لخالد ولقيته متمدد وماسك صدره الكاشف ويئن

قربت منه وجلسته

انا = خالد لايكون تأذيت

خالد بألم = صدري صدري

ابعدت يده عن صدره وانصدمت ,, حسبي الله ونعم الوكيل ,, ينزف والله اعلم كم غرزة انفكت ( تنهدت ) شكل جروحك ياخالد ماراح تطيب

بدر بصراخ = لا تتدخلون بيننا

رفعت راسي اطالع بدر اللي يصارخ على الرجال

ابو سامي بعصبية = على كيف ابوك مانتدخل

علي = خلاص حصل خير

ابتسمت ابو سامي واللي معه لابسين مدني وهالشلة ماتدري انهم شرطة على بالهم جايين يفكون الهوشة وبس

ابو سامي بعصبية = حصل خير هاااه ,,, ليه الدنيا سايبة

رفع خالد راسه

خالد بتعب = يالضابط هذولي اللي اعتدوا علي وعلى خالد

راكان بصدمة = ضابط .؟

ابو سامي = يله شباب اخذوهم

علي بخوف = انا مالي دخل

بدر بغرور = يله نكيّف عندهم شوي ونطلع ,,, ماراح نطوّل عندهم لا تخافون

فجأة رفع ابوسامي يده وعطى بدر كف طيره الجهة الثانية

ومسكه ابوسامي وقعد يسحبه للمكسيما اللي جا خالد فيها

التفتت لخالد ولقيته ماسك راسه

انا بابتسامة = الحمد الله ,, الله فكنا منهم ,,, ماكنت متوقع اننا بنتخلص منهم بهالسهولة

التفت خالد لي والألم واضح بعيونه

خالد بتعب = انت خلصت بس انا ماخلصت ,,, اليوم لازم اروح للاستراحة

زفرت بضيق ,,, بتروح وانت حتى الجلوس ماتقدر تجلس غير احد يجلسك ,,, بس معه حق لازم يروح ويطلّع اللي بالاستراحة باسرع وقت

خالد بتعب = انت وش اللي جابك هنا .؟

انا = ابو سامي اتصل علي وقال تعال لمدرسة خالد ,,, وبعدين تعاااااال انا يوم اتصل عليك ماترد علي ويوم اتصل عليك ابو سامي رديت عليه على طول ,,, ليه مطنشني يالثوووور

خالد = مابيك تجي ,,, بس انت وراي وراي

= عاجبتكم الجلسة هنا انت واياه ,,, قوووووموووووا

نقزت متفاجئ من صراخ ابو سامي علينا ,,, صح اثرنا انا وخالد بعدنا جالسين بالارض

التفتت لخالد وقربت راسي له وهمست

انا = قم لا يسجننا هالعصبي

وقمت وساعدت خالد على الوقوف

ورحنا للمركز كلنا الا خالد اللي راح مع عسكري للمستشفى عشان يعيدون الخياطة اللي بصدره بأوامر من ابوسامي وبعد ثلاث ساعات رجعوا للمركز

والى أخر العصر وحنا بالمركز

ابو سامي = تقدرون تطلعون واذا استجد جديد نتصل عليكم

خالد = يعني خلاص

ابو سامي = لا ماهو خلاص ,,, ابوانهم بيجون ولازم تكونون موجودين بس هذا انا اذكرك مرة ثانية هات كل التقارير الاولى اللي طلبتها منك ,,, مفهوم ,, لاتنسى .؟

خالد = بس انا مضطر اسافر اليوم

ابو سامي = بتترك الموضوع معلق مرة ثانية

خالد = لا بس مضطر اسافر

ابو سامي = بس اولياء امورهم يمكن يحضرون بكرة او بعده لازم تصير موجود

خالد = تكفى يابو سامي تابعه بنفسك ,,, انا علمتك بكل شي ,,, انا مضطر اسافر

ابو سامي بتنهيدة = انا مستعد ومتعاون معك بس انا ماني قريبك حتى اتابع الموضوع عنك ,, خالد اذا كنت مشغول قل لابوك يتابع الموضوع عنك

تساند خالد على الكرسي بتعب والتفت لي وعيونه تحمل كل معاني الحيرة والضياع ,,, ضايع بين المشاكل هنا والمشاكل بالرياض ,, ومن نظراته لي كأنه يطلب مني اتدخل كأنه يقول انا تعبت تكلم معه انت

التفتت لابو سامي

انا = ابوه مسافر ,,, طيب عادي يوكل احد .؟

ابو سامي = عادي ,, الا ابو عبد الله لا يتدخل ,,, التفاهم مع ابو عبد الله الصراحة صعب ,, راسه يابس

ابتسمت والتفتت لخالد

انا = يله خالد امش

هز خالد راسه بتعب وقام

طلعنا من مكتب ابو سامي ومسكت خالد على جنب

انا = بتسافر اليوم للرياض .؟

خالد وهو يتساند على الجدار اللي وراه = ان شاء الله

انا = بتروح وانت شكلك كذا .؟

خالد = وش فيه شكلي

انا = انت حتى الوقوف مانت قادر توقف على طولك ,, متساند على الجدار

لف خالد وجهه عني بضيق وابعد ظهره عن الجدار

خالد بتعب = خالد والله ماني فاضيلك

انا = خالد ان لبدنك عليك حق ,,, انت توك جاي من المستشفى حتى مفعول البنج مايمديه راح عنك ,,, رح للبيت وارتاح وبكرة سو اللي تبي

خالد = خويلد وش دخل هذي في هذي البنج موضعي واقدر اسافر

ومشى عني

اففف عنييييييد ,,, لحقته ومشيت بجنبه

انا = ان سافرت للرياض اليوم باقول لخالك عن سالفة الاستراحة وانت بكيفك

التفت خالد لي معصب ودفعني على ورا ,,, بس دفعته كانت ضعيفة وماحسيت فيها

خالد بعصبية = يقالك ماسك علي شي الحين

قربت منه ولفيت ذراعي على كتفه وقربته مني زي ماكان يسوي فيني لما اكون متضايق

انا بابتسامة = والله انك غالي ,,, بس عنادك يخليني اتصرف معك تصرف ثاني ,,, بكرة يعني بكرة ,,, وان عرفت او سمعت انك سافرت اليوم وريتك الشغل ,,, مفهوم ياثور

يطالعني بنظرات معصبة وساكت

دفعته قدام شوي عشان نمشي

انا = وعلى فكرة رجلي على رجلك ,, روحة للرياض لحالك مافيه

خالد = هين ياخويلد مردودة

ابعدت ذراعي عنه

انا = هذا جزاتي اني خايف عليك ,,, صحيح ,,, افعل خيرا تجد شرا

خالد = انت مانت حاس بالنار اللي احس فيه ,,, انا مقهور ,, مقهور ياخالد

انا = افااا ياخالد كيف ماني حاس بالنار اللي تحس فيه ,,, لو اني ماني حاس كان ما اهتميت فيك ,,, كان ماتركت اخواني بالشقة لحالهم وسافرت معك

سكت خالد شوي

خالد بتنهيدة = اعذرني خالد ماكنت اقصد ,,, لاتاخذ بخاطرك ,,, انا منقهر ولا ادري وش اقول ,, الله مارزقني باخوان واحس الله عوضني فيك (التفت خالد لي وابتسم ) تصدق انت احلى جحش شفته بحياتي

ابتسمت فرحان يوم شفت ابتسامته ,,, فقدتها

انا بابتسامة = تسلم والله ماعليك زود


بعد صلاة المغرب

رجعنا انا وخالد لمدرسته عشان انا اخذ سيارة ابراهيم وخالد ياخذ سيارته وكل واحد راح لبيته

دخلت الشقة وانا تعباااان ونعسااان وجوعاااان

خلود = هلا خالد

ولاول مرة خلود تستقبلني عند الباب بالعادة تصير جالسة بالصالة والا بغرفتها ولا كأني جيت بس هالمرة مستقبلتني والغريب وجهها احمر وكأنها مستحية او متوترة مدري وش قصتها

انا مستغرب = هلا فيك

وجلست بالصالة على الارض بتعب افففف اليوم مانمت ابد على قومتي الفجر

انا = خلووووود ابي أي شي اكله جوعااااان مرة

خلود = ان شاء الله

طالعت خلود وهي رايحة للمطبخ مستغرب وش عندها هذي اليوم صايرة مؤدبة ,, والغريب ماسألتني عن شكلي ,, متبهذل قدامها وملابسي وسخة بالعادة تحقق معي لين اكره نفسي

جت خلود وحطت الصحن قدامي وجلست على الكنب وهي تلعب باصابعها متوترة

الله يستر وراها شي ,,, هدوئها ماهو طبيعي وراه شي

بسم الله

وبديت اكل وانا خايف من خلود وهدوئها المفاجئ

خلود = خااالد

بغيت اغص ,,, ايه انا ادري ,, وراها شي

انا = هاه

خلود = ان شاء الله عجبك الاكل

بالله ,,, كلها سندويشة وعصير حتى العصير حامض

انا = قولي اللي عندك اخلصي

خلود = ام ,, ام ,, آآآ ,, ام محمد وخالتي ام عبد الله جو عندي اليوم العصر وراحوا

انا = طيب واذا ,,, ماهي اول مرة يجونك

والتفتت لخلود ولقيت وجهها احمر مرة وتلعب باصابعها

انا مستغرب = خلود وشفيك .؟

خلود مستحية = ام محمد وخالتي ام عبد الله جايين يخطبوني لمحمد

فتحت فمي وطيرت عيوني فيها

انا بصدمة = ووووششش ,, محمد

ونزلت راسي منصدم ,,, محمد يخطب خلود ,,, محمد ماغيره اخو صالح ,, ضحكت غصب عني ,,, والله محمد رجال والنعم فيه ,,, متوظف وعايل نفسه وماعليه كلام

محمد يبي خلود اختي ,,, غريب ماعمره جاب لي سيره ,,, انا ادري ان اهله يدورون له على مرة مثل ماقال لي صالح بس وش معنى اختي

التفتت لخلود اللي منزله راسها بقوة شوي ويطيح بحظنها

انا = وانتي وش رديتي عليهم .؟

رفعت خلود راسها مستحية

خلود = انا استحيت مدري وش اسوي ,,,, انا اروح واتركهم والا اسكت والا ابـ

انا = يعني مارديتي عليهم بشي .؟

خلود = الا قلت راجعوا خالد

انا = وش راجعوا خالد وزارة هي ,,, الله يفشلك ووش قلتيلهم ان شاء الله راجعوا خالد بالدور الاول والا بالدور الثاني

خلود = لا شقتنا بالدور الرابع ,,, يعرفونها هم

انا = خلووووود

خلود وهي شوي وتبكي = مدري وش اقول

تنهدت وسكتت ,,, خلود اختي خطبها محمد ,, ياربي شسوي ماعرف هالسوالف انا

انا = طيب ماقالوا شي ثاني ,,, لا محمد ولا ابوه ولا حتى صالح قالوا لي شي

خلود = اخذت خالتي ام عبد الله رقم امي ,,, يقولون اول نبي رايك وراي اخوك وبعدين نجي نخطبك رسمي

انا = ووو,, وعلمتي امي .؟

خلود مسحية = لا ,, علمها انت ,,, انا استحي

ابتسمت وسكتت ههههه تقول علمها انت ,,, علمتني انا قبل تعلم امي ,, مع انه المفروض العكس ,, وش معناه هذا ,, معناه خلود تعتبرني اقرب لها من امي

طالعتها فرحان ,,, الله يوفقها ,,, خلود تستاهل

بعد صلاة العشا

طوال الصلاة وبالي مشغول والله اعلم وش قرا الامام ووش ماقرا

حنا مالنا غير خلود ,,, بس محمد رجال والنعم فيه ,,, ياربي وشلون اسوي الحين ماعرف ادبر شي ,,, وماعرف ارد عليهم ,,, ماعرف هالامور

غير اتصل على امي ,,, واتصل على عمي ,,, بس عمي ماني متصل عليه الا بعد موافقة خلود وموافقتي ,, مع انه اصلا عمي ماله دخل فينا بس الحين انا محتاجه

ان ماطاعك الزمن والا طيعه ,,, دايم اقول لايمكن ألجأ لعمي لو مهما يكون

والله محتار

دخلت الشقة وانا الى الحين اهوجس

محمد عمره 25 او 26 وخلود عمرها 16 ,, مو كبير بالنسبة لها .؟

صح ماراح تتزوج خلود الا بعد ماتخلص السنة هذي يعني بيصير عمرها 17 ,,, بس مادري ,, محتااااااار


بعد ماتعشينا دخلت غرفتي انام ,,, تعبااااان على قومتي الفجر هذا غير بكرة وراي سفر

صح على طاري السفر

طلعت من الغرفة ورحت لخلود ,,, الله يستر مالي خلق للهواش معها ,,, يوم اسافر اول مرة للرياض صارت هوشة وصراخ وزعل حتى عشا ماتعشيت هذاك اليوم الحمد الله اني تعشيت قبل شوي ,,, الحين مدري وشلون اقنعها اسافر

دخلت عليها غرفتها ولقيتها تحل واجباتها

انا = خلود بكرة بسافر للرياض

التفتت خلود لي مستغربة

خلود = ليه .؟

اخذت نفس الله يعين

انا = خالد مضطر يروح للرياض وانا ابخاويه

سكت خلود شوي

خلود = طيب بس عطني فلوس عشان ارسل سالم للبقالة ,, البيت ناقصه شوي اغراض

سكتت مستغرب ,,, ماعصبت ,,,

ابتسمت غصب عني صايرة عاقلة اليوم

انا بابتسامة = خلوووود انا ابعلم امي عن الخطبة ,, وان شاء الله يوم يومين وانا راجع ,,

حاولت مابتسم عشان ماحرجها بس غصب عني ابتسمت اكثر

شوي شوي تحول لون وجهها للاحمر

خلود بحرج = خاااااالد ( وغطت وجهها بالكتاب )

طلعت عنها وسكرت الباب وانا اضحك ,,, ورفعت يدي للسماء

انا = الله يجزاك خير يامحمد ,, عقلتها لي