 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
أدوات الموضوع | انواع عرض الموضوع |
|
#1
03-24-2011
|
||||||||||||||||||||||||||||||||
|
||||||||||||||||||||||||||||||||
|
رواية:: محد يهمني واللي براسي بسويه !
الجزء الاول ..
رنا اسمي رنا .. عمري 22سنه .. ارمله .. عندي بنت عمرها سنتين اسمها سديم .. مات زوجي قبل شهر واسبوعين.. بصراحه كانت صدمه لي كون اني صغيره وعندي بنت .. تأثرت كثيييييييير .. وبكيت عليه كثير .. فقدته جعل مسكنه الجنه .. صدق انا ماكنت اعترف بالحب .. عشان كذا ماحبيته .. بس افتقدت حنيته وحبه لي .. افتقدت تدليعه وصبره علي .. افتقدت كل شي حلو بهالدنيا .. والله والله لو اقول واقول ماأوفيه حقه .. هو اكيد فيه سلبيات .. وبعض الاحيان يقهر .. بس حبوب لدرجه خياليه .. ويحب يدلع وهذا اللي كنت ادوره .. ان احد يدلعني .. بس للاسف ماطول الدلع .. راح وخلاني اعاني من بعده .. من جد معاناة خصوصا معي بنت .. الله كريم .. انا الحين ساكنه عند اهل زوجي .. الله يرحمه قبل لايتوفى بسنه نقلنا عندهم .. انا كنت ساكنه لحالي .. بس عشان امه وخواته يحتاجونه اكثر .. اخوه سعود اللي اصغر منه تزوج وطلع من البيت .. وبحكم انه الكبير فلازم هو اللي يتحمل المسؤولية .. لان ابوه ميت .. في البدايه انا رفضت رفضاً قاطعاً اني اسكن عند اهله .. مو عشان شي بس من مبدأ ( كلما كنا بعاد كلما صرنا حبايب ) وبصراحه انا مااضمن نفسي اذا احد قال كذا والا كذا .. المهم في النهاية رضخت للأمر الواقع وانا مقهورة .. واللي قاهرني اكثر انه في اخو ثالث لهم وكبير ويقدر يتحمل المسؤولية بس مايبي يربطه شي .. يبي يعيش حياته قبل لا يتزوج على قولته .. ماعلينا .. انا الحين ساكنه عندهم لان خالتي حلفت علي اقضي العدة في بيت زوجي .. وتبي تكون قريبه من سديم اكثر .. وافقت علشانها بس .. وإلا والله انها حايمه كبدي من هالبيت .. احمد اسمي احمد .. عمري 27سنه .. ترتيبي الثالث من الاولاد .. اعزب اللي يشغل بالي وتفكيري هاذي الايام .. هي مرة اخوي وبنتها .. من مات اخوي الله يرحمه .. وانا ضايع .. كان شايل عني حمل ثقيل .. اتعب وانا اقول ثقيل .. الحين مات ورمى علي حمل اثقل من اللي كان هو شايله .. الله يرحمه .. كيف كان متحمل كل هالمسؤوليه .. سبحان الله ما عرفت النعمة الا يوم فقدتها .. اخوي ترك لي امي وخواتي .. ومرته وبنته .. بتقولون وش دخلك في مرة اخوك وبنته .. بأقولك هم اللي كاسرين خاطري بصراحه .. والا خواتي بكره كل وحده يجيها نصيبها وتروح .. وامي الله يطول بعمرها .. راح تسكن معي او مع سعود المتزوج .. طبعا اللي يريحها .. بس مرة اخوي .. اوكي نقول بتتزوج لكن بنتها .. آآآآآآآآآآآه سديم تيتمتي وانتي صغيرة الله يعينك ويعين امك .. رنا .. تدرون وش صار اليوم ؟؟! .. بقولكم .. دقيت على اخوي .. لاني بروح المستشفى .. عندي موعد .. وهاذي اول مره اطلع فيها من البيت .. المهم لبست بنتي واخذت عباتي ونزلت .. جلست في الصاله طبعاً معي جلالي .. لاسمح الله يدخل احد من العيال .. لازم آخذ احتياطي .. الصاله ماكان فيها احد .. قعدت ربع ساعه بعدين دق اخوي .. لبست عباتي وطلعت له بعد علمت خالتي اني عندي موعد .. بعد مارجعت تخيلوا المفأجاة اللي انا ماتوقعتها !! ... احمد عصبت لما قالت لي امي انها راحت مع اخوها للمستشفى .. يعني انا وشو عندها .. طرطور والا وشو ؟؟! .. يعني انا مو قد المسؤوليه .. انا اوريك فيها اذا جت .. طلعت عند الباب انتظرها تشرف هي وبنتها .. رنا اول ماوقف اخوي السيارة .. على طول بلعت ريقي لما شفت احمد عند الباب وشكله معصب !!.. قلت في نفسي( الله يستر) ونزلت .. فواز : رنا .. رنا : سم فواز : تأمرين بشي ؟؟.. رنا : سلامتك .. مسكت يد بنتي واخوي راح لما شاف باب البيت مفتوح وعنده احمد .. مشيت بخطوات ثقيله ومرتبكه .. اول مره اشوفه من عقب وفاة زوجي .. قربت من الباب ابيه يبعد بس كان واقف بنص الباب !! .. يمه !! .. بصراحه خفت .. قاعد يناظرني بنظرات قويه .. مافهمت معناها .. اخذتني الهواجيس وودتني .. وقعدت افكر وانا مرتبكه وش انا مسويه ؟؟ .. وليش هو معصب ؟؟ .. مني والا من شي ثاني !! .. احمد من وقفت السيارة ونزلت وانا ماشلت عيني عليها .. حرقت لي اعصابي .. ثورت دمي .. وش يبي يقولون اهلها الحين ؟؟ .. ماعندها احد يوديها ويجيبها ؟؟ .. بس الشرهه مو عليها الشرهه علي انا اللي ماتكلمت معها من البدايه !! .. اول ماوقفت قبالي تبيني افتح لها عشان تدخل .. كنت بصرخ بوجهها بس مسكت نفسي .. وقلت ياولد .. اركد .. دخلها اول .. بعدين تفاهم معها .. رنا اول ماشفته دخل البيت .. زفرت زفرة قويه .. وحسيت بالراحه .. إفراج وأخيراً .. يالله بأنحاش لغرفتي قبل لا اشوفه ثانيه .. دخلت البيت مريت على الصاله .. كان موجود بالصاله .. تعديت الصاله وبأرقى الدرج .. وقفني صوته الغريب وهو ينادي بأسمي .. احمد : رنا !! .. وقف قلبي مو عشاني خايفه لا .. هو اول مرة يكلمني .. اول مرة اسمعه ينطق باسمي .. ما ألتفت ولا حتى رديت عليه .. وقفت بس كذا كأني صنم !!.. سمعت خالتي ( أم زوجي ) تقول : رنا تعالي احمد بيكلمك .. انا كذا طيرت عيوني الله يستر .. اكيد معصب مني .. بس والله العظيم ماسويت شي يعصب منه .. خلاص أحس دموعي تجمعت بعيوني .. خالتي وهو تحاول يكون الوضع طبيعي : رنا تعالي اقعدي .. واسمعي احمد وش عنده .. بلعت ريقي .. ورجعت للصاله وجلست بأقرب كرسي .. احمد حسيتها خايفه مني .. حتى انا احس اني مرتبك وانا اول مرة انادي بأسمها واكلمها بعد .. يوم شفتها جلست .. قويت قلبي وتكلمت .. احمد : اسمعي يارنا .. وهذا الكلام اقوله قدام امي .. بصراحه ماعجبني تصرفك اليوم !! .. تدقين على اخوك تخلينه يوديك المستشفى وانا موجود .. انا الحين مسؤول عنك الين تطلعين من العده وتروحين لأهلك .. يعني أي شي تبينه تطلبينه مني انا .. تقولين لامي وامي تقولي .. اما انك تدقين على اخوانك .. فهذا الشي انا ما أرضاه لنفسي قبل لا أرضاه لك .. بعدين وش تبين اخوانك يقولون ؟؟ .. حطوها عندهم ولا هم قادرين عن تحملها !!.. اتمنى انك فهمتي اللي قلته ؟؟ .. رنا والله مافهمت ولا كلمه .. بس عرفت ليش معصب .. اوكي .. عادي اذا اخوي وصلني فيها شي هاذي .. وبعدين مع اخوي آخذ راحتي اكثر .. هو ليش يعصب ؟؟ .. بالعكس مفروض يقول الفكه ... جت منها ازين ماتجي مني .. بعد كلامه احس اني ارتخيت .. وودي اقوم .. بس مااقدر اقوم وهو قاعد .. احس اني بطيح !!.. احمد عاد علي الكلمه يوم ماشافني رديت عليه : مفهوم ؟؟ .. هزيت راسي يعني ايه .. وانا اقول في نفسي .. (على كيفك الدعوه) .. قام من الصاله وطلع .. على طول اول ماطلع .. قمت برقى فوق لغرفتي برتاح احس اني سويت مجهود كبير اليوم .. اول ماحطيت رجلي على الدرجه الاولى .. حسيت احد وراي .. لاتلقائياً التفت .. وحمدت ربي اني مارفعت الغطاء عن وجهي .. لقيت احمد بوجهي وخالتي وراه .. احمد وعينه على الجوال اللي بيده : وش الموعد اللي رايحه له ؟؟!! .. والله وتوهقتي يارنا !!.. وش بقوله الحين ؟؟ .. السر اللي خبيتيه يارنا راح يطلع !! .. الله يستر !! .. احمد احس اني سويت مجهود كبير وانا اتكلم معها .. ماصدقت اخلص كلمتي .. إلا على طول قمت وطلعت من الصاله وسندت ظهري على الجدار من التوتر اللي صار لي .. بس فكرت هي وش عندها رايحه للمستشفى ؟؟ .. صح انا ماسألتها .. رجعت للصاله مالقيتها .. رحت للدرج .. التفت رنا لما حست ان فيه احد وراها .. حتى امي لحقتني .. لانها استغربت سرعتي .. سألتها وانا في بالي آلالاف الاستفهامات : وش الموعد اللي رايحه له ؟؟!! .. رنا بلعت ريقي .. احس العرق مني يتصبب .. انا ما أدري وش صار لي ؟؟ .. اول مرة احس اني خايفه لهدرجه!! .. ياربي اقول والا ما أقول ؟؟ وش راح يكون ردة فعل خالتي قبل ردة فعله هو ؟؟ .. بعدين هو وش دخله يسأل ؟؟ ولي امري وانا مدري ؟؟ الله يسامحك ياخالتي .. يوم حلفتي اني اقضي العدة عندكم .. من جد وهقه .. قويت قلبي وقلت : شي خاص !!!.. قلت الكلمتين هاذي وعلى طول على غرفتي .. ماتشوفون الا غباري !! .. بعد بعد هذا اللي ناقص !! .. يتدخل في خصوصياتي .. احمد تعرفون وشلون النار تطلع من أذاني !! هاذي وشلون تفكر ؟؟ بصراحه قهرتني !! التفت على امي وانا بعيوني آلالاف الاسئلة ؟؟!! احمد : يمه وش فيها رنا ؟؟ امي : والله ياوليدي انا مدري ؟؟! مرت ببالي هواجيس .. لايكون !!.. لا لا ماتوقع .. ليش ماتتوقع يا أحمد ؟؟ إلا اكيد انها .. لا إن شاء الله اللي في بالي مايطلع صح .. سألت امي وأنا خايف من الاجابه .. احمد : يمه تتوقعين انها حامل ؟؟؟!!!.. امي طيرت عيونها كأنها صدقت اللي قلته .. امي : حاااااااامل !!! احمد : ايه يايمه .. يمكن انها حامل .. انا بدق على اخوها بشوف أي مستشفى وداها .. وبكذا اتأكد امي شفت وجهها صار اسود .. راحت وجلست في الصاله .. وباين عليها انها تهوجس .. طلعت من البيت .. دقيت على فواز.. احمد : هلا فواز فواز : هلا والله .. احمد : وشلونك ؟؟ فواز: بخير الله يسلمك .. احمد : فواز ممكن سؤال ؟؟ فواز : أسأل .. احمد : أي مستشفى رحت اليوم ؟؟ فواز : ليش ؟؟ احمد : أسأل بس.. فواز : مستشفى (............) .. سألته وانا منحرج من السؤال .. أخاف يفشلني ويقول وش دخلك .. بس تجرأت وسألته !!.. احمد : انزين أي قسم راحت ؟؟ فواز وكأنه مافهم السؤال .. فواز : وشلون يعني ؟؟ احمد : يعني راحت لقسم النساء والولاده والا قسم الاذن والانف والحنجرة .. يعني زي كذا .. فواز وحسيته مستغرب السؤال عشان كذا مارد بسرعه .. احمد : انت معي ؟؟ فواز : ايه معك .. بس انت وش تبي بالضبط ؟؟ قررت اعلم فواز باللي اشك فيه عشان يفهم حسن نيتي لا أكثر ولا أقل .. احمد : بصراحه فواز .. انا اشك أن رنا حامل !!! حسيت الصدمه بصوته فواز : كيف ؟؟!!! احمد : اللي اقولك .. فواز : بس انا ماحسيت بشي غريب .. احمد : الغريب انها تدق عليك وتقول عندها موعد .. يعني وش معناها .. اذا هي ارمله وماتقدر تطلع الا اذا كملت العده .. تقدر تطلع اذا كان موعدها مهم مثل انها تكون حامل .. فواز تضايق من اللي قلته .. فواز : اوكي انت سكر وانا راح اكلمها واشوف اذا هي حامل او لا .. ودي اقوله يدق علي يطمني بس احس اني زودتها .. احمد : اوكي .. فواز : مع السلامه .. رنا انسدحت على السرير .. وحطيت يدي على بطني .. آآآآآه مشعل .. ليتك عايش وتشوف بطني يكبر مثل كنت تنتظر ولادتي بسديم .. كانت ايام حلوة .. وانا اشكي لك حركات سديم في بطني وكيف كانت تتعبني .. وانت تقول لي ( بطلي دلع البنات ) وازعل منك .. ( انا الحين اتدلع ... خلاص مزاعلتك ) على طول مايمديني اكمل كلمتي الاخيرة .. الا وجاي تحضني وتقولي ( انتي الدلع كله .. كيف تتدلعين والناس تاخذ منك الدلع ) آآآآآآآآآآآه خلاص يامشعل رحت وراح الدلع معك .. رحت وراح كل شي حلو .. وانا بين ذكرى وذكرى .. رن الجوال .. عقدت حواجبي .. فواز !! الله يستر .. وش يبي هالحزه ؟؟ رنا : هلا فواز .. فواز : اهلين .. رنا : سلامات فيه شي .. من شوي تاركتك .. فواز : تركتيني بس ماقلت لي وش عندك بالمستشفى ؟؟ .. انا كذا عصبت .. وربطت فواز بأحمد .. يعني احمد دق على فواز .. وعلمه .. خلاص رنا مافيه مجال للهرب اعترفي وريحي عمرك .. هم في الاخير راح يدرون .. لا ماراح يدرون .. بس هالأحمد لو الله يفكني من تدخله .. كان انا بألف خير .. رنا : فواز انا حامل .. فواز : حااااااااامل .. رنا : ايه وش فيك ؟؟ لا يكون مسويه جريمه وانا مدري .. فواز : كيف حامل ومتى ووشلون ؟؟ رنا : حامل لي شهرين واسبوعين .. فواز : يعني قبل وفاة مشعل كنتي حامل؟؟ .. بعض الاحيان اشك ان اخوي صاحي .. يعني غبي وشلون احمل بعد مامات .. رنا : فواز انت خبل والا وشو ؟؟ وش رايك يعني ؟؟ مشعل كان يدري اني حامل .. فواز : امي تدري ؟؟ رنا : محد يدري .. فواز : بس احمد يدري انك حامل .. طيرت عيوني!! .. رجع يقولي احمد .. خلاص ماعدت اتحمل اعيش في هالبيت .. قررت قرار سريع .. ومستحيل ارجع فيه .. رنا : فواز انت بعيد والا قريب ؟؟!! فواز : ليش ؟؟! رنا : برجع لبيتنا .. بقضي العده عندكم .. فواز : بس خالتك حالفه !! رنا : مو مشكله تكفر عن حلفها .. فواز : لا لا انا مالي دخل .. دقي على عبدالرحمن وهو يجي يشيلك .. اخاف اشيلك يسوي لي سالفه .. حاولت اقنعه عشان يقتنع .. رنا : فواز بالله عليك ترضاها لأختك .. تسكن ببيت كله عيال .. والله اني ما أخذ راحتي .. وبعدين انا اخاف بالليل وانا نايمه لحالي .. واذا بغيت شي في الليل بالله عليك من اروح له لأحمد وإلا لبندر وإلا ادق على سعود .. وش رايك انت بس ؟؟ ( قلتها وانا احاول اهز رجولته ) حسيته حس بمعناتي .. صدق من جد معاناة.. فواز : خلاص انا بكلم عبدالرحمن بشوف وش يقول ؟؟! رنا : فواز تكفى لاتقول اني حامل .. اوكي ؟؟! فواز : خلاص .. انزين الحين تبين شي .. رنا : لا سلامتك .. فواز : اذا احتجتي أي شي دقي علي .. اوكي ؟؟ جت فرصتك يارنا .. جبيتها وهي طايرة .. رنا : بس احمد يقول أي شي تبينه لا تدقين على اهلك .. قولي لي انا .. تخيل بقوله وش ابي وش ماابي .. فواز : هو قال لك كذا ؟؟؟! رنا : ايه .. فواز : اقول يالله لك ساعة وحده بس وتجهزين .. بعد ساعة بمرك .. خوذي كل اغراضك .. مالك قعده عندهم .. ابتسمت .. آآآآآآآه واخيراً قدرت اقنعك .. رنا : اوكي .. فواز : يالله .. رنا : بااااي.. يااااااااااااااااااااااااااااااااي من الفرح قمت انطط على السرير بس على خفيف عشان البيبي اللي ببطني .. فرحانه ياناااااااس .. واخيرا بطلع من هالسجن .. الحمد لله والشكر لك يارب .. قمت ارتب اغراضي واغراض بنتي .. احمد تتوقع يا أحمد اللي سويته صح والا غلط .. لك حق تتدخل في خصوصياتها .. او لا .. بس !! بس ايش يا أحمد ؟؟! اعترف .. قل انك !! انك ايش ؟؟ صارح نفسك .. عشان تعرف وين موقعك بالضبط .. قبل لاتتوهق ويضيع منك كل شي .. بس انا احس بمشاعر تجاهها .. بس ما أدري هي مشاعر شفقه او ....!!! او ايش ؟؟ رد يا أحمد !! آآآآآآآآآآآآآآآه وش ذا اللي احس فيه .. ياترى انا حبيتها والا وشلون ؟؟!! معقوله يا أحمد تحب مرة اخوك ؟؟ .. مالقيت يا أحمد الا مرة أخوك ؟؟؟ البنات كثار ماطاحت عينك الا على هاذي ؟؟ ارمله وعندها بنت وحامل .. ياسلام .. والله انك يا أحمد ماعندك سالفه .. اقول خلني اشيلها من بالي .. لانه لا أهلي ولا أهلها راح يرضون أتزوجها .. ليش لا ؟؟! ليش تتوقع الرفض وانت ماجربت ؟؟!! جرب وشوف يمكن يخالفون توقعك .. يمكن .. ويمكن بعد تكون سحابه عابرة وتروح .. كل شي جايز في هالدنيا .. رنا بعد ساعه صار كل شي جاهز .. بس بقى بعض الاشياء الخفيفه .. اندق باب الغرفه .. رنا : ادخل .. مرام وهي تناظر الشنط وتناظر الحوسه اللي صايره بالغرفه .. مرام وهي شايله سديم .. مرام : سديم موسخه .. وجبتها عشان تغيرينها .. رنا : اوكي . اخذت منها سديم .. وبديت اغير لها .. مرام : رنا !!! جاوبت عليها من دون ما اناظرها لاني عارفه وش السؤال .. رنا : هلا .. مرام وباين عليها انها مستغربه : وش السالفه ؟؟! ألتفت عليها وانا مبتسمه عشان يكون الوضع عادي .. رنا : برجع لأهلي .. مرام : وشلون ترجعين لأهلك .. يعني راح تقضين العده عندهم ؟؟ رنا : تقدرين تقولين كذا .. مرام وهي مطيره عيونها : وامي ؟؟! والحلف ؟؟! وسديم ؟؟! ابتسمت وحاولت اكون طبيعيه .. رنا : عادي .. مافيها شي .. ليش انتي مستغربه ؟؟! مرام وهي تطلع من الغرفه : انا بروح اقول لأمي وهي تتفاهم معك .. وطلعت من الغرفه .. أوووووووووووووف وش هالنشبه .. الحين ماصدقت افتك من اخوها تطلع لي هي .. والله حاله .. وش هالعائله اللي ماتخلي الناس في حالها .. ان شاء الله ماتخرب على طلعتي .. احمد كنت اساساً راجع للبيت يوم دقت علي امي .. امي : احمد وينك ؟؟! احمد : قريب .. امي : تعال بسرعه .. احمد : وش فيه يمه ؟؟! امي : اذا جيت اقولك .. احمد : اوكي .. سكرت من امي .. وش فيه بعد ؟؟ لايكون رنا مسويه شي ؟؟! اووووف .. ليش انا كلما دقت علي امي تذكرت رنا .. الظاهر هالمخ فاضي مافيه الا رنا .. بعد ربع ساعه وصلت البيت .. لقيت امي جالسه عند الباب الرئيسي .. دريت ان فيه شي .. وشي مهم بعد !! احمد : وش فيه يمه .. وراك جالسه هنا .. امي وهي منزله راسها وحسيتها تصيح : رنا !!! قايل لكم ان السالفه فيها رنا .. احمد : يمه وش فيها رنا ؟؟! امي : بتروح لأهلها ... ضحكت بأقوى ماعندي .. والله تضحك هالرنا تتوقع انها تقدر تطلع .. اصلا الدعوه مو على كيفها .. اووووووه يا أحمد رجعت تتدخل في خصوصياتها .. بس ياناس مقدر مقدر والله مقدر .. رفعت امي راسها والحين بس تأكدت انها كانت تصيح .. قربت من عندها ومسحت دموعها .. احمد : يمه لا تخافين اللي تبينه راح يصير .. امي وهي تصيح : بس هي جهزت اغراضها وبتطلع .. غمضت عيوني .. وانا احاول اخذ نفس يروقني .. قبل لا اروح لرنا واصفقها كف على وجهها عشان تعرف تصيح امي مرة ثانيه .. رنا رحت لغرفة البنات ابيهم يساعدوني في تنزيل الشنط لإني مقدر اشيلهن لانهن ثقال .. رنا : السلام عليكم سارة : هلا وعليكم السلام رنا : ممكن سارة تجين تشيلين معي ؟؟؟ سارة : وش اشيل ؟؟ رنا : شناطي .. لاني بروح لاهلي .. التفت سارة على مرام وهي تضحك .. سارة : سمعتي يامرام وش تقول ذي ؟؟! مرام وهي تبادلها نفس الضحكة : سامعتها قبلك .. وضحكوا جميعا .. كأنهم يستهبلون علي .. عصبت منهن .. صدق قليلات حياء .. رنا : بتساعدوني والا وشلون ؟؟ زادوا ضحك .. وتوقعت انهن تتقطع مصارينهن من كثر الضحك سفهتهن وطلعت .. رحت لغرفتي وجلست اسحب بالشناط الين الدرج .. اروح وارجع .. انكسر ظهري .. دق جوالي .. دقيت وان ألهث .. رنا : هلا فايز .. فايز : وراك تلهثين وش فيك؟؟ رنا : قاعد انزل الشناط لتحت .. فايز : وين البنات ماينزلون معك ؟؟ اسغليت الفرصه .. وانا اقوله رنا : شفت يافايز حامل وقاعده اشيل الشنط لحالي .. لان حضرتهن ماطاعن يشيلن معي .. وتبيني بعد اقعد لين تقضي العده .. فايز : انزين يالله اجهزي خمس دقايق وجاي .. رنا : اوكي .. بااااااااااااااااااي نزلت الشناط بسرعه .. لبست عبايتي .. ومسكت يد بنتي .. وطلعت من باب الرئيسي للحريم .. انتظر فواز .. بس ماكنت ادري وش اللي صاير في قسم الرجال .. احمد حسيت بأصوت في قسم الحريم .. اكيد قاعده تجرجر شناطها .. هين يارنا .. احمد : يمه روحي كلميها .. شوفيها جالسه عند باب الحريم .. امي تحسب اني قلت طلعت .. امي وهي خايفه : طلعت !! وينها ؟؟! ياوليدي لا تخليها تروح .. حاولت اهديها وانا اقول : انزين يمه روحي عندها وانا بتصرف .. راحت امي .. اما انا فتحت باب الشارع انتظر من اللي يبي يجي ياخذها ؟؟ رنا سمعت صوت الباب الفاصل بين سور الرجال والحريم .. شفت خالتي وهي جايه لجهتي .. حسيتها تبكي .. من جد كانت تبكي .. شفت دموعها لما قربت اكثر .. والله انها كسرت خاطري !! بس وش اسوي ؟؟! بصراحة العيشه قرف مع هالأحمد !! ترى مو هذا اول موقف يمر علي .. لا !!.. كان يتدخل فيني .. بس من بعيد لبعيد .. بس هالمرة زودها الصراحه !! واخاف اذا مشيتها له يتمادى اكثر واكثر !!.. خالتي : خلاص يابنيتي بتروحين ؟؟؟!!! قالتها وهي تصيح .. ضميتها .. بس كان شعوري مختلف!! .. ضميتها وتخيلت اني اضم مشعل !!.. ضميتها وبكيت من قلب!! .. وشوي وشوي وانا أتذكر مشعل وانه خلاص ماعاد موجود!! .. انفجرت من البكي وانا اشاهق .. ماانتبهت للجوال اللي كان يرن من زمان !!.. رديت وانا اشاهق .. رنا : نـ نــ ــــع م .. فواز : رنا !! .. وش فيك ؟؟!! رنا : اااا ننننن تت وووين ؟؟! فواز : انا برى .. سكرت السماعه .. وسحبت بنتي وطلعت .. ماكنت اناظر لا وراي ولا قدامي .. من كثر ماالدموع غطت على عيوني .. ركبت السيارة .. رنا : ادخل طلع الشنط ... فايز يناظرني وهو مستغرب !! .. بس ماقال شي !!! .. نزل ودخل مع الباب اللي طلعت منه .. نزلت راسي وضميته بين يديني وقعدت اصييييييييييح .. احمد اعترضت طريقه .. احمد : وين رايح ؟؟! فايز : بآخذ الشنط .. احمد : اصبر امي فيه .. دخلت قبله اشوف اذا امي فيه او لا .. كانت موجوده .. ولكن حالتها كانت تكسر الخاطر .. والله ماتستاهل هالرنا الواحد يضيق خاطره عشانها .. قربت من عندها .. احمد : يمه قومي .. خليها تروح عند اهلها .. وان شاء الله بأجيب لك سديم كل يوم .. امي وهي تبكي .. امي : لا ياوليدي .. انا ابي سديم تعيش تحت نظري .. اشوفها بأي وقت ومتى مابغيت .. أووووووووف .. نفخت وانا اتوعد واهدد .. هين يارنا .. تعمدت ان فايز يدخل .. احمد : فايز ادخل .. دخل فايز وتفاجأ بأمي موجوده فطلع على طول .. لكني سحبته ودخلته غصب .. وقلت له بحزم وانا أأشر على امي : وش ذنب هالمسكينه تنحرم من بنت ولدها ؟؟ .. هاه .. رد يافايز .. تنحرم منها عشان أنانية أختك ؟.. والا عشان عنادها ومايهمها احد واللي براسها بتسويه ؟؟ .. حسيت ان فايز كسرت خاطره أمي .. فايز بعيون حزينه : مافهمت شي ؟؟!!! أحمد : أختك المصونه بطلعتها هاذي بتخلي امي تعيش بعذاب ماله نهايه .. وكله من تحت راس اختك !!.. فايز حس اني ضيقت عليها الخناق فقال بأدب استغربته عليه .. فايز : ممكن نطلع نتفاهم برى ؟؟! وطلع .. لحقته وانا اقول لأمي : راح ارجعّها لك .. لا تخافين يمه .. وقفت انا وياه وجه لوجه .. فايز : بصراحه انا ماحبيت رنا تطلع عشان امك ..!!.. بس رنا اقنعتني .. احمد : كيف ؟؟! فايز : احمد وبدون مجاملات .. رنا تشتكي منك .. ومن تدخلك في حياتها .. طيرت عيوني !!.. وأنا أأشر على نفسي وأقول : أنا أتدخل في خصوصياتها ؟؟!! .. فايز وهو ينفخ : أووووف ... أيه .. وما أظن ان اختي راح تتبلى عليك والا انا غلطان ؟؟!! التفت على السيارة وانا احس اني مختنق وودي اخنق اللي بالسيارة معي .. فقلت بكل هدوء أبي انهي هالسالفة على خير : خلاص انا عندي الحل .. فايز وهو يهز راسه : وشو ؟؟!! احمد : خلنا نروح للسيارة .. وأشرت له على سيارته .. مشى معي ألين وصلنا لدريشة رنا .. فايز فتحت الباب .. فايز : وشو الحل ؟؟!! بلعت ريقي وانا احس انه نشف اليوم كثييييييييييير .. أحمد : رنا .. خلاص من اليوم ورايح انا ماراح اتدخل في خصوصياتك .. ولا لي دخل فيك واللي تبينه اطلبيه من اخوانك .. بس ارجعي للبيت .. لان امي حالتها لاتسر عدو ولا صديق .. رنا سويت معه نذالة لا سواها احد قبلي ولابعدي .. سحبت طرف ثوب فايز .. ونزلت راسه يعني بقولك شي في أذنك .. همست في أذنه : قوله اذا أخلف بوعده مالي قعده لو وش يسوون .. وبعدين قله لايناديني .. ولا ينطق اسمي من الاساس .. لاني مااحب اسمعه من لسانه .. فايز وهو يبتسم بين الكلمة والثانية .. واحمد احسه احترق وهو يشوف فايز .. فايز وهو يضحك : هههه خلاص خلاص اوكي .. خلاااااااااص رنو .. هههههه فايز وهو يبعد عني .. فايز : تقولك اذا اخلف بوعده مالي قعده لو وش يسوي .. وتقول بعد لا عمره يناديني او حتى ينطق لساني .. لانها ماتحب تسمعه منك .. حسيت بوجهه شب ضو !!.. ناظرني نظرات استحقار ومشى وتركنا .. اول مامشى .. ضحكت انا وفواز ضحك ماهو صاحي .. تقطعت مصاريني وانا اضحك .. وبنشوف يااحمد انا والا انت ؟؟ .. احمد ركبت سيارتي وابعدت بعيد عن البيت .. اخر عمري تجي وحده زي هاذي تقولي هالكلام !!!.. وانا اللي اقول .. حب ومشاعر .. وعواطف وماأدري ايش ؟؟!! مالت عليك .. خلاص يار.... لا لا تقول لا تنطق اسمي .. من زينها والا زين اسمها .. انا عند وعدي ولا لي شغل فيك .. والايام بيننا !!.. رنا الحمد لله الاوضاع مستقره .. رجعت لبيت اهل زوجي .. بس من هذاك اليوم .. ماشفت احمد او سمعت صوته .. بيني وبينكم فكه .. احس براحه اذا ماكان موجود بالبيت .. تصدقون احس اني بطني بدى يوضح .. واخاف خوات مشعل يلاحظون .. عاد اذا ... أوهووووووووووو .. والله ان يسوون لي سالفة!! .. اذا دروا بحملي بتعرفون وش هي السالفة ؟؟!! والله ان تشيب روسكم منهن .. احمد تصدقون من زمااااااااااااااااان عنها .. وربي اني اشتقت لها .. بس كلما تذكرت الموقف البايخ اللي سوته معي .. احس اني لو اشوفها قدامي راح اذبحها .. بس رغم كذا ودي اشوفها لو لمحه بسيطه .. لاتفهموني غلط .. يعني وهي متغطية .. رنا طبعا اليوم اكمل شهري الرابع .. وادخل الشهر الخامس .. وبطني من جد صار واضح .. نزلت تحت عشان الغداء .. كنت لابسه جلابيه ساده من غير أي تطريز .. لونها رصاصي غامق .. جلست على السفرة وانا حاطه جلالي على راسي .. وتعمدت اني اجمع اطراف الجلال كلها عند بطني .. بحيث محد يلاحظ .. سميت بالله واكلت .. وانا أأكل اسمع الهمس واللمز .. رنا : خالة وين سديم ؟؟!! خالتي : عند أحمد يقول أبغديها معي .. ميلت فمي .. رنا : بس تبي تأذيه مراح تخليه ياكل ؟؟! .. خالتي : هو اللي مشتهي .. كيفه .. سارة : عادي عمها خليها تبلشه .. رنا : حلوة هاذي .. يعني اذا صار عمها خلاص .. وش رايك بعد اعطيه الحفاضه يحفظها .. ( الله يكرمكم ) سارة : ههههههه حلوة .. مرام : كان يرميها على وجهك يارنا .. والله صادقة يا يامرام .. يسويها أحمد .. مرام : اقول رنا !! .. رنا : قوليى؟؟ .. مرام : شكلك سامنه .. وإلا ؟؟! على بالي اضيع في الموضوع .. رنا : تصدقين ايه سامنه .. يختي من هالقعده لا شغل ولا مشغله .. شكلي بأسوي ريجيم .. سارة : ليش ناويه اذا خلصتي العده تتزوجين ؟؟! ... صدق بجحه .. وقليلة حياء .. بس وكلتها تبن لما قلت : وش رايك حبيبتي ؟؟ .. الحمد لله صغيرة وحلوة .. والف واحد يتمناني .. انا كنت امزح .. بس حبيت اقهرها .. طيرت سارة عيونها تحسبني اتكلم جد .. سارة : ووووووووووووووووع .. من بياخذ ارمله وعندها بنت وووو ... عرفت انها تقصد الحمل .. رنا : وووو أيش ؟؟!! قولي ليش سكتي ؟؟! .. مرام بصوت واطي : وحامل!! .. وهي تناظرني قالت مرام : صح !!! ضحكت على خفيف .. هزيت راسي وانا ابتسم وقلت بكل ثقه .. رنا : ايه حااااااااااااااااااامل .. عندك مانع اخت مرام ؟؟.. خالتي حسيتها داريه .. عشان ماعلقت على الموضوع .. بس البنات تفاجأن !!.. هن كانن شاكات .. بس سألن بيتأكدن وانصدمن لما قلتهم .. مرام والصدمة واضحة عليها : كم لك حامل ؟؟!!.. حبيت استفزها : وش دخلك ؟؟!!! ضحكت عليها سارة : اللقافه خليها .. هاذي رنا وهاذي اطباعها .. مرام والى الآن مو مستوعبه : جد جد رنا كم لك ؟؟ رنا : فضّيها سيرة واسكتي .. ممكن ؟؟ مرام : كملت والله .. من هالخبل اللي بياخذك ؟؟!! بعض الايام احسها بزره .. رجعت لنفس السالفه .. فضطريت اني انهي هاذا الموضوع بنغزه تسكتها .. رنا : والله يامرام انتي اللي جبتيها على نفسك .. بس اتمنى ماتزعلين .. انا الحمد لله اخذت حقي من هالدنيا زوج وعيال .. بس انتي انصحك تدورين على هالخبل اللي بياخذك اذا عنستي بييت اهلك !! .. قمت من الغداء .. ورقيت فوق ولا سألت عنها ولا عن ردة فعلها .. خلوها تستاهل ماجاها .. جنت على نفسها براقش .. احمد دخلت الصالة بعد ماقالت لي امي ان مافيها احد .. لقيت مرام وسارة اشكالهم معصبه ويتساسرون واحسهم بياكلون بعض من كثر العصبيه .. احمد : وش فيكم ؟؟!! ماردن علي .. فسألت امي : يمه عسى ماشر وش فيه ؟؟! أمي : رنا حامل !!! ابتسمت .. طلعت يا أحمد مثل ماتوقعت .. حامل .. احمد : بأي شهر ؟؟! امي : ماقالت .. احمد : طيب هذولي وش فيهن معصبات ؟؟! امي : يستاهلن اللي جاهن !! ضحكت .. اكيد مسويات شي .. اشرت بيدي عليهن ابيهن ينتبهن لي : هيه بنات نحن هنا .. هيه يابنت .. مرام .. سارة ... سافهتني .. ولا كأني اكلم احد .. رفعت صوتي بعصبيه عشان يردن علي : هيــــــــــه .. ياسارة .. ناظرتني سارة وهي معصبه : وش تبي ؟؟ احمد :وش فيكم ؟؟! مرام تكلمت بسرعه مافهمت منه أي شي :تقوليدوريالخبلاللييتزوجك .. اناوشفينيناقصعنالبنات .. عشانهنيتزوجنوانامااتزوج .. قالت هالكلمتين .. شفت دموعها تنزل .. مسحتهن وركضت للدرج .. تعمدت اشبك الكلام مع بعض .. لأنها من جد كانت تتكلم كذا .. مافهمت ولا كلمه .. استغربت تصرفها .. احمد : سارة وش فيها ؟؟ سارة : وحنا نتغدى .. جت سالفه ورى سالفه .. وصار اللي صار .. احمد : انزين وش اللي صار ؟؟! سارة : خلاص يااحمد ماصار الا كل خير .. وتركتني ولحقت مرام .. احمد : مامي وش اللي صار على الغداء .. امي : والله ياوليدي كلن جاه حقه وهي تستاهل اللي جاها!! .. احمد : طيب قولي لي .. امي : لا تشغل بالك بسوالف الحريم ومشاكلهن .. الا وين سديم ؟؟ .. احمد : نامت .. امي : قم جبها ياوليدي واسدحها في الغرفه خلها تكمل نومتها ازين لها على الفراش .. احمد : ان شاء الله .. رنا وش رايكم فيني ؟؟ .. عجبتكم صح !! .. بصراحه هي اللي بدت .. بس ماقلتوا لي انتم معي والا معها ؟؟؟ .. هن والله حليلات وطيوبات .. بس بعض الاحيان يستفزوني بسوالف مالها داعي .. بعد بكره عندي موعد للأشعه .. تتوقعون احمد يتدخل او يعارض روحتي مع اخوي ؟؟! .. بس هو وعدني .. بنشوف هو قد هالكلمه والا لا ؟؟! .. نهاية الجزء الاول 
 
|
| مواقع النشر (المفضلة) |
| الكلمات الدلالية (Tags) |
| براسي, تشويه, يهمني, رواية::, واللي |
| الذين يشاهدون محتوى الموضوع الآن : 2 ( الأعضاء 0 والزوار 2) | |
|
|
 |
العرض الشجري