ملامح الحزن العتيق..

منسدحه على ظهرها وولدها اللي كمل اربعه شهور من يومين
: انت حبيبي .. انت دلبي .. يلا قول ممّا .. قول ببّا .. متى تتكلم ياعادل ومتى تمشي ..
التفتت لنورة اللي تجمع اغراضها وجوالها في يدها تنتظر زوجها يجي ياخذها بعد زيارة اسبوع كامل لاهلها ..
قالت : خلاص بتروحين .. ياليتس قعدتي عندنا اسبوعٍ ثاني .. يااختي رجلتس ماخلانا نشبع منتس كل شوي يدق ولايقول جايكم ..
ابتسمت نورة قالت : وش يسوي ماتعود يجلس لحاله في بيتنا .. بس بجي ان شاء الله وقت(ن) ثاني واحاول اطول عندكم .. المهم نوف قبل لاانسى .. خلاص انتي تركتي سالفة النقل ..؟
جلست نوف وحطت ولدها في حضنها قالت : ايه خلاص .. الديرة ديرتي وانا اولى بادارة مدرستها والتدريس فيها .. بعدين انا كل شوي وانا في الطايف ولا جده احسني شبعت منهم ..
قالت نورة بتعقل : حتى لو رحتي يانوف عدولة وين بتخلينه .. مع شغاله مثلاً ..
: الله لايقوله .. اخليه يجلس مع جداته ويربونه ويحرصون عليه اكثر من الاجنبيات .. الا انتي مافكرتي تحملين ..
: لا محمد يقول مانبي عيال لين تكملين دراستتس .. عاد لو احمل وانا ادرِّس الصبح وادرس العصر كان انتهيت من التعب ..
سكتت وهي تشوف العنود تدخل عليهم بجلالها قالت : منين جيتي ..؟
ردت العنود بهدوء : جيت من عند الغنم رحت اعاون امي .. عطيني عادل بشيله ..
ردت نوف بحده : اول قومي تروشي عن ريحة الغنم وقرفها .
التفتت العنود لنورة قالت : دريتي يوم سحيمان بغى يموت ..؟
شهقت نورة بتمثيل قالت : قولي والله ..
رفعت العنود حواجبها بحماس قالت : والله العظيم .. لوشفتيه يوم يشاهق ..
قاطعتها نورة بضحكه : وش منه يشاهق ..؟
ردت العنود : مدري يمكن عشانه مكثر(ن) من الحشيش امس كنت مدخلته في غرفة العلف والحشيش بالدس ومخليته ياكل .. ياقلبي قلباااه ودي ابكي عليه ..
قالت نوف : هذي نتيجة اكل الحرام .. اجل ابوي يشتري الشعير بكم وكم وتجين انتي تدخلين سحيمان عليه .. ليت ابوي باعه واستفاد منه بس ...ولا ذبحه لثلاجتنا .
وقفت العنود بعصبيه واخذت جلالها قالت : الله لايقول انه يبيعه ولا يذبحه .. اصلاً انا وش يجلسني معتس ..
التفتت لنورة وقالت برجا : تكفين يانورة اقعدي عندنا ترى نوف علتني ماغير تهاوشني من يوم تشوف وجهي لين تروح لبيتها ..
قالت نورة بألم : عنود ياقلبي انتي بعد اسمعي الكلام واهتمي بنفستس ودروستس واخدمي امي وابوي ترى مالهم غير الله ثم انتي وترى نوف يوم تهاوشتس عشانها تبيتس احسن البنات .
هزت العنود راسها قالت مغيره الموضوع ومنهيته : تدرون ابوي جا ولا لا ..؟
قالت نوف : وش سالفتس من العصر وانتي تسألين عن ابوي مهب العاده ..؟
جمعت العنود قبضة يدها اليمين وحركتها على راحة يدها اليسار المفتوحه قالت بغيض وحرة لنوف قالت : موصيته يجيب حاجة يااااويلتس على ماتشترين مثلها .
عقدت نوف حواجبها قالت : حاجة وش ..؟
: موب معلمتس لين تشوفينها ..
طالعت نوف في نورة قالت : يااختي ضاحكتن على ابوي كل ماوصته في شي قال طيب وابشري ..
قالت نورة وهي تضحك عادل : موب جديد الشي هذا تذكرين يوم اذا بغينا شي ارسلناها له ..
وقفت العنود وهي تسمع صوت ابوها يناديها وتقول : بروح لابوي يمديه جاب اللي وصيته عليه .

طالعوا نوف ونورة في بعض باستغراب ثم قالت نورة بهدوء : تدرين من شفنا انا ومحمد يوم جيناكم ..؟
ردت نوف وهي تعطي عادل اللعبه عشان يلتهي فيها قالت : من شفتوا ..؟
: عماد وشادن وام ناصر .
بلعت نوف ريقها قالت : ايه سمعت انهم جو خميس وجمعه وراحوا .. خلاص استقروا في جده بس ام ناصر احياناً تجي الخميس والجمعه وشادن ولا ام نايف وحده منهم تجي معها ..
اخذت نوف عادل وضمته على صدرها وكأنها تحمد ربها اللي اغناها عن عماد وطاريه ..
قالت نورة : نوف ابي اسألتس وجاوبيني بصراحه ..
رفعت نوف عيونها لاختها بدون ماتتكلم وكملت نورة : نسيتي عماد ..؟
: هاااا .. ايه خلاص نسيته .. كنت مراهقه وماكان في حياتي احد اول .. و.... طالعت في نورة وصدت .. وكنت احبه ..
: والحين تكرهينه ..؟
تنهدت نوف ثم قالت : اللي يحب عمره ماكره .. صحيح اني تمنيته وصحيح اني للحين تجيني لحظات احسد شادن انها مرته بس ماقد تمنيت انه يكون لي من بعد ماصار لي رجل وصرت محاسبة على التفكير بغيره والحمد لله اذا تذكرت عطا ربي لي افرح واستغفر واقتنع اني عايشه مبسوطه وربي مقسم الارزاق رازقني ومنعم عليّ ...
شالت عادل ووقفت وهي ترفعه فوق : ربي عطاني هالقمر وتبيني افكر بغير ابوه الله يهديتس يانورة ... قومي قومي خلينا نروح لابوي اجلسي معه قبل يجي رجلتس .
وقفت نورة ولحقت اختها اللي هربت من الموضوع ومن المكان وانصدمت بالعنود وهي واقفه قدامهم بنظارة شمسية سودا ..
قالت نوف : هذي وش ..؟
نزلت العنود نظارتها على انفها وطلت بعيونها من فوقها قالت : نظارة شمسيييييييييية ماتعرفينها ..؟
: وش تبين فيها ..؟
: عشان الشمس ماتعورني في عيوني .. هذاك اليوم سمعت الدكتورة في التلفزيون تقول الشمس تضر العيون ولازم نحميها بنظار شمسة ولاتبيني انعمي ..
قالت نورة : محد قال لتس تمَشَّي بين البيوت في عز الظهر و...
دق جوال نورة وقطعت كلامها وهي تطالع فيه قالت : هذا محمد اكيد انه وصل ..
رفعت الجوال لاذنها بعد مافتحت الخط وتجاوزتهم العنود للغرفة بتشوف شكلها على المراية ..



***





فيللا صغيره ..
قريبه من بيت نايف ..
اثاثها كان من اختيارهم ..
ولمساتها على كل ركن وزاوية .. وتنم عن ذوق رفيع ..
والاسبوع هذا الجَمْعَة عندها مثل ماكانت الاسبوع الماضي عند فهد وسارة واللي قبله عند نايف ومنال ..
واقفه في المطبخ مع سارة اللي تقول : فهد مصر انا نقضي الاجازة في الديرة .. وانا يادوب اتحمل اليومين اللي نروح لهم فيها..ناموس بهذل ولدي ومافيها لامحلات ولامستشفى سنع ..
قاطعتها شادن وهي تحضر السلطه وتحط عليها الملح والخل : ياسارة ياعمري والله ان الجو فيها يجنن .. الناس والحياة هناك غير واحمدي ربك الحين فيه سوبر ماركت ابوعماد ومطعم وكافتيريا مو زي اول يعني كل شي بتلاقينه بسهوله .. حتى المستوصف يفي بالغرض ويقولون تطور ..
اخذت سارة قطعة خيار مقشرة وحطتها في يد ولدها سعود اللي يتعثر بخطوته قالت : حتى ولو مو مرتاحه بس عشان فهد واهله بروح اجلس اسبوعين ثلاثه بعدين بحاول في فهد نسافر .
مست شادن ظهرها بتعب قالت : الله يهون علي بس وافتك من الحمل وتعبه .. ياربي ظهري خلاص بينكسر ..
قالت سارة وهي تاخذ طاسة السلطة القزاز من يد شادن قالت : ارتاحي وعطيني عنك .. التفتت عليها قالت بمرح : محد قال لك احملي باثنين الله لايعنينا ..
جلست شادن على الكرسي قالت بضحكه : هههههههه بكيفي هو ..؟ بس تدرين احلى شي ان عماد فرحان انهم اثنين يقول تحملين مرة وحده وتفتكين من التكرار ..
: ايووووه صادق والله .. شوفي فهد مبهذلني يقول نبغى لسعود اخو ولا اخت ..
وصلهم صوت عماد وسكتت سارة .. قالت شادن بصوت عالي : ايوه جايتك ..
طلعت له وهو واقف عند الباب اللي يفصل بين قسم الرجال والحريم بثوب ابيض وبدون شماغ قال : انا ماقلت لاتروحين للمطبخ ..
اخذت نفس طويل قالت : ماعليه ماعندي شغل الشغاله مكملة كل شي بس اشرف عليها وسارة معاي تساعدني ..
: طيب عطينا سعود ابوه يبيه ..
: حاضر ..
التفتت شادن لسعود اللي جا يتخطى وراها ببنطلون بني وتي شيرت بيج وكاب بني قالت : هذا هو جا على سيرة ابوه ..
فتح عماد يدينه لسعود اللي اعتاد عليه قال : هلاااااا بالشيخ سعود تعال تعال ابوك ازعجنا عليك ..
شاله وقبل مايدخل قال لشادن : انتبهي لنفسك ولعيالي .
هزت راسها بطيّب وعلى وجهها ابتسامة رضى .. ورجعت لسارة في المطبخ ..

دخل عماد المجلس وسعود معاه
مجرد مالمح ابوه وهو يحاول يفز من بين يدين عماد وماكان من عماد الا انه نزله وخلاه يروح لابوه ..
فتح فهد يدينه لولده ..
اسعد لحظاته وهو مع ابوه
بينهم لغة تفاهم عجيبة
نزل فهد شماغه ولبس سعود والثاني مستانس ..
وصوره بالجوال ثم وراه الصورة مثل كل مرة يلعبون فيها مع بعض ...
طلع عماد المسبحه ونادى سعود وجاه يجري ..
قالت ام ناصر اللي فضلت الجلسه مع احفادها على جلسة الحريم : ولدك الله يصلحه حر وفطين ماشاء الله عليه..
: أي بالله ياجدتي حر وفطين جاي على سميه ..
ردت ام ناصر باعتراض : الا جاي(ن) على ابوه ..
قال عماد وهو يصب لجدته فنجال قهوة : عز الله سميه سنافي الله يرحمه .. بس هالسعود فيه من شقاوة ابوه يوم كان صغير ..
رد نايف : ان جا مثل ابوه تراني بزوجه بنتي .
رد فهد : الله مير يسلمك ياابو خالد حنا مستعجلين نبي الحرمه وانتم شكلكم مطولين ماتبون عيال .
رد نايف وعيونه على جدته : افاااا الا نبي عيال اليوم قبل بكرة بس كل شي من عند الله .. اقول ياابو سعود ترى بنطلع على بداية الصيف للديرة اش رايك تطلع معانا .
رد عماد باعتراض : من انتم اللي بتطلعون .
قال نايف بعفوية : كلنا انا وامي وجدتي وحرمتي .
قال عماد : صاحي انت ..؟ تروح واختك على وشك ولادة ..
ضرب نايف على جبينه قال : اووووه كيف نسيت انا .. طيب هي كم باقي لها ..
ردت ام ناصر اللي تحسب الايام والليالي لولادة شادن : ماباقي لها الا اسبوع الله يهون عليها .
التفت فهد لعماد اللي بان عليه القلق بحركة اصابعه على ترمس القهوة بتوتر قال : تعال ياسعود روح اخطب من عمك ابومشعل ان جاه بنت قبل لايسبقك عليها احد ..
رد عليه نايف وهو يمثل انه مغتاض : صدق انكم ماتستحون ولاتقدرون احد انت وولدك .. الحين ازوجكم بنتي قبل شوي وماانتهت جلستنا الا وانت خاطب غيرها .
ردت ام ناصر بضحكه وهي تراقب سعود وحركاته الشقية : سعود رجال يخطب ثنتين وثلاث واربع ..
قال نايف : اجل انا اسحب كلمتي ماعادني مزوج ولدكم المزواج ..
جا سعود يجري عند نايف وجلس بحضنه وكأنه يبي يعتذر عن ابوه وجدته .. وضمه نايف قال : المشكله اني احبك .. هذا اللي يشفع لابوك وجدتك عند بنتي .




***



مرت الأيام تتلاحق ..
بعض الأماكن تغيرت وبعضها مثل ماهي
مثل البشر منهم من غير حياته وتغير ومنهم بقى على ماهو مثل ام ناصر الجبل الشامخ في عايلتها ..
اليوم الجو غيم
وماللشمس اثر ..
احياناً ينزل رذاذ مطر واحيانا يسكن ويعطي الناس فرصه للاستمتاع بالجو ..
ومن الصباح كلاً صاحي في الديرة ...
محد يفوت الجو الا اللي مايحبون الحياة وبهجتها ..
في مزرعة عماد اللي كبرت اشجارها وطالت ..
وجفت بعض ورودها وبعضها للحين حي ..
ارضها خضرا وندية ..
وريحة الطين والماء والشجر ينعش القلوب قبل الأنفاس ..
دخل عماد يمسك بيدين عياله دانه ومشعل سنتين ..
وصلوا جلسة احمد ومها وجدتهم اللي تحتضن غلا بنت احمد ..
قالت شادن بهمس : عماد ..
التفت لها بنظارته الشمسية قال : هلا ..
: امسك مشعل معاك وعطني دانه اخاف يزعل من غلا عشانها في حضن جدتي ..
ضحك عماد قال : لاماعليك الحين يجيهم سعود ثم يحوسه هو وغلا ودانه .. الله يكفينا شره بس لايطيح في البير ولايحذف واحد من عيالنا فيها ..
قال احمد بحدة : يييييه اجل المجنون بيجي .. لو دريت ماجبت بنتي ..
ضحكت ام ناصر وهي تذكر ضربه لغلا امس قالت : امس لولا الله ثم امه جات وافتكت غلا ولا يمديه ذبحها ..
ردت مها : الله يهديه حتى انا ضربني يوم جيت بفك بنتي منه ..
قالت شادن : ترى امه تشتكي منه تقول ماخلى في بيتها شي الا وكسره وماخلى احد من جيرانهم الا وخرب علاقتهم فيه من كثر مايضرب عيالهم ..
رد عماد وهو يجلس عياله بجنبه : لا وابوه ليا قلنا سنِّع ولدك وعلمه ان الاذى على الناس غلط قال اتركووووووه هذا ذيبان ياخذ حقه بذراعه .
قالت ام ناصر : الله يصلحه ويبارك فيه .. يكبر ويعقل مهب اجن من ابوه يوم كان صغير .
قال احمد وهو يضحك : صادقه والله يايمه اذكر فهد يوم كان صغير ماخلى احد من عيال الديرة الا وحط في راسه علامه ..
ضحكوا كلهم منه ووصلهم صوت فهد ينادي بــ ياولد ..
قال عماد : هذا هو جا على سيرته .. وهذا سعود جاكم والله ياوجهه يقول انه ناوي له نية(ن) شينه ..
التفتوا على صراخ غلا وهي تجري لابوها وتقول : يابابا بيضربني .
ضمها احمد قال : يخسي مايضربتس وانا ابوغلا ..
راحوا مها وشادن لجلسة ثانية اكتملت بجية سارة وام فهد وحنان وفوزية ..
كل وحده جات وفطورها معاها ..
وعدد من ترامس القهوة والشاهي توزعت بين الجلستين ..
قالت فوزية : ليت نوره اختي معنا في الجو الحو هذا ..
ردت حنان : خلاص بيجون بعد اسبوع وان شاء الله الجو يكون زي ماهو ماتغير ..
قالت سارة : ياربي كل ماتذكرت ان الزواج بيخلونه هنا انقهر .. ليه مايسوونه في جده احلى واريح .
ردت مها : هنا ازين بين اهلهم وجماعتهم ولو حطوه في جده بيصير مختصر وهم مايبون عرس بندر مختصر مثل عرس فهد ..
قالت شادن بضحكه : احلى ياسارة عشان تشوفين كيف كان شكل زواجكم .
ردت سارة : زواجي غريب عجيب مااقتنعت فيه شكلنا بنعيده انا وفهد ..
جاتهم الكورة بقوة وصرخت حنان وهي تشوف سعود ولد فهد يجي يدور عليها قالت : هييي انت اقسم بالله لو ماركدت لاكسر رجولك .
طالع في حنان قال : انقعلي انتي مو حلوة .. هاتي الكورة .
طالعت حنان في سارة اللي اكتفت بالتفرجه لأن ماعاد في يدها شي قالت : سارة متأكده انه ولدتس وانتي امه .
ردت سارة : ماشفتيه لمن ضرب حسام ولد مشاري اخوي .. بغى يقتله بس لحقنا عليه .. فعلاً شككني انه مو ولدي ..
ضحكوا منها وقالت ام فهد : ابد تطمني ولدتس وولد فهد اضمن لكم انا .. سعود الله يحفظه مثل فهد يوم كان صغير .
فزت فوزية قالت : شهد وينها مااشوفها ..
قالت شادن : اجلسي ياعمتي شفناها مع خالد موديها للبقاله مع عيال عمي ناصر .
ابتسمت فوزية وهي تتذكر اهتمام خالد فيها قالت : يااختي اذا قال لها خالد شي مستحيل تعارضه .. شوفيها من يوم قال البسي عبايه وطرحه وهي لايمكن تطلع الا بعبايتها وطرحتها ..
قالت ام فهد : الله يجعلها من نصيبه تراها موب صغيره عمرها عشر سنين المفروض تحط على راسها شي ليا ظهرت ..
قالت مها : ماشاء الله في سن العنود .. امس شفتها عند غنم امها وبجلالها مايفارقها الله يصلحها .
كملوا جلستهم بود بعد ماوصلت حليمة زوجة فواز وام نايف ومنال وصارت الجلسة مجموعات وسوالف متنوعه ومختلفه ..




.. ..

وجه كاميرا جواله لعياله ..
دانه لابسه فستان جينز وشعرها الناعم مقسوم لنصين ومربوط بشرايط حمرا .. نعومه وخجوله وهادية وبجنبها مشعل ببنطلون جينز كحلي وتي شيرت ابيض وجزمة سبور ومسوي فيها اكبر من دانه رغم ان الفرق بينه وبنيها دقيقتين فقط .. يحاول يقلد ابوه اللي اكتسب منه الهدوء واغلب الملامح ..
طالع في صورهم وارسلها وسائط لشادن وكتب تحتها
كنت اظن الحب في وسط القلوب
اثر حبك مالي الدنيا علي
دايم مشرق ولايعرف غروب
منور ونوره تعدى كل ضي
كان حبك غلطتي ماراح اتوب
راح احبك لو كواني الحب كي
لي فواد في هواك دايم يذوب
من عرفتك وانت عندي كل شي

استقبلتها شادن وهي تشوف مشعل يمسك بيد دانه ويبي يوصلها عند امه عشان يرجع لابوه ..
ضمتهم قالت : مشعل تعال اجلس عندي ..
هز راسه بلا وأشر على جلسة الرجال قال : اووح بابا .. ومشى بسرعه لابوه
فتحت جوالها وارسلت
مالوم قلبي لي رسى في موانيك
او سالت الدمعه لوصلك تنادي
الطيب ورد منبعه في اراضيك
والسعد شوفك يا بعد هالعبادي
ادعي عسى المولى يحفظك ويبقيك
يا أغلى مخلوق سكن في فؤادي
..
حبيبي مشعل رجع لك انتبه له ..



وقف عماد لولده بعد ماقرأ الرساله وانتظره لين وصله واخذه بين يدينه وجلسه في حضنه ..
وراحت عيونه على الأرض اللي شهدت صده وقربه ..
شهدت دموعها واعترافاتهم ..
وشهدت العهد اللي وثقته بالوفا ..
واليوم تشهد النتيجة ..
بمشعل ودانه ..
وهي محتله كل الأماكن في حياته ..






***





تمت بحمد الله ملامح الحزن العتيق ....

وطويت آخر صفحاتها اليوم ..

اعترف بأني لست راضيةٌ عنها البته ..

ولازلت اكرر انا قارئة اكثر من كاتبة ..

الملامح وجهتها رساله ..

رسالة لمن عاني من المرض وفقد الامل من الشفاء

ليس على الله صعب ..

لمن كذب حقيقة العلاج بالقرآن ..

ولمن ابطل ادوية الطب العربي واستنكرها ونسبها للتخلف والرجعية ..


وكتابتي عن هذا المرض بالذات لتجربة اختٌ لي في الدنيا وصديقة قريبة .. عانت مع زوجها الأمرين وشفي بإذن الله بالقرآن وسورة البقرة تحديداً والعسل ومغلي النعناع ...
وأيضاً خلطة البقدونس والزبادي والثوم لكنه لم يستمر عليها طويلاً كالعسل والنعناع ..
بعد كفاح وجهاد مع الأدوية الطبية التي لم تجدي به نفعاً ...

وتذكير بأن الكبد الوبائي من امراض العصر ..
اسمه الصامت القاتل وللعلم لدينا في السعودية اكبر نسبة في العالم اصابة بهذا المرض بجميع انواعه ..


الملامح ايضاً كانت رسالة سامية لكل من اتبع هواه وحاد عن طريق الحق مثل خالد وليلى ..

رسالة لكل مراهقة تحلم وتحاول ان توغل الحلم في الواقع ..

كلنا نحلم لكن الواقع والنصيب ليس بأيدينا ومااجمل قناعة المرأة حين يكتب الله لها نصيباً حتى وان رفضته وجن جنونها ..

نوف .. اوردتها قضية لفتاة من مجتمعنا .. فتاة احبت ببساطة ابن الجيران الأرفع منها مادةً وعلماً ..
حبته بجنون لدرجة التمرد ولولا شيءٌ من دين وتعقل لما اصبحت نوف زوجة وأم ومعلمه ..


الملامح رسالة .. لكل ظالم .. لكل فاسد ..


ملامحي كانت لأخواتي الصغار عاشقات قصص عبير وأحلام وغيرها من القصص الفارغه التي لاتحمل سوى مواقف الحب والغرام ..

اعترض الكثير من القراء الناضجين وأغلبهم ان لم يكن كلهم كانوا فوق الثلاثين عاماً وليسوا بحاجة لمواقف العاطفه ..
لكني مقتنعه بأنه يجب عليّ ان اكتب عن العواطف والمواقف الغرامية كي اجذب قراء العشرين وماتحتها وعشاق القصص الغرامية من الناضجين .. كي اشبعهم هنا في قصة مليئة بالأذكار وربما المواعظ ..


الملامح رسالة لكل من قال ان بنت القرية او ( البنت القروية ) لايرغبها ابن المدينة .. فكانت نورة مثالاً واقعي شاهدته بنفسي ..
ولمن قال ان ابن المدينه لايقدر على العيش في القرية ..

وأخيراً ... الملامح رساله لكل زوجة تجد نفسها مع رجلٍ يعاني ..!
ورسالة لكل خائنة ..!!!


اكثر ماارهقني في الملامح هو انني ارتديت ثوب الواعظه او الناصحة ..
وهذا مااتعبني كثيراً ..
لست نادمه ابداً .. واتمنى ان اكتب لأجل التقويم والتعديل .. ولكن ..

انا لست واعظة ولااجيد فن الوعظ والتذكير ربما لأنني حتاج من ينصحني ويعظني ..
لهذا ارهقتني بعض المواقف كثيراً ..

اعلم جيداً انني لم اجيد حبكة القصة ..
وان رأيتموني اجدتها فما كانت كما اود والله ..
وأشعر بأن لدي الكثير الكثير لكني أُصبت ببرود في أغلب الأجزاء لهذا كانت الثغرات كبيرة وكثيرة ..



ختاماً ..

لاادري حقاً كيف اشكر ..
الشكر اقل مما في قلبي نحوكم
..
كل من وقف معي سواء في مهلاً ياقدر او الملامح ..
كل من يشعر انه قدم لأقدار شيءٌ من نجاح
كل من راسلني على الايميل او الخاص اوواصلني بردود قصيرة واختفت ..
مكانكم قلبي ومخيلتي ..
وأنا ممتنةٌ لكم مدى العمر ..
الى لقاءٍ وديٌّ آخر يجمعنا بالحرف والحكاية ..
كونوا بقلبي ....!





ملاحظة / لأجل حفظ الحقوق ولأوضح مالي وماليس لي ..
كل ماورد من ابيات شعريه ورسائل حب ليست لي لشعراء اجهل هويتهم ..
اما خواطر عماد كانت بقلمي انا ..




اخيراً ..
تحذير : من كاتبة الرواية


القصة باسم اقدار .. وان نُسبت لغيري او أٌخفي اسمي منها لن اسامح الناقل وجزاؤه عند الحق الذي لايضيع الحق عنده ..

والحمد لله الذي بنعمته تتم الصالحات
الكاتبة اقدار ..







تمت...