ديوان الشاعره مطلع الشمــس

أبو أحمد



بو احمد تراه القلب مصيوب ... والحال مني غادي سقيم

كنه بقلبي شب لاهوب ... شاقي وقلبي في تأزيم

حبه دعالي القلب متعوب ... ساهر اناجي الطيف واهيم

طيفه شاغلني في لغروب ... من غير وعد ولا ملازيم

وينام في عيني وانا اذوب ... كنه معي أغلى المعازيم

أسمع صدى صوته على الدوب ... مثل التناغم والترانيم

شق الهوى في قلبي دروب ... وأصبحت كني من المظاليم

اهو قريبي وصار مكتوب ... أسمه بقلبي دون تحريم

شهم أصيل الجد محسوب ... وانته تعرفه دون تعليم

فيه السخا ما فيه عذروب ... زين المعاني والمفاهيم

أصبح لقلبي ملك مطلوب ... وله بامتثل حب التعاليم

عسى دياره غيث مسكوب ... وسمي يسوقه مدهم الغيم

والأرض تصبح زهر وعشوب ... يرعى زهرها قايد الريم

أبوظبي


بوظبي انته محليها ... يا سفر لوطان يا عمري

والنجوم انته مضويها ... والليالي وجوها السحري

إنت نوري والضيا فيها ... يا شعاع الشمس والبدري

لو تريد الروح بهديها ... والمشاعر وابدي بعذري

أكتم اشواقي واخفيها ... عن جميع الناس لا تدري

اللقا أول وتاليها ... لاجل شوفك يا بعد عمري

أجمل اوقاتي أقضيها ... ساهر مع طيفك العذري

يا بعد روحي وغاليها ... حبكم وسط الحشا يجري

بوظبي انته محليها ... يا رفيع الشان والقدري

أمل عمري


صحيح انك معي غالي وتملك قلبي وده
صحيح انك أمل عمري واحبك حب ماله حدود

وانته الحب تدري به وتعرف جزره ومده
يفوق الوصف والمعنى وشعري والحروف شهود

ولكن لو تمادى حد منا ينقلب ضده .
وتتغير موازينه ويصبح شي هب موجود

أنا بقدر على قلبي مع الأيام بارده
بسخر عزمي وصبري عسى الله يحقق المقصود

ترى ضاقت بي ايامي وصبري قد وصل حده
انا مليت من نفسي واخاف انه الأمل مفقود

تعب قلبي تعب فكري تعبت وطالت المده
أطالع ظلمة مزونك وأتمنى الربيع يعود

أريد ارض المحل تزهر وأقطف منها ورده
واقدمها لجل عينك هديه والسلام يسود

أريد السعد يبقى لك حليف ثابت وعده
يضمك بالغلا قلبي وتبقى في هنا وسعود

اريد ايامنا تضحك بوقت اللين والشده
وتتبسم ليالينا على ورد وروايح عود

عسى ربي يوفقنا وباب التفرقه يسده
وتبقى لي أمل عمري واحبك حب ماله حدود

إنسحاب

أعلنت لك حبي وتالي انسحابي ... من قلبك القاسي وقلبي جبرته

حب عفيف وافي ما يعابي ... حب كتمته وسط جوفي وصنته

علقت فيه آمال عمري وشبابي ... ياما تمنيته وياما انتظرته

حب سكن ما بين جفني وهدابي ... والله ما تتصوره لو وصفته

لا واعذابي في الضماير سطابي ... بيدي حييته ثم تالي دفنته

إنته معاناتي وسبة عذابي ... وانته الذي فرحي ونومي سرقته

ضحيت لعيونك وسكرت بابي ... عن شوف غيرك والغرام احتضرته

رسمت لك لوحه وصارت سرابي ... وبينت لك خافي شعور كتمته

هذي النهايه يا مسبب صوابي ... سامحك ربي في فواد حرقته

أوهام

أحبك حب لو تدري بعد عمري بتأثيره
سلبني عقلي وروحي واحساسي مع شعوري

أحبك تعجز حروفي عن وصوفه وتعبيره
وانته فوق هام السحب لك نهجي ودستوري

أحبك حب مخلد أحبك من وانا صغيره
أحبك حب ما يوصف ولا تستوعبه سطوري

ربيع القلب يا عمري شذا عطري ونواويره
ضيا ليلي سفر شمسي هناي ولحظة سروري

أسوم العمر من أجلك ولو كثرت مخاسيره
فدتك الروح يا روحي في غيابي وبحضوري

عسى من لامني بحيك تصيبه في الهوى حيره
ويسري الحب في قلبه ويصبح فيه مأسوري

ترى شوفتك هي عيدي تساوي الأهل والديره
سخي النفس طلعتك البهيه يا غلا نوري

أحبك وانت في قلبي محب ما ليه غيره
أهيم بحبك وإنته تهيم بحب غندوري

الحلم الخيالي

تبيني أبتدي واطرح سؤالي ... أبيك تفسر الحلم الخيالي

وتشرح لي تفاصيله الجميله ... وتوعدني على شوفتك تالي

أنا بصبر ولو صبري تعدى ... وبتحمل ولو مهما جرالي

بضحي .. وانت تستاهل اضحي ... على شانك لانك راس مالي

أشوفك شي نادر في عيوني ... وحيد وغير عن كل الرجالي

تذوب العاطفه بهمة حديثك ... ويقوى بصوتك الدافي احتمالي

انا منك حبيبي وانت مني ... تجمعنا الأصاله والمعالي

قبايل والشرف فينا تشرف ... نعم واحلامنا فوق المحالي

أنا أعرفك وتعرفني وتعرف ... تراني بنت ابوها ولا تبالي

لي عزوم على الشده قويه ... ولي نقطة ضعف وحده .. جمالي

وراعي الوصف قد هو قال كلمه ... تخلد ذكرها أول وتالي

ورا أعظم رجل حرمه عظيمه ... وفيه شامخه مثل الجبالي

وهذي هي أنا .. هذي .. أنا اشهد ... عساها روية الحلم الخيالي

الحلم الكبير
كل يوم وكل ساعه وكل عام
وانت حبي وانت عشقي والهيام
وانت كل الحب يا حلمي الكبير
وانت فال السعد يا أجمل غرام

انت كل الحب في كل الزمان
وارتباطي فيك من قلب وكيان
مصدر افراحي وسعدي والحنان
شوفك اعيادي وكل الابتسام

يا رقيق القلب يا عذب الشعور
قربك الأيام تضحك لي سرور
في فوادي وانت لك قدر وحضور
ما توفيك الوصايف والكلام

إنت غير الناس في عيوني أنا
إنته افراحي وعمري والهنا
من أنا من غير حبك من أنا
أعشقك واصحى على حبك وانام

بسمتك والحب لي أجمل حياه
عامره والكون ينور في ضياه
يا نهار العيد يا صبحه ومساه
أجمل آيات التهاني والغرام

الشعر خليه

لا تدعين الشعر لا تدعينه ... للشعر كتاب تقدر معانيه

الشعر سامي ما يبي من يهينه ... مثلك ومنك يا كثر ما يعانيه

كسرتي اوزانه وعدله وزينه ... استحلفك بالله يا هيه خليه

ما انتي على روعة حروفه أمينه ... أخاف باكر نتركه ما ندانيه

شي تهزينه وسي تسرقينه ... ويظهر مثل وجهك كريهه معانيه

عيد الحب


كل عام وانت عمري وفرحته ... كل عام وانت إنسي والسعود

إنت حبي وانت عيده وبسمته ... وانت عيد الحب في هذا الوجود

لك ربيع العمر يهدي باقته ... لاجل عينك أجمل انواع الورود

وليلنا الحالم يضوي شمعته ... يحتفل بالحب ولهان ودود

هو مثلنا يحتفل بمحبته ... عايش الأفراح ونجومه شهود

يا حبيب العمر كمل بهجته ... واجعل البسمات لاحزانك ردود

شوف عمري فيك طابت علته ... وحبك بقلبي ترى ماله حدود

إنت ساكن فيه مالك مهجته ... وانت أغلى حب في هذا الوجود

كلمة ومعناها


قلت لي كلمه ومعناها ... زادني عله على عله

آه ويلي كيف بقواها ... تستفز الفكر وتله

قلت لي ما أقصد إنساها ... ما بها مقصد ولا زله

عابره والحب فحواها ... في قصيدي ولا بها خله

كل كلمه منك أقراها ... حرف حرف وجمله بجمله

لين أوصل بر مرساها ... واصعب الإحساس اوصل له

لك تحياتي وازكاها ... لك ودادي والغلا كله

يا مليك الروح ودواها ... وننتظر للوصل في حله