 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
03-03-2023
|
||||||||||||||||||||||||||||||
|
||||||||||||||||||||||||||||||
رواية على وتر الحياة غنينا البارت السادس
{ البارت السادس }
كيف لي أن أشعر بوجعك رغم تلك المسافات وعدم معرفتي بك كانت تمشي هي والبنات بالمزرعة ويفصفصون لكن فجئة الزين وقفت وصرخت ومسكت ع صدرها زينب : زييين شفييك الزين وهي موقادره تتكلم وضاغطه ع صدرها نور:اجيب لتس مويا الزين وهي تهز راسها بلا وجلست ع ركبتها ووجها تغير لونه زينب جلست قدامها وفكت حجابها وتضربها ع خفيف بخدودها: زين زين شفيتس نور:شكلها موقادره تتنفس زينب: نادي خالد بسرعه ركضت نور تنادي خالد اما الزين فنزلت دموعها من كثر الوجع اللي جاها بصدرها وطاحت مغمي عليها _____________________ عند سديم كانت تتمشى بحديقة بيتهم وتسولف مع غادة غادة : اماانه ياسديم بتسافرين وتخليني وحدي سديم : بتشتاقين لي ؟ غادة : حييل والله ع انك ماتسولفين كثير الا ماتخيل نفسي بدونك سديم : ياحبك للدراما غادة : جزاتي اعبر لك عن مشاعري سديم بضحكه : يازينك ويازين مشاعرك غادة : طيب متى اقدر اشوفك؟ عشان اودعك سديم : بدري ماراح اسافر الحين غادة: بعد ثلاث شهور وين بدري سديم :وبتشوفيني بهالثلاث الشهور ليين تطفشين غادة : وانا اقدر اطفش منك سديم :يمكن غادة : لا مويمكن فعلا ماقدر سديم :نشوف ، انا بقفل الحين اكلمك بعدين غادة : تمام مع السلامة ، وقفلت منها :شتسوين هنا التفتت سديم لمصدر الصوت اللي كان خلفها واعطتها نظرة تقييمية كاملة كانت ماسكه بيدها عصير برتقال وتنتظر من سديم جواب لسؤالها لكن توقعت عدم الأجابة ومع ذاك واصلت المشي لين صارت قريبة منها وبضحكه استهزاء: ليكون تكلمين الحب لكن طنشتها سديم وجلست قريب من المسبح ع العشب الموجود جنبه وفتحت كتابها تقراء بصمت جلست جنبها وهي تسرق النظر الى سطور الكتاب بتشوف وش المكتوب ناظرتها سديم بستغراب لتصرفها ورفعت حاجبها بمعنى وش تبين ؟ جميلة : يوهه مملة انتي لا تردين ع سوالفي ولا تسولفين سديم وهي تقلب صفحة الكتاب ببرودها المعتاد وبتصحيح للفظ جميلة : ماتردين ع لقافتي ولا تسولفين جميلة :ماتتسمى لقافة وسكتت شوي وماشافت اي رد منها جميلة : وش كان يبي منك ابوي سديم : روحي اسأليه جميلة: غبية انتي ؟ لو باخذ منه جواب ماجيت اسألك ماردت سديم وكملت تقرا كتابها جميلة : صدق مملة سديم بهدوء: تقدري تروحي جميلة : ماني برايحه سديم : اجل اكرميني بسكوتك جميلة تناظرها وهي منغمسه تقرا الكتاب،ولا اعطتها وجهه وبدون سابق انذار كبت العصير فوق الكتاب غمضت سديم بجمود لان العصير نصه صار فوق صدرها والنص الثاني ع الصفحة ابعدت الكتاب عنها بهدوء وحركته لجل تنفض العصير منه ، ثم وقفت وصارت تمسح ع بلوزتها والتفتت لجميلة وببرود : انتي مريضه ؟ جميلة بضحكه وهي توقف معها : ماحبيت تبقى بخاطري يومنها جت سديم على نفس البرود : وأي شيء يجي بخاطرك تسوينه ؟ جميلة بلا مبالاة : ااي سديم ناظرت المسبح ثم ناظرت جميلة واقتربت منها بسرعه ودفتها بوسط المسبح جميلة بصررااخ :يااغبيييية يامجنونه شسويتي ؟ سديم وهي تكتف ايدها بحضنها وتبتسم : جت بخاطري وحبيت اسويها ، واخذت الكتاب من الارض ومشت مسحت وجها من المويا:الله ياخذك ياامجنونه خربتي استشوااري ""وصارت تتقرب من حافة المسبح بتطلع "" : يوهه باردد _______________________ عند ريناد كانت منسدحه بغرفتها وتناظر السقف وتفكر بعبدالله شوي سمعت صوت رسالة اللي كانت بأسم ""ع"" فتحت جوالها وابتسمت ماكانت تحمل هالرسالة سوا نقطتين لكنها رسمت ع وجها ابتساامة فتحت الرسالة لكن ماردت مرت دقيقة ثم وصلتها رسالة ثانية محتواها : بزرتي زعلانه؟ رفعت حاجب من محتوى هالرسالة ثم ردت باستفاهم فتح رسالتها ثم ارسل ضحكه ريناد بنرفزه : شعنده يضحك ارسل لها مره ثانية :بدق ردي وقبل تكتب رد ع رسالته دق وفتحت الخط وضلت ساكته عبدالله بصوت مبحوح ثقيل: السلام عليكم ريناد بهدوء وزعل واضح: وعليكم السلام عبدالله بهدوء وتنهيده: زعلانه ريناد بعتب :يومين ياعُبيد عبدالله: انا اسف ريناد: وش اشغلك عني عبدالله: مايشغلني عنش شيء واذا ماكلمتش انتي طول وقتش بفكري ياارنيد ريناد بأنفعال : قل انك مليت وتبي تعودني ع بعادك عشان تاخذ غيري هاه قول سكت عبدالله شوي ثم رد بصوت ثقيل والبحة واضحه:وش هالحكي ؟ ريناد :وش هالحكي حكيي مابه شيء وواضح انت مليت مني صح عبدالله : مليت منش ؟ ريناد: لا تردد حكيي يااعبد الله عبدالله: دامش قلتي اسمي كامل لا في شيء مضيق عليش شفيش ريناد: شفيني يعني مافيني شيء عبدالله : انا اسف طيب ريناد : ماصار شيء يخليك تعتذر عبدالله : رنيدي ريناد بنرفزه : اسمي ريناد عبدالله : لو اقولش وش اشغلني بتعذريني ؟ ماردت ريناد وكمل هو عبدالله بهدوء: انشغلت هاليومين كنت نازل للديره عشان اكلم ابيش""ابوك"" من جديد لكنه مايرد علي ريناد بهدوء : بيجي يوم وتتركني ؟ عبدالله بستغراب من سؤالها: الله ياخذ عمري لا نويت اتركش ريناد :لا رد.... عبدالله : فيش شيء ؟ ريناد بنفس الهدوء : لا عبدالله وهو متأكد ان فيها شيء لكن حب يجاريها : كلمت جهاد ريناد : علمني عبدالله: وش علمش به ريناد: انك تبيه يكلم ابوي عبدالله : ااي ريناد: بس عبدالله: يقول بتجون الأسبوع الجاي للديرة ريناد : مين يقوله عبدالله بضحك ع فهاوتها: عن مين نتكلم احنا ؟ ريناد : اي صح مدري يمكن نجي ويمكن لا عبدالله : لا بتجون باذن الله ريناد: ان شاء الله ثم سكتت شوي وقالت : عبدالله عبدالله :لبيه ريناد :قولي قصيده عبدالله وهو متعود ع تقلبات مزاجها : وش تبين من قصيده ريناد بتفكير:امممم خلاص لا تقولي اذا نزلنا للديرة قولها عبدالله : وش يفرق ريناد بجراءة : بشوفك عبدالله : لو اشوفش توعدين حركاتش هذيك اقص رجولش ريناد تتصنع الحزن: افا ماتبغى تشوفني عبدالله: اي مابغى اشوفش ريناد : اخ ماتوقعتها منك عبدالله بمزح: توقعي عادي شايف شكلش من عمرش يومين لين صكيتي ال١٦ ومليت ريناد بحزن : قالها فارس عبدالله بضحكه: وش حكى ريناد : انك بتمل مني عبدالله : حلو حلو وصلت للي مكدر خاطرش هالحين هالحكى مزعلش ؟ ريناد بتهرب : انا بقفل جاني النوم عبدالله بهدوء: ماتقفلين وانا اهرج ياريناد ريناد: وانا ماعاد ابي اهرج عبدالله : قفلي الخط وشوفي وش يجيش والله لادق ع فارس واخذ العلم منه ريناد بشهقه وهي تحط ايدها ع صدرها:وش بتقوله يادافع البلا عبدالله : بقوله وش مزعل به بزرتي وداقه علي زعلانه ريناد: عشان يجي ويمسكني من شوشتي ويعلمني الزعل صدق عبدالله: يعقب يلمس منش شعره والله لاقص ايديه ريناد بتسليك: اي اي هين عبدالله : هالحين حكاه ذا اللي زعلش ومخليش قالبه علي ؟ ريناد:ماقلبت ولاشيء عبدالله بتنهيده : ااي واضضح ريناد : المهم بنام وراي قومه من الصبح عبدالله : زين ماطول عليش تدفي زين ريناد: ان شاء الله ، يلا فمان الله عبدالله:بحفظ الله قفلت الخط وغطت وجها بالبطانية بتنام _ اليوم الثاني الصباح صحى من نومه وهو يحس بشيء قريب من وجهه فتح عيونه ببطئ لكن انفجع من الوجهه القريب من وجهه تراجع على ورا شوي ثم بدا يستوعب مين هالشخص سلمان : بسم الله الرحمن الرحيم ، شفييك مهبوله تيما وهي مازالت مركزه ع تقاسيم وجهه: انت اخوي سلمان بستغراب اكبر : لا ولد الجيران تيما: لكنك ماتشبهني سلمان: ولد الجيران كيف بكون اشبهك تيما وهي متجاهله تريقته: ريناد تقول انا موبنتكم ولقيتوني بالشارع سلمان بتسليك : حتى هي لاقينها بالشارع عند باب المسجد تيما وهي تبتسم: جدد سلمان: اي روحي اسألي خالتي وبتقولك تيما نطت بفرح وطلعت برا الغرفة ركضض سلمان : اللهم لك الحمد على نعمة العقل ، والتفت لفواز النايم وهذا مايحس بشيء ياثقل نومة ورجع انسدح _بالمطبخ ،دخلت تيما وهي مبسوطة وكأنها مكتشفه االذرة ،وقفت ع باب المطبخ وحطت ايدها ع خصرها : لا ترمي بيوت الناس بالحجاره وبيتك من زجاج ريناد : ليه معك بيت انتي يالقطوه تيما: القطوه اللي لاقينها عند المسجد حبيبتي موب انا ريناد وهي تقطع الليمون :اما مين لقاها تيما: اسألي خالتي ريناد : يمهه انتوا لقيتوا قطوه بالمسجد؟ الام: لا ليه ريناد : مدري هالنتفه تقوله تيما: مايبون يعلمونك عشان لا تصيحين لكن سلمان قالي كل الحقيقة ريناد بتطنيش لكلامها حطت ملح بصحن صغير وطلعت من المطبخ تيما: يالطرما لما اكلمك لا تطنشيني ريناد بانزعاج: اقول تراك بطول ساقي لا تحديني ارفسك تكلمي معي بادب تيما : ترا ادري انهم لاقينك عند المسجد فلا تسوين ماتدرين ريناد : انا لاقيني عند المسجد؟ تيما: ااي سلمان علمني حقيقتك ريناد : اي زين استري علي ولا تفتحين جروحي وتربعت ريناد ع الارض تتابع سبيستون وتمثل دور الحزينه تيما جلست جنبها وتناظرها ، : عشان كذا انتي ماتشبهينهم ريناد ناظرتها وهزت راسها بحزن تيما ضمت كتف ريناد وبمواساة : لا تحزنين خلاص كلنا عيال شارع ريناد وهي موقادره تتحمل تمسك ضحكتها: كلنا ايش ؟ تيما وهي مازالت ضامه كتف ريناد وبصوت حزين: عيال شارع قاطع رد ريناد دخول سلمان لصالة وناظرهم سلمان وهو يجلس ع الكنب الموجود بالصاله :وش صاير فيكم تيما: لا تكلمنا سلمان: ريناد شفيك كانهم حاطينك بوضعيت الهزاز تيما وهي ترفع راسها تناظر ريناد اللي وجها صار احمر وهي كاتمه الضحكه اول ماشافت نظرات تيما لها انفجرت ضحك سلمان :الحمدلله والشكر تيما وهي تبعد عنها : تستهبلين علي يالمليقه وراحت لامها زعلانه ريناد بعد ماهدت من الضحك: انت قايل لها انهم لاقيني بالمسجد؟ سلمان وهو يحك راسه : اي صحيت وهي ناشبه بخشتي تشوف الشبهه بيني وبينها وتقول قلتي لها موبنتنا ريناد :هههههههههههه جايتني تقول لا تحزين احنا عيال شوارع سلمان وهو يضحك بتسليك لان فيه نوم ريناد : شفيك مسطول سلمان: نعسان ريناد: ورا ماتتوكل وتنام؟ سلمان: تعالي العبي بشعري ريناد بضحكه : ليه قردة ؟ سلمان: ابي استكن ريناد: فاقد حنان سلمان بعباطه: لا مريم بتجين ولا كيف ؟ ريناد: توكل بس موفاضية لك بتابع ريمي سلمان وهو يتثاوب :متى بتكبرين ؟ ريناد: اذا تزوجت سلمان بضحكه :عز الله اللي بياخذك مقرود ريناد : هههههههههههه ماكذبت سلمان : تعالي حوسي شعري ابي انام ريناد : وش المقابل سلمان : اوديك تتعشين بمطعم ريناد: تراك مطفر سلمان :ماعليك بسرق من امي يلا تعالي ريناد : توكلني من فلوس حرام؟ سلمان بتملل :بتجين ولا كيف ؟ ريناد : يلا بغسل يدي واجيك _______________________ كان الكل متجمع حول الزين نور وهي جالسة جنب الزين ع السرير وممده رجل ومنزله رجل ع الارض وايدها على شعر الزين تحوس فيه :يمه منتس ياشينه خرشتيني يوم طحتي وتغير لونش كانج اضاءة حقت الحفلات زينب : انتي اول شيء استقري ع لهجة معينه ثم تكلمي عن الانوار نور وهي تحرك ايدها بعشوائية :مومهم ام الزين : كيفك الحين يايمه باقي شيء موجعك الزين بهدوء :لا طيبة الحمدلله زينب وهي تجلس وتفتح العصير والكيك الموجود بدرج المستشفى :حتى الدكتور قال مافيها شيء الوكاد تمثل علينا نور :اكل المريضه يامريضه زينب : بتاكد منه يمكن منتهي صلاحيته الزين بضحكه خفيفه :خليها تاكله بالعافية نور : ع اساس بتنتظرك هي لين تقولين هذا هي بدت تبلع فيه زينب :النية اتفحصه لكن دامك سمحتي لي يازين مابردك واحرجك دق الباب وقطع حديثهم ومجاكراتهم المعتادة الام : غطي راسك يايمه الوكاد انه خالد دخل خالد وبيده باقة ورد بيضا :الحمدلله ع سلامتك يالزين الزين ببتسامة :الله يسلمك اتعبت نفسك خالد :تعبك راحة والتفت لزينب اللي تاكل ولاهي حول احد وناظر نور وحرك عيونه وحواجبه بمعني شتسوي ذي وكان رد نور انها ترفع اكتافها بقلة حيلة لاحظت زينب الهدوء اللي صار فجئة والتفتت لهم وشافت الكل يناظرها زينب : بسم الله الرحمن الرحيم سكوتكم يخوف علامكم خالد وهو يحط باقة الورد ورا ظهره :سلامتك مابقى الا تاكلينا زينب وهي تشرب اخر رشفة من العصر : حاسديني ع النعمة تبوني اموت جوع صح ؟ خالد وهو يحط الورد بيد نور :انتبهي تاكله ذي تسويها الام :هههههههه اذكرو الله لا يصيبها شيء نور : مابيصيبها شيء بتلهفنا بعد لو عطيناها عين الام : الا ياوليدي خالد شنو قالك الدكتور ؟ خالد : مالقى شيء بالفحص العادي لكن ننتظر التحاليل تطلع ونشوف الزين : متى بطلع؟ خالد : اذا نزلت التحاليل زينب : انا جوعانه الزين : صدقوني مافيني الا العافية نور : يعني كنتي تمثلين ؟ خالد : بنشوف التحاليل ونتأكد الزين : ماراح يحصلون شيء زينب : انا جوعانه خالد : مومعناها انك دكتورة يعني تعرفين اذا فيك او لا لهالأشياء تحاليل وفحوصات الام : يايمه لا تعاندين وخلينا ننتظر الدكتور وش يقول نور : لو اني تافلتك ماكان صابك شيء زينب :انا جوعانه الزين بقرف:تكفين اسكتي لا تلوعين كبدي خالد : لو انك تافلتيها كان عرفنا سبب تعبها نور تناظره بنص عين :شقصدك اخي الكريم ؟ خالد بضحكه: ابد سلامتك زينب بصوت اعلى عن اللي قبل : انااا جووعاانه نور بعصبية تصفقها ببوكيه الورد ع راسها لين طاحت بعض الورود واوراقها:اسسكتتي زينب بفجعه تناظرها :ييممه شفيك خالد بفشله غطى وجهه: الله ياخذكم فضحتونا الزين وهي تناظر الورد وبحزن: وردي خالد وهو توه ينتبه للورد الطايح ع الارض : الله ياخذك مالقتيي تضربينها الا بالورد نور وهي تاخذ نفس عمييق :زين جت ع وردك ولا كان شلت الزين وصفقتها فيها الام وخالد :ههههههههههههههه الزين ناظرت نور بصدمه :وانا شدخلني نور : عشان تاكلك وتفكنا شرها زينب وهي ترمش اكثر من مره وتحاول تستوعب الوضع: شفيك خالد : انزلي للكفتيريا اللي تحت وافطري يازينب نور : لا بتفشلنا كانها جاية من مجاعه خالد : انزلي للكفتيريا اللي تحت وافطري يازينب نور : لا بتفشلنا كانها جاية من مجاعه طنشت زينب كلام نور ومدت يدها اليمنى لخالد وصافحها خالد بستعباط : هلا والله زينب :اهلين فيك ، عطني فلوس خالد يسوي نفسه ماسمع: ايوة يازين ماقلتي لي تحسين بأي تعب ؟ زينب : خالدد اناا جوعاانهه نور :تكفى عطها فلوس فكنا شرها لا يشتغل الراديو خالد : عندي شرط زينب : لقد قبلت خالد :تروحين انتي نور مافي روحه لوحدك نور : لن أقبل خالد :اجل مافي روحه انثبري مكانك زينب :حراام عليكم انا جوعااانه نور: توك ماكله كيك وعصير زينب :هذا حلى لكن انا ابي فطور ماتعشيت امس نور :مابروح زينب : انا جوعاانه تراكم مسؤولين عن جسدي يوم القيامة لأني اذا ماتغذيت بالشكل السليم بموتت الام: بسم الله عليك خلاص انا بروح معك يايمه ولا تزعلين نور وقفت : لا والله ماتقومين ياخالة انا بروح وامري لله خالد وهو يطلع الفلوس من جيبه : خذو ولا تطولون نور : من عينيا زينب : يلاا بسرعه جوعانه نور بطفش: زين لا تقروشينا ""وطلعوا"" الزين : خالد وش قالك الدكتور خالد وهو يجلس بالكرسي اللي كانت جالسة فيه زينب : كنتي تعرفين ؟ الزين وهي تلف وجها ولا ترد الأم: شنو قال ياخالد خالد : بنتك ياخالة ...... ________________________ كانت ممسكه بإيده وحاطتها تحت راسها ونايمة خذاها النوم بدون لا تحس وهي تنتظره يصحى بدا يحرك اصابعة ،فزت لما حست بشيء يتحرك وناظرته نوف :عزيز عزيز ببطئ : عطشان وقفت نوف بسرعه وراحت تنادي الدكتور بعد دقيقتين جاء الدكتور ومعه ممرضه وسوا له فحص سريع الدكتور :وش تحس فيه يااعزيز عزيز : عطشان الدكتور :أشر للممرضه تجيب له مويا وشربوه ع خفيف الدكتور :والحين غمض عيونه عزيز بمعنى بخير الدكتور : تحس بأي الام ؟ عزيز :احس بالم براسي وظهري الدكتور وهو يكتب بالملف ويرجع القلم لصدره : شيء طبيعي لان الطيحه كانت ع ظهرك والحمدلله مااكانت قوية ولا تسببت بجروح بالغه ومع ذلك بنخليك تحت المراقبة ٢٤ ساعة عبدالعزيز بهدوء : الحمدلله دخل بدر :السلام عليكم الدكتور ونوف وعزيز: وعليكم السلام بدر بوجهه ضايق : كيف صحته يادكتور الدكتور : الحمدلله صحته كويسة بس يحتاج راحه عبدالعيز وهو يلتفت لبدر : وش اللي صار بدر بتنهيده وهو يجلس ع الكنب:في احد حط قنبلة بالمطعم ومن فضل ربي اننا مادخلنا ولا كنا بنموت وربك لطف فيك ياعزيز عبدالعزيز : وتعبنا كله راح؟ بدر وهو يمسح ع وجه : ربك كريم عبدالعزيز: اهلي عرفوا؟ نوف : دقيت على امك وطمنتها وكانت بتجي بس علمتها انك تحت تأثير المنوم وبتتعب نفسها بالجلسه ووعدتها انك اذا صحيت بخليها تكلمك او اجيبهم عبدالعزيز وهو يرمش بعيونه ببطى بمعنى تمام والتفت لبدر : شصار ع التركيين؟ بدر : ماصار شيء اول ماشافوا الانفجار هجوا واليوم داقين علي يستفسرون وكان بيجون يسلمون عليك لكن مانبي الصحافة تعرف وانت تلزمك راحه هز عبدالعزيز راسه بتفهم وغمض عيونه بدر وهو يوقف ويناظر نوف : خلينا نطلع الحين ونخليه يرتاح نوف وهي تناظر عبدالعزيز ثم ابوها: تمام شوي واطلع طلع بدر ونوف مسكت يد عبدالعزيز وباستها :الحمدلله ع سلامتك عبدالعزيز ببتسامة وهو يشد ع يدها وبصوت شبهه هامس : الله يسلمك نوف: بطلع الحين عشان ترتاح وبجيك بعدين تمام عبدالعزيز وهو يشد ع يدها من جديد ثم يرخيها : تمام ________________________ كان جالس بالمكتب يراجع الاوراق ثم اندق الباب جهاد بصوت ضخم وجهوري:ادخل دخل الضابط ودق له تحية وابتسم جهاد ببتسامة: ياهلا ومسهلا ارحب يابوجهاد ناصر وهو يبادلة نفس الأبتسامو ويجلس : البقى يابعدي شعلومك جهاد وهو يريح ظهره : بخير ونعمة نحمد الله انت شخبارك ناصر وهو يمسح بيده ع لحيته : ابد والله شوفت عينك سمعت ان الأهل جوكم جهاد وهو يقيم ملامح ناصر ويناظر ملابسة العسكرية: اي الحمدلله وصلوا قبل امس ناصر هز راسه : الحمدلله جهاد: شاهي ولا قهوه ناصر : اللي يعجبك يالنسيب جهاد بضحكه وهو يرفع السماعة: لا تكفى الا هالملسونه وطلب اثنين شاهي ناصر : الا اختي عاد مارضى عليها جهاد : اختك بطول ساقي ولو اقيس لسانها جاء بطولي ناصر طلعت منه ضحكه عالية وهو يتذكر مراددها لجهاد : يالله من زمان عنها والله جهاد: تشوفهم قريب ان شاء الله لا نزلنا الديرة ناصر وهو يحط رجل ع رجل :الله يسهلها الا شخبار ابوعناد ؟ جهاد وهو ياخذ نفس ثم يزفره وجاء بيرد الا ويندق الباب جهاد بصوته الضخم الرجولي : ادخل يامعين دخل معين بالشاهي وهو مبتسم ناصر : ياهلا بالحامل والمحمول معين بنفس الابتسامة : الله يحيك ومد الشاهي لجهاد لكن جهاد اشر له بأن يعطي ناصر اول ومده لناصر ، ثم مد الثاني لجهاد ناصر: الله يعطيك العافية معين: الله يعافيك ..استأذنكم جهاد وهو يتفحصه بنظراته وهز راسه: اذنك معك ناصر يلتفت لجهاد بعد مامعين طلع وقفل الباب: شفيك بغيت تاكله بنظراتك جهاد وهو يرجع ظهره ع ورا ويمسك الشاهي : ابد ماهو بعاجبني هالرجال ناصر وهو يشرب الشاهي وينزله: من اي ناحية جهاد: مدري بس مومرتاح له ناصر : ماقلت لي وش علمه ابوعناد جهاد وهو ينزل كاسة الشاهي : ابد مازال يحاول وشايبنا رافض ناصر : سبب خالي ماهو مقنع جهاد بتنهيده: اي والله ناصر : والله الرجال ماينعاب لو اني مره ""يعني حرمه ""مارفضته جهاد بضحكه :ههههههههههههههههه لا يسمعك بتجيه عقده من الحريم ناصر بضحكه: والله اني صادق يارجل يحصل له نسيب زي عبدالله زود ع كذا ولد خالها جهاد وهو يتقدم من الطاولة: تدري وش غلط اهلنا ناصر بتركيز له: وش جهاد: انهم سمحوا لنا نتعمق ببعض اكثر ناصر بختصار له: قصدك يتعمق بريناد اكثر جهاد وهو يهز راسه: تقدر تقول ناصر: عبدالله وريناد تربوا سوا ياجهاد جهاد: اذكر مرت سنوات كان نزور امي زيارة فقط ناصر: لذلك تعودوا ع بعض ياخوي طبيعي هي مابتلقى لا اخ ولا اب مافي بوجها الا عبدالله ٢٤ ساعة جهاد:اي والله اذكر من انولدت ريناد وعمر عبدالله ٩ يمكن او١٠ سنوات وكان متعلق فيها جداً لدرجة مايسمح لأحد يقرب صوبها ناصر وهو يهز راسه بتأيد للكلام جهاد : واللي زاد الطين بلة انفصال امي وابوي وابتعدنا عنها وعاشت امي جنب بيت خالي ناصر بتفهم : والله مالومه لا صار باقي صامل جهاد: اي والله ناصر بستفسار: ووش بتسوون اذا خالي مازال رافض ؟ جهاد: والله ياخوي علمي علمك امس داق علي يبيني اقنع ابوي وانا كل مافتحت الموضوع معه قفل الخط بوجهي ولا يقولي ولد النجراني مازوجه بنتي ناصر : مشكلة والله ، ليه ماتزوجونها انتم؟ جهاد وهو يجمع حواجبه ببعض ويمسح ع عوارضه وبتنهيده: من غير علمه؟ ناصر: اجل وش السوات جهاد: ربك كريم ناصر: الله يكون بعونه جهاد هز راسه وكمل شرب الشاهي ________________________ ببيت جديد علينا ^_^. بصرااخ : هندوووه انزلي هند بملل تطل من سور الدرج : خيير وش تبين هنا: الخير بوجهك انزلي ساعديني امي تقول بيجونا اليوم ضيوف هند: مين بيجي ؟ هنا: مدري بس اتوقع جيراننا هند بتأفف :فاضيتلك انا هنا بعصبية: والله ان مانزلتي تساعديني لا اعلم امي هند: علميها يقالك بخاف ،"وطنشتها ومشت راجعه لغرفتها وقفلتها " هند وهي تمسك جوالها شافت مكالمة لم يرد عليها من "حلمي" ابتسمت وعاودت الأتصال هند بصوت ناعم مايل للدلع: الوو فارس وهو خاق :اطلق من يقولي الو هند بحياء : معليش كنت اكلم هنا العله مانتبهت للاتصال فارس : ماعليه المهم حبيت اقولك اهلي بيجون يتعرفون ع اهلك اليوم هند بشهقه وهي تحط ايدها ع صدرها وبنعومه : يممهه ليكون هما اللي قالت لي عنهم هنا بيجون فارس بضحكه ع شهقتها وبتقليد لصوتها وكلمتها: اي هما هند وهي تضرب خدها ع خفيف: يمه يمه فارس : علامك هند: اخاف ابوي يشك انهم جايين لخطبة ثم يعجل بموضوع ولد عمي فارس:ماعليك بس بيجون يتعرفون ماراح يفتحون اي موضوع لزواج هند بإرتياح حطت ايدها ع قلبها: اششوا خفت فارس : يلا عاد خلي امي تشوف زينك هند بحياء وهي تلعب بشعرها : مين بيجي من اهلك فارس : امممم مرت اخوي وعمتي واختي الصغيره بس هند : حور اللي حكيت لي عنها ؟ فارس : اي هي بس اسمها ريناد وحور الكبيره هند : اهااا وحور ليه مابتجي فارس : عندها اختبار بالتحفيظ بيحددون مستواها اذا كان كويس بتصير معلمة تحفيظ هند: ماشاء الله عليها فارس ببتسامة: الا ماشاء الله عليك انتي هند بحياء : فرووس خلاص فارس بضحكه: وزين اللي يستحون هند : بقفل ترا فارس بضحكه : ههههههههه لالا خلاص هند: اوكي بقوم اساعد ماما بالبيت واجهز نفسي فارس : تو الناس هند: باخذ وقتي الكافي مابي اتحوس لا جو فارس : زين انتبهي لنفسك ولا تشتغلين كثير خلي هنا تكرف بدالك هند:ههههههههههه لا انا الكبيره لازم اكرف فارس: وزين السنعات بس هند : يلا حبيبي بقفل اكلمك بعدين فارس ببتسامة: الله معك ____________ بالمستشفى وتحديداً بالكافتيريا زينب وهي تاكل : يمه يااكل المستشفى الله يكرم النعمة بس نور: الله يكرمه وانتي قاشته قش اجل لو انه زين وش بتسوين زينب وهي بفمها اكل : باخذ للبيت مع.. وغصت بالاكل وقامت تكح نور بفجعه تمد لها مويا: بسم الله عليك يافقمه اكلي زين ولا تتكلمي وانتي تاكلي زينب وهي تشرب مويا وعيونها شوي وتطلع وتدق كتف نور: يمه يمه شوفي هالمز ياحلاته نور وهي تلتفت لمكان ماتناظر اختها وتصغر عيونها : اي واحد نور وهي تاكل من الساندوتش اللي بيدها:الاسمراني ابو سكسوكه ياملحه وقبله وش زينه يااربيي نور تضربها ع كتفها :ابلعي ثم انطقي وبعدين اللي جنبه احلى منه زينب: لا وعع ابو سكسوكه ازين نور: لا والله ابو شنب احلى زينب وهي تشرب العصير بالمصاصه : وين ناظري شنبه كأنه حواجب خالة نشمية نور بضحكه ع التشبيهه: ياكلبه من زين ابوسكسوكه عاد كأن سكسوكته بزر لابس حفاظ زينب بتسليك : ه ه ه ماتعرفين تشبهين الا ياملحه وزينه نور بضحكه: لا والله يشبهه قرد جدي علي ناظريه زين حتى اسمراني زيه زينب: الله ياخذ تشبيهاتتس الميته ماتعرفين تذبين انتي نور: وخري بس ابو ذوقتس المفحم زينب: بالله ناظري ابو شنب لو اشيل شنبه واسويه علاقة لملابسي مابيضبط؟ نور: هههههههههههههه ولا ابو سكسوكه اشيل سكسوكته واخطط عليها بحصة الرياضيات مثلث قائم الزوايا زينب: اسكتي اسكتي بيقعدون ع الطاولة اللي قدامنا نور بهمس : كأنهم دكاتره ولا زينب بتسعباط: لا عرايس ثم سكتت شوي اي واضح دكاتره من ملابسهم وسكتت شوي ثم كملت زينب: شوفي المزايين بس موب ولدنا نور وهي تضرب كتفها:استحي ع وجهك اخوك ذا لا وبعد معطيتس فلوس تعبين كرشتس زينب وهي تحسس مكان الضربه والعصير بفمها : وانا صادقة نور: انا لو اني رجال ماعطيتس وجه انتي وكرشتس زينب وهي تحسس بطنها:ماعندي كرش ياكلبه نور: اي واضح زينب : وبعدين وش زيني ياملحي وقبلي نور: الا ياشينتس اص بس زينبب :كرشتي سر سعادتي وش عليتس بس نور: اعترفتي ان معتس كرش الحين؟ زينب:اي صغيرونه نور:هيا اسكتي زينب:يسموني مربربه نوعيتي مطلوبة للزواج وش دراتس انتي نور بضحكه عاليه خلت كل اللي بالكفتيريا يلتفتون لهم زينب بفشله: اسكتي خايفه اني افشلتس وانتي اللي فشلتيني نور وهي موب قادرة تسكت: نو نو نو هههههههههههه نوعيتس ههههه مطلوب هههههههه مطلوبة وش ؟ ههههههههه زينب بضحكه: قصري حستس ياحيوانه نور وعيونها بدت تدمع: الله ياخذتس للجنه قتلتيني ضحك زينب طنشتها وجلست تشرب العصير ___________________ بالطاولة اللي مقابلتهم مؤيد: الا ياوليد ماسمعت اخر خبر وليد وهو يلعب بجواله :لا وش مؤيد: يقولون الدكتورة الزين جات امس مغمى عليها وليد رفع راسه بتركيز: الزين؟ مؤيد يهز راسه: اي والله سألت الدكتور المشرف عليها يقول مافيها الا العافيه بس دوخه خفيفه وليد : دايم تتعب هالبنت وكل ماسال الممرضات يقولون مافيها شيء سليمة مؤيد: يمكن فقر دم او شيء وليد بعدم اهتمام : مدري عنها مؤيد :الا انت وش حكايتك معها وليد رفع حاجب وناظر مؤيد بمعنى وش مؤيد: اشوفك تعطيها اشغال فوق طاقتها وليد وهو يرجع ظهره ع الكرسي : ابد ماسويت شيء لكن هي عنيده ويبي لها تكسير راس مؤيد وهو ياخذ الطلب من العامل اللي جابه لهم : ماشفت ع هالبنت الا كل خير ولا لها بحركات المياعة والدلع وليد بتغيير للموضوع : والله يااني جوعان مؤيد وهو يناظر ع يمينه ويلتفت لوليد: شعندهم هذول يضحكون وليد وهو يلتفتت لمصدر الضحك ويناظر مؤيد :وانت كذا ملقوف دايم مؤيد بضحكه: اذا شفت احد يضحك مدري ليه احسه يضحك علي وليد وهو يفتح الساندوتش : لانك مريض يبي لك دكتور نفسي مؤييد:هههههههههههههه تقوله وليد ببتسامة: صدقني ____________________ قد لا أراك ، لكنني أشعر بك عند الزين... خالد: كنتي تعرفين؟ ام الزين بخوف: وش فيها بنيتي خالد: بنتك ياخالة لما كلمت دكتورها قال هالأعراض موب اول مره تجيها ويتم فحصها ولا يلقون اي شيء وقالي انه كلمها بهالموضوع الزين بمقاطعه : خالدد خالد بتطنيش وهو يكمل :وقالها انه شاك ان لها تؤام والاعراض اللي تجيها ناتجه عن ضرر هالتؤام وهي تحس فيه والعكس كذلك ام الزين وهي تحط يدها ع قلبها: وليه ماقلتي لي يازين الزين بانفعال : وش تبين اقولتس؟ اقولتس يايمه زود ع اكتشافي اني لقيطه بعد لي تؤام؟ زود ع هالهم ازيدتس هم يايمه؟ وش تبين اقولتس علميني . خالد: بس يازين من حقنا نعرف عشان نقدر نلقى حل الزين بنفس الأنفعال وهي تحرك يدها: وش من حل بتلقاه يااخالد وش من حل ؟ بتلقى لي اهلي اللي رموني ؟؟ بتعرف وش في تؤامي اللي ماعرف اذا هو بنت او ولد؟ بتعرف وش سبب انهم رموني؟ علمني وش والحل المناسب ؟ . ام الزين بصوت حزين :هدي يايمه هدي الزين وهي مازالت منفعله: ماحد حاس باللي احسه ولا تدرون وش فيني كل همكم اني اعلمكم واسكت بس لكن زين وش تحس فيه ووش فيها مايهمكم ابداً خالد بعصبية لكلامها : انتي واعية للي تقولينه؟ لو ماتهمينا ماخفنا عليتس وسهرنا طول الليل فوق راستس ولو ماتهمينا ماوقفت انا بوجه امي يوم علمتتس بالحقيقة ولا امك وقفت بوجه اختها علميني لو ماتهمينا بنتعب انفسنا نعرف وش فيتس؟ . الزين ببكى: انتوا تعرفون اني اتعب تعرفون اني احس بضييقه بصدري تعرفون اني داخلي يتألم وماهو راضي يرتاح تعرفون اني احس الشخص اللي تقولون عنه او عنها تؤامي يتألم ويحتاجني ؟ تعرفون ولا لا ؟ علموني انتوا حاسين بالكلام اللي انقال لي سهل ؟تحسبون ان لي اهل رموني لانهم مايبوني وفضلوا تؤامي علي شعور سهل ؟ ""غطت وجها بيدينها وبكت: انتوا حتى ماتعرفون شعور ان العايلة اللي تربيت فيها تطلع موعائلتي وان الأب اللي ياما تمنيت انه عايش يطلع موب ابوي والحضن اللي ياما بكيت فوقه تطلع موب ام.... ام الزين بمقاطعة وهي تبكي مع بكاها وتمسح ع ظهرها: لا تقولينها يازين انتي بنتي غصب عن اللي يرضى واللي مايرضى انا امتس يازين الزين وهي تهز راسها وتبكي .. خالد بهدوء وهو يناظرها ويحس قلبه ينعصر ع منظرها طلع من الغرفة وقفل الباب وحط راسه ع الباب وبهمس : ليتتس تعرفين يازين ان موب انتي وبس اللي تعيشين هالشعور وليتس تعرفين مين تسبب بهالمشكلة كلها _________________ كانت جالسة بوسط السرير وضامه رجولها لحضنها ومريحه راسها ع رجولها دق باب غرفتها رفعت راسها : ادخل دخلت الغرفة وهي مبتسمة ابتسامة حنونه لها جمانة: وش تسوي سدوم الحلوة هزت سديم راسها بالنفي ، بمعنى ولاشيء جمانة وهي تجلس ع طرف السرير والابتسامة مازالت ع وجها : توقعي وش جبت لك سديم ناظرتها بصمت جمانة وهي متعوده ع سكوت سديم اللي نادر ماتتكلم كثير وفتحت كفها وطلعت ورقة جمانة ببتسامة:كلمت ابوك وحاولت فيه يعطيني رقم امك عشان تكلمينها وبضحكه خفيفه : صحيح اكلت تهزيئ وسمعت تلاطيش كلام بس ماعليه نشبت له لين عطاني سديم على نفس الهدوء : وليه سويتي ذا كله جمانة: ماعليه لجل عين تكرم بلد عاد لا تنسين معروفي رديه لي بالجايات سكتت سديم ولا ردت جمانة حطت الورقة جنب سديم وباست راسها وطلعت كانت تعرف كيف تتعامل مع سديم وتعرف ان ردات فعلها البارده ماهي الا شيء ظاهري فقط وهالشيء اللي خلا سديم تتقبلها ككونها مرت أب وهي ان جمانة تعرف كيف تتعامل معها وعمرها ماعاملتها كأنها زوجة ابوها بالعكس كان تعاملها لسديم تعامل خاص جداً . طلعت جمانة وقفلت الباب اما سديم اول ماتقفل الباب ناظرت الورقة فتره ثم مسكتها وفتحتها صارت تناظر الرقم ولا شعورياً خذت الجوال وصارت تسجله ثم جت بتضغط اتصال بتردد ناظرت الساعة كانت ١٠ الا ثلث ترددت شوي انها تدق ثم ضغطت اتصال وحطته على اذنها رنه ....رنتين ... ثلاث رنات.. ثلاث رنات ونص وبالنص الثاني انفتح الخط سمعت صوت انثاوي واضح انه تقريباً بالأربعين الوو مين معي الوو ماكان الطرف الثاني يسمع الا صوت انفاس سديم عجزت تنزل الجوال وتقفل الخط ولا قدرت ترد كأن لسانها انربط مابين كلمة الو ومابين تنزل الجوال ولا تسمع كأن كل خلية فجسمها توقفت حتى عقلها ماصار يشتغل ويعطيها التعليمات بالأشياء اللي ممكن تسويها ام سديم: الوو وش هالمبزره اللي يدقون من صباح الله ولا يردون حست سديم ان امها بتقفل الخط لذلك تداركت الوضع وتكلمت بصوت تحمد الله انه قدر يوصل للطرف الثاني بوضوح سديم : الو ام سديم: هشوا مابغيتوا تهرجون ، نعم مين معي ؟ سديم وهي تبلع ريقها اللي صار ناشف من كثر ماتبلع فيه :ي ي سكتت شوي ثم تمالكت نفسها واجبرتها تنطق الكلمة اللي مرت عليها سنيين مانطقتها . سنين مرت ماقالت هالكلمة اللي ياما كانت تقولها بدون لا تحس بمعناها عمرها ماحست بحنية الأمومة اللي كل اللي حولها يتكلمون عنه امي ؟ . كلمة كثاارر يتكلمون عنها دايم كان معلماتها يرددون الجنة تحت اقدام الأمهات لدرجة كانت تفكر انها ماراح تدخل الجنة لأن مالها ام ... . ""امي انسانة عظييمه "" . كثير ماتسمع هالكلمة من زميلاتها بالمدرسة وعمرها ماحست بهالشعور كانت تشوف المشاعر الامومية اللي تسمع عنها تروح لغيرها ماكانت تصدق الناس يوم يمدحون امهاتهم لين ماشافت مرت ابوها جمانة وشافت تعاملها مع عيالها كانت تجمع كل الصفات اللي تسمع عنها اي هذي الأم اللي يتكلمون عنها . لكن انا وين امي ؟ . سؤال يتردد ببالها كثييير وين امي ؟ ليه امي موكذا بس ادركت بعد الكبر ان الأم اللي كانت تقول ليه موكذا كانت زيهم بالضبط لكن ماكانت هذيك المشاعر لها كانت هذيك المشاعر لغيرها عمرها ماحست فيها . ام سديم بطفش : ورا ماتنطقين مين معي ؟ سديم بتردد واخيراً انتصرت عليه قالت بهدوء وصوت يكاد يطلع من حنجرتها: امي . ام سديم بصمت دام خمس ثواني ...وتتبعه خمس ثواني ثانية ...ثم عشر ثواني ...مرت دقيقة ونطقت اخيراً ام سديم بصوت واضح فيه الصدمه :سديم سديم بصوت تحاول يكون واضح : يمه ام سديم بصوت عصبي : وش تبين يابنت النحس ؟ سكتت سديم بصدمه :... . ام سديم: عرفتي ان زوجي بيطلع قلتي خليني ادق مره ثانية اعبي راسها بالوساويس واتبلى عليه من جديد هاه وش تبين داقه ؟ ولا ابوتس قايل لتس دقي عليها اكسري فرحتها برجوع زوجها ، انطقي وراتس ساكته اسمعيني زيين ياابنت عزام وقولي لابوتس هالحتسي زوجي بيطلع قريب والله ثم والله لو يقرب صوبه ان مايكون له خير سامعتني ؟ ولا عاد اشوفتس داقتن علي وتتلبين ع زوجي افتكيت منتس كل هالسنوات وهالحين داقتن علي مايعجبتس انتي وابوتس اكون مبسوطة ولا مرت ابوتس تحرضه علي ؟ حسبي الله ونعم الوكيل فيكم كانكم تبون تزعزعون فرحتنا انطقي وراتس ساكته؟ ولا عشاني كشفت نيتس يابنت النحس هاه وراتس ماتسمعيني صوتس اللي تو الوو الوو ناظرت جوالها الا والاتصال مقفل ام سديم :ايا بنت التسلب تقفل بوجهي اللي ماتستحي عشاني كشفت حقيقتها :يمه شفيك تهاوشين صوتك واصل لاخر الشارع ام سديم : بنت النحس داقتن علي الوكاد سمعت ان ابوتس بيطلع قالت انكد عليهم واعبي راسها بالحتسي : مين؟ ام سديم : مين انتي الثانية وهو به غيرها بنت عزام النحس بصدمه: سديم؟ ام سديم وهي تجلس ع الكنبة :اي سديم حسبي الله عليها وعلى ابوها اللي ماشفنا من وراه الا المصايب وهي تجلس قدام امها: وش جاك منهم بالله ام سديم بعصبية: قولي وش ماجاتس منهم هالحين ابوتس بالسجن من تحت راسهم ملفقين عليه بلوى كبر راسه ياجود وتقولين لي وش جاتس منهم؟ جود وهي تريح ظهرها ع الكنبة وتتربع : وانا صادقة . ،انتي الحب عامي عيونك بابوي لذلك تشوفين كل شيء فيه محاسن ام سديم بحده: وانتي مايملى عينتس الا التراب واقفتن لي ضد ابوتس مع هالنحوس سديم وابوها؟ وش ابوتس قصر عليتس به يومنتس بكل طاري توقفين ضده وقفت جود ومشت طالعه من الصاله : بيجي يوم وتشوفين كل شيء بصورة اوضح يايمه وتعرفين الحق مع مين ، وطلعت لغرفتها ام سديم وهي تضرب فخوذها: حسبي الله ونعم الوكيل بس غسلوا مخ هالبنيه ع ابوها حسبي الله فيك ياعزام حسبي الله _________________ عند سديم نزلت الجوال من اذنها وتناظر الشاشه بصدمه مومستوعبة الكلام اللي انقال ولا هي حاسة بدموعها الحارة اللي تنزل من عيونها ناظرت شاشة جوالها هالكلام اللي انقال ثقيل عليها واللي اثقل من الكلام انه من امها ... امها اللي ياما تمنت انها تكون كالأمهات الباقي لكن عمرها ماشافت هالشيء . صحت من صدمتها ع صوت اتصال شافت المتصلة وقفلت الخط بوجها . ثم وصلتها رسالة من نفس الرقم اللي ماكلفت نفسها تسجل له اسم ""مدري وش قالت لك امي بالضبط لكن سمعت نهاية الكلام لا تتضايقين من كلامها ياسديم والله ماتهون علي دموعك اللي اعرف انها تنزل الحين وصدقينيي بيجي يوم وتكتشف انها غلطانه مابيك تحزنين ياحلوة " سديم بضحكه ع محتوى الرسالة وتمسح دموعها.. : الغريب يواسيني وامي تظلمني رمت جوالها ع السرير ونزلت منه ووقفت وتناظر وجها بالمرايا وتمسح دموعها باصابعها بقوة وكأنها تبي تنزع بشرتها اللي مرت عليها الدموع وصارت تكلم نفسها... اشش لا تبكين تمام لا تبكين انتي قوية مريتي باقوى من هالموقف لا تبكين وخذي شهيق وزفير وصارت تاخذ شهيق وزفير وهي تناظر نفسها بالمرايا وراحت الحمام ناوية تاخذ لها دش ثم تنزل تحت . وهم متربعين فوق طاولة المطبخ وياكلون سلطه سلمان: مدري ليه احس اني تيس ريناد بضحكه: هذا مايسمى بالهرمونات الحيوانية بين فتره وفتره تحس بشعور فصيلتك الحقيقية سلمان وهو يعصر ليمون فوق السلطه : من كثر ماانا اجلس معك صرت احس فيك بين فترهه وفتره ريناد : هه هه ههااي شوك كوميك سلمان بفهاوه: وش تقولين ريناد وهي بفمها اكل : يعني جداً ظريف بس بالتركي سلمان: مدري ليه احس الجملة غلط ريناد وهي تبلع اللقمه وتحرك الملعقه بالصحن: ابد صحيحه سلمان وهو يتفاوه: والله نعسان ريناد :نصاب خليتني اهرش راسك ساعة كاملة اخرتها مانمت سلمان: قلت لك العبي بشعري ماقلت احفري لي فروة راسي شوي وتحطيت بذورة وتسقينها من حفرك ريناد وهي تاكل : والله هذا الموجود ماعجبك تزوج وخلها تحك راسك بحنيه سلمان : نشوفك كيف تلعبين براس عبدالله بكرا ريناد تسووي انها استحت: سلمااان سلمان يناظرها بنص عين: يقالك استحيتي ريناد وهي تغطي عيونها بساعد ايدها والشوكه بيدها: بس خلاص سلمان يصفقها ع راسها: بلا مياعه بالله ، لا اصفقك بالصحن ريناد: يووه منك اذا استحيت قلت منتي وجه حياء وان ماستحيت قلت احشميني شسوي لك؟ سلمان : اكلي ساكت دخلت حور المطبخ وشهقت يوم شافتهم حور: حسبي الله عليكم مسويه السلطه للغدا بلعتوها ريناد وسلمان بنفس الوقت اشرو ع بعض وفمهم مليان سلطه : هو /هي حور بعصبية : وش هو وهي انت وياها رييناد وهي تحاول تبلع : هو قالي تعالي ناكل سلطه فيني مشاعر حيوانية سلمان وهو مغطي فمه: كذابة هي قالت لي تعال ناكل سلطه كاننا اتكيت حور: والله انكم حيوانات صدق هالحين وين الأتكيت باكل الزلطه؟ ريناد بعباطه:زلطه سلمان بضحكه: زلطه ريناد بطقطقه: اديلي واحد زلطه سلمان :واحد زلطوطي يامحمد بالخضروات ريناد : ههههههههههههههههههههه زليييطه سلمان وهو ينزل : مزاليط ريناد وهي تنزل معه :وتمشي من جنب حور اللي تناظر استعباطاتهم :زلاليط سلمان قبل يطلع خذا بالملعقه لقمه وطلع :في اكله اسمها زلاليط ريناد : شرايك بأتكيت الهروب سلمان وهو يضحك وباقي بفمه الاكل ومقفل فمه ويحرك يده بمعنى كويس :اممم اممم ريناد : ابلع ابلع سلمان: مسكينه متنحه ماتدري وش جانا ريناد : كم الساعة سلمان: اثنين ونص ريناد : حلو شرايك نمقلب فواز؟ سلمان تحمس من طاري المقالب : قدام بس شلون ريناد وهي تفك شعرها : معي بخاخ ملون للشعر بستعمله ولا لقيت مناسبة سلمان : زين بس مافهمت ريناد وهي تسحبه لغرفتها : الحين تفهم تعال فكت شعرها اللي ياصل لنص فخذها كان طوييل وكثيييف بلونه الأسود ،ومموج كان شكله جمييل جداً واخذت البخاخ الملون ومدت لسلمان واخذت الثاني هي سلمان وهو يناظر شعرها : كأنه طال عن العام ريناد وهي تقسم شعرها اثنين وتحرك نص لقدام : ااي وودي اقصه بس الوزير الخاص رافض سلمان وهو يمسك نص ويرش ع اطراف شعرها :مين عبدالله ريناد وهي ترش ع اطرافه وتهز راسها سلمان : خلي لي شوي برش بعد ع راسي ريناد :زين اللي بيدك رشه لي ع اطراف شعري وانا برش ع شعرك سلمان:لا اللي معي لونه ابيض واللي معك موف خلينا نتبادل ابي الابيض ريناد: زين خلينا نشكل شعورنا فيه وصارو يلونون شعور بعض ريناد وهي تناظره خذت مثبت للشعر وصار تقسم شعر سلمان لانه كان كثييف ومن قدام طويل سلمان بضحك ع شكله وابعد ريناد عنه :وخري خليتيني كاني بنقالي ضاربه كهرب ريناد بضحكه ع شكله:شنبك صار شكله تحفه بالالوان سلمان:ههههههههههه تعالي وشلون بتسوين شعرك ريناد وهي تنزل شعرها المموج كله ع وجها وكان ملون :كذا وبلبس شرشف الصلاة لونه ابيض ونخش عليه سلمان وهو يناظر خشته بالمرايا : الألوان ذي تروح بس ريناد:اي ماعليك وصارو يمشون بالهداوة لين دخلوا غرفة فواز 
 
|
|
03-04-2023
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
بيض الله وجهك
طرح واختيار روعه للموضوع لاحرمك الله رضاه لك كل تقديري واحترامي مجنون قصآيد
|
|
 
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
