لطالما كان الإنسان يصارع عقله وقلبه . الجزء السابع

الجـــزء السابــع


"إنك لا تستطيع الرقص مع الشياطين وتسأل في أثناء ذلك عن سبب بقائك في الجحيم."




صوت مكينة إعداد القهوة هو الصوت الوحيد الذي يصدر في المكان، عيناها المُرهقتان من إضطراب نومها بالأمس مُرتكزة على قطرات القهوة التي تسقط في الكُوبِ فيعانقها،ما حدثَ بالأمس كابوساً، وبعض الكوابيس يجب إيجاد تفسيرها
تنظر ناحيته ، لم يستيقظ حتى الآن ، لم ييقظه صوت آلة إعداد القهوة ولا تضارب الكوؤس مع بعضها
سحبت كُرسياً لتجلس عليه وتضع كوب قهوتها على طاولة الطعام أمامها ، تنهدت بعمق من الضيق الذي يقطن بداخلها
إستيقظ بإنزعاج ، إتسعت عيناها بإستغراب ، لم يستيقظ من إزعاج تحضيري للقهوة ، لكن تنهيدتي أيقظته؟!
إعتدل في جلسته وتنهد هو الآخر أيضاً، نظر نحوها
جالسة في المطبخ المفتوح على الصالة ، بين يديها كوب من القهوة وتنظر إليه وفي عينيها ألف سؤال
لين بهدوء: إذا خلصت صلاة وكل شيء ممكن تجلس أبغى أكلمك شوي
قيس: صليت قبل لا أنام ، بقوم أغسل وجهي وأجيك
لين بداخلها : "معناها هو الآخر لم ينم جيداً، يبدو إن هناك مصيبة تنتظرك يالين "
بعدما إنتهى قيس ، توجه نحو الطاولة ساحباٌ الكرسي وجالساً أمامها كالمعتقل
نظر إليها ببرود: أنا أدري إن عندك ألف سؤال وسؤال ، بس إذا ممكن أنا راح أقولك كل شيء فكرت فيه قبل ما أنام ، أولاً انا آسف ، ثانياُ أنا بعترف لك ليش تصرفاتي غريبة الأمس ، أنا أحب بنت ... من زمان ، ولما شفتها قبل العرس بمدة قصيرة ، تجدد الشعور
لين تنظر إليه متسعة الحدقتين ، ضاغطة بيداها على الكوب ، غير واعية لما يقول ، أو واعية تماماً لذلك الخوف من ماهي مُقبلة عليه يسري في عروقها
لحظة من الصمت
قطعها صوت لين الهادئ : سؤال واحد بس
قيس ينظر إليها متسائلاً
لين بنفس النبرة: ليش تزوجتني؟
قيس:عشان ماكان باقي على زواجنا شيء، وين بتودين وجهك إذا تركك العريس قبل عرسك بكم يوم
لين بغضب وقفت بسرعة غير مهتمة بكرسيها الذي سقط على الأرض: لا والله؟! ومافكرت وين بودي وجهي إذا تطلقت؟ ولا إنت تفكر أبوي راح يرحب فيني وبيهلل يوم يشوفني راجعة لبيته مطلقة؟
قيس : لين ممكن تهدئي شوي وتجلسين ؟ أنا ما كملت كلامي، إن شاء الله بعد ما نخلص نقاشنا نكون إثنينا راضين
لين بغضب :قيس إتكلم بجدية لو سمحت ،أي رضا الي بنحصله بعد إعترافك العجيب هذا ، تخيل نفسك مكاني ،لو جيت لك صباح مابعد الزواج وقلت لك والله آسفة انا أحب غيرك وش بيكون تصرفك ؟ بيكون مالك حق إن تعصب ؟
قيس أشاح بنظرهه بعيداً عنها ،صامتاً للحظات: صح ، أنا أعرف إن أي شيء راح أقوله اللحين وأي أعذار بتكون واهية (نظر إليها) لكن أي شيء قلته وراح أقوله اللحين أنا صريح فيه تماماً .. أنا أدري إن كلمة آسف ماتصلح ولا تجمل أي شيء أقوله لكن يتوجب علي أقولها ، أنا حبيت البنت من سنين طويلة وبعدها (أطلق زفير مسموع) إعتبرناه حُب مراهقة ومشى كل منا في طريقه، بعد العرس بكم يوم تصادفنا وإكتشفنا إن الشعور بعده في القلب ، وصار كل الموضوع بين إيدي اللحين ، أنا أخترتك مع إني ما عرف كل شيء عنك ولا اعرف شيء عن شخصيتك لأن أبوكِ مارضى نتعرف قبل الزواج أو أي شيء من هذا القبيل ، لكني أنا اخترتك عنها لأسباب واقعية .. في النهاية أحنا مو في عالم وردي .. إذا تركتك قبل زواجنا بشوي ،إيش تتوقعين الناس بيفكرون ؟ قطعاً شيء سيء عنا أو عني أو عنك ، بالإضافة إنك بتتحطمين ، أبيكِ تفهميني أنا مو قاعد أبين نفسي إنسان جيد وهالكلام ، أنا أصلاً مادري إذا قراري صح أو لا ، أنا في النهاية بشر والبشر مايعرف القدر ، ولا أعرف إذا كان إختياري فعلاً مناسب لكلانا ، أو أناني وأنا كنت أظن إن القرار الثاني أناني ، لكن إسمحي لي إن أقول لك كل شيء بصراحة ، وصح إني إخترت البداية والقرار لوحدي .......لكن نقدر نقرر النهاية سوا
واقفة على حالها تنصت إليه، تشعر بقلبها تتمزق احشائه ، مهدئتاً نفسها ، محاولة التحكم بأعصابها ، لا تريد أن تسقط دموعها ، لا تريده أن يعتقدها ضعيفة ..
إنحنت لتأخذ الكرسي الذي أسقطته سابقاً على الأرض، جلست عليه وهي تشبك يديها ببعض حتى توقف إرتجافها وتنظر إلى قيس بوجه المقامر كما يقولون ، بتعابير جامدة : قول إلي في بالك
قيس نظر إليها وأومأ رأسه بالإيجاب ، عقد يديه هو الآخر واضعاً إياهما على الطاولة ، بهدوء:تبين تطلقين أو لا؟
لين صمتت للحظات : مثل ما أنت قلت كل شيء بصراحة ، أنا راح أقولك الصراحة ، أنا مو ميتة عليك ولكن أبوي مو من النوع إلي بيكون عادي عنده إن تكون بنته مطلقة ، وفي نفس الوقت .. أنا أستاهل شخص أحسن منك.
قيس : لذلك ...؟
لين : لذلك ما أدري
قيس: لذلك أنا أقترح.. مدة أربع شهور ، بعدها إنتي تقررين تبين تطلقين أو لا، وأنا راح أتزوجها
لين ضحكت بإستهزاء : قيس أنا مستحيل أتحمل إني أكون المزهرية تبعك ، إلي موجودة عندك بس عشانها خايفة من ردة فعل أبوها على طلاقها ، أنا في النهاية صغيرة وأبي أعيش حياتي الي أستحقها
قيس صمت قليلاً ثم أردف : عندي خطة
لين تنظر إليه بتساؤل
قيس: أنا عصبي ، اتنرفز بسرعة .. أوصل لمرحلة إني أضربك
لين تقطب حاجبيها بصدمة
قيس: هذا عند أهلك ، عند اهلي.. مابيننا توافق فِكري ، دايماً نختلف دايماً مانفهم على بعضنا وقليل نتنازل لبعض ، علاقتنا مشوشة ومضطربة .. كذا لا نزعل أبوكِ ولا نزعل أمي
لين رفعت حاجبيها وتومأ بالإيجاب ، لقد فهمت مايقصده ، سوف تكون لديهما أدوار تمثيلية مختلفة في كلا الجهتين ، بشخصيتيهما عند أهلها .. سيكون هناك عذراً لها لطلاقها منه ، بشخصيتهما عند اهله .. سيكون هناك فقط سوء تفاهم بينهما لذلك لن يكون هناك شخص جيد أو سيء ، حتى لا تتشوه صورتها عند أي جهة بعد الطلاق ، اما هو ففي النهاية هُناك من يريدها وتريده فلن يتأثر بالطلاق بأي دور سوف يمثله
لين : أوكِ ، لكن لازم تكون فيه بنود
قيس: حقِك
لين : أولاَ ، ماراح تلمسني أبداً ،أنا بنام في الغرفة وإنت في الصالة تماماً مثل ماسويت بالأمس
قيس: موافق ، وأنا عندي بند ، مع أي شخصيات خارج إيطار أهالينا راح نكون ازواج طبيعين مع بعضهم
لين : أوافق ، ماراح تتحكم في طلعاتي ولا لبسي ولا أي شيء كزوج وأعمال المنزل أحنا الإثنين مسؤولين عنها
قيس:موافق
لين مكملة:ليلى أختي خطي الأحمر متى ماجت متى مارحت لها ماتدخل
قيس: أكيد أصلا هذا يندرج تحت آخر بند قلتيه، وصح أنا أكيد راح أنفق عليكٍ خاصة مثل ما انا أعرف إنك طالبة ، خلصت بنودك؟
لين أومأت بالإيجاب
قيس : أوك بند واحد أنا عند اهلك سيء عندنا بيننا سوء فهم ، بند 2 ماراح يكون بينا شيء ، بند 3 في الخارج أحنا أزواج طبيعين ، بند 4 ماراح نتحكم ببعض وبنتشارك أمور البيت مع بعض والبند الأخير أختك
ديل ؟
لين تنهدت بعمق : أها
قيس مد يديه مصافحاً إياها ، فمدت الأخرى يديها مُعلنين إتفاقهما ، شُكلت العلاقة وبُنيت على بنود ، بمدة مقدارها أربع شهور ، أربع أشهر بتمثيل عِدة شخصيات مُختلفة عند ظروف مختلفة
###
ريان: وهاذي كل السالفة ، وهو اللحين يبي يرجع لنا القيمة بإنه يشتغل سايق عندنا
أم فهد : آه ، بصراحة مادري وش تبغاني أقولك ياريان ، في النهاية هو رجال ذو مبادئ وماراح يوافق برفضك عرضه ، وفي نفس الوقت أنا فاهمة عليك ليه تبي ترفض
ريان : أنا قلت أقولك لأنك في النهاية ربة البيت و .. أنا محتار
أم فهد: ريان حبيبي أنا فاهمة مخاوفك بس بصراحة في نفس الوقت هو صديقك وأنت واثق فيه
ريان : إيه انا واثق فيه .. (سكت قليلاً ثم أكمل) لكن في حالته الطبيعية ، زائد انا ماثق ببنتك الغبية كيف بتنرفزه وبتطفش عيشته ، وهو في النهاية عنده إضطراب غضب إذا جته النوبة ماراح ينتبه لشيء
أم فهد بصرامة:ريان ... ولدي حبيبي ، مابيك كذا .. صحيح إنت خايف من صديقك بس في النهاية هو صديق عمرك ، ما أبيك تصير كذا معاه .. إنت مفروض توقف معاه ، الله يعلم الحياة العصيبة والظروف الا مر فيه الرجال، ترا الصديق يبين معدنه اللحين ، الواحد وش يبي من الدنيا غير شخص واحد على الأقل يتقبله بكل حالاته ..ويعطيه فرص للتحسن والتغيير، فاهم علي يا عين أمك؟
ريان وهو ينظر للأسفل : فاهم عليك ، بس مثـ....
قاطعهما دخولها : ما شاء الله شفيكم تتهامسون ومن دخلت عم الصمت ، شعندهم الإف بي آي متكتمين على حديثهم
ريان تأفف: أستغفرالله كِملت ، والله مانبي الجاسوس يعرف خططنا
غادة :أفااا،شدعوة ألسنا منكم وفيكم... على فكرة عندي مشوار اللحين تقدرتوديني
ريان :بلطي بحر
ام فهد : غـادة إن شاء الله راح يكون عندنا سائق خاص
غادة إبتسمت : أوه صح ماما.. ريان عطني رقم جراح عشان يوصلني مشواري
ريان بغضب : يعني كنتي تتنصتين؟
غادة ضحكت بمكر: إيه شفيك معصب ، تخاف أقول لجراح إنك خايف منه
ريان يسحبها من عبائتها : غــــادة إنتبهي للي تقولينه
ام فهد : ريان إترك أختك ، وإنتِ إحترمي الرجال تراه جاي يأدي دينه وبيتوكل ياويلك إذا قليتي أدبك عليه
غادة وهي تبعد يدي ريان عنها :لا خليه خليه ، أخذ العدوى من صديقه المريض
ريان بغضب صرخ في وجهها : غادة والله العظيم لو إنت مو بنت كسرت عظامك
أم فهد : ريـــان
ريان : يمه إسمعي بنتك شتقول ترا مصختها ، ليش لازم نسكت لها ونتحمل قلة أدبها (أشار بإصبعه السبابة نحو جبين غادة) ترا أنا مو ساكت لها إلا عشانها بنت وعشان خوفك على مشاعرها ، بس ترا آنسة غادة كلنا مرينا بظروفك والي توفى أبونا كلنا يعني مو لازم نتحملك ونتحمل نفسيتك
أم فهد : ريااااان مو قلت لك لا تفتح هالموضووووووع ألف مرة
غادة أبعدت إصبعه بغضب :مو محتاجة شفقتك وتعاملك اللطيف معي ، الله وتعاملك الي ذالنا عليه تراكم من جيت كل واحد يتكلم من طرف خشمه وقالب نفسيته علي لا تستشرف علي اللحين
أم فهد قامت من على الأريكة لتفكون بينهما : ترا طفشت منكم ، التوائم كذا يتعاملون مع بعض ؟
ريان : هاذي قلـ...
أم فهد بنظرة غضب وإسكات : ريان كلمة زيادة والله أغضب عليك
أدارت بوجهها لغادة : وإنتِ إحترمي أخوانك عشان يحترمونك ولا إنتِ بعد تستشرفين عليهم تراكِ إنت قطعتيهم ولازم تتحمليهم اللحين ، و لا يجيني خبر إنك أذيتي جراح وقللتي من إحترامه ، واطلعي مشوارك اللحين وفكينا من شرك شوي و وقت الغذاء تكونين في البيت قيس ولين راح يتغذون معنا اليوم التأخير ممنوع
غادة : أ...
قاطعتها أم فهد : ولا كلمة زيادة يلا مع السلامة
أنزلت نظارتها الشمسية لتكون على عيناها قابضة يديها على حقيبتها وتمشي بغضب نحو الباب
أم فهد تجلس على الأريكة : الناس لا كبروا يرتاحون من هواش أولادهم وأنتم العكس، كل ماتكبرون تتعبوني أكثر وأكثر
###
تتصل إليه وهي غاضبة ، أخذت رقمه من تلك المرة التي أقلها عبر تطبيق كريم ،ليرد عند إتصالها الرابع
غادة بغضب: هيي كومااار سلامات أتصل لك ثلاث مرات ماترد عليي ، أبي أروح مشوار اللحين ضروري
جراح ببرود: أولاً إسمي جراح لكن ماعليكِ عتب كل شخص يتكلم بمستوى عقليته ، ثانياً ريان مارد علي لا بإيجاب ولا برفض عن وظيفتي
غادة إستفزها برود ورد جراح:ولما أقولك تعال ودني مشوار وش تفهم من كلامي ؟ لهدرجة عقليتك صغيرة مثل الـ...
قطع الإتصال مما جعلها تغضب أكثر، أضاء هاتفها النقال برسالة :(اللحين جايك، لا تكثرين حكي، إكتفي بإنك ترسلين لي مسج ،مايحتاج إتصال وأضطر أسمع صوتك)
غادة بغضب: ويييييييييييييييييييع مستفز وييييع وييييع ، مايحتاج إتصال عشان نننن وويييعع غبي يحصل لك تسمع صوتي ياحشرة ، بس أوك هين تستاهل كل إستفزاز جايك
###
وصل بعد عدة دقائق، منزله لا يبعد عن منزلها شيئاً
إقتربت تفتح باب السيارة بغضب، لا يُفتح ، بداخلها: إف صح هذا بابه خربان مثل عقليته ، طرقت نافذته بقوة
نظر إليها ببرود نظرة إستفزتها كُلياً
أشارت إليه بأن يفتح النافذة
أشار إليها بالباب الثاني
غادة ضربت زجاجته بطريقة أقوى وهي تشير له بفتح النافذة
أنزل جراح نافذته ببرود قاتل وببطأ شديد
غادة ونافذة جراح لم تفتح كٌلياً: إفففف جرااااح خلصني إفتح النافذة كلها شهالحركات ، قوم إفتح بابك المعفن هذا
جراح ببرود بعد أن أكمل فتح نافذته : أنا أشرت لك إن تروحين الباب الثاني ، بس مسكينة مخك تعبان ، فاهم فاهم
غادة : جراح لا تستفزني لا تخليني أطلع كل عصبيتي عليك
جراح برود : أوبس.....خفت
غادة بغضب وصٌراخ: قوووم أفتح بابك الزفت هذا وقول لأمي تدبر لك سيارة غير عن هالخردة الي عندك هاذي ، مستواك في التراب مادياُ وأخلاقياً مو مضطرة أركب معاك في سيارتك الويع والخايسة والخرددددة هاذي عشانك تبي تدفع دينك بإنك تكون خدام عندنا وأتحمل غبائك ومستواك انا
فتح بابه بسرعة فضربها ببابه هو يقترب لها وهو ثائر من الغضب، وهي تنظر إليه بعيون مضطربة من الخوف
جراح أمسها بكتفها : مستوايي وفقري الي مو عاجبك ياغادة يابنت الأصول أحسن وأرقى من فقرك الأخلاقي(وشد على الكلمة ) أوكيه ؟ أنا هنا إذا جيت أسد دين ماطلبته أصلا منك ولا طلبت إنك تدفعي لذاك الحمار ولا ريال وبالنسبة لي أدخل السجن أشرف من مقابل وجهك هنا فهذا فقط عشاني ما أرضى أكون مديون لوحدة مثلك وبقذارة شخصيتك
فتح بابها ورماها بداخل السيارة ، وقبل أن يغلق بابها : إنتبهي لأسلوبك معي لا أوريك الويع مضبوط
أقفل الباب وأرتجل سيارته
غادة وهي تمسك كتفها بألم ، صرخت بغضب: إنت يامتوحش ما أسمح لك تضرني والله بقول لأمي وبتشوف شغلك ماعندك أي ذرة رجولة تفرض عضلاتك على بنت
جراح بإستنكار وهو يقود: سكتي سكتي بس كرمينا بسكوتك ومابي أسمع صوتك ، روحي إشتكي لمامتك وراح أقول لها وش قلتي لي بالضبط ، بالعكس ممكن تربيكِ وتأدبك
غادة : إنت ح ق ي ر ، لو إني خليتك تتعفن في السجن أحسن ، مفروض أخليك في السجون والأماكن الزبالة الي تناسب الوحوش مثلك ، بس أنا فكرت في أمك المسكينة شتسوي بدونك
تجاهلها لا يريد أن يغضب مجدداً
اكملت لتثير غضبه : بس والله المفروض إني أخليك تدخل السجن والفلوس أعطيها أمك تدبر نفسها فيهم الوحوش أمثالك مفروض يكونون في السجن وأصلاً مفروض اخاف على أمك منك ، ماتدري ذاك الشبل من ذاك الأسد
جراح أوقف سيارته بسرعة مما سبب إرتطامها بالكرسي أمامها وصرخ بغضب وهو يضرب دريكسون السيارة : غـــــــــــــــــــــــــــــــــــادة!!!!
خرج من السيارة وهو ثائر من الغضب ، وجهه أحمر عروقه برزت وعيناه تخرجان شراراً
تراه يمشي غاضباً ويركل القمامة التي أمامه لتسقط أرضاً من قوة ركلته ، يتقدم للسيارته لايريد إخراج غادة ولكمها ، لكم زجاج نافذته بغضب حتى تهمشت وتحولت إلى قطع صغيرة
شهقت غادة بخوف " هذا تحول ، بسم الله الرحمن الرحيم "
تنظر إليه خائفة من كل خطوة يفعلها ، تراه ينظر نحو يداه ، إنها مملوءة بدمائه
تحاول فتح الباب الآخر ، لكنه لا يٌفتح بقوتها لانه معطل
ذهب إلى الأمام وفتحت الباب لتخرج إليه :يدك كلها دم!!
جراح ثائراً من الغضب ، ماسكاً يديه التي تٌقطر دماً ، راصاُ على أسنانه لكي لا يظهر غضبه عليها : إنقلعي بيتكم مامشينا عنه شيء
غادة : شفيك إنت ماتشوف نفسك
جراح : غادة لا تنرفزيني اكثر إنقلعي عن وجهي خلاص .. آخخخ
قاطع كلامه آلمه من يداه
غادة تبعد يداه السليمة عن يداه المجروحة ليبعد يداها عنه : جراح مو وقت حركاتك اللحين ترا يدك...
صمتت وهي تنظر نحو يداه ، المظهر الآن مكتمل أمامها ، عقلها يصور لها ذكرياتها سريعاً ، تشعر بتقلب في معدتها ، تقلب عينيها مشمئزة .. تبتعد عن جراح قليلاً
جراح بخوف:غادة؟!
تسقط على ركبتها لتتقيأ كل مابجوفها
جراح ينظر إليها خائفاً قلقاً
سمع شهقات بكائها وهي تتقيأ بتقطع
جلس على ركبتيه خلفها هو الآخر ماسكاً بيداه السليمة كتفها محاولاً تهدئتها : معليش ، معليش .. لا تخافي غادة
تتابع تقيأ جوفها إن إستطعنا القول ، لم تتناول شيئاً منذ إستيقاظها
جراح يمسح على كتفها يهدئها : خلاص اللحين بتخلصين ، مو مشكلة مو مشكلة الحين بتوقفين تقيأ ، هدي .. هدي
توقفت عن التقيأ ، إستمرت بالبكاء وهي مغمضة عينيها
جراح وقف مُسرعاً يفتح باب سيارته غير آبه بالزجاج الذي إنتثر على الأرض بسبب لكمه لزجاجته ، يأخذ مناديلاً وينفضها ليتأكد إنها لم تتأثر بالزجاج
يذهب متجهاً لغادة ، ماسحاً فمها وهي تحاول الإبتعاد
وضع ذراعيها تحت إبطيها ليستطيع حملها مع يده المجروحة
وهو يمضي نحو منزلها الذي لم يتحرك عنه شيئاً يُذكر ، توقف عند عتبة منزلها ليجلسها عليها ، جلس على ركبتيه امامها وهو يخفي يداه المجروحة خلف ظهره حتى لا تراها ، مع إن ثوبه وعبائتها إتسخا بدمه
مهدئاً إياها وهو يحاول أن يلتقط أنفاسه : خلص كل شيء لا تخافين ، هششش لا تخافين إنتِ اللحين في بيتكم أمك داخل تنتظرك ، أنا هنا لا تخافين
ماسحاً دموعها : فهد قيس ريان مرام يعقوب أمك أنا كلنا هنا ، مافي شيء تخافين منه اللحين
غادة تبلع ريقها بعد أن هدأت قليلاً ، بصوت مبحوح : جيب يدك أضمدها لك
جراح ضاحكاً بخفة لتلطيف الجو :اللحين تسوين دكتورة علي ، إنت ماتقدرين تشوفينه ، خلاص أنا بهتم فيها إنتِ إدخلي داخل
غادة : بلا غباء تخلي يدك كذا تخر دم
جراح ماسكاً إياها بيده السليمة ليجعلها تقف وهو مازال واضعاً يده المجروحة خلف ظهره حتى لا تراها : يلا إدخلي ، أنا بيتنا مايبعد شيء عن هنا بروح وبدبر نفسي
الباب لم يكن مغلقاً بالمفتاح ، فتح لها الباب وأدخلها غير مستمع لما تقول ، أغلق الباب وراءه ليتنهد تنهيدة عميقة ... عميقة جداً.
###
واضعتاً لها أحمر الشفاه باللون الأحمر وتنظر لنفسها بالمرآة
واضعاً هاتفه النقال جانباً: ماتحسي نفسك أوفر؟
غزل تنظر إليه عبر المرآة ، بردِ طبيعي: أوك راح أمسحه
رافعاً حاجبه مستغرباً: غريبة علطول قلتي اوك بشيله
غزل: مروقة ومالي خلق نقاش ومايحتاج أتهاوش مع حبيبي عشانه بس مايحب الروج الأحمر (وابتسمت له عبر المرآة)
فهد يغير الموضوع:غيري عباتك مو عاجبتني
غزل تلتف بإتجاهه : آمر وتدلل
فهد :لا تتعطرين بعطرك الأسود بزيادة قوية ريحته على غذاء مُعتاد في بيتنا
غزل : إن شاء الله
فهد رافعاً حاجبه : لا تنزلين بكعب
غزل: الي تبيه
فهد : ارمي جوالك واكسريه
غزل: ان شاء الله
فهد: تستعبطين؟
غزل:أقدر أسألك نفس السؤال ، إنت شفيك ؟
فهد ينظر إليها ببرود
غزل:ليش أحسك تتعمد تنرفزني ؟ قلت لك أوك بمسح الروج ظليت تدور أي حجة ثانية عشان تنرفزني بيها ولما ماتنرفزت إستمريت تحاول تنرفزني بكل الطرق
فهد يقف يرتب السرير يتحاشى النظر نحو غزل : يتراوالك ، مدري متى بتفهمي إني شخصية مسيطرة ومايعجبني العجب
غزل : لأنك مو كذا
فهد أستفز: على كيفك؟
غزل: لأنك ماكنت كذا
فهد:ترا عادي شخصيات البشر تتغير
غزل: إيه عادي بس أنا متأكدة إنك مو كذا
فهد وهو يقترب نحو غزل لايبعد بين وجهيهما إلا بضعة سانتيميترات،بإصرار:لا تصيرين محللة شخصيات على راسي، أنا تغيرت عجبك ولا ماعجبك
غزل: طيب ؟ أنا قلت مو عاجبني
فهد : إيه أكيد مو عاجبك
غزل: طيب انا بتحملك لأني أحبك
فهد بغضب: إنت شفيكِ بس تبين تستفزيني؟
غزل غضبت ،قضبت جبينها: إنت شفيك بس تبي تكرهني فيك؟ وش مخبي عني فهد
فهد : ولا شيء لا يكون تشكين فيني إنت بعد؟
غزل: بصراحة إي مع محادثتنا هاذي بديت أشك فيك ولا في أحد يبي يكره زوجته فيه غصب ، لا يكون بتتزوج وحدة غيري وقاعد تسوي كذا عشان تبعدني عنك؟
فهد : بلا غباء علي، إذا أبي أتزوج بتزوج مو خايف منك أنا
رامياً عليها حجابها : إمشي بس لا نتأخر على أهلي عشان محادثة سخيفة
غزل ترتدي حجابها وهي تنظر إليه بغضب" هذا وش مخبي عني ، ليش بس يبي يتلف أعصابي ؟!"
###
جالساً على أريكته الرمادية تماماً كقراراته ، ليست أبيضاً ولا أسوداً .. وليست تماماً مختارة بالعقل أو القلب ، يهز قدمه منتظراً إياها وهو ينظر نحو ساعته مراراً وتكراراً
يسمع صوت خطوات حذائها فينظر نحوها
سادلتاً شعرها الأسود الحريري الطويل وراء ظهرها ، مرتديتاً كحل خارجي ليبرز عيناها النجلاء أكثر وأحمر شفاه باللون الوردي الفاتح ، وفستانا أبيضاً تكسوه طبعات الزهور ، عكس تعابير وجهها تماماً التي لا يبدو عليها أي من البهجة
جمالها مغطى بهالة الضيق
قيس واقفاً : ترا أحنا نتغذا كلنا سوا مو لازم فستان لأنك مابتفسخين العباية
تنظر لين نحو عينيه مباشرة ببرود : بند أربعة
قيس إبتسم مستنكراً: لا تخافين مايهمني وش تلبسين ولا هم يحزنون، أنا بس أعطيك خبر عشان لو تبين تاخذين راحتك وتلبسين شيء يريحك (ناظراً لها نحو الأسفل) لأن مثل ماهو واضح إنك تحبين الراحة ، يعني فستان مع جزمة رياضية
لين ناظرتا نحو جزمتها الرياضية ، تقلب عينيها ، تكره ان تلبس الأحذية ذوات الكعب العالي : شُكراً على الخبر ، أنا كذا أرتاح بفستان وجزمة رياضية، ومرة ثانية أذكرك ببند 4
قيس رافعاً حاجبيه : ومرة ثانية أذكرك إن الي قلته تذكير فقط ، وذكر فإن الذكرى تنفع المؤمنين
لين وهي تسبقه واقفتاً عند الباب ترتدي حجابها : أها ، البند يشمل التذكير حتى
قيس: واضح إن التمثيل في بيتكم بيكون سهل جداً
لين تقلب عينيها وبداخلها " يا الله ياربي شقد هذا غثيث ، إف مو طبيعي شقد ملقوف وثقيل دم " ترد عليه: إممم
قيس بداخله " مبين مو بالعتني ، الا يقول أنا اللحين ميت عليها ، تتوكل بس" ، أردف: اليوم نبي نكون طبيعين قدام أهلي ، يعني أزواج لطيفين تعرفين توهم معاريس وكذا
لين وهي تنظر له بإستفزاز: آه ، تقصد مثل ما مفروض ننكون عليه اليوم ؟
قيس أستفز : إيه ، بند رقم واحد باقي عليه شوي ، لما أقولك يبدأ سوء الفهم بنبديه
لين تبتسم بإستنكار: شرايك تعطيني السيناريو الي مفروض أمشي عليه بعد مستر قيس؟
قيس زفر بعمق: مثل ما أنا بمثل الشخص السيء عند أهلك ممكن تتحملين شوي التغير في التمثيلية الي بنسويها عند أهلي
لين تقلب عينيها للمرة الألف وهي تنظر نحو الباب منتهية إرتداء حجابها تماماً، بدون نفس: طيب
قيس: إنتبهي لعينك لا تلزق في السما من كثر ماتقلبينها
لين تضحك بإستهزاء: هه هه هه قاتل الظرافة ماشاء الله عليك
قيس ماسكاً أعصابه :يلا خل نتيسر لبيت اهلي طولنا عليهم

في السيارة قبل دخول منزلهم ..

قيس وهو يبعد عنه حزامه الأمان: طيب ، فيه بعض الأشياء الي لازم تنتبهين فيها هنا
لين تنهدت:أيوه يلا أعطيني تفاصيل الشخصية عشان أدخل في الكاركتر
قيس: ممكن تتكلمين بدون إستظراف لدقيقة سيدة لين لو سمحتي
لين وهي تنظر أمامها : الي يقول هاذي العلاقة جدية بكبرها
قيس متجاهلاً لكلامها : أول وأهم نقطة، الوالد الله يرحمه متوفي وهذا الموضوع ممنوع فتحه في بيتنا مطلقاً
لين قطبت حاجبيها بإستغراب وهي ماتزال تنظر نحو الأمام
قيس مكملاً: ثانياً أخوتي ماشاءالله إستفزازين نمبر ألف فأستحمليهم معليش
لين: أوووه مره صدمتني بصراحة ، الواحد مايستغرب بصراحة لما يعرف إنك أخوهم
قيس تنهد متجاهلاً إياها : أيضاً يا ملكة خفة الظل يا سيدة لين ، ممكن يكون معانا يعقوب على السفرة وهذا ولد خالتي يعيش معانا ، مايقدر يتكلم لكنه تراه يقدر يسمع لذلك تقدرين تردين عليه بلسانك إذا فهمتي وش يبي يقول، إنتبهي تحسسيه إنه بيموت وتساعديه ولا تسأليه عن حياته الخاصة أبداً، كل الي في البيت يعرفون للغة الإشارة ماعدا مرت أخوي غزل لكنها تفهم عليه شوي مع العشرة
لين قاطبتاً جبينها مرة أخرى " وش هالعائلة المليانة تحذيرات وغموض "
قيس: يلا ننزل، لا تنسي الي وصيتك عليه
عند باب المنزل وضع ذراعه أمامها ليوقفها : إنتبهي
لين ترفع عبائتها وهي تنظر ، الأرض عليها قطرات من الدماء
قيس قبض حاجبيه : غريبة شصاير هنا
أشاح بوجهه لايريد أن ينظر ومشى سريعاً وهي تحاول اللحاق به
عند الباب الذي يفصلهما عن غرفة المعيشة ، سألها : مستعدة ؟
أومأت بالإيجاب
قيس: واحد ، إثنين ، ثلاثة ..
فتح الباب ، تحدق لين بأرجاء المنزل ، لا تستطيع البصم بأن حالتهم المادية متوسطة أم جيدة من مظهر منزلهم ، لفت نظرها أشرطة لعبة البلاستيشن المكدسة بجانب التلفاز .. تبدو كالبرج من طولها ، تبدو غرفة المعيشة كبيرة ومقسومة لقسمان ، قسم يوجد به الأرائك والتلفاز ، وقسم به طاولة الطعام وموضوع عليها الطعام فعلاً لكن لا يوجد أحداً عليها ، ولايبعد الدرج إلا قليلاً عن الطاولة
تخرج أم فهد من إحدى الممرات الموجودة في الصالة : أهلا وسهلاً ومرحباً بالعرسان الجدد ، تو مانور البيت
قيس ولين إبتسموا ، قس بهمس مُعرفاً بها : أمي
لين تقلب عينيها بهمس هي الأخرى : لا احلف
قيس ماداً يديه نحو إمه ومقبلاً رأسها : النور نورك ياتاج راسي
لين مدت يديها ، فاجئتها أم فهد بعناق حميم : هلا والله بالعروس ، الله يحفظ جمالك حبيبتي ( أبعدتها عنها وهي ماتزال ماسكتاً كتفيها ، لين نظرت سريعاً لقيس بتوتر لكن سرعان ما أعادت النظر لأم فهد وهي تبتسم لكن ردة فعلها الحميمة جداً أثارت إستغرابها) : إن شاء الله اليوم راح تتقربين لنا بسرعة ، لا تتوترين واخذي راحتك
أم فهد وهي تقترب نحو الطاولة محدثتاً إياهم : إجلسوا على الطاولة لين يجوون ، معليش إسمحي لنا لين أحنا كذا نطول لين نجتمع أنتم اول الحاضرين
لين : لا مو مشكلة يا خالة ، تعبتي نفسك
أم فهد وهي تقترب لترتب قميص إبنها و بهمس مسموع لقيس: قلت لها إن ممنوع الكلام عن أبوك
قيس راصاً على إسنانه : إيه يمه مايحتاج تأكدين
لين جلست على الكرسي وبداخلها " وش هالقضية إلي لازم ماحد يتكلم عنها ، غريبين هالعيلة"
تلف رأسها ناحية الدرج أثار إنتباهها أصوات ضحك وشخص يبدو وكأنه يحدث نفسه
: شرايك نلعب بلاي ستيشن بعد المغرب والله بتشوف كيف إذا قاتلت الشخصية كأنها ترقص هههههههه بموت
لين بداخلها " غريبة هاذي تسولف مع روحها "
ترى أقدام رجل على الدرج حتى تراه كاملاً وهو ينظر ورائه ويبستم ، وخلفه فتاة تبدو بعمر إختها ليلى
يعقوب عندما إنتبه لها توقف وأنزل رأسه
أم فهد : إمشي عادي هاذي مرت ولد خالتك قيس (لين )
يعقوب نظر إليها وإبتسم وأومأ رأسه كأنه يحيها
لين ( أوه هذا يعقوب ولد خالته إلي يقصده ، ماتوقعته كبير بصراحة لما تكلم عنه إنه يعيش معهم ، فلهذا كنت أسمع صوت البنت لحالها لأنه مايتكلم ، اللحين كيف أرد عليه ) أشارت برأسها هي الأخرى كما فعل يعقوب ، وقيس يراقب تصرفاتها بدقة وحذر
مرام إقترب إلى لين وسلمت هي الأخرى عليها بحرارة : أنا أكيد تعرفيني مرام
لين وهي واقفة تسلم عليها : إي أكيد أعرفك ولو كنت تجننين في العرس
أحمرت وجنتا مرام بخجل: تسلمين والله إنت الجمال كله ماشاء الله
دقائق حتى سمعت صوتاً آخر يصدر من الدرج :إفففف شهالأزعاج كم مرة تتصلون يعني وتدقون على الشخص الباب عشان يطلع ، ماتفهمون لما شخص يقول شبعان يعني إنه شبعان
وقفت على الدرج وهي تنظر للضيف الجديد على طاولتهم بتفحص
لين تنظر إليها بتحديق هي الأخرى
غادة إرتسمت فجأة الإبتسامة على وجنتها ، وتنهد قيس في نفس الوقت
غادة وهي تنزل من الدرج: يا أهلا بالعروس الجديدة ومسهلاً بالين
مدت يديها لتسلم عليها وتقرب خدها بخفة بقرب خد لين : أكيد تذكريني
قيس بإستهزاء: إنتِ فيه احد ينساك مع شعر العجزان حقك ذا
أم فهد وهي ترص على أسنانها: قيـــس
غادة تقلب عينيها ، متجاهلة إياه ناظرة نحو لين : ماعلينا من الي مايفهمون في الموضة شيء الله يصبرك عليه جبيبتي
لين بعفوية : ماعليكٍ منه حتى أنا يعلق علي إني لابسة فستان مع جزمة رياضية مايدري إن الموضة كذا اللحـ...
قيس كح منبهاُ إياها بالصمت
لين عضت شفتيها ، إستوعبت : يعني يمزح وكذا هههههههههه (بداخلها : لعبتي الاعياد ياربي)
غادة وهي تجلس على كرسيها : شدعوة قيس ، مو من البداية تفشلنا مع البنت وتبين لها إنك ثقيل دم ، حاول حاول تخفف دمك هالكم يومين على الأقل
قيس ينظر إلى لين بحقد وهي تجلس على الكرسي بقربه ، ولين تنظر إليه وهي ترفع كتفيها ( إف ذا بيجلس يستقعد لي عالكلمة وأنا أم الأعياد الله يستر بس)
دخلا من باب المنزل غزل وفهد
أم فهد : هلا ومرحبا فهد وغزل ، تأخرتم غريبة
فهد رافعاً يده ليري أمه كيساً بداخله حلوى : غزل كانت تبي تشتري شيء حلو عشان العرسان الجدد
غزل تبتسم : عذراُ خالتي بس كان زحمة المحل
أم فهد : تسلمون حبايبي مايحتاج تكلفون على نفسكم ، الحلا موجود
غادة بفخر: تسلمين يمه
وأم فهد تقلب عينيها متجاهلة إبنتها والكل يضحك
سلمت غزل على لين ،بداخلها( تبدو جميلة وأنيقة ، عيناها زرقاوتان كالبحر ، أتسائل إن كانت طبيعية أم لا ، فهد لا يشبه قيس أبداً ، يبدو عليه أكبر من عمره)
دخل بسرعة خلفهما شخص يلهث : لا يكون تغذيتو عني؟
أم فهد بغضب: لا إخلص وأخيراً جيت ، مرة وحدة بس لا تكون أخر من يجلس معنا على الطاولة
ريان : إسمحي لي يمـ...
قاطعه نظرات الصدمة من الفتاة ذات العينين الواسعتين التي على الطاولة
تنظر لين له بصدمة وعينيها متسعتان
ريان ضحك : هههههههه لا تخافين إيه أنا أشبه مرة ذي الثورة للأسف لأن أحنا توائم
لين تعود لطبيعتها بهمس:أوه
غادة: والله إذا أنا ثورة معناته إنت ثور مو أحنا توائم
أم فهد : هششششش
ريان : طمي حلقك ،(مبتسماً للين) انا ريان الأخ الأصغر للدرج الي جنبك
قيس : كل تبن
لين مبتسمة : تشرفنا
ريان جالساً على كرسيه : طبعاً احنا ترتيبنا فهد بعده قيس بعدين أنا وبعدي بسبع دقايق غادة البقرة وبعدها آخر العنقود مرام
غادة :اللحين إنت مسوي فيها إنك تعرفها علينا يعني؟ وش بتستفيد البنت من ترتيبنا يعني
ريان متجاهلاً غادة موجهاً كلامه للين : طبعاً الله يعينك على ثقال الدم الي بتواجهينهم اليوم
غادة :يمه ترا يقول عنا ثقال دم ، إنت استح على وجهك أمي معانا على الطاولة
أم فهد : خلاص إسكتوا أزعجتوا البنت
قيس: صحيح وش قصة الدم الي عند باب البيت
أم فهد قطبت جبينها : أي دم ؟ مدري أنا ما طلعت اليوم
فهد :آه حتى أحنا شفناه اليوم
غادة ترتشف من عصيرها متوترة ، وريان يحدق فيها
قيس ينظر لريان متسائلاً
ريان أشار بكتفيه إنه لا يعرف
قيس: المهم لازم أحد ينظفه
لين ناظرتاً إليه بداخلها" وليش ماينظفه هو بنفسه إن شاء الله؟!"
ريان : ماعليك نظفته أنا (ونظر إلى غادة )
غادة بداخلها( واضح عرف السالفة هذا مايتخبى عليه شيء)
مرام : أيوه لين ماعرفتينا وش تدرسين؟
لين إبتسمت لمرام: برمجة حاسب توي متخصصة
ريان بإعجاب: اوووووه يعني تقدرين تهكرينجوال قيس متى مابغيتين
غزل نظرت لريان ، لقد لفت سمعها ماقاله
لين بتوتر :يعـ..
يعقوب مشيراً لها بحماس ومرام تنظر إليه متحمسة هي الأخرى : بالضبط بالضبط
لين تنظر إليه مبتسمة بتوتر لم تفهم مايقول
قيس ببرود: من جد إنتم الاثنين فاضيين ، تراها أقصاها بتصير معلمة حاسب في النهاية
لين تركل قدمه
قيس: أم أقصد أنا ماعرف بالضبط مستقبل تخصصها بس أتوقع كذا بتكون وظيفتها
فتحت لين فمها تحاول الرد لكن تكلم ريان متحمساً مقاطعاً لها : ياربي إنت قيس تفكيرك مثل الشيبان عن التخصصات ، تقلك برمجة حااسب يعني تشتغل في أي مكان مو معلمة بس ماعندك أي ثقافة
لين : بالضبط، أقصد إن إيه يعني مثل ماقال ريان
مرام : أنا ويعقوب مبسوطين لأنك تقدرين تهكرين ألعابنا في البلايستشن
لين بداخلها " ليش يحسسوني إني هكر هذول"
فهد : فشلتونا فاهمين تخصص البنت غلط
غزل مبتسمة: يعني إنتِ تعرفي تهكرين ؟
فهد: ما شاء الله مصرين يعني
لين : آممم بصراحة أنا درست تحضيري وسنة من التخصص فقط يعني ماتعمقت مرة في دراسة التخصص لكني دخلته رغبة أولى فأتعلم بنفسي بعض الأمور ومنها التهكير شوي أعرف له يعني
ريان وغادة ومرام بإعجاب : أأاووووووووووووووه حركات
لين تضحك بتوتر إتجاه ردة فعلهم
قيس ينظر إليها متعرفاً عن شخصيتها ( طموحة يعني )
##
بعد الغذاء
الكل جالس على أرائك غرفة المعيشة ماعدا مرام ويعقوب يلعبون كعادتهم
إنتبهت غزل بذهاب فهد إلى دورة المياه ، مترددة بأن تفعلها أم لا
ذهبت لتسحب هاتفها الموضوع بجانب هاتف فهد على الطاولة الصغيرة التي بين أريكتين ، لتسحب هاتف فهد معها بدون أن ينتبه أحد
ريان : فهد في الحمام ليش ماخذة جواله؟
غزل بتوتر : ههه ، امم إنتبهت إن جواله شوي وبيخلص شحنه فباخذه معي أشحنه له
ريان : أها
غزل ذهبت بعيداً عن غرفة المعيشة بحيث لا ينتبه لها أحداً
فتحت هاتف فهد يوجد رقم سُري عليه قد إنتبهت لفهد يدخله في إحدى المرات ، أدخلت ستة أصفار متتالية ففُتح هاتفه
دخلت تطبيقاته ومحادثاته بسرعة تريد أن تكتشف إن كان يحدث إمرأة أخرى غيرها ، فتحت ألبوم الكاميرا لتنظر نحو صورة ورقة في هاتفه ..
: شقاعدة تسوين ؟
غزل يسقط الهاتف من يديها بهلع
لترى ريان أمامها مستغرباً ، يلتقط الهاتف من على الأرض .. ليكتشف إنه هاتف فهد
ريان ينظر إلى غزل حاملاً هاتف أخاه متسائلاً : تفتشين جوال فهد ؟
غزل بتوتر : ريان أتمنز يكون الموضوع بيناتنا
ريان : أنا مو فاهم ليش تفتشين جواله ، ماتوقعت هذا التصرف من غزل
غزل: يعني إنت ماتحس إن أخوك متغير مرة؟
ريان : طيب ؟ شيء طبيعي كلنا تغيرنا بعد وفاة أبوي
غزل : لا ، أنا في النهاية تزوجت فهد بعد وفاة أبوك بسنة ، فهد كان شخص طبيعي لكن فجأة تغير
ريان قطب جبينه : أنا مو فاهم وش تبين توصلين له غزل
غزل : أنا أقصد إنه يبي يستفزني بأي طريقة كأنه يبي ..
: يعني سالفتكم ماتقدرون تتكلمون عنها إلا هنا لوحدكم ؟
غزل تنظر لفهد بتوتر
ريان كاذباً : آه غزل كانت تبي تشحن جوالك فجيت لها أقولها إن مايحتاج تصعد عشان تجيب الشاحن أنا عندي شاحن في جيبي
فهد ببرود: طيب شحن جوالي في السبعين ماله داعي
ريان يضحك متوتراً : فهد بلا ثقل دم عاد زوجتك فيها الخير تبي تشحن جوالك لك غيرها يشيلون جوالك من الشاحن يحصل لك
فهد أخذ هاتفه النقال من يد ريان بدون أن ينطق لسانه بكلمة وعاد إلى غرفة المعيشة
نظرت غزل إلى ريان وهي تتنهد ، كان ذلك وشيكاً
###
وضع قيس القهوة على الطاولة ، لتمتدحه أم فهد :ترا يا لين الله وفقك بقيس هو دايماً الي يسوي لنا القهوة وخدوم ودايما يساعدني ، أنا عندي عكس الناس أولادي هم الي يساعدوني وبناتي مو فالحين الا في الهواش واللعب
مرام وهي تلعب مع يعقوب البلايستشن: أفااااا يا يمه ، انا الي دايما جالسة معك في البيت وأساعدك في المطبخ صار مافيني فايدة اللحين
ام فهد بإستنكار وهي ترتشف قهوتها: إي صح إنتِ دايما موجودة في البيت بس ماتساعديني حدك تساعدين يعقوب في اللعب
يعقوب يضحك مستهزئاً بمرام
غادة : من جد تقولين يعقوب توأمها الي مانولد معاها
أم فهد : اسكتي بس هذا انتي وريان توائم ، هل تجلسون مع بعض؟
غادة هاربتاً من كلام أمها المعتاد: لين شكلك تستحين ، ماشوفك مدحتي قهوة قيس أمي نازلة مدح فيه وإنت بس تتبوسمين
نظر قيس نحو لين ، ليجيب مسرعاً وهو يضع ذراعه حول كتفي لين بودية مصطنعة : إيه لين شوي خجولة ، بس أنا أدري إن قهوتها عجبتني (يُقرب وجهها نحو وجهها المضطرب) صح حبيبتي؟
لين وهي تبعد نفسها : بصراحة ماحب الـ..
قيس مقرباً إياها بقوة مرة أخرى لترتطم بصدره وهي يضحك : حبيبتي والله خجولة حدها .. بس أنا أدري إنها تحب القهوة الأمريكية أكثر ، لذلك شرايك نقوم حبيبتي نسوي لك قهوة في المطبخ سوا
وسحب يد لين ليجرها معه للمطبخ
بهمس موقفاً إياها أمامه في المطبخ : إنتِ شفيك ماتعرفين تمثلين؟
لين بغضب: والله يا مخرج قيس آسفة بس محد قالك تختارني أنا كممثلة في مسلسل حياتك
قيس بغضب:ماتقدرين يعني تقولين لي شي حلو قدامهم ؟ اللحين كيف بيصدقون إن أحنا على توافق
لين : شتبي مني يعني؟ ترا قرف أمدحك وأقولك حبيبي ومدري إيش وأنا ما طيقك
قيس : أنا أدري إنك كارهتني ، بس لا تنسي هذا الشيء لمصلحتنا أحنا الإثنين
لين : إففففف طيب خلاص طفشتني بتعاليمك الي ماتخلص ، فعلاً يناسبك تكون مخرج وبس تشرح للشخصيات أدوارهم وتدقق على تمثيلهم
قيس: واقعاً أنا مٌعلم فـ قربتي
لين : طيب تراني مو طالبتك لا تنسى
قيس واضعاً يداه على فم لين مُسكتاً إياها : اللحين لما ندخل أبيك تمدحين قهوتي الي بسويها لك اللحين وكذا عشان يفهمون إنك بس ماتحبين القهوة العربية بس أنا أعجبك
لين وهي تبعد يداه عن فمها بقوة : إفف طيب خلاص برضي نرجسيتك لوعت كبدي
###
جلس بجانبها فتأففت، همس بإذنها : وديت جراح المستشفى
غادة تقلب عينيها: يعني يهمني عشان تقول لي؟
ريان: ترا غادة ماتقدرين تخبين شيء عني ، أنا تعبت اليوم الصبح بعد يا توأمي هذا أولا، ثانياً جراح اتصل لي عشان اوديه لأنه مايقدر يسوق السيارة بيده
غادة : مبروك
ريان : أنا مئة مرة قلت لك لا تستفزيه ، إنتِ تدرين إن عنده إضطراب غضب مع ذلك تستمرين تستفزيه ..هذا يسمى غباء ، وترا مو بس هو الي يحتاج يروح المستشفى
غادة : بلا تفليم علي اللحين ، ترا بس تقيأت .. حتى التقيأ خليته شيء مو طبيعي
قاطعهما دخول قيس ولين غرفة المعيشة وجلوسهم على الأرائك ولين تمثل نظرة الإمتنان نحو قيس : تسلم حبيبي (هامستاً:وع)
قيس مبتسماً : ولو تامرين آمر (هامساً: لو القتل حلال قتلتك)
لين هامستاً : إسكت لا ترا أقلب عليك قدامهم
قيس وهو يرتشف قهوته : أكرر..أكرر التمثيلية لصالحنا كلانا
لين وهي ترتشف القهوة التي اعدها لها هامستاً: بلشتني بقهوتك المعفنة هاذي ، الله يكرم النعمة لا تسوي فيها علي الشيف مرة ثانية يرحم لي أمك
قيس هامساً: يحصل لك والله غيرك يدفعون عشان يشربون قهوتي
لين تحاول أن تمسك ضحكتها وكوب القهوة يلامس شفاهها : بليييييز لا تضحكني
أم فهد : يامحلا عصافير الحب الجدد وهم يتهامسون ويضحكون مع بعض
قيس ولين يبتسمون إبتسامة صفراء وفي داخلهم ( يضحكون على بعض مو مع بعض)
أم فهد : تعالي لين حبيبتي جنبي بوريك ألبوم الجميلين وهم صغار
قيس وهو يحك أنفه متوتراً : يمه مايحتاج فضايح من ثاني يوم
غادة : هاهاهاي والله قيس مقرف وهو صغير كل صوره وهو يشاغب ويهاوش
أم فهد : من حلات صورك إنت بس تتبكبكين
غادة : يا الله على الفضايح
لين جالستاً بجانب أم فهد : وريني الصور ياخالة ، وهي تنظر ناحية قيس بخبث وتحرك حاجبيها
أم فهد تريها صور متفرقة لهم وهم صغار وهي تأشر عليهم لتعرف عليهم : ريان وغادة كانوا مايفارقون بعض أبد ، وكانو يتشابهون أكثر من اللحين ، لأن طول شعر ريان كان مثل طول شعر غادة وإثنينهم لون شعرهم مثل بعض .. وهنا معاهم يعقوب لأن يعقوب مثل عمرهم .. أحياناً الناس كانوا يسألوني إذا كان توأمهم لأن كنت دايماً أخرج معهم ثلاثتهم
لين تنظر للصورة متسائلة بداخلها .. ثلاثتهم في الصورة يبدون في عمر الخامسة ، ريان وغادة حاملين سياراتان مختلفتان في اللون فقط واحدة زرقاء والأخرى زهرية ، ينظرون للكاميرا مبتسمين إبتسامة واسعة ، ويعقوب بجانبهما مُتلف الملامح بشعره الأسود وعيناه البنيتان ، يبتسم إبتسامة خفيفة وبيديه حاملاً دباً أسوداً
تنظر لجميع الصور ، أغلبها يعقوب لا يبتسم فيها أو يبتسم بخفة ، حاملاً دوماً بين يديه دُمية الدب الأسود
تتابع أم فهد بالتحدث وتريها الصور ، الألبوم بشكل مستطيل طولي ، عندما يُفتح بالكامل هناك جهتان اليسار واليمين وتستطيع رؤية أربع صور بالكامل ، لكن هناك الكثير من الأوراق غير متكاملة بشكل عشوائي .. كأنهمقد أزالوا بعد الصور من الألبوم ، ليس هناك صورة واحدة يوجد فيها الأب
أم فهد : هنا يعقوب ومرام يلعبون مع الأطفال في حديقتنا ، كان يعقوب دايما يخاف على مرام من باقي الأطفال خاصة إن مرام كانت شخصيتها ضعيفة .. وهنا لما كبروا يعقوب يعلم مرام كيف تكتب إسمها، كانت مرام مرة متعلقة بيعقوب
غادة تضحك بإستهزاء: إلا يقول اللحين موب متعلقة فيه
مرام نظرت إليها بتوتر وغضب
أم فهد رمقتها بنظرة : إيه أكيد هو مثل أخوها الكبير وتعيش معه أكيد بتكون علاقتهم قوية مع بعض
ريان: غادة حبيبتي كلي تبن شوي وخلي أمي توري البنت الصور بسلام
لين ملطفة الجو: ماشاء الله صورهم حلوة مع بعض ، شوفي هنا يلعبون عروس وعريس ههههههه كيوت
مرام ذهبت بإتجاه أمها ولين لتنظر للصورة: أوه أحب هاذي الصورة
غادة تنظر إليها بمكر: أكيد تحبينها مو إنتِ تتمنيها
إلتفت يعقوب الجالس على الأرض متوقفاً عن اللعب ليرمق غادة ، ومرام تتسع حدقيتها
مرام بغضب: بلا إستعباط غادة
غادة بمكر : أي إستعباط ؟ إستعباطي لو إستعباطك ؟ واضح للكل إنك تحبينه حتى الأعمى والغبي يقدرون يعرفون
قيس يرمق غادة : غــادة بلا قلة أدب
ريان : هاذي مجنونة ماعليك منها
فهد ينظر نحو مرام متسائلاً
وضعت مرام في وضع مُحرج كٌلياً، كيف لها أن تقول هذا الكلام أمام أخوتها
يعقوب متحدثاٌ بلغة الإشارة لـغادة : صورة أطفال ترا شفيك
غادة : إيه يعقوب ترا عادي واجد صور تتحول لحقيقة
مرام بغضب: ترا عادي غادة ياما كنتي تلعبين مع يعقوب نفس اللعبة لا تكذبين الكذبة وتصدقينها
غادة : إيه صح بس المهم إذا كنت ألعب معه نفس اللعبة للحين أو لا
يعقوب يتجه ناحية الصور ليريهم صوره مع غادة مشيراً: شوفوا كنت ألعب مع ريان وغادة ومرام كثير، هنا وهنا وهنا
لين تسير مع رياح يعقوب لتلطف الجو: صح كثير حلوين الصور ،شوفوا هنا ويعقوب يبوس غادة تجنن الصورة
غادة بمكر: أوبس لا تمزع الصورة مرام ، تعرفي الغيرة ذباحة
فهد بغضب: غــــــــــــــــادة تجاوزتي حدودك تراك تتكلمين عن أختي وولد خالتها هنا
قيس أخذاُ الألبوم من حضن لين بقوة مغلقاً ألبوم الصور : هذا الألبوم مو لازم ينفتح مرة ثانية إذا هذا الغباء بيصير
ريان بهدوء : غادة بلا مشاكل أحترمي وجود لين لأول مرة هنا
لين تنظر لهم بتوتر ، لا يمضي وقتاً حتى تقول شيئاً حتى تشب نار الجميع من حولها
مرام مبررة : صورة لكم وإنتم صغار على إيش بغار يعني
غادة تبتسم بمكر: يعني تعترفين لو إنا كبار بتغارين؟ ترا باين إنك خايفة إن يعقوب يحبني


يُتبع في الجزء القـــادم..

صفحة رائعة
وجمااال راااقي

سلمت أناااملك وما طرحت هووون

يعطيك العاااافيه

وشكرا لا ينتهي

راقني انتقائك الماسي
تسلم يمينك
ودام عطائك العذب
پآقة ورد

سلمت يمناك
طرح جميل جدا

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

يسلمو ع المرور

*،




آنتقاء مميز .. مَ ننحرم من جديدك

طرح رائع
يعطيك العافيه

طرح جميل