ديوان فارس مهدي الغنائي

مرر على كيفك من الشوق مرر

الين صدري يحتظن كل شوقك

وكرر كلام اللي من شوي كرر

ابسمعه بذني وابوح لخفوقك

واكتب من ابيات الجُمل لك واحرر

وانثر لك اللي مستكن بعروقك

ابيك تقرى لا اتكلم وابرر

تكفيني النهته عسى مايعوقك

ياراسمن حبك بقلبي تقرر

بين الحنايا وبين فنك وذوقك

اعاند اضروف ..الهبايب مصرر

والله يبوق اللي نوى يوم بوقك

ريض ولكن مرريلي وامرر

الين صدري يحتظن كل شوقك

الله عليك اش بقى من شـان تقنعنـي

عطني وهات الجروح سلاح وجدانـي

نسيت ميـر الفكـر بالذكـر طمعنـي

وش جابك اليوم تنصانـي وتنخانـي

كتبت شعري وفنـي فيـك طوعنـي

سيف ٍ مجاهـد بحبـك عانـي فانـي

وشرعت قلبي وباب الحزن شرعنـي

واغضيت طرفي سكت قلبي مع الساني

ماكنت اضنك بعد هالحـب تخدعنـي

وماكنت اضنك بعد هالحـب تجفانـي

امسيت بلهام فكرك وانـت ترمعنـي

واصبحت فارس خيال وحلمك الثانـي

ياحيف جرح ٍ بكيتـه منـك لوعنـي

وياحيـف حـب ٍ تملكنـي وخلانـي

ارحل ترى مامنعنـي عنـك يمنعنـي

حب ٍ اصونـه بعـزه ثـم ٍ ايمانـي

بـعشق الكتابه نثرت الآآآآم توجعني

فيها حياتي وروحي واجمـل الحانـي

صبـرت والحمـد لله فيـه جمعنـي

ملاك واغلى البشر عوضني احزانـي

علميني عشق حرفك علميني عشق نوف

وعلميني هالكتابه وكيف تبنين الحروف

واذكريلي بعض خاطر عابراً للقلب عابر

كيف ابعشق كيف ابرسم عشقتي بأحلى الوصوف

وضحيلي لو ملامح عن اساليب المحبه

وضحيلي بعض حبك حرت انا بين الوقوف

ودي اكتب مابقلبك ودي اقرا مابعينك

ودي افصح مابقلبي ودي العالم تشوف

كم مضى من وقتي اللي عشت به هم ٍ وغربه

وكم مضى من عمري اللي عشت به حزن ٍ وخوف

يشهد الله مانسيتك لا ولا حتى جفيتك

من وعى فكري هويتك وانتي اللي بس اشوف

هالحزن مبطي بعيني وبسمة اشفاهي مروه

وكل ماشفتيه مني له نهايه يالهنوف

دام حبك هو رضابي مالحقك اي شك فيني

ودام حبك مارضى بي اتركيلي عشق نوف

مدري عن جروحي وش اللي طرالها

في لحظةٍ والناس مرتاح بالها

جميع من في الحفل يحكي عن الفرح

وانا جروحي من شقاية طرالها

حبٍ سكن روحي لو انه لغيرها

حب الهنوق اللي بعيدٍ مجالها

سجيت عنها قلت يمكن نسيت

بعد العذاب اللي ذبحني ونالها

سنين عانينا من الحب والشقا

مراحلٍ ما يشرح الصدر فالها

مراحل فاقت مراحل قصايدي

مهما كتبت من القصايد جزالها

حاولت اجرب حب ثاني وردني

حب الهنوف اللي غرامي صفا لها

من لامني في حبها ما درابها

ولا شاف مضمون الجمال بجمالها

مزيونةٍ ما شافت العين مثلها

مهما حكوا بالزين تبقى لحالها

أيضاً وفيها كل شيٍ يشدني

طيب وفى وإخلاص من وسع بالها

يا عنك مانت بشاكي الهم عندها

يكفيك عن كل المصالح قبالها

يوم شفتك صابني رهبه وخـوف

والكلام اللي بقوله ضـاع منـي

احسب انك هي وابطيت الوقوف

الله اكبـر ياوصـف ٍ ذكـرنـي

في ملامحك البعيده روح نـوف

وفي ملامحك القريبه خاب ضني

انعمت عيني وانا عيني تشـوف

من غلاها كيف خفاقـي يحنـي

تاهت افكاري وضيعت الحـروف

التزمت الصمت والصمت التزمني

جيت البحر اشكي همومي للامواج

اشكي هموم الوجد والبعد والشوق

عل وعسى يطلق سراحي بالافراج

وانسى زمان ٍ فات عاشق ومعشوق

كنت افتكر موج البحر يقرا الابراج

ويدري عن اللي زاده الهم والعوق

اثر البحر غدار مافيه مخراج

مايفرج الضيقات غير الذي فوق

اللي يعدل كل مايل ومنعاج

مجرى الرياح ومضهر الشمس بشروق

يجبر بقلب ٍ للمحبين محتاج

قلب ٍ غدى من بعد الاحباب محروق

مشيت يادروب العنا لاخر الدرب

ولقيت شوك المرحله يحتريني

وقفت لاشمس ٍ ولا عصراً يهب

الا ضلام الليل ياخذ يديني

وعيونك اللي لا وفت مابها كذب

ياموجعه قولي اش بقى من سنيني

جيهات ترميني من الشرق للغرب

وحزن الملا يابنت شوفيه فيني

ان ماوفت دنياي يامري العذب

تموت لحظات الامل والحنيني

وتبقى مشاعر قصتك ياأول الحب

روح ٍ تجسد وصل بينك وبيني

ياللي سؤالك يجرح القلب من قلب

لاتجرحين اللي دفنته بعيني

بعض العقارب لا قرصت مابها طب

تقتل قبل صوت الفزع والونيني

ماهو طرب يوم اعزف العود يابنـت

ولاهو غلى مغناي لو شلت عرضـه

هذا وانا من جـرح غيـري تكونـت

وشلون ابطلب من عزى الغير قرضه

جيتك اسلي مسمعـي ليـن مالنـت

كلي وبعضي واكثر الحـزن فرضـه

غنيت جرحي والوفى مات واعلنـت

وطير السعاده ماعرف وجهة ارضـه

ولولا الوفاء اللي في عيونك تزينـت

مالي ومال الفـن طولـه وعرضـه

بك تفتخر كـل القصايـد وهيجنـت

والشعر لجلـك زان نظمـه وقرضـه

هـذا وفـاي وبالغـلا ماتهـاونـت

ولاجل الغلا شلت اعذب الشعر عرضه

على مواعيـد الامـل جيـت لافـي

بعطيك ماباقـي مـن أيـام عمـري

وأهديلك اسمى احساس من قلب صافي

تنسج بهـا أمـال المواعيـد بـدري

طبعي كذا اعشق ولا اقـدر اجافـي

وش حيلتي لامن نسى الصير صبري

يرضيك يبقـى عالـم الحـب خافـي

يكفي ترى ماضهرت عذرك وعذري

ياما صرخ جرحـي بقـولات كافـي

مع كـل هـذا جيـت ماكنـي ادري

امـا خذينـي عاشـق ٍ دوم وافــي

والاأهجري وانسي سهامك بصـدري

عنادي مأيناسب مـع عنـادك

ولا حتى عنادك مـع عنـادي

ودادي ما يشابهـك بـودادك

ودادك مأيشابـه لــه ودادي

ولا حتى مزاجـك اومـرادك

يناسبني او انه هـو مـرادي

انا ماهمنـي حتـى ابتعـادك

انا فضلت من مبطي ابتعـادي

وعرفت اشلون ابحرقلك فؤادك

مثل ماشعلتي النـار بفـؤادي