دفتر قصيد وقلم مسجون

لا تلمس الجرح خل الجرح واسبابه
الله يخــــليك مافـــيني مــكفينـــــي




القوم تدري عزيز القوم وش صابه
وإن عودت لي أنا أدري بما فيني




مجروح وجروح بعض الناس تتشابه
وإن كنت ضامي مصير الوقت يرويني




صحيح ليل الهوى مايستر أحبابه
. هاجوس ذيب السهر للصبح يغريني




زيف المشاعر وأهلهـا ناس كذابه
والصادق يحط عينه بس في عيني




حتى حبيبي زمان الحب ماجابه
كان أخر إنسـان متصور يخليني




كنت أجمع أشعار غيري وأتغنابه
. وأقول هذا قصيدي لاجل يغلينـــي



ويومي عسفت المعاني شعر لحسابه
أروع قصيده لغيري صعب ترضيني




أول ليا غاب يجرح قلبي غيابه
وأضـــيق وأزعــــل على كل مـــن يحاكيني



واليوم كل شي يجيني منه أنا أرضابه
إلا إنه يسوق عذر البعد ويجيني



يكفينـي إنه تـرك لي شي أشقابه
دفتر قــــــصيد وقــلم مســـجون بيديني




حاولت أنا أحيا بغلاه وكل ما أحيابه
ملامح وجيـه خلق الله تعزيني




لـو حظ غيري خذاه فلا تهنابـه
لاشك هو شرهةً شحــــت بها سنينـي




وأنـا حجـاج تعلا من على أهدابـه
في كل الاحوال مايقدر يوطيني




وعمر مضى لي معه ياعل يغـدابـه
عسى العوض عنه بأيام بقت فينـــــي