 |
|
|
11-07-2016
|
#101 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
الجزء الثاني والعشرون
دخل فيصل بعد ماطلعوا البنات وسكر الباب وراه ! مشى بهدوء واهو يتأملها متمددة على جمبها وضامة البطانية لصدرها ومسكرة عيونها بتعب.. انتبه لصحن الحليب والساندوش الي على الطاولة .. عرف انه لها وانها رافضة تاكله .. قعد جمبها على السرير ومسح على راسها بخفة واهو يقول بحنية : فتون ممكن تقعدين شوي ؟؟ فتون كنها سمعت خالد يقول ان فيصل بيدخل .. !! وكنها حست فيه يوم دخل ومشى وقعد جمبها .. وخفق قلبها بقوة واهي الخفقان ذابحها مع التعب .. بس مع دوختها مو قادرة تستوعب وش يدور حولها بالضبط .. طالعها فيصل ينتظر منها أي حركة ورد .. لقاها تغمض عيونها بقوة وتضم البطانية لصدرها أكثر .. لمس بأصابعه جبينها لقاه مسخن شوي .. كنها بداية فلونزا .. قرب منها أكثر واهو يقول : فتون .. افتحي عيونك شوي .. فتحت فتون عيونها بوهن .. وشافته واهو مقرب منها ويطالعها .. كشرت بخوف واهي تلم نفسها بشكل يبين انها خايفة منه وقالت بخوف : شتبي فيصل .. ترا والله ماقلت لأحد شي والله .. لاتضربني الله يخليك ..! انصدم فيصل !! بالوقت الي المفروض يحسسها بالأمان .. حسسها بالخوف والرعب !! لهالدرجة صارت ترتعب مني وتحسبني بآذيها ! اتأمل نظراتها الخايفة والدموع مجمعة بعيونها .. كنها طفلة تترقب الخطر يهجم عليها !! شالي سويته يافيصل فيك وفيها ؟؟ ضاااااق صدره من نظراتها وابتسم بحنية وهو يقول : حياتي انا مو جاي أضربك .. أنا جاي أتطمن عليك .. قالي خالد انك دختي وطحتي وخفت عليك ! لانت ملامح فتون شوي .. وقالت : لاتخاف مافيني شي .. بنام وبرتاح ! فيصل : لاتنامين قبل ماتاكلين .. (( وقف بدون ماينتظر ردها ومشى ياخذ الصحن والحليب .. تبعته فتون بنظراتها وقالت : ليه سافرت وتركتني يافيصل ؟؟؟؟ التفت فيصل بسرعه عليها واهو عاقد حواجبه باستغراب .. !! شافها تطالعه ودموعها تسيل بلا شعور منها وتقول بصوت متقطع مع التعب : كنت محتاجتك جمبي ذيك الفترة .. لانها الفترة الي حبيتك فيها واتعلقت فيك بعد .. يمكن أنانية اني حبيتك بتملك .. بس كنت خايفة أضيع من بعدك .. ومع كذا سافرت وتركتني وضيعتني ! (( بكت بقوة واهي تقول : ليه ضيعتني يافيصل ..؟؟ كنت تقدر تترك السفر وتستغل قربي ذاك الوقت وتخطبني .. كنا وقتها بنعيش مبسوطين ونحب بعض .. بس انت اغتريت بعمرك وبغيت تعاقبني على ولا شي ! على اني ماحبيتك من يوم اني صغيرة مثلك ؟؟ على اني ماهتميت فيك وبوجودك زي ماكانت مرام على خالد ؟؟؟ على اني ماغصبت قلبي يحبك ويعشقك من طلعت على هالدنيا ؟؟ ويوم جت اللحظة الي حبيتك فيها استهزأت فيني وتركتني .. ! انلجم فيصل و وقف مصدوم ويطالعها بنظرات تنم على صدمته ! ماكان يتوقع انها كاتمة بقلبها كل هالكلام وشايلة بخاطرها عليه لهالدرجة !! قعدت فتون على السرير بصعوبة ومسحت دموعها وكملت وهي تشاهق : وش كنت تنتظر مني يوم رجعت ؟؟؟ آخذك بأحضاني وأقول عفية عليك حبيبي عذبتني ؟؟ جرحتني عاقبتني بكيتني دمرتني ؟؟؟؟ فيصل أخيرا نطق وقال : جرحتك وبكيتك ودمرتك ؟؟؟؟ والله الي اعرفه ان مو هذا الي صار فيك .. الي اعرفه انك استغليتي سفري ودورتي على حب ثاني ! فتون انفعلت واهي تمسك راسها بتعب وتقول واهي تشاهق : لاااا يافيصل غلطان .. يافيصل اتذكر قبل ماتسافر طلبتك عند باب بيتنا انك تقعد عشاني ! تتذكر ولا لاء .. ؟؟ قعدت اترجاك وأقولك يافيصل بظيع من بعدك .. ان كانك ماتبيني أتهوّر لا تسافر وخلك معاي ! تذكر وش رديت علي وقتها ؟؟؟ تذكر ؟؟؟ فيصل مارد وضاعت عيونه بالفراغ واهو عاقد حواجبه يسترجع ذيك الأحداث ! كملت فتون تبي تذكره وقالت : أنا أذكرك !! قلتلي انتي ماتبيني اقعد الا عشان أمنعك من التهوّر لأنك تحسبني ماشوفك غير محامي عني وبس .. ماكنت حاس بالي بقلبي وقتها وأنا أتمناك تقعد .. فيصل : بس انتي ماصارحتيني ! فتون بانفعال : لا تقول ماصارحتك !! حتى يوم كنت ببيتكم أبكي بالحوش وجيت انت وشفتني .. قلتلك فيصل بمووووت اذا سافرت .. بتذبحني بسفرتك .. صرت تتريق انت وتقول مشاعر وقتيه كل واحد يحسها تجاه اي شخص كان مسوي ضجة بحياته !!! شهقت بقوة وبعدها سكتت وكملت بألم : كنت مابي أخسرك وكنت أرددها عليك ألف مره .. مابي أخسرك يافيصل مابي .. بس انت استهيفت فيني وبمشاعري ورحت وتركتني.. بنفس الوقت الي راح سعود وتركني .. وبذيك الفترة اتزوجت عبير وتركتني .. محد كان حولي وقتها وش كنت تتوقع مني اذا لقيت أحد يحبني وبكل ثقة اتقدم وخطبني ؟؟؟؟ أرفضه عشان واحد خذلني وراح ؟؟؟؟ سحبت مناديل من جمبها ومسحت دموعها ولمت راسها بإيدينها واهي تغمض عيونها بتعب ! كانت هالذكريات تحرق كيانها خاصة واهي تعبانة الحين ولاهي ناقصة تتذكر شي يتعبها .. مشى فيصل عندها واهو يقول برجاء : بس يافتون .. انتي شالي خلاك تكتمين بقلبك هالكلام طول هالوقت .. كنا عايشين لحالنا ثلاث شهور مانطقتي فيهم .. ؟؟ قعد جمبها وحط الصحن والحليب جمبه ومسك ايدها وضغط عليها واهو يقول : ليه الحين اتكلمتي وانتي منهارة وتعبانة؟؟ فتون : انا ماكنت باتكلم أبد .. بس دامك قررت تطلقني بسبب تعاملي لازم تعرف وش أسباب تعاملي هذا ! ضيق فيصل عيونه وقال بابتسامة حنونة : أطلقك ؟؟؟؟ فتون هزت راسها ببرائة وقالت : مو هذا كلامك بالطيارة ؟؟؟ فيصل بنفس الابتسامة : انا قلت بطلقك ؟؟؟؟ فتون : قلت بارميك عند أهلك رمية وحده هذا شمعناه ؟؟؟؟ فيصل : له ألف معنى غير اني أطلقك .. (( مسح على خدها بنعومة واهو يقول : مشكلتي مع كل الي تسوينه فيني أحبك يافتون ولاقدر استغنى عنك .. وانا كان قصدي أخليك عند أهلك هالفترة .. بريحك مني شوي وأخليك تنبسطين مع اختك الي من زمان ماشفتيها ومع امك وصاحباتك .. وانا خليني بعيد كل واحد فينا يراجع حساباته و .. يختبر مشاعره ! فتون لسبب ما سالت دموعها من جديد .. ماتدري شهالصراع العجيب الي يدور بقلبها مابين حاجتها ورفضها لقربه .. مسح فيصل دموعها واهو يقول بضيق : الحين ليش تبكين ؟؟ مو تقولين انا نادرا ماأبكي ؟ فتون : لااستانس حبيبي .. على يدك اتعلمت كل انواع الدموع .. هذا الي كنت تبيه وتتمناه ومستغرب ليه ماتشوفني أبكي !! .. علمتني شلون هي دموع القهر .. وش هي دموع الحزن وش هي دموع الخوف وش هي دموع الألم والضرب .. و .... فيصل قاطعها بضيييق : خلاص فتووووووون .. يعني بالله عليك انتي ماسويتي شي ؟؟ مو كنتي دايم تنرفزيني بكلامك وحركاتك ؟؟؟ فتون واهي تشاهق : اي انا الغلطانة وانا الظالمة وانا هذا طبعي شتبيني أسوي ؟؟ وانت ماخليت عقاب ماعاقبتني فيه وتبيني أتعدل من بعده لا مستحيل !! بالضرب والصراخ انا ماأمشي يافيصل وانت يوم رحمتني أخيرا شسويت ؟؟ كيف كانت رحمتك ..؟؟ جافيتني وصار كل واحد بحاله لا كلام ولا سلام ؟؟ وتبيني أتغير ..؟؟ انا مو بهالاسلوب أتغير يافيصل مو القسوة الي اتغيرني ! ماتحمل فيصل كلامها وضعفها وسحبها لصدره بهدوء وضمها .. شلون نسى انها طفلة بكل ماتعنيه الكلمة ! طفلة ماتمشي الا بالكلام الحلو والطبطبة واللين ! وبلحظة نسى كل الي سوته فيه من عناد وطولة لسان .. وماصار يذكر الا حبه الكبيـــــر لها .. وباس راسها واهو يحس بالندم على كل الي سواه فيها .. لمت فتون نفسها على صدره واهي تمسح دموعها .. مسح فيصل على راسها بحنان وبإيده الثانية رفع كاس الحليب وقربه من فمها وقال : اشربي يافتون شوي فتون : بطني لايعة فيصل ماقدر .. فيصل : شوي بس يافتون مو لازم تخلصينه كله .. قربه من فمها واهي لازالت على صدره .. فتحت فمها وشربت شوي .. وحاول معها تشرب زيادة لين حست انها مو قادرة تبلع شي أبد .. رجع فيصل الكاس وخلاها ترتاح على صدره .. كانت ساندة راسها وجسمها على الجمب .. ظل يمسح على شعرها ويتأمل ملامحها الذبلانة .. وعيونها مسكرة بتعب .. اجتاحت مشاعر حبها بقلبه .. اتمنى هالوقت لو يقدر يرجع الأيام لورى ويغير كثير من مواقفه .. لو اني بس ماسافرت عنها .. لو اني بس ماقسيت عليها .. لو اني اتحملت دلعها وزعلها وعنادها .. لو .......... آخ شتنفع اللو الحين !! هذانا وصلنا بالآخر لهالحال ! اتنهد وطالع فيها لقاها مو حاسة فيه .. شكلها نامت من التعب .. قطع قلبه شكلها واهي نايمة وآثار الدموع والتعب على وجهها .. بلحظة انفعلت وطلعت كل الي بقلبها .. وبلحظة هدها التعب ونامت ! وش يبي أكثر من كذا ليجزم انها طفلة !! مسكها من خلف ظهرها بخفة .. ونزلها مكانها بهدوء .. وغطاها بالغطا .. وانحنى وباس جبينها وهمس عند اذنها : باشتاقلك حياتي .. اتأملها بآخر نظرة .. حسها غاطسة بالنوم وتعبانة ولاهي حاسة فيه .. نزل عينه بعدها ومشى عنها وفتح الباب وطلع واهو يقاوم التفاتة أخيرة لو التفتها يمكن يتراجع عن قراره .. ضغط على قلبه وطلع بهدوء .. وسكر الباب بنفس الهدوء .. مشى وانتبه لخالد وعبير قاعدين بالصالة ووجدان وبشاير استأذنوا وراحوا .. ضيق عيونه فيهم واهو يشوف بعيونهم الاستفسار .. قال من قبل مايسألونه : شربت شوي من حليبها ونامت .. خالد : شفيها يافيصل ؟؟؟ فيصل واهو يقعد : ابد ياخالد بس ماكلت ولانامت زين هاليومين .. خالد : أكيد مو شي ثاني ؟؟ مايحتاج نوديها المستشفى ؟؟ ابتسم فيصل بخفة واهو يدري وش يقصد .. وطبيعي جدا انه يفكر بهالتفكير لان محد يدري عن الوضع والانفصال الي كانوا عايشينه بذيك البلاد .. قال : لاتقلق ياخالد مافي شي .. خلوها تنام ولحد يصحيها لين تصحى بنفسها وترتاح وبعدين خلوها تاكل زين وان شاء الله بتتحسن .. الي فيها ضعف صدقني ! خالد بضيق : واهي ليه وصلت لهالضعف طيب ؟؟؟ طالعه فيصل بنظرة فهمها خالد على طول .. انه مايبي يقول شي قدام عبير .. والتفت على عبير وقال: شلونك عبير .. ؟؟ عبير : بخير الحمدلله .. انت شلونك والحمدلله على سلامتكم .. فيصل : الله يسلمك اعذريني والله مانتبهتلك وانا داخل الغرفة قبل شوي ! عبير : لا عادي كلنا انربشنا .. فيصل : شكل خالتي مو موجودة ! خالد : اي والله طالعة بس شوي وتجي .. فيصل واهو يوقف : زين بروح أشوف أهلي الحين وان شاء الله بمر وقت ثاني أسلم عليها وعلى عمي .. خالد واهو يوقف : مامريت على أهلك ؟؟؟ فيصل : لا والله من المطار على هنا .. خالد : يالله أجل أنا أوصلك فيصل : مو بكيفك اصلا مالي غيرك .. خالد : ههههههههههه بدينا ..! ضحك فيصل ومارد .. ومشى وطلع واهو مافيه حيل يرد .. كلام فتون وشكلها وحالتها ضيقت صدره وقتلت اي احساس فرح ممكن يحسه .. ركبوا السيارة وفيصل رجع المرتبة على ورى وسند راسه .. شغل خالد السيارة واهو يطالع بفيصل وقال واهو يحرك السيارة : شفيكم يافيصل ؟؟ فيصل : فينا الي كافينا .. خالد : والله اني حاس .. فتون هذي محد يقدر عليها الا الي خلقها .. فيصل بضيق : لاتظلمها ياخالد .. انا الي ماعرفت أكسبها وأتعامل معها .. خالد بسخرية : شالي ماعرفت ؟؟ ترا ذي طفلة أي أسلوب يمشي معها .. فيصل : وهذي المشكلة ياخالد .. الطفل وخاصة اذا كان عنيد .. ماتمشي معاه القسوة ! خالد بصدمة : وانت كنت قاسي معها ؟؟؟؟ فيصل بغصة : أكثر من ماتتصور ! خالد : ليه يافيصل ؟؟ هذا وهي غالية على قلبك .. ! فيصل : لاتلومني ياخالد والي يرحم والديك قلتلك الي فيني كافيني .. سكت خالد شوي وبعدها قال : حتى ولو يافيصل أكيد اهي حدتك وطلعتك من طورك ! فيصل بقهر : انت ليه شايل عليها ؟؟؟؟ خالد : مو شايل عليها ولا شي بس اختي واعرف طبعها .. فيصل : اختك مافي أزين منها حبيبي بس يبيلها من يعرف يكسبها .. (( اتنهد بضيق وسكر عيونه .. طالعه خالد حس انه ماله خلق يحكي ويتكلم .. وفيصل راح بأفكاره مابين كلام خالد ومابين أحاسيسه .. يحس بالندم واللوم .. يحس بتأنيب الضمير بنفس الوقت يحس بالظلم !! نادم على قسوته وضربه وعصبيته وانفعاله .. بس شسبب هذا كله ؟؟؟ اتذكر كلام فتون : "عاقبتني على ولا شي !!!" " على اني ماحبيتك من يوم اني صغيرة مثلك ؟؟ على اني ماهتميت فيك وبوجودك زي ماكانت مرام على خالد ؟؟؟ على اني ماغصبت قلبي يحبك ويعشقك من طلعت على هالدنيا ؟؟ " انعصر قلبه بقوة .. كان يحبها بكل حواسه وبكل ذرة بكيانه .. كان ولازال على هالحال .. وبنفس الوقت كان احساس انها ماتكن بقلبها تجاهه ولا شعور .. يحرق قلبه .. لا والي يحرقه أكثر انه يحسها ماتطيقه ولاتبيه !! ليتها بس ماحبتني .. كان أهون علي من انها كانت ماتطيقني وترفضني .. يمكن هذا الي خلاني أروح وأتركها يوم حسيتها بدت تميل لي .. ماكنت أبي أظيع بالمتاهات الي شفتها بعيونها .. مشاعر توها انولدت بقلبها !! كنت أبي أنميها وأكبرها.. بس للأسف قتلتها بمهادها !! كنت أبي أحسسها مرارة الحرمان الي حسيتها .. أبي أذوقها ألم الهجر والبعاد .. ظنيت اني بولعها أكثر .. هههههه ياحظي أبعدتها أكثر !! اتنهـــــــد تنهيدة وصلت لمسامع خالد الي رجع يلتفت عليه ويطالعه وماقدر يمنع نفسه يسأل : طيب الحين خليتها عندنا وبعدين ؟؟ شناوين عليه ؟؟ فيصل بنفس وضعيته : مادري ياخالد .. الحين خلنا نبعد شوي عن بعض كل واحد يراجع حساباته واذا كان لنا نصيب نرجع لبعض رجعنا .. وان كان مالنا نصيب .. (( وبتنهيدة : أكبر غلط أجبرها ترجعلي زي ماجبرناها تتزوجني ! خالد : لا ان شاء الله بترجعون لبعض يافيصل وبدون ماينجبر احد على الثاني .. فيصل بهمس : ربك كريم ..
|
|
 
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
