يا زينه و يا زين طاريه /

صباح \ مساء الخير على عيونكم الحلوه

عادي احبه
عادي اوده
عادي ارسل اشواقي له من بعيد
عادي ان شوفه غدى لايام عيد
عادي لو حبه كل يوم(ن) يزيد
بس وش يفيد
دام قلبه مقيد بالف قيد

اعزائي القراء اعضاء المنتدى بيان هام وعاجل من الرياسه... حول
بما أن وحيث أن الروايه هذي اولى رواياتي وما عندي خبرات سابقه يعني بالعربي توني في اللفه
احب اضعها بين ايديكم بس بشويش عليها واذا كان فيها اخطاء اعذروني وصوبوني وان عجبتكم لا تبخلون علي بردودكم المفرحه
اختكم سالفتي سالفه


الجزء الاول

حبيبي شمعة الجلاس .. ولا كو من يسد عنه
غشيم بالهوا ما داس .. و دروبه من صغر سنه
يغيب و جيته بخلاس .. يخاف القول و الظنه
إذا طال الهجر يا ناس .. تحريت الوصل منه
حسين و كاعب مياس .. و عيوني ما رأت حسنه
عيون الخلق لها حراس .. غزال مشيته فتنه



من قبل 18 سنه وفي بيت أبو محمد الله يرحمه وعلى الصبح كل يوم هالاسطوانه سيف وأم محمد والهواش الصباحي
أم محمد :يا هيا روحي نادي اخوج سيف
هيا كانت جايه من المطبخ : يمه سيف يلعب في الشارع
أم محمد : روحي ناديه الحين بسرعه قولي له يجي الحين مو بعد شوي
هيا : يمه أخاف يصرخ علي قدام ربعه
عاد أم محمد اكره ما عندها هالغيره اللي ذابحهم فيها سيف
أم محمد : فارقي الحين ناديه والا ياويلكم مني

راحت هيا تنادي أخوها اللي اكبر منها بسنتين وهي ميته من الخوف انه يطقها والا على الاقل يصرخ عليها ذيك الصرخه اللي كل اهل الحي يسمعونها وهذي اكثر شي يفشل البنت أم 9 سنين
هيا والخوف مو مخليها تطلع الصوت واضح فما سمعها اخوها عدل:سي.. سسسيف امي تنناددديك
وركيض على البيت قبل ما يوصلها أخوها

سيف وعينه يتطاير منها الشرر وده يذبحها دخل البيت وهو يركض بغضب : هيوااااااااااه يا قليلة الادب انا اللي بربيج ما بقى ولد ما شافج
أمسكته أمه لا يركب ورى أخته فوق بعد ما هربت إلى غرفتها

أم محمد : سيفووووه تعال شفيك على البنت؟؟ انا قلت لها تناديك شصار عشان هالصراخ كله؟؟؟
سيف وده لو أمه تتركه و قاعد يحاول يتفلت منها : هديني أنتي ليش تخلينها ترز وجهها؟؟ إنا ألف مره قايل لها لاتطلع بالشارع
أم محمد وهي شوي وتموت من الضحك عليه : ههههههههههه زين هي ما سوت شي

سيف ما عجبه رد أمه وقال وهو اهدى من اول : يمه أنا اخاف على أختي أنتي ما تعرفين هالاولاد كثري
بعدين سكت شوي كأنه يفكر شوي وقال : شوفي يمه انا صج عمري 11 سنه بس سمعوني من الحين أنا كلمتي ما راح تكسرونها لو على قص رقبتي بنتج ما راح تطلع إلا لابسه عباتها وإلا والله لا اذبحها بيدي سمعتيني ولا تزعلين مني يمه بس هذي أختي

في هاللحظه دخل محمد وهو يشوف اخوه بنظرة غضب : يعني أنت ما تتوب والله يوم سمعت هالصراخ عرفت انه منك ياللي ما تستحي هذاني أقول لك إن لمست هيووه لاتلوم إلا نفسك

أم محمد تدري ان ولدها قلبه طيب بس من كثر حبه لأخته ما يبي احد يتعرض لها مع إن أخوه محمد اللي عمره 15 سنه هو الكبير بس كان اهدى منه
سيف طالع أخوه وهو محتر منه : أنت تشوف إن عادي تطلع الشارع؟؟

قعد محمد على الكرسي وهو مو مهتم : وخير يا طير هي توها صغيره وإذا واحد طالعها فهو مريض ولازم تتركه وما تلعب معاه

توه سيف بيرد على أخوه إلا أمه توقف بينهم وهي تطالع سيف وترفع يدها لمحمد انه يوقف عن الكلام
ام محمد : انزين صلي على النبي ما راح يصير الا اللي يرضيك بس الحين ابيك تروح بيت خالك
سيف وكأنه هدى شوي وانفكت عقدة حواجبه : اللهم صلي وسلم عليه ليش اروح بيت خالي؟؟
سحبته ام محمد على المطبخ وهي تقول : أبيك تأخذ لمرة خالك العصيدة هذي مسويتها لها وتسلم عليها سمعت
سيف يطل بالقدر : ما خليتي لنا شوي؟؟
أمه تطقه على راسه : اذلف لا تبرد العصيدة و إذا جيت بحط لك

اخو أم محمد الله ارزقه ببنت والحين مرته في النفاس وهالبنت ما شاء الله تبارك الله جميله والشعر كثير وعيونها كبيره مع أنها توها باللفه بس عيونها مميزه كبيره وسوادتها كبيره
دخل سيف بيت خاله وهو ينادي : خالي.... يا اهل البيت.... سيف ولد ام محمد وصل لكم بالعصيدة......... وين الناس ؟؟؟؟؟؟
الا مرة خاله تناديه : تعال سيف تعال يالشيخ أنا بالمطبخ
جا سيف وحب راس مرة خاله : شلونج خالتي عساج بخير .. هذي امي تسلم عليج وتقول لج هالعصيدة اكليها بروحج ولا تعطينها خالي بس انتي
ضحكت مرة خاله : ههههههههههههه حسبي الله على إبليسك هههههههههههه ليش مسكين خالك ما تبي يذوق العصيدة ؟؟؟؟
سيف وهو شوي بيخربط الا بدخلة الخال : لا أصلن خالي هو الخير والبركة وهو اللي لازم يأكل العصيدة لأنه هو الابو
الخال : هههههههههههه حيا الله من جانا و حش فينا.. شلونك سيف وشلون أمك وأخوانك
سيف وهو يحب خشم خاله : الله يحيك ويبقيك كلهم طيبين ما يسألون الا عنكم
عايشه وهي تحط العصيده على الطاوله : سيف ابوي روح انتبه لنوره على بال ما احط الغدى لخالك
سيف وحس انه رجال كبير يعتمد عليه : إن شاء الله

راح الغرفه اللي فيها نوره وهي كانت في ذاك الوقت عمرها شهر و كم يوم يعني صغيرونه
شافها وهي نايمه وجا بيبوسها على خدها إلا فتحت عيونها قام يطالع فيها مستغرب على عيونها الكبار....... شوي والا : وواااااااااااااااااااا تصيح نوره بقمة راسها
ويخترع مسكين وما يعرف يسكتها وهي صياحها مزعج الا بدخلة أمها وهي تضحك يوم شافت سيف راجع على ورى من الروعه : هههههههه بسم الله عليك لا تخاف هي كذا على طول.. بس أنت اللي بتربيها اذا كبرت ههههههههههه
طالعها سيف وهو فاتح عيونه على الاخير : صوتها مزعج اول شي بسويه اذا كبرت بلزق حلجها باللزقه
ام نوره : كفو عليك والله ههههههههههههههههههه



ما راح احط اسأله تخمينيه بس اذا اعجبتكم البدايه بليز لاتنسون تردون على اختكم سالفتي سالفه