رواية:: محد يهمني واللي براسي بسويه !

الجزء التاسع




احمد


دقيت على اهلها ..
كلمت اخوها الكبير عبدالرحمن ..
بصراحه خفت وانا اكلمه ..
لانه قال لي ليش ماعلمتونا قبل لاتولد ..
يعني قصده اول ماوديناها للمستشفى ..
وسألني بعد من اللي معي من خواتي ..
ياويلي ويلااااااااااااااااه .. ياويلي ويلاااااااااااااااااااااه ..
والله لو يدري اخوها أننا انا وبندر متعاونين عليها ..
قسم قسم ان يذبحنا ..
بس الحمد لله .. الله ستر ولطف ..
وكذبت عليه كم كذبه بيضا .. ابيض من القشطه بعد ..!!!
بعد ماانهيت المكالمة ..
دورت على بندر .. بشوف وش كانت تبغى فيه رنا ؟؟
مالقيته ..وين راح له هاللي مايستحي على وجهه ..
بس انا منقهر من رنا ..
ليش ترفض تقابلني وانا اللي طالب مقابلتها ؟؟
وتوافق تشوف بندر مع انه ماطلب منها هالشي بالعكس هي اللي مناديته ؟؟؟
بسيطه .. الايام بيننا يارنا ..
دقيت على بندر بشوف وين ذالف ؟؟
احمد : الووووووو
بندر وهو يضحك : هلا والله..
احمد : اهلين .. وينك ؟؟
بندر : ليش وش تبي ؟؟؟
احمد : انا سألتك وينك ؟؟ لاتقعد تتفلسف علي ؟؟ رد على قد السؤال ؟؟
بندر : ان شاء الله عمي .. بروح البيت ..
احمد : وش عندك ؟؟ الا تعال وش تبي منك رنا ؟؟
بندر : ياشين الغيرة زائد اللقافة .. انت الحين وش دخلك ؟؟ منقهر لانها تحبني اكثر منك ..
ينرفزني هالولد ..
انقهرت منه : والله والله ثم والله يابندر لو انك قدام عيني كان عطيتك كف ماتنساه طول عمرك ..
بندر وهو متشقق من الضحك : هين .. هاذا ان شفتني .. انا خلاص بحماية ولي العهد ..
احمد : اقول لايكثر .. وش عندك بالبيت ؟؟
بندر : رنا قالت لي اجيب سديم لها ..
تذكرت شي معهم : بندر كم يبغى لك وتوصل البيت ؟؟
بندر: عشر دقايق ..
احمد : تكفى بندر جب معك مرام او سارة .. لاني دقيت على اهل رنا وقالوا لي من معكم من البنات ؟؟ قلت لهم امي بكبرها مو البنات .. انت جيب وحده من البنات .. وعلى بالي ان امي جايه معنا ورجعت معك .. اتفقنا ..
بندر : اوكي .. شي ثاني ..
احمد : سلامتك ..
بندر : بااااااااااااااااااي ...
سكرت بوجهه مايستاهل اقوله باي ..
والا انتم وش رايكم ؟؟









رنا


غفيت لي شوي قبل لايجون اهلي ..
ما أمداني اكمل غفوتي الا الباب ينفتح بكبره .. الظاهر لو منكسر ماعندهم مشكلة ..
تتوقعون ان اهلي بيدخلون علي هالدخلة هاذي ..
مستحييييييييييييييييييييييييل ..
هذولا اهل زوجي ..
كلهم جايين ..
خالتي .. مرام .. وسارة .. وووو....
ونورة ...
وووووو..
وحبيبة قلبي سديم ..
بس حنين مو موجودة ..
اكيد مع خوالها برى ..
ياسرع مايجوووووون ..
دخلت اول شي خالتي ..
جت على طول وضمتني وجلست تصيح ..
بعدها شفت مرام تفك نقابها وتسلم سلام حار ...
بعدها سارة سلمت علي بنقابها .. سلام جدا عادي ..
بعدها ..
تتوقعون من بعدها ..
اكيد من بعدها ؟؟
من بيكون اصلا ؟؟
مافيه احد تريحوا ..
نورة سحبت واحد من الكراسي وجلست ..
ماهمتني هي ووجهها اهم شي خلوا لبنتي فرصة عشان اشوفها ..
جلست سدومه جنبي وجلست احبب فيها واعضض الين ماقلت بس ..
سافهتهم ومعطتهم اكبر طاف في الحياة ..
ونورة مغير كل شوي تأفف وتقول : الحين ورى مايجيبون البزر .. نبي نشوفه .. وراهم الحين مايجيبونه .. تقل بناكله الحين ..
وكل شوي وهي عايده هالاسطوانه ..
خالتي والبنات ماقالوا شي .. لانه ماشاء الله مايحتاج نورة مكفيه وموفيه ..
بس بصراحه رحمت خالتي .. كل شوي وعيونه تغورق ..
قلت يارنا تعوذي من ابليس وجيبي لهم البزر عشان يروحون ينامون ..
حتى انا عشان افضى لأهلي اذا جو ..
مادريت ان السالفة بتطول ..
والله لو اني داريه كان ماجبته يشوفونه ..
رنيت الجرس وجت الممرضة ..
طلبت منها تجيب الولد ..
جلسنا ننتظر وننتظر وننتظر ..
رنيت الجرس مرة ثانية جتني الممرضة نفسها ..
رنا : وين بيبي .؟؟ انا في قول جيب بيبي ..
الممرضه : بيبي برى مع بابا ..
رفعت لها خشمي .. وانا رافعه صوتي : وشو ذا ابابا ؟؟ مين بابا ؟؟ هيه ياغبيه مافيه بابا برى .. جيب ولد منه بسرعه ..
ارتاعت الممرضه وتحسب انه بيخطفه ..
انا كنت ادري من معه ؟؟..
بس حبيت الممرضه تجيبه غصب منه ..










احمد

جاب بندر اهلي كلهم ..
ماتوقعت يجي احد ..
زين انهم جو .. عشان يعرفون اهل رنا اننا كلنا معها وماخليناها بروحها مثل هاذا الظرف ..
المهم جلس جنبي بندر ومعه حنين ..
والله حنين قمر بس اللي يشينها طبايع امها ..
والا والله عسسسسسسسسسسل هالبنت .. واموووووت فيه ..
عسى الله يهدي امها ..
غريبه تأخروا اهل رنا ..
وانا اهوجس وفكرة تجيبني وفكرة توديني ..
مادريت الا الممرضة تدخل الغرفة بعدين تطلع ..
سألتها : ايش يبغى مدام ..
الممرضة : يبغى بيبي ..
احمد : خلاص روح ..
فيه فكرة براسي بسويها يعني بسويها بس خلي الممرضة تجيب البيبي على قولتها ..
اول ماشفتها مقبله على الغرفة ..
على طول قمت وشلت البيبي منها ...
احمد : خلاص انا في دخل بيبي غرفة .. خلاص انتا روح ..
الممرضة : انتا بابا بيبي ..
احمد : ايوه ..
اشوى انها مو الممرضه الاولى كان كشفتنا .. لانه رنا قايلة لها ماتبي تشوفني ..
حضنته وجلست وقعدت اطالع فيه ..
وبندر مغير كل شوي وهو عطني أياه .. ابي أشوفه ..
آذاني هالبندر ..
قمت وابعدت عنه بكرسي ثاني ..
متردد ادخل والا ما أدخل ..
ادخل والا ما أدخل ..
ادري رنا مراح تقول شي عند اهلي وبتسكت ..
بس ولو مابي ازعلها ..
ادري انها بتزعل مني زود على الزعل اللي فيها ..
وانا مابين ادخل والا ما أدخل ..
بسم الله مادريت الا اللي يبي يسحب مني البزر ..
رفعت راسي ..
الممرضه تبي تاخذه غصب ..
احمد : خير خير ايش ابغى .؟؟
الممرضة : ماما قول انتا مو بابا .. بسرئه جيب بيبي والا نادي سرطه ..
سفهتها ومشيت الين ماوصلت الغرفة ..
على طول من دون مقدمات ..
دخـــــلـــــــت ....!!!!!!!













رنا


قاعده على اعصابي ..
الله يستر من هالأحمد ..
ادري بيسوي شي الين يدخل عارفته .. ابو الهواش والمشاكل ..
وانا قاعده افكر بهالمصيبه ..
مادريت الا اللي يدخل وشايل بزر معه ..
طيرت عيوني ...
لااااااااااااااااااااااااااااااااااا ..
احمد ..
والله حرام اللي قاعد يسويه ..
تغطيت على طول ...
يعني مايرتاح الا الين يسوي اللي براسه ..
انزين مابي اشوفه ..
غصب يعني ..
اووووووووووووووووف ..
سكت ولا قلت ولا كلمه ..
بشوف وش آخرتها معك يا أحمد ..
تدرون عاد ماانتبهت للي واره وشايل معه بنت ..
توي اشوفه لما ابعد احمد عن الباب وتوجه لأمه يعطيها البزر ..
هذا بندر ومعه حنين ..
الله يعين راسي ..
يعني مافيه فكه لا من عيالهم ولا من بناتهم ..
جلست اطالع السقف وانا قرفانه حياتي ..
ماامداني افرح بولدتي .. يجون هالاخوين يحوسون فرحتي ..
الله يعجل بجيه أهلي عشان افتك ..















احمد

ادري انها الحين متضايقة .. ومكتمه .. وضايق خلقها ...
والله مو قصدي ...
بس وش اسوي ؟؟ غصب علي والله غصب ...
اول مادخلت شفت الصدمه بعيونها ..
بس على طول تغطت ..
عادي بس اهم شي شفتها ..
قربت من عند امي وعطيتها الولد ..
امي اول ماشافته ..
صاحت على طول ..
يمين يسار .. ابي اهديها .. ماقدرت ..
قولوا انت اصلا متى قدرت على شي ..
استغليت صياح امي .. والتفت على رنا ..
احمد : الحمد لله على سلامتك ..
تخيلوا ماردت علي ..
اقسم بالله ضاع وجهي قدام اخواني ..
تحسفت اني دخلت ..
وندمت الف مرة اني شفتها ..











رنا


صرخت نورة بصوت عالي : رناااااااااااااااااا !!!!؟؟
التفت عليها ..
جاوبتها وانا مصدومه : خير ؟؟ ليش تصارخين ؟؟
نورة وهي معصبه : ليش اصارخ ؟؟ الظاهر انك نايمه .. احمد يقول لك الحمد على السلامه وانتي نايمه ..
التفت على أحمد .. بتأكد من كلامها ..
سألته وانا مو مصدقه اللي قالته : احمد انت قلت الحمد لله على السلامه ..
رد احمد بجفاء واضح وهو يميل خشته : ايه ..
رنا : آسفه والله ماسمعتك .. لاني تعبانه مرة عقب البنج وغفيت .. آسفة والله آسفه .. والله مو قصدي اسفهك ..













احمد


بغيت اتشقق .. بغيت اقطع هدومي قدامها ..
بغيت اقطع جلدي مو هدومي ..
ياناس اذوب انا ..
انصهر ..
اصير اللي تبونه ..
يازين التأسف منها ..
اصلا يازينها وهي تكلمني ..
تكملك وكأنك وحده من خوياتها ..
ماعندها نظام ورسميات ..
ياخي اموت على البنات اللي كذا ..
اروح ملللللللللللللللللللح ..
ابتسمت : لا عادي .. خوذي راحتك .. لا فيه فشيلة ولا شي .. اهم شي راحتك ..
رنا : مشكور ماتقصر عسى عمرك طويل ..
ماقدرت ارد عليها لاني بإختصار عجزت اتحمل آخر دعوة ..
طلعت ..
وعلى طول عالبرادة اللي بالسيب ..
صبيت لي كاس مويه وشربته ..
صبيت كاس ثاني وصبيته على صدري ..
احس اني مولللللللللللللع حرارة ..
بروح للممرضة تعطيني ابرة خافض للحرارة ..
















رنا


اشك انه صاحي ..
والله عندي بندر ارجل منه بمليون مرة ..
احسه فيه رجه على غير سنع .. وتبيلم مو وقته .. وعنده دفاشة زي وجهه .. وعنده تصتيم في غير محلها ..
ياالله لو اقعد اعدد لكم ماراح اقدر احصرها..
نورة : صدق انك ماتستحين احرجتي اخوي وفشلتيه .. وهو حاملك على كفوف الراحه ..
قلت بنفسي : يرحم امك من زين هالراحه اللي حاملني فيها وانتي موجوده .. انثبري واسكتي بمكانك لا اطردك الحين ..
بندر : انتي الحين ورى ماتنطمين لا اقوم اكمل عليك الحين .. ( يقصد نورة )
نورة وهي تحط اصبعها على فمها : انت شرب ولا كلمه تفهم ..
بندر وهو يرفع حواجبه معصب : قلت لك انطمي ازين لك والا والله لا اسدحك جنب رنا .. بس مو ولاده لا .. اسدحك مكسره ..
مرام جت بين نورة وبندر : خلاص انت وياها .. هواشكم خلوه باليت ماتشوفون الحرمة تعبانه ..
قولي والله بس يامرام .. يعني انا اول مو تعبانه .. سبحان الله يغير ولا يتغير ..
دق جوال بندر ..
بندر : هلا ..
شوي الا بندر ينقز من مكانه ويطلع بسررررررررررررعه ..
وش فيه مدري ؟؟
خمس دقايق بس من طلعة بندر ..
الا يدخلون اهلي ..
انصدمت وعرفت ليش بندر طلع ؟؟؟
والله ماجاب روسكم الا اهلي والخافي اعظم ..











احمد

كنت ادور في الاسياب رايح جاي رايح جاي ..
ابي شي يبرد على قلبي ..
اول ماشفت عبدالرحمن اخو رنا من بعيد واقف يسأل الاستقبال عن غرفة رنا ..
وانا اطلع جوالي وادق على بندر ..
بندر : هلا ..
احمد : بندر بسرعه اطلع جى عبدالرحمن اخو رنا بسرعه ..
مابعد سكرت الجوال ..
الا بندر جنبي وهو يلهث : وينه ؟؟ وينه ؟؟ والله لو شافني ليشرشحني ..
احمد : شفه عند الاستقبال .. انت الحين اجلس وهد روعك .. بعدين قل وينه ؟؟
بندر وشكله خايف : الحين عرفت انك اخوي ..
قام وضمني ..
احمد : عشان تعرف قدري ياحمار ..تدري لو شايفك عندها .... والله ان يقلب الدنيا على روسنا ..
بندر : ادري .. حتى انت يا أحمد ماترضاها على خواتك ..
جابها على الجرح وكنه مادرى ..
بندر قالها كذا بس ..
اما انا حسيتها نغزة بقلبي .. صادق يابندر .. مستحيل ارضاها على وحده من خواتي ..
انزين انا ليش اسوي فيها كذا ؟؟
ليش ارضاها لها .. وهي من عرضي .. زوجه اخوي ..
الله يلعن الشيطان كيف خلاني اسوي هالسواة ..
يلعن الحب شو بيذل ؟؟؟؟













رنا


ماصدقت ان امي قبالي ..
جت امي مسرعه وضمتني وجلست تصيح ..
الكل تأثر لصياحها ..
وانا بعد صحت معها ..
قامت خالتي وهدت امي وجلستها على الكرسي وجابوا لها مويه وشربوها ..
بعد ماهدى الوضع عطوها الولد ..
ضمته وحبته .. وجلست مرة ثانية تصيح بس على خفيف ..
ياربيه ليش كل من شافه يصيح ؟؟
ادري انه يشبه مشعل ..
بس انا ماصحت ..
لان ولدي فرحه مابي اصيح عشان شي مر عليه شهور ..
ادري لو تذكرت مشعل راح اصيح ولا راح اوقف صياح الين اموت ..
بس هاذي الدنيا لازم الواحد ينسى حتى لو يغصب روحه .. وهذا اللي سويته انا ..
قربت نورة من امي ومدت يدينها .. تبي تشيل ولدي ..
نورة بكل ادب : ام عبدالرحمن ممكن تعطيني اياه ابي اشوفه ؟؟
الله يستر ..
مدت لها امي الولد ... وانا حاطه ايدي على قلبي لان نورة وهي تشيله مكشره وعابس وجهها ..
اول ماناظرت في وجهه .. ابتسمت ..
على طول ابتسمت معها .. تلقائيا ..
حضنته وجلست مكانها ..
وانا ماشلت عيني منها ..
مدت اصبعها بكل نعومه وتحسست خده ..
نورة بكل طيبه : رنا .. يشبه مشعل .. نسخه .. سبحان اللي خلقه ..
توسعت ابتسامتي ..
الله يحنن قلبك يانورة ..
رنا : سبحان الله ( وانا ابلع غصتي ) راح مشعل الكبير وجى مشعل الصغير ..
نورة والى الآن مابعد شالت عيونها عنه : وش تبي تسمينه ؟؟
حاولت اتقرب منها اكثر واكثر .. وان شاء الله ان الله يهديها : انتي وش رايك ؟؟
نورة : امممممم سميه .. سميه خالد ..
رنا : اشوف ان شاء الله ..
التفت على خالتي : وانتي خالة وش تبيني اسميه ؟؟
خالتي : كيفك يابنيتي .. ولدك وانتي اللي سميه ..
رنا : وانتي يمه ؟؟
خالتي : كيفك ولدك وسميه براحتك ..
مرام : دام ما أحد قال أسم .. انا بسميه ..
رنا : وشو؟؟
مرام : سموه باسل ..
ميلت فمي يعني لا ..
سارة : سموه فواز ..
غمزت لها : اخوي اسمه فواز ... وش قصدك ياحلوة ؟؟..
استحت وحمّر وجهها : والله ماجى على بالي اخوك ..
غمزت لها مرة ثانية : صدقتك صدقتك ... لا تصيحين ..

















احمد


دخلت امها ..
ووراها عبدالرحمن بعد ماسلم علينا ..
بس ..
وقفنا عبدالرحمن اللي كان يبي يدخل ..
احمد : اهلي موجودين ..
استحى عبدالرحمن : آسف ماكنت ادري .. زين انك قلت لي ..
احمد : لا عادي .. ارتاح ارتاح .. اجيب لك كوفي ..
عبدالرحمن : لا شكرا ..
وجلس ..
عبدالرحمن وهو عاقد حواجبه : ليش جبتها لخاص ؟؟
والله الوهقه وش بقوله ذا الحين ؟؟
لكن بندر سبقني : هاذا اقرب شي لبيتنا ..
عبدالرحمن : بس هي سوت عمليه يعني بفلوس .. مو حكومي ..
ادري وش كان يقصد ؟؟
احمد : الفلوس تروح وتجي اهم شي سلامتها ..
عبدالرحمن : انت اللي دفعت ؟؟
احمد : قلت لك مو مهم .. اهم شي سلامتها .. وش تبي تنفع الفلوس لو خسرنا رنا ..
عبدالرحمن : الحين انت ليش تلف وتدور .. سألتك سؤال صريح رد عليه ؟؟
احمد : يعني لو اختي كانت تعبانه وكانت في بيتكم مو راح تاخذها مستشفى وتدفع لها لو كلفك وش كلفك ؟؟؟ خلاص اعتبرها اختي ...
طلعت جوالي بسرعه وكلمت اهلي قبل لا اسمع منه أي رد ..
احمد : انا بالسيارة بسرعه اطلعوا ..
حطيت الجوال بجيبي ..
احمد : تآمرنا شي .. اللي علينا سويناها .. وهاذي بنتكم خلصت عدتها وهي الحين تحت جناحكم .. واعذرونا على القصور .. مع السلامه ..
عبدالرحمن : الله يسلمك .. ماقصرت كفيت ووفيت ..
عطيته ظهري ومشيت للبوابة ..
كل خطوة امشيها احس خنجر ينغرز بظهري ..
كلما ابعدت احس اني انزف زياده ..
حسيت بدوخه قويه ..
جلست على اقرب كرسي صادفته ..
طولت الدوخه ماراحت ..
جو اهلي وشافوني ضام وجهي بيديني ..
مرام : احمد !!
على طول رفعت راسي ..
مرام : وش فيك جالس هنا ؟؟ يالله امش ..
قمت ومشيت معهم ..
مادريت الا اللي قاعد يطبطب على ظهري ..
التفت ...
بندر مايجوز من اطباعه ..
احمد : خير ؟؟
بندر : هونها وتهون يا خوي ..
احمد : امش قدامي لا اترفس ببطنك ..













رنا


ماصدقت انهم طلعوا ..
اووووف ..
اول ماطلعوا .. دخل اخوي عبدالرحمن ..
سلم علي ..وشال الولد من امي ..
وقال نفس الكلام اللي قالوه قبله ..
عبدالرحمن : سبحان الله .. مشعل اللي ماراح ولاجى ..
رنا : كلن يقوله ..
عبدالرحمن : هاه يمه تريحي بنتك وعندك ..
امي : مراح ارتاح الا الين تطلع من المستشفى ..
عبدالرحمن : بتطلع ان شاء الله ..
امي : ان شاء الله
عبدالرحمن : رنا ..
رنا : سم ..
عبدالرحمن : من اللي دفع ؟؟
سألته وانا مستغربه : وش دفع ؟؟
عبدالرحمن : تستهبلين انتي ؟؟ من دفع حق المستشفى ؟؟
ماني فاهم أي شي من اللي يقوله عبدالرحمن : وش اللي دفع حق المستشفى ؟؟ محد دفع ..
عصب عبدالرحمن : غبية انتي ؟؟
قهرني ليش يقولي غبيه .. رديت عليه وانا معصبه : وشو غبيه ؟؟ لا ماني غبيه ؟؟ فهمني اول بعدين شفني غبيه او لا ؟؟؟
عبدالرحمن وهو ينفخ : انتي في مستشفى خاااااااااااااااص .. ومسويه عميلة .. والعملية في المستشفى الخاص بفلوووووووووووس ..تدرين كم ؟؟ والا اعلمك ؟؟؟
انصدمت خاص وبفلوس ... من جد غبيه .. اجل وشلون جايين اهلي بهالليول يشوفوني .. ومدخلينهم عادي .. اصلا وشلون جايبين البزر عندي اربع وعشرين ساعه .. كلما طلبته جابوه ..
رنا : مدري .. اصلا ماكنت ادري انه خاص .. وش يدريني انا ؟؟
عبدالرحمن : وهذاني علمتك .. انتي اللي دافعه ؟؟
رنا : لا انا مادفعت شي ... اصلا مامعي شي ؟؟
عبدالرحمن : مافيه غيره .. هو اللي دفع ؟؟
رنا : من هو ؟؟
عبدالرحمن : احمد ...
انصدمت احمد !!!
سألته بسرعه بشوف كم دفع : وبكم العملية ؟؟
عبدالرحمن : بعشرة ..
طيرت عيوني .. : عشرة !!!!
امي وهي تشهق : عشرة !!
عبدالرحمن : وش فيكم ؟؟ هاذولا هم الخاص .. كذا اسعارهم ..
رنا : ليش ماوداني للحكومي اصرف ؟؟
عبدالرحمن : سألته ؟؟ قالي هذا اقرب شي لنا ..
رنا : مهوب صاحي منين له يدفع لي عشرة ..
عبدالرحمن : خلاص لاتسوينها سالفة برجع له العشرة ..
رنا : بصراحه يقهر .. من زين راتبه الحين ..؟؟
امي : يمكن انه دافع من فلوس مشعل ..؟؟
عبدالرحمن : لا يمه .. دافع من حسابه ..انا اول شي قلت يمكن من فلوس مشعل .. بس سألته وقالي ..
امي : الله يهديه .. ليش مادفع من حساب مشعل ..
اوووووووووووف .. انا اخلص من مصيبه تطلع لي مصيبه ثانية ..
شكلي ماراح ارتاح ..
امي قامت وشالت سدومه : خلاص بنيتي انتي ارتاحي الحين وبكره ان شاء الله بنجيك من الصبح ..
رنا : انزين .. مع السلامه ..
امي وعبدالرحمن : مع السلامه ...
رنيت الجرس اللي عندي ..
جت الممرضة واخذت الولد ..
اول ماسكرت الباب ..
طفيت النور اللي عندي وانسدحت وتغطيت وغمضت عيوني ..
وووو
وووو
وووو
اندق الباب ..
فتحت على طول عيوني ...
وفتحت النور ..
رنا : من ؟؟
صوت رجال : بأدخل ؟؟
خييييييييييييير ؟؟؟!! وين يدخل فيه ذا ؟؟ لا يكون غلطان ؟؟
ياربيه وش ذا البلشه ؟؟
سكت مارديت عليه ..
اندق الباب مرة ثانية ..
بعدين انفتح ..
على طول انا تغطيت ..
وانا قلبي يناقز بمكانه بيب يطلع من الخوف ..
اول ماشفت اللي دخل عصبت ..
رنا : روعتني .. حرام عليك بغيت اموووووووووت ..
ابتسم ببرائه ولا كأنه سوى شي : آسف والله ماكنت اقصد .. بس ماحبيت اروح وانا عندي شي بقوله لك ؟؟؟
هديت من وضعي شوي : يالله قول وش تبي ؟؟ تراي تعبانه حدي وابي انام ..
تدرون من طلع ؟؟؟
توقعوا من ؟؟؟










طلع بندر ..
بندر وهو يقرب من عند السرير : رنا ممكن تسمينه فراس ؟؟؟
ضحكت من هالاسم : وشو فراس ؟؟ غريب هالاسم ..
بندر : طلبتك رنا لا ترديني .. تكفين ؟؟
اشرت له على عيوني من برى الغطوة : من عيوني الثنتين .. ماطلبت شي .. فراس فراس .. كم عندنا بندر حنا ..
غمض عيونه وهو يقول : مشكورة .. ماتقصرين يا أم فراس .. ههههههه .. انا اول واحد يقول لك يا أم فراس .. هذا شرف كبير لي ..
رنا : خلاص بندر شي غيره ؟؟
بندر : لا سلامتك ..
قلت له وانا اضحك : والحين ممكن توريني عرض اكتافك .. عشان انام ..
بندر : ان شاء الله ..
طلع بندر ..
اما انا قعدت اضحك واضحك واضحك الين عورني بطني ..
هالبندر مجنون رسمي .. زي اخوه بالضبط ..















بعد شهر ...


احمد

مستحيل يمر يومين على بعض .. مانشوف انا وامي وبندر فراس ..
مستحيل ..
حتى خواتي تتجننوا عليه .. بس مستحل ناخذهم معنا ..
خواتي بالاسبوع مرة ..
اما حنا الثلاثه باليومين مرة ..
ماتتخيلون كيف حبيناه .. يمكن لانه يشبه مشعل ..
او يمكن لانه فرفوشي الولد .. ويضحك معنا ..
يمكن ..؟؟
احس اننا طفشنا اهلها ..
لامو احساس الا اكيد .. ؟؟
طبعا لا تسألوني عن رنا ؟؟
لاني من ذاك اليوم ماادري عنها أي شي ..
بموت واعرف عنها شي ..
بموت الا اشوف لو زولها ..
بموت وبموت وبموت .. ولا احد حاس فيني الا بندر .. اللي كل شوي وهو رافع ضغطي يذكرني فيها ويقهرني ..













رنا


تعرفون وشلون بغيت انتحر ..
بغيت اشقق هدومي ..
بغيت امووووووووت منهم ..
انا الحين منحاشه منهم.. وهم لاحقيني..
مايمر يومين الاهم ناطين ..
خالتي وعيالها ..
خير وين عايشين حنا
اوكي ولدكم ماقلنا شي ..
بس مو بهالطريقه ..
حشى ..
مايسوى علينا هالولد ..
بس تدرون ..
والله العظيم اقابل خالتي كل يوم ..
ولا ينط لي احمد ولا بندر كل سنه مرة ...
والله خالتي ارحم لي منهم ..
ولو بحلف اذا جوا بندر واحمد ودهم يدخلون .. بس هه هه هه اخواني لهم بالمرصاد ..













احمد


جاني ظرف بالشغل وماقدرت اروح معهم ..
ميت الا بروح بس ماقدرت ..
راح بندر وامي ..
ولما جيت من الدوام ..
سألت بندر عن فراس : وش اخباره ؟؟
بندر : ودي آكله .. ليت امه تسمح لي .. والله لآآآآآآآآآكله ..
قلت بقلبي : انت ودك تآآآآآآآآآكل الولد .. انا ودي بالام .. ليتها توكل والله لآآآآآآآآآآآكلها ..












رنا


بعد ماراحت خالتي ...
كان فراس نايم ..
نومته بسريره .. ونمت انا معه .. كان الوقت الساعه 10 بالليل ..
قمت على الساعه اربع ..
غريبه ماصاح يبغي حليب ..
قمت بشوف وش فيه ؟؟
فتحت النور ..
وشلته من سريره ..
حاولت اقومه .. ماقام ..
فكيت مهاده ابيه يتحرك عشان يصحصح .. ماقام ..
تخرعت ..
على طول قمت وناديت امي ..
مسكينه روعتها ..
قومتها من النوم ..
وانا اصيح واصارخ : يمه .. يمه .. قومي .. يمه .. فراس مايتحرك ولايصيح .. ماقام من نومته الساعه 10 ..
امي فزت على طول وشالت فراس .. وودته للمغسله .. وانا وراها زي المجنونه ..
غسلته امي عشان يصحصح .. ماقام ..
حضنته امي لصدرها وقامت تهزه وهي تقول : مافيه شي لا تخافين مافيه شي ؟؟
وانا خايفه واقول لامي : طيب عطيني اياه ..
امي : لا لا خليه معي .. روحي قومي فواز .. بسرعه روحي قوميه ..
رفضت اروح .. وجلست اصارخ : يمه تكفين عطيني اياه .. تكفين ...
وامي رافضه .. :مافيه شي مافيه شي ..
تركتني وراحت وانا واقفه بمكاني .. قاعده اتخيل لو مات فراس ..
لو مات فراس .. يعني ماتت احلامي ..
لومات فراس .. يعني ماتت آمالي ..
لو مات فراس .. يعني انا اموت معه ..
وقفت بمكاني ولا تحرك .. عرفت وش هي النهايه ؟؟؟
عرفت وش قاعد ينتظرني ...؟؟
عرفت وش مخبي لي القدر ؟؟؟
خلاص كل شي عرفته ؟؟
وش باقي بس قولوا لي ؟؟
قالوا لي ميت ؟؟ بس انا ما صدقت !!
قالوا ماينبض ؟؟ بس انا عاندت !!!
قالوا لي مجنونه ؟؟ بس انا ماسمعت !!!
الحمد لله على قضاء الله وقدره ..
والله يخلي لي بنتي ..
وان شاء الله فيها العوض ...
رحت لغرفتي وانسدحت على السرير ودموعي على خدي ..














احمد


كنت في الدوام ..
رن جوالي ..
فواز ..
وش يبي هالحزه ذا ؟؟
اوووووف ..
خليته مالي خلق ارد عليه ..
لكنه رن ثانيه ..
قلت اكيد عنده شي مهم ..
برد وبشوف وش يبي ؟؟
احمد : هلا ..
فواز : هلا أحمد ..
احمد : اهلين ..
فواز : وشلونك ؟؟
داق علي تقول لي وشلونك ؟؟ ..
احمد : بخير الحمد لله .. انت وشلونك ؟؟
فواز : بخير .. احمد ؟؟
احمد : هلا ..
فواز : تقدر تطلع من الدوام ..
احمد : ليش ؟؟
فواز : سلامتك .. بس ابيك بشغله صغيره ..
احمد : آمرني ..
فواز : ابيك بمستشفى ( ........... ) اللي ولدت فيه رنا ..
احمد : وش فيه ؟؟ وش صاير ؟؟
فواز : لا تخرع .. ابد مافيه شي .. بس تعال ..
احمد : اوكي مسافة الطريق وانا عندك ..
سكرت السماعه منه ..
طلعت من دون مااستئذن ..
الله يستر ..
لا يكون رنا فيه شي ..او الولد فيه شي؟؟
لا ..
لا .. ما أتوقع ..
فواز صوته جدا عادي ..
اجل وش يبي فيني ؟؟
اووووووووووووووف ..
راسي بينفجر ..
زودت السرعه ..
وسقت السيارة بجنون ..
وانا عقلي مو معي ..
وصلت للمستشفى دخلت الطوارئ ..
لما ماشفت فواز .. ارتحت ..
طلعت جوالي ودقيت عليه : هلا فواز .. وينك ؟؟ انا في الطوارئ ..
فواز : اوكي خلك مكانك انا جايك ..
خمس دقايق ..
فواز : هلا احمد ..
احمد : يكفي فواز من دقيت علي وانت تهلي ... قلي وش فيه ؟؟ تراك روعتني !!!
فواز : طيب انت هد اعصابك ..
عصبت منه : كيف اهديها وانت قاعد تلعب بأعصابي .. تكلم ..
مسكني مع كتوفي وجلسني ..
مسك يدي وبدى يتكلم : احمد .. فراس مات ..
طيرت عيوني : مااااااااات !!!
فواز : ايه ..
عصبت زياده وانا قاعد حواجبي : وتقولها بكل برود ..
فواز : اذكر الله يارجال .. مات كذا من ربي .. مافيه أي شي ..
هناك اخوي عبدالرحمن قاعد يخلص الاجراءات عشان ندفنه ..
ماني مستوعب كل اللي يقوله ..
وش اقول لأمي ؟؟
وش أقول لأخواتي ؟؟
والاهم من كذا ..
وش اقول لبندر ؟؟
والله ان يفضحنا بندر ..
آآآآآآآآآآآآه ياراسي ...
انا لله وانا اليه راجعون ..
حاولت اهدي اعصابي ..
قلت لفواز بكل هدوء : وين فيه عبدالرحمن ؟؟
وقف فواز وهو يقول : تعال معي ؟؟؟
مشيت معه وانا قلبي مقبوض ..
مسكته مع عضده : فواز ؟؟؟
وقف والتفت علي : سم ..
بلعت ريقي .. وجمعت كل شجاعتي وسألته : وشلون رنا ؟؟ عسى بس ماتأثرت ؟؟
غمض عيونه وهو متأثر : ربك يعين بس .. ادع لها ان الله يثبتها ..
آآآآآآآآآه عليك يارنا ...
وش تتحملين لتتحملين ..
ياويلي عليك .. كم شفتي من الهموم .. وانتي توك صغيرة ..
ياليت كل اللي فيك فيني ..












رنا


انهارت اعصابي .. وقعدت اصيح لما شفت امي داخله مع باب الفله من دون فرااااااااااااااس ..
طحت على الارض وانا اضرب الارض بيدي ..
رنا : لا يمه لا .... لا تقولين مات .. يمه تكفين لا تقولين مات ..
قومتني امي من الارض وحضنتني وهي تصيح : اذكري الله يابنتي اذكري الله .. بيعوضك ربي خير ..
جلست اصيح في حضن امي الين جو اخواني ..
عبدالرحمن ..وناصر وفواز .. اللي كانوا بالمستشفى ..
وكلهم متأثرين ..














احمد


دخلت البيت على الساعه وحده ..
مالي خلق احد ..
ولا لي خلق اكلم احد ..
احس اني مخنوق ...
كل هذا مايهم اهم شي عندي مااشوف بندر ..
بس هاذا المهم عندي ...
دخلت الصاله ..
لقيت امي جالسه ..
احمد : السلام عليكم ..
امي : وعليكم السلام ..
جلست بقوة على الكرسي ..
وكأني شايل هموم الدنيا كلها على راسي ..
امي تناظرني ومستغربه : وش فيك ؟؟ عسى منت تعبان ؟؟
ناظرت امي والله ودي اصيح بحضنها بس حاولت اني امسك نفسي : ايه يمه تعبان ..
خافت امي .. جت وجلست جنبي : وش فيك ياوليدي ؟؟ وش تحس فيه ؟؟
اقولها كذا بوجهها والا امهد لها ..
شكلي بأخبطها ولا علي : يمه !!!؟؟
امي وهي على نياتها : سم ...
مسكت يدها وانا اناظرها : فراس مات ..
امي انصدمت وقاعده تناظرني وهي فاتحه عيونها على وسعهن : وش تقول ؟؟ مات ؟؟
احمد : ايه ...
امي : كيف ؟؟؟ وشلون ؟؟ متى ؟؟ تكلم ...
احمد : اليوم .. يقولون مافيه شي ابد .. سبحان كذا مات ..
امي : ورنا وشلونها ؟؟؟
احمد : والله يمه انا ما أدري ..
ماتوقعت امي تكون قويه كذا ..
وتكون اقوى مني بعد ..
بكت شوي وتأثرت ..
مسكت السماعه تبي تكلم ام رنا ..
بس انا منعتها ..
لانه مو وقته الحين ..
الحمد لله هاذي امي وعديتها ..
خواتي كيفهن ..
اهم شي عندي بندر .. وشلون بقوله ؟؟





انتظروني في الجزء العاشر ...

عشان تعرفون وش راح تكون ردة فعل بندر ؟؟؟

بندر اللي تجرأ وسأل هو ولد والا بنت ؟؟؟..

بندر اللي لما درى انه ولد فرح وكأنه ولده ؟؟

بندر اللي علق على الولد وسماه ولي العهد ؟؟؟..

بندر اللي وعد رنا انه مايعلم وشو اللي ببطنها ؟؟

بندر اللي لو سموا الولد بأسمه راح يطلع مثل عمه مودب ومطيع ؟؟؟

بندر اللي ترجى رنا انها تسميه فراس ؟؟

الجزء العاشر


رنا

نمت بأحضان امي .. بعد ماتعبت وانا اصيح واشاهق ..
نمت نومة وحده بتموت خلاص ..
نومة وحدة كأنها بتودع حياتها ..
من جد كنت مرة مرة مرة تعبانه ..
فتحت عيوني بعد ساعات من نومي ..
ناظرت الساعه اللي بيدي ..
كانت الساعه 9 ونص في الليل ..
مسكت راسي بكل يديني وعصرته ولو بيدي كان فتته ..
راسي يعورني وبينفجر من الالم ..
كنت ناسيه كل شي .. ناسيه كل اللي صار ..
تخيلوا قمت اشوف ولدي بسريره او مع امي ..
ورب البيت كنت ناسيه انه مو موجود ..
اول ما ناظرت في السرير ..
تذكرت كل شي ..
تذكرت ان ولدي مو موجود ..
تذكرت قومتي بنص الليل ..
تذكرت صياحي كل الصباح ..
تذكرت دخلت امي وهي جايه من المستشفى ويدينها فاضيه ..
تذكرت دخلت اخواني وهم متأثرين هذا اذا ماكانوا صايحين ..
نزلت دموعي غصب عني ..
والله اني مابغيتها تنزل .. بس غصب وش اسوي ؟؟
رجعت للسرير وكملت صيااااااااااااااااااااااح وانا اشاهق .. لكن بصوت مكتوم .. ليش ما أدري ؟؟








احمد


ضربتها نومة الين الساعة 12 في الليل ..
بتقولون مجنون قولوا ...
بتقولون خبل قولوا ..
بس اهم شي اني ما أفكر .. او أتذكر أي شي من اللي صار اليوم ...
قمت على طول للحمام بدون أي تفكير او تذكر أي شي ..
تروشت على السريع ..
صليت الصلوات اللي فاتتني ..
لبست قميصي ونزلت ..
احس بجوووووووع ..
ان شاء الله خواتي قايمات .. عشان يسوون لي شي آكله ..
نزلت تحت ..
في الصالة ..
مرام بس .. كانت قاعده تحوس بجوالها
وانا اجلس : سلام ..
مرام من دون ماتناظرني : وعليكم السلام ..
احمد : فيه شي آكله ؟؟
برضوه ردت علي من دون ماتناظرني : وش تبي ؟؟
رديت عليها وانا المس بطني : أي شي .. بس بسرعه تراي ميت جوع ..
قامت وخلت الجوال على الكنبه اللي كانت جالسه فيها ..
قمت واخذت الجوال بشوف وش قاعده تحوس فيه ..
اول ماشغلت نور الجوال عشان اشوف ..
ثواني بس .. بعدين حطيت الجوال مكانه ورجعت مكاني ..
وانا احس اني مكتووووووووووووم .. ومتضايق .. وودي اشقق هدومي ..
حطيت ايدي على خدي وانا احاول ابعد صورة رنا عن بالي ..
قاعد احاول بشتى الطرق بس ماقدرت ..
فصرخت صرخه قويه وانا اقول : خلاص اطلعي من بالي .. خلاص مابي افكر فيك ..
طلعت مرام بسرعه من المطبخ ..
ولما شافتني جالس مكاني ولا تحركت ..
رجعت مرة ثانية للمطبخ ... وعيونها فيها الف سؤال وسؤال ..
دقايق جت ومعها صينيه حطتها قبالي :لا .. حطيها في الملحق ..
شالت الصينيه وطلعت من الصالة ..
اما انا قمت وغسلت ايديني ولحقتها ..








رنا

تعوذت من ابليس وقمت ..
صليت العصر والمغرب والعشاء ..
بعدين جلست اقرأ قرآن ..
دخل علي فواز .. يوم شافني اقرأ طلع ..
لما خلصت قاريه طلعت للصالة بشوف فواز اذا موجود او لا ..
خسارة مو موجود ..
ودي اتكلم مع احد .. ودي اسولف مع احد ..
ودي افضفض عن اللي بداخلي ..
تذكرت زمان اول ..
يوم كنت اطفش وابي احد اسولف معه .. كنت اروح لغرفة سارة ومرام ..
الله يرحم زمان اول ..
جلست في الصالة وانا افكر واهوجس ..
تذكرت بنتي ودي اشوفها ..
احس اني من زمان عنها ..
فتحت غرفة امي .. شفتها نايمه على الارض ..
ياقلبي عليها .. مسكينه .. لا أبو ولا أخو ..
اللي يصبر قلبي .. ويعيني عليك يا سدومه ..









احمد


جلست آكل وانا مالي نفس للأكل ..
قمت بشوف إذا سيارة بندر موجوده او لا ..
اووووووووووف ..
مو موجوده ..
الله يعيني عليه ..
وش ابقوله ذا الحين ؟؟
التفت ابدخل إلا اشوف نور سيارة جاييه ..
لا يكون بندر ..
دخلت وسكرت الباب بهدووووووووووء ..
رجعت للمجلس ..
جلست وانا اتنهد وافرك يديني ببعضها ..
متوتر حدي .. وما أبي اتواجه مع بندر ..
انتظرت بندر يدخل علي بالملحق .. مادخل ..
لايكون مو هو راعي السيارة ..
يمكن ..
قعدت اقلب في القنوات الين الساعه وحده ونص ..
اصلا عقلي مو معي ..
حتى قلبي مو معي ..
حسبي الله على من بلاني هالبلوة ..
غريبة وين بندر ؟؟
معقوله الى هالحزه مارجع ..
يمكن جى بس ماسمعت الباب ..
قمت بتأكد ..
سيارته مو موجوده .. الله يستر ..
رجعت مرة ثانية للمحلق ..
ماكملت خمس دقايق الا اسمع صوت الباب يتسكر ..
حسيته سكر على قلبي من الروعه اللي جتني ..
ياربي لطفك .. ياربي عونك .. يارب الصبر منك ...
دخل وهو شاق الحلق ويوسع ابتسامات ..
بندر : لا يكون خنتني ورحت مع امي تشوفون فروسي .. بسرعه اعترف ..
ناظرته للحظات بدون ما أرد عليه ..
جلس جنبي : حمّـــــــود .. وش فيك ؟؟ شكلك يقول توك صاحي .. عيونك مفقعه ..
رديت عليه وانا احس العبرة خانقتني : مافيني شي ؟؟
بندر : انزين رحتوا اليوم ؟؟
سويت نفسي غبي : لوين؟؟
بندر : تستهبل .. لفروسي .. يعني لوين ؟؟
احمد : ليش وين كنت فيه انت ؟؟
بندر : ابد .. بس اني طالع من الظهر بإستراحه مع اخوياي .. وتوي راجع .. قلت يمكن رحتوا لفراس ..
احمد : لا لاتخاف مارحنا ..
تنهد بندر وكأنه ارتاح ..
احمد : وش فيك ؟؟
بندر : زين انكم مارحتوا عشان نروح بكره جميع ..
قلت له وانا ضايق خلقي : وهو حلى كل يوم ناطين عندهم .. خلاص ماراح نروح .. تفشلنا قدام اهلها ..
بندر وهو يحط اصبعه على مخه : كيفك لاتروح انت .. نروح انا وامي مافيه مشكلة ..
هذا الحين وشلون افهمه ؟؟
احمد : امي قالت نفس كلامي .. ماراح تروح مرة ثانية ..
بندر وهو يغمز لي : اكيد انت لاعب بعقلها ... امي منين بتجيب هالكلام الا منك ..
احمد : بندر عن السخافه .... اسمعني بقولك شي .. بسسس
وسكت
بندر : بس ايش ؟؟
احمد : ابيك تكون قوي .. واقوى مني بعد ..
بندر : قول .. وش صاير ؟؟
احمد : اوعدني بندر ماتسوي صجه ولجه ..
بندر : انت قول بعدين انا اقرر ..
احمد : ادري وش اللي راح تقرره ؟؟ بس مابيك تسويه ..
بندر : وش ابسوي ؟؟ تكلم يالله عاد ..
احمد : ادري انك بتصيح ..
بندر وهو يضحك : هههههههههه اصيح .. هيه انت .. ترى ماني حرمه عشان اصيح .... يالله قول وبتشوفني اقوى منك .. بعدين ليش تقولي بتصيح ليش انت صايح قبلي ؟؟
احمد : لا ماصحت ..
بندر : خلاص اجل اكيد انا ماراح اصيح .. قول يالله وشو ؟؟
خبطتها بوجهه ولا علي منه : فراس مات !!!!
ابتسم لي ابتسامه كبيرة ماتوقعتها ..
بس شوي شوي كأنه بدى يستوعب اللي قلته ..
بالتدريج اختفت الابتسامه نهائياً ..
ومابقى غير علامات بوجهه غير مفهومه ..
ماقدرت افسرها ..
قعد يطالعني حوالي خمس دقايق .. وانا العبرة خانقتني وما أدري وش اقول ؟؟
خفت يصيح قدامي .. والله لو صاح لأصيح معه ..
لاني من الصبح وانا خانقها .. وابي افك هالصيحه عشان ارتاح ..
لما شفته طول وهو يناظرني .. تجرأت وصفقته كف على وجهه عشان يصحى ..
ولا كأني سويت شي ..
الى الآن مبلم ..
بصراحه خفت عليه ..
ليتني ماقلت له بهالليل ؟؟
الله يستر وش راح يصير له الحين .؟؟؟
لو صار له شي .. راح يكون كله مني ..
قام من عندي وطلع من الملحق ..
لحقته .. خفت انه يطلع برى ..
وانا مو ناقص اقعد ادوره بهالشوارع اشوف وين راح له ؟؟
اشوى يوم شفته دخل العمارة رجعت لملحقي وانا مخنووووووووووووووووق وتعبااااااااااااااااااااان حدي ..







رنا

لما حسيت انها تضايقت من تبويسي ..
غطيتها وطلعت من غرفة امي ..
مريت على غرفة فواز لقيت النور طافي ..
مريت على غرفة ناصر لقيت النور طافي ..
ياربي كيف اقضي هالليلة الحين ..
المشكلة ما اقدر ادق على احد هالحزه ..
جلست في الصالة ..
مابي اتذكر أي شي ابي بس انام .. والنوم مستحيل يجيني ..
مافيه الا اقوم ادقدق على راح يرد علي ..
وبشوف من قايم هالحزه ..
رحت لغرفتي ..
اول مادخلت سمعت الجوال يرن ..
بلحق عليه قبل لا ينقطع .. للأسف مالحقته ..
شفت شاشه الجوال ..
5 مكالمات لم يرد عليها ..
فتحتها ابي اشوف من هو اللي يدقدق هالحزه ..
طيرت عيوني !!!
وش يبي ذا هالجزه ؟؟
الله يستر ..
مابعد كملت تساؤلاتي .. الا دق الجوال ..
بندر يتصل بك ..
ترددت ارد او لا ..
في الاخير رديت عليه بصوت طبيعي جدا ولا كأن صار شي : هلا ..
بندر وصوته جدا طبيعي : السلام عليكم
رنا : وعليكم السلام .. هلا بندر ..
بندر : هلا فيك .. وشلونك ؟؟
رنا : الحمد لله انت وشلونك ؟؟
بندر وبدى صوته يتغير : انا الحين مو مهم اهم شي انتي ...
حسيت فيه شي غير طبيعي : بندر انت فيك شي ؟؟
ساكت ولا رد علي ..
خفت لايكون اللي في بالي صحيح ..
سألته وانا خايفه من رده : بندر وش فيك فهالوقت المتأخر ؟؟
بندر وباين انها خانقته العبره : رنا !!!
رديت وانا خااااااااااااااااايفه من اللي يبي يقوله بس قويت نفسي وتكلمت بثقه : هلا بندر .. تكلم وش فيك ؟؟
اداري مشاعره تقل هو اللي مات ولده مو انا ..
تكلم بكلام متقطع بس فهمته : فــ ر ا سسسس ووويــــ نــــ ههه
حاولت اكتم صيحتي ماقدرت ..
فشهقت شهقه خلت بندر يشهق نفسها او اقوى منها بعد ..
نزلت دموعي بهدوء على خدودي ..
اما بندر سمعت منه صوت انين خاااااااافت ..
كلمته بصوت مبحوح : بندر .. تسمعني .. انت على الخط ؟؟..
ولا كأني اكلم احد ..
بس قاعده اسمع صوت صياح وكلما له يزيد ..
لما سمعته دخل في نوبة بكاء وبصوت مسموع بعد ..
خفت عليه وكلمته بصوت عالي : بندر ... بندر اذا كنت تسمعني رد علي .. بندر لا تخوفني عليك ..
انقطع الاتصال واكيد بندر هو اللي قطعه ..
نسيت نفسي ونسيت ولدي اللي مات ..
كل تفكيري ببندر .. الله يسترعليه ..
لايكون برى البيت وهو يكلمني ..
ياربي الحين وش اسوي ؟؟
مانقصني الا انت يابندر ..
ما اقول الا الله يصلحك ويهديك ..
دقيت عليه ودقيت لكنه مايرد ..
جلست افكر وشلون اتطمن عليه ..؟؟








احمد

انسدحت في الملحق وغمضت عيوني ..
ورحت بعيد .. بعيد مره .. ابعد مما تتخيلون ..
تتوقعون رحت لوين ؟؟
ابقولكم بس البدايه بس رجاءا لا تطلبون مني اكمل للنهاية ..
لاني مستحيل اكملها ..
تذكرت قبل ايام من وفاة مشعل ..
كيف كان مريض زي أي مريض عادي ..
حرارة ورشح وزكام ..
كلنا نمرض ..
بس ابد ماتوقعنا انه يموت من هالمرض ..
كان يسولف علي سوالف كنت ذاك الوقت اعتبرها غبيه ..
لكن الحين عرفت انها كانت في محلها ..
وكأنه داري انه بيموت ... او على الأقل حس ان الموت قريب ..
حسيت احد دخل الملحق ..
فتحت عيوني ..
مرام تمد لي الجوال : ساعه وهو يدق ولا أحد لمه ..
اخذت الجوال منها وانا الى الآن منسدح ..
سألتها : من هو ؟؟
مرام : مدري ماشفت من اللي داق ؟؟
اول ماشفت المتصل فزيت وجلست على حيلي ..
ماصدقت !!
معقوله !!
مرام وهي الى الآن واقفه : وش فيك ؟؟ من هو المتصل عشان تفز هالفزه ذي ؟؟
احمد : اطلعي .. اطلعي ..
مرام : الحمد لله والشكر ..
وطلعت ..
قعدت افكر اتصل وألا انتظر ..
صبرت خمس دقايق بس مادق ..
ماتحملت .. ودي ادق .. اصابعي تحرقني ..
توكلت على الله ودقيت ..
انتظرت وانتظرت وانتظرت ..
ووو








ووو








وجاني صوتها ثقيل وتعبان : هلا أحمد ..
تحمست وانا اتكلم : هلا فيك ..
رنا : احمد .. بندر موجود بالبيت ..؟؟؟
تضايقت لما سألت عن بندر ..
يعني هي مادورتني .. داقه تدور بندر ؟؟
ليش مادقت علي جواله ؟؟
احمد : الا موجود .. بغيتي شي منه ؟؟
رنا وهي بسرعه تكلم : تكفى احمد .. رح شوفه هو حي والا ميت .. تو دق علي وهو يصيح .. وانا خايفه عليه لاني ادق ولا يرد علي .. بسرعه احمد رح شف ..
طيرت عيوني من كلامها .. بندر دق عليها ويصيح مو معقول ..
قمت بسرعه ورقيت على طول فوق لغرفته ..
ورنا الى الآن على الجوال ..
فتحت الباب .. شفت بندر منسدح على السرير ومغمض عيونه ..
فتح عيونه وقعد يناظرني .. بعدين لف على جهة اليمين : اطلع وسكر الباب ..
ماحبيت اتكلم او اقول أي شي ..
طلعت وسكرت الباب مثل ماقالي ..
رجعت لرنا اللي كانت تنتظر على الجوال : هلا رنا .. تطمني مافيه شي .. دخلت عليه لقيته منسدح وشكله بينام ..









رنا


حسيته وهو يكلمني انه ضايق خلقه ..
فحبيت اساوي بينهم .. مثل ماسألت عن بندر بسأل عنه ؟؟
اكيد حزت في خاطره اني دقيت اسأل عن بندر .. ولا سألت عنه .. والمشكله جواله بعد ..
تجرأت ولأول مرة : وشلونك أحمد ؟؟ بشرني عنك ؟؟
حسيت اللهفه بكلامه : بخير جعلك بخير .. كنت بدق عليك بسسسس ..
رنا : بس أيش ؟؟؟
احمد : خفت انك في حالة ماتسمح انك تكلمين او تردين على احد ..
على بالي مسويه قويه واعرف بالاصول : مهما كان يا أحمد .. انتم اهلي واللي يضرني يضركم واللي يضركم يضرني .. برد عليكم ولو اني على فراش الموت ..
احس ان راسه كبر زياده عن اللزوم ..
اقسم بالله اني قلت هالكلام من الطفش اللي فيني .. وما صدقت احد يتكلم بس ماتوقعت اني احمد هو اللي يكون من ضمن الاشخاص المرغوبين في اني اتكلم معهم ..
احمد : من يوم يومك وانتي اصيلة وراعية واجب .. ماهو غريب يارنا ..
رنا : تسلم ..
ماحبيت اطيح الميانه مرة وحده : تأمرني شي ..
احمد : سلامتك .. وانتبهي على نفسك وعلى سديم ...
رنا : ان شاء الله .. مع السلامة
احمد : مع السلامه
سكرت وانا اتنهد ..
وراي وراي مافيه فكه ..








احمد

سكرت منها وانا شاق الحلق ..
آآآآآآآآآآآآآآآآآآآآآههههههههه
واخيرا حنيتي علينا يارنا ..
واخيرا عجبناك ..
قعدت ادور في الصالة الفوقية وانا فرحان وناسي كل شي حزين ..
شفت نور غرفة البنات مولع ..
دقيت الباب ودخلت ..
سارة نايمه اما مرام معها الجوال وقاعده(تحورف ) فيه .. يعني تشتغل فيه ..
رحت للتسريحه وقعدت أناظر وجهي ..
مستانس .. فرحان ياناس .. فرحان ..
ويحق لي والله ..
من الوناسه ..
سحبت الجوال من يد مرام ..
كذا بس فضاوة زائد شقاوة ..
صرخت مرام بدلع : جيب الجوااااااااال ..
طلعت لها لساني : لااااااااااااااااااااااااااااااااااااااااااااااااا اااااااا..
ماحبيت اشوف وش قاعد تزين الا لين أسألها : بشوف وش قاعده تسوين ؟؟
مرام قامت بتآخذه مني : لا لاتشوف .. انا اقولك بس هاته ..
احمد : يالله قولي اول شي بعدين اعطيكي اياه ..
مرام وهي تمد يدها : قاعده اسوي عرض لصور فراس أبرسلها لرنا ..
على طول شفت الجوال .. فعلا نفس كلامها ..
هذا العرض نفس اللي شفته اليوم العصر ..
اذا كنتوا تذكرون ..
مديت لها الجوال وانا اقول : لاتتعبين نفسك ..
مرام وهي تآخذ الجوال : مو شغلك التعب علي انا مو عليك ..
رحمتها .. الحين لو بقولها انه ميت .. وش راح تسوي ؟؟
احمد : مرام ..
ردت علي وهي تناظر الجوال : نعم ..
احمد : ناظريني طيب ..
رفعت راسها بعصبيه : وش تبي ؟؟ انت اليوم اصلا شكلك مو طبيعي من يوم شفتك قايم لي الساعه 12 وانا غاسله يدي بصابون ..
وقفت عند الباب بقولها وانحاش .. لاني مالي خلق وجع راس : انزين اسمعيني بس انتبهي ..
مرام : قول .. والله انت ماعندك الا الدجه ..
بتعرفين الحين وش هي دجتي ؟؟
احمد : فراس تعب عليهم البارح ويوم ووده المستشفى لقوه ميت .. يعني فراس انسيه .. مافيه .. بح ..
طلعت وسكرت الباب وراي حتى من دون ما أشوف ردت فعلها ..
رحت لغرفة بندر .. فتحت عليه الباب ..
لقيته نايم ..
طفيت النور وسكرت الباب ..
رحت لغرفتي توضيت وغيرت قميصي ...
ونزلت بالصالة انتظر آذان الفجر ..
وبكذا انتهيت من اخواني كلهم .. بتقولون بقى سعود ..
لاتخافون قالت له امي ..
يوم رقيت الظهر انام ..











بعد شهر من كل هالاحداث ....


رنا


الحياة عندي تساوت ..
الاحد زي الاربعاء ..
الخميس صار زي الاثنين ..
صارت عندي الحياة مملة خصوصا عند اهلي ..
مافيه بالبيت الا انا وامي واخواني الاثنين .. ناصر وفواز ..بس ..
لا .. نسيت سدومه ..
يعني امي حرمة كبيرة ماراح تقابلني اربع وعشرين ..
انا احب اسهر .. وامي تحب تنام في الليل ..
وش ازين في الليل لحالي بالله عليكم ...
قمة الطفش ..
في الاخير قرت اكمل دراستي ..
انا بس درست اولى ثانوي .. بعدها فصلت .. كرهت شي اسمه دراسه ..
مو عين .. بس كذا ماحبيتها ..
بس الحين قررت اكمل .. وش راح يضرني ؟؟؟ الا بشغل نفسي لايقضي علي الملل ..
شاورت امي في الموضوع ..
رحبت امي بهالفكرة واستانست كثير ..
بعدين قلتها لأخواني .. حتى هم فرحوا لما دروا ..
الدراسة راح تبدأ بعد شهرين ..
الله يعيني ويصبرني .. الين تبدأ الدراسه ..









احمد ..

حايس حوسه غير طبيعيه ..
حنا الحين في إجازة ..
واهلي يبون يسافرون .. وانا مالي خلق سفر وروحات وجيات ..
بس امي طلبتني .. ومااقدر اردها ..
المشكلة ماعندي اجازة في العطله ..
اجازتي تبدا مع بداية الدراسه ..
كل اخوياي خذوا بالعطلة ..
اما انا فضلتها مع بداية المدارس ..
بس للأسف مادريت عن اهلي عندهم نية سفر ..
احمد : يمه والله ما أقدر .. كلمت رئيسي رفض ..
امي : بس ياوليدي خواتك طفشانات .. من عقب حمل رنا الين ولدت .. وهن ماطلعن ولا راحن ولا شي ..
احمد : طيب يايمه انا وش اسوي الحين .. يعني اطلع اجازة غصب عشان يفصلوني ..
تكلمت امي واحس ان الدنيا صاكه وجهها : خلاص لاتنفصل ولا شي .. بكلم اخوك سعود ..
ميلت فمي .. اكيد الحين امي زعلت ..
خطرت لي فكره بس على الله امي توافق ..
احمد : يمه ليش مايوديكم بندر .. بندر كبير ويعتمد عليه .. يعني ماراح تضيعون معه ..
امي وشكلها ماعجبها الكلام : مالقيت الا بندر .. خله بس يسنعنا هنا .. تبيه بعد يسافر بنا .. لا والله ماعلي عازه يقعد يمشينا على هواه ومايخلينا براحتنا ..
فشلت خطتي يعني مابقى الا سعود وان شاء الله يوافق ..









رنا


قررنا نخطب لناصر ..
واخيرا بيدخل فرح ببيتنا من عقب اللي صار لي ..
بدت امي بالمكالمات وبالأتصالات وبالسؤال عن بنت تناسب ناصر ..
لان ناصر انسان هادي ومعاملته هاديه واسلوبه بعد هادي ..
عمره ما انفعل او صرخ على احد ..
حتى يوم يضيق صدره مايبان عليه ..
ولو تلاحظون ماجبت سيرته ابد لان مافيه شي اقوله عنه ..
عشان كذا قلت لامي دوري له وحده نص لفه .. يعني مخروشه فيه شوية هبال على ثقل .. بس ماتكون خفيفه .. عشان مايجيبون ولد على الصامت ..
لازم يكون خليطي ..
بعد اسبوع من التدوير والتمحيص لقينااااااااااااااااااااها ..
اللي دلتنا عليها تقول انها توها متخرجه من الكليه قسم تاريخ ..
طويله والبياض وسط وسمينه شوي .. وشعرها اسود وقصير الى نهاية رقبتها ...
كل هذا مو مشكلة اهم شي انها طويله ..
لان نصور شرطه الوحيد انها تكون طويلة تناسب لطوله ..
المهم دقت عليهم امي وكلمت ام البنت وقالت لها ان ندور لولدي وناس دلونا عليكم .. نبيكم تحددون لنا يوم عشان نجي نشوف البنت .. والله يكتب اللي فيه خير ..
قالت لها ام البنت : حياكم الله بأي وقت .. ويوم الثلاثاء شرفونا والله يكتب الصالح لنا ولكم ..









احمد

الحمد لله ان سعود مآخذ اجازة والا كان من جد توهقت ..
لان امي راح تزعل علي ..
واعرف امي زعلهاااااااااااااااا شيييييييييييييييييييييين ..
واذكروا هالكلمة (امي زعلها جدا جدا جدا شيييييييييييييييييييين )
بس الوهقه الصدقيه لما طلبتني امي قبل لايسافرون بيوم ..
تتوقعون وش تبي فيني ؟؟؟
انا ادري !!
واكيد انتم بعد تعرفون ؟؟
دخلت عليها غرفتها وجلست على السرير : سمي يمه .. قالوا لي البنات انك تبيني ..
جلست امي جنبي : ايه ياوليدي .. دريت اننا بكره بنسافرمع سعود ؟؟
احمد : ايه قالي سعود يوم كلمته البارح .. تروحون وترجعون بالسلامه ..
امي : انزين ماسألتني وش ابي فيك ؟؟
على بالي اتغيبى : اكيد عشان تقولين لي بسافر بكره .. صح ؟؟!!
امي حطت يدها على كتفي : انا ادري انك داري وقاعد تستهبل علي ..
كشفتني امي ..
ضحكت وانا مفتشل : هههههههههههههه يمه صدقيني مدري ..
امي : ليش ضحكت اجل ..
احمد : يالله يمه قولي ..
امي : ابيك تفكر بالعرس ..
بوزت : يمـــــــــــــــــــــــــــه ..
امي : وشو يمه ؟؟ مو انت قلت لي اذا ولدت رنا .. هذاها ولدت وطلعت من الاربعين والحين لها اكثر الشهر .. وش تبي بعد ؟؟؟
وعشان افتك من اصرار امي : خلاص خليني افكر ..
امي : وانا وشوله مناديتك .. ابيك تفكر الين نرجع عشان اذا جيت ابدور لك ..
تسويها امي ..
فتداركت الموضوع : يمه انا اللي بدور لي .. لا تتعبين نفسك ..
امي : يعني فيه وحده معينه تبيها ؟؟؟
كنك تقرين افكاري يايمه ..
ايه في وحده ببالي بس ادري مستحيل توافقين ..
احمد : واذا كانت فيه .. بتوافقين عليها ..
امي : وليش ما أوافق اذا كنت تبيها ..
ضحكت بنفسي .. احلم ياأحمد ان امي توافق على رنا ..
خلك ساكت ازين لك لاتفشل عمرك ..
حبيت انهي الموضوع لانه لو طول .. بتجرأ واكلمها عن رنا
احمد : خلاص يمه مايصير خاطرك الا طيب ..
امي : الله يوفقك ويسعدك ..
احمد : آمين .. هاه يمه ناقصك شي .. تبين شي ..
امي : لا ياوليدي الحمد لله .. الله يغنيك ويكثر خيرك ..
قمت وحبيت راسها : تروحون وترجعون بالسلامه ..
امي : الله يسلمك
طلعت من عندها وانا اقول بنفسي : رددي يايمه يالليل ما اطولك ..














رنا


اليوم الثلاثاء ..
اليوم راح نشوف البنت اللي راح نخطبها لناصر ..
طبعا ماقلنا لناصر أي شي ..
يمكن ماتعجبنا ويتفركش كل شي ..
ليش نقوله وبعدين نبلشه بالتفكير ..
قررنا انا وامي اننا نسكت على الموضوع .. وكأننا رايحين نزور ناس ..
لبست لبس جدا جدا جدا عادي ..
تنورة سوادء الى الكعب لاهي طويلة ولا قصيرة .. معها بلوزة كم طويل لونها فيراني ساده من دون أي موديل ..
حطيت ملمع وحطيت خط واحد من الكحل على كل عين ..
وبس لبست جزماتي السود اللي كعبهن قصير وبالكاد يحكي او يشاف ..
ربطت شعري ذيل .. كان طويل .. الى نهاية ظهري ..
اهملته في فترة حملي ولا قصيته عشان كذا طايل ومتقصف ..
مو مشكله اذا تزوج ناصر بقصه ..
لبست عباتي وطلعت انتظر امي تطلع من غرفتها ..
بتسألون عن سديم ..
سديم الله يسلمكم مراح تروح معنا بنخليها بالسيارة مع فواز ..
كان مره بيتهم بعيد ..
نص ساعه وحنا بالسيارة .. مليييييييييييييييييييت وطقت كبدي من الشمس اللي على عيوني زيادة على كذا حرررررررر .. من زين فواز وتكييفه ..
على باله كلما قلت له زد للبروده للمكيف اللي عندي ..
يقولي : هذا تكييف مركزي ياغبيه يعني برودته وحده ..
رنا : مالت عليك انت ومركزك ..
اخيرا وصلنا .. حشى لو اننا مسافرين كان وصلنا قبل ..
امي وهي تنزل : قبل لا ياذن المغرب القاك واقف عن الباب .. انزين
فواز : ابشري ..
نزلت وكلمته من ورى الدريشه : فوازوه لاتجوع بنتي اشتر لها شي تآكله .. وانتبه لها ..
فواز وهو يتريق علي : ان شاء الله .. اوامر ثانية عمتي ..
رنا : هههههههه لا .. وزي ماقالت ماما .. مافيه تأخير .. مغرب انتا موجود هنا ..
دخلنا عليهم .. وبعدما ضيفونا ..
امي : انا يقالي ام عبدالرحمن .. متزوج ومعه بنيتين وثلاث عيال ..
ام البنت : ماشاء الله تبارك الرحمن .. الله يخليهم له ..
امي : آمين .. وبعده هالناصر اللي ندور له نبي نزوجه وجعل بنيتكم من نصيبنا ..
ام البنت : الله يوفق ..
امي : آمين .. وعقب هالناصر فواز الله يصلحه ويهديه هو اللي جايبنا .. وعقبه رنا .. قعدتي .. آخر العنقود .. ارمله ومعها بنيه ..
ام البنت : الله يرحمه ويرحم اموات المسلمين .. ويخليهم لك ولايحرمك منهم .. ابوكم حي ؟؟
امي : ايه حي ..
غريبه امي ماعلقت على ابوي ..
بعدين بقولكم ابوي وش سالفته ؟؟؟ اذا جى وقته ان شاء الله .. بس ذكروني ..
جابوا القهوة وقعدنا نتقهوى ..
عرفت ام البنت على نفسها .. وتكلمت عن عيالها المتزوج واللي مخلف واللي مابعد اعرس .. بس ابد ماجابت طاري البنات .. ليش مدري ؟؟ حتى اللي جايين نشوفها ماقالت فيها شي ..
سألتها انا : وش اسم بنتك اللي توها متخرجه ؟؟
ام عبدالعزيز : تجي الحين وتقولك وش اسمها ؟؟
استغربت من طريقتها ..
وشوله هالمشاوير .. قولي وش اسمها وبس ؟؟
يعني لازم اللف والدوران .. بدينا من الحين بالتنحوق ..
الله يعين ..












احمد


البيت مررررره فاضي وممل وكئيب ..
مافيه الا انا وبندر ..
ومستحيل نتقابل .. يا انا ياهو ؟؟
انا نايم هو صاحي ..
انا صاحي هو نايم ..
انا بالبيت هو برى ..
انا برى هو بالبيت ..
من سافروا اهلي ماشفته .. بس اسمع صوته ..
اليوم لما جيت من الدوام مانمت ..
انتظرت بندر يجي لانه ماكان بالبيت ..
لما دقيت عليه قال بعيد ..
وانا فيني نوم وماني فاضي انتظره ..
فرحت ونمت الين نص العصر ..
لما قمت ونزلت تحت لقيته في الصالة يكلم بالثابت ..
بندر لما شافني : اوكي اكلمك بعدين ..
وسكر السماعه ..
جلست وانا مانزلت عيني عليه ..
بندر : خير وش فيك تناظر لايكون معجب وانا مدري ؟؟
احمد : لاوالله ماني معجب .. بس قاعد احاول احفظ وجهك لاني نسيته .. تصدق عاد ؟؟
بندر وشكله مو رايق : هه هه هه ضحكتني .. عندك نكته ثانيه غيرها ..
احمد : لا .. انت قل نكته يمكن تصير احلى من نكتتي ..
بندر : ماعندي نكت .. اسمع .. ترى اليوم بروح اشوف سدومه .. كم لي ماشفتها فوق الشهر ..
حكيت شعري وانا افكر .. صادق بندر من مات فراس يمكن مازرناها الا مرة او مرتين بس ..
احمد : طيب والمطلوب مني ؟؟
بندر : مافيها مطلوب .. بس اقولك اذا بتجي معي او لا ..
تكلمت وانا قلبي يرقع من الوناسه : الا اكيد بجي .. بس انت متى ناوي تروح ؟؟
بندر : عقب العشاء ..
احمد : خلاص انا معك ..







رنا


خلصنا متقوهين والبنت الى الآن مابعد جت ..
خلاص مابقى على آذان المغرب إلا نص ..
وامي قايله لفواز يجي قبل المغرب ..
متى بنشوفها متى بنتمقل فيها ..
والا شكلها مراح تجي ..
تسويها امها ... دام كلامها كذا ما استبعد انها تسويها ..
وانا اكلم نفسي .. مادريت الا اللي دخل علينا ومعه صينيه ..
رفعت راسي ..
واخييييييييييييييييييييرا شرفت حضرتها ..
نزلت الصينينه قدام امها .. وسلمت على امي وحبت راسها ..
وقفت لها وسلمت عليها ..
اول مامسكت يدها مادوي اطلقها ..
يدها نااااااااااااااااعمه وبيضاء ماشاء الله تبارك الله
والله الحرمه ذيك ماتعرف توصف ..
كل اوصافها غلط في غلط .. او يمكن انها ماشافت البنت من زمان ..
اول شي بيضاء .. ومو سمينه زي ماقالت .. بالعكس روعه جسمها ..
ثاني شي شعرها طويل مو قصير .. صحيح شعرها اسود بس يلمع ...
صح طويلة مثل ماقالت ..
صبت امها شاهي وقدمته الام بنفسها ..
اما البنت قعدت تطالعنا انا وامي .. صدق بنت فاصخه الحياء ..
تكلمت البنت بكل دلع : اسمي سحر ويدلعوني سحوره .. توي متخرجه من الجامعه قسم تاريخ .. عمري 21 سنه .. وزي ماتشوفون حلوة ودلوعه ومافيه احد قدي .. واذا عندكم أي سؤال تبي تسألوني اياه انا حاضر ..
امووووووووووووووووت على الدلع ..
امووووووووووووووت على الثقه اللي اتوقع انها في محلها ..
والله لو انا هي .. لاسوي سواتها واكثر بعد ..
دق فواز على جوالي حطيته صامت ..
مو وقت الحين يافوااااااز ..
مابعد شبعت من المناظر ..
عاد تصدقون ماحطت ولا شي بوجهها ..
حتى الملمع ماحطت ..
لو امها زينه قلنا ميخالف البنت طالعه على امها ..
بس ابد مافيه وجه مقارنه .. كأنها مو بنتها
سبحان اللي خلقها ..
دق فواز مرة ثانيه ..
ناظرتني امي بنظرة يعني ردي على اخوك
رديت وانا الى الآن مركزه عليها ..: هلا فواز
فواز : يالله اطلعوا انا عند الباب
رنا : يالله خمس دقايق ونطلع
ناظرتني امي وهي معصبه : اخوك عند الباب ..
رديت عليها بكل براءة وعفوية مادريت عن خطة امي الجهنمية : ايه برى
امي : يالله قولي له طلعنا
ميلت فمي بس على طول عدلته وابتسمت الحين يحسبوني مشفوحه : ان شاء الله
سكرت من فواز وقمت البس عباتي ..
ام عبدالعزيز : وراكم عجليين صلوا المغرب عندنا ..
امي : ان الله كتب نصيب .. بنزوكم ثانية وثالثة ورابعه بعد لين تملون ..
ودعتهم امي وانا عارف انها الوداعية الاخيرة ..
لانها ماتحب الاشكال اللي كذا مياعه ودلع ..









احمد

احمد : دقيت عليها ؟؟
بندر : لا
طيرت عيوني له : خير .. بتروح كذا لا احم ولا دستور ...
بندر : عادي وحنا غريبين عشان نعطيها خبر .. اصلا متى ماجينا نشرف ..
احمد : مشكلة الثقه الزايده عن حدها ..
بندر : يحق لي .. اصلا رنا تعزني ومعزة خاصه بعد .. وتعتبرني مثل اخوها بالضبط ..
ادري انه يقول هالكلام عشان يحرني .. بس ميخالف .. خلاص ماعاد يأثر فيني الكلام اللي زي كذا ..
لان امي متحلفه فيني اذا جت .. بتزوجني يعني بتزوجني ..
بندر : احمد وقف عند محل العاب
احمد : ليش ؟؟
بندر : صدق ماعندك ذوق .. بنت اخوك من زمان ماشفتها .. وبتدخل عليها ويدك فاضيه ..
احمد : الحين انت صرت اللي تعرف بالذوق .. من متى ان شاء الله تسنعت وصرت رجال؟؟
بندر : انا اصلا رجال غصب عليك ..
احمد : الرجال هو اللي يطيع اهلها ويجيب حاجاتهم .. مو اذا جت جاحه ناس ثانين جى الذوق ..
سكت بندر عقب كلمتي ..
شكله حس انه غلطان بحق امي وخواتي ... وماعنده رد يقوله الا انه يسكت ..
وقفت عند محل العاب مثل ماطلب ..
نزلنا انا وياه .. لاني باشتري لعبة لسدومه ..
شريت لها سيكل صغير ..
اما بندر ماش ماعجبه شي ..
احمد : ماني موديك لغيره .. اشتر من هنا وبس .. زين شين ماعلي منك ...
ناظرني نظرات استحقار ومشى وخلاني ..
اما انا حاسبت وطلعت ..
انتظرته فوق الربع ساعه .. بعدين جاني ..
فتح الباب اللي ورى .. حط كرتون .. بعدين جى ركب قدام ..
احمد : هاه وش شريت ؟؟
بندر : مالك دخل ..
ميلت فمي وانا اقول : جعل سديم تقول مابيها .. رجعها ياعمو بندر ..
بندر ويبي يحرني : الله يسمع منك .. عشان ارجع هديتي وهديتك سوى ..
ابتسمت على خفيف وكملت طريقي ..



نهاية الجزء العاشر ..

الجزء الحادي عشر ..

رنا ..
امي : قلت لا يعني لا ..
رنا : انزين ليش ؟؟ فهميني ..
امي : بالله عليك هاذي بنت .. جايه تميع عندنا ..
رنا : يمه كذا البنات .. اجل تبينها عربجيه ..
امي : وانتي وراك منتي بزيها ..
طيرت عيوني على امي .. وش قصدها ؟؟
امي : ايه وراك تناظريني كذا .. ليش ماتتميعين زيها ؟؟
رنا : ماما .. كيف اتميع زيها .. انا ما اعرف .. اصلا مايناسبني التميع .. والدلع ..
امي : وليش مايناسب لك لا يكون رجال وانا مدري ..
رنا : هههههههه .. لا ياماما .. بس سبحان الله الدلع رباني .. مو الواحد يتصنعه ..
امي : الحين وش انتي تبين مني ؟؟
رنا : ابيك تشيلين يدك من هالموضوع .. وانا اللي بدبره مع ناصر ..
صرخت امي : لاااااا .. والف لا .. البنت هاذي ماياخذها .. انا ابي وحده سنعه مو وحده سايحه تقل زبده ..
تأففت وانا ادري امي راسها عنيد : يعني ..
امي : يعني شيليها من بالك .. وروحي عن وجهي خليني اكمل العشاء ..
طلعت من المطبخ .. وانا متضايقه ..
والله عاجبتني وداخله مزاجي .. ليش امي ترفض .. مدري ؟؟
قهر والله قهر ..
رحت ادور سدومه في الغرف مالقيتها ..
رنا : سدومه .. سدومه .. وينك ماما .. سديـــــــــــــم .. سدووووووووووم .. وينك حبيبتي ..
البنت مالها اثر .. اوف وين راحت ذا البنت ...
طلعت فالحوش يمكن القاها ..
لايوجد احد ..
دخلت على امي في المطبخ : مامي مالقيتها .. تتوقعين وين راحت ؟؟
امي : مدري .. شوفي لايكون باب الشارع مفتوح وطلعت ..
اول ماقالت امي شارع .. وانا اركض لباب الشارع ..
اول ماوصلت لقيته مسكر .. اشوى يعني ماطلعت .. اجل وين راحت ؟؟
الله يصلحها البنت ماادري وين تختفي ؟؟
سمعت اصوات برى كأنه صوت فواز .. او كان يتهيأ لي ..
فتحت الباب بشويش .. لان لو شافني فواز اناظر في الشارع يذبحني .. كل شي عنده ولا هالحركه ..
ناظرت يمين يسار .. الا اشوف فواز ومعه سدومه وشكل سدومه معها كيس .. اكيد الاخت متقضيه من البقالة ..
امداها تروح .. لا وبعد تروح وماتقولي .. هين ياسدومه اما ادبتك ..
سكرت الباب وجلست على دكه الخيمه بحيث اشوف اللي يدخل لكني ماانشاف ..
جلست اهوجس وافكر .. وشلون اقنع امي بسحوره على قولتها ..


احمد

لما وقفنا عند باب البيت .. شفنا سدوم مع فواز ..
نزلت قبل بندر وعلى طول لسدومه .. فتحت لها حضني وانا اقول : من حبيبة عمها ؟؟ بسرعه .. بسرعه ..
جت سدومه تركض لي .. ضميتها بأقوى ماعندي وجلست ادور فيها .. ادور وادور الين دخت ..
فكيتها من حضني وقعدت ابوس فيها واعض خدودها الين ماقامت تصارخ ..
سدومه : آآآآآآآآآآآآآآآآآآآآآآآآآي ..
سحبها مني بندر : خلاص قطعت البنت .. عرفنا انك تحب البنت بس مو تذبحها كذا ..
حضنها وراح وخلاني .. اما انا قربت من عند فواز وسلمت عليه ..
احمد : وش اخبارك ؟؟
فواز : الحمد لله بخير .. انت وش اخبارك وش اخبار الاهل ؟؟
احمد : كلنا بخير ونعمه .. الله يسلمك ..
فواز : لاتقول انك مستعجل .. لازم تقلد تقهوى ..
احمد : مااردك ..
فواز : حياك حياك تفضل ..
فتح باب الشارع وشرّع الباب : ادخل ادخل حياك ..
دخل قبلي وقال : بروح اجيب القهوة ادخل في الخيمه ..
شوي شوي الين اختفى عن نظري ..
واقف عن الباب .. خايف .. ماعندي الجرأة اني ادخل ..
التفت بشوف وين بندر ؟؟ ماشفت له اثر ..
سميت بالرحمن ودخلت ..
وقفت في نص الحوش .. وجلست اقلب فعيوني المكان .. حسيت برعشه .. حسيت انه فيه شي بيصير .. وش هو ؟؟ ماادري ..
مااسعفني الوقت افكر .. لاني عرفته ..

رنا

لما انفتح الباب ودخل فواز وهو يقول : ادخل ادخل ..
بغيت اقوم من مكاني وادخل داخل البيت .. بس كان عندي فضول اشوف من هو اللي جاي ؟؟
واللي خلاني اقعد اكثر ان مكاني ماينتبه له احد ..
بس لما شفته انتفضت من داخلي .. مدري ليش حسيت ببرودة في عظامي .. حسيت قلبي بيوقف من النبض .. حسيت بألم .. لاتسألون ليش الألم ؟؟
من زمان ماشافته عيني .. من زمان ماسمعت صوته ..
اول مادخل صار يتلفت كأنه يدور على شي ..
بس ....


احمد

شفتها بس ماكانت واضحه ..
شفتها وارتجف قلبي .. دموعي تجمعت بعيوني .. حسيت بألم في داخلي .. حسيت اني ضعيف قدامها .. ومااقدر اقاوم شوفتها ..
باين عليها كانت منتبه لي .. والدليل جمودها في مكانها ..
ماكان عندي الا عيوني .. هي الوحيده اللي قدرت تتكلم لكن بدون صوت ..
ركزت عيوني عليها ابي اشبع من شوفتها .. تمنيت انها تبقى عشان اناظرها الين امل ..
لكن ابد ماكانت تعطيني فرصه ..
قامت وعطتني ظهرها وابعدت الين ما اختفت ..
خسارة ليش دايم لحظاتي الحلوة قصيرة ..
ليش كلما احاول اني اكون سعيد تتبدل السعادة الى ألم ..
فقت من اللي انا فيه .. وتوجهت للخيمه فتحت الانوار والتكييف وجلست .. وانا الوم نفسي مليون مرة واقول ليتني ماجيت ..

رنا
يالله على هالاحمد .. لايكون يحبني ..
معقوله يارنا احمد يحبك ..
لا لا تكوني واثقه لهدرجه .. بس ..
بس ايش يارنا ؟؟
الا احمد يحبك ..
طيب واذا يحبني .. يعني يبي يتزوجني ..
ضحكت بأعلى صوتي وانا قاعده اصف الفناجيل في الصينيه : ههههههههههههههههههههههههه ..
امي : بسم الله وش بك تضحكين ؟؟
ناظرت امي وودي اسألها .. لو واحد يحب زوجه اخوه عادي يتزوجها .. بس خفت امي تفهم الموضوع ..
خليني ساكته ازين لي .. لاتجيني هوشه من تحت هالسالفه : لا سلامتك مافيني شي ..
امي : انزين حطي التمر وشيليها لاخوك ..
رنا : ان شاء الله ..
زبطت كل شي وشلت الصينيه .. وقفت عند الباب الحديدي للفلة ..حطيت الصينيه في الارض وقبل لا ادق الباب ..
انفتح باب الشارع ودخلت سدومه وهي محموله على يد ..
يد من هاذي ؟؟
ماشفته وجهه لانه كان يناظر لبرى ..
لكنه لما سكر الباب والتفت .. كان وجهه لجهة الباب اللي انا واقفه عنده ..
بدون شعور مني صرخت : بـــــــــــــــنــــــــــدر .. وااااااااااو ..
انتبه لي بندر .. وطير عيونه مستغرب مني ..
ضحكت له وانا مبسوطه على الآخر : هههههههه أخبارك بندر ؟؟
ناظرني بندر وفي فمه ضحكه .. هز راسه يعني طيب .. بعدين التفت لجهة الخيمه ..
فهمت قصده عشان فواز ..
هزيت له راسي وانا اقول : اوكي اوكي ..
دخل للخيمه اما انا استوعبت الموقف ..
اوووووووف ماعلي شي وانا طالعه لبندر ..
جالسه اضحك واضحك .. وانا من جد احس مخروشه اليوم ..
دقيت الباب .. جى فواز وأخذ القهوة ..
رجعت عند امي وانا الى الآن الابتسامة شاقه حلقي ..
رنا : ماما جاي بندر واحمد ..
امي : حياهم الله ..
رنا : ياحليله بندر يمه .. والله اني احبه كثير مثل اخوي ..
امي : كلهم مشاء الله عليهم ينحبون ..
ميلت فمي وانا اقول بنفسي واضح ..
رنا : يمه تتوقعين يتعشون ..
امي : مدري ..
دخلت سدوم ..
سدوم : ماما ..
رديت عليها وانا معصبه : خير وش تبغين ؟؟
سدوم : ماما تعالي ..
رنا : وين تبين ؟؟
سدوم وهي تشد يدي تبي تمشيني : تعالي .. تعالي ..
رحت معها لوين ماتروح ..
طلعت من الفلة يوم ماكنت واقفه اكلم بندر وقاعده تأشر على كرتون عند الباب ..
وقفتها : صبر صبر ماما .. وين بتروحين ؟؟
سديم وهي تشني غصب : ابي الكلتون ..
رنا : أي كرتون ؟؟!
سديم وهي تأشر على الكرتون : هذاك ..
ناظرت الكرتون وانا مستغربه .. وش تبي فيه سدومه ؟؟
دقيت الباب لفواز عشان يطلع يشوف لي صرفه مع هالسديم ..
فواز : خير وش تبون ؟؟
اشرت له يقرب ..
فواز : هذاي قربت وش تبين ؟؟
رنا : سدومه تبي الكرتون .. رح شف وش فيه وعطها اياه ..
فواز وهو يكلم سدومه : وانتي الا تعليني بطلباتك اللي ماتنتهي .. امشي قدامي نشوف وش فيه ؟؟
دخلت داخل عند امي .. اما فواز وسديم راحوا يشوفوا وش فالكرتون ..


احمد
اول ماطلع فواز غمز لي بندر ..
عقدت حواجبي مستغرب من حركته : سلامات وش فيك ؟؟
ضحك بندر على خفيف وهو يغمزمرة ثانيه ..
اشك ان هالولد صاحي : وش فيك ؟؟
بندر وهو مبتسم : يعني يقالك مافهمت ..
احمد : لا والله اخ بندر مافهمت .. ممكن تفهمني ؟؟!
قبل لا يجاوب بندر .. دخل وفواز ومعه كرتون ..
حطه في نص المجلس وهو يقول : الحين من هاللي جايب هالهديه ..
ابتسم بندر وهو يرفع اصبعه : انا وبكل فخر ..
فواز ضحك على طريقه بندر : بس ماله داعي تكلف على عمرك .. كان عطيتها فلوس تستفيد منهن ازين لها ..
انا عارف ان فواز يستهبل معه .. بس شكل بندر صدق ..
بندر وماعجبه الكلام : والله عاد هاذي هديه مني والهديه لاترد ولاتهدى .. ولو بنت اخوي فلوس ماراح اقصر معها .. حتى لو ماتطلب راح اعطيها ..
فواز وهو يضحك : افااااا يابندر .. صدقت والله امزح معك .. وش دعوى .. شكلك ماتحب المزح ..
اما انا استانست على الموقف .. خل بندر ياكل تبن ..هذا قليل في حقه ..
التفت فواز علي : وانت عساك جايب شي ؟؟
اشرت له بأصبعي .. يعني انا ..
فواز : اجل انا ..
ضحكت : هديه مرة صغنونه ..
فواز وهو يلتفت : وينها ؟؟
احمد : في السيارة ..
فواز : اهاااااااااااا .. انزين وش رايكم تتعشون معي ..
وقفت : لا لا فواز .. حنا بس جينا نسلم مانبي نثقل عليكم ..
فواز : والله مافيه ثقل ولاشي .. وش دعوى احمد ؟؟
احمد : لا جد جد فواز .. عشاء اسمح لي انا ما اقدر .. شف بندر اذا يبي كيفه ..
قام بندر ووقف بجنبي : لا لا حتى انا اعذرني ..
فواز يوم شافنا مصرين : براحتكم .. بس اهم شي يا احمد نزل لعبه سدومه .. الحين تقعد تنساها ..
ابتسمت له : لا تخاف .. انا اصلا ليش جايبه ؟؟
طلعت من البيت ونزلت السيكل وعطيته فواز يدخل داخل البيت .. بوست سدومه مع خدودها ..
سلمت على فواز : مع السلامه فواز .. سلم لي على ناصر وعبدالرحمن .. سلم لي بعد على امك و..و.. رنا ..
فواز : مع السلامه .. ان شاء الله يوصل ..
ركبت السيارة ..لقيت بندر راكب قبلي ..
احمد : وش فيك ؟؟
بندر وهو يناظرني بطرف عينه : سلامتك .. امش وخلصنا ..
حركت السيارة : اعصابك ..


رنا
دخل فواز ومعه كرتون .. حطه فالصالة ورجع طلع ..
ماكمل دقيقه الا داخل علينا ومعه سيكل ..
عقدت حواجبي : من له هاذولي ؟؟
فواز : هذولي من عمانها .. السيكل من احمد .. والكرتون من بندر ..
وانا قاعده في مكاني : وش فيه الكرتون ؟؟
فواز : الله لايهينك قومي شوفيه بنفسك .. والا شرايك اقربه من عندك ..
ضحكت على اسلوبه مايعرف يجامل : لا شكرا ..
قمت وفتحت الكرتون .. طيرت عيوني وانا مبتسمه : دب !! مجنون هالبندر .. ليش جايب دب ..
فواز وهو يتريق علي : ادق عليه واسأله ؟؟
وانا مسكينه صدقت : لا لا فواز لاتدق فشله وش راح يقول الرجال ...
فواز وهو يضحك : والله اني ارحمك .. مصدقه بدق عليه ..
رنا : مدري عنك انت تقول بدق .. وانا صدقت ..





احمد
رجعوا اهلي من السفر .. وبعد يومين من رجعتهم ..
كنت جالس في الصالة بعد ماصليت المغرب ..
حطوا القهوة وجلست اتقهوى انا وامي وخواتي مرام وسارة وبندر ..
امي : هاه احمد فكرت ..
ناظرت اخواني وانا متفاجأ من امي كيف تكلمني عند اخواني ..
امي : وراك تناظر اخوانك .. ليش الجواب بوجيههم ..؟؟
احمد : خلاص بعدين اقولك رايي ..
امي : الحين تقوله .. ليش بعدين ؟؟
ميلت فمي : خلاص يمه اقعد انا وياك ونتفاهم على كل شي .. مو الحين ..
امي : خلاص نشوف آخرتها معك ..
ارتحت لما تسكر الموضوع .. لكن الغريب من اخواني مافيه ولا واحد تكلم منهم ..
خلصت بسرعه من القهوة وطلعت من البيت ..
ركبت سيارتي وسندت راسي على ورى وانا احسه بينفجر ..
بصراحه اني مابي اتزوج .. لكن امي الا مصرة على زواجي ..
وش راح اسوي معها ؟؟؟
عصرت راسي وانا ودي افتته من الالم ..
اندق قزازة السيارة .. فتحت عيوني ..
بندر .. وانا ناقص بعد .. فتحتها : نعم ؟؟ّ!!
بندر وباين عليه متضايق : وش فيك ؟؟
مسكت راسي وانا اقول : مابي اتزوج .. يعني وش راح يكون فيني .؟؟
ركب جنبي وحط ايده على كتفه : خلاص بكيفك .. ترى مو غصب ..
احمد : وامي ؟؟
بندر وهو مايدري وش السالفه ؟؟ : وش فيها امي ؟؟ امي مراح تغصبك على شي انت ماتبيه ؟؟
ضحكت باستخفاف على كلام بندر : بس هي غصبتني ..
ناظرني بندر مو مصدق اللي اقوله : قول غير هالكلام .. مستحيل امي تغصبنا على شي مانبيه ..
احمد : يكون بعلمك تراها هي اللي غاصبه رنا تجلس عندنا .. والا رنا اصلا ماتبي ..
بندر وهو الى الآن مو مصدق : حتى ولو يا أحمد هذا عرس يعني مايجي بالغصب ..
فقعت مرارتي هالبندر .. مو راضي يفهم : ياخي اقلقتني انا اقولك كذا وانت تقول كذا .. يعني لو ادري ان امي مو غاصبتني تتوقع اني بيضيق صدري كذا ..
بندر : لا .. بس انا قصدي انت مكبر الموضوع على فاضي ..
عصبت منه : انت اللي والله ان راسك فاضي ..انزل انزل لافقع وجهك الحين ..
ابتسم بندر وهو يفتح الباب : انت ماتعصب الا اذا كان في الموضوع رنا ..
ونزل بسرعه .. يخاف اني اضربه ..
صرخت بقوه : تعال يالتبن .. ليش خفت ؟؟ اذا رجال اجلس جنبي وعيدها ..
جاني مع دريشتي وهو يضحك : العب على غيري .. بس نصيحه مني لاتتعب نفسك .. مراح تآخذها لو تحج البقرة على قرونها ..
ابتسمت له وكأن اعصابي هدت شوي : الحين من جاب طاريها ..
بندر : أحمد .. انا فاهم كل شي .. لاتلعب معي لعبة القط والفار ..
احمد : جعل ياكلونك كل الفيران قل آمين ..
بندر : موافق بس اهم شي انك ماتآخذ رنا ..
غمضت عيوني احاول اهدي .. حتى بندر مايبيني آخذها .. ليش ؟؟
احمد : بندر .. جد جد .. لو .. شوف انا اقول لو .. لو مثلا انا ابي رنا .. تتوقع آخذها والا ما آخذها ..
ابتسمت بندر : اطلع على حقيقتك .. يعني تبيها ..
احمد : تبن بوجهك .. اقول لو مثلا .. تقول لي تبيها ..
بندر : احمد حرام عليك تراك فقعت مرارتي .. قل ابيها وريح عمرك ..
رديت عليه بتسرع ومن دون ما احسب لكلامي أي حساب : ايه ابيها وودي اتزوجها بس مستحيل هي توافق ..
بندر : وامك بتوافق ؟؟
قلتها وانا غاسل يديني من امي : حتى امي مراح توافق ..
بندر وهو يرفع اصبعه لفمه : طيب ممكن اركب ..( يقاله يستأذن )
ضحكت : اركب ..
بندر : في البداية انت تبي تتزوج والا لا ؟؟ ..
احمد : لا ..
بندر : حلو .. طيب لو غصبك امي على الزواج ..
احمد : هاذي المشكله ..
بندر : حلو .. طيب لو قلت لك لو غصبتك امي على الزواج قلها بتزوج بس بشرط انا اختار البنت اللي ابيها ..
احمد : انزين وبعدين ..
بندر وهو ينفض يدينه : انحلت يابابا المشكله وش هو وبعدين ؟؟
احمد : من هي البنت اللي راح آخذها ؟؟
بندر : تستهبل علي انت ؟؟ اكيد رنا .. مو انت تبي رنا ..؟؟
انصدمت من بندر .. كيف يقول هالكلام ؟؟
اوكي انا ابي رنا .. بس مو معناه اني اختارها لي زوجه تعيش معي طول العمر ..
انا ابي وحده صغيرة وماتزوجت .. مو رنا ارمله وعندها بنت ..
لا لا اكيد بندر فاهمني غلط .. مو معناه احبها يعني اتزوجها ..
بندر يوم شاف سكوتي طول : هيه وين رحت ؟؟ هاه وش قلت بكلامي ..
احمد : كلامك ماعجبني ..
بندر : وليش ماعجبك ان شاء الله ؟؟اقول بلا استهبال .. مرة اخوك اولى فيك من الغريب .. بكره تتزوج وتضيع بنتها مع هاللي بتآخذها .. تعوذ من الشيطان وفكر زين .. على الاقل فكر ببنت اخوك هالمسكينه وشلون راح تعيش ..؟؟ لو قلنا امها ماراح تتزوج اوكي البنت ماعليها خطر .. بس يا أحمد اكيد رنا بتتزوج بكره وين راح تودي البنت .. ؟؟
عجزت استوعب اللي قاله بندر .. حتى انتم مااتوقع انكم استوعبتوا شي ..
ظليت اناظره وانا سرحان .. وقاعد اتذكر نفس هالكلام انقالي بس من شخص ثاني ..
بندر وهو يضربني على كتفي : احمد وين رحت .. نحن هنا ..
احمد : معك .. معك .. بس بندر احسها صعبه اني آخذ رنا ..
بندر وهو متحمس : ليش ياحبيبي تستصعبها .. الحمد لله هاذي رنا وهاذي سدومه بنت اخوك .. يعني مافيها تعقيد .. بالعكس يا أحمد اهلها بيوافقون من دون أي شروط .. بيضمنون ان البنت راح تعيش بأمان مع عمها ..
استغربت من بندر بس يفكر بسدومه ..: طيب انا يابندر مافكرت فيني .. ؟؟
بندر وهو يستعبط : افكر فيك ليش ؟؟ وش بك انت ؟؟ ماشاء الله مثل الحمار هذاك تناهق .. وش اللي فيك ؟؟ كنك بزر مغير تونون علي ..
بندر مستحيل يفهمني عشان كذا انهيت معه الحوار : انزل انزل بس .. انت ماعندك الا الدجه ..
اول مانزل حركت السيارة ومشيت لوين ؟؟ مدري ..




رنا
قمت الساعه عشر الصباح .. احس اني شبعانه نوم ..
امس نمت الساعه 11 بالليل .. برمجت نفسي على النوم بالليل .. عشان اقعد مع امي المسكينه اللي من رجعت لبيتنا وهي تقعد لحالها الين العصر ..
غسلت وجهي ونزلت للصالة .. وانا انزل سمعت صوت عبدالرحمن اخوي يسولف مع امي ..
امي : وليش ان شاء الله وش فيها بنتي ..؟؟ الف من يتمناها ..
عبدالرحمن وهو يضحك : هذاك اول يمه يوم انها بنت .. الحين ارمله وعندها بنت .. ماراح يجيها الا يامتزوج .. ياكبير في السن .. غيره لاتفكرين ..
وقفت عند باب الصاله اتسمع ..لاني خفت ادخل يقفلوا على الموضوع ..
امي : ادري ان مراح يجيها الا ابو مرة ولا كبير ..بس املنا بالله كبير يجيها ولد توه مابعد اعرس ..
عبدالرحمن: يمه الله يهديك وشو ولد ؟؟ الولد يبي بنت .. مايبي وحده عندها بنت ..
امي : وراه ياوليدي .. الله يرزقها ان شاء الله ..
عبدالرحمن : امين ..وانا الحين احد جاني وقلت لا ..
امي : بس هاه ياوليدي مااوصيك على وخيتك اشوفك بعد عيني تغصبها على شي ماتبيه .. تراي قلت لك ..
عبدالرحمن : الله يعطيك طولة العمر ليش تقولين هالكلام ؟؟
امي : لاني خابرتك انت وياها مغير تتواحنون دايم .. ادري انها دلوعه شوي .. بس وش نسوي لازم نتحملها مالنا الا هي ..
عبدالرحمن : الحين انا وش قايل لها ؟؟ ماقلت شي ..
امي : ادري ماقلت شي .. بس اذا صار ماصار .. تراها بذمتك .. ان ماجاها نصيبها اكرمها وعزها هي وبنتها ولا تخلي عليهم قاصر ..
عبدالرحمن : الله يخليك لها ويخليك لنا .. مالك الا طولة العمر ..
ابعدت عن باب الصالة وانا احس اني مخنوقه ..
قاعدين يفكرون متى اتزوج ومن اللي راح يجيني ؟؟ ولد والا شايب .. ابو عيال .. والا ماعنده ..
ليش انا قاعده فوق روسهم .. عايشه ببيت ابوي والحمد لله راتب مشغل مكفيني وموفيني .. هذا غير الفلوس اللي يحطه احمد في الحساب ..
بصراحه ضيقوا صدري على هالصبح ..
اووووووووف من هالعيشه ..




احمد
كنت في الدوام يوم دق علي سعود اخوي ..
احمد : هلا سعود ..
سعود : هلا فيك .. وشلونك ؟؟
احمد : الحمد لله بخير .. انت اخبارك ؟؟
سعود : الحمد لله .. اكيد بتسأل وش عندي ؟؟
ضحكت : لا مراح اسأل .. اكيد مشتاق لي وتبي تسمع صوتي ..
سعود : اموت على الثقه .. المهم ..
احمد : عطناه ..
سعود : تبي اكلمك بالتلفون والا نتقابل احسن ..
احمد : اللي يريحك ..
سعود : انا ابي اللي يريحك انت ؟؟
احمد : ليش جايني عريس ؟؟
سعود : ههههههه تقدر تقول كذا ..
فهم وش يقصد سعود .. اكيد بيكلمني عن العرس : اوكي فهمتك .. خلاص نتقابل متى تبي ؟؟
سعود : وش رايك اغديك اليوم .؟؟؟
احمد : اووف اووف ..دام فيها غدى .. اكيد المعرس يستاهل .. وين المدام عنك .؟؟
سعود : ماعليك انت الحين من المدام .. بعد الدوام نتقابل اوكي ..
احمد : اوكي ..
سعود : الساعه كم تطلع ..؟؟
احمد : ولايهمك بطلع اليوم مبكر ..
سعود : نتقابل في مطعم (......) الساعه وحده .. اوكي ..
احمد : اوكي صار ..





رنا
جلسنا على الغدى .. انا وامي وفواز وناصر ..
فواز : الله .. وش ذا الحركات .؟؟
رنا : بالعافيه ..
فواز : وش عندها رنو قاعده تطبخ ؟؟
رنا : على تبن .. اصلا انا دايم اطبخ .. بس انت ماتشوف .. شكلك تتغدى وانت نايم ..
فواز : ايه ايه .. امدحي نفسك ..
رنا : الحمد لله والشكر .. الحين انا وش قلت عشان امدح نفسي ..كل بس وانت ساكت ..
عمت السكوت .. وماكان فيه الا صوت الملاعق وهي تنتقل من صحن لصحن .. وطلبات سديم اللي ماتنتهي .. ابي مويه .. ابي لحمه .. ابي رث .. قلق هالبنت ..
خلصنا من الاكل .. فقمت اشيل الصحون .. وانا رايحه وجايه اشيل .. كأني سمعت ناصر يكلم امي بصوت واطي ..
حاولت اسمع بس ماقدرت ..
وجه ناصر وهو يتكلم يقول عنده خبر .. بس وشو ماادري ؟؟
المشكله عندهم فواز .. بس شكل فواز ماانتبه .. اولا لانه كان يناظر التلفزيون ثانيا.. لان صوت ناصر بالاصل واطي ..
بعد ماكلن قام ينام .. جلست عند امي بسأله وش كان يقولها ناصر ..
رنا : ماما وش عندك انتي وناصر ..؟؟ وش كان يقول لك ؟؟
ناظرتني امي وابتسمت : يعني على بالك ماتدرين ؟؟
رديت عليها وانا مستغربه : ادري بإيش ؟؟
امي : ناصر يقول ان واحد من اخوياه كلمه بخصوصك ..
طيرت عيوني : كيف يعني بخصوصي ؟؟
امي : يعني يبي يتزوجك ..
اشرت على نفسي وانا مو مصدقه : انــــــــــــا يبيني ؟؟!!
امي وهي تشد على كلمه انا : ايه انتي يبيك .. وش فيك عشان ماتتزوجين مرة ثانيه ؟؟
هديت نفسي شوي : مافيه شي ياماما .. بس اتزوج مرة ثانيه احسها صعبه شوي ..
امي استغربت كلامي : ليش صعبه ؟؟ يالله بس .. شيلي هالكلام الفاضي من راسك .. انتي توك صغيرة وكلن يتمناك ..
رنا : بس انا ما اتمنى احد ..
امي : رنا لاتجننيني .. راح تتزوجين ان شاء الله وتجيبين اخت لسديم ..
رديت على امي بأستهتار واضح : يكون خير .. قال ايش قال اجيب اخت ..؟؟..
امي : تقولينه الحين .. لكن اذا جت الصدقيه .. اعلمك وشلون تتزوجين غصب ..
قمت وانا معصبه : مافيه احد يقدر يغصبني على شي انا ماابيه .. ترى العرس مو غصب ..
طلعت من الصاله ورقيت لغرفتي ..وانا ودي اشقق هدومي من اللي سمعته الصباح والظهر ..


احمد
بعد ماطلبنا الاكل ..
احمد : هاه سعود المكيرفون لك تكلم ..
سعود : ابيك تسمعني للأخير .. بعدين انت قل اللي تبيه .. اساسا القرار لك اولا واخيرا ..
احمد : تكلم اسمعك ..
سعود : دريت ان امي بتزوجك .. ودريت بعد انك شايل الفكرة من راسك ..
احمد : صحيح ..
سعود : بس اللي ماكنت ادري عنه ولا خطر لي على بال .. انك فكرت مجرد تفكير انك تآخذ رنا ..
طيرت عيوني ..: رنا !!
سعود : هههه .. ايه رنا .. وش فيك تخرعت ؟؟ احمد مو عيب ولا حرام .. بالعكس انت بتسوي اجر بسديم ..
قعدت اهوجس من اللي قاله هالكلام .. لا يكون .... بندر .. والله لاوريه شغله لو كان هو ..
سعود : احمد انت معي ..؟؟
احمد : معك كمل ..
سعود : بصراحه عجبتني الفكرة انت متزوج متزوج .. فليش ماتآخذ رنا .. منها تتزوج ومنها تكسب اجر في اليتيمه ..
رديت عليه وانا اتتريق : وش قالوا لك فاتح مؤسسه ايتام انا ؟؟
سعود : مو قصدي كذا .. بس يا أحمد لو تفكر فيها .. والله انها حل مناسب لك ..
احمد : شكرا انا ماقلت لك دور لي على حل .. وبعدين ليش انا اللي اضحي بحياتي .. انت خذها ..
سعود : والله لو انا مو متزوج لآخذها .. احمد بلا هبال هاذي بنت حالها حال البنات .. وش فيها عيب ؟؟
احمد : عيبها انها كانت متزوجه ..
سعود : لا والله عذر اقبح من ذنب .. فكر زين يا أحمد لاتضيع مرة اخوك منك ..
احمد : سعود لاتستهبل علي .. اضيعها ليش ؟؟ اصلا حتى لو انا وافقت .. امي مستحيل توافق ..
سعود : انت ماعليك من امي .. انت وافق وانا احلها مع امي ..
اووووووووف الحين وش يفكني من سعود ؟؟
وش اللي خلاه يحط هالفكرة براسه ؟؟ ياويلك مني يابندر لو كنت ورى هالسالفة ؟
احمد : خلاص بفكر بس ما اوعدك اني اوافق ..
سعود : انت فكر واكيد انك بتوافق
واثق ياسعود اني بوافق .. مهما كان انا مستحيل آخذها ..حتى لو وافقوا كلهم ..
هزيت راسي يعني خلاص قفل الموضوع ..



رنا
جلست في غرفتي الين المغرب ..
بعد ماصليت نزلت تحت .. دخلت الصالة لقيت اخواني كلهم موجودين ..
رنا : السلام عليكم ..
الجميع : وعليكم السلام ..
رنا : وشلونك عبدالرحمن ؟؟(لاني ماشفته الظهر )
عبدالرحمن : بخير .. انتي وشلونك ؟؟
رنا : الحمد لله ..
التفت على امي : وين سدوم ؟؟
امي : عند التلفزيون ..
فواز : وانت بس فوق ماتدرين عن بنتك ؟؟
التفت عليه وانا مالي خلق : يكفي انت اللي تدري عنها مو انت خالها .. والا خال ببلاش ..
فواز وهو يتتريق علي : ايه صح انا اللي حاملها ببطني ووالدها .. والا يمه ..
امي ضحكت وهي تناظرني وهي تدري اني معصبه ..
ناصر وهو يناظرني ومد يده عشان يمسك يدي : رنا وش فيك معصبه ؟؟
ناظرته مستغربه اول مرة يمسك يدي : لا مافيني شي .. ليش ؟؟
ناصر وهو يناظر في عيوني : اكيد !!
ناظرت في عيونه بتحدي : اكيد ..
ناصر : انزين ليش ماتبين تتزوجين ؟؟
فتحت عيوني على وسعهن : ومن قالك اني مابي اتزوج ؟؟
ناصر : يعني بتفكرين في خويي ..
ميلت فمي : ناصر خويك اعزب والا متزوج ؟؟
ضحك وكأنه عارف اني بسأل هالسؤال : لا مو متزوج .. بس قد تزوج وطلق ..
حاولت اطول السالفة عساهم يملون من هالموضوع : وليش طلق ؟؟
ناصر : ما سئلته .. بس اذا تبين اسئله ؟؟
حركت شعري بدلع وانا اقول : ما يمنع ..
عبدالرحمن اللي كان ساكت طول الوقت .. حسيت ان عنده شي .. لانهمستحيل يسكت عبث ..
رنا : وش رايك عبدالرحمن ؟
عبدالرحمن : راينا ماراح يقدم ولا يأخر اهم شي انتي .. انتي اللي بتتزوجين مو حنا ..
رنا : بس ماتحسون ان الوقت توه على الزواج .. يعني توي مكملة سنة من وفاة مشعل .. وبعدين ودي اكمل دراسة .. والعمر قدامي وش انا طايرة عليه ..
عبدالرحمن : معك حق في كل اللي قلتيه .. بس مافيه مانع ان تفكرين في أي واحد يتقدم لك .. والا انا غلطان ..
رنا : لا منت غلطان .. دام هذا رايك خلاص انا افكر وارد لكم خبر .. ارتحتوا ..
قمت وخليتهم وانا حدي متضايقة ..
رحت لعند سدومه وضميتها وجلست اصيح بهدوء حتى مااحد يحس علي ..


نهاية الجزء الحادي عشر

الجزء الثاني عشر







احمد
بعد ماتغديت انا وسعود .. رحت للبيت وعلى طول سيده لغرفتي مابي اشوف أي احد وخصوصا امي ..
نمت الين العشاء ..
قمت وصليت ولبست ثوبي لاني ناوي اطلع .. الى الآن مابي اشوفهم ..
كنت مفكر اطلع مع باب الحريم .. بس اهم شي مايكون احد في الصالة ..
قعدت ادعي ربي اني ماأشوف احد .. بسسسسس ..
الحمد لله طلعت بسلام ..
ودي افضفض واتكلم لأحد .. بس ماعندي احد اثق فيه واقدر آخذ راحتي معه ..
اخويايي بس سلام وسوالف غير كذا مافيه ..
قعدت الف بالشوارع الين ماانلف راسي معه ..
ياربي وش اسوي ؟؟
امي من جهه واخواني من جهه ..
قعدت افكر وافكر وافكر .. واحسبها يمين شمال الين طلعت معي وقررت قرار مابعده قرار ..
والآن الآن اروح لأمي واقولها قراري اللي لو يصلخوني ماارجع فيه ..

رنا

ياربيه وش اسوي انا بعمري ؟؟ ..
المشكلة لو فيني عادي .. بس بنتي المسكينه هي الوحيده المتضررة من هالسالفة ..
ليش مايفهمون ؟؟ ليش مايقدرون ؟؟
بموت يعني لو ماتزوجت .. ولا بعد يقولون الزواج ستر للمرأة ..
طيب يعني في بيت اهلها مو مستورة .. عليهم كلام ما ادري من وين يطلعونه ؟؟
جلست افكر واحسبها بس كل مرة ماتضبط معي ..
ماني قادرة استوعب بنتي تسكن وتعيش مع رجال مايمت لها بصلة ..
ياربي الصبر من عندك ..
تعبت من التفكير ونمت من دون ما أحس ..

احمد

دخلت الصالة كان فيها مرام وسارة ..
احمد : السلام عليكم
مرام وسارة : وعليكم السلام ..
احمد : امي وين ؟؟
مرام : بغرفتها ..
على طول على غرفة امي ..
دقيت الباب ..
...: ادخل ..
خذت نفس عميق وسميت بالرحمن ودخلت ..
احمد : السلام عليكم .. قربت من عندها وحبيت راسها ..
امي وهي تبتسم : وعليكم السلام ..
عرفت سر ابتسامتها .. عرفت ليش انا جاي ووش راح اقول ؟؟
شبكت يديني مع بعض وانا احاول اضبط تنفسي : يمـــ ..
مابعد كملت الكلمه الا امي تقول : سم يا وليدي .. قول اللي في خاطرك ..
ضحكت لها .. لهدرجه مستعجله على زواجي : يمه الله يهديك مابعد قلت شي ..
امي : ادري وش بتقول ؟؟
احمد : اوكي دامك داريه .. خلاص اجل توكلي على الله ..
امي : ابشر ياوليدي بالمره السنعه اللي تسعدك وتهنيك ..
ابتسمت لها وانا اقوم واحب راسها : الله يخليك لنا ولايحرمنا منك .. بس هاه يمه شرطي اشوفها قبل لا يصير أي شي ..
امي وهي تطق صدرها : ابشر ماطلبت شي .. هذا حقك ..
احمد : اوكي ماما تبغين شي قبل لا اطلع ..
امي : سلامتك وانا امك ..
احمد : تصحبين على خير ..
وطلعت ..
احس حمل ثقيل وطاح .. كنت شايل هالموضوع وانا حاس اني مراح اخلص منه .. بس الحمد لله مشى الموضوع وتعدل كل شي ..
طلعت جوالي وكلمت سعود ..
احمد : هلا سعود ..
سعود : هلا فيك ..
قلت له من دون مقدمات : تراي قلت لامي تدور لي على زوجه ..
سكت سعود فترة .. حسيت انه تفأجا بقراري .. لانه جاء سريع ..
احمد : سعود وش فيك ؟؟
سعود وتغيرت نبرة الصوت : سلامتك .. الله يوفقك .. وزي ماقلت لك الظهر هاذي حياتك وانت حر فيها ..
احمد : انزين تآمرني شي ..
سعود : سلامتك .. مع السلامه ..
احمد : مع السلامه ..


رنا
صليت الفجر وجلست على سجادتي وانا ادعي ربي انه يدلني للطريق الصحيح ..
يارب افرج كربتي .. يارب مالي غيرك أشكي له .. يارب هون علي همي وغمــي .. ياربـــ
سمعت دق خفيف على الباب ..
رنا : من ؟؟
......: انا ناصر .. افتحي الباب ..
رنا : مفتوح ادخل ..
دخل ناصر وشغل النور ..
رنا : لااالاااالااااااااا .. ( وأنا أأشر بيدي ) طف النور عشان سدومه ماتقوم ..
ناصر : أوكي .. بس ابي اتكلم معك ..
جتني ضيقة صدر .. اكيد بيتكلم عن خويه ..
رنا : ناصر تكفى مالي خلق الحين ..
ناصر : لاتخافين انا بقولك شي زين ..
ابتسمت : اكيد زين ؟؟؟..
ناصر : ايو الله زين ..
قمت من سجادتي وابعدت جلال الصلاة عن راسي ولفيت السجادة معه ..
شغلت النور ووقفت قباله ..
ناظرني ناصر بحقد : هاذي اللي مالها خلق .. ( يقلد صوتي ) لاااااالاااااالاااا ..لاتشغل النور عشان سدومه ماتقوم
ضربته على خفيف مع كتفه : نصووووووووور لاتصير كذا عاد ..
ناصر : خلاص رضيت ..
بقلة صبر سألته : هاه وش بتقول ؟؟ وشو الزين اللي عندك ؟؟
ناصر يناظرني وهو متعجب : اقولك وانا واقف .. يانقعد هنا .. يانقعد بالصالة .. ( قصده الصالة اللي في الدور الثاني )
رنا : لالا .. تعال نجلس على سريري أحسن ..
جلسنا على السرير مقابلين بعض ..
ناصر : شوفي انا عارف انك رافضه فكرة الزواج .. وعارف بعد انك ماتبين هالشي عشان سدوم .. وعارف بعد اني قلت لك فكري بخويي .. بس الحين اللي عارفه ومتأكد منه اني اقولك لاتتزوجين اذا ماتبين الزواج .. وماراح احد يغصبك عليه لا أمي ولا عبدالرحمن يقدرون ..
ناظرته مستغربه كلامه : نصور .. انت شارب شي قبل لاتجيني ..
ناصر : ههههههه .. شف البنت العربجيه .. وش قصدك يعني ؟؟ منتي مصدقتني ..
رنا : والله مصدقتك .. بس انك توقف ضد امي وعبدالرحمن هاذي كثر منها ..
ناصر وعيونه كلها تحدي : جربيني !!!!
اخذت نفس عمييييييييييق وانا احس براحه اول مره احسها من يوم جيت لأهلي ..
سألته وانا متخوفه : يعني لو رفضت خويك .. ماراح تقوم القيامه؟؟؟ ..
ناصر : لا ..وبعدين خلاص اعتبري الموضوع منتهي .. لافيه خطبه ولاشي ..واذا احد سألك عن شي .. قولي له أسألوا ناصر .. اوكي ..
سألته مرة ثانية وانا ماني مصدقه اللي قاله : يعني خلاص ماافكر ولا أعيد حساباتي ؟؟..
ناصر : ايه خلاص .. وش فيك انتي ؟؟
رنا : مافيني شي .. بس والله من الفرحه اللي فيني ..
ناصر : جعلها دوم ان شاء الله ...
قام ويبي يطلع : تبين شي غيره ؟؟
قمت على طول وحبيت راسه : سلامتك ياخوي .. الله يخليك لي ولايحرمني منك ..
ابتسم بهدوء كالعاده : تصبحين على خير .. بروح انام ..
رنا : وانت من اهل الخير ..
طلع وسكر الباب ..
اما انا الدنيا مو سايعتني من الفرحه ..
انسدحت على سريري .. ماكملت ولاعشر دقايق الا وانا في سابع نومه من الوناسه ..


بعد شهر من هالاحداث ..
اعرض لكم بإختصار اللي صار في هالشهر ..
نبدأ بأحمد ..
خطبت له امه كذا وحده .. لكنه كان يرفض .. اما لانه مايبي من هالعائلة .. او شاف البنت وماعجبته .. او البنت ترفض انها تسكن مع اهله ..
الين مااستقر على وحده شافها وعجبته لكنه الى الآن ماوافق عليها .. خصوصا انه ماقال لهم انه راح يسكنها عند أهله ..
نوف مرة سعود حامل ..
حتى نورة حامل لكنه ماعلمت احد الى ألين بان بطنها والحين هي في الشهر السادس
مرام انخطبت وزواجها في الصيفيه ..


اما من جهة رنا ..
تقدموا لها كثيييييييييييييير واغلبهم رجاجيل كبار ومعهم حريم .. اللي يبيها الثانية واللي يبيها الثالثة .. حتى الرابعة بعد ..
وكانت ترفض وناصر يوافقها الرأي ويوقف بصفها ..
وعبدالرحمن يهدد ويتوعد ان هاذي آخر مرة ترفض ..
وكل مرة يقول هالكلام .. لكنه يصير العكس بفضل الله ثم بفضل موقف ناصر اللي مأيدها في كل شي ..
اما فواز كان مايتدخل في شي .. لكنه كان يقول رايه .. انه مو موافق ان اخته تتزوج من راعي حريم ...

رنا
طلعت من الصالة معصبة وموصلة حدي .. خلاص طفشت مليت ..
كل يوم على هالمنوال ..
لايكون انا قاعده فوق راسه وانا مدري ..
يخي يذلف لبيته ولا عاد يورينا وجهه ..
احس انه خانقني وخانق بنتي معي ..
اوووف ..
رقيت فوق لغرفتي وانا ودي بس اصيح ..
انسدحت على السرير وبدت عيوني تنزل دموعها لكن بهدوء ..
حسيت بالراحه وهن ينزلن .. حسيت بشعور غريب تجاه شخص ما أطيقه ولا أحب سيرته لكن ليه طرى على بالي ما أدري ؟؟؟ ..
غمضت عيوني بهدوء وتذكرت .... أ حــــ ـــمــــ ــــد
ليش مدري ؟؟
جى على بالي فجأة ..
وقعدت اتذكر المواقف اللي مريت فيها معه ..
واتذكر يوم يشتري لي البلوزة الحمراء .. ويوم يشيلني وقبل لانوصل للمستشفى قلت له يرجعني .. تذكرت يوم يشليني للمرة الثانية يوم كنت أنزف .. حتى يوم انه يناظرني وانا نايمه بدون غطى ..ويوم اترجاه انه ماينزل الجنين واشرح له اسبابي ..
كانت أيام وعدت .. الله لايعيدها ..
كانت شقى .. اصلا كل حياتي شقى .. من يوم مامات مشعل ..
مشعل .. !!!
آآآآآآآه يامشعل .. وينك تشوف حالي من بعدك ؟؟
صحت زياده وضاق صدري وحسيت اني مخنوقه وبموت من الهم اللي فيني ..
تعبت من دنياي .. واللي عانيته منها ..
ماحسيت بنفسي الا وانا نايمه ..

احمد
والله البنت ماعليها .. حلوه موووت .. بس
قهر لو ترفض عشان بس ماتبي تسكن عند اهلي ..
انزين انا مااقدر اطلع .. اهلي يحتاجوني ..
عندي فكره .. اسوي شقة مستقله ببيتنا غرفتين على مطبخ وصالة وحمامين ..
كذا اتوقع مالهم حجه انهم يرفضون ..
بحيث اني اكون قريب من اهلي وقريب منها ..
خلاص يا أحمد توكل على الله وكلمهم بكره وقلهم انك موافق وقلهم بعد عن الشقه ..
ناظرت الساعه اللي على يدي اووه الساعه 11 وربع ..
احس اني ميت جوع ..
نزلت من غرفتي .. لقيت امي وبندر بالصالة ..
احمد : السلام عليكم ..
امي بس : وعليكم السلام ..
احمد : يمه فيه عشاء ..
امي : ايه .. تبي احط لك ..
وانا اجلس : وين البنات ؟؟
امي : رايحات عن اخوك سعود يوسعن صدرهن ..
احمد : وانتي ورى مارحتى معهن ؟؟
امي : مدري مااشتهيت ..
قامت امي ودخلت المطبخ ..
التفتت على بندر اللي كان ساكت ..
احمد : وش فيك بندور ؟؟ عسى ماشر ..
ناظرني بإحتقار ..
عصبت منه .. عليه حركات هالبزر : لايكون قاتل ابوك وانا مدري ؟؟
بندر : اللي مابه خير لأهله مابه خير للناس ..
عرفت وش يقصد ؟؟ يقصد رنا وسديم ..
بس خلاص يابندر .. ماعاد اسم رنا يأثر فيني او يخليني ارتبك او افكر ..
الاول تحول ..
مااحس اني اميل لها او اشتاق لها زي اول ..
والحمد لله اني خلاص ركدت وخطبت بعد عشان استقر ..
احمد : بندور اذا تبيها خلاص ولايهمك اروح اخطبها لك .. ولاتزعل ولاتشيل بخاطرك ..
بندر : اصلا لو انا اقدر آخذها تتوقع بشاروك والا استأذن منك ..
احمد : اوووف اوووف .. اثرك انت اللي معجب فيها وتبيها .. مو انا ..
بندر وهو متأثر وواضح عليه : والله مو عشانها .. عشان سدوم المسكينه اللي بتتبهدل بحياتها ..
حسيت بتأنيب الضمير .. صادق بندر .. بس مااقدر اجبر نفسي على شي انا مابيه .. اذا سدومه بتتبهدل بحياتها فهاذا هو نصيبها ..
لاتقولون عني اناني .. انا مو كذا .. بس الظروف تجي عكس دايما .. بعدين هذا اللي ربي كاتبه .. والحمد لله على كل شي ..
قمت وانا عايف الدنيا كلها ..
دخلت على امي بالمطبخ : يمه خلاص مابي عشى .. بطلع ..
طلعت بسرعه حتى قبل لاأسمع كلمة من امي ..
ركبت سيارتي ومشيت ..


رنا
قمت على صراخ وصياح .. ياساتر يارب .. وش فيه ؟؟
ناظرت الساعه ..
3 !!!!
وش عندهم ؟؟ ومن اللي يصارخ ؟؟
طلعت بسرعه من غرفتي .. وقفت مكاني وانا اشوف امي تصيح وتصارخ وفواز يحاول يهديها ..
قربت من عندهم وانا حاسه فيه شي كايد صاير ..
استر يارب .. استر يارب ..
رنا : فواز .. ماما وش فيها ؟؟
فواز اللي ماكان منتبه لي .. التفت بسرعه لي ووجهه مخطوف ولونه اسود ..
لما شفت شكله تروعت .. وقعدت اصيح من دون مااعرف وش فيه ؟؟
فواز وهو متوتر حده : تكفين رنا لاتصيحين خليك قويه وتعالي هدي امي .. يالله رنا .. يالله ..
انا ماني فاهمه ولاشي ..
بس سمعت كلامه .. قربت من عند امي وحاولت اهديها ...
رنا : خلاص ماما .. خلاص اهدي .. ترى والله لأصيح معك ..ان ماهديتي ..
امي ضمتني بقوة وهي تصيح بصوت عالي : ياويلي عليك يابنيتي .. ياويلي عليك ..
لما سمعت امي تقول هالكلام .. مافهمت شي .. لكن الجنون عندي زاد عن حده ..
تركت حضن امي ومسكت فواز من رقبته باقوى ماعندي ..
رنا : بتقول وش فيها ؟؟ والا والله لاطلع في الشارع واسوي لك فضيحه لاصارت ولا استوت ..
صرخت بقوة : تــكــلـــم .. قــــــــــــول
بلع ريقه وتنفس بقوة وكأنها بتطلع روحه : ناصر وووووووو...ووو...وو
ضربته كف على وجهه وانا اصارخ : تكلم وووو .. وأيش ؟؟
فواز : سدوووووووووم ..
غمضت عيوني وانا احس بإرتخاء بأطراف رجليني ويديني ..
سدوم .. حبيبتي وش فيها ؟؟
عمري اللي بقى لي .. وش صار عليه ؟؟
حياتي اللي انا شقيت فيها .. وينها الحين ؟؟
بهدوء ماكان يتوقعه فواز .. حتى انا ماتوقعته : لاتقولي ماتت .. تكفي فواز .. ( امسح دموعي بكل يديني ) تكفى اللي يرحمك ويرحم اللي خلفوك .. لاتقول انها ماتت .. (ماقدرت امسك نفسي وزدت في الصياح ) والله مابقى لي غيرها في هالدنيا ..
طحت عند رجلينه وانا اصيح واشاهق ..


احمد
الساعه 12 ونص ..
كنت ادور في الشوراع .. ومن شارع لشارع .. هاذي عادتي لما اتضايق احط حيلي في الشارع ..
مريت على شارع رئيسي .. تفاجأت بالزحمة اللي فيه ..
كنت اقول تفتيش .. بعدين اقول لا لا اكيد حادث .. الله يستر علينا ..
بعدين لما اشوف السيارات تمشي .. اقول لا لا تفتيش .. لو حادث ماتمشي السيارات ..
الين قربت اكثر واكثر ..
فتحت قزازة السيارة وكلمت السيارة اللي جنبي : هلا أخوي ..
راعي السيارة : هلا والله ..
احمد : عسى ماشر وش فيه ؟؟
راعي السيارة : حادث ..
احمد : حادث !!! وين الأسعاف طيب ..
راعي السيارة : والله ياخوك انا مدري ..
طلعت جوالي بسرعه ودقيت على الأسعاف .. بلغتهم عن الحادث بعدين وقفت سيارتي على جنب ونزلت ..
اغلب الناس نازلين عشان يشوفون الحادث تقل الحادث فرجه .. عشان كذا الطريق مايمشي ..
انا اول مرة انزل اشوف حادث ..
بس نزلت لانه مافيه اسعاف بحاول اسعف اللي اقدر عليه .. وان شاء الله اني ربي على هالعمل يفرج كربتي ...
تخطيت كل الرجال ودخلت داخل لمكان الحادث ..
مافيه الا سيارة وحده بس ..
سألت اللي جنبي : وشلون صار الحادث ؟؟
الرجل: مدري بالضبط بس اكيد انه كان غافل ودخل في الشبك ..( قصده الحديد اللي يفصل بين الشارعين .. اللي رايح واللي جاي )
قربت من عند السيارة وانا اشوف اللي يحاولون يفتحون السيارة عشان ينقذون اللي فيها ..
واسمع اصواتهم وهم يقولون : البنت .. البنت .. بسرعه .. اقوى اقوى .. بسرعه لاتطول وهي تنزف ..
بنت !!! وبسرعه !! ولاتنزف !!
قربت اكثر وحاولت افتح الباب معهم ..
بس اني وقفت لما شفت اللي داخل السيارة ..
صرخت بأعلى ماعندي : ناصرررررررررررررررررررر .. بسرعه تكفون ياشباب .. بسرعه ..
اظلمت الدنيا بعيني ومااشوف الا عيون ناصر اللي قاعده تتألم بصمت وهو يناظرني ..
اكيد شافني .. الا الا شافني .. ابشر ياناصر .. راح افتحه وانقذه .. ابشر ..
قاعد اهز بالباب بأقوى ماعندي وانا اصرخ على الباب : افتح .. افتح .. أأأه .. أأأأه .. أفتح ..
حاولنا انا ومجموعه لكن ماقدرنا ..
تركتهم ورحت للجهه الثانية لأن البيبان اللي ورى مقفله ..
طالعت في القزازة وانا امسك العروة عشان بفتح الباب ..
طيرت عيوني .. وانا احاول استوعب البنت اللي راكبه قدام ..
قعدت اصارخ واضرب نفسي زي المجنون : سدوم .. سدوم .. هاذي بنت اخوي سدوم ..
مسكت الباب بأقوى ماعندي وحاولت افتحه .. وانا احاول وعيوني معلقه عليها وفمها ينزف دم ..
قعدت ارجف الباب برجلي لعل وعسى ينفتح .. حاولت وانا ادعي ربي ..
حاولت انا واللي معي .. والحمد لله انفتح ..
اول ماانفتح شلت سدومه بين ايديني .. وركبتها بأقرب سيارة ..وانا مااشوف اللي قدامي
احمد : الله يخليك بسرعه على اقرب مستشفى ..
نسيت ناصر : لا لا وقف وقف الله يخليك .. اصبر دقيقة بجيب ناصر وبجي ..
نزلت بسرعه .. ورجعت للسيارة اشوف الناس مطلعين ناصر
مسكته معهم : تعالوا هنا .. بسرعه .. هنا هنا ( وانا ااشر للسيارة اللي فيها سديم ) ..
ركبناه ورحنا على اقرب مستشفى ..
دخلوهم بسرعه .. اما انا جلست على كراسي الانتظار .. وانا اعصابي تعبانه ومشدوده ماني قادر اتحمل أي شي ..
غمضت عيوني وانا اصيح ..
صادق يابندر .. والله راح تتبهدل بحياتها .. وهاذي اولها ..
مريت ساعتين ..
وانا ماوقفت صياح ..
والله مااسامح نفسي لو صار لسدومه شي ..
حسيت احد حط يده على كتفي ..
فتحت عيوني على طول : هاه .. وش صار ؟؟
موظف الاستقبال : انت اللي جبت المصابين ؟؟
وانا امسح دموعي : ايه .. وش فيهم ؟؟ وش صار عليهم ؟؟
موظف الاستقبال : مدري .. بس لازم اخوي تعطيني بيناتهم .. انت تقرب لهم ..
احمد : ايه ايه .. اعرفهم ..
موظف الاستقبال : ممكن بس لو تكرمت تجي معي عشان تعطيني البيانات ..
احمد : اوكي ..
قمت مع الموظف وانا أحس بدوخة مو قادر أتحملها ..

يتبع

تكملة الجزء الثاني عشر

دخلت في عالم اشبه بالغيبوبه ..
صرت زي المجنونه مدري وش اللي قلب حالي ..
جلست اصيح واصارخ وامي وفواز يحاولون يهدوني بس مافي فايده ..
رنا : ودوني لبنتي .. آآآآآآآآآآآآآآآه ..ابي اشوفها تكفون ..تكفون ودوني .. آآآآآآآآآآآآآآآآآآآه يابنتي ياويلي عليك ..
فواز : اذكري الله يارنا .. بنتك مافيها شي .. اذكري الله ..
تعلقت في ياقه ثوبه وانا اشاهق من الصياح : احلف بالله ان سدوم مافيها شي .. فواز قول تكفى وش صار لها ؟؟ تكفى فواز ريح قلبي ..
قام فواز وقومني معه : روحي جيبي عباتك عشان اوديك لها ... يالله انا انتظرك بالسيارة ..
قمت مع امي ولبسنا عبياتنا وطلعنا ..
طول الطريق وانا اصيح .. عجزت امسك نفسي ..الين ماوصلنا المستشفى ..
فتحت باب السيارة بسرعة وركضت ألين بوابة الطوارئ .. ووراي فواز اللي كل شوي يحاول يلحقني .. لكن مقدر ..كنت اسرع منه ..
وقفت عند الاستقبال ..
سألته بصوت مخنوق وكله صياح : وين بنتي ؟؟ الله يخليك قلي وينها .. اسمها سديم ..
موظف الاستقبال وحسيته تعاطف معي : هدي اختي هدي .. اسم بنتك سديم مشعل ..
هزيت له راسي : ايه ايه .. وينها .. وينها .. ( وانا اتلفت يمين ويسار )
قرب فواز من عندي ومعه امي : وش قالك ؟؟
رديت عليه وانا الى الآن اشهق : ماقال شي ..
مسكني فواز مع كتوفي : اذكري الله ولاتسوين بنفسك كذا ..
موظف الاستقبال : اختي .. سديم مشعل في غرفة الضماد النسائي اللي على اليمين ..
ركضت اول ماسمعت الوصف ..
دخلت الغرفة وجلست افتح الستاير وحده وحده ولاهمني أي احد .. اللي يهمني الحين اني القى بنتي واشوفها ..
فتحت الستارة الرابعة .. تعديتها .. لكني رجعت يوم شفت انها بنت صغيرة ..
قربت من عندها وانا قلبي بيطلع من مكانه ..
قربت اكثر واكثر الين وصلت ليدها ..
قربت يدي ليدها وانا كلي خوف .. مسكتها وانا ارتجف ..
كانت باردة وابرد من الثلج .. كانت يدها زرقا من كثر آثارابر المغذي والتحاليل ..
التفت على وجهها اللي كان اغلبه ملفوف بشاش ..
ورجلينها المغطيه بالجبس .. ويدها الثانية الملفوفه ومعلقه على رقبتها ..
حاولت اركز على ملامحها ..اذا هي سدوم او لا .. قربت يدي من الشاش ورفعته عن اسفل شفتها ..
دق قلبي بقوة لما شفت شفتها زرقا ..
معقولة تكون هاذي سدومه ..
معقوله هاذي بنتي ..
لالالا ياربي هاذي مو بنتي ..
هاذي جثة هامده كأنها ميته ..
وبنتي حية مافيها شي ..
مابقى غير شعرة واوصل للجنون ..
جلست اضرب راسي بأقوى ماعندي .. عشان استوعب اللي صار ..
ماقدرت ..
حسيت بصداع ذبحني .. غمضت عيوني وسندت راسي على طرف السرير .. ودموعي تنهمر بهدوء ..


احمد
كنت جالس في نفس مكاني.. بعد ماشفت ناصر وسدومه وتطمنت عليهم ..
كنت متوقع انها راح تجي ..
وفعلا ..
كانت عيوني اغلب الوقت على باب الطوارئ الين دخلت ..
دخلت زي المجنونه .. كانت تركض .. ولما وصلت للأستقبال .. سمعت صوتها وهي تصيح وتكلم الموظف ..
وشفت فواز لما حاول يهديها ..
وشفتها بعد لما كلمها الموظف بعدين راحت تركض لغرفة سديم ..
اما فواز وامه اللي كانت معه راحوا لغرفة ناصر ..
جالس ومحتار .. كيف راح تتحمل تشوف سدومه بهالشكل ..
مستحيل راح تعرف شكلها ..
وقفت ومشيت الين الغرفة ..
وقفت عند الباب .. انتظر صوتها .. بس ماسمعته ..
لايكون صار لها شي ..
لازم ادخل واشوف وش صار لها ؟؟؟
اخذت نفس طويل ودخلت ..
فتحت الستارة من دون صوت ..
شفتها حاطه راسها على طرف السرير وماسكه يد سديم ..
خفت لايكون اغمى عليها ..
ناديت اسمها بتردد : رر....نـ....ــا ..


رنا
رفعت راسي على صوته .. وكنت ادري انه احمد .
ناظرت فيه.. وانا احاول امسح دموعي اللي شوشوت الرؤية عندي ..
بلعت ريقي الناشف : أحمد !!
احمد وعيونه حزينه : فيك شي ؟؟
كسر خاطري .. شكله متأثر مرة ..
نزلت دموعي مرة ثانية .. وانا حاسه بإختناق : تعبانه يا أحمد تعبانه ..
قرب اكثر ووقف والسرير هو الفاصل اللي بيننا : سلامتك .. وش تحسين فيه ؟؟
زدت بصياحي وعجزت اتمالك اعصابي ..
تكلمت بعصبية وكأني ابي استعجل القدر : ليتني امووووووت .. ليتني اموت وارتاح .. ابي مشعل .. ابيه يا أحمد محتاجه له .. والله اني فاقدته .. وفاقده حنانه ..

احمد
عجزت اتحمل الكلام اللي قالته ..
نزلت دموعي غصب عني .. وانا اتذكر مشعل واللي قاله لي ..
والله اني اناني .. قاعد افكر بحياتي ونسيتها هي وبنتها ..
ودي اقرب من عندها واحضنها واخفف عنها .. بس مقدر ..
ليتني اصير لها مشعل اللي تتمنى انه يرجع ..
غمضت عيوني وانا ابلع ريقي اللي نشف : لاتقولين كذا يارنا .. انتي قوية .. وتقدرين تتجاوزين كل اللي صار .. بس خلي ايمانك بالله قوي .. وان شاء الله الله بيفرجها ..
طلعت بسرعه قبل لااضعف اكثر ..
رجعت لمكاني وغطيت وجهي بيديني وجلست اصيح وانا اتذكر شكلها وشكل سدومه ..
سمعت احد مر قدامي وهو يقول : الاستقبال قال وين غرفتها ؟؟
الرجال : يقول غرفة الضماد بس مدري وين ؟؟
هذا صوت فواز .. رفعت عيوني ومسحت دموعي وناديته : فواز ؟؟
التفت فواز : احمد !!
قرب من عندي : هلا والله .. ( سلم علي ) وشلونك ؟؟
هزيت راسي يعني بخير ..
فواز : شكلك تعبان .. روح ارتاح .. خلاص حنا عندهم ..
جلست على الكرسي لاني حسيت بدوخه : لا انا بجلس الين اتطمن على سدومه ...
فواز : اللي يريحك .. انا بروح اودي امي لسديم وبشوفها واجيك .. اوكي .. بس القاك هنا ..
احمد : انزين روح انتظرك ..
خمس دقايق وجاني فواز وجلس جنبي ..
فواز : بصراحه ماألومك .. لو انا مكانك كان مقدر اتحرك بمكاني ..
احمد : الحمد لله على كل شي .. ربك لطف بحالهم ..
فواز : الحمد لله ..
ادري مو وقته بس ودي اسأله سؤال ومتردد ..
احمد : فواز ممكن اسألك سؤال ؟؟
فواز : اسأل .. خذ راحتك ..
احمد : امممم .. سدومه وش ركبها مع ناصر؟؟ ..
ابتسم فواز ابتسامة حزينه :آآآآآآآآآآآآآآآآآآآآآآآآآه يا احمد .. السالفة طويلة بعدين اقولها لك ..
تحمست اعرف وش السالفة : لا قولها الحين .
فواز : بس مو وقته يا أحمد ..
احمد : الا وقته .. والا انت عندك شي ؟؟
فواز : لا ماعندي شي .. بس ماراح اقول التفاصيل .. بقولها لك باختصار ..
ارتحت لان فواز بيعلمني : قول .. اسمعك ..
فواز : عبدالرحمن بيزوج رنا .. ورنا رافضه .. وناصر مأيد موقفها .. حتى انا بس ماتدخلت ..والبارح كالعاده تهاوشوا ثلاثتهم .. طلعت رنا لغرفتها وهي معصبه .. اما ناصر أخذ سدومه وقال انه بيروح يوسع صدرها مع رنا .. لما رقى لرنا لقاها نايمه .. قال خلاص بآخذ سدوم لحالها .. بس هاذي السالفة ..
انصدمت من اللي قاله .. يعني رنا تنخطب وترفض ..
وعبدالرحمن يحاول يغصبها .. بس الى الآن مقدر ..
بس في النهاية راح يزوجها غصب عليها ..
عذرتك يارنا لما قلتي انك تبين تموتين .. عذرتك انك تبين مشعل ..
لكني ماعذرت نفسي لاني فرطت فيك وفي بنتك ..
نسيت نفسي وزواجي قدامها .. وحلفت ايمان اني لاحافظ عليها وعلى بنتها .. لو كلفني هذا الشي عمري ..
اوعدك يارنا اوعدك ..


رنا
لما هديت شوي وحسيت اني اقدر اوقف دموعي ..
سألت امي اللي جالسه تقرأ على سدومه : ماما وش اخبار ناصر ؟؟
امي : الحمد لله يابنيتي طيب .. وانتي وشلونك ؟؟
رديت عليها بصوت مبحوح : بخير .. بروح اشوف ناصر ..
طلعت من الغرفة ..
لكني سمعت امي وهي تقول : فواز برى مع احمد خليه يدلك ..
طلعت وانا حاسه اني بطيح من الدوخه اللي فيني ..
شفت فواز وجنبه احمد اللي كان سرحان وفي عالم ثاني ..
قربت من عند فواز : فواز وين غرفة ناصر ؟؟
قام فواز بسرعه لما شافني .. مسكني مع ايدي : تقدرين تمشين ؟؟
هزيت راسي يعني ايه ..
مشيت انا وياه الين غرفة ناصر ..
سميت بالرحمن ودخلت ..
اخذت نفس طويل وانا احمد ربي واشكره .. ان ناصر طيب ..
مافيه أي شي ..
اللهم رضوض بسيطه ..ووجهه ممخش شوي ..
جلست جنبه وهو نايم .. مسكت يده وبستها وانا حاسه بتأنيب الضمير ..
كله مني .. كله مني .. لو انا موافقه على واحد من هاللي جوني .. كان ماصار اللي صار ..
استغفر الله وش قاعد انا اقول ؟؟
لو تفتح عمل الشيطان ..
قدر الله وماشاء فعل .. اللهم لا اعتراض على حكمك ..
بس خلاص اي واحد يجيني راح افكر فيه واذا بيناسبني راح آخذها وكفاية مشاكل لحد هنا ..

الجزء الثالث عشر



احمد
حاس اني مخنوق ومااقدر اتنفس .. زياده على كذا بطني يعورني ما أكلت شي .. حاس بدوخه ذبحتني ..
بس فوق كل هذا مقدر اتحرك من مكاني واخلي رنا وسدوم بهالحال ..
راح انتظرهم الين ترجع رنا للبيت .. والدكاتره يطمنوني اكثر على سدوم ..
كتفت يديني .. وسندت راسي على الجدار .. غمضت عيوني وانا حاس اني راسي ثقيــــــــــــــــــــــل بالحيل ..
جلست افكر بوضعي .. كيف راح اقدر اتصرف بزواجي عقب اللي صار ..
الحمد لله اني مارديت عليهم .. والا كان من جد حالتي الحين حاله ..
ياربي وش راح اسوي الحين ؟؟
مستحيل اخلي سدومه ورنا بهالحاله ؟؟
انا وعدت نفسي اني احافظ عليهم ..
بسسسس ..
لاتقعد تبسبس يا أحمد .. خلاص الموضوع عندك انتهى ..
لاتضيعهم اكثر ماهم ضايعين ..
المشكلة ان ( الكلام ) يدور الى الآن في راسي .. ماني قادر اطلعه من راسي ..
كلام حاولت اني انساه قصدي اتناساه بس للأسف ماقدرت ..
آآآآآآآآآآآآه بس من هالحياة .. آآآآآآآآآآآآآآآآآآه ... آآآآآآآآآآآآآآآآآآآآآه ..
اللهم طولك ياروح ..
اووووووووه نسيت بندر ..!!!
الله يعيني عليه وش يفكني الحين من لجته ؟؟
ياربيه مالي خلق هواشه ومعاتبه على اللي صار ؟؟
انا عارف انه بيحط اللوم علي ..
بس من جد انا مالي ذنب ..
لازم افكر بشي اقوله له عشان افتك من حنته اللي ماراح تخلص ..
وان شاء الله راح القى ..

رنا
حاسه اني تعبانه ومقدر اتحمل اكثر من كذا ..
حبيت راس ناصر اللي كان نايم من دخلت عنده ..
طلعت بشوف سدوم اذا هم انقلوها لغرف التنويم او لا ..
مريت في الاسياب اللي بصراحه توي اركز فيها ..
كنت هاديه وانا امشي .. عكس اول مادخلت المستشفى ..
شفته ..
وليتني ماشفته ..
كان شكله مرة حزين ويكسر الخاطر ..
نزلت دمعتي اللي ماقدرت اسيطر عليها ..
وقفت مكاني وقعدت اطالع فيه .. تغير كثييييييييير ..
والا يتهيأ لي ..
احسه كبر عن اول ..
وجهه شاحب ومصفر ..
حتى من ضمة يدينه حسيته ان اعصابه مشدوده ..
تبون الصراحه رحمته .. اول مرة اشوفه مكسور وحزين ..
قربت من عنده من غير تردد ..
خلاص ماعدت مثل قبل احسب لخطوتي حساب ..
قربت الين وقفت قباله بالضبط ..

احمد
حسيت بخيال شخص قدامي ..
فتحت عيوني وانا على وضعيتي ماتحركت ..
ناظرت فيها وعلى طول عرفتها ..
فزيت من طولي وبغيت اصقع فيها بس الحمد لله هي تدراكت الموضوع وابعدت ..
بإرتباك واضح علي : آسف والله مو قصدي ..
ردت علي بصوت اهدى من قبل : لا عادي .. انا عاذرتك .. احمد خلاص كفايه الى هنا .. روح ريح نفسك .. شوف شكلك كيف صاير .. وبكره تعال .. انا ببقى معها ..
ياكذاااااااااااااااب يا أحمد وتقول خلاص ماعدت تحس في أي مشاعر اتجاهها .. وتقول ماتحرك فيني شي .. وتقول بعد خلاص ماعدت افكر فيها وطلعت من راسي ..
صرت اكبر كذاااااااااااااااااب يا أحمد ..
آآآآآآآآآآآآآآآه من قلبك اللي راح يدمرك .. ولاتدري وين راح يوصلك ؟؟
انتبهت لها وانا احس نفسي ضايع قدامها : هااااااااااه .. لا لا .. ماني تعبان ولاشي .. انا بجلس معـــك ..( توهقت يوم قلت معك .. احس وجهي ضاع ) ق ققصدي معكم الين ماتقوم سدومه بالسلامه ..
رنا : احمد عشان خاطري روح .. والله احسك بتطيح من التعب ..
بمووووووووووووووووووووووووووووووت وربي بمووووووووووت .. تقول عشان خاطرك .. ماتدري ان الخاطر كله لها .. ياربي تتوقعون لوتدري اللي بداخلي راح ترضى فيه وتبادلني نفسه .. والا راح تعترض وترفض قلبي وترفضني ..
لا لا يا أحمد لاتتشاااااااااااااائم .. وانت ماجربت أي شي .. ولاخطيت ولاخطوه ..
خذت نفس قبل لا أرد عليها : خلاص اللي تشوفينه بروح ارتاح بس من بكره الساعه 8 وانا عندكم ..

رنا
هزيت له راسي وانا حاس اني مقدر اوقف اكثر من كذا : خلاص يا أحمد اللي يريحك .. اهم شي تروح ترتاح ..
احمد : تآمرين شي ..
رنا : سلامتك .. واذا بغيت فواز موجود .. لاتشغل بالك ..
عطاني ظهره وطلع من المستشفى ..
اول ماغاب عن عيني .. طحت على الكرسي بتعب واضح على وجهي المغطى ..
حسيت بدوخه وكتمه ..
وراسي قام يروح يمين ويسار .. وعيوني تقلب ..
ابعدت الغطاء عن وجهي بدون شعور .. وانا حاسه اني بفقد الوعي ..
ماكنت مهتمه لأي شي .. او بالأصح نسيت كل شي ..
حسيت بيدين دافيه تمسك وجهي : انتي بخير .. حاسه بإيش .. تكلمي .. يابنت .. تكلمي .. انتي دايخه .. تبين مويه .. يابنت ..
شوي شوي وكلما الصوت يبعد ألين أختفي نهائيا ..
وأغمى علي ..

أحمد
طلعت من المستشفى وانا قلبي معها ..
مو قلبي بس روحي وحياتي ودنيتي .. كلها تركتها هناك ..
وصلت للبيت على آذان الفجر ..
وانا ميت جوع وميت تعب .. محتار اختار الفراش والا الأكل ..
شكلي بأختار الأثنين .. بنام وانا آكل ..
ترى اسويها لاتستغربون ..؟؟؟؟!!!ههههههه
فتحت باب الشارع ودخلت ..
انا عارف نفسي لو دخلت داخل الفله .. راح انسدح على كنبة الصالة وانام واترك الصلاة..
احسن لي اتوضى من مغسلة الملحق واطلع اصلي ..
وقفت على المغسلة وبديت اتوضى .. من التعب اللي فيني ماانتبهت ان الملحق انواره شغاله الا لما خلصت وضوء لاني احس اني صحصحت شوي ..
دخلت راسي بشوف من فيه بالملحق ..
بندر !!!
منسدح ويطالع في التلفزيون .. ناظرني بنظرة مافهمتها بعدين رجع عيونه للتلفزيون ..
مديت بوزي وانا متضايق من شكله وذا الحين وشلون بقوله عن سديم ؟؟ والله الوهقه اللي وهقت نفسي فيها ..
احمد : أحم احم .. بندر .؟؟
بندر من دون مايناظرني : خير ؟؟
احمد : بقولك شي .. بس عطني وجه ..
التفت بندر علي : خير وهذاني عطيتك وجه .. تكلم ..
احمد : أممممممممم بندور اخوي حبيبي .. والله اني جوعااااااااااااان وميت جوع .. ابي فطور ..
بندر : وش اسوي لك انا ؟؟ المطاعم فاتحه خششها .. روح افطر ..
قلت له بترجي وانا ماسك بطني : بندور تكفى والله ما أقدر تعبان .. عساني الحين اوصل للمسجد .. تكفى بندور .. والله من تركت العشاء ما أكلت عقب ..
بندر وشكله رحمني .. قال لي ووجهه للتلفزيون : خلاص خلاص .. بروح اجيب لك وش تبي ؟؟
احمد : ابي فول وشكوكه وكبده .. ( طلعت من مخباة ثوبي 50 ورميتها له ) .. شف الخمسين ..
التفت وهو معصب : تعلمنا ان معك فلوس .. ترى كلنا معنا .. رجعهن ..
احمد : ميخالف مابيننا شي وانا اخوك ..
طلعت وتركت الخمسين مكانها ..

رنا
ريحة بنج عند خشمي ..
اوووووووووووف قرف .. وش ذا الريحه ؟؟
فتحت عيوني وانا أتأفف ..
ناظرت حولي الا انا في سرير وعلى يميني رجال لابس بالطو شكله دكتور .. وعلى يساري رجال لابس بنطلون اسود جنز .. وبلوزة سوداء نص كم ..
بحلقت بعيوني ماني عارفه وش صاير لي ؟؟
كنت بتكلم بس سبقني الدكتور : الحمد لله على سلامتك .. إحنا حطينا لك مغذي عشان تصحصحي من الدوخه اللي انتي فيها .. وماعليكي شر ان شاء الله ..
اخذ علبة البنج اللي كانت على الطاولة وطلع ..
توي انتبهت ليدي اللي كانت مغروسه فيها إبرة المغذي ..
رفعت عيوني للرجال الواقف على يساري ..
على طول ابتسم لي ..
انا ماكنت منتبهه لأي شي .. حتى اني ناسيه ان بنتي صايره لها حادث ..
حتى وجهي ناسيه انه مكشوف ..
طولت وانا اناظره ومستغربه من ابتسامته ..
تكلم وليته ماتكلم .. وابتسامته الى الآن على فمه : انتي بخير ؟؟ تحسين بشي غير الدوخه ؟؟
عجزت اتكلم او افتح فمي .. بس قعدت اطالعه ومبهورة من شكله وهو مبتسم ..
شكله خطييييييييييييييير ..بالأسود ..
بلعت ريقي وحاولت اقول شي بس ماقدرت ..
مد يده بجرأة واضحه وحطها على جبيني وهو مبتسم : تكلمي .. وش فيك ؟؟ انزين مو لازم تتكلمين .. اذا انتي بخير هزي راسك ..
هزيت رأسي وانا احس اني بيغمى علي مرة ثانية ..
وش اللي طيحه ذا قدامي ؟؟
وش اللي حطه فطريقي ..؟؟
لما شاف اني سرحت .. تكلم وقال : انا كنت مار بطلع من المستشفى لما شفتك دايخه وتعبانه ماقدرت اخليك بهالحاله واطلع المشكله مافي احد مر من عندك وخفت عليك .. شلتك وجبتك هنا وو..
انصدمت لما قال شلتك .. قطعت كلامه وانا متفاجأة : شلتني !!!
ضحك لما شافني مستغربه : ههههههههه ايه شلتك .. تصدقين كنتي مرة خفيفة ...
بغيت اصيح الا قولوا صحت .. والله مهزلة .. انا ماصدقت على الله افتك من احمد يجيني هذا ..
من جد ماقدرت اتحمل الموقف .. ونزلت دموعي وانا حاسه بغصه في حلقي ..
......: ليش تصيحين ؟؟ والله ماسويت لك شي .. بس شلتك وحطيتك على هالسرير .. والله العظيم اني ماسويت شي غيره ..
لما صحت استوعبت كل شي .. واول شي استوعبته اني بدون غطى ..
على طول رفعت الشرشف اللي مغطي جسمي .. وحطتيه على راسي ..
ما أمداني اتغطى الا يد قويه تسحب الشرشف كله حتى عن جسمي ..
بنظرات مستغربه من تصرفي : ليش تغطيتي ؟؟ حرام عليك انا تارك كل شي وجالس جنبك وانت تحرميني من شوفتك ؟؟؟
الحين انا بديت اعصب .. وش فاكر نفسه الأخ لايكون زوجي وانا مدري ..؟؟
تكلمت وياليتني ماقلت شي .. ورب البيت ندمت اشد الندم : هيه انت خير ان شاء الله .. عطني الغطى .. حرام عليك تناظرني .. والله حرام ..
وبديت اصيح .. حسيت نفسي ضعيفه .. وانا مو كذا بالعكس انا قوية وقويه بعد ..
بس اللي مريت فيه خلاني كذا .. ضعيفة .. مكسورة ..
فجأة ماحسيت فيه الا يضمني لصدره ..
حط راسي على كتفه بكل هدووووووووووء وانا مستسلمة بكل طوع .. وكأنه مغناطيس جذبني له ..
.......: لا تبكين .. والله حرام هالوجه الحلو يبكي ..
انا غمضت عيوني ورحت في عالم ثاني .. عالم وردي ..عالم حلوووووو ..
عالم ذكرني بمشعل وبحنانه .. مشعل وتدليعه ..
خجلت من نفسي وابعدت عنه وانا ضايعه مشتته ..
ابيه وماابيه .. على اني مااعرفه .. الا اني حسيت بالامان والراحه معه ..
قلت له بكل أدب : ممكن تطلع وتخليني لحالي ارتاح ..؟؟
حسيت فيه يناظرني .. لكن انا ابد ماناظرته عقب اللي صار ..
...... : اوكي براحتك .. بسسس ..ممممم .. ممكن طلب أخير ؟؟!
رنا : آمر ..
..... : اسمي تركي .. وبعطيك رقمي .. حلفتك بالله تدقين علي تطمنيني عليك .. اوكي ..
انتبهت له لما طلع قلم من مخباة بنطلونه وورقة وكتب فيها الرقم ..
مسك يدي اليسرى وفتحها وحط الورقة فيها وسكر يدي .. بعدين قربها من فمه وباسها ..
ترك يدي بهدوء وطلع ..
وخلاني جامده مكاني من أثر البوسه اللي انطبعت على يدي ..

احمد
صليت الفجر ورجعت للبيت وجلست في الملحق انتظر بندر ..
كنت مجهز له كلام كثير بقوله له ..بس محتار اقول له الحين او اذا قمت من النوم ..
وانا افكر بأقوله او ما أقوله ..
دخل بندر ومعه الفطور : سويت شاهي ؟؟!
طيرت عيوني عليه : هـــــــاه .. لا لا ماسويت شي ..
بندر ويحط كيسة الفطور على الأرض : لانك فالح .. اووووووف ..
وطلع من الملحق شكله راح يسوي شاهي ..
اما انا ماقدرت اصبر على طول فتحت الكيس وطلعت الفول والخبز والكبده والشكشوكه وبديت آكل ..
مرت عشر دقايق .. بعدين دخل بندر ..
بندر وهو يجلس ويصب الشاهي : يعني ماتقدر تصبر .؟؟؟
احمد : اقولك ميت جوع تقول ماتقدر تصبر ...
بندر وهو يميل فمه : بالعافيه ..
احمد : الله يعافيك ..
بندر : اقول احمد .. يوم طلعت بالليل وين ذلفت ؟؟
استغربت منه كلمة ذلفت : ذلـــــــــــــفـــــت !!! وش قصدك ؟؟
بندر وهو مستحقرني لأبعد درجه : ماقصدي شي .. بس دامك جوعان ورى مامريت المدام عشان توكلك ..
ألحين ببدى العب بأعصابه هاذي فرصتي ..
رديت عليه وانا مو مهتم : أي مدام ؟؟!!
بندر : أي مدام .. العروسه اللي بتآخذها .. والا هونت ..
أحمد : اوهووووووووووووو ... انت قديم .. جدا قديم .. ليش ماسمعت وش صار ؟؟
بندر وعاقد حواجبه ومستغرب : وشو صار ؟؟ ليش انت غيرت رايك ؟؟ والا وش السالفة ؟؟
بقوله واللي يصير .. ادري تهورت وتسرعت لكن خلاص ماعاد فيني صبر ..
أحمد : بندر بارك لي ..
بندر وهو الا مو فاهم وش السالفة : على ايش ؟؟ احمد فهمني ..
أحمد : خلاص انا كنسلت الزواج ..
بندر وهو مو فاهم شي من اللي قلته : قديمه .. بكره تروح تدور غيرها .. هاذي اللي مفرحك يعني ..
أحمد : بندر .. انت مافهمت انا وش اقصد ؟؟
بندر : وش تقصد ؟؟
احمد : اقصد .. خلاص انا قررت اتزوج رنا ..
بندر طير عيونه مو مصدق : رنــــــــــا !! ..
أحمد : ايه رنا .. مو هذا اللي انت تبيه ؟؟
بندر وهو الى الآن مو مصدق : انزين وشلون ؟؟؟ وليش ؟؟ ومتى ؟؟
أحمد : تستهبل انت ووجهك .. مو انت قلت لي خذها .. خلاص انا فكرت وشفتها مناسبه لي ولها ...
ارتسمت على وجهه ابتسامه فرح : الحين اقدر اقولك الف الف مبروك .. والله وعرفت تختار .. متى ناوي تخطبها ؟؟
أحمد : قريب ان شاء الله .. بس خلني ارد على هذولا ( اقصد اللي خطبت منهم ) واقولهم مو موافق .. بعدين ارتب وضعي واروح اخطبها ..
بعدها خلصت أكل وقمت بروح انام ..
بتسألوني ليش ماقلت له عن الحادث ؟؟
اخاف اقوله .. يسوي لي مناحه .. ويقول أيه انت ماقررت هالقرار الا لما صار لهم كذا ..
خلني ساكت ازين لي وكأني ماأدري عن أي شي ؟؟
وبكره يحلها الف حلال ..
دخلت غرفتي وغيرت ملابسي .. انسدحت على السرير وانا جوالي معي .. بدق على رنا بشوف وش اخبارها ؟؟
دقيت .. بس محد رد ..
مرة ثانية .. برضوه محد رد ..
سكرت الجوال ونمت وانا ناوي اقوم الساعه 11 اروح عندها بالمستشفى ..


رنا
حاولت اقوم من السرير ..
بشوف فواز وين راح ؟؟ بروح اشوف بنتي ..
ناديت السستر تفك ابره المغذي لانه خلص ..
لبست عباتي زين وتغطيت وطلعت من الغرفة ..
وصلت لأقرب استقبال صادفني ..
رنا : لو سمحت ممكن اكلم جوال ؟؟
موظف الأستقبال : من بغيتي ؟؟
رنا : ابيك تدق على أخوي .. الله يخليك .. اذا خايف على جوالك .. انت دق وكلمه .. ووصف له مكاني .. الله يوفقك ..
موظف الأستقبال : أوكي ..كم رقمه ؟؟
رنا : 05500000000 اسمه فواز
كلم اخوي ووصف له مكاني .. وبعد عشر دقايق ..
شفت فواز اقبل علي ..
مسكني مع يديني : الله يهديك يارنا وين رحتي ؟؟ خفت عليك ..
قلت له وانا احس بتعب : مو وقته الحين .. بعدين اقولك .. تكفى فواز ودني لبنتي .
فواز : سدومه نقلوها لغرف التنويم فوق .. تعالي معي ..
رحت معه الين غرفة سدومه ..
جلست على السرير جنبها ..
امي : يابنيتي وينك ؟؟ من ساعه وانا اقول لفواز رح شف وين اختك .. يقولي تجي الحين ..
قصيت لهم كل السالفة اللي صارت لي ..
وآخر شي قلت لهم .. لما صحيت لقيت الدكتور وبس ..
غير كذا ماتكلمت .. من شالني ؟؟ من اللي وداني للسرير ؟؟ من اللي انقذني ؟؟ ماجبت طاريه ابدا ..
رنا : فواز .. وشلون الحين فيه مرافق معها او لا ؟؟
فواز : الا انا خلصت كل شي .. وانتي بتصيرين معها ..
رنا : زين سويت .. لاني مستحيل اخيها بروحها .. خلاص انتم روحوا .. واذا جيتي ياماما وقت الزيارة جيبي لي غيار انا وسدومه ..
فواز : اجل يالله يمه .. لان حدي تعباااااااااااااان مره ..
قامت امي معه وطلعوا من الغرفة ..
تذكرت جوالي وانا ارص على ورقة تركي بيدي بقوة ..
قمت بسرعه وطلعت في الممر : فواز ..
التفت فواز اللي ماابعد كثير : هلا..
رنا : جوالي لاتنساه اوكي .. جيبه معك ..
فواز : اوكي ( ويأشر بيده يعني مع السلامه )
دخلت عند بنتي انسدحت جنبها على السرير ونمت والورقة في حضن يدي دفيانه..
يتبع ...

تكملة الجزء الثالث عشر


احمد
قمت من النوم وانا شبعااااااااااااان ..
ناظرت في ساعة جوالي ..
4 ونص ..!!!
قمزت من على السرير وانا مو مستوعب .. وشلون نمت الى هالحزه ؟؟ كيف ماقمت على المنبه ؟؟
رحت للحمام وتسبحت .. بعدها صليت الظهر والعصر .. لبست ملابسي ونزلت تحت ..
في الصالة ..
كان فيه امي بس ..!!
تصدقون ناسي كل شي .. ناسي امر خطبتي ..
احمد : السلام عليكم ..
قربت وحبيت راسها ..
امي : وعليكم السلام .. هلا يمه .. وشلونك ؟؟
احمد : الحمد لله .. انتي وشلونك ؟؟
امي : والله ياوليدي ضايق خلقي عشانك .. امس طلعت وانت زعلان حتى العشاء ما أكلته ..
أحمد : لا مو زعلان ولاشي .. بس دق علي واحد يبغاني ضروري .. وماقدرت اخليه ينتظر الين اخلص عشى ..
امي : انزين وش صار على البنت .. رديت على أهلها ..
هنا أنا تعلثمت وماقدرت اقول شي ؟؟
وش اقولها ؟؟
تبوني اقولها اني هونت .. وابي رنا ..
والله ان تزعل علي امي زعلة مالها اول من تالي ..
خلني اجاريها واسكت الين القى الوقت المناسب واخطب رنا ..
احمد : يمه الى الآن مابعد قررت .. تراه زواج مو لعبه .. يومي بالكثير وارد عليهم ..
خطرت لي فكره .. وقلتها لامي .. : بعدين يايمه انا ماقلت لهم انها بتسكن بالبيت .. يعني مافيه بيت بروحها ..
امي : يعني تهقى بترفض ..
احمد: اكيد بترفض زي اللي قبل .. وش رايك يايمه قبل لا أرد عليهم تكلمينهم وتقولين لهم ان شرطه تسكن مع اهله .. وخليهم يفكرون ويردون خبر قبل لا اوافق انا او ارفض
امي : صادق وانا امك .. الحين لو وافقت عليها .. بعدين ترفضك عشان السكن معنا ..ماارضاها عليك .. يعني انت توافق وهي ترفضك .. لا والله
ابتسمت على تفكير امي : اللي تشوفينه ..
قمت بطلع : تبين شي قبل لا أطلع ..
امي : ماتبي غدى ؟؟
احمد : لا ..
طلعت من البيت وركبت سيارتي وعلى طول على المستشفى ..

رنا
ازعاااااااج هالمستشفى مايخلون احد ينام .. كل شوي وهم داخلين ..
اووووووف منهم ..
قمت على الساعه وحده .. لمادخل علي فواز ومعه جوالي وشنطه فيها ملابس لي ولسدومه ..
فواز : الحين انا بروح وبجي العصر .. تبين شي اذا جيت العصر ..
رنا : سلامتك .. واذا بغيت شي بدق عليك .. اقول فواز ..
فواز : هلا ..
رنا : درى عبدالرحمن ..
فواز : ايه ..
رنا : وليش ماجى ؟؟
فواز : انا قلت له لاتجي الحين .. تعال بعد العصر ..
رنا : اهاااااااا .. اوكي ..
فواز : يالله مع السلامه ..
فتحت الشنطه وطلعت لي ملابس .. حطيت ورقة الرقم على الطاولة اللي جنب السرير ..
ودخلت الحمام بتسبح ..
على الساعه خمس .. بعد ماتطمنت على سدومه .. واكلتها من الا كل اللي جايبنه لها .. خليتها تنام ورحت لعند ناصر اخوي ..


احمد
وصلت للمستشفى ورحت على طول للغرفة اللي كانت سدومه موجوده فيها بس مالقيتها ..
رجعت للأستقبال وسألته عنها ..
قالي انها فوق في غرف التنويم .. خذت رقم الغرفة ورقيت فوق ..
دقيت الباب بس محد رد ..
فتحته وانا انادي : رنا .. رنا .. انتي موجوده ..؟؟
برضوه محد رد ..
تأكدت انها مو موجوده حتى باب الحمام مفتوح ومافيه احد ..
دخلت على سدومه اللي كانت نايمه حبيتها على راسها اللي كان مغطى كله بالشاش ..
جلست على الكرسي .. وانا افكر وين راحت رنا وخلت بنتها ؟؟
يمكن راحت لأخوها !!
يمكن .. كل شي جايز ..
جلست انتظرها وانا العب بالجوال ..
لفت انتباهي الثلاجه اللي كانت قبالي ..
قمت وفتحتها .. فاضيه ..
فكرت اني انزل تحت للبقالة واملى الثلاجه منها .. عصيرات ومويه وشكولاتات .. على ماتجي من عند اخوها .. هذا اذا كانت عند اخوها ..
بدون ماافكر فتحت باب الغرفة ونزلت للبقالة ..

رنا
بعد ماتطمنت على ناصر .. اللي الحمد لله كان صاحي ويتكلم عادي معي .. يعني هذا دليل انه بخير ومافيه الا العافيه ..
طلعت من عنده بروح لبنتي ..
دخلت غرفة سدومه .. اول مادخلت قلبت عيوني يمين يسار ..
وانا ارفع خشمي احاول اشم الريحه ..
ريحه عطر رجاليه قويه ..
قربت عند بنتي لقيتها نايمه .. اكيد فيه احد جى لعندها ..
ياترى من هو ؟؟
مااشغلت نفسي كثير بهالموضوع .. لاني شفت ورقة الرقم على الطاولة ..
على طول مسكتها وضميتها بيدي .. وانا قلبي يرجف ..
لايكون اللي دخل شاف الورقة ..
الله يستر ..
مسكت قلبي بيدي وانا احاول اخفف دقاته .. بس ماقدرت ..
فتحت الورقة ..
055000000000 تركي عبدالله الـ........
طولت وانا اناظر خطه .. وش كان يحس فيه وهو يكتب الرقم .؟؟
لايكون يفكر اني بكلمه او بعطيه وجه ..
بدون شعور قطعت الورقة لقطع صغيرة ورميتها في الزبالة ..
رجعت لبنتي وجلست اقرأ عليها ..
وانا في عالم ثاني .. عالم صامت خالي من أي مشاعر ..
اندق الباب ..
قمت بسرعه وعدلت غطاي ..
ووقفت عند الباب ..
رنا : من ؟؟!
..... : احمد ..
رجعت لمكاني وانا اقوله : أدخل ...

احمد
دخلت ومعي الاكياس ..
على طول رحت للثلاجه وجلست اصفف اللي جبته فيها ..
بعد ماخلصت قربت من السرير : وشلونك رنا ؟؟
رنا : الحمد لله بخير ..
احمد : وسدومه وش قالوا عنها ؟؟
رنا : الحمد لله بس قالوا لازم تقعد لين يفكوا الشاش اللي براسها .. ويفكون الجبس من رجليها .. ويمكن يعيدون يجبسون لها مرة ثانية ..
احمد : ماقدامها الا العافيه.. تقوم بالسلامه ان شاء الله ..
رنا : الله يسمع منك ..
احمد : ناصر وشلونه ؟؟
رنا : بخير ..
احمد : كم رقم غرفته بروح اشوفه ..
رنا : غرفة 4453 الدور الثالث ..
استغربت برودها .. كأنها تكلمني من دون نفس ..
فحبيت انهي هالمهزلة ..
احمد : اوكي انا بطلع اشوف ناصر تبغين شي ؟؟
رنا : سلامتك ..
طلعت وتركتها لكن تركت قلبي عندها ..
ليتني اعرف وش تفكر فيه ؟؟ او وش قاعده تحس به ؟؟

رنا
بعد ماطلع .. تأكدت انه هو اللي كان فيه قبل لا أجي ..
لان العطر نفسه لما دخل قبل شوي ..
ما أمداني اكمل تحليلي ..
الا اندق الباب ..
قمت بسرعه وتغطيت زين ووقفت عند الباب : من ؟؟!
..... : انا عبدالرحمن فيه احد ؟؟
فتحت له الباب .. : لا أدخل مافيه احد ..
تركته ورحت جلست على السرير ..
قرب من عندي ومد يده بيسلم علي .. مديتها وسلمت عليه ..
عبدالرحمن : وشلونك ؟؟
رنا : بخير ..
عبدالرحمن : وسدومه عساها احسن الحين ..
رنا : نحمد ربي ونشكره ..
عبدالرحمن : توي كنت عند ناصر .. وقالوا لي انه بخير وبيطلع بكره .. وسدومه متى قالوا بتطلع ؟؟
رنا : بعد اسبوع لما يفكوا الشاش عن راسها ووجهها ..
قرب من عندها وحب راسها .. : ماعليها شر ان شاء الله..
رنا : الشر مايجيك ..
سكتنا فترة .. والاجواء الى الآن مشحونه بيني وبينه ..
عبدالرحمن : شفتي عنادك وين وصلنا ؟؟
تأففت وانا مالي خلقه : مو وقته الحين ؟؟
عبدالرحمن : الا وقته .. عشان تصحين من اللي انتي فيه .. بغيتي تضيعين بنتك من يدك .. وانت الى الآن تكابرين .. حتى اخوك ماسلم منك .. شوفي وش صار له من تحت راسك ..
ماتحملت كلامه قاعد يظلمني وانا مالي ذنب بكل اللي صار ..؟؟
يعني لو انا وافقت اتزوج يعني ماراح يصير هالشي ..؟؟
هذا قدر ومكتوب سواء وافقت او لا ..
صرخت بوجهه : ليش انت دايم كذا ؟؟ كل شي تحطه فوق راسي ؟؟ ليش مو انت السبب في كل شي .. لو انك مخليني في حالي ولا تدخلت في أي شي كان ماصار هذا كله .. لاتحاول تبرئ نفسك .. اذا انا ورى كل هذا .. ترى حتى انت تتحمل الجزء الأكبر ..
نزلت دموعي غصب عني وانا حاسه بالظلم ..
ماحبيته يشوف ضعفي .. ودموعي اللي صارت تنزل مثل الشلال ..
طلعت من الغرفة وابعدت شوي ..
جلست على وحده من الكراسي الموجوده في الممر ..
وقعدت اصييييييييييييييييييح لكن بدون صوت ..

احمد
سلمت عليه وتحمدت له على السلامه وطلعت ماحبيت اطول عنده .. لانه عنده اصدقائه وزملائه في العمل ..
طلعت وانا ناوي ارجع لرنا ..
بكلمها واحاول المح لها اللي انا ناوي اسويه ..
رحت للغرفة وقبل لا أوصل .. قابلني عبدالرحمن ..
احمد : السلام عليكم ..
عبدالرحمن : هلا والله وعليكم السلام .. وشلونك .؟؟
احمد : بخير الله يسلمك .. الحمد لله على سلامتهم .. طاح الشر ان شاء الله ..
عبدالرحمن : الله يسلمك .. الشر مايجيك .. ادخل داخل شوف سدومه .. رنا مو موجوده خذ راحتك ..
والله مسكين ياعبدالرحمن يحسب اني توي جاي ..
مايدري ان هاذي المرة الثانية اللي اجي اشوفها ؟؟
بس هو يقول ماهي موجوده .. وين راحت ياترى ؟؟
وين تروح هاذي ؟؟ لايكون فيها شي وانا مدري عنه ؟؟
احمد : اوكي اشوفك على خير مع السلامه ..
عبدالرحمن : مع السلامه ..
دخلت عند سدومه .. وجلست عندها انتظر رنا ..
بس طولت ماجت ..
ماحبيت احرجها واحرج نفسي اكثر بقعدتي هنا ..
خلاص تطمنت عليهم وش أي بعد ؟؟
بطلع واروح ابلغ امي تجي تشوف سدومه وتتحمد لها بالسلامه ..
وانا امشي بالممر بروح للمصعد ..
عرفتها .. مستحيل اشوفها ولا اعرفها .. مستحيل اتوه عنها ..
شفتها جالسه على الكراسي وضامه وجهه بيدينها ..
حاولت افهم وش فيها ؟؟ ماقدرت ..
قعدت اخمن من راسي .. ماعرفت ..
مريت من عندها ماراح اكلمها وكأني ماعرفتها..
ركبت المصعد ونزلت للدور الأرضي ركبت سيارتي وانا افكر ..
عرفت الحين وش فيها ؟؟
اكيد شي فيه علاقه بعبدالرحمن اخوها ..
لاني لما جيت اشوفها هو طلع لي وقالي مو موجوده .. اكيد زعلها وطلعت من عندها ..
والا انا غلطان ..

رنا
مسحت دموعي ورجعت للغرفة ..
الحمد لله انه طلع ..
لاني لو شفته راح اذبحه .. قاهرني .. الحين انا وين ..؟؟ وهو وين ؟؟
الحين وقته هالسوالف ..
دقيت على امي بشوفها ليش تأخرت ؟؟
قالت لي انها جايه بالطريق ..
كان الوقت على العشى .. توضيت وصليت قبل لا تجي امي وفواز ..
مسكت جوالي ودقيت على بنت خالتي فجر ..
رنا : السلام عليكم ..
فجر : هلا والله وغلا بالقاطعه .. وعليكم السلام .. اخبارك ؟؟
رنا : بخير الحمد لله .. انتي وش اخبارك ؟؟ وش اخبار زوجك والعيال ؟؟
فجر : كلهم الحمد لله بخير ..
رنا : فجورة تدرين انا وين ؟؟
فجر : وين ؟؟
قصيت لها سالفة الحادث من طق طق الى السلام عليكم .. س ماطريت لها تركي والموقف اللي صار لي معه ..
مدري احس الكل بيلومني على اللي سواه تركي فيني .. وكيف انا خليته يتمادى .. ففضلت احتفظ هالموضوع بنفسي احسن لي ..
فجر : ياعمري كل هذا يصير لكم وانا ماعندي خبر ؟؟
رنا : شفتي انك قاطعه وماتسألين عن بنت خالتك ؟؟
فجر : انتي القاطعه .. آخر مرة كلمت انا .. يعني الدور عليك انتي ..
رنا : وهذاني كلمتك ..
فجر : وش عقبه ؟؟ بعد ماصار لكم اللي صار .. انت بأي مستشفى عشان بكره ازورك ..
رنا : لاتتعبين نفسك .. شوفتك وسلامك وصل ..
فجر : لا والله غير اجي .. وش دعوه ؟؟ مو من كثره ..
رنا : براحتك .. حنا في مستشفى ......... وقبل لاتجين دقى اقولك الدور ورقم الغرفة ..
فجر : اوكي .. اخليك الحين بروح احط العشاء .. اشوفك بكره ..
رنا : اوكي .. مع السلامه ..
فجر : الله يسلمك ..
سكرت من عندها ..
هاذي فجر بنت خالتي وصديقتي واكثر من اختي .. بس في الفترة الأخيرة من كثر اللي مريت فيه ماصرت ادق عليها كثير .. مالي خلق احد هذيك الفترة .. بس الحين لا .. متحمس هاني ارجع وياه مثل قبل ..

نهاية الجزء الثالث عشر ..

الجزء الرابع عشر

رنا
ناظرت ساعة جوالي من دون ما أتحرك من السرير ..
9 ونص .. اوووووووووف من اللي يدق الباب هالحزه ..
ما أتوقع الممرضات لأنهن على طول يدخلن بدون استئذان ..
اندق الباب مرة ثانية بس بصوت اعلى ..
قمت وانا احاول الملم عباتي وأحطها على جسمي وأغطي وجهي ..
فتحت الباب حتى من دون ما أقول مين ؟؟
ناظرت من عند الباب وانا يالله يالله افتح عيوني ..
صرخت بصوت عالي : بندرررررر ..!!
ابتسمت بندر من صرختي وشكله مستانس : ايه بندر .. وش فيك تفاجئتي ؟؟
قلت له وانا اضحك :هههههههه هالحزه عاد .. !!؟؟
بندر وهو يضحك على ضحكتي : ههههه (ولف وجهه عني ) أرجع يعني ..
صدقت انه بيرجع : لا لا لا تعال امزح معك .. ادخل حياك ..
بندر وهو يدخل وخلى الباب مفتوح : الله يحيك .. اخباركم ؟؟.. علومكم ؟؟ زمان والله عنكم ..
وانا اسحب به كرسي عشان يجلس : انت القاطع اللي ماتسأل والا احنا موجودين ..
بندر وهو يجلس : يابنت الحلال والله اني ضايع ما ادري وش اسوي ؟؟
جلست على السرير :بسم الله عليم وراك وش فيك ؟؟
بندر وهو يتنهد : المهم ماعليك مني ..بشريني عن سدومه .. وش اخبارها الحين ؟؟ عساها احسن ..
رنا : الحمد لله والشكر له .. بخير عساك بخير ..
بندر : والله يارنا لما قالي احمد .. بغيت امووووووووووت تعرفين وشلون انهبلت .. والله اني قلبي معكم .. بس ماباليد حيله ..
رنا : تسلم يابندر .. عارفين والله ومقدرين .. لاتشغل بالك .. جت سليمه الحمد لله .. متى دريت انت ؟؟
بندر : امس الساعه 11 .. امي قالت لي ..
رنا : اهااااااااا .. وش اخبارها ؟؟
بندر : الحمد لله بخير ..
بعد هالكلمه قام وجلس جنب سدومه على السرير وباس راسها .. بعدين مسك يدها وباسها ورجعها مكانها .. بس الى الآن يده في يدها ..
ناظرني وفي عيونه نظرة حزن : تصدقين رنا .. ودي سدومه عندي .. وربي مشتاق لها .. يوم كنتي موجوده .. اول ماادخل البيت اروح للملحق لاني عارف ان سدومه فيه .. لكن الحين مافي الملحق الا الهواء ..
تأثرت لكلامه : تتزوج ان شاء الله وتجيب زيها وتنساها ..
بندر : مستحيل غير سدومه مافي احد بالقلب ..
رنا : اوف اوف .. الرجال عاشق ..
بعد ماقلت عاشق .. شالها بين يدينه وحضنها وهو يقول : عاشق ومغرم وميت بعد .. اذا عندك مانع بعد ..
رنا : ههههههه لا ماعندي مانع .. انت عمها بمقام ابوها .. لو تذبحها حلالك ..
طير عيونه علي : اذبحها ..!!! انا اذبح حبي !! لا لا بسم الله عليها من كل شر .. تقوم بالسلامه وترجع زي اول بحول الله وقوته ..
رنا : آميـــــــــــــــــــــن ..
نزلها من بين يدينه وحطها في سريرها : عندي مشوار ولازم الحق عليه .. بس قلت بأمرك قبل لا اروح .. تآمرين شي ..
رنا : سلامتك ..
تذكرت شي : بندر .. كيف دخلت ؟؟
بندر : ههههههههه توك تذكرين ؟؟ والا شوفتي نستك ..؟؟
رنا : صادق شوفتك نستني .. جاوبني الحين كيف دخلت ..؟؟
بندر : ههههههه عشان تعرفين ان عمكم ماهو هين ..
مديت بوزي من تحت الغطاء : من ناحية مو هين فهو فعلا مو هين ..
بندر : ههههههههه .. تصدقين عاد عطيت السستر خمسين ريال ودخلتني ..
طيرت عيوني .. مو صاحي هالرجال ..
رنا : ليــــــــــــــــش ؟؟؟ مو قادر تصبر لوقت الزيارة ؟؟
تنهدت وهو يغمض عيونه : تستاهل سدومه من يبيع عمره ويعطيها اياه ..
رنا : مو لهدرجه يابندر .. الله يخليك حق نفسك ..
قالي وهو يناظر ساعته : اووووووووه تأخرت .. يالله اشوفكم العصر ان شاء الله .. مع السلامه ..
سألته بلقافه : بندر وش عندك مستعجل ؟؟
فتح الباب وهو يقول : خلي الموضوع يضبط بعدين اقولك .. يالله مع السلامه ..
طلع وسكر الباب .. حتى ما انتظر اقوله مع السلامه ..

بعد أسبوع ..

أحمد
خلال هالأسبوع مافيه شي مهم يذكر .. غير زياراتي المتكررة أنا وأمي وخواتي لسدومه بالمستشفى ..
اليوم يوم جمعة ..
صليت الجمعه انا وبندور وبعدها رجعنا للبيت ..
وبعد ماتغدينا ..
أحمد : يمه بتروحين معي ؟؟..
أمي : ألا بروح ..
أحمد : وانت بندر ؟؟
بندر : بروح المغرب ..
أحمد : خلاص اجل جب خواتي معك المغرب .. يالله يمه انا بالسيارة ..
قمت وطلعت وركبت السيارة ..
دق جوالي ..
واحد من اخوياي .. جلست أكلمه على ماتجي امي ..
ماأنتبهت الا اللي ركب بجنبي .. حركت السيارة على أنها أمي ..
بس انمسكت يدي تمنعني ..
ألتفت بشوف من هو ؟؟
ألا أشوف بندر ..
أحمد : خيــــــــــــــر .. حسبتك أمي ..
رجعت أكلم بالجوال : نايف أكلمك بعدين .. مع السلامه ..
سكرت الجوال وحطيته في جيبي ..
بندر: هههههههههههه أكلت المقلب ..
أحمد : انت ووجهك تضحك بعد ..
بندر : انزين قلي وش صار ؟؟
أحمد : على أيش ؟؟
بندر : لاتستهبل علي .. وشو على ايش ؟؟
عصبت : أيه وش قصدك خطبتي اللي بكنسلها والا موضوعي مع رنا ..؟؟
بندر بتريقه : ايه ماشاء الله انت مواضيعك واجده .. حتى حريمك صايرة واجده ..
أحمد : اذا على خطبتي امي بتتصرف .. اما موضوعي مع رنا .. بكلمها اول ماتطلع سدومه من المستشفى .. سؤال ثاني أخ بندر ..؟؟ أشوفك صرت اخوي الكبير وانا مدري ؟؟
بندر : اذا انا افهم منك .. ليش ما اكون اكبر منك ؟؟
ضربته على كتفه : أنزل لا أشوتك مع الدريشة .. ضف ..
بندر : ههههههه .. بأضف بس والله لأصير وراك وراك .. ألين أشوف نهايتها ..
أحمد : تدري وش أحسن شي فيك ؟؟
بندر : وشو ..؟؟
أحمد : انك بتضف وجهك عن وجهي وبآخذ راحتي بالبيت من دون حنتك ورنتك اللي لجيتني فيها ..
بندر : ماراح اروح ألين اتطمن عليك ..
أحمد : لا أمي على غفلة .. جعلك تفارق اليوم قبل بكره ..
بندر : هههههههه .. تكفى كثر من دعاويك هاذي .. محتاجه والله كثير ..
أحمد : ابشر .. دعواي زي كذا وأردى ..
فتحت امي باب السيارة ..
بندر : ميخالف ابيهن .. بس ادع لي ..
احمد : خلاص انزل ..
نزل أحمد وركبت امي ..
حركت السيارة ..
وبالطريق ..
أمي : لك خلق تسمع وش ابقول ؟؟
ناظرت امي مستغرب .. وش فيها أمي ؟؟ وراها تتكلم كذا ..؟؟ أكيد عندها شي يضيق صدره !! وألا ماقالت لك خلق ؟؟
أحمد : هههه وش دعوه يمه حتى لو مالي خلق .. بسمعك وانا ما أشوف الجاده ..
أمي : ياوليدي انا كلمتهن وقلت لهم شرطك ..
أهاااااااااااااااااااا .. امي ضايق صدرها عشان هالموضوع .. ؟؟ الله يستر وش بتقول ؟؟ لاتقول انهم وافقوا .. والله ان تجيني جلطه .. عقب ماضبطت وضعي ..
أحمد : أيــــــــــه وش صار ..؟؟ وش ردوا عليك ؟؟
أمي : من يوم كلمتني ذيك الساعه .. وانا مكلمتهم .. والبارح ردوا علي ..
أحمد : أيـــــــــــــه ..
وانا حاط يدي على قلبي وادعي .. خسارة ماقلت لبندر يدعي لي ..؟؟
ههههههههههههههههه
أمي : يقولون مانبي بنتنا تسكن عند حمولتها .. قالت ايش ؟؟ تقول لاصارت البنت بعيده تسلم وتسلمون .. ( لما أمي قالت انهم رفضوا وأنا اتنهد بأقوى ماعندي .. أحس حمل وأنزاح .. والله كنت شايل همه .. خصوصا وانا أشوف رنا يوميا .. واحس قلبي بيموت من الشوق لو ما أخذتها .. والحين أخليكم مع أمي .. بس حبيتا قولكم وش شعوري يوم قالت هالكلمتين ) وش ذا الكلام اللي هي تقوله .. فيه ام تقول هالكلام ..؟؟ ليش وحنا بناكل بنتها ؟؟ والله انها حرتني بكلامها .. اشوى انك ما أخذتها ياوليدي .. اذا هاذا اوله ينعاف تاليه .. لا بالله مابيك تآخذها ولانبي قربها .. بس ولا يهمك ياوليدي .. والله ثم والله لأزوجك بنت تستاهلك وتقدرك ولاتعافك لا انت ولا أهلك .. أما هاذي وش ينبغى فيها اذا اهلك ماتبيهم .. اجل غديك ماتزورنا ولاتجينا عشانها ..
ترى امي ماخلصت حكي .. بس حبيت اختصر لكم السالفة ... كلام كثير قالته امي .. شي فهمته وشي والله ماادري وش تقول ؟؟
بس اهم شي في الموضوع اني افتكيت من السالفة ..
وصلت للمستشفى وامي الى الآن مابعد خلصت كلامها ..
فتحت بابي : يالله يمه انزلي وبعدين نتناقش في الموضوع ..
أمي وهي تتلفت على اللي حولها : وصلنـــــــــــــــــــــا ؟؟!!
أحمد : هههه ايه وصلنا .. قاعده تتكلمين ولا انتهبتي للطريق .. يالله انزلي ..

رنا
اليوم جمعه أكيد الكل راح يجي واولهم أحمد في المقدمه ..
مشاء الله عليه مخلاني ولا يوم .. يزورني اكثر من مرتين في اليوم ..
هالاسبوع زاروني كثيـــــــــــر ..
زوجه عبدالرحمن مرة أخوي .. نوف مرة سعود .. خالتي الوحيده أم فجر .. وفجر .. وطبعا فجر ماقصرت علمت عماتي .. عندي ثلاث عمات من دون اعمام ابوي الاخ الوحيد بينهم .. زاروني كلهم من غير بناتهم ..
وجعني راسي من جد ..
بعد ماتغديت وغديت بنتي .. اللي الحمد لله كلما لها وتتحسن .. فكوا الشاش عن وجهها .. وخفت الجروح اللي فيه ...
اما رجولها أمس فكوا وحده والحمد لله تجبرت .. اما الثانية رجعوا يجبروها مرة ثاني .. واحتمال يطلعونا بكره ..
بس اللي مضيق صدري انها ماتضحك او تتكلم الا بالموت .. احس نفسيتها مرة معدومه .. وانا اصبر نفسي واقول يمكن من الحادث واللي شافته .. اكيد بتتأثر ..
المهم تسبحت ولبست قبل لا يجي احد ..
غيرت ملابس سدومه وعطرتها .. ومشطت شعرها وسويت لها قرنين مثل تحب ..
اووووه نسيت اقولكم .. ناصر اخوي الحمد لله تحسن كثير وطلع من المستشفى بعد يومين من دخوله .. وهو بعد يزورني ويزورني بعد اكثر من أحمد ..
كلمت امي اسلم عليها .. قبل لايجي احد ويشغلني ..
وقبل لا أسكر من امي .. اندق الباب ..
وانا مستعجله : يالله امي اندق الباب .. ابروح البس عباتي .. مع السلامه ..
سكرت الجوال .. قمت بسرعه ولبست عباتي وتغطيت ..
جلست على الكرسي ..: ادخل ..
انفتح الباب ..
....... : رنـــــا ؟؟!!
مديت بوزي .. هاذي خالتي ..
قمت بسرعه واستقبلتها : هلا والله ..
سلمت عليها وحبيت راسها : هلا خاله .. وشلونك ؟؟
خالتي : الحمد لله بخير .. وانتم وش اخباركم ؟؟ وش اخبار سدومه
قربت لها الكرسي وجلست ..: الحمد لله بخير .. ليش تكلفين على عمرك ياخاله .. ؟؟ تعب عليك ..
خالتي بلهجة شديده : لا مو تعب ولاشي .. انا جايه اشوف بنيتي ..
رنا : ماتقصرين ياخالتي عساك على القوه ..
اندق الباب مرة ثانية ..
قبل لا أنطق وأقول مين .. خالتي تكلمت : هذا أحمد .. ( بصوت عالي ) أدخــــــــل أدخـــــــــــــــــل .. أحمــــــــــــــد .. تعــــــــــال ياوليدي مابه غريب ..
غطيت وجهي .. وانا أتأففف .. وش تقول مافيه أحد غريب ؟؟ وانا وش خانتي من الإعراب ؟؟ وألا انا ماعني غطوة على قولتهم ..
بلعت كلمتها وسكتت .. مهما كان هي بمقام أمي ولها كل الإحترام ..
بس أحسها في الفترة الأخيرة .. شايله علي ليش ما أدري ؟؟ الله يستر بس لاتسوي لي مناحه .. وتطلب مني سدومه تنام عندهم ليله او ليليتين .. والله تسويها .. عاد انا ذيك الحزه ... !!! اخنقهـــــــــــــــــــــــــــــا ...!!!

أحمد
دخلت : السلام عليكم ..
امي ورنا : وعليكم السلام ..
سحبت لي كرسي وجلست ..
أحمد : هاه وش الأخبار ؟؟ عسى كل شي تمام ..
رنا : الحمد لله ..
أحمد : تغدت ..؟؟ اكلت شي ..؟؟..
رنا : ايه أكلت ..
امي : ايه لاتجوعينها .. ترى الحين محتاجه للأكل أكثر من أي شي .. عشان يجبر كسره وتزين صحتها ..
سكتت رنا ولا ردت على أمي ..
حبيت ألطف الجو شوي ..
قمت وجلست جنب سدومه على السرير : هاه سدومتي .. وش اخبارك اليوم ؟؟
قلبت عيونها لي بدون ماتتكلم ..
ناظرت رنا بحزن وانا اسألها : الى الآن ماتتكلم ؟؟!
رنا : ايه الى الآن ..
أمي أعمتها مرة وحده يوم قالت : حسبي على ابليس .. بعذر البنت لو انطرمت .. أجل اللي شافته شوي .. ياعمري عمرها وياحياتي حياتها .. لو ابوها الله يرحمه عايش كان ماصار اللي صار .. بس وش نقول قدر الله وماشاء فعل .. انا ما أدري وينك عنها ؟؟ ( تقصد رنا ) وشوله مطلعتها مع خالها ذيك الحزه ؟؟ والا فيه ام عاقله تسوي سواتك ؟؟ والله لو انها عنـــــــــ..........
قطعت كلام امي لما شفت رنا لفت وجهها عن امي وجلست تناظرني من تحت غطاء عيوني الشفاف .. صحيح ماشفت عيوني لكن واضح انها تناظرني ..
قمت بسرعه لأمي : خلاص يمه وش ذا الحكي ؟؟ هذا وقته ؟؟ لاطلعوا بالسلامه ان شاء الله قولي اللي تبينه ؟؟
أمي وهي تتنهد : آآآآآآآآآآآآه بس آآآآآآآآآآآآآآه .. لو الكلمه بيدي كان تشوف وش اسوي ؟؟ مو بس اتكلم ولا أحد يسمع لي ..
اندق الباب .. وحمدت ربي انه قطع هالسالفة ..
رحت اشوف من عنده ..
أحمد : هلا أخوي .. بغيت شي ؟؟
.......: انا الدكتور المناوب .. بدخل اشوف حالة البنت .. وأسجل ملاحظاتي .. ممكن تشوف لي الدرب ..؟؟
أحمد : ايه ايه .. تفضل حياك ..
دخل ودخلت وراه ..
لما قرب من السرير .. كانت رنا جالسه في الجهة اليسرى .. يعني لازم تبعد عشان يشوف سدومه لان المغذي من جهتها ..
انا كنت ورى الدكتور ..
لما رنا رفعت راسها بتقوم وتسحب الكرسي معها ..
لاحظتها وكنت جدا دقيق في الملاحظة ..حطت يدها على صدرها وكأنها تمنع شهقتها من اللي شافته .. انا كذا حسيت .. وتأكدت بعد لما ابعدت الكرسي ما جلست عليها ظلت واقفه وتناظر الدكتور ..
تبون الصراحه أكلتني الغيرة ..
وش فيها ؟؟ وليش تناظره ؟؟ وليش حطت يدها على صدرها لما شافته ؟؟ أكيد فيه شي ..
بسسسسس هذا الشي من جهة رنا ....بس ..
اما الدكتور ماكان يطالعها ولا هو مهتم ابد يمها .. لانها كانت وراه ..
كان يتكلم معي ويسألني انا مو هي ؟؟
يعني المسألة من عند رنا .. وماراح اقول لازم اعرف لاني ماراح اعرف .. بس بقول اتمنى اني اعرف ..

رنا
اول ماشفته بعدين اشهق ..
مو معقوله ..!! ابدا ما أصدق ..
تركي .. دكتور ..!!!
بس شكله ماعرفني .. جعله مايعرفني ابد ..
بس انا خايفه ان أحمد لاحظ شي .. حركاتي كانت مفضوحه ..
الله يستر علي ..
لما عطاني ظهره عجزت أشيل عيني منه .. حتى وهو يتكلم مع أحمد .. ماقدرت امنع نفسي من اني استمتع بصوته ..
تركي هذا عجبني ودخل مزاجي من اول ماشفته ..
له طله وهيبه .. شكله وحركاته وهو يكلمك او يناظرك تحس انه يعرفك من زمان .. وحتى انت تعرفه ..
ملامحه وتقاسيم وجهه .. تجذبك .. وتخليك غصب تناظره ولاتشيل عينك منه .. جذااااااااااب لأبعد مدى ..
كل هذا .. واللي صار لي معه شي ثاني .. قسم بالله احس اني انتفض من داخل .. احسب رعشه بتذبحني وانا اناظره واتمقل فيه ..
وربي لو اقارنه بأحمد .. يطلع احمد ولاشي .. احمد عنده صفر بالشمال ..
أحمد : هاه دكتور بشر ؟؟
الدكتور تركي وباين عليه انه يبتسم لان من صوته عرفت لما تكلم : لا تطمن أخ ممم ...
أحمد : أحمد ..اسمي أحمد ..
الدكتور تركي : أخ أحمد .. تطمن حلوتكم الامورة مافيه الا العافيه .. ( قرصها على خدها بخفه وباس القرصه ) تتدلع بس .. بس مافيه مانع تدلعونها زياده ..
أحمد وهو يبتسم : والله يادكتور من ناحية الدلع مآخذه حقها وزياده .. الله يقومها ان شاء الله بالسلامه وراح احطها بعيوني ..
الدكتور تركي : انت أبوها ؟؟!
أحمد : لا أنا عمها .. ابوها متوفي .. الله يرحمه ..
الدكتور : الله يرحمه ويرحم اموات المسلمين .. انزين .. ملاحظاتي عليها كلها الحمد لله ايجابيه .. انا راح اكتب لها خروج على مسؤوليه المستشفى .. بس لازم بعد يشوفها دكتورها ويكتب ملاحظاته واذا تطابقن الملاحظات راح تطلع بكره بإذن الله ...
أحمد : الله يبشرك بالخير .. ماقصرت يادكتور .. عساك على القوه ..
الدكتور تركي : انزين امها موجوده هنا ؟؟
بديت ارجف لما سأل عني ؟ ما أتوقع انه يعرفني .. لا أن شاء الله مايتذكرني .. ولو عرفني ان تصير كارثة خصوصا احمد موجود ومن ساعه وهو عينه علي ويراقبني .. الله يستر ..
أحمد : ايه موجوده ..
الدكتور تركي : بكلمها بخصوص البنت ..
أحمد وهو يناظرني بعيون قويه وكأنه ولي أمري : قولي وانا اقولها ..
الدكتور تركي والحين شفت ابتسامته لانه ألتفت علي : ليش فيه مشكله لما أكلمها .. ( وهو يناظرني )
هنا أحمد عصب .. لكني مااهتميت له ..
عندي القمر ليش اطالع بالنجوم ؟؟
تكلمت وانا ارجف من ردة فعل أحمد : آمر دكتور ..
ليتني ماتكلمت ؟؟ ليت لساني انقطع ؟؟ ليت احمد منعه انه يكلمني ؟؟
تدرون ليه ؟؟
لانه عرفني ..
ناظرني بنظرات ولهانه .. كأنه يدور علي وتوه يلقاني ..
عقد حواجبه وهو مستغرب .. لف وجهه عني وجلس يناظر سديم .. بعدين لف علي وهو يقول وابتسامته شاق الحلق : هاذي بنتك ؟؟
بلعت ريقي وانا احاول اصلب روحي واوقف زي الناس .. احس اني بديت اتمايل : ايه بنتي ...
رفعت عيوني لأحمد ..وانتبه احمد اني اناظره ..
أشر لي احمد .. حط اصبعه على فمه يعني اسكتي ..
تبون الصراحه اول مرة اسمع كلام أحمد من دون نقاش ..
سكت ومو بس كذا .. طلعت من الغرفة بعد ..

أحمد
تأكدت ان بينهم شي ..!!
تنهدت بضيق ..وانا ودي امسك الدكتور واعجنه بيديني الثنتين ..
واللي قهرني اكثر رنا اللي عطته وجه ..
باين على شكل هالدكتور انه معزلجي درجه اولى ..
بس .. لما ناظرتني رنا وقلت لها اسكتي وسمعت كلامي وطلعت ..
احس اني طفيت ناري .. وبردت شوي .. ودريت انها مابينها وبينه شي .. والدليل سمعت كلامي وطلعت .. وهي اصلا بالعاده انا عندها ولاشي ..
تكلمت بلهجه الواثق : يادكتور اذا عندك كلام قوله لي انا ..( كملت وانا ابتسم وطاير من الفرح ) طلبت تكلم امها .. وشف امها وش سوت لك ؟؟ فماله داعي تحرج نفسك وتحرجها .. اهلنا مايحبون يكلمون رجال ..
شكله تضايق .. بس ما أدري من منين ؟؟ من رنا وموقفها معه ... والا من كلامي ..؟؟
لما شفته طول ماتكلم : دكتور أكلمك انا ..
ناظرني وهو يهز راسه لي : قلت لي ابو البنت متوفي .. يعني انت اللي بتوقع على خروجها ..
ناظرته مستغرب سؤاله .. ليش عاد ابوها متوفي ؟؟ احسه تعمد يقولها : ان شاء الله والا انا ما أنفع
جلس يقرأ بالأوراق وهو يقول بلهجه ماعجبتني ابدا : ينفع .. ينفع ..
واخذ اوراقه وطلع ..
على طول لحقته خفت رنا بالممر .. يحاول يكلمها او يقولها شي ..
بس لما طلعت مالقيت رنا ..
وين راحت ؟؟
وقفت عند الباب انتظرها ترجع ..

رنا
لما طلعت من الغرفة .. نزلت تحت والحمد لله ان جوالي معي ..
نزلت لحديقة المستشفى .. وجلست اتمشى ..
دقيت على امي مرة ثانية .. ابيها تجي ..
اتوقع خالتي ماراح تروح الا لما يطيب خاطرها من حفيدتها على قولتها .. وخصوصا ان بكره راح نطلع .. يعني متى بتشوفها المرة الجايه ..
مالي خلق اقابلها بروحي .. ابي امي تجي وتفكني ..
كلمتها واصريت انها تجي مبكره .. ووعدتني على نص العصر راح تجي ..
لاني لما نزلت للحديقة اذن العصر ..
وانا اكلم امي جاني انتظار .. ناظرت في الشاشه .. أحمد !!!
اوووووووووووووووووووووووف .. وش يبي ؟؟
سكرت من امي ورديت عليه .. خفت ما أرد يقول اني اتهرب ..؟؟
رنا : ألوووو ..
أحمد : هلا رنا .. وينك ؟؟
تنهدت بس من دون صوت حتى مايسمع .. والله مو حاله هاذي احسه خانقني .. ماصارت ..!!
رنا : موجوده بغيت شي ؟؟
أحمد : ايه بغيت .. انتي وينك ؟؟
رنا : خلاص برجع للغرفة ..
أحمد : لا لا لا .. لا ترجعين انتي وينك وانا اجيك ؟؟
ميلت فمي ..: في الحديقة ..
احمد : اوكي دقايق وانا عندك ..
سكرت من عنده حتى من دون ما أقول اوكي ..
جلست على الكرسي بعصبية وانا اضغط بيدي على الجوال بكل قوتي ..
حتى اسناني ماسلموا مني جلست احك فيهن لين حسيت انهن خلاص راح يتكسرن ..
مامريت ولا دقيقتنا لا هو واقف قبالي ..
أحمد : رنــــــــا ؟؟
رفعت راسي له : نعم ؟؟
أحمد : ممكن أجلس ..
قمت بسرعه حتى ما أخلي له فرصة حتى يجلس لاني لو جلست ماراح اتكلم اواقول شي .. لانه بيراقب حركاتي وانا مااحب كذا : نمشي احسن ..
احمد : اللي يريحك ..
مشينا انا وياه ولا تقولون صديقي ..
رنا : اسمعك تكلم بس ياليت بإختصار ..

احمد
كنت بقوله وش بينك وبين الدكتور ؟؟ بس الحمد لله اني مسكت لساني ..
انا عارف لو سألتها هالسؤال بتقوم القيامه ....
فكرت بأي شي اقوله لها عالسريع مالقيت الا هالسالفه ..
أحمد : اممممم .. رنا انا بتزوج .. ووو الى الآن قاعد ادور .. امممم .. بسسسس .. سس .. مممم ..( بجرأة مني .. وماتوقعت اني اسويها .. ومعها بالذات .. مسكت اكتافها بكل يديني ولفيتها لجهتي وخليت وجهي بوجهها وبكل حماس قلت لها .. ) رنـــــــــــــا .. أبيــــــــــــــــك .. ي ي يعني ابي اتزوجك .. ترضين ؟؟؟!!

رنا
بقولكم بصراحه وش صار لي بالضبط ؟؟
انا الى الآن مااستوعبت حركته .. حتى مابعد سمعت كلامه اللي قاله ..
انا الآن بأفهم وش هالجرأة اللي نزلت عليه فجأة ..وخلته يسوي هالسوات فيني ..
حركت يديني ببرود واضح وابعدت يدينه عني ..
تكلمت وانا ضايعه مشتته : أحمـــــــــــــد .. كيف تسوي فيني كذا ..؟؟
أحمد بنفس حالتي وعيونه ضايعه ويناظرني بألم : لو تدرين وش ابي اسوي فيك كان ماسألتيني هالسؤال ؟؟ رنا .. انا .. انا .. أحــ ب ـــك ..
( بلع ريقه ) ايه احبك .. ليش اكذب على نفسي ؟؟ انا من زمان وانا افكر فيك .. بس ماني متجرأ اقولك أي شي .. تدرين ليه ؟؟ لاني خايف تصديني .. واتحطم .. ففضلت اني اعيش على أمل احس من اني اعيش على ألم ..
انصدمت من كلامه ماتوقعت ابد ..ان أحمد يحبني .. او يكن لي مشاعر .. لاني عارفه مستحيل احد يآخذ مرة أخوه .. وخصوصا احمد لانه ماتزوج لسى .. يعني بيبيع شبابه عشان مرة اخوه .. ادري اني توي صغير .. بس ولو الشاب يبغى بكر .. وهذا حلم كل شاب ..
بصراحه ماعندي كلام اقوله له ففضلت اني اسكت .. الين يخلص كلامه ..

أحمد
لما طول سكوتها .. دريت انها انصدمت .. !!
بس ولو لازم اطلع كل اللي بقلبي هاذي فرصتي ..
اخذت نفس طويل وزفرت زفرة بغت تطلع روحي منها : رنـــــا .. انا مابي تقولي أي شي الحين .. ابيك بس تفكرين باللي قلته .. وخوذي راحتك بالتفكير ولما تقرري .. تأكدي اني راح احترم قرارك سواء رفضتيني او قبلتي بي ..
كانت ساكته وتناظر في عيوني ..
ودي تتكلم تقول أي شي .. ؟؟ بس للأسف طول سكوتها ..
وصعبه انا اخليها تنطق .. لاني عارف لو نطقت غصب عنها .. راح ترفضني وتبعدني عن طريقها ..
ففضلت اني اسكت معها ..وبأشوف وش أخرتها ؟؟
طولنا وحنا نناظر عيون بعض ..
انا ابيها تقول شي .. وهي مو راضيه حتى اني اسمع صوت تنفسها ..
بعد دقايق .. حسيت بحركة يدها ..
رفعتها ببطء أتجاهي ..ورفعت اصبعها لوجهي ..
رنا بصوت مبحوح وشكلها كانت تصيح : اتزوجك انت .. ؟؟؟!!!
رديت عليها بسرعه : ايه انا .. تتزوجيني انا ؟؟
رنا : ومــــشــــعل ..!!!
بعدها انهارت من الصياح وصارت تشاهق .. ضمت وجهها بيدينها وهي تحاول تخفف صوت صياحها ..
لكن اخوكم في الله خربها مرة وحده بدال مايكحلها عماها ..
لويت عليها بيديني وقربتها لصدري .. : اصير لك مشعل لو بغيتي .. اصير لك الدنيا كلها لو حبيتي .. راح اعوضك عن كل شي شفتيه .. لاتقولين كلام .. او حكي طاير في الهوى .. والله ثم والله ثم والله يارنا راح اعوضك عن اللي صار .. واسعدك قد ما أقدر ..

رنا
ماحبيت هالأمور توصل لهالمواصيل بس هو اللي اجبرني ..
ابعدت يدينه عني .. وقلت له كلمة وحده : افكر ..
مشيت وخليته .. ألين ابعدت ..
جلست على الكراسي .. وانا افكر ..
من يصدق اني امر بهالموقف ..؟؟؟
ابد ماكنت اتخيل مجرد خيال .. ان أحمد يحاول يتقرب مني .. فما بالكم يجيني اليوم ويقولي ابي اتزوجك ؟؟؟
مستحيل يبي يتزوجني عشان الحادث .. لا لا ..
شكله من زمان كان يفكر بهالموضوع .. لانه يقول من زمان بس كنت متردد وخايف انك ترفضيني ؟؟
يالله كيف خطرعلى باله اني ممكن اوافق واتزوج اخو زوجي ..؟؟
انا ما أدري كيف يفكر هالأحمد ؟؟ وكيف قرر هالقرار هالصعب ؟؟
قلت له بفكر .. بس ما أتوقع ..!!
مستحيل افكر اني اتزوجه حتى لو اجتمع الكون كله علي ..
مستحيل آخذ اخو زوجي ..
والله صعبه وصعبه كثــــــــــــــــير .. كثــــــــــــــير .. أكثر مما أحد يتخيلها ..
راح اكتم على الموضوع الين بنتي تقوم بالسلامه .. وبعدين يحلها ربي ..

تكلمة الجزء الرابع عشر

أحمد
بصراحه ماأدري وشلون صار هذا كله ؟؟
أحس اني بحلم !!
أحس جسمي الى الآن يرجف .. رغم انها ابعدت واختفت عن عيوني ..
لكنها ماأبعدت عن قلبي أبد ..
اصلا هي موجوده فيها فكيف تبعد عنه ؟؟
غمضت عيوني أبمسح كل اللي صار قبل شوي ماقدرت ..
احس الى الآن قاعد ينعاد لي ..
تعوذت من الشيطان .. وتوجهت لمسجد المستشفى عشان اصلي العصر ..

رنا
رجعت للغرفة وانا مشوشه .. عقلي مو معي ..
احس نفسي ثقيلة .. ومشيتي أثقل .. حتى تنفسي صار ثقيل علي ..
حاولت أمشي بسرعه حتى ابعد شعور الثقل ..
لكني ومن زود السرعه في الممرات صدمت بشخص ..!!!
رفعت راسي بتأسف ..
لكني تفاجأت بوجوده قدامي ..!!
فعرفت انه مو انا اللي صدمت فيها .. هو اللي اعترض طريقي ..
نزلت عيوني وحاولت امشي .. لكنه كان يصدني ..
تكلمت بهدوووووء وانا احاول اضبط نفسي : ممكن لو سمحت ؟؟!!
تركي : وإذا مو ممكن ؟؟
تنهدت وانا مولعه : انزين وش تبي مني ؟؟؟!!
تركي : انتظرتك تدقين تطمنيني عليك .. بس مادقيتي .. ممكن اعرف ليش ؟؟
رنا: لاني مو متعودة اكلم شباب على التلفون ..
تركي : ويعني انا اللي متعود اكلم بنات ..؟؟!
رنا : مو شغلي .. انتم اتهمني .. متعود او مو متعود .. الحين ممكن تخليني أمر ..؟؟
تركي : انزين بس قولي وش اسمك ؟؟
ضحكت بتريقة عليه : ههه .. والله انت وسيع وجهك .. لاتخليني اغلط عليك .. ابعد عن طريقي وخلني اروح ..
تركي : انتي أرملة صح .. وسديم تصير بنتك .. بس باين عليك صغيرة .. يعني اللي يشوفك يقول لسى ماتزوجتي ؟؟
لهنا وخلاص .. عصبت منه : انت قاعد تقص لي قصة حياتي ..
دفيته ومشيت ..
تركي : لاتنكرين انك كنتي معجبه فيني .. وتقبلتيني قبل هالمرة ..
انصدمت من كلامه ..!!
وقفت وانا مطيره عيوني !!
وش قصده ؟؟ لايكون يقصد يوم يغمى علي !!
ألا اكيد يقصد هاليوم ..
نرفزني حسبي الله على ابليسه ..
ألتفت بعصبيه ..وصرخت في وجهه : الإنسان لما يسوي معروف لأي أحد .. مايقعد يمن فيه ويعايره انه ساعده ..
ابتسم وياحلو ذيك الإبتسامه .. ابتسامه هاديه تدل على انه انسان واثق من نفسه وثقيــــــــــــل بالحيل : بس أنا ماقصدت اللي فهمتيه ؟؟.. أنا أقصد مممممم ( وسكت ) أتعرف عليك ..
ضحكت بإستهزاء : هه هه والله ضحكتني .. تتعرف ؟؟!! .. للأسف اني اقولك اني مو راعية هالكلام اللي تقوله ؟؟
قرب من عندي وهو مكتف يدينه : انزين .. يمكن خاني التعبير .. كان ودي اقول .. اتمنى ان النصيب يجمعنا ..
طارت عيوني على وسعهن .. نصيب !!!!
لايكون يبيني اتزوجه ...!!!
لا لا .. هو اصلا يستدرجني عشان آخذ وأعطي معه .. إذا هذا قصده وربي يشوف مني ريق حلو على قولتهم ..
تكلمت بإستهزاء وانا احاول أخلي كلامي كله لعب بلعب : ههههه .. نصيـــــــــــب !! ومن قالك اني ابيك .. من لمح لك .. وش اللي ضرب بنافوخك وخلاك تفكر هالتفكير ؟؟ اصلا كيف تجرأت تقول هالكلام ؟؟
كنت اقوله كذا .. وانا قلبي يحترق ..!!
أخاف يصدق اللي قلته ويهون عن اللي قاله .. هذا إذا كان جاااااد وصادق بكلامه ..
ناظرني بعين قويه وبتحدي وهو يصر على أسنانه اللي بانت كثيــــر : مسكينه .. وربي انك مسكينه .. انا أبي النصيب بيني وبينك يجمعني .. قولي اللي تقولينه .. مجنون .. مهبول .. فاقد عقله .. مايهمني .. اللي يهمني بهاللحظه بس .. أن احلف لك بالله العظيم .. ان قلبك بيطلع من مكانه من الرجفه اللي تحسينها .. وتتمنين ان ربي يسهل امورنا .. لاتلعبين على عمرك .. وتنكرين ..!!!
مصدق عمره بزياده ..
بس والله صادق بكل اللي قاله .. ولا كذب بأي حرف ..
أحس براحه معه .. راحه تنسيني كل شي ..
والله اني ادعي ان ربي يجمعنا .. هاذا اذا فعلا هو يبيني ..
بسسسسسسسسسسس ..
مو أنا اللي ينقال هالكلام .. حتى لو أبيه .. مو معناه انه يصدق نفسه اني ميته عليه ..
فحبيت أتحداه مثل ماأتحداني .. واقهره بكلام اقوى من اللي قاله لي ..
ابيه يعرف ان اللي يبيني لازم يتعب عشان يوصل لي ..
وانه لاجماله ولا وسامته ولا شخصيته يقدرون يأثرون علي ما دامي مادخلت في بالي ..
أشرت له بأصبعي وأنا أرجف .. خفت يشوف رجفته ..
بلعت ريقي واستعديت للمواجهه : هيه انت .. ( وانا أأشر بأصبعي لجسمه من فوق لتحت ) عمرك سمعت أغنية معجبه .. الظاهر ماعمرك سمـــــ.... ..
قاطعني بسرعه وهو ينزل أصبعي : اولا نزلي اصبعك اللي شوي وينكسر من كثر مايرجف .. ثاني شي اغنية معجبة أعرفها .. وسمعتها .. بس اسمحي لي اقولك انتي معجبه غصب عليك ..
وجلس يغنيها بصوت واطي ..كان صوته مره خطير وهو يلحنها ويأشر علي ..
تركي : لاعيوني لمحت له .. لاهلا ولا مرحبا
مدري من وين طلعت له .. فكرة أني معجبه ..
مو هاذي هي .. بس أبدا مو راكبه عليك ..
بصراحه عقب كل هاللي شفته .. ماقدرت أكابر أو أجادل أو حتى آخذ وأعطي معه بالكلام ..
فتركته ومشيت .. وانا حاسه بغثيان وودي استفرغ .. ألين ماوصلت للغرفة وعلى طول دخلت للحمام .. وطلعت كل اللي ببطني ..

أحمد
شفتها معه .. لاتقولون ماشفتها .. !!
بس انا مصدوم .. من وين رنا تعرفه ؟؟
وهو وش يبغى منها ؟؟ وليش هي واقفه تكلمه ؟؟ وشو اللي بينهم ؟؟
أحس راسي بينفجر من حل هالألغاز .. اللي من جد حيرتني ..
كنت واقف لما كانوا يكلمون بعض .. وشفته لما قرب منها .. وشفتها لما رفعت اصبعها واشرت لجسمه وكأنها تستحقره ..
وآخر شي شفته لما لفت وجهها عنه وابعدت ..
أروح أسأله ..؟؟؟! لا لا لا .. وش اقوله ؟؟
اقوله ليش تكلمها ؟؟ ووش تبي منها ؟؟ ماراح يقول الصدق .. أكيد بيكذب علي .. أنا لازم أسألها هي .. وألحين بعد ..
مشيت لين وصلت للباب ..
بغيت ادخل بس تذكرت أمي .. كيف اكلمها وامي موجوده .. وزياده على كذا ماقدر اصرف امي .. وش اقولها ؟؟
انا ألحين بطلع من المستشفى .. ولما يحين الوقت المناسب راح اكلمها .. والليلة بإذن الله ..

رنا
صليت العصر وانا احس الى الآن بالغثيان ..
انتبهت لي خالتي ..: وش بك ؟؟ ورى نفسك صارت شينه ؟؟
رديت عليها بأدب وانا ابتسم لان مالي خلق مشاكل : سلامتك .. مافيني شي ..
خالتي : أيـــــه .. انزين بقولك شي بس ابيك تساعديني فيه ؟؟
استغربت طلب خالتي .. وش عندها ؟؟
زدت الابتسامه شوي : آمري ياخالة ..
خالتي وهي تقرب كرسيها اكثر واكثر لي : مايآمر عليك ظالم .. بس ودي ازوج أحمد .. والمشكله انه مافيه احد عجبه ..
رفعت حاجبي وانا ابتسم على شكل خالتي ..
والله لو تدرين ياخالة ان احمد مخطط علي .. وش بتسوين ؟؟ اكيد بتطينين عيشته ..
كملت معها السالفة بإهتمام .. بشوف وش آخرتها : أفـــــا ياخالة ... محد عجبه ابد ؟؟
خالتي وهي متحمسه : ابد ابد .. والله انه كاسر خاطري .. عاد انا قلت مافيه الا انتي تحلين لي السالفه ..
طيرت حواجبي وانا مستغربه من كلامها .. أشرت على نفسي : أنـــــــا ؟؟!!
خالتي : ايه انتي .. ابيك تدورين لي على وحده مزيونه من اهلكم .. وابيه تكون مثلك ..
انصدمت من كلامها .. يعني انا معجبتها بس هي تكابر .. ليش ؟؟؟
والله انك داهيه :انزين ياخالتي فيه كثار من اهلي .. بس مستحيل تلقين احد يشبه لي ؟؟
خالتي : مو لازم عاد مره مره .. يعني تكون حولك وبعمرك وبزينك ..
واخيرا اعترفت اني زينه : خلاص ابشري ياخالة مالك الا اللي يرضيك .. اول مااطلع من المستشفى راح ادور لك من اهلي وارد عليك ..
خالتي : هذا العشم والله يابنيتي .. بس شوفي قولي شرطه ؟؟
ههههههه من وين وجهه بعد .. له شروط ..
رنا : وش شرطه ؟؟
خالتي : انها تسكن معنا بالبيت ..
ياحبيبي كملت .. والله انهم فاضييييييييييين هالعالم .. اذا انا ماتحملت اقعد معكم .. تبين اخلي وحده من اهلي تذوق اللي انا ذقته .. مستحيــــــــــل ..
خالتي : قبل لاتردين علي أسأليها اذا تبي تسكن معنا اولا .. اذا لا خلاص دوري غيرها من دون ماتقولين لي ..
رنا : أن شاء الله ..
من جد خالتي تتكلم والا تمزح .. الحين ولدها مكلمني ويبيني .. وهي تقول لي ابيك تخطبين لي من اهلكم ..
ترى انفقعت مرارتي منهم .. لامن احمد ولا من امه ؟؟
ولااااااااااا والادهى والأمر .. ان احمد شارط انها تسكن مع اهلها .. يعني لو مثلا .. اقول لو مو صدق .. لو انا وافقت .. برضى اسكن عند اهلها .. والله يحملون .. لو يطير احمد من قدامي ويوقع .. ما أوافق ..

أحمد
الساعه الحين 9
اكيد الزوار كلهم راحوا ..
كنت واقف عند باب المستشفى ..
سميت بالرحمن ودخلت ..
بس الحمد لله السكيورتي ماانتبه لي يوم دخلت ..
لان الزوار يطلعون بشكل كبير .. فما انتبه ..
درت المستشفى كله عشان القى لي مصعد مافيه سكيروتي .. بس مالقيت ..
ففضلت اني اصعد السلم ..
صعدت السلم وعلى طول على غرفة سدوم ..
دقيت الباب بسرعه .. عشان محد ينتبه علي ..
انفتح الباب .. : رنا .. ابي اكلمك بموضوع ضروري ..
رنا وباين عليها انها مصدومه : ألحـــــــــــين !!!
قلت وانا اترجاه : أيه الحــــــــــين .. تكفين يارنا .. موضوع مايتأجل ..
رنا : اوكي ادخل بس خل الباب مفتوح شوي ..
دخلت وسحبت لي كرسي وجلست وانا احاول القط انفاسي ..
جلست على السرير وهي مقابله وجهي : تكلم .. وش الموضوع ؟؟ تراك خوفتني !!
ابتسمت عشان اطمنها : لاتخافين .. موضوع عادي بس مستعجل ..
رنا : انزين قول ..
قربت الكرسي شوي وانا متوتر ما أدري من وين ابدأ ؟؟
جلست افرك بيديني الين حسيت بحرارتهن : ممممم .. رنا .. بصراحه ابي افتح معك موضوع العصر ..
رنا : وانا بعد ياليت تفتحه لاني ناوي احط حد لكل شي ..
فرحت لما اخذت وعطت بالكلام .. يعني متقبله الموضوع ..
أحمد : انتي كذا ريحتيني .. وسهلتي علي كل شي ..
رنا : قول يا أحمد وانا اسمعك .. لانك اذا خلصت كلامك انا بعد عندي كلام ولازم تسمعه ..
أحمد : رنا .. زي ماقلت لك انا ابيك .. بس ماابيك تحطين في بالك انه عشان بنتك .. لا .. انا ابيك انتي لذاتك .. لشخصك .. صدقيني يارنا .. انا حاولت ابعدك عن بالي بس ماقدرت .. حاولت انساك بس استصعبت المسأله .. حاولت بكل الطرق بس فشلت والله شاهد على كلامـــــــ.....

رنا
قاطعته بالكلام ..: والدليل انك قلت لأمك تخطب لك .. صح ..؟؟!!
ناظرني منصدم : انتي وش دراك؟؟!!
رنا : ههههه .. احمد اذا ماكنت تدري راح اقولك .. امك اليوم قالت لي أدور لك من أهلي ..
زادت صدمته اكثر وقال وهو مو مصدق اللي اقوله : أمي قالت لك كذا ؟؟!! رنا انتي تتكلمين جد والا تمزحين ؟؟؟؟!!
رنا : ليش امزح معك ؟؟ انا قاعده اقولك الصدق ..
قال وهو الى الآن ملامح وجهه مشدوده : وانتي وش قلتي لها ؟؟
رنا : قلت لها ابشري باللي تبينه ..
سكت احمد فترة ومارد ..
لما طول سكوتها .. انا تكلمت وفجرتها بوجهه : أحمد تتوقع لو أمك تدري انك تبيني بتوافق ؟؟ انا عن نفسي ما أتوقع .. صعبه يا أحمد تقنع امك وتقنع الدنيا بزواجك مني .. واللي اصعب ان اوافق وسط هالظروف.. امك تبيني ادور لها عن بنت تشبه لي .. وانت تبي تتزوج الأصل اللي هي انا .. بصراحه يا أحمد تحيرت وياكم .. اقبل طلب امك والا طلبك .. ادري ان الموضوع اسهل مما يكون .. بس لو كنت انا وانت مو في الظروف او هالموقف .. انت تتكلم بالعاطفه .. وعن حبك ومشاعرك .. لكن انا راح اتكلم معك بالمنطق والعقل .. زواجك مني ماراح يتم .. وراح يحطون الف عثرة وعثرة بطريقك عشان بس ماتآخذني .. واولهم امك ..
بس حط في بالك اولا واخيرا .. انا الى الآن ماقلت رايي فيك .. واذا انا موافقه عليك او لا ..
ظل يناظرني وهو مستغرب من كلامي .. طول ما أنا اتكلم كانت تعابير وجهه تتغير شوي شوي .. مرة يبتسم مرة يكشر مرة يرفع حاجب ومرة يعبس .. كثيــــــــــر كان يتأمل يديني وانا اتكلم .. لاني كنت احركهن وانا اتكلم .. طبعا هذا كله من الحماس ..

احمد
قالت كلام كثير .. وكنت مركز بكل كلمه قالته .. بسسسس .. ماعجبني كلامها رغم انها كانت منطقيه فكل اللي قالته ..
أحمد : واذا قلت لك لاتفكرين بأي شي .. غير انك توافقين علي او لا ؟؟
انتظرت ردها .. لكنها ماردت ..
فعدت عليها السؤال مرة ثانية : ماجاوبتيني ؟؟
رنا : اجاوبك وش اقول ؟؟ احمد مستحيل اعطيك اجابه الحين .. وعشان تتطمن انا راح افكر وارد لك خبر .. هالشي يريحك او لا ..؟؟
تنهدت وانا مرتاح .. واخيرا جاوبت : اكيد ريحني .. بس هالموضوع يكون بيني وبينك الين تردين علي .. اوكي ..
رنا : اوكي ..
احمد : انزين انا احس اني طولت عليك .. اخليك تنامي ..
رنا : اللي يريحك ..
طلعت قلم من جيبي وسحبت الجريده اللي على الطاولة ..

رنا
شفته يكتب على الجريده ..
كان يكتب ايش ما أدري ؟؟
راقبته لين خلص .. ناظرني وهو مبتسم : فضوليه .. اكيد بتعرفين وش انا قاعد اكتب ..؟؟؟ راح اقولك بس لاتستعجلين ..
قطع الورقة اللي كاتب من الجريده ..
قام من على كرسيه وجى لجهتي وانا على السرير ..
انا تخرعت من حركته .. فشي طبيعي بتحرك وازين جلستي ..
أحمد : لاتخافين مراح اسوي شي .. بس ابعطيك الورقة ..
مد يده يعني خوذيها ..
مديتها واول مالمست الورقة وحطيت اصابعي عليها عشان امسكها ..
مسك يدي .. حاولت اسحبها .. لكنه كان اسرع ..
قرب أكثر وحضن يدي بين يدينه الثنتين وبينهم الورقة ..
خفت من حركته .. وصار قلبي يدق مثل الطبل .. ويدي ترتعش داخل يدينه ..
تمنيت الارض تنشق وتبلعني ولا امر بموقف مثل هذا ..
احمد وعيونه بعيوني وشكله رايح فيها : عندي أمل كبــــير انك تكوني لي .. لي أنا لحالي ..
صار يمسح على يدي وهو يتكلم وانا ضايعه بالطوشه ..
تعرفون ترى اللي فاقده حنان .. تنخرش كذا مهما كانت محترمه او متربيه وبنت ناس .. خصوصا اذا كان الشخص اللي قدامك يتمناك ويبيك بكل صدق ..
أحمد : اوعديني يارنا .. لو رفضتيني ماترفضين عشان اخو زوجك .. ارفضيني لأي سبب حتى لو كان تافه .. بس لاتقولي اخو زوجي وصعبه اتزوجه ..
قرب يدي من فمه وباسها .. لكنه طول في البوسه .. وانفاسه الحاره على يدي احرقتني ..
سحبت يدي بكل أدب من دون ما احرجه ..حتى هو كان متفهم للوضع .. وانا اسحبها حط الورقة في يدي ..
احمد : تصبحين على خير ..
وطلع ..
في وجهي الآلآلآلآلآلآف من علامات الاستفهام ..؟؟؟؟؟؟؟؟؟؟
ودي استوعب اللي صار .. ماقدرت !!
معقوله يكون هذا احمد ؟؟
ابد مستحيل يكون هو .؟؟
لهدرجه احمد رومنسي ... لهدرجه عنده مشاعر فياضه ويعرف يعبر عن اللي يبي يقوله بطريقه حالمه وجذابه ..
جلست انفض راسي .. مو مصدقه .. وانا اقول .لا لا لا .. هذا مو احمد ..
ناظرت في الورقه اللي في يدي واللي مكتوب فيها ...
كيف أعبر لك عن اللي في حشاي
ودي احكي لك ولكن ماقويت
ماأطيع الناس لو ذموا هواي
ولا أطيع الناس لو قالوا خطيت
دامني مخطي انا أتحمل خطاي
وش عليهم مقتنع فيك ورضيت
لا يهمك هرجهم خلك معاي
الوفا ناداني بعيونك وجيت
يادفا روحي اذا اقبل شتاي
وياحنان يروي قلبي لاضميت
لحظة غيابك يجرحني بلاي
وياعذاب العين اليا منك بطيت
قبل احبك ماسطع نجم بسماي
لا ورب البيت لا ورب البيت غيرك ماهويت ..
ناظرت يدي واثر البوسه الى الآن مااختفى من بالي .. وانا في حاله لايعلمها الا الله ..
لاتعليق ..
اترك لكم التعليق .. اللي اتمنى من الكل انه يقول رايه وبصراحه .. هل توقعت احمد يسوي كذا .؟؟. وهل كنت تتوقع احمد بهالرومنسيه هاذي ؟؟؟.. وهل اللي سواه احمد يخليني اعيد الحسابات من اول وجديد .؟؟؟. لانه طلب مني اني ارفضه لاي سبب كان بس اهم شي ماارفضه عشانه اخو زوحي .. وهل وهل وهل .. الى اتمنى القى لها اجابه عندكم ..


نهاية الجزء الرابع عشر ..

الجزء الخامس عشر
بعد شهر
رنا
مر شهر من عمري وعمر بنتي ..
شهر عشته لخدمة بنتي وتلبية طلباتها ..
الحمد لله تحسنت كثير .. فكوا الجبس اللي على رجلها وصارت تمشي زين .. والآثار اللي كانت في وجهها اختفت ولله الحمد ..
كنت جالسة في غرفتي ارتب الملابس واحطهن في الدولاب بعد ماغسلتهن ..
دخل عبدالرحمن للغرفة اللي كان بابها مفتوح : مشغولة ؟؟!
عدلت جلستي : لا .. حياك ..
سحب كرسي التسريحه وجلس عليه : بكلمك بموضوع ؟؟!
عرفت وش هو بس ماعلقت : اسمعك ..
عبدالرحمن : فيه واحد ماشاء الله تبارك الرحمن .. رجال والنعم فيه .. طلبك للزواج .. شاب توه بس انه مطلق لأسباب رفض انه يقولها ..
بعدين سكت .. شكلها يبني اعلق على كلامه : ايه وبعدين ؟؟!
عبدالرحمن وهو متحمس : وشو اللي بعدين ؟؟ اقولك طلب يدك للزواج .. وبصراحه من زمان هو قالي بس انا أجلته لسببين .. الاول عشان اسأل عنه والثاني عشان سدومه الين تتحسن صحتها مرة مرة ..
رنا : والحين بس باقي موافقتي ؟؟
عبدالرحمن وهو متردد : موافقتك .. او رفضك .. كله بنتقبله بصدر رحب ..
رنا : يدري ان عندي بنت ؟؟
عبدالرحمن : يدري .. وقالي البنت تسكن مع امها ..
رنا : يعني مافيه مشكله ..
عبدالرحمن : لا ابد .. كل شي ماشي زي ماتبغين بالضبط .. الباقي موافقتك ..
رنا : خلاص افكر .. عطني اسبوع وارد عليك ..
عبدالرحمن : على اقل من مهلك .. فكري براحتك .. لاتستعجلين ...
سبحان مغير الاحوال .. اول يغصبني والحين خوذي راحتك .. وعلى اقل من مهلك ..
رنا : اوكي .. بفكر واذا اخذت قرار اكلمك ..
قام وهو يبغى يطلع : تبغين شي قبل لا اطلع .. سؤال .. شي .. منا منا .. أي شي .. لاتستحين ..
رنا : سلامتك .. اذا بغيت كلمتك ..
عبدالرحمن : لا مايحتاج تكلميني .. روحي لناصر وهو يقول لك كل شي .. لان ناصر هو اللي طلب انه يسأل عنه ...
غمضت عيوني بثقل وفتحتهن بأثقل : اوكي ..
طلع من الغرفة وهو يقول : مع السلامة ..
رنا : الله يسلمك ..
ادري انه ماسمعني .. بس ميخالف ماراح يضرني شي ..

احمد
مر شهر وانا انتظرها
مر شهر وانا ما انام الليل بسببها ..
مر شهر بطوله وعرضه وهي الى الان مابعد ردت علي ..
تعبت وانا انتظر .. او بالاصح تعبت من التفكير والهواجيس اللي قلبت حياتي ..
قررت اني اكلم عبدالرحمن في الموضوع واللي يصير يصير ..
اذا ماتبي ترد علي بكيفها .. اخليها ترد علي غصب عنها ..
كلمت عبدالرحمن امس في الليل وقلت له ابمرك بكره وابكلمك بموضوع خاص .. قالي اوكي ..
توي طالع من المسجد مصلي المغرب ..
توجهت على طول لبيته ..
وبعد السلام والاخبار واخذ العلوم ...
ترددت قبل لا أتكلم ..
بصراحه شكلي بتراجع .. اذا رنا صاحبة الشأن مستصعبة الموضوع مطنشته ولاردت علي .. اجي لاخوها برجليني وان كلي ثقة ... صدق اني مو صاحي ..
قويت قلبي وتكلمت : انا بصراحه جاي بموضوع ومتردد ..
عبدالرحمن : لا يا أحمد .. لاتتردد ولاشي .. قل اللي في خاطرك ولا تستحي .. وتأكد اني بخدمك لو اقدر ..
أحمد : انت تقدر بسسسسس ..
وسكتت ماني قادر انطق اسمها او اجيب طاريها ..
عبدالرحمن : بس ايش يا أحمد ؟؟ تكلم وصدقني انا بالخدمه ..
بلعت ريقي : اممممم .. عبدالرحمن انا جاي اخطب رنا ...
ناظرني عبدالرحمن بإستغراب واضح .. وطول وهو يناظرني ..
حاولت أكسر حاجز الصمت اللي فرضه عبدالرحمن ماقدرت ..
حاولت اقول شي عجزت ..
ففضلت اني اسكت الين هو يتكلم ..
عبدالرحمن بعد فترة من السكوت وباين عليه الاستغراب : من له بتخطب رنا ؟؟؟
مافهمت على سؤاله : يعني وشلون من له ؟؟!
عبدالرحمن وشوي وعيونه تطلع : يعني من هو اللي يبي رنا ؟؟
بغيت ابتسم على سؤاله .. بس تراجعت .. مو وقته ..
احمد : انا اللي ابيها ..!!
عبدالرحمن وهو يعقد حواجبه : انت ؟؟؟!!
أحمد : ايه انا .. ليش مستغرب ؟؟؟
عبدالرحمن ومو مصدق : أحمد انت صاحي والا في عقلك شي ؟؟؟
أحمد : لا صاحي .. شفت ياعبدالرحمن لما قلت لك اني متردد ومقدر اقولك ... متوقع ردة فعلك ..
عبدالرحمن : أحمد أنا .. أنا مو مصدق .. وش اللي يجبرك تأخذ رنا ؟؟ أنت شاب وتقدر تتزوج اللي تبيها .. بس تتزوج رنا الارمله وعندها بنت .. هذا اللي مو داخل راسي ..!!!
هنا انا ابتسمت .. خلاص تعبت وانا اخفيها ..
احمد : عبدالرحمن انا مو مجبور أخذ ارملة وعندها بنت .. بس انا ابي رنا وابي بنت اخوي تعيش حياة طبيعيه .. انا ماجيتك الا واثق انك راح تتفهم الموضوع .. رنا صغيرة ومو ذنبها انا ارملة .. حتى انا ماني صغير حتى اقول والله ماانفع آخذها .. انا جيتك وانا واثق من اختياري .. واتمنى القى عندك أجابة ترضيني ..
ابتسم عبدالرحمن وباين عليه استانس من كلامي : والله يا أحمد لو ألف العالم كله ماراح ألقى مثلك .. يكفى أنك بتضحي بحياتك عشان بنت أخـــــ ..
قاطعته بالكلام : لا عبدالرحمن .. هاذي مو تضحية .. انا ماطلبت رنا عشان سدوم .. لا والله .. والله يشهد على كلامي .. انا انا ..
ماقدرت اكمل .. لاني لو كملت .. راح اقوله عن حبي لها .. وانا مابيه يدري اني احبها ..
عبدالرحمن : مايحتاج تقول أي شي انا فاهم اللي قاعد تحس فيه الحين .. ومقدر وضعك .. وعشان اطمنك اكثر .. انا موافق حتى من دون ما أسأل عنك .. وتأكد بعد انا رنا حتوافق بإذن الله لانها ماراح تلقى أحسن منك يصونها ويحافظ عليها وعلى بنتها ..
ارتحت من كلامه .. لانه كان يتكلم وهو واثق .. يعني اكيد راح يقنع رنا ..
أحمد : وان شاء الله اكون عند حسن ظنك .. بس انا ابيك تستعجل لي بالموضوع ..
عبدالرحمن : حتى انا مستعجل اكثر منك .. انا راح أسأله اليوم .. وراح ارد عليك بعد يومين .. عشان نحدد كل شي ..
أحمد : الله يريحك بالك مثل ماريحت بالي .. والله اني كنت شايله بصدري .. والحمد لله هم وانزاح ..

رنا
ماني قادره افكر او اتخذ أي قرار ..
احس اني مو مرتاحه ..
اخاف ارفض يعصب عبدالرحمن ويقول انتي مو عاجبك العجب ولا الصيام في رجب ..
واخاف اوافق اظلم نفسي واظلم بنتي معي .. واعيش بنكد عشان بس عبدالرحمن لا يعصب ..
مو حالة هاذي ..
اووووووووف ..
طلعت من غرفتي بروح لناصر ..
ابيه يقولي معلومات تقنعني بهالشخص اللي خطبني ..
بحاول قدر الامكان اني اتقبله بالغصب ..
رحت لغرفته ..
دقيت الباب ..
جاني صوته من داخل الغرفة ..
ناصر : من ؟؟
رنا : انا رنا ..
ناصر : ادخلي ..
فتحت الباب : السلام عليكم ..
ناصر وهو جالس على السرير وفي احضانه الاب توب : وعليكم السلام ..
دخلت وجلست في طرف السرير ..
رنا : مشغول ؟؟
سكر الاب توب وقرب من عندي : لا .. آمريني ؟؟
رنا : ما يأمر عليك عدو .. بسسس .. بغيت أسألك ؟؟
ناصر : أسألي ..؟؟
رنا : بصراحه ياناصر قبل لا أسأل .. انا مو مقتنعه بالزواج من الأصل .. وانا بصراحــــ...
قطع كلامي : خلاص رنا .. لاتكملين اذا مو مقتنعه .. خلاص ارفضي .. ولا لك دخل بأي شي ..
خفت ترجع المشاكل بين ناصر وعبدالرحمن ..: لا لا ياناصر .. انت فاهمني غلط ..انا ابي شي يحمسني .. يعني ابيك تكلمني عن الرجال اللي سألت عنه .. وتقولي كل شي عرفته عنه ..
ناصر وهو يرفع حواجبه : ماطلبتي شي .. راح اقول كل شي كل شي ..
بس راح اطول .. مو تقولين خلاص وجعت راسي ..
ابتسمت : لاتخاف مراح اقول .. يالله تكلم ..

أحمد
ماكنت مصدق اني خطيت هالخطوة ..
احس اني احلم ..
واللي ماتوقعته اكثر .. ردة فعل عبدالرحمن وتقبله الموضوع بكل صدر رحب .. وموافقته بعد ..
الحمد لله والشكر لكي ارب .. الحمد لله يارب ..
دخلت للبيت وانا في قمة السعاده ..
اول ما دخلت الصالة .. شفت امي جالسه وتكلم بالتلفون ..
رحت لها على طول وضميته بقوة وهي بيدها السماعه ..
امي استغربت وبسرعه قالت : مع السلامه أكلمكم بعدين ..
سكرت السماعه ولوت علي ..: وش بك ياوليدي ؟؟ عسى ماشر ..
كنت ساكت واحاول اني استانس بحضنها قد مااقدر ..
بعدت عنها لما شفتها تعبت من ضمي ..
جلست جبنها وحبيت راسها : يمه احس اني مستانس ومرتاح عالأخر ..
أمي : الحمد لله ياوليدي الله يسعدك ويهنيك دوم ..
أحمد : اليوم يايمه اسعد يوم بحياتي .. ماتتخيلني يايمه قد ايش انا مبسوط على الأخر ..
أمي : انزين قلي وش اللي يسعدك ؟؟ علمني عشان افرح معك ..
هنا انا توهقت من جد واختفت ابتسامتي ..
وش اقول لأمي الحين ؟؟ اقولها والله خطبت رنا وابي اتزوجها ..
يوووووووووووووه والله ان تزعل علي امي ولا عاد تكلمني ابد ..
صرفت الموضوع لكني ماابعدت عن الموضوع الاصلي ..
مسكت يدينها وفردتها على يديني : اقولك وليش ما أقولك ؟؟ ليش مو انتي امي وراح تفرحين لي ؟؟
أمي : أكيد ياوليدي بفرحك وبطير بعد من الفرحه ..
أحمد : يمه أنا خطبت ...
أمي وهي مطيره عيونها : خطبت !!!؟؟
أحمد : ايه خطبت ..
أمي وهي الى الآن الصدمه واضحة على وجهها : ومن خطبت ؟؟
أحمد : أخت صديقي ..
أمي وبدت تتغير ملامح وجهها : متى ؟؟ ووشلون ؟؟ وكيف صار كل هذا ؟؟
أحمد : هو سألني خطبت والا لا ؟؟ قلت له خطبت بس ماعجبوني .. قالي شوف اختي واذا اعجبتك خذها .. شفتها وعجبتني .. وهاذي السالفة كلها ..
سألتني أمي سؤال ما كان يخطر على بالي .. ومستغرب كيف نسيته ..
أمي وشكلها مو مصدقتني : ووافقت أنها تسكن معنا ببيت واحد ؟؟؟!!
ناظرت أمي وانا مو مصدق كيف فاتتني هالنقطه .. صح انا ماشرحت لعبدالرحمن هالنقطه ..
يالله كيف فرحت بدقيقة وتنكدت بدقيقة ..
ناظرت امي وانا في قمة الحزن ..
تنهدت : يمه ليش تذكريني بهالموضوع ؟؟
أمي : أنت مفروض ماتنساه .. والا بس شفت البنت وانهبلت عندها ونسيتنا ؟؟؟!!
أحمد : افااااا يايمه انا انساكم .. بس نسيت اقولهم هالشرط .. خلاص ولاتزعلين انا أكلمه بكره واقوله الشرط .. واذا ماوافق راح انكسل الخطبه من اصلها .. كل شي ولا زعلك يالغالية .. المره بدال ألف .. لكن انتي مابدالك احد ..
حبيت راسها وطلعت .. وانا في قمة اليأس والاحباط ..
حتى ماانتظرت ردها ..

رنا
ناصر قالي كلام كثيـــــــــــــر ..
شي فهمته وشي مافهمته ..
لكن اللي شد انتباهي وخلاني أركز معه اكثر ..
لما قال انه دكتور واسمه تركي
انصدمت من الاسم : قلت اسمه تركي ؟؟
ناصر : ايه تركي .. ليش وش فيه ؟؟
سألته بإستعجال وانا مو مصدقه : تركي ايش ؟؟
ناصر : تركي عبدالله الـــ........ .. ويشتغل بمستشفى ال...... .. بس ماشاء الله تبارك الله يارنا .. الكل يمدحه ويمدح في اخلاقه .. وازيدك من الشعر بيت .. تراه وسيم ماشاء الله .. واللي في المستشفى يقولون رغم وسامته الا انه مايطالع بنات او يغازلهم .. يقولون صاين نفسه ماشاء الله ..
انا طارت عيوني من مكانهن .. ونقز قلبي وطلع من صدري ..
ماني مصدقه اللي سمعته .. تركي!!
تركي خطبني !!
تركي يبيني مثل ماقال ..
يعني ماكان يلعب او يغازل .. كان صادق ..
ياويلي .. ياويلي ...
كل الكلام اللي قاله ناصر .. يثبت انه تركي ..
وخصوصا لما قال انه وسيم .. هنا انا صدقته ..
تلخبطت الافكار في راسي .. وعجزت افسر اللي انا فيه ..
معقوله .. تكفون احد يعطيني كف على وجهي عشان اصدق ..
طول سرحاني وسكوتي وذهولي من اللي سمعته ..
ناصر : رنا وش فيك ؟؟؟ رنووو امانه اذا ماتبينه قولي .. والله مايقدر عبدالرحمن يغصبك وانا حي وموجود ..
كأني فقت من سرحاني : هــــــاه .. لا لا .. ناصر .. بفكر ..بعدين بقولك قراري ..
وطلعت من الغرفة بسرعه ..
رحت لغرفتي وسكرت الباب وقفلته بالمفتاح ..
انسدحت على السرير .. وجلست اصيـــــــح واصيـــــــــــــح ..
ماني مصدقه .. بالله لو احد في مكاني وش راح يسوي ؟؟؟
مستحيل يصدق ...!!
من جد .. تركي قال وصدق بالقول ..!!
ياحبي له .. ياعشقي له .. ياغرامي له ..
اموووووووووووووت فيه .. وربي اموووووووت ..
وعقب ماخطبني صرت امووووووووووووت اكثر واكثر ..
موافقه والله موافقه ..
مستحيل اطيره من يدي .. مستحيل ..
ماصدقت يجيني ..
انا بصبر اليوم وبكره بقول لعبدالرحمن اني موافقه ..
والا ليش اصبر ...؟؟
انا اكلم عبدالرحمن اليوم واقوله اني موافقه .. ليش انتظر ؟؟

أحمد
طلعت وانا متضايق حدي ..
لما ركبت السيارة .. شفت بندر توه جاي ونازل من السيارة ..
ضغطت على منبه السيارة عشان اعلمه اني موجود بالسيارة ..
شوي الا يفتح الباب ويركب ..
بندر : هلا أحمد ..
أحمد : هلا ..
بندر : وش تبي ؟؟
أحمد : بقولك شي ..
بندر : قول ..
أحمد : عندك شغل ؟؟
بندر : لا .. وش عندك ؟؟
أحمد : خلاص بروح انا وياك كوفي واقولك سالفتي ..
سكر بندر باب السيارة وهو يقول : حرك ..
كنت ساكت طول الطريق واحس شوي وبنفجر .. ماتعودت أكتم أكثر من كذا .. والحمد لله اللي جاب بندر هالحزة ..
بعد عشر دقائق .. وقفت عند اقرب كوفي ..
نزلت انا وياه وجلسنا ..
أحمد : وش تطلب ؟؟
بندر : ابي موكا ..
طلبت موكا لبندر .. اما انا طلبت شاهي ..
بندر : هاه قول وش عندك ؟؟
أحمد : بندر انا خطبت رنا ...
ناظرني بندر بنص عين ومو مصدق : عيد عيد ماسمعت ..
أحمد : اقولك خطبتها ..
بانت الفرحه في عيونه قبل شفاته : احلف بالله انك خطبتها ..؟؟
كنت اتكلم معه وانا احس نفسي مسدوده : والله خطبتها ..
بندر : انزين وش فيك متضايق ؟؟ مفروض تكون مستانس ..
تنهدت : قلتها مفروض .. بس انت ماتدري وش صار ؟؟
بندر : احمد اسرد السالفه كلها .. لاتقطعها ..
أحمد : اسمع ..

رنا
بعد ما أخذت قراري .. أخذت جوالي ودقيت على جوال عبدالرحمن بقوله عن موافقتي ..
رنا : هلا عبدالرحمن ..
عبدالرحمن : هلا والله .. توي كنت بدق عليك ..
عقدت حواجبي .. بيدق علي ؟؟ ليش ..
رنا : آمر وش بغيت ؟؟
عبدالرحمن : خمس دقايق وبجي .. واقولك وش ابغى ؟؟
استغربت أكثر : بتجي ؟؟!! وين بتجي ؟؟
عبدالرحمن : وش فيك ؟؟ بجي البيت ..
رنا : أهاااااااااا .. خلاص انتظرك ..
نزلت تحت وشفت امي جالسه في الصالة ومعها فوز وناصر وسدومه تلعب ..
استغربت جمعتهم ..
رنا : السلام عليكم ..
الكل : وعليكم السلام ..
رنا : ماشاء الله وش عندها العائلة مجتمعه ..؟؟
فواز : عبدالرحمن يبغانا ..
استغربت أكثر : عبدالرحمن !!!
فواز : ايه .. وش فيك مستغربه ؟؟
رنا : حتى انا يبغاني ..
فواز : تتوقعون وش عنده ؟؟
رنا : مدري عنكم ..
ناصر : انا عارف وش يبي ؟؟
فواز + رنا : وشو ؟؟
ناصر بضيق : موضوعك يارنا .. أكيد بيتكلم فيه ..
تكلمت بحياء شديد .. ويالله يالله اطلع الكلمة ..
وجهت كلامي لناصر : اذا على موضوعي لاتشيل هم ياناصر .. لاني موافقه ...
امي بفرحة وهي مو مصدقه : موافقه موافقه .. والا تلعبين باعصابنا ..
نزلت عيوني وانا مرررررة مستحيه : ايه موافقه .. ليش مستغربه يمه ؟؟
فواز قام وحط يده على جبيني .. على باله بيقيس حرارتي : انت مسخنه والا فيك شي ؟؟
رفعت عيوني : لا مافيني شي .. مو انتم تبوني اتزوج .. خلاص هذاني اقولكم موافقه ...
........: بس انا مو موافق ..
كلنا التفتنا لجهة الصوت ..
عبــــــــــــد الرحـــــــــــمـــــــــن !!!!
الكل وقف ...حتى انا ..
أمي : ليش ياوليدي منت موافق ؟؟؟
عبدالرحمن وهو يقرب ويحب راس امي ..: اجلس بعدين افهمكم ليش انا مو موافق ..

أحمد
قلت لبندر كل السالفه ..
بندر : والحين انت ضايق صدرك عشان امي والا عشن ماقلت لعبدالرحمن شرطك ..
مسحت جبيني بكل يديني بقوة وانا فاقد التركيز : كل الاثنين يابندر ..
بندر : شوفا ذا من جهة امي لاتقلق خل الموضوع علي .. اما بالنسبه لعبدالرحمن ترى عادي كلمه بكره واشرحه له موقفك .. او روح لمه احسن لك عشان تفهمه الموضوع اكثر ..
تنهدت بضيق واضح علي ...
بندر : اذكر الله ياخوك .. ترى الدنيا توخذ بسهاله .. لاتضايق نفسك .. ولاتهتم كل شي ان شاء الله بينحل ..
كملت شرب الشاهي بدون ماأرد عليه ..
جلست اناظر يمين ويسار والشباب اللي حولي ..
تذكرت شي وابتسمت ..
بندر انتبه لي : ليش ابتسمت ؟؟ يالله قول اعترف .. من تذكرت ؟؟ اكيد حبيبة القلب ..
أحمد : لا .. ولاشي .. كذا ابتسمت ..
بندر : كثر لي منها ..
أحمد : يعني حرام الواحد يبتسم؟؟ ..
بندر : لا مو حرام .. بسسسسس مايبتسم الا فيه شي حلو ..
أحمد : اقول وماتضحك علي ..
بندر : قول .. ( وغمز )
أحمد : بندر انا سويت شي في المستشفى لرنا ..
طير بندر عيونه : شي ؟؟؟!!!!!!!! مثل وشو هالشي ؟؟
مسكت ضحكتي مابي اضحك لاني لو ضحك ماراح اسكت : بس ماتضحك ؟؟
بندر وهو مبتسم زيي وينتظر اللي بقوله : ايه قول ماراح اضحك ..
أحمد : حبيت يد رنا ...
بندر وهو مطير عيونه شوي وتطلع .. حرك يده عند راسه يعني انت مجنون ..
ضحكت على حركته : لا مو مجنون .. انا صاحي ..
بندر : كيف حبيتها ؟؟ وكيف هي رضت ؟؟
أحمد : بندر رنا أحسها متقبلتني أكثر من الاول .. فأنا استغليت الموقف وسويت اللي براسي ..
بندر : وهذا اللي براسك .. يعني حبيت يدها خلاص ملكتها ..
أحمد : لا يابندر .. بس شي احسن من لا شي ..
بندر : اقسم بالله انك منسم .. انت لو على حبك وعشقك وغرامك لها .. كان اخذتها من زمان .. بس انت بغباءك تباطيت الموضوع وقمت تصرف ..
أحمد : بس خلاص هي لي الحين ..
بندر : لاتصير واثق أكثر من اللازم .. ترى اخوها الى الآن مابعد رد عليك ..
تكلمت وانا مرتاح من هالناحيه : لا تخاف يابندر انا من هالناحية ماشلت هم ..
بندر : قسم بالله انك كلك بكبرك همووووووم وتوجع الراس ..
ضحكت على كلامه ... صادق بندر انا هالفترة صاير كتله من الهموم والمشاكل ..

رنا
صرخت بأعلى صوتي وانا اقول : لااااااااااااااااااااااا والف لا ..
صرخ عبدالرحمن أعلى مني وكأنه يتحداني : ماشاورتك ..
رديت عليه بصراخ اقوى : مو على كيفك .. انا ماني لعبة عندك تزوجني من تبي ؟؟
عبدالرحمن وهو يصر على اسنانه ويحاول يهدي نفسه : قلت لك ماشاورتك .. انا قاعد اقول لأمي الموضوع ..
رنا : يا سلاااااااااام ومن هي صاحبة الشأن انا والا أمي ؟؟
عبدالرحمن وهو الى الآن يحاول يمسك اعصابه : شوفي يارنو ورب البيت لو امي وافقت .. ان تتزوجينه غصباً عليك ..
التفت على اميوعيوني تلمع دموع : ماما صح مارح توافقي .. صح ماما ؟؟
سكتت امي وظلت تناظرني من دون ماتقول أي كلمه ..
لما شفتها ماردت التفتت على الصنم فواز وناصر اللي ماتكلموا ولا علقوا ..
رنا : وانتم ؟؟ وش رايكم ؟؟ موافقين على كلامه .. وتبوني آخذ اخو زوجي .. تكلموا .. ليش ساكتين .؟؟ والا الموضوع عاجبكم ..
الكل ساكت ومو راضي ينطق او يقول شي ..
زدت في الصراخ وانا راسي ولع نار ووجهي حمر : انتم تبوني اتزوج .. خلاص بتزوج ... موافقه على تركي .. يعني انحلت القضية ..
قام عبدالرحمن ومسكني مع اكتافي بكل يدينه : يارنا أفهمي الموضوع .. حتى انا موافق على تركي .. بس لما جاني أحمد .. انا شلت تركي من بالي نهائيا .. أحمد اقرب لك من تركي .. احمد يبغاك وبيعزك وبيعز بنتك ..
ابعدت يدينه بقوة وانا أتحداه : بس انا ماأبغاه .. مو على كيفك .. مو على كيفك .. تفهم والا افهمك ..
التفتت عليهم كلهم : حتى انتم ماراح تفهمون وشلونا لحرمه تآخذ اخو زوجها .. شينه وربي شينه .. كيف راح اتقلبه واعتبره زوج .. كيف راح اعيش معه واجيب عيال ؟؟ ماسئلتوا نفسك هالسؤال ؟؟ والا بس ودكم تتخلصون مني وخلاص .. حرام عليكم وربي حرام ..
التفت على امي ووجهت لها الكلام : حتى انتي يايمه مع اخواني .. حتى انتي ضدي .. ليش طيب ؟؟ ليش يايمه ليش ؟؟ انا وش سويت عشان تعاقبيني وتزوجيني اخو زوجي .. انت ماتبيني انستر واتزوج .. خلاص انا بتزوج تركي وبنستر مثل ماكنتي تبين ؟؟
جاني كف على خدي خلاني اصحى من صراخي ..
ناظرت مين اللي ضربني ...
عبدالرحمن ... جعل يده الكسر ..
عبدالرحمن : رنووووو ورب البيت كلمه ثانية لأذبحك بمكانك .. وتراك ازعجتينا بتركي وتركي .. تركي خلاص انا رفضته يعني بح .. فهمتي والا افهمك زين بالعقال ..
ناظرتهم كلهم وانا اصيح واشاهق من الصياح ..
تكلمت بهدوء وانا احاول اجمع الكلام واطلعه من فمي : يرضيكم اللي قاعد يصير .. يرضيكم انكم تظلموني .. والله لو تسوون اللي براسكم .. ان يكون ذنبكم على جنبكم .. وتراي حذرتكم ..
قلت هالكلمتين وعلى طول رقيت لغرفتي ..
انسدحت على سريري وقعدت اصيح الين اذن الفجر .. وانا كل شوي اسب والعن في هالأحمد .. الله يآخذه وافتك منه ...
يحسب الدعوه سهله بأنه يتزوجني ..




يتبع ...