رواية جفاف وردة بيضاء في رُكن الذكريات /17

.. البارت السابع عشر ..
.
.
‏بناظرك الفتّان آمنت بالسِّحر
وهل بعد إيمان الصَّبابة من كفر؟
فلا تعتمد بالهجر قتل متيّم
فإنَّ المنايا لا تزيد عن الهجر!
" محمود س. البارودي "
.
.

سعود بقلة صبر : انس وش مخبي عنا ؟!
انس رفع نظرة له وبملامح جامدة التزم الصمت .
نطق راكان وهو يحاول ان يستدرجه بالكلام : ستة انقتلو بنفس المكان وبنفس الوقت الا هادي بعدهم بنص ساعه ، بعد مأتم التفتيش اكتشفنا إن بصمات هادي على المسدس ، وهو كان مستدعيهم للمكان .
اكمل سعود : اهل المقتولين قفلو القضية بشكل غريب ، والأغرب ان اهل هادي طلبو بالبحث بالقضية ، ولما صرنا نبحث تتقفل .
نطق انس بما يُخبي : كانت تجيني طلبات بفصل هادي ، بعدين تحولت لتهديدات بالقتل .
صرخ سعود بصدمة : وانت ساكت ؟! .
انس رفع نظرة وبصوت بارد : ليه وش تبيني اقول ؟! .
سعود يرمي الملف فوق الطاولة بغضب : ابيك تقول كل شي لي ، التهديد مو شي سهل .
راكان : سعود خلنا نفهم كل شي بعدين تكلم .
سعود ابتعد وصوت انفاسة تُسمع من شدة غضبة .
راكان : متى جاتك طلبات بفصل هادي ، والتهديدات ؟! .
انس بضيق : قبل سنتين ، والتهديدات مالها شهور .
راكان : زي مافهمنا وظفت هادي قبل 3 سنوات .
انس هز راسه بنعم .
راكان : متى بدا يعالج من الادمان ؟! .
انس : بعد شهور من توظيفة .
راكان نطق بعد تفكير سريع : وش عرفك انه محتاج الوظيفة ؟! .
انس ب استغراب : تشك بهادي ؟! .
راكان بثقة اجاب : اشك باللي ورا هادي .
نطق سعود وهو يمسك راسه : هذا اللي كنت خايف منه .
انس بملامح مُستفهمه : وش فيكم .
راكان بذكاء عُرف به : هادي كان ورآه احد ، وهادي خانهم لكذا انقتل .
انس فتح عيناه وهو فعلاً يتذكر ذاك الصوت ( يلا مو خسران شي ، خويك او نقول الحارس الشخصي لك كم مره لقيته يلعب معي ، اذا بتسال كيف يلعب ف بقولها كان يدور وراي يبحث يسال ، هو ماكان راح يلقى شي بس سبب لي قلق ، والحين احسن الله عزاك ) .
وقف انس وبتلعثم : ماصدق كيف كذا .
سعود اقترب بخطوات واسعه : انس وش فيك .
انس بملامح شحبت : ابي ماء
سعود هز راسه وهو يبتعد : طيب بجيب لك بس اجلس .
تقدم راكان ب اهتمام : تحس بشي .
انس بهمس مُتعب قد بان في صوته : راكان الموضوع اكبر مماتتخيل ، ولازم سعود وماجد مايدرون بشي .
راكان بهدوء : وش تقصد .
حمل هاتفه والمفاتيح المُلقاة يميناً : ابيهم يطلعون من السالفه لانها تخصني لحالي ، وراح اتواصل معك عن اللي اعرف لما نكون لوحدنا .
راكان هز راسه وهو يفهم مقصده : ابشر .
استدار انس تاركة خلفة .
جلس راكان وعيناة تتجة للملف القابع فوق الطاولة .
..
فتح باب المطبخ مُستغرب انُه مُغلق في هذا الوقت .
التفتت نورة وببتسامة : واخيراً حسيتي فيني .
سعود بصدمة نطق : بسم الله وش تسوين هنا ؟! .
نورة مسكت صدرها : الا بسم الله منك انت اللي وش تسوي هنا ؟! .
سعود نظر لما تفعل وببتسامة : والله وكبرتي وصرتي تشتغلين .
نورة عادت لغسيل ما امامها : كلها من اخوك عاقبني .
سعود بسُخرية : احسن ، ليته يعاقبك كل يوم .
نورة بغضب ترمي مابيديها وتستدير له : الحين وش جايبك ؟! .
سعود ضرب راسة وهو يتذكر انس نطق بكذب : وشسمة تعرفين هذا خويي راكان بالمجلس ويبي ماء .
نورة بتوتر : وش عرفني فيه .
سعود بقلة صبر : وانا قايل انك تعرفينه ، المهم جيبي ماء .
نورة ب انفاس غير مُنتظمة تحركت للخزانة التي تحتوي جيكات الماء وب امر وهي تخرج واحداً منها : وانت بتجلس واقف ؟! .
سعود ب استفزاز ساخر : تكلمي زين الحين ، اجل اجلس واقف كيف ذا .
نوره مُشيرة نحو الثلاجة : اقول طلع الثلج وانت ساكت ولا جيب الكاسات .
سعود اتجه لثلاجة بتذمر : مستحيل يشتغلون البنات بدون تامر .
نورة ببتسامة بعد ان سمعت صوت السيارة المُغادرة : والله شكل خويك ذبحة الضماء وراح لبيت اهله .
سعود خرج يسير بخطوات واسعه .
نورة عادت تُغسل ماكان بين يديها وبهمس مُتافف : شغلك ي ابرار عندي .
..
نظر سعود مكان سيارة ماجد الخالي وبهمس : وين راح ذا بنص الليل .
اتجه لمجلس الرجال وبتساؤل بعد ان دخل : ليش انس راح ؟! .
راكان ببتسامة : صار عنده شغل سريع ، وانت عاد تاخرت .
سعود انزل نظرة للملف الذي يحملة : والقضية وش صار فيها ؟! .
راكان يُحرك كتفيه : مدري ، وانا طلعني منها القضايا اللي ماسكها قد شعر راسي ، وولد عمك شكله ماراح يتكلم .
سعود وعيناه تضيق : انت تتكلم من صدقك ؟! .
راكان هز راسة : ايه ، انا بروح البيت .
سعود رفع حاجبة الايمن بشي من الاستغراب : مو قلت بتنام عندي ؟! .
راكان امال ثغره ببتسامتة : ماقلت ، انت اللي خططت واخوي فهد بالبيت وبروح له .
سعود نظر للملف : طيب جيب الموضوع ذا بحله باين ولد عمي يعرف كثير وساكت .
راكان وضع الملف خلفه وببتسامة : خله معي الحين ، و ترى مانسيت انك خربت علي اجازتي ، لكذا اي استدعاء جنائي يجيني بكره تمسكة عني .
سعود ينفجر ضاحكاً : والله تستاهل ، وبكره مضغوط اعذرني .
راكان : بعد بكره .
سعود يُخرج لسانه بشي من الاستهبال : بعد جمعه واجازه .
راكان يدفعه ضاحكاً : بخليها ليوم مابي اشتغل فيه .
سعود يلتفت باحثاً عن هاتفه : الا وين جوالي بكلم انس .
راكان وملامحة يكتسيها الجمود : يالله اشوفك بكره على خير .
سعود رفع ذراعه مودعاً وبتنبيه : لاتنسى الملف جيبه بكره .
راكان خرج : ان شاء الله .
وقع نظرة على ناعسة العينان وكيف لا يعرفها ، كانت ترتدي قميص اسود قصير الاكمام ويصل طولة لنص الساق و تُعطيه ظهرها مُنشغله باغلاق الباب العالي والضخم بهدوء حتى لا يخرج له صوت .
استدار براسة للخلف بسُرعة باحثاً عن من كان خلفة نطق بصوت عالي بعد ان راه مُركز ببحثة وهو يخاف ان يراها : فطورك بالدوام علي .
نورة اللتفتت وبعينان مصدومة عادت للخلف وهي تدفع الباب بقوتها وتختفي من امامة .
سعود ببتسامة اقترب : ماهيب غريبة عليك ي ابو محمد وتم .
راكان انفجر ضاحكاً وهو يتذكر شكلها .
سعود : وش فيك ؟! .
راكان ببتسامة لم يُخفيها : لان عيونك ناعسة نفطرك .
سعود اسبل بعيناه : مادريت ان عيوني معجبتك .
راكان ابتعد وهو يهمس ب اعجاب : سبحان من خلق عيونها .
واكمل بتمتمة لخاطره يحفظها من قديم : مآ كُنت أؤمن بالعيون وسُحرها حتى دهتني بالهوى عيناك .
..
عادت للمطبخ بخوف وهي تُمسك راسها وتعض شفاهها السُفلية : ي ويلي ي ويلي ، وش بيقول الحين ، والله اللي بيقول طلع كلامي صدق واني عامدة اطلع لهم .
نطقت بذعر : بس سعود قال راح ، كيف رجع .
تحركت لثلاجة واخرجت زجاجة ماء وبهمس مرتبك بعد ان ارتشفت نصفها : انا ماسويت ولا عمدت ، كنت ابي اسوي بسعود مقلب حسبته لحاله .
ضربت جبينها وبتنهيده مقهورة : الحين من بيفهمه اني ماعمدت .
صعدت على السلالم بخطوات سريعه وتمتمت : انام احسن من التفكير .
..
انزل هاتفه فوق الطاولة الصغيرة بجانب السرير ، وبدا ينظر لجهة رنين هاتفها .
صرخ بعد انزعاج من صوته : تعالي سكري الزفت ذا .
خرجت من دورة المياة بسرعه وهي تثبت ربط منشفة شعرها جيداً وبغيض : وش فيك ؟! .
ماجد صمت ونظره يتجول على جسدها بالبيجامة البيضاء وسروالها المُنقط بسواد .
ابرار اغمضت عيناها وهي تلعن بداخلها ، فقد نَسيت ارتداء الروب حتى يُغطي ذراعيها التي اصبحت امامة عارية .
ماجد بصوت هادئ : جوالك من اليوم يدق .
ابرار استدارت بخطواتها للهاتف وبهمس : مو وقتك .
ارتفعت حادقتيها فجاه وهي تتبع الهاتف الذي سُحب من كفها .
ماجد قرا الاسم ( ام لسان ) وببتسامة هامسة وهو يضعه على السبيكر : شكل وراك مصيبة انتي وام لسان ، يلا ردي .
وصل صوت مها الخارج من الهاتف : ابرار ي كلبة ي حيوانة مو قلت اذا دقتي تردين على طول ؟! ، ولا ماجد نساك اهلك ، حتى امك تدق وجوالك مقفل ، اعترفي وش عندكم .
ماجد رفع عيناه بدهشه و ابتسم بتسلية .
بفشلة نطقت : مها اسكتي .
مهاا بصدمة تقف : تسكتيني ؟! ، انا ي ابرار تسكتيني عشت وشفت ي بنت منيف .
ابرار بملامح اصفرت رفعت يدها مُحاولة ان تسحب الهاتف : جيب بتجيب العيد اعرفها .
ماجد انحنى بهمس خبيث وهو يُغلق ثغرها بكفة : تسوين اللي اطلبة ؟! .
عادت للخلف بضيق وهي تهز راسها بنعم .
ماجد ابتعد ببتسامة قصيرة للحمام بعد ان ترك الهاتف في كفها .
ابرار بغضب همست : انتي مجنونه .
مها بصوت ساخر : ي ماشاء الله مره اسكتي ومره مجنونة ، والله المجنون عارفه ربي اجل اكلمك ولاتردين .
ابرار زفرت انفاسها وبهدوء : ماجد كان عندي وكنت ابيك تسكتين عشان ماتجيبين العيد .
مها : لحظة لحظة وش قصدك اجيب العيد ؟! .
ابرار تضرب جبينها : مها اقول وش اخبارك ، واخبار الاهل ؟! .
مها تُحرك عيناها بضجر : ايه غيري الموضوع ، المهم انتي تعرفين الابراج ماتشتغل عندنا زين ، ولما تشتغل ماحصلك و امك وجدتي ام هزاع يسالون عنك وناشبين لي كل ماتحركت قالو شوفي الابراج اعتدلت دقي عليها ، والله مدري وش شايفني لكن الله المستعان
ابرار بعينان بدت تغرق بالدموع : ي حبي لهم ، هم وش اخبارهم .
مها بحنان مُغلف بالحب : كاني اشوفك بتبكين ، كلنا بخير ومشتاقين لك ولا تخافين زي ماتركتينا ، وتقول جدتي يابتجينا ولا نجيها .
ابرار رفعت نظرها لماجد الخارج وبهمس ضاحك : ي جعل الخلق كلهم فدوة لها ، والله لاتجي لاتنور الرياض كلها ، بس ان شاء الله بجيكم ، يالله اكلمك بعدين .
مها بخبث : كاني اشوفه عندك ، يالله انتبهي لنفسك .
ماجد نزع قميص بجامته ونطق بعد ان اندس في فراشة : طفي النور وتعالي .
نظرت له بعينان مفتوحتين على اتساعمها : نعم ؟! .
مرر لسانه على شفاهه السفلية وكان يحاول ان يمسك نفسة عن الضحك : لا يروح تفكيرك بعيد ، بس ابيك تطفين النور وتنامين ع السرير ، بتطولين ترى عايشة بالبيت ذا وبيتعب ظهرك .
شعرت ب احراج لم تشعر به في حياتها وبربكة : لا انت نام لا تفكر بغيرك .
ابتسم على احمرار وجنتيها : بتجين تنامين ، ولا خليتك تسوين الطلب ؟! .
ببلاهه نطقت : اي طلب ؟! .
جلس رافعاً احد حاجبية : اللي بتسوينه واعطيتك الجوال عشانه .
نظرت له بشي من القهر : ايه تذكرت ، وش طلبك ؟!.
رمى جسده للخلف وغطى راسه باللُحاف وبخبث : لا خليه بوقت ثاني ، الحين تعبان وابي انام وراي دوام .
اغلقت الانارة واقتربت بخطوات بطيئة ، تمتمت بعد ان استلقت في الجهه الاخرى من السرير : اعوذُ بكلمات الله التامات من شر ماخلق .
بصوت نائم نطق : تشوفيني شر ؟! .
ابرار بهمس : نام نام .
بعد دقائق غيرت جهة نومها وهي تستقر على جنبها الايمن بعد ان شعرت بهدوء انفاسة وانتظامها ، تجولت بنظرها في ملامحه الجذابة في اصلها .
..
الساعه السادسة صباحاً .
خرج من الحمام وهو يُعدل بذلته العسكرية وبمزاج رايق بدا يُغني .
فهد بصوت عالي : يالله صباح خير .
دخل راكان المطبخ مُكمل مايُغني .
وضع كوب الحليب امامة والاخر رفعه لثغره مُرتشفاً منه وببتسامة عريضة : اسعدنا معك
تحرك لثلاجة وهو يخرج علبة الجبن : ابد صحيت وشفتني مروق .
فهد جلس ببتسامة : الا اسمع عشان تروق صدق ، كلمني مدير الشركة ، وطلب ارسم تصميم اسبطل ، والحين بروح له .
راكان نطق بعد ضحكة قصيرة : وماقال لك وين المزرعه اللي بتصمم لها
فهد بتفكير : لا بس بروح مع ولد عمه واكيد يعرفها .
انفجر راكان ضاحكاً .
فهد ب استغراب من ضحكة : وش فيك ؟! .
راكان ببتسامة بدا يشرح له : هم يبون مزرعه ورشحت لهم مزرعة ابوي ، ومفروض انت اللي تودي ولد عمه مو ولد عمه يوديك .
فهد بعدم فهم : انت وش تقول ؟! .
راكان يُعيد الكلام بشرح اوضح : ابوي يبي يأجر المزرعه ، ولما شفت انس يدور مزرعه رشحت لهم مزرعه ابوي ومنها نكسب ، ومنها نضبط مزرعتنا ببلاش .
فهد : ومين انس ؟! .
اجاب بعد ان ارتشف الحليب : ولد عم ماجد وسعود .
فهد بصدمة : وهم لهم ولد عم ؟! .
راكان يتذكر شكلة : ايه ، بس اغلب حياته عاشها برا .
فهد بتفكير : وليش عاشها برا ؟! .
راكان يقف بسُخرية : روح اسأله ، وش دراني عنه .
..
تجول بعيناه الناعسه في ملامحها النائمة ، حرك اصبعه على شفاهها ب اعجاب ، ابتعد بربكة من صوت طرقات الباب وبصوت عالي : من ؟! .
ابرار استيقظت بخوف : وش فيه .
نهض ماجد مُتحركاً جهة الحمام : الباب يدق روحي شوفي من .
ابرار عدلت شعرها وهي تقف .
فتحت الباب ثم ابتسمت بوجه من خلفه : اهلاً ؟! .
الخادمة ببتسامة ولكنة انجليزية : اهلاً بك ، سيدتي والدك في الاسفل وينتظرك .
ابرار ببلاهه : عربي عربي .
الخادمة براس فارغ من الكلمات التي تُريدها : مافيه معلوم .
التفتت ابرار ع صوت ماجد خلفها : ماجد تعال شوف وش تقول ذي .
اقترب ماجد بعد ان ارتدا قميصة : وش فيه .
ابرار بفشلة : تتكلم انجليزي مافهمتها .
ماجد ببتسامة : ذكريني ادرسك عربي .
ابرار : مين كاذب عليك وقايل ماعرف عربي ؟! .
ماجد بهدوء : ماقصد ماتعرفين عربي اقصد تتعلمين الكتابة والقراءة .
ابرار قاطعته مُشيرة للخادمة وهي تبتعد :بلا كثرة حكي شوف وش تقول .
ماجد حرك عيناه بمعنى : ماذا ؟!.
الخادمة : السيدة ابرار والدها في الاسفل وطلب ان يراها .
بملامح مصدومة نطق : ايش ؟! .
كررت الخادمة ماقالت : السيدة ابرار والدها في الاسفل .
هز راسة بغضب : هذا بعد له وجه يجي ، خلاص خليه ينتظر .
عاد للخلف ونزع مايرتدي ورماه ارضاً ثم اخرج من الخزانة الثوب الرسمي وارتداه ع عجل .
خرجت ابرار وبتسائل من سرعة حركته بالغرفة : وين رايح .
نطق بهدوء : ابوك تحت وطالب يشوفك .
شهقت بقوة : ابوي تحت ؟! .
هز راسه : انا بنزل له ، بدلي وانزلي .
اقتربت وهي تمسك ذراعه : والله ماتنزل الا انا معك .
تحرك لطرف الغرفة باحثاً عن اوراق عملة : طيب اخلصي .
..
تركت ماتفعل بعينان مصدومة .
هند : صدق ؟! .
اريان بتوتر : من قال لك !؟ .
هند ب استغراب من توترها : امي قالت .
اريان : من قال لامي ؟! .
هند بغيض : راكان وانا مدري ؟! .
تُعدل شعرها بفك ربطته وجمعة من جديد وهذه حركتها المعتادة عند توترها : انا ماعرف شي .
تنظر لها بشي من السخرية رافعه حاجبها الايسر : ماتعرفين شي اجل ؟! ، ترى ابوي اللي قال لامي وامي قالت لنا كلنا يعني لاتحاولين تخبين علينا .
اريان بخوف نطقت : وين هاجر ؟! .
هند رفعت كتفيها بمعنى لا اعلم .
تحركت اتجاه الباب قاصدة الخروج : اخاف هاجر تقول انا علمتكم .
سحبت ذراعها : وين طالعه العيال برا .
ضربت جبينها بغضب : ابي هاجر من صحيت ماشفتها .
بانتقاد بان على ملامحها : لاتعصبين علي ، ترى مالي دخل ، ولا ادري وينها .
تحركت اريان لغرفة الجلوس وبهدوء : ريما الحلوة تعالي .
وقفت ريما ببتسامة : جيت .
مسحت ع شعرها وبحنان : روحي شوفي وين هاجر .
سارت ريما للخارج بخطوات واسعه وبتمتمة نطقت : هاجر وينك .
استدارت بجسدها للباب المُغلق وهي تسمع ضجيج من بداخله واصواتهم تحركت له وفتحته .
رفعت نظرها نجلاء : اريان صدق اللي سمعته ؟! .
نطقت اسيل : مستحيل محمد يسوي كذا ويشك بهاجر .
قاطعتها روان : لاحد يستغرب من محمد شي ، من يومة هو وحيته ماطيقهم .
نجود بحماس : والحمدلله فيها شي ايجابي ، ان تركي تزوج هاجر .
اسيل بتفكير : اي والله ، الا قولي السالفه ي اريان .
عادت للخلف وهي تمسك جبينها من الصداع الذي داهمها فيه .
نجلاء بغيض من خروجها بدون جواب : اعوذبالله مافيه احترام ماكان احد تكلم وسالها .
تكلمت الجوهرة بعد ساعات من الصمت : باين متضايقه ع هاجر لا تضايقونهم اكثر ماهم فيه ، وقفلو ع الموضوع .
لوت نجلاء شفاهها بغيض : اخيراً سمعنا صوتك .
بسُخرية نطقت اسيل : ولا يوم تكلمت قالت دُرر .
وقفت الجوهرة : اروح اجلس مع امي احسن من مقابل وجيهكم .
روان : بروح معك .
نطقت اسيل بطقطقة مُشيره لنجلاء : شوفي امك ذي ولا مضيعه .
الجوهرة بصوت وصل لهم من الخارج : هذي اختي كم مره افهمكم .
نجود بضيق : ليتك يمة ارضعتيني بعد .
نجلاء بغيض : انا ناقصتك بعد يكفي مجنونة وحده .
..
بصوت رجولي ساخر : ارحب مابغينا نشوفك .
ابرار بهمس وصل له : احترم ابوي .
جلس ماجد ونظراته تتامل سلامها الحار على والدها .
ابرار بصوت باكي : اشتقت لك وينك ليش ماجيتني من زمان .
ابو ابرار مسح على شعرها وبحنان : ماحبيت ازعجك وانتي توك متزوجه .
ماجد ب استفزاز : ي ماشاء الله
ابرار بعينان غاضبه نظرت لماجد بمعنى ( فيك خير فشلني الحين ) : وش ذا الكلام البيت بيتك متى ماحبيت تعال ولا فيه ازعاج .
ابتسم ماجد من حركتها :أية ترى صادقة متى ماحبيت تجي البيت مفتوح لـك لـست شهور .
ابو ابرار بملامح اصطنع فيها الضعف : تسلم والله ي ولدي , من عوايدكم كرمكم لضيف ماهيب لست شهور بس .
بملامح متقززة من كلامة التزم الصمت
ابرار ب استغراب : لية ست شهور ؟! .
ابو ابرار يُقاطعها وهو يجلس : انتي بشريني عن صحتك , ماعليك من كلامنا . .
ابرار رفعت نظرها لماجد الجالس في الطرف ويتاملهم : الحمدلله بفضله بخير .
ابو ابرار نظرة لماجد : وانت كيفك .
ماجد بهدوء : ع حطت يدك وانت ادرى .
ابرار بعينان اتسعت صدمة من اسلوبة الغريب .
ابتسم على نظرات عيناها له : شكلك ماراح تصبين قهوه لابوك .
ابو ابرار : لا يابوك مابي قهوه ولا شي .
ابرار وقفت وتحركت جهة طاولة القهوة : لا افا تجيني ولاتقهويت .
ابو ابرار بتسائل خبيث لم يطف ماجد : الا وين ابوك ؟! .
ماجد يضع ساق ع ساق : بتربطة بشي بعد يوم انك تسال عنه ؟! .
ضغطت بقوة على الفنجان الذي كنت تحمل وببطء: ماااجد .
ابو ابرار نظر لها وبخوف ان تفهم شي : زوجك يحب يمزح كثير .
ببتسامة ساخرة : ايه والله نحب نمزح كثير .
ابرار ابعدت نظرها عن والدها وبهدوء : ماجد شغلك بتتاخر عليه .
ماجد وقف : فديت المهتم .
ابرار احمر وجهها بسبب وجود والدها وبعينان اشتعلت اشارت له ان يخرج .
ماجد انفجر ضاحكاً وهو يتحرك للخارج : تعالي ابيك .
ابرار بخجل اشارت لوالدها : شوي وبجي ي عيني .
ابو ابرار : اخذي راحتك ي بنتي .
وقف بعد ان خرجا وبخبث تجول نظره في المجلس الكبير : ماعلية ي ابرار حطيتك بمصيبة بس طحتي بخير .
..
في الخارج .
ضربته من صدره بقوة : وش ذا الاسلوب مع ابوي .
ماجد باستغراب اصطنعه : ليش وش سويت ي قلبي ؟! .
ابرار ب انفاس اضطربت : ماسمح لك تقل ادبك مع ابوي ، كل شي ولا هو .
ماجد بهدوء هامس : اي ابو تتكلمين عنه ، وهو راميك علي , وانتي تعرفين ان وراة مصلحة بعد . .
ابرار عادت للخلف وبغضب : انا ماسمح لك تعايرني ب ابوي وبرجع معه عشان ترتاح .
ماجد بملامح اكتساها الغضب اقترب : انا وش قلت لك من قبل .
ابرار بخوف عاد خطوة للخلف : وش قلت ؟! .
ماجد بفحيح : ارجعي وتشوفين . .
ابرار بصوت غير مُتزن : وش بتسوي يعني .
ماجد حاوط راسها بكفية واقترب بقبلة طويلة دافئة على جبينها وبهمس : اذا تبين تشوفين وش اسوي ارجعي .
امال راسه لاذنها واكمل همسة بكلمات شبه قاتلة : السجن من الاشياء اللي بتشوفينها .
ابتعدت وبعينان غرقت بالدموع : ابوي وش مسوي .
ماجد استدار خارجاً : حاولي تعرفين منه .
..
وقف على نداء والدته : لبية يمة .
ام ماجد : صدق ابو ذي هنا ؟! .
ماجد بضيق : من ذي ؟! .
ام ماجد : يعني من ابرار .
ماجد بهدوء : اها زوجتي ، ايه هنا .
ام ماجد اتسعت عيناها بقهر : وتقول زوجتي ، وانت اللي كنت تقول لاحد يقول زوجتي .
ماجد ببتسامة قبل راس والدته : ارضي بالامر الواقع زي مارضيت .
ام ماجد ابتعدت براسها : متى نروح نخطب نوف ، قبل لا تسحرك بنت ابليس ؟! .
ماجد بدون مُبالاة: اسالي ابوي .
ام ماجد بتافف : ابوك انا شفته عشان اساله .
ماجد ببتسامة : كم يوم وبتشوفينه ، الا الخدامة فطرت انس قبل يروح ؟! .
ام ماجد : صحيت ابي اسلم عليه ولا لقيته .
ماجد ب استغراب : طلع مع سعود ؟!
ام ماجد : لا بسيارتك .
ماجد ضرب جبينه بقهر : مايغير حركاته .
..
في المجلس الخارجي .
ابتسمت بعد ان رتبت على فخذه : اخبار امي وجدتي ولية ماجبتهم معك .
ابو ابرار : ماجيتهم من اعرستي .
بضيق هتفت : وليش ؟! .
ابو ابرار بتوتر : ان شاء الله بروح لهم اليوم .
نظرت لعيناه وبِتساؤل حاولت ان يُرضي فضولها : وش تخبي عني ؟! .
ابو ابرار بخفوت نطق : كلها ست شهور بس وبترجعين هذا اللي اقدر اقولة .
براس مشوش نطقت : وش سالفة الست شهور اللي تقولونها , وليش ارجع ؟!! .
حاوط يداها بين كفيه : لاتصدقين اي شي يقولونه عني , وانتبهي من ماجد ذا . .
واكمل بهمس : انتبهي تعطينه اللي يبي .
سحبت يداها وهي تكح بخجل بعد ان فهمت مقصده .
وقف : ماوصيك .
ابرار وقفت وبعينان حائرة : يبة زواجي يعني لعبة ؟! .
قبل راسها وبضيق : ماكنت ابي اسوي لك كذا بس انجبرت .

..
اغلقت الباب بعد ان صعدت : هاه جيت .
سيف بضيق : وش فيك تكلميني بدون نفس .
صوبت نظرها اماماً : انت اعرف .
زفر بتعب : هاجر والله ماتحصلين احسن من تركي ، حتى رفعت ضغطه لك امس ، واعطيته اوامر تعجيزية .
انفجرت بغضب : ايه اغسل راسي بكلمتين ، قول لولد عمك مايحلم .
نطق بعد ثواني من صمتها : تركي كلمني وصراحة .
استدارت براسها ناحيته وبسُخرية مُقاطعه له: ايه وش قال ؟! .
تنهد سيف وهو ينظر يساراً : اذا بتجلسين تقاطعيني ماراح اتكلم .
التزمت الصمت .
سيف : قبل اتكلم ، ابي اسالك .
حركت راسها بمعنى اسال .
سيف بهدوء : ممكن اعرف ليش رافضه تركي ؟! .
اجابت بعد صمت ثواني : احتفظ بالاجابة .
سيف هز راسه : اللي تبين ، المهم والاهم .
هاجر بقلة صبر : وش ؟! .
سيف : تركي منزعج من تصرفاتك .
هاجر همت بفتح باب السيارة : الشرهه على اللي جاي لك ، لو اني عارفه هرجك كذا ماجيت .
سحب ذراعها : مو قبل شوي تقولين وش يقول ؟! .
هاجر عادت بظهرها خلفاً لمقعد السيارة وبتافف : خلاص انا وياه تزوجنا وانتهى الموضوع ، وصل لخويك ماينقل اسرار بيته .
انفجر سيف ضاحكاً : شكلك عارفه وش قال ، وترى تركي مايخبي عني .
هاجر بغيض : عندي شغله .
سيف نطق بهدوء : الا محمد كلمني .
بتوتر خايف : وش يبي ؟! .
داعب خصلات شعره ب اصابعه وبخفوت : يسال عني .
هاجر بملامح اكتساها الحزن : ماسال عني ؟! .
سيف بكذب : الا سال .
هاجر فتحت الباب خارجه : لا تكذب اعرفه مستحيل يسال . ..
دخلت وبصوت عالي مُنبه للجميع : بنات فهد كلم ويقول بيجي معه رجال لاحد يطلع ، اللهم اني بلغت اللهم اشهد .
اسيل انزلت كإسة الشاي : وش جايبة فهد ؟! , ومن ذولا.
هند رفعت كتفيها : والله مدري ، وين البنات ؟! .
نجلاء بهدوء وهي تمشط شعرها : روان والجوهرة مع امي ، ونجود تغسل رضاعة اخوها .
هند : وين اريان وهاجر ؟! .
ريما رفعت راسها من الطفل عزوز الذي كانت تُلاعبه : طلعت تدور هاجر لاني مالقيتها .
اسيل رفعت حاجبيها بألم مُتخيلة فهد : ي ويلها من فهد .
نجلاء بتحذير : لاتقولون شي ، وهم بيجون قبل يجي .
هند جلست : اي والله ، مو فاضية لصياحه .
دخلت نجود وهي تحمل الرضاعه في كفها الايمن : اسوي حليب ولا .
نجلاء : ايه .
هند : نجود شفتي هاجر واريان ؟! .
دخلت هاجر خلفها : هلا انا هنا وش تبين ؟! .
هند تبحث بعيناها خلفها : وين اريان ؟! .
هاجر هزت كتفيها بضيق : مدري عنها .
..
انفتحت بوابة المزرعه الضخمة
ودخلت منها سيارة فهد العادية نسبتاً لسياره التي كانت خلفة .
ترجل انس بهدوء ونظرة يتجول في المزرعه .
اقترب فهد : ابوي توه شاريها ، ويسوي فيها تعديلات وتوها ماخلصت .
قاطعه انس وهو يثبت النظارات الشمسية : لا عادي ، انا بس ابي مساحة كبيره نحط فيها اسطبل .
اشار فهد يميناً : هناك مساحة فاضية وكبيرة .
التفت انس خلفة : منير جيب دفتر وقلم .
هز راسه مُنير عائداً للخلف .
وقف بعد سيرة من خلف المنزل الذي يتوسط هذه المزرعه وبعد تامل نطق ببتسامة : مساحه اكبر من اللي ابي بعد .
ابتسم فهد ببتسامة عريضة اظهرت صفت اسنانة : الحمدلله ي طويل العمر
استدار انس ناحية وانزل نظارته قليلاً : م افضل طويل العمر .
حك قفا راسه : وش نقول لك ؟! .
ابتسم انس : ابو عايد .
بعد مُدة من الحديث والرسم والاتفاقات .
اللتفت خلفة على صوت الرجل الكبير الذي كان يمشي ناحيته ويتبعه ثلاثة من الرجال .
فهد : هذا ابوي .
انس ببتسامة : الله يطول بعمرة تشرفت فيه .
بعد السلام واخذ الاخبار .
ابو علي : ان شاء الله اعجبتك ي ولدي .
انس رفع نظارته فوق راسة : ايه حلوة ، بس اعذرنا ي عم راح نضيف فيها اشياء .
ابو علي : اللي تبي تسويه سوه ، الا من انت منه .
بفشلة همس تركي لسيف الواقف جواره : احس الولد بينصدم من ابوي .
سيف بهمس مُماثل : اي والله شركات وخير ، واخر شي يقول من انت .
علي وكز كتف تركي بضيق : فضحتونا .
سكت تركي وهو يسمع مانطق به انس : انس بن عايد العايد .
ابو علي بتفكير بهذا الاسم الغريب له : والنعم والله بالعايد .
نطق تركي بصدمة : لا تقول تعرف الدكتور ماجد العايد ؟! .
اتسعت عينان سيف : تخيل يعرفة ؟! .
ابتسم انس : مع الاسف بقول اعرفه ، وهو ولد عمي .
وضع تركي كفة اعلى راسة : يالله ، وش ذي الصدفه .
فهد بملامح فضولية : وش فيكم .
نطق سيف : الدكتور ماجد اللي يدرسنا بالجامعه طلع يقرب له .
ضحك علي وبتمتمة وصلت لسيف وتركي : هذا اللي كنتو بترشونه عشان ينجحكم .
تركي امال ثغره بضيق : كم مره قلنا لاحد يدري .
نطق ابو علي بملامح حنونه اكتساها الكبر : ماشاء الله ، الله يزيدكم خير .
انس بصوت رجولي مبحوح : جزاك خير ي عمي .
علي : خلصتو ؟! .
فهد رفع راسه من الدفتر الذي يُخطط فيه بمساعدة منير : اية .
علي : يلا اجل للقهوة .
حرك راسه بعدم رغبة : لا والله مشغول اعذروني .
ابو علي بحلف تعود عليه لاكرام ضيوفة : والله ماتطلع غير متغدي عندنا .
انس بعدم رغبة : لا ي عم كثر الله خيرك ، مايحتاج .
ابو علي بامر قاطعاً حديثه : حلفت انا ، يلا سيف وتركي روحو جيبو ذبيحة.
انس بنرفزه من اصرار هذا الرجل : ي عمي ابشر بس مابي الا غدا بيت . .
ابو علي اعطاه ظهره وهو يعود لداخل : ماعليه ، دامك بتتغدا .
تركي ببتسامة : اشكرك لانك انقذتنا من الصلخ بذي القايلة .
انس بغرابة : بتذبحونها انتم ؟! .
سيف هز راسة : احنا نذبحها وحريمنا يطبخونها .
انس بملامح مصدومة : شي عجيب .
تركي اقترب لسيف هامساً : شكل ابوه مدلعه .
سيف ببتسامة : انت ماشفت سيارته .
تركي بقهر : لاتقهرني زود على اللي انا فيه ، كل ماتذكر ان سيارتي كل يومين بالصناعية يجيني شلل بالمخ .
سيف يُغطي عيناه من اشعه الشمس : اقول خلنا ندخل .
تركي سار متجهاً لداخل : دامه يقرب لدكتور ماجد ، بنطلبة يتوسط لنا .
سيف : الا شفت جماله ؟! .
تركي بتقزز : السوالف ذي للحريم .
سيف بنظرات ساخره : ودي اصدقك .
وقف وهو يبتسم : انا كيف شكلي ؟! .
سيف دفعه بقوة : مسوي بتطقطق ؟! ..
ابعد انس نظره عنهم بعد ان راهم يبتعدون وباستفهام : منير وين جوالي ؟! .
منير ب اهتمام : بالسيارة ، تبيه ؟! .
انس بهدوء وهو يبتعد : خلاص بروح اجيبه انا .
..
ام مساعد : ايه وكيف كانت جده .
تهاني ببتسامة : والله حلوة و تمنيت ي خاله انك معنا ، منها تشوفين امل .
ام مساعد ترتشف من فنجانها : خليت التمشية لكم ، انا ماقلت اني اجي من الشرقية بعد اروح لجده .
تهاني وضحكتها تتقلص بعد ان رات دخول وتين .
وتين ببتسامة : حي الله تهاني .
تهاني بملامح ضيق تُقبل خدها بعد ان صافحتها : من متى وانتي هنا ؟! .
وتين : مالي ايام ، بشري كيف جده ؟! .
تهاني جلست بملامح اصطنعت فيها السعاده : حلوة ، الا وش جايبك ؟! .
ام مساعد ب استغراب : وش ذا السؤال ي تهاني ، بيت عمها وتجي متى ماتبي .
تهاني ببتسامة غيض وضعت ذقنها بين اصبعها الابهام والسبابه : ي خالة فهمتيني غلط ، بس استغربت لاني من زمان ماشفتها .
ام مساعد بصوت حازم : بس فيه اسئلة يكون مالها داعي .
وتين : ي خاله عادي سؤالها مافيه شي .
ام مساعد : الا افطرتي !؟ .
وتين ببتسامة : بنتظر البنات لما يصحون ونفطر مع بعض .
ام مساعد : اجل ماراح تفطرين دامك بتنتظرينهم ، ماراح يصحون الا الظهر .
تهاني بغيرة : ي خاله ، انا زوجة ولدك ولا سالتني افطرت ولا .
ام مساعد رتبت ع فخذها : اعرفك تفطرين مع مساعد .
وتين وقفت وهي تشعر انها غير مرحب بها في هذه الجلسة .
ام مساعد : وين ؟! .
وتين بهدوء : بروح اشوف البنات .
ام مساعد بتنهيدة بعد ان اختفت امامها : الله يعينها ويجبر خاطرها .
تهاني بفضول : وش فيها ؟! .
ام مساعد : اشربي فنجانك بلا كثرة حكي .
حركت ثغرها يميناً وشمالاً بقهر .
..
جلس في المقعد الامامي بتافف من حرارة الشمس التي لم يتعود عليها ورفع هاتفه الموضوع بالتكاية النصفيه بين مقعده ومقعد الراكب ، نظر للمكالمات التي لم يردعليها : والله مايهجد لين ارد عليه .
بعد كم رنة اجاب الطرف الاخر : انس وينك ؟! .
انس بهدوء : مشغول .
سعود : مشغول بوش ؟! .
انس بضيق : واذا عرفت وش بيصير ؟! .
سعود ب استغراب من ردة : ماراح اصدقك لو عرفت .
انس بطولت بال : والله العظيم مشغول .
سعود : طيب ، امس وين نمت ؟! .
انس : بشقتي .
سعود : بس اعرفك ماتنام فيها وهي مو نظيفة .
انس اعاد ظهر للخلف وببتسامة : ماشاء الله تعرف عني كثير .
سعود بهمس : خلنا من كل ذا ، موضوع هادي لا تنساه نلتقي الليل .
انس : وانت للحين بموضوع هادي ؟! .
اجاب بعد صمت وبهمس : انا الحين بالدوام ، في الليل نتكلم .
انس بتفكير : انا ماراح اجي الليله مشغول .
سعود : تتهرب انت ؟! .
اللتفت انس على صوت منير : ابو عايد خلصنا .
ادار مفتاح السيارة : منير ادخل لهم ، وانا بحط السيارة بمكان فيه ظل .
منير اقترب : بحطها لك انا .
انس اغلق الباب : لا ادخل الرجال ينتظرونك .
نطق سعود بتكرار : انس معي ؟! .
انزل نظارته على عيناه : والله مشغول شوي ي سعود لما اخلص اكلمك .
سعود : اوك انتظر مكالمتك .
ادخل الهاتف في جيب ثوبة الابيض وعدل شماغة، وبعينان تجول بها في المزرعه باحثاً عن مكان يُقف سيارته فيه من اشعة الشمس .
حرك سيارته لتلك الجهه تحت سعف النخل المصفوف بعشوائيه اعلى بعض الاخشاب .
ترجل من السيارة وبتذمر نطق وهو يُخرج الهاتف : يرحم والديك ي سعود وش تبي بعد .
اتسعت عيناه من المتصل وب اهتمام نطق مُقاطع لطرف الاخر : وش صار ؟! .
الطرف الاخر : استاذ انس ، والدة هادي وافقت تشوفك .
ابتعد انس مسافة قصيرة عن سيارته ووقف امام جذع نخله طويلة وبهمس : احد يدري ؟! .
الطرف الاخر : لا ، وصيتها ماتقول لاحد .
..
من اخر المزرعه عادت : هذي وين اختفت .
اللتفت ب استغراب ع الصوت المبحوح الرجالي الذي لا يُشبه صوت اي من اخوتها وبخوف همست : بسم الله .
اتجهت بخطوات بطيئة محاولة ان تكتشف من هناك ، تصلبت قدميها وهي تسمع مانطق به : لا بقنعها تفتح القضية ، الموضوع فيه قتل ، وفيه تهديد لي ولاهلي .
بغضب : والله العظيم اقتله قبل يفكر انا ماعاد قدرت انام الليل من التفكير فيه .
اجاب بضيق : ايه حطيت حرس , اثق فيهم .
اكمل بعد ثواني : اسمع ابي رقم وكيل التحقيق الجنائي راح ابلغ عن الملف اللي مع سعود عشان يبتعد عن القضية مو ناقص يدخل واحد من اهلي بعد معي .
بجمود نطق : اوك ، ابيه ب اسرع وقت .
هُناك في الخلف همست ببطء والكلمة كاد ان لاتخرج بسبب الخوف : قتل .
برجفة تملكتها غطت عيناها وعدلت عبائتها : يمة وش في رجولي ماتشيلني .
تحركت بخوف للخلف و بخطوات واسعه بدت تركض .
انس التفت بعد ان سمع صوت سقوط وبعينان اتسعت صدمة من الفتاه التي تحاول ان تنهض ، وهي تُعدو للخلف برعب ظاهر من حركات جسدها .
اغلق الهاتف وتحرك اتجاهها .
اريان مدة ذراعها وبتعته في صوتها الناعم الرقيق : ارج عع وراكك ، ولاا وقسم ب ااالله نادي تت لك كل من في المزرعه .
انس وقف مكانه : فيك شي ؟! .
اريان تُغلق عيناها بقوة من خلف غطاء النقاب الذي اخفاها وبإلم بان في صوتها : مالك دخل .
انس بهدوء رفع حاجبة : انادي احد لك ؟! .
اريان عادت للخلف ب انفاس مضطربة : اذلف وراك انت غبي ماتفهم ؟! .
تقدم خطوة للامام وب استفهام : من الغبي ؟! .
ب رجفة بانت في يديها وهي ترفعها امامه بمعنى قف : ماحد .
نظر لكفيها وب استغراب من ارتجافها وكلامها الغريب : ليش خايفة , انتي ؟!
غطت اصابعها ب اكمام العباءة : مو خايفة .
انس تذكر مانطق به في المكالمة وبخوف ان تكون سمعت شي فهذا الاهم رفع حاجبة : من متى انتي هنا ؟! .
اريان عادت ب ارتباك وهي تفهم مايرمي له : توني جيت ماسمعت شي .
انس بصدمة لم تتضح بسبب النظارة الشمسية التي حجبت عيناه : دامك قلتي ماسمعت يعني سمعتي .
وبهدوء حاول ان يستدرجها فيه : وش سمعتي ؟!! .
اريان اختفت من امام انظاره وهي تختبي خلف جذع النخله : بتروح ولا كيف ؟! .
نطق ببحة تحذير حادة قبل ان يبتعد : الموضوع اللي سمعتيه لاحد يدري فيه ، وهذا اُمر .
عضت شفاهها السفليه بملامح مُتوجعه من ساقها : مجرم ويهدد ، ي ويلي وش يسوي بمزرعتنا . .
اخرجت راسها تبحث عنه وبتنهيدة تطرد الخوف همست : الحمدلله راح .
نهضت وبخطوات مُتالمة بدت تمشي ، وقفت بعد عدة خطوات باستغراب وهي تنظر لسيارة الفاخرة امامها : حقت مين ذي ؟!.
..
فهد ببتسامة لوالدته : وش رايك متوظف امس ، واليوم مديري يتغدا عندي .
ام علي ببتسامة عريضة : الله يوفقك ي وليدي ، هذا الصح ضبط مديرك يضبط شغلك .
فهد تجول بنظرة وب استغراب : وين القطوة ؟! .
هند بخوف : مع هاجر داخل .
ريما : لا لا .
سحبت ذراعها اسيل وبهمس : والله اقطع لسانك لك .
فهد بتسائل : ماودها تجي تسلم علي ؟! .
اسيل بضحكة مُصطنعه : عاد مالها يومين شايفتك .
همست روان : وش فيها اريان ماجات ؟! .
رفعت اكتافها الجوهرة : علمي علمك .
همست نجود : اريان مو موجودة ، ولو يدري فهد قطع رقبتها .
روان بصدمة وهي تفهم الموضوع : الله ياخذكم تخيلو البنت تدخل الحين .
الجوهرة : هي اصلاً وينها ؟! .
نطق فهد بعد ان وقف : هند و اسيل ادخلو ساعدوا نجلاء بالغداء ، ولا بتجلسون كذا ؟! .
وقفت هند بتذمر : حتى وانت ماتوظف ماتغير اسلوبك الاعوج .
تنفست اسيل ب ارتياح وهي تضع كفها على صدرها : اخيراً راح .
.
.
.. نهاية البارت السابع عشر ..
.
.

ابدااااع راقي..
وفي منتهى الروعه والجمااال
كلمااااااااات من ذهب..
ومعطرة بعطور ساحرة..
لاعدمنا كل مايخطه قلمك لنا
تحياتي وعبير ودي

سلمت يمناك
طرح جميل جدا

يسلمو ع المرور

يسعدك الله على الموضوع
وعلى اختيااااره الا كثر من رووووعه

شكرا يعطيك العااافيه

نجمكم

يسلمو ع المرور

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

سلمت الآكف ومَاجلبت
إبداع دآئم وتميز مُستمر
لا عدمنَاك
قوافل شكري وتقديري لك

يسلمو ع المرور