 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
04-29-2019
|
||||||||||||||||||||||||||||||||
|
||||||||||||||||||||||||||||||||
رواية/ وأني عن بحر هواكِ نازح/البارت السادس
6
مدخل "وقال العقلُ دعهُ ولا تزٌرهُ وقالَ القلبُ فلتذهب إليهِ حديثُ العقلِ مَوضوعٌ ولكن حديثُ القلبِ مُتفقٌ عليهِ" """""""" قبل سنة نزلت من الدرج بمساعدة راكان الي صادف طلوعه جية رائد عندها همس لها وهو ساندها عليه :يعني امس تترجيني ادخل معك واليوم مُجبر ابتسمت :مو لو رضيت ودخلت وانت ساكت كان ازين جلست على اقرب كنبة مسوية تعبانة وهي اصلاً ماتبي تسلم عليه قرب راكان وسلم عليه والتفت لها :خلاص عاد ..بطلع الحين خلي أي احد يرجعك غرفتك كشرت بوجهه :بكلم امي خلاص ابتسم وطلع من المجلس متجه لشغله ناظرها رائد :أتوقع لهنا و stop خلاص يكفي خولة :على ؟ رائد :كلمت ابوي على وضع علاقتنا ..قلت له اني مابيك من مقدمته توقعت انه وافق :غريبة وافق رائد :للأسف طبعاً ماوافق وغريبة لو وافق اساساً ..لكن جا دورك ترفضيني انتي عند ابوك خولة بكذب حتى مايظن انها متمسكة فيه:وتظن اني ماحاولت ؟؟ رائد :اجل نكلمهم حنا الاثنين سوا توترت :بننرفض ..لأن سمر وسعد سووها من قبل ..اظنك تذكر وش صار بعدها تنهد وهو يتذكر :سعد انطرد من البيت وسمر سحب عمي ملفها من الجامعة ..اتذكر زين حست بقهر يوم تذكرت معاناتهم وتأملت بالمعاناة الي جالسة تعانيها لوحدها ..لو خاطرت بأي تصرف ممكن تدفع ثمنه غالي :انا مو مستعدة اتحمل خسارات بحياتي كملت بداخلها "وانت أول خساراتي" رفع راسه :يعني مضطرين نعيش فترة وحنا مرتبطين ببعض ناظرته :يب مضطرين رائد :اجل لازم يكون فيه احترام بيني وبينك وبينك وبين سحر كانت موافقة لين سمعت اسمها :عفوًا وش دخل الانسة ؟ رائد رفع حواجبه :ممكن اعرف ليش مالها دخل؟ خولة بقهر عدلت جلستها وداست على رجلها الشي الي آلمها لكن كابرت واندفعت بالكلام :مستحيل ادخل بعلاقة أكون فيها طرف ثالث ..مستحيل أكون طرف ثالث واكون مضطرة اسمع واتحمل اهانات واحاسيس غبية ..مستحيل اتركك مزهرية وماتحط حد لهالوضع سحبت نفس وهي تشوفه متفاجئ من صوتها الي رفعته لكنها كملت :رائد..المشكلة هذي انا وانت فيها ..اما ست الحسن والدلال مالها دخل ابد..لا تدخلها ولا تجيب طاريها ابدًا لوسمحت مافهم السبب ولا دخل مزاجه هز راسه :انا الى الان مو فاهم وضعك ولا قادر اشوف كلامك معقول ..فالنهاية مصيري معاها توقف بسببك خولة :مو بسببي بسبب ابوي وابوك ..لا تحط الذنب علي ..وبعدين تعال تخيل الدور عندي انا.. وعندي حبيب وجيت انا دخلته بعلاقتنا وكل موقف يصير اروح اشتكيله ويدق عليك كل شوي يسفل فيك وانت خلقة مو ناقص ..هالشي تتقبله انت ولالا سكت ..لأنه فعلاً اول ماتخيل الموقف تنرفز ..لكن مو ضروري يقتنع بكلامها لأن الدور عنده مو عندها ..اساساً مايبي يوريها انها صح لكن ضميره ضغط عليه :ممكن اقرر اذا تقابلنا سوا حست الضغط ضرب عندها :رح الله ياخذك يا شيخ ..قال نتقابل قال مارد ووقف :مارح نقدر نوصل لحل دامك مو قادرة تفتحين مجال للنقاش وقفت خولة معه وفتحت جوالها قدامه ودقت على امه وفتحت سبيكر استغراب لكن اول مانتبه للأسم فتح عيونه بصدمة خولة :السلام عليكم عمتي :خولة ؟؟ هلا حبيبتي خولة بسرعة:عمتي يرضيك ؟؟ رائد بعلاقة مع وحدة بالشغل قرب منها بسرعة لين سمع صدمة امه :منجدك ؟؟ خولة انتي صادقة خولة وعيونها بعيون رائد المصدوم :ايه ياعمتي ..اسمها سحر :اسمعي يا بنتي ..لا تشيلين بخاطرك ولا تسوين شي انا بتفاهم معه هالكلب الي سود وجهي ..طيب يمة ؟؟ لا تزعلين خولة :ياقلبي ياعمتي..ماقلت الا لك لأنك الوحيدة الي ممكن تساعديني بدون مشاكل ..اشوفك على خير سكرت منها وهي تناظره بتحدي رائد شد على نفسه قد مايقدر :اخسي اذا مديت يدي على بنت بحياتي ..لكن انتي خسيسة سحب نفسه وطلع من عندها مايبي يقعد و يذبحها نادت الشغالة وجات طلعتها غرفتها حست انها ارتاحت بعد الي سوته ..قهرها باسلوبه الغبي وخله يتعلم شلون يعاندها مشت بشويش لشباكها تبي تشوف مشى ولالا ولفتها صوت الهواش فتحت الشباك وطاح قلبها وهي تشوفه وحوله خمس او سبع اشخاص متلثمين ويضربونه شهقت من قلبها ومشت لم عبايتها متناسية الم رجلها قربت من الشباك وهي تلبس عبايتها وتناظره بخوف ورجفة انتبهت لواحد طلع من جيبه سكين صرخت من قلبها :راااااااااااااااااااااااااائددددد انتتتتببببببببببببههه مامداه يلف وراه الا اثنين يمسكونه وواحد طعنه بقوة وانحاشو حس روحه طلعت مع طلوع السكين طاح على الأرض وهو يحس بدوخة والم فظيع الدنيا تدور حوله وهو يشوف السما فوقه وشباك بيت عمه ووحدة تصارخ فيه نزلت خولة وهي تركض ماتدري شلون ..تركض ومع كل خطوة تركضها كانت تدعس على وجعها ولا تفكر فيه طلعت من البيت وطاحت بجمبه سحبته فوق رجولها برجفة وصياح :ررااائد ..رااائد حرك عيونه عليها وماهو قادر يتجاوب معها حطت يد على جرحه واليد الثانية تحاول تلف وجهه وتخلي تركيزه عليها :تكفى ناظرني ..تكفى ركز معي ..تكفى رائد لا تروح تكفىى فتح فمه بيتكلم بس خلاص غاب عن الوعي صرخت من قلبها بوسط الشارع وطلعت الرجال من بيوتهم على صوتها راكان وابوها ماهم موجودين ولاحد قريب منهم جا الإسعاف واخذوه واخذوها معه كانت بجمبه وغرقانة بدمه تشوف الدكتور وهو يحاول يسعفه لين يوصلون المستشفى وبالطريق كلمت راكان بعد ما اخذت جوال المسعف وهي ترتجف وصلوا المستشفى ودخلوه الطوارئ وهي قعدت فالانتظار جات الشرطة الي استدعتها المستشفى وحققوا معها ..شرحت لهم كل شي وهي مرعوبة وخايفة ..من الي تجرأ يطعنه قدام بيت عمه قدام بيت ولد عمه الضابط رجعت جلست قدام غرفة العمليات وهي تشوف رجفة يدها الي مصبوغة دم حاسة قلبها بينفجر من قوة الدق والخوف كل ماتتذكر شكله وهو طايح بين يدينها بكل ضعف تحس بالموت سمعت صوت راكان جاي من بعيد فزت ناحيته وركضت له وهي تبكي من جديد رمت نفسها عليه وهو لمها له بحضنه وقلبه طايح من الخبر الي صدمه اخذها وجلس على اقرب كرسي انتظار منهم وشد عليها شوي لين تهدى بعدها عنه وهو يشوف كيف مرعوبة والقهر ماكل قلبه :صارلك شي ؟؟اذوك ؟ هزت راسها بالنفي وهي تصيح :لااا ..انا شفتهم وهو يطعنونه من الشباك ..ورحت لهه ..كااان بيموووتتت يا راكانن تنهد ورجعها بحضنه خرج الدكتور من غرفة العمليات وفزت هي مرة ثانية ناحيته قام معها راكان الدكتور :الحمدالله أعضائه سليمة والطعنة جات بمنطقة مو خطرة ..بس يفوق ونتطمن عليه وراح يمديه يطلع ارتاحت وراكان تطمن شوي وخرجوا سريره من غرفة العمليات راحت له خولة وهي تبي تتطمن اكثر شافته نايم ووجه شاحب بهاللحظة جو العساكر لراكان يأخذ منهم التفاصيل بينما خولة راحت مع رائد لغرفته دخلوه الغرفة وضبطوا وضعه وخرجوا دخلت خولة الحمام غسلت يدينها ووجهها وطلعت له مرة ثانية جلست بجمبه وهي تتأمله وتنتظره يقوم مرت ربع ساعة لين فتح عيونه بهدوء فزت :رائد ؟؟ رائد تسمعني ؟؟ انت معي؟؟ رفع عيونه وناظرها :خولة ؟؟ حست نفسها راح تصيح مرة ثانية مسكت نفسها بقوة :شلونك الحين ؟ انادي لك الدكتور هز راسه بالنفي :ابي موية بس بسرعة اخذت موية وقربت منه بتشربه مد يده واخذ الموية :مانشليت ترا اعرف اشرب رجعت جلست مكانها :مالت عليك شرب ورجع عطاها القارورة :لما شفتيني انطعنت ليش طلعتي وراي؟ ممكن اعرف ؟؟ خولة رفعت حواجبها من كلامه :قلت اطلع أتصور معك رائد بجدية: أتكلم صدق ..كيف لو كانوا الكلاب باقي موجودين واذوك ولا قربوا منك ؟؟ خولة ببساطة :بس ما اذوني ولا قربوا مني غمض عيونه :ثاني مرة لا تتصرفين من راسك مهما كان الوضع ..اتصلي بالشرطة بالاسعاف براكان باللي هو بس لا تعرضين نفسك للخطر فرحت ..حست انه خايف عليها لين قال :عمي حطك عندي امانة ..مابي يصير لك شي ويزعل عمي تحطمت بس ماهتمت ..اهم شي انه بخير ..وقفت :برجع البيت ارتاح شوي ..من طحت وانا واقفة على رجولي الله يستر رائد :هاتي جوالي بدق على سحر ودها تصفقه حرفيًا :مادري وين جوالك ضغط على زر استدعاء الدكتور :خلاص بكلمهم يشوفون وينه ..هاتي جوالك اتصل عليها منه خولة :مبلكتها انا رائد ببرود :شيلي البلوك خولة :مع نفسك رائد :خولة ؟ خولة :رائد ؟؟ انت بعقلك ولا باقي تعبان مارد عليها وسكت :خلاص روحي بيتكم فكيني بهاللحظة دخل راكان :السلام عليكم ناظره رائد :وعليكم السلام راكان :الحمدالله على السلامة ..ماتشوف شر رائد :الشر مايجيك راكان :وش صاير ؟ من الي تسبب لك ؟ تعرفه ؟ رائد تنهد :قبل مانطعن قالي سلم على مطلق ومعاذ ناظر راكان بخولة :امشي اوصلك البيت ..وبيدخل عندك المحقق يأخذ منك التفاصيل ..بوصل خولة وبرجع لك هز راسه وطلعت خولة مع راكان راكان :انتي مجنونة تطلعين له يوم شفتيه انطعن ؟ خولة :اصص متحسفة انا اصلاً ليتي تركته يموت التفت لها باستغراب :وش حقه الصياح والنياح الي تو ؟ خولة بقهر :حمار يقولي ليش طلعتي لي؟ راكان :وهو صادق خولة :مالت عليكم كلكم وعلى الي يخاف عليكم راكان :لا تخافين بناخذ حقه وحق خوفك عليه ..تطمني """""""""""""" بالمزرعة دخل للبوابة اول مانتبه لخورشيد طلع من غرفته دخلها واخذ مفتاح الملحق وطلع مرة ثانية وتخبى لين جا العامل الثاني واخذ النوبة عن خورشيد مشى ناحية الملحق بهدوء وفتح الباب دخل بهدوء وسكر الباب وراه فتح النور وهو يمشي بهدوء يدور عقيل عقيل الي حس بدخوله توقعه خورشيد لين شافه قدامه يناظره بتفحص وقف بربكة :من انت ؟ :انا الي بطلعك منها ..بطلعك للعالم الي ماقد شفته قطب حواجبه :تعرفني ؟ هز راسي :ماعرف الا اسمك ياعقيل ماهتم :كيف بتطلعني ؟ مد يده :هات يدك ..بننحاش ركض عقيل :ماقدر انحاش..صقر وامه هنا اتركهم ناظره باستغراب :منهم صقر وامه ؟ عقيل :خيولي قرب منه يبي يفهمه :بننحاش عن المزرعة بشكل مؤقت ..لكن لين يكتشفون من انت ..وقتها بترجع لصقر وامه بكيفك وبدون ماتضطر تتخبى هنا ناظره بحيرة :ليش تسوي كذا ؟ ابتسم بخفة :انا مارضى اسكت عن الظلم ..توقعت سالفة وجودك كذب لين طلعت صدق عقيل:مافهمت ؟؟ :مو لازم تفهم الحين ..امش معي حس بتردد تلفت يناظره اغراضه واغراض امه الي مكونة من ملابس مهترئة اضطرت تعيش فيها مدة تسع سنوات معه وملابسه هو الي كان البيق بوس يغيرها له باستمرار بسبب كبر جسمه مع الوقت التفت للكرتون الكبير الي مليان دفاتر واوراق والي كانت امه تحارب أُميته وتعلمه من قلبها كل شي تعرفه التفت للألعاب الخشبية الي اخترعتها له ناظر بالشخص الي يبي ينحشه :ممكن اخذ الكرتون هذا معي؟ هز راسه بالنفي وهو يناظر ساعته :لا مو ضروري ..انا بجيبه لك بعدين عقيل:اجل لا شكرًا ..مارح انحاش ..هالكرتون ان ماطلع معي مستحيل قاطعه بنفاذ صبر ومشى ناحية الكرتون وشاله معه :خلاص باخذه يلا امش ركض بسرعة ناحية وحدة من قمصان امه وحطها بالكرتون :انا اعرف مكان ممكن نهرب منه ..او نتخبى لين المناوبة الثانية ويمدي ننحاش رفع حواجبه :شلون دريت ان المناوبة الأولى كانت قبل شوي؟ عقيل بذكاء :شلون دخلت اجل ؟ بس للاسف العمال بعد ماحاولت انحاش امس بيركزون بمناوباتهم حس طارق بقوة نباهته بالنسبة لشخص محبوس بهالمكان من وقت ماوعى على الدنيا ..واضح عقله نظيف :طيب طيب ..يلا قبل يحسون """"""""""""" بعد الظهر رجع من دوامه ووقف قدام البيت واتصل بودق :يلا انزلوا نزل معاذ هو ومعتز ونزلت وودق وراهم وهي يديها بيد جدتها ركبوها قدام وركبوا الثلاثي ورا منذر :وشلونك يمة -اخذ يدها وحبها ام معاذ :بخير ياجعل عيني ماتبكيك ناظر من المرايا بمعتز :شلون استعدادك لللسمستر الجاي؟ معاذ :ماشالله اكل كتابين باقي واحد معتز مارد عليه :زين الحمدالله ..متحمس منذر :عاد لا اوصيك ابي كل سمستر معدلك يكون 4 نفس الي فات ودق :لاحظت شي التفت لها معاذ باهتمام :وشو ودق :انه سبحان الله معتز دفارته اعلى من دفارة الانسان الطبيعي ..الـ قاطعتها ام معاذ :قولللي ماشاللله لا تنظلين الولللد ضحكت ودق :ماشالله ماشالله ..تعال اتفل عليك بعد ضحك بقرف :انقلعي معاذ:كملي كملي وش لاحظتي ودق :المهم انه ..انه ماخذ حتى نصيبك من التفكير الإنساني والحياة الإنسانية معاذ بتفكير:الا صح ملاحظ معتز بنص عين :قل اعوذ برب الفلللقق منذر :أقول انتي وهو ..مالها دخل الدفرة ..السالفة بالرغبة والمثابرة والإصرار ودق :لا فهمت وش السبب معاذ وهو مسوي مهتم :وش السبب ودق :دم ابوهم لا اله الا الله معاذ :أي والله مافيه جمال لكن الدماغ ابن كلب ودق :صح ولا قلي من الي بتناظر بمعتز ..نظرة من عيونك الرمادية بتذبحها معاذ :أي والله ..الحمدالله على عطايا الرحمن معتز :ودي تسكتون لين نوصل منذر:الظاهر ودق تبينا ننزلها وتكمل كعابي ودق :نمزح يا شباب شفيه معاذ :الصراحة توجع ودق :صح ..المزحة لامست الواقع شكله معاذ :شفتي تكلمت عن جمالي انقهروا ..حتى عقولهم بها بلا ام معاذ:والله عيالي كلهم حلوين من امك الله يرحمها لين معتز وليدي ناظر معاذ بودق :نفس المثل الي افكر فيه ؟؟ هزت راسه ورفعت يدها بمعنى كفك رفع كفه وصفقها بيدها ام معاذ :قليلين ادب انت وهي ودق ببراءة :وشو يمة ؟ ام معاذ : اسكتي لا انادي لك طارق الحين انفجر معاذ ومنذر ومعتز ضحك على كلمة ام معاذ ودق انقهرت :يمة شدعوة ..ماصرت أخاف منه ام معاذ :اصا ..اذكرك يوم تجين وانتي شفايفك بيضا من الخوف بس اذا سمعتي حسه ودق :طيب؟؟ ترا عادي الحين مرة منذر:الا صادقة ..امس يوم جيت اخذها شفتها تسولف معه وعلى وضعه يمزح معها بدفاشة استغرب معاذ والتفت لها :وش صار ؟؟..ليش ماقلتي لي ودق برد وجهها ..ماودها تقول ..بس بسرعة صرفت :عادي بعد ماقلت لهم انا ماعاد بجيكم ..لحقني يقول انه من حقي وانا توي اعرف بالورث وماعرف ايش المهم كلمة مني كلمة مني وعوج يدي رفع حواجبه وماعجبته الحركة :خير ان شالله ؟ ماهتمت لردة فعله :عادي يمزح ..اخر مرة اشوفه ان شالله مارد وناظر بالطريق وقف منذر قدام المطعم :وهذا المطعم وصلناه نزلوا من السيارة ودخلوا استقبلهم الويتر لأن منذر حجز من اول ووصلهم لطاولتهم ..كانت غرفة منفصلة دخلت ام منذر وفتحت نقابها ووراها ودق الي فكت لثمتها وجلسوا على الكراسي جلست ودق بيمينها معاذ وبيسارها منذر واخذوا المنيو يشوفون وش يطلبون ودنقوا الثلاثة على المنيو اما منذر خذا المنيو الثاني وجلس يفرج ام معاذ عليه ودق :شوف ناخذ اللازانيا والفوتوشيني ..مع سلطة سيزر اوفف معاذ :لازانيتهم مالحة ..ماتنمدح ..لكن شرايح الدجاج الي مع الفوتوشيني كانت شي خيال معتز :ايه صح ..بدال اللازانيا خذي ديناميت شرمب ودق :لااا ماحب الشرمب معاذ :غبية فاتك نص عمرك ودق :خل يفوتني ولا اكل هالحشرة معاذ :استغفرالله ..يابنت نعمة معتز :شوفوا شرايكم بذا برياني ودق :للااا ..ماودي بهارات وفلافل معاذ استغرب :البرياني فيه فلافل؟ معتز استغرب هو بعد ورفع راسه لأمه :يمة البرياني معه فلافل؟؟ استغربت هي بعد :لا طبعًا ودق :يا اغبيا اقصد جمع فلفل معاذ :لاحول ولاقوة الا بالله..خلاص ياتبن اعلفي أي شي وفكينا ماغير تتشرطين ودق :خلاااص ابي بس فوتوشيني ..كنت اقصد نطلب سوا مو نتشاور على طلب كل واحد معتز سحب المنيو :هاتيه يالدايخة عطته ومسكت جوالها على مايطلبون يخلصون انتبهت لإضافة بالسناب كان اليوزر طارق محمد ..زفرت بضيق منه ضافته هو بعد وهي عاجزة تحدد شعورها تجاهه هل تخاف منه هل عادي هل هو طيب هل هو خبيث ..ماقدرت تفهمه راحت فتحت لستة الناس الي مبلكتهم وشالت البلوك عن البنات العنود وسمر ونور وحورية ..لان خلاص ماصار يربطها فيهم شي الحين صورت الطاولة الي قدامها ودخلت شوي من معاذ فالصورة عشان يصير فيه مناسبة لتعليقها وكتبت "اللهم خوالي لأخر العمر" وارسلتها شوي وجا الويتر اخذ الطلبات ومشى وجلسوا يسولفون منذر غمز لمعتز :ودق شقلتي تبين قبل كم يوم ناظرته وهي ناسية :وشو ؟؟ ابتسم وفتح المنيو الثالث الي ماحد فتحه وطلع منه ملف وحطه قدامها وابتسم :افتحيه استغربت ..اخذت الملف وفتحته شافت شعار نادي نسائي..دق قلبها وطلعت الورق الي فيه كان اشعار بتوظيفها بالنادي ..مشرفة رفعت عيونها بصدمة لمنذر ورجعت تقرا مرة ثانية مو مصدقة :اوميقاد ماصدق صفر معاذ :باااقي ماشفتي شيي رفعت راسها :وشووو ..اجلطني ضحك على كلمتها وطلع من بوكه بطاقة :اخيرًا بعد نقاشات طويلة بيني وبين عبداللطيف-رمى بطاقة ناحيتها-رخصة قيادة شهقت بصدمة :اماااانة؟ ضحك على ردة فعلها ..لها ستة شهور متخرجة من مدرسة القيادة بس عبداللطيف كان رافض ويبدوا انه بعد اخر مرة سمح خلاص حسته هي عربون اسف على أفعال عياله معها معاذ طلع من جيبه مفتاح الاسبير حق سيارته :وبهذي المناسبة ..هذا مفتاحي ..استخدمي السيارة وقت فراغي منها ودق استغربت:يمة ..معاااذو من متى ابتسم :من نبل أخلاقي حست بمشاعر السعادة توصل لأعلى ليفل وقفت وراحت لمنذر وسلمت عليه وحضنته وراحت لمعاذ الي استحى :أقول شقلبي مناك بس ودق ضحكت:وخر أقول بسلم على جدتي ضحك معتز على فشلته وخر عنها ودفها برجله بس طنشته وراحت لجدتها الي سلمت عليها :ياحبيبتي ونور عيوني ..الله يحفظك ويطول بعمرك ويبعد عنك عيال وبنات الحرام ..الله يقر عيوني بشوفتك وشوفة عيالك يا حبة عيني تعشق جدتها اذا قالة ياحبة عيني حضنتها من قلبها ومن قلبها تدعي ان الله يحفظهم لها لأنهم هم سبب مقاومتها للحين اندق باب الغرفة منذر بابتسامة:وصل الاكل ..خلاص ارجعي """""""""" كان لها أسبوعين ببيت أهلها واليوم بترجع بيتها نزلت من السيارة مع عيالها ودخلوا البيت ركض ولدها ماهر ووراه اخوه ثامر للمجلس وهو يصارخ وينادي ابوه ووراهم اختهم سيرين طلعت العنود لغرفتها تشيل عبايتها وترتب نفسها عشان تنزل تسلم على عمها ومرته ناظرت لنفسها بالمرايا ..لابسة فستان شيفون ابيض مشجر بأخضر ومزموم من تحت الصدر واكمامه لنص الذراع بخت من عطر ديور أصفهان ولبست سليبر البيت ورجعت مرة ثانية قدام المرايا تشوف شعرها شلون وعدلته شالت الفرقة وخلته كله على جمب وطلعت من الغرفة مرت من عند غرفة خولة ودقت الباب وسمعتها تقولها ادخلي دخلت :السلام عليكم كانت خولة على سريرها ماسكة جوالها :هلا هلا قامت لها وسلمت عليها :شلونك ..وراك طولتي العنود :والله كنت تعبانة وانلفونزا ..قلت لا اعديكم ..احسن لي اقعد ببيت اهلي لين اطيب خولة :زين ..شلونك الحين طيب العنود :لازينة خولة :طيب مشينا ننزل ..ابوي وراكان يتقهوون تحت مشت معها العنود ونزلوا للمجلس دخلت العنود :السلام عليكم التفت لها عبدالطيف :هلا ..هلا ..تو مانور البيت يا ام ماهر ابتسمت على ترحيبه وقربت منه سلمت عليه وحبت راسه التفتت لراكان الي كان ماهر وسيرين بحضنه وثامر ركض لخولة الي تحبه وتدلعه قربت منه تبي تسلم عليه ترك عياله على جمب وقام سلم عليها صافحها وحب خدودها بهدوء وجلس لعياله الي رجعوا لحضنه جلست قريب منه وقامت خولة تقهويهم خولة وهي تناول ابوها الفنجان :شفت سناب ودق يبه ؟ عبداللطيف:لا ..مامسكت جوالي من الصبح ..وش صار خولة :خالها طلع لها رخصة السواقة راكان من دون مايحس :#### شهقت العنود لأنه سب قدام عيالها عبدالطيف انقهر من عصبيته ..لكن مابيده شي يردعه ..ترن بباله كلمة منذر "كلمتك ماصارت مسموعة" سحب نفس وثبت عيونه بعيون راكان :انا وافقت يصدرها لها التفت لأبوه بضيق:يايبه مايكفيك أمها ..بعد تفتح لها باب ثاني تفضحنا فيه العنود حست بغيرة من ودق كونها اول من بيسوق .. التفتت لخولة الي متحسفة انها تكلمت قدام راكان :تبين تسوقين يا خولة خولة رمشت لها :رئودي موافق شدت الضيقة باراكان ..ابد ماكان ناقص طاريه ..خصوصًا وعلاقتهم متوترة بعد ماعرف عن مدة يده على العنود ..وقف :انا طالع اريح بغرفتي وقفت معه العنود ولحقته بعد ماطلع التفت عبدالطيف لخولة وهو فاهم عليه :متى كلمتيه خولة :ولا فتحنا السيرة ..بس راكان لازم يفتح مخه المسكر ذا شوي ..لين متى بنقعد نقوله العالم تغيرت مارد عليها وركز بفنجاله وهو يتذكر جيات منذر له بوقت شغل راكان وإقناعاته المستمرة بإنه يترك وصايتها فعليًا له لكنه كان يرفض كونه خالها الغير شقيق وخالها معاذ الشقيق ماهو بكفو وصاية دخل راكان غرفته ودخلت وراه العنود التفت لها بضيق :وش الي وصلنا لهالحال ؟ رفعت حواجبها :انت ..يدينك الي مديتها ولا احترمتني ولا احترمت ابوي ولا احترمت الدم الي بيننا تضايق من كلامها ..:رجاءً العنود !! العنود بقهر:تظن انك بعد ماطفيت عصبيتك علي ..كان الموضوع بيوقف انت بترتاح وانا بانسى ؟ انا مانسيت وعمري مارح انسى ولا ارضى ماحب نبرتها قرب منها :العنود !! العنود بنفخة :نعم !! راكان :كلي تبن وعساك مارضيتي ..اخر مناي والله تنرفزت منه :طلقني ابتسم بسخرية :وانا اقدر؟؟ رفع ضغطها بإبتسامته :جعلك تحس بقهري في خولة ..جعلك تذوق ضيمها اختفت ابتسامته ومارد عليها ..لف عنها وطلع من الغرفة :الله يسد نفسك يشيخة توقعته بيصفقها بس صدمتها ردة فعله مشت لسريرها وجلست وهي تفكر بكلامها له ليش ما قالت سمر ..الي تعاني بسبب بنتها ..ليش قاعدة تحسد خولة الي مثل ماهي شايفتها مبسوطة ..كارهة هالفكرة """"""""""""""" مانام من التوتر ..خاف يدخل احد الاسطبل ويشوفونهم بينما عقيل نام براحة بعد ماشبع من خيله الي اسمه صقر ناظر بالساعة ..كان قريب العصر وقت المناوبة الثانية حسب ماخبره عقيل ..لأن الي يروح ينام يقوم قبل مناوبته ويسوي الاكل ..فأكيد خورشيد قاعد يسوي الاكل هو والي معه الحين والمناوبين تعبانين ناظر فيه شلون نايم ..قرب منه وصحاه بشويش :عقيل ..عقيل ؟؟ فتح عيونه باستغراب وناظر فيهلين استوعب وتذكر قام من سدحته وهو يفرك عيونه :توقعتك حلم ابتسم وشال الكرتون:يلا ..ورنا شلون نخرج الحين مشى قدامه وهو يتلفت كل شوي :من البوابة الشرقية ..راح نضطر نمشي بعدها مسافة طويلة حتى نوصل الشارع العام طارق :الي اعرفه انك محبوس من وقت ولادتك ..وش الي عرفك بالشارع العام عقيل :امي سولفت لي عنه في حال قدرت انحاش وخورشيد يسولف لي عن يومه ويجيب طاريه مع الكلام ..ومع طلعاتي للأسطبل انتبهت له طارق :مارح اتعب معك دام استعيابك سريع لهدالرجة عقيل :ليش تتعب معي طارق :عشان ارجع لك حقك وحق امك ..ولا ماتبي عقيل بشك:انت تعرف سالفتي ؟ طارق :قبل سنوات ..سمعت سالفة المفروض ما اسمعها ..ماصدقتها لين شفتك عقيل :وش السالفة طارق ابتسم :لا مو قايل لك لين اتطمن عليك وعلى تفكيرك عقيل مارد ..اهم شي بينحاش وشوي شوي بيفهم كل شي """""""""""" قبل ست شهور مرت حول الشهرين ومابينها وبين رائد كلام من بعد مانطعن وخافت عليه وصدها بذيك الطريقة ..كرهته جدًا بالمجلس أبو راكان لخولة :وينه رائد ماشوفه يسأل ولا شي ناظرته خولة وماردت رفع حواجبه :خولة اكلمك خولة بنفخة :اثنين مجبورين على بعض وش تبي منهم ؟ سكت ومارد عليها وقفت :يعني فوق اننا ساكتين على هالضيم بعد تبينا نمثل قدامكم السعادة رفع صوته :خـــــــــولـــــــــــــــة جمدت مكانها من صرخته ونبرته وبدون ماتلتفت :سم كان راكان قدامها يناظر ابوه بجمود غمضت عيونها بربكة والتفتت له :سم يبه أبو راكان :وش الي اسمعه توترت :ولا شي يبه ..لا تشغل بالك رفع حواجبه : ماتبين رائد ؟ دارت عيونها باللي في الغرفة ورجعت تناظره :لا موكذا ام راكان بضيق :اتركها يا عبداللطيف مارد عليها وعيونه ثابتة بعيون خولة خولة :تهاوشنا ومابي اكلمه ..مافيه شي كايد أبو راكان :دقي عليه اجل وسمعيني استغربت:الحين ؟ هز راسه بإصرار :ايه ..يلا سمعيني رفعت جوالها وبربكة فتحت الواتس وكتبت "ابوي جمبي" ودقت عليه وفتحت سبيكر رد بدون مايشوف وش أرسلت :هلا خولة بسرعة :ابوي يبي يسألك فتح عيونه فيها واشرلها تسكت ناظرته بترجي وطنشها رجعت تكلمه :ابوي يحسب بيننا شي على اخر شي ارسلته واتس حس بكلامها المخربط وفتح الواتس وشاف رسالتها فهم انه عمه شاك فيهم ابتسم بخبث :ايه ترا للحين زعلان كلمتك قوية علي ..ماتسوى علي نبي نطلع ونستانس خولة فهمته يبي يرد اتصالها بأمه:بس انا قلت ابوي مارح يوافق شسوي ماتفهم انت رائد :وانا قد قلتلك ان راكان والعنود طلعوا قبل وحتى سعد وسمر ..يعني انتي تتغلين مالت عليك خولة :ما اتغلى وكلامي واضح رائد :الله يسامحك ..بس أتمنى المرة الجاية ماتخورينها وانتي تتكلمين معي غمضت عيونها ..ابوها بيذبحها الحين"والله اوريك":انت استفزيتني ولا احد يقول لبنت عمه مو زوجته يابنت الكـ###!! بعد انا ما ارضاها على ابوي شهق من كلمتها :انا قلته ؟؟ قلته للقطوة الي مر قدامي وانا اسوق خولة :ياشيخخخ رائد بإنفعال :والله العظيم ..ماني كذاب خولة شافت ابوها مشت عليه وجلس يسمعهم عادي:خلاص طيب اشرت لأبوها وسكرت السبيكر وطلعت من المجلس :والله انك حمار وماتستحي ضحك من قلبه :انتي الحمارة ..خسارة كان ودي احضر السالفة لايف خولة بقهر :ماااايضحححككك أستاذ رائد رائد :مو شرط يضحكك خولة : والله شك فينا ..خلاص شف حل تراي مليت تغير صوته :وش رايك نكمل ؟ استغربت :نكمل ايش؟ رائد :زواجنا ..الي قاعدين نسويه خطر ومو بصالحنا رفعت حواجبها :قل الصدق وش صار بينك وبين سحر ؟ رائد بضيق : We broke up خولة :لا والله ؟؟ نكمل عشان الي تحبها تركتك ؟؟ بكرا تصالحك وتجي تقول خلينا نتطلق ؟ رائد :انا مارح ارجع لها ..لو تموت خولة :شدعوة ..شسوت لك ؟ رائد :من انطعنت وهي مطنشة إصابتي ومركزة عليك ..شسويتي ووين رحتي وغير كذا امي حلفت برضاوتها ما اكلمها استغربت وطنشت جزئية امه:وش الي مركزة علي ..مافهمت سكت ثواني :عندها سنابك وانستقرامك وتويترك خولة عصبت:من وين طلعتهم ؟ رائد :اخذتهم من حساباتي وحسابات العنود انصدمت :هي تعرف العنود ؟ رائد بسرعة :لا انا متابع العنود بتويتر والانستا وهي دخلت لمتابعينها وطلعت حساباتك سحبت نفس :رائد ..الحال الي وصلت له اوفر رائد :انفصلت عنها يوم اكتشفت انها مو كفو ..خولة انا ابي قاطعته وقلبها معورها من نطقه لإسمها دخلت غرفتها :رجاءً رائد ..انا انسانة ماني مفتاح سبير متى ماضاع الأساسي ولا ماعاد ينفع تطلعني من درجك ..غير ان حت انفصالك مو بكامل إرادتك رائد :خولة خولة :رائد !!..تذكر يوم الملكة ..رميت انا كل شي ورا ظهري -وبكذب-إجبار ابوي وعمي وعاداتهم وقلت ابدى معك بتفاهم ..لكن انت قلتها بوجهي بأسلوب مو حلو بحقي كبنت عم لك ..وبعدها انتهكت خصوصياتنا ودخلتها بعلاقتنا كطرف ثالث وكنت بصفها وهي غلطانة وتركتها تغلط بحقي وسكت ..تبي بعد هذا كله ..اجي اطبطب عليك بخسارتك ؟؟ اذا انت بسبب نزوة ماهتميت شلون بزواج ؟؟ معليش رائد انا على رايي وسكرت بوجهه بخوف من كلامها ..الي ينافي كل شي بقلبها ..مشت ورا عقلها وكرامتها داست على أبو علاقتهم الغريبة جاتها رسالة منه "سوري ..امر بأثار الانفصال ..اعذريني اذا كلامي الي ما اقصده اذاك ..لنا تفاهم بكرا" ماركزت الا على كلمته "كلامي الي ما اقصده" رمت الجوال بقهر..يوم قالها نكمل سوا قلبها المجروح فرح ..بس الحين بتدوس عليه اكثر وراح تمشي ورا عقلها مهما صار اليوم الي بعده رن عليها رنة ..انه تحت بالمجلس نزلت بلبسها ولافكرت تكشخ له كانت لابسة ترنق وتيشيرت اصفر ولامة شعرها أي كلام وبيدها كوب قهوة دخلت المجلس :السلام عليكم التفت لها :وعليكم السلام ورحمة الله حطت الكوب على الطاولة وقعدت واقفة ماسكة جوالها رائد : لذي الدرجة جيتك بوقت غلط؟ خولة التفتت له:لا عادي ليش؟ رائد :لا بس شايفك جاية وانتي حايسة ..اول كنتي تجين وانتي على الأقل مرتبة خولة :عشان اول كنت اطلع لزوجي ..الحين انا طالعة لولد عمي الي علاقتي فيه مؤقتة رائد برفعة حاجب :يعني اول كان لك امل اننا نكمل خولة:لا تفسرها ..بس اني مليت من التصنع الي على غير سنع ومابستفيد منه رائد :اها..طيب اجلسي ابي اكلمك جلست وحطت رجل على رجل :وشو رائد :ابي نحط حد ..ابي نحترم بعض قاطعته :انت الي بديت بقلة الاحترام رائد :مو مشكلة نفتح صفحة جديدة ..اعطيني فرصة سكتت كمل :اوكي ؟؟ نبدا من جديد وجست فريند ..لين نلقى حل ..اهم شي مانتهاوش ومانتلاسن نكون نساعد بعض ماحبت الفكرة ..تخاف تميل له وهالشي ماتبيه:اتركني افكر .. انزعج من كلمتها :تفكرين بإيش؟؟ ابعرف صدق تفكرين بإيش؟؟ خولة بحدة :افكر بكرامتي مافهم عليها :الله يشفيك ..انا باخذك على قد عقلك ومارح اتناقش معك ..مجرد اني بزورك زيارات خفيفة لين نلقى حل من هالغثى وقف وبدون مايطالعها طلع من عندها انقهر من قلب فتحت جوالها على رسالة بالواتس من لطيفة بنت عمتها بدون تفكير دقت عليها :لطططفف انقذذيييييييييينييييييي استغربت لطيفة :وعليكم السلام ورحمة الله ..الحمدالله بخير شخبارك ضحكت :والله سوري ..والله اني بورطة مايعلمها الا الله لطيفة :خير اللهم اجعله خير قامت من مكانها طالعة غرفتها :انا ورائد تنهدت لطيفة :تحبينه ومايحبك ؟ استغربت :يعني حلالة مشاكل العايلة ايه بس بعد منجمة!! ضحكت :والله واضح ..انتي تستحين عند طاريه وهو مادري بس خمنت خولة :حتى لو استحي المفروض مايوضح لطيفة :تستحين من الطفش يعني ؟ خولة :لا صدق -زفرت-خلاص انتي الفايزة ايه صح لطيفة :طيب ..وش صار بالضبط ؟ تبينه يحبك خولة :لا يع عفته خلاص ..اصبري بحكيك من البداية للنهاية ربع ساعة وقالت لها كل شي بالتفصيل لطيفة :لا صدق مشكلتك عوجا ..تعالي جاوبيني بصدق ..تحبينه ولالا ؟ خولة :قلبي ايه عقلي لا لطيفة :لو مشيتي ورا عقلبك فقلبك بيوجعك وبتحسين بفراغ مهما صار..لو مشيتي ورا قلبك احتمال تتجحفلين من رائد وعقلبك بيأنبك وبتحسين بالموت زايد ان قلبك بيكون مكسور خولة :شكرًا الله يبشرك بالجنة لطيفة :عشان كذا ابي الصدق ..بعيد عن الي بينكم كله تبينه ولالا خولة :ابيه بس هو مايبيني وهذي مشكلة لطيفة :سهلة ..خليه يحبك ..ترا سهل تحببينه فيك خصوصاً وهو توه منفصل ..لا اراديًا يبي الي يداويه وينسيه خولة :بس ماقدر ..ماقابله كثير ..والسوسة زميلته بالدوام لطيفة :وانتي بتتركين لها الخيط والمخيط ؟؟ اسمعي كلامي وصدقيني بترتاحين خولة ترددت :وش كلامك ؟ لطيفة :اول شي اقبلي اتفاقه """"""""""" الوقت الحالي وقفت عند الباب :يعني ماتبونها تعرف انه مباحث منذر :بالضبط ودق :سهلة ..ان شالله بس تكون كويسة مب زبالة منذر:بتشوفك بنت مثلها فأكيد بترتاح لك خصوصاً وهي متغربة عن أهلها هزت راسها وطلعت من البيت نزلت من العمارة وانتبهت لعمر واقف عند سيارته لفتها ستايله الغريب انتبه لها ونداها فتحت عيونها :اغطي ترا قرب منها :اوكي اسفين بس بنبهك ..اذا حسيتي وضعها غريب اتصلي بمنذر وهو بيتصرف ..واصبري عليها تراها كملت :متغربة عن أهلها ..ماعليك تو منذر مسمعها لي ابتسم :زين ..انا رايح انتبهي لنفسك ناظرت كيس الشبسات الي بيدها محسسها انها رايحة تحارب طلعت شقته ودقت الجرس سمعت صوتها الخفيف :مين ؟ ودق :انا جارتك ..ابي اتعرف عليك فتحت الباب باستغراب :اهلًا دخلت بابتسامة وشالفت لثمتها :يوه برا حر ..ذبت خلاص ماردت ولا أبدت أي تعابير وهي مستغربة منها :تبين شي؟ ودق ناظرتها :اتعرف عليك ! زين :سوري بس زوجي مو موجود وماقدر ادخل احد بدون اذنه ودق :ماعليك تو اخوي كلمه عند الباب ابتسمت لها واشرت لها على الصالة :حياك دخلت الصالة وفصخت عبايتها وناولتها لزين مع الكيس جلست وهي تهوي نفسها من الحر :والله ماكنه شتا ابتسمت زين وماردت ناظرتها ودق وبدون مقدمات ..لأن الوضع مو محتاج رسميات :ايه وش اسمك كم عمرك ..هاتي علومك زين :اسمي زين عمري 19 سنة ..ابد متزوجة وقاعدة ببيتي لا اطلع ولا اجي ودق :شدعوة زوجك حابسك ؟ زين ماحبت تبين:لا الحمدالله..بس مليت من الخروج ودق :ماعندك دوام ؟ زين :لا ..كنت بالجامعة ومليت منها وطلعت ودق :اها ..انا عن نفسي ماسجلت صراحة ..قلت بقعد ببيتنا منسدحة ابرك لي ..كويس نتشارك بشي زين :ليه ماسجلتي بالجامعة ؟..احس كنا مانصدق نتخرج من الثانوي عشان جو الجامعة والحرية الي فيه ودق :مابي ادرس بعد ..احس ابي اشتغل خلاص زين :طيب لقيتي لك وظيفة ودق :اكيد ..هنا بالنادي الي على الشارع العام ..فيه وظايف لأنه توه جديد ..تبين اعطيهم اسمك ترددت خافت يرفض عمر :اكلم زوجي اول عند عمر لبس بنطلون جنز مشقق وتيشيرت احمر وجاكيت جلد فوقه وطلع من الشقة صادف زين بطريقه ..عطته نظرات من فوق لتحت ومشت غرفتها وده يصفقها بس مو وقته طلع وارسل لمنذر "انا تحت" ونزل ينتظر عند سيارته ..انتبه لودق طالعة ووراها منذر راح كلمها ومشى ناحية منذر الي يناظر لبسه من فوق لتحت :خلاص اكلتني بعيونك الله يخسك منذر :يعني لأني اعرفك أقول مو لايق ولا هو فعلًا مو لايق عمر ناظر بإنعكاسه على قزاز المحل الي قدامه :لأني حالق كني طالع من دورة عسكرية الوضع مشكك منذر :مابقول انتبه تشككهم لأنه مايحتاج عمر :كاره نفسي بس الترقية تنتظرني منذر :تحملت زين مابتتحمل.. قاطعه :والله اتحمل زين ولا اتحمل بنات وعيال ## يحومون حولي ..بس كل شي لأجل هالارض يهون ربت على كتفه :الله يوفقك يارب ييسرلك ويسدد خطاك قرب منه وخمه بقوة وتركه :امين يارب ..يلا انا ماشي مشى لسيارته بعد ماتأكد انه مغير اللوحات وركبها وحرك ناحية مكان عماد وصل هناك ووقف قدام بيت عماد طلع له وركب معه :السلام عمر :وعليكم السلام عماد سكت ..متوتر عمر :سمعلي اتفاقنا عماد وهو حافظها صم :اسمك عمر عمرك 30 ولد نعمة ..عاطل عن العمل..اعرفك من خمس سنين بوحدة من الاستراحات ..وجاي معي تقضي وقت عمر :حلووو ..عطيني نبذة عن المكان عماد :شقة ببرج الضاير..صاحبها اسمه محمد الخالد ..عنده بارتي اليوم على شرف خويه احمد الي رجع برا ..والي بيتجمعون ..اخوياه المقربين وخوياتهم فقط عمر :يعني الموجودين هم غالبية الأسماء الثقيلة صح ؟ عماد :صح ..حتى قروبات التوجيه ماعندهم خبر غير ان محمد مسوي برايفت بارتي عمر :يعني نقول ان حفلة اليوم اثبات وجود وتطقس للوضع عماد :بالضبط عمر :على بركة الله ..خلك مثل ما انت لا تتصنع واعتبرني مو موجود لين ادرعم عليك عشان تعرفني على محمد عماد :ازهلها حس ان معنوياته منخفضة :زين بخير تنطح جمل ابتسم بخفة ومارد ..من رده عرف انها طلعت عيونه """"""""""""" فتح له باب الاستراحة ودخله :هذي استراحة ابوي وماصار يتجمع فيها مع اخوياه ..يعني تعتبر مكان امن هالفترة عقيل :مؤقتة ؟ طارق :تقدر تقول ..مارح نطول عشان نكشف الحقيقة عقيل :من انت ؟ طارق :انا طارق ..وبنبقى سوا هنا عقيل :يعني اعتبر نفسي محبوس هنا ؟ طارق :لا ابد ..تبي تطلع للمحطة بكيفك بخلي معك فلوس ..لكن الحين بحلق وجهك ذا الي كله شعر وبرتب شعرك وبتنام وتقوم بكرة نروح السوق نجيب لك ملابس وبنضطر نخبيك فترة حتى العمال يبلغون رئيسهم انك انفقدت عقيل تحمس :ويبدا الاكشن طارق ناظره بتردد :تعرف منهو الرئيس؟ عقيل هز راسه :على انه حابسني من سنين الا اني ماعرف عنه الا انهم ينادونه بيق بوس طارق :اوكي البيق بوس يقرب لي ..لذلك اضمن لك انه مارح يلقاك وبكون عارف تحركاته اول بأول عقيل شك فيه :يقرب لك ؟ هز راسه : ايه ..وهو غلط غلطة كبيرة ماتغتفر مارح اسمح له يتمادى فيها عقيل :كنت تعرف عني من قبل ؟ طارق :كسالفة وماعرف اذا انها صدق او لا عقيل :وش الي يخليني اثق انك بصفي ؟ تنهد :ماعندي شي يثبت ..غير اني خاطرت بحياتي عشان اطلعك..صاحب المزرعة لو درى مو بعيدة يحبسني معك عقيل :منهو صاحب المزرعة طارق باستسلام :خالي ..اسمه عبداللطيف الجالك ناظر بعقيل الي سمع اسم عبداللطيف وجلس يفكر فيه بينما طارق رجع بالزمن لوقت جيته عزا جده كان بيدخل غرفة جده لأن فيها خاله ويبي يواسيه دخل الغرفة ومالقاه موجود التفت بالغرفة وهو يتعبث بأغراضها ويشوف أغراض جده فتح وحدة من الادراج وشاف أوراق قديمة مصفرة بفضول طلعها وجلس يشوف وش فيها ..كانت شهادة ميلاد باسم عقيل نايف الجالك ..استغرب وانشد للموضوع ..منهو عقيل بهاللحظة سمع صوت خاله بسرعة تخبى بالغرفة والأوراق باقي بيده دخل عبداللطيف ومعه شايب من دولة ثانية :حياك تفضل خويه :وش السالفة عبداللطيف :الولد كمل 16 سنة محبوس بالاستراحة ..واخاف ينكشف خويه :اول ماتحس انهم بدوا يشكون بالموضوع طلع لهم ورقة الايجار وبجي انا اخذه لي على انه ولدي ومريض عبداللطيف :زين شوي سكتوا فترة طويلة رفع راسه يبي يشوف ليش سكتوا انتبه لهم يناظرونه برد وجهه من الروعة عبداللطيف ابتسم وناظر بخويه :وبعدها اذبحه بالبر ووكله للكلاب طلع من مكانه وبفشلة :خفت تهاوشني اذا شفتني هنا عبدالطيف اشر على طارق وعرف فيه خويه :وهذا ولد اختي طارق طارق ابتسم وماحب يدقق حط شهادة الميلاد على الطاولة :اعذرني ناظرعبداللطيف بالشهادة وبحزن :هذا توأم ودق ..توفى بعد ولادته همس طارق :الله يرحمه ناظره عبدالطيف :لا جينا نذبح الولد تخاوينا سكت وضحكوا اثنينهم ومشت عليه ككذبة لأنهم اكتشفوه رجع للواقع على سؤال عقيل ناظره بتفحص :ومنهي البنت الي يوم طلعت شفتها ويوم حاولت تجيني ضربتها على راسها من ورا ؟ ارتبك وماعرف شلون يرد عليه """"""""" مخرج "تناءت دارهُ عني ولكنْ خيالُ وجودهِ في القلبِ ساكن إذا امتلأ الفؤادُ به فماذا يضُر إذا خلت منهُ الأماكنْ" 
 
|
|
04-29-2019
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
100
جمال الاختيار خلفه ذآئقة جميله جدا تعرف ماذا تقدم محتوى الطرح اكثر من راقي من الاعماق اقدم لك شكري واحترامي ليل المواجع محمد الحريري 
|
|
  مهم جدآ قرار بخصوص احتساب المشاركات وتوضيح مفصل بالاضافة لشروط استخدام الخاص وصندوق المحادثات تفضلوا بالدخول طريقة احتساب المشاركات وكيف تحصل على مشاركات اضافيه بنجاح - منتديات قصايد ليل قوانين استخدام الشات والرسائل الخاصة - منتديات قصايد ليل
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
