ديوان الشاعر المبدع / ثامر بن شبيب

قصيدة بسكات





ياكثر شرهاتي عليك انت بالذات
والا على غيرك تراها قليله

تعبت اجي بسكات واروح بسكات
ساكت وانا متني حموله ثقيله

مرات احس اني لحالي ومرات
احس مسنود بجيش وقبيله

عشت بمتاهه غير كل المتاهات
كانت مفيده بس ماهي جميله

عرفت منها كيف طعم الخيانات
وشلون ترخصك النفوس الذليله

خسرت .. لاوالله فدتك الخسارات
ياغلا من الدانه بعينن بخيله

ماقلت لك قصة بعيد المسافات
اللي معه بشته وسيفه وخيله

ضحى بهم منشان سود وسيعات
الله يعين اللي مفارق خليله

جيتك اشيل من التعب كثر مافات
طرقي وهدت سود الايام حيله

خذني من ايدين الحزن للمسرات
ليله معك عن الف ليله وليله

صوتك لحاله غير عن كل الاصوات
وش غير ؟ حتى الغير ماهو مثيله

غير انت وصوتك غير والشوق مامات
وتلومني لاجيت قلبي اشيله

دايم ترى اهل القلوب الحزينات
تنشد عن الغالي وتجي تشتكي له

علاقتي وياك غير العلاقات
لو كان ماهي ياحبيبي طويله

اشره على الغالي عليك انت بالذات
والا الرخيص رخيص ماني بجي له

قصيدة العشره

تدري وش اكبر صدمتن تنصدمها
لا حتجت لك غالي وقام يتصدد

علاقة العشره بلحظه هدمها

من شان حاجه للمفارق تهدد

وكانه ندم .. مافاد ناس ندمها

مافات مات .. ولا يفيد ان تودد

جعله فدا ناس مواطي قدمها
تسوالها ديره وحكم مشدد

ناس تساوت روسها مع خدمها

زمانها راحت عليه وتجدد

اطلال صارت .. جاء زمان وردمها

حتى مكان اطلالها ما يتحدد

وجودها ماهوب يشبه عدمها

على الاقل اليا عطت ماتردد

ماهيب مثل اللي ربوعه صدمها

لاجاه في حاجه رفيقه تصدد

قصيدة محتاج لك حيل

محتاج لك حيل والله يقطع الحاجه

حدتني وجيت اداري دمعة عيوني

باين علي التعب والضيق وانتاجه

منهار لوني متغير ماهو بلوني

لقيتك .. اللي يصد معقد حجاجه

وانت اقرب الناس والغالي ومضنوني

لكن على الله بديه الضيق وافراجه

والا انت الله معك خابت بك ضنوني

بلاش منك ومن موقفك واحراجه

رح واتبع اللي خذوا مني وخلوني

من صد عني ترى مانيب محتاجه

من دونه اعيش دامه عاش من دوني

وان قدر الله مع الايام نتواجه

تمر مثلك مثل ناسن يمروني

في عيوني تصير ماتسوا ولا حاجه

من عقب ماكنت تسوا الناس في عيوني

قصيدة دمعة البرد

طبع الندى يبكي وهو حاضن الورد

في عز ماهو فارغ الصدر مرتاح

مثل السحاب اللي بكا دمعة البرد

تفرح به العربان لا بارقه لاح

اما انا قلبي غدى قاسي عرد

ماعاد يبكي لو فنت كل الارواح

من يوم راح وشاف دمعي ولا رد

حرمت مابكي لي على واحد راح

طرد المقفي يتعب القلب بالطرد

يشوحه المقفي كما شوح ملواح

ترى حلاة الرجل في حزة الجرد

مايقبل الهين .. ويوقف اليا طاح

ان صدرم صدر .. وان وردم يرد

ياخذ حقوقه لو بها سيوف ورماح

والدمعه اللي شافها وراح مارد

اخير دمعه كانت لواحد راح

قصيدة سافر


سافر واخذ قلبي معك وين مارحت
اخذه معك في غيبتك وش ابيبه .؟؟

يمكن معك يرتاح لاشافك ارتحت
يمكن يجيبك لي ولا تجيبه

والا انا لقفيت معذور لاطحت
ياصعبها فرقا حبيب لحبيبه

من فوق تقلب غيبتك دنيتي تحت
ياللي فراقك لي اكبر مصيبه

اليا طرا طاريك من ضيقتي صحت
والدمع يملي كم ثوبي وجيبه

انا اشهد انك داخلي منحت نحت
يابخت منهو صرت حظه نصيبه

مليون ضيقه ان جيت عن خاطري زحت
ارجع فديت الليل يوم تحكي به

يا قلبة الله في عيوني اليا لحت
كنك اسير جابه الله الحبيبه

قصيدة قلب بدوي

ماعلي خلاف اقول اللي ابيه

من فضل ربي علي اني قوي

الا حبك شي ما اقدر عليه

كن حبك ضيف والقلب بدوي

انت بس اللي ابيه ولا اجيه

عنك حظي لاوي ذراعي لوي

صرت لي مشوار لاجيت ابتديه

ان لقيت الدرب ضيعت الخوي

رد يامنهو حياتي في يديه

لا تخليني وانا لك مهتوي

ان خسرتك وين ابلقا لك شبيه

وانت من كل شي نادر تحتوي .؟

وين رايح جعل هالزول افتديه

وانت خابرني من البعد انكوي

انت حتى الجرح منك اشتهيه

من غلاك اضمى عذابك وارتوي

انت لا سولفت ماكني هنيه

التزمت الصمت كني منطوي

ليه اسولف لك وهي من غير ليه

تعرف انك تطوي احزاني طوي

انت حبك شي ما اقدر عليه

كن حبك ضيف والقلب بدوي

قصيدة جيتك

لاتلومني لاجيت كلي من اقصاي
مافيه غيرك لاتضايقت جيته

جيتك ولاغيرك ذكرته بمسراي

جيتك وكل انسان غيرك نسيته

جيتك وانا ماني بأنا تايه الراي

جيتك وانا مدري وش اللي بغيته

جيتك وقلبي دقته تسبق خطاي

جيتك اقول مفارقك ماقويته

ان مر يوم بالعمر منت وياي

اشتاق لك شوق المسافر لبيته

مثل الهوا تحتاجه الناس والماي

يحتاج لك قلب هواك وهويته

دامك معي ماقصرت يوم دنياي

دامي خذيتك وش بقا ماخذيته

وانكان تنشدني بعد ليه انا جاي

ابشر برد يقنعك لاقريته

جيت اعترف بالفرق يا اخر مناي

بينك وبين اللي عشانك جفيته

اني ليامن جيت لك ( همك رضاي )

واني ليامن جيت له ( مالقيته )

لاتلومني لاجيت كلي من اقصاي

مافيه غيرك لاتضايقت جيته

قصيدة الرساله

ياللي حرمت القلب مبطي من الصوت

لاتحرمه هالحين رد الرساله

ايام عمري معك لحظات وتفوت

وش تنتظر لاضاع عمري بداله ؟

يعني عشان اسمك على القلب منحوت

ماعاد تسئل ليه وش هالنذاله ؟

ان كان قصدك شوفتي وسط تابوت

خلنا على ماقيل كلن بفاله !!!

اليا طرى طاريك حسيت بالموت

اليا متى هالحال ماهي بحاله .؟؟؟

من غبت وصارت غيبتك شي مثبوت

الناس تنشد ليه ثامر لحاله .؟

زعلان حدي منك ضايق ومغموت

وكل من سئلني عنك ضقت بسؤاله

عز الله اني معك ماني بمبخوت

امشي يمين الدرب تمشي شماله

عزاه يالدنيا عقب بحت الصوت

صار الرجى منك ترد الرساله !!!!

قصيدة أحبك




انا لاقلت لي شلونك وانا ضايق اقول بخير
مدامك سائل عني اكيد ان ضيقتي راحت

انا من كثر ماحبك اشوفك في عيوني غير
تضيق النفس من غيرك ولامن شفتك ارتاحت

احبك كثر .. ماتطري فبالي وتشغل التفكير
كثر .. ماشيلك بعيني وناس منها طاحت

احبك كثر .. ما ادمح خطاك ان خانك التعبير
كثر .. ماخانت الرفقه بكتم اسرارها وباحت

احبك كثر .. صقار تولع في محبة طير
كثر .. مادلة الطيب بريحة هيلها فاحت

احبك كثر .. ماحس بشعور اني عليك اغير
كثر .. مازيح هالغيره عن افكاري ولا انزاحت

احبك كثر .. مالك داخلي حب وغلا وتقدير
كثر .. ماغبت عن عيني ودموع امفارقك ساحت

تصدق !! من عرفتك صرت احبك .. واكره التغيير
وانا اللي كنت اعشق كل نجمه بالسما لاحت

تأكد كل ماتسئل عن حوالي اكون بخير
مدامك سائل عني اكيد ان ضيقتي راحت

قصيدة الشهره

الشهره اللي وراها الناس منجرفه

ماهوب اكبر طموحي مصافح ايديها

مانيب جاهل بها انكانها حرفه

اعرف مداخيلهاواعرف خوافيها

اعرفك يادربها واقول ماعرفه

وان مر طاري لها صديت طاريها

الشعر لولا عيون الجادل الترفه

والله لانسى القصايد مع قوافيها

ضيقات صدري كثيره مالها صرفه

من كثرها ماعرفت شلون ابحكيها

اشياء منها تبات النفس منقرفه

ياكثر ماحطمت نفسي وامانيها

القدس راحت إناظرها من الشرفه

وابن اليهودي يدوج في ضواحيها

وحنا العرب ساكتين اسكات معترفه

نشوف بالعين ارض القدس وش فيها

والدمعه اللي من المسكين منذرفه

ماحركت شي بالظالم معانيها

الجوع .. والبرد .. ومسكن يشبه الغرفه

تقتل احلام الفقاره .. قبل تحييها

والناس صارت بجرح الناس محترفه

يارب سترك من الدنيا وبلاويها

والحب تطعن بصدقه .. بنت منحرفه

من كثر ماكذبت .. تنسى اساميها

وبعض السوالف تغثك مابها طرفه

تدبل كبود تدور من يسليها

مثل البشر بعضهم ماودك تعرفه

زود على ضيقتك وجهه يطريها