علمني كيف أترك يدك في عز حبي لك كاملة

علمني كيف أترك يدك في عز حبي لك "شموخ أميره" ... الكاتبه ::: أميرة البنفسج


علمني كيف أترك يدك في عز حبي لك "شموخ أميره"
بقلم: أميرة البنفسج



إهداء
الى دمعتي الساخنه التي لم تجد من يطفئ لهيبها

البارت الأول

اليوم : الأحد
المكان : دبي
الساعه : 4:30 عصرا
__________________

أميرة
فتحت عيوني بحزن لقيت أبوي ممدد قربي و ما سك يد أمي و أمير يطالعني و يمدلي يده
أمير : تعالي أدري انه صعب عليك تعالي تعالي ...
قمت أطالعه بهدوء مب عارفه وش فيني ؟؟
حسيت أمير اختفى و قابلني أحلى وجه شفته في حياتي
مسك يدي و ضمها لصدره بقوه و ابتسم لي بحنان و باس على راسي
و قالي : قلبي لك مهما جرى .... روحي لك و حياتي لك يالغلا

يالله وش هذا ؟؟
الساعه 04:00
أدري انها أحلام غريبه بس هالحلم مدري وش فيه غريب عن كل الأحلام اللي حلمت فيها !!!
هذي أحلام أميره غريبه مثلها تماما و غير متوقعه !!

هربت من العالم اللي كله ذكريات و آلااااام
هربت من الذكرى و لحقتني ..
هذي عادة الذكريات غثيثه و مقيته و خصوصا لما تكون شينه و انت تحاول بكل السبل انك تهرب منها بس هذا بحد ذاته مستحيل !
اسمي أميره عمري 22 سنه قبل ما أكتب أحداث قصتي كان يومها توني متخرجه من الجامعه

قسم فيزيا و علوم فلك أهوى الرسم بشكل خيالي و خصوصا الرسم بالفحم مره أبوي سوالي معرض كبير
و فزت بجائزه و صرت مشهوره في هالمجال , و بعد سوى لي مرسم كبير بالبيت عشان دوم البيت يكون وصخ !
بسبت الفحم و الألوان اللي ارسم فيها و طبعا هذا شور الوالده عشان تفتك من هالوصاخه !! (( مدري وش احس فيه هههههههههه ))
المهم أنا سعوديه بس سكنت دبي مع أهلي
تدرون اني ما صدقت على الله أهرب !!!
أهرب من كل شي يذكرني في هالإنسان اللي عذبني و جفاني و باعني
و حمدت ربي ان أهلي قرروا يسكنون دبي عشان انساه
صحيح أنا ما أحب صخب المدينه و ازعاجها
أحب الهدوء و الراحه بعيد عن الإزعاج
و مع ذالك مشتاقه للرياض حيييييييييييييييييييييييييييييييييييييل
عائلتي غنيه بالعربي واسعة الثراء و تقدر تجيب الشي اللي تبيه
حتى لو بالمريخ .....
الفلوس مب مهمه عندي قد انه مهمه الأخلاق أكثر من أي شي ثاني هذا بالنسبه لي أنا مدري عن الباقين !!
عايلتنا تتكون من أبوي اللي طول الوقت ملتهي بشغله و شركاته حتى ما يدري عنا وين رحنا و وين سرنا !!
و أمي اللي طول وقتها زيارات و طلعات و دخلات من الصبح لين وقت الغدا و أحيانا تطلع بالليل وقت اللي يكون في عزومه أو عرس !!
و أخواني الأول أمير إسمي على اسمه أكبر مني بسنتين حبوب و مرح جدا يكره الدراسه يعني ما كمل الا للثانوي و بطل !
حياته فاضيه ضايعه غامضه !! كان أكثر واحد مبسوط لما قرر أبوي نسكن دبي و نبعد عن أهلنا فرفوش و مرح و حبوب جدا !!
و الثاني : أحمد عمره 28 سنه و متزوج من بنت عمي ناديه و عنده ولدين طلال عمره سنتين و تركي عمره 3 سنوات و دايم أحمد مع أبوي في الشركه يساعده و طول الوقت مشغول و مب فاضي مثل ما يقول ؟؟ يا حليله (( نائب رئيس مجلس الإداره ))
مشغول لشوشته !؟؟
و الثالث : ثامر عمره 25 سنه بروحه ما يندرى عن حياته وش هي بس انه ظاهريا طيب و عموما أنفر منه مدري ليه ؟؟
أحيانا أحس انه كاشفني أو اني حاسه انه بيصلحلي مصيبه مدري وش هي !!
على العموم هالشخصيات قصدي عايلتنا ما اشوفها غير في أوقات الوجبات في الفطور و الغدا و العشا أحيانا الفطور ما احضره و طبعا بأوامر
كريمه ساميه من الوالد وجبتين الغدا و العشا لا احد يتخلف عنها و طبعا الفطور صاير على راحتنا ..
أحلى شي ان حياتنا ما فيها قيود و قواعد الكل عايش على كيفه و حياته محد يدري عنها بس بالعموم أنا احس دوم اني مكشوفه !!
حياتي من خلصت الجامعه و هي فاضيه غير طبعا المكالمات مع بنات عمي اللي مشتاقه لهم بالحيل حتى لما سكنا دبي ما اقطعوني دوم يتصلوني علي و اتصل عليهم و طبعا
طلعات مع صديقاتي و مع رنو بنت عمي خالد و بس ..
لما جيت لدبي انشغلت و انشغلت رنا مدري وش عندها و خفت المكالمات بينا و اللي هي بالنسبه لي كل شي يعني توأمي و عموما احس بكآبه بدون وجودها مع انها وعدتني
انها بتلحقنا لدبي مدري عنها هي بتوفي بوعدها و لا كالعاده !!! (( لا لا رنو قول وفعل))
رنا انسانه غير تقليديه رائعه بكل شي هي حضورها يكفي و بتعرفونها أكثر من خلال شخصيتها الأكثر من مثيره
و بما ان لأبوي اتصالات واسعه في دبي و فروع شركته فيها ناوي يخلي المقر الرئيسي بدبي !!!
صارت مسائل انتقالنا للبيت قصدي للقصر الجديد شي سهل و ميسور سكنا و طبعا كانت الأيام الأولى لي بدبي أعتبرها عاديه جدا
لأنه طول الوقت قاعده بالبيت و الكل في حركه و الكل يأثث في غرفته لأنه على قولتهم يبون غرف على ذوقهم فصاير البيت حوسه !!
و لأني عاجبتني غرفتي مثل ماهي مع انها كئيبه وين ذي و وين غرفتي بالرياض بصراحه ما احب الألوان الهاديه أحب انه كل شي في غرفتي يكون غير أبيها مرحه شوي أصلا ما كان لي نفس أغير فيها شي أما أخواني كل واحد يبي غرفه على كيفه و طبعا هالأسبوع كان زحمه كل واحد يدور على الإستقرار مدري متى بيجي الدور علي و أغير غرفتي !!
أما ناديه كانت زعلانه ليش اننا نقلنا دبي ؟؟
و عموما تركناها على راحتها تصلح اللي تبيه في بيتها اللي جنب بيتنا و خصوصا انه أخوي خيرها بينه و بين أهلها اللي هم بعد أهلنا بعد المشكله اللي صارت المسكينه خافت على مستقبلها مثل ما يقولون .. (( أكره هالفكره التافهه )) و اختارت أخوي و جت معانا
السالفه الله يسلمكم .... ان ابوي اختصم مع اخوانه على ارض كبيره و استثماريه و سعرها مغري كانت لجدي الله يرحمه ورث يعني و أبوي كان يبي يشتري نصيب كل واحد فيهم بالسعر اللي يبونه لكنهم رفضوا عرض أبوي و كل واحد منهم تمسك بجزئه في الأرض بس و بالتالي صارت مشاكل ما لها أول من آخر و بسبتها ابوي ترك الديره باللي فيها و رفض اننا نتم فالرياض و طبعا صارت شركات أعمامي من الشركات المنافسه لأبوي مع انه أكبرهم و أكثرهم ثروه و مال و جاه (( يا ربي أكره الكلام عن الفلوس قطيعه تقطعها اذا بتفرق بين الأهل ))
و جينا هنا طبعا بعد شور من الوالده (( شفتوا كيف اللخبطه .. )) طبعا أنا في الوقت اللي صارت فيه المشكله كنت عايشه عالم ثاني عالم نساني الناس و الحياه كلها آآآآآآه يا ربي !!
المهم ... أبوي زود البيت بالخدم و السواقين و الحشم و كل شي ممكن نحتاج له
و امي طبعا بطبعها اجتماعيه فصارت تتعرف على اللي حولنا لأنه أصلا لها صديقات هنا من كثر ما كانت تجي في الصيفيه لدبي و عموما هي هذا طبعها و مستحيل تغيره ؟!!
و أخواني من سكنا و أنا ما أشوفهم .. إلا ناديه اللي طول الوقت معاي تطالعني و أطالعها يا إما تمل و تجي عندي أو أمل و أروح لها .. و عيالها بسم الله عليهم هازين البيت هز !!!
جلست أسبوع كامل بالبيت بدون ما أطفش أو أحس بالطفش من الحديقه للتلفزيون لغرفتي للروايات للأغاني للمرسم للذكريات المريره المؤرقه !!
ذكرياتي مع الألم اللي ما ينتهي وش بقول غير الحمد لله على كل شي .. حتى ما فكرت أطلع من البيت مدري وش جا علي !!
هذا كل شي عني باختصار اليوم حبيت أكسر الروتين و أطلع من البيت قلت للسواق يوديني أي مكان اشم فيه هوا .... دبي رائعه بكل اللي فيها!
سرنا في شوارعها الصاخبه كل شي كان فيها جميل معالمها و خضرتها و أسواقها و ناسها كنت أتأملهم بسعاده .....في الأخير
وقفني السواق عند البحر قلت له يروح و أنا بعدين بدق عليه ..
جلست على الشاطئ أتأمل ؟؟
الحياه و الناس اللي حولي الأطفال يلعبون البحر روعه من روائع الكون
و الحياه لها وجه آخر صحيح انها متعبه و كلها حزن و ألم بس فيها شي جميل يدفعنا للتفاؤل و الحب
الكل حولي من كل صوب اختلفت توجهاتهم بس هدفهم واحد !!! انهم يفرفشون عن انفسهم أسميها فسحه في الحياه !
و بعد عن المشاكل اللي ممكن تتعب الإنسان و اذا زادت ممكن تموته !!
صار البحر فسحتنا و الوناسه و الطلعات همنا عشان نخفف و لو جزء بسيط من الأشياء اللي نعاني منها !!
الناس سعيدين يغيرون جو و خصوصا انه آخر الأسبوع الكل يحب يغير الرتابه و الروتينيه اللي في هالحياه الكل يدور على صفاء النفس و تغيير الحياه للأفضل الكل يدور على السعاده و راحة البال كنت أحاول ادخل أكبر قدر ممكن من الهوا لصدري ياه أحس نفسيتي مرتاحه أو هدت نفسي يوم شفت البحر .
طلعت من تأملاتي و أفكاري لقيت قدامي عيله سعيده الأم تصب الشاي للأب و الأطفال من حولهم يلعبون
يسولفون بكل و ناسه و بسطه و سعاده جلست أتأملهم و أفكر هل عيلتنا كانت كذا في يوم من الأيام ... بصراحه ما أعتقد ؟!!!
يمكن كانت كذا في يوم من الأيام بس اللحين لاء !!!
.. قمت أتمشى و أسترجع ذكريات ما كان ودي أتذكرها و مع ذلك لحقتني مب راضيه تتركني بروحي نهائيا !!
تذكرت ناصر سبب آلامي اللي مب راضيه تنتهي ناصر هذا انسان مدري شبقول عنه بعد اللي صار!!
بقول للناس ولد عمي خطبني و هرب !!
بقول للناس حبيت واحد باعني و أنا اللي حبيته و أغليته و أخلصت له في حبي ؟؟
من أول مشكله تواجه حبنا هرب و تنكر لي بكل برود و لا يدري انه في قلب يحترق ... يحترق عشانه !!
كان في نظري هو حياتي ودنيتي و كل شي بالنسبه لي حبيته بإخلاص و احساس صادق
ما كنت متخيله حياتي بدونه كان كل أحلامي كان قلبي و روحي وهواي و على قوله انه حبني ؟؟
طبعا بعد اللي سواه ما ظنيت انه يعرف طريق الحب طبعا حبيته بدون ما احد يدري الا رنا اللي كانت تدري بكل التفاصيل أو بالأحرى كانت جزء منها سرحت لبعيد و قمت أتذكر ....
ناصر : تدرين يا بعد عمري وش ودي !
أميره : قول غلاتي
ناصر : ودي أسعدك
أميره : كيف بتسعدني !!
ناصر : مدري وش اللي يسعدك يا قلبي
أميره : وجودك جنبي أكثر شي يسعدني يا حياتي
ناصر : أميرة ودي أشوفك قريب يا هناي
و بدون شعور انقطعت هالصفحه من الماضي بعد ما رجعت للواقع و السبب اني
حسيت بكتله توقف قدامي ... انسان يطالعني بعصبيه و عيونه فيها دموع !!
... : لو سمحتي !
طالعته و ابتسمت له ابتسامه كلها استفهامات
أميره : هلا حبيبي وش فيك ؟
.... : ممكن تشلين ريلج عن لعبتي !
سحبت رجلي مثل الملدوغه أشوف وش تحتها ....... و قلت بارتباك :
أميره : معليش آسفه ما كنت منتبه اني وطيت على لعبتك
بعدت رجلي عن الطائره الورقيه حقته شالها ... و هو متحسر
أميره : إن شا الله ما تكون خربت أنا آسفه صراحه مب قصدي
طالعني هالطفل البريء و الدمعه على طرف عينه
... : كسرتي أعمدتها الخشبيه جذي كسرتيها زين انج ما قطعتي الخيط
زاد ارتباكي .. نزلت لمستواه و مسحت على شعره و قلت :
أميره : ممكن تعطيني اياها اصلحها لك ؟
بعد عني و قالي بحده ..
... : لا
أميره : ليه ؟؟
و فجأه سمعت صوت ينادي ..
... : سهيييييييييييييل يا سهيل ؟؟
من سمع الولد الصوت ركض تجاه صاحب الصوت و قال بصوت مسموع
.... : ذيج المره كسرت لي الكايت مالتي
أما صاحب الصوت طالعني أول ما سمع كلام الولد ....... جا تجاهي
تبون الصراحه ارتبكت لا عفوا قصدي ... خفت !!
وقف قدامي و قال :
... : لو سمحتي ممكن
قاطعته و قلت بسرعه
أميره : أنا آسفه مب قصدي لأني ما كنت حاسه بنفسي آسفه
ابتسم لي و قال لي بمرح
.... : حصل خير
كنه نفسي هدت شوي يوم ابتسم لي و قلت و أنا أطالعه
أميره : شكرا أخوي و أكرر اعتذاري
أما الولد اللي هو سهيل فراح يلعب و لا كأنه قبل شوي كان يصارخ !!
وقف الرجال يطالعني لحظه و بعدين كأنه كان متردد
تدرون وانا بعد كنت متردده اكمل طريقي بس وقفني بصوته و قال :
... : لو سمحتي .... الاخت اماراتيه
فاجأني سؤاله بصراحه ... التفت و قلت :
أميره : لا مب اماراتيه
ابتسم لي و قالي :
.... : عيل انتبهي على روحج
قلت مستفسره و على وجهي ابتسامه بريئه
أميره : ليه أعتقد ان بلدكم أمان !
... : لا اختي الأمان من الله كل مكان في هالعالم فيه شر
أميره : و الله انك صادق الشر في كل مكان .. على العموم مشكور على النصيحه
ابتسمت له بإمتنان و قبل ما اكمل طريقي
تأملته بنظره خاطفه كان ودي أطبع صورته في ذاكرتي حسيت اني راح أشوفه مره ثانيه بس مدري ليه هالشعور داخلني !!!
مشيت بدربي و هو مازال واقف مدري بصراحه وش موقفه بس يمكن يكون يبي يقول شي ؟
و المهم اني مشيت ما كان ودي أمشي ....آه ليته بنت كان جلست اسولف معه !
من يوم جيت لهالبلد ما لقيت أحد أسولف معاه حتى رنا ما ترد على اتصالتي
تنفست بعمق و أنا أتأمل الموج بسعاده مب طبيعيه مدري وش سببها ..
بس هالوجه شدني حيل ما أدري متأكده اني شفته قبل كذا في مكان مدري وين المهم اني شفته قبل هالمره !! ؟؟!!!
رجعت للبيت و أنا مستانسه و أغني أغنية أحمد الهرمي و لا كأني قبل لا أطلع من البيت كانت مقفله معي !!
على بااالي كلااام الحب على بااالي تفاااصيـــــــله
على بااالي شقى و احلااامنا و أمااانينا و مشاااعرنا
على بااالي ليااالينا سهرناااها أغنيـــــــــــــــــلك
على بااالي الغرااام اللي عطااانا جناااحه و طيـــرنا

دخلت غرفتي بهدوء أصلا مالقيت أحد بالبيت كالعاده
جلست على السرير أتذكر كل اللي صار لي على الشاطئ و هالإنسان اللي ملامحه انطبعت في خيالي بدون ما احس !!!
و فجأه تذكرت الألم اللي مر عليه ثلاث سنوات بسبب ناصر اللي كان سبب تعاستي !!؟
ادري انه مكتوب علي ان سعادتي ألم و فرحي ألم و الألم نفسه لازم يكون عذاب !؟؟

يوم الأربعاء
المكان : دبي
الساعه : 10:50 مساءا
________________

عبدالله :
بصراحه هالبنت اعيبتني و دخلت مزاجي !!!
مب قصدي أعبر بهالطريقة بس هالبنت غير الكل شي عجيب حسيت فيه وقت اللي شفتها !
اسمي عبدالله اشتغل في شركة عايلتنا هالشركه شراكه بين أبوي و اخوانه اللي هم عماني !!
و انتم عارفين شو يعني أشتغل فيها يعني مالي أي صلاحيات كل الشغل بيد أخوان أبوي الله يرحمه طبعا !!
صرت ريال البيت بعد موت الوالد الله يرحمه عيلتي تتكون من الوالده و خواتي نوره ارمله و عمرها 30 سنه مات زوجها في حادث شنيع الله يرحمه ... و أماني توها تدرس بالجامعه و عمرها 20 سنه و ود درة هالبيت كله توها بالمدرسه
تدرس بالثانوي عمرها 17 سنه وعيال أختي نوره سهيل عمره 7سنوات و عبد العزيز عمره 3 سنوات
عايلتي متواضعه في حياتها صح يماعتنا كبيره بس شايفه نفسها مدري على شو شايفين اعمارهم الحمد لله اننا مب شراتهم !!!
المهم عمري 26 سنه وسيم و جذاب جدا قصدي أينن على قول البنات !! ...
عزابي قلت أكون نفسي بالأول لين الله يسهلها
تبون الصراحه كان همي أهلي قبل كل شي ...
حبيت أطلعهم اليوم للبحر يوسعون صدورهم شوي جذي و هم بالبيت مثل الخيشه كل واحد راقد عالشبريته و يزاعج (( أنا طفشان ))
قلت نغير جو شوي ... تصدقون كان هاليوم حلو وايد مدري ليه !!!
يوم شفت هالإنسانه على الشاطئ مدري شصابني ملامحها بريئه هاديه حلوه و بصراحه البنت جميله جدا باين عليها مب من هالديره
المهم لما راحت في طريقها شنك جلعت روحي من صدري ما كان ودي تروح !!!
وقفت سرحان اطالعها ليما اختفت عن عيني ذبت في سحرها بدون ما أدري بروحي
رجعت متحسف عليها ليش انها راحت كنها نسيم حلو لفحني و اختفى !!!
رديت لمكان يلستنا و أنا سارح مب عارف في شو بالزبط (( أكيد فيها )) !!
(( شو اللي صابني شن المره بتم تسولف وياك انت و يا هالويه !! ))
تنبهت يوم سمعت صوت الوالده
ام عبدالله : عبدالله شجا عليك فديتك
انحشرت ود بالنص و هي متحمسه
ود : عبدالله عبدالله مين هذي اللي كنت تسولف معاها مو شنك طولت وطقيت معاها حنك !!
طالعتها بدون نفس وقلت
عبدالله :سكتي عني مب متفيج لج ... جدامكم أنا اللحين كاني ما كنت أسولف
نوره كانت تطالعني و هي تسأل :
نوره : عبدالله شجا عليك وش فيك مختبص !!
الوالده : ما بتفكون اخوكم يا خذ نفسه شوي .. معليش أبوي جذي خواتك ما عندهن عقل
انحشرت أماني بعد بنص السالفه
أماني : من قالج حنا ما عندنا عقل شذي الواحد ما يروم من النقره معاكم امايه تركي هالرمسه الشينه عنج فديتج !!
قلت بدون نفس زود مصخوها خلاص ضاق صدري من نقرتهم
عبدالله : كل اللي صار ان المره كسرت الطايره مالت سهيل و اعتذرت على اللي صار و بس
كلهم طالعوني مب مقتنعين ..
أدريبهم ترى هلي ما يقتنعون بسرعه يحبون يفتشون و ينبشون بين الأشياء كنهم بوليس سري ول عليهم !!
عبدالله : قوموا يالله خلصت الرحله يالله ابويه خلونا نسير للبيت يكفيكم جذي !!
نوره : من صجك تو الناس !!
و طبعا انهالت الإعتراضات من كل صوب و أولهم سهيل و اكيد محد ينهي مثل هالأمور الا الوالده الله يسعدها !!

________________
اليوم : الخميس
الساعه : 11:30 صباحا
المكان : سيارة رنا
_______________

أميره :
صحيت اليوم بدري طبعا وحده مثلي ما عندها شغله تسويها
وش بتسوي غير انها تقوم تاكل و ترجع تنام مره ثانيه بصراحه ملييييييييييييييييييييييييييييييت

و بعدين انا مب مثل أمي من وصلنا دبي ما صرت أشوفها الا بالوجبات
رحت المطبخ أصلح لي فطور من الطفش قلت أصلحه و لا أنا من متى أصلح فطور كسوله حيل !!!!
دخلت لقيت الطباخه في المطبخ سألتها :
أميره : وش تسوين ؟
الطباخه : كيك لمدام حصه
أكيد بتطلع مع صديقاتها أو طلعت و بتقول للطباخه ترسل لها الكيك مع السواق تصدقون حظها و الله !!
صلحت لي ساندوتش جبن و كوب شاي بالحليب و طلعت لقيت الأخ أمير مقعد في الصاله يتفرج تلفزيون بصراحه استغربت انه يصحى في هالوقت !!!
أول ما شافني قام و قالي بمزحه المعتاد ..
أمير : يا هلا و مرحبا ماشا الله سندويش جبن واااااو عليك
و سحب الساندويش من الصحن و قسمه نصين أخذ نص و حط الثاني بالصحن و قال :
أمير : عشان يصير بينا عيش و ملح ههههههههه
أميره : تدري هالحركه لو صلحتها لأحمد كان خلى عياله ياكلونك !!
أمير : لا لا لا و لي يرحم والديك لا تجيبين لي سيرة هالإنسان
تنهدت و قمت آكل الساندويتش و أشرب الشاي و أطالع التلفزيون معاه
أميره : انت ما تبطل تتفرج هالمصخره هاذي ارحمني من هالقرف و طفه يالله
قال بمزح ...
أمير : من يومي يا أموره و أنا أتفرج هالمصخره !!
و قام يقلدني !!
قلت يعني اني معصبه ؟
أميره : بطفه و لا أقوم ؟!
أمير : لا لا أنا كم أموره عندي نطفيه ليه لا
تعدل في جلسته و قالي :
أمير : أموره مستانسه هنا ؟
أميره : بصراحه ! لا ودي أرد للرياض
أمير : تدرين و الله انك صادقه حتى دبي تطفش تصدقين أنا أعرف الإمارات من زمان و حافظها شبر شبر
طالعته مذهوله :
أميره : صددددددددددق !!!!!!
أمير : ايه و الله صدق انتي وين عايشه هههههههه
تنهدت للمره الألف و قلت :
أميره : حظك انت و الوالده .. هي بعد لها صديقات هنا و أنا طفشانه مووووووووت
ضحك بفخر :
أمير : وش رايك أوديك العين مكان شي و بصراحه تعجبني مره العين
قلت بفرح
أميره : اللحين !!!
أمير : ايه وش ورانا حنا العواطليه ما عندنا شغل خلنا نتمشى و نفرفش !!
أميره : بس سمعت ان العين بعيده عن دبي و تصير حوادث كثيره في هالطريق
أمير : خليها على رجالها لا تتفلسفين يالمثقفه
شويتين رن جوالي رديت بسرعه :
أميره : هلا و الله بهالصوت صدق ما تستحين وينك من زمان ؟؟
........... : موجوده أنتظرك تدقين
أميره : ههههههههه و الله انك ما تستحين طيب دقي علي بأي وقت و انتي عارفه اني ميته طفش !
......... : طيب شوي شوي علي بأقولك هالخبر
أميره : وش هو ؟؟
............... : أنا بدبي
تدرون من سمعت هالخبر صرخت و من شدة صرختي المسكين أمير نقز من مكانه قلت و الفرحه مب شايلتني !
أميره : لا لا و الله صدق لأ لأ ... رنا تكذبين علي انتي ... صدق بدبي مستحيل مو معقول !!
البنت كانت مستانسه يمكن أكثر مني
رنا : ايه و الله أنا هنا بدبي و عند باب بيتكم بعد منتي بمصدقه روحي افتحي الباب بتلقيني قدامك !!
تدرون انه قلبي بغى يوقف رميت الجوال و نقزت من مكاني و طيران على الحديقه مثل المجنونه رحت فتحت الأبواب
و فتحت باب البيت و شفتها واقفه عند الباب لا لا أنا شكلي أحلم و فركت عيني من قوة الصدمه تدرون طلعت الشارع
حتى بدون غطى أو عباه أنا في الشارع ببجامة النوم ؟؟
حضنت رنا بقوه و بكيت و هي طبعا بكت و قمنا نحضن بعض و نبكي مثل الأطفال تدرون رنا هذي مب بنت عمي و بس هي بنت عمي و أختي و صديقة عمري و كل شي بالنسبه لي بصراحه مبسووووووووطه دخلتها للبيت و جلسنا في الصاله و نسيت
أمير و سوالفه جلست بعد ما هديت و طلبت لرنو عصير قلت :
أميره : مفاجأه روعه بصراحه وينك من زمان و الله فكيتي ضيقي الله يفك ضيقتك أخيرا عمي وافق انك تجين معنا !
رنا : أبوي ما رضى الا بالشده و خصوصا ان أخوي بيشتغل هنا مع عمي مساعد
أميره : حلو يا شيخه ودي أسولف أحكي أتكلم أطلع مع وحده تفهمني و الله واحشتني ..... متى جيتي !!
رنا : من أمس و الله .. بصراحه يالغاليه كان ودي أجيك من أمس بس قلت أخليها لك مفاجأه
أميره : يا قلبي هذي احلى مفاجأه بصراحه ما قلتيلي وش أخبار هيفا و الهنوف و البنات كلهم ؟!
رنا : الحمد لله كلهم بخير و يرسلون لك أحلى سلام
أميره : بصراحه لهم وحشه
رنا : الله يسلمك .... أجل وين عمتي حصه ؟؟
أميره : تعرفينها انتي عاد ما يبيلي اعرفك على طباعها
رنا : أه فهمت ..... جولاتها الصباحيه !!!
قامت تطالع الصاله و تتأملها
رنا : بصراحه بيت روعه أدريبه عمي ذوقه يجنن ....... على فكره ما وريتيني غرفتك
أميره : تدرين كان ودي أوريك اياها بس قلت تلتقطي أنفاسك شوي بعدين أوريك غرفتي
رنا : أموره يا قلبي بطلي هالمصطلحات اللي جايبتها من الروايات ارحميني !!
أميره : هههههههههههههه ما تتركين طبعك حتى و انتي بدبي !
طلعنا لغرفتي و أول ما شافتها قالت :
رنا : أميره بصراحه ما توقعتها كذا كئيبه .
تنهدت بحزن لأنها صادقه فعلا غرفتي كئيبه !!!
أميره : تدرين كذا أخذتها بدون ما أعدل فيها شي كل أخواني عدلوا غرفهم على مزاجهم معدى أنا حتى
ناديه غيرت بيتها بالكامل أما أنا غرفتي ما كان لي نفس أغيرها ما لي خلق فأخذتها مثل ما هي !!
رنا : اسمعي كل شي بيتغير في هالغرفه و بنعدلها فهمتي .. و بعدين ما وريتك غرفتي تدرين اني ما رضيت أسافر لما تأكدت ان كل شي جاهز
يا ماما انتي بنت عز لازم كل شي في حياتك يكون توب !!
أميره : يوه يا رنا مليت من هالكلمات الله يخليك وش مفيدتني هالفلوس و ناصر تركني وراح ؟؟
قالت لي بملامه
رنا : اوووووش لا يسمعك أحد !!!!
راحت للباب و سكرته بكل حذر ..
رنا : أموره يا قلبي نحاسب على كلامنا يا جميل ما نبي مشاكل الله يرحملي والديك
أميره : و الحل ؟؟
رنا : انك تقومين تبدلين ملابسك اللحين بنطلع ..
أميره : وين بنروح ؟؟
رنا : نتغدى يا روحي و نتمشى و بعدين وش فيه وجهك كذا شاحب و صايره نحيفه اسمعي يا أمورتي هالحال ما يعجبني !
لازم تكونين كامله من كل النواحي ..
طالعتها بصمت أسمع كلامها و اتأملها ما شا الله عليها حلوه و مهتمه في نفسها عدل و وجهها ما شا الله مورد تصدقون في فرق !
رنا : يا الله قومي وش تنتظرين !
أميره : اصبري بدق على السواق يجهز السياره
طالعتني مستغربه !!
رنا : أي سواق يا حبي هذا اللي بتدقين عليه .. أنا معاي سيارتي يا قلبو!!!
تبققت عيوني صح هالمره من الدهشه
أميره : وووووووووووووووووووووووش ... تسوقين؟
قالت لي بكل برود و هي تبتسم
رنا : ايه حبيبي طبعا اسوق انا ما جيت دبي الا عشان اسوق براحتي تدرين بالرياض ما في سواقه !
هزيت راسي بتفهم لأني كنت أتمنى اشوف الحريم في الرياض في يوم من الأيام يسوقن بس أنا اسوق سياره مستحيييييييييل .. أخاف !!
أميره : أها تطور و الله
قمت لبست و خلصت و طلعنا الشارع شفت سيارتها سودا مره حلوه ركبناها و قلت
أميره : غريبه لونها مهو وردي أو بنوتي ما لقيتي الا الأسود !
رنا : افهميني يا أموره أحيانا يحبطني تفكيرك صراحه ....... تدرين الأسود لون ملكي عشان كذا يعجبني ؟
أميره : أها تشرفنا
قالت بمزح
رنا : الشرف لي يا قمر هههههههههه
______________