ديوان إحساس الغروب للشاعرة إحساس الغروب

قصيدة بعثــــــــــــرة للشاعرة إحساس الغروب

جيت يمك غاية القلـب احتـواء
جيت لك حب وأحاسيس رقيقـة
حاملة زهرة تبي قطـرات مـاء
من يدينك تشرب الصدق وتريقه
وشفت غيمة صيف مامنها أرتواء
وانعطف قلبي معود مع طريقـه

يالحمام اللي على الأغصان ساجع
لاتزيـد الهـم فالـروح الكئيبـة
لاتزيـد الهـم فينـي والمواجـع
ولاتقلبني على الجمـر و لهيبـه
ويل قلبي لانظرت الكـل هاجـع
وهو فراشه محدٍ عقبه دفـي بـه
راح عني ياحمام وقـال راجـع
ولا رجع لي غير علمٍ بالمصيبـة

ياطير وقف على وين؟
خلك هنا في محلـك
ماكنت من قبل يومين
مجروح والحزن ظلك
شفته نفضت الجناحين
ونثرت وردك وفلـك
ماقلت بتـرد هالديـن
للي من العهد حلـك
والحين ياطير هالحين
تبي تطير له كلك؟؟!!!

البادي اظلـم واستمـع للـي يليـه
الحل عنـدي هـاك منـي حلهـا
من قلط افراشٍ يجي يجلس عليـه
نفسٍ ذليلـه موتهـا أحسـن لهـا





في الحبس ياكثر المظاليم كثـراااه
وياكثر ما فالكون من شخص ظالـم
والكـل عالـم ربنـا فـي نوايـاه
وأكبر حظيظ اللي من الظلم سالـم
مظلوم" تقبل دعوته فـي مصـلاه
مايرفـع الشكـوى لـدار المظالـم
يجيبهـا ربٍ جزيـلـه عطـايـاه
رب كريـم بالمخالـيـق عـالـم








راجع تعزيني على مـوت الأمـآل
قتلتنـي وراجـع تعـزي قتيـلـك
تمشي ورى الجثمان والدمع همـال
ودم الضحيـة بايـنٍ فـي شليلـك
جزاك ربي خير في كل الأحـوال
طعنة فـؤادي منـك تبقـى قليلـك








العلم جاني ولـي أسنيـن حافظتـه
والله يرحمك ياللي فيـه وصانـي
قال الصديق الردي كالداب وشجرته
مـن يتفيـا تحتهـا هالـك فانـي


يامدخـلٍ نفسـك فيمـا لايخصـك
بالله قلـي وشهـو اللـي جنيـتـه
ملقـوف كـلٍ لاتكلمـت هصـك
هـذا الـذي مـن اللقافـه خذيتـه








يـاطـيـر أركـــد لاتـطـيـر
وأن طــرت ماعـنـدك خـبـر
يجيـبـك الضـبـي الصـغـيـر
الـلـي مــع الــوادي عـبـر
يعـنـي تطـيـر أو ماتـطـيـر
مصـيـرك مـحــول حـــدر

مافيه مثلي فالبشـر ياحصـة
مافيه مثلـي ياذخايـر جـدي
أنا الذي قصة عذابـي قصـة
جيش الألم في خافقي متحدي
همي لو أن الناس جاها نصـه
أدمى القلوب وطافها متعـدي
مرت سنين وقلت هذي الغصه
يالله عساهـا أزمـة وتعـدي
وشفت الأمل والنور ماله بصه
في عين من حظه هوى متردي
يْدي أنا عن غايتـي منقصـه
أشوف حلمي وماتطوله يْـدي
ياليتنـي آقـف أنـا مقتصـة
من هالزمان وناسه اللي ضدي
ويا ليت ليه فالهنـا لوحصـه
اجيب فيهـا ضحكتـي وودي

ياوين أبلقى لي مسافات ونحـاش
من ذا الهموم اللي بقلبـي تزايـم
أربع سنين وجمرة الفقـد تعتـاش
عليك ياقلبٍ عن الضحـك صايـم
متكلبش الهـم وسطـك تكلبـاش
محطـم ٍ فيـك الرجـا والعزايـم
صبرت صبر ايوب لكن على ماش
طال الظلام وحضرة الحـظ نايـم

كملي الديوان يعطيك العافيه
واغلقيه

قالوا العرب قدرٍِ بما فيـه نضْـاح
يبان طبع الآدمي لـو بعـد حيـن
وأنا كذا طبعي من أسنين ياصـاح
لامتغيـر شـيء فينـي لهالحيـن
لو الزمن قاسي وكفينـه أشحـاح
ولو أن جميع الخلق ليّـه معاديـن
ولوأن في صدري سكاكين ورمـاح
وأغلب جروحي من طعون الموالين
ما ميل عن عـد مشاريبـه قـراح
واشربك ياعـد الـردى والردييـن
لني ورثت الطهر من شايـب ٍ راح
عساه جـار المصطفـى والنبييـن
ماهيب أنا اللي تعْرف شلون لاطاح
بعض العرب قامت تحد السكاكيـن
وتقطع الأجساد وتزيدهـا جـراح
وتاكل على كتف الجياع المساكيـن
أن طاح منهـو للمواجيـب نطـاح
ينزف عليـه القلـب دم الشراييـن
وأن طاح خبلٍ ماله إحسان وأرباح
دعيـت ربٍ لـه عبـاده مصليـن
يرفع بلاه ويحفظ أرجالي اصحـاح
ويجيرهم مـن كايـدات الموازيـن
ويالله ياللـي بارقـك فالسمـا لاح
ابقى مثل مانا على العسر والليـن
قلبٍ رياضه خضر بالخيـر فـواح
يكره يشوف الدمع في مقلة العيـن
ويكره يشوف الناس في حزن ونياح
وده جميع النـاس دايـم سعيديـن
ماقولها ياسامعي ضحـك ومـزاح
شاهد علّي اللي خلقنا مـن الطيـن

ياليتني ما تعبتهـا النفـس يانـوف
ياليتنـي قزرتهـا فــي تعـبـط
درسٍ احفظه ودرسٍ اقوله طوووف
واجب احله" واجبٍ فيـه اخربـط
ثلاث مرنبـي وذا الهـم مـردوف
علـى فـؤاد بسبـت الهـم خبْـط
ممتاز جبته بـس مافيـه مخلـوف
نتيجـة الممتـاز هــم وتحْـبـط
الوضع مايمشي معه رقم وحروف
لا صار مالك في الوزارة مضْبـط
سابع سنه مرت وأنا عيني تشـوف
ناس وراي وصارت اليوم تزعـط
لأنها وبـدون ماتمسـك صفـوف
لقت لها شخـص ٍ بكتفـه تشعْبـط
وأنا ورب الكون ماعندي ظـروف
صعبه ولكـن مابـي الكبـد تنبْـط
من دنيةٍ تمشي بلا سلـم وعـروف
ومن حق في سيـره مقيـد مربْـط

يالله إنك ترحم الحـال العليـل
وتغفر اذنوبٍ على متني ثقـال
ياإلهـي جيتـك بقلـبٍ ذليـل
وعين فيهـا دمعتيـنٍ وابتهـال
ساجدنٍ وجهي مع الليل الطويل
سايلٍ دمعي على مـر الليـال
عن صراطك خايفة رجلي تميل
وانحبس مابين غيي والضـلال
والذنوب اتحطني في واد ويل
وانحرم يارب شوفك والظلال
يالهي خايفـة يـوم الحصيـل
باكية من موقفي عند السـؤال
يوم ماينفع خليـل مـع خليـل
ولايشيل الذنب عم ولا خـوال
يالهي جيـت بالحمـل الثقيـل
طامعة في رحمتك ياذا الجلال
راجية جنات عـدن وسلسبيـل
تحتضن روحٍ بغتها راس مـال
روح يكفيها من الـزاد القليـل
لابغت دنيا ولا جـاه وريـال
روح عاشت بالجسد عابر سبيل
للسفر شدت على متن الرحال
وزهبت مزوادها حق الرحيـل
زادها تقوى وخـوفٍ وامتثـال
عارفة ان الامد لهـو طويـل
الخلود لغيـر خالقنـا محـال

مالي بدمعه على خد القمر حاجـه
الدمعـه اللـي تعذبـنـي بأدبـهـا


قلبي بغصبه غصب يفـل إحجاجـه
ويضحك مع الناس واللوعه يحاربها


بعلمه كيف يكسب حربـه وتاجـه
ويحرق فؤاد الذي روحي معذبهـا


بعلم القلب مـن طبعـه ومنهاجـه
بحفظ دروسه وعلى قلبـه بجربهـا


بسقيه مر الجفا واضيـق افجاجـه
الين روحه تضيـق ابهـا محادبهـا


بسوق جيشي عليه ابزمرة افواجـه
رايات نصري على دربـه بنصبهـا


بتعبـه واتسـبـب دوم بزعـاجـه
بسكن في روحه واستوطن مضاربها


بشب فيها لهيـب اشـواق وهاجـه
انفاس صدره بنار الوجـد الاعبهـا


الين روحه تصيح بصدق محتاجـه
لعيوني اللي بنظرة شـوق تطربهـا


بعيشه وسط بحر ٍ تلعـب امواجـه
تهيم روحـه ولا تاصـل مراكبهـا


بعلمه ان عينـي شعلـة اسراجـه
نفسه بدوني ظـلام الليـل يرعبهـا


بخلي رجلـه بدربـي دوم دواجـه
تاصل على الدرب ماتلقـى متعبهـا


ابهلكه ثم ازيـد ابلوعـة احراجـه
هواجسـه لـو تعدانـي بحاسبهـا


امشي معه بالوفا ويقـول منعاجـه
دامه كذا قلـت اخربهـا: اخربهـا

الطير لاشفتـه تذكـرت نايـف
الطيب القرناس راع المواجيـب
اللي تعلا فـوق روس النوايـف
راسه هناك بعاليـات المراقيـب
ستر البني الطاهـرات العفايـف
وشف البني المترفات الرعابيـب
ماهو مثله غيره على الكل طايف
صغير سن وطايفٍ راعي الشيب
ماهو بقولي لكـن الكـل شايـف
فعل الشجاعٍ اللي يفك النواشيـب
نايف فديتك من جميـع الكلايـف
ادري تهزك دمعتي مابها ريـب
ياريح جـدي ماعليهـا حسايـف
لاطاح دمع البنت ماهو لها عيـب
بس أنت لاتشقي الضلوع النحايف
ضيقتك تحرق خافقي بالواهيـب
فدوتك عيـنٍ ماتكـف الذرايـف
ويفداك قلبٍ بين عوج المحاديـب