جزء من ابداعات الشاعراياد المريسي

هنا ساطرح مجموعة

من قصائد الشاعرالبحريني اياد المريسي

يا ناس بحريني

على شان الفؤاد اللــــــــي ربا بين الضلوع احيان
اخلـــــي عشقهـــا جمرٍ بصــــــدري دوم يكويني

لان اللي يشوف بعين قلبــــــي ما يشوف احزان
اجل وشلون لـــــــو شافـــت عيونه ما بهر عيني

حبيبه تكـ/ سر اوزان القصايــــــد لانهـــــــا اوزان
وهي كــــــل الحروف اللــــي اتناثر في دواويني

على فكره!! ...حبيبية خافقي لو هي تجي عنــوان
اشوف ان القلم يفـرح ويتراقص علــــــــى ْيديني

كثر ما قلت ابكتبها اجيـــــــها من الوله عطشان
قبل ما تنطـــــــــــق اشفاتــــــي تلملمني وترويني

وقبل مـــــــا ابدا اناغيها بقلبي... انفجر هيمان
وتتجمع جيــــوش الشوق منــــــي وتبتدي فيني

كثر ما كنت اعشق فـــــــي عيون الفاتنه شطآن
قبل ما تنولد فكرة (اسافــــر )..هـــــــي تناديني

عليها /منّها/ فيهـــــــا/ لجلـــــــها ..لانــها اللحان
تعلمت الشعـــر مـــــــن شــــان اكتبها و تغنيني

اهي حبي وهي امي ..وهي ما هي وطـن!!/اوطان
اهي ديره ازرعت عشقٍ تمرجح بيـــــن ضلعيني

ربيت الثم جدايل خيـــــرهـا وانـــا غريـر لسان
وكبرت وصـرت اتفاخـر الى مـن قـت: ( بحريني)

انا العاشق تراب ارضى وانـا اللـــي جيتكم ولهان
ابي من قلب كل مـــن هو حضـر عمرين يعطيني

عشان احكـــــــــي لكم عنها على نغمة الا يا دان
,اذا عمري وهو عمــــــــــري محال اليوم يمديني

هيا( البحرين) لا.. امــــــــي هي الاشواق والتحنان
وهي صدري إذا ضاقــــــــت صدورٍ مــا تخليني

هيا (البحرين) لي منه نبت فــــي مهجتي بستان
تمر فـ خاطري واجلــــــــــس آسالف بيني وبيني

هي البحرين واتلعثم كمـا طفلٍ صـــــحى نعسان
على ذاك الرمل يكتـــــــــب( دخيلك لاتصـحيني)

وربي ما ذكرت انــــــــي على هذا الشعر شفقان
بعد ما زانت حروفـــــي أسمهــــــا قلـت: يكفيني

وربي ما عبرت البــــــــــــحر.. لكنّي بها غرقان
امانه من لمح يــــــــــــدي امانـــــــه لا ينجيني

ابي تتشرب عروق الولــــــه فيني وظل ضميان
ولا ابي غير اياديهـــــــــا بكاس الوصل تسقيني

على شان الفؤاد اللــــــــي ربا بين الضلوع احيان
اخلـــــي عشقهـــا جمرٍ بصــــــدري دوم يكويني
.
لان اللي يشوف بعين قلبي مـــــــا يشوف احزان
.اجل وشلون لـــــــو شافـــت عيونه ما بهر عيني

عرفتوا ممكلة قلبـــــــــي وحبــــي درة الاوطان؟!
هيا( البحرين) يتمرجح غلاها بيــــــــــن ضلعيني

ابي من كثر مــــــــــــا ردد اسمها تنصت الاذان
وش اكبر فخر من قولــــــــــــة: (انا يا ناس بحريني)

عطشان يالبحرين

للحب/للأشــــــواق لقلوب هالناس
للطيب /واحســــاس المحبه أغاني


للدار واهـــــــل الدار يفتل قرطاس
.وتصير أجمل أغنية فـــــــــــي زماني


من ناي شاعر يعزف الشعر بأحساس
و يهيّض المركب ويشجــي المواني

من قلب ما يعـــرف أبد كلمة الياس
ومن جيتها كـــــــن الفرح ما نساني


يا دانة البحار يا عقــــــــد الالماس
يا اللي تغيض بضحكـــــها هـ الغواني


يا تحفة العشاق يا اعذب من انفاس
عذرى ايتلعثم لــــي طراها لساني


يا (مملكة) حب وامانـــي وهوجاس
الشعر قبل اسمــك شربني وضماني


في صدر شاعرْك الشجر ينطر الفاس
.من شان يحطب هالغلا فــي كياني


يا (مملكة) ويحــــيـــط أسمك باقواس
لانك علـــــى الاوراق غيـــر المعاني


عطشان يالبحرين عطشان الاحساس
.ودي اضمك واشـــــربك لو مداني


بعيش لك عمرين مــــن غير مقياس
وان ما كفاني جبت لــــي عمر ثاني


قومي فديتك واضحكي جعل هالراس
ينام فـــي حضنك وقـــــولي حناني:


يزرع بوجهك شــــــوق ويبعثر الياس
واقـــــول ضمينـــــــــي واغني عشاني


ويتقلب بوسط المحاجر هالانعاس
وانام فــي حجـــــــرك بعشق الاناني


واناغي الفرحـــــه علـــى صدر كراس
واتخيلك في غرفتــــــي وفي مكاني


عيدك غلا /حب/ومحبــــــه ونوماس
فرح ايتراقــص مــــــن غناه المباني


في عيدك الفرحه مثل فرح الاعراس
ننثر عبير الـــــــــــــورد ضحك واماني


للحب/للأشــــــواق لقلوب هالناس
للطيب /واحســــاس المحبه أغاني


من ناي شاعر يعزف الشعر بأحساس
جيت ابحر بشوقي وابيك المواني

قصة حب

يـــا دار !! جيتـــك بـ أســـألك خبرينــــي
وقبـــل اســـألك ودي اضمّك بالاحضــــان

بـــردان صـــــدري بطلــبك دثـــرينــــــي
بـــــردان يـــــا البحريــــن بـردان بــردان

شهــــرين مــــــا غيـــر الضمـــا محتويني
يا لــيــت هــذا الــبــعــد يــا دار " أنسان"


والله نحــــرته لجــــل عينــــك وعينــــــي
وفهقت ضـــلع الشـوق واطلقت الاشجــان


وسيـّـلت لك في صبـــح فـــرّحك حنينـــي
وصــبّيت فـــي كــاس الولــه دمع الاعيان

وشـــلون حالك ؟!ســـولــفي ؟! طمنينـــي
شخبــــار عشّــاقـك ؟! تـرابك ؟! وشطئان:

كــــانت تضـم احــــــلام طيـــرين فينـــي
يــوم ان عشقك نخــل وانفاســـي اغصـان

تدرين يــا البحرين ؟!! ابــي تسمعيني ؟!
ودّي اســولف لك وانــا حـــيل خجـلان !!


بــس قبــل مــا ابدى ليه مــا تســــأليني ؟!
يــا قــو قلبك ؟! رحـت عنـــي؟!وبيبــان :


شـــوقي علــى وجــهــــي وخفقت يدينــي
ويصرخ لك الخافق مـن الشوق : ولهاااااااااان

لحظــــه !!بســــولف لك وابــــي تفهمينـــي
ودّي نـــأجل هـ العتب عــــدة ازمــــــــان


عشــــاق انـــا وانتي ..ابيــــك ..وتبينــــي
ومـــــا يختلف فــــي "سـكة" العشق خلان

الــــــيوم جيتـــــك والفــــرح معترينــــي
الـــــيوم غيـــر ..اليـــوم .يــا عز الاوطان


اليــــوم عيـــدك ..افــــرحي وفــرحينــــي
خــــل تذبــــل بصدري بســـاتين الاحزان


صـــبي الفــــرح يــــــا دار في راحتينــي
ابغتســل مــن ضحكتك ..ليـــن مـــا يبــان

شْْكثــــر محتاجــك وجيتــــك خــذينـــــي
ضمــي ولــــه عاشق مــن الـوجد عطشان


جـالك "م ب ع ث ر" لجل مـــا تــجمعيني
ايووووووه لــو تدري كــم الليل سهــــران!!

يــا مـــــــــا تخيلتك كـــــذا تغــايضينــــي
والبّســـك مــن لـــهفت القـــلــب فستـــــان


وامشّطـــك وآجـــدّل الشـــــــوق لينـــــي:
نثــــرت شعـــرك فوق وجهــــي والامتان

وآعطّــرك ..وآشـــم عطــــرك ..يـ عينــــي:
علــى غنَـــج هـ الفـــاتنه "ليـــــل يـــــا دان"

واغمــز لك بـــرمش الفــــرح ..تلكزينــي
بسّـــك"!!..وينــبت في مـــــلامحْك بستـان

يالله ابيـــــك الحيـــن ابــــي تجـــاوبينــــي
مــــــن مثلي مْـــن الناس عاشق وولهان؟َ!

صباحك غير

صباح الـ..!!أيش؟! مدري أي صباح اللي لقيت اليوم ؟!
صباح أجمل من الضحكه على مبسم طفل يحلم



صحيت ؟! او تو ما فارق عيونك بسمة اليشموم؟!
يفوح الشوق من صبحك الينك بس تتكلم



صباحاتي معك لحظه تفارقني خيوط النوم
وتنسج لي ابتساماتك حياتي ..كيف ما اتعلم ؟!



يا أجمل صبح من بد الخلايق صار لي مقسوم
مع صبحك تظن انني أجي واستأء واتظلم ؟!



صباحك يقسم الدنيا .(أحد راوي /و أحد مفطوم)
صباح ايلخبط اللي مر في صبحك ولا سلم



جبين وْسادتك يبكي شعرْك بحرقة المحروم
صدر هذا السرير اللي حظنْك اللحين يتألم



عيون امرايتك /مشطك/زجاجة عطرك المغروم
زوايا غرفتي /اذني/وانا ..والفرح نتلملم



صباحك.. غير!! ..مدري أي صباح اللي لقيت اليوم؟!
صباح الـ..!!أيش؟! مدري؟! يا حبيبي جيتك أستعلم

اعتراف


اشتقت اضمــــــــــك وآتنفس حنانك
واغفى على صــــدرك واناغي خلاياك

وارسم علــــى وجه اشتياقي عشانك
العمر يضحك كــــــــل ما كنت وياك

لي طــــــار من بين الشفايف جنانك
كن الصـــــــدر والقلب شرفه وشباك

مثل الطفــــل تحرج بضحك زمانك
.وتبعـــــثر العــــــابك بهـالقلب وأشياك

وليمن تثنى فـ الصــــــدر خيزرانك
.آغص/ وأشرق/ وارتبـــــــك /وآتمناك

ما عاد يطــرب مسمعي غير دانك
.تذكر..عروقي يــــوم ترقص لمغناك؟!

اطلقت لخيول الامــــــــاني عنانك
واسابق اسراب الســوالف علـى شفاك

وشلون ينبت ف الضلـوع أقحوانك
يا ريحــة اشــــــواق المحبـين لباك :

عاشـــق فناجينه تبـــــي زعفرانك
وما صـــب قهــوة لوعته غير يمناك

مشتــــاق اضمـــك وآتنفس حنانك
واغفى علــى صــدرك وتسهر خلاياك
.

ذبحني الشوق يا مسقط

احس بضيق يا مسقط كثر ما جيت لك مشتاق
كثر ما ثرثرة خطواتي لْشارعْك باسراري


ذكرت الموعد ..اللهفه..سوالف..ربكة العشاق
ذكرت اللحظه اللي من سببها عفت انا داري


طريقي لك طويل ودرب حلم المبتلي بك شاق
وانا منهك حنين مْن البكى والبعد واسفاري


تعالي واجلسي جـنـبـي بسولف لك عن الاشواق
ابحكي لك عن الطيش..الجموح..العبْث..وامطاري


حكايات "القميص" اللي تشرب شهدها ..وش ذاق؟!
اذا مدّت طــرف ذاك السليـط تعد أزراري


كأن اللي يشوف اللي جري يحتار!!..هذا عْناق؟!!
بلحظة ما ارتمت تلعب على صدري واوتاري


ابفضح هالصبا العاشق مدام انه غدى بي عاق
بشهّــر بالغـرام اللـي لـثـم مـن شـفّـتـي ناري


صبيّه طايشه تقطف غلالها ثرثرات احداق
تجي تركض على صدري تدوس بطيش ازهاري


برغــم او لقــاء جـتـنـي خجوله ..خايفه بأرهاق
تخبي كفها العارق حيـا عن لهفة انظاري


يصيح الخوف من فركت ايايدها صياح افراق
ينز العطر من رعشت اصابعها وانا داري:


تحاول تحبس انفاس الجنون الهادر الدفاق
لجل ما يفضح الشوق الغريق الثاير الجاري



تحاول تختبي عن مد شوق الخافق السراق
كثر ما كنت احاول وبغبائي ابني اسواري



تفاصيل الحكايه مو مهمه وما بقى اوراق
لعب هذا الخريف اللي كساها بحسبة اشجاري


يكفّيني اقول اللي جري منها ولا ينطاق
تخوفني "عليها/ منها"... فيها عبث ضاري


ولي حست بدمعي مكتنز في ضفة الامواق
تجي تسكب دفاها من وفاها بكاسة انهاري


واذا جيت اشتكيها عندها تبادر: "وبالطقاق
اذا ما انته بقد العشق وش جابك على دياري؟!"


اذا يرضيك هذا الرد يا مسقط وش الترياق؟!
وانا فيني عتب سمم شراين الهوى الساري


تعبت الحين يا مسقط واحس الكون هذا ضاق
وجيتك ممتلي ضيقه..عتب..لوم..و...!! على الطاري!!


نسيت اقول يا مسقط سبب عشقي لك الحراق !!
عشقتك من غلاها اللي كسر عزمي واصراري


كسيتك من ملامحها ترف ضحك الصبا الرقراق
ولبّستك سوالفها ...غنْجها ...ضحكها....العاري


قسم بالله يا مسقط اموت بعشقها واشتاق
واخاف آموت يا مسقط وهي ما فكت ازراري


خذي مني قصيدي والفرح والحبر والاوراق
وخليها تجي تسقى عطش قلبي واشعاري

أعشقْه وآحبه


جيت أســأله عــن قلــب هـــو كان يغليه
هــذا فـــؤادي قـــول: أن كـــنت تبغاه؟!
.
.
.

تتــذكــره؟!
.
.
.
تعــرْفه؟!
.
.
.
ويقـــــول :نــاسيه
وكفــوف صـدري تصطـــفــق مــن خطاياه
.
.
.

وآقــول لـــــه : طيب...أبســـألك: تبغيه؟!
وفينــي لســـان الضيــــم مـا كفّ ..والله :
.
.
.
مــا ارخصــت لـــه نفسـي..انـا بس شاريه
لــنــــــــي احــبـــه / واعشقــــه / وآتمنّاه
.
.
.
ودّي أضـــمـــه وأبـتـــدي وأنتــــهي فيه
وتبحــر مــراكب لـوعـتي صــــوب مرساه
.
.
.

مـــا غيــر يلــمــح شــوق عـيني شواطيه
في ذمــتــي كــــــــن الامــل صــار يمناه
.
.
.

لان الـــــنـــدى لــه موعــدٍ فــــوق خدّيه
والصبـــح يــاخذ نــور ضـــيه مـــن ْشْفاه
.
.
.
بـــــه غــنــج/بــه غيره/ اذا ســاقهن تيه
كــلّ العـــذارى حســنــهن مـــــن عطاياه
.
.
.

ان قـــال : (وينـــــك؟!)..جاوب الصدر: لبيييييييه
كـــن العـــروق اللــي بهـــا لقلــب افواااه
.
.
.

يا كــثــر مــا يـــاخـــــذ ولا قلــت : يكفيه
..ومـــن كثــر مــا يجرح وانـــا غص بالـ(آآه)
.
.
.

جتــنــي ضلـــوع الصـــــــدر لجله مشاريه
قمـــــت وفهقت الصــــدر يا عـــــلّ يقراه
.
.
.

(أعشقــــْه وآحبــــــه) ولا قلـــــــــت : أفيه
ليتـــــه يقلـــّط (آهـــــــــــــتي) في حناياه
.
.
.

كل ما ا نتهت هـالـ(ليه؟!)طوحت له (ليه؟!)
خـــاويت انـــا الحيره غصـــــب من سواياه
.
.
.

هــــذي جـــروح تْحــــــــن.. جتني تناديه
لنّــي أحبه/ وأعشقه حيــــــــــــل واهواه
.
.
.


أن حــــــدّ شافه ..ليت يســـألْه: وش فيه؟!
.
.
.
يذكــــــر فؤادي ؟!
.
.
.
يعـــــرفه ؟!
.
.
.
او تناساه؟!




أن حــــــدّ شافه ..ليت يســـألْه: وش فيه؟!
يذكــــــر فؤادي ؟! يعـــــرفه ؟! او تناساه؟!

الفاتنه



الفاتنة.. أم الغنج.. ذابحتني
شيخة حنايا مهجتي هالرزينه

ذباحتي.. معشوقتي ..آسرتني
اللي تتل الشوق من راحتينه

حتى على أنفاسي غصب زاحمتني
وصارت حياتي في صدرها رهينه

البارحه مرت علي وخذتني
مني.. وعطتني للسهر في يمينه

واقفت وانا أتمتم وحيد :اتركتني..؟ !
للشوق .. للهفة .. وبحه حزينه

للدمع..وكفوف الحنان المستني
لين اقشعرت من حنيني ايدينه

غلّفتني لعيونها و أرسلتني
لحظة حنين تشق صدر المدينه

كتبت: "ابيك ولو سنيني عصتني
وما غيرك أنتي اعشقه يالثمينه "

مـدري متى..؟!! لكنها غافلتني
فجّت ضلوعي وازرعت ياسمينه!!

واخضرّت الدنيا معي واسألتني:
منهو سكن قلبك؟!".. وجاوب انينه:

"اللي مـ بيني وبينها.."..وقاطعتني :
تكفى تغيّر هالحروف الحزينه"

ودموعها تعتب تقول اذرفتني
ومسحت بايديني ودبت سكينه

لو دمعها بوجه الزمن فاتنتني
ذابت من دموع الغلا وجنتينه

من بد كل الناس هي ليه جتني!!؟
يعني البلد ما غص به ساكنينه !! ؟

ضمت شقا عمري وهي علمتني
وشلون احاسيسي بيديها عجينه

وأقسمت دام انها كذا ذابحتني
.والله لاتركها بقلبي ... سجينه