ديوان الشاعرة ( عابرة سبيل ) _ رحمها الله

رساله من بدوية

تعال بشرح لك أنا كل مغلوق
تعال شاهدني مع ذكرياتي


لا لا يغرك لبس موضة ومسحوق
انفض غبار الوقت تلقي صفاتي


قرب وطالع معن الشوف يحدوق
وزيف التطور جرده من حياتي


بتشوف في وجهي من الماضي اطروق
أخذت من بطن الصحاري صفاتي


طفلة بثوب مخيطينه ومفتوق
تنطر جديد الثوب بالعيد ياتي


سمعت طرف اخبار عن كلمة السوق
وتاخذ وتسأل هو وجوده ثباتي


طفله سحبها الوقت للهم برفوق
حتي انها صارت من العاشقاتي


وجار الزمن وعرض الحب للعوق
شرق ركايبها وهم مشملاتي


واتلا عهدها فيه يركض ورا توق
مسرود جيب وفي يدينه عصاتي


ويصد لكن يلتفت لي من الشوق
عجلان يلخصني بعين تحاتي


وقفي وخطواته يتلن معلوق
وخلاني ماتنقل عظامي عباتي


ودار الزمان ولا مشي الحظ بوفوق
ومازلت أخفي بالظلام اعبراتي

ولا زلت أنا العب له علي كل طاروق
حتي يجيب الله موعد وفاتي

بريال عارضته

بريال عارضته على السوق بريال
من باعني برخيص والله لأبيعه

من يشتري رجال قصر بالافعال
باع العهود الماضيه للخديعه

رجال يسوى له ثمانين رجال
كل الصفات اللي ملكها فضيعه

له ضحكة تشبه لضحكات الأطفال
ذيب ونظراته حنونه وديعه

وله فزعة منها المجانين عقال
وفجوج لا ضاقت علي الوسيعه

ياما عدل عوجا ثقيلات وطوال
وأنامعاقبته غيور صريعه

والله يسوى له ثمانين رجال
والخبل مثلي لا زعل يب يبيعه

يسألوني

يسألوني عابره وين الجديد
والاجابه ضايقه فيني ملل

راحت ايام السعاده والقصيد
عشتها بين التكانه والجهل

كنت اروض شارد الحرف العنيد
ماعسرني لو بغيته في عجل

فيه اصور لوعة الحب الاكيد
ومنه(اشكل) ماحوى قلبي غزل

ومعه (اسافر) عن معاناتي بعيد
ولأجل حبه ماشحني من زعل

احضنه (فرحة) طفل في يوم عيد
واسكنه (روض) الخزاما والنفل

واحتويته ليت لي (قلب ) بليد
ماعرف (فرق) الجزاله والهزل

والنهايه مابقى عندي جديد
واعذروني صارت ايامي ملل

العيد باكر

العيد باكر أسعد الله ممساك
والله مدري وين خد جلسته

وين انت ياللي عيدنا في محياك
كف القدر من ضيقة الخلق بسته

من يوم ما لوحت لي كف يمناك
لليوم دمعي بالخفا ما حبسته

ومن يوم ماذوقتني حر فرقاك
والياس زرعه في حياتي غرسته

شريت لي ثوب علي شان لقياك
والثوب راحت موضته مالبسته

وشريت عطر ما زهاني يلياك
أربع سنين بعلبته مالمسته

ودفتر قصيد كل يوم يترجاك
مافيه يوم ماسهرت ودرسته

حان الوداع

حان الفراق .. وتم توديع غالين
قسوة زمن وظروف ماهي رحومه

وحاولت ابدل موقف العسر باللين
وأبين قدامه جسور ظلومه

و أعاتبه وأنقد على دمعة العين
وانا - حشا لله - ماني ألومه

و أقول هذا حال كل المحبين
وهذا الفراق اللي تجينا علومه

ومسكت نفسي كن ماصاير شين
أخشى على خلي يشقق هدومه

ثم قلت وش تنطر حبيبي لهالحين؟
أثر ايديني ماسكات كمومه ؟؟؟؟

هيا تغزل

كل ماتصل فيك صبح وليل تشكي لي
من عوج الاوضاع والدنيا ومتاعبها

مليت يا صاحبي مابيك تحكي لي
هالأسطوانه أنا مليت مطربها

حتى خيالك بتال الليل ياتي لي
جروح وعيون معقوده حواجبها

عيشتني بعالم ماهو على جيلي
زهرة شبابي حرام انك تخربها

ياما هجرتك ولا كملت ترحيلي
حبايب ما تعبر عن حبايبها

حبيبتك ما تحمل هالبهاذيلي
إضحك معاها ولاطفها ولاعبها

هيا تغزل وغن وزيد تدليلي
البنت ياحبها للي يداعبها

قلي وش رايك بفستاني ومنديلي؟
الوانهن تعجبك .. أو مانت راغبها؟

وقلي وش رايك بعقدي مع خلاخيلي؟
وشف قذلتي يوم قصينا ذوايبها

وقلي وش رايك بأطباعي وأقاويلي
لاحظ عليها وغيرها وشطبها

خل بيننا انقاش وعلوم وتعاليلي
وامر على البنت وان حبيت طالبها

يامدمن الهم كافي دمع بالليلي
بكره تشبع من الدنيا ومصايبها

دنياك والله .. ماتسوى التزاعيلي
حتى ولاهيب كفو الي يعاتبها

سنين

سنين مامرت علومه عليه
لا علم لا طاري ولا من مكاتيب

سنين في صبري وحالي رديه
بين المحاتى وانتظاري وتعذيب

لا ليل .... لا فرحه.... لادنيا هنيه
يعلم بحالي واحد يعلم الغيب

انا ان تحريت اتصاله عليه
دقات قلبي ضربها ينفض الجيب

ولو دندنت أساوري في يديه
اضم انا الهاتف واهل التراحيب

ابا انطره وابقى بعده وفيه
وارفض على شانه جميع الخواطيب

شعري.. جنوني.. آرائي

مسافرة مسافرة وجمعت أنا أشيائي
بروح أدور لي أرض غير مأهوله

أفكاري مبعثرة والمشي عشوائي
والدرب مخطور والأحلام مشلوله

بروح أمارس جنوني واقتل أعبائي
مابي خوي يخاويني بهالجوله

بحمل معايه صراحه وقول تلقائي
وقصة موادع وقطعة قلب منزوله

وشعري وجنوني وفلسفتي مع آرائي
بطلق لها عنانها وتقول منقوله

في رحتي مستعده أفقد أعضائي
دامني أمنت فيها صرت مسؤوله

مليت وأنا أنظعن بالظهر واستائي
ماقلت لو مرة هالطعن وشهوله

مليت أكفر أخطاء ماهي أخطائي
وادري براع الخطا وأقول منهوله

في رقبتي قلادة وهي سبة إيذائي
من قبل لا ولد وهي بالعنق مغلوله

محتاجه للنفس من ضيقة أحشائي
واشوف مفتاح قيدي مقدر أطوله

يا دنياي

جيت بكتب عن شقا عمري قصيده
مير عيا القول لا ياقف معي

شاف همي والمعاناة الشديده
أكبر من القول وحروف النعي

هاك يا دنياي عمري ما أريده
إضربيني واقسميني واجمعي

أي نعم ماني بهالدنيا سعيده
من نهار ولادتي وهمي معي

عشت محزونه وملتاعه وشريده
وياكبر شي تخبيه اضلعي

مابي بين الناس تبكين و وحيده
وان هجع طرف البشر ماتهجعي

إما موتة حق أو إيدي بأيده
هيه..يارحمة إلهي..أسرعي

الصدفه

مشيت بالزحمه مع الناس بالسوق
ولا ادري من اللي طق كتفي بمسباح

أدرج النظرات من تحت لافوق
وشهقت مثل اللي تواجه بالأشباح

غايب ثمان سنين والقلب محروق
أتلى العهد به تو ماشاربه لاح

واليوم عندي ناحل بين عروق
وعوارض على اصفر الوجه واجراح

والله يا دمع تحدر من الموق
إنه على الموطى من العين لا طاح

يقولون لاتزعل من البعد ياشوق
وانا كما اللي قاضي من جراح