ديوان الشاعرة / ينابيع السبيعي

"بس البلا من ضيع الله دليله"

الوقت محسوب على كل مخلوق
والعمر يمضي بين يوم وليله

صحيح قالوا كل مطرود ملحوق
بس البلا من ضيع الله دليله

الناس مثل بضاعة داخل السوق
والموت تاجر كل شي يشيله

وبين الخلايق للخلايق به فروق
والفرق عند الله لتابع سبيله

بعض البشر مايعرف الكذب والبوق
أحساس صادق والمشاعر نبيله

وبعض الآوادم لا مبادي ولا حقوق
اهل النمايم والنفوس الرذيله

ياكم قلب من عنا الحب محروق
راحت حياته بالوهم عزتيله

وانا عزاي بقمة المجد من فوق
على المعزه والعلوم الفضيله

ماضاع عمري بين عاشق ومعشوق
وترجيع عشره فايته مستحيله

أسمى المبادي داخلي دم وعروق
وقمة شموخي بارق قمت أخيله

واصدق حروفي جاوزت كل منطوق
مضمونها ينعي قلوب قتيله

وقلبي على تلويع الايام مسبوق
فقدت بالعمر الليال الجميله

شلت المآسي واسود الحزن برفوق
وعزي لمن شح الزمان بخليله

"نهاية قلب"

أحرقتني بالشوق حتى الإباده
وكم بي طفيت شموع من غير ترجيح

كنت احسبك للقلب معنى السعاده
شفتك سقيت الروح صد وتجاريح

شلي حصل وازريت عطني الإفاده
تعبت ادور لك بالاعذار تصحيح

صدق المشاعر فيك سير مداده
عجز يداري في الحنايا وانا ابيح

ان قلت ابنسى زاد جرحي وكاده
وان قلت احبك بان في القلب تصريح

يرضيك تعذيبين ودك زياده
ودك تشوف بخافقي كل تبريح

ظلمت قلب بان صدق ووداده
كتب غلاك احساس مثل المصابيح

هذي نهاية قلب عاش بعناده
قلب تقاذف بين الامواج والريح

مدري شجرى للقلب أتعب جواده
يركض ورا ظل فقد كل تلميح

ان كان صدك بالأكيد اعتماده
أغلق انا ابواب الهوى بالمفاتيح

واطفي شموع القلب أعلن حداده
وانهي بصرح الحب قصه وتوضيح

"قناع الغدر"

ظني تروف القلب توفي حقوقه
فلبي وفا في غصة الوقت ناجاك

ظنه تحبه وانتشى في عروقه
أثره مخدوع في حقيقة نواياك

أظهر كتاب الزيف بانت فروقه
الحق يظهر يتضح في سواياك

ساعه تراضي القلب ساعه عقوقه
يا شين طبعك طايع ذيك أو ذاك

وين الوفا والغدر بانت طروقه
هذي حقيقه واضحه قالها فاك

لاجلك ( خفايا الأمس ) كاتم حروقه
والا ( هدية شوق ) أظهر خفاياك

زرع اتهامك واضح في عذوقه
كم ضاق رحم الكون فيني وعداك

تبقى الحقيقه والمعاني سبوقه
واضح معي في مبدأ الحرف واقراك

لا تنتظر من قلب خلك بروقه
بطفي ضيا حبك من القلب وانساك

ما عاد لي تفكير تطفي شروقه
ما دام بقناع الغدر زيف مبداك

والا المشاعر بي تراها صدوقه
ما نامت بيوم الجفا تطلب ارضاك

خلك توعد الله اقوى يعوقه
منهو تسبب بالجفا والخبر جاك

لكن جهاز القلب بانت حروقه
ثم تعرى وانكشف سر مغزاك

"من وين ما ناظرت لاحت طيوفه"

ياشوق قله ماتناسيت ماضيه
لو سبته عمري يلاقي حتوفه

هاجس حروفي بالمحبه يناديه
واهيم مع ذكراه واكتب حروفه

أسهر على همسة غرامه واناجيه
والهم من فرقاه حالي يلوفه

ياشين وقت افراق غالي لغاليه
لاصارت اطعون المفارق تحوفه

لازلت أشوفه في خيالي وأراعيه
من وين ماناظرت لاحت اطيوفه

عمري قضيته في رجاوي لياليه
يجتاحني هم الزمان وظروفه

ليته عطاني الحب باصدق معانيه
من قبل مايرحل ويعلن عزوفه

أعيش في ذكراه لازلت أطريه
وان طال صده ماعليه الحسوفه

يانبض قلبي .. ياحقيقة مباديه
الصمت خيم بين يأسه وخوفه

ياكم قبلي وهقنه أمانيه
والحلم جمره ضمها في كفوفه

"أنثر له اشواقي وخافي كنيني"

أكتب احاسيسي واترجم حنيني
بالحرف والكلمه لخلي واناجيه

أنثر له أشواقي وخافي كنيني
واسرح مع اطياف المحبه واناديه

واسأل متى تفرح بشوفتك عيني
يامنوة اللي ضيعنه لياليه !!

ومتى على الله يوفي الوقت ديني
واللي يبي مني علشانك أعطيه

حبك غدا مثل النفس محتويني
ياحاضر الايام .. ياكل ماضيه

ياغايته في مقبلات السنيني
ياكل ماله ياسبب كل مافيه

يافرحة عيت بدربي تجيني
وعيت تنور بالتلاقي مماشيه

ان قلت هذا ظلم : اطلق يديني
يقول شوفي منهو الشور بيديه

لو كنت حولي ؟ لو سمعت بونيني
قدرت قلب مايغير مباديه

قلت أفهم اللي تقصده ياظنيني
وادري بحبك داخل الصدر مخفيه

ليت الليالي تجمع العاشقيني
وكلن على ماقيل يفرح بغاليه

"شف خفوق ما سمع غيرك ولكن يسمعك"

حبيبي وش تقول بخافق قصة غرامه فيك
نسى الدنيا ومافيها وجاء ينشد عن أحوالك

الخطأ مرضاه : لكن أنت بدمح لك خطاك
ياحبيب عن دروب الغدر طيبك يردعك

أدري انك تفتديني لو على درب الهلاك
وادري ان التضحيه تشرب نقا منبعك

القصيد اللي لشخصك يرسم ابعاده غلاك
والهوى اللي يدفع الخافق لحبك يدفعك

أنت حظي وأنت سعدي والعمر كله فداك
ولو تيسر لي لقانا : مابه أحدن يمنعك

إيه احبك . إيه احبك . والوفا نبضه وفاك
شوفني ياحلم عمري رغم صدك أسمعك

إيه يعجبني عتابك .. بس يحرقني جفاك
كيف اموت الفين مره ولا يبالي مدمعك

ان طلبت الود : قلت كل الود جاك
جاك قلبي وجيت كلي ياحبيبي أتبعك

والله اني فدوة لك وافرح بلحظة رضاك
انت قدرك غصب عني ياحبيبي يرفعك

شف عيوني ياعيوني تنتظر لحظة لقاك
وشف خفوق ماسمع غيرك ولكن يسمعك

والخطأ مرضاه لكن أنت بدمح لك خطاك
ياحبيب عن دروب الغدر طبعك يردعك

"أهرب من اللوعات ..يلحقني النوح"

الدمعه اللي بعثرت لحظة البوح
هدت معالم فرحتي .. حلم عمري

أهرب من اللوعات ..يلقاني النوح
وارجع لدمع البوح والقاه جمري

من وين ماوجهت ؟ ومنين ماروح
تجفاني الوجهات وأحتار بأمري

أقضى نهاري صمت والصوت مبحوح
والليل قضيته على ضو سمري

الى متى ياغربة العمر والروح
لون الامل مابين داكن وخمري

ماعاد فيني قلب يتحمل جروح
لازالت جروحي من أيديك حمري

يامجدد آهاتي من القلب مسموح
الله يبيحك ياسبب كل دمري

تحكي الدموع وتنخرس لحظة البوح
يالعبره اللي حطمت حلم عمري

"والله أنه في عروقي يحرق النبض ويتوه"




حسبي الله عليهم .. كانهم مني خذوه
ماتفيد الندامه والمدامع والحسوف

حسبي الله عليهم شافو الحال وعموه
واجهوني بالمسافه والحواجز والوقوف

اعترف أنه حبيبي :ليتهم كثري بكوه
قبل أحبه كان قلبي ما يحس ولا يشوف

اعترف كان أرخصوني أنه أغلى من فدوه
في حروفي وشوقي والملامح والكفوف

اعترف أن الحقيقه عكس ماعني حكوه
الله أعلم : واعترف له بالغلا قلب عطوف

وش كثر حبه يساوي .. بينهم ياما قروه
في حضوره في غيابه ماتوفيه الحروف

كان حظي ماتجمل وحلمي الاول نسوه
وعلموه ان الخواطر كسرها مابه كلوف

والله أنه في عروقي يحرق النبض ويتوه
وانه أقسى من طعني بالخناجر والسيوف

لو تناثر من عيوني ..في لساني ماحكوه
العتب ما هو عليهم ولا على كل الظروف

بين كل المرايا وبين كل الوجوه
لو نسيته ثواني .. في خيالي يطوف

ليتهم في كل ساعه باعوا الدنيا وشروه
كان عرفوا ليه أحبه واعشقه بين الالوف؟!

ليتهم جاعوا سؤالي أو بعد مثلي ضموه
عن حبيبي والاجابه تنشد المعنى وقوف

"صرخة اغراب"


ضاع الندا يرجع لي الصوت وشفود
صرخه يرددها الصدا ..صدقها غاب

بغير الوفا ماني مع الحب موعود
مالك جدا منك الندا ((صرخة اغراب

طال الجفا وقلب تمناه ما صاب
وجفت به غصون الغلاة المواريف

هبت سموم تلفح زهور و اعشاب
زاهي ربيع احرقه واهج الصيف

يذرى هشيم عودها عصف و تراب
وقاع به النوار أصبح تجاريف

غابت تغاريد حكت شوق الاحباب
ولا عاد باقي من لحنها مهاتيف

من بعد ماهي روضة شوق واعجاب
قفت به الذكرى على واهي الهيف

ياما سقيته باصدق الود ما طاب
نبع الوفاء أسقيه كيف على كيف

ولو صابني باسم الوفاء جور وعتاب
يهون جرحي في رضاة المواليف

عطاني بيمناي ورد و أطياب
وفي كفي اليسرى عهود ومحاليف

واليوم ينسى عهدنا و الغلا ذاب
وين الذي لا جيت هب الهوى ريف

اقسم لي بصدق ووفاء عهد الاحباب
ولا وثق برجواي حسن التصاريف

أدمى خفوقي بالوهم زيف كذاب
اوثق عهوده با لهوى شفتها زيف

مات الغلا في خافقي و الهوى ذاب
ولا ينفع بموت الغلا قول يا حيف

الصدق بين و الكذب ما له احجاب
شمس الحقيقه واضحه صدقها شيف

ياما تماريته غلا بين الأصحاب
واليوم تبقى ذكريات الصواديف

جرح عميق بخافقي ما له اطباب
جف العطا واحيا هموم و تحاسيف

أدمى بشريان القصايد بلا اسباب
ولا لي مع الأشعار نظم ومواليف

مالي جدى من عضة البهم بالناب
حبه مضى ليله حلوم و تخاريف

هذي النهاية صرخته صرخة اغراب
ما عاد يلفى في خيالي لهم طيف

"أمانه لا بكى قلبك"

أمانه لابكى قلبك تذكرني .. تذكرني
وإذا حسيت بك عبره تراها دمعة عيوني

مدام ان الغلا أكبر خطاي ولانت عاذرني
أنا ماشره على اللي دون ماخطي مايحبوني

أنا لاجيتك من اقصى شعوري وانت خابرني
يضيع الخوف والصمت الرهيب ان جيت من دوني

عزاي اليا انكسرت بواقعي جيتك تجبرني
دخيلك وين اروح ان كأنك انت تخيب ظنوني

ذكرتك وادري اني لا ذكرتك مانت جابرني
ذكرتك واعتلى نزفي خفوقي وادمت أطعوني

بكيتك يوم صار الضحك في عالمك يقبرني
ضحكت من البكا لما عرفت اش تعني شجوني

علامك ياسبب جرحي وحزني ماتقدرني
علامي ماقدرت انسى جحودك وانت في كوني

دخيلك وش بقى لاصرت اكابرك.. وتكابرني
وعمر الوجد ماعزا جنون العشق وجنوني

أمانه لا بكى قلبك أمانه .. لا تذكرني
واذا حسيت بك عبره تراها دمعة عيوني