روايتي السادسة: العمر لحظة

- أعدني منك إليّ فإنّني
لطالما هربت من الهوىٰ وبلاؤه
لكنني هويت وجار عليّ الهوىٰ وخذلني
" سأبقى علىٰ العهد دائماً "
أليس ذلك ما به عاهدتني
أين اليمين وأين ما عاهدتني؟


رائعه كل الشكر والتقدير لطرحك الجميل الراقي

دجى الليل معجب بهذا

شكرا عةغريب الديار على المرور الطيب نورت صفحتي المتواضعه ومشكوررره اطيافي حبيبة قلبي ع المرور والتقيم سلمتي لا عدمت مرووركم الطيب اللي شرواكم

تابع البارت الرابع عشر
:

:
:
‏أحب لذة زعله وقت غيرته
‏ أنا لك ولغيرك ما أكـون ..💕
:
:
:
بعد ما ركب سيارته اتصل بحمدة ماردت عليه اتصل بحامد اللي كان مخلص ترتيبات اغراضه وقاله عطني حمده اكلمها ،، دخل غرفة حمده ولقاها مخلصه كل شي وقالت لحامد: بروح معاك يلا انا خلصت..
حامد : هيه انتي بروح مع راشد انا وين تبين تروحين معانا..
ضاقت زود وهي تقول: لا خلاص بروح عند ابويه تحسبتك بتروح بروحك مادري ان عرب وياك..
تازم من لهجتها وقال بحده: انته ثور قتلك عطني إياها وانته منقعنى عالخط..
ارتبك حامد اول مره ،، من صرخة راشد وصوته العصبي والعالي وفر تلفون ع حمده اللي انصدمت من رده فعل حامد ويهه لللي تغير وشافت رقمه عالشاشه تنهدت بضيق وماحبت تحط اخوها فموقف محرج ردت برسميه: مرحبا راشد ..
غمض عيونه ع ذكر اسمه وتنهد وقال: اسسسف والله انى غلطان وادري ان العذر ما يفيد لكن فهميني قبل لا تحكمين عليه باي شي تسمعينه وتشوفينه ..
ردت عليه بهدوء غير عن المعتاد وهي تقول: ان شاء الله ،، حامد وياك وعطت حامد تلفونه ونزلت اغراضها وهي تشوف الأغراض كلهم جاهزه وقالت لبوها : بروح معاك في الكروزر مادام ان الوالده وسهولي بيروحون مع بطي ..
ضحك وهو يقول: حاضرين الغالية ويرها لحضنه وقال بهمس: رشود مزعلنج ..
ضحكت غصباً عنها وهي تقول: انتوا شفيكم عليه اليوم غصب تبونه يزعلني ..
ضحك ابوها وهو يقول : لا بس يبين انه مزعلنج وفيه شي بينكم انتوا الاثنين مفضوحين ..
زفرت بضيق وهي تقول: بابا يا عيون بنتك لا تحاتي زعل عادي وبنتراضى بس اتغلى عليه وضحكت تودي الأغراض في سياره في نفس الوقت دخل راشد بسيارته في الحوش ووقف سيارته وهو يتريا حامد شافها تحط الأغراض في سياره خاله وشاف خاله طالع مع حامد نزل وسلم عليهم وقال: خالي طلبتك
ابتسم فهد وهو يقول: عطيتك امرني ..
ضحك وهو يقول: خل الشوق تسير ويايه لين الشاليهات بنسبقكم نحن وانته خلك مع العمه تراضيها..
جازت له الفكره وقال: والله زين يلا وبصرخه قالها يا حمددده روحي مع ولد عمتج واخوج ..
تيبست في مكانها وهي تحط الأغراض في سياره تسارعت نبضات قلبها ما تبا اليوم بذات تشوفه وتختلي معاه هي فاهمه أسلوبه انتبهت انهم مقربين منها وقالت وهي تشوف بطي: لا عادي بابا بروح ويا بطي ..
فهد بحزم: بتروحين مع راشد يعني راشد ،، وبس من تغلي عليه...
انصدمت من ردت فعل ابوها وهي تشوف حامد يحط اغراضهم في سيارة شاحت بجسمها عنهم وهي تتجه صوب سيارة راشد بتركب ركبت ورى كرسي حامد وهي تقول لحامد: اسفه فديتك حطيتك في موقف محرج والله مب قصدي ...
بزعل رد عليها وهو يقول: خلاص حمده انسي سالفه واذا بينج وبين خطيبج شي لا تطلعونه في في غيركم ترا مالنا ذنب نحن يتسفل فينا ً..
تضايقت من حامد واسلوبه هي ناقصه بعد تلّوّييم سكتت وقعدت وهي مساندة راسها على دريشه انتبهت لراشد يركب ووهو يقول: حيهم الشيوخ نورت السيارة في ذمتي ..
تجاهلته وهي فيها ضحكه يوم صد وطلعها قال: مالت عليج مب ويه حد يمدحج احسن زعلي لين يسدج وبترضين بروحج.. لف راسه لقدام وهو يقول لحامد: سمع سمع الغالي اهداء لگ وشغل اغنية عيضه المنهالي شوق الهجر عطاه حامد بنظرة بمعنى هالاهداء يدل دربه وضحك اما راشد كمل سواقته وهو يدندن ورى عيضه : تعال ولملم شتاتي قربك ينور فرحة ليالينا ،، نسهر ونضحك ونخفي الهم والعله ،، ولا الويع والله ان يبطي وهو فينا ،، ما عاش منهو يهين القلب ويذله،، انا وحبك من الهجران ملينا وطول على الاغنيه على هالمقطع ..وبعد ما خلصت الاغنية شغل اغنية ثانيه لعيضه وطول ع الاخر وقعد يرتبش ويبسسس وهو يغني ويا عيضه وياشر بيده وحتى حامد يضحك عليه عارف ان راشد بيقهر اللي يالسه ورى ،، شوي وحط اغنية عيضه ازعل عليك وخاطري فيك ،، دورت تلفونها في شنطه مالقته تذكرت انها حاطتنه في سيارة ابوها وناستنه ع طبلون وراشد يطالعها من المرايه ضحك عارف ان عدادها فووول شاح بسياره عمداً وطاحت حمده ع طرف وهي تقول بخوف: راشد شفيك انتبه لا تموتنا ..
ضحك من خاطره عليها وقال ويا عيضه على اجمل مقطع يحبه : سمع حامد هالمقطع وايد احبه ،، لا شفت زولك قلت لبيك يا مرحبا يا اعز مخلوق ،، ليتك تقلل من تغليك وتاخذني بمعروف ورفوق ،، ما دامني مغرم وهاويك ،، وغلاي يجريلك في العروق وشوق مضنيني ومضنيك وشله نزيد قلوبنا حروق... وقام يطالع حمده اللي عقدت حوايبها دلاله على انها ما عيبتها الاغنيه او الكلمات علرف انه تفكيرها راح لبعيد وضحك وهو يقول بهمس لحامد: تغار الأخت ..
ضحك حامد وقال: فكونا بالله منكم ماعندكم سالفه مالت عليكم ...
ضحك راشد ووقف عند الشيشه وقال: شو تيون تطلبون ..
حامد: ماي وباسكن واي شي من الموالح مكسرات واجباس ،، لف عليها وقال: وانتي يا بعدهم شو تبين..
رفعت نظرها له وهي رافعه حاجبها وقالت : بتنزل بها لبس لين الشيشه ( واحة ادنوك) ...
ضحك وهو فاهم النغزه وقال: نعم الريال ما يعيبه شي ...
ردت عليه : اها زين ولفت ويهها صوب الدريشه اما راشد نزل وهو يضحك وقال لريال: عبي فول سبيشل و اح صوب الواحة ودخل يتشرى وهو في عقله شي واحد انها لين الحين مصدقه المقلب اللي صار ضحك وما انتبه على اللي في سياره تطالعه ومنطبخه طباخ تتحسبه يضحك للي قدامه وهو مب مفتكر في حد خذ الأغراض وحاسب وطلع وركب سياره ودفع البتترول وراح...
:
:
:
‏نبضي يدق بداخل الصدر لبيـــك
مدري احتويت القلب ولااحتويتك
اسمع معي دقات قلبي تناديــك
حتى عروق القلب تصرخ فديتك❤
:
:
:

بعد ما وصلوا الشاليهات نزلت شاليهم بس تفاجات بوجوده وهو يقول: مافي روحه لشاليهكم لين مايي خالي فهمتي وراح عنها لداخل يعاون حامد بالاغراض وهي كانت تطالعه ومكتفه ايديها ومقهوره وتحارب دموعها مب وقت دموعج يا عيني ابدا مب وقتها حاولت تصرط عبرتها وهي تقول: الله يغربل الغيره وحرتها تحرق اليووف حراق ،، بعدت عن شاليهم وقعدت في شاليه قوم عمتها لين مايوون ..
اما راشد راح صوب الاسكوترات وخذ له سكوتر وقعد يفر في البحر وشوي انه حامد ياينه وقعد يلعب معاه بالاسكوترات ويسوون سباق اما هي فكانت تشوفهم من بعيد وقعدت تصيح ع راحتها الحين الدنيا هدوء ومحد عندهم خلوني اطلع اللي فيني شوي وقعدت تبكي لين شبعت وبعدها ملت من الانتظار دخلت شاليه ريل عمتها وشغلت مكيف صاله وانسدحت وغفت عينها من دون ما تحس ...

انتهى البارت الرابع عشر

اول اطيافي ,روح الندى ,كتف ثالثه معجبون بهذا

دجى الليل
تمضين في تسلسل مشوق
وقافية رائعة في لسان القارئ
ننتظر التتمة

تقديري..

دجى الليل معجب بهذا

دجي حبيت هل بارت حلو

الله يعطيج العافية

دجى الليل معجب بهذا

يعطيك الف عافية احسنتي
روووعه ننتظر البقية
سلمت الايااادي تقديري
دمتي وكوني بخير

دجى الليل معجب بهذا

عطاااء جميييل وراائع


يعطيك العااافيه

دجى الليل معجب بهذا

الله يعطيكم العافيه جميعاً ،، ومشكورين ع مروركم الطيب حبيباتي لا هنتوا ..

البارت الخامس عشر
:
:
:
اتلفت وكَني بينهم .. محُتريك
‏مثل طفل تنكَر هالوجّيه وبكى..��
:
:
:
الجميع وصل على الظهر وياييبين غداهم معاهم وقعدوا في شاليه بو فهد يتغدون ويرتبون الأغراض وبعد الساعه وحده ونص ساروا الجميع بيتغدون وناسين حمده يتحسبونها عند راشد وحامد اللي خلصوا من الاسكوترات ويووا يتغدون عند شاليه يدهم وخلصوا غدا وساروا صاله ودورها بعيونه ومالقاها انصدم وين راحت هاي ليش مايت راح شاليهم بسرعه وأول ما دخل شافها نايمة ع الكرسي تنهد براحه وقرب منها تاملها شوي عن خاطره وقال وهو يقرب منها ويوعيها: حمده .. حمده
فزت حمده ع صوته وهي تتلفت وتشوف المكان توها تستوعب قالت: السموحة غفيت من دون شعور ..
ابتسم في ويههها وقال: فديتج مسموحه بالحل ،، بس اذا تبيني اسامحج زود ردي لي قلبي اللي خذتيه وبسامحج
كشرت في ويهه وهي تقول: بس دخيلك راشد الا اليوم مابا اشوفك ولا أبا حتى اسمع صوتك ارجوك..
بقهر مسك ايدها وقال: انتى مينونه تبين تنهين كل اللي بينا بالحظة طيش
بعدت ايدها عن يده وقالت: طيششش !! والله ما ظني طيش يا راشد ..
فر ايدها بقو وقال: انا عاطنج ويه بزياده ولا انتي ماتستاهلين .. وقام عنها وروح ،، اما هي قامت وراحت بيت ابوها العود ...
:
:
:
وأخفي عنك شيئًا ليس يُحكى
‏فأصمت ثمّ تفضحني عيوني.
:
:
:
ردت الشاليه ودخلت غرفتها تسبحت وبدلت ثيابها وحطت ميكب خفيف وكثفت المسكرا وطلعت لقت عمتها شموخ حضنتها وهي تقول: ودي انام ع صدرج ..
حضنتها شموخ وهي تبتسم: صدر راشد احن عن صدري
بعدت عنها وهي متاسفه ع حالها الكل فرحان بها وبراشد عبالهم انهم اثنين يكملون بعض وابتسمت وهي تخفي الألم والحزن ورى عيونها وقالت لها شموخ : في شي بينكم ..
هزت راسها بلا هي اساساً طالعه تغير جو ليش تنكد عليهم وعليها ابتسمت ونزلت تحت ..
:
:
:
قعدت تجلب في القنوات بملل وتافف ياها حامد وقالها: قومي بوديج السكوتر لفت عليه بفرحه بس خاب ظنها يوم شافته يكلم شموخ عمتها عرفت انه لين الحين زعلان منها قامت بضيق وراحت صوب البحر وراها مزنه تمشي تبا تعرف شو وراها وصلت البحر وطمست ريولها فالبحر وقعدت تشوفهم يوم يلعبون بالسكوترات حامد ويا عمتها ووراشد ويا مزون...
رن تلفونها وهي تشوف اسم المتصل تضايقت بس ردت بهدوء: سلام عليكم ..
ردت بعصبيه وقهر وهي تقول: حسبي الله عليج جانج بتاخذين ريلي مني وبتحرمينه من ضناه ..
غمضت عيونها بالم وهي تقول: هدي يا حرمه ماني ماخذه راشد عنج وعن ولده تطمني بس لا عاد تدعين عليه ارجوج اللي فيني مكفيني .. ردت بفرحه وهى تمسح دموعها وتقول:صدق ماراح تاخذينه مني..
زفرت وهي من الغصه تبا اللي يواسيها وقالت: اكيد ولج عين تنظر ان شاء الله ... وسكرت تلفون وهي تشوفه كيف يلاعب اخته بسكوتر وفرحان مب جنه عنده حرمه بالسر والحين بتربي ،، الله عليك يا راشد وعلى قلبك اللي تقدر تسيّره مثل ما تبا ،، حست بحركه تحت ريولها انتفضت بخوف يوم شرفت قباقيب صغيره وطلعت من البحر بسرعه وحست بالم في مكانهن وراحت صوب شاليه حطت ملح. ع ريولها وطلعت ولقت الحرمات فارشات مقابل البحر ويشوفون الجميع يلعب يلست عدالهم وهي تشوفهم ،، الكل كان يعرف انه فيها شي بس ما يعرفونه يبين ع ويهها كانت طالعهم وتبتسم انتبهت ع صوت عمها اللي قال: الغالية
لفت عليه بتعب وهي تقول: لبيه الغالي..
اشر بيدة ع مكان فاضي قربه وقالها: تعالي هنيه ...
ابتسمت بحب وهي تيلس عدال عمها وهمس في اذنها: اذا فيكم شي لا تبينين لاي حد غيري ...
رفعت ناظر عيونها وطالعته يشبه راشد وايد قصدي راشد يشبهك ي عمي وايد وقالت بهمس: ماقدر عمي أقول سامحني فديتك ..
حضنها بطرف ايده وهو يقول: عطيني تلفونج بدق لربيعي ناسي تلفوني في سياره ...
عطته تلفونها بعد ما فتحته ،، وقام عنهم وسار بعيد وشاف الأرقام كامله وشاف المسج انتبه على المسج:( ردي انا حرمة راشد)
خذ رقم وهو تحت تاثير صدمه كيف حرمته وما يبا يقول ولا يعترف بشيء .. تضايق اويلي عليج يا حمده عشان جي زعلانه..
رد لهم بعد ماخزن الرقم في تلفونه وقال: مارد الريال اذا ياج رقم غريب لا تردين ،، يمكن يطلع هو ،، هزت راسها بطاعه وهي عقلها عند اللي ع سكوتر يلعب وفال أمها،، انتبه عليها كيف تشوف راشد ،، وسار صوب البحر وهو يزعج ع راشد : راشششششد
راشد كان يلعب بسكوتر وما انتبه على ابوه يوم يزقره ويضحك ويا مزووون ويطششررر بالماي ع شموخ وحامد ،، وقف على شاطيء يتريا ولده يخلص من سكوترات ويقبضه ع طرف ،، بعد ربع ساعه خلصوا سكوترات ونزلوا وراشد يقول لمزون: سيري بدلي ثيابج لصقت ع جسمج من الماي ومسح ويهه بفوطته كان حاطنها ع الكرسي مال شاطيء وشرب ماي انتبه ع ابوه ياينه وهو يقول: حيه بو راشد ..
ابوه بعصبيه قال: انته ما تسمعني يوم ازقرك...
انتبه لعصبية ابوه وقال بجديه : افا بو راشد معصب باسه ع راسه وقال: والله ماسمعتك ي الغالي لاهي في الاسكوترات امرني عني فداك ...
سحبه ع طرف وهو يحاول يبعد به عن الجماعه وقال: انته شو سالفتك ويا حمده تباها ولالا،، انطق بسرعه...
طالعه راشد بحده وقال: ابويه شفيكم انتوا اليوم عليه حد مازر روسكم ترا مافينا شي انا وحمده احلى من العسل صدقني..
طالعه بطرف عينه وهو يكلمه بعصبيه: أي عسل أي بطيخ بالله عليگ ،، راشد اذا فيك شي عندك شي ،، معرس سبحان الله من ورانا قولي ..
طالع ابوه بعصبيه وهو يقول: اخسسسي اعرس من وراكم مب راشد اللي يسويها ..
ابوه بعصبيه مسكه وهو يقول: راشد لا تقعد تينني انته ما تعرف ليش حمده زعلانه...
راشد تافف بضيق وهو يحط ايديه ع خصره ويهز راسه بلا وهو يقول: لا حول ولا قوة الا بالله العلي العظيم،، حمده سمعتني ارمس في تلفون ويا وحده وتتحسبها حبيبتي وزعلت وبس عاد انا كملت المقلب عليها بس لا اكثر ولا اقل ...
طالع ولده بغضب وهو يقول: لا مب جي سالفه ،، حمده اكبر من جيه يا راشد..
ضجر من الكلام ودق بريله على تراب بعصبيه وقهو ومسح ع ويهه وهو يتشهد قبل لا ينفعل ع ابوه وقال ابوه: زين اعصابك لا تنفجر علينا الحين بثبت لك شي طلع تلفونه وارسل على الرقم وحطه سبيكر وترياه يرد ،، ردت بعد رنه طويله وقالت: الووو
رد ابوه وراشد يطالعه بعلامه تساؤول: الو مرحبا تلفون فيصل ..
ردت بدلع : لا ي الغالي غلطان ..
طالع راشد وقال: السموحه منج.
ردت: بالحل وسكروا الخط ...
طالع ولده وقال: هالبنت منو،، والرقم ،، رقم منوه ؟؟؟
طالع الرقم وقال بعصبيه: رقم حرمه
ابوه بضيقه: هالحرمه من وين يابت رقم حمده مطرشه لها مسج وقالت لها انا حرمة راشد وحمده ما تتكلم ولا تقول شي انا خذيت تلفونها بدق لواحد من شباب بس في حقيقة الامر كنت أبا ادور ع ضالتي ،، أبا شي يدينك عندي ،، لان حمده زعلها عوف وما تزعل من الهين الحين عرفت بلاها ...
انصدم راشد وهو يقول: تخسسسي تكون مرتتتي والله مب مرتي ..
زفر بقهر وغيظ وقال: من وين يابت رقم حمده وكيف تعرفك ،، وليش تتواصل وياها ..
ضرب الأرض بريله وقال: ماقدر أتكلم باي شي هاي امانه عندي .. لين ايي صاحبها ويشلها...
تنهد ابوه ومسكه من كتفه وهو يقول: راششششد ما دام النفس طيبه تكلم عشان أوقف وياك لا صار شي لا سمح الله ...
مسح ع راسه بيده وهو يخلل أصابعه على شعره وقال بغبن وغم : ما قدر يا بويه هاي امانه وراعيها ممب موجود الحرمه من كثر ما اتواصل وياها عشان العيال حبتني وعرضت عليه الزواج بس تخسي اني اتزوجها قتلها مابا اتزوج ولا غيره انا براعيج لين ايي ريلج وبسلمج إياه لانه موصني عليج وعلى عيالج عاد الحرمه عاشت دور الحبيبه بس كيف يابت رقم حمده ماعرف يمكن يوم سرت هذاك اليوم اشوف العيال واطمن عليهم يمكن خذت رقم حمده من تلفوني بس دام هاي علومها بغير رقمي ولا تيييب لي عوار راس وتدخل بيني وبين حمده ويخترب كل اللي بينا ..
طالعه ابوه وشاف الصدق في عيونه قال لولده: منو هاي ،، وحرمة منو؟؟ وليش هالريال امنك ع بيته وعياله وشو سالفته هالريال...
باسه ع راسه وقال: سامحني يا بويه ماقدر انطق امانه والامانه ثقيله يابويه اني احطها على رقبتيه وارمس بها...
مسكه من كتفه وقال: قول لحمده صدق ،، ترا البنت شارتنك...
هز راسه وراح شاليه دخل الحمام تسبح وتلبس وتعطر وظهر خاري ..
شافهم قاعدين على اليلسة وما شاف غناته بينهم ... دور بعيونه وين بتكون قاعده شافها على شاطيء البحر بتركب اليخت وتغيظ انها بروحها سرع خطواته تجاهه لكن للأسف حرك اليخت قبل لا يوصل ...
راح عند تاجير اليخت وكلمهم يتصلون بشخص اللي يسوق اليخت يرحع لكن للأسف السايق قالهم ماقدر ارجع لان اليخت محجوز للأشخاص عندهم حفله عصب راشد اكثر كيف تركب يخت مني ودرب ،، من دون ما تعرف منو صاحبه وانه محجوز ولالا...
قعد على اعصابه وده يطلع وراها خذ يخت وطلع وراهم على سبيل انه يوقفهم ويطلع حمده منهم ...
:
:
:
ياربّ افتح على وجهي دروب الخير، وَحقق ‏لي رِضاك، وكلّ أحلامي.
:
:
:
اما في اليخت فكان الترتيب جاهز على اكمل وجه ،، وتنسيق وهي الحبيبه قاعده ولا تدري بالدنيا عبالها المكان فاضي ما شافت حد موجود وقاعده على طرف اليخت وتشوف البحر وتشوف العماير والجزيرة والمنتجعات ابتسمت ،، كمية الراحة النفسية اللي انتابتها كبيره وشعور الراحة والبعد عن التفكير ،، وعن المحيط والأفكار السلبيه والاشياء العكسية ،، وعن الزعل وعن الناس المحبطين كم تسوى انك تشتري نفسك وراحتگ وتبعد عن الناس اجمعين وتتمعن في مخلوقات الله وحكمته وصنيعته في الكون ،، حتى الطيور اشكالها وهي تطير من مكان لمكان كانها تغني لك فرح ،، النورس عالبحر وكيف متجمع حول البحر اشكالهم تفتح النفس صوت اليهت في البحر كانه موسيقى في اذنك ،، شكل البحر المموج وخطوطه الزرقاء ورغوة البحر وتموجاته وشكل امواجه ترتفع تقرب وتبعد من شاطي فاقت على لمسة يد على كتفها انتفضت ولفة بخوف وهي تشوف اشخاص يطلعون من داخل اليخت انصدمت وفتحت عيونها على كبرهن وهي تقول: كيف ييتتوا ومنو انتم..
ابتسم وهو يضحك: انتي منو نحن حاجزين اليخت لنا ..
نزلت راسها بحيا وهي تقول: اسفة شكلي ركبت بالغلط والله ما شفتكم ..
ابتسم وقال: بس كيف بترجعين نحن حاجزينه اربع ساعات يعني بيي الليل وانتي معانا.
لمت نفسها وهي تقول بخوف: تكفى طلبتك ،، كونوا بعاد عني وانا ما بحشركم بس خلوني في حالي ..
هز راسه وقال: لا تطلعين منيه وانا ما بخلي حد من شباب ايي من ورى اليخت خليج يالسه ولا تبانين فهمتي ولالا ،، لاني ما ضمن اللي عندي اقدر اضمن نفسي بس ماقدر اضمن اللي وياي عشان جي أتمنى ما تطلعين وانتبه لحد يزقره: شهاااب ..
راح بسرعه وقال: وعديني لا تظهرين تكفين ترا شله نصهم فاسدين وقال بصوت عاليي: ياي ياي ،، ياحميد ...
ودخل وسكر الباب صغير وراه وهو يتنهد لمعة الحزن اللي بعيونج خلج تركبين بلا عقل الله يستر وما يشوفونج المطافيق ...
راح عندهم وهو يقول: يلا يلا دق عود يا نواف وسمعنا صوتك ...
بدى يدق نواف العود بصوته وغنى اغنية ميحد حمد لقيت الدار ...
وكانوا قاعدين وقدامهم أنواع شراب المهيتو ،، وشراب آخر.... ويرتشفون منه ويصفقون ويغنون وبين فترة وفتره يروح بدس عندها ويعطيها بوب كورن ومهيتو بس ما طاعت تشرب خافت منه قالها بسرعه: مسكي والله مافيه شي اشربي يا بنت الناس مابا حد يشوفج ويحس بغيابي وطلع بسررعه وسكر الباب تنهد بخوف وهو يشوف نايف وحميد واقفين عند الباب دفرهم وسكر الباب وتم حميد يوايق من ورى الزجاج يبا يشوف شو ورى الباب قاله بقهر: شفيك توايق مافي شي ترا حسستني انه مغبي عليكم شي يلا يلا نرجع لشله ..
حرك القلاص اللي في يده يذوب ثلج وقال بغصه: انا اموت واعرف شو سرك ورى هالباب وليش تقفله ..
هز راسه بلا وهو يقول تعال تعال ..
غمز نايف لحميد اللي فهم عليه ورجعوا في القعده عنده الطرب والوناسه والدق والدي جي ...
همس لحميد: يوم تحس انه بدى يختفي ع طول بنروح وراه بنشوف شو وراه ...
هز راسه بالإيجاب وقال: خل عينك عليه مب مطمن له حاس فيه شي ...
هز راسه بالإيجاب وقعدوا يسمعون الطرب وديجي ومطولين ع الأغاني اخر شي ،، حل الليل وحل الظلام في اليخت وبعد ماصلى المغرب والعشا جمع طلع وهو يشوف الجو كيف محلو وشاف القمر انتبه لربعه اللي متفرقين في كل مكان وقال: نواف وين البقيه...
ضحك نواف وقال: هههههههه لقوا لهم صيدة وراحوا لها ..
انصدم وفج عيونه نقل نظره للباب وشافه مفتوح ربع بسرعه ونقل نظراته في المكان ،، المكان فاضي مافيه حد سمع صوت صريخ واستنجاد طلع ومسك نواف من قميصه وقال : ي كلب اعراض خلق الله مب لعبه ...
نزل في اليخت تحت ودخل الغرفة وشاف الجميع حولها ،، اللي يحاول يثبتها ،، واللي يحاول يتقرب منها،، دخل بهجوم عنيف وياهم وسحبها بقو بينهم وهو يشوف ويهها كيف بدى يغمى عليهاا وهو يحسبن عليهم ويضارب وياهم نزل نواف وصرخ فيهم: شباب شباب هدوا ودخل يفجج بينهم وهو يكمل كلامه شباب ،، شباب هدوا ،، الله يهديكم ويصلحكم خلاص فجوا عن بعض ومسكهم وطلعهم برى وقف شهاب يرتب تبشيرته وهو يلهث من تعب وقرب منها وهو يحاول يصحيها ويرش ع ويهها ماي لكنها فقدت الوعي لانها من يومين ما كلت وهو يحسبن عليهم حاول وياها لكن ماقدر انها تفيق ،، خاف انها تروح في غيبوبه او يصير لها شي حط عطر في كلينكس وشممها إياه،، على امل انها تصحى بس الظاهر ان الحرمه صار لها هبوط يا اما في ضغط او الدم او هبوط حاد في سكر او انيميا يا ترى هالبنت كيف اعالجها الحين،، خاف عليها وخاف اكثر كيف ينزلها من اليخت يوم يردون سمع أصوات الصريخ واصواتهم العاليه وهم يضاربون بين بعضهم ،، طنشهم وهو يروح فوق وقال لنواف: نواف تعال شوف البنت شو فيها ما دام عندك خبرة مسعفيين لا يكون البنت صار فيها شي ونحن ما نعرف...
نزل نواف وياه لين الغرفة وشاف البنت وقاس نبضها وهو يشوف النبض الضعيف قال بصدمه لشهاب: البنت باديه تفقد النبض ،، عندها نبض خفيف لايكون البنت فيها شي من الامراض وتموت علينا ...
حرك ايديه بتوتر وهو يقول : وانا شدراني البنت لقيت فيها كمية من الحزن وريولها قادتها ع يختنا ،، الحين مب هذا موضوعنا،، موضوعنا كيف نصحي البنت ونرد لها وعيييها ...
زفر بضيق وقال: بحاول اسوي لها نعسششة الصدر،، نعشهها بيده مرتين وحط ايده مكان نبض وقال: البنت نبضها خفيف وماقدر انعش صدر ممكن البنت فيها شي من الامراض ونحن مانعرف ..
شهاب اللي تكلم بعد صمت: روح فوق واذا شفت أي يخت ثاني اطلب المساعده..
هز راسه بالإيجاب وطلع...
اما راشد في. يخته كان معصب وشوي وبيصيح خايف ع حمده يسمع صوت الأغاني ودي جي عالي ومب قادر يوقفهم من الأصوات محد منتبه له قام يكلم راعي اليخت يسررع ويساوي بالمسافة بين اليختين عشان يقدرون يشوفونه...
:
:
اما عندهم طلع نواف وقال بتخويف: في منكم حد سوى شي للبنت لان البنت تعبانه واحتمال قلبها يوقف في أي لحظه ،، الجميع انصدم ووجهوا نظرتهم لحميد اللى ارتبك نواف مسكه من تيشيرته وقال : شو سووويت اعترف ...
نزل عيونه في الأرض وقال: كتمتتتت أنفاسها عشان ما تصرخ وتستنجد بشهاب ..
مسكها بقوو وهو يهزه وقال: كم دقيقه كتمت أنفاسها ...
هز براسه بعلامه انه ما يعرف كم دقيقه بس يعرف انها فترة طويله لو ماعظته في راحة يده كان المفروض هم خالصين منها الحين ،، ضربه ع صدره وهو يقول: عديم مروءه وقليل اصل ونخوه كانت بتموت بين ايديك وانته همك نفسك ورغباتك ،، حسبي الله ونعم الوكيل فيك من ريال البنت بتموووت وانته همك نفسك ورغباتك واشباع ذاتك .. انا لله وانا اليه راحعون ولا حول ولا قوة الا بالله العلي العظيم ..
ودفره وهو يقول: ذنبها في رقبتك لين يوم الدين ان صار لها شي ...
:
:
:
اما تحت فالغرفة كان شهاب يهوي عليها ويفتح شوي من عباتها من قدام عشان يهوي عليها وحاول مره اخيره انه يعطر في ايده ويشممها إياه وفرح وهو يشوفها بدت تنتبه وتتلفت يمين ويسار وتستعيد وعيييها ..

انتهى البارت ...

بحط لكم توقعات وابا ردود عليها..
منو تتوقعون الريال اللي مأمن مرته وعياله عند راشد ؟؟
ومنو الاشخاص اللي في اليخت ؟؟
وحمده هل بتسمع لراشد؟؟
راشد بعد ما يشوف حمده بالمنظر هذا شو ردة فعله ؟؟
اتريا حوابكم وحماسكم ما يزيدني الا حب وشغف الاستمرار ..

ملكة الجوري ,روح الندى ,اول اطيافي معجبون بهذا

كاتبه انيقه ماشاء الله حبيبتي

ب انتظار القادم

اعجابي وتقييمي وتنبيهات

دجى الليل معجب بهذا