ديـــــوان الامـــير عبدالعزيز بن سعود(السامر)

(شــــرطان الـــذهب)





لف شرطان الذهب فـوق المتـون
لفها يـوم التـوت فـوق البيـاض
خاف غضّـات الصبايـا يزعلـون
سيّدات البيض ما فيهـا اعتـراض
إن حكى غصـبٍ عليهـم يسكتـون
وإن سكت تسكت معه كل الريـاض
يـا جماعـه يـوم سلهـم بالعيـون
قال .. يا رمشي من (السامر) تقاض
لوه ما وصـى المدامـع يرحمـون
كان متنا يـوم بـرق العيـن نـاض
يا صـل الله يـا عيـونٍ تقطعـون
وتهلكون الحـي بصحـاحٍ مـراض

(ربيع قـــلبي شوفتــه)





كلّ ٍ يقـول الزيـن كلّـه بخلِّـيْ
أكيد ماشافوا مـن الزيـن حاجـه
ماشافوا اللِّي رمش عينـه مظلِّـيْ
قلبي تكسّرْ منـه كسـرَ الزجاجـه
خـلّ ٍ ذبحنـي بالغـلا والتغلِّـيْ
ربيـع قلبـي شوفتـه وابتهاجـه
هو روح روحي هو بعد كلّ من لي
لاشافني زعلان يضحـك حجاجـه
ويفـز لـي فـزّة محـبٍ يهلِّـيْ
هو طب جرح ٍماعرفتـوا علاجـه
وليشاف غيري صدّ كلّه رضاً لـي
حتى نظر عينه عن النـاس عاجـه
ما غير اناظـر بالخلايـق تسلِّـيْ
والله علم عن خافقي وش مزاجـه
اوادعـه ودمـوع عينـه تهـلِّـيْ
ما باغني قلبـه بموسـم خراجـه

كلمة خفية





أحـدْ يبنـي بدنـيـاه ويـهـدِّي
بغيت أصبر ولكـن بـاح سـدِّي
عجايـب هالزمـان الله يكافـي
طويلـة مالهـا بالكـون حـدِّي
إلى بَرَّقتْ فيها ضـاق صـدري
وش آخذ ويش أخلِّي ويش أعدِّي
أنا فـي خاطـري كلمـة خفيـه
ابظهرهـا ولـو ماهـوب ودِّي
ولا أحـد يستشـك إنّـه هدفهـا
وانـا ماقلتهـا قصـدي تحـدِّي
أحد يخطي وهو ماهوب يـدري
يحسبه تايـه الـراي.. متقـدِّي
وأحد ينطحـك لاجالـه بحاجـه
ولامنّـه قضاهـا عنـك صـدِّي
واحد يلعب على الحبليـن دايـم
ضعيـفٍ لا يجيـب ولا يـودِّي
ونـاس ٍ ماتفيـد بهـا الجمايـل
تراهـم مابهـم مخلـوف كـدِّي
وانا منهـم بـري والشاهـد الله
وطـرف العيـن فيهـم مايلـدِّي
جليس السو ماهو صاحـبٍ لـي
أنا ضدِّه وهو خصمـي وضـدِّي
إلى جا.. قلت يقعد مثـل غيـره
والى أقفى قلت جعلـه مايـردِّي
أنـا ويّـاه مانصـلـح بـديـره
إلـى منـه نـزل فيهـا نشـدِّي
يدوِّرْ لـه مـن العربـان مثلـه
على قدّه وأنـا ماهـوب قتـدِّي
إلـى جاملـت ولياهـا مصيبـه
وإلى صرّحـت قالـوا مستبـدِّي
ابصبر مثل صبـر أيـوب لكـن
بطول الوقـت مانـي مستعـدِّي
وعرف الطيبيـن أكبـر تجـاره
تراهـا كـل يـوم ٍ تستـجـدِّي
مشاهدهـم علـى عـز ومعـزّه
تريح خاطـرك وأنـت متعـدِّي
وجليس الخير يضحك له حجاجي
واعدّه مثل أخوي وصلب جـدِّي

بين الرجا واليأس





بين الرجا والياس ياسعود ضيَّعْـتْ
أحترت أنا مابيـن شـكّ ٍ وغيـره
الظاهر إنِّي ْ من هوى النفس ودَّعْتْ
حبٍّ نصر غارات حربـه كسيـره
على هزايم حبِّـي العـام وقَّعْـتْ
لقيت فـي تـرك المقفيـن خيـره
خلصت أنا مخلاص ميِّسْ وشيّعْـتْ
جثمان حبِّي فـي بدايـة مصيـره
ياليتني فـي حبّهـم مـا تلوَّعْـتْ
عشان الوعهم علـى كـلّ سيـره
مير البلا قلبي عصانـي وريَّعْـتْ
ولا كسبت إلاّ الجـروح الخطيـره
المشكل إنِّي مـن وداده تجرَّعْـتْ
هـمّ ٍ يَرّحْلّنِـيْ علـى كـل ديـره
والظاهر إنِّي في قراري تسرَّعْـتْ
وقلبي من الفرقـا نذيـره بشيـره

(آه من حـــبك)



آه من حبك اللِّي جار جور ٍ عظيـم
كلّ ماقلت ياستّـار جرحـك يزيـد
الضرر صابني من جرحك اللِّي قديم
مالحقني ضرر جرح الحبيب الجديد
في عيوني معاني كـلّ دمـع اليتيـم
واقع الحال من ضيم المحبّه قصيـد
يتمتني ليالي الوصـل يتـم الحشيـم
في قصيدي عذاب الحب حبل الوريد
وقلبي اللِّي عليك من المحبـه يهيـم
طال بالصبر دربه وأنت فض ٍ عنيد
بين حرّ السموم وبيـن جنّـة نعيـم
في صحاري عيونك شمس دنياي جيد
أتِيّمـمْ مقامـك يـوم هـبّ النسيـم
أتلطّـفْ بخنّـة ورد غصـن ٍ بعيـد
فيك هاجوسي اللِّي زارني بك نديـم
إِهدْ لي مثل طيفك يا مُنى الروح عيد

(لـــيالــي نـــجد)




نجـد بلياليهـا عـن أمثالهـا زود
لـو كلهـا عنـد الأوادم ليـالـي
ياللي ليالي نجـد بعيونكـم سـود
يا بعدكم عن فهـم سـر الليالـي
غير الجمال اللي بالانظار مشهود
احساس خافي بين غالي وغالـي
نجد بلياليهـا إلـى هبّـت النـود
عانقت بالفكـر النجـوم العوالـي
وأدركت معنى سامي النبل والجود
اللي تميز بـه فعـول الرجالـي
دار الفهود اللي مناهيجهـم كـود
اللـي منازلهـم سنـام المعانـي
نجد الوفا.. نجد العطا ماله حـدود
نجد المـروّه والشمـوخ المثالـي
نجد الهوى المصيون عن كل منقود
بالعصر الاول.. والعصور التوالي
لي مع لياليهـا مواثيـق وعهـود
العسر منها يسـر والمُـرّ حالـي

(آهـــــات)






آهات من طول العنـا طاولتنـي
ونفسي من الفرقا وحالي صخيفة
جارت عليّ من الفراق وقصتني
غزَتْ ولكـن مانـوَتْ بالنكيفـه
بهمومها اللِّي شفت منها كوتنـي
هذا الذي خلّي حياتـي مخيفـة
باكر يروعنى وانـا فيـه فَتْنِـيْ
أقول ليت الغيب يبخـل بحيفـه
خيل السعاده بالهـوى خالفتنـي
وخالفت معها عيد قلبي وريفـه
هبَّت ْ هبوب ٍ بالنيـا عطّشَتْنِـي
وكم غالي ٍ قبلي ظما من وليفـه
ليت اللّيالي عن غرامي نهتنـي
ولا بدا زرع الأمل منك هيفـه
وإلاّ أنّها في غايتـي خيَّرتْنـيْ
وأختار أنا مرباع قلبي وصيفـه
خلّ ٍ جيوشه بالمحبـة غزتنـي
وانـا أسيـرٍ للعيـون العفيفـه
أغلا هجوس ٍ طول الأيام جتني
هاك الهجوس اللِّي تجيني بطيفه
الماضيات بغيبها مـا انصفتنـي
والمقبلات أرجي عدَلْها خليفـه
أتبع ظنون ٍ بالهوى مـا شفتنـي
أحسب حمولي بالمحبّةْ خفيفـه
واليوم ظالمة المحبـه طوَتْنِـي
طي الورق يوم انطوى به خريفه
وأشباح ياسي بالهموم اعترتنـي
وأنا عليّ أسباب صـدَّكْ كليفـه
أشيل حتفي راضي ٍ فوق متنـي
وأروح نفسي من حياتي معيفـه
وأقـول للِّـي بالجفـا عذّبَتْنِـي
عسى الشقا من بيننـا بالنصيفـه
شربت من فيض الشقا وأشبعتني
دنياً مع الأحزان ضـدِّيْ حليفـه

(ســــيد الغـــناديـــر)




أسمع رسول أشـواق قلبـي يناديـك
وترقص أماني نشوتي لأجل أشوفـك
وآخذ من ظْروف الرخا وقت واعطيك
عسى الأمان يبـدد شكـوك خوفـك
تَغَـلّ ياسيـد الغنـاديـر وأغلـيـك
وأجيب لك عمر الهناء فـي كفوفـك
يجـوز لـي يازيـن منَّـكْ تغلـيّـكْ
وأفهم وأقـدَّر يـا حبيبـي ظروفـك
واحذر حكي عذّالـة الحـب يغويـك
عساك تصحى للحكـي مـا يطوفـك
أنا علـى قربـك شفـوق ٍ وبرجيـك
رجوى أملهـا بالوصـال معروفـك
ياروح روحي بالغـلا كلّـه أعنيـك
الله يجلـى بالهـوى عـن كسوفـك
ما نيـب والله طـول الأيـام ناسيـك
حلفٍ عليّ ماأنسى دقايـق وصوفـك

(من يـــشوفك ملـــكته)






قلت من كثر حبك وين أودي غـلاك
رد وإلا قسمته بيـن قلبـي وعينـي
ما دريت إن مالي فالهوى إلا هواك
باسطٍ لك على شرع المحبة يدينـي
ولع الله قلبي واشتقى فـي رضـاك
سالفتنا بحبك بيـن روحـي وبينـي
من يشوفك ملكته بالهوى يـا مـلاك
في عيونك جمالٍ يسحر الناظرينـي
كل باهي جمالٍ مـا يسـاوي بهـاك
عنه بعد الثرى عن مطلع الفرقدينـي
وبارق العاتق اللي في سحابة سماك
شع نورٍ تكسر من علـى وردتينـي
شفت مثل الشفق يوم انتبه من شفاك
بس مال الشفق في غيبتـه شفتينـي
راح عمري وعمري غالي في رجاك
أترجا وصالك بيـن حيـنٍ وحينـي

(حــــــوريتي)




الله عطاني وكثـر مـا بهـا منـه
حورية الحور نور الروح وعيوني
ما أحلى دلاله وما أحلى بالغلا فنه
إن راح عني على ما راح ودونـي
حوريتـي كنهـا حوريـة الجنـه
ما شفت أبد في حياتي مثل مظنوني
والحب ربي لخلقه والغـلا سنـه
وعيونها بالغلا المختـال وصونـي
قلبي يحب الحبيب اللي على ظنـه
من حبها باح لهل الحب مكنونـي
شوفي خذنـه محاجرهـا وردنـه
حوريتي حبها ما وقف من دونـي
أنا أشهد أن الغلا له ياعرب عنـه
أعن للشوف عنـه وارد شطونـي