ديوان صاحب السمو الملكي الامير خالد الفيصل حفظه الله

(أحـــذر عـــدوك)



..كلٍ يعوّد لاصـل جـدّه ومربـاه
راعي الشرف يشرف والانذال يهبون
..الفْرع من عوده شرابـه ومسقـاه
والحنظلة مرّه ولو تشـرب مـزون
..الطّيـب كايـد والمناعيـر تقـواه
والهون هيّن تدنـع النفـس وتهـون
..ناسٍ على كسب المراجل مضـرّاه
وناسٍ على كسب الفشيلة يضـرّون
..هذا على وضح النقا كـل ممشـاه
وهذا الى شافـوه ربعـه يصـدون
..لا تامن الخوّان لو زخرف حكـاه
من خان بك مرّه يبي باكـر يخـون
..وافطن ترى زول الرّجاجيل تـوّاه
كم واحدٍ يعجبك زولـه وهـو دون
..يا طيّب الشارات من يـوم منشـاه
احذر عدوّك لايغدرك علـى هـون
..ترى عدوك غايتـه فيـك ومنـاه
يزرع بصدرك من قنا رمحه طعون
..والّلي رضع لبوة عـدوّك توقّـاه
الجرو ولد اللبـوة الّلـي تعرفـون
..للطّير يالصقّـار بالرّيـش مغـواه
الجاهل الّلي باكثر الريـش مفتـون
..للحُر والشبـوط ماكـر ومجنـاه
والفرق بالافعال لـو هُـم يطيـرون

(هلّــــــ وطلّــــــــــــه)




...خلّها يا باعث الفرحـات فلّـة
مابقى بالعمر كثر الّلي مضى لـي
...عطني من الحب سقوه ثم علّـه
تزهـر الأيـام وتشـع الليـالـي
...من بغى دربٍ سأل عنه ودلّـه
ما يرد المهتـوي صعـبٍ وغـالِ
...اطلق الخفّاق مـن قيـدٍ يتلّـه
كسّر الجنحان مقصـور الحبـالِ
...تبري الّلي صار به تسعين علّه
من نظر حالي نشدني كيف حالي؟!
...مابقى لي حال نشّ الحال كلّـه
الله يعديك ظلم الّلـي جـرى لـي
...كل شهر للقمـر هلّـه وطلّـه
وانت لك عامٍ وبدرك ما بدا لي!!

(أفــــكاري)





..ركضت الحق الهارب ومتمرّد افكـاري
ابا اروّض الفكره على حالـي الجـاري
..ابا اقضب عنان الطامح الجامح العاصي
ابا المس حنان الساهـم الحالـم السـاري
..ابا اجمع شتاتي عقب رحلات غرباتـي
واناغم هواجيسي علـى باكـي اوتـاري
..تعبت –وجرحني يا اهل المعرفة- دربي
وطالت مسافاتي وانـا اطـارد افكـاري
..وراها توارى من ورا حاضـر ايامـي
وراها تسافر مـن ورا قـدرة اسفـاري
..وراها تواري عجزي تشوفـه عيونـي
وراهـا تطيـر وكلـي قيـود واعـذارِ
..حبسني رماني بالثرى والسمـا حلمـي
اغازل سحاباتي وانا اكتب لهـا اشعـاري
..اروّح لها صوتي مـع رايـح النسمـه
واقول امطري ياغيمتـي جفـت انهـاري
..ويمسي علي الليل خالـي وانـا خالـي
لا باح لي سـرّه ولا بحـت باسـراري
..نجوم السما تقدح وليلـي بهـا ساكـن
عجيب السكون بليل فيـه الفلـك جـاري
..ويافكري الهـارب ويانـوري الغـارب
بدونك فراشاتـي تهـاوت علـى نـاري
..وانا لو عذرت الغير مااعـذر افكـاري
انا موطـن افكـاري ودار الفكـر داري

(أبي منه الخبر )




أبي منه الخبر و يقـول للّـه
لفى المرسول ما عيَّن محلَّـه
و قلبي تايهٍ مـن عـام الاوّل
ألا يا الله يسّـر مـن يدلّـه
خذاه اللّي على خدَّه علامـه
سوادة غيم في شمسٍ مطلّـه
سرقني ما دريت انّه سرقني
سلبني و أحسب إني فاطنٍ له
انا يوم أرسل عيونـه لقلبـي
عطيته مهجتي و المعطي الله
نصف زين الخلايق في عيونه
و باقي الزين في باقيه كلّـه