بلا منطق للكاتبه : جرة

قال بابا بتنهيدة:ما أدري يا بنتي أصدقك ولا لأ...!
أكره نبرة بابا دي..تحسس سامعها بإنو حقيييير و مو متقي الله فيه..على عكس الواقع...!
اتنهدت:إلا ما قلتلي..ليش اتصلت...؟!
-و هذا سؤال تسألينُه أبوكي...؟!
-لا بس قلقت..يعني مو متصل في دا الوقت إلا و في شي...!
-إنتي شكلك تبغي الدُغري...شوفي جود..أنا جايك ذحين...!
-نعم...؟!
-يا بنتي ما يسير..شوفي أنا بقدر ظروفك و أتجاوز و أقولك ما يسير..المفروض إنك ترحبين فيا...!
-ما يحتاج تقولي أنا أعرف الواجب لكن استغربت..إنتا فاجئتني...!
-خلاص طيب أنا جايك ذحين...!
قلت بأسلوب حاولت يكون لطيف:طب..يعني بس حتمر..لإنو أنا مني جاهزة و علي يرجع تعبان ما يقدر يشوف أحد...!
-و إن كان..في شي اسمه أسلوب...!
-آسفة..إنتا فاجئتني..كمان..علاقتي بك ما تخليني أو تخليك ترحب بيا في أي وقت...!
-قصدك نظرتك لي...!
عضيت على شفتي السفلى..كنت عارفة بابا ما حيفهم كلامي لكن ليش قلتلو..مادري...!
-طيب ما رديت عليا دحين..إنتا بغيتني في موضوع...؟!
-ايوة بكلمك في شي و بمشي...!
ابتسمت:أجل حياك الله...!
-بدري!!
و قفل،حطيت الجوال جمبي و قمت رحت لسعود إلي ما زال يلعب في السيب...!
قلت:سعود...!
-نعم...؟!
-حبيبي قوم ادخل غرفتك..جدو ذحين جاي و أبغاك تقعد في غرفتك و ما تخرج هوا يبغاني في موضوع...!
قال بملل:جدو أبوكي...؟!
-ايوة...!
وقف و قعد يبربر "يتحلطم" و هوا يدخل الغرفة:كل ما يجي إدخل الغرفة إدخل الغرفة..ليش هوا مو إدخل الغرفة؟!"
صادق سعود..بابا عمرو ما جا كزيارة اب عادية لبنتو...!
روقت الصالة و جهزت شاهي في طقم مرتب و قعدت أستنى...!
ما استنيت وقت طويل لين ما دق الجرس و قمت و قلبي يدق بقوة...!
حسيت بالغيض من نفسي..ليش أتوتر..ليش مني قوية و جامدة..ليش دقات قلبي و حرارة جسمي يخونوني في المواقف دي..ليش...؟!
فتحت الباب بعد ما اتأكدت إنو بابا و بكل غباء أخفضت بصري و أنا أقول:اتفضل...!
دخل بابا:زاد فضلك...!
قفلت الباب و أنا أسحب نفس أما بابا فجلس في الصالة قبل ما أقول _كعادتو_...!
كنت حتجه للمطبخ أجيب الشاهي و بقية الأشياء لكن بابا وقفني:جود..تعالي اجلسي...!
-الشاهي جاهز...!
-ما رح أشرب شي عندك...!
مادري هل قصد بابا يهينني أو يجرحني بجملتو دي...؟!
جلست في نفس الكنبة إلي بابا كان جالس عليها..كانت طويلة كفاية عشان يكون بيني و بينو فراغ معقول و مُريح ليا...!
إلي قطع الصمت كان أنا،قلت:ايش الموضوع إلي بغيتني فيه...؟!
طالع بابا فيا بابتسامة:ايش هذا..لا سلام ولا كلام...!
طالعت في بابا لثواني قبل ما أقول:كيفك...؟!
-بخير ما دام إنتي بخير...!
يا الله قد ايش أحب دي الجملة من علي و عمو و جدة..أحسها طالعة من قلب..أحس إني لو قلتلهم إني كويسة حيرتاحو و يسيروا من جد بخير...!
-بابا ايش الموضوع إلي بغيتني فيه...؟!
قطب حواجبو:يا بنتي إنتي ليه كذة..فيكي عجلة و قلق و علطول مربوشة...!
قلت بقهر:طبيعي بقلق..إنتا من يوم الخميس ما سألت عني..رحت المدينة و رجعت ولا كأنو شي..دحين..تتصل عليا في الصباح و تقولي ابغاكي في موضوع و ما تباني اقلق...!
-احترمي نفسك و لا ترفعي صوتك..و إنتي إلي ما اتصلتي و بعدين لا تلعبيلي دور الخايفة المفزوعة..خلاص بقولك..أنا جاي هنا أبغى أتكلم معاكي في وضعنا...!
تصدقوا ارتحت...؟!
أنا من يوم ما قلي:"أبغاكي في موضوع" و الدراما عندي شغالة..اتخيلت أحداث و أشياء زادتني قلق..لكن ما دام قال وضعنا فألف حمد و شكر...!
-شوفي جود..أنا بأتكلم و أقول لكن بشرط تسمعيني و ما تقاطعيني...!
قلت و أنا أتنهد:اتفضل...!
-أنا يا جود كنت ناوي أناقشك في فعلتك يوم الخميس لكن عمك رجاني ما أتكلم و لا أنا شايف إننا لازم نوعيكي لغلطك...!
طالعت في بابا و أطلت النظر لحد ما قال:ليش تطالعي فيا كذة..كلمة الحق ما ينزعل منها ولا إنتي شايفة غير كذة...؟!
-لا ما ينزعل منّها بس للأسف ما نقدر نقولها دايماً...!
-في هذي صادقة و معاكي حق...!
لا تتوقعو أناقشو في كلامو و أقولو نفس إلي قلتو لعمو..إلي قدامي إنسان ما يفهم..لو قلت إلي قلتو لعمو حيفتح معايا نقاش سخيف أترفع أنا عنو...!
بابا:أنا يا بنتي جايك اليوم بنفسي عشان أقولك إن إلي قاعد يسير غلط..ما ينفع أنا و إنتي نستمر كذة..الناس بدأت تتكلم و أنا مني خايف على نفسي قد مني خايف عليكي..أنا مني أناني زي ما تقولين..أنا خايف على أولادك و بيتك..أنا يا بنتي...
وقف بابا كلام و كأنو مو قادر يكمل...!
منظر بابا و نبرتو كانت مثيرة للشفقة..كنت على وشك أتعاطف معاه لكن صوت بداخِلي دوى:"كدااااااااب"...!
حاولت أتجاهل الصوت لكن ما قدرت..ما قدرت أتعاطف..ما قدرت أبدي أي ردة فعل..لكن قدرت..بس قدرت _بعد ما دققت النظر في عين بابا_ أشوف قد ايش الصدق أبعد ما يكون عن كلامو...!
شفت أشياء كتيرة وحشة في عين بابا..أشياء من زمان عارفتها و شايفتها لكن دي المرة غير..دي المرة شفتها كلها مرة وحدة الشي إلي خلاني أقول بكل ثقة و حزم:أوكي بابا..أنا ممكن أبدأ معاك صفحة جديدة لكن بشرط...
طالع فيا بابا بحواجب مقطبة،قلت:أبغى أعرف كل شي من يوم ما غلطت لحد ما حطيتني عند جدة و عمو...!
بابا انصدم و سار يتنفس بصوت مسموع...!
أما عني فما بعدت عيني عنو و أنا أستنى...!
شفايف بابا..بدأت ترتجف..وبدأ يطلع أصوات قصيرة متكرررة كأنو يبغى يقول كلمة معينة بس مو قادر...!
شوية شوية حسيت بوجه بابا يحمر..خُفت..مابغا يسير لو شي عندي و بسببي...!
قمت بسرعة و جلست جمبو..حطيت يدّي على صدرو و اليد التانية لفيتها على أكتافو و قعدت أسمي و أقرأ عليه و أهديه...!
و الحمدلله بعد مدة هدي بابا و رجع وجهو طبيعي و عضلاتو ارتخت..اتنهدت أنا براحة..لالا..لا تحسبو حب أو اهتمام..أنا في دي المواقف أحكّم إنسانيتي لا أكتر و لا أقل...!
قلت:أجيبلك شي...؟!
-موية...!
جبت لبابا موية..شربها مرة وحدة و حط الكاسة عالطاولة إلي قريبة منو...!
قلت:أحسن دحين...؟!
طالع بابا فيا بعتاب فقلت:هدا شرطي و طلبي..أنا من حقي أعرف كل شي...!
قال بابا بانفعال:ايش تبغي تعرفي أكثر من إنك بنت حرام...؟!
حسيت بدمي يفور..قلت:أول شي وطي صوتك سعود لا يسمع و يروح ينطقلي الكلمة في كل مكان..تاني شي في أشياء كتير مي واضحة لازم أفهمها...!
همس بقهر:ايش..ايش...؟!
-أمي..اسمها و أصلها و كل شي عنّها...!
-تسألي عن وحدة حقيرة ليه...؟!
-أبغى أعرف..أبغى أعرف حقيقة هدي الإنسانة إلي قلتو إني على خطاها..أبغى أعرفها أو على الأقل اسمها...!
قال بابا و هوا يتجنب يطالع فيا:أنا جاي هنا عشانك و عشاني..مو عشانها أو عشان حكايتك...!
-حكايتي هيا حكايتك هيا حكايتها...!
-لأ...!
مسكت يد بابا و قلت برجاء مستميت:بابا الله يخليك..الله يخليك قُلي..أنا مابغا منك شي غير إنك تقولي..الله يخليك...!
سحب بابا يدّو:حيفرق معاكي شي...؟!
قلت و دموعي كانت قريبة:بابا الله يخليك..الله يخليك قولي..أبغى أعرف...!
قال بشدة:جود خلاص..قلت لأ يعني لأ...!
بكيت من شدة بابا:أبغى أعرف..إذا كانت حقيرة و كلبة و بنت شوارع زي ما تقولو كيف جيت..كيف حملت بي...؟!
بابا بانفعال:اتقي الله..هذا مقدر..حتعترضي على ما كتب الله...؟!
-أنا ما أعترض..أنا أبغى أعرف..بس أبغى أعرف...!
بابا بنفاد صبر:تعرفي ايه...؟!
-أبغى أعرف كل إلي سار..حكيني الحكاية...!
-و مين إنتي عشان أكلمك في موضوع زي هذا...؟!
طالعت في بابا و قلت بحزن باكي:أنا الموضوع كلو..بابا ارحمني و ارحم حالي..قُلي..أنا تعبت..أنا أحس إنو كل إلي أعرفو غلط بِـ غلط..أحس إنو في شي ناقص و أبغى أعرفو..من حقي أعرفو...!
قال بابا بتنهيدة:أستغفرك ربي و أتوب إليك...!
طالع فيا:قد ما تبغي تعرفي قد ما أنا مابغا أقول..يا بنتي أنا أتألم لمن أتذكر..صعب عليا أتكلم..صعب...!
-أنا أواجه نفس الصعوبة..بابا إنتا لازم تتكلم..لازم تجبر نفسك تتكلم زي ما أنا جبرت نفسي من قبل على أشياء كتيرة أكره أسويها عشانك و عشان عمو...!
سحب بابا نفس و قال:حتكلم..لكن فيه تفاصيل أعتذر عن إني أقولها...!
-براحتك..المهم أفهم و يسير في شي ممكن الواحد يصدقو...!
-كان عندي شغل..المدير طلب مني أرتب ملفات ما يستأمن عليها أي أحد و أنا ما حبيت أوقف و أكمل شغل بكرة...!
كنت مسلمة كل حواسي لبابا..سمعي و بصري و فؤادي...!
-كان الوقت ليل لمن خلصت و كنت حركب سيارتي لكن...
عض بابا شفايفو و نزل راسو لتحت:وقفتني "لمى" لمن قالتلي بإنها تخاف تركب تاكسي لحالها في ذا الوقت و رجتني أوصلها...!
صدري سار يهبط و يطلع،قلت:لمى أمي...؟!
غمض بابا عينو و فتحها و هوا يهز راسو بايوة...!
قلت بتساؤل لنفسي:لمى...؟!
و كأني بحاول أثبِّت الاسم..أمي أنا..اسمها لمى...!
-ايوة لمى..لمى أو خديجة...!
طالعت في بابا باستغراب فقال:اسمها خديجة لكننا كنا نناديها لمى...!
قطبت حواجبي:ليش كانت لكم معرفة قوية بها..و مين كنا..مين تقصد...؟!
-الشركة..الكل يناديها لمى..كانت في الورق بس خديجة...!
طالعت في بابا و قلت و أنا أرجع قصتي ورا أدني:و بعدين..وصلتها و بعدين...؟!
سحب بابا نفس و قال و هوا لا زال يطالع تحت:وصلتها لشقتها و...
قاطعت بابا:شقتها...؟!،ليش مالها أهل و كيف شقتها..احنا هنا لازم محرم...!
قال بحقد:هذي وراها ناس..تسوي إلي في راسها و تضرب بالقوانين عرض الحايط...!
-طيب وراها ناس و جنية و تسوي إلي في راسها..لكن مين هذا إلي يسكن وحدة زيها في عمارتو...؟!
-لا تسأليني عن أي شي..أنا مادري..هيا دلتني على عمارة و وصلتها لها و بعدين طلبت مني..
قاطعتو:معليش..لحظة لحظة..العمارة..كانت عادية ولا...؟!
طالع بابا فيا بغضب:ايش قصدك يعني...؟!
قلت و أنا أرفع أكتافي:ما قصدي شي..بس أبغى أعرف...!
-جننتيني أبغى أعرف أبغى أعرف..العمارة ما كان فيها شي يشكك..كانت عمارة زي هذي إلي إنتي ساكنة فيها...!
بعد صمت ثواني قلت:ايوة و ايش طلبت منك...؟!
-طلبت مني أوصلها لشقتها و...
قاطعتو بهمس مصدوم:و توصلها لشقتها ليه...؟!
-قالتلي خايفة و...
-تاكل تبن خايفة..أحد قلها تتأخر عن بيتها..ايش الـ...
بابا ما صدق أوقف في صفو:فعلاً كانت حقيرة و كلبة و ماكرة و...
قلت:و بعدين..ايش سار...؟!
قال بنرفزة:سار إلي سار...!
قلت بغيض:يعني ايه سار إلي سار..يعني ايه...؟!
-إنتي غيبة..ما تفهمي...؟!
-أنا مني غبية..أبغى أعرف كيف...؟!
قال بعين اتوسعت بشكل مرعب:كيف ايش...؟!
قلت بصوت مرتجف:أوكي أنا غبية..أنا مني فاهمة..فهمني...!
أعاد التساؤل:إنتي غبية...؟!
-ايوة غبية..يلا فهمني...!
قال و هوا يحرك يدّو:طلعتها للشقة و حلفت عليا أشرب شي عشان تعب الطريق و..و..
طالعت في بابا و أنا أحس بالحزن يسيطر عليا:خلعت عبايتها...؟!
طالع بابا فيا بصدمة،قلت بصوت باكي:فتحت شعرها...؟!،اتمايلت قدامك زي الـ...
بدأت أبكي..غطيت وجهي بيدّي و قعدت أبكي...!
بابا خاف:جود بس..بس خلاص..جود اذكري ربك...!
قلت و أنا مغطية وجهي:ليه..ليه كده تسوي فيا..أنا ما سويتلك شي..ايش كان حاوجك..زوجتك ايش كان ناقصها..جمال و لا حُب ولا أخلاق...؟!،إنتا ليه كده سويت فيا..أنا..أنا ما سويتلك ولا حاجة..أنا..أنا ما..أنا...
بابا حضني فازداد بكايا...!

ما أبغاه يحضني..ما أبغاه يكون أبويا..ما أبغاه هوا..أنا أبغى عمو..أنا ما أحبو..مابغا أبوية يكون كده..مابغا هدا يكون جد أولادي..ما أبغاه يكون نسيب زوجي..ما أبغاه..أنا أبغى واحد تاني..أبغى رجال..أبغى اسمي يكون تحت اسم رجال..أبغى أحط عيني في عين كل الناس و أقول:"هدا بابا"،بكل فخر أقولها زيي زي أي وحدة شايفة في أبوها الرجل المثالي...!

تركني بابا بعد ما خف بكايا،قال:عشان كذة ما بغيت أقولك...!
مسحت دموعي و اتظاهرت بالقوة لإنو جا على بالي سؤال يحتاج قوة...!
قلت:أنا..أنا بقي عندي كم سؤال يحتاجو إجابة...!
-اسألي..معد بقي شي يتخبى...!
-آآ..هل..كنت إنتا..يعني..أبغى أعرف لو..إنتا..أول أحد..قصدي..يعني..ماما..يعني إنتا..إنتا أول شخص لها ولا...
-نعم...؟!
طالع فيا بصدمة مخلوطة بغضب و خوف:إنتي..إنتي كيف تتجرأي و تسأليني هذا السؤال..كيف...؟!..لا..لا إنتي..إنتي شي ثاني..إنتي شي مو طبيعي...!
-جاوبني..ايوة ولا لأ...!
بصراحة..ما سرت حاسة بأي شي..كنت بس أبغى أعرف و أعرف..تماماً زي المدمن..بس يبغى المخدرات من غير لا يفكر بالطريقة و الوسيلة...!
قال بابا بانفعال:مو من حقك تسأليني ذا السؤال...!
-بابا إنتا لو جاوبتني حرتاح و حفهم أشياء كتيرة أنا مني فاهمتها...!
-إنتي ايش تبغي و ايش تقصدي بالضبط...؟!
-بابا إنتا عارف كويس أنا ايش أقصد..أنا عارفة مو مفروض أحط عيني في عينك و أسألك في شي زي كده لكن وضعي و وضعك غير..بابا أرجوك جاوبني...!
-يا بنت استحي..إذا منتي محترمتني كأبوكي احترمي سني..احترمي شيبتي..احترمي ولدك إلي جوة..احترمي إلي في بطنك..احترمي نفسك وذاتك...!
-ذاتي...؟!،ذاتي تعبت من كُتر الاحترام..ذاتي تبغى تعرف ما تبغى تضايقك والسلام..ذاتي ما طلبت منّك تقول إلا..ايوة أو..لأ...!
-إنتي سألتيني و أنا من حقي أجاوبك أو ما أجاوبك...!
-طب بس هُز راسك..بس...!
-يا بنت ايش في راسك إنتي..قاعد أقولك لأ ما رح أجاوب...!
-بابا..أنا من حقي أعرف تفاصيل قصتي كاملة..جاوبني..جاوبني إنتا كده تاخد ذنبي.."تابعت بطفولية"..بابا أنا ما رح أسامحك..لو ما جاوبتني ما رح أسامحك و حيقعد دا السؤال في نفسي ليييييييين...
قاطعني بصرخة:"لأ"
فزيت من الصرخة المفاجئة فقال بابا:لأ..ارتحتي..خلاص أخذتي المعلومة إلي تبغيها ولا لسه عندك أسئلة قذرة ثانية...؟!
سكت..كنت أبغى أضيف دي المعلومة للي عندي..رغم إني كنت متوقعة الإجابة لكن لمن انقالت في وجهي و صاحبها إلي متأكد منّها صرح بها ليا حسيت بشي تاني..حسيت بها أقوى و أوسخ و أبشع...!
شي..يعور القلب...!
اتنهدت بهدوء و بطئ لكني رفعت راسي بعد ثواني و أنا أحس الإستماتة في إني أعرف ترجعلي...!
قلت بصوت واطي:طب بابا..لمن ماما حقيرة و بياعة هوى كيف جابتني..معقول ما كانت تاخد أي موانع...؟!
أخفض بابا راسو:مو هنا العجيب.."رفع راسو و صوتو"..مو هنا إلي مني قادر أصدقو..أمك في حياتها ما حملت..أمك كانت تاخذ موانع..طول عمرها..من يوم ما صاعت..المفروض تأثر عليها حتى لو وقفتها..لكنها حملت..حملت فيكي رغم كل الموانع إلي أخذتها...!
طالعت في بابا بعجب:حملت بي و هيا مداومة على حبوب تمنع الحمل...؟!
طالع بابا فيا باستغراب لمن قلت و أنا أحاول أحشرو:طب مو هيا كلبة و حقيرة..ليش ما حاولت تنزلني...؟!
-إنتي ما عندك إحساس..أنا أكره أتكلم في ذا الموضوع..أتألم و ما أحب أنسأل في ذي التفاصيل...!
-إذا كنت تتألم فأنا أتألم أكتر منّك..بابا أنا و إنتا في دا الموضوع مافي بينا خصوصية أو حساسية..جاوبني بابا جاوبني..ولا أقولك..قولي القصة كلها...!
-أقولك عن ايه؟؟!!،عن وحدة من عجايب الدنيا ولا أقولك عن عقاب ربي ليا..أقولك عن ايه ولا ايه...؟!
-قولي عن كل شي..و زي ما اعتبرتني عقاب..اعتبرني رحمة..ربي عجلك عقابك في الدنيا..ربي يبغى يطهرك من ذنبك و إنتا زعلان...؟!
كلامي كان زي البلسم بالنسبة لبابا..حسيتو لان و هدي و حيقولي على كل شي..أنا ما قلت إلي قلتو تخفيفاً عن بابا..أنا قلت إلي قلتو عشان أبغى أعرف..كوسيلة لإقناع بابا إنو يتكلم..و سواءً كان في كلامي شي من الصحة أو لأ فأنا ما يهمني..أنا بس أبغى أعرف..بس...!
طالع بابا فيا بتأثر..بابا شخصية غريبة..غير متزنة؛دحين متأثر و ممكن يقلب معايا 180 درجة للأحسن لكن بحلول الصباح يرجع يكرهني..عادي..عادي جداً...!
ابتسمت:يلا بابا حكّيني الحكاية...!
اتنهد:حملت بك...
قاطعتو:لحظة لحظة..إنت ما كنت خايف تعلم...؟!
-لأ..كانت معروفة فاجرة..و معروف عنها ما تتكلم و تتبلى إلا على إلي يصدها..أذكر مرة اتبلت على واحد و في الأخير طلع مطنشها لأنها أكبر منُّه و كمان كان متربي فما أعطاها وجه..حقدت فاتبلت..غير كذة ما تنطق بحرف...!
في نفسي..حبيت دا الشاب و بقوة..لو بابا كان زيو!!!
قلت:المهم إنتا..بعد ما غلطتوا و حملت..ليش قالت لك..المفروض تنزلني سُكّيتي و ما توجع راسها...!
قال بقرف مقهور:مو ما كانت تبغى تخسر فلوس...!
-و طبعاً إنتا أعطيتها عشان تسكتها...!
قال و هوا يهز راسو:نعم..أعطيتها لكن يوم موعد العملية انسرقت شنطتها و معاها الفلوس...!
-oh my god..و بعديييين...؟!
تعرفوا..مني حاسة بإنو دي القصة قصتي قد مني حاسة إنها قصة مثيرة تستحق الاستماع و الإنصات...!
بابا استغرب حماسي إلي في غير وقتو لكنو قال:انسرقت الفلوس فرجعت لي و طلبتني فأعطيتها...!
-أعطيتها مرة تانية...؟!،طب..بعدين..بعدين ايش سار...؟!
اتنهد:"وصلني"
طالع فيا:قالت لي أوصلها لإن السواق إلي تثق إنو ما يعلم سافر و سواق أهلها ما يرضى يوديها مكان إلا بإذن من أهلها...!
قلت باستغراب:لها أهل...؟!
-أجل...؟!
-و وينهم عنّها...؟!
-ما أعرف..كل إلي أعرفُه إنها كانت تروح مشاويرها "الوصخة" من الشغل..السواق إلي متفقة معاه يوديها من الشركة و يرجعها لها و بعدين يجي سواق أهلها و ياخذها من الشركة لبيتها...!
طالعت في بابا:هذي ما فقلبها خوف...؟!
-أمك ما في قلبها شي غير الصياعة و الشباب الصغار...!
-رجاءً لا تنسبها ليا..أنا أمي جدتي إلي ربتني..مو دي إلي ما عرفت اسمها إلا و ولدي عمرو أربعة سنين...!
كملت و أنا أنتبه لشي:بس لحظة..ما كانت تواجه مشاكل..متى كان يمديها تسوي شغلها و تروح مع داك السواق و ترجع بعدين يجيها سواق أهلها..كيف كده...؟!
سحب بابا نفس:كانت مفهمة أهلها إن شغلها يستمر لين آخر الليل...!
-و أهلها بُله..ما يفهموا...؟!
-ما أدري يا بنتي..أنا علاقتي فيها ما كانت قوية لحد إني أعرف ظروفها..لا تسأليني...!
قلت باستغراب:و إنتا كنت ماشي معاها في علاقة و إنتا ما تعرف ظروفها...؟!
-أنا بس.."انفعل"..أنا قلتلك إني غلطت مو بإرادتي..شي قدامي و...
ما اقتنعت بفكرة "مو بإرادتي" لكني اتنهدت و قلت:طيب و بعدين..وديتها ولا لأ...؟!
-وديتها..ما كان بيدي حيلة..دخلت الحارة القديمة و هناك عند العمارة إلي حتم فيها العملية اتفاجأنا بسيارات الهيئة و الشرطة و بالدكتور إلي أخذت الموعد عندُه نازل بين أيادي الشرطة..سحبت نفسي من المكان و كان كل همي أتخلص منك....!
زودت إنصاتي و قلت و في خيالي كتير احتمالات:ايوة...
سحب بابا نفس:دورت على كذة طبيب..و في كل مرة كان يطلع مانع..مرة الدكتور مسافر..مرة مريض..مرة انمسك و غيرُه كثير.."بلع ريقو و انبح صوتو"..تخيلي..تخيلي تسسسعة شهور نحاول ننزلك..نحاول..نحاول مافي فايدة.."اتوسعت عينو و بدأ يحرك يدو و هوا يتكلم"..كل مرة كان يطلع شي..تسعة شهور..تسعة شهور و احنا في دوامة محاولات فاشلة...!
قلت بعجب و عدم تصديق:تسعة شهووورر!!!؟؟؟
طالع فيا و قال بطريقة تأكيدية:تسسسعة شهور..
تابع:و حتى بعد ما ولدتك..جات لتحت بيتي و اتصلت عليا..نزلت و ما دريتبها إلا راميتك عليا..أخذتك و أخذتها و رحت لشقتها و هناك صرخت بأعلى صوتها بإنك شيطان..شيطان ما قدرت تتخلص منو لمدة تسعة شهور رغم إنها آذت نفسها بالضرب و حاولت تطيح لكن ما كانت تزبط أي حركة.."ضحك ضحكة صغيرة ساخرة"..و رغم تعب الولادة إلا إنها هددتني بتدمير حياتي..أنا خفت..كانت قد إنها تسويها،عشان كذة أخذتك و حاولت أتخلص منّك..عند البحر،عند المسجد،عند ملجأ..ما قدرت؛الناس كانو دايماً حولي،تخيلي..يوم أحد الساعة ثلاثة الليل و الناس في البحر..و إذا ما كان حولي أحد تبكين بكى عالي مو طبيعي يلم الناس من بيتها..كُنتي كنك فاهمة..كُنتي..كُنتي فعلاً شيطان صغير زي ما أمك قالت...!
كدب..مو معقول..ايش إلي قاعدة أسمعو..محاولات فاشلة لإسقاط جنين تستمر تسعة أشهر و ناس في البحر يوم الأحد الساعة تلاتة الليل!!!
طالعت في بابا:و بعدين..ايش سار..كيف وصلتني لعمو و جدة..كيف قلت لأهلك دا الخبر..و كيف أنا كبرت بعدها و كيف..قُلي..كمل القصة...!
سحب بابا نفس و نفثو و كأنو يستنى ردة فعل لكنو ما لقى إلا نظرات الإثارة و التحمس و..الفضول!
قال:ما كنت بعقلي..أخذتك و رحت لبيتي،هناك لقيت مرتي صاحية في انتظاري..هيا صحيت من يوم ما خرجت فجأة و قعدت تستناني إلين ما جيتها و إنتي في يدّي...!
مع كل كلمة تخرج من بابا كان قلبي يسرع في النبض..كنت..مسلوبة التركيز و السمع و كل شي...!
قلت:ايش سوت..كيف رحتلّها بيا..كيف اتجرأت تواجهها...؟!
-قلبت الدنيا عليا..صرخت و صحت الأولاد من صراخها و طردتني من البيت...!
-طردتك...؟!
-آآآه لأ..أنا إلي خرجت..آآ المهم المهم..أنا خرجت و منظر أولادي ما أنساه..نظراتهم كانت تذبحني و لحد الآن كل ما أطالع فيهم أشوفها..عشان كذة أنا...
قاطعت بابا لإني ما كنت أبداً مستعدة أسمع أعذار سخيفة تانية...!
قلت:بس وقتها سارة ما كانت فيه..صح...؟!
-لأ..إنتي أكبر...؟!
-ايوة أنا أكبر..المهم..و بعدين..رحت لجدة...!
-ايوة..ما كان قدامي غيرها..لقيت نفسي من غير ما أحس برة البيت..راميكي على الكرسي إلي ورا و ماشي بالسيارة لبيت أمي...!
قلت و أنا أحس بالخوف على نفسي:حاطني ورا..بيبي مولودة حاطني ورا لحالي...!
أخفض راسو:كنت أبغاكي تطيحي.."رفع راسو و قال بصوت عالي"..بس ما طحتي..قعدتي حية..ما صابك ولا جرح ولا خدش..شيطان..فعلاً شيطان...!
طالعت في بابا مصدومة،قلت بقهر:مو شيطان..إلي سلمني تسعة شهور سلمني مشوار النص ساعة...!
قال بابا من غير ما يعلق على كلامي:هناك أمي هزأتني و سخطت عليا و طردتني...!
-طب ليش اتكلمت..ليش لمن رحت لجدة قلت إني بحرام..ليش ما فهمتها إني بزواج...؟!
-مادري..أنا رحت لها من غير ما أحس..و اتكلمت بلا حساب...!
-طب ليش قلت لجدة..ليش ما اتكلمت قدام زوجتك بلا حساب...؟!
-ما أعطتني فرصة..دخلت بك و علطول صرخت و هاجت و ما جا الصباح إلا و هيا خارجة لبيت أهلها...!
-أوفف..خرجت...؟!
-طبعاً..و ربي ستر ما دريت إنُه بحرام و لا ما كان رجعت لي...!
بصراحة كبرت في عيني..فوق ما عندها مبدأ و كانت ما حترجع لو بحرام كمان يحبها..باين إنو يحبها..ولا ما كان اتكلم كده بعيون واسعة و صوت حار متحمس...!
بس كده معناتو خرجت لأهلها و سارت مشاكل أكبر مما أتصور..أجل عشان كده الناس اتكلمت و تَبَّلت ما شاء الله..و أنا كنت مستغربة؛أحسبهم اتكتموا عالموضوع..والله لو كده يحقلهم يكرهوني..قصدي مرة بابا و أخواني..أكيد حسوا إنو وجودي كان سبب لمشاكل بين أبوهم و أمهم و كان سبب لتوتر عائلة بكاملها..من جدة لأولادها لأولادهم...!
سحب بابا نفس:و هذا إلي صار..عمك هوا إلي أخذك..كان صغير و كنتي أصغر..و من يومها عاد و هوا مصدق إنُه أبوكي و إنتي بنتُه...!
-قصدك سار بابا و سرت بنتو..عمو عُمرُو ما كدب كدبة عشان يصدقها..هوا لقاني قُدامو،وحدة شبه يتيمة..شي طبيعي حيحس بالأبوة تجاهي...!
طالع بابا فيا بعتاب:أنا مني جايك عشان تزيدي حسرتي و إحساسي بالذنب...!
-لأ..لا تتحسر..صدقني..لو عشت معاك..في بيتك وسط أولادك ما كنت حتربى زي ما اتربيت عند عمي و جدتي..مو عشان شي فيك..أولادك متربين أحسن تربية..إنتا و زوجتك إلي أتوقع إنها ما كانت حتأذيني ربيتوهم..بس أنا ما كنت حتربى زيهم..زوجتك غصباً عنها ما حتقدر..حتشوف خيانتك لها فيّا..إنتا نفسك ما حتقدر..إنتا و أنا بعيدة عنك ما تطيقني كيف و أنا في بيتك...؟!
-لالا..أنا ما أكرهك...!
قلت و أنا أتنهد:ما علينا..المهم..ايش عملت بعد كده...؟!،وين رحت...؟!
-أخذوكي جدتك و عمك من هنا و أنا بدأت أصالح مرتي من هنا...!
-طب كيف كان الوضع..أنا نفسي أعرف الوضع فترة ما كنت بيبي..كيف كنتو عايشين كعائلة..كنتو عادي تتزاوروا و الحياة ماشية ولا كنتو شبه متقاطعين...؟!
-كلهم كانو عادي إلا أنا و أولادي...!
-بس كانو صُغار...!
لمن شفت نظرة بابا المستفسرة:أولادك كانو صُغار لسه...!
قال بحزن:ايوة كانو صغار و وجودك سبب لهم مشاكل أكبر منّهم بكثير...!
وجودي...؟!،ليش ما يقول فعلتو...؟!
سحبت نفس و سحب بابا كمان...!
قلت:طب بابا..تقدر توصلها...؟!
-ايش...؟!
قالها بابا باستنكار،فقلت:بابا أبغى أعرف..تقدر توصل لماما ولا لأ...؟!
وقف بابا:أنا عمري ما شفت وحدة بجراءتك..ما كفاية الأسئلة القذرة إلي أجبرتيني أجاوبك عليها..لسه كمان تبغيني أوصلها!!!
ما كنت أبغى بابا يزعل..مو حُباً فيه بس طفشت..طفشت من إنو بيني و بينو حساسية..خلاص تعبت و قرفت...!
مسكت يدُّو و أنا جالسة و قلت:بابا لو أقدر أقوم و أبوس راسك كان قمت لكن ما أقدر و ما فيا شدة..بابا لا تزعل..أنا ما كان قصدي أضايقك أو أزعلك منّي..بابا بليز لا تزعل و تخرج من بيتي زعلان...!
طالع بابا فيا لثواني بعدين انحنى:نزلتلك...!
انفجعت..أنا كنت بتكلم بس..ما عنيت ولا كلمة وحدة من إلي قلتها...!
لازم أتخذ قرار..لحد يستهين..التصرف إلي حسويه دحين حيحدد مصير علاقتنا...!
كرامتي و مشاعري ما كانو سامحين لي بسسس...

نزلت دمعة من عيني و أنا أبعد بشفاهي عن راس بابا...!
حسيت بإني سويت شي المفروض إني ما أسويه رغم إني كنت حاسة إني لازم أقبل راس بابا...!
أنا من جوتي أحس إنو ما يستاهل..أنا من جوتي أحس بحرارة..أحس بقلبي يزيد نبضو..و أحس إنو جسمي ولع..أحس كل خلية جوتي ثارت..كأنو جسمي و عقلي و عواطفي رافضين إلي سويتو بس أنا حاسة رغم صعوبتو إنو الصح..إنو...
رفعت راسي مصدومة..مسكت جبهتي و طالعت في بابا بصدمة...!
قلت بشفايف مرتجفة:بَـ .. بَـ ...
قال بشفاه مهتزة:كنت مقرر..كنت قاعد أقول..لو ما باست راسي تنسى إنها بنتي..كنت أتمنى ما تقبلي راسي..لإني.."دمعت عينو"..كل ما أشوفك أتألم..كنت أبغى عذر عشان أقاطعك بس إنتي في حياتك ما أعطيتي فرصة..أو سويتي شي ممكن آخذُه كعذز أو عيب فيكي و لمن حاولت أطلع عيب فيكي طلعت أنا الغلطان..لثواني الناس وقفت معايا لكن فجأة أمي و أخواني الاثنين و أولادي و حتى زوجتي..زوجتي إلي هيا زوجتي قالتلي:"كانت حامل..ليش خليتها تنفعل؟!"،رغم إن وجودك يضايقها إلا إنها عاتبتني...!
نزل راسو و رفعو:قبل كنت أكرهك عشانك تذكريني بماضي أسود ذحين سرت أكرهك لإنك عمرك ما غلطتي عليا و سمحتيلي ألاقي فيكي عيب...!
تابع و هوا يحرك يدّو و يتجنب يطالع فيا:دايماً كان..كان ربي معاكي ضدي...!
طالعت في بابا مستغربة و مفجوعة..ايش دا الكلام...؟!
قلت بانفعال:بابا..ربي أرحم بعبيدو من نفسهم..كيف تتكلم كده...؟!،كيف تتجرأ...؟!،هذا ربي..في كل شي لُه حكمة..اختار لي و اختار لك هدي الحياة..هذا اختيار ربي..مو اختياري أو حتى اختيارك...!
إنتا..إنتا كيف تسمح للشيطان يلعب براسك..ربي حطك في اختبار لمن مشيت أمي بمفاتنها ظاهرة..صح فشلت في الاختبار و استسلمت لهواك لكن إلي إنتا فيه دحين اختبار تاني و أنا..أطلب منك تعديه..عشان لو ما عديتو أنا حتأثر..إنتا قدامك دحين ولدي..و زوجي...زوجي حسسو إني غالية عندك حتى لو ما كنت كده في الحقيقة لإنك بكده تفيدني؛احترامو ليا حيزيد..ولدي..ولدي لو حبك أنا حعشقك..لو عشقك أنا حموت عليك..إنتا..إنتا لو بس توسع أفق عقلك شوية حتلاقي إنو كل إلي حولك يساعدك..سمعتك..أولادك..زوجتك إلي تحبك..أخوك إلي عقلو يوزن بلد..أمك إلي مهما سويت تسامحك..كل دا و منتا قادر تستقر..منتا قادر تحس بالراحة..بابا و إن كنت في أيام قاسية عليك و تجاهك و أتكلم كلام جارح أنا محتاجتك..أنا أبغى يكون عندي أم و أب..أعرف أمي فاجرة ما تشرف بس..بس أبغاها..نفسي أشوفها عشان كده سألتك لو تقدر توصلها ولا لأ..نفسي لو بس ألمحها.."دمعت عيني"..أنا..أنا ما..يعني..يعني..أمي فاجرة و توطي الراس و أبوية ما يحبني..أنا حياتي صعبة..صح أقول دايما لنفسي و للناس إني مستقرة مع عائلتي الصغيرة و مبسوطة و مني محتاجة أحد بس..بس أنا كدابة..ايوة أنا كدابة..أنا أحياناً أغار من علي..لمن يحكيني أو يحكي سعود عن هبلو أو ذكرياتو مع أمو و أبوه و مع أخوانو و أخواتو..أحس في دي الظروف ما ألاقي شي أقولو..أحس إني أبغى أتكلم بس مافي شي ينقال..ذكرياتي مع عمو ما فيها قلة أدب أو هبل..عمو كان مُربّي و مُؤدِّب..ما كان صاحب عشان يشاركني في الأشياء إلي نسويها بالدسة من ورا أهالينا...بابا أنا والله أحتاجك..حتى لو سمعت أو حسيت بالعكس..اتأكد إني..إني لسه أبغى أب و إن كان حولي رجال كثير يحسسوني إنهم آباء بس أبغى الإنسان إلي أنا قطعة منو..أبغى سعود.."بكيت"..أبغى سعود يشوفني معاك زي ما يشوف علي مع عمو سلطان..أبغاه يشوفني معاك إنتا لإنو عارف إنو إنتا أبوية الحقيقي..هوا..هوا دايماً يقولي:"عمو سعود أبوكي الكذبي و جدو إلي ما أحبو أبوكي الحقيقي"..أنا ما أبغاه يقول كده..أنا أحب عمو و هوا بابا و هوا كل شي بس..بس كمان إنتا..خلاص..خلاص لا تسير بابا..خليك عمو و خلي عمو بابا..ما عندي مشكلة بس..طفشت..خلاص طفشت..سعود كِبر و بدأ يفهم و أنا..حامل..لازم نشوفلنا صِرفة..لازم..أوكي حتى لو تكرهني..الله يخليك مثل قدام علي و سعود إنك تحبني..الله يخليك...!
غطيت وجهي بيدّيني و قعدت أبكي...!
كرهت نفسي و أنا قاعدة أترجاه..لأ أنا مو كده..مو هادي مشاعري أو يمكن ما أبغى هادي تكون مشاعري.....!
طول عمري و أنا مستقلة..طول عمري و أنا أقول إني ما أحتاج بابا لإنو عمو مكفيني و زيادة..طب ليه قاعدة دحين أترجاه..أنا حُمارة أصلاً..أترجاه ليه..أنا قوية و ما أحتاجو..أنا...
وصلني صوت بابا هادي يخفي وراه أشياء ما أعرفها:جود..جود خلاص..خلاص لا تبكي..أنا..أنا و إنتي حنبدأ صفحة جديدة مع بعض..حنسى كل إلي سويتيه ليا و حبدأ معاكي صفحة جديدة...!
رفعت راسي:و إلي سويتو إنتا...؟!
-ها...؟!،أنا....؟!
ما حعطي بابا فرصة ينكر أو شي،قلت:أنا كمان حنسى كل إلي سويتو ليا و حبدأ معاك صفحة جديدة...!
ابتسم:أجل خلاص...!
اتقدم مني و جلس جمبي:أنا حكلم عمك و حقولو على إلي سار و أنا حأوضح للكل إنو كل إلي بيني و بينك انتهى و إنو أنا و إنتي ما بينا أي شي سيء...!
هزيت راسي:لاء..لا تتحمس..خلينا واقعيين..من ثانية حتحبني و أحبك..لا طبعاً..احنا محنا بزورة أو زعلنا استمر ليوم أو يومين..بابا هذي سنين..هذي 24 سنة..لا تستهين..بابا مو مهم نحب بعض قد ماهو مهم تصفى نفوسنا..لا تتكلم أو تقول أي شي..خل يربي ييسر كل شي..أنا.."ضحكت بخفة"..أنا ربي واقف معايا عشان كده ما أبغى أي أحد يدخل أو يتصرف...!
نزل بابا راسو و قعد يستغفر على الكلام إلي قالو...!
رفع راسو:حتسيري تجي بيتي و تتكلمي عني عادي قدام الناس...؟!
قلت و أنا مقطبة حواجبي:أنا أصلاً ما أتكلم عنك قدام الناس...!
-ايوة..إنتي يا ما تتكلمي يا تقولي كلام مو كويس...!
-لا والله..يشهد ربي عليا إني ما أنطق بحرف و إذا اتكلمت ما أقول إلا كل خير..أصلاً أنا ما أعطي فرصة لأحد إنو يكلمني عنك..أو يسألني عن ماضيا...!
-المهم إن الكل يحسب إن علاقتي بكي سيئة أنا أبغى الناس ذحين تعرف إنها سارت كويسة...!
-بابا..على فكرة لسه قبل أسبوع كانت النار والعة بينا..ما يسير كده..الناس مو مهمة..في ايش حيفيدوك..كلمة كلمتين حيقولوها و ينسوا..بعدين نبقى أنا و إنتا محتارين ما بين إتباع إلي اتظاهرنا بيه و ما بين إتباع مشاعرنا و أحاسيسنا...!
-طيب..المفروض أحاسيسك تكون كلها حب و احترام ليا...!
-أوكي..حتسير لكن شوية شوية..مو كده فجأة من قعدة وحدة..الاحترام موجود موجود سواءً حبينا بعض أو كرهنا بعض..يعني..المفروض يكون موجود..لكن الحب مو علطول..العجلة مي حلوة..أوكي اتصالحنا و اتصارحنا و أنا شاكرة لك إجابتك على أسئلتي لكن هذا ما يعني إنو علاقتنا تسير وردية..كده..out of the blue..نسير مثال لعلاقة بيرفكت بين أب و بنتو...!
وقف بابا و قال بحكمة مادري من وين طالعة:الظاهر إنو مافي أمل...!
طالع فيا:أنا خارج..تبغي شي...؟!
قلت باستغراب ممزوج بصدمة:بابا!!!
-خلاص..أنا اتأكدت من شي ذحين...!
-بابا أ...
قاطعني:إنتي أضعف من إنك تنسي إلي سويتو...!
قلت بنرفزة من أسلوب بابا:الحمدلله إنك عارف إنك سويت شي...!
وسع بابا عينو بصدمة من جملتي،قال:شفتي..إنتي الحقد و الكره كبر فيكي و الظاهر إنك حتنقليه لولدك..عشان كذة أعتذر عن التقرب منُه..علاقتي بك يا جود ما رح تتعدى حدود الواجب...!
كانت صرخة على طرف لساني:"أحسن"
صرخة اندفنت بداخلي..لإنها أدركت إنها لو طلعت حتسبب إلي ما يحمد عقباه...!
وقفت و أنا أسمي...!
قلت بطريقة إنهاء حوار:إلي يريحك أنا مستعدة أسويه..المهم تكون راضي عني..إنتا والد..و رضا الوالد من رضا الله...!
اتنهد:أشوفك على خير...!
و خرج...!
جلست على الكنبة و ما كانت إلا ثواني قبل ما بكيت بصمت..مجرد دموع بدأت تتوالى على خدّي...!
مشاعري..هدرتها..بكيت و أظهرت لبابا ضعفي..اعترفتلو بحاجتي لو قبل ما أعترف لعمو و لكم و لنفسي حتى...!
آخرتها يطلعني غلطانة..حقودية و أضعف من إني أسامح..أنا لو زي ما يقول ما كان فتحتلو الباب..أنا أنقل الكره لسعود..والله العظيم أحاول قد ما أقدر ما أحسسو بشي..أشجعو لمن يحكيني عن رغد و عن بقية أولاد أختي خلود و عن تجاربو المعدودة معاهم...!
أنا ما بزرع الكره في أحد..ولا أقول لأحد عن شنايع بابا..ما حقدت لا على أخواتي و لا على بنات عماتي و لا وطيت راسهم في التراب..أنا مادري..مادري ليه محد يقدر..هل لازم أصرخ و أندب و أشقق ملابسي عشان يحسوا بألمي..يحسوا قد ايش أنا عانيت...؟!
ايش العالم دا...؟!،ايش الناس دولا...؟!
"ماما.."
رفعت راسي لسعود إلي قالها بتفحص،قرب مني:تبكي...؟!
مسحت دموعي:لا حبيبي...!
قرب مني أكتر فمديت يدّي عشان يجلس في حضني و جلس...!
حط راسو على صدري و قال و هوا ينعم بالدفا:مامي ايشبك...؟!
-ما فيا شي حبيبي..ما فيا شي...!
-ماما هوا هدا أبوكي كل شوية يجي إنتي تبكي..إنتي تبكي..ليش كده...؟!
حضنتو أكتر و دفنت راسي في رقبتو و قلت بصوت مخنوق:أنا بس متضايقة..هوا مالو دخل...!
رفع سعود راسو و قال بإصرار:لأ..أنا ما أحبو..شرير..بس يخامصك و يقولك أشياء وحشة..هوا زي النونو ما يعرف عيب..هوا مامتو ما تقولو عيب...!
شديت على سعود:خلص حبيبي خلص..هوا حُر..احنا مالنا دخل...!
رفع سعود نفسو و لف يدّو على رقبتي و قال و هوا يبوسني:طب لا تبكي..أنا أزعل لمن تبكي..لا تبكي علشان الأغبياء...!
كلام سعود غصبني أبتسم،قلت:عيب تقول كده سعود...!
-طيب خلاص لا تبكي...!
ابتسمت..سعود قال جملتو الأخيرة بنفس أسلوب علي لمن يبغى يسكتني و يبغاني أسوي إلي يبغاه...!
رفعت راسي للباب إلي انفتح فجأة..و كان..علي...!
طالعنا أنا و سعود باستغراب،قلت:وي..ايش جابك دحين...؟!
قال و هوا يقفل الباب:مافي شغل و طفشان...!
-و إنتو عادي كده سايبين...؟!
ابتسم:مو سايبين بس مافي شغل و المدير رايق فاستأذنت..قلت ما دام إنك في البيت ليش أقعد...؟!
أجبرت نفسي على الابتسام و أنا أشوف علي متجه لينا،جلس جمبي و فجأة اتغيرت ملامحو..قرب وجهو من وجهي و قال بحواجب مقطبة:جود ايشبك...؟!
رجعت براسي على ورا:ايشبي..ما بيا شي...!
-جود...؟!
-علي ما فيا شي...!
طالع في سعود:سعود أمك ايشبها...؟!
قال سعود ببساطة:عشان هدا أبوها خاصمها...!

نعم...؟!
صرخة علي خلتني أفز،التفت لو و قلت بسرعة:بابا كعادتو قلي كلام بايخ فاتضايقت و سعود كان قاعد معايا...!
-وتردي عليه ليه...؟!
-هوا جا ما اتصل..إلا اتصل بس قلي...
قاطعني علي بعصبية:جا البيت...؟!
-ايوة جا البيت...!
-جا البيت...؟!
-ايوة...!
-جا البيت...؟!
-علي ايوة ايشبك..جا البيت...!
-جا البيت..كذة ببساطة..جا البيت...!
-و يعني جا البيت..ايش فيها...؟!
-فيها إنُه دخل بيتي و طلع و أنا مالي علم...!
-ايش يعني..تبغاني أتصل عليك و أقولك إنو بابا جا...!
-ايوة تتصلي عليا و تعطيني خبر..مو أقعد زي الأهبل..الناس داخلة و خارجة على بيتي و أنا مادري...!
-لا من جد علي..بابا كان عند العمارة و...
قاطعني:لو عند الباب..تعطيني خبر تحترمي رجال البيت الموجود..
قاطعتو بقهر:أنا محترمة بس هادا بابا لازم..
قال بشدة:لمن يكون أبوكي رجال أستأمنُه على أهلي يسير خير..هذا شي..الشي الثاني لمن أكلمك ما تقاطعيني و عدلي طريقة كلامك معايا لا تشوفي شي ما يسرك و قومي حطيلي شي آكلُه لإني جاي تعبان و طفشان و قرفان و قرفتيني إنتي زيادة...!
و قام راح للغرفة...!
أخفضت راسي..ليش أنا ناقصة..ناقصتك يا علي تخاصمني...؟!
قال سعود الصامت من يوم ما جا علي:ماما...؟!
رفعت راسي و قمت:"تعال ساعدني"،و رحت للمطبخ...!
و طول ما أنا أرتب الغدا و أسخنو كنت أستنى علي يجي يساعدني _في الفترة الأخيرة سار علي يساعدني بما إني تقلت_ لكنو ما جا،حزت في نفسي...ليش ما جا...؟!
حطيت الغدا و رسلت سعود ينادي أبوه...!
جلسنا عالسفرة ساكتين،علي..شغل التلفزيون و قعد ياكل و هوا يتفرج..أنا..كنت آكل و عيني على لُقمتي،و سعود ينقل بصرو ما بينا...!
خلصنا أكل و وقف علي:أنا داخل أنام...!
قال سعود إلي متعود يسمعو مني:تمسي على خير...!
قال علي بدون أي مشاعر واضحة:جود ما بتنامي...؟!
قلت و أنا أروق السفرة:برفع...!
-رفعي و تعالي...!
قلت من غير ما أرفع عيني:شُغل البيت متلتل و أنا ما عندي نوم...!
حسيت بنظرات علي الحاقدة قبل ما يروح للغرفة...!
بعد ما راح قال سعود:ماما ايشبو بابا...؟!
قلت و أنا أعطيه صحن خفيف عشان يوديه للمطبخ:ايشبو بابا...؟!
و وقفت و مشيت وللمطبخ ورا سعود إلي قال:إنتي زعلانة و هوا سواكي زعلانة..ما ينفع كده اتنين زعلانة...!
ابتسمت..حضنت سعود و بستو..حبيبي هوا..متعاطف معايا مرة...!
بعدتو عني:معليه حبيبي..بابا زعل لإنو بابا..بابتي أنا زعلني..هوا زعل عليا..عشاني مو مني...!
-طب ليه يخامصك..إنتي مالك شُغل.."صرخ"..هوا جا مو إنتي...!
انفجعت..في صوت سعود كان فيه قهر..شي غريب أول مرة أشوفو عليه...!
شوية إلا سعود يبكي و يحضن رجليني و يقول بقهر و صوتو مختلط بدموعو و مو واضح:كل شوية يجي تبكي بعدين بابا يزعل..يـ..يزعل و..ويخاااامصك..أنا ما أحبووو..بس أبوية و عمو..هوا أسلاً (أصلاً) غبي..أنا ما أحبو بس يقعد يطفشنا و يخليني زعلااااان...!
انصدمت..هدي مشاعر سعود تجاه بابا...؟!،سبحان الله كيف الطفل يحس..حسيت..حسيت إني..إني قاعدة أشوف نفسي زمان..كنت كده أحس..أحس إنو لمن يجوا عماتي و بابا و البقية أتضايق و أسير زعلانة...!
انقهرت..انقهرت على ولدي..أنا ما كنت أبغى سعود يعيش نفس الأحاسيس إلي أنا عشتها..ما كنت أبغاه يحس بأي توتر في أي علاقة كانت...!
سحبت نفس أحاول أهدّي فيه نفسي..ما ينفع أبكي..كفاية سعود..أنا لازم أكون أقوى..ما ينفع كلنا ضعيفين..ما ينفع...!
-تعال سعود...!
و رحنا للصالة..جلس و جلست جمبو...!
قعدت ساكتة لثواني قبل ما أقول:سعود..بابا قد قلك شي...؟!
هز راسو بلأ...!
-أبوية أنا يا سعود..أبوية أنا..إلي جا اليوم...!
هز راسو:لااااء...!
-أجل خلاص..احنا مالنا دخل..هوا يسوي إلي يبغاه و يقول إلي يبغاه..و بعدين إنتا ليه مزعل نفسك..هوا حُر..و أصلاً ما يقدر يسويلنا شي..قول ليه...؟!
ابتسمت لنظرات سعود المتسائلة و قلت:بابا معانا..هوا يعرف كل شي..احنا مالنا دخل..هوا إلي يتصرف..و إذا هذا أو غيرو عملولنا شي نقول لبابا و هوا يتصرف..بابا يعرف...!
اتنهد سعود:بس بابا يخاصم...!
-بابا يخاصم لإنو عصبي شوية و يتنرفز بسرعة بس هوا من جوتو يخاف علينا و ما يحب إنو أحد يضايقنا...!
-طـ..وي..بابا...!
التفت و لقيت علي ماشي لنا و عينو مثبتة لقدام و لمن وصلنا شال سعود و قعد مكانو و هوا يحطو فوقو..حضنو بيد و باليد التانية جذبني لصدرو...!
غمضت عيني و فتحتها و أنا أحس براحة تتسلل ليا...!
قلت بهدوء:ليه ما نمت...؟!
قال بهمس:ليه و من متى أنا أنام و أنا مزعلكم..و إنتا يا مفعوص..حسابك بعدين..آخرتها طلعت أنا إلي أزود على أمك همها...!
سعود:ايش يعني همها...؟!
-علي:اشششششششششش..لا تخرب اللحظة...!

*********************************

جرة،،،
أسند رأسه على مقود سيارته..لمَ..لمَ دائماً هكذا...؟!،لمَ لَم يرى يوماً عطفها و نضجها و جمالها الذي يتحدث عنه الجميع...؟!
"جميلة روح و شكل"،"أميرة" و غيرها الكثير الكثير من الأوصاف التي سمعها عنها..لم لا يرى هذا الجانب منها...؟!،لم تظهر الجانب الجميل منها للناس أما لأبيها لا تظهر إلا القسوة و التبلد...؟!،لم لا تفهمه...؟!،لم هي عديمة الإحساس..بل لم هي جريئة منزوعة الحياء...أي امرأةٍ هي هذه...؟!
هكذا سعيد كان يفكر...!
تركته يهيم في أفكاره بينما تسللت من الحاضر للماضي عن طريق ذكريات حُفرت داخل سعيد و سعود و الجدة و الجميع...!
ذكريات تظهر ما كان يحدث حول جود و هي محاطة بغطاءٍ أبيضٍ فوقه التفت يد عمها المراهقة...!
سأبعد التراب عن ذكرياتهم المدفونة..ذكرياتهم التي لن يعرفها أحدٌ حتى جود..فقط أنا و أنتم و أصحابها...!
(دخل سعود الذي لم يكن يتجاوز عمره الخامسة عشرة لغرفة أمه..كان يحمل الرضيعة التي لم ترضع و لن ترضع من أمها..كانت هادئة و مستكينة..تماماً كما مظهر أمه التي وضعت رأسها بين يديها صامتة...!
قال بتردد:"أمي..الجيران سألوني بنت مين إلي عندكم..ايش أقولهم؟!"
رفعت أمه رأسها فأصابه الفزع..عيناها كانتا محمرتين و ملامحها غاضبة..قالت:بقوةٍ مرعبة:"بنت سعيد..قول هذي بنت سعيد..اتزوج من ورانا و جابها..قول كذة.. "صرخت"..هذي بنت سعيد"
صرختها أيقظت الرضيعة فبكت..قالت:"خذها..خذها داخل"
سحبت سماعة الهاتف التي أمامها..اتصلت بابنها و بدون مقدمات أمرته أن يأتي و أردفت أمرها بدعوةٍ فظيعة دب الرعب بسببها في كل خلية من خلايا سعيد الذي ذهب لأمه خاضع الرأس كسير النفس...!
قالت:البنت هذي بنتك..سامع..بنتك و بنت مرتك إلي شردت لبيت أهلها و والله يا سعيد..والله لو ما تسجلها باسمك لتشوف شيٍ ما شفتُه..سامع...؟!
رفع سعيد رأسه..لا..لا يريدها..إنها قذرة..إنها نجسة..إنها..
قال:"أمي هذي مي بنتي"
"مي بنتك..أجل جايبها لي ليه..هذي بنتك و أكيد عارف"
قال بصوتٍ عالٍ يائس:"يا أمي..يا أمي تراها بنت شوارع..هذي ممكن ما تكون بنتي..أنا مع الخوف أخذتها من غير ما أعترض..يا أمي لا تورطيني..لا تخربون لي بيتي..هذي مي بنتي"
نظرت إليه بغضب..كيف لا و قلبها كان قد أخبرها بأن تلك الرضيعة هي ابنة سعيد..هكذا..شعرت بأنها منها و من صلب زوجها المُتوفّى...!
قالت بإصرار:"لا بنتك..بنتك..و حتربيها و حتضمها لكرتك..رضيت و لا ما رضيت"
قال بغضب:"اثبتيلي..طب اثبتيلي إنها بنتي و إذا أثبتيلي يسير خير"
ورقة سعيد الأخيرة الرابحة كانت جهل أمه..هو يطالبها بإثبات و هي لا تملك إلا مشاعرها..و أيُّ إثباتٍ هو هذا...؟!
ما لم يكن بحسبان الجميع هو سعود المواهق الناضج..المراهق الواعي الذي وقف جوار الباب و همس:"تحليل الـDNA"
أمهما نظرت باستغراب أما سعيد فنظر لأخيه الصغير بغضب:"إنتا ادخل جوة و مالك شغل"
حاول سعود أن يركز ناظريه على أمه:"أمي ممكن نتأكد بتحليل في المستشفى"
صرخ سعيد:"سعود يا حيوان ادخل جوة"
كرامة سعود صاحت:"مني حيوان..أمي ممكن نتأكد..ممكن"
اتجه سعيد غاضباً لسعود..أمسكه من قميصه و دفعه للخلف بقوة:"قلت لا تتدخل"
سقط سعود أرضاً و كان سعيد على وشك إفراغ غضبه به لولا صيحة أمه:"سعيد"
لسع أخاه الصغير بنظرة شذرة:"حرجعلك يا كلب"
عاد لأمه التي قالت:"كلام أخوك حيمشي..بكرة أنا و إنتا في المستشفى و لو ما جيت فانسى إني أمك و انسى هذا البيت و نصيبك منُه و انسانا كلنا و ارجع لبنات الشوارع يا ولد الشوارع..تفو عليك..يا خسارة التربية"
نظر لأمه مطولاً بغضب و حقد ثم خرج من الغرفة،و في الممر..حيث رأى سعود على وضعه لم يتغير رفعه من قميصه،قرب وجهه من وجهه و كاد أن يقول شيئاً لكنه صمت و اكتفى برميه بوحشية و خرج من المنزل...!
سعود احتضنه الجدر..ظهره آلمه لكن ليس بشدة إيلام قلبه و قلب أمه..ليس بشدة إيلام صوت بكاء الرضيعة التي لم ترضع من صدر أمها و لن ترضع...!
وقف و اتجه لغرفته حيث الرضيعة..حملها و اتجه لأمه التي احتضنته و احتضنتها باكية...!
و في الصباح كانوا في المشفى..أصر سعود على المجيء بغية حماية أمه رغم ضعفه..رغم خوفه ممن أوصلهم للمشفى..رغم خوفه من أخيه الذي رأى الوحش في عينه...!
و هكذا أصبحت جود ابنةً لسعيد و زوجته...!
هكذا أصبحت جود بالحبر ابنة سعيد و بالقلب ابنة سعود..حرفُ علةٍ كان الفرق..ربما..أخطأ الكاتب!!!

*********************************
الجزء الرابع عشر
(سأسعى لرد الجميل)

سلمت و قعدت أستغفر و بعدين مسحت على وجهي...!
علي:ايش تسوي من أول..ساعة تستخيري !!،بعدين في ايش..ليش رافضة تقولين لي...؟!
التفت لعلي،بصراحة استخرت في موضوع عمو و في موضوع الإعادة حقي...!
قلت:استخرت لنا...!
-في ايش...؟!
-في كل شي...!
-ايش إلي في كل شي..استخارة هذي مو دعاء...!
-يوووه علي..خليني أنا و ربي...!
علي قعد يطاااااالع فيا..قلت:اييييييش؟!
-قاهرتني...!
-يا الله..ايش سويت دحين...؟!
-تقهري..دايماً لمن تكوني داسة شي أحس لكن لو أمووووت ما أعرف ايش هوا إلا لمن تبغيني أعرف...!
ابتسمت..قمت و أنا ألم السجادة و أسمي بالله عشان يعيني في حركتي...!
حطيتها على جمب و نزلت الشرشف على أكتافي و رحت جلست عالسرير...!
قلت:اطمنت على سعود إنو نايم...!
-ايوة..طول اليوم كان مهلوك و تعبان...!
-ايوة الله يصلحو..تعبني ما نام أمس إلا متأخر و صحي بدري اليوم...!
هز راسو و حاولت أنا أشغلو بأشياء تانية..أعرف علي..لو حط في بالو يعرف حيعرف و لو اتبع أسلوب معين أنا حستسلم و أقول..و أنا ما ينفع أقول..خططي كلها حتخرب و دي..حتبقى مصيبة...!

*********************************

سحبت نفس..لازم أكلم عمو و آخد موافقتو..أوكي هوا وافق..لكنو وافق عالفكرة بشكل عام و أنا لازم آخد موافقتو عالشخص...!
بصراحة خايفة و حاسة بصعوبة..عمو لو أقولو مين في بالي حيثور أكتر و حنسى أنا نهائياً إني أفاتحو في الموضوع مرة تانية...!
بس أنا لازم أتشجع..أنا أبغى الموضوع يخلص قبل ما أولد..لازم أتحرك..أوكي عمو حيرفض..أوكي ممكن يعصب و يخاصم بس أنا لازم أحاول..لو ما حاولت حكره نفسي بعد كم سنة و حلومها في اليوم مية مرة...!
بس متى أكلمو..الجوال ما ينفع..و لمن نروح علي معانا..كيف..متى يمديني أكلمو...؟!
اتنهدت..مافي إلا إني أبات عند جدة بكرة و يوم الخميس الصباح لمن الكل نايم أكلمو...!
بس علي ما حيرضى..حيقولي:"خلاص حتروحيلهم يوم الخميس..ايش لو داعي؟!"
أفففف..كل ما شي يتعدل يخرب التاني..و كل الموانع تكون حاجات سخيفة زي دي...!
لكن ايش حسوي..أكلمو و أمري لله...!
و في الليل..في الوقت إلي علي يكون فيه رايق..قلت:أمممم..علي..حبيبي...!
قال بنفس طريقتي:نعم..يا عيوني...!
اعتدلت في جلستي و قلت و أنا ألعب بشعري:آآآه..علي أنا أبى أطلب منك شي...!
-أنا أبغى أنام...!
-ايوة حبيبي..حتنام و أنا حنام و كلنا حنام و سعود حينام و احنا حنام و...
-ايوة ايوة و بعد النوم...؟!
-آآم..علي أنا أبغى توديني عند جدة عشانننن أنام عندها...!
قلت قبل ما يعلق:الله يخليك علي..الله يخليك لا تقول لأ...!
كان حيتكلم لكني قلت:بليييييييز..الله يخليك..علي حبيبي إنتا لا تردني..قُلي طيب..قلي طيب...!
طالع فيا مدة قبل ما يقول:لأ...
-لاااااااااااااااااا...
-قلت لأ يعني لأ..لو كان فيه سبب مقنع أوكيييي لكن بس كذة..طقت في راسك و بتروحي..آسف ما رح أخليكي...!
قلت بدفاع:فيه سبب..جدة..جدة أحسها مرة محتاجتني و فاقدتني و عمو أحسو يبغى يكلمني في أشياء كتيرة بس مو لاقي وقت و...
طالع فيا بنظرة:ما تبغيني أقعد معاكم يعني..أوكي أنا ممكن أحطك يوم الخميس..أسلم و أمشي !!
-لا علي مو عن كذااااا..بس..
-واحشتك القعدة عندهم يعني...؟!
-يعني..يعني ايوة و كده أبغى أقعد معاهم و...
سكت فقال علي:كلنا نشتاق لقعدة أهالينا و أيام زمان لكن ايش نسوي..لو إجازة قولي ها ممكن لكن احنا ورانا دوامات..أحطك يوم الخميس و أجيكي الجمعة و السبت أدوام..ما حرتاح كذة...!
-لالا..أنا عندي خطة أحلى..بكرة بعد العصر علطول نروح عند أهلك و بعد العِشا نمشي..تحطني عند جدة وتروح على البيت..و يوم الخميس تجوا إنتا و سعود على بيت جدة...!
-اممممممم..ما شاء الله..و لين يجي الخميس ايش نسوي أنا و سعود لحالنا...؟!
-عادي..تقعد عند أهلك..حتنبسط و ينبسطوا...!
-بصراحة إنتي وضعك موعاجبني..يا تقولين لي ايش عندك و تتيسري عند أهلك يا نامي و انسي الموضوع..ولااا تزني لا أبطل روحة الخميس بالمرة..تصبحي على خير...!
همست:و إنتا من أهلو...!
و أعطيت علي ظهري..حتسألو..ايشبو قالب؟!،أقولكم:علي حاسس إني مخبية عليه شي..أنا صح مخبية بس مو هبل..أنا فعلاً ما أقدر أقول لعلي أي شي دحين..ما أقدر..ما ينفع...!
بكيت..من غير دموع..اللهم خشمي حمر و قلبي انقبض...!
مديت يدّي..سحيت منديلة من الكوميدينة و مسحت بها خشمي..و احتفظت بها تحت البطانية بين يدّيني عند قلبي...!
حسيت بيد عند عضدي و وصلني صوت هامس:جود إنتي ليه تبغي تروحي...؟!
غمضت عيني قلك نايمة:خلاص مو لازم...!
ببطئ:ليه..تبغي..تروحي...؟!
قلت و أنا خافضة بصري:أبغى أروح...!
اتنهد:طب..نامي ذحين و و بكرة حنشوف...!
قلت:إنتا زعلان..ما حروح و إنتا مو راضي...!
لف يدّو عليا و حط راسو على مخدتي:لأ مني زعلان..نامي و الصباح رباح...!
يا رب يرضى..يا رب لمن بكرة تهديه و يرضى..يا رب...!

*********************************

كنا قاعدين في بيت أهل علي قعدة حلوة..هروج و حكايات و تريقة..أنا و عمتي و بناتها و علي أما سعود و لينا فقاعدين بعيد عننا شوية مادري في ايش يتناقشوا...!
صفاء:بس والله..أحسك ذحين غير..وجع..في زواج أحمد كنتي شايفة حالك..باين عليكي طيبة بس فيكي عنطزة...!
شهقت:أناااااا...؟!
قبل ما ترد قال علي:ايوة إنتي و لمنننن ذحين فيكي عنطزة بس كنك أخف لكن أول ما أخذتك..الله لا يبلانا..أعووووذ بالله..شايفة حالك على مادري ايش...!
أحلام:امممم..كنت أحسك لسه صغيرة و كنت أقول:حتكبر...!
التفت لعمة و أنا متوقعة إنها حتكمل سلسلة المصارحات دي...!
لكنها ابتسمت ببساطة،قلت:ايوة عمة كملي...!
علي فجأة بصوت عالي:و حتى مع أهلي كنتي ساكتة و ما تتكلمي..مسويتلي فيها الهادية..لكن في البييييت..تعالو شوفوها..وحش..مجرمة..أعوذ بالله...!
طالعت في علي:لا يا شيخ...؟!
-ايوة الله..كنتي شايفة حالك..شي لا يُطاق...!
-عمممممة..شوفي ولدك!!!
ابتسمت عمة برزانة و قالت:سيبيكي منهم..أخوان و اتجمعوا على أحد..إنتي ما كنتي مغرورة..كنتي تبغي تسمعينا و بعدين تتكلمي و اسم الله عليك ما مر شهر إلا و إنتي معانا عادي...!
حطيت يدّي على بطني:والله صادقة فيا يا عمة..هدا الكلام إلي يريح..أنا حامل...!
علي و هوا يدَّعي الدهشة:بالله..حامل...؟!
طالعت في علي بعدين في صفاء إلي قالت:هوا شوفي أنا انقهرت..يعني أعطيتك ايميلي و جوالي و ما اتصلتي ولا حتى أضفتيني..انقهرت منك..حيوانة وحدة...!
علي:بأي حق ما تضيفي أختي...؟!
سكت..اتذكرت كيف إني بعد زواج أحمد انشغلت بأشياء كتيييييرة...!
علي:جوووووووووود...!
-ها...؟!
ابتسم:وين وصلتي...؟!
-ولا محل...!
صفاء:وجع..ما لقيتي تتنحي إلا لمن اتكلمت...!
-ما تنحت !!
عمة:بنت..ايش ذا اللسان على مرة أخوكي...؟!
صفاء..اتفشلت أما أنا فضحكت:ايوة صح أنا مرة أخوكي..احترميني...!
علي:المهم..ايش كنا نقول..ايوة..ليش يا هانم جود ما تضيفي أختي...؟!
-ماااا..نسيت...!
-ليش نسيتي...؟!
-امممم..انشغلت...!
-بميييين..بيا...؟!
أديت علي _إلي الظاهر إنو فهم سبب سرحاني_ نظرة:و أنا ايش عرفني بك وقتها عشان أنشغل بك...؟!
صفاء نطت و كأنها تبغى تغير الموضوع:هي..آآآ..جود شفتي إلي رسلتلك هوا...؟!
قطبت حواجبي مستغربة من دخلتها الغلط:ايش...؟!
-رسلتلك رابط قصة...!
قطبت حواجبي أكتر:لا ما جاني شي..ليا مدة ما دخلت...!
-ليييييييييش...؟!
-البركة في أخوكي و ولدو...!
علي:ولدو مو ولدك...؟!
-إلا..بس صفاء تعالي هنا..أنا ما قلتلك ما تقري شي إلا لمن تقوليلي...؟!
-لالا هذي حلوة أنا متأكدة منها..إلي كتبتها عندها مدونة تنزل فيها مقالات و أشياء حلوة...!
-طب لو كده ارسليلي لنك بلوجّها (رابط مدونتها) ...!
-أوكي...!
علي:هانم صفاء..ما كنك قاطعتيني...؟!
كان معصب الشي إلي خلاني أضحك:دوبك تنتبه...؟!
قال و هوا يحك راسو:ما..مادري طفشان...!
و وقف و راح لسعود و لينا و قعد معاهم..قالت عمتي بهمس:ايشبه...؟!
قلت و أنا أرفع أكتافي:مادري له كم يوم طفشان و نومو ملخبط و كده...!
صفاء:مني...؟!
ابتسمت:لا حبيبي مو منك..أخوكي أحياناً عليه طلعات طفش غريبة...!
صفاء:إلا أقولك..لمن تدخلي مدونتها..
-لحظة لحظة ايش اسمها هيا...؟!
-مادري نسيت..المهم ادخلي و اقرأي المقال إلي كاتبتو عن الزواج..مرررررررة حلو..اتكلمت فيه عن فكرة إنُو بعد السنين الأولى يخلص الحب...!
-آآه..ترا عبط..الناس الطبيعين يكونوا دايماً العكس..السنين الأولى مليانة مشاكل..الزوج يكون عصبي و يتنرفز بسرعة و الزوجة مدلعة و ما تتحمل كلمة..هيا لو عدت كلو يهون...!
عمة:لا مو لذي الدرجة يا جود..هما بس يكونو دوبهم بادئين حياتهم و مو متعودين..هما يقولو إنها حلوة و ما تتعوض لإن المشاعر فيها تكون قوية و سبحان الله بكذة يسير توازن..يعني يكونون مو متعودين و مو ناضجين لكن مشاعرهم حارة و قوية فيقدرون بكم كلمة حلوة و كم وردة يتراضو...!
أحلام:و بعدين مو الحب إلي يخلص..الانـــبهااااار..يكون كل واحد طاير في الثاني..بعد كم سنة يتعودوا على بعض و يسيروا عاقلين..مو كلمة توديهم و كلمة تجيبهم...!
صفاء بسخرية و قهر:بس البنات دايماً يقولو إنو الخمسة سنين الأولى و بعدها خلاص معد يحتفلو بعيد زواجهم و لا يحبوا بعض بقوة...!
قلت:عبط زايد...!
علي من بعيد:يوووووووووه..يعني ما بقي لنا إلا شوية...!
التفت:وي..اسم الله علينا...!
عمة بغضب:علي..كم مرة أقولك ما تقول إلا الطيب...؟!
علي و هوا يسوي شي لسعود و لينا:آآآآآسف...!
قال بعد مدة:إلا ايش رايكم توقفوا ذا النقاش الهادف..طفشتوني ترا...؟!
كملنا كلام و لا كأنو قال شي فاتأفف بطفش..حبيبي هوا..الطفش باين عليه..مادري ايشبو..يبغالي أشوفو بعدين...!
قالت أحلام:بس أحس إنو الخلفة في البداية مي حلوة...!
ابتسمت:صح..مرة سمعت واحد يقول إنو مالو داعي لو ما يعرفوا بعض...!
صفاء:بس الخلفة هيا إلي تبين لو الآدمي كويس و لا لأ...!
عمة:إنتوا لا تشغلوا نفسكم بذي الأفكار..الطيب طيب من البداية و السيء سيء من البداية..ترى يبان من البداية..لو الوحدة ذكية تكتشف...!
أحلام:مو هذي المشكلة..هما ما يقدروا يكونوا أذكياء..الناس تسوي الملكة عشان يتعرفوا على بعض احنا نسويها عشان ننبسط كم شهر و يطلع كل واحد قدام الثاني بيرفكت...!
عمتي:إلا على سيرة الخلفة..كم باقيلك و تولدي...؟!
-أممم..شهرين و نص بالكثير...!
عمة بثقة:لا يا حبيبتي لأ..قولي شهرين و نص بالقليل...!
ابتسمت باستغراب:والله آخر مرة حسبت طلعت معايا كده...!
عمة:لالا...
صفاء:استحي على وجهك..أمي حاسبتلك أحسن منك...!
-عشان ولدها بعدين مو هيا إلي حتولد..يحقلها تستعجل..أنا أبغى أطول المدة...!
أحلام بضحكة:مو أول مرة تولدي !!
-مو يا حبيبتي لإني مو أول مرة أولد خايفة..لإني عارفة ايش حعيش..قبل..في سعود كنت عايشة جو مع كلام العقاد..يقول إنو المرأة تحس بمتعة لمن تولد..تستمتع بالألم يعني..و كنت مطمنة عالآآآآآخر..لين ما أكلت على راسي...!
قربت مني عمة و قالت بصوت هامس:طب كده بينك و بين نفسك..ما كنتي حاسة بمتعة..ما كنتي حاسة بأي سعادة...؟!
قلت بضحكة خافتة:إلا إلا..بس والله تعبت...!
-ايوة هوا كذة أول ولادة..صدقيني ذي المرة إن شاء الله أهون...!
صفاء:يعني يعني...
أحلام:مال أبو أمنا داعي...!
طالعت عمة في أحلام:أبو أمك الله يرحمه..بس خلاص..جود..يلا اسكتي...!
طالعت في عمة:والله أنا شُجعت على الكلام ولا ما كان اتكلمت...!
وقف علي من عند البزورة و هوا يقول:أحلى شي عندي لما جود تتهزئ...!
طالعت فيه بقهر:ما اتهزأت...!
عمة:تعال اقعد إنتا..ناقصتك و عبطك...!
جلس علي جمب عمة من الجهة التانية:الله لنا يا أم علي..كل ذا عشان ما قلتلك من بدري...؟!
قلت:ايش هوا...؟!
مدلي علي لسانو:اييييييييييييه..مالك دخل..سر بيني و بين مامي...!
مامي طلعت من علي تجيب الـ..
والله زوجي ما ينفع لو الدلع..بس فديتو كل شي منو حلو !!
عمة:مامي..مامي وقت الراحة لكن في الجد.."قلدت صوت علي"..أمي..كنك شوية و تصفقني كف...!
و قامت متوجهة للمطبخ...!
قلت باستغراب:علي ايشبها...؟!
قال بلا اهتمام:آآآ..واحد من "أصدقائي القُدامى" اتصل عالبيت و أمي ردت فقال إني ما أرد على جوالي من مدة طويييييييييلة و عاد أمي سألتني لإنها تعرف صوته صاحبي من زمان فقلتلها فزعلت ليش ما اتكلمت من أول...!
-لا يكون هذا نفسو إلي اتصل آخر الليل...؟!
قال بقرف:مادري..كيفهم..الله لا يردهم على قولك...!
قلت:بعدين منتا في مدرسة أو جامعة عشان يكون فيه مكان يجمعكم غصباً عنك..كل شي بيدك..خليهم يولو...!
-يااااا شيييخة...!
قلت:و عمة أكيد فيه شي تاني مزعلها..هيا ما تزعل من دي الأشياء...!
-بس أنا ما سويت شي...!
-مو لازم إنتا..ممكن أي شي أو حتى ممكن أشغال اتجمعت مع بعض فسارت طفشانة..عادي مو شرط تكون إنتا...!
اتنهد علي:طيب خلاص...
طالع في أخواتو:طالعي كيف يطالعو فينا...!
طالعت في صفاء و أحلام..كان باين عليهم الطفش...!
ضحكت:علي شكلنا مطفشين أمك و أخواتك...!
صفاء:ايوة..بصراحة اليوم مملين...!
أحلام:لا علي و جود من جد إنتو ما عندكم نص و نص..يا تسو لنا جو مو طبيعي يا تجيبولنا البلى..يعني معليش بس بصراحة سايرين مملين الفترة ذي...!
قلت:سويتي احنا ما سار عندنا شي إلا انتظار البيبي..يعني هوا الشي الحماسي القادم..غير كده غرقانين في روتين قاتل..يعني المفروض نجي و إنتوا تحمسونا..مو احنا...!
صفاء:مو احنا نفس الحالة..أنا كنت أدور على شي أستناه ما لقيت إلا البيبي حقك ذا...!
قلت و أنا أغمض عيني بفلسفة:العوائل المحترمة دايماً تمر بحالات زي كده...!
علي:ارحمييييييييييني...!
-طيب...
طالع علي فيا باستغراب فقلت:حرحمك...!
-آآآآه...
و على كده لين ما اتعشينا و حركنا..أنا في السيارة كنت تعبانة..أسندت اسي على ورا و أنا أحس بنفسي مكتومة..يا رب تيسر الولادة ليا يااااااااا رب...!
لفيت راسي و أنا أنادي سعود إلي كان سادح و مغمض عينو..فتحها على طول..قلت:نمت حبيبي...؟!
قال بتعب هوا كمان:شوية...
ابتسمت:هيا سمي بالرحمن بابا و نام...!
رجع سعود يغمض عينو و أنا أسندت راسي و غمضت عيني...!
علي:تدري لو سامحين للمرأة بالقيادة كان خليتك تسوقي و قسمت المشاوير بينا...!
قلت و أنا مغمضة عيني و مسترخية:لو سمحوا للحريم يسوقوا حجيب سواقة تكون كوفيرة و ماخدة الحزام الأسود في الكراتيه...!
-و كم حتعطيها إن شاء الله..3 آلاف ولا أربعة...؟!
-والله أي شي..لو حتريحني أديها أي شي...!
-و من وين إن شاء الله..اتوظفي و ادفعي من راتبك...!
عقلي صحصح لكن صوتي لأ...
قلت:إن شاء الله لمن أتوظف...!
ضحك بسخرية و هوا يلف:تخيليكي موظفة...!
رجعت أغمض عيني من غير ما أرد..عندي إحساس قوي يقولي إني حكون امرأة عاملة..مع إنو مرة حلو الوحدة تقعد في بيتها و ترتاح..لكن عندي إحساس قوي ينفي دا الشي...!
بعد مدة مادري كم هيا اكتشفت إني غفيت لمن فقت على صوت علي...!
-جود..جود..جود يلا...
قلت بنوم:هااااا...؟!
-ايش إلي ها..قومي...؟!
قلت و أنا أقوم:ايش..وصلنا...؟!
طالعت باستغراب في المكان إلي موقف فيه علي...!
علي:نمتي...؟!
التفت لعلي و أنا مقطبة حواجبي...!
ابتسم بحلاوة:انزلي و ادعيلي...!
قلت:علي من جدك...؟!
-يعني بوصلك لين هنا عشان أستفزك مثلاً...؟!
-بس إنتا كنت زعلان و متنرفز طول اليوم عشان كده و دحين...
قاطعني:خلاص انزلي إنتي ذحين...!
-علي كيف أتركك لحالك...؟!
-منتي كنتي ناوية تتركيني لحالي أمس...؟!
-بس...
-جود..لو مانزلتي حمشي و تحلمي أرجعك...!
قلت بحرج من نفسي:بس إنتا ما كنت راضي...!
قال بنفس أسلوبي:و دحين راضي..ممكن تنزلي...!
قلت بسعادة:شكراً علي...!
ابتسم:شوفي لا تبيني سعادتك و تستميتي في الامتنان..سوي نفسك منتي مبسوطة لإني عالتكة حتنرفز...!
قلت و أنا على وشك أبكي:Ali gimme a hug
-مع نفسك ذحين..يلا انزلي...!
-عليييييي...
اتلفت يمين و شمال كأنو حرامي و هوا يتأفف و بعدين حضني...!
بعد عني و قعد يتحمحم..قلت:ايش حتسوي بكرة...؟!
-أسوي أي شي..طبعاً إنتي ما تبغي سعود معاكي..صح...؟!
-آآه..خلاص اخرج إنتا و هوا كده عالظهر و مروا في الليل نتعشى مع عمو و جدة...!
اتنهد:طيب يسير خير..يلا انزلي...!
-اتصل عليا أول ما توصل و خلي سعود ينام معاك لا تنام لحالك...!
-ما أنام لحالي عشاني ولا عشان سعود...؟!
-آآآ..عشان سعود...!
-لا يا شيخة...!
ضحكت:خلاص ما دام مني موجودة خليه ينام معاك...!
ضحك:أقول انزلي انزلي...!
ابتسمت:لا من جد حبيبي..لا تخليني كده..أخاف عليكم...!
ضرب على صدرو:أنا و ولدك رجال...!
ابتسمت:مو أنا ليش أحبك إنتا و لدك إلا لإنكم رجال...!
ابتسم فقلت:طب علي تنزل معايا عشان أخاف أطلع لحالي...!
قالو هوا يوقف السيارة:طيب...!
طالع لورا:بس سعود نايم..خلاص جود اطلعي و ما عليكي خلاف إن شاء الله...آآ..أقولك بطلعك عند درج المدخل بعدين استخدمي المصعد و إذا دخلتي طمنيني...!
قلت و أنا أنزل:طيب..!
و نزلت من السيارة و استنيت علي لين ما جا و طلعني..شافني دخلت المصعد بعدين راح للسيارة..أول ما وصلت خرجت من المصعد و أنا أسمي..دقيت الجرس..وصلني صوت منورة فقلت:"جود"..دخلت وسط نظرات عمو المستغربة..ابتسمت و أنا أتصل على علي...!
قلت:دقيقة بس بطمن علـ..ايوة هلا..خلاص وصلت..طيب..أول ما توصل طمني...!
و قفلت..طالعت في عمو بابتسامة و أنا أمشيلو..سلمت فقال:ايش جابك...؟!
جلست:ايش الترحيب دا...؟!
-لا بس مو من عوايدك تجي الربوع...!
ابتسمت:جا على بالي أبات عندكم فجيت..و كمان أبغاك في موضوع...!
تابعت:آآ..اتعشيت...؟!
-محنا مسوين عشا اليوم..جيعانة ادخلي شوفيلك أي شي...!
طالعت في عمو مستغربة و أنا أفسخ عبايتي في مكاني:ايش الأخلاق هذي..وي!!
ضحك:لاااا..بس يا شيخة ما نمت الظهر مادري ليش و أحس نفسي مهدود..و يا ليت سويت شي..لا بس كذة لااااابد...!
ابتسمت و أنا أتذكر:بس إنت خِلقة أخلاقك يوم الربوع زفت...!
-يا شيخة..إلا في ايش كنتي تبغيني...؟!
-ممم..شوية مو دحين..جدة وين...؟
-جدتك تصلي و بتنام أكيد بعد ما تصلي..إلا أقولك..كويس إنك جيتي..تراها سايرة روحها في خشمها و طفشااااانة..و أنا ما أعرف ايش أسوي معاها..أحسها..أحسها ما تبغاني..يعني مو تكرهني بس تحسيها ما تحب تقعد و تهرج معايا..كذة..ما..مادري كيف...!
-طب ما تحاول تخرجها...؟!
-واللهِ أتمنى..أترجاها دايماً بس ما ترضى..كل ما أحاول أكلمها تقولي سكر و كل شوية أحتاج الحمام و معد فيني شدة..أصلاً هيا من يوم ما بطلت تخرج معايا و سارت ما تجيب أشياءها بنفسها ساءت نفسيتها...!
ابتسمت و أنا أمسح على كتف عمو:خلاص حبيبي..هدّي..لا تحرق أعصابك..إن شاء الله أنا دحين حولد و إنتا حتتزوج..يعني..تسير حركة شوية في العيلة..و إن شاء الله تفك و تتحمس..تعرف ايش..إن شاء الله لمن أجي أشتري أشياء البيبي أقولها تجي معايا و لمن إنتا تجي تشتري الدبل و زي كده نصر عليها تجي تختار...!
قال بطفش:دبل ايه يا أمي فكيني...؟!
كان نفسي أقول لعمو حتى إنتا أخلاقك سايرة زفت عشان قعدتك في البيت..لا إنتا إلي سويت عيلة و لا إنتا إلي صايع في الشوارع تسوي حركات شباب و تغير جو...!
لكن و لإني أبغى أكسبو ما حقلو كلام زي كده...!
قلت:إلا إن شاء الله..اسمع أنا بروح أشوف جدة و أسلم عليها و أشوف لو تحتاج شي و بعدين بجي و أناقشك في دا الموضوع...؟!
قال عمو بضيقة أطفال:جود تناقشيني في ايه..منتي ناقشتيني و خلصتي...؟!
ابتسمت و أنا أوقف:ناقشتك في الموضوع مو في ذات الشخص...!
-يعني إنتي محددة خلاص...؟!
-والله تقدر تقول أبغى آخد موافقتك عليها بعدين آخد موافقتها عليك...!
-و مين هيا دي...؟!
قلت بدون اهتمام و أنا أعطيه ظهري:أحلااام..شوية أروح أشوف جدة و أجيك...!
و رحت بسرعة عند جدة و قلبي يضرب ضرب مو طبيعي...!
آخر شي أتذكرو كانت دهشة عمو و نظرة الصدمة المرعبة...!
خلصت جدة صلاة و قالت على طول:جود...
ابتسمت:ايوة جدة...
و رحت و سلمت عليها..جلست جمبها و جيت بتكلم لكن صوت صفقة الباب القوية ألجمتني...!
جدة:الله وكبر "الله أكبر" ايش فيه هالولد...؟!
قلت و أنا أحاول أرقع:آآآه خسر فريقو حق الكورة...
-الله يا خسر فريقُه..عمك من متى يشجع...؟!
عضيت شفتي السفلى..أنا حمارة؛أعرف إنو جدة ما يمشي معاها الترقيع..أذكى مني و من عمو و منكم !!!
قلت و أنا أبتسم:أجل تلاقيه شاف شي نرفزو..إلا قوليلي إنتي..كيفك و ايش مسوية...!
-الحمدلله..إنتي كيف جيتي و متى و ليش ما تقولينْلي...؟!
-والله يا جدة حسيت إني مشتاقتلك و مشتاقة لعمو..كلمت علي و طلبتو و الحمدلله وافق و جابني..بكرة بيجي هوا و سعود و يتعشوا معانا...!
اتنهدت:خير..خير إن شاء الله...!
ابتسمت و أنا أحط يدي على فخدها:إلا إنتي ايشبك يا جدة..أحسك..كده تعبانة و طفشانة..ليه..ايشبك...؟!
قالت بهم بدون تردد:والله يا بنتي إني شايلة هم ذا الولد..إنتي و ربي سترها معاكي لكن سعود..والله إني ما أكلمو في زواجُه..أدري بيظيق (يزعل) عليا..لكن معد فيا صبر..أبغى أشوف ذُريتُه قبل ما أموت...!
قلت بانفعال:اسم الله عليكي جدة لا تقولين كذة..والله أزعل منك..لا تفاولي على نفسك...!
-أنا أدري..والله إني أدري إن إلي فيه وِحدة..الواحد لا كبر و ما اتزوج يعجز..عشان القلب..القلب يا بنتي إذا ما لقى الزوج يعجز و إذا عجز عِجزنا احنا

...!
اتنهدت:أعرف جدة أعرف..كلامك والله صح..إنتي ادعي..ادعي بس و أنا بحاول أقنعو..والله إني إذا كلمتو يظيق كمان لكن ايش نسوي..لازم..و الحمدلله مافي أي مانع..السكن متوفر..يفضي وحدة من الشقق و خلاص و الراتب الحمدلله راتب عمي يكفي و يوفي..مافيه أي مانع...!
-صادقة والله..لكن ذحين ليش ظاق..كلمتيه إنتي...؟!
-ها..آآه ايوة حاولت أفتح معاه الموضوع..هوا..هوا وعدني حيفكر لكن مع التوتر تلقيه اتنرفز و قفل الباب بقوة و عصبية...!
-يا بنتي إنتي ليه ما تشوفين وحدة من أخوات علي..إلا كم عمرها ذيك إلي باقي ما اتزوجت..طيبة هيا..فيها خير..عمك ضعيف ما يقدر في الحريم...؟!
ما كنت أبغى أدخل الفكرة في راس جدة..أخاف تتكلم و لا تقول شي رغم إنو الكل متوقع إنها الأنسب لعمو...!
قلت:مادري..الله يكتب إلي فيه الخير..هيا جدة تبغين شي...؟!
-إن كان شي موز هبيلي...!
-إن شااااء الله...!
وقفت فقالت:و الموية..عبيلي كاستي...!
قلت و أنا أشيل كاسة جدة الخاصة إلي تتغطى:إن شاء الله...!
و رحت للمطبخ..عبيت الكاسة بموية باردة و أخدت كم حبة موز و أنا أقول:منورة كلمي عمو ينتبه للموز..شوفي الخربان كتير..حرام هذا كرتون كامل...!
-أنا قلت..لكن بابا سؤود مافي ينتبه..هدا رجال حرامي..أنا أول أروح..حيوانة..فوق كويس تحت خربان..بابا سؤود ما يفتح كرتون عشان شوف بعيونو يقول احنا مسلمين لازم أمانة..ثقة...!
-عارفة الله يصلحو عمي..يحسب كل الناس زيو...!
-أنا أقول لكن بابا ما يسمع...!
-والله ما شفتي علي..يروح يضارب على حبة الطماطم لو فيها قاااااد كده سواد يروح يضارب...!
-أحسن بنغالي كده ينفع..ناس طيبين ما ينفع...!
-صادقة و الله..هيا يلا تصبحي على خير...!
-و إنتي من أهلو..!
و رحت لجدة..قعدت معاها شوية..أكلت و أكلت معاها موز..هرجنا كده يجي حق ساعة إلا بعدين نامت و اتوكلت أنا على غرفتي و هناك أديت علي رنة..عشان لو نايم خلاص..لو صاحي يرجع يتصل و رجع اتصل...!
رديت بهدوء:ايوة...
-أهلاً..ما نمتي...؟!
كنت قدني سادحة عالسرير و مغيرة:لاااء..دوبها جدة نامت و أنا.."اتثاوبت"..أنا دوبي دخلت الغرفة..إنتا ايشبك ما نمت...؟!
-و أنا أقدر أنام من غيرك...؟!
-و إنتا راضي لأ...!
ضحك:قصدي يهمني تكوني في البيت..حتى لو منتي معايا...!
-ايوة..شغل استبداد هذا...!
-هذا اسمو حب..حب يااا جاهلة..يا عديمة الغومنصية...!
-غومنصية...؟!،ايش دا..فرنسي على بدوي..ايش يطلع هذا...؟!
-هذا اسمهُ لغة الانترنت و المنتديات..بس إنتي مالك فيها...!
-لا صدقني ليا فيها و بقوة...!
-ايوة زمان كان لكي فيها ذحين خلاص...!
-كلو منك...!
-والله..ما أحلاكي تفتحي مواضيع و تتناقشي بكل رُقي مع الأعضاء..مصصصصخرة...!
-أصلاً مو من حبي فيها..أحسها كلها نفاق..الناس الراقيين إلي فيها و أصحاب المبادئ مهم موجودين..على الواقع يختفوا مدري كيف...!
-أصلاً أحسها دقة قدييييمة..منتدى و ناس أتناقش معاهم و قوانين ألتزم فيها..يييييه..شي يجيب الطفش...!
-لا هوا حلو يكون عند الواحد منتدى يطلع فيه كل مواهبو و إبداعاتو..بعدين بصراحة فيه منتديات أنا أدخلها و أشارك فيها عشان أحمل.."بسخرية"..ضع رداً لائقاً ليظهر المحتوى...!
ضحك:طيب يختي سيبينا ذحين من المنتديات..إنتي بتنامي...؟!
-إن شاء الله..و إنتا...؟!
-بقفل منك و أنام...!
-سعود وين...؟!
-سعود يا ستي جمبي أهو..سادح و في سابع نومة...!
-حبيبي هوا..بوسلي إياه...!
-طيب...
-بوسو !!
-طيب!!
-دحين يلا...
-استغفر الله..لازم تسمعي الصوت يعني...؟!
-ايوة ايش حيضرك يعني لو بستو...؟!
-طيب طيب..
و ما سكت إلا لمن سمعت صوت بوسة...!
انشكحت...!
قال:ارتحتي يختي..شوفيني خليتيني أضعف و أحضنو..مني قادر أسيبو...!
-و فيها ايه يعني لمن تنام حاضن ولدك...؟!
-ما فيها شي..تبغي شي...!
-لا سلامتك..بس انتبه ترا إلي جمبك سعود مو أنا...!
بانفعال:يا حيوانة يا قليلة الأدب.."وطى صوتو"..والله بس ما أبغى سعود يصحى..لكن تعالي..تعالي و أنا أوريكي..قليلة أدب وحدة...!
ضحكت:هدّي هدّي ايش فيك..مزحة و طلعت...؟!
-أنا أمزح قلة أدب عادي..إنتي لأ...!
-استبدااااد...أقولك مستبد بس ما تسمع...!
-إنتي كذة تخربي صورة الطهر و الأخلاق و الحياء حقتك في عيني...!
-أوووووه..كيوت علي..كيوت..يعني أنا لسه عندي حياء قدامك..حسبت إني فاصخة الحيا أنا...؟!
-كذابة..والله لو قدامي ذحين ما نطقتي بكلمة..قلك ما أعرفك يعني...!
قلت و أنا أبغى أوقف النقاش:طيب خلاص..يلا روح نام..مع السلامة...!
قال بصوت واطي:ايييييوة..اطلعي على حقيقتك..أتحداكي ذحين تكملي النقاش..شوفي أنا رحمةً بك و رأفة..و مراعاةً للأدب العام ولا كان قليت أدبي و نزعت قناع المروءة و الشرف..يلا..يلا روحي نامي و خليكي قد مزحاتك مرة ثانية...!
-آآه..تقصد بأن هذا هو درس اليوم...!
-نعم نعم هوكذلك...!
ضحكت:تبغى شي...؟!
-لأ..تصبحي على خير...!
-و إنتا من أهلو..اتغطى كويس...!
-طااااااييييييب...!
-يلا باي...!
-سلام...!
و قفلنا...!
حطيت الجوال على الكوميدينة و أنا أبتسم بسعادة لكن سرعان ما اختفت ابتسامتي...
عمو..أسلوبي كان غلط..أنا أصلاً ما كنت ناوية أكلمو كده..لكن لمن سألني لقيت نفسي أتكلم من غير ما أحس..أنا لا اهتمامي ما كان مفتعل..حتى بسرعة رجعت اتوترت..أسلوبي كان غلط..كان المفروض أكون معاه أكلمو بهدوء و صراحة و أحاول أمتص أغضبو..كيف أرتكب دي الغلطة و أنا أكتر وحدة أعرف إنو عمو لو أحد كلمو بأدب مستحيل ما يناقشو و يتكلم معاه..أنا غبية..كيف كده أسوي..دحين الموضوع حينقفل نهائياً و ما حقدر حتى أفتح فمي...!
يا ربي..ايش دا...؟!،يا ربي لو لك حكمة وريني هيا..أنا عارفة عموحيعصب من قبل لكن قلت أحاول و طلعت كده من غير ما أحس...!
يا ربي..يا ربي لا تكلني إلى نفسي طرفة عين..يا ربي إنتا أعلم بتعبي و بالهم إلي في قلبي..يا ربي لا تخليني لوحدي..يا ربي هدئ سر عمي..كل إلي أبغاه هوا إني أرد لو الجميل..يا ربي إنتا أعلم بالتعب إلي تعبو معايا..رباني و كبرني و حبني !!!
يا رب..ياااااا رب

*********************************

"آآآآآه..ظهري..سار لي كم يوم و أنا حاسة بالألم يزيد عليا..استغفر الله يا ربي..ايش دا..يلا هانت..راح الكتير و بقي القليل..كلها ثلاثة شهور إلا و أولد..."
طالعت في الساعة..كانت ثمانية..مع إني حاسة بتعب لكن ما فيا نوم..قمت بصعوبة و أنا حاسة نفسي مكتومة..شي جديد دا..لسه بس أمس بدأت أحس بالكتمة..مادري ليه أحس حملي في سعود كان أسهل و أهون مع إنو الكل يقول إنو أول حمل هوا أصعب حمل...!
خرجت من الغرفة للحمام..يوووووه..اتذكرت إنو ما معايا فرشتي..ما كنت جاهزة للمبيت..الله يصلحو علي لو قلي من أول..على كل حال أحمد ربي..واحد تاني كان رمى بخاطري عرض الحايط...!
فجأة جا على بالي عبدالله..لو رضيت بو كان حيسوي معايا كده...؟!،مادري ليه أحس إنو لأ..يمكن لإني حابة علي مرة و مرتاحة معاه الحمدلله..بس من جد..أحس لو رضيت بعبدالله كان قعدت في مشاكل مع أهلو حتى لو هوا يحبني و أفترض أنا إني ححبو...!
يووووووه..أنا كمان..ايش التفكير دا..خلاص بيتزوج الرجال و يفكني من إحساس الذنب و لو إني حسب حكاوي عماتي لمن يجوا و أقعد معاهم و أسمع أحسو..يعني أمو و أخواتو لمن يقعدوا يتكلموا عنو..أحسو عايش طبيعي..مالت عليه رغم إني ناسيتو و مني مهتمة لكن كنت أحس نفسي كلبة بسببو..وجع..حسيت بالذنب عالفاضي عشان واحد كان مصاب بمراهقة متأخرة..بس بالله "وش يحس فيه" لمن يتذكر...؟!
"وش يحس فيه"..أنا صح مني متعودة على دا الكلام لكن دي الجملة بالذات أحسها أحياناً معبرة و لو إني ما أزبطها لمن أقولها..هيا مي حلوة إلا من أهلها...!
أوه لحظة..ايش كل إلي فوق دا...؟!
أنا قاعدة أتهرب من التفكير في عمو و في إلي سار أمس..أو خليني أقول التخلف إلي سويتو أمس...!
اتنهدت و أنا أبدأ صلاتي على كرسي التسريحة الموجودة في غرفتي...!
قعدت أقول الأذكار و أنا في نفسي أتمنى لو إني صحيت و صليت الفجر في وقتها..كان قعدت أدعي لين الشروق..كان اتواصلت مع ربي زي العالم و الناس..كان..استغفر الله..خلاص..رحمة ربي و لطفو مو مرتبطين بقعدتي لين الشروق...!
اتنهدت و أنا أحاول أذكر نفسي بكل الأشياء إلي ربي ما خذلني فيها..طبعاً ربي ما قد خذلني..أنا قصدي في الأشياء إلي أتذكرها و يا قلها قدام إلي ما أتذكرها...!
قمت و أنا أفكر إني حسوي فطور لمن يصحو..طالعت في الساعة..جدة هادا وقتها بس عمو..عمو على حسب ما كان ينام دا الأسبوع و طول الأسبوع كان يقولي إنو ما كان يخرج من الشغل للمسجد للبيت..معناتو أكيد كان ينام كويس معناتو أكيد حيصحى اليوم بدري...!
سمعت صوت كحكحة قوية طالعة من جهة الحمام..أكيد هدا عمو..تعرفوا كيف الرجال في الحمام يكحوا و يتمضمضوا بقوة أول ما يصحوا...!
قمت من الكرسي و خرجت من الغرفة من غير ما أفك الشرشف..أحس شكل الوحدة بالشرشف يغصب الرجال إلي قدامها إنو يهدى...!
جلست على وحدة من كنبات الصالة إلي تقابل التلفزيون...!
دخل عمو بعد ثواني و طالع فيا بنظرة لاسعة سرعان ما اتحولت لطبيعية و هوا يقول:صباح الخير...!
و ارتمى عالكنبة و سحب كل الريموتات عندو...!
قلت و أنا أشوفو يشغل التلفزيون و يقلب لين ما يوصل للجزيرة الوثائقية:صباح النور...!
قلت عشان أكسر الصمت:كيفك عمو..نمت كويس أمس...؟!
-نمت...
-ارتحت...
ببساطة:لأ لكن نمت..اليوم حنام كويس...!
طنشت و ما حاولت أفكر في إلي يقصدو و أنا أقول:كنت أبغى أسألك عن..
لمن شفت نظرتو الغريبة قلت:..الللفطووور..نستنى منورة تقوم تسويه و لا تبغى أسويلك دحين...؟!
-لا ارتاحي إنتي شكلك تعبانة...!
-ايوة صح والله..بس عادي ممكن أسويلك...!
قال بصدق:لا حبيبي ارتاحي..إنتي جيعانة يعني مرة...؟!
-لا بس قلت لو إنتا تبغى...!
-أنا ما أبغى...!
قلت بتفكير:بس أصلاً أنا أبغى أتحرك..عارف..أحس نفسي مرة تقيلة و مكسلة..والله أحس حملي في سعود كان أسهل...!
قال بابتسامة:لإنو سميي..شي طبيعي يكون حملك فيه سهل و هين...!
-لا ياشيخ...
-إلا ايش ناوية تسمي البنوتة....؟!
-والله ما ححاول أفكر دحين..جدة تقول إنو الدكاترة كدابين و إنو محد يعلم الغيب..قصدها ممكن يكون ولد...!
-بس سعود اتوقعوا صح...!
-ايوة بس أنا ما حشغل نفسي دحين..كل شي من ربنا حلو..عارف أنا خايفة من ايه..خايفة من علي..علي يحب الأسماء الخفيفة حقت البنات إلي دحين و أنا ما أطيقها..أنا ما أحب إلا أسماء زمان..فاطمة رقية عائشة..إذا مرة مرة جديدة جمان شيماء أحلاااام...!
-جمان...؟!
-ايوة..مو حلو...؟!
-إلا بس أحس جمانة ألطف..هيا جمان جمع..صح...؟!
-ايوة...!
-و علي في ايش يفكر...؟!
-علي يقولك ليان لينة تالة...!
-طيب كلها حلوة دي...!
-عارفة بس فيها شي يقهر..الناس تقلبها أجنبي..عندك لينة يكتبوه بالألف و تالة و نورة و سارة...!
-طيب إنتي ايش دخلك في الناس..أهم شي بنتك تكبر و هيا عارفة و متأكدة إنو اسمها عربي و خلاص...!
-بس أحس أسماء زمان غير..تحس البنت تكبر باسم..كده ناضج و ثقيل لو معنى...!
-شوفي جود كلو يهون قدام وله و دلع و غرام...!
-ايوة الله شي يفقع القلب..بنات عندي في الجامعة مساكين مظلومين..والله وحدة معايا في كلاس مسكينة اسمها دلع و هيا بعيدة كل البعد عن الدلع..ضخخخخخمة و عفشة..و البنات قليلات أدب ماخدينها مسخرة..و هيا ضعيفة..عفشة و تهبش صح..لكنها ما تتحمل..يعني مي قوية بس فيها دفاشة...!
ضحك:أنا أعرف إنو لكل واحد نصيب من اسمو...!
-هيا تلاقيها دلعها في مشاعرها مو في تصرفاتها أو شكلها...!
-غلطة أهلها مو غلطة الناس..هما إلي أعطوا إلي حولها مجال عشان يتريقوا عليها...!
قلت بابتسامة:طب ايش في أحلام...؟!
لعمو مطلق الحرية إنو يفهم السؤال زي ما يبغى !!!
-اسمممم جميل و أصحابو أجمل لكن ما أحس إنو يناسبني ولا يناسبك...!
-هوا أنا ما أتخيل وحدة من بناتي أو بناتك يكون اسمها أحلام بس ليش ما يناسبك..ولا يناسبني كمان...؟!
سكت عمو لثواني و هوا منزل راسو بعدين رفعو و قال:كان بإمكاني أصرخ عليكي و أقفل الموضوع لكن ما أبغاكي تطلعي من هنا منتي راضية...!
جود أنا حتكلم و مأبغاكي تقاطعيني ولا..تبدي رأيك...!
سكت لثواني و هوا يطالع فيا بنظرة مؤلمة بعدين أخفض راسو و قال بحزن:
أحلام ذي أخت أحمد..أحمد صاحبي من المتوسط..تهمني راحة أخواتو و أنا ما أرضى لأحلام بواحد زيي..أبداً..مهما كانت ظروفها و مهما اتأخر سنها في الزواج..لإنها تستاهل تجيب أولاد..هيا و إلي زيها لازم يربوا لأنهم حيربوا صح لو ربوا..حرام..حرام عليا لو اتزوجتها...!
و وقف و عمو و خرج من الصالة و أنا كنت
shocked
و بس ...

^^^^^^^^^^^^^^^^^^^^^^^
الجزء الخامس عشر
(أنا و أبي و أصدقاؤه)

علي،،،
قفلت من جود بعد ما قلتلها إني أنا و سعود بنخرج أي مكان..حسيتها من صوتها شوية متضايقة لكنها ما أعطتني فرصة حتى أسأل ليه..عالعموم أنا ما حصر..جود لها مدة داسة عني شي..و ما دام ما تبغى تقول أحسن لها إنها ما تتوقع مني أساعدها..لإنها من البداية ما دخلتني في ذا الموضوع الخطير إلي متكتمة عليه...!
طالعت في سعود إلي أصر على اختيار ملابسه..ما كان شكلُه زي لمن جود تلبسُه..اتذكرت سيل تحذيرات جود من إنو سعود يخرج من البيت بشكل مو مرتب...!
قلت:كذة عاجبك...؟!
طاااااالع فيا سعود لمدة قبل ما يقول بنفس أسلوبي المستفز:جددددداً...
-طيب ماما قالت لازم تخرج مرتب...!
-طب أنا كده مرتب...!
-لأ منتا مرتب..حلبسك من الأشياء إلي أمك تجمعهم مع بعض...!
و مشيت متجه لغرفتو و في طريقي مسكت يده و مشيتو معايا...!
كان لين ما وصلنا لغرفتو يتكلم و يقول إنو يبغى يلبس على كيفُه...!
وقفنا قدام الدولاب يمكن فوق العشرة دقايق آخر شي اتصلت على جود تتصرف معاه..أنا ما أحب سعود لمن يتكلم و يبدي رأيه..ما عندي صبر أنا للبزورة إلي يتكلموا..أحب سعود بعد ما جود تزبطوا...!
و كان هذا إلي قالو سعود:
(-كويس..
-ايوة..إنتي رحتي و تخليني..ماما..أنا بابا ما يعرف شي في الملابس..بس يخلي شكلي مو حلو...
"أنا هنا صرخت لكن سعود أعطاني نظرة قلك يسكتني"
-ايوة ماما ايوة..
-البلوزة الحمرا مع البنطلون الأزرق...
-طب ماما أنا أبغى ألبس كده..ليش تقولي لأ...؟!
قال و هوا على وشك يبكي:طيب في البلوزة فيه في الجوة البلوزة ورقة زرقا..عادي ينفع...!
-خلاص طيب...
بزعل:أبى البنتلوووون...
-البيضا الصفرا مو حلوة...
-طيب..
باس السماعة بعدين حطها على أذنه لكن رجع و باسها بأقوى...و أنا كل إلي قدرت أسويه هوا إني أتحسر على جوالي...!
-حتى أنا أحبك..
-لا عادي البلوزة البيضا حلوة..حلوة زيك..
بخجل:ايوة يلا باي...)
و مدلي الجوال..أخذتو منه و قلت:ايوة سيد سعود..ايش قررت...؟!
-قررت..أنا إلي قررت ترا مو ماما..ماما سمعت كلامي أصلاً..أنا قلتلها أبغى البيضا..هيا قالت حاضر..ماما تسمع الكلام شاطرة...!
-و أنا...؟!
-إنتا أبداً مو شاطر...!
-سعودوه فكني من شرك و وريني وين البلوزة البيضا ذي...!
طالع فيا ببراءة و ابتسم و هوا يمد أياديه:ما أوصل..شيلني...!
حسبي الله و نعم الوكيل..أنا ما أتحمل النظرة البريئة حقت ذا الولد...!
شلتو و لمن شلتو ما قدرت..بستو و قلت و أنا أرفعو:أصلاً ولد سوسة حق مشاكل...!
-ماما تقول أنا زيك بس أعقل...!
-أمك..أمك هذي يبغالها تصفيق مجننتني..يلا جيب البلوزة..يلا...!
جاب سعود بعد عناء البلوزة و إلي طلعت في النهاية سكرية مو بيضا...!
وي..ايشبي غلس...؟!
مدلي سعود يدو:بابا لبسني...!
-البس بنفسك...!
قال بدلع:ما أعرَف...!
-لا يا شيخ..و الهبل إلي لبستو قبل شوية...؟!
قال و هوا يرفع أكتافو:نسيت كيف...!
طبعا اضطريت ألبسو..آآآه يا ذا الولد هوا و دلعه..أنا لازم أخليه رجال و عفش..والله أشوف أولاد زملائي إلي في الشغل..من سن سعود..يجوا بملابس رياضية..أقولهم كيفك أحسهم بيعطوني كف..أما ولدي..يا حليلُه..ما يطالع فيه واحد إلا و يبتسم..كلو من تربية جود..معلمتو عالأدب..الله يصلحها بس...!
حطيت يدي في يدو و قلت:نمشي...؟!
-عند فين نروح...؟!
ما كنت عارف وين أوديه بس لازم أخرجو و لازم أخرج أنا كمان..بصراحة البيت من غير جود ما فيه حياة..صح أنا ممكن أقعد عالنت أو أتفرج أي فلم لكن سعود...!
-وين تبغى تروح...؟!
-أمممم..أبغى أروح في الملاهي...!
طالعت في ساعتي..كانت لسه وحدة و نص..قلت:طيب بس مول مو ملاهي ملاهي...!
قال ببساطة:طيب...!
-وين تبغى تروح..شوف احنا أول شي نتغدى بعدين نلعب لإننا من فطرنا ما أكلنا...!
قال و احنا نخرج و نركب المصعد:لا بابا..مابغا..أول شي ألعب بعدين ناكل...
-طيب أنا جيعان...؟!
-إنتا العب معايا مو بس لحالي زي كأني لحالي ألعب...!
-على حسب..لو ما كان زحمة ممكن ألعب معاك..طب إنتا ما قلتلي ذحين..وين تبغى تروح بالضبط...؟!
-آآآ..نرووووح مول أوف أرابيا...!
-نعم يا أخوية...؟!
قالها بطريقة..والله ما كأنو سعودي...!
-لينا قالتلي كده...!
-و من علم لينا...؟!
-مادري...!
قلت و أنا أركبو السيارة و أربط حزامو:اسمو مجمع العرب...!
إلا تعالو..من سماه كذة...؟!،واللهِ هوا مول جيد و أهل جدة طالعين فيه..بس مين سماه...؟!
شغلت السيارة و جيت بمشي لكن سعود وقفني:بابا غلط...
التفت مستغرب فقال:أول شي تقوووول:سبحان الذي...
قال بعد مدة:قووووول...
-ايشبك...؟!
-قول ورايا...
-ايش أقول...؟!
-قول سبحان الذي...
-سبحان الذي..
-سخر لنا هذا و ما كُـ ـ ـ ـنا لهوووو مقـ ..مقرنين..
كملت عنو:و إنا إلى ربنا لمنقلبون...
-ايوة..
-طيب كان قلت لي تبغى تقول الدعاء...
ما رد عليا سعود لكنو اكتفى بإنو يلف وجهو و يطالع للشباك..آآخ من حركات البنات هذي..كأنو جود لمن تقعد تتدلع عليا!!
وصلنا لمجمع العرب و رحت لجهة الألعاب و قعدت أطالع في العروض..ما كنا حنحتاج شحن كثير..عبيت بمية و قلت إنها إن شاء الله بتكفي سعود...!
و بدأنا نلف..أغلب الألعاب كانت مقفلة..أوفففف..ايش المصخرة هذي..من يوم ما أعرف نفسي و ألعاب الأطفال تفتح من بدري..القطارات و الأشياء إلي تفجع هيا إلي تفتح خمسة...!
عالعموم هوا قلي إنهم شوية و يفتحوها بس يبغوا يسووا صيانة و شوية تعديلات...!
قلت:هيا سعود سمعت بنفسك..خلاص نروح ناكل أي شي و بعدين نجي نلعب...!
برطم سعود فقلت:تبغى ذرة ولا بطاطس و لا اسكـ...
سكت..لإني كنت أبغاه ياكل شي عدل..مو حلى...!
لكنو قال:اسكريم...
قلت:طيب حبيبي شوف أنا حشتري بطاطس و حشتريلك اسكريم..تاكل شوية معايا بعدين تاكل الاسكريم عشان إنتا حتلعب لازم تكون قَوي...!
-طيب بس أبغى اسكريم...!
و رحت و اشتريت من هوت آند كريسبي الحجم الكبير..لإني جيعان مرة و أبغى سعود ياكل معايا..اشتريت كمان هذا الـ الاسكريم على شكل دوائر صغيرة..سعود يحبو..يحب يقعد يحاول ياكلو دائرة دائرة...!
جلسنا على طاولة و كان سعود ياكل لقمة معايا و لقمتين من الاسكريم...!
قلت و أنا أرفع حبة بطاطس ملفوفة كده بيدي:شوف سعود شوف..مليانة كاتشب...!
-فيها شطة...!
-لا ما فيها..أنا قلت للرجال ما يحط عشانك..كلها..ترى أنا معد قادر أتحمل..مررررة أبغاها...!
قال بلا اهتمام:كلها...
قلت عشان أنرفزو و أخليه ياكل:لإنك أصلاً ما تقدر تاكلها..خايف يكون فيها شطة...
طالع فيا:إلا إلا أقدر.."فتح فمو"..أكلني...
ضحكت و أنا أدخلها في فمو بشويش عشان لا يشرق...!
بعد ما خلصنا أكل _و على فكرة أكلت معاه من الاسكريم_ قال سعود:بابا أبغى موية بعدين أبغى الحمام...!
طالعت فيه..يعجبني لمن يكون واضح و يقول إلي يبغاه بطريقة التعداد...!
قلت:"طيب نروح الحمام أول عشان نغسل"،و رحنا بالفعل عالحمام و هناك رفض سعود مساعدتي..ابتسمت و أنا أستناه عند الباب المردود..طريقته و هوا يرفض..مادري حسيتو كأنه حس إني اتعديت على خصوصياته أو شي...!
خرج و شلتو علطول عشان يوصل للمغسلة و يغسل لنفسو..طبعا ساعدتو في ذي بعد ما رفعتو للمغسلة و نشفتلو و خرجنا و اشترينا الموية و بعدها انطلقنا نلعب...!
أشرت لسعود بباي و ابتسمت لمن انتبهت إنو يناديني من أول و حاولت أركز معاه في كل مرة كان يختفي فيها و يرجع يبان لمن تنعاد اللفة من جديد..السؤال..ايش الممتع في ذي الألعاب؟!،يعني ايه يقعد يلف و يدور و يلف و يدور...؟!
كنت حاس بالطفش..و عارف نفسي لازم ألاقي شي أسويه ولا حنكد على سعود الضعيف..مو ايش أسويله..يعني لو يقعد معايا و يكلمني والله أنبسط معاه لكن لمن من لعبة للثانية أقعد أستناه...!
لو هانم جود ما راحت ما كنت حكون طفشان..والله إني غبي..لمن تكون معايا أحياناً أحس بالطفش ..مو منها..بس كذة..أحياناً أتمنى جود و سعود يبعدون عني شوية..لكن بس يبعدو أحس نفسي محتاجهم..أستوحش..من جد سخيف و مادري ايش أبغى؟!
إلا لحظة..أنا كم لي من أصحابي..يعني..حمادة و ذولا...؟!
فجأة رن جوالي..رفعتو و:"أوف..شكلي جذبتهم"
رديت:ألو...
حمادة:السلاااااااااااااام عليكوووووووووووووم
ابتسمت:و عليكم السلام..هلا..كيفك؟!
-طيب..إنتا كيفك و كيف أهلك؟
-بخير...
-آآه علي وينك..شكلك برة !
-ايوة برة...
-طب..آآه..يعني معاك أحد؟!
-كيف؟!
فجأة يطلع صوت:
(أقول بلا أدب زايد..هات..
حمادة بغضب:ياخي يمكن معاه أحد...)
قلت و أنا أأشر لسعود:أحمد ايشبك؟!
فجأة يطلع لي صوت عبود:علي..إنتا برة..طيب عرفنا..معاك حرمتك ولا لأ..نبغى نشوفك..يمدينا نجيك؟!
اتنرفزت من الأسلوب لكن سكت..أوكي..هذا الآدمي همجي خلقة و ما عندو ذوق..لكن طيب و هذا الشي إلي مصبرني...!
قلت:لأ..ما معايا إلا سعود...
قال بأدب مدري من وين جاي:طيب وينك...ممكن نجيك..عادي ما بنضايقك؟!
حسبتها خلال ثواني و قلت:أنا في مجمع العرب...
قال بصوت مضخم:حيثُ يتكدسُ أهلُ جدةـااااا.
ضحكت:لا مو لذي الدرجة زحمة...!
-المهم المهم..نبغى نجيك ذحين..و قول لسعود الغضب الساطع آآآآآتٍ...
-الساطع...؟!،امشي امشي بس الله معاك...
و فصل..و رحت أنا عند سعود..مسكتو من يده و قلت:سعود فاكر أصحابي إلي أول جو البيت؟!
-و جابولي جوم بوي أحمرة...؟!
ضحكت على الجيم بوي إلي مو راضي ينَّطق صح:ايييييوة..بيجون...!
-وين؟!
-هنا...
-هنا معانا...؟!
-ايوة...
-بس بابا إنتا تقعد معاهم بعدين أنا مين يلعب معايا...؟!
انتبهت لذي النقطة:آآآه إنتا حبيبي ما شبعت لعب...؟!
برطم سعود فقلت:طب يا سعود أنا كمان طفشان...!
سكت سعود لثواني قبل ما يقول:طب..أنا جبت الجوم بوي بس ما جبت شريط...تشتريلي؟!
طبعاً مضطر أشتريلو..آآه منو..أكره سعود لمن يبان فيه المكر و شقاوة الأطفال..طبعا مو أكرهه أكرهه بس يعني...!
قلت:و أنا أقدر أقول لأ؟!
و رحنا لمحل كذة لا هو كشك و لا هو محل..كان يبيع الكترونيات و أشياء زي كذة،أول ما دخلت قلت:عندك أشرطة جيم بوي؟!
طالع فيا الرجال لثواني بعدين قال:عندي مجموعة بسيطة؟!
-ورينا...
و رفعت سعود و جلستو على القزاز (زجاج)..طلع الرجال كذة شريط..شكلهم ما كان يحمس..يمكن مي ماشية..قلت:طب ليه كذة مغبرة و شكلها قديم؟!
-احنا معد نبيع..هذي بضاعة من زمان عندي و ما دامك تبغى اشتري..نفس الشريط مافي شي..ما رح تلاقي هنا في محل ثاني...؟!
-طيب..وريني شي كذة يناسب لولد صغير...!
سعود سحب وحدة من العلب قال:بابا هدا...
مسكت العلبة و قلبتها بيدي..كان عليها قرود شكلهم يضحك و موز في كل مكان...!
قلت:طيب..ايش فيها ذي...؟!
قال الرجال:ما فيها ولا شي..بس قرود ينقزوا و ياكلو موز..بس حلوة..حتى إنتا يمديك تلعبها..تضحك و تسلي...!
-ايوة..و بكم...؟!
-عشانك و عشان ولدك بمية و لا ترى والله هذا مو سعرو...!
-بس شريطك مغبر و باين عليه قديم..المفروض إنتا تبغى تتخلص منه...!
مسح الرجال العلبة و قال:أهوه..معد هوا مغبر...!
سعود بثقة:إلا..شكلو قديم..هدا مو بمية...!
طالع الرجال فيه و قال بابتسامة:ليش مو بمية...؟!
-علشااان هوا مو زي إلي أول جبناه...!
-كيف كان إلي جبتوه...؟!
-كان جديد..خلاص بتمانين...!
الرجال برجاء و هوا مبتسم:تسعين...؟!
-لللللللأ...
-خمسة و تمانين...؟!
سعود و هوا طفشان من زن الرجال:خلاص أقولك تمانين !!
ضحك:خلاص ولا تزعل..ثمانين ثمانين...!
طالع فيا:سمي على ولدك و حصنو..ما شاء الله حليوة و واثق...!
ابتسمت و أنا أحس بالفخر بسعود:يعني خلاص من جد ثمانين...؟!
ببساطة:ايوة..
حاسبت الرجال و طلعت..جلسنا على طاولة بعد ما اشتريت عصير منجا..جلست سعود فوقي و قعد يلعب..كنت أتفرج عليه و هوا يلعب و هوا كان يوريني و يشرحلي..اسم الله عليه..في الألعاب رهيب..حركتو سريعة و ما يحتاج وقت عشان يستنتج...!
كنت أخليه يشرب معايا..ما كان حاسس بأي شي..مشتغل عالأتوماتيك على قول جود..أقرب المصاصة منو فيشرب و عينه معلقة عالجيم بوي...!
شوية إلا رن جوالي..حطيت العصير عالطاولة و خرجت الجوال من جيبي و كان أحمد..رديت:ألو...
-أين أنت يا أخ العرب...؟!
-أنا في السوقِ...!
-السوقِ..لا إله إلا الله اسمهو المجمعوووو...!
-و إنتم وينكم...؟!
-احنا تحت...!
-كيف دخلتو...؟!
-كلمنا بنات كانوا داخلين و قالوا أوكي...!
-تستهبل إنتا و هوا...؟!
-يا سلام و إنتا كيف دخلت...؟!
-عادي أنا معايا أطفال...!
-ارحمني..حتى ما يخلوا..بس يمكن لإنك جيت بدري فمشوك..و لا تبدأ محاضرات..محمد مكفينا و عمر وجهو قالب طماطم..تقول أحد خطبوا...!
فجأة طلع صوت:"اسكت يا قليل الأدب"
أحمد:شايف شايف..قال ايش..حياوي..وجع..صوتو أعلى منو...!
ابتسمت:هوا حياوي حياوي..بس معاكم يعبر معايا ينكتم مدري ليه...!
ضحك أحمد:طيب وينك بالضبط...؟!
-أنا عند الألعاب..في الطاولات..المحل فاضي حتلاقوني علطول...!
-أوكي..ببايو إلى أن نصل إليك...!
-ههه..طيب يلا باي...!
بعد مدة سمعت اسمي..التفت:كان حمادة ينقز و ينادي و وراه البقية..ابتسمت و قلت لسعود:أهم جو...!
اتأفف سعود فقلت:بابا سعود..خليك عاقل..خلاص كمل لعب و ما بتطفش...!
أعرف إنها صعبة بالنسبة لطفل إنو يقعد و يشوف الألعاب و يتركها..لكن ايش أسوي..خلاص قاعد ألعبو من أول..خليني أنا أنبسط كمان !!
جو لين عندي فشلت سعود عني و جلستو على الكرسي و هوا ما زال يلعب..وقفت و أنا مبتسم..سلمت عليهم..بعدين جلسنا عالطاولة...!
كلهم قعدوا يطالعوا في سعود إلي مطنش أهاليهم..قلت:سعود حبيبي..قوم سلم...!
طالع فيا:بابا أبغى موية...!
شربتو موية و أنا في نفسي أتوعدوا..يلعن أبو التطنيش إلي مطنشهم هوا...!
بعد الموية عن فمو و قال و هوا يطالع فيهم:سلاكم عليكم...!
رد عبد الرب و أحمد و يوسف في نفس الوقت:و عليكم السلاكم...!
طنشهم سعود و كمل لعب..محمد ضحك أما عمر فاكتفى بابتسامة...!
قلت باستنكار:سعود..ليش ما تسلم...؟!
وقف سعود اللعبة و مدلي الجيم بوي و هوا يقول بحيرة:أبوسهم ولا بس بيدي...؟!
اتنهدت و قعدت أطالع فيه..قال:بااااابا..ايشبك...؟!
مد يوسف يدو و رفعو من فوق الطاولة بشوية صعوبة..باسو و حطوا فوقو..أخد الجيم بوي مني و قعد يلعب معاه...!
عبد الرب:هييي سعود..و احنا مالنا رب...؟!
طالع فيه سعود و قال بطفش:شوفو فوق...!
على فكرة:"سعود يكره عبود"
أحمد:يوسف والله إنتا لازم تتزوج..كنك حرمة..إحساس الأمومة عندك متفجر...!
يوسف بحقد:بلى قالولك لغم أتفجر..بعدين ايش إلي حرمة..هذا اسمو أبوبة...!
محمد:أبوبة؟!،اسكت إنتا و هوا..اسكت...!
سعود و هوا يهز يوسف من كتفو:شوف شوف..
طالع يوسف في شاشة الجيم بوي:أما..جبت حياة جديدة؟!
-ايوة علشان كملت مية موزة...!
-آآآه من قلك إنو كذة...؟!
-أنا قلتلي...!
ضحك يوسف و هوا يلف يدو حولين بطن سعود..أحسو متعلق فيه بشكل غريب...!
قال عبود:متى نتغدى...؟!
حمادة:أول نلعب بعدين نتغدى...!
محمد:تستهبل..جايبني من بيتي في عز الظهر عشان نلعب...؟!
-أجل ايش جاي تسوي...؟!
عبود بتهديد:محمد..تبغى تناقش قضايا الأمة بعيد عنا الله يخليك..أنا جاي أبغى أنبسط...!
أحمد:بعدين واحد جاي السوق لحالو مع ولدو..ايش يبغى يسوي غير إنو يلعبو...؟!
قلت:ترى عادي..مو لازم تلعبوا...!
حمادة:اسكت يا شيخ..وجع..آباء ثقيلين دم..إلا نبغى نلعب..أنا و عبود نبغى نلعب..يوسف...!
يوسف و هوا مشغول مع سعود:هااا...
-تبغى تلعب...؟!
-إذا لعبتو بلعب عادي...!
عبود:سعودوه...
-نعم...
-تبغى تلعب...؟!
سعود بلا اهتمام:اسأل بابا...!
عبود:بابا..
طالعت فيهم:براحتكم..تبغوا تلعبو قومو العبو...!
رفع يوسف راسو:عادي آخذ سعود...؟!
-حجي معاكم...!
حمادة بحماس:حتلعب...؟!
-لأ..بس حجي...!
-طيب وين الكرت...؟!
قطبت حواجبي فقال:عشان نزود عليه...!
تابع:احنا كذة دايماً..نشحن مع بعض..كل واحد يدفع خمسين...!
قلت:مالو داعي..فيه أعتقد...!
حمادة:يعني كم حيكون فيه إذا كنت إنتا من قبل قاعد تلعب سعود..يلا طلعو و كل واحد يطلع إلي عندو...!
محمد:ما رح أدفع شي..لإني ما حلعب...!

-
-مالت عليك إنتا..خذ عمر و فكونا...!
وقف محمد:عمر امشي نروح أي كوفي شوب...!
طلع عمر محفظتو و حط عالطاولة خمسين فقال محمد:بتلعب...؟!
-لأ...
-وليش تدفع...؟!
-حرام ما حيطلع شي لو كل واحد دفع خمسين...!
قلت:تعالو نروح معاهم..عشان بقعد مع سعود...!
ابتسم محمد:ما عليه خلاف..خليه يروح معاهم و تعال إنتا...!
حمادة بابتسامة:علي من قلك إنك ما حتلعب...؟!
عبود بابتسامة أوسع:من الحمار إلي أعطاك الإذن...؟!
طالعت فيهم فقال يوسف:إنتا و هوا بلا سماجة..سعود أبوية قوم عني عشان بنمشي نروح نلعب...!
و نزلو منو..جاني سعود و وقف عندي و شدني من كمي..دنقت فهمس في أذني:بابا يسير ألعب معاهم تاني...؟!
حمادة و عبود:ايوة يسير...!
التفت متفاجأ فلقيتهم واقفين ورايا و مبتسمين ابتسامة عرييييييييييضة..ضربهم محمد على أكتافهم بالخفيف:إنتا وهوا بلا جْنَان...!
وقفت و طلعت خمسين و حطيتها عالطاولة..التفت لسعود:خلاص تقفل الجيم بوي...؟!
-بس أكمل المرحلة...!
-اضغط ستارت و قفل الجيم بوي...!
سوى سعود إلي قلتلو عليه و مدلي هوا فقال أحمد:لا حنلعب أدفانتشر كامب..ما ينفع تشيلوا في جيوبكم أشياء...!
محمد:و طبعا ما في غير محمد حمالكم...؟!
عمر:مو مشكلة بشيل أنا معاك...!
سحب حمادة الخمسينتين إلي عالطاولة و قال و هوا يطلع خمسينة من عندو:يلا..يوسف عبود يلا...!
طلعوا الاثنين و اتوجهنا لمحل الشحن..شحن حمادة و جانا..و بسرعة عالية مشيوا زي المجانين و لمن وصلنا للعبة إلي يقولوا عليها لقيت إنها نفس اللعبة إلي مانعت إنو سعود يدخلها...!
قلت:هييي إنتا و هوا..ايش يدخلكم هناك...؟!
كانت لعبة كبيييييييييييييرة و فيها زحليقة سماوية عاااااالية و فيها طلعات و نزلات و حاجات غريبة...!
عبود:والله صادق فيه..ثقالة دم آباء...!
مسك يوسف يد سعود و حمادة مسك يدي،قال عبود:يلا حبايبي لا تخافوا..مافي شي يخوف...!
فلت يدي من حمادة:أقولك إنتا و هوا..خلونا في ساعة طيبة..ولدي ما بيدخل شي زي كذة...!
محمد بتعقل:علي الله يهديك ما فيها شي..دايما إلي أصغر من سعود يدخلوا..ما عليه خلاف إن شاء الله...!
تابع:يلا هاتو عفشكم...!
طلعوا كلهم محافظهم و جوالاتهم..قلت:عادي كذة أشياءكم تتلخبط...؟!
عمر:تبغى أشيل بس أشياءك...؟!
قلت:أخاف أحد من أهلي يتصل عليا...؟!
عبود بصدق:عادي إذا أهلتك اتصلت محمد بعدين يقولك...!
ضحك محمد:خلاص اطمنت..لو أهلتك اتصلت أنا حقولك..ولا يهمك...!
ابتسمت:"أهلتي؟!،والله لو جود تسمعني ولا تسمعهم..كان تكردفنا و تصرخ:"أنا ماليا اسم يعني..مرة مرة ما تبغوا تنادوني قولو أم سعود"،تماما زي ما سوت مع جدي..يعني..على حسب كلامها...!
قلت:أنا ما أقدر على ذي الألعاب..سعود أبوية عادي تدخل لحالك...؟!
سعود و هوا يلصق في يوسف:ايوة عادي..يوسف فيه...؟!
يوسف بعبط:أخ بس..ولدك دايماً جُملو في الصميم...!
قلت:طيب حبيبي انتبه لنفسك..و إياك تتزحلق على ذاك الشي...!
كانت الزحليقة مرعبة..أتخيل سعود ينزل منها...!
عبد الرب:سعود..لا تسمع كلام أبوك..يلا...!
حمادة:والله هيا أحلى شي...!
يوسف:بسرعة عشان يدخلنا...!
و راحوا..قلت باستغراب:ايوة الله..كيف بيدخلو..طول بعرض كل واحد فيهم ما شاء الله...!
محمد:يرشوا الرجال...!
عمر:محمد لا تقول يرشوا...!
محمد:أجل ايش هيا..يعطوه فلوس عشان يدخلهم..عشان كذة ما أرضى أدخل معاهم...!
جلسنا عالكرسي إلي قريب من اللعبة،قلت:بس طالع كيف الأهالي يطالعو..حاقدين عليهم...!
عمر:غريبة ما يشتكوا...؟!
محمد:كل إلي يجوا في ذا الوقت ناس تبغى الهدوء و ما تبغى مشاكل..و أغلبهم حريم و بنات يبغوا يجوا ينبسطوا و يتمشوا..مو زي حقون الليل...!
عمر:أنا أخواتي يجوا في زي ذا الوقت مع بنات خالاتي و زي كذة...!
-والله أنا ما سرت أجي عالظهر إلا بعد ما اتزوجت..يا شيخ قرفوا أبو أهلي..أجي أبغى ألعب ولدي..أبغى أروق مع أهلي..مافي..تحس الكل يطالع فيك...!
محمد:تحس ما عندنا فكرة إنو واحد يجي مع أهلو..يا هيا مع صحباتها و أهلها..يا هوا مع شباب يضطروا نفسهم لبنات الناس عشان يدخلوهم...!
عمر:بس احنا ذي المرة جينا شوية متأخر و لا كان دخلونا عادي...!
محمد:ايوة في الصباح عادي يدخلو...!
قلت:والله إنهم بقر..بدل ما ينشروهم برة يمنعونا يحطوهم جوة يمسكوا قليلين الأدب...!
محمد:والله صادق..
عمر:حتى الحريم سار عندهم عادي...
محمد:ايوة..أصلاً ترى الحرمة إلي كانت مع البنات هيا إلي عرضت علينا تدخلنا...!
-بالله...؟!
محمد:ايوة الله..جاتنا و قالت:تبغوا تدخلو؟!،قلنا ايوة فقالت:والله شكلكم طيبين بس اوعدوني ما تأذوا بنات الناس..عاد حمادة و عبود اتحمسوا و قعدوا يحلفوا و يوعدوا..نادت بناتها و دخلنا معاهم...!
عمر:المشكلة السكيورتي شافنا نكلمهم و خلانا ندخل عادي...!
رفعت راسي و أنا أسمع صوت سعود..لقيتو يأشر من ورا شبك من فوق و جمبو يوسف..ضحكت و سويتلو باي..فجأة جات كورة كبيرة على راس سعود..خفت عليه..ابتسم محمد:عادي الكورة لينة...!
التفت سعود وجري على أحد في الوقت إلي سمعنا فيه ضحكة عااااالية،قال عمر:هذا عبود...!
قلت بغيض:هذا عبود حيوان...!
محمد:ايشبك إنتا..ما تبغى أحد يقرب ولدك؟!،ايش بتسوي إذا دخل المدرسة..ترى الأولاد كلهم كذة عفشين..ترى سعود حالة شاذة...!
-لا تقولي..قول لأهلتي...!
ضحك محمد:ترى ما كان قصده..هوا كذة عبيط...!
ضحكت:والله صادق فيا..أنا ما عندي إلا سعود و هيا...!
عمر:بس ليش احنا كذة..ايش فيها لو قلنا أسماء حريمنا...؟!
علي:أنا عارف إني لمن أتكلم بالنكرة عن أخواتي و أمي و زوجتي غلط لكن أنا عارف و متأكد إني حلاقي تريقة و سخافة من إلي حولي..و ما حينادوني إلا بأسماءهم...!
محمد:صح كلامك..بس الواحد يبدأ بنفسو..مثلاً بتكلم أحد من أهلك في الجوال قدام رجال عادي ناديهم باسمهم..يعني شوية شوية لين ما السخيفين يحسوا بسخافتهم...!
قلت بصراحة:بس أنا بدوي و ما أتحمل..عارف نفسي و إلي حولي في الشغل و الشباب إلي يقربولي ممكن ما ينادوني إلا:يا زوج جووود يا زوج جوووود...!
ابتسم محمد:شاطر..تنفذ الكلام بسرعة...!
ضحكت بحرج:اسكت خلاص..ما انتبهت...!
قال بابتسامة:هذي آخرة الحماس في النقاش في ذي المواضيع...!
وقف عمر فجأة:أنا بقوم أشوفهم...!
و راح وقف عند سور اللعبة..قال محمد:إنا لله..أنا ما أعرف متى ذا الولد يبطل...!
-ايش فيه...؟!
-ترى قام مستحي منك...!
قلت بطفش:ييييييييييه هوا لسه..أنا المتخلف نسيت الموضوع...!
-المشكلة لو تشوف أولاد أعمامو..تعرف كيف لمن يجوك الشباب معفنين ما فيهم أخلاق و لا حيا؟!،هما كذة..مادري كيف طالع من بينهم..أصلاً حتى لمن يتعاملو معاه..كأنه بنت..الله يعينو على نفسه...!
-الحياء حلو بس هوا مرة...!
-بعدين هوا مو حياوي..هوا خجول..يعني ما يتكلم قدام الناس..أنا متفاجئ إنو اليوم اتكلم و إنتا موجود..تصدق قعد سنتين معانا ولا كأنو يعرفنا..بعدين فك معانا و سار يتكلم...!
قلت:إلا إنتوا كيف اتلاقيتو...؟!
-آآآآ..تقدر تقول إلي جمعنا حمادة و عبود...!
-آآ..يعني هما أصحاب من زمان...؟!
-من أيام الجامعة...!
-ايوة صح..إنتوا كلكم موظفين...؟!
ابتسم:دقيقة خليني أكمل..حمادة و عبود كانو أصحاب في الجامعة..حمادة أول ما اتوظف اتعرف على يوسف إلي جا يتدرب في نفس المكان إلي اتوظف فيه حمادة..اتصاحبوا الثلاثة بقوة و أنا كانت ليا معرفة بيوسف..كان هوا و أهلو جيرانا زمان..كنت تقريباً في السنة مرة أقابلو..كذة كل بداية إجازة صيف..تعرفني لئيم و ما أحب حركات الشباب و الـhanging out و زي كذة..لكن هوا دخلني فيهم..مرة أصر عليا أجي و هما موجودين..و شوية شوية صاحبتهم..بعد سنة تقريباً سرت مرة معاهم...!
-آآآآه..طب و عمر...؟!
-عمر عاد صاحبي أنا..درس معايا الابتدائي و بعدين اتفرقنا..إلي جمعنا بو كان ورطة بصراحة فكنا منها..مرة ورطنا في الحساب..كنا خارجين أنا و أخواتي و اتحممممسنا في الأكل..جينا بنحاسب..نقص يمكن خمسين ريال..جا هوا و بكل خجل مدلي خمسين..أنا انفجعت..وجهو كان مرة مألوف..نسيت موضوع الفلوس و قلتلو:أعرفك..تعرفني..طبعاً هوا مسكين حسب إني أهزأو ليش بيساعدني عشان كذة اضطريت آخذ منو الفلوس و قلتلوا برة بسحب و أرجعلك...!
-و إنتا ليه ما رحت سحبت و رجعت دفعت...؟!
-يا شيخ الفلبيني ذاك حيوان..فضحني؛ما تروح تسحب و مو راضي يخليني أسدد بالبطاقة..يقول ممنوع صاحب المحل منع...!
-وجع..المهم..و بعدين عرفت إنه صاحبك من الابتدائي...!
-ايوة..لمن رحنا عالبنك و شافني أدخل بطاقتي سألني لو كنت أدرس في المدرسة إلي كنا ندرس فيها..قلتلو ايوة قلي أنا عمر كنت صاحبك و مدري ايش..طبعاً هذا كلو و راسو في الأرض..مستحي مني و من أخواتي...!
-أووه..بس حلو ما شاء الله..يعني واحد من أيام المدرسة و محترم..أنا ما أطيق أصحابي إلي كانوا في المدرسة...!
ابتسم:و أنا زيك..لكن عمر غير..أنا نفسي بس أفكو شوية عالناس..ما شاء الله عليه تراه مثقف و أخلاقو حلوة..بس يبان دايماً غبي من خجلو...!
ضحكت:يا ليت عبد الرب يعطيه شوية...!
ابتسم و قال بصوت واطي:أقولك شي بيني و بينك..أنا و عبود ما نتفق أبداً..أوكي حبيبي و صاحبي لكن أبداً ما أتحملو و هوا يتضايق مني..يقول إني ثقيل دم...!
ابتسمت:هوا بصراحة إنتا محترم بزيادة...!
ابتسم:ايوة..شوف احنا خمسة مع بعض بس كل واحد مع أحد..عندك حمادة و عبودة مرررة أصحاب..أنا و عمر نليق لبعض..أنا ما أتحمل قلة الأدب و السماجة و عمر ما يتحمل العفاشة..فلايقين لبعض...
-ويوسف؟!
ابتسم:يوسف معانا كلنا..يوسف شخصيتو حلوة..يمشي معانا و مع المصافيق إلي قاعدين يلعبو..ينفع في الفلة و ينفع في الأدب و العلوم و الأخلاق...!
ابتسمت:ايوة بس مين صاحبو مرة...؟!
-هوا يميل لعبود و حمادة بس تقدر تدخل فيه..تراه بيموت على ولدك..حاط صورتو وول بيبر في الجوال حقو...!
-من وين له صورة ولدي...؟!
-مادري عنو..صورو زمان في المستشفى قبل ما تقوم إنتا..صورو في بيتك أول..كنت إنتا مشغول عنو..خاف تقول لأ فما قلك...!
ابتسمت باستغراب:ما كنت حقول لأ..بس هوا ليش متعلق مرة في سعود..أحس غريبة..دايماً الشباب يا ما يهتموا بالأطفال يا يكرهوهم...!
ابتسم بحزن:يوسف أصغر أخوانو..كلهم حريم و رجال كبار..أصغر أخواتو لمن اتزوجت و جابت ولد اتعلق فيه بقوة...كان هوا كمان مو كبير بس الولد سار لو حادث و هوا تقريباً بعمر سعود يوم الحادث..يومها كان تقريباً مر على موت ولد أختو سنة..أصلاً إلي انتبه للحادث عمر..لمن نزلنا كلنا شاف سعود طايح عالأرض علطول شالو و اتمسك فيه..فوق هذا.. يوسف مرة حساس..تحسوا جاي غير..عارف اتربى لوحدو..أمو و أبوه عجااايز و كبار..أخواتو إلي ربوه فجاي رهيف مرة..تحس ما كان فيه رجال في حياتو...!
-بس ما أحسه مرة غير..أحسو عادي رجال ما شاء الله و طيب..صالح يعني...!
-هوا حبيب بس مرة رهيف..مرة..تحسوا مو سعودي...!
-بالله عليك..السعوديين كلهم كذة..ما تشوف أبوك كيف يعامل أخواتك..يييه على أبوية..كان شديد معايا أنا و أحمد أخوية شدة..بس شوفوا مع أخواتي..ايش لطف و رقة..هههه..يعني والله قاعد أقول ايش هذا..كل قوتو تروح قدام أخواتي إذا اتكلموا...!
ابتسم محمد:هذا الطبيعي..أنا أحس نفسي مابغا أولاد كثير..واحد اثنين بس و الباقي بنات...!
-تفكر تتزوج...؟!
-طبعاً...
-متى...؟!
استغرب محمد أسلوبي فقلت:محد منكم متزوج إلا أنا...!
ابتسم:عندك عمر حقتو جاهزة..بس والله خايف عليه..حريم عيلتهم قوايا و هوا يا قلبي ضعيييييف..بس من كلامو الظاهر إنها تحبو..مع إنها عفشة و تردح...!
ضحكت و أنا أتذكر الحكايا إلي تحكيني هيا جود من الكتب إلي تقرأها..حكايات الحب إلي تكون فيها البنت قوية و الولد ضعيف و خواف...!
فجأة سمعت صوت بكى..التفت و كان سعود شايلو يوسف يحاول يهديه..وقفت و رحت بسرعة فقال يوسف:ما فيه شي ما فيه شي بس انفجع...!
مديت يدي و شلتو من فوق سور اللعبة:انفجع من ايه...؟!
قال سعود وسط بكاه:ولد..ولد جوة كعشني...!
-نعم...؟!
مسح محمد على راسه:كعشك ليش ايش سويتلو...؟!
-مادري..ولا شي...!
عبد الرب ملامحه فجأة اتغيرت..قال حمادة:الولد شعره خشن و منكوش و ولدك ما شاء الله شعرو حلو فكعشو...!
-يا سلام..عشانه قرد يضرب ولدي...!
يوسف:خلاص علي احنا خاصمنا الولد...!
عبد الرب قرب من سعود و مد يده لراسه و قال بتأثر:خلاص سعود..آسف...
طالعت فيه:ليش تتأسف إنتا...؟!
حمادة بسرعة:لإنو سعود من أول كان خايف من الولد و ما يبغى يلعب في نفس الجهة بس عبود قلو ما عليك و مشاه معاه بس فجأة الولد نط من وراه و كعش سعود...!
قلت بغضب:وينو ذا الحمار...؟!
يوسف:مادري..كعش ولدك و فجأة اختفى..بس ترى عبود ما قصر فيه دفو بقوة...!
قعدت أضغط على راس سعود بأطراف أصابعي:من وين شدلك شعرك...؟!
-من كل محل...!
و دفن وجهو في صدري...!
قلت و أنا أمسح على راسو:خلاص إنتو كملو لعب و أنا بهديه...!
طالع فيا سعود:لا بابا..تعال العب معايا...!
-سعود تبغى تكمل لعب و إنتا كذة...؟!
محمد:سعود راسك يعورك لمن ذحين...؟!
-لااا..بس أنا..انا انفجعت...!
ابتسم محمد:خلاص علي ادخل معاهم...!
-ايش إلي أدخل معاهم..أنا من زمان ما لعبت ذي الألعاب..ما أقدر أنطنط و أتسلق...!
حمادة:والله حماس..تعال معانا...!
سعود:بابا أبغى معاهم بس إنتا تجي...!
يوسف:تعال..إذا ما تبغى تتسلق فيه جوة مسدسات تتطلق كور..ممكن نسوي حرب الكور...!
عبدالرب:ارحمني..ولا شريط سوني...!
سعود و هوا يمسك وجهي بيدينو:بابا والله أبغى أوريلك شي...!
بعدت يدو عن وجهي و بستها و همست:سعود بس الولد كعشك...؟!
ابتسم و هوا يمسح وجهو:ايوة...
قلت و أنا أنزلو عالأرض:محمد الله يخليك جيب الموية...!
راح محمد للكرسي إلي قاعدين عليه و جاب الموية..شربت سعود و مسحت وجهو و رقبتو بالمنديل زي ما جود تسوي معاه بعد كل لعبة كان يلعبها...!
طلبني سعود موية فرجعت شربتو عشان ما أبغاه يكبكب..بعدها و هوا يقول:بابا تجي معايا...؟!
حسيت إني أبغى أدخل معاه مادري ليه..قلت و أنا أمسح شنب الموية إلي فوق شفايفو:طيب...!
انبسط سعود و قعد ينطنط..محمد كان ماسك البطاقة طلعها و رحت للرجال المسؤول عن اللعبة بعد ما دخلت سعود من فوق السور..طبعاً الرجال في البداية رفض بس عبود قال:عادي زي ما دخلتنا دخله...!
قال:كل شوية دخل دخل..أنا بعدين في مشكلة...!
قلت:أنا ما حطلع فوق بس تحت عند اللللـ...
يوسف:عند مسدسات الكور...!
الرجال كان طيب والله لإنو في النهاية استسلم و خلاني أدخل...!
دخلت اللعبة بعد ما أعطيت البطاقة لمحمد إلي راح مع عمر و جلسوا عالكرسي إلي كنا جالسين عليه..أعطيتهم طبعاً جوالي و أشيائي..حطيتها في يد عمر لحالو...!
دخلت مع سعود أول شي لمحل المسدسات..علمني سعود كيف..و بصراحة انبسطت و أنا ألعب معاهم حرب الكور على قولهم..نعبي في المسدسات الكبيرة كور..تقريباً تشيل ثلاثة أربعة كور و نبدأ نطلقها..كان حمااااس محترم..كنت مطنشهم و قاعد أطلق لسعود..كنت أحاول قد ما أقدر ما أجيب الكور عليه..على عكسه..كان يحاول يسددها و يجيبها صح في الأغلب و كان ينبسط لمن أسوي نفسي اتعورت...!
قعدنا زي المجانين نلعب و باقي الأطفال يطالعو فينا بحقد...!
قلت:سعووود..لعد تطلق عليا...!
سعود قعد يضحك و استمر يطلق عليا...!
قعدنا نلعب ليييييين أذان العصر..ما كنا حنطلع لولا الرجال إلي قعد يزن و محمد إلي هزأنا و أجبرنا نطلع...!
خرجت و أنا أحس بالتعب..يييييه..ايش كنت حسوي لو طلعت فوق و قعدت أتسلق و أنطنط...!
طلعت آه تعب و حر قوية...!
حمادة بفجعة:بشويش لا تطلع روحك...!
-اسكت كلو منك..حماس و حماس...!
عبود:من إلي كان يصرخ و يضحك جوة...؟!
قلت و أنا أفتح الموية:اسكت مالك شغل...!
لكن الموية كانت مخلصة..قلت:يووووه..أحد يروح يشتري موية...!
يوسف:أنا بروح..سعود تجي معايا...!
قلت و أنا آخذ أشيائي من عمر:سعود لا تاخذ موية باردة ...!
هز سعود راسو بعد ما مسك في يد يوسف و راح معاه..قلت بصوت عالي:يوسف انتبه لا يفلت من يدك...!
حمادة بصوت واحد مو شايف خير:علي..إنتا تخاف على ولدك...؟!
طااااااااالعت فيه لين ما قال عبود:سؤال سخيف...!
حمادة:لا بس ما أحس إنك من النوع إلي يخاف...!
قلت و أنا أتذكر جملة من جمل جود:الخوف ذكاء...!
محمد:هذا بالنسبة للأطفال..بس الكبار !!
قلت و أنا أرفع أكتافي:عادي..أنا لين قبل ما أتزوج ما كنت أخاف..والله كان عقلي ترللي...!
ترللي كناية عن العقل إلي مو في مكانه...!
ضحكوا على الكلمة و اكتفيت أنا بابتسامة و أنا أشوف يوسف و سعود جايين:والله من جد...!
مدلي يوسف موية قبل ما يبدأ هوا و البقية يتبادلوا المويتين..فتحتها و قربتها من فم سعود:بسم الله...
أحسكم مستغربين ليش أشربو و هوا يمكن موصل خمسة سنين بس أقولكم..سعود حجمو صغير..طبيعة جسمه زي جود و سعود عمها..ما فيهم جسم..أنا ما شاء الله أخواتي مو زي جود..لينا اسم الله عليها توصل لفخذها...!
بعدت الموية عن فمو و شربت و أنا أمسح فمو بأطراف أصابعي اليسار...!
قلت:أحد يبغى موية...؟!
عبود:يلا أكل...؟!
حمادة:بصراحة أنا واحد أبغى آآآآآآكل...!
محمد:اذكروا الله..خلونا نروح الفود كورت و نتغدى..بلا فجعنة...!
همست:لا إله إلا الله...!
طالع فيا محمد:تتريق...؟!
-نعم...؟!
استنتجت فابتسمت:لا من جد أذكر ربي...!
قال و هوا يرجع شعره على ورا:طيب يلا عشان أنا بدأت أتنرفز...!
-ليه...؟!
و مشيو و مشيت وراهم و أنا ماسك يد سعود إلي سأل:بابا متى نروح ماما...؟!
-نتغدى و بعدين نروح عند جدة..ولا أقولك..أمك قالت عشا..أريح نرجع البيت نرتاح بعدين نروح لجدة...!
-طب ما ينفع ماما تيجي معانا في الفود كورت و تاكل...؟!
ضحكت كيف إنو لقط الكلمة و علطول بدأ يستخدمها..قلت:ما ينفع حبيبي..منتا شايف أصحابي..كيف ماما تجي...؟!
-طيب..كلهم هنا رجال..هدولا كلهم عادي ماما تيجي و تقعد معاهم بس أصحابك لأ !!
ما عرفت بايش أرد عليه و فاجئني حمادة لمن رجع على ورا و حط يده على راس سعود:welcome to Saudi Arabia
عبود:الولد ذا خطير..ممكن يفضحك...!
محمد:إلا ضعيف شايف شي عجب..شي مخالف للمنطق...!
يوسف:يا شيخ..زوج أختي..هزأها في بريطانيا ليش ما تغطي..عشان كانو قاعدين حريم مع رجَّال و كانوا منقبات...!
محمد:أية..عديم المبدأ...؟!
هز يوسف راسو...!
عبود:وجع..فاكر لمن قابلته...!
يوسف:بس خلاص..سلكتو الرجال...!
جلسنا على طاولة و بدأ كل واحد يقرر من وين يبغى..أنا و سعود كنا جالسين عالطرف..التفت لو:ايش تبغى...؟!
-مممم..أبغى هاااارموونجر...!
كنت عارف إن سعود يبغى من مقدونلز (ماكدونالدز)...!
ثواني إلا و الطاولة كلها تفطس ضحك و بدأوا يكرروا..هارمونجر..هارمونجر...!
طالعت فيهم:هييييييي..إنتا و هوا..ولدي !!
بعد ما هديوا طالعوا في سعود إلي كان يطالع فيهم بدونية فظيعة..قال بلكنة مزبوطة:burger
حمادة:ايييييييييييوة..كده تعجبني...!
سعود:أنا حر..أنا بالكيفي..أبغى أقول كده..بابا شوفهم...!
قلت و أنا أمسح على ظهره:خلاص حبيبي خلاص...!
عبود:وااااااااا..من جد أبو..طالع كيف وجهه قلب...!
طالعت فيه:لا يا شيخ...؟!
يوسف:مالت عليك إنتا و هوا و هوا..سعود حبيبي قول ايش تبغى..من وين هامبرجرك...؟!
اتكتف سعود و قال:من ماكدونالدز...!
محمد:علي..انتبه لولدك..و خليه يتابع ناس تتكلم انجليزي كويس..تراه يلقط بسرعة...!
قال سعود بثقة:أول شي عربي..لغتنا أهم...!
حمادة و عبود هزوا روسهم بإعجاب...!
محمد:يا شيخ...!
سعود ببديهية:ماما تقول...!
قلت من ورا أسناني بغيظ:خلي..أمك..في..حالها...!
حمادة:بدوي بدوي...!
عبود:أقولك يا أبو هارمونجر..أبغى ماك عريبيا...!
طالعت فيه مستغرب:ها...؟!
محمد:ماك عربي...!
ضحكت:ايش هذا...ماك عريبيا...؟!
عبود:يلا مين بيقوم...؟!
قلت و أنا أوقف:أنا بروح..مين يبغى من مقدونلز كمان...؟!
يوسف:خذني معاك...!
عبود:يوسف جيبلي ماك عريبيا...!
علي:أحد ثاني...؟!
هزو راسهم بلأ فرحنا لجهة مقدونلز و اشترينا...!
رجعنا للطاولة و لقيناهم بدأوا ياكلو..عبود:سنة إنتا و هوا...!
سعود بقهر:زحححححمة..زحمة...!
التفت لسعود و طالعت فيه باستغراب فقال عبود:إنتا..كل ذا عشان زحـ..زعلتك و خليتك تمر من عند الولد..حقودي واحد...!
قال يوسف:بس إنتا..محسسني إنتا البزر و هوا الكبير...!
جلسنا و مدينا لعبود وجبتو..أكلنا و كنت أنا ما بين نفسي و ما بين سعود إلي يقتنص أي فرصة عشان يوقف أكل...!
زبطنا موضوع الفلوس _بما إن كل واحد يدفع لنفسه_ ...!
عبود:هيا سعودوه..المرة الجاية تجرب الزحليقة...؟!
سعود:يعني و بعدين معاك..إنتا ليش كده تطفشني...؟!
قرب عبود من سعود و نزلو و همس في إذنو بشي فهمس سعود لعبود بشي خلاه يصرخ:والله لوريك شغلك..جرب تسويها بس...!
قلت بحواجب مقطبة:ايش فيه...؟!
عبود:مالك شغل..سر بيني و بين ولدك..
و مد لسانو بطفولية...!
ودعنا بعض و بعدها كل واحد اتيسر في طريقه...!
يا ترى ايش قال عبدالرب لسعود...؟!
آآه..أكيد شي سخيف أو تعليق غبي من تعليقات عبود...!
أول ماوصلت البيت حسيت بتعب فظيع و قررت إني لازم أنام...!
فصخت لبسي و ارتميت عالسرير و أنا أفكر بسعود إلي دخل الحمام إلي في غرفتنا..آآ..ايش هذا..بدأت أخرف..عقلي فجأة بدأ ينطط لأحداث اليوم...!
خرج سعود و طالع فيا:بابا..نروح ماما...؟!
قلت و أنا ألتفت:تعال نام معايا ذحين و بعدين نروح لماما...!
طالعت في الساعة و أنا أفكر إن باقي ساعة عالمغرب...!
قلت و أنا أضبط منبه جوالي عشان الصلاة:يلا سعود..غير ملابسك و تعال...!
طالع فيا باستغراب:بابا كده تنام...؟!
طالعت في الشورت و الفلينة إلي ما لبست عليهم شي:ايوة و إنتا كمان...!
اتخصر:لأ..عيب و مو مرتب...
و خرج من الغرفة بعناد..طنشته و غمضت عيني لكن بعد حوال الخمس دقايق حسيت بشي صغير ينط من فوقي و بطانية تغطيني ببطء أظهر ضعف إلي يشدها...!
ابتسمت و لفيت يدي على سعود..الولد ذا ماخذ من أمه كل شي حلو...!

*******************************
الجزء السادس عشر
(أنا و أبي..قرار مؤجل)

فتحت الباب و أنا مبتسمة لسعود و علي..حضني سعود بسرعة أول ما فتحت الباب:هاه حبيب ماما...؟!
قفل علي الباب و دخل:وين جدة...؟!
-و أنا ليا الله...؟!
-والله إلي ما يبغاني ما أبغاه...!
طالعت فيه بنظرة:طيب..
ضحك و هوا يرتمي عالكنبة..جلست حمبو و قلت و أنا أحط يدي على فخدو:وين رحتوا...؟!
-مجمع العرب...!
-طب ليه شكلك تعبان...؟!
اعتدل في جلستو و قال بهمس:اسكتي..لعبت...
ابتسمت بسعادة:بالله..ايش...؟!
-أصحابي غصبوني و سعود رجني..بس والله انبسطت...!
-أصحابك..ليه إنتا قابلت أحد...؟!
-واللهِ من غير ما أرتب..اتصل عليا أحمد و قلي إنتا برة..سألني ويني و قلي بيجوا...!
-آه..و انبسطتوا...؟!
-الحمدلله...!
قلت برجاء:حكييييني...!
ابتسم:ما فيا حيل ذحين..بعدييين...!
لويت فمي:مااااالت...
طالع فيا فقلت بسرعة و خوف:أمزح أمزح...
قال بأمر:سعود..روح نادي عمك و جدتك...!
قلت:جدة أكيد تصلي السنة و تقول الأذكار دحين...!
-طب سعود وين...؟!
-في غرفتو..مادري ايش عندو...؟!
-إنتي مو جاية تقعدي معاهم...؟!
قلت:سعود حبيبي روح اقعد عند جدة لين ما تخلص صلاة...!
اتكتف:أقعد أستناها يعني...؟!
ابتسمت:ايوة..هيا تحب تصلي و أحد يستناها...!
راح سعود بتأفف..ههه..عرف إني أصرفو...!
قلت بصوت واطي:جدة مرة متضايقة عشان عمو ما اتزوج..تكلمني و هيا شوية و تبكي..حزنتني..و كلمت عمو ما أعطاني وجه...!
قال بنرفزة:و عمك ايشبُه..تراه كبير...!
قلت:وطي صوتك لا يسمع و يزعل..كلمتو و تخيل..ولا كأني فتحت معاه الموضوع..و لو حاولت ألمح يغير السيرة و يتكلم عن شي بعييييييييييد....!
أوكي..اتكلمت عشان أبغى أحسس علي إنو معايا في الموضوع و أهيئو نفسياً لو سار نصيب و في نفس الوقت ما كدبت..هدي كانت ردة فعل عمو..ولا كأني قلت شي...!
شي مستفز !!!
عمو ليه كده..ليه لمن ما يعجبوا الشي يطنش..يحسس إلي قدامو إنو سخيف...!
علي:والله عاد عمك مو صغير عشان أحد يحزن عليه و يقرر عنه و مو صغير عشان يقعد لين ذحين مو متزوج..طق الثلاثين و هوا لسه..شوفيني ما كملتها و عندي ولد بسم الله عليه عمره خمسة سنين...!
قلت بعتاب:علي..اذكر الله و احمد ربك عالنعمة..يمكن عمو نصيبو لسه مو دحين...!
استغفر علي و قال:عارف بس والله مقهور..عمك ما شاء الله رجال أخلاق و متوظف أحسن وظيفة و مو متزوج..زيه زي أحلام..كل إلي جوها زبالة مع إنها بنت حلوة و محترمة و متعلمة..وين عمك و إلي زيه عنها...؟!
قلبي دق..آه..علي ايش قاعد يقول...!
تابع:مو قصدي شي..بس وين الآوادم يختفوووون..وين..هذولا المحترمين وينهم..يا الله يا جود..كل ما أروح معاكي جرير و أشوف المثقفين يقروا..أقول يا ربييي.ذولا في الحياة وينهم..ليش ما نشوفهم..ليش ما يطلعوا...؟!
حطيت يدي على كتف علي المتنرفز و قلت:بس حبيبي..هدّي..ايشبك...؟!
-أفففففف..انقهرت...!
-طيب حبيبي..أحلام و عمو مافي زيهم..أنا متأكدة ربي حيكتبلهم الخير..الناس الفنانة و المحترمة دايماً نهاياتهم حلوة...!
-هذا لإنك تحبي الـ "يتريق عليا" happy endings
-ايوة أحبها و مؤمنة بها و مقتنعة لإنو مافي نهاية وحشة لإنسان طيب..حتى حتى لو ما لو حظ في الدنيا تشوف خاتمتو..شي يقول عالجنة علطول..هذا إذا مرررة مرة يعني حظو ما كان صاحي...!
ابتسم علي:كنك..كنك قلبتي على بدوي...!
ابتسمت و قلت و أنا أحك شعري:أحس و أنا حامل أسير عفشة...!
-و متوحشة...!
-يا سلاااااااااام !!
-و أنا صادق..يا ربي بس تولدي بالسلامة...!
-آمين بس مو عشانك..و مديت لساني...!
طالع فيا باستغراب فضحكت:كان قصدي أقول للقراء مديت لساني لك...!
قال بغضب:و إنتي تقوليلهم عن قلة أدبك معايا..ذحين يقولو ما عندُه شخصية...!
كنت حرد لكن عمو دخل الصالة بابتسامة و هوا يرحب بعلي...!
وقف علي و سلم عليه:لا كان أحسن ما خرجت..ساعات تحسسني كنك سندريلا..تجي في الوقت بدل الضايع...!
قلت بقهر:سندريلا ما جات في الوقت بدل الضايع..مداها تتكلم و ترقص مع الأمير...!
طالعو فيا الاتنين بعدين كملوا كلام بعد ما رد عمو على علي...!
قمت و أنا أقول:ايوة ايوة طنشوني..أصلاً من حلاتكم يعني..مالت عليكم سخيفين تافهين...!
رجعت التفت و قلت:عمو..ولدي وين...؟!
-آآ..وريتو لعبة جديدة نزلتها على جوالي و قاعد يلعب...!
قلت و أنا أتابع طريقي:و أنا أقووول مالو صوت...!
رحت لغرفة عمو و بالفعل لقيت سعود..قلت:وي سعود..ايش تسوي...؟!
جا لين عندي و وراني اللعبة..قلت:آآه ايوة حلوة..بس ممكن تقفلها عشانك واحش ماما مرة...!
قال بنفس دلعي:طب ممكن بس شوية أخلص المرحلة...؟!
برطمت:بس سعود أنا أبغى أقعد معاك و أكلمك...!
-طيب..طيب خلاص لا تزعلي..دحين رح أقفلها...!
ابتسمت:يلا...
و مشي خارج من الغرفة و مشيت وراه..وصل لين عند عمو و قال:عمو خلي بابا يحطها في جوالو...!
عمو:طيب حبيبي...!
علي و هوا يسحب الجوال:ايش هيا...؟!
جاني سعود و حط يدو في يدي..جلست على وحدة من كنبات الصالة البعيدة عن عمو و علي و جلس سعود جمبي..حط راسو على صدري و لف يدو حواليا...!
قلت:ايوة سعود..قولي..ايش عملت...؟!
قال علي بيأس:لااااااااا..سعود..سعود الله يخليك..من يوم ما اتكملت بذا الأسلوب يعني بتبدأ شغل المجاغة حقها..سعود الله يخليك خليهم يوقفوا...!
ضحك عمو:و إنتا ايش عليك منهم..خليهم..أم و ولدها..ما حتقدر تدخل بينهم...!
قلت و أنا أمسح على شعر سعود:وي..ايش حارق رزك...؟!
علي بغيض:أصلاً ما عندي رز من الأساس...!
قال سعود بهدوء و هوا يغمض عينو:ماما في سر حقوووولك عليه بعدين...!
-طيب حبيبي...!
فز علي:لا يكون إلي عبود قالو لك و تكذب عليا من أول ما تبغى تقول لي...!
قطبت حواجبي فقال:يختي هذا عبد الرب قال شي في أذن سعود نرفزه و مو راضي يقولو...!
قلت و أنا أمسح على شعر سعود:ايش قلك حبيبي...؟!
قال بطفش:يا ماما هدا واحد.."سكت لثواني"..ماما دا عبودي..ايش أقووووولك..ماما..تعرفي زي مين..زي داكا عبدالإله أخوكي بس دا عبودي يحبنا...!
ابتسمت بهداوة و أنا أخلل يدي في شعر سعود و أكمل لعب بيه...!
قال عمو:طيب علي..أنا بطلب إذنك في شي...!
طالع فيا:طبعاً جود أنا حستخدم سلطتي عليكي كأب و ما حستنى رأيك...!
رجع يطالع في علي:علي..عارف تعبان..باين عليك..بس أبغاك تقعد إنتا و زوجتك و ولدك عشان سعيد كلمني و قلي بيجي يتعشى هوا و أولاده بما إنو البنات و أمهم رايحين زواج...!
قلت و أنا أحاول ألتهي:زواج مين...؟!
-مادري..صحبة خلود يعرفوها و يعرفوا أهلها فحيروحوا كلهم..يعني..شي زي كذة..المهم ذحين..علي ايش قلت...؟!
علي و هوا يسند راسو عالكنبة:بكيفكم أنا مالي شغل...!
عمو:علي...
علي:إنتو أحرااااااااااااار...!
عمو و هوا يطالع فيا:جود..طبعاً حتقولي لأ...!
أخفضت بصري و قلت و أنا أزبط لسعود لبسو:براحتك...!
-لا تقوليلي براحتك..إنتي إلي تقرري...!
قلت بهدوء و أنا أتجنب أطالع فيه:لأ مو أنا..بعدين هدا مو بيتي عشان أقرر مين يجي و مين ما يجي...!
-أنا ما فتحت هذا الموضوع..أنا قلت تقعدي معاهم و تتعشي لإني عارف إنك متى ما طقت في راسك بتخرجي لبيتك و علي ما شاء الله بس في دا الموضوع ديموقراطي...!
علي:كنك..كنك دخلتني في الموضوع...!
عمو:ليه و مين قال إنو مالك دخل...؟!
-عشاني ديموغراااااطي...!
-ديموغراطي..والله إنك..علي..كنت أبغاك تساعدني...!
-الله لا يبلانا..تقول بزرة قدامك ما تفهم..ياخي أهي عندك..تتكلم عنها..كلمها !!
قلت بابتسامة واثقة:عمو إنتا ليه افترضت إني حرفض..عادي..حياهم الله...!
ابتسم عمو:ايييييوة لإني عارف إنك تعتبري دا البيت بيتك..عشان كذة أخدت إذنك...!
قلت بسخرية و أنا أدعي العجب:بالله...؟!
اتكتف و قال بابتسامة حلوة:بالله...؟!
لفيت وجهي بدلع و ما كانت إلا ثواني و عمو جمبي لاف يدو حول أكتافي و باليد الثانية يداعب سعود...!
علي بصراخ:هييييييييييي..قوووووم..ايش تسوي عند زوجتي..قووووووم...!
جدة إلي دوبها دخلت الصالة:ولد..ليش صوتك طالع...؟!
علي:شوفي..شوفي يا جدة كيف اتجمعوا في جهة و طنشوني..ولا كأني زوجها..و لا كأن إلي في حضنهم ولدي...!
جدة بطفش و هيا تتوجه لعلي:يا الله سترك...
جلست جمب علي:هب لي مخدة لظهري...!
حط علي مخدة ورا ظهر جدة و هوا مبتسم...!
جدة بعد ما ارتاحت في جلستها:هيا تعال...
حط علي راسو على صدر جدة بس طبعاً بالخفيف عشان لا يضغط على صدرها..و مد لسانو بطفولية...!
اعتدل عمو في جلستو:علي يا أهبل..هييي..قوم عن أمي لا تكتمها...!
اعتدل علي في جلستو كمان و قال:والله يا سعود إننا أهبل رجالين..مسوين أقويا ليييين عند الحريم نضعف...!
طالعت في علي بدهشة و هوا يتابع:والله..يا الله على أصحابي إلي في الشغل..زوجاتهم و أمهاتهم كنهم ولا شي و علطول يشتكون منهم...!
قلت:علي لا يكون تقلهم إنك ما تستبد و تفتري..تراهم مو طبيعيين و الرجال دحين زي الحريم..ينقلوا الكلام بطريقة وحشة...!

-أنا ما أقول شي..أصلاً ما أعرف كيف كل واحد يتكلم عن الشر إلي يسويه في زوجته...!
عمو:يمكن على أساس رجولة و قوة...!
ضحك علي:رجولة ايه..يا شيخ والله على الحكاوي إلي أسمعها..حريمهم مو بس مكردفينهم..إلا ماسكينهم من رقابهم...!
ابتسم عمو:عشان ربي قال سَكن مو افترى و سيطرة و محاولة إثبات قوة...!
جدة:علي قوم عني...!
شهق علي قلك انصدم..فقلت:جدة الدلع عندها مؤقت..قوم...!
قام علي عن جدة و هوا يتأفف:وجع..محد يبغاني في ذا البيت...!
حزنت عليه:تعال علي حبيبي تعال...
وقف عمو و هوا يقول بطفش و قرف:والله إنكم ما تنعطوا وجه..خلاص قايم..لا تروحيلو و لا تروحلها...!
ضحك علي:سعودي حبيبي تستحييييييييي...؟!
طالع عمو فيه بنظرة و هوا يجلس و يمسك الريموت...!
قلت و أنا أقوم:جدة قلتي لمنورة تسوي شي...؟!
عمو:يووووووه سعيد قال نقولو ايش يجيب عشا...!
قلت:ليش يجيب..خلاص أنا أسوي..بس واحد منكم حيروح و يجيب لو فيه شي ناقص...!
اتأفف علي و قال عمو:لا تطالعي فيا...!
قلت بثقة:مو شغلي لو فيه شي ناقص واحد منكم حيتلحلح...!
و دخلت المطبخ..خليني أشوف ايش ممكن أسوي...!
فتحت التلاجة و أنا أسمع:"ما قلت إنها تحس إنو هذا بيتها..دحين لا يمكن توافق سعيد يجيب شي..معتبرتهم ضيوف عندها"
ابتسمت..هدا عمو..مشكلة عمو إنو ما يعرف إنو همسو أعلى من صوتو العادي...!
عمو من الناس الفاشلين في الهمس...!
قلت:منورة...
قالت:مافي صلصة...!
-طب طماطم...؟!
-فيه شوية...
طالعت في البصل إلي في السبت:ممم كويس فيه بصل..هيا الله يسعدك قطعي 3 بصلات كبار صغير صغير...!
-بابا سئيد يجي...؟!
-ايوة...
-بس دجاجة وحدة فيه...!
-مو مشكلة..مو بقي من شوربة الحب إلي في المغرب...؟!
هزت راسها بايوة فقلت:خلاص نحميها و إن شاء الله يكفي..بس بابا و أخواني حيجوا على ما أعرف...!
سمعنا صوت جدة تنادي منورة..رحت لها أنا:هااااا...
جدة بلهجة آمرة:اخبزي الخميرة...!
قلت بتكاسل:جدة بقي من حقت المغرب...!
-و إن كان..اخبزي..والله إني خبزت لجدك ذيك الخميرة قبل ما أولد عمك بكم ساعة...!
قلت في نفسي:"ايش دخل الولادة في الموضوع؟!"
-مين..عمو سعود...؟!
-ايوة...
-هدا إنتي يا جدة مو أنا..بعدين أنا تعبانة و ما فيا حيل و أصلاً أصلاً ما أعرف أسوي الخميرة...!
-تعلمي..مين بيسويها لسعود لا مُت..والله إن ولدك يحبها...!
قلت باستنكار غاضب:جدة..لا تفاولي على نفسك خلاص حتعلم أسويها...!
عمو:الله يهديكي يا أمي ايش ذا الكلام..قولي خير...!
رحت المطبخ من غير ما أرد..بس فعلاً لازم أتعلم أسويها..هدا تراثنا و إن كنت منفصلة عن تراثنا و ما أعرف فيه شي..لكن زي الخميرة و العصيدة و شوربة الحب و الدكيك..هدي كلها أشياء حلوة..أشتاقلها بين فترة و التانية و سعود حبيبي يحبها و أنا ما أعرف أسويها..حتى علي والله يحبها...!
مسكت أنا العشا و خليت منورة تتولى الخميرة..بس أنا لازم أتعلم..إن شاء الله بعد ما أولد أتفرغ لتعلمها...!
خلصت من شغل العشا و خرجت من المطبخ بعد ما زبطت النار...!
قلت:عمو بابا متى حيجي...؟!
-والله قلي إنو قريب..خليه..ايش عليكي إنتي...؟!
قلت و أنا أجلس:عليا إنو العشا ما بقيلو شي و يجهز...!
علي بشك:مو كأنه ينفع تخليه على نار هادية و ما يسير فيه شي...؟!
اتنهدت و أنا أحط مخدة ورا ظهري:إلا..
قلت و أنا أطالع في سعود إلي كان يلعب بعيد بالجيم بوي:سعود تعال هنا...!
جا سعود و جلس جمبي:ماما شوفي..أنا ما وريتك...!
قلت و أنا أطالع في القرد إلي قاعد يتزحلق على غصن:ايوااا..ايش دا..اليوم اشتريتو...؟!
-ايوة..عشان أصحاب بابا جو..بعدين أنا مابغا أقعد طفشان..بعدين بابا جبلي...!
-آآآه..ايوة و بكم اشتريتوه..شكلو قرمبع...!
طالع علي فيا:لا تتفلسفي..ما لقيت إلا هوا..و ولدك إلا يبغاه...!
-طيب أنا ما قلت شي..بس لإنهم في المحلات دي يا تعطيهم في وجههم يا ياكلوك...!
مسك عمو كرتونة اللعبة:واللهِ واضح إنو مو أصلي..غشاشين..بكم اشتريتو...؟!
علي:طلب مية بس سعود قعد يزن عليه..تخيلوا هوا إلي كاسر مو أنا...!
التفت لسعود بابتسامة:من جد سعود..ايش قلتلو...؟!
سعود:قلتلوووو حقك مو زي حقي إلي أول..شوفي ماما العلبة حقتو..كأنها مو من جد..بعدين قلتلو بتمانين..قلي خلاص طيب...!
عمو:بداية طيبة والله..قدر ينزل عشرين ريال...!
علي:والله أنا ما لي في الألعاب و الأشياء ذي.."طالع فيا"..أحسن عشان مرة ثانية تجي...!
-لا أنا أثق في سعود..هوا يعرف و يقدر يفرق لو أصلي ولا مو أصلي..بعدين كويس إني ما جيت..أقلها الولد سار يعرف يكاسر...!
اندق الجرس و مادري ليه لكن اتوترت...!
وقف عمو و كان حيروح لكن علي قال بلا اهتمام:خلي سعود يفتح الباب...!
طالعت في علي بعدين في عمو إلي قال:سعود حبيبي تعال...!
قام سعود و هوا ماسك جيم بويو و مسك في يد عمو و عينو على الشاشة...!
فتح عمو الباب و دخلو تلاتة رجال..بابا و أولادو..وقف علي و وقفت أنا..سلم عمو و قفل الباب بعد ما دخلو و سلمو على علي بعدين وصلولي و سلمو عليا..كل دا سار أتوماتيك...!
جلسو و بالصدفة كان عبدالإله جالس قريب مني..ما يفصل بيني و بينو إلا مكان شخص واحد...!
التفت لي و قال:كيفك؟!

كأنو في أحد صفقني بكتاب !!!

هزيت راسي:الحمـ..الحمدلله..إنتا كيفك...؟!
-بخير..كويس الحمدلله.
و أداني ظهرو...
وي..ايش يبغى في حياتو دا...؟!
فجأة كده نط عبدالرحمن في الموضوع:جود متى حتولدي...؟!
تابع بعد ثانيتين:طفشان أبغى بيبي و مالي مزاج في بيبي حقي فلازم أحد ثاني يجيبلي بيبي...!
احتجت وقت عشان أستوعب الكلام إلي انرمى عليا بسرعة غريبة...!
قلت:ما..إن شاء الله قريب..كم شهر كده و أولد...!
بابا:كم شهر يعني كم...؟!
قلت:مادري..ما أحب أفكر..يمكن شهرين تلاتة مادري...!
أنا أعرف بالضبط كم بقي بس دحين ما أعرف..أففف متوترة و مربوكة..أنا ليه متوترة..ايوة عرفت عشان أسلوب بابا الغبي في الكلام...لأ..أسلوب بابا كان عادي..يا ربييييييييي..أنا ايشبي...؟!
عمو:وي سعود حبيبي..ليه ما تسلم على جدك...؟!
عبدالرحمن بمزاح عبيط:عندو إلي يشغلو..سعودوه..سلم على جدك و أخوالك...!
قال سعود و هوا يتوجه ليا عشان يعطيني الجيم بوي:حسبتكم سلمتو عليا...!
أخدت الجيم بوي منو و أنا أسمع عبدالرحمن يقول:كيف يعني سلمنا عليك و إنتا مو حاس..أبغى أفهم يعني يعني أبغى أفهم أنا...!
التفت سعود لعبدالرحمن:عشان إنتو بس تبوسوا تبوسوا تبوسوا..تعوروا خدي..أصلاً إنتوا تبوسوا الهوا..بس ماما تبوسني من جد..كمان بابا و عمو و أبوية و أمي و إنتوا ما تعرفوا..أنا حسبتكم سلمتوا...
و قال سعود شي بصوت واطي...!
قال عبدالرحمن:شوف الولد..أنا خالك ترفع صوتك عليا ليه...؟!
عبدالرحمن كان مستمتع و الكل عارف إنو يبغى يستفز سعود عشان كده محد اعترض على كلام سعود...!
سعود إلي كبر راسو و راح سلم على راس بابا و بعدين مشي لعبدالإله و مد يدو فصافحو الأخير و اكتفوا بالمصافحة...!
عبدالإله قال بابتسامة أول مرة في حياتي أشوفها:تستاهل..علبالك كل الأولاد أولاد أختك...!
أوكي سعود ولد أختو..يمكن يقصد خلود..مادري...
عبدالرحمن بقهر:والله هذا سعود الطفل الوحيد إلي ما عرفت أبكيه...!
عمو:و ليش الأذية..مرة ياخي مستميت على أذى الأطفال روح بكي بناتك...!
عبدالرحمن:ما أقدر أقرب من بناتي أنا..ايشبكم إنتوا...؟!
عبدالإله و هوا يضحك:أبله..اسكت..إلا توري الخلق إنك خواف...!
-مني خواف..بس الأم تتوحش لمن أحد يقرب على أولادها..شوف جود شوية و تاكلني...!
عمو:لا جود تحب تترك الحرية لسعود إنو يتصرف.
و قام عمو و شال سعود و جلس جمبي و حط سعود فوقو...!
حط عمو يدو ورا أكتافي و هوا يقول:سعود تحب خالو عبدالرحمن...؟!
سعود التفت لعمو و سار وجهو قريب من وجه عمو:ايوة عادي..بس خليه يسكت...!
علي:اسكت...
التفت عبدالرحمن لعلي بابتسامة عريييييييييضة:هلا و الله بالنسيب..ليه صوتك مو طالع اليوم...؟!
ما رد علي عليه فبوز عبدالرحمن بقهر..غصبني أبتسم..ملامح وجهو و هوا مقهور تضحك...!
قال فجأة:ايش رايكم نلعب أونو...!
بابا:عبدالرحمن..اعقل...
عبدالرحمن:إنا للاااااااااااااااه...
عبدالإله:أصلاً فيه أونو...؟!
بابا:فيه ولا مافي..عيب إنتا رجال..لازم تبطل لعب...!
اتنرفزت...
قلت بنبرة بريئة:هيا الرجولة تتحدد بورق ملون عليه أرقام...؟!
التفت لي بابا:لا طبعاً بالأفعال لكن اللعب للأطفال...!
قلت بصوتي العادي:الرسول كان يلعب..كان لمن يزعل أو يتضايق يروح و يلعب مع عائشة رضي الله عنها و كان يحب يشوفها تلعب...!
صلى الكل على النبي و قال عبدالرحمن:فديتش و فديت طوايفش يا جود..يلا نلعب أونو !!..
عمو:معاك...؟!
عبدالرحمن بضحكة:لأ..هيهي...
ابتسم عمو:واللهِ في مكانٍ ما في الغرفة عندي بس مي كاملة.."التفت لي"..جود عندك؟!
-في البيت..ايوة...!
علي:أونو أصلية من أيام زمان...
عبدالإله بغلاسة طفولية فظيعة:طب احنا عندنا مونوبولي أصلية من أيام زمان..الحديدية ذيك...!
علي:مافي مونوبولي حديدية..هيا ورق...!
عبدالرحمن:لاااا قصدو الأشياء إلي نحركها..المكوة و الجزمة و...
عمو استغل انشالغهم بالنقاش التافه و ميل راسو و همس لي:حبيبي خفي شوية على بابا و حاولي تفتحي أي نقاش معاه...!
التفت لعمو فسار وجهي قريب من وجهو:نعم؟!
-ها..ولا شي..كم الساعة دحين...؟!
و طالع في ساعتو.. وي ايشبو عمو...؟!
أنا سمعت إلي قالو عمو كويس..كنت بس أبغى أتأكد من إنو قال إلي سمعتو..بس ليش هوا غير رأيو في اللحظة الأخيرة..لو كان عاد الجملة كان قلت:إن شاء الله طيب...!
قال عبدالرحمن بأسلوب لطيف:ايش حنتعشى اليوووووووووم...؟!
قلت:كبسة...
-لااااا..خلينا نطلب أي شي..مافي حرمة هنا تبغى تطبخ...!
-أنا طبخت...
طالع فيا بصدمة:إنتي سرتي من إياهنُّ..جوووود كنت أحسبك فلة...!
طالعت فيه:فلة يعني نطلب و فيه أحد ممكن يطبخ..بعدين على فكرة..كبستي أنا لا تقاوم..حتى اسأل علي...!
التفت عبدالرحمن لعلي بجدية و كان حيتأكد من المعلومة لولا عبدالإله إلي قال:طبعاً..القرد في عين أمو غزال...!
و لف وجهو
اتنرفزت و في لحظة حسيت إنو إلي قدامي بزر...!
و ما لقيت نفسي إلا أطلع لساني لعبدالإله إلي معطيني ظهرو...!
عمو ابتسم و عبدالرحمن ضحك أما بابا فطالع فيا مستغرب:وي بنت..ايش هذي الحركات...؟!
التفت عبدالإله:هيييييييي..ايش سوت...؟!
قلت و أنا أحس فجأة بالذنب:والله ولا شي بس مديت لساني...!
عبدالإله بتريقة عليا:بس مديت لساني...
التفت لعمو:عمو شوفو !!
عمو:طنشيه...
كنت حعترض على اقتراح عمو التطنيش لكن عبدالإله فجأة ابتسم:كنت أمزح...
-ها...
علي بسخرية على مادري مين: مين قال ها سمع...
-إووووو علي..لا تستخدم دا المثل..مرة أكرهو...!
عبدالإله:ايوة علي..كيفك...؟!
طالع علي في عبدالإله:الحمدلله..إنتا كيفك...؟!
-بخير...
التفت لعمو و قلت بصوت واطي:يعني ايش نفهم من دا الحوار...؟!
التفت لي عبدالإله واهوا رافع حاجب واحد و بتهديد:لا تحشي..تراني قاعد أحاول أحبك ها...
بسم الله..ايشبو فجأة كده انقلب.. " أحاول أحبك " ؟! ... والله ساعات الناس دولا يخوفوا..فجأة تتقلب مشاعرهم و أفكارهم...!
قلت بطاعة زي لمن أبغى أرضي سعود:طيب حبيبي ما رح أحش..أصلاً أنا ما كنت أحش...!
و وقفت و أنا أسمي ربي و رحت للمطبخ..أففففف..كأنو الجو حار..يمكن مع حرارة الفرن !!
طفيت النار على العشا و قلت لمنورة تعبي السلطات في صحون صغيرة و تبقيلها...!
حطيت الرز و الدجاج في الصحن الكبير المدور و حطيت في صحن صغير لمنورة بعدها رحت لباب المطبخ و قلت:عمو تعال جيب صحن الرز..ما أقدر أشيلو...!
وقف عمو و جا لين عندي و عداني لجوة المطبخ و علي يقول:جود..تحتاجون مساعدة...؟!
-ها..لا حبيبي ارتاح بس الصحن ما أقدر أجيبو...!
جدة:الله يا جود إن كانك بتولدين علينا...!
-ما بقي شي خلاص بس صحون صغيرة..أصلاً الحركة أحسن..بعدين أنا ما بتعب نفسي...!
-إلا تتعبين..شوفي وجهك غدا مظلم...!
-عادي..لازم الحمل كده...!
عمو و هوا خارج بالصحن:خلاص جود اقعدي...!
جيت بدخل المطبخ مطنشتهم لكن جدة نهرتني:إنك اقعديّ...!
قلت بزعل:جداااااااهـ....
وقف علي لكن جدة قالت:مو إنت إلي تقوم..عبد الإله..قوم..قوم لا أقوم عليك...!
عبدالإله بطفش:ايش فييييييييييييييه...؟!
جدة:قوم اخدم أختك في حملها و اكرمها..الله وكبر عليكم إن كان بتهلكونها كذة كل ما حملت...!
عبدالإله لجدة:إنا لله عالحب المفاجئ إلي يطلعلك فجأة...!
ابتسمت و جلست..عبدالإله قام متنرفز..كان ممكن يقوم عادي لكن جدة استخدمت لفظة غلط..استخدمت كلمة "اخدم"،الشي إلي طلع قرون لعبدالإله...!
بابا:هيا..ولدي يتهزأ عشانك...!
ما قالها بحقد أوغيض..لا بالعكس قالها ممازح...!
و كان أنا قدامي خيارين..يا أستجيب للمزحة دي و أكسر عدد بسيط من الحواجز أو ما أستجيب و ينعاد موال السنين...!
و خلال ثواني فكرت و قلبت الخيارين و اخترت إني أبتسم...!
-و هوا أنا أحمل كل شوية...؟!
علي:بس والله جدة رهيبة لمن تحب أحد...!
قلت:طبعاً..أم سعود مو أي شي...!
بابا:أم سعد...
-مالي شغل أبغاها أم سعود زيي...!
جدة:إلا يا بنتي..إني أبغاني أم سعود...!
ابتسم عمو و قال بابا:هيا خلي سعد يسمعك...!
جدة:سامعني و داري..و إن كان الوحدة ما بتختار كنيتها لولدها ايش بتختار...؟!
قلت:صح..ما شاء الله..محلايا والله أتكنى لولد من أولادي و أنا ما أحبو...!
عبدالرحمن:مافي أم حتكره واحد من أولادها...!
-لا مو عن تكرهو..بس مثلاً لو في وحدة واحد من أولادها قليل أدب ولا قليل خاتمة..بأي حق تتكنى بيه..كل ذنبها إنو الكبير يعني...!
بابا:فيه قصة مشهورة للنبي مع رجال تظهر إن الوالدين يتكنوا لأكبر ولد احتراما له...!
-عليه الصلاة و السلام..عارفتها القصة لكن أحياناً ما يستحق الاحترام و أنا كأم مابغا أتكنى لواحد موطي راسي مثلاً..أنا بتكلم عن الأشياء الكبيرة مو عن كسل في المدرسة ولا قلة ترتيب في البيت...!
عبدالرحمن بتفكير:يمكن كلامك صح بس في النهاية هذا الولد ما طلع إلا من تربية أمو و أبوه...!
-كنت أقول كده بس دحين عرفت إنو الأم و الأب مو هما إلي يربوا قد ما التلفزيون و الأصحاب يربوا و يأثروا..كتير أشياء ما تعجبني في طفلي..لا أنا أسويها ولا أبوه...!
قبل ما أحد يعلق رفع سعود راسو عن الجيم بوي و قلي:طفلي يعني أنا...؟!
-ها..لا حبيبي أنا بتكلم بشكل عام...!
اتنهد سعود بطفش و رجع لشاشة الجيم بوي...!
عبدالرحمن:على مين..قال طفلي قال...!
و ضحك..انقهرت:دحين ايش إلي يضحك...؟!
عبدالرحمن:سعود...
من غير ما يرفع عينو:نعم...
عبدالرحمن:نعامة ترفسك...!
طالع سعود في عبدالرحمن بحدة و رجع بعد كده لجيم بويو...!
علي بابتسامة:ولدي..هذا ولدي...
ابتسمت و أنا أقوم:عشان مرة تانية لا تتعرض لولدي...!
تابعت:سعود حبيبي يلا عشان نغسل يدنا...!
قام سعود و هوا ينهي إلي كان في يدو..ضغط على ستارت و جاني...!
الكل غسل يدو بعدها جلسنا عالسفرة..عبدالإله و هوا يرتمي عالأرض:ما بغيتو تجلسوا...!
عمو:دحين إنتا ما تعرف تكمل جميلك..لازم تحطلك لمسة في النهاية...!
عبدالإله:هذا مو جميلي..أنا أُجبرت على هذا الجميل...!
قلت و أنا أغرف لسعود:ما دام الشغل فيك فيك اتظاهر بإنك إنتا اتبرعت...!
-اسكتي إنتي كلو من تحت راسك...!
جدة:والله يا عبود..تسكت أختك هاااا...
التفت عبدالإله لجدة:أبغى أفهم..ليش في صفها...؟!
-لإنها حامل...
قلت و أنا أشوف جدة تاكل أول لقمة:جدة الملح كويس...؟!
هزت راسها بايوة و جلست أنا أأكل سعود..مو أأكلو أأكلو بس أساعدو عشان لا يعدم لبسو..مافيا حيل أغسل..لسه قبل أمس مخلصة كل الغسيل...!
و بعد ما خلصنا العشا اعتذرت بإني ما أقدر أرفع..بصراحة تعبانة..رحت لغرفتي و اتمددت..يا ربي..مستغربة..ليش تعبانة مرة..والله في سعود ما تعبت دا التعب...!
تعرفوا ايه..قاعدة أفكر في شي..قاعدة أقول يمكن التعب إلي فيا مو من الحمل قد ما هوا من أشياء تانية...!
ياااا الله قد ايش اليوم انحرق دمي..في حياتي ما اتوقعت إنو عمو ممكن يكون بدي الصعوبة..عمرو ما أعطاني إحساس بإنو عنيد أو غلس إلا في موضوع ودا..أوكي أعرف..الرجال مرة حساسين و مستحيل يكلموا أحد في شي زي كده بس خلاص..أنا عرفت..ليه ما يتعاون و يتجاوب معايا...؟!
اليوم ولا كأني اتكلمت..من بعد ما قلي إنو مستحيل يرضى لأحلام بنفسو و دخل غرفتو معد كلمني..خرج للصلاة و رجع و من بعدها قعد معايا عاااااادي..شي من جد يقهر..لا و كان يكلمني في أشياء عجيبة .. تخيلوا بالله .. يناقشني في "أفاتار" و قد ايش حلو الفلم و قد ايش نجح ..!
حسيت نفسي حنجن..كيف يكلمني في فلم وأنا لسه قبل شوية بأترجاه يوافق على شي في مصلحتو...!
فجأة اندق الباب فانقطع حبل أفكاري...اعتدلت في جلستي و أنا أقول:اتفضل...
انفتح الباب و كان عبدالرحمن مبتسم..قال:منتي نايمة..صح...؟!
ابتسمت و أنا أهز راسي بلأ..اتقدم مني و هوا يطلع جوالو:أقولك فيه أغنية فرنسية أحبها أبغاكي تترجميلي هيا...!
ابتسمت:ايش اسمها...؟!
ضحك بهبل:ما أعرف..
قلت:ما أقدر دحين والله تعبانة..ارسلي هيا و أنا أرسلك ترجمتها بعدين...!
بوز بعدين قال:كده خربتي الموضوع إلي كان حينفتح...!
-هااا...
ابتسم و قال ببساطة:كنت أبغى أفتح حوار معاكي بس بتعبك قفلتيه...!
ابتسمت:سعود فين...؟!
-مادري في الصالة..بس ترى أنا معجب بولدك..ترا هوا حق بنتي ماليا شغل...!
ابتسمت:كيفهم بناتك و حليمة كيفها...؟!
-الحمدلله كويسين..صح حليمة تسلم عليكي...!
-الله يسلمها...!
قال و هوا يحك راسو:آآه جود..كنت أبغى أسألك في شي...!
-ايش...؟!
-هواااا..جود أبغى أسأل..هل أنا أهبل لدرجة إن الواحد ما يعتمد عليا...؟!
أول إحساس جاني بعد سؤال عبدالرحمن كان إنو عبدالرحمن يلف و يدور...!
قلت:واللهِ مادري..أنا ما قد اتعاملت معاك لكن الظاهر ليا إنك تستهبل منتا أهبل...!
-يا شيخة الشباب حولي طفشوني..كل شوية يقولو إنتا زي البزورة ما عندك هرجة..مدري كيف متزوج و مخلف..و خرابيط زي كده...!
-و هما مالهم...؟!
-مدري...
بعدها سكتنا...!
مدري لكن حاسة ورى عبدالرحمن شي...!
قلت:و إنتا دا الموضوع مضايقك مرة...؟!
-ها..لا عادي...
-طيب...
-ايش...؟!
حك راسو و هوا ماسك ابتسامة..بعدها طالع فيا:أوكي جود..بصراحة قاعد أحاول أفتح معاكي أي نقاش و هذا أول شي جا على بالي.."ابتسم بحرج"..اتوقعت تبدأي تتكلمي عن غباء الناس و آرائهم الأغبى...!
ما عرفت ايش المفروض تكون ردة فعلي..يعني أنا تعبانة و في غرفتي و يجيني واحد هدا كل هدفو..أنا عارفة عبدالرحمن عفوي بس بجد مني عارفة بايش أرد عليه...!
و ما لقيت نفسي إلي أقول:طيب بصراحة..مني عارفة ايش أقولك..
تابعت بعد ثواني باسترسال مفاجئ:أقدر جداً إنك جيت لين حدي تبغى تفتح معايا نقاش بس عبدالرحمن خليني أقولك شي..إنتا منتا مضطر تفتعل أي شي..صدقني أنا مستعدة أرحب بأبوك في أي وقت لو حسيت إنو جوتو.."و أشرت بأصابعي بحركة".. قد كده مشاعر صادقة تجاهي فكيف إنتا و إنتا من مدة تبذل جهدك عشان توصل علاقتنا للوضع الطبيعي في الوقت إلي أعتبر فيه موقفي سلبي تجاهكم و ما زلت أحس بإني دخيلة على عماتي و بنات عماتي..أنا أعترف إني ما أقدر أنسى لكن في نفس الوقت مستحيل أحقد أو أطلب منكم إثبات على محبتكم..صدقني متى ما تجي إنتا و بناتك و حليمة تنوروني و تبسطوني..في أي وقت..ارفع السماعة و قولي..أنا يا عبدالرحمن ما عندي دي القدرة إلي تخليني أدخل في الناس و أسوي معاهم علاقات بس أنبسط و أحس بسعادة لمن هما يجوني..عشان كده حبيتك إنتا و سارة أكتر شي..لإنكم دخلتوا فيا غصباً عني...!
طالع فيا و قال بصدق:عارفة..السلبية ذي مشكلة فينا كلنا..لين وقت قريب ما كنتي هامتني..من جد..كنت أقول و أنا مالي بوجع الراس..فاكرة لمن قلتلك إنو السبب أبوية و إنو لو مو أبوية أمي إلي تخاف علينا من غضب أبوية..ترا كل هذا راح من يوم ما اتزوجت..بس أنا فجأة حسيت ببناتي يكبروا..حسيت إني ما أبغاهم في يوم يحسوا بالحيرة تجاهك..لو أنا كنت مطنشك كأخت لأسباب أشوفها مقنعة هما ما رح يلاقوا أي سبب مقنع عشان يطنشوكي كخالة..بكده بدأت أتقرب منك بس "ابتسم" لقيت نفسي سعيد بتواجدي حولك..سبحان الله..ارتحتلك..كذة من غير سبب...!
ابتسمت..ما عرفت ايش أقول لكني أحس بإحساس حلو...!
ابتسم و هوا يوقف:طيب خلاص أنا بروح...!
وسعت ابتسامتي:طيب ممكن تناديلي سعود...!
قال بخوف طفولي:لااااا مابغا..زوجك حاقد عليا أخاف أنادي ولدو لكي يقوم يقلبها تحقيق...!
قطبت حواجبي بابتسامة:ليه يعني...؟!
-مادري يا شيخة عنو..والله زوجك عقد...!
-علي..لا والله مو عقد..بالعكس...!
ابتسم:يمكن معاكي إنتي مو عقد..مع الناس غرز...!
-ها...
-عقدة..ايش اللفل التاني..غرز...
لمن ما راحت التناحة من وجهي قال:تفصيل..مدرسة...
قطبت حواجبي مستغربة و مني فاهمة...
-مالت عليكي..heavy blooded!!
ضحكت:ايش يعني..تقيلة دم بالانجليزي...؟!
هز راسو بايوة فقلت:هادي تضحك...!
-يلا يلا خلاص بروح...بباي..
و خرج...!
قطبت حواجبي بابتسامة و أنا أرجع أتمدد..دخل فجأة و خرج فجأة...!
تمتمت لسببٍ ما:"الحمدلله"
لكن سرعان ما اتذكرت عمو و ما احتجت وقت عشان أتوقع إني حرجع لبيتي و لسه ما أخدت منو كلمة...!

****************************
الجزء السابع عشر
(سُفرة..و لأول مرة)


"جود يلا قومي الصلاة"
قلت و أنا أقوم:لقيت توبك؟!
-ايوة ايوة...
اتوجه علي للدولاب بينما رحت أنا للحمام...!
كنت حاسة نفسي تعبانة و أبغى أنام..استغفر الله...
اتوضيت و خرجت..ما لقيت علي..الظاهر خرج للصلاة...!
كبرت و صليت..بعد ما خلصت حاولت أنام بس ما قدرت..كنت تعبانة بس مادري ليه مو قادرة أنام..اتعوذت بالله من الشيطان و أنا أغمض عيني...!
سمعت بعد دقايق صوت بكا قريب مني..فتحت عيني مفجوعة و كان سعود يبكي..جلست بتعب:بسم الله سعود..ايشبك...؟!
قرب مني و حضني و قال ببكا:ماما أبغى أجي عندك..شفت..شفتك تروحي...
رفعتو بصعوبة و سدحتو جمبي و انسدحت..طبطبت على صدرو بتعب:بسم الله حبيبي..لا ما أروح..بسم الله..قول بسم الله بابا...
قعدت أقرأ على سعود لين ما هدي و هديت أنا كمان...!

^^^^^^^^^^^^^^^^^^^^

علي،،،
همست:ايش قاعد تقول سعود؟!،كيف طاحت..ايش طيحها...؟!
قال سعود بصوت متحشرج:خرجت بتجيب موية لنفسها و كانت الأرض مبللة فطاحت...
-وذحين..كيفها؟!
-علي مادري..أمي تعبانة..علي..أنا ما أقدر أكلم جود..اليوم خميس و إنتو أكيد جايين..كلمها بس لا تفجعها..قولها أمي كويسة...!
-طيب..طيب الدكتور ايش قلك عنها...؟!
قال بحرقة و وجع:يقول..يقول جاها شُعُر..ما..ما..يقول...
قلت و أنا أفكر:شُعُر؟؟؟؟!!!!
-يقول جاها شُعُر..شعر يا علي شعر...
-خلاص خلاص سعود اذكر ربك..إن شاء الله ما فيها إلا العافية..أنا بجي مع جود اليوم و إن شاء الله جدة بخير...!
-علي..لا تفجع جود..قولها إنها تعبت شوية..والله أخاف يسير فيها شي..علي الله يخليك..مني ناقص...!
-خلاص سعود خلاص..أنا بتصرف..ما عليك..
قال بصوت واطي:علي..مني عارف ايش أسوي...
-استهدي بالله يا رجال..أمك ذحين في بيتها تحت عينك و إن شاء الله ما فيها شي..بلغت أخوانك إنتا...؟!
-ايوة..موجودين كلهم..بس..بس أمي تسأل عن جود...
شي من الراحة اتسلل لقلبي لمن فهمت إن جدة تتكلم...!
-خلص ولا يهمك..جايين..ما يجي العصر إلا و احنا عندك...!
-إن شاء الله..
-تبغى شي...؟!
-لا سلامتك...
-الله يسلمك..مع السلامة...!
تكيت راسي على ظهر الكنبة..يا ربي..ايش أقول ذحين لجود..والله لتنجن عليا..كيف أهديها...!
"علي..."
فزيت:هلا...
-ايشبك...؟!
-ها..ما..ما فيا شي...
قطبت جود حواجبها و جات جلست جمبي:

إلا فيك شي..ايشبك...؟!
لازم أقولها..يا ربي عونك...!
-آآآ..جود..دوبي مكلم عمك و...
قالت بفجعة:ايش..فيه شي...؟!
-ها..لا لا حبيبي بس جدة...
-ايشبها جدة...؟!
-ما فيها إلا العافية بس تعبت شوية...!
دمعت عيون جود و أنفاسها عليت فجأة:علي..جدة ايشبها...؟!
-ما فيها شي..جود ايشبك..اذكري ربك...
بكيت:إلا فيها..ليش عمو كلمك و ما كلمني...؟!
مسكتها من أكتافها:جود..جود ايشبك...
-بربك علي..جدة فيها شي...
-ما..
-بربك أقولك..جدة فيها شي...؟!
هزيتها:جود ايشبك..إنتي حتى ما سمعتيني..جدتك ما فيها شي..
-طب..طب ايش تعبها..تعبت شوية..طيب ايش فيها...؟!
-أول شي تهدي و بعدين..مني قايلك و إنتي كذة...
زاد بكاها:هيا فيها شي..جدة فيها شي...
قلت بشدة:جود...
رفعت راسها بسرعة و قعدت تطالع فيا بشفايف مرتجفة...!
حضنتها و قلت بصوت واطي:إن شاء الله تكون بخير...!
-طب ايشبها..ليش ما تقولي...؟!
-طاحت..طاحت من موية كانت عالأرض..في المطبخ...
بعدت عني و قالت بصوت عالي:طاحت عالسيراميك...؟!
-ما جاها شي..الحمدلله ما انكسرت..بس..بس جاها شعر..و..و..لفوا حوضها في المستشفى عشان العظم ما يتحرك و..و إن شاء الله بخير..هيا في بيتها ذحين و...
شوية شوية جود كانت تغطي وجهها و تنهار بالبكا...!
حضنتها:جود خلاص لا تبكي..ما فيها شي..عمك قال إنها كويسة و تسأل عنك تبغاكي..ما حتسأل عنك إلا و هيا فيها قوة..سمي بالرحمن ما فيها إلا العافية...!
رفعت راسي لسعود إلي كان يطالع فينا من عند بابا الصالة..تركت أمو إلي مسحت دموعها و هيا تحاول تتمالك نفسها قدام ولدها !!
ناديت سعود فمشي لنا ببطء و على وجهو الحيرة..طالع في جود:ماما ايشبك...؟!
رفعت جود راسها:ما فيا شي..روح البس عشان نروح عند جدة...!
سعود و هوا على وشك يبكي:ليش دحين..لسه...
كنت عارف لو بكي سعود حترجع تبكي جود و وقتها حفقد أنا السيطرة...!
-حبيبي جدة تعبت عشان كذة ماما تبكي..نبغى نروح لها ذحين عشان نقعد معاها...!
طالع فيا سعود لثواني بعدين حط يدو على كتف جود:طب عادي ماما لا تبكي..زي لمن إنتي أول تعبتي في..في المدينة بعدين سرتي كويسة..عايدي ترى..والله جدة طيبة ما فيها شي...!
قلت:إن شاء الله..ذحين روح البس عشان نروح لجدة...!
راح سعود فقلت لجود:هيا جود..قومي نلبس عشان نروح...!
قومتها و رحنا لغرفتنا نلبس...!
يا رب..يا رب فعلاً ما يكون فيها إلا العافية..أنا ما طمنت جود إلا من خوفي عليها..بس يا رب ما يكون في جدة شي...!

^^^^^^^^^^^^^^^^^^^

سعود،،،
قاموا بنات أخواني لإنو جود جات و معاها علي بيدخل يسلم على أمي...!
دخلت جود و بعدت الطرحة عن وجهها إلي أثر البكا كان باين عليه..أول ما طاحت عينها على جدة انقلب وجهها..كنت بروح ألحقها لا يسير فيها شي لكنها كانت اتوجهت لأمي..انحنت و سلمت على وجهها و راسها و طولت عند رقبتها...!
أمي كانت تمسح على شعرها و تقرأ عليها..أمي لحظتها كانت أقوى من جود...!
أخفضت راسي لمن حسيت بعلي جمبي..حضني و قال بصوت غير مسموع:كيفك...؟!
-الحمـ..الحمدلله...
تركني و اتوجه لأمي..سلم عليها بعدها رفع سعود و خلاه يسلم...!
جود مشيت لي و حضنتني..مسحت على راسها و بستو:بس بابا..جدة كويسة..ما فيها شي..
تركتها و قلت لعلي:تعال المجلس...
التفت لسعود و حاولت أبتسم:تجي معايا...
طالع فيا و على وجهو نظرة الـ ولا شي و هز راسو بلأ و هوا زام شفايفو...!
شال علي سعود و همسلو بشي في أذنو فسكت الأخير و حط راسو على كتف علي إلي راح للمجلس...!
التفت لجود و ابتسمت و أنا أحس بالوجع من جوتي:جود حبيبي لا تضغطي على نفسك..أمي ما فيها شي...
طالعت فيا و التعب باين على عينها:هِيا كيف طاحت...؟!
-ما..جود أبوية خلاص..خليكي إنتي دحين معاها..هيا من أول تسأل عنك...!
و رحت للمجلس...!
ارتميت عالكنبة جمب علي إلي كان حاط في حضنو سعود..سعود كان سااااااكت..كان في عالم ثاني..حسيتو مو معانا أبداً...!
طالعت في أخواني..كانوا يتكلموا عادي..صح كانوا متضايقين بس مو زيي..كانوا كلهم أقويا..كانوا ..
أنا ليه ضعفان..ليه أحس محد موجوع غيري..يمكن لإني عشت مع أمي أكثر منهم..يمكن لإني الصغير و الصغير دايماً الأقرب للأم...!
بعدين جود..أنا أحتاج ذحين جود..يا ربي..استفغر الله العظيم..ما أعترض بس تعباااااان..أنا تعبااان...!
أحس راسي حينفجر !!
رفعت راسي و أنا أسمع سعد ينادي:علي..
طالع علي في سعد:نعم...
ابتسم سعد:كيف حالك...؟!
-الحمدلله بخير..إنت كيفك...؟!
-بخير نحمد الله..كيف سعود و كيف بنت أخوية...؟!
-الحمدلله...
سعد:سعود..ليش ساكت..سعووووووود...
علي:سعود كلم عمك...
سعود كان مسترخي و شبه نايم بسبب الجو الهادي...!
رفع نفسو عن علي و قال و هوا يطالع في سعد بتفحص:نعم...
-كيف حالك...؟!
-كويس...
-ما بتسألني عن حالي...؟!
طالع سعود في سعد لثواني قبل ما يبرطم و يحمر خشمو..رجع راسو لصدر علي و لف وجهو عن سعد...!
سعد:يه..سويت شي...؟!
علي و هوا يمد لي سعود بعد ما مديت يدي لو:لا بس هوا تعبان شوية...!
سعد:عاد بغيت أتكلم معاه...!
سعيد:ما عليك..الولد ذا مدلع...!
همس سعود و ما سمعتو إلا أنا:أنا مو مدلع...
مسحت على راسو و حسيت بحرارة..
التفت لعلي:فيه حرارة شوية...
مد علي يدو يعس سعود و على وجهو انزعاج:يا الله..
قلت بصوت واطي لعلي:جود و هيا صغيرة كانت علطول تسخن لو حست بأحد تعبان أو بالجو متوتر...!
"لو..محتاجين..تبغوا أنزل أجيب دوا؟!"
عبدالله إلي اتكلم...!
التفت علي بسرعة و قال بشدة:لأ...
طالعت فيه مستغرب..ليش كذة يكلم الولد؟!،عبدالله معروف طول عمرو مبادر ويتطوع في كل شي..مو

قصدو يتفضل عليه أو شي !!
قلت:لا حبيبي..سعود يمرض مع الزعل عادي..ينام و يصحى طيب..ما عليك...!
عبدالرحمن:طب ليه زعلان..أحد خاصمو..علي..يا مفتري...
سعيد:ما تعرف ولد أختك يعني..طالع على سميو مدلع...
طنشت لكن علي ما طنش:بس سبحان الله..ما شفت الرجولة إلا فيهم...!
سعد:طبعاً..معروف..الطفل المدلل بحكمة دايماً يطلع رجال..لأنهُ يكون قد حظي بما يحتاج من حنان...!
علي:مممم..صح ايوة...
اتفاجأت لمن حسيت بسعود يقوم عني و يوقف،مسح عينو اليمين بقيضة يدو و قال بصوت مخنوق:غبيون كلكم..أنا مو مدلع...
و مشي خارج من المجلس..انصدمنا كلنا..ايشبو الولد فجأة...؟!
سعد:باين عليه من أول زعلان...
عبدالرحمن:ياخي ليتك وديتو في بيت أبوية مع باقي البزورة...
سعيد:الله يهديك يا علي..ليش تجيبو...؟!
طالع علي في سعيد:ما جا على بالي...
و وقف بعد ما قالي بيكلم أهلو...!
قلت لسعيد:ما..ما عليك خلاص بيروح عند أمو..هوا من أول أصلاً ما يبغى يجي هنا...
آه يا رب..مصدع..راسي يعورني..أحسو ثقيييييييييييييل..ثقيل مرة...!

^^^^^^^^^^^^^^^^^^^

جود،،،
انفجعت لمن شفت سعود طالع من ورا الساتر إلي نحطو عند باب المجلس..وجهو ما كان عادي..الزعل باين عليه...!
جا لين عندي..لفيت يدي حول أكتافو وقلت بصوت واطي:ايشبك يا بابا..ايش فيه...؟!
طالع فيا و هوا مبرطم:أبوكي بس يقول مدلع مدلع..عشان عشان أنا قعدت عند بابا...!
وقفت و انسحبت من الصالة إلي انتقل لها سرير جدة بما إنها أوسع و متهوية أحسن...!
رحت لغرفتي و دخلت فيها مع سعود..رديت الباب...!
خليت سعود ينسدح عالسرير و اتمددت أنا جمبو..فرصة عشان أرتاح شوية..قلت:ايشبك حبيبي..ليه زعلان...؟!
-مادري..بس هادا أبوكي بس يقول مدلع..بعدين سرت ببكي...
اتنهدت..لأول مرة أحس نفسي عاجزة عن التصرف مع سعود...!
قلت:طب بابا تبغى تلعب جيم بوي...؟!
هز راسو بلأ فقلت:طب تنام..حاسس نفسك تعبان...؟!
-لأ ماما أبى معاكي...
-حبيبي أنا تعبانة و لازم أقعد مع جدة..والله مني فاضية...
برطم سعود..حسيت نفسي من جد مني عارفة كيف أتصرف...!
اندق باب الغرفة المردود بعدها انفتح..كانت سارة...!
دخلت بهدوء أكسبها إياه الوضع..جلست عالسرير بعد ما اعتدلت جالسة و سعود اتحرك و حط راسو على فخدي...!
حطت يدها على سعود:حار...
هزيت راسي بايوة فقالت:كيفك...؟!
-الحمدلله..إنتي...؟!
هزت راسها:طيبة..آآم جود..لو تبغي..أنتبه لسعود...
بسرعة:لا حبيبي..ما يحتاج...
-لا لإنو ماما قالت جايين ضيوف و الظاهر رح تنشغلوا...!
-ضيوف ايه...؟!
-ناس من الجماعة دولا..جايين يسلموا على جدة...!
اتذكرت..قد مرة تعبت جدة و اتكدسوا الناس علينا بشكل متعب..و بدل ما يسيروا أدوا واجب تعبونا بذبايح الكل يوم و الضيافة و مدري ايش هوا...!
عضيت شفتي السفلى..الله يعين بس...!
قلت:سعود بابا لازم أروح أقعد مع جدة...
ابتعد سعود عني و سحب البطانية و غطى نفسو...!
اتنهدت فقالت سارة:ما عليكي..أنا بنتبه لو...!
قلت:هوا رح ينام علطول بس خليكي معاه الله يسعدك لين ما تتأكدي إنو نام...!
ابتسمت:طيب...
قلت بصدق:شكراً...
و خرجت و أول ما خرجت لقيت أم سارة في وجهي..مدري ليه بس حسيت قلبي طاح...!
قالت و هيا تأشر على غرفتي:سارة جوة...؟!
خفت..أخاف تحسبني أستغل بنتها أو شي..والله سارة هيا إلي عرضت..أنا مالي !!
قلت:أيـ ..ايوة...
-لحالها...؟!
-للللأ...مع سعود...
-آه بس حسبتها فاضية..باقي البنات وين...؟!
-مادري...
تابعت بسرعة:تبغي شي...؟!
طالعت فيا:لأ يا ماما إنتي روحي اقعدي مع جدتك...
و عدتني لغرفة جدة وين ما كانوا البنات مستقرين...!
رحت للصالة و أنا قلبي يدق بقوة..يا ربي قد ايش أستحي منها..و رغم إنها ما تسوي حركات هبلة..بس دايماً إحس إني سلبت منها شي و أحس..هيا كمان تحس كده !!

^^^^^^^^^^^^^^^^^^^

جود،،،
حطيت الصحن على الطاولة الصغيرة إلي قدام جدة و أنا أتنهد...!
جدة مي راضية تاكل !!
قالت وحدة من العجايز إلي على السفرة:الله يا أم سعد إن كانك بتتعبينا معاك..كلي الله يهديك...
لأ..لأ فظيعين..من بعد العصر جو و إلمن دحين..ايش قلة الذوق دي..استغفر الله بدل ما ياخدوا أجر أخدوا ذنب..تعبت و أنا أرتب للضيافة لإنو لو ما كان كل شي بيرفكت حيروحوا يلفوا على العيلة كلها و يقولوا:ما فيهم سنع..ما فيهم كرم...
أنا أداريهم و لا أداري جدة ولا سعود و لا أداري نفسي...!
قلت:جدة الله يخليكي كلي..ما يسير كده..كلي الله يخليكي...
قامت وحدة من العجوزات و هيا تحمد الله..قربت من جدة..أعرفها دي..دي صحبة جدة الروح بالروح...!
حطت يدها على كتفي:قومي يا بنتي قومي ارتاحي...
قلت:لا عمة مرتاحة..ما تقصري...
هزت راسها:قومي..قومي ادخلي كليلك لقمة..شوفي ولدك..شوفي عمرك.."دنقت ليا"..و إن شاء الله نص ساعة و هم خارجين...
-ها...
-قومي قومي...
جدة:قومي يا جود قومي...
طالعت في جدة مستغربة و الحرمة تقومني..جلست صحبة جدة مكاني و بدأت تأكل جدة و أكلت معاها..قعدت أطاااالع..ليش تاكل معاها و ما تاكل معايا...؟!
حزت في نفسي بصراحة..ليه أنا بنتها...؟!
التفت لي الحرمة:هيا روحي يا بنتي روحي...
سمعت رنة جوالي فرحت متجهة لغرفتي لكن استوقفني صوت سارة تناديني...!
كان صوتها جاي من غرفة جدة..لسه أهلي ما راحوا..بس البنات من يوم ما جو الحريم قليلات الأدب دول و هما في الغرفة و عماتي و زوجات بابا و عمو سعد قاعدين يوجبوا في الحريم من أول...!
رحت لغرفة جدة و وقفت عند بابها..كانوا قاعدين يتعشوا..غرفولهم و مشيوا...!
قلت:نعم؟!
سارة:اتعشيتي...؟!
-لأ...
-طب..تعالي معانا لا تقعدي ضغطك ينرفع و تتعبي...!
-لالا مابا...
خلود:بلا عبط تعالي لا تقعدي مع إلي هناك...
-لا مابغا..بعدين جوالي يدق..يمكن علي يبغى شي...!
سارة:طب نغرفلك...
-والله مالي نفس حبيبي..كمان بروح أشوف سعود..شكلو حيبدأ سخونة...!
-لا لا نومتو..ترى ما فيه شي...
ابتسمت:شكراً حبيبي..
و أديتهم ظهري بمشي و قبل ما أتحرك سمعت همس:"ايشبها دي؟!"
بصراحة ما عندي القدرة عشان أميز مين بالضبط بس على كلٍ ما يهمني...!
رحت لغرفتي و لقيت اتصال من عمة..يوووه..ما فيا حيل أكلم بس عيب..لازم أتصل..عشان كده جلست على السرير و دقيت و ما كانت ثواني إلا وردت:ألو...
-أيوة السلام عليكم...!
-هلا و عليكم السلام..جود حبيبي كيفك؟!
-الحمدلله كويسة..إنتي كيفك عمة...؟!
-الحمدلله يا ماما..إنتي كيفك و كيف جدة...؟!
قلت و أنا أتنهد:الحمدلله كويسة...
-كلمني علي والله وقلي..طمنيني يا بنتي عليكم..جدتك كويسة...؟!
-الحمدلله يا عمة جت على كده..الحمدلله...
-حبيبي تبغي أجي عندك...؟!
للحظة حسيت إني أبغى عمة...!
قلت بلهفة من غير تردد:ايوة عمة...
اتداركت الوضع:لاء عمة..ناس كتير هنا..جو من العصر..ما راحوا..تعبوني..و سعود تعبان..مو راضيين يروحوا..تعبوا جدة...
-مين ذولا...؟!
-مادري يا عمة..ما أعرفهم كلهم..ناس يقربولنا من بعيد..مادري أصلاً كيف عرفوا بالخبر..تخيلي بدل ما ييجوا يقولوا كيفك جو دقوا العشوة..راح علي جاب رز و لحم..اتعشوا و برضوا ما راحوا...!
-يا بنتي أهلكم ذولا..
بقهر:أهلنا يثقلوا علينا..عمة تعبونا تعبونا...
-خلاص يا ماما خلاص..بكرة إن شاء الله أنا أكون عندك لو تبغي..ولا أقولك متى ما بغيتيني اتصلي..
سحبت نفس قوي و طلعتو...!
عمة:بسم الله عليكي...
قالت بعد ثواني:هيا عمك يبغاكي...
اتحمحمت عشان يتعدل صوتي...!
عمي:أيوة...
-احم..ايوة هلا عمي..كيفك...؟!
-إنتي إلي كيفك...؟!
-الحدلله بخير إنتا كيفك...؟!
-أنا بخير..كيف جدتك...؟!
-الحمدلله..
-سعود كيفه...؟!
ما عرفت أية سعود يقصد لكني قلت:الحمدلله كويس...
-جود ايش رايك تجيبين سعود عندنا...؟!
-كيف...؟!
-لين ما جدتك تصير طيبة..ترجعي على بيتك...
استغربت:ليه..أنا حروح على بيتي إن شاء الله...
-ما بتقعدين عند جدتك...؟!
-ها..إلا بس...
-علي قال ناوية تقعدين لين جدتك تتحسن...
أوكي..أنا ما أعرف أي شي عن إلي يقولو...!
-خلاص يسير خير..أشوف أنا كيف الوضع و أتفق مع علي و...
سكت..مادري ليه..أحس كأني..مادري مادري...
عمي:شوفي يا أم سعود..إنتي غالية عندي..لكن لو دريت احتجتي شي و ما كلمتي عمتك بزعل عليكي..و ها أنذا أبلغتكِ...!
أجبرني أبتسم بآخر جملة..قلت:الله يسعدك عمو..ما تقصروا والله...
-هيا خذي عمتك ...
عمة:هيا أمي مع السلامة..سلمي على جدتك و انتبهي لنفسك...
-إن شاء الله...
-يلا نشوفك على خير...
-مع السلامة...
فصلت و أنا أتنهد..أحس نفسي ارتحت شوية..يا رب لا تحرمني منهم..عمو و عمة من أحلى الأشياء إلي سارت لي بعد زواجي...!
التفت لسعود..كان نايم..بس على وجهو التعب..انحنيت و بستو..يا ربي عليك يا سعود..إنتا أكتر شي أشيل همو...!
سعود مو من الأطفال الطبيعيين أو العاديين..مو أمدحو عشنو ولدي..لا باين عليه..سعود من الأطفال الأذكيا إلي يخافوا و يحسوا لو فيه شي مو حلو قاعد يسير..لو طفل طبيعي كان ما اهتم بمرض جدة بس سعود غير..يشيل هم الأشياء و يقلق...!
دحين و هوا صغير كده..كيف لمن يكبر...؟!
بدأ سعود يتحرك..أكيد حيصحى..لإنو نومتو كانت نومة تعب..تستمر كم ساعة و بعدها يقوم...!
فتح عينو بعد دقائق و رفع راسو..بستو و أنا أحط يدي على رقبتو:ها حبيب مامي...
مافي حرارة..زي ما اتوقعت..ديك كانت سخونة زعل...!
-ماما...
-يا عيونها...
-ما نروح اليوم البيت...؟!
-ما أعرف حبيبي..أنا أبغى أقعد مع جدة..بكلم بابا و أشوف...
-ماما أنا أبغى معاكي...
حضنتو:طيب حبيبي ولا يهمك...
بعدتو عني بعد ثواني:هيا تقوم تغسل...
قام سعود و هوا يقول:فيه ناسات برة...؟!
ابتسمت:ايوة حبيبي بس إنتا امشي بسرعة روح الحمام..محد يشوفك...!
-طيب إنتي تعالي...
قمت و أنا أبتسم..حطيت يدي في يدو و رحنا..و بعد ما خلصت غسيل و تشطيف رجعت على غرفتي..جلست سعود على كرسي التسريحة و اتجهت لشنطتي...!
أعطيتو لبان و عطرتو و بعدها خرجنا من الغرفة و استغربت من إنو الأصوات انعدمت إلا من صوت عماتي و البنات..و صوت أطفال جديد...!
رحت للصالة و لقيتها خالية من سفرة العشا..بس عماتي و البنات كانو قاعدين قدامهم شاهي و جدة نايمة...!
قلت باستغراب:وين الناس...؟!
التفت لصحبة جدة إلي قالت مبتسمة: هيّا طردتهم لكي...
-طردتيهم...؟!
-لا والله لكن قلت إن أم سعد تعباااااانة و إنك إنتي ما فيكي شدة و ولدك تعبان..عاد خلاص..العيب بيكون عليا قلت هالكلام مو عليكم...!
-ليه..خلاص سعود مو تعبان الحمدلله و كان دخلناهم جوة عن جدة...!
سارة:إلا أحسن..يا شيخة ولا كأنو قدامهم مريضة..ايش ذا...؟!
قامت سارة بابتسامة و شالت سعود:سعووووودي حبيبي..نمت معايا اليوم...؟!
سكت سعود و لف وجهو فقالت:سعووووود..هيييي..ايش سويتلك أنا؟!،ليش ولدك كده مطنشني...؟!
قالت أمها:نزلي الولد و خليه في حالُه...!
قلت:لا عادي..سعود أبوية...
نزلتو سارة و قالت بهمس حزين على سعود:والله حبيبي مرة زعلان...!
خلود:خليه يروح..ترى جو أولادي و أولاد عبدالرحمن..جوة في غرفة جدة...!
مسك سعود فيا:مابغا...
اتنهدت...
تركني سعود و راح..اتحركت لقدام السيب عشان أشوف وين بيروح..و راح لغرفتي...!
رجعت جلست على أقرب كنبة مني...!
خلود:ايشبو..مو على أساس يعرف أولادنا...؟!
طالعت فيها:تعبان...
أم سارة:تعبان ايش فيه...؟!
رفعت أكتافي:مادري..عشان جدة و عشان الجو...
عمتي صفية:ولدك ذا مدلع..ايش دراه هوا بمرض جدة...؟!
استغفر الله يا ربي..عاد عمة صفية دي تنرفزني..عليها أخلاق و أسلوب..تخيلوها حماتي..الله يرفع بأم علي عنها بس...!
سارة:جود تبغي شاهي...؟!
-ها..لا حبيبي...
-ترى فيه نعناع...
ابتسمت:لا مابغا...
سمعت جوالي يدق..كنت حقوم لكني لقيت سعود قدمي ماسك الجوال:بابا...
ابتسمت:شكرا حبيبي...
و قمت و أنا أسمع سارة تنادي سعود إلي راح لها بتردد...!
رديت على علي لمن وصلت لغرفتي و رديت الباب:ألو...
-أيوة السلام عليكم...!
-وعليكم السلام هلا...!
-كيف جدة...؟!
قلت و أنا أهز راسي:الحمدلله كويسة...
-و حفيدتها...؟!
-الحمدلله...
-طيب جود أكيد إنك بتقعدين صح...؟!
-لو..عادي يعني...؟!
-عادي...
-شكرا...
-طيب يختي ارسليلي سعود عشان نمشي...
-كلمت عمة و عمو و قالـ...
-عارف أنا إلي بلغتهم...!
-ايوة قالتلي عمة..عمو يقول سعود يقعد عندهم بس والله مو راضي..يقول ما يبغى يروح يبغى يقعد معايا...!
-لأ..أنا بروح عند أهلي و سعود بيجي معايا..جود إنتي رح تنشغلي بجدتك..سعود حيتعبك...!
-والله مني عارفة..مو راضي..مو راضي حتى يكلم أحد هنا...!
-ناديه طيب..بكلمه...
-بس بشويش عليه..ترا مرة متأثر...
-ايش بسوي لُه يعني..ناديه...
ناديت سعود و خلال ثواني كان عندي..مديتلو الجوال فأخدو و ما سمعت إلا إلي قالو:
-ليه؟!
-مابغا..أبغى ماما...
-لأ مو تعبانة...
برطم و عيونو دمعت:مابغا...
سكت لدقائق بعدين قال:أجي بكرة؟!
-بكرة نجي هنا؟!
-أمي و أبوية يجوا...؟!
-طب أنا أروح عند أمي...
-طيب..
-لأ مو زعلان...
-مع السلامة...
و مدلي الجوال،قلت:كويس اقتنع...
-طيب..شوفي أنا بكرة أهلي رح يجوا..بيجيبوا سعود معاهم...
-و إنتا طبعاً...
-أكيد..تبغي شي قبل ما أمشي....؟!
-لا سلامتك بس شوية أجهز سعود و أرسلو لك....!
-يلا في أمان الله...!
-مع السلامة...!
وقفت:يلا سعود حبيبي..تجهز عشان تروح مع بابا...!
-ماما أنا بكرة حجي...!
-ايوة حبيبي إن شاء الله..
ما كان فيه شي أسويه غير إني أوصي سعود على أشياء معينة...!
مشيت معاه لين باب المجلس و ابتعدت لمن شفتو يدخل...!
جلست على الكرسي إلي جمب سرير جدة و أنا أتنهد...!
سارة:جود سعود رايح...؟!
-ها...
كنت شاردة و مو منتيهة...!
قالت:سعود حيروح...؟!
-ايوة...
-ليه...؟!
-عشان مني فاضيتلو..حيروح هوا و أبوه عند أهلو...!
حليمة:طب كان خليتيه يجي معايا...؟!
ابتسمت:ما كان رح يرضى..بالغصبة راح عند جدتو و جدو...!
أم سارة:ليه..خليه معاكي..بعدين ولدك مو شقاوي يعني...!
أول شي:شغلة يروح لهم مالها داعي..و بعدين هما ما عرضوا إلا تأدباً و ذوقاً..تاني شي:سعود مدلع و يحتاج رعاية طول اليوم..أعرف أنا السبب لإني أبالغ في الاهتمام بيه لكنو فعلاً ما يقدر يقعد..خاصة في الأجواء الكئيبة دي...!
قلت:لا أحسن يروح هناك..أنا ما حقدر أنتبهلو هنا...!
فجأة طلع صوت جدة:جود...
فزيت:نعم...
-ازهمي منورة...
-أنا فيه جدة..ايش تبغي...؟!
قالت بصوت عالي:ازهمي منورة !!
-جدة أنا فيه..قوليلي ايش تبغي..محتاجة شي...؟!
-أقولك نادي منورة...
كنت حقوم لكن سارة وقفت:خليكي خليكي...!
و راحت للمطبخ و ربعد ثواني جات منورة و انصدمت لمن قالت لها جدة إنها تبغى الحمام..منورة اتجهت لحمام جدة و جابت الكرسي المتحرك و السطل إلي يتعلق في الكرسي عشان تقضي فيه جدة حاجتها _الله يكرمكم_ ....!
انصرفوا من الصالة و راحوا لغرفة جدة..أما أنا فوقفت..أبغى أتعلم الطريقة الصح عشان بعد كده أنا..إلي رح أسوي لجدة...!
هوا مو عن شي..منورة طيبة و تحب جدة و جدة تحبها لكن من أولى يخدم جدة..بنتها و لا شغالتها...؟!
أعرف إني ما حقدر أسوي لجدة كل شي..بس على الأقل أتعلم..في الوقت إلي أكون فيه صاحية و مو تعبانة أنا أسوي لجدة كل شي...!
رجعت جدة بعد ما خلصت على السرير بمساعدة منورة و أنا أطالع و ألقط كل حركة...!
منورة رجعت الأشياء للحمام و بعدها رجعت للمطبخ..رحعت أنا جلست على الكرسي إلي جمب السرير بصمت...!
بعد دقيقة كاملة سمعت:يا بنتي تعبانة إنتي...!
قلت بزعل:مني تعبانة يا جدة...!
-ما تعرفين...
-خلاص اتعلمت...
-إنك اولدي بالسلامة و أنا بخير...!
غطيت وجهي و دفنتو عند كتف جدة..حطت يدها على راسي و قعدت تقرأ عليا...!
مقهورة..ما أعرف بس حاسة نفسي...مادري..زعلانة من إلي سار و زعلانة عشان حاسة نفسي مني راضية..هذا قضاء..طب ما دام أنا مؤمنة بكده ليه مني راضية..ليه أحس نفسي مو هادئة..ليه أحس إني مغمومة...؟!
رفعت راسي و بعدت شعري لمن حسيت بأحد يدخل الصالة..كانوا هما..رجعوا...!
مسحت وجهي و أنا أسمعهم يقولوا إنوا الشاهي خلص...!
بطبيعتنا ما نقدر نقعد من غير شاهي و نعناع على الطاولات...!
مها:ماما والله جيعانين...!
أم سارة:ليه ما اتعشيتوا..ما غرفنالكم احنا...؟!
سارة:ايش غرفتولنا..لقمتين..ماما ايشبك..احنا فوق الخمسطعش بنت ما شاء الله...!
أم سارة:سمي بالرحمن..والله لو بغيتوه كان فيه البركة...!
انتبهت من كلامهم إنو الكل راح ما عدا أخواتي و أمهم و بابا و زوجة عبدالرحمن و أعتقد عند الرجال فيه زوج خلود لإني سامعة أصوات من عندهم غير إلي أعرفها...!
وقفت و أنا أقول:فيه لو تبغوا أشياء مجمدة..بطاطس و نجتس و كده...
جمعت سارة يدّينها:من جد؟؟؟!!!
ابتسمت:ايوة...
أم سارة:لأ..ليش البطر..مرة جيعانة روحي سويلك أي شي...!
قلت:عادي..حتى أنا ما أكلت و أعتقد إنتو كمان..ممكن نسوي أي شي خفيف...!
كنت أتظاهر بالقوة في الوقت إلي كنت فيه متوترة و خجلانة !!
أم سارة:لأ..مالو داعي..الحرمة تعبانة خلوها ترتاح...
التفت لجدة و رجعت طالعت في أمهم:بالعكس جدة تحب النجتس..والله ممكن تاكلها...!
سارة بطفش و هيا تتكتف و ترجع على ورا:قصدها منورة...!
-آآآم طيب أحد يجي يساعدني..بسوي الشاهي و..أحد..أبغى أحد يطلع النواشف معايا...!
سارة بكسل:ينفع ما أجي...؟!
-و هوا فيه أحد غيرك حيجي...؟!
أم سارة:قوموا يلا ساعدوها...!
أوبس..أنا ما كان قصدي شي..والله طلعت كده..لا يكون فهمتها على أساس إنها دقة...؟!
وقفت مها و قومت معاها سارة إلي كانت تعترض...!
رحنا للمطبخ و قلت أنا لمنورة تدخل تنام..رفضت فذكرتها بإنو بكرة ورانا قومة من بدري عشان جدة...!
كنت قاعدة أسوي الشاهي و أنا أستمع لكلام سارة و مها....!
كان نفسي لو أدخل معاهم في الحوار لكن خفت ما يتقبلوني..خفت يطلع شكلي سخيف و غير كده أنا مني من النوع إلي يدخل صح..عمتي دايماً تقولي إني أعطي إلي قدامي إحساس بإنو أقل مني و بإني إنسانة متعالية..قالت لي كده لمن اعترفت لي مرة عن أول انطباع عني..و إنها بس كانت تبغى ترضي ولدها إلي كان ما يعترف بشي اسمو زواج أصلاً...!
أنا ما أقصد..قد مرة سألت علي لو كان دا الكلام صح..و بدون تردد أكد كلام أمو..من غير ما يفكر أو يحاول يتذكر حتى..كان يبغى ينرفزني..آه..أكره علي لمن أحسو يستمتع بعصبيتي...!
خرجت من أفكاري على صوت سارة:جود التونة خلصت...؟!
التفت لها:مافي في الكرتون...؟!
-لأ...
-طب..شوفي يمكن في الدولاب...
أشرتلها و لمن راحت لقت وحدة صغيرة..طلعتها و قالت:ليش هنا...؟!
ابتسمت:منورة تحب تخزن لوقت الحاجة...
مشيت و سحبت من التلاجة الشطة و المايونيز و أخدت صحن و تبسي كبير و مفك و خرجت...!
و أعتقد إنها معد حترجع المطبخ تساعد !!
رفعت الكافتيرة عن النار بعد ما طفتيها و لمن كنت أصب الموية في البراد سمعت:اتوقعت رح تجي تتأسفي...؟!
التفت بعد ما حطيت الكافتيرة:نعم...
مها من غير ما ترفع عينها عن الطماطم إلي كانت تقطعها:اتوقعت..بس يمكن إنتي ما حسيتي إنك غلطانة...!
قلت باستغراب:عن ايش تتكلمي إنتي...؟!
-عن يوم الملكة...!
احتجت ثواني عشان أرجع لطبيعتي..حسيت كأنو الزمن اتوقف !!
قلت بعد ما أعطيتها ظهري و كملت صب الموية:و ليه أعتذر...؟!
-تعرفي إنتي ايش يعني ملكة...؟!
-ايوة أعرف..
-طيب...
قلبي كان يدق بقوة..لكن فيه شي..قصدي أشيااااء..لازم تتوضح...!
قلت:روحي اطلبي ذا الطلب من أبوكي..أنا غلطت..لكن مو عليكي و لا على أحد..أنا غلطت لإني رفعت صوتي على أبوية..هدا الشي الوحيد إلي أحس إني غلطت فيه..أنا تبت..و استغفرت ربي عشاني رفعت صوتي على أبوية بس ترا ما اعتذرت من بابا..هوا نرفزني بس صدقيني..لو كان فيه أحد ما كان انفعلت..حسيت إنو مافي قدامي أحد بعدين أنا ما اتوقعت إنو كل هدا يسير..أنا بس...
قاطعتني بقهر:أنا بدل ما أنام مبسوطة نمت أبكي..مافي أي تبرير لتصرفك...
-و أنا كمان..بدل ما أنام فرحانة لأختي نمت محروق قلبي..مين إلي نرفزني..مو أبوكي؟!..أنا سكت و ما انفعلت عشان ولا شي..أصر الكل عليا فجأة إني أبات و أنا ما كنت أبغى..كنت تعبانة..قلت لأ لأ لأ..بس ما سمعوا..آخر شي دمعت و قلت إني ما أبغى قام أبوكي بدأ يقول كلام بايخ و فجأة عمو وقف في صفو و هزأني..حسيت إنو التهزيء دا لازم يتوجه لأحد تاني..لا تطالبيني بأشياء أنا ما أقدر أسويها..الاعتذار دا لو حتطلبيه من أحد اطلبيه من أبوكي أو عمك...!
التفتت بسرعة و كملت شغل و هيا تقول:عالعموم أنا مني حاقدة عليكي...!
ابتسمت و أنا أرص الفناجين في صحن:لإنكم اتربيتوا صح ما شاء الله..من بعد ما جبت سعود و سرت ألاحظ أثر كل شي عليه سرت أقدر أفرق بين إلي متربين و إلي مو متربين ..بغض النظر عن الذوق و المجاملات إلي تسير كتير في بيئتنا..و اكتشفت قد ايش إنتوا متربين ما شاء الله..و مني قاعدة أجامل أو أكدب..بدليل إني حقولك إني لو عشت عندكم ما كنت حكون زيكم لإنو لا بابا و لا أمك و إلي هيا الأهم رح تتقبلني..كل دي الحقائق اكتشفتها بعد ما اتزوجت..و أمك ما سارت تعني بالنسبة ليا شي سيء زي زمان..لإني أنا دحين عندي بيت و عشان ما أكره أمك أو أحس إنها السبب في وضعي زمان أحط نفسي مكانها..بنت زوجي إلي ما قصرت عليه في بيتي..و من مين..من وحدة ما تسوى ظفري..شي يقهر...
"فيه إنسانة طبيعية تتكلم عن أمها بذي الطريقة؟!"
التفت مفجوعة و لقيت أم سارة تدخل للمطبخ...!
قالت لمها:ودي الطماطم خلاص...
سويت نفسي مو مهتمة و رجعت لرص الفناجين رغم إني خلصت منها لكن سويت نفسي قاعدة أرتبها أكتر...!
خرجت مها من المطبخ فقالت أم سارة:ردي..
برضو طنشت..
قالت:على بالك ما أفهم الحركات دي..ترا عندي بنات..لا تسوي نفسك مو سامعتني...
-ما أسوي نفسي، مشغولة قاعدة أرتب الفناجين...
-براحتك بس مهما كان ماضيك مع أمك سيء ما يحقلـ...
التفت لها بقهر و قلت من ورا أسناني:ما عندي أنا ماضي معاها و لا مع زوجك و لا مع أي أحد...
قطبت حواجبها و قالت بعد ثواني:أنا ما قصدت أذكرك بشي..لكن ما يسير تتكلمي عن أمك و أبوكي بذي الطريقة..إنتي عندك أولاد..مهما كانت أمك سيئة المفروض ما يحسوا بذا الشي و ما يحسوا كمان بكرهك لأبوكي..بغض النظر عن كون أبوكي زوجي أو حتى أمك هذي زوجة زوجي...
كان نفسي أصرخ في وجهها"مو زوجة زوجك"
زميت شفايفي بينما كانت تقول:و إذا كنتي إنتي ما تكرهيني فأنا نفس الشي كمان..أنا أثق في سعود و في تربيتو..و بعدين لو كنت أكرهك ما كان خليت رقمك و لا حتى ايميلك يقعد عند سارة..و إذا علبالك ما كنت أعرف عن العلاقة الـ سرية بينك و بين سارة فتكوني غلطانة..أنا بالعكس كنت أبغاها تستمر لكن أخاف على أولادي و ما أسمح لأي أحد يلومني على هذا الخوف..أنا ما أكرهك إنتي كشخص..أنا أكره المشاكل إلي ممكن تجي من وراكي...!
-واللهِ أنا كبيرة و أولادك كبار..أنا عن نفسي مني محتاجتهم..ما أنكر إني أحياناً نفسي أكون وسطكم بس خلاص..أنا متزوجة و عندي بيت أنا وسطو..تخافي عليهم من ايه...؟!
قالت و هيا تفتح التلاجة و تطلع منها أشياء:أتكلم عن زمان...
قلت و أنا أشيل الصحن إلي عليه الشاهي و الفناجين:ما أهتم بزمان...
و خرجت من المطبخ..حطيت الشاهي على زاوية السفرة و رحت جلست عند جدة...!
سارة:وي..تعالي اجلسي...!
-ها..مابغا..تعبانة ما بجلس على الأرض...!
و أول ما خرجت أم سارة قالت سارة:ماما شوفي جود..تقول زعلانة منك ما تبغى تجلس معاكي على سفرة وحدة...!
طالعت في سارة مفجوعة..ايش بتقول المجنونة دي...؟!
طالعت فيا أم سارة بعدين طالعت في بنتها:قومي جيبي السكرية...!
-ماما...
-بنت..قومي أشوف...
قامت سارة بتأفف و أمها تقول لمنى:منى حبيبي الفناجين...
لمن جات منى بتدف صحن الشاهي لأمها قالت:انتبهي لا تخبصي الترتيب...
ابتسمت..دقة وااااااااااااضحة..المفروض إني بدل ما قعدت أعيد و أزيد في ترتيب الفناجين أعبي السكرية و أحطها في الصحن !!
أم سارة:تعالي تعالي يا جود..
-مابغا مني جيعانة...
قالت بلهجة أموية آمرة:تعالي بلا عبط...
قمت..و أنا أفكر في الطريقة إلي استخدمتها..زي لمن تكلم بناتها لمن ما يسمعوا الكلام..بس طبعاً هيا قالتها بحكم إنها أم تكلم وحدة قد بناتها..أقول كده لإني ما أبغاكم تفهموا إنو خلاص كل شي اتعدل..سبق و قلت إنو ولا واحد حولي مثالي..كلهم طيبين لكن مو مثاليين و بيرفكت..عشان كده لا تفهموا لفظة "أموية" غلط !!
جلست على جهة فاضية من السفرة و ما كانت ثواني إلا و سارة تفحط و تجلس جمبي..حطت السكرية عالسفرة بقوة:أقولكم جيييعااااااااانة...!
أم سارة:سمي بالرحمن...!
منى:مفجوعة وحدة...!
و تتالت التعليقات على سارة إلي صرخت:ايشبكم إنتوا عليا..جود شوفيهم...!
خلود:سيبي جود في حالها..طالعي كيف وجهها أحمر..هييييييي جود..جود..
رفت راسي لها:نعم...
وين باقي الحوار...؟!
مو مهم..المهم..إني مع أخواتي على سفرة نواشف..في ديك الليلة..في وضع اتخلى الكل فيه عن كل السخافات كسرت حواجز كتيرة..و زي ما يقولوا..
I broke the ice

***************************************
الجزء الثامن عشر
(عسى أن تكرهوا شيئاً و هو خيرٌ لكم)


سعود،،،
قمت من الصالة متوجه لغرفتي و أنا كاتم زعلي من أمي..عارف إنها متضايقة و محرجة من وضعها لكن مالو داعي تصرخ فيا عشان أقوم..بمجرد ما تنادي منورة عشان حاجتها للحمام أنا رح أقوم بنفسي من الصالة...!
ارتميت على السرير و أنا أحس نفسي قرفان..من كل شي..من وضعي..من وضع أمي..من تعبنا احنا الاثنين..من علاقتنا..علاقتنا من قبل ما تمرض و هيا متوترة و من بعد ما مرضت..لا تسألوني..والله حسبتها رح تهدى من ناحيتي لكنها ساءت..مني عارف كيف أتصرف و مني عارف ايش إلي مزعلها مني..حاولت أغير كثير أشياء في نفسي اتوقعت إنها هيا إلي مضايقتها لكن مافي فايدة..مني عارف ليش زعلانة..و مستحي أكلم جود...جود خلقة تعبانة..فوق حملها شايلة هم أمي و همي..قعدت عندها من يوم الخميس لين السبت..الأحد راحت الجامعة و يوم الاثنين جت هنا..قعدت تقريباً طول اليوم بعدين راحت..و اليوم ثلوث..الأغلب حتجي بكرة و تبات...!
اتنهدت:"المصائب لا تأتي فرادى"
الحمدلله لك يا رب على كل حال...!
فعلاً مستحي من جود..أحس نفسي مثقل عليها مرة..نفسي لو تشيلني من بالها و تريح نفسها..فوق همنا على راسها تخرج..يا ذا التخرج..آه..أحياناً أفكر..لو ما كانت متزوجة كان أحسن..جود اتزوجت صغيرة و بدأت الجامعة متأخرة ترم..كان المفروض دحين تتزوج...!
يوووه..استغفر الله..خلاص هيا مرتاحة..أنا مالي..الحمدلله على راحتها و على حب علي لها...!
اعتدلت و أنا أفكر إنهم أكيد خلصوا...!
استغفرت من إحساسي بإني مابغا أخرج..أمي سارت عصبية معايا و ما تطيق قعدتي و أنا ما أحب أحد يقلب معايا من غير سبب...!
لكنها أمي..مهما سوت و مهما حسيت إنها تغلط في حقي..أكيد أظل أنا حبيبها و آخر عنقودها...!
وقفت و مشيت متجه للصالة..جلست على أقرب كنبة من سريرها و أول ما جلست قالت:كلمنك جود...؟!
-ها..لا..بس أكيد بتجي بكرة...!
-ليش ما تكلمني...؟!
-يا أمي جود والله تعبانة..مشغولة بحملها و تخرجها...!
-الله يوفقها و يلقيها خير...!
-آمين يا رب...!
-و إنتا..ما تبغى تلقى خير...؟!
-نعم؟!
-أقول ما بتلقى خير...؟!
-الله يا أمي..إلا إن شاء الله..الله يكتب الخير للجميع...!
بعد ثواني نادت أمي منورة ففزيت:ها أمي أنا فيه...
و قربت منها و انحنيت فقالت:حيل عني..منورة..يا منورة...
-أمي أنا هنا..ايش تبغي..منورة في الحمام..قوليلي ايش تبغي...؟!
-ما بغيت شي...
ما رضيت أتحرك من عند سريرها..أبغى أشوف ايش تبغى...!
و لمن خرجت منورة و جات طلعت أمي تبغى علبة المنديل إلي مي قادرة توصل لها...!
حسيت بدمي يغلي..أنا هنا..أنا ولدها هنا..ليه يعني ما تطلبني علبة المنديل..لا فيها حرج و لا شي خاص...!
ارتميت على الكنبة و أنا أتمتم باعتراض...!
طالعت فيا أمي بعتاب و هيا تقول:ظقت عليا...؟!

ما طالعت فيها...!
قالت:هيا إن كان ما بتكلمني لا تكلمني..لكن لا تظيق عليا..إني ما أقدر يا ولدي على ظيقك...!
اتنهدت و قمت..جلست على طرف سريرها و مسكت يدها:أمي أنا مضايقك في شي...؟!
-إنك أدرَى ايش مظيقني عليك...!
--قوليلي..قوليلي يا أمي..عيوني لكي والله..بس قولي ايش تبغي...!
قالت بحزن شديد:زوجة..أبغى أشوفك مع زوجة و أولاد..شفت أولاد سعد و سعيد و خواتك لكن إنتا بعده..أبغى أشوفهم يا ولدي قبل ما أموت...!
نزلت راسي و أنا أحس بألم في حلقي..كتمت صوتي و دموعي..إلا موضوع الأولاد..ما أطيقو ينفتح من أمي...!
-قولي..إن كان في وحدة تبغاها..قولي...
رفعت راسي:خير يا أمي إن شاء الله خير..إنتي بس لا تشيلي همي...!
-والله إن خيروني بين الأولاد اخترتك..كبرت و ما في كبري من أولاد إلا إنتا و جود..ما تبغاني أشيل همك؟!
-يا أمي الله يهديكي لا تقولي كذة..كلنا أولادك و كلنا نحبك...!
-لا يا ولدي..وقت شدتي حبايبي..وقت ضعفي إنتا و جود...!
-والله حرام ذا الكلام..من يوم ما طحتي كلنا حولك..إنتي بس لا تفكري كذة...!
-لا كبرت عرفت ايش أقول...
سكت..ما رح أطول في نقاش شي زي كذة !!
قبلت راس أمي و حضنتها..
ياااه..ما اتوقعت في شبابي إني ممكن أحضن أمي و أحتويها..كنت دايماً أنحضن من قِبَلِها..و ما أحتوي إلا جود..و بعد ما راحت جود اتعودت إني ما أعطي حنان لأحد..أنا دايماً متعود أنسدح على فخذ أمي..رغم إنو أخواني قد شافوني و قعدوا يضحكوا عليا..ما أؤمن بمبدأ الرجال إلي يستغني عن الحنان و المشاعر..أحس كل إلي كذة مو رجال و عندهم نقص في الرجولة عشان كذة يدعوا إنهم مو محتاجين نساء يعطفوا عليهم...!
ابتعدت عن أمي لمن حسيت إنو وقت راحتها جا..سدحتها و غطيتها و طفيت الأنوار و انصرفت لغرفتي عشان ترتاح...!
سحبت لابتوبي و جلست على السرير..يووووووه..متى آخر مرة قعدت زي الآوادم عليه...؟!
فتحتو و أنا أفكر إنو يبغالو تنظيف و كثير أشياء لازم تتمسح..شكلي..شكلي والله أعلم حضطر لوالحد من المجانين إلي أعرفهم عشان أسرقلي كم فلم حلو أتسلى عليهم و لو إني أعرف إني مني حق أفلام...!

**************************

جود،،،
كنت في المطبخ قاعدة أجهز الغدا..سعود عندي يتكلم و علي برا في الصالة يتفرج عالتلفزيون...!
سعود:ماما ماما نسيت..يا ماما...
-ها يا بابا نعم...
-نسيت أقولك...
-تقولي ايه...؟!
-أقولك عالسر...
-أية سر؟!
-أول لمن رحت مع بابا مول أوف أرابيا و إنتي مو معانا..
-ايوة...
كان حيتكلم لكني اتذكرت:ايوااااا..لمن في بيت جدة قلت تبغى تقولي حاجة...!؟
-ايييييييييوة..حقولك عالسر...
-قول حبيبي...
قرب مني و قال بصوت واطي:بس ما تقولي لبابا...
-ما أقول..
قال بهمس مبحوح:شفتي الزحليقة الكبيرة إلي هناكَ..هديكَ يا ماما...
-ايوة..
-ماما ديكا الزحليقة إلي زي البحر لونها...
-ايوة حبيبي عرفتها...
-بابا يقول لأ..ما أركبها..أنا مع عبودي و يوسف و حمادة دخلنا اللُعبة..بعدين أنا مابغا أدخل الزحليقة هادي بس عبودي شالني و غصباًُ عني..تخيلي..تخيلي غصباً عني خلاني في الزحليقة..و أنا خُفت..خُفت مرة مرررررررررة..كمانةْ خُفت بابا يخاصم..
-حبيبي إنتا..طب بابا ما شافك تبكي؟!
قدرت أعرف إلي سار..مالت على وجهو عبودي دا..بكّى ولدي..أنا علي قلي سعود بكي عشان واحد كعشو !!
قال بحماسة يحاول يخفيها:إلا يا ماما..شافني أبكي..أنا قلت لبابا إنو واحد كعشلي شعري..بابا كان حيخاصمو..شوية..شوية مرة و يقتلهم...!
-حبيبي إنتا فديتك..يعني إنتا كدبت عشان بابا ما يخاصم صاحبو...؟!
-ايوة..علشان يمكن بعدين يزعل عبودي..أنا ما أحب هدا عبودي..بس حبوه هوا طيب ترى بس شوية غبي...!
تركت إلي في يدي و نزلت لسعود..شلتو و بستو:حبيبي إنتا شاطر..ترا إلي سويتو كويس..صح الكدب حرام و غلط بس لمن تحس إنو لو كدبت فيه مشكلة ما رح تسير ترا أحسن...!
-يعني ربي مو زعلان مني...؟!
-لأ حبيبي إن شاء الله مو زعلان منك..اسمع...الكدب حرام مرة حرام بس زي ما قلتلك..لو خايف إنو تسير مشكلة لو أحد عرف ما تقول أحسن...!
قال بصدق:أصلاً أنا ما أعرف كيف أكدب..أحس لمن أكدب أقول كلام مو من جد..أنا ما أصدق نفسي لمن أكدب...!
ابتسمت و قلت و أنا أبوسو:حبيب مامي سعود..حبيب مامي..!
-حتى مع النونو...؟!
قلت و أنا أنزلو:مع النونو من غير النونو مافي أحد زي سعود...!
تابعت:يلا حبيبي دحين خد السفرة و افرشها...!
سحب سعود سفرة و راح للصالة..مالت عليه عبودي..والله حق إلي يعلم علي عليه..أنا ولدي..ينغصب يسوي شي ما يبغاه..أشوى ما كنت هناك..كان وريتو شغلو...!
بس والله فرحت بسعود..حبيبي هوا..أنا متعودة منو إنو ما يعرف يكدب لكنو لمن احتاج يكدب عرف يكدب الكدبة الصح في المكان الصح...!
اتنهدت براحة قبل ما أنادي:علي تعال جيب صحن الرز...!
جاني علي و شال الصحن و هوا يقول:والله إنك مدلعة..أبوية ما قد شال صحن لأمي لمن كانت حامل في لينا...!
قلت و أنا أشيل السلطات:صدقني إنتا إلي ما كنت تدخل المطبخ و تشوف...!
جلسنا ناكل..في الغدا دايماً سعود يتكلم..علي يكون طفشان و تعبان من الشغل فما يفتح مواضيع و سير و مافي إلا سعود نشيط في دا الوقت...!
سعود:بابا بابا..
-يااااا نعم...
-بابا أبغى أجي معاك البقالة...
طالع علي في سعود:هوا أنا قد رحت البقالة و إنتا مو معايا...؟!
-بس شكلك طفشااااان...
كمل علي أكل و هوا يقول:هذا و إنتا عارف...
قلت و أنا أقطع لسعود دجاج:ايشبك عالولد ضعيف...؟!
قال علي بنرفزة:عشان لازم على كل غدا أرد على ذا السؤال...!
قلت:قول طيب و خلاص...!
ما رد علي و كمل أكل لكنو بعد ثواني شال سعود و حطو في حضنو:يعني إنتا لازم تحسسني بالذنب...!
و قعد يأكل سعود بيدو..ابتسمت و أنا أشوف سعود يضحك:عشان عندي شي بقولو..أبغى أشوف معصب ولا عادي...
-ايش عندك...؟!
-ولا شي..خلاص بعدين...
-سعود اهرج..ايش عندك...؟!
التفت سعود لعلي:بابا..غلط !!
قلت:بسم الله..ايش فيه...؟!
-ماما بابا مو اهرج..بابا انطق..إنتي اهرج...!
علي:كيف؟!
سعود:بابا ما ينفع تتكلم كده..ماما بس تقول اهرج...!
نزلو من فوقو:طيب..و خلاص لا تقول إلي عندك...!
-عارف..أصلاً رح أقول لماما و ماما تقولك بعدين تقول طيب...
علي:هيا لأ...
سعود:لأ..إنتا ما تقول لماما لأ...
ابتسمت:فديت حبيبي أنا...
علي:لمدة أسبوع..أي شي تطلبيه..لأ...
سعود بثقة:نشوف نشوف...
هنا علي اتنرفز و بدأ يعابط في سعود..الشي إلي يضحك إنو سعود يقلد علي في أسلوبو الواثق و في حركاتو المستفزة فيسير علي كأنو ينقهر من نفسو أو شي...!
بدأت ألملم الصحون لمن خلصو...!
قلت و أنا أمد صحنين فوق بعض لسعود عشان يوديهم:علي إن شاء الله بكرة نروح عند جدة...؟!
سحب علي نفس:بكرة ربوع..عند أهلي...!
-طب...
ما لقيت شي أقولو فسكت..قال علي:طب لو على الأقل مري سلمي و بعدين أنا أرجعك لو تبغي لبيت جدتك...!
قلت و أنا أخفض بصري:المشكلة مو في الوقت إلي أروح فيه..علي جدة تتوقع مني أبات عندها..كمان..أنا..هوا أنا كمان أبغى أقعد عندها..ما دام ويك اند و مافي دوام و...
-لو منعتك حأحس بالذنب..مو لازم تمري على أهلي بس أنا بروح...!
ابتسمت بسعادة:من جد؟!،الله يخليك ليا !!
أخفى ابتسامة و هوا يقوم للحمام عشان يغسل..وقفت أنا بنشاط و أنا أبدأ أساعد سعود في الترفيع...!
يااااه..من جد إني أحياناً غبية..مادري ليه حسيت إنو حيرفض..مادري ليه...!
فجأة سمعت صراخ..علي كان قاعد يناديني...!
كنت قدني خلصت ترفيع و غسلت لسعود بعد ما غسلت أنا..رحت للغرفة و لقيت علي سادح مستعد لقيلولتو...!
قلت:أيوة...
-حتنامي...؟!
-ايوة..اليوم تلوت...!
أنا لمن أروح الجامعة لازم أنام...!
-طيب يلا...
-طب لحظة بنادي سعود...
و كنت على وشك أخرج لكنو قال بطفولية:مابغا سعود...
-نعم؟!
-ما أبغى سعوووووووووود..مابغا..خليه ينام في غرفتو...
قطبت حواجبي و أنا مبتسمة، فقال باعتراض:جود لنا مدة من يوم ما قعدنا مع بعض زي الآوادم..والله سرت أحسك قدييييييييييييييمة...!
-قديمة!!،أوريك من القديمة..بس أروح أنوم سعود و أجي...
لمن شفت امتعاض قلت:أصلاً هوا نعسان..يمكنو نايم دحين...!
و رحت لغرفة سعود و زي ما اتوقعت كان شبه نايم على السرير و هوا ماسك الجيم بوي...!
شلتو منو و بستو فقال:ماما أديني...
-ايش تبغى حبيبي...؟!
قال هوا مغمض:أديني جوم بويييييي...
قلت و أنا أغطيه:طيب حبيبي طيب...
بستو للمرة التانية و خرجت من الغرفة متوجهة لغرفتي...!
دخلت و لقيت علي نايم..ضحكت بخفة..هدا إلي كان يبغى يقعد معايا...!
و طبعاً الولد طالع لأبوه..نام من غير ما يتلحف...!
مسكت البطانية و نفضتها و أنا أسمي بالله تلاتة..انسدحت جمبو و غمضت عيني و أنا أدعي و أطلب من ربي أشياء كتييييييييرة...

**************************

دخلت و اتقدمت من جدة..سلمت عليها:كيفك جدة اليوم..إن شاء الله أحسن؟!
-بخير يا بنتي بخير..
طالعت في علي الواقف عند الباب:ادخل يا علي ادخل...
دخل علي و قال بصوت عالي:كيفك يا أم سعود اليوم...؟!
-إن شاء الله إني بخير...
-لا إنتي بخير و ما فيكي إلا العافية...
سلم عليها و بعدها رفع سعود عشان يسلم عليها،قعدوا الاتنين على وحدة من الكنبات و جلست أنا جمب جدة عالكرسي إلي جمب سريرها...!
بدأ علي يفتح حوارات مع جدة و بذكاء أجبرها تتكلم..و حتى لو كان كل كلامها نكدي و يائس لكن اسمنها اتكلمت..نطقت...!
بعد مدة دق الجرس..قام سعود و سأل:ميييييييييييييييين؟!
وصلنا صوت عمو:أنا...
فتح سعود الباب و هوا يقول:لازم تقول اسمك...
ابتسم عمو و شال سعود:طيب يا سيدي آسف...!
قفل عمو الباب و جا لجهتي..سلم على جدة و عليا و بعدين راح لعلي..سلم عليه و قعد جمبو و حط سعود فوقو...!
عمو:يعني يا سعود بابا ما يقول أنا...؟!
-بابا معاه مفتاح...
-طب لو ما معاه مفتاح...؟!
-بابا دايماً معاه مفتاح...
التفت علي لعمو:ايش تبغى ياخي..معايا مفتاح...
عمو:اسكت..أبغى أشوف من فتى عليه...ايوة يا سعود..بابا لو لو مثلاً ما معاه مفتاح..ايش يقول...؟!
رفع سعود أكتافو:ماعرف...
-طب ماما...؟!
سعود بصوت عالي:عمو!!
-نعم؟!
-ايشبك..خلاص..هما معاهم مفتاح..أنا بس ما عندي...
قلت و أنا أقلد سعود:ايشبك ياعمو..جننتو خلاص..وي...
عمو و هوا ينزل سعود للأرض:والله الولد متحيز معاكم..ما يبغى أحد يقول عنكم شي...!
علي بفخر:تربيتي هذا...
راح سعود لشنطتي و خرج منها الجيم بوي و انفرد بزاوية من الصالة و قعد يلعب..يا ربي عليه دا الولد..ما يطفش..أنا ما قبلت بأي جهاز غير الجيم بوي لسعود لإنو مو معقد و أحس دحين الواحد يطفش منو بسرعة قدام باقي الأجهزة..إلا سعود..متمسك فيه بشكل..فعلاً غريب...!
وقف علي بعد مدة:طيب..أنا بمشي ذحين...!
عمو:ليه؟!،اقعد...
علي:بكرة إن شاء الله بجي..ذحين بروح عند أهلي...
عمو:طب اقعد شوية..خلي الجو يبرد...
تابع عمو بشكل مفاجئ:ولا آآآه ايوة...اليوم ربوع...
علي:يب..لازم أروح..سعود يلا...؟!
سعود:دحين...؟!
علي بشدة خفيفة:ايييوة ذحين..بكرة إن شاء الله نجي هنا...!
قام سعود و هوا ماط شفايفو..مشي لين عندي..باسني و همستلو أنا:بوسلي أبوية و أمي...
بعد عني:طيب...
سلم على جدة و عمو و راح مسك في يد علي و خرجوا الاتنين...!
عمو:بتقعدي اليوم هنا...؟!
هزيت راسي بايوة بعدها التفت لجدة:جدة..اليوم بنام عندك...!
حسيت بسعادة جدة و راحتها إلي حاولت تكتمها..قالت:هَيّا الله يرضى عليك...!
ابتسمت:أكلتي...؟!
-الحمدلله...!
قلت:يعني؟!
عمو:ما أكلت...
ابتسمت بزمة:أنا عارفة..مادري جدة قاعدة تعاند مين؟!
عمو:تعاندني أنا...
عمو كان يمزح بس..حسيت إنو يعنيها!!
قلت:حروح أشوف أي شي يتاكل...!
عمو:الغدا موجود لو تبغي..هيا أكلت شوية و ما حترجع تاكل...!
-أنا الحمدلله مو جيعانة بس بسوي شاهي و تبعاتو...!
و رحت للمطبخ و أنا أفكر بنبرة عمو..فيه شي..أبصم بالعشرة فيه شي..عمو كان يقصد إلي يقولو..تعرفوا كيف الواحد لمن زعلان و ما يبغى يبين فيدق بالكلام...؟!
اتنهدت..من جد المصائب لا تأتي فرادى و إن كان إلي يسير حولي مو مصايب مصايب الحمدلله يعني بس هيا كده أشياء صغيرة تتجمع في وقت واحد تسببلي قلق..استغفر الله..يا ربي اكتب أجري بس...!
بعدت الكفتيرة عن النار و أنا أفكر في زمان..في دا المطبخ كنت دايماً..كل ما أبعد الكفتيرة عن النار أوعد نفسي إني ما حكبكب الموية الحارة و أنا أعبيها في البراد عشان ما أرجع أمسحها..كان دا آخر همي..سبحان الله كيف الواحد كل ما كبر كل ما زاد همو..مو إني الحرمة الكبيرة إلي همها قد الدنيا..لا..بس أحس مشاكل الحياة مالها سن..بمجرد ما الواحد يتزوج و يسير مسؤول عن نفسو و عن أحد تبدأ مشاكل الحياة الروتنية..لو ايش ما كان عمرو..و بغض النظر عن طبيعتو..حساس و لا لا مبالي..اجتماعي و لا منعزل..هيا تجي..هيا كده حياة الكبار و أصحاب البيوت...!
إلا على سيرة البيوت..لازم ننتبه أنا و علي لموضوع البيت..العقار قاعد يرتفع..و ما ينفع الواحد يقعد طول عمرو على الأجار..عاد مدري عن علي يقدر يبني و لا لأ..شكلي حستفسر من عمة عن دا الموضوع...!
خرجت من المطبخ و تركت أفكاري هناك لإنو الطفش البادي على وجه عمو شغلني عن كل شي...!
صبيت لجدة شاهي و رحت جلست عالكنب جمب عمو..صبيتلو شاهي و صبيت لنفسي...!
قلت:كيف الشغل اليوم...؟!
طالع فيا مستغرب سؤالي:الحمدلله...
-ما سار شي أكشن؟!
-لأ...
-ليه منتا كريم في الكلام؟!
اتنهد بأفأفة فقلت:ايشبك حبيبي..ليه كده طفشان؟!
أنا أعرف طفشان..من سنين أعرف ليه طفشان !!!
قال:ما..مادري..ملل..اليوم زي أمس و بكرة حيكون زي اليوم..كل يوم نفس الشي..طفشت...
قلت و أنا أرفع فنجاني:صح..تحس العيلة راكدة..مافي زواجات..مافي بيوت جديدة تنفتح..مافي مواليد بالتالي أطفال جدد..مافي خروج مافي سفر..طبيعي حنطفش...!
-لو تلمحي وقفي...!
التفت لعمو و قلت باستغراب مصطنع:ألمح لايش...؟!
-جود..تراكي ما تعرفي تكذبي...!
-أكذب؟؟؟!!!
-ايوة..أنا لمن أكذب أو أسوي نفسي يبان عليا و إنتي نفس الشي...!
ضحكت:صح..أنا ما أعرف أكدب...!
-مو أنا إلي ربيتك و ما عودتك تكذبي...!
-ما اضطريتني كمان..ترا الكذب جُبن..يبدأ من خوف الطفل من أحد بنية صافية..يتحول لكدب لمن يبدأ يحس الإنسان بالأمان و بإنو حماية لو...!
-ايوة..زي البقر إلي في الشغل عندي...!
ابتسمت:ايش...؟!
-يركن الواحد سيارتو قدام الشركة و يقول للمدير:آسف اتأخرت سيارتي خربانة و ما لقيت تاكسي بسرعة...!
-لقوا من فلتهم...
-والله من جد..و ما يسير لهم شي..المدير يخرج و يشوفهم خارجين و يركبوا السيارة قدامو..مرة اتأخرت و نصحني واحد بالكدبة دي..قلتلو لو شاف سيارتي بعدين؟!،قال:عادي..قلوا أخوية و لا صاحبي صلحها و جابها ليا..مادري يعني ما عندي ضمير ولا ايه..والله ممكن ما أنام...!
-هدا الطبيعي أصلاً...
-لا معد سار طبيعي...
جدة:لكن يا بنتي الكذب ضرورة أحياناً...
التفت:ايش...؟!
-والله يا بنتي كانن الوحدة تكذب عشان لا تتطلق...
-كيف..في ايش يعني...؟!
-ينت عمتي الله يرحمها..زوجها طلقها عشان عرف إن غداه كان من طبخ أمها..يقول ليش تكذبين؟!
-و هيا ليش كدبت عليه..كان قالت طبخ أمي...
-هو كان صِلف زوجها..كانت تعبانة بتولد و إلا اطبخي..أمها بغت تساعدها طلقها...لكن رجعها بعدين...
-غصباً عن وجهو يرجعها..والله لو وحدة تانية تتفل في وجهو و تقولو انقلع الله لا يردك...!
عمو:ميت الرجال..الله يرحمو...!
-الله يرحمو..إنتا فاكرو يعني...؟!
-لا..لكن قد حكتني أمي عنو...!
-آه..طب..ايش تبغوا عشا...؟!
قلتها بابتسامة فقال عمو:لنا كم يوم ما نسوي عشا..محد ياكل...!
-طب أنا مشتهية ماكدونالدز..ايش رايكم...؟!
-أمي ما تاكل...!
-إلا..تحب التشيز برجر..عادي...!
-طب جيبي التلفون...!
-لا..إنتا اخرج جيب...
-مابغا ما فيا حيل...
-الله يسعدك عمو..عشان خاطري..لازم تخرج..ما يسير شغل و مسجد و بيت...!
قام:أصلاً حتى المسجد معد أروح كتير...!
و راح لغرفتو..اتنهدت..الواحد لين متى..ما يسير..ما يسير..بالذات عمو ما ينفعلو يقعد وحداني..عمو لازم يكون عندو أحد يهتم فيه..لازملو زوجة و أولاد..بغض النظر عن الأولاد..هدا رزق من عند الله..عمو لازم يكون فيه أحد حولو..ما ينفع كده!!
خرج بعد دقايق و هوا لابس..استغربت إنو استسلم و بيخرج يجيب...!
قال:كم أجيب...؟!
-آآه..أنا اتنين و كمان منورة..جدة ما حتاكل إلا واحد..
-لحظة لحظة..كيف يعني..كلكم تشيز برجر...؟!
-ايوة و إنتا كمان..
-لا مابغا...
-إلا..أنا أبغى تشيز برجر و أبغى زيك...!
-مابغا..مو حلو..ما يشبع...!
-بليز..أبغى جدة تاكل و ما رح تاكل إلا لو كلنا زي بعض مع بعض...!
-أوكييييييييي..أنا لا تحسبيني..احسبيكم...
ضحكت:أوكي ححسبنا..أنا و منورة أربعة و مع جدة خمسة...!
-أوكي و ايش تبغوا معاه..ببسي؟!
-ايوة..جيب كبير من البقالة أصرف...
بعد ثواني دخلت منورة للصالة و في يدها ورقة..مدتها لعمو:بابا..جيب هدي..ناقص من البيت...!
مسك عمو الورقة وطالع فيها بعدين رجعها لمنورة:ما حنسوي اليوم عشا..بكرة أجيبها...!
قلت:ما دام حتمر البقالة جيبها و اخلص...!
قال و هوا يمسح وجهو:ما معايا صرف...!
-أنا معايا...
قال و هوا يتوجه للباب:لا خلاص يا ماما..مالو داعي..بكرة أصرف و أقضي للبيت مرة وحدة...!
-طيب..
و خرج عمو و أول ما خرج قالت منورة:جود..تعالي فيه مشكلة في مطبخ...!
جدة:ايش فيه...؟!
منورة:ها..لا بس أبغى أسأل عن شي كيف أسوي في اللحم...!
جدة:مين علم جود؟!
قلت و أنا أقوم:بس أنا سرت أحسن منها..سارت تسألني...!
قلتها بمزاح و أنا أتوجه للمطبخ مع منورة..أول ما دخلت قلت:ايش فيه؟!
-مافي مشكلة في لحم...!
-عارفة..ايش فيه؟!
-جود..أنا في قولك..إنتي لا تقولي أنا قلت...
-طيييييب...
-جود بابا و ماما في سير زي نار..أنا دحين..عندي اتنين بوس..خلاص أنا سرت اديوت (غبية)..ماما يقول شي بابا يقول تاني..بابا يقول:أنا قولي لي كل شي لا تعبي ماما..ماما تقول قولي أنا كل شي..لا تقولي لبابا..خلاص..أنا تعبت..ما أعرف ايش أسوي..أسمع كلام مين..بابا و لا ماما..ماما زعلانة من بابا..كل يوم تخاصم..كل يوم..تقول بابا ما يحب هيا...
اتنهدت..كنت متوقعة حسمع شي من دا القبيل..قلت:هوا عشان مرض جدة و عمو طفشان اتوترت علاقتهم..معليه..اصبري شوية و إن شاء الله مدة و يرجعوا زي أول...!
قالت و هيا تخفض بصرها:أنا أعرف ليه ماما زعلان...!
-ليه؟!
-أمي كل يوم تقول..بكرة أموت بكرة أموت..تقول تبغي تشوف زوج وبيبي حق بابا...!
اتنهدت:عارفة..إنتي بس كل ما تجيب سيرة الموت خاصميها..قولي لا تقولي يا أمي كذة..احنا نحبك و إن شاء الله تشوفي أولاد بابا..لا تخليها تتكلم براحتها عن دي المواضيع...!
-أنا أخاصم تقولي:يا حمارة اسكتي..أمي بس تقول أنا موت أنا موت...
ابتسمت..جدة ما تسبها إلا و هيا تعرف طيب قلبها..قلت:ما قصدها تسبك..هيا شوية أسلوبها عفش...!
-أنا ما يزعل من ماما..جدة..أمي سعودي..زي أمي هناك..ماما أنا كده...!
ابتسمت:الله يسعدك يا منورة و لا يحرمنا منك...
-جووووووود..لا يقولي كده...
و حضنتني:أمي تقول تعالي اندونيسيا خلاص..بس إنتوا...
قلت بعد ما بعدت عني:منتي مشتاقة لأهلك يعني؟!
-إلا أبغى أروح خلاص بس إنتوا هنا..أنا أبغى هناك و هنا...!
ابتسمت:الله يخلي الجوالات و الايميلات..مي مشكلة...!
-ما أعرف أنا..بعدين يمكن أشتري كمبيوتر...!
-إنتي إن شاء الله أكيد بيجيكي يوم و ترجعي لبلدك..وقتها عاد اشتري و اتواصلي معايا..مو تنسيني...!
-ايوة..إنتي زواج ما نسيتيني..أنا كمان ما أنساكي...!
-يا ربي يا منورة..ييسرلك ولد الحلال...!
-اندونيسيان..ولد حلال خلاص مافي...
ضحكت:ايش دراكي..أنا كنت و أنا صغيرة أقول مافي سعودي ولد حلال..عادي..يجوا أولاد الحلال لبنات الحلال...!
اتكلمت منورة و قالت شي..لكني ما سمعتو...
يا الله قد ايش غبية..لمن أستخدم تعابير مني قدها !!
يا الله..يا الله...

^^^^^^^^^^^^^^^^^^^^^^

سعود،،،
رفعت راسي لجود إلي سألت:خير عمو؟؟؟
أنا قلتلها تجي لغرفتي بعد العشا..أبغا أكلمها و أقولها عن إلي قاعد يسير...!
-ولا شي..بسسس...
تابعت:جود..أبغى أسألك..أمي قد قالت لك شي عني...؟!
-كيف...؟!
-في الفترة الأخيرة اشتكت مني..قالتلك إنها متضايقة مني...؟!
قالت باستغراب:للللأ...
تابعت:ليه تسأل...؟!
-أمي يا جود في الفترة الأخيرة سارت معد هيا طايقتني..تعاملني مرة زفت...!
قطبت حواجبها:ليه..مسويلها شي...؟!
-لأ..مادري..والله طول الأيام إلي فاتت أفكر لو كنت مسويلها شي بس ما ألاقي..مادري ايشبها..والله طفشت..زعلانة مني و بقوة..مرة زعلانة و ما تكلمني إلا قدامك و قدام الناس..غير كده ما تتعامل معايا...!
-وي..من متى كده معاك...؟!
-من يوم ما مرضت...!
-و قبل ما تمرض...؟!
-برضو..بس أهون من دحين....
نزلت جود راسها و سكتت...
لمن ما شفت منها ردة فعل حطيت يدي على كتفها:جود...
رفعت راسها بسرعة:عمو..أنا أعرف ايش بجدة...!
-ايشبها؟؟؟!!!
سحبت نفس:أوكي عمو..جدة باختصار..تبغاك تتزوج..خايفة عليك..و يحقلها..و أنا معاها في كل تصرفاتها..الفرق الوحيد إنها هيا مي متجرأة تكلمك و تصارحك أما أنا فأكلمك و أحاورك..هدا هوا الفرق...!
قلت بنرفزة:جود اتكلمنا في دا الموضوع و إنتي سويتي إلي عليكي..جزاكي الله خير...!
جود بدهشة و غضب:عمو..إنتا منتا منتبه لنفسك..إنتا على بالك زي كل الرجال..تتحمل تقعد لحالك..أصلاً من الأساس مافي رجال يتحمل يطول من غير زواج لكن إنتا بالذات زيادة..لا طباعك و لا تربيتك تخلوك تعيش لحالك...!
-طب أنا ايش أبغى بالزواج..ايش حسوي..ما يهمني الزواج قد ما يهمني الأطفال..و إنتي صغيرة ما كنت محتاج أي شي..كنت مبسوط..أعترف..أنا إنسان أحب أربي..أحب يكون عندي أحد أهتم فيه...!
-عارفة بس كيف يكون عندك أحد و إنتا مو متزوج...؟!
قلت بصدمة:جود إنتي تستهبلي..إنتي عارفة وضعي كويس...
قالت بغيض:عارفة لكن الأطفال شي من ربنا..هدا شغل ربنا..مو شغلك إنتا..إنتا كل إلي عليك تتزوج و تصارح إلي حتتزوجها بكل شي...!
-ايوة..و أجرح نفسي..جود لو انرفضت من أحد حتدمر..بعدين هذي أحلام..حرام...
قاطعتني:مني..قاعدة..أناقشك..في الأشخاص...أنا بكلمك عن الفكرة..إنتا لازم تسعى..و تحاول و...
-أسعى!!!،طيب..إذا افترضنا هيا وافقت..أهلها؟!..ليه يرموا ببنتهم على واحد مريض ما يخلف...؟!
-مو لازم أهلها يعرفوا...!
صحت:نعم؟!!!!
-مو..لازم..أهلها..يعرفوا...
حسيت بدمي يغلي..ايش قاعدة تقول هذي؟!
قلت:آها..أخدعهم..أتزوج بنتهم و أنبسط على حساب سعادتها و سعادتهم..ما شاء الله..و نعم الأخلاق والله...
-إنتا سمعتني..خليني أكمل..عمو..إنتا فهمتني إنو النسبة ضئيلة بس فهمتني في طفولتي أكتر إنو مافي شي مستحيل أو صعب على ربنا...!
صرخت:جود مالك شغل في حالتي..بلا ضئيلة بلا زفت..و قفلي الموضوع لإنـ...
قاطعتني بصوت قوي:لأ ما رح أقفل الموضوع..و ما فيها أي شي لو سمعتني..اتحملت كل كلامي إلي قبل ما تبغى تتحمل تسمع فكرتي..أنا مني أنانية و لا متخلفة عشان أرضى لبنات الناس بإلي ما أرضاه لنفسي و لأولادي..فكرتي ما فيها إجبار..فيها إنك تتعاون معايا و تثق بيا..فيها إنك إنسان مسلم عندك رب تستخيرو..فيها إني ما فكرت أكلمك في الموضوع قبل ما أستخير ربي مرات و مرات لين ما ارتحت تماماً..فيها و فيها..و بعدين تعال هنا..تحسب إني أبغالك أي وحدة و السلام..تحسب إنو الموضوع لو ما تم حيتغير شي في حياتي أو حياتك..سبق و قلتلك مليون مرة إنك لو سمعت كلامي يا يتحسن وضعك يا تقعد زي ما إنتا..لكنك ما تبغى تسمع و لا تبغى تحاول...!
حسيت بقلبي ينبض بقوة..أنفاسي حارة..شي يوجع إنو بنتك تحط عينها في عينك و تطلع فيك كل ذي العيوب عشانك بس..حاولت تشاركها همومك...!
حطت جود يدها على فخدي و قالت بهدوء و عطف:عمو ما أبغاك تزعل مني بس ثق فيا..كم مرة لازم أطلبك تثق فيا..ما حيضرك شي لو حاولت..وافق على الإنسانة و أنا مجهزة كل شي..كل كل شي..أحلام دي لو كلمتها و لا سمح الله رفضت ما حيطلع الموضوع لأحد..حيقعد بيني و بينها و بينك..علاقتي بزوجي و علاقتك بأحمد ما رح تتأثر لو أحلام رفضت لإنو محد رح يعرف بدا الرفض إلا احنا..أنا فكرت أقولها و آخد رأيها..يكون الموضوع بيني و بينها..محد يدري إلا هيا...
قلت بخنقة:ما أقدر..أكره اللف و الدوران..جود افهمي..هذي أخت أحمد...
-و يعني أخت أحمد..ما حيضرها و لا حيضر أحمد شي...!
-ما أقدر ما أقدر...
-ايش إلي ما تقدر؟!،إنتا أصلاً ايش رح تسوي؟!،عمي اسمعني..أنا إلي رح أكلم البنت و أسألها..وافقت كان بها ما وافقت انتهينا و أنا وعدتك لو ما وافقت ما رح أفتح الموضوع معاك نهائياً..و ولا كأنو سار شي..إنتا بس راضي بها زوجة ولا منتا راضي...؟!
سحبت نفس و أنا أشيح بوجهي عنها...!
جود مي فاهمة..مي فاهمة شي !!
طالعت فيها:جود إنتي منتي فاهمتني...
-لإنك إنتا..منتا فاهم نفسك..كيف تبغاني أفهمك؟!
-أنا فاهم نفسي كويس و عارف ما حقدر أكمل معاكي..جود تعرفيني ما أحب اللف و الدوران..أتخيل..بس أتخيل وحدة تكلمك عن واحد و تسألك موافقة عليه ولا لأ..من ورايا..من غير علمي..جود أنا أحط نفسي مكان أهلها..لو افترضنا يعني إني وافقت..يا الله..بنتي..توافق و تعطي كلمة من ورايا..شي يقهر!!
-و إنتا مالك في أهلها..هيا وحدة ناضجة و كبيرة و وضعها من الأساس ما يسمح لأهلها يرفضوا لأسباب سخيفة..الشي الوحيد إلي حيكون سري هوا مشكلتك و هيا .. المعنية بالأمرحتكون عارفة..عمو استوعب..ليش نطلع كلام..افرض مثلاً إنكم خلفتوا..إنتا ما تدري..هدي أشياء غيبية..علمُها عندَ ربي..ولا إنتا و لا هيا و لا دكتور يقدر يقرر أو يمنع..لو مكتوب لك شي حيجيك..إنتا عليك تسعى و تحاول...!
حسيت بالضعف و الطفش و الاستسلام...
قلت:طيب..افرضي وافقتْ و وافقت هيا..و وافقوا أهلها..أحمد..أحمد لو ما كان راضي..ما حيقدر يكسر كلمة أهلو..أخسر صاحبي عشان وحدة...؟!
-ايييييييييوة..هنا فكرتي..أنا رح أكلم البنت..و إذا وافقت تروح إنتا تكلم أحمد..على أساس الموضوع بينك و بينو و إنك ما تبغى تتقدم رسمي إلا لمن هوا يوافق و تشرحلو إنو مافي شي حيتغير لو ما وافق و تطلب منو يخلي الموضوع بينك و بينو...
قلت بصدمة:أقولو عن إلي فيني...؟!
قالت باستنكار:لا طبعاً..بس أحلام تعرف !!!
سكت لثواني قبل ما أقول بتفكير:جود من متى و إنتي تعرفي لشغل الحريم ذا...؟!
فجأة حسيت بالزعل..جود من متى تعرف تسوي شغل الـ من تحت لتحت..ايش هذا الدهاء إلي طلع فجأة...؟!
طالعت فيا بنظرة ما عرفت أفسرها:ربي أقر بعظم كيد النساء لكن ما أقر بسوء هذا الكَيد..لإنو مو دايماً نستخدمو في الشر..و ما أعتبر إلي قاعدة أسويه كيد..أنا قاعدة أحاول أسعد ناس أحبهم...
قلت و أنا أحس باللامبالاة تتسلل ليا:طيب..و بعدين..أتقدم رسمي...؟!
-لأ..يبقى علي..تكلم علي و تاخد موافقتو و تطلب منو ما يقول لأحد عشان لا تكون فيه أي حساسية في الموضوع..قول لعلي لا يقولي حتى..و اطلب منو هوا يكلم أحلام و ياخد موافقتها..و اصحك تطلب من أحمد يكلم أحلام..لإنو أحمد عاقل و ما يهمو كلام الناس و يمكن ما يتحمس للفكرة لإنو يخاف من الحساسيات..تفكير أحمد زي تفكيرك..لكن علي مرة متأثر من إنو أحلام مو متزوجة و زعلان عليها..حيتحمس للفكرة..اطلب منو هوا يكلمها و لمن يقولك إنها موافقة تتقدم رسمي...!
-آه..و متى أسوي كل هذا...؟!
-من بكرة لو تبغى...!
-إنتي على بالك أنا أقدر أكلم أحد في ذي المواضيع و لا أقدر ألف و أدور..بعدين أنا ما أعرف أكذب..على طول يبان على وجهي...!
-دي هيا المشكلة الوحيدة...!
طالعت في عينها:لأ..المشكلة الأكبر إنو كل كلامك مو عاجبني...!
اتنهدت جود:أوكي..ايش رايك أكلم أنا أحلام و لو وافقت تكلم إنتا أبوها و تقولو إنك ما رح تتقدم رسمي إلا لو وافقو..و إنو مافي شي حيتغير لو رفضوا...!
-جود..أنا إنسان واضح..يا أهل البنت يعرفوا بوضعي يا بلاش...!
-طب قولهم...
-مجنونة إنتي؟!
-شايف..شايف كيف..ما دام منتا قادر يقعد الموضوع سر بينك و بين زوجتك إن شاء الله ..أنا ما أبغالك أي وحدة و السلام..أنا متنقية أحلام تنقاية..في كتير بنات ميتين و يبغوا يتجوزوا..بس أنا عارفة إنتا ما تقدر تعيش مع أي وحدة لإنك إنتا مو أي واحد..مو زيك زي كل الرجال..إنتا لمن تتزوج تبغى حياتك تتحسن..ما تبغا لقب متزوج ينضاف لك و خلاص..عشان كده قاعدة أقولك..حاول..الموضوع يستاهل...!
اتنهدت:جود..اقفلي الموضوع خلاص و لو أبغاكي تنفذي الفكرة حقولك...!
طالعت فيا:يعني توعدني تفكر من غير حساسية...؟!
-يعني قفلي الموضوع و لعد تفتحيه إلا لو أنا فتحتو...!
-عمو..أقولك على شي...؟!
طالعت فيها فقالت:أنا مرة طرحت فكرة الرجال إلي ما يخلف..كنا نتكلم عن الزواج..فقلت كجس نبض:طب و إلي كامل بس عندو مشاكل في الخلفة؟!،أول مُعارض كان أحلام..قالت إنو فيه ألف طريقة و طريقة عشان الأزواج يخلفوا و لو ما نجحت ولا طريقة فكافل اليتيم كهاتين...
و أشرت بأصابيعها...!
قلت:تبغي تعطيني أمل يعني...؟!
-لا مو عن كدة..بس أقولك عن رأيها في الموضوع بشكل عام...!
-قلتيها..بشكل عام..لكن لمن يسير الموضوع شخصي يتغير كل شي...!
ابتسمت جود لسبب مجهول و قالت و هيا توقف:عالعموم أستنى ردك..عمو استخير..لا تعتمد على نفسك بس..استخير..ربنا أعلم...!
و خرجت من الغرفة و أول ما خرجت عرفت ليش ابتسمت...!
إلي ظهر لجود من تساؤلاتي الأخيرة و من استماعي لها بهدوء هوا إني مهتم مع إني كنت أبغى أوضحلها إني مني مهتم...!
قال لا مبالاة قال !!
رميت بنفسي عالسرير و أصدرت آه طفش و ملل من كل شي...
مابغا أفكر و مابغا أعطي لنفسي حتى فرصة أفكر في الموضوع..أنا حتى لو كنت مقتنع باللف و الدوران إلي جود تبغاني أسويه..وين المروءة و الأمانة..أكذب على صاحبي..صديق عمري..إلي معايا طول ذي السنين..أكذب عليه..عشان حياتي و سعادتي..سعادتي...؟!،ليه و مين قال سعادتي مربوطة بأحلام هذي؟!،أصلاً إنسانة ما أعرفها و لا أثق فيها..مو عشانها أخت صاحبي خلاص..أعطيها كل ثقتي و أقولها عن كل مشكلتي..مين هيا و مين تطلع...؟!

اتقلبت على الجهة الثانية و أنا أستغفر..يا رب تسامحني..أخذت ذنب بنت الناس و أنا أفكر فيها بذي الطريقة..ايش ذنبها و هيا في بيت أهلها ما تدري عن شي...؟!
استغفرت..لكن المرة دي بقوة..لإني حسيت كيف إني حولت الموضوع لشي شخصي..خليت تركيزي على أحلام مو على الفكرة..أنا ليه كده ساير سخيف و سطحي..التافهين هما إلي يغفلوا عن الفكرة و يهتموا بالأشخاص...!
فكرة..ليه مين قال إني حفكر..ما حفكر.. ولا حتى ححاول ..!

*********************************

سعود،،،
صحيت و أول ما قمت..و بشكل مفاجئ..جا اسم أحلام على بالي...
ضربت وجهي بيديني و شديت على شعري و أنا أزمجر !!!
قمت و سحبت فرشتي و اتوجهت للحمام بعصبية..أمس ما نمت الليل و اليوم أول ما أقوم تجي على بالي !!!
خرجت من الحمام و أنا أذكر ربي..أوكي..هذا الشيطان..هوا إلي قاعد يقلقني..أنا المفروض ما أستسلم...!
قعدت أطالع في غرفة جود قبل ما أرجع لغرفتي..كلو منها..من ذاك اليوم..من يوم ما رمت اسم أحلام و أنا مني قادر أوقف تفكير..صح مو مرة لكن كنت أفكر و بين فترة و الثانية ينقز اسمها فجأة ليا..سرت أحس إنو اسم أحلام مشهور..ما أقولكم إني اتعلقت أو حسيت إنها ليا..لا..بس سارت أحلام "أخت أحمد" شخص في بالي..أول ما كانت تعنيني..ذحين أحس بوجودها..زمان كانت زيها زي أي وحدة في الشارع..ذحين سرت أحسها قريبتي...!
حسبي الله و نعم الوكيل...!
خرجت للصالة و لقيت أمي و جود..قاعدين ياكلوا كيوي...!
سلمت على راس أمي:صباح الخير...!
أمي:صباح النور...!
جلست قدام التلفزيون و أنا أسمع جود تقول:عمو أقطعلك كيوي...؟!
قلبت للجزيرة الوثائقية و أنا أقول:لأ...
و بعد ثواني لقيتها قدامي مبتسمة بقطعة كيوي..طالعت فيها:مابغا...
-بس أنا أبغاك تاكلها...
-ايوة بس أنا مابغا آكلها...
-حتردني يعني...؟!
سحبتها منها و رميتها في فمي فضحكت...!
جلست جمبي و قالت و هيا ترجع شعري ورا أذني:استخار عمو حبيبي...؟!
قلت بانفعال من ورا أسناني:لايش؟!
ابتسمت بحلاوة:لحياتو...
طالعت في التلفزيون و هيا تقول:طبعاً لأ..بس والله عاذرتك..أعرفها دي الحالة..لمن نكون عارفين إنو ربنا رح يهدينا عشان نسوي الشي إلي ما نبغاه لو استخرنا..قاعدين نعاند الصح و نعاند نفسنا..تمر عليا دي الحالة كتير بس في حياتي ما استسلمت لنفسي أكتر من يومين تلاتة..أضغط على نفسي و أستخير...
و قامت رجعت لأمي و فتحت معاها موضوع مادري ايش هوا...!
بعد مدة قالت أمي:جود..قومي منورة..خليها تسويلنا فطور...!
جود:أنا بسوي يا جدة..خليها ترتاح...
أمي بنرفزة:خليها تقوم..ليش ترتاح..البيت خلاص قام...!
جود:حرام يا جدة مسكينة..طول الليل معاكي..خليها ترتاح دحين..حرام..أنا بسويلكم فطور..ايش تبغوا...؟!
قلت و أنا أقوم:سوي لأمي..أنا مابغا...!
و رحت لغرفتي..و أول ما دخلت طاحت عيني على السجادة..استغفر الله العظيييييييم..ساير زي الإمعة كلمة توديني و كلمة تجيبني..كل شي ينقال أفكر فيه..كل شي ينقال يأثر فيا..أفففففففف...!
رميت نفسي على السرير..في الفترة الأخيرة ساير كاره نفسي..و متضايق من تصرفاتي و ردود أفعالي تجاه كل شي و كمان ساير مضطرب..فقدت الهدوء و الثقة و فقدت قدرتي على التفكير بعقلي و...
و خلال ثواني غرقت في التفكير في الشخصية مو في الفكرة..من جديد !!

*********************************

جود،،،
قلت لعلي إلي سأل:الحمدلله..أحسها فكت شوية...!
علي و هوا يلف بالسيارة:يمكن اتعودت و اتأقلمت مع الوضع...!
وقف عند بوابة العمارة و نزلنا..قال و هوا يشيل مني شنطتي الكبيرة:طيب و عمك...؟!
و كملنا نقاش لين وصلنا الشقة...
دخلنا و بدأت أنا أروق البيت و أرحمو من بعض آثار تدمير علي و سعود من غيري..طبعاً سعود صغير..على حسب إلي معاه..لو أنا يكون منظم..لو أبوه يبدأ يتمرد من ناحية الترتيب...!
و انشغلت عاد ببيتي و أسرتي...!
عالساعة عشرة خلصت شغلي..أحمد الله بس إنو السبت ما عندي دوام..أصلاً أنا غبية..يوم الربوع ما سويت شي قلك بروح لجدة من بدري و جا علي و خبص كمان يوم الخميس..هوا قلي إنو رجع يبغى يتروش و هناك ما يرتاح لإنو مافي كل أشياءو...!
قعدت على الكنبة في الصالة جمب علي و أنا أتنهد...!
طالع فيا بعدين رجع يطالع في التلفزيون..قال:نومت سعود...
-طيب...
-قولي شكراً...
-شكراً...
حسيت بنظرات علي إلي استمرت مدة مو قصيرة فالتفتلو:ايشبك...؟!
-إنتي ايشبك...؟!
-ما بيا شي..ايشبك تطالع من أول...؟!
-حتعيدي نفس موال أول زواجنا...؟!
ابتسمت بحواجب مقطبة:ايش فكرك...؟!
-فكرني إن..معد فيه شي جديد أتذكره...!
طالعت في علي مستغربة:علي..ايشبك..ضايقتك بشي...؟!
-لا..بس أحس ليا مدة عنك..من زمان ما قعدنا مع بعض..أحس إني فقدتك رغم إنك كل يوم في وجهي...!
-فقدتني؟!،كيف يعني..حاس إني مقصرة معاك في شي...؟
-لاء جود لأ..بس أحس..مادري..أحسك بعدتي عني..بشكل ما يريح...!
سكت و ما عرفت ايش أقول..أوكي يمكن لنا مدة من آخر سهرة حلوة بس هوا عارف..مو بيدي..حملي و تخرجي و تعب جدة...!
ناداني لمن ما لقى رد..طالعت فيه فقال:عارف و مقدر إنك مشغولة بأشياء كثير لكن أنا كمان لي حق عليكي...!
نزلت راسي:أوكي..أنا آسفة لو كنت انشغلت عنك أكتر من اللازم..أوعدك ححاول أرتب نفسي و أنظم وقتي...!
قرب مني و لف يدو على أكتافي:ما أقولك كذة عشان أحسسك بالذنب..أنا بس أبغى أوصلك إنك واحشتني..جود ما قد حسيت إني فاقدك زي ماني قاعد أحس ذحين...!
طالعت فيه و قلت و عيني في عينو:طب قولي مشتاقلك لا تقولي كده...!
سكتنا مدة و احنا نتبادل النظرات..اتنهد علي بعدها و قال:تعرفيني ما أعرف أعبر..أنا اتنرفزت و حسيتك منشغلة بغيري.."ابتسم"..ايش تتوقعي من واحد بدوي زيي...؟!
أخفضت بصري لإني حسيت إني ممكن في أي لحظة أبكي ..نفسي أبكي و أشكيلو بس مني لاقية سبب مقنع و مني عارفة بايش رح أشكي..أنا أحس نفسي مدووشة..أحس فوق راسي أشياء كتير..هم حملي..هم عمو..هم جدة..انتباهي لسعود..و دحين علي و إهمالي الغير مقصود لو...!
حطيت راسي على صدر علي فحضني و هوا يهمس باسمي...!
قلت:ما فيا شي...
-طيب...؟!
غمضت عيني و أنا ألف يدّيني حولين علي:خليني كمان شوية...!
-أوكي..إنتي حرة...

*********************************

جود،،،
صحيت الصباح و لقيت علي مو موجود..اتنرفزت..أكره لمن علي يسوي كده..ليش ما يقومني أساعدو و هوا عارف نفسو يحوس الدنيا و يتأخر لو ما قمت معاه...؟!
يمكن متأثر من حركتي أمس..أو تلاقوه حاسس بالذنب عشانو حسسني بالذنب..حبيبي هوا..حساس و رومنسي..أبغى أفهم أنا ايش يبغوا البنات بالرومانسيين بالكلام..ايش أحلى من إنك تقومي و تلاقي زوجك خارج لشغلو من غير ما تحسي و لا تنزعجي..هدي قمة الرومانسية و الرقة بالنسبة ليا...!
خرجت من الغرفة بعد ما اتشطفت و اتغسلت..سعود كان مشغل التلفزيون و قاعد يتفرج على (بوب ذا بلدير)..هوا كده اسمو صح...؟!
جلست و أنا أقول:صباح الخير...
قال من غير ما يطالع فيا:صباح النور مامي...
-وي..صباح النور من غير بوسة ولا حضن...؟!
قام و جا لين عندي..حضني و جلس جمبي..قلت:من متى حبيبي صاحي...؟!
-مادري..من أول...!
ابتسمت:طب فطرت...؟!
-مممممم..سويت كورن فليكس...!
مسحت على شعرو:بالعافية حبيبي...
مادري ليه حسيت بالخوف..إني أقوم و ألاقي سعود مشغل التلفزيون و ماكل فطورو..بالعادة كان يجي و يصحيني...!
قلت:طب مامي لمن تفطر ما رح تفطر معاها...؟!
ابتسم:أنا سويت شويييييييييييية كورن فليكس عشان لمن تقومي آكل معاكي...!
ابتسمت بسعادة:يسعد قلبك يا قلبي..ايش تبغى تفطر...؟!
طالع فيا:لا أمامي مو دحين..شوية خلي الكورن فليكس يروح من بطني و بعدين آكل معاكي...!
ابتسمت:حبيبي أنا مني جيعانة..متى ما إنتا جعت كلمني...!
حضني و حط راسو بالخفيف على بطني:ماما إنتي حلوة...!
قلت و أنا أمسح على جسمو:عارف إنك زمان كنت تقولي إنتي حولة...؟!
شهق بصدمة طفولية:من جد...؟!
هزيت راسي:آها...
-وي..ما كنت أعرف أقول حلوة...؟!
ابتسمت و هزيت راسي:ما كنت تعرف تقول..
-يا الله كنت نونو زي النونو إلي هنا...
قالها و هوا يأشر على بطني...!
قلت و أنا أمسك يدو:ايوة زي النونو إلي جوتي..حط يدك و حس...!
و قعدت أحرك يدو و هوا يقول:ماما متى يجي النونو...؟!
-مممممم..بعد شهرين إن شاء الله...!
باقيلي أعتقد شهرين إلا..بس ما فيا أشرح الـ "إلا" لسعود...!
-طب ايش اسمها...؟!
-مادري..إلي ييسرو ربك حلو...!
-أنا أبغى اسم حلو...!
ابتسمت:أكيد حلو..أخت سعود لازم يكون اسمها حلو...!
-ينفع لورا...؟!
-ايش لورا دي...؟!
-ماما..همتارو !!
-آآآآه..البنت إلي عندها همتارو..لورا..ايوة عرفتها..لا ما ينفع.أبغى أسماء عربية قوية...!
سعود قعد يتكلم و يقترح من إلي يعرفو و أنا سرحت أفكر في اسم..طالعت في سعود بعد ما جاتني فكرة شريرة..همست في أدنو بشي فبعد عني بحماس و قال:الله..حلو !!
-بس هدا سر بيني و بينك..لا تقول لأحد...!
حط يدينو على فمو:ما أقول ولا لأحد...!

^^^^^^^^^^^^^^^^^^^^^^^^^^^^^^

سعود،،،
قلت و أنا أضحك:بشويش عالبنت...
كنت قاعد أكلم أحمد و دوبي سمعتو يخاصم بنتو و يقولها تروح..الظاهر مضايقتو...!
أحمد:ياخي مني..يا بابا بس خلاص...ها..بعدين..بعديييييييييييين..قاعد أقول بعدين...
قلت:أحمد ابعد الجوال و بعدين خاصمها..أنا ايش دخلني أتهزأ معاها...؟!
أحمد:أعرف طفشتك بس معليش...!
و ما سمعت صوت بعدها غير بكا بنتو..يوه..ايش بكاها..لا زود خصام و لا سمعت صوت ضرب و أصلاً أحمد ما يضرب...!
قلت:بسم الله ايش فيه...؟!
أحمد:ولا شي..حدجتها بنظرة بس..ههههه..
-يا مجرم..نظرة الآباء الحمراء...
-اييييييييوة..بس شوف البراءة..قاعدة تبكي مني في حضني..ها..لا حبيبي مو عنك..والله مو عنك..هذا عمو سعود..قاعدة تسأل عنك تبغى تعرف تستحي ولا لأ..هههه...
-ليه ما تستحي مني يعني...؟!
-لا يعني تتفشل إنك سمعت الخصام و لا لأ..بس عادي ما تتفشل منك...!
-هيا ايش تبغى...؟!
سكت ثواني بعدين قال بهدوء:تبغى تنام...!
ابتسمت:جود كانت كذة...!
-مو لو ما اتعاملت مع جود زمان كان والله ما عرفت أمشي حالي معاها...!
قلت بعفوية:ليه وين أمها...؟!
-ها..تعبانة شوية فـ..أنا مضطر أعتني بطفلتنا...!
-ما تشوف شر..اسمع..عندك أي شي جديد فلة...؟!
-ايش تبغى...؟!
-فلم..مسلسل..طفشااااان مرة و ما عندي أي شي أسويه...!
-عندك فلوس...؟!
قلت بسرعة:محتاج شي...؟!
-لا بس لو عندك فلوس و فاضي ما عندك أفكار أو مشاريع روح اتزوج...!
-أحمد فكنيييي...
-أستهبييييييييييييييل....!
-لااا تستهبل..أعرفها حركات نص كم دي..ترموا الكلمة قلك تبغوني أنشغل و أفكر...!
-ترموا؟!،إنتا الظاهر أحد مطفشك قريب...!
-طبيعي..طول عمرهم و هما يطفشوني...!
-ايوةعارف و أنا معاهم..بس الظاهر المدة ذي مكثف التطفيش...!
-جداً...
-يالله يا شيخ..ييسر الله طيب..الواحد ما يدري وين الخير....!
-من جد..دحين ما جاوبتني..عندك ولا ما عندك...؟!
-لو ما عندي يسير عندي...
-ايش عندك...؟!
-ما عندي شي جديد...
-يا شيخ أبغى حاجة ما شفتها...!
-بالله يا سعود..متأكد ثلاثة أرباع إلي عندي ما شفته....!
-طيب بعدين وصلي هيا بطريقة ما...!
-لا إنتا تعال خذها..كم لي ما شفتك...؟!
-من جد..أحس من بعد ما اتناسبنا معد سرنا نشوف بعض...!
-لإننا اطمأنينا..سرنا أهل..غصباً عنا كل فترة و الثانية بنشوف بعض في أي مناسبة...!
ضحكت بخفة:هواااا ذا..و كل واحد أخس من الثاني..ما نتصل و لا نسأل...!
-بس نحب بعض...
-نعم...؟؟؟!!!
-نعم الله عليك..حاسك تعبان و طفشان قلت أغدقك بالحنان...!
-اغدق الضعيفة إلي بكيتها..خليك بعيد عني...!
-من ايش خايف..أنا الحمدلله محصن...!
ليش كل الناس قاعدة تدقني...؟!
-و أنا عارف ربي...
بعد صمت ثواني ضحك أحمد بقوة و قال:إلي على راسه بطحة يحسس عليها..أنا دوبي شايف مسلسل و واحد من الممثلين قال ذي الجملة..ما قصدت أدقك بالكلام يعني...!
سكت فقال أحمد:تريد شيئاً...؟!
قلت بهدوء:لأ...
-أوكي..أشوفك على خير..مع السلامة...
-مع السلامة...
و فصلت...
يا الله..كنت قاعد أكلم أخو أحلام...
آآآآآآآآآه..أنا..كنت قاعد أكلم أحمد..أحمد صاحبي..صاحبي من سنين..مو أخو أحلام..أصلاً مين أحلام...؟!
ضغطت المخدة على راسي...
أبغى كل خيال سخيف فكرت فيه يطلع و كل لحظة حلوة اتخيلت حدوثها تطلع..لإنو مجرد التفكير..غباء...!
غباء؟!
الغباء هوا إني قاعد أمثل الصلابة..من يوم ما حسيت إنو فيه إمكانية وحدة توافق و أنا حالتي مشقلبة فوق تحت..كلام جود عنها و عن رأيها "العام" في موضوعي قلب لي كياني..أنام عليها و أصحى عليها..اسم أحلام يتردد عليا كل يوم أربعة و عشرين ساعة...!
و ما زلت أنا متذبذب..ما بين أستسلم و أفصح عن رغبتي بمعرفة المزيد و ما بين أكتم...!

*********************************
الجزء التاسع عشر
(ألهمني يا ربي)


كنت في الجامعة لمن رن جوالي رنة الرسالة..رفعتو و إلي ظهر لي إنو الرسالة من عمو..لحظتها..فقد قلبي دقة من دقاتو..اتفاءلت و اتشاءمت..عشان كده فضلت أروح أطمن على سعود و أقعد معاه و أفطر...!
لمن وصلت لعند سعود و شافني وقف و جا عندي..مدلي يدينو فشلتو و بستو:هلا حبيبي...
و رحت و قعدت معاه في مكان الجلسات و قعدت أفطر معاه..قال:ماما خلصتي...؟!
-لا حبيبي...بقيلي محاضرة وحدة...!
-أول جيتي و خلاص...!
-حبيبي أول كنت مصدعة و مابغا أحضر المحاضرة...!
-طب دحين إنتي مصدعة...!
-بسم الله عليا..لا مني مصدعة..قول كلام طيب !!
-ماما إنتي أكلتي اليوم بنادول...؟!
-ايشبك إنتا...؟!،تبغى تروح البيت يعني...؟!
-لأ..بس مابغا أقعد هنا تاني...!
قطبت حواجبي:ليه أحد قلك شي...؟!
-لأ..بس فيه ولد معفن...!
-ولد معفن..ليه ايش سوا...؟!
-قرفني..مو راضي يمسح خشمو..أعطيتو منديل مو راضي..مسح بيدو و قعد يلعب بالألعاب..وسخها ما قدرت ألعب...!
ابتسمت:خلاص حبيبي يمكن أمو ما علمتو..لا تقعد تتريق و تتكلم عليه...!
كمل أكل من غير ما يعلق و رفعت أنا جوالي و فتحت الرسالة و...
Omg !!

****************************************

سعود،،،
كنت مجنون..مستحيل..مستحيل كنت بكامل وعيي..ايش رسلت أنا..ايش كتبت...؟!
والله ما كان قصدي و لا كنت أعنيها..حتفهم غلط..أنا عارف جود..ما حتفهمها زي ما أنا أقصد..أصلاً ايش كنت أقصد لمن رسلت ذاك الكلام...؟!
حطيت راسي بين يدّيني منتظر الاتصال المتوقع من بعد رسالتي...!
لكن إلي جاني كان رسالة..محتواها ما أعطاني إحساس بأي شي غير سعادة جود...
"أشياء زي كده الجوال ما يصلحلها ^_* "
رميت الجوال بعيد عني..أنا ما قلت إني وافقت..ما قلت إني وافقت..بس قلت أبغى أعرف أكثر عنها..مجرد فضول..ما قلت إني وافقت أو حتى اقتنعت بأفكار جود الملتوية...!
وجع..وجع في كل شي !!
لا و حاطة وجه غمزة كمان..أنا هنا محروق دمي و هيا مبسوطة..ليه مبسوطة ليه؟!
أنا عارف جود ما تختار و لا تُعجب بأحد إلا و هوا يستاهل بس يا عالم فهموها..أنا لو هيا مبسوطة و مرتاحة يكفيني..أولادها أولادي و سعادتها سعادتي..ليش ما تبغى تفهم إني راضي بها جمبي و بس..مني محتاج شي ثاني...!
جود..جود..استوعبي...
يا رب..يا رب يا كريم يسر لأحلام هذي زوج يسعدها و يصونها..ذحين..ذحين يتقدملها و يوافقوا عليه..يا رب..يا رب يا كريم...!
و قعدت أدعي..بصدق و إخلاص لإنسانة..ما أعرف عنها إلا اسمها...!

****************************************

جود،،،
كنت متحمسة..بشكل مو طبيعي..لدرجة علي سأل:"من وين مشرقة الشمس اليوم؟!"
قلتلو:"من الشرق"،و قعدت أضحك و هوا يطالع فيا مصدوم..سعيدة و نشيطة بشكل..و الأهم من هدا كلو إني مرتاحة و واثقة كمان!!
آه يا ربي شكراً..موافقة عمو بس فرحتني..بغض النظر عن موافقة أحلام..لإنو لو ما وافقت معناتو دا نصيب و بعدها يحقلي أستسلم..باعتبار..إنو دي إرادة ربنا..و لو إنو عمو حيكرهني لمدة بسيطة بسبب إحساسو بالرفض بس لو وافقت و اتوفقوا رح يحبني أكتر...!
سعود و هوا يجلس جمبي:ماما..إنتي ايشبك الوم...؟!
-ايشبي...؟!
-مرة طيبة اليوم...
-وي سعود..يعني أنا دايماً شريرة...!؟
ضحك:لا يا ماما..بس مرة فرحانة ما شاء الله ما عصبتي..أبغى أعرف ايشبك...!
-ليه..هوا أنا سايرة أعصب كل يوم...؟!
قال و هوا يهز راسو:لأ بس..تشمبقي كتير...!
-أشمبق ها...
أشمبق يقصد بها سعود أشمق و معناها أعطي نظرة احتقار و أنا ألف وجهي...!
بس هل من جد أنا سايرة أشمق كتير؟!،الأغلب الإجابة حتكون ايوة بس مو على أحد غير سعود و علي..والله صابرين عليا..سعود ما يزعل و علي ما يخاصم..بس لحظة..علي غصباً عنو يتحمل مزاجي..سعود ليه يتحمل..حبيبي هوا..عاقل اسم الله عليه...!
دخل علي الشقة بعد مدة..كان راجع من صلاة العصر..طالع فيا و هوا يقفل الباب..جا و جلس على وحدة من الكنبات و هوا يقول:اليوم مني مرتاح...!
-ليه حبيبي...؟!
فز في قعدتو و قال:شفتي..شفتي..ايش إلي ليه حبيبي..إنتي الفترة الأخيرة سايرة تقولي:خير..ايش صاير؟!
اتخصرت:أقووول إنتا و ولدك..ما شاء الله كل واحد من جهة..دا دوبو يقولي تشمبقي كتير و إنتا تقول إني ما أكلمك كويس...!
قال و هوا يمد يدينو لسعود:عالعموم رجعتي للطبيعي حقك ذي الأيام..معناته مافي شي...!
-علي يعني و بعدين معاك؟!
حط سعود على فخدو و قعد يلعبو..طالع!!،ولا حتى عبرني بنظرة...!
برطمت و قلت بزعل و أنا أقوم:لا تكلموني..ما أحبكم!!
و رحت على الغرفة..أوكي..لازم جدياً أبدأ أفكر بطريقة أفتح فيها الموضوع مع أحلام..بس لا..قبل لازم أكلم عمو عنها..يا ربي..متحمسة..أبغى آخر الأسبوع يجي عشان أكلم عمو..مواضيع زي دي ما ينفع تنقال في التلفون..و بعدين أنا أبغى أخلص كل شي بسرعة عشان قبل ما أولد يكونوا مملكين..والله إني طول الوقت أدعي يتم الموضوع على خير قبل ما أولد..عندي إحساس قوي إنو لو ولدت و هما مملكين ما رح أتعب زي لو ما كانوا مملكين!!
بعد شوية دخل علي عالغرفة و فسخ توبو و علقو..جا بعدها للسرير و اتمدد..قلت باستغراب:حتنام؟!
-لا..بس..أوفففف..أحس نفسي مكسر..لأسباب مجهولة...!
-أمس نمت كويس؟!
-ايوة بس مادري ايش فيني...!
-يمكن من كتر النوم..أمس تراك نمت مرة بدري و كمان اليوم الظهر تعتبر رجعت بدري و نمت لين العصر اسم الله عليك...!
-تعويض الأسبوع إلي فات..كنت ما أنام كويس...!
-لاحظتك..ليه؟!
-طفشاااااااااان..و قرفان من كل شي..أحس روتين قاتل..أبغاكي تولدين بسرعة..ذحين...!
ابتسمت و أنا أحط يدي على بطني:خلاص معد بقي شي...!
طالع فيا:تتحرك؟!
ابتسمت و أنا أطالع في بطني:حالياً لأ...
قرب مني و حط أدنو على بطني و قال:لا تتحرك...
-قبل شوية ما اتحركت...
-بس ذحين تتحرك..جربي حطي أذنك..ولا ما تقدري..حطي يدك حتحسي؟!
طالعت فيه و قلت بابتسامة و أنا مقطبة حواجبي:علي..تراها جوتي!!
ضحك بخفة و هوا يرفع راسو:نسيت!!
اندق الباب و كان سعود إلي دخل و هوا ماسك بيد وحدة الجيم بوي..دخل و قفل الباب..جا و جلس فوق السرير عندنا..قال:طفشان!!
قلت و أنا أرجع شعرو ورا أدنو:ليه حبيبي..ليه طفشان؟!
بوز شفايفو و ما رد فقال علي:ايش فيك...؟!
-أبغى..
و رجع سكت..قلت:ايش تبغى حبيبي...؟!
قال بحيرة:مادري..
-ايشبك..تبغى تخرج..تروح محل معين؟!
-لأ..
-أجل ايشبك...؟!
رفعو علي و حطو على فخدو:عادي..طفشان زي ما أبوه طفشان..صح سعود...؟!
-إنتا طفشان يا بابا...؟!
-ايوة طفشان مررررة..أبغى يصير شي حماس..دوبي قاعد أقول لأمك تولد بسرعة...!
-هيا ماما لمن تولد يسير حماس...؟!
-ايوة زي لمن جيت...!
-أنا سويت حماس...؟!
قلت:طبعاً حبيبي..مرة فرحنا لمن جيت..كان أحلى يوم في الدنيا...!
ابتسم:من جد...؟!
قلت:علي وين الصور حقت سعود...؟!
-كلها في ميموري الكاميرا حقتك...!
قلت:سعود قوم جيب الكاميرا حقتي من الدولاب و علي جيب اللاب توب حقي...!
طالع علي فيا:وإنتي يا برنسيسة...؟!
ابتسمت:أدعيلكم بالتوفيق...!
قال سعود و هوا يتوجه لنا بالكاميرا:بابا..الرسول كان يساعد في البيت حقو..لا تستحي..قوم...!
قام علي:من مين أستحي..من زوجتي و ولدي..بس أنا مالي مزاج أقوم بس حقوم عشان ذكرك للرسول صلى الله عليه و سلم و لا ما كان قمت..أصلاً قمت عشان بس لا أكسر مبدأ من المبادئ إلي تحشرها هاذي المثالية في راسك...!
قال آخر كلمة و هوا يحط اللابتوب قدامي..ابتسمت و أنا أرفع شاشتو:شكراً..مالو داعي تبرر الخير إلي تسويه...!
خرجت الميموري من الكاميرا و دخلتها في اللاب توب..فتحتها و بدأت أدور على جهة صور سعود و هوا بيبي...!
قال علي:خلينا نتفرج عالصور من البداية...!
قلت و أنا أرجع للبداية:أوكي...
و لمن فتحت أول صورة قال علي:يييييييييه..بزرة..
-لو سمحتوا من غير تعليقات..بعدين البزرة دي هيا بغيت تموت عليها...!
قال سعود:ماما أول وريتيني صورتك..إنتي حلوة حتى زمان...!
بستو:حبيب مامي إنتا..مو أحلى منك...!
قلت:الصور الجاية كلها بايخة..خليني أشغل الفيديوات...!
شغلت فيديو الحفلة إلي جبلي فيها عمو الكاميرا و قعدنا نتفرج و نضحك على هبلي و هبل عمو وقتها..قلت:والله لو يدري إنك شفتو...!
-بس والله مرة كان غير..حتى وجهه..أحس ذحين صاير نكدي...!
-حبيبي هوا من الوحدة...
قال علي بنرفزة:هوا إلي عاجبه الوضع..لو يبغى بيلاقي...
قلت في محاولة لإغلاق الموضوع:الله يرزقو بنت الحلال!
و بدأت أقلب في الصور..علي لمن ينفتح دا الموضوع يتنررررررررررفز..يقول إنو عمو هوا الغلطان و أياً كانت أسبابو رح يلاقي لو يبغى...!
و في كلام علي..شي من الصحة...!
سعود:ماما..أنا..ويني...؟!
خرجت من الصورة إلي كنا فيها و قلت و أنا أدور على فيديو معين:علي فاكر لمن كان يبربر...؟!
ضحك علي:ما قد وريتيه...؟!
-مادري واله ..ما أعتقد..كم لي ما فتحت الكاميرا...؟!
لقيتو..و شغلتو..كان فيديو لسعود قاعد يبربر فيه..كان نونو مرة ما كمل كم شهر...!
سعود بدهشة:هدا أنا...؟!
-ايوة حبيي...
كان سعود يطالع بحماس و خدودو محمرة أما علي فكان يضحك و مبسوط و يعلق كل ما اتذكر حاجة...
اتذكرت أنا كمان شي..داك اليوم كان حلو..لأسباب كتيرة..كنت فيه أحاول أرضي علي..لإني زعلتو..من غير ما أحس..اتكلمت و قلت شي من غير ما أدري إنو كان قاعد يسمع..هوا ما عرف إني عرفت لكني عرفت..و كنت أحاول أرضيه بشتى الطرق..حسيت بالذنب قوي يومها!!
اتنهدت و أنا أنفض كل ديك الذكريات من راسي..الحمدلله..أنا لحياتي معنى دحين..دحين قاعدة أعطي مو آخد..أحب و أنحب..أقلق و يقلقوا أحبابي عليا..الحمدلله..يا ربي لا تغير عليا بعد ما أنعمت..يا رب...!
سعود:ماما!!،إنتي صغيرة..
طالعت في الصورة إلي فاتحينها و ابتسمت:ما قد وريتك؟!
-ماما إنتي ما توريني كل شي..بس هديكا إلي في الأول...
ابتسمت:طب كيف حلوة الصورة...؟!
--ماما إنتي في كل الأيامات حلوة...!
ابتسمت فقال علي:والله جود..طالعي..مو حلوة..كان عندك حب شباب...
طالعت في الصورة إلي كانت وحدة من أحلى صوري و أنا صغيرة..كان شكلي فيها حلو و نفس الصورة متقنة و ثابتة..قلت:وين حب الشباب..أصلاً الحمدلله ما كان عندي..إنتا إلي كان عندك مو أنا...!
-متى شفتيه....؟!
-مادري ما شفتو..بس أحس وجهك يركب عليه يكون فيه حبوب زمان...!
-مالت عليكي..والله إني وسيم...!
- أنا قلت غير كده..بعدين الأولاد كلهم تطلعلهم حبوب أول ما يبلغوا مو زي البنات ممكن تجي في ظهورهم أو صدورهم...!
-وااااه..تجي في أجسامكم...؟!
-يب..أحياناً كمان يطلع الدهن في الشعر..هيا أصلاً الحبوب كلها دهون لازم تطلع..و عاد على حظ الوحدة في أي مكان يطلعلها..بس ترى كمان الاهتمام لو أثر..يعني الدهون تتركز في محل واحد بس تطلع في الباقي و لو بنسبة بسيطة..بنات يعرفوا يتعاملو معاها و بنات لأ...!
-إنتي تعرفي...؟!
قلت بغرور:ايوة الحمدلله..أعرف...
-يااااا رب سترك..محد يقولك شي..
-والله كنت أعرف...
-طيب خلاص...
و قعدنا نحاول أنا و علي نلهي سعود و نخرجوا من موود الطفش..و على كل حال..أنا و علي اتفقنا نسوي تجديدات في حياتنا بعد ما أولد..حنضيف أشياء في البيت تعمل تغيير بس ما تكلف كتير لإنها مي شقتنا ولا بيتنا الدائم..كمان أنا لازم أغير من شكلي..كمان لازم...
لازم؟!،اللازم دحين إني أخلص موضوع عمو و أنهيه..قبل ما أولد!!

****************************************

كنا في بيت أهل علي..قاعدين قعدتنا المعتادة و كنت من غير ما أحس أراقب أحلام..و فجأة..حسيتها شريرة..مو شريرة..بس حسيت إنو شكلي حيطلع سخيف لو كلمتها..يا ربي..مادري..أنا استخرت و قلبي يقولي بقوة إني ما أخرج من هنا إلا و أنا مكلمتها..بس كيف..و متى؟!
فجأة أُلهمت بشي..أحلام تنام بدري..و نادراً ما تكمل معانا السهرة..يا دوبك تتعشى و أحياناً ما تتعشى لو اتأخر العشا!!
خلاص..لمن تطلع أنا حلحقها بعد مدة و أكلمها..بس ايش حيكون عذري لو سألتني عمتي وين رايحة..آه..ايوة..حقولها أبغى أسألها عن فلم..لالا ايش السخافة..حتقولي صفاء عندك تعرف كل شي عند أختها..طب..آه..حقولها وحدة في الجامعة كلمتني عنها و طلبتني رقمها..و إنو أنا ما أعطيتها خفت تكون كدابة فبسألها عنها و..
آآآآآه..ليش فجأة أحس كل أفكاري و خططي سخيفة؟!
يا ربي..ألهمني بشي ما يشكك أحد..مابغا أحد يعرف أو يحس بإني داسة شي..كفاياني علي إلي عينو تقولي كل يوم:"ايش وراكي؟!"
قالت عمة إنوا العشا جاهز و قاموا البنات بالتالي يغرفوا و يساعدوا أمهم أما أنا فكنت أرتب السفرة بما إنو عمتي أصدرت قرار بإنو ما أتحرك..مادري ليه بس تقول إنو شكلي تعبان و عمة لمن تقول شي لازم يتنفذ ولا حتستخدم أسلوب السطلة الأموية..عاد اتخيلوا كيف !!
جلست أحلام آخر وحدة عالسفرة و هيا تقول:أبغى..أناااام..
علي:أصلاً متى ما كنتي تبغي تنامي...؟!
عمي:سمي عالبنت..صاحية من الفجر...!
علي:كمان إنتي مع نفسك..خير صاحية من الفجر..ايش عندك...؟!
طالعت أحلام فيا:سكتيه..ما فيا حيل أرد...!
طالعت في علي:علي..
-مابغا..ما بطالع...
ضحكت فقالت عمتي:اهجد عن بنتي و زوجتك...
علي:بنتك و فهمنا..زوجتي ليش..ايش سويت لها...؟!
عمتي:ولا شي..بس ناوي...
علي بفجعة:بسم الله أمي..كيف تعرفي...؟!
-من عيونك أعرف...!
عمي:أمكم رومانسية و حساسة...!
عمي كان يتريق و أنا بصراحة ما أرضى على عمة..قلت بقهر:طبعاً لازم تكون حساسة لعيونكم..مو ما شاء الله النظرة ذي متوارثة..منك يا عمو لأولادك إلي هما أ ولادها..إلي هما أزواجي...!
حسيت بنظرة غريبة..التفت و كان علي يطالع فيا بنظرة مرعبة..قلت:ايش فيه...؟!
صفاء:قلتي أزواجي...
انتبهت و قلت:وي..قصدي..أزواجي أنا و زوجة أحمد..قصدي عمو أحمد..لا تسويلي سيرة...
علي:هيا ايش سويت ذحين...؟!
عمة:أقلقتها..خليها تتعشى...
علي بطفش:طيب...
ابتسمت و أنا أشوف سعود يكلم لينا و يقطع لها من اللحم إلي في صحنو...!
قامت أحلام:الحمدلله..تصبحوا على خير...
قلت:حتنامي...؟!
-ايوة..
-آه..طيب..تصبحي على خير...
-ايه..كنتي تبغي شي...؟!
-ها..لالا..بس كنت أبغى أسألك عن رواية..لو حلوة ولا لأ...
-ايش اسمها...؟!
-مادري..بس حلاقيه لو دورت عليه أون لاين..بس بما إنك تبغي تنامي...
-عادي..ما حنام دحين..حقرأ أول..تعالي...
علي:ايش هوا الكتاب...؟!
التفت لعلي:مادري..مني فاكرة اسمو ولا اسم إلي كتبو أو إلي كتبتو..أنا فاكرة إنو لفت نظري اسمو بس مادري ايش هوا...
جات عندي أحلام و مسكت يدي:طب تعالي..ما حنام علطول..تعالي عادي...
قمت و رحت مع أحلام و أنا أسمعهم يكملوا كلام..طلعت الدرج و قلبي يدق بقوة..مادري ايش حقول..مادري كيف حبدأ..لكن لازم أتكلم..لازم ما أطلع من هنا إلا و أنا مكلمتها..وافقت ما وافقت..مو قضيتي..المهم أقولها!!
دخلنا لغرفتها و اتوجهت هيا علطول للابتوبها..فتحتو و قالت:تعالي..ايشبك؟!
حكيت راسي و قلت بتردد:أحلام..أنا..مابغا أسألك عن كتاب...
طالعت فيا باستغراب:ها...
-أنا أبغا أكلمك في موضوع..هوا..هوا ما ينفع بالجوال و ما ينفع قدام أحد و...
قاطعتني بتوجس:ايش فيه جود..علي فيه شي..إنتي فيكي شي...؟!
-لالا...
-سعود فيـ...
قاطعتها و أنا أتقدم منها و أجلس عالسرير:لا أحلام..ما فينا شي...
-أجل ايشبك...؟!
-أنا أبغى آخد رأيك في شي يخصك...
-خير...
لمن حسيت بتوترها و استغرابها هديت..كأنو ثقتها و هدوءها انتقلوا ليا و أديتها أنا توتري و ترددي!!
-خير إن شاء الله..بس قبل..أبغاكي توعديني ما يطلع الموضوع لأحد..عشان لو سار شي لا سمح الله..محد يعرف إلا أنا و إنتي..و أنا ما اخترتك أكلمك في دا الموضوع إلا و أنا واثقة منك...
-جود..من جد خلعتيلي قلبي..ايش فيه...؟!
-أحلام...
سحبت نفس و طلعتو:أحلام أنا أبغى أخطب لعمو و...
وقفت كلام لمن شفت أحلام تقطب حواجبها..قلت بسرعة:أحلام لا تهتمي بإنو عمي..أنا...
قاطعتني بهدوء و صوت عميق:كملي..

سحبت نفس تاني و قلت:عمو عندو مشكلة..أنا..
أطبقت شفايفي و سكت و أنا أطالع لتحت..
رجعت أطالع في أحلام و أنا أقول:لمن كان عمري عشرة سنين..آآه..أحلام إنتي عارفة عمو أكبر منك و لسه مو متزوج و مو راضي يتزوج..هوا..أنا قبل مدة اكتشفت ليش..من كلام كان هوا كاتبو.."دمعت عيني"..و..و..
رجعت أخفضت بصري و أنا أحس بالصعوبة..قالت أحلام:و ايش...؟!
قلت من غير ما أرفع بصري:لا تزعلي مني أو تفهميني غلط..أنا مني شايفتك ناقصة أو شي..في الحقيقة عمو هوا إلي ناقص و.."طالعت فيها"..أحلام أنا مابغا لعمو أي وحدة..لإنو أي وحدة لو ما وافقت عليه ما حتسكت..إنتي الوحيدة إلي أنا واثقة إنها رح تسكت حتى لو ما حصل نصيب..إنتي الوحيدة إلي..إلي..
قالت بصدمة:جود عمك يبغاني..يبغى يخطبني؟؟؟
قلت بسرعة:أ...
قاطعتني بإنزعاج مفاجئ:جود أمي و أبوية عندك..تكلميني أنا ليه...؟!
-لإنو..أحلام اسمعيني..عمو عندو مشكلة..أبغى أعرف أنا أول تقبلك لهدي المشكلة بعدين رح يجي هوا رسمي..أصلاً أصلاً عمو موعاجبو الوضع..مو عاجبو إنو أجي أكلمك بالدسة بس أنا أصريت لإني..
-ايش مشكلة عمك...؟!
-أنا لمن كان عمري عشرة سنين..عمو سوا حادث و..سار..يعني..هوا سار معد يجيب أولاد...
قالت بصدمة:ايييش؟؟؟؟!!!!
-هوا..
-جود عمك عقيم؟!
مسكتها:أحلام وطي صوتك..خليني أكمل..اسمعيني..أنا عارفة يمكن تنصدمي..صدقيني أنا انصدمت أكتر منك بس هوا وضع لازم أتعايش معاه..بليز خليني أكملك..و سوي إلي يعجبك بعدها...
-جود إنتي عارفة ايش قاعدة تقولي...؟!
-هوا مو عقيم..هوا الدكتور قلو صعب تخلف...
-و ايش تفرق..متى سار الحادث و كيف؟!
-لمن كان عمري تسعة أو عشرة سنين..لمن اتخرج من الجامعة...!
-ليه..قصدي كيف..هوا إلي سواه..كان لحاله ولا معاه أحد...؟!
-كان لحالو..هوا..هوا راح استراحة بعيدة شوية..أصحابو كانوا مسوين احتفال..وكانوا بيناموا..عمو ما يحب فرجع لحالو ما نام معاهم و سار الحادث في الطريق...!
قطبت حواجبها:استغفر الله..طب و كيف سار ما ينجب..كيف..قصدي ايش قال الدكتور و..
-مادري..هوا بس قلي إنو الدكتور قلو صعب تخلف..ما كلمني ولا قلي التفاصيل...!
اتنهدت و قعدت تستغفر و هيا منزلة اسها..كانت متعاطفة مع عمو و الظاهر نسيت إلي قلتو في البداية...!
حطيت يدي عليها:أحلام..لا تفهميني غلط و خدي وقتك في التفكير..أنا زي ما قلتلك اخترتك إنتي لإنك حتسكي و ما رح تتكلمي عن الموضوع لو ما حصل نصيب...
رفعت هنا أحلام راسها و قالت مقاطعتني:و إنتي يا جود تبغيني آخذ عمك...؟!
-أنا قاعدة أعرض عليكي الفكرة..
قاطعتني:و ايش إلي يجبرني يا جود..أنا مني فاضية لدرجة إني أستنى أي واحد يجي و يدق الباب..بعدين مستحيل أعطيكي كلمة من غير علم أمي و أبوية..كبرت صح..اتأخرت في الزواج صح..لكن مستحيل أتنازل عن مبدأ من مبادئي عشان تجربة ما أعرف رح تنجح ولا لأ..ما أعرف نفعها حيكون أكبر من ضررها ولا العكس...!
-مو عشان كده..عشان منتي فاضية..عشان عندك نشاطات و اهتمامات حفظت عقلك و كيانك عن البلاوي إلي يسببها الفراغ و الوحدة..عشان واثقة منك و من عقلك..أنا ما أقولك تخبي عنهم علطول..لو أعطيتيني موافقتك حقول لعمو عشان يتقدم رسمي..أنا لو كنت متأكدة إنو رفضك ما حيأثر على علاقتي بكم ما كنت دسيت و جيت كلمتك لحالك..إنتي لو رفضتي..علاقتي بعلي رح تتأثر، علاقة عمو بأحمد كمان رح تتأثر و علاقتنا أنا و عمو و جدة بكم كعيلة رح تتأثر..أنا مابغا دا الشي يسير..كمان عمو ما يبغى أحد يعرف بموضوعو..ما يبغى أحد يعرف بمشكلتو إلا الإنسانة إلي حيتزوجها و إلي هيا الوحيدة إلي رح يأثر عليها شي زي كدة..بعدين محد يدري..يمكن ربي يرزقو أولاد..الخلفة رزق و الرزق عند الله...
-ونعم بالله..لكن في شي اسمو منطق..لو اتزوجت واحد و اكتشفت بعدين إنو ما يخلف أقول الرزق على الله لكن إني آخذ واحد ما يخلف عشان يمكن ربي يرزقو..وين الأخذ بالأسباب في تصرف زي هذا...؟!
سحبت نفس أقوي فيه نفسي..أنا قلت إني حتحمل أي شي عشان عمو..و أحلام و إن كان كلامها يأثر فيا لكن من حقها..تقولوا في وجهي ولا من ورايا...!
-أحلام إنتي زي ما قلتي منتي مجبورة..وافقتي ولا ما وافقتي مافي شي مو كويس رح يسير..أنا وعدت عمو..قلتلو لو تم الموضوع رح تتحسن حياتك و تسير أحلى..لو ما تم رح تفضل زي ما إنتا..إنتي استخيري و اسألي ربي..الواحد ما يدري وين الخير..لو رضيتي قوليلي..لو ما اقتنعتي لعد تكلميني في الموضوع..لإني ما رح أتحمل رفضك زي ما عمو ما حيتحمل يسمعها مني..أنا قلتلو إنو لو ما وافقتي ما رح أكلمو في الموضوع مرة تانية..علاقتي بكي ما أبغاها تتأثر..و أقول بكي عشان أنا أصلاً ما أبغاكي...
-ما رح أقول لأحد..من ستر على عبدٍ في الدنيا ستر الله عليه يوم القيامة..و إنتي إلي لا تزعلي من كلامي..بس ما أعتقد فيه مجال للمجاملة في مواضيع زي كذة...!
وقفت:صح معاكي حق..تصبحي على خير...!
و خرجت من الغرفة من دون ما تستوقفني !!
عند بداية الدرج كانوا علي و صفاء قاعدين يتكلموا..طالع علي فيا مستغرب:ايشبك...؟!
-ها..هههه..لا بس..أول مرة أحلام تفتري فيا..طردتني من الغرفة...!
قالت صفاء:يووووه..أحلام رعب لمن تبغى تنام...!
علي:صح..أتذكر أول كعشتك...!
جود:وي!!
صفاء:وجع..بس لا كنا صغار..هيا كانت أولى متوسط..و أنا كنت لسة بزرة..بس برضو وجع...!
قلت و أنا أتجه للدرج:لا تتوجعي كتير..علي دحين ماشيين...؟!
صفاء:لااا اقعدوا...
-قولي لأخوكي..أنا مالي شغل...
-كذابة..أنا إلي مالي شغل..يا صفاء مرة أخوكي مستبدة..ما دام سألت لازم نروح ذحين...!
نزلت و أنا أقول:ايوة..هيا ما تنبلش بعصبيتك قبل النوم..أنا إلي أبتلي فيك بس...!
صفاء:مين قلك..مين قلك..ترى مرة قد لقاني أون لاين و قعد يهزأني..و اكتشفت بعدين إنو نعسان...!
علي:بس ما سكتيلي..قعدتي تسبين...!
صفاء:حتى أنا كنت نعسانة!!
قلت:هوا طبع فيكم..خلاص..أصلاً مادري واحد نعسان ليش يدخل النت..مني فاهمة فكرة نعسانة و برضو أشتغل..لا و شي مو مهم كمان...!
وصلنا للدور الأرضي و جلسنا..طبعاً كنت سرحانة..شغالة عالأتوماتيك..أرد مادري ايش أقول و في الأغلب أهز راسي و أبتسم!!
و بدل ما ينزاح عني هم زاد هم!!

****************************************

سعود،،،
تتوقعوا جود كلمتها أمس؟!،هيا قالتلي لو وافقت حقولك..لو ما وافقت ما حفتح لك الموضوع مرة ثانية..خلاص لمن تجي اليوم حشوف حتكلمني ولا لأ و كمان يمكن تكون أصلاً ما فتحت الموضوع معاها..يمكن كانت البنت مشغولة أو طفشانة فما قدرت تفاتحها في موضوع زي كذة..يمكن..محد يدري...!
يوووووه و أنا ليه مهتم..أصلاً من البداية مني مقتنع بالفكرة..أنا يا آخذ وحدة زيي بنفس مشكلتي ولا بلاش..خلي المستصحين للمستصحين..حرام أظلم وحدة على حساب سعادتي...!
و أحسن ما توافق..عشان ما أحس بالذنب..و هيا الله يوفقها و يرزقها إلي يسعدها..والله إنها بنت ناس و متربية..هيا أعقل أخوات أحمد على حسب ما يقول..كمان جود تقول إنها أحسن متعلمة غير متزوجة قد قابلتها...!
دخلت للبيت من صلاة العصر و أنا مو قادر أبعدها عن تفكيري..الفترة الأخيرة ساير سخيف..بس أفكر في ذا الموضوع..و معد أقدر أشيلو من راسي..كأني واحد مو شايف خير..مين يوم ما انقالي اسم وحدة مو قادر أوقف تفكير...!
أوووووووهـ !!
رحت لغرفتي عشان أغير ملابسي..أكيد جود شوية و تجي...!
خرجت للصالة و ما مداني أجلس إلا و الجرس يندق..قمت و فتحت الباب بعد ما شفت جود و وجه علي و سعود...!
كالعادة سعود أول من سلم عليا..اتعلق فيا زي دايماً..بستو و أنا أبتسم:كيفك يا بطل...؟!
-الحمدلله يا بصل...!
-وي سعود!!
-بابا يقول!!
قفل علي الباب و هوا يقول:يا ذا البابا..أي شي غلط هوا السبب...!
نزلت سعود و أنا أقول بغلاسة مفاجئة:لإنك كلك على بعضك غلط...!
علي:ما برد عليك...!
و دخل لجوة عند أمي..سلمت على جود و أنا أقول:من متى و علي يقصر الشر...؟!
قالت و هيا تفسخ العباية:نعسان..من الفجر صاحي...!
-يستاهل..ليش يسوي صحي...؟!
-مادري عنو..لقى فلم و اتحمس و ما رضي ينام إلين يمكن الساعة تمنية..بعدين قال لو نمت ما حقوم إلا الظهر فقعد صاحي...!
-آآه..
و رحنا دخلنا لجدة و هناك سلمت على علي بالغصب..هههه..أهبل علي لمن يزعل..يسير زي الأطفال...!
علي..؟!؟!
شديت على نفسي لمن انتبهت إني رجعت أفكر في علي بطريقة ثانية..علي زوج جود..مالي صلاح أخو مين!!
استغفر الله العظيم..كل شي يلف و يدور حولها..كل شي...!
جا سعود عندي و قال بحماس:عمو عمو..
-ها...
-اسمع اسمع...
و قعد يحاول يقول:
Amm..amm..I..I like playing..aaa..video games
تابع بحماس:عمتو أحلام علمتني...
-آه.."ابتسمت"..ما شاء الله..طب تعرف ايش يعني...؟!
-ايوة..يعني ألعابُ الفيديو...
ابتسمت عشان لا أحبطو و أنا في نفسي قاعد أقول:حتى سعود سار يلف و يدور حولها..الله يستر لا كمان علي يرجع يتكلم عنها ذحين!!
من جد..من جد قرفت..أنام و أصحى على نفس الموال..نفس التفكير ما يتغير..قمة السخافة و التخلف..حياتي سارت كلها تفكير في الارتباط..أنا مادري كيف الشباب إلي كل همهم الزواج عايشين و متحملين نفسهم...!

^^^^^^^^^^^^^^^^^^^^^

جود،،،
حسيت للحظة بالحقد على سعود..حسيتو نطق اسم أحلام في وقت..مادري بس جاني إحساس إنو عمو حيقوم على سعود ضرب...!
طالعت في عمو..آه يا عمو..أنا عارفة..أكيد على نار و ما أقدر أكلمو..هوا عارف إنو لو ما وافقت ما حقولو..تلاقوه دحين يحسب إنها رفضت..هيا رفضت؟!،من جد مادري..بس إن شاء الله يحسبني ما كلمتها لسه..و إن شاء الله ما يسألني:"كلمتيها ولا لأ؟!"،وقتها حتوتر و لو أنا اتوترت عمو ايش يسوي..ما ينفع كلنا خايفين و متوجسين..الحياة ما تمشي كده..لازم نشد على أنفسنا و ندور على سعادتنا و راحتنا..لو قعدنا بآدابنا و مثالياتنا ما حنعيش..حنتعب و أنا..تعبت من التعب...!
يا الله كيف زواجي و السنين غيرتني..غير..غير لمن يكون عند الواحد عيلة لازم يحافظ على كيانها..يسير أقوى و يتنازل عن مبادئ و قيم كان متمسك فيها في حياتو قبل ما يتزوج..ما أقولكم اتغيرت تغيير شامل..جود هيا نفسها جود..بس اتنازلت عن كتير مثاليات كنت متمسكة فيها..زي إني ما أكلم أحد لو زعلني..زمان كان لا يمكن أتناقش مع أحد في مشاعري..دحين أغصب الناس يسمعوني..زمان كان لا يمكن أقول لأحد إني محتاجة مشاعر..لمن اتزوجت حسيت إنو لازم أتكلم..أعبر عن احتياجاتي بكل صراحة و ثقة لإنو الحياة كده..الناجحين كده..يكلموا الناس في إلي يبغوه و يرموا بردود فعلهم المتوقعة عرض الحايط..هوا كده..الحياة كده!!
عمو:علي أمس شفت أحمد...؟!
علي:لأ...
-متى تشوفو أجل..لمن إنتا ربوع و هوا خميس..متى تشوفوا بعض...؟!
-والله ايش أسوي..عشان زوجاتنا ياخذوا راحتهم..بعدين هوا المفروض إن اليوم تكون زيارة أهلي بس أنا ما أحب الحبسة..بعدين ما أقدر أقعد مع أمي و أخواتي..متى أقعد معاهم و متى أحمد يقعد معاهم لما زوجاتنا فيه...؟!
-شوفولكم صرفة..آخر مرة كلمت أحمد يقولي كيف علي!!
ضحكت أنا بخفة فطالع فيا علي:طالع..تضحك..كلو بسببك أصلاً...!
-والله..محد قلك تتزوج..اتحمل...!
-اسكتي..والله لو مو حامل كان رديت عليكي...!
ابتسمت و قال عمو:خليها تضحك..ايش حارق رزك..ليش ما تبغاها تضحك...؟!
-وليش تضحك..ايش إلي يضحك...؟!
قلت:ولا شي يضحك..آسفة...!
سعود:mom..ig..igroning is the best
ابتسمت لسعود:صح حبيبي صح..ignoring is the best
و شديت على "اقنورنج" عشان أصحح النطق لسعود من غير ما يحس...!
علي:سعودوه..أنا ما قلت تتعلم لغتك أول و بعدين لمن تكبر تتعلم انجليزي...!
عمو:خليه..القوانين و تحديد الأوقات حيخرب عقلو..هوا ذكي و يلقط الكلمات بسرعة..لا تقمعوا...!
علي:ياخي الولد اتصرع..أحلام من جهة و جود من جهة..ما يسير..عربي و انجليزي و فرنسي..حرام..أول شي العربي يثبت عنده بعدين...!
قلت:صح..هوا إلي مو شاطر في لغتو ما يقدر يتعلم لغة تانية بس دحين صغير..عادي..المشكلة تكون لمن نعلمهم حروف و كتابة و قراءة..دحين إلي قاعد يسويه حفظ بس...!
عمو:ايوة الله..كده ممكن يفيدو..يقوي الحفظ حقو...!
سعود:دحين إنتوا قاعدين تتكلموا عليا و تفكروا فيا...؟!
علي:شفت كيف..شفت كيف إنتا مهم...؟!
-بس إنتوا قاعدين تتكلموا عني وأنا..لسه..ما ما..ما قلت ولا حاجة..أنا بالكيفي..أنا سعود مو إنتوا..أنا أتكلم!!
جدة:صادق..صادق الولد..يالله..يتجادلون عن الولد قدامُه..شي!!
ضحكت أنا:جدة محنا قاعدين نتجادل..قاعدين نناقش قضية...!
و الحمدلله دخلت جدة معانا في الهرجة..من يوم ما طاحت معد سارت تتكلم كتير..يا رب تحسن الحال بس...!

****************************************

أحلام،،،
ما زلت مصدومة من إلي سار أمس..مني قادرة أقول لأمي لإني وعدت جود..كمان مني قادرة أفكر لحالي..كنت في كل شي أشارك أهلي أو على الأقل أمي..لكن ذحين حاسة إني ما حقدر أكلمها لإنها ببساطة حتقول لأ..و لو ما قلتلها إنه ما يجيب حكون أكذب عليها و ببساطة أكبر..أنا ما أقدر أكذب على أمي...!
جود فجعتني و صدمتني..خلتني متشتتة بين أفكار كثيرة..ما بين زعلي لإنسان كويس اكتشفت إنه ما يخلف..و ما بين زعلي لإني حسيت إن جود متوقعة إني أوافق..و ما بين صدمتني لإن أحد جا خطبني..أنا لأسباب كثيرة ما أعجب أحد..أولها إني سمرا..و لمن أحد يتنااااازل و يسأل عني و يكتشف إني متعلمة و أهلي تاركين ليا الحرية إني أكمل و أشتغل يبعد..و لمن يكتشفوا إن ليا شروط مستحيل أتنازل عنها ينصدموا..و كأن الطبيعي إني لازم أرمي نفسي على أي واحد يجي..مادري كيف يفكرون..مادري...!
اتنهدت و أنا أفكر إني لازم أفكر في الموضوع بجدية..أنا بصراحة مني مستعدة أضحي..أصبر و أصبر و أصبر و آخر شي أتنازل عن أمومتي مقابل إني أتزوج...!
للحظة شكرت جود إنها جات و كلمتني لحالي..حسيت رغم زعلي منها نفسي أقولها شكراً من قلب..إلي قالتو صح..لو اتقدموا رسمي علطول حتسير حساسيات..لكن برضه فكرة إني أعطي موافقة أو رفض من ورا أهلي مو عاجبتني...!
و بيني و بينكم..الرفض عندي أهون..مادري لكن حاسة بكرامتي ثايرة عليا..فجأة..حسيت بالنقص..حسيت جود واثقة إني حوافق..بس..بس كان فيه في صوتها نبرة رجا..معناته..يمكن..مادري..يمكن..يمكن أنا متحسسة من الموضوع و أنا مادري..برضه مادري!!
أستخير؟!،بصراحة..أحس إني لازم أستخير..في نفس الوقت مابغا..خايفة أستخير و أرتاح و من غير ما أحس أقول ايوة موافقة و بكذة أتنازل عن أمومتي..عن حقي في إنو يكون عندي أطفال و أنا مابغا أتنازل..أنا خايفة..خايفة..
مسحت دموعي إلي كانت طارفة؛ يمكن الخير في إن ما يكون عندي أولاد..يمكن الخير يكون في عم جود مو في أحد ثاني..يمكن..
الحيرة تذبح و الخوف يكبر في قلبي..
غطيت وجهي بيديني و بكيت..
ليش..ليش لازم أحمد ربي إنو جا أحد و خطبني..ليش أحمد ربي إنو فيه أحد فكر فيا..ليش لازم أفرح و ليش حاسة إن الكل يتوقع مني أوافق رغم إنه محد يعرف بالموضوع إلا أنا و جود..و ليش جود اختارتني..يا رب..يا رب ألهمني..يا ربي لا تتركني لحالي..آآآه يا ربي آه...
مسحت وجهي بالسريع لمن اندق الباب..انفتح و كانت أمي..استغربت لمن شافتني..قربت مني:أحلام..؟!
-ايوة..
-تبكين؟!
-ها..لالا بس...
و فكيت البكوة فحضنتني أمي بسرعة:بسم الله ايش فيكي...؟!
من يوم ما لامس راسي صدر أمي ما اتحملت أكثر و بكيت من قلب...!
-أحلااااممم..أحلام يا بنتي ايش فيكي..ليش تبكين...؟!
-مادري..مادري..
-ايش إلي ما تدرين..أحد قالك شي..أحد ضايقك...؟!
-لااااء..محد سوالي شي..بس..مادري ايشبي..أمي مادري ايشبي...
سكتت أمي لثواني بعدين قالت بهدوء:أمس جود قالتلك شي لمن دخلت معاك هنا...؟!
انصدمت لكن مسكت نفسي في آخر لحظة:لا أمي لا..جود مالها شغل...
بعدت عن أمي شوية و قلت و أنا أمسح دموعي:جود كانت تسألني عن كتاب إذا حلو ولا لأ عشان ما تبغى تبدأ شي جديد مهي متأكدة إنو يسلي...
-أجل ايشبك...؟!
-مادري..أمس كنت عادي..لكن قبل ما أنام انكتمت فجأة و اليوم صحيت مخنوقة...
رجعت دموعي للنزول على آخر كلمة فرجعتني أمي لحضنها و مسحت عليا و هيا تقول بهمس:أعيذك بكلمات الله التامات من شر ما خلق..بسم الله عليكي بسم الله..عشان كذة ما جيتيني اليوم أول ما صحيتي..كم مرة أقولك إنتي و أخواتك لا تكتموا لا تكتموا لكن ما تسمعوا الكلمة مني..ما دامك في البيت معايا تعالي و قوليلي...
ابتعدت عن أمي..مسحت وجهي للمرة الثانية..حاولت أبتسم و أنا أقول:خلاص..هيا بكوة كانت محبوسة طلعت...
-هيا تعالي معايا تحت...!
-لا أمي عندي كم شغلة بسويها...!
-هاااا..هذا الغلط..ما دام مخنوقة و مكتومة تقعدي لحالك ليه؟!،عشان تقدري الشيطان عليكي؟!،انزلي يلا معايا..بسبقك..غسلي وجهك و تعالي...!
و خرجت من الغرفة و نفذت أنا كلامها..أبغى أعطل عقلي و قلبي..حنسى كل إلي قالتو جود..
بشكل مؤقت..لو على الأقل!!

****************************************

الجزء العشرين
(اعذريني،،لكنها حياة!!)


جود،،،
خرجت من الرسالة إلي كنت فيها و مسحتها وأنا مفجوعة!!
أحلام مو من جدها..مو..من..جدها...!
طالع فيا علي إلي كان متمدد على الكنبة الطويلة:جودوه...
التفت:ها...
-ايشبك...؟!
-ما فيا شي...!
نط علي فجأة و سحب الجوال و قعد يفتش فيه و هوا يقول:فجأة يتقلب وجهك و إنتي ماسكة الجوال..أفتش ما ألاقي شي...!
-و إنتا دايماً تفتش...؟!
-ايوة..إذا اتقلب وجهك زي كذة..طبعاً بفتش...!
-هدي عادة مي كويسة..لا تخلي دي الحركة شي من طباعك...!
قال و هوا يرجعلي الجوال:واللهِ لو قعدتي ما تقوليلي حتسير عادة عندي...!
-أنا مني مخبية عليك شي..رسايل غريبة من ناس ما أعرفها بتجيني...!
-و من متى و إنتي تنفجعني كل ما جاتك رسالة من رقم غريب...؟!
-لأ..هوا الفترة الأخيرة كترت و سارت مرة وسخة..شي طبيعي حنفجع...!
-مافي في جوالك أي رسالة وصخة...!
-طبعاً لإني أمسحها كلها أول بأول..يطيح الجوال في يد لينا و لا سعود...
-سعود ما يعرف يقرى...
-مو حيروح لمثلو الأعلى لينا و يقولها اقرئيلي...!
-ايشبك طب متنرفزة..أطفال عادي...!
-مني متنرفزة...!
-إلا..عصبيتك زايدة ذي اليومين...!
سحبت نفس:لأ يتهيألك..مو زايدة ولا شي..إنتا بس طفشت من الدوام و من الروتين..دحين تيجي الإجازة و ترتاح...!
-إلا على سيرة الإجازة..إنتي المفروض هذا آخر ترم لكي..ايش حتسوي و إنتي حامل...؟!
-عادي..حاخد وثيقة التخرج و أروح أولد...!
-جود بلا استعباط..ما تدري يمكن تجيكي الولادة قبل..زي في سعود...!
-لا إن شاء الله..تتيسر...!
اتنهد:طيب و بعد ما تتخرجي..ايش حتسوي...؟!
-مادري..آآآآه علي..ايوة صح..أنا فيه استاذة عرضت عليا الإعادة..ممكن كمان أقدم على وظيفة في الجامعة و...
-تحللللللللمي..أنا ما صدقت تتخرجي...!
-بصراحة علي..أشوفو شي ضروري..إنتا ناسي إننا لازم نبدأ دحين نفكر في بيت..أصلو ما رح ينفع نعيش طول عمرنا على الإيجار...!
-يييييييييه...نفس موال أمي مع أبوية زمان...!
-ايوة طبعاً نفس الموال..أنا ما أدري إنتوا الرجال ليش ما تفهموا..والله ما ينفع..طبعاً إنتا مستحيل تبني..حتطفش بسرعة..عشان كده نشتريلنا أرض نخليها..الواحد ما يدري ايش يسير في الحياة بعدين...!
ضحك بسخرية:و ايش حتسويلك الأرض..تجيبلك نص بيت...؟!
-تجيب إلي تجيبو..اسمها شي يقعد..مو فلوس متكدسة في البنك تنصرف في الأخير على خرجات و ملابس و هبل..و أرض نشتري وراها أرض..لين ما بعدين تجيبلنا شي طيب..أما شغلة أولادنا يكبروا و ينحشروا في غرفة..هدي مو عندي أبداً...!
-يا شيخة خليها على ربك..ما تدري يمكن أقدر أبنيلك قصر بعدين..بصراحة أنا لمن بدفع على شي بدفع على شي يعجبني..و ما بآخذ فضلة أحد...!
-هااااا..هدي الفكرة غلط..محد ياخد فضلة أحد بالفلوس..عادي..أعطانا شي و أعطيناه شي...!
-جود أجلي الموضوع لبعدين...!
-المهم دحين..إن شاء الله بعد ما أتخرج أشوفلي أي شي..حتى لو أتعاقد مع أي شركة و أترجملهم أون لاين...!
-واللهِ يا جود ما بكذب عليكي..أنا شغل ما أبغاكي تشتغلي..كل شي تبغيه بيجيكي..لكن شغل لأ..سوي إلي تبغيه..افتحيلك موقع ولا أي شي..علمي الناس فرنسي بس إنك تخرجي من البيت لأ...!
اتنهدت:خلاص ربك يسهلها بعدين..أستخير و تستخير و لو فيه خير ربي حيجيبو...!
جا سعود و مدلي الجيم بوي:ماما شوفي...!
أخدتو منو و شفت،قلت و أنا اأشر على الكلام:يقولك تبغى تسجل؟!..يس ولا نو...!
أشر على "يس" و قال:يس...!
سجلتلو و رجعتلو هوا..أخدو و جلس جمبي فوق رجل علي إلي كان آخرها لاصق في فخدي...!
علي بطفش:يعني يا سعود يعني...؟!
التفت سعود لعلي:عورتك...؟!
-لأ..بس مضايقني...!
قلت:الله..خلي الولد مسكين يقعد...!
-أبغى أقوم...!
قام سعود و راح لغرفتو..قلت بصوت واطي لعلي:كان لازم تقومو يعني...؟!
-أنا مددت رجلي أبغى أرتاح..بعدين بعد شوية بقوم للصلاة..حيكون قدو اندمج في اللعب و حيقعد يقولي:بابا أنا مُتحمس...!
-طيب حتى لو..لمن تسوي معاه كل شوية زي كده يسير بعدين يكره القعدة معانا..دحين صغير و ما يقدر يطنشنا بس بعدين..لمن يكبر...!
-جود...
-نعم...؟!
-ليش إنتي اليوم شايلة هم المستقبل...؟!
-أنا ما رح أرد...!
قال بنفس أسلوبي و هوا يقوم:و أنا حعترف..هذا من ذوقك...!
قمت أنا أشوف سعود و بالي يرجع ينشغل بالرسالة..بايش أرد عليها..بايش؟!
أنا دوبي أنتبه..إني فعلياً..ما عندي أي معلومات عن الحالة !!

^^^^^^^^^^^^^^^^^^^^^^^^^

راحوا علي و سعود الدانوب عشان يمونوا للبيت..اغتنمتها أنا فرصة و دقيت على عمو و أنا حاسة بالخوف..عارفة من حق أحلام و بالعكس عجبني إنها رسلت و استفسرت من غير ما تخجل أو تتتردد..و إن كان زعلت على عمو لكن في شي طمني عليه..إنها سألت معناتو جادة و بتفكر في الموضوع..و إنها ما جاملت معناتو ما حتغصب نفسها على شي و ما حيسير لها بعدين كلمة على عمو..هيا سألت و إن شاء الله حتعرف كل شي..يا رب بس تيسر لها و تيسر لو...!
رد عمو بصوت خالي من أي مشاعر:ألو...
-السلام عليكم...
-و عليكم السلام..هلا..كيفك...؟!
-الحمدلله..إنتا كيفك و كيف جدة...؟!
-تمام الحمدلله...!
قلت في محاولة لفتح موضوع عادي:جدة كيف..اتقدمت في مشيها؟!
-ممم..يعني..منورة تقول إنها سارت توقف لحالها من غير ما تساعدها و تجلس على الكرسي..
-آه..كويس..أنا كنت أبغى أكلمها في دا الموضوع..خليها شوية شوية تبعد المسافة بين الكرسي و السرير..عشان جدة تسير كل شوية تمشي أكتر من غير ما تحس...
-خلاص حكلمها..أصلو أمي كل ما أحاول أمشيها تقولي أخاف أخاف...
-هيا الخطير عليها دحين السيراميك..لو تسير تقدر على الموكيت كفاية...
-و وين السيراميك عندنا؟!..البيت كلو موكيت ما عدا المطبخ و الحمامات...
-ايوة..مو عشان كده بقول كفاية..آآم عمو..كنت أبغاك في موضوع..
قال عمو بنبرة المترقب:خير إن شاء الله...
-لا خير..بسسس..هوا أحلام..طلبت..
عمو بتوتر:ايش..ايش تبغى...؟!
-هوا..يعني هيا تبغى تتطمن من ناحيتك و..
قاطعني بعجلة:ايش يعني تتطمن من ناحيتي...؟!
-يعني..عارف هيا عندها شروط و شوية استفسارات..أنا بس كنت أبغى أعرف لو عادي مثلاً ترسلك رسالة أو حتى ترسلي هيا و أنا أرجع أرسلها لك..عارف الوضع شوية حساس و هيا عندها..يعني..
قال عمو بثقة و هدوء:أي شي تبغاه أنا حاضر و من حقها..تسأل إلي تبغى تسألو و لا تستحي ولا تجامل..هذي حياة مي لعب!!
ابتسمت..كلام عمو ريحني..و إن كان ممكن يعصب لكنو حيلتزم و لو صرخ عليا حقولوا إنتا إلي قلت عادي...!
-الله يسعدك طمنتني..أنا مرة كنت خايفة تتضايق من أسئلتها و استفساراتها...!
-لا عادي..
-أوكي أنا حكلمها دحين و أرجع أتصل عليك..يلا باي...!
-مع السلامة..
و أنهينا المكالمة على كده...!
سحبت نفس أهدي فيه نفسي..انتبهت فجأة..كيف حرسل الرسالة لعمو و أنا مسحتها..ضربت جبهتي بيدي بقهر..كيف أرسلها دحين؟!،أنا مستحيل أكلم عمو مباشرة..حوريه الرسالة و هوا يتصرف..ما أقدر أقولو:"أحلام تبغى تعرف لو كنت قادر ولا لأ؟!
!!!
ما أقدر..هدا رجال و حتى لو حرمة..هدي مواضيع الواحد ما يحب يتكلم فيها..أنا نفسي ما أقدر كيف بعمو؟؟؟!!!
بسسسسس..عمو رجال..رجال من جد..مستحيل يقدم على خطوة زي دي و هوا..
غطيت و جهي بيديني و أنا أبلع ريقي..إذا أنا نفسي مو متقبلة الفكرة..إذا أنا نفسي اتحسست من أحلام..كيف عمو..أنا عارفة من حقها..عارفة إنها ما تبغى تبلي نفسها بواحد مو قادر على الزواج..عارفة إنها مي واثقة من عمو و ما تعرفوا لدرجة تجزم فيها إنو ما حيتقدم إلا و هوا قادر..حتى و لو كان عن طريقي..حتى و لو كانت واثقة مني و من إني أتمنالها الخير..أحلام طيبة لكن مي ساذجة عشان تغفل عن نقطة مهمة زي دي و لا غبية عشان يمنعها خجلها من إنها تسأل..و الأسوء من داك لو إنها تبغى تقرير عن الحالة و هدا الأصعب..يعني إجابة عمو..لو حيجاوب..ما حتكون "ايوة أقدر" و بس..لأ..هدي لسه فيها روحة مستشفى..
أنا من جد..من جد مني عارفة و لا فاهمة أي شي عن حالة عمو..من جد...!
همست من قلب و بصدق:"يا ربي لا تتركني لوحدي"
أنا أبغى ربي ييسر الخير للاتنين وين ما كان و في مين ما كان..بس فكرة إنو الموضوع ما يتم..أحسها صعبة..صعبة عليا..أنا من قلب أبغاهم لبعض..من قلب...!
اتنهدت و أنا أفكر إني لازم أتصل على أحلام قبل ما يحي علي عشان أقدر أكلمها براحتي...!
اتصلت على أحلام لكني قطعت الاتصال بسرعة قبل ما ترد..ايش حقولها دي كمان...؟!
أنا عمو بغيت أقلو بس بعدين غيرت رأيي في نص المكالمة و طلعت مكالمتي لو من غير سبب..أنا صح دايماً أتصل..أعطيه تقرير عن أي شي سار و يعطيني هوا كمان..لكني مع التوتر ما عرفت حتى أبدأ الكلام و الحكايات..آآه يا ربي..تعبت..ايش أسوي..أقولكم..خلاص برسلها رسالة..و حقولها ارسليلي الرسالة تاني..عادي..ما فيها شي..ايوة ما فيها شي..حقولها مسحتها عشان خفت علي يشوفها أو حاجة..و حقولها إنو دا من حقك و عاد..لأ ما حقول دا الكلام الأهبل..هيا عارفة إنو دا من حقها..آآه..من يوم ما بدأت دا الموضوع و أنا أتمنى إنو أحلام مو عاقلة و ناضجة..لو كانت بنت عبيطة كان الموضوع أسهل..أسهل؟!،ايوة أسهل لكن مو أضمن إنو يبقى سر و أصلاً..لو كانت عبيطة مستحيل كنت حفكر فيها لعمو..أنا ياما شفت بنات حلوين و حبوبين و طيبين لكن هبلات و ما فكرت في ولا وحدة فيهم..مع إنو عمو أحس أحسلو وحدة تكون منطلقة و هبلة شوية..كفاية هوا عاقل بس وضعو ما يسمح بوحدة عبيطة حولينو..يا رب..من جد "الحلو ما يكمل"..عمو رجال و لا كل الرجال..عليه قلب و عقل..حتى حلاوة حلو و يجنن..مو عشني أحبو..لأ عمو مرتب و نظيف و لا يمكن يقبل يكون مو مرتب و هدا شي يفتقدوه رجال كتير إلا من رحم ربي!!
اتنهدت و أنا أفتح جوالي عشان أكتب رسالة..الشي الوحيد إلي مني مترددة أكتبو هوا السلام عليكم !!
كتبت:
"السلام عليكم..
أحلام عارفة يمكن يكون مالي داعي لكن ممكن ترسليلي..."
مسحت إلي كتبتو..رسالتي لازم تكون واثقة..ما ينفع أحسسها بترددي..كلنا لنا مصلحة..هيا تبغى تستقر و أنا أبغى أطمن على عمو و أسعدو..خلي ترددي لبعدين...!
كتبت:
"السلام عليكم..
كيفك أحلام؟!،آسفة بس ممكن ترسلي الرسالة إلي رسلتيها مرة..."
وقفت كتابة و أنا أتذكر شي...
مسحت إلين كلمة آسفة و أنا أتذكر جملة في رسالتها غفلت عنها مع دهشتي من طلبها...
أحلام قالت في آخر الرسالة:"اترددت قبل ما أرسلك و خفت تزعلي و أنا مابغا زعلك لكن من حقي أعرف كل شي..أنا أبغى حياتي تتحسن..مابغا هم جديد"
أحلام كمان كانت مترددة..مو بس أنا...
ابتسمت بسعادة..خاصة بعد ما انتبهت إنو جملتها رجعت لذاكرتي نصاً..شكراً يا رب!!
رحت للرسالة إلي كنت أكتبها و كملت بعد كيفك أحلام:
"أبداً ما زعلت..كنت حزعل لو عرفت إنك خليتي دا الشي في نفسك لكن عندي طلب صغير أتمنى ما يضايقك..ممكن ترجعي ترسليلي الرسالة تاني..أنا مسحتها خفت أحد يقرأها..ارسليها عشان أرسلها لعمو..عمو يشوف إنو من حقك إنتي تعرفي لكن أنا لأ..عشان كده ممكن ما يكلمني و لا يقبل مني..ارسليها تاني و إذا عندك أي شي تبغي تعرفيه اتكلمي و اسألي..أنا سبق و قلتلك انسي إني جود و اعتبريني وحدة عرفتيها بس..من يوم ما بدأ موضوع الخطبة"
و ما أعرف كيف رسلتها..مادري ايش إلي حرك أصابعي..كل إلي أعرفو إنو الرسالة اترسلت...!
فتحت الرسائل المرسلة و قرأت الرسالة و حسيت فيها ثقة مني..يمكن لمن اتذكرت تردد أحلام حسيت بالقوة..مادري..خلاص..ربي ييسر..أنا مالي شغل بدي التفاصيل..المهم دحين الموضوع يمشي..أنا ورايا تخرج..والله معد أنا عارفة ايش أسوي..معد بقيلي شي..اختبار واحد بقيلي و أخلص..
اتنهدت..أبداً ما اتوقعت أتخرج بدي الطريقة..اتوقعت إني أكون مبسوطة و متحمسة..أول ما سجلت في الجامعة كنت معتقدة إنو آخر سنة حتكون فلة و بسطة..ما اتوقعت إني حكون متزوجة و مخلفة و عندي أشياء و هموم بالنسبة ليا أهم من الجامعة و من التخرج..من جد مني حاسة بحماسة..حاسة إنو الوثيقة حتنحط في ملف في الدرج..مالي ذكريات في الجامعة قد ما ليا ذكريات مع علي و سعود..غلطانة؟!،صح..عارفة..كان المفروض أعطي اهتمام لنفسي و لحياتي..لأ، أنا مني مهملة..أنا بس..مادري يمكن أكون أبالغ..أنا كل أستاذاتي يحبوني و يراعوني..لكني أنا عزلت نفسي عن البنات..يمكن..مادري..أنا الصحبة الوحيدة إلي كانت من جد صحبتي هيا دانة و كمان دحين معد أكلمها إلا نادراً..وين و وين لمن أكلمها..أغلب شي رسايل بالايميل..صح تكون طويلة بس والله أنبسط بها..تعطيني تقارير و أنا أعطيها تقارير..و السبب إننا احنا الاتنين فجأة كرهنا الماسنجر..بصراحة سرت أكسل أدخلو و هيا تقول إنها سارت تحسو سخيف و تطفش منو..و معاها حق..أحسو دقة قديمة!!
و بعدين هيا الوحيدة إلي حافظت عليها من أصدقاء الانترنت الكتيرين إلي كانو عندي..ناس استمريت معاهم بالسنين و دحين طنشتهم..ما حذفتهم بس خلاص..و أتوقع لو ما صادف و شفت دانة وجهاً لوجه كان حتى هيا معد كلمتها..أنا مادري كيف كنت عايشة و كل معارفي أون لاين ما أعرف أصلهم من فصلهم..ساعات أحس إنو ربي كان ساتر عليا طول حياتي...!
قمت من على سريري و أنا أسمع صوت الجرس..الله يعين دحين على ترتيب التلاجة..والله مالي شغل..علي و سعود حيساعدوني غصباً عنهم!!

*****************************************

أحلام،،،
قرأت رسالة جود يمكن للمرة العاشرة!!
تستهبل؟!!!!!!!!
ايش يعني مسحت الرسالة و تبغاني أرجع أرسلّها هيا..أففففف..فجأة..حسيت نفسي طفشانة و نفسي أقولها معد أبغى..أنا ايش يجبرني أضحي..لا أنا إلي عَجّزت و لا أنا إلي متأكدة من عمها و واثقة كل الثقه فيه...!
اتقلبت عالسرير بعد ما حطيت الجوال على الكوميدينة..فجأة فقدت حماسي و رغبتي في الموضوع..و ايشبها حالي؟!،الحمدلله مني فاضية و لا ميتة على أول عريس يجي..أصلاً مين جا؟!،فعلاً..مين قد خطب؟!،ولد صاحب بابا قبل سنتين..بس عشان تخصصي انجليزي و هوا بيسافر يدرس فيبغى وحدة تعرف انجليزي كويس ما تفشلو...!
أصلاً رفضوه من غير ما يستشيروني..ماما قالت لي قبل سنة تقريباً..تقول بابا شاف فيه سخافة مو صاحية...!
أنا أثق برأي ماما و بابا..يمكن أكثر من ثقتي بنفسي..ماما حكيمة و بابا نظرته في الرجال ما تخيب..حاسة إني غبية..لمن أتخذ قرار زي هذا لحالي..غبية و كذابة و أخدع أهلي..في نفس الوقت أنا قطعت عهد على جود إني ما أكلم أحد..جود معاها حق في تكتمها..أنا فاهمتلها..هيا عاجبتها علاقتها بأهل زوجها..جود تشوف يا تقوى ذي العلاقة أو تقعد زي ما هيا و معاها حق..مو أمدح نفسنا لكن بصراحة كأهل زوج..ما أعتقد فيه زينا..و أكيد جود ما تبغى تخسر هذي الميزة خاصة إنها شبه وحيدة و ما عندها أهل..جود من قلب شايفتنا أخواتها..الله يديم المحبة بس..أنا نفسي أحب جود و مابغا أزعلها...
يوء..أنا ايشبي..خرجت عن الموضوع..خلي جود على جمب..هيا قالت انسي إني جود و أنا رح أحاول أنسى..
مسكت جوالي و فتحت الرسالة إلي رسلتها..نفسي لو ما كنت رسلتها..سؤالي يعني موافقة بس أبغى أتأكد من بعض الأشياء و أنا خايفة إني ما أكون موافقة...!
أستخير؟!،ليه..و أنا حاسة إنو أصابعي بتتحرك و ترسل من غير ما أحس..أنا وكلت أمري لربي..و أياً كان إلي حيصير فهوا خير..و لو مو في الدنيا في الآخرة...!
قرأت رسالة جود للمرة المليوووووووون...
ابتسمت..ليش فجأة أحس جود أكبر مني..جود أصغر مني بكم..بتسعة..عشرة سنين..ليش حاستها أكبر مني..ليش حاستها أفهم مني..لو اتزوجت حسير كذة..حكبر..أنا كبيرة و بالغة و عاقلة خلاص بس قصدي..حسير كذة..حسير حرمة..حتسير عندي كل ذيك المواضيع و الاهتمامات..و الـ...
ما حقول سخيفة..هيا الكلمة المتوقعة صح؟!،من وحدة متعلمة و حرة نفسها..صح؟!،طيب..ما حقولها لإنها مي سخيفة..هذي هيا المرأة و السخافة إنو الوحدة تنكر رغبتها في ذا الشي..قمة السخافة..لإنو رح يجيها يوم و تبان فيه بشكل..يحرجها و يصدمها قبل ما يصدم إلي حولها..يصدمها و هيا إلي كانت مسوية المثالية المترفعة عن ترهات النساء!!
آآآه يا ربي..وين قاعد ياخذني تفكيري..ليش ما أقدر أركز في أي شي..يا رب..يا رب أبغى أغمض عيني و أفتحها و ألاقي كل شي انتهى و اعدّى..
يا في الجامعة أمارس نشاطاتي..يا في..يا في بيتي مع..زوجي!!

*****************************************

سعود،،،
ضغطت على الجوال بقوة...
مسحت على وجهي الحار بيدي..
قرأت الرسالة و ضربت على المكتب بقبضتي..مو أنا إلي أنسأل سؤال زي هذا...؟!
بالعقل..بالعقل..كيف أتقدم و أنا...
أوكي..صح من حقها لكن مو غباء منها تسأل..بعدين جود..جود كيف تتجرأ..هيا صح كتبت في الأخير إنو أحلام رسلت لها ذي الرسالة..يعني مو منها لكن برضو..المفروض جود متأكدة من إني ما حقبل و أتنازل لها و أوافق إنها تكلم البنت و أنا ما أقدر أتزوج!!
قال لا تزعلي قال...حتزعل من ايه جود..أنا إلي حزعل...!
بس تدروا ايش..أنا رجال..أقدر أتزوج..إني فقدت قدرتي على الإنجاب ما يعني إني غير قادر بعدين..بعدين أنا مني عقيم ذحين..لأ مني عقيم..ايوة أنا مني عقيم..أنا بس صعب إني أخلف بسبب التشوهات إلي اتعرضت لها من الحادث..و إذا الكل يعتقد إني مني متزوج لإني مني رجال فحعرف أنا..سعود.. كيف أثبت لهم العكس...
آخخ عالقهر..أنا أنحط في موقف محرج زي كذة لكن ايش أسوي..بدأت لازم أكمل و حوري أحلام و جود إني رجل طبيعي !!

*****************************************

جود،،،
بعد ما كلمت جدة طلبت عمو..طبعاً ما حسألو عن أي شي..بس ححاول أستشف من صوتو أفكارو!!

-ألو..
-حم حم..أهلاً..كيفك...؟!
-الحمد لله إنتي كيفك...؟!
-تمام..الحمدلله..كيف جدة..إن شاء الله أحسن...
اتنهد عمو:الحمدلله..تدري..أحس حالتها الصحية زي ما هيا بس حاسسها فرحانة..بس تحمدالله و تهلل..مادري ايشبها...!
ابتسمت:الحمدلله طيب..الله يديم عليها...!
-آمين..جود..
-أيوة...
سال بهمس:إنتي..قايلتلها شي...؟!
-ها..
عدلت صوتي و اخفيت الصدمة عشان لا يحس علي بشي..قلت بصوتي العادي:لا طبعاً..ليش هيا قالتلك حاجة...؟!
-لأ..بس مني لاقي سبب لسعادتها..الله يديم عليها لكن شكيت...
ابتسمت بهدوء:عمو أنا وعدتك صح؟!،بعدين إنتا منتا واثق من عقلي..قالولك هبلة و لا هبلة أمشي و..أتكلم عن مشاريعك و مخططاتك...!!؟
أضفت الإضافة الأخيرة لمن حسيت بعين علي تلسعني..يفترض مني ما أنتبه لنظرتو لكن علي عمرو ما حيفهم إني أحس بها لو هوا في شركتو و أنا في الجامعة!!
قلت:إنتا طمني عنك و عن نفسيتك..يعني المفروض راحة جدة تريحك..إنتا كنت شايل همها...!
-...ايوة...أنا..مرتاح...
قلت بسعادة:يا ربي دايماً..
-جود..
حسيت من نبرة عمو كان يبغى يقولي شي فقلت:ها حبيبي...
قال بهدوء ممزوج بتردد:أبـ..آآ..لا..آه..تعالي..قصدي..
-عمو...عندك شي...؟!
-لا..بس تعالي..
ابتسمت:حجي في موعدنا إلي دايماً..
-إيوة..آآم..تبغي شي دحين...؟!
-سلامتك..
-الله يسلمك..
-و يسلمك..باي..
-مع السلامة..
-نشوفك على خير...
و أنهينا المكالمة..حطيت الجوال جمبي فقال علي:ايش مشاريع عمك...؟!
التفت لعلي و قلت:حبيبي هوا..مرة طفشان..سايرة تجيه أفكار مشاريع و خطط..يعني..يفكر يبدأ شغل...
-آه..و ايش الأفكار إلي جاته...؟!
ضحكت:قلي ما أقول لأحد...!
-أنا مو أحد...
ضحكت:يا شيخ كلام فاضي..مرة يقول يبغى يشتغل في الدبلوكسات..مرة يبغى يبني استرحة..مرة يبغى يبني فوق العمارة..مرة يبغى يفتح كوفي شوب..يعني زي كده..طفشان و ساير..
قاطعني علي:مو لو يتزوج!!..جود والله متنرفز..لسه قبل كم شهر واحد من إلي في الشركة اتزوجوا..يا جود رجل غير صالح للزواج..مجنون..مصفوق و اتزوج..عمك ايش قاعد يسوي..والله أنا مستغرب..أحسن مني و أكبر لكن أنا إلي متزوج و مخلف..شي عجيب...
-علي اذكر الله و سمي على نفسك..عمو خلاص ربي حيرزقو في الوقت المناسب..لا تتكلم زي كده عن نفسك...!
اتأفف علي:طفشان و مقهور..أصحابي..صح متخلفين و همج بس أطيب منهم و أنظف مافي..أخواتي..عمك..ليش كل الرهيبين في الحياة ما يتزوجوا..ليش الزواج ساير شي أسطوري...؟!
-أولاً لا تقول أخواتي..صفاء لسه صغيرة و قدامها فرص و أحلام إن شاء الله ربي بيرزقها واحد يقدرها مو حي الله أهبل يجيها على تخصصها إلي يفيدو في البعثة إلي حياخدها و هوا مو وجه دراسة أصلاً..عسكرية تكرف أهلو و كتير عليه..يا علي إنتا ما تدري ايش في الغيب..أنا قلبي يقولي شي كويس حيسير..و إن شاء الله قلبي قاعد يصدقني..إنتا بس قول يا رب...!
طالع فيا علي بتساؤل و قال:ليش..ليش أحسك ذكرتيني بعمرو خالد...؟!
-هااااا...؟!
ضحك:فجأة صح؟!،بس والله ذكرتيني به...!
ابتسمت:عشان رمضان قرب يعني...؟!
-والله مدري بس من زماااااااان عنه..ياخي أحبُه..يعطيني أمل في الحياة...!
-الله يسعدو و يسعدك...
قال بنرفزة:يسعدني ثم يسعدو..أنا زوجك..أنا أول...
اتنهدت بابتسامة بعدين قلت:الله يسعد الجميع...!
-كذة ممكن أسامحك...!
-الحمدلله..أهم شي إنك تسامحني و ترضى...
-تتريقي...؟!
-لا والله..علي..لا يكون تبغى تتضارب..ترى ما فيا حيل....!
ضحك ضحكة شيطانية فابتسمت...
يا رب لا تحرمني من دي الضحكة!!

*****************************************

جود،،،
اليوم خميس!!
قاعدين في بيت جدة في الصالة..مع عمو و جدة..عمو اليوم غير..متحمس..بالمرة..لا مو متحمس بسسسس.. زي ما هوا زمان..كان نفسي أقولو:ليش مبسوووووووووط؟!
لكن ما أقدر..هوا مو إنو مرة طاير بس في سعادة في وجهو..لأ مو سعادة قد ما هيا راحة..آآه..أصلاً ايش الفرق المبسوط مرتاح و المرتاح مبسوط...!!
عمو:صح جود..ايش حتسوي في تخرجك؟!
-خلاص إن شاء الله..يوم التلوت حختبر آخر اختبار و أنفك..و وثيقتي حتكون بعد شهر إن شاء الله...!
-جود نسويلك حفلة...؟!
علي:ايوة عشان حتسير معد تروح الجامعة...!
عمو:اسكت إنتا..بلا بدونة زايدة..حنسويلها عشان حتتخرج بنتيجة عالية...!
-والله ما أعتقد..كنت أبغى أتخرج بمعدل عالي..بس ما أعتقد...!
-ليه حبيبي كم تتوقعي...؟!
اتنهدت:أربعة...
-حااففف...؟!
برطمت فقال علي:دوافييييييييير...
عمو:والله مو دوافير بس البنت ما قد نزلت نسبتها عن 98%..مالت...
علي:ايش فيك إنتا كأني أنا السبب..بعدين هذيك مدرسة و هذي جامعة..المدرسة الكل شطار الجامعة يبان مين الشاطر و مين الحفييييييظ...!
قلت بتفكير:بس والله كويس مني..البنات التانيين إلي متزوجين يجيبوا تلاتة..تلاتة و نص لو مرة..الحمدلله..أنا أحسن منهم...!
-طيب..و ايش حتسوي بعد ما تتخرجي...؟!
قال علي بابتسامة واااااااسعة:حتجيبلي أولاااااد...
طالع عمو في علي بطرف عينو:تحللللللللللللم...
ضحكت..نفس الشي إلي قالو علي ليا أول...!
علي:لا يا شيخ..و إنتا مالك..زوجتي و أنا حر...!
عمو:والله لو راضية ما بقول شي..لكن لو تبغى تسوي شي ما بخليك تمنعها..ناسي شرطنا..إذا ناسي أذكرك...!
-أي شرط؟!!!
-لمن خطبت..ناسي ولا منتا ناسي..جود..تراني ما قلتلك عشان بس لا يطيح من عينك..ترا هددتو..و قلت البنت قدامها مستقبل ما تمنعها من أي شي..قام قال:والله لو احتاجت تسافر لفرنسا أسفرها...!
شهق علي أما أنا فقلت:والله مابغا أسافر بس أبغى أعيد في الجامعة...!
طالع علي فيا:لأ...
-بس ما بغا دحين..أبغى اقعد مع بنتي شوية..ما يسير أخليها و أشتغل علطول..و بصراحة مابغا أجيب شغالة...!
علي:شغالة؟!..حنسير عيلة سعودية..حطارد المكاتب يعني..و هذي شردت و هذي ما تعرف تطبخ و...والله مافي..لو ايش ما يسير...!
سكتنا أنا و عمو و قعدنا نطالع في علي إلي لجأ لجدة:شوفيهم...
جدة:يا الله في العقل...
-ايوة..مع أولادك..أنا مني فاهم..في بيتنا جود المسكينة و هنا أهلها يدافعوا عنها..مادري متى توقفوا في صفي...!
عمو:ما رح نوقف في صفك...
-أنا ما أحبك أصلاً..
-حتى أنا ما أحبك أصلاً...
طالع سعود في "رجلي البيت" و قال:مبزرة...
ضحكت أنا ضحكة مكتومة..و ضحكوا عمو و علي...!
عمو:جود انتبهي لولدك..ساير عليه كلمات مدري كيف مسوية...
قلت:طبعاً..من سبعة و تلاتين درجة..أكيد حيقلب..هما و كلامهم...
عمو:والله مرة مبالغين..كثير أعرفهم من الرياض ما يتكلموا كدة..يا شيخة زودوها هما و اللهجة...
علي:ايوة أثقل بكثير من الجزء الأول...
قلت:هما تحسهم يبغوا اللهجة تطلع..طيب شي حلو يبينوا للناس لهجة منطقة من مناطقنا بس مو لدي الدرجة !!
علي:أسوأ شي لمن الناس تقلدهم..شي يقهر..يعني لمن مهي لهجتك الأساس تطلع بشعة..والله يا شيخة ناس من نص جدة يتكلموا نجدي..الله لا يوريكي..شي..
-أعرفهم..مليانين في الجامعة..إلي يضحك إنو بعض النجديين يتفشلوا من لهجتهم و بعض الحجازيين يكرهوا لهجتهم فيسير كل واحد يتكلم بلهجة التاني...!
عمو:عشان قلة الأدب ولا المفروض كل واحد يتكلم بطبيعتو..كلو من التريقة حقت الناس..بدوي و حضري و مدري ايش هوا..متخلفين...
قلت و أنا أقوم عشان أشوف العشا:من جد...
و رحت للمطبخ و ما مرت ثواني إلا و عمو دخل المطبخ..صب موية في كاسة و مر عليا و قال بهمس:أبغى تفسير للرسالة..اليوم!!
و خرج..أوكي..فجعني و احتجت وقت عشان أستنتج..صوتو..ما كان معصب بس المتوقع إنو يكون معصب..أحلام كانت صريحة بزيادة..صح اعتذرت لكنو شي أكيد يقهر أي رجال..عمو المفروض يعصب بس إنو ما عصب..طلب تفسير..بنبرة واثقة..طبيعة دا التفسير كيف لازم تكون؟!،و متى يمديني؟!
خرجت من المطبخ بعد ما قلت لمنورة تجهز العشا و تغرفو..جلست و كان عمو مبتسم بهدوء..الشي إلي خوفني زيادة..لو متنرفز و معصب أهون عندي..أما إنو يبتسم و يتكلم و يتحمس هدا الشي يفجعني..هدا معناتو إنو معصب و مقهور لدرجة إنو أخفى أي أثر لمشاعرو..يا ربي لأ..مابغا..يا رب يسرها معايا..تعبت منو..أبغى مصلحتو و هوا مو متعاون معايا!!
انحط العشا و اتعشينا و شربنا الشاهي و انبسطنا سوا و رجعنا البيت و ما حصل أي شي..لا عمو ناداني و لا أنا رحت و كلمتو!!
رجعت البيت..فتحت شنطتي بشوف جوالي إلي رن برنة رسالة و انصدمت !!

*****************************************

خرجت من الاختبار و أنا مرتاااااحة..آخر اختبار..يااااه..الحمدلله..خلاص معد فيه مذاكرة تحت وطأة دوشة علي و سعود!!
أخدت سعود من الحضانة ودقيت على علي..أول ما رد قلت بصوت عالي:خلاااااااااصت...
ضحك:مبروووووووك..خلاص معد حتذاكري...
-معد حذاكر...
-خلاص..تاخذي وثيقتك و نسويلك حفلة و تقعدي في البييييييييييييييييييت...
-علي..
-نعم..
-مالت عليك..دحين هذا هوا إلي هامك..منتا مبسوط إني حتخرج و يسير مستوى دراستي..جامعي...
-إلا..ولا لأ..أصلاً ما يهمني..لو إن شاء الله ابتدائي..إنتي جود و أنا علي و ولدنا سعود..في ستين نيلة المستويات هذي...
قلت بصوت أوطى:كداب..أصلاً كنت رح تحتقرني لو ماكنت متعلمة...
همس:ههه..أنا؟!،أكون غبي لو أفكر إنو فيه أحسن منك..بلا تعليم بلا نيلة...
-من جد؟!
-طبعاً أصلا إنتي..."اتغيرت نبرتو"..لا بس شوية ظروف مع الأهل..إن شاء الله...
قطبت حواجبي قبل ما يقول علي:غبي..
-ايييش...؟!
-يا شيخة المدير ساير مسوي وكيل مدرسة..يمشي في الأسياب و يعطي أوامر..دوبو يقولي:ارجع على مكتبك...!
-إنتا في السيب؟!
-ايوة..تعبت من القعدة..المهم ذحين..ايش حتسويلنا عالغدا اليوم..بمناسبة إنك خلصتي...
-ما حسويلك شي يا عمري..إنتا حتمر عليا أنا و سعود و نروح نتغدى في أي محل...
-لا جود..غدا مي حلوة..اسمعي خلاص مو لازم تطبخي..نشتري بخاري عالطريق...!
-لأ..أبغى أتغدى برة...
-جود الدنيا حر..
-و مين قلك حنقعد في الشارع؟!،حندخل أي مطعم...!
سعود:مقدونلز ماما مقدونلز...
أول شي جا على بالي إنو ماكدونالدز مو شي محرز يعني..غدوة تخرجي المفروض تكون في مطعم محترم بس عشان خاطر سعود...
قلت:سعود يبغى مقدونلز..خلينا نمر..الله يخليك..والله مشتهيتو..ترضى البيبي يشتهي شي و ما أعطيه...؟!
-جود..قلتلك ألف مرة إنو الحركات ذي في أول حمل..ما تنفع ذحين...
-علييييييييييييي...
-خلاص خلاص..طيب..أعوذ بالله..سايرة زنانة...
ابتسمت لكن قلت عشان يغير دي العادة:شكراً حبيبي..بس مو لازم لمن توافق تتعوذ من ابليس..وافق و قول من عيوني..خلاص إنتا وافقت...!
-حبطل ترا...
-لا لا لأ..حرام..أولادنا يبغوه و أنا حبيبتك كمان أبغاه...!
-أنا أبغى بخاري...
-عادي..نتعشى بخاري...
-ما شاء الله عليكي..الله يحفظك بس..
-آمييييين..
-يا رب العالمييييين...
-يلا باييييين...
ضحك:باي..
-باي حبيبي...!
قفلت من علي و التفت لسعود بحماسة:حنروح ماااااك...
ابتسم سعود:ماما أنا مابغا هابي ميل...
-ليش؟!
-عشان خلاص النونو يجي..ياخد هابي ميل..أنا لأ..أنا كبير...!
ابتسمت:صح..ولدي كبير...
رحت للكافتيريا و اشتريت أكل ليا و لسعود بما إنو علي حيطول شوية و سعود ما فطر ولا أنا..جلسنا على طاولة و هناك..رن جوالي..و كان..عمو!!
ما رديت..لإنو بعد شوية حخرج مع زوجي و ولدي و أنا عارفة النقاش حيطول..ما حيكون شي وحش..لا..من بعد إلي شفتو في شنطتي مستحيل يكون وحش..أنا خايفة يكون عمو يبغى التفسير إلي طلبو و أنا مني مستعدة أبداً أعطي تفسير مو لاقيتو دحين!!

*****************************************

سعود،،،
ممكن أفهم ليش ما ترد؟!
أتصل عليها من أول ما ترد لييييش..يعني أكيد شافت ليش ما ترد..أكيد إني متصل أبغى أكلمها في شي مهم..آه جود...
عضيت شفتي السفلى من القهر..ضمنت يعني و لا ايش؟!،أصلاً لو ما سويت إلي سويتو كان ردت من أول رنة..
حطيت راسي بين يديني:استغفر الله العظيم..ايش هوا ذا إلي أنا فيه؟!،ما بقي أحد إلا و فسرت تصرفاتو على إنها إهانة و تطنيش ليا..ياما جود ما ردت عليا و ياما أنا ما أرد عليها..ليش دحين بس متحسس من الموضوع لدي الدرجة؟!
رفعت راسي و أنا أتنهد..أوكي أعترف..أنا ساير حساس و..غبي!!
رن جوالي فجأة..و كانت جود..اترددت قبل ما أرد لكني رديت:ألوو..
-السلام عليكم...
-و..عليكم السلام...
-كيفك عمو...؟!
-الحمدلله..طيب..إنتي كيفك...؟!
-الحمدلله بخير..عمو..
-نـ..نعم..
-اليوم كان آخر اختبار...
قالتها بسعادة..ابتسمت:مبروووك..بس لسة الوثيقة أحلى شي..لمن تاخديها تحسي بالحرية من جد...!
ضحكت:أنا حاسة بالحرية خلاص..أنا ما يهمني لا الاختبار ولا النتيجة المهم عندي إلي أضيعو في المذاكرة...!
ابتسمت:الناس الأذكياء كذة..الطبيعيين يشيلوا هم المذاكرة مو الاختبار و النتيجة إن شاء الله الواحد بياخذ إلي يستحقو...!
-صح بعدين أغلب الدرجات نزلت فإن شاء الله شي حلو...
-إن شاء الله..آآه جود..كيف؟!
-ايش حبيبي؟!
حسيت جود عارفة..و تبغاني أتكلم..هيا ما اتكلمت عشان تترك ليا المجال..جود أنا فاهمها..تبغى تسمع مني و تفهم كل إلي أبغاه..جود حريصة على إني أكون أنا المستفيد الأول..مو إنها مي مهتمة بأحلام..لأ..لكنها تبغى تفيدني أكتر شي!!
-كيف الـ.."قلت بسرعة"..جود احنا لسة على وعدنا؟!
-أية وعد؟!
-إذا ما حصل نصيب ما ينفتح الموضوع مرة ثانية..أبداً..حتى طول السنين الجاية..استجبت لرغباتها و لو ما طلعت بنتيجة فما رح أستجيب لرغبات أي أحد...!
-إلي يريحك..مافي أحد يغصب أحد على شي..صدقني إنتا ما سويت أي شي إلا برغبتك..أنا..ما أجبرتك على شي..تصدق عمو إنك لمن ترفع صوتك أنسحب..أنا ما أرجع أتكلم إلا لمن إنتا تعطيني إحساس بإنك ممكن تسمع..و كنت إنتا في كل مرة تعصب تحس بالذنب و تزعل إنك زعلتني فترجع تسمع!!
حسيتها سعيدة و هيا تتكلم..اتنهدت..أحس ما عندي شي أقولو...
تابعت جود:الربوع الجاي إن شاء الله حكلمها..بعدها يسير الدور عليك كلياً..تتقدم رسمي..طبعاً ما حتروح بجدة و بيا و تتقدموا..لأ..أول شي كلم أبوها لحالو..على أساس ما تبغى يسير حساسية لو ما حصل نصيب..عارف عشان يطمنوا..عشان ما يضيفوا لمواصفاتك إنك صاحب ولدهم و نسيبهم...!
اتنهدت:لسة بدري يا جود على دا الكلام..خلي الموافقة تجي و بعدين..
تابعت و أنا أنتبه لشي:طيب إذا افترضنا إنو البنت وافقت..أهلها..لو رفضوا...!
انفعلت جود:و ليه يرفضوا..وين يلاقوا أحسن منك؟!،عمو..أوكي أهلنا و حبايبنا لكن لمن تخطب و تتكلم مع أبوها اتكلم بثقة..لا تحسسوا إنو يتفضل عليك أو شي..مو تقل أدبك لكن خليك واثق و محترم!!
-أعصابك يا جود..أهل أحمد غير و إنتي عارفة..ما عندهم طبيعة الاستغلال لو شافوا واحد مسكين...!
-أنا عارفة حبيبي إنو ما عندهم دا الطبع لكن برضو الواحد يروح باحترامو..مو يروح بتردد..حتى لو من جوتك خايف و متوتر لا تبين!!
اتنهدت و قلت بهدوء:خلاص طيب..يسير خير بس أهم شي ما يطلع الموضوع لأحد..جود أنا أجبرت نفسي أسوي أشياء كثيرة أنا ما أبغاها ولا مقتنع فيها..أنا قبلت يا جود أعطيها تقرير جديد عشان تفهم إنو الكذب مو لنا..مستحيل أقدم على خطوة زي دي و أنا مني قدها..صارحناها و لازم تقدر هدي المصارحة و تردها لنا كمان...!
-عارفة حبيبي إنك ضغطت على نفسك..على بالك مني فاهمة..حتى أنا والله انصدمت..صدقني تصرفك دا ما حيروح هدر..كلو يرجعلك..لو مو دحين بعدين..و لو مو بعدين عند ربنا حيكبر..ما حينساه...!
-إن شاء الله خير..تبغي شي دحين؟!
-سلامتك..
-الله يسلمك..باي..
-باي..
و أنهينا المكالمة..و أول ما أنهيناها انتبهت إني ما أخدت التفسير إلي أبغاه..لسة!!

*****************************************

الجزء الحادي و العشرون
(وحدي الآن!!)


أحلام،،،
"جود أنا ما رح أوافق بمجرد إنك نفذتيلي طلبي!!"
قلتها بانزعاج على الجوال لجود إلي كانت تكلمني..و اتوقعت إنها تتضايق لكنها قالت بكل هدوء:و من قال إني اتوقعت دا الشي أصلاً..أنا قاعدة أكلمك عادي..أبغى أعرف ايش رأيك..إذا كنتي لسة مترددة قولي بستخير قولي لسة أحتاج وقت أفكر..لا تقوليني شي أنا ما قلتو...!
-جود..مو إني أبغى أقولك بس..جود هذي حياة..مو شي عابر..أنا ما رح أضحي بشي قليل..حتى لو إنك تشوفي إني المفروض أحمد ربي..أنا ترى مني ميتة عالزواج..و بصراحة..بصراحة يا جود..لازم يكون فيه شي يستاهل هدي التضحية!!
اتنهدت جود بصبر و قالت:أحلام حبيبتي..من قال إنك ميتة على الزواج..مين قال إني شايفة إنك لازم تحمدي ربك..أوكي ما أكذب عليكي..أكيد حبي لعمو يخليني أشوف إنو لازم أي وحدة يتقدملها تحمد ربها لكن بغض النظر عن دا الموضوع..عشان تحسسي الرجال بقيمتك لازم تحسسيه بإنو هوا يحمد ربو إنك وافقتي و حسسيه بدا الشي بعيد عني..قلتلك من قبل لا تهتمي بيا..خرجيني برة الموضوع..أنا مجرد وسيط..لا تخلي علاقتك بيا تأثر على قرارك...!
-ما..أصلاً أنا مني مهتمة..عادي..المفروض ولا وحدة فينا تزعل..هذي حياة!!
حسيت جود تبتسم و هيا تقول كأنها تكلم طفلة:صح حبيبي..هدي حياة..محد يزعل من التاني..كل واحد يقرر و يختار إلي يريحو!!
سبق و قلت إنو جود أحياناً تحسسني إني أصغر منها و إنها زي أمي!!
قلت:طيب..
ما قالت جود شي فكملت:أنا..قرأت...
-قرأتي ايه؟!
-دورت عن الـ..الشي إلي حطيتيه إنتي في...
-أيييوة...
-جود..مادري..بس..
حسيت فجأة بشي يضغط على قلبي..
بلعت ريقي و أنا أغمض عيني..كنت حتابع لولا جود إلي قالت:و أنا كمان...
انفعلت فجأة:جود ليش تقولوا مستحيل..كل القضية إنو..إنو هوا عندو "بصوت أوطى"..تشوهات أثرت عـ..علــ الـ...
اتوقفت..حسيت بصعوبة و حرج إني أقولها..ما أعتقد حيكون شي لطيف أكلمها عن حالة عمها في وضع زي كذة!!
قالت جود بلطف:عارفة حبيبي..لكن هوا مو مقتنع بنسبة الواحد بالمية دي..يمكن معاكي يقتنع و يمكن ربنا يقدر شي..أنا مني مستوعبة فكرة إنو ما يخلف أصلاً..أحلام أنا من يوم ما كنت صغيرة و أنا أتخيل أولاد عم صغار أربيهم زي ما رباني أبوهم..و أنا مؤمنة بدا الشي!!
اتنهدت..أنا مالي حل إلا إني أتوكل على الله و أؤمن بالنسبة الضئيلة دي..إلي أطلقت عليها جود واحد بالمية عشان تحط أسوء الاحتمالات قدامي..بس لأ..مين قال إني لازم ألقالي حل عشان أكمل..أوففففففف...
جود:طيب حبيبي يلا دحين مع السلامة..لازم أقفل!!
-مع السلامة...
-باي...
و قفلت..آآه يا ربي..ليش أحس إني ملزومة بسعود ذا ... ؟؟!!
رحت للرسالة إلي رسلتها جود ليا و كتبت تحتها إنها من سعود..سوى نفس حركتي يعني..الفرق إنو المخاطب في الرسالة أنا!!
"السلام عليكم،،
التقرير الطبي و صلك و أنا رجال..بكلمتي!!
وفق الله الجميع"
أنا أعرف شكله..أحمد كان يورينا صورهم مع بعض..الشي إلي يصعب عليا الموضوع..أتخيلُه قدامي يتكلم و يقول هذي الكلمات!!
حطيت الجوال على جمب و رجعت أفتح التقرير من جديد..أتأمل فيه..أقرأ الكلمة فيه مية مرة..أراجع قواعد اللغة فيه..ساير شغلي الشاغل..من يوم ما حطتو جود في شنطتي و أنا مشقلبة فوق تحت!!

************************************************** *

سعود،،،
قمت من سجادتي لمن سمعت صوت أمي..حسيت إني لسة محتاج أقعد أكثر لكن أمي أولى !!
رحت لها و جلست جمبها و أنا أقول:خير أمي..بغيتي شي؟!
-ايوة بغيت...
ابتسمت:ايش بغيتي؟!
-بغيتك تقعد معايا..الله إن كان قاعد في البيت و بتخليني لحالي!!
بست راسها:آسف..خلاص بقعد معاكي!!
و صبيت لنفسي فنجان قهوة و أنا أفكر بإلي كنت قاعد أدعي بيه..مادري لو كان صح..مادري لو كان منطقي لكني في النهاية دعيت و الدعوة وصلت لربي و إن شاء الله إنها رح تتم...!
أنا مادري لو رح تستسخفوني ولا لأ..لكني ما كنت قاعد ادعي لنفسي..كنت قاعد أدعي لأحلام..ايوة لأحلام..كنت قاعد أدعيلها ربي ييسر لها الزوج الصالح إلي هيا تستاهلو..لإنو أنا معد تفرق معايا..الموضوع بالنسبة ليا سار إرضاء لجود و بس..أنا حسوي إلي ينطلب مني و بس..و أحلام الله يختار لها الخير!!
رن تلفون البيت و أيقظني من أفكاري..قمت برد عليه لكن أمي قالت:والله إنها جود...
التفت لأمي باستنكار:ايش دراكي؟!
-دريت...
رديت على التلفون و أنا أبتسم..بشوف فعلاً جود و لا لأ..و كانت..جود!!
قلت باستغراب:الله..والله يا أمي إنك صادقة..جود تصدقي أمي قالت إنو إنتي من قبل ما أرد!!
ضحكت جود:يوووه..هوا دا يجي شي قدام إلي دايماً..عارف أحياناً لمن أكون أبغى أكلمها و ما فيا حيل أتصل ألاقي سعود جايني يقولي إنها عالتلفون!!
ابتسمت:أمنا رهيبة!!
-شفت كيف؟!..صح أنا كنت أبغى أكلمها..بس إنتا كيفك؟!
-طيب الحمدلله..إنتي ايش مسوية؟!
-تمام الحمدلله...
-و كيف الحمل..صح متى حتولدي؟!
-آآمممم..يوم الملكة..
-أية ملكة؟!
قالت ببديهية:ملكتك!!
-نعم؟!..ليش؟؟ليش هيا...
-لا بس أنا أقول..أنا كده..أبغى أخلص موضوعك بعدين أولد..مابغاها تجي إلا و عمها متزوج!!
اتنهدت..و حسيت تنهيدتي طيرت جود فوق من السعادة..قالت:آخر التنهيدات إن شاء الله!!
-خذي أمي...
و وديت السماعة لأمي..قال مني مهتم قال!!

************************************************** *

جود،،،
قفلت من جدة و أنا متحسفة على عمو..يا قلبي عليه..والله ما كنت متوقعة حيتأثر كده..تأثر عمو معناتو إنو هوا من جد راغب فيها..طب ليش يسوي نفسو مو مهتم...؟!
يمكن هوا نفسو مو عارف إنو مهتم!!
رن جوالي و كانت أحلام..قمت لغرفتي و قفلت الباب..جلست على الكرسي باسترخاء و رديت:ألو...
-السلام عليكم...
-و عليكم السلام..أهلاً..كيفك؟!
-الحمدلله..كيفك إنتي؟!
-تمام...
-آآآآه جود..
-نعم...
-كنت أبغى أسأل عن شي...
-اسألي حبيبي...
-جود كيف عمك مع الشغل؟!
-كيييف...؟!
اتفاجأت بالسؤال إلي جاي فجأة و من غير مقدمات ولا مؤهلات تفتح الموضوع!!
-جود بصراحة..ما ينفع مافي أولاد و كمان مافي شغل.."تابعت بسرعة"..أنا..أنا لسة ما وافقت بس أبغى أعرف..يعني..إنو...
-والله ما أعتقد حيعترض من غير سبب..بس حتأكد منو و أرد لك خبر...
-ايوة...
-أي شي تاني...؟!
-..لأ..مع السلامة...
-باي..آآ..لحظة أحلام...
-ها...
-أحلام لو عندك أي شي تاني..شروطك يعني..طلباتك..ايش تبغي؟!
-ما..مو الشروط بعدين لمن يتقدم رسمي؟!
-إلا حبيبي بس دحين إنتي من حقك تعرفي كل شي..فيه شروط ما حتقدري تشترطيها بعدين...!
-زي ايه؟!
-مادري بس أنا من رأيي ما دام التواصل بينكم ميسر استغلي الفرصة..لا تعطي كلمتك إلا و إنتي متأكدة من كل شي..و أقولك هيا من دحين..لو عمة و عمو وافقوا حتلاقي نفسك غصباً عنك توافقي لإنو لو الكبار وافقوا ما للصغار كلمة...!
-ماما و بابا مو كذة!!
-ولا عمو و جدة..ولا أنا..لكن نروح ولا نيجي ما رح نتغير..بالذات في دي الأمور...
-جود...
-نعم...
-من غير زعل..بس..أحس إنك تبغي تثبتيلي بكلامك إنك مهتمة فيا و إنك..منتي متحيزة لعمك...!
سكت لثواني..غمضت عيني و فتحتها و أنا أبتسم...!
قلت:أحلام..من غير زعل كمان..أنا ايوة متحيزة لعمي..و مصلحتو عندي أهم من مصلحتك..مهتمة بكي لكن سعادتو عندي أهم..و أنا كنت صادقة معاكي في كل كلمة قلتها..إنتوا الاتنين عندي مهمين و عمو أهم و عشان ما أظلمك نورتك بالحقيقة و كنت معاكي في كل كلمة و طلب طلبتيه و على فكرة..إلي سواه عمو لمن نفذ طلبك مو شي هين..أنا مادري أصلاً كيف اقتنع..إنتي عارفة إني رجعت البيت و لقيت التقرير في شنطتي..ما كلمني من كتر ما هوا مستصعب الموضوع..أحلام..أنا ما أزكي عمو لكن ما حتلاقي رجال زيو بسهولة..وحدة من دعواتي كانت إنو ربي يرزقني واحد زيو!!
ما علقت أحلام فقلت:أي شي؟!
-لأ...
-أوكي باي..
-بـ..ـأي...
و قفلت..ابتسمت..مادري لو كان إلي قلتو مناسب..لكنها الحقيقة..أحب أحلام لكن يبقى عمو عندي أهم...!
و في الليل وصلتني رسالة من أحلام....
"السلام عليكم جود،،،
كيفك؟!،مادري يمكن ليل..آسفة بس أنا ما جاني نوم و ما حيجيني إلا لمن أقولك ذا الكلام!!
جود أنا ما قد ارتحت لشي قد مني مرتاحة لهذا الموضوع..مو إني موافقة..لأ..بس أحس إنو إلي بعدو خير..إذا تم فهو خير و لو ما تم فخيرة ليا و لعمك و لكي و لأهلنا..إنتي كلمتيني أنا لوحدي عشان مشكلة عمك و أنا أقولك إني راضية بها..أما شغلة الشغل و السكن و باقي أمور الحياة فخليها بعدين..لمن تتقدموا رسمي حقول شروطي لأهلي و حيقول عمك شروطه..و لين هنا دوري خلص..الباقي موافقة أهلي..آه..شي ثاني كمان..أنا متوقعة شي يستاهل التضحية..يعني..حياة مثالية أو شبه..بما إنو مافي حياة مثالية في عالمنا!!"
ابتسمت لدرجة فكي عورني..ياااا ـــ
طالعت في علي بسرعة و كان مديني ظهرو..أوه..لو كان شاف ابتسامتي كان فتحلي تحقيق..الحمدلله...
قفلت جوالي و حطيتو عالكوميدينة و أنا أراقب علي..جيت بأنسدح لكن وصلني صوت علي:جووووود...
-ها حبيبي...
-ليش قاعدة تطالعي فيا؟!
قلت و أنا أعدل البطانية فوقو:أحبك حبيبي أحبك...
-كذااااابة...
-والله أحبك...
-كذابة...
قلت أبغى أغير الموضوع:يعني على بالك ما أحبك؟!،كذابة لمن أقول أحبك؟!
التفت ليا:كذابة في السبب..إنتي تحبيني غصباً عنك..بس كذابة في إنو سبب مطالعتك فيا هوا إنك تحبيني..إنتي ما عندك حركة لمن تحبي أحد تتأمليه..و أنا عندي ذي الحركة و إنتي ما تتفاعلي معايا لمن أسويها...
كان علي في نهاية الكلام منزعج و يتكلم بغيظ...
قلت و أنا ألعب بشعري:أنا أستحي..مو ما أتفاعل معاك...
طالع علي فيا لثواني بعين ضيقة بعدين قال:إنتي كذابة و أنا ما أحب الكذابين...
-ما تحبني؟!...
قال بقهر و هوا يدف البطانية و يجلس:أنا ما أحب الحريم...
-أحسن..و لا أنا ما أحب الرجال...
قال بقوة:أحسن..
و رجع انسدح بقوة على السرير و سحب البطانية..ابتسمت و قربت منو..حطيت يدي على كتفو فحركو بعنف..قطبت حواجبي بس رجعت ابتسمت و قلت بهمس:علي..أقولك على شي..بس ما تقول لأحد إني قلتلك...
-مابغا..أبغى أنام...
-شي مرة مهم...
-مابغا...
-علي..
-جود..أبغى أنامممم...
-عليييييييييي....
صرخ:أبغى أنام..ما تفهمي إنتي؟!
دمعت عيني و قلت:طيب..خلاص نام...
و رحت لجهتي من السرير و انسدحت..أهبل..ليش يصرخ؟!
أصلاً أحسن ما رح أقولو,,كنت حقولو و حرضيه بس بكيفو..غبي..ما يستاهل..
مسحت دموعي..لا وي حبيبي يستاهل..بس برضو غبيييييييييييي...
سميت بالله و نمت...

************************************************** *

سعود،،،
-جود..من جدك؟؟؟؟؟؟؟؟
-والله..تبغى أرسل الرسالة إلي رسلتها..ترى عادي..أرسلك هيا...
-جود..جود..آآآهـ...
ضحكت جود أما أنا فمسكت على قلبي..
قلت بقهر:ليش قاعدة تضحكي؟!
-ليش شوية و تبكي؟!
قلت بغيظ من ورا أسناني:مني قاعد أبكي..أنا ما كنت...
-ما كنت متوقع بس الحمدلله وافقت..خلاص عمو اتكل على الله و استخير و روح اتقدم رسمي...
-جود...
آخخخ..أنا ما كنت أبغاها توافق..ليش توافق..ليش هذي المعجزة تسير لمن ما أبغاها تسير..ما رح أقدر أعطي أي عذر..أنا مشيت في الموضوع لإني متأكد إنو مو أحلام "أخت أحمد" هيا إلي حترمي بأمومتها عرض الحايط..أنا كنت أدعي إنو ربي ييسرلها الأحسن..و مو أنا الأحسن!!
-أوكي..أنا بس كنت أبغى أعطيك الخبر..بعدين أفهمك و أقولك على التفاصيل..دحين تروح تصليلك ركعتين و تحمدالله و تطلب منو التوفيق..و بعدين إن شاء الله لمن أجي حصرف علي..أقولو يكلم أصحابو و يقابلهم ولا أي شي...
-جود..مابغا تسرع و كرفتة..مو تمشيلي الموضوع جري..و إلي صبرني كل ذي السنين و صبرك يصبرك كم سنة..من جد..من جد مابغا يطلع الموضوع لأحد...
-أصلاً ما رح يطلع لأحد..إنتا أول شي تكلم أبوها..حتى أحمد و علي مالو داعي تكلمهم..كلم أبوها و قلو إنك تبغى رأيو و إنك مستعد لأي تساؤلات..و إنك ما جبت معاك أحد عشان لو كان مافيه نصيب محد يتحسس..طبعاً حيزعل علي و حيلومك أحمد عشان ما قلتلهم بس إنتا وقتها قول خفت عمي يكون لو رأي أو وجهة نظر ففضلت تسمعو الطلب منو مو مني..و خلاص..معد فيها شي..لو أعطوك الموافقة..نروح أنا و إنتا و جدة و نخطبها..
-جود في العادة الموضوع يكون عند الحريم بعدين يتطور و يوصل للرجال...
-ايوة..بس علاقتك بهم أقوى و أفضل من علاقتنا احنا بهم..أنا و جدة علاقتنا بهم جات عن طريق المصاهرة بس..لكن إنتا تعرفهم من زمان..تعرف كل فرد في العيلة عندهم من زمان..عشان كده أحسن إنتا تبدأ مو احنا...
اتنهدت:طيب طيب..
-خلاص..يسير خير إن شاء الله..
-إن شاء الله..مع السلامة...
و قفلت الخط..رميت الجوال على السرير..
ليش وافقت..من متى عيلة أحمد تربي بناتها على التضحية و عدم الثقة في النفس..و ليش..ايش ناقصها عشان تضحي؟!