أوراق غيرت لونها / البارت الخامس

البارت الخامس



دخلت نورا .. وهي تتأمل وجه مرام الشاحب..
والوضع ما طمنها أبدا..
طبعا للآن ما عرفنا ما هي أوصاف بطلتنا مرام..
مرام بيضاء البشرة .. متوسطة الطول .. نحيفة نوعا ما بسبب الظروف اللي تواجهها لكن بشرتها نظرة .. عيونها بنية فاتحة وكبيرة رموشها ما هي طويلة مرة لكن عيونها فاتنه بإجماع الكل ... شفتيها مليانه بشكل رائع..
وأجمل ما يجملها ابتسامتها .. وبحق ساحرة.. وبسببها تدخل قلب من يعرفها .. أو يراها مباشرة ..
نورا مستمرة في تأمل مرام .. حطت يدها على جبهة مرام ..
نورا: الحمد لله مش ساخنة ..
نورا بتعب: أقول لك إرهاق بس..
تتكلم نورا بنوع من الإحراج: مرام .. كنت أقصدك بخدمة .. لو تقدري..
مرام تبتسم: عيوني ..لو أقدر..
نورا : ياسين على عينك..بس أنتي عارفة اليوم جمعة .. ونسوان إخواني كل واحدة رايحه بيت أهلها..وأمي مثلما أنتي تعرفي تعبانه..وأخي خالد عازم اليوم مجموعة من زملاءه..فإذا ما فيها إحراج لو تقدري تساعديني..
مرام في البداية ترددت توافق.. وما تدري ليش.. بس ما حبت تكسف نورا من أول طلب تطلبه منها ..
هزت راسها بالموافقة: حاضر ولا يهمك..ثواني ألبس البالطو وأطلع معك..
....
وصلت مرام للمطبخ مع نورا.. وسألتها: أيش ناوية تسوي من أكل؟
نورا بحيرة: تصدقي والله ما أنا عارفه .. المشكلة أخي خالد إذا عندنا عزيمة ما يعجبه العجب..
شعرت مرام بغصة من هذا الكلام..وراحت تتلفت يمين ويسار في المطبخ..
المطبخ من الألمنيوم باللون الخشبي الفاتح.. وكل ما فيه جميل ..ابتسمت مرام لا شعوريا وقالت لنورا: نورا ما تخافي بنتعاون مع بعض..ويصير خير..
نورا بقلق: الله يستر..
مرام : نورا لاتقلقيني !!! كم عدد اللي بيعزمهم؟ في حدود كم؟وراحت تتأمل المنظر من شباك المطبخ..
نورا تلفت ناحية مرام: يعني قال من عشرة او خمس عشر
مرام تبتسم وظهرها للشباك:كويس .. يعني نحسبهم كل خمسة مجموعة .. يعني لازم نقدم من كل صنف ثلاث أو أربع صحون..فين التنور؟
نورا:في السطح معه غرفة خاصة..والعجينة جاهزة
عجنتها بعد صلاة الفجر بروح الآن أخبزها..
(التنور عبارة عن وعاء كبير بشكل اسطواني يعمل بالغاز.. يعمل الخبز في المنزل ولا يخلو بيت في اليمن منه تقريبا.. خاصة المناطق الشمالية..)
مرام وهي تغسل يدها:طيب.. أنتي بس وريني وين أماكن المواد الغذائية ومواد الطبخ وروحي..
نورا كانت قد جهزت العجين.. وبنات الصحن..(من أشهر الأكلات في اليمن.. وألذها .. تعمل من الدقيق والبيض والحليب..وتكون رقائق فوق بعض يفصل بينها بالسمن.. وبعد خروجها من الفرن أو التنور يصب فوقها العسل وتأكل ساخنه)
مرام من جهتها راحت لعملها .. وسوت الرز واللحم.. وسلقت المعكرونة.. وقلت البطاطس..نورا خلصت ورجعت للمطبخ تساعد مرام...
شافت مرام مشغولة تماما ..
حطت الخبز على الطاولة وغطت عليه عشان ماينشف وشافت مرام منسجمه في عملها...تناديها مرام.. أيش ناوية تسوي؟
مرام بدون ماتلتفت لها:بسوي اللي أقدر عليه ..
نورا تأخذ بعض الصحون وتحطهم في الحوض: طيب أيش أسوي أنا الآن؟
مرام:قصي(قطعي) السلطة على ذوقكم.. بس جهزي لي حبة خيارة كاملة .. وحبة جزر..وحبة طماطم..وفلفل حلو..وحطيهم على جنب..
نورا وهي تغسل السلطة المبلله بماء وخل: حاااااضر..
شعرت مرام بألم في ظهرها ويدها اليسرى.. وبدأ العرق يتصبب من جبهتها ..
نوراشعرت بقلق: مرام .. سامحيني ..ما كان مفروض ما أناديك وأنت تعبانه..
مرام:عيب عليك هذا الكلام.. أنا بحسبة أختك..إلا وين خالة سلمى.. وشجون؟
نورا: شجون نايمه عند أمي.. ولو تدري أنك هنا كان طارت طيران!!
ما أدري أيش مسويه أنت لهالبنت ؟ ليل نهار تكلمني وتسألني عنك..
مرام تضحك ضحكة بسيطه: مانا مسويه لها شي.. بس شجون غير كل البنات.. ذكية مره .. وحساسة زيادة ..مع صغر سنها تتلوه لأشياء أكبر من سنها..
ويمر الوقت كلام وعمل بين مرام ونورا...
ونورا تأخذ من الثلاجة بيض وتقليه بسرعة وتحط عليه جبن وتلتفت ناحية مرام: مرام تعالي نفطر وبعدين نكمل..
ولأن الانسان دائما وقت التعب يكره شي اسمه اكل....... لكن مرام مضطرة تطيب نفس نورا بلقمتين..
نورا: مرام مجنونه انتي؟ مااكلتي شي؟؟ شوفي كيف شكلك ضعيفه قوي(جدا)
مرام بابتسامة : ماعليك كيف انا..انا الحمدلله شبعت..كلي على عافيتك يارب..

الساعة العاشرة تقريبا.. تطل من الباب شجون وهي تفرك عيونها علامة أنها لسه صاحية من النوم..
مرام أول ما شافتها ابتسمت..وشجون أول ما شافت مرام شهقت وجرت لها .. وارتمت في حضنها وهي تهمس: ماما ..
توترت مرام لا تكون نورا سمعتها بعدين سين وجيم..
قبلتها وتلاعبها .. دخلت خالة سلمى.. لابسة دراعة بيضاء وطرحة بيضاء لابسه ابيض في ابيض فيعطيها المنظر جمال وهيبه .. وملامحها هادية .. أول ما شافت مرام ابتسمت.. وقربت منها وسلمت عليها..
خالة سلمى: سامحينا يا بنيتي .. والله ما نعرف كيف نجازيك.. أتعبناك معنا..
مرام تمسك يد خاله سلمى: لا أبدا يا خاله .. هذا واجبي.. ونورا يشهد الله بحسبة أختي.. كيف صارت صحتك الان؟
خالة سلمى: تسلمي يا بنيتي الحمدلله على كل حال.. تحتاجوا مساعده مني؟
نورا : لا يا أمي.. مرام ما شاء الله عليها .. ربة بيت من الطراز الأول .. ما شاء الله عليها بس..
خالة سلمى: الله يوفقها .. ويوصلها مناها..
نورا ترفع يداتها للسماء: آميــــــــــن وتضحك وتكمل وانا كمان ياامي ولا مرام بس؟
خاله سلمى تضحك: لا تعملي نفسك غيرانه ولا شي..وانتي كمان
مرام ونورا يضحكوا ..
نورا: خلاص ياامي انتي ارجعي غرفتك وانا بجيب لك الفطور انتي وشجون

خرجت خاله سلمى وهي تدعي لنورا ومرام..
مرام مازالت شجون في حضنها .. حطتها وطلبت منها تروح مع جدتها .. بس الصغيرة عاندت..ورفضت..
نهرتها نورا..بس مرام وقفتها.. وجلست وقربت أذنها من أذن شجون وهمست: هكذا تفشلي ماما ؟ خلاص زعلت .. معي بنت ما هي مطيعة..
تغيرت ملامح شجون وهي تقول: يعني إذا خرجت ما أنتي زعلانه مني؟
مرام تهز راسها بمعنى الموافقة : أكيد..
تحط شجون قبله طويلة على خد مرام وتخرج..تلحق بجدتها..
نورا باستغراب: مرام !! أيش مسويه في البنت ؟ والله تحبك أكثر مني؟؟ بدأت أغار..
مرام: عنجد نورا؟
نورا تضحك : لا ولو.. أنتي تستاهلي والله.. كيف تصدقي بسرعه ..مااحد يقدر يمزح معك يعني؟
وكل واحدة مشغولة بما في يدها..
نورا تتكلم: مرام..
مرام: نعم؟
نورا بصوت متردد نوعا ما: أسالك سؤال..
حست مرام بنغز في صدرها: تفضلي..
نورا: ليش عايشه لوحدك..
كانت مرام عند الفرن وظهرها لنورا.. بعدما سمعت السؤال.. ما تحركت من مكانها..
نورا حست أنها غلطت بسؤالها: مرام .. ما تزعلي .. أنا آسفة .. خلاص انسي اني سألتك..
مرام التفتت وحطت صحن في الحوض بدون ما تطالع في نورا..
مرام: لا عادي.. ما في مشكلة..وما اسعفها حرف انها تنطق بأكثر...
نورا سكتت ورجعت تشوف عملها..
وانشغلت كل واحده في عمل..
حتى أذان الظهر..ساعتها نورا بدا عليها القلق..
مرام: نورا فيك شي؟
نورا: أخي من طبعة ما يعزم إلا الجمعة عشان ما يجي من الصلاة إلا وكل شي جاهز..
مرام باستغراب:طيب.. وليش خايفة ؟ ما يجي وقتها إلا وكل شي جاهز..بس بكذا صلاة الظهر بتروح علينا في وقتها..
نورا تغسل الصحون: ما أدري ما أقولك.. بس والله ما كان هكذا قبل الذي قلتلك..
تنهدت مرام وهي تتذكر ألم نورا في هذيك الليلة ..
مرام: ما تشغلي بالك أبدا.. كل شي بيصير مثلما بدك وزياده..
ولأن الجامع قريب من البيت سمعوا الخطبتين.. والصلاة..
تقريبا اصبحوا مخلصين كل شي..التفتت مرام من نورا..
سألت مرام: نورا وين السفره؟
نورا:فوق الثلاجة..
مرام:طيب وين بيتغدوا؟
نورا: في الغرفة التابعة للمجلس..
مرام: طيب..هاتي السفرة .. ووريني هذه الغرفة..
تأخذ مرام السفرة ..ولما وصلت الغرفة شافت حجمها كبير ومناسب..مفروشة سجاد غالي .. ومساند جميلة على الجدار.. بس ما في كنبات ولا مجلس عربي..
نورا: هذي الغرفة إذا في عزايم للأكل .. طبعا ماستغربي طلبت من خالد اكثر من مره يجهزها لنا بطاولة مع كراسيها قال كذا اجمل وكمان اريح في الاكل..
مرام تتأمل الغرفة فعلا جميله.. سجادها باللون البني وفي طاولتين فخمة مناسبة للمكان في اسفل الغرفة.. ارتفاعها حوالي 50سم بنيه مذهبه..
التفتت مرام لنورا: حلوة بالعكس عجبتني مره.. وقطعت السفرة السفري أربع أقسام وحطت كل قسم في جهه.. كل ثنتين جنب بعض..
وراحت على المطبخ..وفرقت الأكل في صحون التقديم..وحطت الأكل على السفر..
حطت الرز باللحم وحطت الشفوت(خبز خاص يعمل من دقيق الذرة والدقيق الأبيض .. في صحن خاص.. ويبل بالزبادي المخلوط بالكراث والكزبرة والبقدونس الفلفل الحار مخلوطة بالخلاط..ويخفف الزبادي بالماء أو الحليب حتى يكون أكثر لذه..)
وبنات الصحن والمحشي ورقائق الكريب بعدما حطت لهم عسل مع سمن بلدي..وصلصة الطماطم ..والمكرونه بالبطاطس واللحم المفروم.. وطبعا ما نست الشربة بالعدس والخضار اللي ما أحد يتقنها مثل مرام..وزينت كل شي يحتاج إلى تزيين مثل الشفوت والأرز.. بشرائح الخيار المقطعة على شكل نجوم.. وبالجزر المماثل .. وغيرها من التفنن الذي تتقنه مرام جيدا..
وراحت قربت الطاولتين من المخصص للأكل كل طاوله في جهه.. وحطت فوق طاولة جاكات الماء والعصير بعدد السفر.. يعني لكل سفرة جاك ماء وجاك عصير..
وحطت الملاحات في كل سفرة ..وملاعق الغرف..
وصحون الفاكهة في الطاولة الثانية والحلا الذي هو كاسترد بالحليب والكيك والمكسرات ..حطت الكريمة بطريقة حلوه وزينت بالمكسرات ورشة جوز هند بعدما غيرت لونه للوردي بصبغة بعصير العناب..
وما بقي في المطبخ غير (السلته) حيث أنه ما ينفع في هذه الأكلة الأشهر على الإطلاق في إلا أنها من فوق النار على السفرة..
رجعت على المطبخ ولبست برقعها..وهي حاسة بألم فضيع بظهرها وكتفها بسبب الحر الذي يسبب لها الألم..
سمعت صوت فتح الباب الذي جهة المجلس .. لأن الشقة معها بابين .. باب جهة المجلس .. وباب جهة الصالة العائلية..
التفتت لنورا : نورا .. شوفي لي طريق أنزل..
نورا بدهشة: وين تروحي..
مرام: أنزل غرفتي..
نورا بنوع من السخرية الكوميديه: نعم؟؟ وتكمل بجديه: لا أولا نتغدى وبعدين أنزلي..
مرام:لا أرجوك .. أنزل أصلي ..ما لي أي نفس آكل..
نورا:صح من التعب سدينا نفسك..سامحيني بس.. خلاص نتغدى وروحي ارتاحي..
*****
وفي الجهة الثانية ومش بالبعيد .. في الغرفة التابعة للمجلس.. بعدما دخل الضيوف المجلس في انتظار أن يجهز الأهل الغداء .. فوجئ خالد بكل شي جاهز..وفي أجمل صورة!!
تعجب!!هو يعرف حريم أخوانه ما في وحده منهم فنانة طبخ .. عشان عادها تتفنن في التزيين!!وأخته وأمه مش من عوايدهم تجهيز كل شي بهذا الشكل هم ينتظروا لما يجي يذوق كل شي وأي شي ما عجبه لا يمكن يتقدم!!شاف كل شي في أبهى حله .. وتقدم وذاق بعض الأصناف بحذر .. ولقى مذاق في قمة اللذة..
شاف كل شي جاهز.. ماء .. وعصير .. مع أنه دائما يطلبهم طلب!!
تعجب من ترتيب الملاعق والشوك ..وهي تحدد مكان كل شخص..
راح على المجلس ونادى ضيوفه يتقدموا للغداء .. وراح على المطبخ ينادي : نورا .. نورا..
نورا سمعت صوته خرجت وقفته قبل ما يدخل المطبخ..
خالد: خير أيش في؟
نورا: عندنا حريم ..
خالد يرفع حاجبه: من ؟
نورا بتردد: عندنا مرام ..
خالد بتعجب: من مرام؟
نورا بقلق بس حاولت انها ماتبين: المستأجرة عندنا.. جاءت تساعدني .. من الساعة ثمانية الصباح وهي عندي.. ولا ما كان قدرت أسوي شي وحدي .. وأنت عارف..
خالد أول ما عرف أنها الساكنة الغرفة كشر وما عجبه الوضع أبدا.. أياً كانت الخدمة اللي قدمتها..
تحولت لهجته للسخرية: هاااااااااه.. يعني ما كفاها طول الأسبوع تروح على الوظيفة ..كمان الجمعة تشتغل في البيوت.. ويتهكم أكثر..بس بصراحة عمري ما شفت شغالة منظمة بهذا الشكل.. الأمانة تنقال..شوفي لي يا أختي العزيزة كم أجرها ..عشان ما تخصمه من الإيجار وأنا بدفع.. تأخرت على ضيوفي بروح اتغدى وبعد الغداء بجيب لك الفلوس..وراح وهو يضحك بسخرية..
نورا أظلمت الدنيا في وجهها وما تدري كيف ترجع المطبخ..وتواجه مرام..
دخلت المطبخ ووجهها أحمر من الإحراج..
شافت مرام تطالعها ..بدون ما تتكلم ولا كلمة..
حاولت تدارك الوضع..
نورا: مرام ..ليش واقفة ؟ تعالي نأخذ أكل للصالة ونأكل أحنا وأمي..
لكن مرام كانت مجروحة .. وجرحها ينزف .. ينزف بلا هوادة..ما عادت تدري هي فين بالضبط..
خرجت من المطبخ .. وخرجت من الشقة بدون ما تنطق بحرف واحد.. حاولت نورا تلحق بها .. أو تمنعها .. لكن ما استطاعت..
رجعت نورا جلست في المطبخ على الأرض .. وبكت .. بكت كل ما في نفسها..
سمعت صوت خالد: هاي..باقي شي؟
يقصد السلته..
جهزتها نورا ونادته : أدخل .. ما فيش أحد..
دخل خالد وشاف عيون أخته حمراء.. عرف أنها تبكي ..بس تجاهل الموضوع .. وناوي يرجع له بعد انصراف ضيوفه..
*****
مرام صلت الظهر.. وجلست على السجادة ودموعها كالسيل تجري.. لا أحد يقوى على إيقافها..
رفعت يديها لرب السماء..ودعت لنفسها بأن يلهمها الله الصبر..وتضرعت لربها أن يفرج كربها.. ويقوي عزيمتها..
وقامت وضعت جسدها المنهك على السرير علها تحصل على ساعة راحة ..
*****
نورا تغسل الصحون وفي انتظار الباقي الذي بيجي من عند الضيوف..
دخل خالد وحط مجموعة صحون على الحوض.. ولاحظ أن نورا تبكي..
وقف أمام نورا وهو يتأمل وجه أخته .. أكثر شي يجرحه أنه يشوف نورا تبكي .. خاصة أنه متأكد أنها كانت سعيدة مع زوجها .. وأنه سبب خراب مملكتها .. لكن لو تدري يا نورا ما هي أسبابي.. هكذا أخذ يكلم نفسه..

نورا من بين بكائها: ليش يا خالد سويت كذا؟ ليش؟ قل لي أيش غيرك ماكنت هكذا .. ولا هذا طبعك... تلتفت للناحية الثانية عشان ماتشوف وجه خالد..
خالد يحاول يكون طبيعي ومتماسك أمام انهيار نورا : ليش أيش حصل عشان تبكي هكذا؟ وهو من داخل نفسه متألم جــــــــدا..
نورا وبكائها يزيد: حرام عليك .. والله حرام.. جاءت الساعة ثمانية.. وهي لسه ما فطرت .. ورفضت تأكل .. طلعتها تعبانه.. ووجهها أصفر.. وبعدما سمعتك نزلت وهي حتى ما شربت شربة ماء ..
خالد يحاول يهدي اخته: متأكدة أنها سمعت؟
نورا:خالد لا تغالط نفسك .. أنت تعمدت تسمعك .. وتعمدت تجرحها .. وتذلها..
وقبل ما يتكلم خالد..سمع صوت أمه من خلفه..
أم خالد (خاله سلمى): خالد .. تعال معي لغرفتي..
وراحت على غرفتها .. نورا راحت أخذت شجون على المطبخ عشان تغديها وتغير لها ملابسها ..ودموعها ما وقفت كلما تذكرت مرام..


دخل خالد غرفة أمه .. جلس أمامها على الكنبة ..بدون ما ينطق كلمة ..
حطت أم خالد يدها على يد خالد..
أم خالد: خالد يا ولدي .. أصابع يدك سوا؟
خالد هو شبه متأكد من الكلام اللي بتقوله له امه لكن لايمكن يعصي لها امر او يقاطعها في حرف حتى لو كان عارف الكلام: لا يا أمي..
أم خالد : وكمان البشر ياولدي..رجال ونساء..فإذا شفت من أم شجون أشياء ما عجبتك .. تأكد ياولدي أن مش كل الحريم مثلها..أشوفك يا خالد بدأت تكره وجود المرأة في حياتك بشكل مرضي.. وأنت دكتور ياولدي .. فلازم تلحق نفسك وتتخلص من عقدتك..
خالد ساكت ما نطق حرف..
وأمه تكمل: خالد مرام عايشه لوحدها..وهي عندنا من ستة شهور تقريبا.. ما سمعنا عليها كلمة .. من العمل للبيت والعكس يا ولدي .. ما شفنا منها إلا كل خير.. والله ياولدي أن بنات السوق تعرفهم من نظرة..الله وحده يعلم ما هي ظروفها عشان تجبرها تعيش لوحدها..لكن ما سويته اليوم غلط ما توقعته منك .. بدل ما تحصل البنت عندنا على كلمة شكر على الأقل .. تخرج من عندنا مجروحة ومهانه..والله ما يجوز يا ولدي..
خالد بصوت واطي: ليش أجرتي لها يا أمي ؟ ما كنا ناقصين فلوس عشان تأجري الغرفة؟
أم خالد ماعجبتها لهجة ابنها ولا طريقة تفكيره: ما أجرتها عشان فلوس ياولدي .. أنا حرمة كبيرة .. ورحت وجيت وسافرت مع أبوك الله يرحمه كل الدول لما كان يشتغل في القنصلية..وعرفت الناس أشكال وألوان ..وعرفت معادن الناس..
سكتت وخالد مانطق بحرف.. تكمل أم خالد لكن بنوع من الحزم:
ويوم جاءت مرام عندنا ..عرفت أنها محتاجة لهذه الغرفة ..عرفت من عيونها أنها في ضيقة .. كان ودي يا ولدي أسكنها ببلاش .. لكن عزة نفسها كانت تتكلم من بين عيونها الظاهرة لي ..ولو حاولت تداريها ببرقعها..
وقف خالد خير أمي .. الان أنا بروح باقي شي؟
أم خالد: لا ياولدي.. روح الله معك..
خالد خرج من الغرفة .. وقبل يغلق بابها سمع صوت أمه: خالد.. أصابع يدك لا يمكن تتساوى..
*****
الساعة الرابعة صحت مرام بعدما نامت لها ساعة ..صلت عصر..وقامت عند الشباك تطل على الشارع شايفه الناس رايحه وجايه ..
كل واحد رايح وجهه عارفها ..
وجالسة تتأمل ..سمعت الباب يدق.. بس ما اهتمت.. ولا راح تهتم بعد اليوم.. يكفي اليوم ما جاها .. جلست على الأرض وأخذت دفترها .. هو ليس وقته الآن ...لكنها بحاجة له الآن .. وهو ليس بمن يرد لها طلبا..
*****
وخلف الباب نورا .. وتطرق بلا مجيب..حاولت .. نادت.. بلا فائدة..رجعت بخفي حنين..
رجعت .. وراحت على غرفتها مباشرة..
....في الغرفة المجاورة ...خالد متصل بالنت يبحث عن بعض المواضيع اللي تهمه.. بس ما استطاع ..فكرة مشتت ..
يفكر في الكلام اللي سمعة من نورا..
وكلام أمه.. وتصرفه..والكلام اللي سمعه عن مرام !!!! هل هو صحيح أم خطأ؟؟؟؟
ما عرف من يصدق؟
ترك ما بيده .. وغير ملابسه..استعدادا يروح على المستشفى..مع أن دوامه ما يبتدي إلا بعد المغرب..
طبعا أنا ما أوصف ملامح الشخصية إلا عندما تجي الحاجة لذلك..
الدكتور خالد طويل ..بشرته مائلة للبياض .. لون عيونه أسود..وشعرة أسود .. لحية خفيفة..جسمه رياضي درجة أولى .. يلبس غالبا سبورت.. عمرة خمسة وثلاثون سنة..
خرج من غرفته وشاف غرفة نورا مفتوحه شويه... قرب من الباب.. كانت نورا راميه نفسها على سريرها ووجهها على المخده وتبكي...
آلمة منظر اخته جـــــــــدا.. ظل واقف.. وماقدر يدخل لأنه عارف ردة فعلها..
تنهد تنهيده عميقه.. وطلع من الشقه..
*****
وكما تمر الساعات تمر الثواني عند مرام..لبست البالطو( العباية) وطرحتها وبرقعها..وخرجت.. عسى تلاقي بعض الأكسجين الذي انعدم في الغرفة..
نزلت وتوجهت ناحية حديقة الحي..وما تدري عن العيون اللي تراقبها...
خالد نزل بعدها.. وقبل ما يفتح باب السيارة شافها .. وتعجب .. وين بتروح وهي مش من عادتها تروح أي مكان ؟؟
مشى وراها... ترك السيارة و
مرام وصلت الحديقة .. عبارة عن حديقة عشبية صغيرة .. فيها بعض الألعاب البسيطة للأطفال..وشوية أشجار.. كانت الكراسي الموجودة كلها مليانه..
راحت وجلست تحت واحدة من الأشجار..
كان الجو حلو ومغيم..
وهي تتأمل الأطفال وهذا يجري .. وهذا يبكي.. وهذا يلعب..
وتلك العيون بدورها .. تتأملها..
شافت ولد صغير يجري ناحيتها .. وعندما وصل وشاف أنها مش أمه تراجع شوي..
مدت له يدها ..ونادته: تعال ما تخاف..قرب الولد شوي .. حطته مرام بحضنها ..وضمته بحنان.. وكأنها تضم ولدها..وراحت تلاعبه..
كان الولد تقريبا ابن سنه ونصف..
سألته وين ماما؟الولد تلفت يمين ويسار ..وما عرفها خاصة أن كل الحريم لبسهم متشابه لحد كبير..
بس أم الولد سمعتها .. أشرت لها وقالت لها: أنا أمه وشايفته..
تبسمت مرام ..
وقفت والولد بحضنها وراحت به لأمه
جلست حوالي نص ساعة.. وهي تتأمل الأطفال.. وفكرها في عالم ثاني..قامت نفضت عبايتها ومشت بهدوء ورجعت على البيت..
وما تدري أن خالد يتبعها..وصلت لباب شقتها .. وكتفها يألمها .. ما استطاعت تفتح الباب..سمعت صعود أقدام .. وقفت بينما مر خالد.. وعندما عرفت أنه هو .. تمنت لو تنشق الأرض وتبلعها..بصراحة أكثر أصبحت ماتطيقه..
مر من جنبها.. والتفت وشاف أنها ماسكة كتفها .. وتناظر المفتاح ..
رجع لجنبها وسألها: في مشكلة في الباب؟
ساكتة .. وما ردت..
وهو يعرف شعورها ناحيته تماما في هذه اللحظة بعد اللي سمعت منه.. بس هو ما اهتم..
تقدم أكثر: طريق لو سمحتي وأنا بفتح..
تراجعت مرام للخلف أكثر.. وفتح خالد الباب..وطلع..
ودخلت مرام شقتها..
وبعد المغرب تنزل نورا مره ثانية تدق على مرام الباب لكن مرام سوت نفسها نايمه...
وقلبها يتقطع .. تعرف ان نورا مالها أي دخل بالموضوع لكن لازم تلاقي حل وبينما تلاقيه تحاول تتهرب من نورا وخاله سلمى...
سمعت نورا تطلع الدرج... وطلعت منها هي تنهيده عميقــــــه...
*****
وتستمر الحياة....ويمر اسبوع.......
حاولت مرام فيه جاهده انها ماتتلاقى بالمدعو خالد ..ونورا مانزلت لها شعرت مرام بقلق لغيابها لكن هكذا اريح لهم الثنتين..
..........................

وفي صباح اليوم كان الجو ماطر مطر خفيف والجو مائل للبروده... وصلت مرام الشركة متأخرة بسبب المواصلات ....باقي على التوقيع عشر دقائق فقط..
كانت متجهه للمصعد.. بس لفت انتباهها بنت صغيرة تبكي..
راحت لها وحضتها : مال القمر يبكي؟
بس البنت ما وقفت بكاء
مسحت على راسها.. وقبلتها على خدها .. وضمتها بحنان..وهمست عند أذنها: خلاص ماما ولا تبكي ياقمر.. قولي لي مع من أنتي هنا وأنا بوديك..
شافت البنوته من بين شهقاتها وجهه مرام وشافت عيونها ونطقت من بين دموعها: مع بابا..
مرام تمسح عيون البنوته: خلاص أنا بوديك عند بابا .. أيش اسم القمر؟
" شهد
مرام: اللــــــــــــــــــــه . . اسم يجنن وما يصير صاحبته تبكي..
خذت البنت وراحت بها على المكتب.. بعدما شرت لها فطور وتسالي..هدأت البنت..
أول ما دخلت المكتب تأملوها محمد وأيمن باستغراب..
بس هي ما خلت نظرات الاستغراب منهم تطول..
مرام: شباب .. ماحد يعرف منكم بنت من هذي؟
هزوا رؤوسهم بمعنى لا..وهم ساكتين وحواجبهم مرفوعه علامة الاستغراب..
مرام: حصلتها في الرسيبشن (الاستقبال) وقد كلمت السكرتي(الأمن) الخاص بالشركة إذا حد دور عليها يدله علي..
أيمن وهو يتأمل شهد: وإذا ما حد ظهر؟
مرام: ساعتها لازم تساعدوني وتروحوا على القسم تحطوا بلاغ .. وأنا باخذها معي البيت..
محمد: وإذا ما ظهروا أهلها؟
مرام: ياشيخ بيظهروا البنت مش بنت شارع .. تقول جاءت هي وأبوها.. وبعدين شوف شكل البنت ..واضح أنها بنت ناس..ساعتها بنستعين بوسائل الأعلام .. إبتداءا من الصحف وانتهاء بالتلفزيون.. لا تكبروا القصة ايش فيكم؟
محمد: لا ابدا بس يعني نفرض..
حست بالبنت ترجف من البرد خاصة أنها لابسه كنزة على تنوره قصيرة مع هيلا هب..
ولأن الجو مطر وبارد نوعا ما عندما خرجت مرام من البيت وقد لبست لها شال..
والآن الجو صار أكثر بروده لأن المطر بدأ ينزل اكثر..
أخذت الشال ولفته على جسم الصغيرة..
مرام : هاه الأمورة الآن مش بردانه ؟
هزت راسها بلا وتأكل سندوتش..
هنا دخل عبد الحافظ زي المجنون : شباب شفتوا لي بنت صغي... وقبل ما يكمل شاف شهد بحضن مرام..
ما يدري ليش شاف أن عفرايت الأرض صارت تتنطط في وجهه
عبد الحافظ: تصدقي طول عمري مش مرتاح لك.. بس ما توقعت أنك حقيرة وسافلة لهذا الحد..كنت أحتقرك .. بس الآن صرت أكرهك..
صدق مالك أمان..أصلا لوكان في أهلك خير ما كنتي هنا.. وكلام يجرح في الصميم..
الكل ما استوعب الموقف بما في ذلك مرام..
وعبد الحافظ يكمل: كيف تأخذي البنت وهي كانت خلفي وأنا بآخذ لها فطور؟ كيف يا...
بس قبل ما يكمل ..
أيمن بغضب: بس .. بس يا غبي.. البنت ما كانت خلفك..البنت كانت تدور في الشركة وهي تبكي..
محمد بصوت لا يقل حدة عن صوت أيمن: ومرام أخذتها .. وحطت بلاغ عند رجال الأمن ..يعني كان مفروض تنتبه .. وبعدما ضيعت بنتك كان لازم تسأل..
مرام ساعتها وقفت .. وحطت البنت من حضنها .. وأخذت شنطتها..وخرجت وهي مجروحه..
محمد: أنت واحد وسخ..
أيمن: فعلا لاتصنع المعروف في غير أهله ..
محمد: لا والبنت تقول إذا ما ظهر أهلها ياشباب ساعدوني وحطوا بلاغ في القسم وأنا بروحها معي البيت وأعتني بها ..
أيمن: وفوق يامحمد من كثر ما تحن عليها حسبناها بنتها .. شفت كيف خلعت الشال ولبسته البنت ؟ وكأنها تقول إذا كنت متدفيه أنا ما أحس بشي..
محمد: والباشا مسوي فيها رجب طيب أردوغان هو ومبادئه..صدق اللي اختشوا ماتوا..
عبد الحافظ يتأمل بنته اللي جت وقفت أمامه .. لابسه شال سوسني .. مغطيها كلها لأنه أصلا كبير عليها .. وفي يدها كيس ورقي مليان تسالي ..
وشوي شوي ويستوعب كلام الشباب .. ويستوعب اللي صار..بس صحى على صوت شهد: بابا ليش خاله زعلت ؟ ليش أنت زعلت؟
لف عبد الحافظ ناحية الباب وطلع بسرعة هائلة..
عبد الحافظ: شباب انتبهوا للبنت لما أرجع..

*،




آنتقاء مميز .. مَ ننحرم من جديدك

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

سلمت يمناك
طرح جميل جدا

راقني انتقائك الماسي
تسلم يمينك
ودام عطائك العذب
پآقة ورد

تسسلم يدياااتك على رووعه طرحك
الله يعطيك العاآآآآآآفيه ...
وربي يسعدك

سلم ذوقك واختيارك
ربي يعطيك العافيه
وما ننحرم من جمال طرحك
لروحك الجوري

طرح رائع
يعطيك العافيه

يسلمو ع المرور

سلمت يمنآكـ على مآحملتهـ لنآ
موضوع عآلي بذوقهـ ,, رفيع بشآنه
مودتي