ديوان الشاعر عبدالله العليوي . رحمه الله ..

مدري متى صارت جروحي تسليـك
عقب الوفاء وشلون غرتـك دنيـاك
يا من علي اليـوم كثـرة طواريـك
نهايـة الغـدار مـاظـن تخـفـاك
في حبك الثاني عسـى الله يهنيـك
حنـا مـع الأيـام ندلـه وننسـاك
كنت الرجاء واليوم خاب الرجاء فيك
أرخصت ماضينـا وغيـرت مبـداك
وين الحنان اللـي مقـره موانيـك
وين الضمير اللي عن الغدر ينهـاك
غال الدموع أرخصتها لك وأنا ارجيك
ابني لـك بدمعـي وتهـدم بيمنـاك
يكفين ما قاسيـت منـك و تغليـك
منتب علـى قلبـي وصـي ومـلاك

ماجيت حب لك ولانيب راجيك
ماجيت يمك في رجاء مد يمناك
جيتك مثل غيري بنفسك اعزيك
مالك وجود اليوم مت ودفناك
شربت منك المر واكتم واداريك
حتى عدوي مايسوي سواياك
الشاهد الله ماخبر جبت طاريك
وان جاء لك الطاري بخير ذكرناك
عين بكت لك ماتلد النظر فيك
غصب علينا من سواياك عفناك
عواذلي قامت تبيعك وتشريك
ارجوك تبعد عيدنا يوم فرقاك

قلبي بعيد عنك وين انت وياه
قلبي عليك اليوم ابعد من سهيل
قلبي كفاه من الشقاء منك ماجاه
ماحده الله للشقاء والغرابيل
قلبي معك ذاك امس تامر وتنهاه
واليوم عيني منك ماتسهر الليل
نسيت حبك وانت ياليت تنساه
أيامنا ضاعت خداع وتمثيل
عزي لقلب مثل قلبك تولاه
ماعاد ابي للي حصل منك تعليل
هذا الفراق اللي تبيه وتمناه
خلك بعيد وعلهالك تساهيل

محاولة نسيـان حبـك وطاريـك
أكبر خطاء فكرت به في حياتـي
حبك سطابي حطني بين أياديـك
صار إندفاعي لك من أبرز صفاتي
ابيع كل الناس يازيـن وأشريـك
وشوف في نظرة عيونك غناتـي
ليت الهموم تصيب قلبي وتخطيك
ما اقول قلي من يسوي سواتـي
يزداد حبـي لـك بزايـد تغليـك
حسيت إني فيـك حققـت ذاتـي

راجع تبي قلبي عقـب ماتندمـت
راجع تبي قلبي على خبرك العـام
العام انادي ياهوى البال وين انـت
واليوم حبك ينتظر حكـم الإعـدام
على الجفاء من طول صبري تعلمت
والجرح في قلبـي تداويـه الأيـام
خلك بدربك لو مشيـت وتعثـرت
مسكين ياباني قصـورك بالأحـلام
مجبور أبيعك لو بكيـت وتأثـرت
وش حيلتي حظي تـردى ولا قـام
ما عاد لي بالحب مثلـك تغيـرت
يا زين حبك ينتظر حكـم الإعـدام

ما بقى بي حيل للجرح الجديد
جرحك اللي فات توه مابـرا
صارت الأيام مثلـك ياعنيـد
عن جروح القلب قلبك مادرا
من خطاك العام حاول تستفيد
وادفن الذكرى القديمة بالثرا
يوم قلبي عنك مايبعد بعيـد
وأنت قلبك بالهوى باع وشرا
ليت من ينساك في حبٍ جديد
ليت حبك ما على بالي طـرا

ياليتني ماشفت زولك ولا جيـت
دربك ولا شافت عيوني عيونـك
ليتي معك بالمعرفة مـا تماديـت
ليت الظروف وسود الأيام دونـك
من قبل أشوفك ليتني عنك صديت
قبل تمكـن بالضمايـر طعونـك
الوقت ما جالي على مـا تمنيـت
خلن بحالي ما ترجيـت عونـك
يا زين من طول المشاوير مليـت
يا مشغل قلب شقا فيـك هونـك
وين أنت أنا لك تالي الليل ناديت
حتى السهر ماله حـلاة بدونـك

لو ترد ايام ضاعت في رجاك
ماسهرنا في غيابك نرتجيك
داري بالجرح جرحي ماخفاك
تدري ان الحل والله في يديك
خل جرح القلب يرفع مستواك
غيرتنا مثلك الدنيا عليك
بالجفاء والصد يوم الله بلاك
ليت ربي بالموده مبتليك
لاتعاتب والخطآ كله خطآك
بعت منهو في حياته مشتريك
ابتعد لو كان قلبي مانساك
قلتها مجبور ابعد مانبيك

يعني خلاص ارخصتنـا مـا تبينـا
نقطع رجانا منـك مـره وننسـاك
قفلـت بـاب المعرفـه وانتهيـنـا
وش عاد لو نسمع مع الناس طرياك
لو رحت عنا اليـوم باكـر تجينـا
لولاك ما عشنا مع الحـب لـولاك
أنت الحبيب اللـي بهجـرك بكينـا
يا ما تلوعنـا علـى أيـام فرقـاك
وين الليال اللـي بقربـك قضينـا
يوم أنت مرضيني وأنا أقوم برضاك

حاولت أعزي مثل غيري من الناس
لقيت نفسي أستحق العـزاء فيـه
يا موت مالك قلب ما عندك إحساس
ما شفت حال اللي فقد شوف غاليه
يا موت ما ترحم طوى حالي الياس
قلبي جريحٍ ما لقى مـن يواسيـه
يا موت لو تشرب من الهم لو كاس
ترحم وحيـدٍ هـم قلبـه يباريـه
قالوا مقدر قلت يا نـاس لا بـاس
أصبر وهمي في حشا القلب مخفيه
أمرٍ قضاه الله على العين و الراس
خلوني أنسـى لا تجيبـون طاريـه