ديوان الشاعرة ( عابرة سبيل ) _ رحمها الله

ريجـيم

دوم يعيرني يقول : انتى متين
حلجك المفتوح لازم نغلقه

هيه يا دبه لزوم تخففين
والا أثور فيك عشرين فشقه

وفي رجيمي استمريت سنتين
جدي اللي مات بغيت ألحقه

ويش رايك؟..قلتها بصوت حزين
قال دبه..وانقلبتي لي اسلقه

العـنز

تطورت العنز مع من تطور
ولاهوب مقصور التطور على الناس

عقب الربيع الزيد والخد الأخضر
قامت تعلك بالمدينه بقرطاس

ترضع صخلها من حليب مبستر
تخشى رشاقتها مع الوقت تنداس

باقي قليل ويشرب التيس منكر
ويروج الهروين راعي وعساس

قصائد ساخرة

ياخبلي الغايب متى ترد للعين
متى أشوفك أوتجيني رساله

صحيح بالدنيا خبول كثيرين
لكن خبالك يا حياتي لحاله

ياناس..وين اسبنش باباي
باعطيه خل نقل همي

حتى يصارع جميع اعداي
واول مايذبح ولد عمي..!!

صوت السهارى

طلال تكفى تراي دخيلتك كافي
لا تطري البعد والتوديع والفرقا

الليل..صوت السهارى حسك الدافي
يزيد من لوعتي والضيق والحرقا

إن لامس الجرح قولك انسف الحافي
وافتح زراير هدومي لضيقة ترقا

وينلاف قلبي بتال الليل ينلافي
ثم تنقلب دمعتي تنهيدة شرقا

كلمة طلال

باعلن على كلمة طلال احتجاجي
طلال يكفينا تجاريح يا خي

ما انته بلاجي لا ما انته بلاجي
تكفى تراها كلمة تذبح الحي

قل ضيف قل زاير لناس هجاجي
وبركه نرد وكن ماصار به شي

خلك على ماقيل في برج عاجي
لو تحترق كل البشر في داخلي في

شفني وشف حالي وقل ابتهاجي
عقب انقلاب الحال وش صارير في

من أول كيفي وحره ومزاجي
واليوم ماعندي من اللي مضى شي

مديت كفي للعطا وطاح تاجي
وبعض المبادي دستها تحت رجلي

مشية العسكري

تل قلبي وقاسه وافحصه واسطره
ثم قطه على حافة جليب طويل

المحبه بعينه..مسخره بمسخره
والمحبه بعيني دبلتين وكليل

اتعيل إلى منه عطاني اظهره
وان نظرني غديت صغير مايعيل

وصار قلبي مكينة وقرقعة منجره
وحس طقاقة تضرب وناس تشيل

هب ياذاك الاسمر..ما اشجعه ما اظفره
فيه ضحكة طفوق وفيه هرجة ثقيل

مشية العسكري قدام جمع اومرا
في كبود العذارى منه حب وغليل

سكبة التاجر اللي فيه عرق افقرا
لا تكبر ولابذر ولاهو بخيل

شاربه ورمش عينه عينه وحاجبه واشعره
ليلة خرمسية..لاقمر ولافتيل

جاه قلبي صغير يرتجي وانهره
وجاه قلبي شجاع ورد يمي ذليل

ضلع وراه بكبره يدمره لا خزره
كيف اجل يا جماعة ان خز عابر سبيل؟

نون

ليه سموا صبي العين نون؟!!
لن نونك يعيش بنونها

اه يانون..يانور العيون
يابعد نونها وعيونها

لك غرام محشم ومحزون
هو سبب عابرة وفنونها

ولك مكانة تعلت بالمزون
جملة الناس طاحت دونها

مال الأيام في غيبتك لون
إنت نكهة حياتي ولونها

الأسمر

الاسمر اللي زارني في محلي
الله يجيره من جميع الصواديف

عيا على قطع المواصيل خلي
يومه درى في علتي زارني ضيف

جلس يسليني بهرج يسلي
صادق لو ان الهرج بدعه وتأليف

إليا ضحك جيته من الضحك كلي
واليا سكت ضاعت جميع السواليف

قال التغلي؟قلت مامن تغلي
قلت الفراق؟وقال مامن تكاليف

وقال أبروح وقلت واكبر غلي
وقامت تدق طبول قلبي تحاسيف

ليال عمري كلبوها غدن لي
عداك..ياليلة رجوع المواليف

الله اكبر

لي صاحب هو الطرب والذاذا
زبنته الله عن جميع الحواديث

ماهمني هذا ولا اريد هذا
كنه مورثني الملايين توريث

الله واكبر ميتين استعاده
ماكنه الا نازل لي من الغيث

لا مر..كن القلب يطلب انقاذه
كنه برازي والمشاعر مغاليث

ان جيت ابا ارقد كن بالعين ماذه
فرقاه نار وذكرياته محاريث

واصبري اللي مقترب من نفاذه
باسباب من بيني وبينه مواريث

أحــلام

ياما على نفسي بالأحلام كذبت

وياما صبرت وصبرنا مانفعنا

وياما..وياما من وداعه تعذبت
وياما نحاول نفترق ما استطعنا

كم مرة ودع وكم مرة غبت
وكم مرة عقب الوداع اجتمعنا

ياما توادعنا وشرق وغربت
ويوم إلتفتنا في بعضنا رجعنا

لاقادرة أنساه مهما تهربت
ولا معترف في حبنا مجتمعنا