رواية أقدار

نزل من الدرج وتوجه لها ابعد فاطمه ومسك يدها : امشي بشويش سحبت يدها بضيق : اتركني ! طنش كلامها ورجع مسك يدها: امشي يا بنت الحلال ! طالعته ورددت بصوت خافت : ابعد عني! ساندها ودخلها للجناح بالرغم من رفضها ! جلست على السرير بتعب ...وصدرها يهبط ويعلو ... تكلم وهو يطالع امه إلي دخلت وحامله البيبي والتوأم خلفها ناشبين لها : يمه جهزوا لساره اكل ...وشوربه قاطعته ام سالم بضجر من التوأم : انا عارفه اتحرك من ذول ! طالعهم بحده : سوار خذي اختك واطلعي برا ...ما تشوفين ماما تعبانه ! سوار خافت من ابوها سحبت حور وطلعت بدون نقاش ! أم سالم زفرت براحه : ايوه كذا ... خلاص يمه انت روح الحين تدخل ام وسيم وام سلوى يساعدوني عندنا شغل ! تكلم وعيونه على ساره المنهكه : اساعد ساره قاطعته : لا تهتم حنا نقوم بالواجب وزيادة ! هز رأسه وطلع من المكان بهدوء ! ام سالم اقتربت من ساره بحنان : الحين بعد الاستحمام ان شاء الله تتحسنين .. هزت راسها بتعب مو قادره تتكلم ..وبطنها تحس بسكاكين تنغرس فيه ! ** ** ** جالسه تلاعب حفيدتها بفرح : اغغغغ عفس ملامحه بقهر : انا ما يقهرني الا هالاسم ! ساره ! انقطعت الاسماء حتى تسمي البنت بهذا الاسم ؟!! ابتسم ماجد على ابوه للحين مو راضي على الاسم : حلو الاسم ! عفس ملامحه : يا خوفي تطلع هالبنت على صاحبة الاسم الاصلي ! ام ماجد طالعته : علامك للحين معلق على هالاسم ؟! خلاص رغبة امها تعبت بحملها ...خليها تسمي مثل ما تبغى ! ابو ماجد بمكابره : انا مو ضد انها تسمي ...انا ضد هالاسم ! ام ماجد : مو حلوه كل يوم تعيد هالاسطوانه ...بلاه تزعل عائشه من كلامك ...تراها صديقتها واكيد ما ترضى عليها ! ماجد بابتسامه وهو يشوفها مقبله لهم: خذ راحتك يبه ...مو عاجبها تطق راسها بأقرب طوفه ! خزتها بعيونه واقتربت منهم : شفت يا عمي ولدك ما هو طايقني ! جلست جنب ام ماجد وبتحدي : انا ما اطق راسي بالطوفه ..انا اخذ حقي وزياده ..وازعل عند اهلي ! ابو ماجد ابتسم لها : اهم شيء البنت ما تطلع لك بالقوة ! ماجد بضحكه : تم قصف الجبهة بنجاح ! عائشه مطت شفتها : الله يسامحك يا عمي !، رد بصراحه : والله تبغين الصراحه ...تراك مو هينه قويه وتوقعت من الخطوبه تنفصلين عن ماجد من قوة شخصيتك ...بس سبحان الله ربنا كتب تكملي مع ماجد وتيجي سوير على هالدنيا ..ومط شفته مو عاجبه ! ضحك ماجد على شكل ابوه...وبعدها طالع عائشه : شفت بسببك ابوي زعلان علينا ... عائشه بابتسامة : مو زعلان بس يتغشمر معك ...صح يا عمي ! وغمزت له بضحكه ! ام ماجد مدت لها البنت : خذي غيري لها ...شكلها متضايقه من الحفاظ عائشه بضجر : دوبني غيرت لها ! ماجد : تستاهلين ...امك ثم امك ثم امك يا شيخه ! ابتسمت وحركت حواجبها واخذت بنتها : عسل على قلبي ! ام ماجد بتساؤل : معقول ولدت ساره ..هي بشهرها الاخير ! عائشه وهي واقفه وحامله البنت : والله ما ادري اتصل هلى جوالها مقفل ! ربي يحفظها وتقوم بالسلامه... *** *** ** فتحت عيونها في الصباح بصعوبه على صوته ...حست نفسها بحلم ...وما هي مستوعبه ...ناظرته جالس عند البيبي ويلاعب فيه وكأنها هالطفله تفهم عليه ! ما تدري كم من الوقت نامت ...جسمها كله مكسر ...وبطنها عضت على شفتها من وجع بطنها .... إلتفت عليها وعدل جلسته بابتسامه : صباح الخير ! ردت بصعوبه : صباح النور ابتسم لها بود: كيفك الحين ؟! يوجعك شيء ! ضغطت على بطنها بشويش وبصوت اقرب للهمس : تعب عادي ...كم الساعه ؟! ناظر ساعته : الساعه 8:30ص استغربت نامت طول الليل بدون ما تحس بنفسها ...طالعت البيبي وقبل ما تسأل جاوب على سؤالها بعد ما فهم وش تبغى : اخذتها امي عندها ..علشان ترتاحين ..والصبح جبتها هنا ! باستغراب نطقت: نمت كل هالوقت ! وقف وهو يناظرها شاحبة الوجه وملامحها منتفخه للحين : اعطيتك البارحه منوم ...علشان تنامين وترتاحين ! الحين نحضر لك فطور ...تحتاجين تغذيه ! بس انتبهي من التوأم على البنت ! دقيقه وراجع.. مستغربه هذا نفسه والا استبدلوه ! البارحه ماد البوز وحالته حاله ...والحين رايق ! طالعت سوار وخلفها حور متلهفات للبيبي : ماما نبغى نشوف اختنا ! حور : بابا يطردنا ! هزت رأسها بالموافقه وبصوت هامس : من بعيد شوفوها لا تحملونها ! ناظرت السقف بتعب ...اكيد ابوها ما معه خبر ...ولا احد ... ما تدري وين جوالها ! طاح قلبها على عصبية ابو فهد وهو يأخذ البنت من يد سوار : ليه تحملينها ! شد اذن سوار : مو قلت لك لا تقربين من اختك ! تحملينها بعد ! برا عند فاطمه اشوف ! رجع البنت مكانها بشويش وبنبره خائفه استغربتها ساره : الله ستر والا وقعت من يدها ! مستغربه من رد فعله .... رفع نظره وشافها تتأمله سآل باستغراب: وش فيك تناظريني كذا ؟! ردت وعلى راسها علامات تعجب : مو انت ما تبغى بنت ....وماد البوز من البارحه ! رفع حاجب باستنكار :انا !! مين قال ! ردت وهي تراقب رد فعله : تصرفاتك البارحه ! هز راسه بالنفي : انا يمكن تفاجأت انها بنت وما كنت متوقع هالشيء ...بس الحين عادي الحمد لله ... اخذت نفس وسألت: وين جوالي؟! ابوي ما يدري قاطعها : انا اتصلت فيه واعطيته خبر ...واليوم ان شاء الله رح ييجي يحضر العزيمه ويتحمد لك بالسلامه رفعت حاجب : عزيمه ؟! هز راسه : ايه عزيمه اخواني وعيالهم واهلك والجيران بمناسبة انك قمت بالسلامه وقدوم هالحلوه واشر على البنت تنهدت وتكلمت بهدوء : تدري للحين ما شفتها ! قام وحمل البنت وجلس جنبها على السرير : شوفي حلوه مثلي ! ونفخ صدره بغرور ....مطت شفتها وبمكابره : تراها مو حلوه لانها تشبهك ! ابتسم على تعليقها : احس كل بناتي يشبهون لي وما يشبهونك ....ان شاء الله لما ييجي فهد يطلع يشبهك ...عادي ولد وما يعيبه الشكل ! وضحك بصوت مرتفع على ملامحها المنتفخه ! ردت بغيض ونسيت تعبها: جمال الشكل مو شرط ...جمال الاخلاق هو الاهم ...واذا ماني عاجبتك الف واحد يتمناني و قطعت كلامها لما ناظرها بحده : جيبي سيره هالالف مره ثانيه علشان اناديهم يصلون عليك جنازه ! اشوف التعب راح ولسانك وش طوله انتبهت لكلامها وردت بترقيع : قصدي قطعت كلامها لما دخلت ام سالم ومعها الفطور .... ** ** مها بشماته : الحمد لله جابت بنت ! اميره رفعت حاجب : وش فيها البنت ؟! مها بانتعاش: انت ما تدرين وش كثر عمي متشوق يكون عنده ولد ...والحين جابت بنت قاطعتها اميره بتحقير لكلامها : صدق سخيفه وما عندك سالفه ! ام محمد تكلمت بلسان ثقيل : س ر ه هزت راسها اميره بأسف ما تفهم على امها : وش تبغين يمه ؟!، مها تحاول تفهم عليها : ساره ؟! هزت ام محمد راسها اميره عقدت حواجبها : وش فيها ؟! ام محمد ردت ولسانها ثقيل ... طالعت اميره مها وهزت راسها بأسف ...مو قادره تفهم عليها....تنهدت اميره بحزن على حال امها ..يمكن هذي خطيئة ساره ...ما تقدر تتكلم وإلي حولها يفهمون عليها ...ولا تقدر تحرك يدها ...حالها يزداد سوء وحالتها النفسيه بالحضيض ..وخاصه بعد الطلاق ...غير الامراض المزمنه إلي اصابتها ...قلبها يوجعها عليها ...مهما كانت سيئة تبقى امها ...وما تقدر تتخلى عنها ... ** ** ** ابو راكان بإهتمام : وعساها طيبه ؟! ابو محمد براحه : الحمد لله طيبه ...لو جيت معي قاطعه ابو راكان : تعرف عندي مراجعه بالمستشفى ابو محمد باهتمام : وش قالوا لك ؟! رد بتعب : يا اخوي ما بقى من العمر كثر إلي راح ! دخلت ب 80 وش انتظر الا حسن الخاتمه ! ابو محمد بتأثر لو يطلع بيده ما فارق الدنيا ...وبنبره ضعيفه : خلاص راح العمر ...هدني المرض والتعب ...ما ابغى من هالدنيا الا ارحل وقلبي مرتاح على ساره ....خايف عليها من خلف ! ابو راكان بضعف: بعد عمر طويل يا اخوي...بس عندي طلب اتمنى تنفذه بعد ما يآخذ ربي روحي قاطعه ابو محمد ؛ لا توجع قلبي بسيره الموت .... ابو راكان بتصميم : ابغاك تطلب من ساره تسامحني ...انا طلبت منها السماح ...بس احسها ما سامحتني .... ابو محمد بهدوء : بس انت اوجعتها وجرحتها ! ابو راكان بندم : الله يلعن الشيطان ...اعماني ابو محمد : ساره ما هي من النوع الحقود وانا رح اشوفها بعد ما تطلع من النفاس تزورك ...وننسى الماضي ...وترجع المياه لمجاريها ! هز رأسه ابو راكان :ان شاء الله ! ** ** ** ** استلقت على السرير بشويش ...وهي تشعر براحه وسعاده بعد ما شافت ابوها واخوها وعمار وعزام واخوانه ....شعور جميل تحس انه لك اهل وعزوه .... طالعته لما دخل الغرفه ...ورد السلام بشويش ...اقترب من البنت .. قبلها بهدوء ...وبعدها طالع ساره : وش ناويه يكون اسمها ؟! طالعته وهزت كتوفها : ما فكرت للحين ! انت في بالك اسم ؟! رفع حاجب بتفكير : وش رايك «نور» خزته ساره : اخاف اسم وحده تحبها قطعت كلامها لما اقترب وجلس على طرف السرير وبعتب تكلم : هذا ظنك فيني ...اني لي علاقة سابقه ؟! ردت بترقيع :ءء قصدي ...ام فهد كانت تتكلم عن البنت إلي خطبتها ...وطول الوقت مها تمدح فيها ..اي انسان يشك قاطعها بتحذير : انتبهي تتعرضين لاعراض الناس ...ترى عندك بنات يا ساره ... ساره بحيره : ليه كنت تبغى تخطبها ؟! رد بهدوء: انا ما خطبتها ...انا مدحتها ومدحت اخلاقها ...وام فهد فكرت اني ابغاها .. ساره بتشكيك : انا سمعت السالفه مو كذا ! رد بلامبالاه : ما تفرق معي الروايه إلي وصلتك ...إلي يهمني انها هذي البنت محترمه ومؤدبه ويا حظ إلي رح تكون من نصيبه ! انتفخ وجهها من الغيره : روح اخطبها قاطعها بابتسامه : بدينا بالغيره ! زفرت بضيق : اي غيره ؟! وليه اغار عليك ؟!. تنهد وتكتف بروقان : تكلمي وقولي كل شيء عندك ...وانا اسمعك قاطعته : ما ابغى اتكلم ..ابغاك تتكلم انت !، انا احس نفسي ما اعرفك ...مو حاسه نفسي مثل باقي البنات متزوجه ...طول وقتك بالشغل ..او مع ربعك ...ما تجلس معي ولا مع البنات ...اذا مو طايقني وما تبغاني ...ما له داعي تمثل وتجامل ...احكي تكلم ...ما ابغى اكون مثل الغبيه ما تعرف شيء عن زوجها ...يمك قاطعها بروقان : اوششششش اذا هذا الشيء مزعجك ...انا اريحك واتكلم بكل شيء .. هزت راسها وبصوت مخنوق : يا ليت ! حرك رأسه بتفهم : انا رح احكي بالمختصر ...لاني ما احب ادخل بالتفاصيل ..اتفقنا هزت راسها بشغف حتى تسمع وش عنده : مو مشكله ..عادي هز راسه : بس ما تزعلين من الكلام ؟! ردت بقلة صبر : ما رح ازعل ! كتم ضحكته على شكلها الفضولي ..وتكلم وهو يناظر رد فعلها : اممم انت بالنسبة لي مثل زوجتي وام عيالي وانفجر من الضحك على ملامحها المنصدمه ! طالعته بزعل : انا الغبيه إلي صدقتك ! عدل ملامحه الضاحكه : يا بنت الحلال وش تبغين اتكلم ؟! ساره بقهر : خلاص ما ابغى اسمع شيء ! ابتسم على ملامحها : سوير ...بصراحه انا ما ادري وش تبغين بالضبط ...لكن كوني على ثقه اني ما تزوجتك الا اني مقتنع فيك وابغاك تكونين زوجتي وام عيالي ! قاطعته بتكذيب : كيف وانت ما تعرفني ؟! رد ببراءه : صحيح ما اعرفك ..بس دخلت عقلي وتفكيري بدون ما اشوفك ...وصممت ما اتزوج غيرك قاطعته بمراره : لو كلامك صدق وينك رميتني سنين بدون ما تسأل ؟! ما فكرت بحالي وبحال البنات ؟! تنهد : اولا ما كنت ادري بالحمل ...ثانيا ما ا نكر اني تعمدت هجرانك وكنت اقدر ازيد المده لولا سالفة خطوبتك ... كنت ضامن انك ما تكونين لغيري بما انك زوجتي ...واضمن انك كبيره مو بالطعشات قاطعته بأسف : يا قو قلبك ...وش الذنب إلي اقترفته حتى تجازيني ؟! رد بضيق من هالسالفه : الاذى إلي حصلته منكم مو قليل ... ردت بتبرير وبحرقه : انا ما اذيت احد ...ليه الكل يؤذيني بدون ذنب ؟! رد بهدوء وصدق : صدقيني بعدي عنك ذي المده افضل ...لاني ما اضمن نفسي وقتها وش تكون رد فعلي لو قابلتك ...انا تدمرت نفسيا وجسديا والسبب انتم بدون ذنب اقترفته بحقكم ....لاني اعزك تركتك حتى ما اضرك ...لاني كنت بركان منفجر ...بحثت عن خلف بعد ما تحسنت حالتي بس للاسف ملح وذاب ... ساره خلينا ننسى الماضي .. ونعيش اليوم وكأننا ما نعرف بعض من قبل ...يمكن اذيتك وقتها وانا تأذيت منكم ...كذا متعادلين ....انسي وانا انسى ... ولا تفكري بالماضي لانك ما رح تحصلين الا الالم والوجع ...والايام ما رح ترجع ...ليه نفكر بامور مضت ما رح ترجع ...فكري بيومك وعيشي لحظاته بكل تفاصيله ولا تشغلي بالك بالمستقبل ...لانك ما تدرين وش مخبي لنا المستقبل ...عيشي يومك ولا تسمحي لمخاوفك واوجاعك تدمر يومك وتدمر المستقبل ...خلاص انسي ...وناظري حولك وشوفي النعم إلي انعمها ربي عليك ...وغيرك محروم منها ! ابني مستقبلك بيدك ...ومستقبل عائلتك .... لا تبني احلامك وآمالك على اشخاص ...مع الزمن تنصدمين منهم ...او تفارقينهم...وقتها رح تكون صدمه كبيره .. انا مو دايم لكم وما تدري وش مخبي القدر ...لو اخذ ربي أمانتي او امانة ابوك او اخوك او عمك ...ما تدرين كلنا على هالطريق ...علشان كذا اعتمدي على نفسك ...وكماي طريق العلم ...لو كنت غبيه كان ما دخلت كلية الطب ...دامك قدرت تدخلين الطب بإمتياز تقدرين تتخرجين بمعدل يرفع الراس ....حطي الدراسه الحين هدفك ...وما رح تحملين الا بعد التخرج ...واي شيء تحتاجينه انا موجود ! واوعدك ما تشوفين مني الا كل شيء خير ...وان شاء الله ما اشوف منك الا كل خير ... نفتح صفحه لحياة أجمل ...عنوانها الاحترام.... فلا معنى للحياة الزوجيه بدون إحترام !!! ** ** ** بعد يومين عدلت جلستها على الكنبة ..وهي تحس نفسها صارت احسن ...وخف تعب الولاده ...واكثر شيء تحسه بعث بنفسها السعاده اهتمام اهل زوجها فيها بطريقه تحسها مبالغ فيها !! ام سالم ما هو عاجبها :،يا يمه بعدك ما كملت اسبوع وجالسه هنا ...ارجعي للسرير واستلقي تراه مو زين قاطعتها ساره بضجر : والله يا خالتي طق كبدي من السرير ...والله ما فيني شيء ووضعي تمام ! ام فهد بعدم رضى : انت تشوفين كذا انك متحسنه...بس جسدك من الداخل يحتاج فترة نقاهه ! طالعتها ساره وابتسمت على جنب من تقلب ام فهد اوقات تحسها حنونه وفي صفها واحيانا تحسها ضدها ...مو قادره تحدد شخصيتها !! ام وسيم وهي ترتشف من القهوة : البارحه سألتني اختي ام وليد مين سمى البنت بإسم «عائشه» ساره ابتسمت تموت على عائشه من كثر حبها لها اصرت يكون الاسم على اسم صديقة الروح رغم المعارضه من حولها ! تحس بحنين لايام الطفوله ....غمضت عيونها لثواني وهي تتمنى ترجع ايام الطفوله ..وتقضي وقتها مع عائشه ... فتحت عيونها وعندها امل انها تشوف طفولتها وصداقتها مع عائشه مع عيالها وعيال عائشه ! ام سالم مو عاجبها هالاسم : ما ادري كيف تفكرين انت وصديقتك كل وحده سمت ابنتها على اسم الثانيه ! ام وسيم : تقول اختي لو شفت فرحة عائشه لما عرفت انها بنت ساره على اسمها ! ام فهد بمداخله : بما انك اخترت اسماء التوأم المفروض هذي المره إلي اختار الاسم اخوي ! والله حرام عليك كان مخطط لاسم نور ...ما ادري كيف تنازل عن هالاسم ! تضايقت ساره من هالاسم ...مستحيل تسمي هالاسم ...تخاف يكون على اسم حبيبة القلب ...مع انها ما شافت منه حركات تدل على انحرافه ...بس الغيره هي إلي تحركها !! ام وسيم : والله ما احد تعب مثلها بالولاده ...على الاقل تختار الاسم هي ! ام سالم بتأكيد : صادقه ...خليها تختار ...بس لو اخترتي اسم ثاني ! ساره بابتسامه : ان شاء الله البنت رقم 4 تختارين اسمها انت يا خالتي ! قاطعها : عساها تبقى امنيه وما تتحقق ! طالعته وابتسمت ما انتبهت على دخوله ! ام وسيم بدفاع : وش زين البنات ! رد بابتسامة : الحمد لله عندي 3 وان شاء الله ربنا يرزقنا اخ للبنات ! ام سالم هزت راسها : ان شاء الله ...ربك كريم ! قبل ما يجلس انتبه عليها : اشوفك جالسه هنا ؟! ام سالم : والله هالبنت عنيده ...أقول لها ما يصير تجلسين كذا ...بس عنيده وما تسمع الكلام ! ساره بضجر : والله طق قلبي من الغرفه والسرير ! رد بتصميم : كل هذا لمصلحتك ...لازم ترتاحين على الاقل اول اسبوعين ! ما استبعد باكر الاقيك بالحديقه ! ساره هزت راسها بابتسامه : والله طرت على بالي هالفكره ! خزها بعيونه : اقول قومي لسريرك وارتاحي ...واتركي عنك الخبال ! ردت بابتسامة مغلفه بالالم : عادي بالتوأم من ثالث يوم داوم قاطعها ما يبغى الماضي يبقى حي... لازم يندفن ...طالع امه : كيف اكلها ؟! ام سالم ابتسمت وهي تشوف نظرات ساره عليها : مو ذاك الزود ...بس في تحسن عن اول ! طالعها بجديه : ما يصير كذا ...انت تدرسين طب ..واكيد تعرفين ضرورة الغذاء بذي الفتره ...انت تضرين نفسك بإهمالك ... أم فهد : جارتي بعد الولاده قاطعت الاكل ...اخذوها للمستشفى ..جسمها ما تحمل قلة الاكل ! حور اقتربت من ابوها : بابا سوار تقولك عادي نروح للبقاله ! طالعها وهو يبحث بعيونه عن سوار : علامها مرسله واسطه اليوم ؟! يقال انها تستحي ؟!! حور ما لها خلق لكلام ابوها : نروح ؟! قاطعها وهو ينادي على سوار : سوار يا سوار ! لمحها من خلف الباب تناظرهم بترقب وبحزم : تعالي هنا ! تقدمت رجل للامام ورجل للخلف ! ساره ضحكت على ملامحها ... سوار طالعت امها وهي رافعه حاجب بطفوله ...وبعدها اقتربت من ابوها : نعم ! طالعها وهو يتأملها : الله ينعم عليك يا بابا ....اشوف ترسلين واسطات ...مو خابر إنك خجوله ! سوار بابتسامة صفراء : يعني ما نروح ! رد بهدوء : انا ما قلت لا ! حور بحماس: يعني نروح ؟! رد بتنكيس : لا سوار الاعتراض طفولي : بس عيال عمتي راحوا للبقاله ! رد بهدوء : لما اطلع اخذكم بطريقي للبقاله افضل ! استأذنت ام سالم وتبعتها ام فهد وام وسيم! طالعهابعد خروجهم : استلقي على الكنبه ...ولا تتحركين كثير ...امشي بس بهدوء ..وبدون حركات مبزرة ! يوجعك شيء اليوم ؟ ! هزت راسها بالرفض : الحمدلله احسن اليوم ! رد بإهتمام : ان شاء الله ! يقولون زواج عمار بعد 3 أسابيع هزت رأسها بتأكيد : ايه اتصل فيني ! يعطيني خبر ... هز راسه وما علق على الموضوع ...طالعها بإهتمام : باكر العزيمه للحريم ...انتبهي حصني نفسك والبنات ...ترى العين حق ! يتبع .... مرت السنين بحلوها ومرها ... جلست جنبها بضجر من الدوام ...طالعتها وهي سرحانه ...هزتها بخفه : وين سرحانه ؟! طالعتها وابتسمت بلطافه بعد ما طردت ذكرياتها...تنهدت وردت بصوت هادي : سرحانه بذي الدنيا ! عائشه وهي ترتشف العصير من تحت من النقاب : يا لطيف حرررر....متى تنتهي فترة التدريب ؟! ابتسمت ساره : ما بقى شيء ...الله يعدي الايام على خير .. عائشه بإحباط : ما ظنيت يعدي على خير وحضرة شاهينوووو موجود! يا اختي دقيق ...ويحاسب على الذره ردت بابتسامة رايقه : يا اختي يحب الجديه بالعمل ...هذا وهو يمدحك قدامي ...يقول عنك ذكيه قاطعتها عائشه وكبر راسها : ما اصدق ...الدكتور شاهين يمدحني بنفسه ! هذا ما يعجبه العجب ! تدرين افكر استأذن وارجع للبيت سوير مريضه ...وقلبي قارصني عليها ! ردت ساره بتعاطف: يا قلبي عليها ...هي عند ام ماجد ؟! هزت راسها : ايه عند خالتي ام ماجد ...هالخايسه متعلقه فيها اكثر مني ! ولا كأني امها ! ضحكت ساره على تعليقها : اكيد رح تتعلق بأم ماجد وهي اغلب وقتها مقابلة ام ماجد تدرين «عائشه» احسها مو متعلقه فيني ...متعلقه بالتوأم ....تبكي اذا تركوها .... سألت عائشه بفضول : مو متعلقه بأبوها ؟! مطت شفتها ساره بغيره : هالدبه تفضل ابوها علي ...مع انه تواجده بالبيت مو كثير ..بس متعلقه فيه عائشه بتحليل : يمكن مدللها ...مو مثلك تصرخين عليهم ساره بضحكه : بذي صدقتي ...مدلع البنات ...اما انا ما ادري افقد اعصابي من حركاتهم ...يرفعون الضغط ! اليوم ضربت حور رفعت ضغطي وما قدرت اتحمل وضربتها ...طبعا اشتكت لابو الشباب ...وزعل مني لاني ضربتها ...يقول الضرب مو حل ! عائشه بتفكير : يقولون الضرب مو حل بس اذكر كانت امي تطقنا وحتى الوالد العزيز ما كان يقصر ...احس في مبالغه لما يقولون ما تضربون الاطفال ... ساره بغيض : يقول بالاسلوب الحلو تعاملي معها ...ما يدري انه هالجيل ما ينفع معه لا حلو ولا مر ! يرفعون الضغط ! تصدقين لما كنت اعيش لوحدي ما كنت اتغلب مع التوأم ...ويسمعون كلمتي بدون معارضه ...بس لما طلع الاب الحنون ما عادت كلمتي مسموعه عندهم ! عائشه: يمكن هو يرقع لهم ...وما يعلق لما ما يسمعون كلامك ! ساره بالنفي :،بالعكس دوم يؤكد انهم يسمعون كلامي ...بس لما يكون مو موجود يطلعون الشيب برأسي ! وخاصه هالحور ..وانا الغبيه كنت اقول عنها مسكينه ... عائشه بابتسامة : انك غبيه هذا شيء مفروغ منه ...اما جيل اليوم ما في احد مسكين .... الله يكون بعونك ...انا بنت وحده ...ومتغلب فيها ...كيف انت 3 ساره وهي ترتشف من العصير : الله قاطعتهم من خلفهم : جالسات هنا بالحديقه ...والدكتور شاهين يسأل عنكم ؟! وقفت عائشه بفزع : قولي قسم ! زينب هزت راسها بتأكيد : ايه متأكده وحتى شهد قالت للدكتور انكم بالحديقه برا تتمشون ! ساره بغيض من شهد : حسبي الله عليها ! عائشه بعجله تكلمت : بسرعه نرجع للمستشفى ..بلاه يحط علينا نقاط مو ناقصنا ! زينب وهي رافعه حاجب بنغزه : يحط عليك انت ايه اما بعض الناس اكيد ناجحه حتى لو ما تعرف تغرز ابره ! متأكده ساره انها تقصدها : وش قصدك ؟! زينب بنصيحه : ما تتحسسي مني ...بس ريحتك طالعه انك تراكضين خلف الدكتور شاهين ...وبينكم علاقه ...فأكيد رح ينجحك ! بس خذي نصيحتي بدل ما تراكضين خلف الدكتور وماهو معطيك وجه ..ناظري إلي ذبح نفسه علشانك قبل ما ترد ساره تركتهم زينب وغادرت بسرعه ... عائشه بروقان : صدق بنات فاضيات ! طالعت ساره إلي باين الغضب من عيونها : وقحه ! انا اراكض خلفه ! عائشه تكتم ضحكتها : لا تنكري تراك دوم تراقبين حركاته..والبنات فسروها انك تراكضين خلفه ... حركات المبزره جابت لك الشبهة ووجع الراس ! ساره للحين الناربقلبها : انا متأكده الزفت ارسلها تقول هالكلام ! عائشه بضحكه : يا بنت الحلال أعطيه رقم اهلك وعنوانك ...الرجال مصمم الا يخطبك ! ساره بضيق : انا ما ادري من وين طلع لي هالمحمد ! بصراحه انا ما اشوف منه شيء...تفاجأت لما وصلني خبر انه يبغى يخطبني قاطعتها عائشه : بلاك ما تشوفينه لما تمشين يأكلك بعيونه...انا بصراحه ماني مرتاحه لنظراته...ليه ما تقولين لزوجك يتصرف معه ..وتخلصين من ملاحقته ! ساره هزت راسها برفض للفكره : مستحيل ...انا ما اضمن رد فعله ...اخاف ينقلب الموضوع علي ...انت ما تعرفينه اذا عصب لا يستقبل ولا يرسل ....وهذا محمد احسن شيء اتجاهله مثل قبل وانتهينا ! عائشه بعدم رضى بقرارها : شوفي عمار يتفاهم معه ! ساره تسكر السالفه : ما ابغى مشاكل ...ودامه ما تعدى حدوده ..مالي فيه ...يناظر من هنا لباكر ! علاقتي بزوجي فوق الريح ما ابغى اهدمها ...بعد ما تعدينا كل العقبات ** ** ** همست لها عائشه : طنشيه هزت راسها وهي تمشي وعيونها بالارض ...مطنشه نظراته ...حست الدم وقف لما تجرأ ونادى اسمها بهدوء وهو يقترب :لو سمحت انسه ساره ! التفتت حولها تناظر تخاف احد يشوفهم ...وبهمس وصل لمسامعه : انقلع لا بارك الله فيك ... سحبتها عائشه مبتعدات عنه ...وقفت عائشه وهي تكتم ضحكتها وتقلد صوت ساره : انقلع لا بارك الله فيك...حسيت عجوز إلي تتكلم ! ابتسمت ساره بدون نفس وتحس قلبها يدق بقوة للحين : حسبي الله على عدوه ...وش هالوقاحه إلي عليه ...يظن الدنيا سايبه ؟!! تخيلي لو شافه زوجي واقف معي ! عائشه بضحكه: يا بنت الحلال الرجال مصمم يبغى رقم اهلك ..اعطيه رقم الدكتورشاهين وانتهينا ! صدقيني اذا تعرضت لاي مضايقه المفروض زوجك او احد من اهلك يكون عنده علم ويوقفه عند حده ...اما اذا سكت رح يتمادى .. تنهدت ساره : ادري كلامك مضبوط ...خلاص اليوم اكلم ابو فهد ويتصرف اخاف يتمادى ...وانا مو ناقصني مشاكل ... عائشه بتآكيد : وهذا هو الصح ... ~~ ~~ ~~ طالعها وهي تمشي مع عائشه ومندمجه بالسوالف ...اشر لها تيجي له !! ناظرت حولها واستغربت اول مره يعملها .... طالعت عائشه بتردد : تعالي معي ! عائشه وهي صاكه على أسنانها : زوج وزوجته وش دخلني بينكم ! ساره بتوتر : استحي ! عائشه خزتها : تستحين ! ابوك يالكذب ...اقول روحي قبل ما يعصب تركتها ساره وتوجهت بخطوات هاديه ..اقتربت ووقفت بهدوء : سلام طالعها لثواني وبعدها تكلم : كملت شغلك ؟! ردت وهي تهز رأسها : ايه تابع حديثه : جهزي نفسك خمس دقائق وتكونين بالسياره ...امي كلمتني قبل شوي رح يطلعون للبر ....يا دوب نجهز اغراضنا ! هزت راسها بسرعه وحماس : ان شاء الله ثواني واكون جاهزه ! ابتسم على حماسها وبتنبيه : الثقل مطلوب ! ابتسمت بإحراج: نسيت نفسي ... استأذنت وتوجهت تجهز اغراضها وهي تشوف نظرات بعض زميلاتها لها ...وكآنها عامله جريمه ... احيانا تجيها رغبه تصرخ بأعلى صوتها وتقول حلاااااااااالي يا عالم ! بس بنفس الوقت ما تبغى احد يعرف انها زوجته وخلي البنات يموتون من قهرهم ! ..تصرفاتها وتفكيرها غريب!!! رفعت راسها وشافت محمد يعطيها نظرات ناريه ... كملت طريقها بعد ما رسمت ابتسامة سخريه : الاخ مصدق نفسه ! اخذت اغراضها بسرعه وطلعت وهي تتكلم بسرعه مع عائشه : طالعين للبر سلااام.. طلعت مستعجله وما جاوبت على اسئلة عائشه ... إلتقت فيه عند باب الخروج ...وقف ينتظرها ...تقدمت وهي تلهث : تأخرت عليك ! مسك يدها وهو خارج بابتسامه: لو ألف الدنيا ما ألقى اسرع منك بالتجهيز ..حتى اشك اذا تناظرين نفسك بالمرايه ! طالعته وابتسمت بثقه: ليه اناظر نفسي بالمرايه وأنا واثقه من نفسي ؟!! يكفي اشوف جمالي بعيون من حولي ! رد : وش هالغرور ؟! قليل من التواضع يا بنت الحلال خزته بابتسامة : بعض من عندكم ي قطعت كلامها لما حست يدها انسحبت بقوة وارتدت لجهة الساحب وبصوت ارعبها: ... انتهى البارت

الله يعطيك العافيه على الطرح
اللي كله ابداااااااع


حضوري شكر وتقدير لك
ولاهتمامك في مواضيعك


اخوك
نجم الجدي

اقتطافة أنيقة
لاعدمنـآ هذا الجمال بالطرح..
بإنتظآرجديدك بكل شوق..
ودي وشذى الورد..

أجمل التحااايا
أقدمها لك

لمرووري بصفحه جميله بمستوى رااقي

يعطيك العااافيه

وشكرا لجهووودك

تميز دائم في الاِنتقاء
وفي روعة الطرح
دمت بكل خير

100
أناقة طرح وجاذبيه
إهتمام و..

اجتهاد واضح في الطرح
وذائقة عالية المستوى

استمعت النفس بما مرت عليه هنا،،،
فبهذا العطاء سنرقي

من أعماق القلب أشكرك

اخوك
محمد الحريري

طرح رائع كـ انت
الاناقةة دائما تعتلي صفحاتك
لا حرمنا من منبع الجمال
الذي يزيدنا شوقاً
لـ اطروحاتك

كل الود

طرح رائع
يعطيك الف عافيه ع النقل

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد