ديوان الشاعرالكبير/ فيحان القعياني المطيري(شاعر الجيلين)

قصيده في قبيلة مطير

اليا جهلـت مطيـر وافيـن الأشبـار=من لا يعـرف مطيـر يسمـع خبرهـا

ركز معي واعطيـك موجـز للأخبـار=وأعرف رجال مطير وأعـرف ديرهـا

علوى وعبـدالله مثـل ضلـع سنجـار=وبريـه مثـل طويـق صلـبٍ حجرهـا

تلقى لنا في صفحـة المجـد تذكـار=يا طيب شجرتنا ومـا اطيـب ثمرهـا

حنا هـل الـردة وحنـا هـل الكـار=وبالمعجـزات مطيـر كـلٍ ذكـرهـا

عز الخوي والضيف والثالـث الجـار=أهل الشيم تلقى الشحم فـي سفرهـا

مطير حمران النواظر باهـل الأنظـار=لا عـدو الظفـران عــدو ضفـرهـا

حريبنـا يشـرب قراطيـع الأمــرار=ومـن ريبنـا عينـه يطـوّل سهـرهـا

وشيوخنا الدوشان أهل قحص الأمهـار=الرابح اللـي مـا يجـي فـي نحرهـا

إخوان جوزاء اللي لهم صيت وأذكار=يا سرع ردتهم ومـا اسـرع خطرهـا

والنعم والنعميـن تكـرار وأمـرار=حنـا نجـوم الليـل وأهمـه قمـرهـا

عنا القبايـل تنـزح أيميـن وإيسـار=أحدٍ كسب لـه دار وأحـدٍ خسرهـا

وحدودنا في الغرب من حجر ويسـار=ويحدّنـا شـرق الكويـت وبحـرهـا

ومـن الحجـاز ونجـد نأخـذ ونختـار=والمجمعـة وسديـر لـلـي عمـرهـا

والصلـب والصمـان مـا مثلهـا دار=عسى عليهـا السحـب يمطـر مطرهـا

من دونها علـوى يبيعـون الأعمـار=في راية الدوشان ما أحـدٍ كسرهـا

حامينهـا بالشلـف والسـيـف بـتّـار=ولا غيرهـم حـيٍ بــذوده نشـرهـا

قطعانهـم ترعـى زماليـق الأقـفـار=وعنها الوجيه القشـر يبعـد قشرهـا

وأنا ما أذم الناس في كـل الأقطـار=ولا ودي اظلمهـا ولا أبغـى قهرهـا

واليا مدحت شيوخنـا مـا بهـا عـار=العـار للـي سبـهـا مــا قـدرهـا

واليوم في نعمة بعـد صـار ماصـار=في نعمةٍ بعـض البشـر مـا شكرهـا

الشـكـر لله ثــم للـوالـد الـبـار=اللـي حكـم بـر البـلاد وبحـرهـا

قرب ذلولـه للسفـر وقـت الأسحـار=والنـور شعشـع حيـن دب بظهرهـا

في خدمة الإسلام قامـوا لـه أنصـار=وبأمـره مشـوا سبحـان ربٍ ومرهـا

قاموا هل التوحيد لين اطفـوا النـار=وهل الفتن والشرك الأكبـر حشرهـا

وأرسى قواعدها بعـد حـج وأزتـار=وحكـم بشـرع الله والأمـة نصـرهـا

وعيالـه اللـي خيرهـم سـر وجهـار=اللـي عمرهـا خيرهـم مـا دمرهـا

خلـوا صحاريهـا بساتـيـن وأنـهـار=حتى الطيور استأمنـت فـي شجرهـا

في الأرض دبابة وفـي الجـو طيـار=تحمـى سواحلهـا وتحمـي وعـرهـا

الله يكافيهـا مـن عيـون الأشــرار=وتعمي عيون الحاسـد اللـي نظرهـا

وصلوا علـى اللـي للمخاليـق مختـار=عـد السنيـن اليالهـا مـع شهـرهـا

القصيده الثانيه

قصيده بعنوان العولمه

الا يازمان العولمـه بحـت سـر النـاس=تـحـدى وحـنـا لـزمـن ماتحـديـنـا

نحب الكرم وأطيب والصدق والنومـاس=ومـن فظـل ربـي وكرمـه ماتردينـا

من الصغر نرقى للعلى لين شاب الراس=ولانحسـب الشـي(ن) فعلنـاه بيديـنـا

اليا صار ماش الحال في دنيتـي لابـاس=عسى الله يعوض بمنزل(ن) عنـه شدينـا

لقيت الرجال أشكال فيهم ذهب ونحاس=ويكثـر عددهـم لـو وصفنـا وعدينـا

لكن الضعيف الضعيف بيت(ن) بليا ساس=سريـع أنهيـار اليـا بنيـنـا وهديـنـا

رفيق الرخا تلقاه وقـت الرخـا لابـاس=وعنـد الشدايـد مايقـول أستعديـنـا

على ماتقـول النـاس يارفقـة الاْفـلاس=ليـا صـار ماينفعـك حاضـر ولا ديـنـا

وصابعك ماهي في سوا والعباد الجناس=ومن صـد عنـا عنـه باالوجـه صدينـا

القصيده الثالثه

قصيده في الجيب الفكسار

ياراكب اللي لو شرينـاه بقصـود=اهون علينـا قيمتـه مـن لزومـه

اليـا صلـح ماهمنـا النقـص وزود=انزود في سعره على اللي يسومـه

فكسار له في عالم الصنع مشهـود=علامـة الجـوده عليـه امختـومـه

مايصنعونـه غيـر كفـار ويهـود=ولا العـرب ماتصنـع الا رقـومـه

مثل القمر لونه مع الحمـر وسـود=كامل مزايا فـل مركـب حكومـه

اليا اشتغل مثل الحساوي على العود=ولا هنـوف(ن) لزفـاف امعزومـه

شقحى عليها عود وخدود وجعـود=وللـي تماريهـا تصيـر امهزومـه

وليا سرى فاالليل والعالـم ارقـود=يبعد عن القلب الشقاوي اهمومـه

ماكنه الا مـن صواريـخ السكـود=اللي على العدوان وجـه اسهومـه

ادخيل براقـه بـلا مـزن ورعـود=يوم السمـا غيـم وغابـت انجومـه

كنه مع الحزم الجلد ذيب مطـرود=مثل البرد ضرب الحجر في اكرومه

وليا عطى التغريز ماعنـه منشـود=يطلـع كمـا حـرٍ قويـه اعزومـه

ابمدحـه والمـدح مافيـه منقـود=واللي يحب الجيب لحد(ن) يلومـه

وبغى عليه النصا هل الطيب والجود=خص الرفيق اللـي تسلـي اعلومـه

وبغى اليا طاح المطر وخضر العود=وّخذ مع الريضـان شـده اوقومـه

وبغى عليـه اّدوج لصيـد واعـود=لو ماخـذ الا لليـل واحـد ابيومـه

وبغـاه للـلازم موقـف ومـاجـود=سواة شيخ(ن) جالس(ن) للخصومـه

القصيده الرابعه

قصيده بعنوان ياقلب

ياقلب لاتسهر عيونـي كفايـه=يكفيك دمع ٍمن عيوني تكفـا

ابكي ولاحد ٍداريٍ عن بكايـه=مرحوم ياوقـتٍ مضالـي توفـا

اْْْْْْيـام كانـت ماتبيـن خفايـه=ويام تكشف كـل ستـرٍ مضفـا

اْغليتها لين اْرخصت مستوايـه=وقتٍ بعد لقانـي الوجـه قفـا

وغابة علي الشمس واظلم سمايه=ونور القمر نـور عليـه وطفـا

العام يبرق لي بريق المرايـه=واليوم وسط ابحور الامواج هفا

حول على الغبه بعزمه ورايـه=كما حصاتٍ حولـة مـع مطفـا

القصيده الخامسه

مرثيه في والدته يرحمها الله

عفى الله عن عينن تكـدر منامهـا=صار السهر والحزن غاية مرامهـا

كن الجليجل والرمد وسـط موقهـا=ليا نامـوا العالـم تكـدر منامهـا

ليا قلت نامي ياعيونـي تكـدرت=قامت تهل الدمع والحزن أمامهـا

يصبح عليها الصبح مانـام طرفهـا=وكثر السهر والدمع خطر بعدامها

لواني أبكي دم لحد(ن) يلومنـي=تدرون عيني يوم تبكـي علامهـا

أبكي على أمـي وحلـلاه ياأمـي=الـي توفـت ماسمعنـا كلامـهـا

شهريـن لاحيـه ولاهــي ميـتـه=من شاف طيحتها قنع عن مقامهـا

وفي ليلة الجمعـه سمعنـا خبرهـا=قالـوا يجـون أقاربهـا لاْْستلامهـا

وجينا وجونا الربع من كل ديـره=ربع(ن)تعازيهـا تسابـق سلامهـا

وأنا مومنن بالقدر خيـره وشـره=وروح مثل الزرع يقـرب صرامهـا

والموت حق وكل نفس(ن) تذوقه=وحق الجنـازه دفنهـا واغتنامهـا

وقمنـا نغسلهـا وصلـوا عليـهـا=في خرقتن مشري من السوق خامها

ومشينا بها المغرب لدار المقابـر=والناس عند القبر زاد ازدحامهـا

ثم ادخلوها القبـر وأنـا اتفـرج=في حفرتن في الليل يفجع ظلامهـا

يـارب نورهـا عليهـا بـنـورك=وفي جنة الفردوس تبسط عظامهـا

واتلاخبـر يـوم أنـهـم قبلـوهـا=وقاموا يفكون الربط عن حرامهـا

وحط اللحد ولقبـر دمـدم ترابـه=وقامت عليه الريح تذري عسامهـا

وقفيت مالي حيلتن فـي المقـدر=ثم كشرت دنياي بعـد أبتسامهـا


ياكبر فضل أمـي وياقـو صبرهـا=وياطيبهـا لنـا وياكثـر ألامـهـا

تسعت شهور تشيلني فـي حشاهـا=وعامين ترضعني وتعلـن فطامهـا

وليـا مرضنـا ماتغمـض عيونهـا=وان كان جعنا ماتشـح أبطعامهـا

ستيرتـن مايسمـع الجـار صوتهـا=حنون مـع تقديرهـا واحترامهـا

يـوم أتذكـر وتصـور خيالـهـا=أسبح مع الاْحزان ولبـس وسامهـا

عسى سحاب الوسم يسقـي ترابهـا=عليها المزون الغريمطـر غمامهـا

القصيده السادسه
قصيده بمناسبة افتتاح موقع الشلالحه الرسمي

نيابه عن هل الموقـع نيابـه عـن ذوي شـلاح=هـلا يامرحـبـا بضيوفـنـا ملـيـون ترحيـبـه

وحنا اهل الوفا واهل الكرم يوم الليالي شحـاح=ولنـا ماقـفٍ فالقـرن كـل النـاس تدريـبـه

نهار إن الدمي سالت مع الوادي من اللي طاح=وفعلٍ كل مـن شافـه ليـا شيـب يهذريبـه

كلامٍ صدق لهل الصـدق ماهـو مـزح للمـزاح=وتشهد بـه قبايـل حـرب والسلمـان وعتيبـه

ولأ نجحـد عيـال صعيـب يـومٍ المصيـح صـاح=ومن شارك من المطـران ذاك اليـوم ياطيبـه

ولأ نبخص حقوق النـاس يامـا جـاء ويامـا راح=قبايـل والقبايـل كـل علـم الطيـب تحريبـه

وحنا اليوم فـي نعمـه وكـلٍ خاطـره مرتـاح=نحـج ونستعي ونطوف والمسـجـد نصليـبـه

ألا يادرنـا نـفـداك بــالأ مــوال والارواح=لعـل الله يحفـظ ملوكـنـا والـشـر يبطيـبـه

وصلـو عـد ماخيل خيال وعـد بـرقٍ لاح=على صفوة قريش المصطفى احمدسيد اصاحيبه

القصيده السابعه

بعنوان الماضي والحاضر

اليـوم ياكثـر القضـا والقضـايـا=دار الزمـان وبـان زينـه وشينـه

وشفنا العلـوم اللـي منـول خفايـا=ولا كـان هـذا الشـي متوقعيـنـه

الصلـب والصمـان راحـت قرايـا=والصحرى الحجاز ونجد راحت مدينه

معـاد فديـره نـسـوق المطـايـا=واللـي يبيلـه دار ياصـل ابحينـه

يركب على اللـي يبعـدن النحايـا=موتـر وطيـاره وريــل وسفيـنـه

والعـد ماتـارد علـيـه الضمـايـا=صار الرشا والدلوا سيـر ومكينـه

والوايـت اصبـح مـاردن للرعايـا=وراعي الماخـوذ معـرف رطينـه

وبيت الشعر بـدل بقصـر ومرايـا=والنجـر بطاحـون بــدل رنيـنـه

والكيـف حطينـاه فــم الغطـايـا=والغـاز بعـد الضـو مستعمليـنـه

والذيب ياكل من فريـس الضرايـا=والثعلب يهوش الأسد فـي عرينـه

الله يكافـيـنـا الـبــلا ولـبـلايـا=ياواحـدن كـل البشـر مرتجيـنـه

في ساعتـن خلقـك حفايـا عرايـا=ودخل عليك مـن القهـر والغبينـه

القصيده الثامنه

قصيده في امير الرياض وامير نجد الامير سلمان بن عبدالعزيز

عـز الريـاض وعـز وادي حنيفـه=وعـز الأمـاره ولأمـور العضـايـم

عدل الحكـم سلمـان بالعـز ريفـه=خمسين عـام وكـل أبوهـا غنايـم

تبصر بعدلـه عيـن حيـن كفيفـه=العز لـه والمجـد والطيـب دايـم

ستر العذارى والفقـارا الضعيفـه=ريـف اليتامـى وأمهـات اليتايـم

هـداج تيمـا مايغـلـق غريـفـه=يوم الـورود تـزود والجـم عايـم

ياكاتب اكتب وانشـري ياصحيفـه=أحلى التهاني عـد ماصـام صايـم

هذي رياض الخيـر حلـوه نظيفـه=العاصمـه ماتقبـل أهـل الظـلايـم

مصيونتن مثـل الهنـوف العفيفـه=أميرهـا سلمـان للـعـز شـايـم

للأمـر بالمعـروف نفسـه خفيفـه=وأثقل من العارض على اهل الجرايم

أمير نجـد اللـي شتـاه وخريفـه=تلقـى وراه الخيـر حتـى البهايـم

يازيـن مرباعـه ومحلـى مصيفـه=والمشي في صحراه لوهـي سمايـم

دار الإمـام اللـي حماهـا بسيفـه=وقـام فيهـا الديـن والحـظ قايـم

الشرع طبق فـي البـلاد الشريفـه=والشرك وأهل الشرك ذب الخرايم

وصارت رغد بعد الحياه الكسيفـه=مرحوم ابو تركي قـوي العزايـم

لو أوصفه في الناس ملقى وصيفـه=يا أهل البشوت ولا بسيـن العمايـم

القصيده التاسعه

قصيده وطنيه

ياالله يااللي تعلـم السـر والغيـب=ياعالم(ن) بااللي تخفـي العبـادي

يامنجين يوسف وذا النون وشعيب=ويامبصر اللي بعد شوفـه يقـادي

لاتجعـل الفتنـه وأهلهـا عواقيـب=ياهـازم الأحـزاب ياخيـر هـادي

ومن بعدها يادارنا لـك مواجيـب=باالمـال والاْرواح دونـك نفـادي

ياديرتي ديرة هل الخير والطيـب=ياأغلى وطن ياأغلى بلـد يابـلادي

دار السعود مطوعيـن الاْصاعيـب=اللي حموها مـن جميـع الاْعـادي

عشنا بهـا يـوم الليالـي شلاهيـب=يوم العرب فيها تشـوا الجـرادي

يوم الضمأ والجوع يـوم الملاهيـب=نصبـر عليهـا حـر والـلا بـرادي

واليـوم حصلنـا جميـع المطاليـب=ولاْمن فيهـا سـاد والخيـر زادي

ماهمنا اللـي يشذبـون العراقيـب=أهل الحسد والحقد وأهل العنـادي

ياالشله اللـي تعملـون التخاريـب=أنتم بـوادي والسياسـه بـوادي

أهبوا هبيتوا ياخبـاث الهناديـب=ياهل التحيـز فاالخفـا والـدوادي

حنا لنا ماضـي وحاضـر وتجريـب=عراف ونعرف الخطـأ والقـوادي

ولا تزعزعنـا كثـار الأكـاذيـب=دون الوطـن متكاتفيـن الاْيـادي

شعب وحكومه في حلول الاْصاعيـب=أنحارب أهل الشرك وأهل الفسادي

نحكم بشرع الله على الحق ونصيـب=الله يوفقنـا طـريـق الـرشـادي

والاْمــر لله والــولا للمعـازيـب=وحنا لهم ذخراً علـى كـل بـادي

اللي سقونـا صافيـات المشاريـب=النهضه اللـي خيرهـا بازديـادي

وفيها إنتخابات المجالـس بترتيـب=وصوت الموْذن في سماها ينـادي

فزنا بها بيـن العجـم والأعاريـب=وعلـى ثراهـا معلنيـن الجهـادي

وصلوا على المختار سيد الاْصاحيب=والخير مقبـل فاالليـال الجـدادي

القصيده العاشره

نصيحه في ابنه صالح

إن كان ياصالـح اليـا غبـت تهتـم=مادام راسي حـي مابـك همومـي

الهم لـن حطيـت فاالقبـر الاْظلـم=وأنته صغير ولنـت قـادر تقومـي

هـذاك هـو الهـم ياصالـح أعلـم=الله يجيـرك مـن ليـال الثلـومـي

لاكـن أبـا وصيـك عسـاك تفهـم=ويطول عمرك ليـن تحفـظ علومـي

الأولـه :مـن شـاْن دينـك تعـلـم=وصل الفروض الخمس وأذن وصومي

وأد الزكـاه وحـج وحـذر تنـدم=وستغفـر الله وطلبـه كـل يـومـي

وإن صلـو الجمعـه تـوض وتقـدم=والماء طهـاره للجسـد والهدومـي

والثانيـه: فـي والديـنـك تنـعـم=وتبـع مراضيهـم وخلـك رحومـي

وعطف عليهم يافتى الجـود وحلـم=وحذرا تشاهد فيك بعض الوهومـي

والثالثه: فـي وجـه ضيفـك تبسـم=وكثرله الترحيـب جعلـك تدومـي

وحذراك لاتبخل على الضيف لاْكـرم=والبخـل خلـه للعفـون الرخـومـي

والرابعـه: لاتقطـع اللحـم والـدم=ومواصـل الاْرحـام حقـاً عمـومـي

واللي يزورك فـي حقوقـه تعـزم=والرزق عند اللـي ينـش الغيومـي

والخامسـه: دون الأمـانـه تحـكـم=وحرس عليها فـي جميـع السلومـي

الله محـمـل بـالأمـانـه بـنــادم=وتعـوذة منـه السمـاء والحزومـي

والسادسه: فـي حـق جـارك تلـزم=خله معـك دايـم عزيـز محشومـي

لنـجـاك زلــه شيلـهـا لا تكـلـم=والصبـر مفتـاح الفـرج للقرومـي

لابـد مايـنـدم عليـهـا ويسـقـم=وليـا ذكرهـا ينشغـل ماينـومـي

وجارتـك عنهـا ياالسنافـي تشيـم=ولا يستر العورات غيـر الهدومـي

والسابعه: لاتستمـع هـرج مـن نـم=راع النميمـه لـو حكالـك ظلومـي

لن راح من عندك حكا فيك وحكـم=عليك دعوا كبـر ظلـع البقومـي

والثامنـه: مـع درب ربعـك تولـم=اللـي عليـك يستـرون الخـرومـي

وأن كان جوك افرح بهـم لاتكتـم=خلك لهـم ظلـعٍ طويـل الرجومـي

والتاسعـه: حـذرا دخيلـك يلـطـم=أضف الذرا دونه وخلـك تعومـي

وعـط الرجـال حقوقـهـا لاتظـلـم=والحق ماهو عيب يـرض الخشومـي

والعاشره: مـن دون مالـك تحـزم=خلك تصيـح صيـاح دونـه وتومـي

والمال يبغـى مـن يقديـه ويضـم=ويضهر مواجيبه ليـا جـاء الزومـي

ورعيت(ن) من دون راعـي تقسـم=مابين ذيـب وبيـن طيـرٍ يحومـي

لاتجالـس لأنـذال لوهـم بنـي عـم=جالس هـل العليـا عيـال القرومـي

و؟؟؟ مايسقيـك مـن بـارد الجـم=ولا يقطع الفرجـه ردي العزومـي

اليـا نصيتـه شـان وجهـه ودلهـم=وليـا طلبتـه ماقضـالـك لـزومـي

وصلات ربي عـد مـن حـج وسلـم=وعداد من شاف القمر والنجومـي

القصيده الحادية عشر

بعنوان الزبيدي

يابنت يااللـي تلقطيـن الزبيـدي=أنتي تشوفينه وأنا كيف الشوفـه

لعيونك أخذي كل صيدك وصيدي=جعلـه فدلـك يامخضـب كفوفـه

وأنا عريب جدود مانـي بزيـدي=من لابت(ن) تسكن بنجد معروفـه

من الكويت اليا حجـر والعويـدي=الفين شرق وغرب هاذي وصوفـه

حنا هل الـرده وخطـلان الاْيـدي=وأهل الثلاث المعجـزه ياالهنوفـه

قالت مغير أمزح معك ياالوليـدي=موقف حرج وحراج قـدر ظروفـه

وقفـا تقالـنـه مقـيـد بقـيـدي=في مشيته في ركزته فـي وقوفـه

ونا عن أهل الغي ساحب رصيـدي=طـاوي سجلاتـه وماحـي حـروفـه

أخاف نفتح صفحت(ن) من جديدي=وبلش سواة اللي بلش فـي خروفـه

ويصير طيراً مثل طيـر الهويـدي=اللي علـى دربـه جرالـه كلوفـه

بعد التعـب نخسـر ولا نستفيـدي=وتصيـر ماهـي طرقتـاٍ بمخلوفـه

قربـه عذابلـي وفرقـاه عيـدي=ومـرار تطرقنـي عليـه الحسوفـه

أقـول ويـش السالفـه ياالعنيـدي=وسري على بدر(ن) طلع من خسوفه

وذكرت يوم أمقيط حول يصيـدي=وليا علـى راسـه رشـاه محذوفـه

ولقطة غليص اللي لقـط ماتفيـدي=اللي حتوفـه شالهـا فـي كتوفـه

أنكان قفل السالفه مـن حديـدي=الوقـت لايرحـم ولابـه مـروفـه

أشكي لبو حماد وأبـو الحميـدي=وأبـو محمـد كلمتـي لاتطـوفـه

واللي يجيب الحل والعلـم أكيـدي=ارفع له البيضاء وشـوف معروفـه

أمـا نقيـم ولا نطـري الشديـدي=ولا غـزيـه مابعـدهـا نكـوفـه

القصيده الثانيه عشر

الملحمه

يـاالله يامنـزل تبـارك وياسـيـن=ونزلـت بكتابـك حلالـن وتحريـم

ياللي خلقت اّدم من المـي وطيـن=وقسمت بين الخلق الاْرزاق تقسيـم

تجعل عملنا فـي ثقـال الموازيـن=وتجعـل منازلنـا بجنـات ونعـيـم

ماتنفع الدنيا البنـادم بـلا ديـن=وناس تمشـي بيـن رحـال ومقيـم

حنا نحب أهل الكـرم والقوانيـن=ولا الـردي مالـه علينـا مـلازيـم

وخص شيخ(ن) من شيوخ القحاطيـن=زبن الدخيل وسعد من يشكي الظيم

أصل العرب قحطان ماهم بسيطيـن=وصفهم أبن حميـد حوتـاً لواهيـم

عاداتهـم يثنـون دون المخليـن=واللـي يعاندهـم يعـض الأباهيـم

وأبو محمد وقفتـه تعجـب العيـن=في ساعتن مافيـه فهـم ومفاهيـم

طلب خويـه مـن عيـال السلاطيـن=والغى القرار اللي صدر والتعاميم

ماصك بابه مثـل بعـض البخيليـن=والضيف يلقالـه حفـاوه وتكريـم

عزيز نفس ومن رجال(ن) عزيزيـن=أهديه من عنـدي تحيـه وتسليـم

راع النيـاق الطيبـه والبعـاريـن=ذودين منقيـات حمـر ومجاهيـم

أم الرقاب العوج علـط الحناحيـن=وأم الوجيـه الطيبـه والخراطيـم

وحليبهن يشفـي كبـود العليليـن=من بين دم وفرث مابـه جراثيـم

ما طمعوه أبسومها أهـل الملاييـن=ولا قال ذي سيمت وهذاك ماسيـم

يصرف على شقح البكار المزاييـن=أشعيـر ونخالـه ومويـه وبرسيـم

ويـت ورعيـان وخيـام وصواليـن=غير الخساير والتعـب والخداديـم

ماشح في خمسه وعشـره وعشريـن=وظهورها مـن نعمـة الله مراديـم

الله يكافيهـن عيـون الشياطـيـن=أهل الحسد وأهل العيون الواطيـم

يازين شوفتهن من العـرق ويميـن=وصلـب والصمـان مدهـال للريـم

دار البداوه والضعن والمضاعيـن=لعـل تسقيهـا المـزون المرازيـم

ويصبح خضار العشب مثل البساتيـن=سيلن على سيلن وديمن على ديـم

ديرة شيوخ مطير سقـم المعاديـن=أهل الرمك وأهل السيوف الواحيم

كلن يبيهـا ميـر أهلهـا معييـن=تحزمـوا مـن دونهـا باالمحازيـم

باالمـال والأرواح دونـه مضحيـن=شيوخنـا اللـي للسرايـا مقاديـم

ثم أعتزى فيصل سعـوط المجانيـن=وزود عزوم أمطير وهمه عوازيـم

كم طاح من عدوانهم فاالمياديـن=وقفت جموع القوم عنهـم مهازيـم

وجاها الحكيم اللي رفع راية الدين=ثم انورة سـود الليـال المظاليـم

الدار وأهل الدار الأمره مطيعيـن=وحد بناه وحطـم الشـرك تحطيـم

حاكم وعقبله رجـال(ن) حكيميـن=أهل الوفاء شقر الحرار الصواريـم

حكامنـا المقـرن منـول وهلحيـن=تحكم بشـرع الله وترسـم مراسيـم

واليوم في نعمه وخيـرات ماشيـن=في وقتنا الحاضـر تطـور وتنظيـم

حتى الرمـال القاحلـه والضلاعيـن=يوجد بها صحـه وكهـرب وتعليـم

القصيده الثالثه عشر

دارنا دارنـا باارواحنـا نشتريـه=أرضنا اللي عطتنـا كـل محصولهـا

دار عبد العزيز اللي بنا المجد فيه=يوم خاض الجزيره عرضهـا طولهـا

قبلة المسلمين اللـي تصلـي عليـه=دار صفـوة عبـاد الله ومرسولهـا

وشنبي باالرجولـه كـان مانحتميـه=كلمةً قالهـا غيـري وأنـا أقولهـا

غير حكم السعـود ابلادنـا ماتبيـه=دولـةً سجـل التـاريـخ مفعولـهـا

لاتصـدق وسامـه لاتصـدق فقـيـه=شلـةً يلعـب الشيـطـان بعقولـهـا

الرياجيـل ماتسمـع كـلام السفيـه=واليهـود غسلـت مخـه بمحلولهـا

الله اللي خلق ولكـل شبهـن شبيـه=والشبوهـات ياالشـبـاه جيتولـهـا

ماكسبتوا بياض الا سواد اللوجيـه=في ديار اليهـود اللـي لجيتولهـا

كل واحد يفكر كيف موتـه يجيـه=مختفي فاالجحـور اللـي حفرتولهـا

ونتحرك تعرض واحد(ن) شب فيـه=سلط الله على أهل الظلـم بفعولهـا

القصيده الرابعة عشر

بعنوان يالبيض

ياالبيض شبنا عن هواكن وتبنـا=توبة نصوح(ن) مابعدها رجوعي

يوم الشباب نحب واليـوم شبنـا=اصد بعيونـي وسكـر سموعـي

قالـن علامـك ماتلبـي طلبـنـا=نبغى وصالك وأنت قلبك قطوعي

قلت القطوع اللي بحبـه جذبنـا=ولع شموع الغير وطفى شموعـي

وطال النقاش وفي العلوم أنتشبنا=ونفس تاْمرنـي وقلبـي قنوعـي

وقلت أقنعن ياالبيض تبنا وأنبنا=والمسلم اليا تاب قلبه خشوعـي

بعد مرضنا من هواكـن وطبنـا=هذي تقاريري وهذي وقوعـي

عشرين عام وكثرها وش كسبنـا=مرت علي أحلام مثـل السبوعـي

يامـا بنينـا ونهـدم كـل مبنـا=وياما زرعنا ما أثمرن الزروعي

ويامـا تريحنـا ويـامـا تعبـنـا=وياما سهرنـا ولاْْوادم هجوعـي

وياما على عيص النجايب ركبنـا=وياما لبسنا من جديد الدروعـي

وياما مشينـا فاالخطـر ماحسبنـا=وياما هزمنا من كبار الجموعـي

ويامـا تغلبنـا ويـامـا غلبـنـا=وياما مشينـا فالخطـاء وسنوعـي

القصيده الخامسه عشر

بعنوان المرقب

المرقب اللي ضحى الجمعـه تعليتـه=الرجل ماهي علـى مبـداه مجبـوره

كله علـى شـاْن خلـي يـوم عديتـه=الجادل اللي كما نور القمـر نـوره

أخذت ساعه وأنا مشرف علـى بيتـه=أحاول أنزل ورجلـي تقـل مكسـوره

أخـاف يزعـل علـي اليـا تعديـتـه=وخاف لا ينكشـف والحـال مستـوره

وجيتـه مسـيـر وحيـانـي وحييـتـه=قالت تفضل حياتـي قلـت مشكـوره

وتقـول ليتـك هنـا وقـول ياليـتـه=والكلمه اللي على المكشوف محضوره

ياليتني مـن بعيـد الـدار ماجيتـه=عزلـه أنـه لعبـي لعبـة الـكـوره

القصيده السادسة عشر

وهي مساجله بين شاعرنا والشاعره عابرة القارات

ياطير يااللي ماتهـاب أشهـب الال=خذلي رساله فـوق ريـش الجناحـي

ارسالـةٍ فيهـا عجـاريـف ومـثـال=عسـى لبـو صالـح وراهـا صلاحـي

والبعد والحرمـان والهجـر غربـال=والوقت صار بخيـل وأنتـم شحاحـي

وأن كان خايف من هل القيل والقال=أحفـر لحبـك ودفنـه باالمساحـي

رد الشاعر فيحان القعياني

يامرحبـا ترحيبت(ن)تشـرح الـبـال=فيها الصـدر المستضيـق أنشراحـي

احلى من السكر ومن طعـم الأعسـال=وخف وسرع مـن هبـوب الرياحـي

برسالـةٍ جانيـبـا الطـيـر مـرسـال=الله يعينـه فاالمـجـي والمـراحـي

والقلـب منهـا فـز وهتـز وهتـال=ودقت هجوسه من جميـع النواحـي

وعلى الهوا واصل محطـات الاْرسـال=يراسـل اللـي فاالبلـد والضواحـي

وخذت يـوم وليـل والفكـر شغـال=وشرحت ماضـي قصتـي وقتراحـي

خلي قريب أبعيد فـي رمـل وجبـال=بيـن العـدود المالحـه والقراحـي

وأسمه يرافـق كـل فـارس وخيـال=ويمشي على صم الصفـاء والبطاحـي

وفاالسوق يوجـد بيـن تاجـر ودلال=وعدى طويـق ومـال وادي نساحـي

ويدخل على ورعين في بطـن رجـال=وبنت(ن) من الورعين تبغى النكاحي

ويمشي على هاتـف وبيجـر وجـوال=ويرافـق المجنـون ويقـول صاحـي

بين وخافـي مسكنـه شمـس وظـلال=ياما مشـى ساعـه ويامـا الستراحـي

أغليك وسمك ياحبيبـي علـى البـال=لاكـن منـك المعـذره وسمـاحـي

شربت من كاس الهوا نصف فنجـال=على العسل مخلوط سـم(ن) ذحاحـي

واليوم شبـت وتبـت ياساتـر الحـال=مـدري صقوطـي صـار ولا نجاحـي

تركت حب البيـض سمحـات لاْقبـال=الاْ الحبيـب اللـي بحـبـه مبـاحـي

مرت علـى سنيـن وشهـور واليـال=مدري متـى الاْيـام تطلـق سراحـي

دنيا تقلب كل يـوم(ن) علـى حـال=غاراتهـا بيـن المسـاء والصبـاحـي

أخاف بعد الموت من سـوء الأعمـال=فـي ساعـةٍ فيهـا السرايـر تباحـي

نهـار ماينفعـك صاحـب ولا مــال=الا عملك اللـي علـى اللـوح لاحـي

ولاخذت من دنياك لـو ربـع مثقـال=ولا ينفعـك كثـر البكـاء وصياحـي

ويـاالله يااللـي لصعـوبـات حــلال=تفزع العبد(ن) كل ما قـام طاحـي

وتجعل لنا فـي جنـة الخلـد منـزال=وتدلنـا درب الهـدى والنجـاحـي

وصـلات ربـي عـد مـا هـل همـال=على الرسول اللي مشـى باالنصاحـي

القصيده السابعة عشر

وهي في ابل الاميربندر بن عبدالعزيز

يـاالله ياعالـم خفـيـات الأســرار=ياعالـم(ن) ماكـان بيـن وخـافـي

ياالواحد المعبود يـاوال لاأقـدار=نرجي رضاك ومـن عابـك نخافـي

أنت الذي لذنوب الأنسان غفـرار=أغفـر أثقـال اذنوبنـا والخفافـي

وياالله علينا نـزل الغيـث مـدرار=وتعوضنا باالسيـل عقـب الجفافـي

الأرض تطلـب والبهايـم ولاْشـجـار=أنت القوي والطف بحال الضعافـي

وياسيـدي للعيـد فرحـه وتذكـار=جعله يعود أبخيـر انـت أمتعافـي

شوفتك عيداً غير يـاواف الأشبـار=دامـت نشوفـك ماعلينـا خـلافـي

مبروك يوم العيد مبـروك الاْمطـار=وليا استواء المرباع والجـو صافـي

يازين فاالروض الخضر شبت النـار=والكيف في صفر الدلال المصافـي

هاذي بها هيل(ن) وهاذيك مسمـار=وسوالفـن بيـن النشامـا نضـافـي

فـي عثعثـن نبتـه خزامـا ونـوار=والريـم فيهـا والوضيحـي يشافـي

يازين شوف الذود تمشي بالاْقفـار=اليا أقبلن ونكـان راح(ن) مقافـي

ذود(ن) مغاتير(ن) منقـاه وخيـار=متلحفـات شحـوم ماهـن ضعـافـي

أم الوجيـه الطيبـه حسـك لاْوبـار=سفن الصحـاري قاطعـات الفيافـي

ياحلو صوت أعيالهن وقـت لاْسحـار=اليـا أستعـدن ورزمـن للعطافـي

ثم أسرحن من فجر والطيـر ماطـار=ومقفورهن يبرا لهـن مـن خلافـي

ويا زين شوفتهن على وقت لاْفطـار=وحليبهن من كـل مطعـوم كافـي

الله يكافيهن مـن عيـون الأشـرار=وياالله عليهن تجعـل الستـر ضافـي

ذود أبو فيصل مكرم الضيف والجار=ريف الضعيف وسعد من جاه لافـي

يفرح اليا قالوا نصا البيـت خطـار=ماصـك بابـه فاالسنيـن العجافـي

ونعـم ونعميـن تكـرار ومــرار=الكامـل الله وأنـت ياميـر وافـي

ومدح(ن) بليا فعـل لرجـل معيـار=وعيباً على الشاعر يـرد القوافـي

أنتم هـل العوجـا طويليـن لاْعمـار=ستر البنات اليـا رمـن الغدافـي

حريبكـم يشـرب قراطيـع لاْمـرار=وحليفكـم يامـن بكـم مايخـافـي

وصلوا على اللـي للمخاليـق مختـار=والمعـذره فـاأول واّخـر مطافـي

القصيده الثامنة عشر

ملحمه في الأمير بندر عندما عاد من الخارج

يالله يااللـي تعلـم الشـر والخـيـر=يلـي تحـل الحبـال صعبـه عقدهـا

ياعالـم الأسـرار يـارازق الطـيـر=ويامكرم(ن) مريم بعيسـى ولدهـا

ويامنجين يوسف بعد حط في البيـر=ومن الذي قـدت قميصـه بيدهـا

ويعقوب من حزنه دموعه شخاتيـر=وقرت عيونه بعـد ريحـه وجدهـا

يومنه أورح ريح يوسف مـع العيـر=وعادت عليه عيالـه اللـي فقدهـا

ياالواحد المعبود مالك حـدٍ غيـر=الحمد لـك وشكـر واللـي بعدهـا

يامرحبـا ترحيبتـن تـازن النـيـر=وأكثر من المليون جملـة عددهـا

أقولهـا ياميـر فـرحـه وتعبـيـر=يامرحبا باأهـل البلـد فـي بلدهـا

ترحيب(ن) أحلى من حليب الأباكير=كنه لذيـذ العافيـه فـي جسدهـا

أنتم لكـم شيمـه وقيمـه وتقديـر=وأنتم حماة الـدار وأنتـم سندهـا

يومن أبو تركي يقـود الطوابيـر=قوم(ن) يصبحها وقـوم(ن) هجدهـا

على الرمك ومعسكرات المساميـر=ناس(ن) تسالمله وناس(ن) طردهـا

خاض الجزيـره باالعيـال المناعيـر=أجبالهـا ورمالهـا مــع جلـدهـا

مامل من كثـر التعـب والمشاويـر=كـم ليلـةٍ يسهربـهـا مارقـدهـا

يطارد أهل الشرك وأهل المزاميـر=ويحطـم الأصنـام واللـي عبـدهـا

اليـا تلاقـوا باالسيـوف البواتيـر=كم روس قوم(ن) فاالملاقا حصدهـا

القائد اللـي حـرر الـدار تحريـر=ورسـا قواعدهـا وشيـد عمـدهـا

وتبدلـت عسـر الليالـي بتيسـيـر=للمسلـم اللـي نعمـة الله حمـدهـا

مرحوم والله يمنعـه مـن زمهريـر=ويكفيه ضلمـات القبـور ولحدهـا

وعياله اللـي سمـروا نجـد تسميـر=احـرار والأحـرار توفـي وعدهـا

قاموا على المنهج بحكمـه وتفكيـر=في خدمة الأسـلام تبـذل جهدهـا

والمملكه دار الشرف ديرة الخيـر=الله يحميـهـا ويـرحـم فـهـدهـا

دار السلام ومهبـط الوحـي ياميـر=وأم(ن) عطتنا درها مـن جسدهـا

عشنا وعاشـة فـي تقـدم وتطويـر=خيراً صـدر منهـا وخيـرٍ وردهـا

الله يكفيـهـا عـيـون انواطـيـر=وتعمي عيون الحاسد اللـي حسدهـا

وجعل السحاب اللي مزونـه مزابيـر=يلـوح بارقهـا ويـرعـد رعـدهـا

ويمطر على دار الظبـا والمغاتيـر=وسيولهـا باالخـد يسبـق بـردهـا

والأرض يطلـع عشبهـا ونـواويـر=وتشرح ضمير اللي بعينـه شهدهـا

وياماحلى الخلفات جنـب المعاشيـر=تسرح وتمرح فـي ربيعـه وحدهـا

وطيـر يكفـخ والحبـاري مخاميـر=ونكان طارت باالخضيـرا عصدهـا

وليـا تعلاهـن ومـالـن محـاديـر=هاذي يرددهـا والأخـرى لبدهـا

طاح العشاء طـاح الغـداء لصقاقيـر=ثـلاث وربـع مـع طريقـه جلدهـا

والمعذره يامير لـن صـار تقصيـر=مـن واحـدٍ فزعاتكـم ماجحـدهـا

ماقالهـا يبغـى وراهــا دنانـيـر=ولاله مقاصـد يـوم فيكـم قصدهـا

يقولهـا ياميـر فـرحـه وتعبـيـر=يامرحبا بأهـل البلـد فـي بلدهـا

وصلوا على اللي نور الحـق تنويـر=عد الفروض وعـد منهـو سجدهـا

القصيده التاسعة عشر

هذه قصيدة رثاء(( لشاعر الجيلين)) الشاعر فيحان القعياني المطيري في والده رحمه الله

يابوي ضاقت دنيتي بعد فرقـاك=كني بها الدنيا وحيد(ن) لحالـي

قالومريض وقالـو الهـم يبـراك=قلت آه ماتدرون يابـري حالـي

يفزقلبـي كـل ماحـل طـريـاك=وصفق على الكف اليمين الشمالي

لاتحسبنـا بعـد موتـك نسيـنـاك=لاوالذي ينشي صـدوق الخيالـي

انت الوحيد اللي حقيقه فقدناك=القلب ماهو عنك دالـه وسالـي

اكبرمصيبه يـوم للقبـر جبنـاك=عليك ملفوفـات بيـض الشيالـي

حطوك فالحفره ولاعـاد شفنـاك=هلو عليك اترابها وانـت غالـي

مالي جداغيرامسح الدمع ونعـاك=الله يصبرنـي عـلـى ماجـرالـي

الله يغفرلـك ويمـحـا خطـايـاك=في جنة الفردوس منزلك عالـي

مرحوم ياللي تفعـل الخيريمنـاك=يابـن صويلـح ياكريـم السبالـي

الطيب والنوماس والدين يزهـاك=عزالله انك من زحـول الرجالـي

ماعادباقي عندنا غيـر ذكـراك=حتى وانا فاالنوم اشوفك قبالـي

والمعذره على باقي قصائد الشاعر الكبير فيحان القعياني المطيري

هذا اللي قدرت أجمعه لكم وابو صالح شاعر له حق علينا اكثر من كذا شاعر خدم القبيله

اكثر من اربعين عام علماً بأنه شاعر محاوره بس ماشاء الله عليه يجيد النظم والمحاوره

وكل شاعر مطيري خدم القبيله له حق علينا كاأعلاميين وسلام عليكم

يعطيك العافية

بس ياليت بروقه كل قصيده برد جديد

حتى يكون الديوان مرتب اكثر