ديوان الشاعر : مستور بن عوض

شموع المدينه

يوم طابت ليلتي يا بنت مع طيب السوالف
وانتشر سحر الغرام وذابت اشموع المدينه
وابتدا هاجوس شعري ينظم الأبيات حالف
ما يجيب إلا جزال الشعر وأبيات(ن) رزينه
قلت اببدا بالعيون وقال قلبي ما يخالف
يا حلاة عيونها من صابته ربي يعينه
وإلا ذاك المبسم اللي صار للعشاق سالف
يسلم المبسم ويسلم كل حرف(ن) تنطقينه
طاب لي ذاك الجديل اللي على المتنين والف
ما خذا عقلي وقلبي غير خصرك يا حسينه
اطلبيني ما بغيتي وابشري بي لك موالف
والله إن يرخص لعينك كل شيّن تطلبينه

ابيات يتيمه

وش الله بلاني بك وحبيتك بيومين
صدق من يقول الحب يا زين من نظره
وانا يوم شفتك كني اعرفك من عامين
يابو مبسمن يسوى هل الشام والبصره








يامل قلبـن طـواه الهـم ياخالـي
له عام ماذاق طعم النوم والراحـه
ماعاد ميز مابين المـر والحالـي
ولا عاد حسب خساراته من ارباحه








مريت اسلم قبل ما اغادر الديره
واجدد العهد والميثاق ياروحي
ماودي ارحل ولكن يالله الخيره
تجبرني اظروف زادت فيني جروحي







حلفت مااتوب من حبك وانا حي
بظل احبك الين الموت ياخذنـي






ماطعت نفسي على نسيانك البارح
لا قلت يا نفس احبه قالت التوبه
والله يا صاح مانسى رمشك الجارح
لو كان توقف جيوش الزير من صوبه

لا واحسايف

لا واحسايف ضاقت النفس يا منادي
وامسيت في ليل الهواجيس محتار
الجمر في وسط الحشا حيل وقادي
والعمر ضاعت به مصاعيب الاقدار
من نجد اون وياصل الصوت للوادي
يا اهل الدواسر قلبي اليوم به زار
على حبيبن غاب عني ولا عادي
ياالله عساه يعود وينور الدار
ما ذقت من فرقاه شربن ولا زادي
وحرمني من النوم والليل جوار
يا اهل الصحافه ودوا العلم للرادي
خلوه ينشر في الاذاعه والاخبار
قولوا لحبيبي يرجع الشوق بي زادي
وان ما رجع لي جن بي عقلي و طار

فمان الله

ياكيف ترحل ياحبيبي وانا جيت
يا لعنبوا حظي لفيت ورحلتي
حلمت بك في نجد وفي بيشه اصحيت
ويومي سألت الناس قالوا مشيتي
ما اظن يا عمري مع الوقت انا ابطيت
ما اقوى على الفرقا ولكن قويتي
أخطيتي بحقي وانا اليوم ما اخطيت
اهديت لك حبي ولا انتي عطيتي
يكفي كفايه ليتني ما تعنيت
ويكفي حياتي ما عطيت وخذيتي
يا ليتني في يوم ما كنت حبيت
واكون ما شفت ولا انتي لفيتي
روحي فمان الله يا بنت صكيت
قلبي من امثالك ولا انتي عليتي

غلطانه

ان كان ظنك ما به الا انتي فغلطانه
تعالي اكشف لك عن اللي حبهم قلبي
أدري ثقل والا انتي بحبي فولهانه
واكبر دليل ان جيت قلتي هلا حبي
صحيح قلبي يوم شافك قال سلطانه
وصحيح اذا منك رحلتي قلت ياربي
ان جيت عاني قلتي اليوم زعلانه
وان غبت قلتي وينك اليوم عن دربي
يا بنت روحي صارت النفس طفشانه
ومليت من قولة حبيبي أنا ما ابي

يا بوي

يا ابوي أنا من جور الايام ونيت
وش حيلتي يا ابوي حظي رماني
اسأل عيوني كم من الدمع هليت
ويجيب دمعن شاكين لك زماني
ضاقت بي الدنيا من اول وخبيت
واليوم ابشكي لجل وقتي شكاني
ما عادني يا ابوي حين ولا ميت
عافتني الدنيا وهمي حداني
ومن زود ما بي تهت مره وحبيت
واثر الزمن يحكم عليه اعاني
يا ابو محمد زاد همي ومليت
ضاق الصدر يا ابوي والموت حاني
خلاص عن دنياي يا ابوي صديت
هذا نصيبي يوم بعته شراني

ضحية حب

ابكتب على ضي القمر أجمل الابيات
وابرسل مع النجمه لخلي توديها
رساله حزينه تشرح لصاحبي ما فات
تبين له احوالي وباللي جرى فيها
سهير الليالي وازفر الهم والونات
واداري همومي لكن القلب يشكيها
طعني حبيبي بالغدر واكثر الطعنات
وباع المحبه يوم انا كنت شاريها
رماني ضحية حب وزاد الألم حسرات
وخلاني اعد الليالي واعانيها

بنت نجدية

قالت عسى الله يرحم حالك وحالي
ويوفقك يا خوّي الدرب ببنيه
اتحبك وتقدر تهنيك يا الغالي
وتكون مثل القمر في نورة وضيّه
قلت بصراحة ترى انتي كل أمالي
وغيرك ترى بدنيتي والله ما فيه
وبعيش دنيا الهنا وأنتي على بالي
وبكون ملكك أنا و بكل ماليه
قالت ترى ياخوّي الدرب لي والي
كدر حياتي وزود كل مأسيه
وما أظن يوم الهنا يا خل يصفالي
دام إن جوي وجوك داخله فيّه
قلت الصبر في المحبة عشقي إهبالي
مستور لامن عشق عشقه سعوديه
قالت دخيلك حبيبي دوّر إبدالي
أنا من أهل الرياض وبنت نجديه
قلت الهوى في المحبه نفس الأحوالي
إن كان في نجد وإلا في الجنوبيه

غاده

ياحي ضيفة أبوها ياهلا بغاده
تو أنور العالم بعيني ومن حولي
يامرحبا ميه ومليون وزياده
نورتي الدار قولي يايبه قولي
أن طال عمري هديتك تاج وقلاده
واتوجك بالذهب بالعرض والطولي
وابني لك المجد واصور لك ابعاده
واعطيك حبن مع الايام موصولي

جنيـــــه

انا لي خويه ماهي من البشر يا ناس
خويه من اهل الجن لا شك جنيه
تجيني بوسط النوم مثل الحلم وسواس
اذا شفتها اذكر ربي بليلتي ميه
جمالن حقيقي ما لها في البنات اقياس
رزانه وثقل ويمكن بوصف حوريه
لها مبسمن يشفيي وخدن كما الالماس
عيونن وساع ورمش سوا العجب فيه
يفوح العبير وياحلا ريحة الانفاس
ويازين خصلات الشعر لا اقبلت ليه