× في شقة فيصل .. !!
دانة " تكلم بالتيلفون " : اسكتي والله العظيم خايفة مادري وش أسوي .. ؟؟
مشاعل " تتنهد " : جد موضوع مو بوقته أبد .. طيب من قال لك .. ؟؟
دانة " بتطنز " : يعني مين اللي رايح معي .. أكيد عمي ناصر ..
مشاعل : أهااا .. طيب قولي له خلاص ..
دانة " والدمعة بعينها " : المشكلة مو هنا أقدر أصرف السالفة ..
مشاعل "استغربت " : وين المشكلة أجل ؟؟؟؟
دانة : أنا غبية التقرير اللي سويته حلووو مرة وهادف .. وعرضوه اليوم بالقناة قالت لي أمي ..
مشاعل : يوووووه جد مشكلة .. × سكتت شوي .. طيب عن ايش التقرير ؟
دانة : عن عايلة فقيرة .. وحالتهم غريبة وكذا .. يعني التقرير بيشوفه الأعمى .. وطالعة أنا آخر شي .. × بخوف .. يااااربي أقول له وأمري لله ..
مشاعل " بهدوء" : لا اصبري يمكن مايدري ..
دانة " تسمع صوت المفاتيح عند الباب وبسرعة " : مشمش أكلمك بعدين باي ..
× دخل فيصل ..
مشاعل : باي ..
× سكرت دانة .. ووقفت .. أهلين حبيبي ..
فيصل " يبتسم لها وهو يمشي " : هلا حبيبتي .. كيفك ؟
دانة " وقفت وقربت ومسكت يده وتبتسم " : تمام دامي شفتك ..
فيصل " يطالعها مستغرب " : وش فيه وجهك ؟
دانة : أبد هيك .. كلمت مشمش وسولفت عن أيامي زمان في بيت بابا وتعرف ..
فيصل " يبتسم وضمها " : يالله حبيبي عازمك على العشاء ..
دانة " تطالعه " : وين ؟
فيصل : ستيك هاوس .. ماتبين .. ؟
دانة " ابتسمت " : إلا مررررررة أموت في أكلهم ..
فيصل : يالله حبيبي بسرعة .. روحي البسي .. ولا تحطين شي بوجهك ..
دانة " بقهر " : بس بتزين لك ..
فيصل " بهدوء ": إذا بتكشفين .. لا تحطين شي ..
دانة " واقفة " : ولا خفيف ..
فيصل "عصب" : يووووه يادانة ولا شي وبعدين أنت حلوة بدون شي ,,
دانة " عصبت " : بس أنا عروس ولازم أتزين .. ياسبحان الله لازم تعكر الجو ..
فيصل " وهو معصب " : أنت تشوفين المشاكل اللي صارت لنا الأسبوع اللي راح وساكت ومتحمل .. ولا قلت لك غصب غطي وجهك ..
دانة " راحت للغرفة وهي تمشي " : الله يخليييييييك أكرمنا بسكوتك .. معقد ..
فيصل " طلع زقارة وبصوت عالي " : خلاص مافيه عشاء .. ولا أبي تسوين لي شي ..
دانة " دخلت الغرفة وسكرت الباب " ..
فيصل " يكلم نفسه .. يالله عناد مو طبيعي أبد .. × فتح التلفزيون ورفع الصوت ..
× دانة بالغرفة .. جلست على طرف السرير .. × تسمع صوت التيلفزيون .. وقفت بخوف.. يااااربي أخاف يشوف التقرير .. × طلعت بسرعة .. وابتسمت بخوف .. فيصل ..
فيصل " يطالعها وهو زعلان " : نعم وش تبين ؟
دانة " قربت وجلست .. وأخذت من يده الريموت وسكرت التيلفزيون ..
فيصل " يطالعها " : ليش سكرتيه ؟
دانة " تبتسم " : يالله ماودك نطلع .. ؟
فيصل " بهدوء " : وأنت خليتي لي مزاج طلعة ؟؟
دانة " تطالعه " : طيب مو لازم نطلع .. قوم معي بالمطبخ ونسوي لنا عشاء وأبيك معي ..
فيصل : روحي لحالك .. أنا بطلع مأجل موعد مع واحد من العيال وبروح له دام ماعندي شي ..
دانة " بينها وبين نفسها .. أهم شي تبعد عن التيلفزيون ..
فيصل "وقف " : كولي العشاء لحالك ..
دانة " وهي جالسة تشوفه " : طيب حبيبي .. أنا آسفة .. وخلاص قفل على السالفة ..
× فيصل سكت وطلع ..
× في شقة عبد الله ..
سارة وعبد الله يتعشون ..
عبد الله : بكرا الغدا عند أهلي ..
سارة " تضحك " : استغفر الله ذكرتني بسواليف أمي .. والله عبود قديييم مرة ..
عبد الله " يطالعها ومستغرب ": تضحكين عشاني قلت بنتغدى ؟؟ ؟؟
سارة " تطالعه وبتطنز " : أجل عشان ايش ؟؟ أقول عشاء واحمد ربك .. يالله أتحملهم ..
عبد الله " ترك الملعقة " : سارة احترمي نفسك .. لا تخلينني أغلط عليك ..
سارة "تضحك " : محترمة نفسي .. كل كل بس .. × تآكل ..
عبد الله " ترك الملعقة وقام .... !!
سارة " تكلم نفسها .. بالشيطان .. جعلك ماترضى ..
× في شقة فيصل ..!!
× دانة جالسة بالصالة مشغلة التلفزيون وتنتظر التقرير بالأخبار .. × تكلم نفسها .. يالله وينه والله بيجي فيصل ماشفت شي .. × تسمع ورفعت الصوت بسرعة .. (( عائلة سعودية فقيرة تعيش في صحاري الرياض .. نترككم مع التقرير الذي أعدته لنا دانة فهد ...... !!!
× في بيت أم عبد الله .. نورة جالسة على السريروتلبس ولدها وتلعبه .. يااااقلبي ياعبودي .. اضحك × تحط اصبعها على فمه.. × يضحك .. ياااعمري أنت .. عسى ربي يخليك لي .. × تطالعه .. ياااازينك بس ..
× دانة سكرت التيلفزيون وهي ترتجف من الخوف .. وتكلم نفسها .. يااااربي أنا وش يضمن لي انه ماشافه عند الرجل .. × تتنهد .. يااااالله ياليتني سامعة كلام أمي .. !!
× في استراليا ..
× خالد جالس على طاولة الطعام .. وليلى تحط الصحون ..
خالد : كلمني قبل يومين ..
ليلى " وهي تسحب الكرسي بتجلس" : ياعمري يانورة .. والله كاسرة خاطري .. لااااا وأنت مع فيصل ..
خالد " أخذ الملعقة " : الحين أبد مو معه .. وراحمها .. والولد اللي بينهم ماقدر يرجع كل شي ..
ليلى : ياسبحان الله .. بس الطيب بهالدنيا هو اللي يتعب
خالد " يقاطعها " : مافيه أحد مرتاح لا الطيب ولا اللي فيه شر ..
× في شقة فيصل .. دانة بالغرفة .. وتولع الشموع .. × تكلم نفسها .. مشي الليلة عادي يادندون ولا تبينين شي.. لأنه لو داري عن شي جاء بسرعة .. !! × سمعت صوت الباب .. × بسرعة سكرت نور الغرفة وتركت نور الأباجورات وجلست على طرف السرير .. × فيصل فتح الباب .. وشاف الغرفة وابتسم .. السلام عليكم ..
دانة " وبدلع " : ياااااهلا وغلا ..
فيصل " قرب ووقف قدامها " : ردي السلام بالسلام ..
دانة "وقفت " : وعليكم السلام ..
فيصل " مسك يدها " : حلوة ريحة البيت ..
دانة " تبتسم " : أحبك .. وش أسوي !! بدلعك ..
فيصل " باسها على رآسها " : دانة قلبي اعذريني على اللي صار اليوم والله أنا أغار عليك من النسمة ..
دانة " حطت يدها على فمه " : بس لا تقول شي .. أصلاً ماراح أزعل عليك أبد .. ولو تدري عن غلاك بقلبي مااعتذرت لي لأني ماأزعل منك أبد ..
فيصل " يبتسم " : أنا عصبي ماأمسك نفسي .. فيه أشياء صغيرة أعصب منها وأشياء كبيرة ممكن أسكت .. مادري وش يصير فيني .. !!
دانة " تطالعه .. وساكته ..
فيصل " يبتسم مستغرب " : وش فيك تطالعيني كذا ؟
دانة " طاحت دموعها ": والله اني محظوظة .. عسى الله مايغير علينا ..
فيصل "ابتسم ويهمس لها" : أحبك ياأحلى وأطيب زوجة بالدنيا ..
× مع إشراقة يوم جديد في السعودية .. !!
× فيصل ودانة يفطرون ..
دانة : وأنت بتجلس بدون شغل ؟
فيصل " يبتسم " : كلها فترة وراجعين استراليا ..
دانة : بس حبيبي ماعندنا دخل .. وضاغطين على أنفسنا ..
فيصل : ربي يفرجها ..
دانة : لا تقعد بدون شغل وتقول ربي يفرجها .. لازم نسوي شي ..
فيصل "سكت شوي .. : دانة .. فيه سالفة مقلقتني وضميري مو مرتاح ..
دانة " استغربت ": وش فيك ؟
فيصل : لازم اليوم نروح لأمي ونحطها أمام الأمر الواقع ..
دانة " سكتت .. ..
فيصل " استغرب " : ماأعجبك كلامي ؟
دانة " بهدوء " : والله العظيم نفسي أتقرب من أهلك ونفسي أدخل معهم .. بس أمك أحسها مو سهلة ..
فيصل " يبتسم " : أمي أطيب منها مافيه ,, بنروح اليوم العصر ونجرب ,, ماراح يضر شي ..
دانة "تتنهد" : الله يعين .. طيب بتقول لهم .. ؟
فيصل : لا .. ماراح أقولهم ليش ؟؟
دانة : اللي يريحك ..
× في بيت أم عبد الله .. أم عبد الله وعبد الله ونورة يتقهوون بالصالة ..
عبد الله : الله يصلح الحال يايمه والله لو داري انها كذا ماخليت الزواج يتم ..
أم عبد الله "تضحك " : يايبه البنت مشحونة .. كثير بنات أول الزواج يخافون من أهل الزوج وبعدها يتغيرون .. وكيفها أهم شي مريحتك ..
نورة "تقاطعها" : يمه لا تصيرين طيبة بزيادة .. كلمي أمها وقولي لها إن البنت ماتبينا
عبد الله " بسرعة " : لالالالا ماله داعي تآصل يمكن تتغير .. هي طيبة وكلمة توديها وكلمة تجيبها ..
أم عبد الله : الله يعين على هالدنيا والله حنا بخير ..
نورة : بس هالبنت ماني مرتاحة لها ..
× في بيت أبو عبد العزيز .. سارة وسحر بالصالة ..
سحر : يووووه ياسارة .. تشوفين وشلون طيب معي .. يجنن والله يجنن ..
سارة "مستغربة " : طيب يشرب ..؟؟
سحر " تتهد وتضحك " : أقول لك من أول يوم بزواجنا اعترف بكل شي وقال أنا نويت أتزوج أبي أطلع من اللي فيه والغفلة اللي أنا فيها..
سارة "ابتسمت " : طيب ليش سافرتي أسبوع بس ؟
سحر : أنا مليييت ماتعرفينني أمل من السفر واشتقت لأمي ..
سارة : ياحبي لك والله فرحتيني الله يوفقك يارب ..
سحر : آميييين .. × جت أم عبد العزيز ..
أم عبد العزيز " وهي تمشي " : سارة ليش مارحتي مع زوجك لبيت أهله .. ؟
سارة " بوجه عابس " : يمه يضيقون الصدر ,, هدوء ونورة ماتتكلم ..
أم عبد العزيز " جلست " : يايمه مايصلح .. وبعدين أنت رحتي لهم بفترة طلاقها والمشاكل واللي جاهم مو سهل .. والله يايمه إنهم ناس طيبين ولا ترفسين النعمة برجولك ..
سارة " بسرعة وبنفس شينه " : ان شاء الله .. ان شاء الله .. يصير خير ..
سحر : أنصحها بس ماتسمع ..
سارة "تضحك " : هذا اللي ناقصني بعد !!!!
× في بيت أبو فيصل ..
× أم فيصل لحالها بالصالة تتفرج على التلفزيون .. × رن الجرس .. أم فيصل تصوت .. منور .. منور .. تعالي بسرعة ..
× جت منار ., سمي يمه ..
أم فيصل : روحي افتحي الباب ..
منار : طيب ..
× راحت ..
× أم فيصل .. من اللي جاي هالوقت .. × جت منار بسرعة .. يمه يمه ,, فيصل ..
× وقفت أم فيصل .. " مستغربة " .. وينه الحين .. ؟
منار " تتنهد من الركض " : دخل .. بس أنا ركضت ..
أم فيصل " بسرعة " : شوفي أنا بروح لغرفتي قولي أمي نايمة ..
× دخل فيصل ,, ومعه دانة ..
أم فيصل " انصدمت ".. وسكتت .. !!
فيصل " قرب " : السلام عليكم ..
أم فيصل " بقهر " : وعليكم السلام ..
فيصل " قرب يبوس رآسها ,, وأبعدته بسرعة .. × سكت فيصل ..
أم فيصل " بصوت حاد " : وش عندك ؟
فيصل : جايين نسلم عليك .. والله اشتقنا لك ..
أم فيصل " تطالعه " : بيتي يتعذرك .. اطلع ..
دانة " قربت " : لازم تسمعيننا
أم فيصل "بسرعة وبصوت حاد " : اطلعوا من البيت .. وإلا بمشي وأخليكم ..
فيصل " يطالعها" : يمه تكفين سامحينا .. ونبي ترجع حياتنا مثل أول ..
أم فيصل : دام هذي معك ماراح ترجع حياتنا مثل أول.. شوف وشلون انقلبت حياتنا من يوم دخلت..
× دانة ساكتة..
فيصل : ماعليه يمه ماعرفتيها لو عرفتيها وفتحتي قلبك لها راح يرجع كل شي مثل أول وأحسن ..
أم فيصل " تضحك باستهزاء" : أقووول .. لا تكثر من الكلام اللي مامنه فايدة .. ومابيني وبينك شي إلا إذا رجعت لنورة وتركتها ..
× دانة منقهرة وساكته ..
× فيصل ماقدر يرد .. × دانة مسكت يد فيصل .. يالله يافيصل ..
× فيصل نزل رآسه ودار ظهره ومشى .. ويحس بقهر بداخله ..
× أم فيصل بصوت حاد وعالي .. ايه روح معها خلها تنفعك .... × سكتت شوي .. منار روحي صكي الباب وراهم ..
منار "تمشي شوي شوي ,, راحمة أخوها ..
× فيصل فتح باب السيارة وركب .. وركبت دانة ..
فيصل " يتنهد " : مادري وش فيني كنت بقول كلام كثير وبأثر فيها.. بس لما شفتها راح كل الكلام ..
دانة "بهدوء": قوية أمك ..
فيصل " يبتسم وبقهر " : قوية وطيبة ,,
× دانة سكتت وفبالها كلام كثير .. بس ماتبي تضايق فيصل ..
× في بيت أم عبد الله ..
× نورة بالمطبخ تسوي حليب لعبود .. × دخلت أمها ..
نورة " طالعتها وابتسمت "..
أم عبد الله : يمه بروح اليوم لأختي تجين معي ؟
نورة " محتارة " : والله مادري مالي خلق أطلع .. بس أشوف ..
أم عبد الله : اللي يريحك ..
نورة : يمه شفتي عبود صحى من النوم وإلا لا ؟
أم عبد الله : إيه ياعمري شكله مرة جوعان استعجلي يمه ..
× في بيت أم فيصل ..
أبو فيصل وأم فيصل وعلي بالصالة ..
أبو فيصل " بصوت عالي " : بأي حق تطردينه ..
أم فيصل "بعناد وبصوت عالي " : البيت بيتي ومن حقي أدخل اللي أبي وأطرد اللي مابيه ..
أبو فيصل "معصب مرة " : اقسم بالله العلي العظيم إذا مارجعتيه خلال هاليومين .. سمعتي يومين بس .. !! والله إن ينتهي كل شي بيننا..
أم فيصل "انصدمت" : بعد هالعمر ؟؟؟
× علي ساكت ..
أبو فيصل "بصوت حاد ": ولدي مابيه يتمرمط .. ومن حقه يدور راحته وأنت السبب بكل شي صار .. فرضتي كلامك فرض عليه .. ومشتيه وكأنه بزر .. لا تحسبين الناس على كيفك.. هذا واحد طلع عن كلامك وتزوج والثاني ماندري عنه بشي ..!! كله منك وتعاملك ..
علي "بصوت هادي " : يبه تعوذ من ابليس
أم فيصل "تقاطع علي وبصوت عالي": أصلاً ابليس راكبة .. وأنا اللي متحملة وصابرة بهالبيت على كل شي.. ولدت وربيت وتعبت وطلعت رجال وفي النهاية أنا اللي ضيعتهم .. والله ياأبو فيصل أعتقد وصلتهم لمرحلة أنا اللي أرتاح فيها هاللحين .. وأنا اللي أدور الراحة .. بس اللي مكتوب عليه الشقى !!! × دمعت عينها ..
أبو فيصل " يتنهد": المهم فيصل يرجع يعني يرجع وكلمتي ماأثنيها .. !!
× طلع أبو فيصل ..
أم فيصل "جلست على الكنب وحطت يديها على رآسها وبكت ... !!
علي "قرب وباس رآسها " : يمه فكري زين وتعرفين الصح من الغلط ..
أم فيصل "تبكي ": وشلون يعايرني بولدي محمد ؟؟؟ أنا وش ذنبي ؟؟
علي " جلس جنبها وقرب لها " : يمه كان معصب لا تشرهين عليه ..
أم فيصل " بكت بقوة " : يعني أنا راضية عن اللي صار بولدي .. !! والله قلبي جمر عليه ومادري هو يآكل هو يشرب هو ميت هو حي.. والله لو هو ميت بعد أهون من إني مادري عنه !!!
علي : يمه اذكري الله وإن شاء الله يرجع .. ربي معه ..
× جت منار .. وجلست قدامهم ..
علي " بصوت هادي " : منور قومي جيبي ماء لأمي ..
× وقفت منار : طيب .. × تأفف وتكلم نفسها .. يااااربي كبرت وهم دايم مايبونني أدري بشي .. افففف ..
× في بيت أم دانة .. !! فيصل ودانة توهم داخلين ..
أم دانة : يالله حييهم نور البيت ..
فيصل "توه يجلس " : بوجودك ياخاله.. كيفكم إ ن شاء الله تمام ؟
أم دانة : الحمد لله .. أنتم عساكم مرتاحين ؟
فيصل : الحمد لله.. × يبتسم .. دامي مع دانة مرتاح ..
دانة " ابتسمت ..
أم دانة : الله يخليكم لبعض ..
× في بيت أبو فيصل .. علي جالس جنب أمه ,, وأمه ماسكه رآسها ..
علي "يطالعها " : يمه فيك شي ؟
أم فيصل : أحس رآسي بينفجر ..
علي : أجيب لك حبة بنادول ؟
أم فيصل : آخذه يبه .. والله ماأقدر أشوف شي ..
علي "وقف " : يمه شكل ضغطك مرتفع وإلا منخفض قومي بعد .. × يطالعها .. حتى وجهك مو طبيعي ..
أم فيصل " رفعت رآسها" : يبه قل لمنور تجيب عبايتي لازم أروح المستشفى والله أحس الدنيا كل شي صار أسود..
علي "بينه وبين نفسه " : الله يستر ..
× في بيت أم عبد الله .. × أم عبد الله تركض دخلت غرفة نورة ونورة ترضع ولدها .. ×بسرعة .. نورة يمه كلمني علي يقول أختي بالمستشفى ..
نورة "انهبلت " : وش فيهم ؟
أم عبدالله "والدموع مالية وجهها" : والله مادري ؟؟ !! يايمه دقي على عبدالله والله ماني قادرة حتى أمسك الجوال ..
نورة "بسرعة أخذت الجوال ودقت " : يارب تحفظها من كل شر ..
× أم عبد الله واقفة وتسمح دموعها بالمنديل .. يارب يارب يارب تخليها ..
نورة "بسرعة " : هلا عبدالله وينك ؟
عبد الله : فالبيت ..
نورة "بهدوء وخايفة" : طيب ياحبي لك تعال أمي تبيك
عبد الله "استغرب" : وش تبي ؟ وش فيه ؟؟!!!!!
نورة : خالتي بالمستشفى..
عبد الله "قاطعها": ياساتر عسى مافيها شي كايد ..؟؟
نورة : لالا إن شاء الله بس ياحبي لك بسرعة ..
عبد الله " وقف ": يالله يالله جيت اجهزوا ..
× في المستشفى ..
أم فيصل دخلت الغرفة وعلي يمشي وراها والممرضة معهم ...
علي "بصوت واطي يكلم أمه ": لازم تريحين نفسك وسمعتي الدكتور وش قال .؟؟
أم فيصل "تشيل عبايتها " : الله يعين ..
الممرضة : يالله ياماما لازم ترتاحي ولا تفكري بشي لأنه ضروري يرتاحي ..
أم فيصل " انسدحت على السرير " : يارب ..
علي "باس رآسها " : ماتشوفين شر يالغالية ..
أم فيصل "طاحت دموعها": الحمد لله على كل حال ..
× دق جوال علي .. هلا يبه .. ايه بالدور الثاني .. لا الحمد لله مافيها شي .. يالله هلا بك
× في بيت أم دانة ..
× دانة وأمها بالصالة .. !!
أم دانة :بالعكس يايمه والله أدعي لك ليل نهار ..
دانة " بخوف " : بس فيصل للحين مايدري عن التقرير ولا أدري وش أسوي ؟؟
أم دانة "تبتسم " : الله يصلحك .. توك تحسين بكلامي ؟؟ مالك إلا تقولين له ..
دانة "عبست وجهها" : صعبة ماما .. والله صعبة .. مررررة غيور .. أنت ماشفتي كيف يبهذلني بالمطاعم والأسواق ماتوقعته غيور ..
أم دانة "تضحك " : هههههههه وفيه سعودي مو غيور ؟؟؟
دانة : يااااااااااالله الله يستر منه .. صدق عرفت إن كلامك كله صح .. وفيصل أفكاره تختلف جذرياً عني ..
أم دانة "تتنهد": يايمه الكلام ببلاش بس التطبيق صعب ..وهذا حال فيصل!! يتكلم بس صعبة عليه يطبق لأن عايلته وعاداته تختلف عنك ومهما كان اللي حوله يأثرون عليه ..
دانة "سكتت شوي ": ليش كل ماجيتك خوفتيني ماريحتيني
أم دانة "قاطعتها": يايمه أنا أصدق وحدة معك وأخاف تصدقين الأيام وهي تضحك عليك .. أنا أكون صريحة معك ماأبيك تنصدمين ..
× فيصل واقف بالسيارة عند بيت أبو دانة .. كان بيمشي وهون .. × نزل من السيارة .. وطلع زقارة .. ويدخن .. × بينه وبين نفسه .. ليش يايمه ؟؟ والله لو تعرفين غلا دانة بقلبي وراحتي معها كان مازعلتي .. × وقف شوي يتفرج وهو يدخن .. × رمى الزقارة ودعسها برجله .. وركب السيارة وشغلها .. ومشى .. !!!! شغل عبدالمجيد ..
حدك هنا لا تقربي مني .. أنا الله خلقني حر ..
مهما ظروفي تمر ..
ومهما لقيت صدود ..
أبقى أنا الموعود ..
مابيني يأسي والمنى ..
× قطع جوه صوت الجوال .. طلعه ورد .. هلا علي ..
علي : كيفك ؟
فيصل "بصوت تعبان " : ذبحني التفكير محتار بين أمي ودانة ..
علي "سكت شوي ...
فيصل " استغرب " : وش فيك ؟
علي " بهدوء": فيصل أمي مرتفع ضغطها
فيصل "بسرعة وبخوف " : عسى ماصار فيها شي ؟
علي : لالالا بس قالوا بنرقدها يومين أو ثلاث ..
فيصل "استغرب وبقهر " : يعني بالمستشفى أمي ؟
علي "يتنهد": إيه .. ويقول الدكتور لاااازم ترتاح وإلا الله يستر ..
فيصل "بقهر " : يااااااااالله كله من اللي صار .. طيب بأي مستشفى؟
علي : لا تجي أمي لازم ترتاح ..
فيصل " بسرعة وبعصبية": وش اللي لا تجي أمي هذي ..!! بجي يالله بأي مستشفى ..!!
× عبد الله وأم عبد الله ونورة .. دخلوا غرفة أم فيصل .. بسرررعة راحت أم عبد الله وباست رآسها ..سلامتك يالغالية ..
أم فيصل "بصوت تعبان " : الله يسلمك ..
× قربت نورة وباست رآس خالتها .. سلامتك ياخاله ..
× وقرب عبد الله وباس رآسها . سلامتك .. ياجعلك ماتشوفين الشر ..
أم فيصل : الله يسلمكم ,, اجلسوا ..
× عبد الله وهو واقف : قلت أشوفك وأتطمن عليك .. أنا بطلع عند علي وأبو فيصل ..
أم عبد الله : على راحتك يبه بس انتظرنا لا تمشي ..
عبد الله : إن شاء الله .. يالله ياخاله تآمريني بشي ؟
أم فيصل : سلامتك يابعد قلبي ..
× جلست أم عبدالله وجلست جنبها نورة ..
× علي يطق الباب .. × تغطت نورة .. × دخل علي .. وقرب لأمه .. وبصوت واطي .. يمه فيصل بيجي ,,
أم فيصل " وهي تشوف علي وبصوت واطي " : وش يبي ..!! ماارتاح يبي يموتني ؟؟
× نورة سمعت ونزلت رآسها ..
علي "بصوت واطي " : وش أقول له ؟
أم فيصل "راحمة فيصل بس تخاف على زعل أختها ..سكتت.. !!
علي "ابتسم " : أكيد رضيتي .. بعدين يمه لازم تريحين نفسك وصحتك أهم من كل شي..
أم فيصل "طاحت دموعها": وأنا ماذبحني إلا هو وأخوه .. ×سكتت شوي .. خلاص خله يجي ..
علي "طلع ....
أم عبد الله "تبكي " : وش فيك ياأوخيتي عسى ماشر وش اللي جاك ؟
أم فيصل : مرتفع الضغط الله يعين ..
× نورة طلعت القهوة وتصب ..
أم عبد الله : يابعد عمري ريحي نفسك ..
× عبدالله دخل .. نورة تعالي شوي ..
نورة "عطت أمها القهوة وطلعت مع عبد الله ..
نورة : وش عندك ..؟
عبد الله " تعالي اجلسي بالانتظار لأن فيصل بيجي ..
نورة " ودقات قلبها تنبض بسرعة .. بيجي ؟
عبد الله "مسك يدها ومشى معها .. وإلا أقول لك تعالي نتمشى لما يطلع ..
نورة "والدموع بعينها " : زين سويت ,, أشوى إنك قلت لي ..
عبد الله "يبتسم": ماأبيك تنحرجين ..
×رآحوا لللفت ..وانفتح وركبوه ونزلوا ..
نورة " وهي طالعة من اللفت " : ياعمري ياخالتي شكل اللي رافع ضغطها فيصل ..
عبد الله : الله يعينها .. فيصل ومحمد كلهم يرفعون الضغط ..
× نورة فجأة ارتبكت .. ووقفت ..
وتشوف فيصل وهو بعيد عنهم ماانتبه .. دقات قلبها أسرعت .. ودموعها طاحت ماتدري ..
عبد الله "انتبه .. وسكت ..
× نورة .. ولسان حالها يقول ..
ليتني ماقد عرفته ولا أمنته قلبي ..!!
ليتني أول ماشفته مقبل (ن) غيرت دربي .. !!
× نورة .. مسحت دموعها ومشت .. وبينها وبين نفسها .. ياااليت عندي أخت أشكي لها .. وتفهمني .. ياااليت عندي أحد أطلع شوي من شوقي وأطفي شوي من ناااااري .. والله لو تدري عن غلاك ماتركتني .. !!
عبدالله "قطعها " : نورة ..
نورة "بصوت هادي " : نعم ..
عبد الله "ابتسم " : أنا حاس إني ربي بيعوضك برجل أبرك منه وأطيب منه ألف مرة ..
نورة "ابتسمت تحت الغطاء ابتسامة فاقدة فيها الأمل .. !!
× دخل فيصل .. وسلم على خالته .. وباس رآس أمه .. الحمد لله على السلامة يالغالية ..
أم فيصل " طاحت دمعتها " : الله يسلمك ..
× جلس جنب خالته وقرب الكرسي عند أمه ..
أم عبد الله "وقفت " : يالله ياأخيتي ماتشوفين شر ..
فيصل "يطالعها " : تونا ياخاله ..
أم عبد الله : لالا بروح تطمنت على أختي أهم شي .. × طلعت جوالها من الشنطة .. × وراحت تودع أختها .. يالله ماتشوفين شر.. ولا تشيلين هم شي ترا ماأحد نافعك .. وصحتك أهم من كل شي ..
× فيصل نزل رآسه ..
أم فيصل " بتعب " : الله يعين على الدنيا .. ويفرج عن ولدي والله هذا اللي هااااد حيلي ×بكت ..
أم عبد الله : الله يفرج عنه وادعي له ..
× طلعت أم عبد الله ..
× فيصل مسك يد أمه وباسها .. سامحيني يمه ..
أم فيصل "مسحت بيدها على رآسه " : وأنا مالي إلا ثم أنتم .. الله يسامحك ..
فيصل "يطالعها ويبتسم " : طيبة والله مافيه في الدنيا مثلك ..
أم فيصل " بهدوء" : بس زوجتك لا أشوفها ..
فيصل " تنهد": يمه والله بتتعبين نفسك .. والبنت لو تعرفينها زين صدقيني راح تندمين على اللي سويتيه ..
أم فيصل "سكتت "....!!
فيصل " بصوت هادي " : يمه أنا مابي أتعبك وإذا تبين أسكت ..سكت ..
أم فيصل "بسرعة " : لا قل كل اللي بخاطر والله أخاف يصير فيني شي وأنا مضيقة صدرك ,,
فيصل "ابتسم " : أجيبها يمه ؟
أم فيصل " سرحت .. !!!
فيصل "يطالعها " : اللي يريحك وأنا أهم شي راحتك ورضاك ..
أم فيصل " هزت رآسها / يعني رآضية / ..
فيصل "قام وباس رآسها ويضحك من الفرحة .. هه هاللحين ارتحت ..
أم فيصل "بكت": خفت يافيصل توي أعرف انكم غالين ..
× في بيت أم دانة ..
× دانة بالصالة تكلم بالجوال .. ×تضحك .. جد ؟؟ والله مررررة انبسطت حبيبي أوكي .. الله يقومها بالسلامة .. طيب .... خلاص 10 دقايق وأصير جاهزة إيه صادق تأخرنا ..طيب.. باي عمري ..
× نورة بالغرفة وعلى السرير تستعد للنوم وجنبها ولدها .. × أمها تطق الباب ..
نورة : ادخلي يمه ..
× فتحت الباب أمها .. مانمتي ؟
نورة "ابتسمت " : لا والله هه توي أنوم عبودي أزعجني ..
أم عبد الله : طيب شوفي أنا تذكرت شي قبل أنام .. واليوم جيت بقول لفيصل وهونت ..
نورة "ارتبكت ومستغربه" : وش فيه ؟
أم عبد الله : يمه تأخر بمصروف الولد .. وتشوفين حالتنا على الله ثم على راتب أبوك الله يرحمه .. هو له أبو يصرف عليه ..
نورة "سكتت شوي .. صادقة يمه .. خلاص طيب كلميهم وإلا قولي دقي على علي يوصل له ..
أم عبد الله : لا أنا أقول لعبد الله .. بس قلت بشوف رآيك ..
نورة : لا أكيد أنا مع حق ولدي .. بكرا يتعود إني أنا اللي أصرف عليه ولا يعطيني ولا ريال لعبودي ..
أم عبد الله : صادقة يمه .. إلا إن الرجل يتعود ..
نورة : يالله الله يفرج كل ضيقة ..
أم عبد الله " قربت وتطل على عبود " : يابعد عمري نايم ..
نورة "تناظر عبود .. يدنن يابعد قلبي .. مع إنه تعب أمه اليوم ..
أم عبد الله : الله يخليه لك يارب .. يالله تصبحين على خير ..
نورة "ابتسمت ": تلقين خير ..
× طلعت أم عبد الله ..
× نورة سحبت اللحاف وانسدحت .. حطت رآسها على المخدة وتفكر .. !! الحمد لله اللي جبت منك هالولد .. عشان أقدر أشوفك .. ياااه اشتقت لك .. × تذكرت يوم تشوفه بالمستشفى .. ماتغيرت يافيصل على حلاك لا ويمكن صرت أحلى .. ×تتنهد .. يالله مكتوب .. × طاحت دمعة .. ياحظك فيه يادانة .. أكيد أسعد وحدة بالدنيا أنتِ .. !! يارب ترجعه لي .. يارب يارب يارب ..
---------------
× مرت الأيام .. وتغيرت أشياء بسيطة .. دانة تقربت لخالتها أم فيصل اللي رقدت بالمستشفى أربع أيام وبسبب ارتفاع الضغط !! .. وفيصل !! مايدري عن موضوع دانة .. !! وعبد الله وسارة على حالهم .. أما سحر مبسوطة مع سلمان اللي فعلاً كان يحتاج تغيير .. وخالد وليلى جايين زيارة للرياض ..
-------------------------
× في بيت أم عبد الله ..
نورة بغرفتها .. تكلم بالجوال ,, الحمد لله على سلامتك ياقلبي ,, عاااد لازم أشوفك ,,
ليلى : ياااقلبي والله إنك فبالي ,, ماتفارقينني ..
نورة : طيب ليش ماقلتي لي إنك جاية ,,
ليلى : ياعمري تعرفين على بال ماأستقر وأرتاح وزيك عارف ,,
نورة : أدري والله وعاذرتك .. والحمد لله على السلامة وسلمي على خالد ,,
ليلى : إن شاء الله ,,
نورة : طيب حاولي تجينني بكرا أو بعده ,,
ليلى : بحاول لأننا ماراح نطول تبدأ دراسة خالد ,,
نورة : والله مشتاقة لك ,,
ليلى : وأنا أكثر ياقلبي ,, أوكي ياعسل ,, أنا بروح تعرفين أصير مهمة توي راجعة ,,
نورة "تضحك ": مررررة ,, يالله فمان الله ..
ليلى : فمان الله ,,
× في شقة فيصل .. فيصل جالس على اللاب توب بالصالة .. ودانة تحط الغداء على الطاولة..
فيصل "يبتسم " : الحمد لله كلها شهر وحنا راجعين استراليا والله مبسوووط مرة ..
دانة "وقفت ": الحمد لله .. والله شوي وأموت من القهر ..
فيصل : ربي يفرجها .. أهم شي رضى ربي ونرضي الوالدين وربي معنا ..
دانة "ابتسمت ومشت " : صادق ياسبحان الله ..
فيصل "يطل على طاولة الطعام " : هه دانة مسويه كبسة ؟
دانة "وهي بالمطبخ " : وش أسوي حبيبي مايعجبك إلا الكبسة ؟
فيصل "وقف وراح لطاولة الطعام ": آآآآه يالكبسة .. × سحب الكرسي وجلس ..
× دانة جت ومعها الماء × تضحك .. سعووودي .. حطت الماء على الطاولة وسحبت الكرسي وجلست ..
فيصل : تسلم يديك حبيبي ..
دانة : ياحبي لك .. يالله بسم الله ..
فيصل : بسم الله ..
× في شقة عبد الله .. عبد الله ونورة وسارة يتغدون ..
عبد الله "يبتسم " : أجل اشتقتي له وأنت مالك ساعتين عنه ..
نورة "وهي تآكل " : ياااااحبي له بسم الله عليه صاير يتحرك كثير .. وياملحه إذا اممم
سارة "تقاطعها": أنا اللي أعرفه إنهم يقولون ابب بس ياعمري ماعنده أبو
عبد الله "ناظر سارة نظرة حادة ..
× نورة سكتت .. وحست إنها انقهرت منها ..
عبد الله "رحم نورة وعصب على سارة " : تراني متحملك لأن أصلي وبطبعي طيب وإلا نورة ع الأقل صار عندها ولد واللي تزوجها ماعرف قيمتها.. يعني بإختصار متحملك لأني تربيت على الطيب وإلا أقدر أخليك تندمين إنك فكرتي تزوجين ..
سارة "بخوف ": وش فيك ؟؟؟ أمزح معها وهي تعرف إني أمزح ..
نورة "تقاطعها": لا ماتمزحين ومو أول مرة تتكلمين وساكته ومتحمله .. تراني قليل أجي لبيت أخوي عشانك فيه
سارة "بتطنز": لااااا تكفين تعالي
عبدالله "يقاطعها " : خلااااص × وقف وترك الملعقة .. احترمي وجودي على الأقل .. واحترمي إني زوجك !!
سارة "بصوت عالي " : ياااسلام هي تتكلم عادي وأنا ياويلي..؟؟ لا ياعمري بتكلم
عبد الله " راح وخلاها وهي تتكلم ودخل الغرفة وصك الباب بقوووة.. × بصوت عالي .. بعمرها ماراح تتعدل ..
× سارة وهي جالسة تطالع نورة .. يااااسلام هذا اللي طلعتي فيه مشكلة .. انبسطي ! .. ياختي لا تجين إن كانك بتخلقين بيني وبين زوجي مشاكل ..
نورة "تطالعها وباستحقار " : والله ماجيت لبيتك .. جيت لبيت أخوي .. وأي وقت أبجي ولا عليك مني ..
سارة " انقهرت " : طيب طيب نشوف ..
نورة : بشوف وش بتورينني !!!
سارة " سكتت ,,, !!
× في بيت أبو فيصل ..
أبو فيصل وام فيصل وعلي ومنار يتغدون ..
أم فيصل : والله مادري ولدي يآكل وإلا ذابحه الجوع ..
أم فيصل "تنهد": الله يفرج عنه ..
أم فيصل "والدموع بعينها " : يوم يطلع وهو مليان جسمه .. وكنت أقول له انتبه لا يزيد وزنك .. × سكتت ..
× منار تطالع أمها ..
أبو فيصل : والله اشتقنا له .. واشتقت حتى لهواشه ..
أم فيصل : 5 شهور ماأدري عنه أكيد نحف وطلعت عظامه .. × بكت .. وتركت الملعقة ..
علي " يطالع أمه " : ادعي له ..
× في شقة فيصل .. طلع توه مغسل ..
× دانة وهي تشيل الصحون .. هاه أعجبك الأكل حبيبي ..
× فيصل يطالعها .. أكيد تسوين شي ومايعجبني ..
دانة : يااااحبي لك ..
فيصل " أخذ اللاب توب وجلس على الكنب بالصالة ..
دانة "بالمطبخ وبصوت عالي ": ترا اليوم بروح لأهلك ..
فيصل : طيب .. × فتح ايميله .. × يكلم نفسه .. يوووه أمس وأنا شايفه .. 16 ايميل اوووف والله يالناس فاضية..
× في شقة عبد الله .. عبد الله وسارة بالغرفة ..
سارة "جالسة على طرف السرير " : بعد أختك وقحة ولا سمعتها يوم رحت وش قالت ..؟؟
عبد الله "واقف " : وش قالت ؟
سارة "بكت تمثل " : تقول البيت مو بيتك ومتى مابي جيت ومن هالكلام اللي سم على قلبي وأنا ساكتة.. والله ماتدري عن اللي يصير بيننا بس قدامك تتمسكن وتمثل إني مسكينة وإلا هي حية من تحت تبن .. أختك سوسة تعرف وش معنى سوسة ,, معقووولة كل هالسنين ولا تدري عنها !!
عبد الله " انقهر من نورة ": طيب أنا أتفاهم معها × وقرب ومسح دموع سارة .. دموعك غالية علي × وقف شوي .. .. × وطلع .. راح للصالة ..
× سارة تبتسم ..
نورة "تكلم أمها بالجوال " : يابعد عمري ماأزعجك ؟
أم عبد الله : والله كأنه لك خمسين سنة عنه لا ماأزعجني بس أنت اللي أزعجتيني تبينه تعالي خوذيه × تضحك ..
نورة "تطالع عبد الله وهي تكلم " : طيب يمه مع السلامة أنا المغرب جاية ..
أم عبدالله : مع السلامة ..
× سكرت .. نورة تطالع عبد الله مستغربة .. !!
عبد الله " معصب " : لا مو المغرب بتروحين الحين قومي .. يالله .. أنا ماني ناقص مشاكل .. وحركات التمثيل هذي ماتعجبني يانورة وأنا أخوك وأنا أعرف إن حقك ماتخلينه ..
نورة "انصدمت " : وش تقول أنت ؟
عبد الله " بعصبية " : قوووومي يالله بلا تمسكن وتمثيل .. يالله روحي عند أمك الله يعينها عليك ..
نورة "وقفت " : أنا بطلع .. بس احترم نفسك شوي وأمي هي أمك .. ولا تأثر عليك وحده أنت عارفها من يوم تزوجتها ..
× سارة تسمع وتبتسم ..
عبد الله "بصوت عالي " : وأنا عارفك من زماااان قبل أتزوجها .. والله لو وحدة منكم قاصرة الشر ماصارت !! كل شوي مشكلة ., أشغلتوني بكلام فاضي ,, خلاص لا تجين البيت وهي ماراح تجي البيت وأقطعها من الحين ..
نورة " شافت باستحقار .. وراحت تآخذ عبايتها .. × وماسكة نفسها عن الدموع .. × وجواها قهر .,.
عبد الله " وهو طالع وبنفس شينه " : أنتظرك بالسيارة ..
× نورة بصوت عالي .. حسبي الله عليك ياسوير ..
سارة "طلعت ووقفت قدام باب الغرفة وحاطه يدها على خصرها .. × نورة تشوفها وهي تلبس عبايتها .. ياربي لك الحمد ولك الشكر .. نعمة العقل زينة ..
سارة "بتطنز": والله زينة !!.. أشوف فيك عقل ماشاء الله ..
نورة "مشت وخلتها .. وطلعت ..
× فيصل يقرا الايميلات .. وفتح ايميل عنوانه " الفقر بالسعودية ,, والإعلام كشف لنا أشياء نجهلها ..
((( (( عسى الله يفرج عنا كل ضيقة ))
(( هذا تقرير عرض في قناة لااااايفوتك التقرير ..
اييييه نسيت ترا اللي تقدم التقرير مااااتدوخ أبد وين السعوديات ذولي مانشوفهم إلا مرة وحدة بالعمر
)) ))
× فيصل بدا يحمل التقرير .. × جت دانة .. تبتسم وجلست جنبه .. شو عم تعمل ..؟
فيصل " يطالعها ويبتسم " : أتصفح ايميلي .. أدوختني هالايميلات مايخلصون الناس ..
دانة "ابتسمت ": لا وشلون عاد إذا صار الشخص محبوب مثلك .. × حطت رآسها على كتفه .. × وحط يده من ورا ظهرها .. ياحبي لك يادندون .. × سكر شاشة الكمبيوتر ,, وضمها .. هاه خلصتي مغسلة ؟
دانة " بدلع " : إيه بس يتعب المطبخ ..
فيصل : إذا رحنا استراليا إن شاء الله أجيب لك غسالة صحون × مسك يدها .. عشان اليد الحلوة ماتتعب ,,
دانة "ابتسمت " : عسى ربي يخليك لك وربي مبسوطة معك فصولي ,,
فيصل " بصوت هادي " : أنا مبسوط أكثر لأني أحبك أكثر ,,
دانة "تبتسم " : لا أنا .. والدليل تعبت عشان أتزوجك .. لااا وحبيتك من أول نظرة ..
فيصل "بعناد وبهدوء" : أنا تعبت أكثر ..وأنا ضحيت بأشياء كثيرة ..
دانة " تضحك .. يااااااحبي لك ..
× نورة تبكي بالصالة وأمها عندها ,,
نورة "تبكي " : يمه من راح يبقى لي في هالدنيا لو تركني عبدالله..؟؟
أم عبد الله "تتنهد": لا حول ولا قوة إلا بالله العلي العظيم .. حسبي الله على سوير هذي !!
نورة : أنت لو شايفتها وشلون ترد .. أنواع الخبث .. والله العظيم ماكنت أصدق المسلسلات أقول خرابيط مافيه أحد بيننا كذا ..
أم عبد الله : الشر بكل مكان يايمه .. بس أنا أكلم عبد الله ..
نورة "تمسح دموعها": طيب وين ولدي ؟
أم عبد الله : نايم بغرفتي وقلت للشغالة كل شوي تشوفه ..
نورة "وقفت " : بروح له مانافعني بهالدنيا إلا الله ثم أنت وولدي .. الله يخليكم لي ..
× راحت نورة ..
× دق التيلفون ,, × ردت أم عبد الله .. هلا فيصل .. الحمد لله بخير .. والله كلنا بخير أنت كيفك ؟ ايه زين .. خلاص أقول لها ,, طيب مع السلامة حياك ..
× أم عبد الله ×تصوت .. نورة ..نورة .. ×نورة ترد بصوت عالي ,, جيت يمه جيت .. ×جت نورة ومعها عبودي ,, سمي يمه ..
أم عبد الله : دق فيصل ..
× نورة ارتبكت .. وش عنده ؟
أم عبد الله : يبي يشوف عبودي وأكيد بيجيب له مصروفه ..
× نورة بهدوء .. طيب بروح ألبسه ..
× راحت نورة .. وهي أبد مو على بعضها .. × وبينها وبين نفسها .. يااااارب أشوفه لو لمحه تنسيني كل اللي صار لي اليوم وربي شوفة تنسيني .. ياااااارب ..
× في بيت أبو فيصل .. !!
× أم فيصل وعلي بغرفة علي ..
أم فيصل "منزلة رآسها على الأرض وهي جالسة على طرف سرير فيصل ...
علي "بهدوء جالس قدامها على طرف سريره " : لااا يمه لا تقولين كذا ,, إن شاء الله بتفرحين فيني .. وبعدين ولدك شقردي وأول ماأتوظف بتزوج وبتشوفين عيال عيالي ..
أم فيصل " تطالعه " : أنت الوحيد اللي ماقد أغضبتني .. ولا قد سمعت صوتك مرفوع علي ..
علي "قام وباس رآسها " : وأنا أقدر أرفع صوتي على الغالية ..
× دخل أبو فيصل .. هاه وش عندكم ؟
أم فيصل : أسولف مع ولدي يابعد عمري ..
أبو فيصل " مشى وجلس جنب أم فيصل " : وش تسولفون عنه ؟
علي : تبيني أتزوج ..
أبو فيصل : هههههه لالا بدري ..
علي " بمزح " : ايه مو الحين بدري ,,
أم فيصل : خلاص سنة وشوي ويتخرج .. وأزوجه وأفرح فيه ..
أبو فيصل : الله يوفقهم .. وعقبال مانفرح بمنور ..
أم فيصل "تضحك " : ووووه بس يامنور يابعد قلبي هي الله من الهداوة ..
علي : منار مافيه مافيه مثلها ..
أم فيصل "وقفت": يالله بروح أطلع الحلى وأجهزه .. بيجي فيصل وزوجته ..
× في بيت أم عبد الله .. × رن الجرس ومافيه أحد بالصالة .. نورة تلبس ولدها بالغرفة ,, والأم تصلي .. والشغالة ماتسمع تغسل ..
نورة "تصوت" : افتحوا الباب .. ايرا افتحي الباب ..
× مافيه أحد يسمع ..
نورة " أخذت ولدها .. وبينها وبين نفسها ,, والله اشتقت أسمع صوته ,, وأكيد هذا فيصل .. طلعت نورة من الغرفة .. وهي تمشي ,, يرن الجرس ,, ×نزلت .. !! × طلعت أم عبد الله من المجلس "مستغربة " : نورة وين ؟
نورة "مرتبكة " : مادري من عند الباب ومافيه أحد يفتح أصوت من اليوم
أم عبد الله "تقاطعها": إيه أكيد فيصل وأنا قلت لك .. ×تتنهد .. الله يهديك بس ..
نورة "انقهرت " : يمه روحي افتحي وإذا رجعنا قلت لك ..
× راحت أم عبد الله ..
× نورة "حطت ولدها على الكنب .. ×تذكرت صح .. وراحت بسرعة قبل تجي أمها .. ×تركض للغرفة .. وتكلم نفسها .. خلاص باقي شهر وأطلع من العدة ولا فكر يرجع أنا أرجعك يافيصل .. × دخلت الغرفة .. وفتحت الدرج وطلعت العطر .. (عطر أول زواجها ) .. × ونزلت بسرعة وعطرت عبود فيه .. ×ورفعت عبود وضمته ياااااابعد قلبي أنت والله إنك غالي يكفي إن فيصل أبوك .. × دخلت أم عبد الله .. عطيني الولد ..
×نورة عطتها الولد .. قولي له ينتبه له ..
أم عبد الله "تبتسم " : إن شاء الله ..
× راحت ..
× نورة طاحت على الكنب .. يااااااربي والله نفسي أشوفه .. قههههر ..
× دخلت أم عبد الله على فيصل ..
أم عبدالله "بنفس شينة " : هذا عبودي وأنا بروح أجيب القهوة ..
فيصل "ضحك يوم شاف ولده .. وقام أخذه .. هلا هلا يابعد عين أبوك ..
× طلعت أم عبدالله ..
فيصل "ضمه ووقفته الريحة ,, ورجع يشمه مرة ثانية .. وشمه مرة ثالثة بقوووة .. × تذكر العطر .. ×جلس ,, ياااااالله ,, وش الفايدة يانورة .. ×فيصل تذكر سالفة العطر .. يااااااالله ,, ×رجع شريط الذكريات
(((( في شقة فيصل اللي قبل يروح استراليا أول زواجه ,, × دخل على نورة وهي بالغرفة ,, ومعه كيس حلوة ,,
نورة "تطالعه وهي جالسة على كرسي التسريحة وتحط مكياج" : وش فيها الكيس الحلوة ياحركااات ,, !!؟
فيصل "يبتسم وقرب وعطاها بوسة على رآسها ..
نورة "ابتسمت ": وش عندك فيصل ؟
فيصل : رحت لباريس غاليري بشتري لي عطر قبل أروح استراليا وأعجبني عطر نسائي وقلت نورة أهم
نورة "سحبت الكيس من يده " : يااااحبي لزوجي بس ,,
فيصل "استغرب حركتها " : خليني أنا أوريك ..
نورة "تضحك " : أقوووول بلا حركات خلاص أنا أفتحه .. وش الفرق يعني !!
فيصل "راح وجلس على طرف السرير وهو منقهر .,, لأنه كان بيعطيها الهدية بحركة رومانسية .. وبهدوء .. قولي لي رآيك ,,
× نورة تفتح العطر ,, وبخت منه وشمته ..
فيصل "يطالعها ينتظر رآيها " .. هاه وش رآيك ؟
نورة "عابسة " : أحسها مررررررة قديمة ريحته ,, صراحة مو ذاك الزود ..
فيصل "نزل رآسه " : جاملي ع الأقل ..
نورة "تضحك " : ماأعرف ,,
فيصل "سكت ..
نورة "طالعته " : خلاص مع إنه قديم بحط منه بالأسبوع مرة عشانك ,,
فيصل "بهدوء" : طيب ,, !!!! )))))
× فيصل × يتنهد .. ايييييه دنيا ... !!!! عبود يضحك بحضنه .. × يلعبه .. ياحبي لك .. والله ريحة العطر روووعه بس أمك الله يهديها .. ×بينه وبين نفسه .. كيفها أمك ياعبود؟؟؟ مبسوطة وإلا متضايقة .. عاد أمك حساسة بزيادة .. والله نفسي أدري عن أخبارها .. !!
× نورة بالمطبخ .. تكلم أمها وفيه الشغالة معهم ,, لالالا يمه لاتفهميني غلط إلا الشك !!
أم عبد الله "تمشي ومعها القهوة " : وأنا شكيت !! ليش أشغلتيني ,, خلاص اسكتي ..
نورة "بسرعة " : وتوي ممكن أرجع له ..
أم عبد الله "وقفت ومستغربة " : نسيتي وش سوا فيك ؟؟
نورة "بسرعة " : إيه بعد أنا أخطيت يوم مديت يدي على دانة ..
أم عبد الله " مشت " : ياسبحان الله ..
× نورة تكلم نفسها ,, يااااربي أبي أحد يفهمني ,, !!
× في شقة فيصل ,, دانة جالسة بالصالة .. ومعها لاب توب فيصل ,, تتصفح .. × دق جوالها ,, هلا حبيبي ,, طيب بالطريق ,,؟؟ اوكي.. أسكر اللاب توب وإلا أخليه ؟,, أوكي حبيبي باي ,, دانة أغلقت كل شي ,, وشافت المقطع اللي محمل بس ماشُغل ,, وبسرعة فتحته ×فضول ,, (((( عائلة سعودية فقيرة تعيش في صحاري الرياض ))) ×بسرعة سكرت المقطع ,, × بخوف ,, معقولة شافه وسكت ماقال شي !!! ياااااااربي والله رحت فيها .. بس ليش ماقال لي شي !! يااااااربي ,, ×بسرعة تذكرت ,, توه محمله أكيييد ماشافه ,, ياااربي والله رحت فيها .. وانتشرتي بالنت يادانة ., × سرحت ,,, أأأأخ بس لو أعرف الرقم السري حق ايميلك .. × تتنهد ياااالله ,, أستاهل ,, والله أستاهل ,, ×دق جوالها .. اوووف ,, ×وقفت بسرعة ,, ومع الارتباك ماحذفت المقطع !! قفلت اللاب توب بالزر ضغطته بقوة من الخوف !! ×ردت ,, يالله يالله جيت .. لا جااهزة ..
× فيصل ينتظر بالسيارة .. ومشغل نوال .. ويدخن وسرحان .. والله تغير كل شي .. !! طيب ليش ماأرسلها مسج أشوف ناقصها شي !! للحين على ذمتي !!ومنها أشوف أخبارها ,, ×فتحت الباب دانة ×وقطعت تفكيرة .. يوووه ياريحة الدخان عمري ,,
فيصل "بنفس شينة": صكي الباب بس بسرعة تأخرنا أمي تقول مجهزة القهوة لها ساعة ,,
دانة "استغربت": وش فيك طيب تتكلم كذا ؟
فيصل : مافيني شي لا تعكرين مزاجي بكثر الأسئلة على غير سنع ,,
دانة "سكتت شوي ,, طيب أخبار عبود ؟
فيصل "مشى بالسيارة " : تمام الحمدلله ,,
دانة "تبتسم " : الحمد لله ,, أخباره تغير ؟
فيصل "ابتسم " : ياحبي له ,,
×دانة ابتسمت ,, الله يخليه يارب ,,
× في شقة عبد الله ..
سارة وعبد الله بالصالة يتقهوون ,,
عبدالله : لاااا نورة تتأدب أنا أعرفها ..
سارة "بخبث": ياااليت .. الله يصلحها ..
عبد الله "يشرب شاهي " : عاد أنت خففي شوي وبلا حركات مالها داعي ,,
سارة "تمثل " : ياااعمري والله تغيرت معها وترا مزحي ثقيل ,, عبووود للحين مافهمتني ,, قبل مايسمونني إلا خفيفة دم ,,
×عبد الله بينه وبين نفسه ,, امحق خفة دم ,,
سارة : المهم أنا بروح بكرا أو بعده لبيت أخوي عبدالعزيز ,,
عبد الله "استغرب" : مو تقولين ماأطيق مرته ؟؟
سارة "بصوت حاد" : قلتها زوجته ,, أنا بروح لبيت أخوي ,, مو بيتها ,,
عبد الله "بتطنز": هي وزوجها واحد ,, شوفي إذا بتروحين حب في الكلام أقول لك من الحين لا ..
سارة "تضحك باستهزاء": أصلاً سحر بتروح معي ومتفقة معها من أسبوع ,, وعبدالعزيز انبسط ,,
عبد الله : طيب ,, بس مثل ماقلت لك مشاكل مابي ياسوير ,,
× في بيت أبو فيصل ,,
×أبو فيصل وأم فيصل وفيصل وعلي ودانة ومنار ,, بالصالة يتقهوون ,,
أم فيصل "تطالع دانة ومنقهرة إنها تكشف عن علي ,, بس ماتقدر تقول شي !!
أبو فيصل : لاااا إن شاء الله تروحون وترجعون رافعين روسنا ,,
أم فيصل "تطالع دانة " : أخبار أمك يادانة ؟
دانة "تبتسم " : والله تمام الحمد لله ..
أم فيصل : كم باقي لها وتطلع من الحداد ,, ؟
دانة : ماباقي عليها كثير أظن وأنا ماني متأكدة أٌقل من شهر أوأقل والله أنسى ,,
أم فيصل : الله يرحمه ويغفر له ,,
× علي يهمس لفيصل ,, أنا بطلع للإستراحة ,, تجي معي .؟
فيصل : والله إنه ودي أغير جو ,,
علي "بهمس " : قم أجل .؟
فيصل : يالله شوي بس أشرب فنجالي وآخذ علوم أمي وأقوم ,,
علي : طيب ,,
× دانة تسولف مع منار ,, ليش هو حبوب ؟
منار "بصوت واطي " : إلا مرة حبوب وطيب ,, بس يقهرني بعض الأحيان ,,
دانة "تطالع فيصل " : وشلون يقهرك وش كان يسوي ؟
منار : قبل يتزوج أحسن ,, كان يآخذني للبقالة أشتري اللي أبيه ,, الحين لا
دانة : إيه الحين كبرتي أنت مو صغيرة ,,
منار "بدلع " : يآخذني للمولات بدال البقالات ,,
فيصل "يطالعها ويضحك " : منوووور وش تقولين ؟
دانة "تضحك " : لاااازم نآخذها لمول ,, أكيد ناقصها أغراض ..
فيصل "يأشر على عيونه " من عيوني ,, وأنا كم منور عندي ,,
× راحت الليلة سواليف ومبسوطين ودانة منشغل بالها ماتدري هي حذفت المقطع أو لا !!,,, !!
× فيصل ودانة ,, توهم داخلين الشقة ,,
دانة "فيها نوم " : داااايخة أنا بدخل أنام ,,
فيصل : أوكي بس سوي لي شاهي بسرعة بقعد على اللاب توب ,,
دانة "مسكت يده " : ياحبي لك نم ,,
فيصل " يطالعها": والله عندي شغل شوي ,, يالله سوي لي شاهي حبيبي وروحي نامي ,,
دانة : طيب ,,
× راح فيصل وجلس على الكنب ,, وشغل اللاب توب ’’ × حط رآسه على الكنب ينتظره يشتغل ,, × بينه وبين نفسه ,, وش فيني أنا اليوم !! معقولة اشتقت لها ,,!!! لالالا بس أنا أحب دانة ,, ياااالله ,, وش هالشعور الغريب ,,
× نورة ,, جالسة في غرفتها ومافيها نوم ,, وعبودي نايم ,, ×شافت شنطة اللاب توب ’’ ياااي من زمان عنه ,, ×قامت وأخذته ,, طلعته وفتحته ,, تتنظر ,, ×سرحت ,, وش أسوي لعبد الله ,, أعتذر منه بكرا ؟؟ والله ماأستغني عنه ,, ياااربي الله يآخذ روحك ياسارة الزفت ,, × اشتغل اللاب توب ’’ × انقهرت يوووه النت مايشتغل ,, ×تكلم نفسها ’’ إيه المودم بغرفة عبد الله ,, قامت بسرعة ,,
× في شقة فيصل ,, دانة حطت الشاهي ,, يالله حبيبي تصبح على خير ,,
فيصل : بدري ؟
دانة : والله فيني نوم أحس اليوم طويل ,,
فيصل : تصبحين على خير ,,
× رجعت نورة للغرفة ,, فتحت الماسنجر ,,, ×حاطه الظهور دون اتصال ,, × انصدمت لما شافت فيصل متصل ,, ياااااربي وش أسوي !!! أحط الحاله متصل !!! وإلا أحذفه بس وأرتاح منه ,, والله لازم أبعد عنه ,, ×سكتت شوي ,, طيب أسأله عن أخباره ,, ×جت فبالها فكرة ,, بغير التوبيك وبدخل ,, والله خطيرة ,, إيه هو تعجبه نوال ,, أكيد سمعها ,, تكتب بسرعة
" نامت عيون الناس إلا عيوني ,,الناس حبوا وإلا أنا بس حبيت ,,
مرات أقول شلون عايش بدوني ,, ومرات أقول إني بشوقي تماديت ,,
× نورة ترددت تدخل ,, ×مرتبكة ,, وخايفة ,, ×ونبضات قلبها تدق بسرعة ,,, × وتجرأت ودخلت ,, !! × قلبها ينبض بقوة من الخوف ,,
× فيصل شاف اللي دخل وفتح الماسنجر ,, ×مستغرب ..نورة !!!! ,, عدل جلسته ,, ياااالله نورة عندي بالماسنجر والله ناسيها !!! يوووه وش هالصدفة ,, !! × يتنهد ,, انتبه لكلمات التوبيك ,, !! .. يقرااااااه .. ياااالله توك تحسين !! يوم فات الفوت ,, ×ضاق صدره ,, وش تبي عكرت مزاجي,,!!
× نورة فاتحة المحادثة ,, أكلمه وإلا لا ,, !! نفسي أسأله عن أخباره ,, بس والله قلة أدب ,,
× دانة .. فاتحة الأباجورة .. ومرة خايفة .. !! يارب ماأنكشف .. !! يارب .. والله برروح فيها .. دانة تقلب يمين ويسار وماقدرت ترتاح !!!!!
× فيصل ,, سرحان ,, ×بسرعة ,, آآآآسف يانورة ,, أنا مرتاح وماصدقت أستقر ,, ×حذفها بسرعة ,,
× نورة استغربت ,, يوووه طلع ,, !!! ليييييش يافيصل !!! ×دمعت عيونها ,, كارهني بقوووة ,, × بكت ,, ليش كلهم ضدي ,, معقولة أن كريهة لهالدرجة ,, ×سجلت الخروج ,, وهي تبكي ,, كلهم مايبونني ,, حتى أخوي اللي ماعندي غيره أخو ,, !! قفلت اللاب توب وحطته على الكرسي ,, وراحت تطل على عبود وهو نايم بسريرة ,, ياااااالله ياعبود بسرعة اكبر ,, والله أحتااااجك يبه ,, أمك تعبت ,, ×رمت نفسها على السرير ,, والله محتاجتك يبه ,, ×شهقت شهقة قوية ,, وبكت ..
× فيصل يتصفح ,, ×تذكر ,, إيه أذكر إني حملت مقطع ,, راح لسطح المكتب ,, وفتحه ,, (( عائلة سعودية فقيرة تعيش في صحاري الرياض .. نترككم مع التقرير الذي أعدته لنا دانة فهد ...... !!!
نعم في صحاري الرياض ,,
عائلة لا صديق لها ولا قريب ,,
عائلة تتوسد الهموم ,,
وتصبح على الدموع ,,
× فيصل انصدم عشان الاسم الصوت صوت دانة ,, مصدووووم ,, كمل ,, سحب المقطع اللي مدته 7 دقايق إلى الدقيقة السادسة ,,
((× دانة تتكلم ,, هذا هو حال تلك العائلة, فمن المسؤول ,, !!
وهذه حالة من آلاف الحالات ,,!!
دانة فهد .....
× فيصل مو مصدق ,, !!! ويحس بدوخه من قوي الصدمة !! ترك اللاب توب ,, وحط يديه على رآآسه ,, ليش !! ليش يادانة ضحكتي علي !!! × منصدم ,, مايدري وش يسوي !!! آآآآآآآآآآآآآآه والله قلبي ناغزني من اليوم ماني طبيعي !! ×عصب ,, ورمى اللاب توب برجله على الأرض ,, !!!!!!!!!
قهر ماكنت أنا أدري تعيش بقلبي كذابة ..!!
قهر ماكنت أنا أدري على الحبلين لعابة ,,!!
كذب كانت سواليفك ,,
وكل كلمة على كيفك !!
وفيت لقلبك بعمري َََ
ولك ضحيت بأيامي ,,
نعم صدقت كلماتك ..
ولا أدري بنياتك .. !!
وهذا أنا اليوم ندم من رآسي لأقدامي .. !!