على قد الغدر اعذريني

المشاركة الأصلية كتبت بواسطة دجى الليل

البارت الرابع
:
-
ليت عيني له مسكن ورمشي عليه ظلال…
:
-
عند الحريم سوالفهم وضحكهم واصل لين برى وشغلوا الدي جي ورقصن سلامه وسلمى واليازيه وبنتها عليا وولدها محمد يضحك عليهم وراح عند غلا بنت منصور وهو يقول لها روحي رقصي نفس امج.
مريوم كانت تضحك وتصفق لهن لكن انتابها تانيب ضمير بأنه مياري مب بينهم قامت واقفه وهي تبعد عنهم اتصلت بها وشوي ردت عليها: حي الله بنت العم .
مياري ابتسمت بضيق ونطقت: الله يحيج ياروحي شحالج!
مريم بصدق: والله اني زعلانه لانج مب عندنا تضايقت الكل فرحان وموجود الا انتي.
تنهدت بضيق وهي في خاطرها تقول هو سبب في ضياعي وتبيني افرح بوصوله تحنحنت وهي تقول: لا والله مريوم مالي خاطر اطلع حتى من الغرفه.
مريوم بضيق: ليش عشان ماتشوفين عمر!
تضايقت من طاريه هو الثاني وقالت:الموضوع مايخص عمر والله بس مزاجي هاليومين متعبني كثير والله يا مريوم احس كل شي صار بسرعه وانا مب مستعده لأي شيء .
تنهدت مريوم بضيق ونطقت بعبره مكتومه: يعني هنَّا عليج يا مياري ماتين تشاركينا فرحتنا بعبدالله.
بكت مياري من حست بضيقتها وهي روحها متخبطه في حياتها ماتريد تشوفه ولا تشوف عمر مسحت دمعتها وهي تشهق: مريوم يا كلبه صيّحتيني ترا الفرحه بالقلب مب بالعلن لازم اعلن فرحتيه يعني بوجودي بينكم حمدلله على سلامته .
مريوم بقهر: والله مياري والله ما اكلمج اذا ما ييتي!!
مياري بقهر: لاااااا لااا ياحيوانه لاااا ورب الكعبه يا مريومه انج تضغطيني فوق الضغط اللي انا احسه مريوم تراني تعبانه والله تعبانه محد حاس فيني اوووف مريوم.
مريم من سمعت شهقاتها المتتاليه حست بانها فعلاً انها منضغطه وهي قاعده تضغطها اكثر ونطقت بضيق : خلاص ميور اسفه حبي والله اسفه انا بييج اليوم الفليل.
ابتسمت بين دموعها ونطقت: يا مرحبا بج.
مريوم تنهدت بضيق: وبج زود يا عيوني شيء في خاطرج.
هزت راسها بلا وهي تسكر عنها وتنهدت وهي تبكي قهرها وآلامها يعني الحين كيف يحطونها بـ هالموقف الخايس كيف تفهم عمر انها ماتنفع له ابداً لكن تعبت من التفكير وهي بس تفكر بردة فعلها لو بتشوف عبدالله بتطيح من طولها ماتقدر ترفع عينها له ..
:
-
مر الوقت سريعاً وتم تجهيز العشا في بيت بو حامد على سلامة عبدالله ودخنوا الميلس ورتبوا كل شيءومن بعد صلاة العشا وصلوا الجميع الا عبدالله اللي كان واقف برى وضايق صدره يكلم راشد اللي قال: عبدالله تعوذ من ابليس لاتخلي حد يشك فيك واذا مره ضاقت عليك الدنيا وتحس قلبك متلوم فيها تقدم لها وانتهى الامر.
عبدالله بضيق يدق طبلون السياره بقهر وعصبيه: المصيبه في عمر اللي يباها واقف عرضه في ويهي ولا انا بخطبها بس وقتها انا وعمر اللي بنتضارب.
تنهد راشد بضيق: سمعني خل هالموضوع على طرف الحين وسير عندهم وان الله كتب وشفتها بتعرف كيف تتصرف.
انهى مكالمته عبدالله ودخل داخل الميلس وحس بخنقه كانه الهوى انعدم من الوجود وحس اصواتهم بعدت عنه تعوذ من بليس وهو يحاول يسترخي ضببت الرؤيه عنده وحس بتشويش صداع راسه زاد تحامل على نفسه وشرب ماي شوي لعل يرجع لوعيّه شوي وقف وتوجه بخطواته للحمام غسل ويهه عدت مرات اعتدل من حس بوجود حد وراه ومن اللتفت شاف حامد وراه اللي قال بخوف: ما من شر يا ولد العم !
طالعه عبدالله بضيق ونفور وهو يمسح ويهه بالمنشفه ولكن حامد سحبه بيده برى الميالس وراح به لين ميالس الحريم فتح الباب وقفله وأتصل بمها مرته تطرش جهاز الضغط مال امه عند حد من خواته لـميلس الحريم مسك عبدالله بيده لكنه نفض يده منه وقال لحامد: لا تمثل دور اللي خايف على ولد عمه.
حامد مارد عليه من سمع دق الباب الداخلي مال الميلس فتح الباب وشل الجهاز من يد سلمى وسكره من دون ما يعطيها مجال تسال لمنوه.
قرب من عبدالله وهو يقول: انته ظن اللي بظنه ان كان لك الظاهر فالله له الخافي ان كنت امثل عليك ولا من صدقي خايف عليك هذاك الوقت ( بهاللحظه بدا يحط اللفه على يده وتحتها سماعة الضغط وبدا يضغط) كنا يهال وفي مرحلة مراهقه يوم اختارونا لسباق الرالي ما قالوا عيال عم ضد بعض لعبنا كفريقين فريق تراسته انا وفريق تراسته انته ولا اهانه لقدرك ولا بقصورٍ فيك اللعب والتحدي كان واضح ومعروف نهاية المسابقه واحد خسران وثاني فايز دخلنا بروح رياضيه اللي فاز وفوّز معاه فريقه واللي خسر وخسّر معاه فريقه يعني التحدي كانت نتيجته واضحه من البدايه اذا كنا بنشخصنها وبنقلبها عداوه ليش من قبل ماندخل السباق مانفكر في هالنقطه بس عشان انته كنت متهور اكثر مني وكنت دايماً تسمع لشلتك اللي حرّضوك عليّه وهم اللي تسببوا في زعلنا ( شل الجهاز عنه من شاف انه ضغطه مرتفع ) ونطق بقهر: ليش مرتفع ضغطك شو فيك منو مزعلنك!
طالعه عبدالله بصدمه من بداية كلامه لين وصل لمنو مزعلنك سحب يده بضيق وهو يقول بهدوء: تعب السفر بس يبالي ارقد وارتاح وبيخف.
هز راسه حامد بضيق وقوّمه وياه وهو ينطق: شي في خاطرك!
طالعه عبدالله وتنهد بضيق: حامد خلني في حالي الله يخليك والله تعبان.
اثنينهم اللتفتوا على فتحت الباب ودخول سلامه وهي تسحب مياري وياها وقالت بغضب وهي تسكر الباب بقو وتقفله عشان محد يدخل: انتي شفيج منخشه في حجرتج ما طلعتي اقلّها وجبي عمتي وتحمدي لها بوصول عبدالله من السفر اشوفج بس قاعده وماتظهرين منها مريضه نفسيّاً انتي ولاشو موضوعج مياري.
مياري بضيق: يا بنت الحلال قلت لكم راسي يعورني هو رد من السفر يا مرحبا به قرت عين عمي وعمتيه بشوفته انا شو يخصني فيه يا سلامه عورتوا راسي تراكم فيه.
سلامه ضربتها على كتفها: يا الله انتي متى بتفهمين عمتيه متضايقة من اسلوبج دومج منخشه ولا وجبّتي منها وطلعتي تسلمين عليها وتتحمدين لها بسلامة ولدها ووصوله
قاطعتها بضيق مياري : ياربي يعني شو المطلوب مني الله المستعان.
سلامه بعصبيه: تطلعين وتسلمين عليهم وتقعدين عند عمتيه بس من حضن هالغرفه اللي ماشبعتي منه.
غمضت عيوونها بصبر وهزت راسها بالايجاب وتقدمت للباب وفتحته وطلعت تنهدت سلامه بغضب ووسعت عيونها بصدمه من شافت حامد وعبدالله واقفين شهقت بصدمه وطلعت برى هي الثانيه.
:
-
اما حامد تنهد بضيق وهو يقول: العذر والسموحه منك يا ولد العم على اللي سمعته.
زادت ضيقته ضيق من سمع كلام سلامه وانها ماتتعدى باب غرفتها ومن صوتها اللي واضح فيه الانهزام والاستسلام نطق لاشعوري: دوم هي وحيده وماتروح لحد.
حامد بضيق تنهد: لا بس ماتحب تثقل على حد تلقاها ملازمه كتبها وبس.
هز راسه بصمت والضيق احتواه هو متاكد انها تتهرب من اهله عشانه هو وصلوا الميلس وتعشوا ومن بعدها كلٍ راح لبيته ومابقى حد الا عبدالله وابوه وعمه اللي نطق: يا مرحبا في ذمتي بوحميد الغالي نورت دارك وبيتك.
أبتسم لعمه ورد: المرحب لا هان الغالي وبك زود فديت خشمك والدار منوره بكم .
وقعدوا يسولفون وهو راح لبعيد كان منى عينه يشوف وييها مب ظهرها تنهد بسرحان..
:
-
:
حَبيبٍ خَاين العِشْرة جَمّع حُزن البَشَر فينِي
كَذَب قَلْبي إذَا بلَحْظَه نسَاه أو تنَاسيتَه
نَسى حُبّي بَعِد عُمرِي
وخَلّى الهَم يطْويني
وخَلّى الدنْيا فِي عِيني كَئيبَة
ليت مَا جيتَه
يجِي مِنّه أكْثَر طَعن قَلْبي
مَعنينِي ينَادِيني عَلى الفُرقَى
وأقُول أبْشِر ولَبّيته
:
-
عند الحريم قعدن البنات سوالف وضحك ومريوم اللي طلعت مياري من جوها وقعدن يضحكن ويسولفن وهمست سلمى لسلامه: يارب عمتيه تخطبني لعبدالله.
ضحكت سلامه وهي تقول: ليش لم شمل العايله وانا مادري.
سلمى تضايقت من سلامه وسكتت بعدها نطقت: اقلها سلفاتج خواتج ما بيعّعادنج اما الغريبات بيّعادنج.
سكتت سلامه بقهر لانها استهلكت طاقتها في عناد مياري اليوم انتبهت على ابوها اللي دخل يضحك وهو يقول: قربوا قربوا محد غريب..
فزن البنات بسرعه يعدلن شيّلهن ولفت مريوم على مياري وهي تقول: من يدخلون اخوانج قلبي يدق!
ضحكت مياري وتلاشت ضحكتها من سمعت صوته يكلم عمته من عند الباب: كثر الله خيرج يا عمتيه واغناكم الله وبيّض الله ويوهكم على العشاء الفنان.
سحبه حارب لين داخل وهو يقول: ترمس من عند الباب ليش راعي الدكان انته.
ضحك عبدالله بتوتر مايبا يشوفها خايف لسانه يخونه في التعبير وويهه يفضحه من ملامحه ودخل داخل ووراه ابوه .
كان يمشي باتجاه عمته بثقل ورزانه وحضنها وباس راسها وهو يشكرها على العشا.
ضحكت سلامه وهي تقول: مب من قدرك يا ولد العم تستاهل زود صد صوبها وابتسم وهو يقول: ماعليج زود ام غلاوي الله يطول بعمرج .
رفع نظره على ابوه اللي قال: يوم انتي بينهن وتسوينهن كلهن منخشه ورى مريوم ليششش!؟
ضحكت مريوم وهي تلاحظ توترها الزايد ورجفة جسمها وقالت بدعابه: تراه مب عمر مستحيّه هالكثر.
غمضت عيونها بضيق من طاريه ماهي قادره تخطي لعمها خطوه وحده لكن تحاملت على عمرها لانه محد يعرف بوضعها بينهم وظهرت من بينهن وهي ترجف بالقو وصلت لعمها وهي تسلم عليه وتبوس راسه ودقات قلبها تسمعهن في اذنها وصدرها يهبط وينزل من الرعب اللي تعيشه بينهم في هاللحظه حضنها لصدره بحنيّه وهو وده يعرف هالبنت شفيها ليه خوفها غريب منهم من لاحظ تصاعد صدرها وهبوطها وهي تأخذ النفس شد على حضنها وهو يقول: بسم الله عليج يا غنــاتـــي محد غريب كلهم هلج هنيه.
هزت راسها بالايجاب وويها حمر من صداع راسها والحر اللي تحسه رغم برودة الجو ونضح المكيّفات فيه ابتسمت مجامله وهي بتطيح من كثر خوفها منه هو بالذات ماتبا تشوفه بينهم .
اما هو رفع عينه عليها من اول ماظهرت من بين اختها سلمى واخته مريم ووسع عيونه بصدمه ولا ارادي شد على يد عمته اللي كان ماسكنها بكل قوته ومانزلت عينه منها لين شافها توسدت حضن ابوه عمته انتبهت له ولعيونه اللي مارمشت من شافها طالعت ام عبدالله بنظراتها اللي لاحظت نفس النظرات واكتفت بتنهيدة صمت وعيونهن حايره باللي يشوفنه خبصت البنت من صوب وخبصته هو من صوب ثاني التوتر الواضح عليهم ضياع مياري بكلام عمها اللي قال: تنفسي ليش كاتمه نفسج يا امايه بتموتين.
رفعت نظرها تدوره بينهم ايي ياخذها من عمها ولكن انتفضت من قال لها ابوها: مياري سلمي على عبدالله وتحمدي له بسلامة الوصول.
رفعت انظارها لبوها بصدمه وخوف ومن شافته يأشر عليه والانظار عليهم لفت باتجاهه ونزلت نظرها وهي تنطقها غصب: حمدلله على السلامه.
رد هو الثاني وعيونه ما انزاحت عنها من شاف ضيقتها وخوفها وتوترها: الله يسلمج يا بنت العم.
بعدت خطوتين عن عمها ورجعت لمريم ووقفت وراهم بحيث ما تنشاف وويهها احمر اشرت لمها حرمت حامد انها بتسير فوق لان دقات قلبها تسمعهن في اذنيها لدرجة عمها سمع دقاتها شلتها المها وطلعت فوق فتحت الباب وعقت عمرها على السرير وهي تبكي بقهر وبضعف كيف ماقدرت تسيطر على وضعها الحين شو بيقولون عنهم اكيد بينهم شيء ياربي انا متى اهمش الناس من حياتي متى بلتفت لحياتي وبس راحت في سابع نومه من بعد نوبة البكى..
:
-
تحت عم الصمت ثواني من بعد ما راحت فوق وكانت مريم جداً مستغربه نظرات عبدالله لمياري وكيف انصدم من شوفتها لدرجة انّه مارمش ولا رمشه وتمنت ان هي الوحيده اللي لاحظت هالشيء لكن نظرات امها وابوها وعمتها وعمها لعبدالله اللي كان يطالعها وبلع ريقه بضيق من بعد ما مسح ويهه بيده قام من عندهم وهو يقول: بروح البيت تعبان سمحولي وطلع عنهم وترك في قلوبهم تساؤلات وشك من وضعهم اللي ما عجب حد ابداً بلعت مريم ريقها بخوف وهي تحاول تفسر رفضها المستمر لعمر وعدم حضورها للعزيمه اليوم يدل على شوه توسط ذهنها حلين مالهم ثالث الاول ان بينهم حب وماوفت بوعدها لعبدالله وماتبا تشوفه . او انها مجبوره على عمر وخايفه من المواجهه وماتبا تشوفه.
انتهى الوضع اللي كان بينهم من يوم نطق بو عبدالله: اسمحولنا نحن نترخص الحين ونلتقي باجر باذن الله .وكلٍ راح لداره وبيته..
:
-
في بيت بو عبدالله دخل عبدالله وجسمه يعرق وينشف انتبه له عمر اللي كان طالع من المطبخ واستغرب انه تخطاه من دون كلمه وحده ورقى الدريّ بسرعه تنهد بضيق عمر من شاف حالة اخوه وخطواته المتسارعه للصعود ، كمل عمر خطواته للصعود ولكنه اللّتفت للورى من سمع صوت الباب وسمع ابوه وامه يتكلمون وامه اللي قالت: مادري والله يا خالد بس نظراته اكدت لي ان في قلبه شيء صوبها رغم انها ماشافته ولكن ربكتها ورجفتها في وجوده وهو ما نزل انظاره عنها اقنعت نفسي قبل لا اقنع قلبي انهم مب خاليين وشيء في قلوبهم لبعض(قصدها حب مادروا عن شيء).
مافهم من حوار اهله شيء لانهم دخلوا غرفتهم وتسكر الباب عليهم وهو كمل خطواته للغرفته وقلبه ضايق كثير من اللي صار مب عارف كيف يبدأ علاقته مع مياري ولايعرف كيف يوصل لقلبها ماحبها عبث ولا صبر كل سنين عمره عشان تجازيه بالرفض وعدم القبول وهو اللي رفض كل بنات حواء ماتوقع ولا واحد بالميّه انها بتنجبر من عمها وشو الاسباب اللي ما تخليها توافق عليه برضاها حاول انه ينام وتقلّب يمين ويسار والنوم عيياء يزوره ويرحم عيونه.
-
بالاتجاه الثاني من نفس المكان قاعد على سريره شبه منسدح ساند جسمه على ظهر السرير وحاط ايديه على راسه بضيق خنقته العبره من تذكر كلام سلامه لمياري بانها تطلع لهم وتقعد عندهم وتذكر اول ماشافها وكيف كانت خايفه ومرتبكه منه وويهها مخطوف احسها تذكرت اليوم المشؤوم ياربي سامحني كانت لحظة غضب وقهر ياربي كيف كانت ضايعه بينهم محد حاس فيها فعلاً ولا بمعاناتها كانت تدور على الامان وسطهم ومحد حس بذعر والرعب اللي فيها الا انا لاني تسببت لها بـ هالخوف والله يا مياري ماتستاهلين اللي ياج مني كيف امي قالت كل بنات عمي معرسات الا مياري وسلمى اللي قهرته اليوم بجراتها وتتبوسم له وتحط عينها في عين اللي يطالعها واللي مايطالعها ابتسامتها اليوم ضايقته وايد واربكته خاف انها تكون هي لكن حمد ربه انها مب هي شاف البراءه اللي ضيعها بيديه شاف الطهاره والعفه شاف اعظم ذنوبه فيها كييف قدر عليها تذكر كلمتها ان كنت مجبور الله يسامحك وان كنت متعمد حسيبي الله غمض عيونه سامح لدموعه تنزل لعلها تغسل حوبته وتغفر ذنبه في هالمسكينه مب قادر يسامح نفسه ابداً وصلها لهذي المرحله اللي تخاف فيها وتدور امانها وهي وسط اهلها وبيتها طلعت منه آآه طويله ومتعبه شو يسوي لجل يرضي ضميره كيف يطلب منها تسامحه سمع صوت ضميره اللي يأنبه وصوت عقله اللي يقول تسامحك على شو بالضبط على غدرك لها ! ولا على شرفها اللي راح بالغصب والجبر واكراهٍ منها وجبر منك ! ولا على حياتها اللي ضاعت بسببك وخوفها من الناس وهي وسط اهلها ! كيف تسامحك وهي تدور على الامان بعز وقفة اهلها معاها ! كيف تسامحك وهي ينكتم نفسها منك وكانه الكون كله يصبح بلا هوى ! نفض راسه من صوت عقله المأنب لفعلته ولكن قلبه عيّياء يهدأ حالفٍ عليه من يرد البلاد وتوطى ريوله ارض الوطن ترجع له ذاكرته ويتذكر بطولاته وانجازاته اللي ماتشرف واللي حرمت عينه النوم بسبب ضميره المأنبنه وقلبه اللي صحى متاخر وايد وادرك ان فعلته ما كانت الا انتقاماً منه هو ومن نفسه لانه مثل ما قال له حامد دخلنا الحلبه فريقين اذا من اول بنفكر في فوز وخساره كان لازم واحد منا ينسّحب بس مادامنا دخلنا بروح رياضيه ومعنويّه عاليه معناته محد فكر بالفوز ولا الخساره دخلنا وطلعنا موهوبيين ورافعين روسنا اقلها هالسباقات محد يدخلها الا ناس محترفين في السواقه. صحى من غفلته على اهتزاز جسمه رفع عينه وشاف مريم اخته مسحت دموعه بصبعها ونطقت بصعوبه: شوفيك ياخوي!
عبدالله ابتسم مجامله وهز رأسه بالنفي ولكن قاطعته قبل لا يتكلم: لا تكذب عليّه انا اختك ! انته تحبها !
وسع عيونه بكبرها على كلامها وهي كملت كلامها: قولي عبدالله انتوا تحبون بعض اللي شفناه مب طبيعي ابداً الكل لاحظ توتركم و...
قاطعها عبدالله بعد ماتحنحن وهو ضايق: لا ياعمري والله ما بينا شيء لانحب بعض ولاشيء !
مريم رفعت حاجبها بعدم اعجاب من رده ونطقت: ودموعك وتعب قلبك وسهرك رغم ان النوم يناديك منادى من عقب السفر وتعبه واسترسلت كلامها وهي تتنهد اصدقني القول انا اختك سترك وغطاك انته عرفت انها راحت من بين ايديك صح.
مافهم كلامها وعقد حواجبه بضيق: كيف راحت مني ! انتي شو تخربطين مريوم والله اني تعبان انسدح على فخذها وهو يقول: خليني انام لو شوي بس حطي ايدج على راسي ولعبي بشعري وقري عليّه.
تنهدت بتعب وبضيق وبدت تسوي اللي قاله لها ولكن ما بتخليه لين تعرف شو بينهم هم الاثنين.
:

وانتهينا من درامتنا الرابعة ..:hht05264:

بارت رائع واحداثة مميزة
الله يعين مياري وفضول اخت عبدالله وين يوصل
واتمنى مياري ما تسامحة. وعبدلله يتعاقب

الله يعطيج العافية

دجى الليل معجب بهذا

روعه حبيبتي وشوقتيني اكثر
بعد البارت الرابع
نبغى نعرف وش صار بينهم

دجى الليل معجب بهذا

المشاركة الأصلية كتبت بواسطة نظرة الحب

روعه حبيبتي وشوقتيني اكثر
بعد البارت الرابع
نبغى نعرف وش صار بينهم

بتعرفين يا نظرة الحب بتعرفين بس ما قلتي لي يا نظرة الحب بنظره اللي كانت بينهم 😎😎😎😎😎😎اسم ع مسمى ولا !؟؟؟؟ لازم تحللييين لي النظرات يا نظره التسميه مب عبث

عـــودالليل معجب بهذا

الحبكه للحين ممتازه
خصوصا هذا البارت بدينا نخش منعطف
لآفت وفيه شد وانسجام

دجى الليل معجب بهذا

المشاركة الأصلية كتبت بواسطة مجنون قصايد

الحبكه للحين ممتازه
خصوصا هذا البارت بدينا نخش منعطف
لآفت وفيه شد وانسجام

فعلا عمو مجنون لين الحين كل شي ممتاز ومميز ولكن المنعطف. الياي اتمنى تلبسون حزام الامان 😎😎😎فيه شقلبات ومتقلبات تفوق الخيال 😇😎🥹🙂🙂🙂

عـــودالليل معجب بهذا

الا يحبهااااا
داام بقق عيووونه خخخخخخخخخخخ
عبدالله كله اسرااار

دجى الليل معجب بهذا

المشاركة الأصلية كتبت بواسطة نجم الجدي

الا يحبهااااا
داام بقق عيووونه خخخخخخخخخخخ
عبدالله كله اسرااار

توقعاتككككك تفووووووق المستتتتحيييييل انته فعلاً تدقق باللي بين السطور ترقبوا البارت الخامس بيوضح لكم شيء محبب لقلوبكمً😇😇😇😂😂😂 خله بس من يعرف بملجة عمر بها هنيه عاد قولي كيف تسير الامور بينهم 😎😎😎😎

البارت الخامس
:
-
يزين يومي يا مهجتي بين الناس بحضورگ..
ويزين اكثر ان انّْذكر طاريگ بالجلسة…
:
-
في صباح اليوم الثاني وتحديداً في بيت بو عبدالله وعلى قهوة الضحى قاعدين ام عبدالله وابو عبدالله يتناقشون في موضوع امس نطق بو عبدالله وهو يقول: بس ما قد ياب طاري لي ولا لمّح لي بـ اللي في خاطره.
ام عبدالله بضيق: انته خل هالكلام على طرف انا طول ليلي مانمت قاعده افكر بردة فعله لو درى بانها صارت لاخوه وبالصراحه احس انّ نحن استعيّلنا شرايك لو ننكسل الموضوع!
طالعها بعصبيه وهو يقول : تعوذي من ابليس يا حرمه واسكتي وخلينا نشوف شو اللي بيصير يمكن اللي نفكر به اوهام.
تنهدت بضيق وهي تصب لها فنيان قهوه دخلت عليهم مريم سلمت وقعدت تشرب شاي دخلوا عبدالله وعمر في نفس الوقت حسوا بربكه واللّتفتوا لهم عمر طالعهم ونطق: شفيكم تطالعونا بسم الله .
نطقت امه بخوف: دخلتوا في نفس الوقت خوفتوني.
عمر ابتسم: فديتج مافينا شيء كل واحد ظاهر من غرفته وتلاقينا عند الدريّ.
ابتسم عبدالله وهو ياخذ كوب شاي من مريم: سلمتي يا عين اخوج!
مريم ابتسمت ويلست قربه: حبيبي الله يسلمك يا تاج راسي.
نطق ابوه بهدوء: متى بتبدأ يا عبدالله تداوم في الشركه انا وعمك ننرياك.
ابتسم عبدالله ونطق: لو من اليوم انا مستعد يا ابويه انته بس آمرني.
ابتسم بفخر ونطق: وهذا عشمنا انا وعمك فيك يا عبدالله انك ما تخيّب ظنا فيك.
ضاق صدره زودٍ على ضيقته وتنهد بضيق وهو يهمس بينه وبين نفسه: وانا محد يكسرني غير عمي واثق فيني ومتعشّم فيني.
انتبه على نظرات مريم المستغربه من كلامه وقالت بهدوء: شو تخربط انته!
ضحك بهدوء وهو يقول: عمي رافع سقف توقعاته فيني وانا بعدني ماعرف لشغل عندهم.
ابتسمت بطمئنان وانتبهت على امها اللي قالت: عمر حبيبي من يلست وانته ساكت شي فيك ! متضايق حاس بشيء ! شكلك مارقدت صح.
هز راسه بالايجاب بصمت وهو يخلل ايديه في شعره يهمزه ومن ثم نطق: هيه والله يا الغاليه عيياء النوم اييني.
نطقت امه بضيق من بعد ما شافت نظرة ابوه له: ليش يا ابويه شيء يعورگ.
نطقت مريم بضحكه: ههههه لاتحاتينه امايه اكيد طول الليل يرمّس الحب ومن فرحته النوم ماياه.
ابتسم بسخريه على حظه ونطقت امه بغضب: عمر شوفيگ اللي كنت تباه صار شو اللي كدر قلبك .
تنهد بضيق من رفع عينه لأبوه ونطق: ان سالتگ سؤال واحد وعندك اجابته بتجاوبني ولا!
خافت مريم من كلامه وقربت من عبدالله تشد على ايده من اعتدّل ابوها بيلسته ونطق: ابشر بعزك ان كان الجواب عندي عطيتگ اياه!
عبدالله مايدري ليش حس انه لازم يقوم ومن رن تلفونه قام واقف يستأذنهم وطلع من البيت .
اما مريم كانت خايفه من شكل عمر اللي بايّن انه مهموم ومتضايق ونطق بجديه يصاحبه ضيق: عمي ليش ما خذ موافقة مياري ليش جبرها عليّ.
كمل ابوه بضيقه تحت نظرات مريم المصدومه نطق: ماجبرها يا عمر البنت كل مره ترفض اللي يتقدم لها وهالمره انا اللي قلت له يجبرها عليك حتى لو هي ماتبا باجر بتتعود عليك وتتقبل الوضع انته ست مرات خطبتها ورفضتك رغم ان الكل يعرف مافيك بلاء ولا هي فيها بلاء ومالقينا لها سبب مقنع عشان ترفضك بس انا متاكد انها بتتقبلك مع العشره.
قام واقف وهو متضايق منهم ونطق: اباها برضاها يا ابويه مب برضاكم. وقفى عنهم وهو طالع سمع ابوه اللي قال: وين بتسير !.
عمر بضيق: بسير اشتري خاطرها واطيبّه عقب سواتكم!.
هز ابوه راسه وطلع عمر عنهم.
:
اما عبدالله اللي انهى مكالمته وكان بيدخل بس وقف من سمع كلامهم عن مياري وانه عمه اجبرها توافق على عمر سوّدت الدنيا بعينه وبلع ريقه بصدمه وبضيق وبغصه واضحه يالله على الشعور اللي داهمه في هالوقت وفي هاللحظه تحديداً لوم على ندم على ضيق كيييف وضعها الحين وشو شعورها بعد ما اجبرها عمي على عمر يالله شعوره بـ هاللحظه اشبه بشعور القاتل اللي حددوا موعد قصاصه بالضبط خوف على ترقب على كثير اشياء وردت في باله رجع خطوتين على ورى من حس بخطوات حد ياي وانتبه لعمر اللي طلع معصب وسكر الباب وراه بقوه ، سحب نفس عميق وزفره وعقبها دخل داخل وحاول يكون طبيعي قد مايقدر انتبه على ملامحهم ونطق بهدوء عكس احساسه الداخلي: شفيكم وليش عمر ظهر متضايق عسى ماشر!.
تنهدت امه بتعب وطالعت خالد بلوم: يعني بالله عليگ يوم البنت مب موافقه ليش تجبرونها عليه وتكسر قلب ولديه!
خالد بضيق: يا حرمه ولدج دخل الاربعين وهو مب راضي ياخذ حد غيرها واللي في سنه قدهم عيالهم طولهم وهو ماعنده بذره وحده وهي ماعندها سبب عشان ترفضه ومع العشره بتحبه وين تلقى حب مثل حب ولدج لها تحمّد ربها وتشكره.
ام عبدالله بضيق: ما اختلفت وياك ولكن هي بعد ماتتعوض ومناسبه لعمر بس جان شفتوا شو في خاطرها يمكن البنت...
قاطعهم عبدالله بندفاعيّه ومن دون شعور: والله ماتكملين جملتج يا امايه والله انها بعيده عن درب الردى بنت عمي ومحشومه عن كل ردى وكل زله ، ويشهد الله ان اللي يمشي في عروقها طهر وعفه مب بس دم يا امايه لا تظلمين بختج وبخت بنت عمي..
انصدمت مريم بدفاع عبدالله عن مياري وايّقنت ان هالاثنين مب خاليين من بعض وزادت شكوكها من نطقت امها: وانته شدراك يا بويه يمكن قلبها هاوي حد غير اخوك.
عبدالله بنفي : مستحيل بنات عمي حشام ويمكن البنت لها اسبابها تنهد بضيق ومن دون شعور وادراك نطق الواحد مايسوي شيء من كيفه يشاور يا ابويه واللي ايي بالاكراه والجبر والغصب ماله لذه يابويه ولا له قبله ومن ادرك كلامه واستوعب مقولته وشاف انظار ابوه وامه ومريم عليه تحنحن وقام واقف وهو يسترسل بكلامه: ما كان المفروض تخطون هالخطوه من دون علم وسابق استشاره عن اذنكم وسمحولي بسير عند راشد وطلع عنهم تاركهم في دوامه ومتاهه ضايعه بسبب كلامه الغير مفهوم واللي بعضه مبطن..
الكل انصدم من ردة فعل عبدالله وتاكيده لهم على طهارتها وصدق انفعاله من يابت امه طاري انها ممكن تحب حد استضاقت مريم وهي محتاره بوضع عبدالله الانفعالي معقوله ان مياري تفكر بـ هالتفكير راحت فوق وهي متضايقه من وضع البيت المتكهرب.
:
-
فـي مكان اخر وتحديداً في بيت بو حامد بعد ماسولف عمر ويا حامد وعمه وماقدر يلوم عمه عشان ما يزعل من بنته شوي ونزلت مياري وهي متكشخه وحاطه ميك اب خفيف لان قلبها عوّرها عليه شو ذنبه يترياها اربعين سنه وفي ليلة فرحته تعكر صفو مزاجه ارتجفت ايديها بخوف من حست انها بتدخل على ريال غير اخوانها المشكله شو تقول له انا مب بنت! انا ما اصلح لك وماقدر اييب لك عيال! تنهدت بضيق وهي مستثقله الموضوع ان سكتت اليوم مردّه ينكشف الموضوع يوم العرس وبيعرف وبيكون الغلط راكبنها من ساسها لين راسها لانها ما قالت له ولا عطته علّم عن الموضوع وبتعتبر غشته وان نطقت وقالت له عن الموضوع كيف بتثبت له صحة كلامهاا رجفت كل خلايا جسمها من حست بحضن دافيء يطوقها وهي مازالت واقفه عند الباب ابعدت عنه وهي تحاول تاخذ نفسها وربكتها ونفضة جسمها اثبتت له ان مياري فيها شي ومب طبيعيه وحاولت تسحب نفس بشهيق وتزفره وتبعد عنها إحساس الاختناق اللي تحسه حالياً حولها، لاحظ تكتمها ولونها اللي قلب للون الاحمر سحبها لداخل الميلس وسكر الباب وراه واتجهه للكراسي قعّدها على الكرسي وقعد قربها خاف عليها من شكل ويهها اللي تغيّر فجأه مسك كوب الماي اللي على الطآوله وحط شويه على راحة يده ومن ثم مسح ويهها وهو يسمي عليها شرّبها ماي وخلاها لين تهدأ ابتعد عنها برغبة منه عشان يعطيها الفرصه تتكلم معاه وماتحس بأي قيود باتجاهه.
تساند على ظهر الكرسي ولاحظ احمرار ويهها وحرارة ايديها وويها كيف غدا احمر من حرارة موقفها ونطق بضيق على حالتها: بنت العم انا ياي اشتري خاطرج واطيّب قلبج بـ اللي يرضيج وتوافقين من خاطرج انا ما صبرت هالسنين كلها عشان عمي يجبرج ... .
شبكت ايديها ببعض بتوتر مقاطعه لكلامه وهي تتكلم بسرعه وتصف الكلام صف من خوفها اللي بيوّقف قلبها : لا عمر مب القصد اللي فهمته امس كنت شوي تعبانه ومتنرفزه وطلّعت مني هالكلمه لكن اللي ابا اقوله يا عمر انّك ما تنّرد والف بنت تتمناگ لكن انا ....انبترت جملتها من نطق بضيق وبعبره استوطنته: لا تنطقينها دخيلج يمكن صح ماتكونين من الالف اللي يتمنوني لكن لاتجرحيني وتنطقينها بلسانج مابا اسمعها.
بعدت يده عن شفتها وهي تتنفس بخوف والرعب دب قلبها من مجرد ما لامس اصبعه شفاتها وين لو بيّتقرب منها وبيحضّنها شو بيصير فيها ونطقت هي تصحح ظنه: من قال ما اتمناك عمر اهدأ خلني اكمل كلامي ولاتقاطعني ارجوك ( هز راسه بالموافقه بصمت وهو يتمتع بخلّقة ربه)، اقصد انا اللي مااستاهلك انته تستاهل وحده احسن عني.
عمر برفض تام وهو متعمق النظر فيها مسگ كفوف ايديها ولاحظ تشنج اعصابها من مسكته وماقدر يبعد عنها اكثر يبا قربها بأي طريقه وقرّب منها يبا يحضنها ونطق وهو يقول: انتي ليش جي شاده اعصابج تكفين اهدي. ما كمل كلامه الا داهمتها غمامه سودا بعيونها وحست بدوخه وكانها تتمايل بالهوى بدون ميزانيه وقبل لا يميل جسمها على الكرسي ثقل راسها اللي تحسه اكبر عن جسمها وحضنها بخوف وهو يطبطب على خدها ومازاده الا شگ فوق شگه ان البنت مب صاحيّه رشها بماي على ويهها ولاحظ رجفة شفايفها وايديها بعد عنها بعد ما شل عنها الشيله وفتح ازرار قميصها يهوّيها ويبعدها عن الاختناق والضيق اللي تحسه وتوتر من حالتها وخصوصاً من شافها تعّرق وتهذي ورجفة شفايفها وتصاقع اسنانها مع بعض من شدة خوفها من قربه وايديها اللي تحاول تسيّطر فيهن على اهتزاز ريلها قامت من عنده واتجهت للحمام واستفرغت اللي في بطنها كله ( بـ هاللحظه دخل حامد وحارب وانصدموا من منظر عمر وويهه المسوّد ) طلعت من الحمام ومن خطت ريلها عتبة الحمام تمايل جسمها وترنّحت بمشيّتها بسبب الدوخه اللي داهمتها وكانت بطيح عليهم ولكن من لطف الله سبحانه وتعالى انتبه لها حارب اللي كان اقرب لها وطاحت بحضنه وشلها فوق لغرفتها وهو وده يعرف شو اللي صار من شاف تعمقها بالنوم دلاله على ارتياحها وانتظام نسمها وان الامر صعب عليها دعت في خاطرها الله يقويها لكنها تفشل في كل مره وتخاف الفشله كثير ماتبا حد يشوفها بأضعف حالاتها طلع عنها حارب وسار للميلس يشوف عمر. ومن دخل نطق بـ لهفه: بشررر
حارب بضيق: رقدت بس مب عايبني حالها شو اللي صار وخلاها تتعب.
عمر بضيق: ما صار شيء والله كنا نرمس عادي ومن مسكت ايدها تعبت على طول.
حامد بهدوء وخوف من يوم فزت ذاك اليوم اللي قعد فيه بقربها وهو الشك ذابحنه ليش تخاف منهم وحارب كذا مره يشكي نفورها منه وماتقعد عدالهم وماتفتح لهم الباب ابداً في الليل يارب مايكون اللي في بالي يارب تنهد بضيق وهو يوقف مسكه عمر وقال: حامد ! مياري فيها شيء ومحد خبرني !
هز راسه بالرفض ونطق: ان كان فيها عله ما يوّزناك اختنا يا عمر نحن ما غششيناك لكن..
قاطعه حارب اللي قال: لا الصراحه هي مب موافقه ولكنها امتثلت لرغبة ابويه وعمي وخضعت لهم مكرهه ومجبره مب مخيّره بس تدرون فزعها وخوفها منّا غريب وغريب جداً واعتقد انها حاله نفسيّه متمثله بالانطوائيه والانعزال !
طالعه عمر بصدمه: اووص اووص شو هالرمسه لا تكمل كلامك البنت بسم الله عليها اجتماعيه وفرفوشه ومافيها شيء بس يمكن انها تعبانه او عندها نقص فيتامينات او حديد .
حارب انتبه على حامد اللي طلع والضيق باين فيه ولف على عمر: لا تروح بتغداء عندنا وبعدها نشوفها يوم تقوم تمام.
هز راسه بالايجاب بصمت وقعد والدنيا ضايقه فيه .


البارت السادس باذن الله في الليل ان سنحت لي الفرصة 😎🤓

روح الندى ,عـــودالليل معجبون بهذا

ماشاء الله عليك
فكر جميل ومسترسل

كملي

دجى الليل معجب بهذا

المشاركة الأصلية كتبت بواسطة عـــودالليل

ماشاء الله عليك
فكر جميل ومسترسل

كملي

ربي يفرحك على المرور الطيّب ان شاء الله والله قاعده. اكمل عسى بس اخلص بسرعه وانزلها