ديوان الشاعره النادره

لقبوني النادره

بنت قرم وبنت وافين الخصال
تاج راسي لليالي ذاخره

والنعم فيهم لامن ذكر المجال
منزلتهم في المعالي فاخره

هم بني زايد عظيمين الفعال
وعزوتي عند الظروف القاهره

فعلهم مشهود لاطال الجدال
من يدين بالملاقا شاطره

أفتخر في صيتهم شيب وعيال
في قصيد وفي مقال وخاطره !

ويعتزي باسمي صناديد الرجال
ومؤمنه بالله و يوم الآخره

نادره في عزتي مضرب مثال
شامخه .. راسي رفيع وشاعره !

مالكه روح التواضع والجمال
لأجل هذا لقبوني (( النادرة ))

فرعة الواد

كريم ياغيث سقاء فرعة الواد
كريم ياغيث تزبر مناشيه

كريم يا جعله على طول يزداد
حيث الشكاله والوفاء كلها فيه

ربعي هل الطالات شيبان و أولاد
ريف الضعيف اللي عنا الوقت حاديه

دواسر يفخر بهم طيب و أنشاد
ويفخر بهم شعري وتفخر قوافيه

كسابة الناموس شجعان وأجواد
وعز الذي ضايم وخابت هقاويه

لهم جميل الطيب و المدح ينقاد
اللي رقو في المجد عالي مبانيه

ولاجاء نهار فيه ضيقات و أنكاد
عدوهم بالضيق ترجف محانيه

يسقون سم الويل من جالهم عاد
لاضيعو علمه وضاعت عزاويه

يسقي ديرهم صادق الوبل رعاد
الا انتهى غيثه تزبر تواليه !!

ياعالم الأحزان

خمسة عشر في الحج ياشين ليله
وسته بعد عشرين ياعام الأحزان

فجر الأحد عشنا بهمه ويله
يوم أعلنو فقده وينعاه ديوان

( جابر الأحمد ) فيه نبكي رحيله
وتبكي عليه أمه وتبكيه بلدان

وتبكي على فراقه سنين طويله
فيها خدم لأرضه ودينه بالاحسان

لو يرجعه دمع ذرفنا هميله
وبدمعنا نسقي فيافي وديان

حكم القدر لاشك مافيه حيله
لابد جوره تشهده كل الأعيان

راح الفهد ثم راح جابر قفي له
اللي على روس الزعامات عنوان

مرحوم ياشيخ فعوله جليله
أغلى الكويت وعزها كل الأحيان

قدم جهود مالها من مثيله
تبقى بتاريخ العرب دون نسيان

يارب جابر جاك كرم نزيله
شيخ يحبونه صغار وشيبان

وأكتب له الجنه حياة بديله
وأجعل مقره بين روح وريحان

المواجع

يا الله يا معبود يا والي الكون
يا رافع سبع بليا عمدها

يا عالم بخلقه وماذا يسرون
سبحانك العالم ومحصي عددها

أفرج لي هم بين الأضلاع مكنون
حالي من أسبابه ترداء جهدها

سنين تمضي والمواجع يزيدون
تقبل وتقفي ما رحمني نكدها

العمر قفا وزهر الأيام يمضون
والمر ذقته ماعرفت لشهدها

ولا أظلم سواد الليل نامت به عيون
ألفت علي افكار وألفا جلدها

قمت أتفكر والمدامع يهلون
بهذي الحياة اللي نساني سعدها

دنيا تغير ما عرفنا لها لون
يا بخت منهو جاهل في عهدها

كم من حزين من عناها ومغبون
وياكم بال راحته قد فقدها

وكم من شجاع راح واليوم مدفون
بين النصايب وأستقر بلحدها

وكم حرة من وقتها عانت طعون
ذاقت مآسي وقتها من ولدها

كانت تظنه في زمنها لها عون
وعلى المصاعب عزها هو سندها

ضيع أملها و فيه خابت به ظنون
وبأسباب طيشه كبدها كم لهدها

وكم من فقير شاف ويله ومحزون
عزيز نفس وحاجته قد جحدها

وياكم من قرم بطيبه يمارون
حلال صعبات الأمور وعقدها

وذاق الغبينه من عيال يعقون
باأسبابهم عاش الحياة بزهدها

وعلى النواقص صارو اليوم يمشون
يقطعك يابذره ترداء حصدها

وبعض الشباب تشوفهم مايصلون
وش قدمو للاخره في وعدها ؟

لهذي الحياة وشغفها كم يشرون
وأفضال ربي نادر من حمدها

وكم جايع غيره من الخلق يهنون
شاف العذاب ولقمته ماوجدها

عجايب فيها عيوني يحيرون
با أسبابها عيني شكت من سهدها

يالله ياللي له عباده يعبدون
ترحم لجفن ليلته مارقدها

فيك الرجاء يارب ياوالي الكون
عندي أمل في يوم يقبل سعدها

طاري الصداقه

خلاص ما ينفع مشاريه وعتاب
خلاص قلبي عاف حتى غلاكم

كنتو غلا قلبي وكنتو لي أصحاب
وكنتو الحبايب في عيوني أراكم

وهبتكم حب حلم فيه الاقراب
ومن الغلا ياما دمحت لخطاكم

خليت قلبي بين أياديكم كتاب
وانتم لغز يحتار منهو قراكم !!

يا للأسف يا ظني اللي بكم خاب
فيكم ويا عزي لقلب رجاكم

خنتو عهدنا بعد ما كنتم أحباب
بعد الغلا مدري وش اللي دهاكم؟

صارالوفاء ماعاد يحسب له حساب
ما عاد ينفع من يماشي سواكم

واليوم قلبي طاب مع خاطري طاب
يومي عرفت اللي مخبا وراكم

أببتعد وأعدكم مثل الأغراب
وأنسى لماضيكم وقاسي عناكم

وطاري الصداقه دونها بغلق الباب
ما أريد أشوفه ما حصلي معاكم

بقولها من دون ترديد الأسباب
با أقطع قدم رجلي إذا هو نصاكم !!!

عقدين مرت ..صوت

يمه علام الزمن هو صاير ضدي ؟
يضحك لغيري وانا لي كاشر نابه

أخفي طعوني و دمعي جارح خدي
وأشقت فؤادي طعون الوقت وأسبابه

يا طعون تكفين عن قلب الشقاء هدي
صدري من اللي حصل يكفيه ماصابه

جارت علي السنين وبيحت سدي
والهم فالقلب قام ينصب اطنابه

وتاهت جميع الخطى في حلمي الوردي
والحزن طعمه مع الافراح متشابه

ودنياي ضاقت وهي ما قدرت جهدي
وغاب السعد مني وحطوه بترابه !

ودرست أنا في مدارس وقت متحدي
وصرنا أنا والعمر والروح طلابه !

وصديقة كنت معها حافظه عهدي
طاعت عذول ورانا تنبح كلابه !

عقدين مرت و أعايش ضيقتي وحدي
العمر يمضي وأنا أطرد مقفي ركابه!

عجايب عاقبتني عكس ماودي
والحظ طايح وسعدي طول غيابه!

يمه تعالي و حطي يدك بيدي
العمر دونك أشوفه صاير غابه !

مادام موجود راسك حي من قدي ؟
يكفي أشوفك جبال القلب وهضابه !

يالنادره

أدمى فؤادي وأحيا بالقلب ضيقات
هذا الكلام اللي بروحي قريته

طعون وقتي مالها اليوم سجات
( يالنادره ) وجرح الزمن ماقويته

هيهات يسلى ضايق البال هيهات
والصبر عيا يومن اني بغيته

كلن تخلا بالظروف الصعيبات
عني وخانوا بعهدي اللي عطيته

يشمت ليامن شاف بالخد دمعات
حتى القريب اللي لضيقي اعتزيته

والصاحب اللي زاد بالحال سيات
لا واحسافه ليتني مانخيته !

والفرحه اللي انتظرها ولاجات
العمر قفا والزهر ماجنيته

لاوين وانته تهدي القلب طعنات
ياحظي ياللي من زماني رضيته

الصبر زادلي بعظيم البليات
وحكم القدر مايوم والله عصيته

ليت الجروح اللي بقلبي عميقات
تطيب لامن زان حظي ياليته

حفظت لي بالطيب قلوب وفيات
ودرب بديته بالوفا مانهيته

انشدت من همي حروف وكلمات
يومك شكيتي الحال وحزني بكيته

( يالنادره ) اخذي عهود وثيقات
( مهنديه ) وقولي ماقد نفيته

الحق عندي له على الدوم وقفات
وشرواك ( يابنت الدواسر ) شريته

والله لانك عندي اغلى الرفيقات
يالغاليه حرفي لحرفك هديته

عمر الطفوله

ليتني يايم في عمر الطفوله
أترك الدنيا وأخليها وراي

أقضي ألأوقات في صوله وجوله
بين لعب وضحك والعابي جداي

اطرب مع اصحابي وياني ملوله
ونومي بحضنك ترى غايه هناي

اوصل الروضه واعودلك عجوله
ماحتمل طول المغيبه يامناي

طفله اصغيرة وفي طبعي خجوله
بالبراءه دوم يغلبني حياي

اجهل الأيام وقلوبن غلوله
واجهل طعونن شكاء منها حشاي

واجهل الوقت الردي وانسى حموله
ولاعرف ظروفن حصل منها شقاي

واجهل سؤالن عجزت ألقا حلوله
كيف حكم الوقت يأمر في عناي

وكيف بعض الناس تجرحنا فعوله
مايجي من هرجها حكمه وراي

قصدهم ظلمي و تهميشي سعوله
همهم طول الزمن طعنه قفاي!

يمه ارتاحي من الهم وحموله
كلهم مايوصلون لمستواي!!

القلب دعاك

الحين يعني جاي وتقدم أعذار ؟؟
الحين يعني تعترف في تجافيك؟!!

وتبي تنسيني جميع الذي صار
وطعون قلبي من عمايل أياديك

حيرت قلبي والفكر منك محتار
أشقيت حالي يوم همي أراضيك

خليت داخل خافقي تشتعل نار
وشمت عذالي وحتى معاديك

شربتني ياصاحبي كاس الأمرار
ياما تحملتك لكن مانفع فيك

أخلصت لك وأوفيت ميرأنت بوار
وأهديت لك قلب(ن) بالأشواق يوفيك

ومديت لك يمناي يوم الزمن جار
على حياتك يوم كل(ن) مخليك

جازيتني بالشر وبقلب غدار
خنت العهد يوم الخيانة مواريك

خنت الوثايق ولعبت فيك الأفكار
أفكار منهم شككو في مباديك

والحين باأعلنها بتصميم وأصرار
القلب عافك من بعد كان شاريك

وعن دنيتي فارق ولا أسمع لك اعذار
تعبت من عذرك وكثره خطاويك

بعيش في دنياي لا زيف وإنكار
وأنسى مع الأيام عظمه بلاويك

وأدعي الأهي عالم(ن) كل الأقدار
يشفي جروحي في خبر حوبتي فيك!!

ياوجودي لا لفا هم جديد

ياوجودي لا لفا هم(ن) جديد
وهاضت جروحي وطاري النوم راح

وقامت الضيقة تزاحم بالوريد
والآلم والآه حلو باأجتياح

وقامت عيوني بدمعي تستزيد
وصار حالي يلبس همومه وشاح

ألتزمت الصمت أفكر به وأعيد
الفكر مذهول مايوم استراح

ياظروف الوقت يالحظ العنيد
ياطعون القلب ياكل الجراح

ياظلام الليل يالسعد الفقيد
فهموني جاوبوني باأتضاح

جاوبوني باأختصار وبالمفيد
(ليه دنيانا ماتسقينا قراح) ؟؟