ديوان الشاعرنايف صقر

يانية النسيان موتـي داخلـي غيـظ وظمـا

عليك من حبي لها في داخي موت وسيـاج

حبيبتي نجمه تغنت فـي ملامحهـا السمـا

حبيبتي صرخه على الوقت الرمادي واحتجاج

حبيبتي جمله عتب مزمن على شفـة عمـي

حبيبتي شوكى غصون الورد لأيام العجـاج

حبيبتي غصن اخضر .. لين على دربي نما

لو كسرتني في كفوف الوقت تكسير الزجاج

لعيونها كل الجروح استعذبت نـزف الدمـا

ولعيونها جفن السهر صارت له الدمعه مزاج

أسترجع الماضي واناديها تعالـي لـى كمـا

غيثٍ يبشر بالحيا سيله وسيعـات الفجـاج

والا تعالي لي مثل طيـفٍ تهـادى وارتمـى

داخل عيوني لو يسافر بين رمشي والحجاج

حتى تعيش الخطوه اللي رافقت درب الظمـا

وانا اجعلك للهامه اللي مانحنت للناس تـاج

صاحبي لاعـاد تشعبهـا مسافـه

وأنت تاركني على ورك المطيـه

لاتعرضنـا المضامـي والكلافـه

وارتحالات السـراب السرمديـه

إترك الـوادي وتغريبـة ضفافـه

للدفـوف وللحـون السامـريـه

العتب قد قلت لـك مانـي بخافـه

أنا اخاف اللي يقفي عـن خويـه

والشتا لاجاك في بـرده صلافـه

سامـر الموقـد وزر الفرملـيـه

والخريف إن حت في كفوفك جفافه

قابلـه بالحـب وعيونـك نديـه

قيس ليلى نبضة في صـدر قافـه

قد نقشهـا فالصخـور العامريـه

واصبحت ليلى الحقيقه والخرافـه

لاهي الدمعـه ولا العيـن الخليـه

لو كلامه مر ف رقبـة الزرافـه

ماتعجـرف بالطـروق العجرفيـه

بنتلاقى قبل الارض من الحسافـه

دامنـا خـلان وقلـوب غنـيـه

فكرت أعلق صورك..ومالت الفيه على جـدار

وتخاصمت ياحبيبـي كـل جدرانـي عليهـا

قلت أكسب أحلام غرفة بأختياري وأخسر الدار

ويكفي الدار يارجواي بـوح صـورك فيهـا

وأزهر فـالأسمنت حوذانة غرام وفـز نـوار

عقب أرتجف سقفها واركونها منهـا واليهـا

كن الصور ياحبيبي كلمـة فـشفـاه ثرثـار

اوكنها لاقريت الوانها وأبعادها وخطوط أيديها:

لهفة شرارة تشظت فأنفجار الطيـف والنـار

في عتمة لو سرت عنهـا الليالي..تحتريهـا

يفنى الدجى والفصول الأربعة وتجف الانهـار

ويبقى الندى في ورقهـا وفـثيـاب ترتديهـا

في صورتين..أبتسامتك يمين..وعينك يسـار

كأن أشافيـك تكـذب كذبـةٍ لـي وأفتريهـا

فيهـا سنينـك خمايـل ياسمينـك والجلنـار

ياللي فداياك عمـري وأمنياتـي لـو تبيهـا

وعيونك اللي تكحل بالدجى وتقـول الأشعـار

الله يخلـي هدبهـا لـي ويرحـم والدينـهـا

واحة نخل حولها كن السراب بحور وسـوار

من دونها ضيعة العاشق لـو أنـه مهتديهـا

وفـصورة مثل حبس الما بكف وحرث الأوتار

أو كنهـا سالفـة مـن منتهاهـا تبتديـهـا

نار الحطب صفرا وزفراتهـا زرق

يذكر بها الأخضر ليالـي جفافـه

لشموسها شبيت في سدرة الشرق

واطعمتها طلح الشجن والحسافـه

لعلي اكتب من لحون الدفا طـرق

والا اجمع التمر لمواسـم خرافـه

والشاعر اللي يجهل النوح والورق

يغيب عـن بـال التباريـح قافـه

الشعر انا حادي مجاهيمه الـزرق

اللي تـرزم لـي حنيـن ولطافـه

بيني وبين اللي يغنون بـه فـرق

لاني اشقي بـه واحبـه واخافـه

والمزنه اللي شافي قطنها البـرق

سالت ونسيتها الرعـود ارتجافـه

ياحبيبي والبكا .. هـم المحاجـر

بالدمـوع ابـرد مناديلـي كويتـه

آه من صوت ترك كـل الحناجـر

وانتثر في دفتري شعـر وقريتـه

صاحبك لين حشا والحسن فاجـر

من لمحته قلت جاك اللـي بغيتـه

من غرامك في غلاك ارحل واهاجر

وان ضواني ليل من يمك سريتـه

لاتزيد طعوني أوجعـت الخناجـر

مابقـي عـرقٍ بقلبـي ماثنيتـه

لو عيوني غيم واهدابـك محاجـر

ماظما رمشك تحـت دمـعٍ بكيتـه

القلب عود يفوح والطيب مـن مكسـره

تحته من الجمر مايوقد سكـات الرمـاد

والعيـن مغرورقـه بالدمـع ومبعثـره

بين الصور والرسايل والدجا والسهـاد

حنـا اليـا حسبنـا مازرعنـا الـذره

قـل للعصافيـر تتركنـا وقـل للجـراد

البارحه جف في غصن المـلام ثمـره

عقب البياض انكسر ضلعه وسال السواد

والناس خلان قبل الريـش والمحبـره

شعوب وفخوذ واحباب وصباح وهجـاد

هذا الجمل لو سنامه سامـك فـظهـره

ماله عزوم يقـوم بهـا ولا لـه شـداد

ياذيب عيد علـى قلبـه وفـج نحـره

دامه رغى عقب هدراته وشـم الحمـاد

تمخض الوكر والقرنـاس عـن حمـره

في راس قشعه لعب فيها الظما والنفـاد

يوم النحاس انصدع لونه وذاب أصفره

غنيت للسنبله كـل اغنيـات الحصـاد

مايدفي الا الوبـر والوصـل والمقـدره

لازاد شوك الشتا في راحتـك والفـؤاد

ولاصار ما لك اليا منك ركضت اغبـره

شوري عليك اترك البيدا .. وكب الطراد

خلص كل الكلام ولابقي غير القصيـد اعتـاب

نشف وجه الجراح ولابقي غير السهـر راحـه

سلامـاتٍ تطولـك لاتجينـي خايـفٍ مرتـاب

ترى لك وحشه مثل الظلام ان مـات مصباحـه

ترى لعيوني اكثر من صديق وللخفوق احبـاب

اشوفك تختصرهم في خفوقـي يـااول جراحـه

على هونك .. ترفق ياشتـاي البـارد الكـاذب

تراها.. قفلتين .. الطعنتيـن ان قلـت ذباحـه

بشوفك .. بلمحك .. بتذكرك لاغابـو الغيـاب

وأبا اصرخ من حشاي ورحله الغفران تفاحـه

ألا ياكبرهـا وانتـى وانـا واثنينـا الاغـراب

على قلب خساير غيرتـه فـي ذمـه ارباحـه

رهنت لغيبتـك ظـلٍ نحيـل ودمعتيـن وبـاب

علـى قلبـي قفلتـه والوفـا همـه ومفتاحـه

تفضل نعمه النسيان ما ابغي لاابتعدت اصحـاب

عطاياك القديمـه والجديـد اليـاس وارماحـه

بقي طيفٍ باحرسه في عيوني لك عليه اهـداب

ولانـي حاجبـه ياوجهتـه لاهـداك مرواحـه

خلص كل الكلام اهديت لك لون الوداع واخضاب

مهر كفٍ دفاها مـن عـذاب مصافحـي راحـه

ليت لي ذود يـدك البيـد واحدالـه لحالـه

كان ماوالله علي خلاف فـي نجـد العذيـه

جفت اقلام الغرام وطـول المحبـوب بالـه

والله اني ماهقيت ان الغضي يقسـي عليـه

وش خطاي الا المحبه وش رجاي الا وصاله

وش يبي غير المـوده والغـلا والمقدريـه

دللوه اللي ربوه صغير واسرف بـي دلالـه

ليت لي قلب يطيق الصبـر وعيـون خليـه

والغضي لو لاعه التحنـان وبقلبـه عدالـه

ماغذت من دونه القيعـان جـردٍ جرهديـه

وان تشره قايد الغزلان مالـه بـي جمالـه

لعنبو من خان خلانه وجنـب عـن خويـه

عن جنوبه والوله والشرق يغنينـي شمالـه

صد ياقلب الجفـا لاصـد وضـاح الثنيـه

ماانت ياالخفاق عبد له ولا انت اصغر عياله

انت خفاق الضلوع العوج والخيـره خفيـه

صاحبـي عذبتنـي صاحـبـي وريتـنـي

في لقا ساعه بعـض حلـم وسنيـنٍ قادمـه

ياحبيبـي كـان ماسميتنـي .. سميتـنـي

ليت روحي منك ياعـذب المـوادع سالمـه

جيتنـي لـولا الليالـي جابتـك ماجيتـنـي

والليالي جابتك مثل القدر كل الظروف تسالمه

آه ماخليتنـي ثــم رحــت ماخليتـنـي

في دروب طـوال مهزمـه معـاك وهازمـه

كن في عينك مـن العشـره اليـا باريتنـي

شي اقل من الحيا بعيون ضيـف وعازمـه

ليتنـي لاجابـو اسمـك ياحبيبـي ليتـنـي

تشرب الذكري بعض عيني وعيني حازمـه

انـت لودليتـنـي فـرقـاك .. مادليتـنـي

دام حبـك فـي جبيـن الليالـي واسـمـه

لك بكي جرحي قصيدي وانـا مـا أبكيتنـي

آه ياحـر الوجـع فـي النفـوس الجازمـه

القلب كـل ارباعـه خلـي وعـروق

يقـرا بـه الظامـي قصيـدة سرابـه

للريح في رمـل التباريـح محـروق

وتلعب خماسيـن الولـه فـي ترابـه

ومع القلم هات ابيض الطرس ياصفوق

راعي الهوى ماجابنا.. الوقـت جابـه

لو من حـل حكايـة الشهـد مخلـوق

ماكـرم الله العسـل فــي كتـابـه

لو للسحايب ياطويـل الهـدب سـوق

شريت لـك بـرقٍ رهيـف وسحابـه

هتانها ياصاحبـي لـو هطـل فـوق

اخضرت اطراف السمـا مـن عتابـه

شاعر عيونك لاكتـب فيـك طـاروق

تختـال اساريـر الزهـر فـي ثيابـه

والفرقا ماتنبـت بختـري ورقـروق

ولاتشرح الصـدر الحزيـن الربابـه

وكان انكرت صوتي وتوديهي النـوق

بامـوت مـن قـل الوفـا والصبابـه

باسباب ما اعاني من الوجد والشـوق

إن غبت .. اجروحك بقلبـي تشابـه