 |
 |
 |
 |
|
 |
||||||||
 |
 |
| …»●[دواويــن الشعــراء والشاعرات المقرؤهـ المسموعهــ]●«… { .. كل ماهو جديد للشعراء والشاعرات من مقروء و مسموع وتمنع الردود .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[دواويــن الشعــراء والشاعرات المقرؤهـ المسموعهــ]●«… { .. كل ماهو جديد للشعراء والشاعرات من مقروء و مسموع وتمنع الردود .. } |
|
|
|
|
أدوات الموضوع | انواع عرض الموضوع |
|
#1
07-20-2010
|
||||||||||||||||||||||||||||||||
|
||||||||||||||||||||||||||||||||
قصايد ناصر القحطاني
الشــــــــــــــــاعر : ناصر بن محمـــــــــد القحطاني ناصر بن محمد القحطاني شاعر يجيد التعامل مع المفرده بحرفنه الشاعر القادر على لي الاعناق الى قصائده كما له العديد من المشاركات في الصحف المحليه والخليجيه اذ اصبح محط اهتمام متلقي الشعر الشعبي في ارجاء الجزيره العربيه كما قام العديد من الامسيات الشعريه وكان وكان اهمها على الاطلاق أمسيه قصــرالحمراء بأسبانيا وذلك بدعوه من جمعيه الثغره الاسلاميه هنـاك . وقد حققت هذه الامسيه بالذات نجاح فاق الوصف وكانت محطه هامه في حياته الشعريه . بألاضافه الى امسيـــــــــــــه شعريه اخرى اقامها في عاصمه الضباب لندن ولا يقل نجاحها عن نجاح امسيته الأولى ليظل ناصـــــــر محمد القحطاني بقصائده شاعر الطراز الأول . تلمس في قصائده جراح امته واثبت موهبته في كتابه الشعر الجميل وله ديوان د مقروء بأسم الذاهبـــــــــه ودواوين صوتيه (( ورود و بارود - شمس الغرام - همس الغمام )) ومن قصــــائده °ˆ~*¤®§(*§ الفــــــزعة §*)§®¤*~ˆ° كتب الشاعر ناصر القحطاني هذه القصيده عندما التقى بالشيخ احمد ياسين المجاهد الفلسطيني المعروف اثناء زيارته للملكه وشاهد آثار التعذيب على جسده المنهك في المعتقلات الاسرائيليه ليبدأ ناصر القحطاني باطلاق رصاص الكلمات تجاه العدو المحتل .. في قصيده اقل ما يقال عنها رائعه .. وذلك ليس بمستغرب على شاعر سخر قصائده لمحاكاه معاناة امته ورصيد الأمها في شكلا تتابعي لا يشعر به الا نـا صــر القحطاني او من هو في احساسه الشفيف . يا حلاوه صرختك والحر تكفيه الاشاره ما انت في غزه وحيد الا معك عشرين دوله (القصيده مكتمله ضمن الديوان وبعنوان أحمد ياسين) (الذاهبه) الله اللي راد و العقده قضاها اللي عقدها لا على الدنيا السلام و لا لباقي العمر زينه الفضا ما كنّه إلا خيمةٍ طاحت عمدها و الفرح ما كنّه إلا شيخٍ انقصت يدينه و العمر قطعة زجاج انكسرت و لا طال أمدها و العرب في العيد بدموع اليتامى مستهينه و الشوارع لفّها ثوب الظلام اللي هجدها و البيوت أطلال من عقب المحبه والسكينه و الشتا و الليل و البرد و سما يصرخ رعدها والعيون اللي ورا الشبّاك مذعوره حزينه طوّلوا في الكهف الأصحاب و بقت روحي وحدها كنّها في كوكبٍ ثاني خلا من ساكنينه الوداع اللي بعلم .. لعيني أعبر من رمدها و الوداع اللي بلا علم .. لقفص صدري غبينه و الوداع اللي بلا رجعه .. عليّ أمّر و أدهى و الله إنّه غرغرة سمّ و سكاكينٍ سنينه و العنود اللي جفيت الناس و الدنيا بعدها مدّت الفرقا لغاليها و هي تعطي الثمينه وينها .. كيف تركتني .. ليه ماجت في وعدها و القمر لا طل خابرها تجي بيني وبينه رحت أنادي و أتلمّس في مهب الريح يدها كنّي حصانٍ بلا صاحب طوى البيدا حنينه رحت أصيح الصبح وينه و العرب ما رد أحدها ما سمعت إلا صدى صوتي يقول الصبح وينه كنّهم من يوم ذيك الشمس غابت عن بلدها طلعوني في النفود و صكوا أبواب المدينه كنّهم من يوم ذيك الذاهبه محدٍ وجدها كل رجالٍ من الشرهه قلع في الدرب عينه أثرها ماتت و ماتت كل فرحه في مهدها و الربيع أقفت به اللي كانت التاج لجبينه جاورت عقب الحدايق حفرةٍ ما أقسى لحدها حفرةٍ ماني مصدق كيف ضمّت ياسمينه للحزن فيني مثل ما للطهاره في جسدها ويش أسوي لا فتشت اللي لها وسط الخزينه زخرفت حلم و بنت له مسكن و سمّت ولدها آآه لو غرّد ولدها في خميلة والدينه عاهدتني و ظفرت بيمينٍ أقوى من عهدها و الصبي لا خير فيه إن كان ما نفّذ يمينه ما تتقى عن رثاها عرقٍ اكتظّ بشهدها و لا تبقّى خلف قضبان الجفن عذرا سجينه كيف عند العالم أيام العزاء محصى عددها و إلا أنا طالت شهوره و الله أعلم كم سنينه لا الثرى فيها نبات و لا المشي خفف نكدها لا السما فيها طيور و لا البحر يمّه سفينه لا القمر هذا مساه و لا العصي هذا رغدها لا الزهر هذا شذاه و لا الذهب هذا رنينه قالوا الشيخ الفلاني مرجع القوم و سندها قال يبشر بالعوض و العلم جينا ناقلينه ساق لك بدر البدور اللي نشدها من نشدها جادلٍ هزّت عروش و خيبت روسٍ ذهينه قسمها في رسمها في جسمها إلا في رشدها و إسمها إن جا للغضب قومه على الألسن رطينه إترك الناي و عطيّة شيخنا غنّ لسعدها و انبسط يا عم و إنسى اللي ورى التربه دفينه قلت و لصدري تناهيدٍ تروّع من شهدها آآه وا ويلاه من يجلب على قلبي ضنينه خلّوا أغلى ذاهبه ترعى ربيع اللي فقدها و العطا راعيه محدنٍ صوبه الله لا يهينه لو ضمنت الجنّه و تفاحة القلب و شهدها قلت من بكره عسا مجنونها تاقف سنينه ناصر القحطاني (بغداد) عساها فاتحة برد و سلام و خاتمة وقّاد على "دار السلام" الله يروّع من يروّعها حضارة سومر و بابل .. قبل تشريفة الميلاد عروق الرسل و العلم و هل الشعر و روايعها هوى سيف الله المسلول يوم ان السيوف حداد مساري سربةٍ كان المثنّى في طلايعها عروسٍ زفّها المنصور و الدنيا لها سجاد و دلّعها الرشيد .. الله عليها يوم دلّعها بدت بالسندس اللي يهوّس الخلاّن و الحسّاد و كثر ما هزّها التاريخ ما اهتزّت روابعها بقت خضرٍ مرابعها .. بقت تنجب لنا الأمجاد بقت بيضٍ صنايعها .. بقت سودٍ وقايعها ورى ما تستميت قلوبنا معها و هي بغداد يا كبر العار لو ما تستميت قلوبنا معها عليها الله .. و أمان الله بلاد الرافدين بلاد هجد صوت القنابل جنب تهليلة جوامعها دهاها من ورا الحملات ليلٍ لو نقص يزداد أهلنا في مدامعها و أهلها في مطامعها هل الحريّة اللي لا غشا أصحاب البيوت رقاد تفرّق بينها مندوبة الهاون مضاجعها هل الحريّة اللي بعدها صاروا بنات الضاد ينوش المنتشي حشمة ملابسهن و يرفعها هل الحريّة اللي قصّت أجنحة أكثر الأولاد ما دام يدينها ما ترفع اثنين من أصابعها تعوّدنا على حرق النسل و الحرث .. و الأصفاد تعوّدنا على نارٍ يطفّيها مولّعها يبس بكفوف أهلنا غصن زيتون و كما المعتاد عناقيد الهدايا جاتنا من كف صانعها عسى المقبل مثل صيحة ثمود و مثل صرصر عاد عشان أهل البيوت الخاربه تبرى مواجعها على وين المراكب سايره في حضرة الرواد عساهم للدواير لين تدرجهم منافعها مصير أمصار و أجيال و زمن و جموع بيد أفراد لها التاريخ بالمرصاد و إن خانت ودايعها محبّتنا عداوة و القلوب قريّبات بعاد بعد ما نصنع الكذبه نصدّقها و نتبعها خذتنا العنتريّات الله يبيح من ابن شداد وضعنا بالخطب ليت الخطب نقدر نضيّعها تواعدنا مع الوحده و صرنا نخلف الميعاد مذاهب و أنظمة و أحزاب من يقدر يجمّعها تصهين دمّ ناسٍ طايرين بعجّة الأوغاد تصاغرنا مثل ما استصغر الكرسي مراجعها أخيراً .. كم بقى طاغي و كم باغي و كم جلاّد و كم لص و كم أصنام و كم أوهامٍ نصارعها و كم صورة تظن "الروح و الدم" أغنية و إنشاد و هي كلٍ هناك يدوسها و إلا يقطّعها لعل الليلة اللي جابت الكابوس ما تنعاد و بسم الله على بغداد من شي يروعّها ناصر القحطاني (راسي) راسي و لو شحّ الزمن ما حنيته ما باقي إلا إنتِ توطيّن راسي رضيت بالهم وتعزّبت بيته و صبري و عزّة نفسي أهلى و ناسي يا مرحبا بالجرح لو ما قويته الذل في وجهه عنيدٍ و قاسي و إن طاعنى الخفّاق و إلاّ عصيته ما خنت في يومٍ من الأيام باسي لعل قلبٍ ما يثور إن نخيته تصبح ركونه للمواجع كراسي و إن مرّنى ليل الغرام و سريته لاتحسبين إنّى مع الوقت ناسي جرحٍ برا و إن ما برا ما نسيته لو يمتلى من موية العذر كاسي تدرين راسي للبشر ماحنيته ولا إنتِ و لا غيرك .. يوطّون راسي ناصر القحطاني (الصوره) تراها الصورة اللي جا عليها بالوداع علوم فديتك ما سواها حرّك الخفّاق و أوجاعه عسى يا أحلى هدايا الكون ما انت بمن حلال القوم عسى يمّي يجيبك من تركتك عنده وداعه معاك أضيع يا عمري .. و أبي لو ساعةٍ من يوم تضيّعها معي .. و أنسى وش اليوم و كم الساعه عشيرك من يد الترك ليد الفرس ليدين الروم هذا هو يعربيٍّ لا نسى حلمك و لا باعه تعال الكل ينشد عنك و طيور الخيال تحوم و أنا ما بين طيف و صوره و دفتر و سمّاعه من أوّل ما أصبح استفرد بنكهة سرّك المكتوم و أهيم بكل شارع و أندهك و أخرج على الطاعه أطارد شمسك اللي لآخر الدنيا بدون غيوم و الى منّي ذكرت عيونك و مغناي و شراعه أجي جنب البحر و أحكي له أوّل ما عرفت العوم و فوق الشاطي أرسم وجهك اللي سافر شعاعه و الى جا الموج يمّي ضمّت ايدي وجهك المرسوم و طاحت نجمتينٍ مرّت الخدين مرتاعه و أعوّد للحدايق ما بقى من زادي إلا اللوم أفتّش عن عبيرٍ كم و كم نسمه من اتباعه أداعب وردها و الفلّ و الريحان و اليشموم و لا هو ملمس الورد الطبيعي يا أجمل أنواعه و أنشّد عنك أناشيد و عصافير و شجر و كروم و كرسي باهتٍ لونه و سبع خيوط لمّاعه و أشوفك في فساتين و ذهب و معلّقٍ منظوم و أخبّر بك سرايا كل سوق و غالي بضاعه و أشيل أوراقك أمّ حروف و قلوبٍ تشيل سهوم و أغنّي ما طرى و أطبع عليها الطاري طباعه و أعوّد للوساده في مسا ما له قمر و نجوم أصحّي صورتك من نومها و تفزّ فزّاعه أنام بحضنها لين الصباح يقول (صحّ النوم) و أفيق بوجهٍ أجمل من (صباح الخير) مطلاعه ناصر القحطاني (منك لله) هذا جزا اللي يحبّك .. منك لله و إلاّ طريقتك أجل هذي طريقه ما قلت لك هالفراق إيّاك و إيّاه و إنّي ما أطيق الجفا يعني ما أطيقه مبطين و العيد ما جبنا هداياه و لا كشفنا الصناديق العتيقه مبطين و الليل ما أشعلنا زواياه و البرد ما حنّ أناملك الرقيقه يا شبه الأزهار ياللي ما لك أشباه من وين ما جيت كنّك في حديقه لو كلّ شيٍّ الى شفناه طلناه ما و الله أصدّ عن شوفك دقيقه يوم أذكر إنّك زمان أخرست الأفواه أسجّ و أرجع بتنهيده عميقه و أقول لأدنى الخليقه واحلالاه إن الأماكن تبدّل و الخليقه ناصر القحطاني (غاده) جيت يا كثر السوالف و القصايد الدلال مبهّره لعيون غاده جيت أسامرها و أحطّ لها وسايد من شجونٍ قتلها للبرد عاده جيت أغنّي و الغلا كلّه وقايد علّ ذيك النار ما تصبح رماده جيت أبي من وصلها جروحٍ جدايد القديمه ملّها الليل و سواده مثل ما ملّت عتيقات القلايد و جيت ألبّسها من أشعاري قلاده غيرها مابي رخا وقت الشدايد و لا تبي لأحدٍ بعاشقها شهاده إن رضت ما ظنّي رضا الناس كايد و لو تضايق ضاع مفتاح السعاده كم لقيت اللي لقيت من النقايد من نصيبٍ طوّلت كبوة جواده كم قضى ليلي و أنا أطارد شرايد الدموع لحاف و الهاجس وساده لاعني التحنان ما للصبر فايد قلت أسوق الدرب يكفيني جلاده و جيت أصّب الشوق يوم الشوق زايد علّ خاطرها خذا منّه مراده و إلاّ أنا لي تالي اللقيا عوايد قهوتي من جمرها سكّر زياده ناصر القحطاني (بنت الهوى) أقبلت بنت الهوى مثل البشاره في طرف ليلٍ جلب نوره بأثرها كل نجمٍ من ضياها شبّ ناره و لا سهر معنا القمر ليلة سهرها عطرها زفّ الخبر قبل انتشاره و فلّت حجاج المسا طلعة قمرها دربي أمست فرحته ليلة نهاره تنشد غيوم النواظر عن مطرها ما سمح طرفي لحمله بانحداره كلّ عبره لأوّل الفرقا دخرها فرحة أكبر منتصر وقت انتصاره طلّة الوجه الطفولي تختصرها جادلٍ تشريفها طال انتظاره فكري و عيني و خفّاقي ديرها جت تهادى تاره و تختال تاره و الدلال ذنوب و العشق يغفرها جت تبي من الشمس ليديها سواره و من نجم الليل عقدٍ في نحرها جت لسان غرورها ينشد عباره هي درت تسع الكواكب عن خبرها جت ملاكٍ كلها عشق و طهاره جت عنودٍ لفّة الراس تعسرها حفلة ايدي مصافحتها في حراره و عيدها لا جات تسبح في شعرها بنت بدوٍ دلّلوها في الحضاره سالفة عربانها من أوّل شهرها كم طلب يدها و لا ظنّ الخساره طيّبٍ يزداد في رفضه فخرها لين روّح تفرك يمينه يساره منوته لو هو ولد عمّ و حجرها ما تبي إلا عصمة اللي باختياره ساق شبكتها الغلا و قلبه مهرها وش عليه إن سولفت عنه بغزاره بين غيدٍ صانها الرّب و سترها وش عليه إن خاطت الجرح بمهاره أذكر إنّه يوم ميلاده شكرها كنت ألّم الشوق و يزيد انتثاره كنت أسولف و أحسب إني منتظرها ما كرهتك يالصبر لولا المراره ما عرفتك يالضما لولا ثغرها ما حملتك يالهوى لولا الشطاره ما عشقتك يالغرق لولا نظرها قلت أبأبحر و الغلا أسباب الجساره و أحرجتني خرسٍ أغرقني بحرها دونها جفنٍ يغير بدون غاره ما سلمت من السيوف اللي شهرها ليتها تاخذ وفا شيخ الزياره كم لفاني ماخذٍ منها صورها بحّ صوت الوجد ما خلّصت ثاره و سبحة أشواقي نثرها اللي نثرها يوم جا للبان وقفه و استداره راحت تجر أسود الليل بسفرها ودّعت دربٍ توّعد به سماره و غضّ خفّاقي معَ غضّة بصرها ما عذَرها خاطري وقت انكساره عذَرها إن اللي سرى معها عذَرها ناصر القحطاني (تناساني) حبيبي ما كفاني في الحضور الصوت و الصوره و لا طفّت لهيب الشوق ثنتينٍ تحلاّني سقا اله ليلةٍ فيها القمر غاب و طفى نوره بعد ما سلّمك - يا نور ليلي - وجهه الثاني سقا الله يوم كان الحب غصنٍ نقطف زهوره عسى الريح اللي اومت به تنام .. و يسعد الجاني حبيبي .. علّها تكبر جروحٍ منك مغموره نصيبٍ جابني لك .. باتجاه الشمس ودّاني ذخرت أغلى شعور .. و كل خفّاقٍ و مذخوره لعينك يالجريح المستريح القاصي الداني و شلتك داخل الوجدان حملٍ لذّ لي جوره و لو أشغلتني و أشغلت بي تفكير خِلاّني أبأولّع لك الدنيا قصايد عشق منثوره وبأعزف بك نغم للحب يا قيثارة الحاني عليك عيون ناس و كل قلبٍ ضاق بشعوره تمنّتك العيون .. و جيت يا عيني تمنّاني أحبّك .. كيف ما أحبّك .. و أنا اللي لك بنى سوره على جمرٍ يدفّي بارد أشجانك من أشجاني حبيبي .. و المشاعر فيك مختاله و مغروره تدلّل .. و انت في ساحه غلاي اليوم وحداني و إذا ملّت خطاك الدرب .. مسموحه و معذوره تناساني .. دخيل الحب .. لو تقدر تناساني ناصر القحطاني (الخيزران) وش بقى يالخيزران إلاّ التثنّي للتثنّي .. ملّت النشده يميني امتحنت الشوق و الشوق امتحنّي و الحنين ازداد يا وجهة حنيني آه .. يا زبدة سنيني اللي مضنّي آه .. يا أحلى ما انكتب لي في جبيني من سكنت بصوتك العذب و سكنّي و الحياة ألوان ورديّة بعيني يا حنانٍ فيه الا يا صغر سنّي يالضما اللي ما ترك حتى يديني أكثر اللي في عذاريبك فتنّي سجّة الطفل و حضور أم الجنيني فيني طعونك .. و هي ماهيب منّي لكن أمست .. و أصبحت منّي و فيني ما دريت إنّي إلى من قمت أونّي لذّتي بك لا استلذّيت بونيني أنشد عيونك متى قد قلت حنّي كم بخلت بجرحك ..و قلت اجرحيني وش يقول اللي عشق فيك التغنّي لا حضنك السامري ضاق الهجيني يا كنيني قمت أجاهر بك و أغنّي و استحيت و قلت أردّك في كنيني أحتفل بك .. و إن سمعت أحدٍ يهنّي سقت لي زفره و تنهيده بحيني و التمست الخوف خوف من التجنّي من سبايبك .. آه لو ما انت بضنيني أدري إنّهم قالوا إنّي و قالوا إنّي و أدري إنّك لأبعد ظنوني تجيني فاتني .. لا خيّب الله فيك ظنّي آه .. يا بعده بدونك نصّ ديني التمنّي ضعف .. و إن جت للتمنّي علّها ما تبطي إلا بك سنيني و إن حيت فرقا تبي تاخذك عنّي قصّر الله عمرها بينك و بيني ما بقى يالخيزران إلا التثنّي و الوعد لا صارت الساحه يميني ناصر القحطاني (سوار الذهب) يالفارس اللي ترجّلت و حضنك الهدب يا ليتك أبطيت و الدنيا عليها السلام يوم اعتنق معصم الأمه سوار الذهب طاب التلاقي و لا أحلى منه غير الخصام ثرت و بدل ما يسيل الدم لين الركب اوميت بالغصن حتى جاك سرب الحمام همنا بموّالك اللي مثل صوت القصب يا عاجل البر و الخيره و مسك الختام الله على فعلك أثره مثل حد الحدب و الله على الكرسي أثره مثل بنت الحرام أحدٍ على أخوه و أحدٍ ضد أبوه انقلب ترسم و تحسم خرايط تحت جنح الظلام و أحدٍ رهين اتجاه الريح مع من غلب و أحدٍ على طول خلف خلاف .. ليته عدام ما يعجبه لا العجب و لا الصيام برجب كان أسفل السافلين و فجأه أعلى السنام و اللي انولد وسط فمّه ملعقة من ذهب الرّب ساتر عيوبه من سنين الفطام بس انت غير و فعولك غير .. ياللعجب من يأسنا في الحلال نظن فعلك حرام خطابة العرش مرّوا في زحام و صخب يا أشد أهمية من أهل الصخب و الزحام يا أكبر فخامة و أقوّ عزوم و أعلى رتب و أطلق زعامة و أعز جنودوأطهر نظام لا فاخروا بالدراهم و الحسب و النسب فاخر بشيٍ عجز عنه الملوك العظام معاويه و انت عيدين بحياة العرب و احنا جسد و انتم الاثنين تاج و وسام قالوا زمام أمة محمد عساه انقضب قلت الله يخلي خشوم النسا للزمام في شرقنا تنقص الثورة و حجم الغضب و يزيد رقم النصايب جنب رقم الخيام فخامة الرّيس أعيانا الرجا و التعب حتى أصغر أحلامنا ماهي على ما يرام فخامة الرّيس آخر شي عندي طلب تسمع من اللي فتح لك قلبه آخر كلام لو فيه عشرين حاكم من سوار الذهب ما كان قلنا عروبتنا عليها السلام ناصر القحطاني (المقابر) المقابر في مكانٍ تفاخر فيه روس النصايب و امتلت من عظام الناس فاضي قبوره كل شيٍ يتراجف فيه حتى الهبايب و الذهايب توارى و النصايب فخوره وقّفت بي قدم رجلي و كلّي عجايب و البكا حولي اسمع له تمّرد و ثوره لين جاء و أخجل عيونٍ تودّع حبايب مؤمنٍ جفّف الدمع بحديثٍ و سوره عن يميني بيوت السابقين الذهايب و عن يساري بيوت اللاحقين محفوره أسمع أصغر ذنوبي كنّه يصيح تايب و القدم ما نشدت بموقفه عن شعوره اذكر انه تشرّه لحظة و كان هايب قلت خلّ الطواري ما طلبتك مشوره دامها جت من الله مرحباً بالمصايب لو ثقل حمل نفس المسلم اللي صبوره جيت أشيل الجروح المشرقات العطايب طيّب الله ثرى اللي فارق العين نوره ما ركزت النصيبه و اعتلت راس شايب كود أبا أدل ذاك القبر لا جيت أزوره علّ ما تبخل بماها عليه السحايب كودها تستر أطراف النصيبه زهوره كلّ حزنٍ ملا الدنيا على القلب ذايب و انقلي يالجروح الحمل لو زاد جوره كنت أعزّي مجاريحٍ بعاد و قرايب و أترك الخاطر لعيني تجبّر كسوره تغرف الحزن و تصب العباير صبايب و إن خلص دمعها لعيون أبوي معذوره شايلٍ صورته في البال لو كان غايب ليته اللي يشيل لشخصي اليوم صوره كان لي ظنّ بصغري و لا هوب صايب أحسب إن القبور من الحياة مهجوره علّ قبره نعيم و صالحاته سبايب هي عزاي بوداع مودّعٍ جاه دوره ناصر القحطاني (إبن باز) الموادَع به من الحنظل و لون الشامه و ارتحالات الزفير و ذاريات الكنّه و الليالي كسب و آخرة المكاسب خامه و البنادم بين ضحك و بين دمع و ونّه كيف نبكي لا فقدنا شيخنا العلاّمه كيف نزعل و الصواب اللي فجعنا سنّه الكفيف المبصر الشامخ قصير القامه بشّروا به سندس الفردوس و أهل الجنّه عالمٍ يا كثر ما أبحر لأمته و أيامه و أمته به كانت لباب السما ممتنّه حالمٍ ما كانت لنفسه جميع أحلامه وش خذا منّا .. و حنّا وش خذينا منّه كم عنى للتايه اللي ما اهتدى لإسلامه كم ترك بالخلف قنطار الذهب له رنّه كم جلس يقرا نفوس العالم اللوامّه كم وقف للمستغيث اللي كبر به ظنّه مرّةٍ شفته و شفت قلوبنا قدّامه كل ما افتى عوّد الجني لماكر جنّه ما حلا حتى اعتدال الشيخ في هندامه يوم يقبل .. عطر يجهر به و عطر يكنّه زعفرانٍ باذخٍ في مشلحٍ و عمامه كنّه أطهر صبح و إلا ما أعرف وش كنّه ؟ الموادع شين .. و الشامخ قصير القامه بشّروه بعشرةٍ قد بشّروا بالجنّه ناصر القحطاني (شمر) الشمس غابت و كلٍ دوّر سراجه و الشوق جمّر .. ما أحّر الشوق لا جمّر دام اتجاهك شمال مودعك حاجه سلّم على حايل و سلّم على شمّر قدّامك الخافق اللي ينشد علاجه كنّه معلّق على برزان و مسمّر و انت تعرف يا بعد حيّي من تواجه بيضان الأفعال لا من الزمن سمّر إن ضاقوا أعنف من البحر و من أمواجه و إن راقوا أركد من الخرمان لا عمّر كم صيت بيتٍ عتق في الباب مزلاجه و كم شيخ امارة قبل تعيينه مومّر و كم حاتميٍّ تكفّي فلّة حجاجه وشلون للضيف لو عن ساعده شمّر و إن مرّ تاريخهم متلبّسٍ تاجه كم عاشقٍ كيّف و كم حاسدٍ زمّر في جوٍ أغلى على الرجلي الى داجه من ديرة السادس و من ديرة معمّر كنّه الى أهدى له البرّاق ثجّاجه طلّة غريرٍ ضحك و من الخجل حمّر توارثوا حرثه و تمتير ديباجه ركّابة الجيب من ركّابة الضمّر الودّ لا غرس بدري صعب مخراجه و الله و لا ألذّ و أحلى منه لا ثمّر أدخل على اللي تطوف البيت حجاجه من ناقصٍ عند مدح الغير يتذمّر و المدح لو كان في الرديان للصاجه و يقال عمّر بلد بالعون ما عمّر و الذم لو زاد في الطيّب تولاجه لا أحرق و لا أغرق و لا عمّر و لا دمّر ناصر القحطاني (آخر زمن) السوالف يا جنيني طاولنّي و العرب تالي نسوا حسن الضيافه و الخوارج من تدنّي في تدنّي و البلد مليان تهريج و طرافه و الحياة أكبر من اللي مسّ ظنّي و أوسع من أحلام الأنذال التوافه و القصايد صنعتني و الفن فنّي و القوافل ما تحسب إلا المسافه ليه أعبّر غادياتٍ عارضنّي و صكّ شحاذٍ على باب الصحافه ما خذيتك يا جنيني بالتبنّي و لا غذيتك غير حسٍ له رهافه حط في بالك قبل ما تحتضنّي ما انت باللي ينتهقوى باختطافه لك علي ما دمت منّك و انت منّي ما تمرّك غير الأنسام بلطافه و إن دخل بك في ظلام الليل جنّي لا تخافه لا تخافه لا تخافه كلبّوها سورتين و ترجهنّي يطلع المعتوه و يجيك اعترافه و الله إنّي و و الله إنّي و و الله إنّي من رجالٍ في ملاقاهم حسافه حقّهم ما ياصله راع التمنّي و انتصافتهم ماهيب أي انتصافه أتفيّا في ظلال الغصن كنّي شايبٍ رحّال شاف اللي يعافه قلت خلّوني على ليلاي أغنّي و أزعجوا موالّي دعاة السخافه عصبة الخنّاس عشّاق التجنّي ملحقين أعمارهم ذل و كلافه وش يبون الخاربين بقلع سنّي آفةٍ لا بارك الله بأيّة آفه لا سلام .. و كل نذل يحلّ عنّي ما بعد ملّت يديّ من النظافه و السفيه اللي من العام متعنّي ما ترك حتى النعامه و الزرافه إن مدح و إن سبّ و الله ما شحنّي اعتبرته تافه و ستين تافه و القصايد صنعتني و الفن فنّي و البلد مليان تهريج و طرافه ناصر القحطاني (تهليله وتكبيره) تطمّن يا قصيدي مالك إلا العزّ و النوماس من أيام النّبي و الشّر ما تسكت مزاميره تجمّلني مثل صفرا الى لزّت تجيب الكاس و أنا لك وجه عزٍّ طبّق العزّ بحذافيره لك الله لا جروحٍ تنزف و لا خاطرٍ منحاس هذولا ما لهم غير الشتيمة في البلد سيره هذولا مجدهم زايف .. هذولا عرقهم دسّاس هذولا حوّلوا ضحكة بياض الطرس تكشيره هذولا لو أقول إن البحور تكذّب الغطّاس عطى كلٍ شعيب و ضاق جوّه .. يالله الخيره سماسرةٍ على روس ألسنتهم فلسفه و إفلاس يا شين المفلس اللي لجّ خلق الله بتنظيره أنا رغم أنفهم راع البياض المرهف الحسّاس و أنا اللي دلّته تسوى لها عشرين تبهيره سقى الله ديرةٍ كانت زمان أقرب من الأنفاس غدت من ديرةٍ بأنفاس لأنفاسٍ بلا ديره سقى الله صرخةٍ غنّت صباح و صحّت لها ناس على فقدان فردوسٍ تغنّينا بأساطيره سقى الله يوم ذبّينا مراقيبٍ ورا مكناس وقف سلمان بن عبد العزيز و لا وقف غيره و رحت أصدح بصوتي و الزمن خلفي يدّق أجراس و أفضفض للتراب اللي يفضفض لي بأساريره و أطوّل قامتي و أوقّف التاريخ راس براس و أقول إن ماتوا أهل المجد ما ماتوا مداويره عسى الله ما يبارك في القلم لا راود القرطاس و هو في داخله حقدٍ دفين و حسدٍ و غيره تعلّق يا قصيدي بالنجوم و شلّة الخنّاس عليها من هل التوحيد (تهليله و تكبيره) و أنا ذاك الخوي قل : (يالله الخير) و لك النوماس و الى خان الخوي بس الخوي قل : (يالله الخيره) ناصر القحطاني (عروس) خويّة درب عمري ما خذاني دونها النسيان و أنا يا أهل الملامه ما رغبت العيش وحداني أبي لي مهرةٍ ما عسفت صغيره و بنت حصان أبوها اللي يفّك المشكلة و يزبّن الجاني و أخوها لا تعزوى باسمها فزّوا له العربان يحقّ لها الفخر في قولة آل فلان جدّاني أبيها في بحر عشرين لا زودٍ و لا نقصان أبيها أقصر طويلة و الوصوف أشكال و ألواني أبي الجبهه كما الصبح و كما القوس أسود الحجان و أبيها ناعسات و نرجسيّة سود الأعياني أبي رمشٍ كما ريشٍ يغطّي الثلج في الأوجان و أبي جفنٍ يشيل الرمش طربانٍ و كسلاني و أبي خدٍ مثل وردٍ تنمى في طرف بستان و أبي خشمٍ قصير و مثل حدّ السيف شاماني أبي البسمه كما البرق و ثناياها كما المرجان و شفاها جمرتين و فمّها خاتم سليماني أبي شعرٍ كما ذيل الفرس لا طبّت الميدان أو الشلال لا من بات ليله بين الأمتاني أبي جيدٍ سواة ابريق فضه ناتقٍ مليان و صدرٍ كنّه مرايه عليها طلع رمانّي أبي ظهرٍ كما الجدول و قدٍ مثل غصن البان و خصرٍ مثل مجدول العنان و جسم روياني أبيها نابية ردفٍ و بطن ضامرٍ جوعان أبيها مدمجة ساق و قدمها لسان ثعباني أبيها بنت عزٍ من رغدها ينعم الفسقان أبي الرقه و أبي الدقه لها بأطرافها شاني أبي المشيَه كما اللي طالع من المعركه كسبان و أبيها ترش مع خطواتها مسكٍ و ريحاني أبي صوتٍ الى منّي سمعته كنّ فيه ألحان يدغدغ مسمعي و يثير كل السحر فأشجاني أبيها حب و إخلاص و هواجيس و فرح و أحزان أبيها مثل ما دكتور أهالي العشق وصّاني أبيها لوحةٍ ما صوّرتها ريشة الفنان أبيها جوهره ما جابها قاصي و لا داني أبيها تنتصر لي من زمانٍ حطّني نيشان و تبشر بالغلا اللي ما لفا به واحدٍ ثاني مهرها قلبٍ و شعرٍ يهزّ القلب و الوجدان و ألبسّها القصيد و تصبح أوزاني و قيفاني أبي اللي فات و اللي فات صعب و من لقى العنوان يردّ العلم و إلا أفضّل أبقى أعيش وحداني ناصر القحطاني (سالفة بدو) طول النهار أضمّد جروح غيري و يصيح جرحي لا ضويت آخر الليل يا ما المسا صبّ السهر في نظيري و خذا معَ لمّة هجوسي تعاليل و خلف العيون اللي تراقب مسيري أحيت مزون العين قاع المناديل النار فيها من مواقد ضميري و الدرب فيه من الرموش المضاليل أشيل حلمٍ حاس كسره مريري كم صكّت اليمنى اختها ترثي الحيل انشبت في بعض المحابيل طيري واطيري اللي عذّبته المحابيل كم صارت العشرة وسيلة عشيري و عدّيت مشواري معه (كذبة إبريل) خلاص دامه ضاق حتى شويري باللي تجبين اسرعي يا مقابيل عرفت كيف أكون بعيون غيري من سالفة بدوٍ على ضوّهم ليل ناصر القحطاني (يابوي) يا بوي أنا من ضوّك أشعلت ضوّي و الله ما تفنى و لو كنت فاني شربت علمك في مراحل نموّي حتى قوى عودي و غنّا لساني تذكر ضناك الحالم اللي ينوّي صار أكبر من أيّة نوايا و أماني يا ليت عمرك طوّل و عشت جوّي و تشوف كيف أنجبت لك عمر ثاني عشقٍ على حبل الوريد متلوّي لهواية التحليق وحدي خذاني ما ضقت من باكر و أنا أقول توّي هذا زمان الغير و إلا زماني ودّي تحدّثه النجوم بعلوّي دام الثرى يحلم بحزّة طماني من لا دخل بين الرجال متقوّي ما ظنتي يصهل صهيل الحصاني و اللي على جال الضلوع متطوّي تباشري بمفارقه يالمحاني و الله لأسوّي ثم أسوّي و أسوّي و إلا فلا باسمي فلان الفلاني ماتوا عداي و صار وقتي عدوّي لابو دقايق ساعته و الثواني أنا على ذاك المكان متروّي بس الوعد لا قلت هذا مكاني ناصر القحطاني (أغلى العرب) وين انت يا أغلى العرب ناوي توّ القمر ما سرى توّه ما شفت يا المترف الراوي وشلون دنياي محلوّه ليلي بدونك وش يساوي جيت و حبيبك صفا جوّه و إن خفت من حاسدٍ غاوي يحرسك مولاك من سوّه كانك على حسرتي قاوي ما للزمن طيب و مروّه اخترتك لدربي مخاوي و ماني موصّيك بالخوّه تجرح يا مملوح و تداوي فديتك اللي تبي سوّه و إن صرت بعدين ما تاوي علّك حبيبي على القوّه ناصر القحطاني 
 
|
|
07-21-2010
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
قصايد ناصرالقحطاني
تابع قصايد ناصر القحطاني
(طلوع الشمس) هذا انت و إلا طلوع الشمس يا حيّ هالنور و اليمّه عليك يا حمس قلبي حمس و يا وجد عيني على اللمّه أبطيت و الوقت من قبل أمس ما عاد يخجل على دمّه و أقبلت للخاطر اللي عمس تهدي له العيد و تضمّه ما يطمس الهم كله طمس كود الغلا اللي على الذمّه يا ورد يثّر عليه اللمس طول العمر ليت من شمّه احتجت حبّ و صباح و همس و وردّتني صافي الجمّه و ارتاح كفّي بذيك الخمس راحه رضيعٍ بحضن أمّه ناصر القحطاني (كلمة راس) العين من حمل السهر متكيّده و إلا إنت ما شفتك تشكّى يا عنيد أسرفت بي ما فيه شور تأيّده بطنك من الجمر و ظهرك من الجليد يا خوفتي دام الشفوف محيّده يوم من الأيام تصبح من حديد كم كنت جامح و البروق مسيّده و تسوق ركبك للنزول و للشديد و أصبحت عودٍ في ظهره زويّده تحويشته صفر و طموحاته نشيد أبطيت ما أخطيت و خطاك أتصيّده على كثر ما مرّ من عاتق فريد حتى رسايل عالمٍ متقيّده من خلف سور قصور هارون الرشيد العام في عنق العنود قليّده و اليوم يا رخص الذهب في كل جيد لو كنت عبدٍ يستحي من سيّده ما شفتك أصلاً يا موحدّني وحيد ذيك النفوس اللي تقول معيّده تفداك لو هي من جديدٍ في جديد اللي بلا دين و سلوم تقيّده لبسه كفن لا تحسب إنه ثوب عيد سلّم على اللي لو زمانه بيّده بأقصى ضلوعه شي لا يمكن يبيد لو راودته الباشه المتسيّده تلقاه ما يستنكر العيش الزهيد و إلفت نظر بنت الرجال الجيّده من واحدٍ لا يستزيد و لا يزيد يوم الفوايد ما استفاد وحيّده و إن غاب مهما غاب ما كنّه فقيد وشلون تفرق سيّده من سيّده إلا بعد فرق الشقيّ من السعيد الطيّبات قريّبه و بعيّده و إن شانت الأيام ما رحنا بعيد بيوتنا تحت الشموس مشيّده و أرزاقنا بيدين خلاّق العبيد و الشعر فيه معلّقة و قصيّده بس المصيبه كان ما سر القصيد يرجع مثل بنت الرجال الجيّده لا ساقها الحظ الرّدي يمّ البليد ناصر القحطاني (حليب أمي) وش جابها في يديك تشيلها يمّي جمّع مناقيدك اللي جيت تنثّرها صحيح أنا أعشق و صار العشق في دمّي لكن سوالفك نقص .. و لا تكثّرها ما خِلْقَتْ اللي تنسيني حليب أمّي أبيع كل العذارى لأجل خاطرها اللي فرحها اشترت به حزني و غمّي ترجي ضناها عسى الله ما يخسّرها تفرش طريقي دعاوي بعثرت همّي يدينها للسما و يهل ناظرها أبوس يدها و أكّف العبره بكمّي كل العظايم لها يالله ما أصغرها و الجادل اللي خذت روحي و أنا أسمّي تستاهل اللي تبقّى من مشاعرها قلت لهواها فدتك جروح يا عمّي جهنّمك جنّةٍ تنعش سعايرها انشودةٍ ما روى ترديدها فمّي و لا روت من غراميّات شاعرها لعلّها قبل أقول لقصتي تمّي يوم العزا تختم القصه عبايرها ناصر القحطاني (غازي) الأبيات تحبي لك .. و الثنا يمشي على معكاز و الأرض تدور .. و المهجر يذكّرني بمركازي مكانٍ في زمانٍ عزّ بك .. ما أغلاه من مركاز و أنا في مجلسٍ نهجه و نهج العزّ متوازي صغيرٍ .. كل ما صدّت عيون .. أقرب من المعناز سواليف الضيوف تدور و عيوني لمعنازي ألا يا كثر أصابعهم الى شافوك بالتلفاز و عشقٍ مثل زخّات المطر مجنون و اعجازي أفكّر من يكون اللي على أصوات الضماير حاز من اللي ما يبي غير الجزا من ربٍ يجازي من اللي في فراش الموت ابوي يردّده بايجاز من اللي يفرشون لسيرته سجّاد شيرازي تخيّلتك شبيه السندباد .. أثرك شبيه الباز دخلت الذاكره و القلب يا أوّل و أصعب ألغازي يا غازي .. و الله انها ما تضيق إلا على المعتاز و أنا و أمثالي من الناس محتاجين كم غازي عرفتك .. مزنٍ يزلزل زمانٍ كله استفزاز و لو ما للزمن زلزال زادت نزوة النازي قريتك .. يوم خلّيت الورق بأحلى الغرق يمتاز يفزّع له ميّة فارس .. و تحتضنه ميّة جازي سمعتك .. يوم صحت و قمت أباري صيحتك منحاز و أردّد : نجد نجدي و الحجاز – و ربّي – حجازي أعزّك يا عزيزٍ عزّك الله و انت بين عزاز معزّة من زعامة عزمها مدري وش توازي تفاصيلك .. غزت سجّادتي .. و أصبح دعاي أجواز محاصيلك .. ملت زوادّتي .. و انجازك انجازي من أول ما يجوز الغزو .. قلت : يجوز قالوا : جاز كم أرضٍ ترتجيه ان كان شروى غازي الغازي يخلّدك الزمن .. يا صورةٍ غرّد بها البرواز مثل ما خلّد التاريخ ابن حيّان و الرازي بعيد من المواجع و انحياز اليعربي لا انحاز أبأقول لعدّويني قبل ما أقول لعزازي أنا من أمةٍ في الماضي لها صهلله و انجاز و أنا من أمةٍ في تالي الوقت انجبت غازي ناصر القحطاني (سالفة عمري) مسا الخيرات وإن طال البطا يالمنزل المهجور ترى ما ابطا بي الا حالةٍ مثلك يقدرها إذا عندك عتب لا مانع من معاتب المذكور واذا عز الرضا تفداك الأعذار ومقابرها أنا اللي جيت لك و الريح تعوي و الشتا مسعور ولا به من دفا و المربعانية بأواخرها تغيّر و انطبع دربك بلون المسك والكافور وهذي رعشة كفوفي ولابه من يدثّرها بعد ما كنت أجي بابك بدستور و بلا دستور و لا أدري إلا وذيك الدرفه اليمنى على آخرها طموحي عارضته اللي معاها كل شيء يبور وجاء كسر الطموح أهون علي من كسر خاطرها سنة ما أقبل نذير الشيب كانت بأوّل الطابور وكنت أحلامها ذيك السنه و أوّل سرايرها لقت قدامّها فوضى و قلب وشاعر و جمهور و جات ورتبتني من جديد و صرت شاعرها بقييت أسري لها لا همّني وحشه ولا ديجور أشيل أحلامنا تحت النجوم وهي تفسّرها سقى الله يوم جابت لي قبل يومين من عاشور هذاك العسجد اللي جابه الله من عشايرها غلاها كان تحويشة عمر بشعور فوق شعور إلين اكتظّت الأشواق و ألهاني تكاثرها ربت ماهي تحت ريش النعام و في بلاط قصور و لكن لا ترف له قيمه إلا تحت أوامرها يحملن أمّهات البيض تسع شهور تسع شهور على رجوى بشايرها و لا لاحت بشايرها تقل بدرٍ و لا بأيّات بدر تقول بدر بدور ولا بأيات بدر بدور.. يعني ما إنت خابرها ؟! لو استقصوك عنها ما إنت محتاج لشهادة زور تحت سقفك سحايب ملحها و أمواج سكرّها ما أرّق المتحف اللي من ورى ضلوعك فدتك الدور و أنا ما أقوى نظر ما فيه بعد غياب ناظرها حديقة بيت أهلها .. سورها العالي .. حمام السور زخارف بابها .. شبّاك غرفتها .. ستايرها ورق جدرانها .. سجّادها .. تقسيمة الديكور خزاينها .. هداياها .. رسايلها .. خواطرها تحفها .. مزهريّتها .. قصصها .. شِعرها المكسور صورها .. مكتبتها .. أقلامها لمّة دفاترها زمام السيف .. شال الليل .. حنّا الكف .. كحل الحور حلقها .. عطرها .. فستانها الأبيض .. جواهرها مرايتها .. فصوص الساعة البيضا أمّ خمس سيور خواتمها .. قلايد جيدها .. نقشات أساورها ملابسها .. بروق ألوانها .. دولابها الممطور من أزرقها الى أحمرها الى أخضرهاالى أصفرها نسانيس الهوى اللي ترتشف يشمومه المنثور صخيفات المناديل اللي احتضنت عبايرها مصابيح المكان اللي خذا منه النهار النور سنون أمشاطها اللي ما نست عشرة ظفايرها بطاقاتٍ يطرزّها صغارٍ يحملون زهور رحيل الدبله اللي ما تهنّت في خناصرها زوايا كنّها بلور في بلور في بلور مسا رزنامةٍ غاب الحرير اللي يغيّرها وش أقول ليتاماها الكثير الممتلين كسور و أنا أشياها تحاصرني و أحسب إنّي محاصرها بكيت و صارت الدنيا قفص و استوحش العصفور ضحكت و ملّت شبوك القفص من كذب طايرها عرفت شلون الأرض تدور و أيام الزمان تدور و الأعيان إن صفت كيف ومتى تذبح محاجرها و متى تصير القبور بيوت و تصير البيوت قبور و كيف الذكريات يذوب ماضيها بحاضرها على الله .. و انت أبيك المتحف اللي للعرب معذور إذا جتك العيون و صدّت أبوابك نواظرها تمر أجيال و تصدّر سواليف و تعيش عصور و تروي سالفة عمري من أولها لأخرها ناصر القحطاني (رساله إلى الجيل القادم) يعني ما غير الجندي اللي هزّه الشوق و رمى غنّا على نغمات " يا عصفور وينك مختبي" قنّاص ابن قنّاص .. قتل النفس عنده شرب ماء ما دام قنص الصامدين ألذْ من قنص الظّبي يعني ما غير الطفل (محمد الدره) ذاك اللي ورا أبوه احتمى كم من نعش ملفوف بالبيرق و بأطراف العبي ما احنا لنا حمسين عام نفكّر نصون الحمى كنّ العروبه في دم المستعربين أي أجنبي حنّا ولفنا هالرصاص اللي بالأحضان ارتمى عقب الحمام اللي ولفنا في سمى مسرى النبي حنّا على بير السلام اللي ذبحنا بالظمى كل أغبيانا يحلفون إن الزمن هذا غبي داوود هذي نجمته تخطب عشاشيق خصما لو كان يحرقها مية مليون مخلص يعربي كم غيّر الشاشه بعد ما ملّ من شوف الدماء متبلّدٍ .. قال ايش قال اهتّز من موتة صبي عقول يا مال الغبا .. و عيون يا مال العمى و أزوال يا مال المرض .. و أموال يا مال السبي الله يا حلمٍ نلوكه كثر ما العايل زما ما قوّم الدوله و خلاّ الحلم يولد و يحبي إلا دلال المغربي يوم أرخصت غصنٍ نمى ياهل العزاوي ما دريتوا من دلال المغربي هذي شجرةٍ ثابتة و فروعها وسط السما قالت قبل توديعنا : يا أرضي من الروح اشربي يالله ما دام آمال أهلنا فوق طاولة زعماء انك تقدينا الصراط المستقيم اللي النبي و إن كان طالت و العصافير أسرف بها اللي رمى يالله بجيلٍ كلّه يشابه دلال المغربي ناصر القحطاني (أحمد ياسين) يا حلاوة صرختك و الحّر تكفيه الإشاره ما انت في غزه وحيد .. إلا معك عشرين دوله يا نهارٍ كل ماله يسقي الليل المراره ما عليك من الفوازير .. الفوازير محلوله البطل يا شيخ ياسين ان شكى التاريخ عاره قوّم الدنيا و طّش بها وراه و قال قوله و البطولة تارةٍ تشرق ضحى و تغيب تاره يا بطل علّمتنا كيف أبجديات البطوله انت لامن قلت : لا صدّيت لك خمسين غاره و انت لا قلت : ايه تشحن لك مية صوله و جوله كل وسمٍ بجلدك الصّوان طيّر له شراره يا شموخٍ تنحني له هامة الدنيا الخجوله و إن حنت ظهرك كرابيجٍ تعّز أسخف حضاره ما تذّلك و انت شيخٍ ممتلي دين و رجوله بس حدثّني حديث الما لعشاق الطهاره عن بلادٍ صار للجغرافيا فيها ألف صوله عن صمود مخيّمات تنشد الفرعه زياره عن رجالٍ لا خضوع و لا نفاق و لا عموله عن جرادٍ سبّب الرعب اسمه (أطفال الحجاره) القدر بالحرب عوّضهم مراجيح الطفوله عن (عروسٍ) فجّرت عشرينها لعيون حاره و ذكروا سكّانها أيامٍ من الخنسا وخوله عن هذيك القبّه آخر حلمنا و أول مناره بيلسانٍ .. عزّه الله و احتضن مسرى رسوله عن حماس الرايح اللي كل ما ذعذع سماره لان وجه القاع و اهتز البحر عرضه و طوله عن زغاريد البنادق .. هي تظاهر بالغزاره عن عصافير البيادر .. هي تحلّق بالسهوله عن شبابيك اليد اللي حرّمت لمس الستاره عن رغيفٍ من صباح الله قليل اللي ينوله عن سما الموّال و أرض الدبكه و رقص العباره و التفاصيل الكثير و خطوة الذهن العجوله عن يسر مدري عسر مدري كسر مدري جباره هدنةٍ لعيون عيدٍ ما درينا عن حلوله جيلنا ملّ الجرايد ما لقى فيها بشاره ما وعينا إلا على النكسه و موّال الخساره نحسب اللي وسط بال أجدادنا نقدر نطوله يا حرام .. الحر .. أجل ما عاد تكفيه الإشاره وش ورا خمسين عامٍ بعثرت عشرين دوله؟ ناصر القحطاني (بنات الريح) تعلمنا الفروسيّه .. و شاقتنا بنات الريح الى جت ما تقول إلا خلقها الله مختاله لها عشقٍ قديم يقوم فعيون العرب و يطيح و لها عزٍ نهار السبق كلٍ ودّه يناله رماحٍ تعبر المضمار بين الصوت و التلويح حشا ما كنها إلا كل رمح يسابق ظلاله إلى بان المذهّب من يبين بحزّة الترجيح و أيادي مَن ؟ من أهل الخيل بعد شوّي تشتاله ماهيب أيّه فرس من كثّروا في فوزها الترشيح و حصانٍ .. من نشد عنّه لقاه من أطيب سلاله إلى مرّت نواصيها المنصّه و الجموع تصيح خطير يطوّح الرجال بشماغه و بعقاله وش أنعم بالبلد عقب الهجاد و كثرة التصبيح سوى حرٍ وراه الصافنات تنومس رجاله على صهواتها كمّل معزّي دعوة التصحيح معا قطعة حرارٍ من هل التوحيد خياله و أنا أحب الفروسيّه و تغريني بنات الريح و أشوف الخيل جات و في ظهور الخيل خياله ناصر القحطاني (قصر الحمرا) على الحمرا السلام و كل حيٍ يذكر أمجاده و أنا تاريخي أمجاد و براهيني مجوّدها قصيدة شعرنا الشعبي عروس بتاج و قلاده سفيرة لهجةٍ طلّت على الدنيا قصايدها على البال ابن زيدون و غراميات ولاّده و سواليفٍ لابن رشد أتذكّرها و أرددّها يا هالقصر العظيم اللي هل التصوير ترتاده يا تحفةٍ غير أهلها مستحيل أحدٍ يشيّدها يا تنهيد العجوز و ضحكة المولود بمهاده يا نفحه عاطره لبنيةٍ ما زمّ ناهدها يا جرحٍ ما على بال الزمان المقفي ضماده لفيتك و انت بأرضٍ من غلاها ما اتباعدها على الروضه وقفت و وقفتي ماهي على العاده ومن باب الشريعه ساحه الريحان قاصدها مشيت و جيت في بهو الأسود أتذّكر الساده و ألبّي صوت جنّات العريف اللي مواعدها الأبراج .. الدهاليز .. الحصون .. السقف و عماده حجا الجدران .. نقش أقواسها .. مرمر قلايدها خرير الماء على الحوض الله الله ما أعذب انشاده صور عشر الرجال تقرّب السجه و تبعدها أجي ديوان ابو الحجاج مابه غير مقعاده و لا حصّلت لك من حاشيته إلا مساندها مليت الكف بترابٍ شرد ذهني مع أسياده و تلّت دمعتي تنهيدةٍ كنت أتنهّدها أنا أدري بك حزينٍ يعربّي طوّل حداده على خير أمةٍ صفحاتها بيضٍ تساودها و انا ما جيت سايح جيتك بمصحف و سجاده من حجاز أكرم الأكرام و أشرفها و سيّدها أنا المتغرّب اللي نادته قطعه من بلاده صويبٍ شاقته حمر القصور و جاء يشاهدها صوابه فيه من غرناطه و فيها من أجداده رجالٍ كل واحد قوّم الدنيا و قعّدها رجالٍ جغرفوا شعث الفجوج و جات منقاده رجالٍ غيّروا تاريخ الأمصار و عقايدها رجالٍ ما أشغلتهم عن مناويهم و لا غاده و لا حتى قصورٍ ماسها يحضن زبرجدها خذوها من هنا حتى ورا النهرين و زياده و ساقوا عقربيّات صهيل الخيل راعدها زمنهم كان صعب و كانت الأرقاب سدّاده و الانفس تنجلب و الحدب تلقى من يجرّدها لك الله كانت الدنيا لهم ساحات و رياده متى نتبع خطاويهم و كلمتنا نوحدّها متى بس نتصافى و السحاب يدّن رعادّه متى أحلام الربيع المبتعد نقدر نجسّدها متى .. مدري متى .. لكن مصير الحق نعتاده ما دام جباهنا ما فارقت روضة مساجدها ناصر القحطاني (ارهابي) نحمد اللي بيّن الحقد الدفين الغابي و أعتق أقنعة الوجيه اللي تقاربناها أول المكروه سلبي و آخرته إيجابي خير الأرض القبله و خير الدروس أقساها يوم وصلت للحمى ما أرخص من العنابي من يعيش بدون مذهب .. عيشته ينعاها جدّي اعرابي و أنا اعرابي و ابوي اعرابي و أقرب مصيبه على الأعراب قرب حماها كثّروا فيك الحكي يالمسلك الوهّابي كلمّا زمزم شربنا شربةٍ من ماها يزعمون إنك تصدّر كل يوم إرهابي الله يكرّم مشايخنا و طيب لحاها لدّوا أهل الموبقات السبع وسط كتابي و طلبوا من بيّناته كلمتين انساها ساقوا أصحابي هناك و شككّوا بأحبابي و أوصوا بتقطيع جسم أمٍ توارثناها و أنكروا في بنت عمّي حفظها جلبابي يحسبون المحصنات تهيم في دنياها و طار في عجّتهم الوجه الكريه الهابي ما يغت من الدبش عز الله إلا أرداها و الكروش أربابها وسط البنوك ترابي و العروش أكثر قضيّه ماخذه مجراها و الخرايط تصغر أكثر مثل صغر ثيابي ايه ما كن الفجوج الجرد مترّناها يا وجودي كل ما صليّت في محرابي و افتكرت أمّه حميد و حلمها و أقصاها وجد عودٍ مرّ بالشارع و هو متصابي و لا درى إلا و العماير معطيته أعلاها إن نجا قالوا عليه الظالمين إرهابي و إن رحل معلوم حنّا اللي تحمّلناها ناصر القحطاني (الفتح) كانوا أهل الديره جياع و عرايا كانت الديره مكشرةٍ حزينه من جهاله .. في تعصّب .. في خطايا في مغازي .. في عداوة .. في ضغينه و البطل منّاك .. في صدره خفايا ينتخي باللي معاه من ربعينه قال يا ربعي على الله الشكايا طالت و طوّل على الديّان دينه للنوى لوعة .. و للصامل مزايا للدجا مسرى .. و للصحرا سفينه ورثنا و أمجاد أهالينا سبايا ما يعين الله سوى اللي يستعينه قالوا : أبشر و العمار لها فدايا ما نبات .. و نجد فالظلما سجينه حوّلوا فوق أربعين من المطايا و الثلاثين البنادق فوق الخزينه كل ما مرّوا على دور و قرايا كفّ ابن معشوق متعدّي جبينه شيخهم ما عدّهم مثل الرعايا ياخذ الشورى و شوره في كنينه ما طلع مطلاع طلاّع الثنايا مطلعٍ ما جابت أخباره جهينه جا على الصّرار .. و اسودّت نوايا و التفت له من ورا (الجهراء) ضنينه قال : عوّد .. قال : أنا ويّا المنايا و المربّع واصلينه واصلينه استزاد من الحسا فزعه حمايا مرّوا (الصمّان) ما ابتلّت شفايا منتشينٍ برمضان و صايمينه و ردّوها (ابو جفان) و هن ضمايا عيّدوا و العيد الآخر محترينه بيّن ( العارض) و هو ماله حلايا وش يسوي من غلب صبره حنينه قال ابو تركي : موصّيكم وصايا داركم وش بين ما طاكم و بينه حط في ضلع الشقيب اولى السرايا ثم على الشمسيّه و حرّك بحينه ساريٍ برجال و كبودٍ ملايا سبعة سباعٍ مع المسرى ذهينه مرّوا (جويسر) و لجّن له صبايا و اطمروا للبيت الآخر في سكينه صان أهاليه .. البعيد من الدنايا و أرسل لربعٍ على قلبه و دينه ساقوا الأرواح للعزوه هدايا و استهلّوا كل شيٍ بايعينه بعدها و (الحائط) أشبه بالخلايا و الفشق و الشمع كلٍ قال وينه حسّبوا في بيت ابن سالم ضحايا و أثر ما وسط الفراش إلا خدينه جمّعوا من جمّعوا وسط الزوايا بس لين تسلّ شعره من عجينه و فتحوا في الجدر دربٍ للبقايا عالمٍ بالليل الأسود مستهينه للتمر و القهوه انفتحت شهايا و انعسوا .. و الذيب كيف تنام عينه المسا ودّعهم يدّق التحايا و كل رجّالٍ تفاول ركعتينه يرقبون الصبح .. و المصمك تغايا وش ورا جدرانه الحمر المكينه خوخة الحصن .. و دهاليز .. و خبايا و أربع أبراجٍ شواهيقٍ حصينه يوم فتح الباب يا طيب السوايا ما درى عجلان منهو في يدينه انهزم و معزّي كفوفه سخايا و المفوّه جنبه .. الله لا يهينه زجّ له شلفا بغاها للحنايا و أصبحت في الباب ذكرى من يمينه و المنادي صوّت بحل القضايا شيخنا "عبد العزيز" الله يعينه و الرياض إن قالها معطي العطايا يجعل السور القديم أعظم مدينه انطلق منها معزّي للنحايا صاروا أهل الديره من أغنى البرايا و صارت الديره مثل درّه ثمينه لا جهاله .. لا تعصّب .. لا خطايا لا مغازي .. لا عداوة .. لا ضغينه ناصر القحطاني (الحدود) مع كل نسمه يا وطنّا تحيّه و الله نحبك حب ما فيه قدّه يا تاجنا اللي روسنا به قويّه يا نبضنا اللي دمّنا دون حدّه نستاهلك نورٍ ملا العين ضيّه و نبنيك صرحٍ ما انخلق من يهدّه لو عنك نحّتنا الليالي نحيّه جيناك كلٍ زود شوقه يحدّه كلّك دفا يا حضن نجد العذيّه هي بس نجد اللي تزّف المودّه ؟ شف ثغر حايل شف هوا أبها البهيّه شف غرّة الدمام شف كف جدّه شف بيرقك و البرق و السامريّه مجدٍ يلوح و لوحةٍ مستجدّه شف حكمة الراعي و صدق الرعيّه و الخير مقبل و الضغاين مصدّه بحبوحةٍ من سلسبيلك هنيّه يفرق بها التاريخ هزله و جدّه يكفيك بيت الله و منزل نبيّه و شرعٍ من كتاب الولي نستمدّه أطعمك من جوع معبود البريّه و أمنّك من خوف و فجيعه و شدّه النفط من قبله يدينا ثريّه من ينشد التاريخ يقنع بردّه حنّا الوفا حنّا الكرم و الحميّه حنّا هل التوحيد صدقٍ نعدّه قربك و بعدك يا وطنّا قضيّه و أنا من اللي قصّروا فيك مدّه مناخك لحافي و رمضاك فيّه و أقسى تضاريسك فراش و مخدّه يا كم نشدت و رد ظنّي عليّه عودٍ يَمَال الجنه أذكر مردّه كان يحكي لي عن زمانه و غيّه و يقول قلبك يا أبيض القلب لدّه أيامكم يا بوك خضرٍ نديّه ما عشتوا أيام الشقا و المكدّه كنّا نمر الصايبه و الخطيّه نزايعٍ ما بين روحه و ردّه كنّا الى من دارت الشاذليّه كلٍ يدوّر شرب فنجال ضدّه كنّا نسوق الروح يم المنيّه لأجل الرغيف اللي ضرينا بمدّه و اللي خذينا الصبح يوخذ عشيّه و لا نمسي إلا عقب ما نستردّه نسمع من الهودج صياح الصبيّه أم الجديل اللي لها من يكدّه تنخى و نخوتها شبب كل هيّه و تمنّي الصنديد باللي يودّه لا نشف رمح و لا استراحت مطيّه و لا تركنا سهلةٍ مجرهدّه و اليوم أمان و شمس عزٍ جليّه و الدار بين المبغضه و المودّه بقى يوصّيني عليها و صيّه لين جرحتني دمعته فوق خدّه قلت اذكر الله و الحدود محميّه ورث الفطين اللي حفظ ورث جدّه حنّا لها ما دامت الروس حيّه حنّا لها لو بيّح الموت سدّه أي و الله طوال اليدين معصيّه و أقصر يد اللي تهقويه يدّه لعّل مالي غير داري هويّه الورده اللي بالحشا مستبدّه من يوم أنا طفلٍ عظامه طريّه و أنا أرخي الحلم الطفولي و أشدّه صغير ألوّح بالعلم في يديّه حتى (نشيد بلادي) أمشي و أردّه و الى لمحت البدلة العسكريّه أقبض يدي و أرفع بهامي و أمدّه و اليوم أغنّي للوطن سامريّه و الروح تارك علمها دون حدّه ناصر القحطاني (النسا) النسا روح المسا والليل لو فكر يبات - كان مافيه اغنيات - و كان ماله ذكريات وكان مافينا عظيم و ما لامانينا حليف - و ما بنا قلب وليف - ولا لنا قصد شريف النسا نصف الحياة - الا النسا كل الحياة -اه يا اسرار الخوات -اه يا احلام البنات اه ياالطيش الطفولي -اه يالحزن الشفيف - اه يالعشق العفيف - اه يالجنس اللطيف علمن حتى المرايا - والشبابيك اللغات - والرسايل والدوات - صارت اعذب مفردات كم بكن وانكف مبصر - و ضحكن وابصر كفيف - و رمشن واهتز سيف - و همسن وامتد ريف كم غدن لاخوانهن عزوة صناديد عصاة - بين صفق المرهفات - و بين ضبح العاديات طاحت اشناب و كراسي - وانطلق دمع و نزيف - و اعتلى الخف المنيف - و المقابر تستضيف النسا ضلع عوج لولاه كل العدل مالهن عنا فوات ومالنا عنهن غنات تبرق الدنيا علي يديهن ويغرين القنيف نطمع بتكريم ضيف ونوقف بيوم عصيف النسا بحر على موجه منايا وامنيات والنسا مركب نجاة نسال الله الثبات هن لباس وهن فراش وهن معاش وهن رغيف ان فتك جوع مخيف وان حدا الرجال حيف النسا حتى شراب الجنه العذب الفرات تحت ماطا الامهات يالهن من مكرمات كل ماعود من الكد اقبل ابن ادم ضعيف له ورا البيبان طيف مثل نسناس المصيف في بلادي يحسبون ان النسا متخلفات في المسا مستوطنات وفي الضحى مستعمرات مادروا عن هالبيارق شمخ العرض النظيف فزهة الدين الحنيف شجرة العز الكثيف غاده وسجاده وكفين وحجاب وصلاة من صبايا محصنات من عروق طيبات اطهر من الفين منظر كلها فتنه و زيف في رجا الصبح الكسيف وأجرة الليل السخيف كم مكان يعرض اعراض آنسات وسيدات والهوى له بايعات والغلاف و لافتات والحسن تشبير عنق وطول وخصر نحيف وشي ماينشاف شيف لاجل الاول والوصيف شهب تشابه رسوم الشاشه المتحركات ما.. لزمتهن طرات ولا لهن ملح وحلات لاربيع فيه خير ولا به الا بروق صيف والشتا مابه رفيف يحي اوراق الخريف لي مناحل لي خلايا كلها سكر نبات لي حصون ناعمات لي غصون شامخات لي قوارير ملاها العقل والدم الخفيف خلفها العمر الكليف ودونها الحد الرهيف يازمن وش جاب حلوى غلفوها باالعباة جنب حلوى للمشاة و للغبار و للشتات شف بدل ماهي لواحد صارت لجمع لفيف .. كيف انا اخبرك كيف شوفها فوق الرصيف ناصر القحطاني (طعم المسا) معك طعم المسا غير .. و معك حتى السوالف غير معك يا حلو تقليب المواجع بين كفّينك تبختر بين دقّات الخفوق و نشوة التفكير ترى كل الحياه اصغر من اللي بيني و بينك احس انّك تجي و العشب ينبت و الطيور تطير و احس ان السحاب يلوح براقه علي يدينك احس بروعة الدنيا و احس ان الزمان بخير و احسّك للحياة اعذب نداء ما انت بمثل عينك اشوف الصبح لا شال الشفق هز الظلام عصير و اشوف الورد يضحك ما بقى الا ينشدك وينك ؟ و اشوف الريح تقبل مستخفّه دمّها و تغِير تنثّر لك شعرك و تنتثر سلّة رياحينك ورا ما ترقص القمرا بقلب ٍ خانه التعبير مثل ما ترقص الالوان في مسرح فساتينك دخيل انشودة العشق و ذنوب ٍ ترفض التكفير دخيل آخر ربيع ٍ مرّني في حضن عشرينك انا اللي نزّلك من برجك العاجي و جاك يسير يمد لك اليمين ولا درى عن لهفة يمينك و اثرك تشوفني في حلمك اللي في رجا التفسير على ذاك الحصان الابيض اللي في ميادينك شعرت بطعم سكّينك من اول ما بدا التقدير تمثنيت العروق و قبّل اكبر جرح سكّينك لقيتك قبل ما ابحث عنك في الابراج و التبصير قريتك قبل اموت بلذّة قراءة فناجينك ابي للناس اسولف بك و اقول اللي يصير يصير و احسّك سالفه لو سولفوها شوّهوا زينك حشا لو تطري الفرقا ما اعدّك راعي التقصير عزاي اني ملكت بوقتها عرش اجمل سنينك يقولون الزمان اغبر و انا اقول الزمان بخير ما دام اللي سكن في ناظرك ما طاح من عينك ناصر القحطاني (هذا قراري) خلاص ابا اترك كل شي ٍ مكانه العشق و العبرات و الحسن و التيه جفا .. ملل .. فرقا .. تغلّي .. خيانه هذا قراري و سمّه اللي تسمّيه ما همّني ذاك المكان و زمانه اغليه ولا علّني ما ارجع اغليه يا سيّد الماضي و ذيك المَكانه انا الذي شوّه بشرواك ماضيه الحب عرّفتك على عنفوانه و الا انت ما تستاهل اصغر معانيه ما شفت طرفك في قساه و حنانه يرقى قصيدي و يتغطرس على يديه ما شفت عودك كم و كم خيزرانه سميتها به .. و انثنت مع تثنّيه ما شفت شعرك كيف علّيت شانه دلّيته الريح و غدى وقتها فيه ما شفت صبح ٍ جاك تضحك ثمانه عقبال ما اصبح يوم و القاك ناسيه قل للعذر ما عاد للعذر خانه لو تبني بدمعك بيوت المشاريه قل للطواري لو تطيح الميانه لا هنت لي صوت ٍ ولا اشتقت ( لبّيه ) امانه .. ان كانك تعرف الامانه لا تذكر انه كان لي عشق ٍ ارجيه جاك الكلام .. و خل قلبك مكانه و العشق و العبرات و الحسن و التيه ناصر القحطاني
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
