ديوان بدر بن عبدالمحسن

(ظامي هوى)

ما أقول أنا لبيه .. وما أقول سمّى
ياعيونه اللي ما صفت لي وتكدّرت
يا صاحبي بكفيك مدحي وذمّي
كان الجفا تقصير يا زين قصرت
يا من نثر برماح الأهداب دمي
لو للجروح ضماد وصلٍ تصبّرت
لا شك ما انته يا دعج العين يمّي
لا والذي اطغاك زين وَتكَبّرت
ظامي هوى وشربت من فيض همّي
ويوم ارتوت روحي من الدمع صدرت

(العين مشتاقه)

يا عاذلي .. ما تشوف العين مشتاقة
لولا الحيا جاوبتك بدمعها الصافي
عطني جلد .. كان تنخاني على فراقه
ودي الي من تركته ما أشبح خلافي
لاح الجبين .. وجذبني نوض براقه
حيثه ربيعي .. وورد الخد مصيافي
والغصن لولا المطر ما أخضرت أوراقه
يا كيف عشب الوسم يترك وينعافي

(العشره الحلوه )

العشره الحلوه .. على الراس والعين ..
أحلى الليالي .. اللي مضت .. لكن مضت ..
ويش رايك في هالحين ..
دايم .. تذكرني .. اللي فات ..
كل الحياة ماضي بعيد ..
باكر تراه .. يومٍ جديد ..
أحلى الليالي .. اللي مضت .. لكن مضت ..
ويش رايك في هالحين ..
بالله .. لا تخلي الوفا .. يصبح صبر ..
لا تختصر .. كل العمر ..
وتعيش امل .. عطني عمر ..
أحلى الليالي .. اللي مضت .. لكن مضت ..
ويش رايك في هالحين ..

(الظما عشق )


كل ما حث الخطى .. ينبت
الطلح في عيوني
تبني الرمال رمال
كل ما حث الخطى .. يولد
من رحم السراب جبال
أثر الظما عشق
وردت يا بير السما
الشمس دلوي والشعاع حبال
أثر الظما عشق
يا ربعي الخالي
وأثر الأماني جمال
ترعى عشب بالي
والشمس ترس نحاس
وأثر الشعاع نصال
وراعي الهوى خيال
يفكها من الياس
واحث الخطى .. ينبت
الطلح في عيوني
تبني الرمال رمال
يكبر الطلح في عيوني
ويغيب ..
يسيل من تحت القدم
رغم الجفاف .. شعيب
اقطع تجاعيد السهال
بسيف الظلال ..
ويشرق سواد بيوتكم
في ( مرو ) التلال
وغيم الخريف
البرق له وميض .. ورفيف
يشرب الطلح في عيوني
وتسقي الرمال رمال

(ظماي انت )


ظماي انت .. ومن يعشق ضماه غيري
جروحي انت .. ومن يكره دواه
اسقني لو ما ارتويت .. داوني لو ما شكيت
ماهقيت اني اعطش .. في حياتي لغيرك انت
مادريت ان مابه أغلى منك ..الا انت
ما تصور ان عيني مره تغفى وما اشوفك
ما تصور لو يطول الصمت ما اسمع حروفك
تدري احساسي بخوفي هو أماني
لما تسأل عني ليله عن مكاني
ما تصور كيف تحرقني الثواني
شمعه في ليل انتظارك..!
ياللي يسبقني زماني .. من عطش .. ليلي ونهاري
عطني موعد .. وانسى موعد
بس لا... تهجر وتبعد
يا ظما قلبي لقلبي .. وغربة اعيوني عن عيوني
وينك انت
ياترى الليله في صدري
لا ..
في جفني
لا ..
في الشعور اللي خطفني
اه ... لو تدري بشوقي
آه ... .يا ظما الدنيا بعروقي

(العشق والعتب)


السهر وقدةٍ تصلى الجروح
والهوى ما بكت عين الجريح
في الجمر دلةٍ صفرا تفوح
وأنا قلبي على الشكوى شحيح
اقشر العشق عشقٍ ما يبوح
لين يفنا عتب أو يستريح
اقضب الليل تكفى لايروح
دام لي با الصدر عرقٍ يصيح
باكر وادع وفراق ونزوح
تطلع الشمس ونجومي تطيح

(العشق)


العشق .. هو خال .. وزمام ..
والا العيون اللي .. محاجرها ظلام ..
وقبل السلام .. وبعد السلام ..
يابنت أنا أحبك .. والسلام ..
واناظرك وانتي بشعرك تلعبي .. باصابعك كل الحديث اللي أبي
ما تعبت ليلي أناظرك .. ومااظنك إنتي بتتعبي
با بنت أنا أحبك .. والسلام ..

ديوان بدر بن عبدالمحسن


يغلق

ومض|بدر بن عبدالمحسن|متجدد



،
فلسفة شاعر !
ومفكر وإنسان وهبه الله القدرة على رؤية الأشياء كما لانراها .. !
قدرة على رسم صورة من خيال .. وعلى ابداع قصيدة من فكرة .. وفكرة كأنها قصيدة .. !

حين أقرأ للبدر ، لا أقرأ لشاعر فقط بل لفيلسوف ومفكر ..
هذا الرجل حضارة وتجربة إنسانية لاتتكرر كثيراً ..

،
البدر : أضعه بين العظماء الأكثر تاثيراً في تاريخ الانسانية ..
شاعر استطاع أن يروض مشاعر القسوة والعنف واللامبالاة والتصحر الفكري ، والشعوري في غنسان هذه الصحراء ليخلق فيه ومنه الجمال .. !

* لو استطعنا أن نؤرخ لسلوك وثقافة أكثر من جيل في هذه البلاد !
لوجدنا الفارق الشاسع بين ماقبل وبعد البدر ..

علمنا بالشعر مالم نكن نعلم .. !
علمنا الحب والرقي وكل المشاعر الانسانية الرقيقة والشفافة التي كنا في تناقض معها ..

لن يكفي ولن يفي الكلام اذا كان عن البدر .. *

هنا جديد البدر [ومض ]

سأعود

معاركي الصغيرة :
● من قال إن القتال ... هو القتل .
● نقاش .. للزمان رائحة الدم الدافئ وللمكان لون الشاش .
● معاركي الصغيرة شغلتني عن معاركي الكبيرة ،
لا بأس فقد حمتني هزائمي الصغيرة من هزائمي الكبيرة .
● لا عيب في الهرب العيب في السبب ..