بقايا أنثى مجروحة / الكاتبة : سحر الاحساس ، الجزء الخامس عشر

%%البارت الخامس عشر%%

لا صرت بايعني أشوفك على خير ...مع السلامه دام ما به سلامه

قلت انتهينه قلتلك خير يا طير .... ما ني أول شخص يخسر غرامه

أمحذرك من قبلها ألف تحذير ....لعفتني بيعف قلبي هيامه

ما ني بميت لا ولا احتاج تبرير....صح الله لسانك ووفر كلامه

بسمعك حبكه وفكره وتصوري...وافهم عدل يا مدعي بالفهامه

وجه الشعر ابيض ويحتاج تبرير ...ودي تزينها القصيده علامه

ماضيك الأسود بذكره دون تقصير...كذا يكون بخده الشعر شامه

يصدق معي تعبير ويخون تعبير...يا ضيعت الشاعر بوقت انسجامه

يمكن خطى دونك بالشعر مير....لو ما حترمتك للغرام احترامه

ما كان حبك غير بس طعنتك غير...علمتني معنى الندم و الندامه

ماجاك مني اي زله وتقصير ....كل ما خطيت أعاتبك ببتسامه

حسبي على الذكره اذا هبت عصير ....ما عاد تنفع شرهتي والملامه
في جناحي..
فارس وبابتسامة:الحلو وش فيه اليوم زعلان..

:ومين يقول أني زعلانة..

فارس:تصرفاتك تقول..من جيتي من عند أهلك وأنتي مبوزة..قول لي في حد مزعلك..

:ما في حد مزعلني..بس متضايقة..

فارس:وش منه..

قلت بعد تردد:فارس أنت عرفت أن غادة تتطلقت صح..

فارس هز رأسه بأيه..
قلت بنبرة بكي:وأكيد أول ما تنتهي من عدتها بتتزوجها..

فارس نزل عيونه بهدوء وبصمت..
:شوف فارس أذا عزمت تتزوجها ياليت قبلها تتطلقـ..

قاطعني فارس لما قال:احلمي اطلقك..وقام من السرير وطلع..رميت المخدة بقهر ع الأرض..لهدرجة يا فارس هاوي تعذيبي..


================================

الساعة تسع الصباح طلعنا أنا ومرام ورغد نفطر بسبازيو بالمملكة قبل ما نطلع للجامعة..
وبعد ما انتهينا من فطورنا نزلنا..وركبت رغد مع سواقها..وأنا ومرام طلعنا بسيارتي..
انتبهت لمرام وهي ترجع رأسها لورى وهي تضغط بأيديهن عليه بقوة..
قلت بخوف:مرام حبيبتي وش فيك..

مرام:أحس بدوخة غير طبيعة..

:بسم الله عليك..نمر المستشفى..

مرام:لا ما يحتاج بعد شوي بتروح الدوخة أن شاء الله..

:عبد الكريم أطلع للمستشفى..

مرام:صدقيني يا مشاعل ما يحتاج..وبعدين راح نتأخر على محاضراتنا..

:لاحقين على المحاضرات..أهم شيء صحتك..لازم أطمن عليك..


=================================

مرام وهي تبكي:كيف وأنا مهتمة بمواعيد أخذ الحبوب..كيف..

مسحت ع شعرها:خلاص مرام لا تبكين عشاني..أرضي باللي كتبه ربي لك..

مرام:مشاعل رجعوني للشقة مالي مزاج للجامعة..

:أوكي..

ألتفت ع السواق وقلت له يرجع..ولما وصلنا نزلت معها..صعبة أخليها وهي بهالحالة..
دخلنا وجلستني بالصالة وراحت تغسل..
بعد مدة سمعت صوت بكاءها وشهاقها..وراحت لها بغرفتها..وحصلتها تضرب بطنها بقوة..
مسكت يدها: أنتي وش تسوين خافي ربك من اللي جالس تسوينه..

مرام وهي تبكي منهارة:ما أبي أحمل من هالشايب ما أبي..
ضميتها وأنا أهدي فيها..
وبعد ما هديتها وحلفته بربي ما تسوي شيء يضرها ويضر الجنين طلعت منها..


====================================

الساعة ثمان المساء..
رجعت من أهلي ولما وصلت لقصر عمي طلعت فوق..وحصلت الخدامة جويا استغربت من وجودها في الدور الثاني لأن شغلها بس يتضمن الدور الأول..
:جويا..

جويا وحسيت بصوتها ارتباك:yes,madam‏

:there is my aunt

جويا:I do not know..
ok go
دخلت جناحي ونزلت عبايتي وبعدها رتبت عمري قدام المراية ونزلت تحت..
:نوريهان نوريهان..

نوريهان:نعم يا مدام مشاعل..

:خالتي وينها..

نوريهان:طلعت عم بتزوز أختها أم عساف..

حسيت بخوف لأن غادة صار لها تقريبا طالعة من العدة أسبوعين وفارس ما جاب أبدا سيرة لزواجه منها..وكلما طلعت خالتي تزور أم عساف أحس أنها بتخطب غادة لولدها..فقت من أفكاري لما قالت نوريهان:مدام بتريدي شي أبل ماروح..

:لا..روحي

دخل فارس:السلام عليكم

:وعليكم السلام..

فارس وهو يجلس جنبي:متى جيتي من أهلك..

:قبل شوي..

مسك فارس يدي يلعب بأصابعي وقال:اشتقت لك..

قلت بابتسامة:وأنا أكثر يا حبيبي..

فارس:لو جد مشتاقة لي ما كان نمتي أمس عند أهلك..

حطيت رأسي ع كتفه وبدلع:فارس كلها ليلة اللي نمت فيها عند أهلي..

رن جوال فارس ورد:ألو..هلا ندوش..أنا بخير الحمد لله أنتي كيفك..ندى ترى تكلمنا بهالموضوع كثير..سحب فارس يده اللي كانت ع أكتافي..وطلع لفوق وهو يكلم..
يا ربي نفسي أعرف وش بينه وبين ندى مكالماتها زايده هذي الأيام..

==============================

اليوم الثاني طلعنا لمزرعة أهل خالتي أم فارس..
بالمجلس كنت جالسة أتكلم مع نهاد والجوهرة والعنود..
دخلتنا علينا غادة اللي متغيرة كثير ومعه ندى..سلموا علينا وجلسوا..وكانت غادة تطالعني بنفس النظرات كانت تطالعني فيها بزواجها..المهم ماهتميت لنظراتها..
الجوهرة:غادة وش أخر رسمة رسمتيها..

غادة:والله من زمان ما رسمت..

:ما شاء الله يا غادة أنتي رسامة..

غادة وبابتسامة واضح أنها من دون نفس:أيه..

نهاد:وش رأيك يا غادة تراوينها لوحاتك..راح تعجبها انا متأكدة..

غادة:أوكي يله..
طلعت أنا والبنات للمرسم..وأخذت غادة تفرجنا لوحاتها وتتكلم عنها..

:بصراحة ياغادة رسماتك تجنن ما شاء الله..

نهاد:أيه والله من جد..
جذبتني لوحة مركونة بزاوية أستأذنت من غادة أروح أشوفها..وكانت اللوحة عبارة عن بحر أمواجه متلاطمة ع بعضها والسحب متراكمة بشكل جذاب ومغطيها اللون الأسود..وكانت ألوان اللوحة ممزوجة باللون الرمادي والأسود وشوية من اللون الأزرق والأبيض..وعلى كثر ما اللوحة جذابة ألا انها تحسس الشخص اللي يطالعها بالخوف..وبصراحة ما أدري وش اللي تركني أصير ملقوفة وأتفرج باللوحات اللي وراها,,وانتبهت لوحدة من اللوحات وكانت عبارة عن صورة فارس..
وحسيت أني باختناق لان هالشيء ما يدل ألا انا فارس لها مكانة بقلبها..
أستأذنت أنزل ولما طلعت وقفت في نص طريقي أخذت أمسح دموعي اللي نزلت بسرعة..ولما وصلت تحت خذيت نفس طووويل ومسحت دموعي ودخلت المجلس..
وبعد الغداء اتصلت على فارس يأخذني لأني من شفت اللوحة وأنا متوترة وحالتي حالة وقلت له أني تعبانة ودايخة لأني مانمت البارحة زين


==================================

دخلت الفلة قبل فارس..
طلعت لغرفتي ومن كثر توتري بكيت..
جلست ع طرف السرير بعدما نزلت عباتي..
انفتح الباب وعلى طول مسحت دموعي..
دخل فارس وجلس جنبي..
فارس:مشاعل تبكين

نزلت عيوني..
فارس وهو يرفع رأسي:مشاعل وش فيك..

رميت نفسي بحضنه وجلست أبكي وأنا متمسكة بياقة ثوبه بقوة ولاشعوريا"قلت:فارس أنت لي لوحدي..مسح فارس شعري برقة..ثم كملت وأنا أشهق من كثر البكي..ما راح أخليك لغيري ما راح أترك غيري ياخذك مني..

فارس بنبرة عذبة تجنن:مشاعل أنا ما افكر أخذ غيرك..انتي الوحيدة اللي مالية علي دنيتي..

رفعت رأسي وطالعته..وأنا أقول في نفسي لا تلعب علي فارس أنا أدري أنك بتأخذ غادة..يارب وشلون بتحمل أذا تطلقت منه وأخذ غادة..بموت من القهر..
نزلت عيوني ورجعت رأسي على صدره ونزلت دموعي بصمت..


=====================================

فتحت عيوني وحصلت الدنيا ظلام..طالعت في الساعة وكانت ست ونص..تذكرت اللي صار الظهر تنهدت وقمت من السرير..ودخلت الحمام أتوضئ..وبعد ما انتهيت من صلاتي..نزلت تحت وكان البيت تقريبا"هادئ..
وأنا نازلة شفت فارس داخل..
فارس وهو يبتسم:مساء الخير على قمراي..

ابتسمت:مساء النور..

فارس وهو يحط يده ع خدي:قولي لي كيفك ألحين

:الحمد لله أحس أني أحسن من أول..

فارس:طيب ممكن اعرف ليه كنتي تبكين..أحد مزعلك..

:لا كنت متضايقة شوي..

فارس:ومين اللي مضايقي..

:محد مضايقتي..بس تعرف المرأة في شهورها الأخيرة تكون دايما متضايقة وحالتها النفسية تعبانة

فارس وهو يقرص خدي بخفيف:طيب مرة ثانية لا تبكين ترى ما تحمل دموعك اللي تعذبني..

طالعته بحب ..طالت النظرات وحسيت أني راح أتعذب أذا تركت هالعيون اللي عشقتها بجنون..
ثم انتبهت لنفسي واستحيت ونزلت عيوني..
فارس:أنا أستأذن بروح أتسبح..
طلع فارس لفوق وطلعت أنا للبنات..


===============================

بعد أسبوع قضيناها بمزرعة أهل خالتي رجعنا الرياض..
كانت الساعة عشر بعد ما طلعت من خالتي حبيت أسوي سهرة حلوة مع فارس..حطيت الشموع في كل مكان حتى ع الأرض بطريقة روعة ورميت الورود ع السرير بعد ما بدلت المفارش..وجهزت طاولة صغيرة فيها كيكة في وسطها قلب باسمه وكأسين عصير برتقال فريش..
ولبست فستان أسود..وسيحت شعري وعملت مكياج ناعم..وسكرت الأنوار
بعد ما ولعت الشموع..وأرسلت لفارس هالرسالة..
‏ أبغاك تتأكد من هالحقيقة :

خيالك مايفارقني ؟!
يلاحقني مدا الأوقات ..!
يحط راسه على كتفي ويتغطى معي ويبات ...
معي يسافر اذا سافرت ..
ويتعطر اذا تعطرت ..
وفجأة دون ماأشعر !!
يزود داخلي الآهات ..!
ينور غرفتي وداري ..
ويتمرجح على أفكاري !
وكل مااكتب قصيدة عشق ..!
أخصه بأجمل أشعاري ..
هنا بعيني بانيله دار ..
وهنا بقلبي مكانه صار ..
وهنا خلف الظلوع العوج ..!!
أسولف له عن أخباري ؟!
حبيبي أطيب أحبابي ..
عطر داري قمر بابي !!
أنا ماأقدر على غيابه ..
ولايقدر على غيابي ..
< أحبه >
ويشهد الليل وعيوني ..!!
< أحبه >
ويشهد سهيل وجفوني ..!!
أحبه كثر هالدنيا ..
وكثر ما عانق أهدابي ..
أنا في انتظارك حبيبي..
وجلست انتظره طالعت بالساعة وحصلتها11.30..استغربت لحد الآن ما جاء..
بعد فترة مو قصيرة دخل فارس وبعصبية سكر الباب بقوة..وغمضت عيوني بسبب الصوت اللي طلع من الباب وهو يتسكر بقوة..
فتحت عيوني وقلت بخوف:فارس حبيبي وشفيك..

دفني عالكنبة ثم رمى علي الظرف اللي بيده وقال:شوفي فضايحك يالوقــ..

طالعته مستغربة:وش جالس تقول فارس..

أشر فارس ع الظرف:شوفي وشفي بالظرف يا محترمة..
..أخذت الظرف وفتحته وأيدي ترتعش من الشيء الموجود..

طالعته:هذي صوري..

فارس وبحدة:تسوين نفسك بريئة..أنا مو مغفل تلعبين عليه..وش قصة هالصور ومين حبيبك أحمد هذا..وصرخ..كيف تعرفتي عليه ومن متى..

قلت بخوف:فارس أي أحمد وأي حبيب..

فارس مسك شعري وبصراخ:لا تلعبين علي يا الحقير..عمري ما شافت حقيرة مثلك يالو..ة..أصلاً أنا كنت شاكة أنك تخونيني من الرسايل اللي تدعين أنها من صاحبتك سلمى..لكن كنت أكذب نفسي وأقول لا بنت عمي وزوحتي مو من هالنوع..ليه تسوين كذا ليه لما حــ....ولا كمل..

ورفع وجهي وعطاني صفعة طرحتني على الأرض وثم رفعني بشعري..وأنا أبكي وأحاول أبعد يده عن شعري وباليد الثانية حاولت أبعده عني:فارس والله والله ما أدري عن وش تتكلم..فارس حرااااااام عليك..فارس أرجوك أبعد عني بتموتني..

فارس وهو يرفع أيده عن شعري ويرميني عالأرض:أحسن جعلك الموت..

وكنت بنجن لما سحب عقله وعلى طول تكورت ع بطني عشان احمي اللي فيه..وبدأ يضرب وما ترك قطعة فيني ماتركها تتألم..كنت احاول وأترجاه يسمعني يفهمني يتركني..لكن ولا كأني اتكلم..
ثم سحبني فارس وللمرة الثانية من شعري وقال:عمــــــري ما شفتك حقيرة مثلك يالوا..أنتي طاااااااااالق طااااااالق..

==============================

آآآآآآآه يافارس..ظلم وضرب وطلاق..ليه أنا أيش سويت..آآآآآه خذيتني من بيت أهلي وردة مفعمة بالحياة وتركتني وردة ذبلانة تركتني بقايـــــــــــا..
لما وصلنا للقصر سحبني فارس من السيارة لحد ما دخلنا من البوابة..وكنت أترجاه أنه ما يقول لأهلي..أكيد بيصدقون مثل ما صدق..
ولما دخلنا كان خالد طالع وانصدم لما شاف شكلي وفارس يسحبني لداخل..
وعلى طول مسك يد فارس وأبعده عني وطحت بالأرض:يا الحقير وش تسوي بأختي..

فارس وبصوت ساخرة:أنا جاي أرجع لكم هالصايعة عشان تربونها من جديد..

مسكها خالد من ياقة ثوبه:احترام نفسك..ولا تتكلم عن أختي كذا..
ابعد فارس يد خالد بقوة ورمى صوري في وجهه:أختك اللي تعتقد أنها متربية وعاقلة تخون زوجها وهالصور أرسل لي حبيبها وأذا مو مصدقني شوف جوالها..

طالع خالد بالصورة ثم طالعني والشر مالي عيونه..
قلت ودموعي مثل النهر ع خدي:خالد والله والله أنا مو كذا..
مسكني خالد من شعري ورفعني له..وشهقت من الوجع..

خالد وبصراخ:الله لا يوفقك يالحقيرة فضحتينا فضحتينا..

فارس:أنا حبيت أعلمكم عشان تنتبهون من أنها تسويها مرة ثانية وتفضحنا وتخرب سمعة عايلتنا..

وطلع لكن وقفه خالد لما قال:فارس أرجوك لحد يدري غيري أنا وياك وأهم شيء أبوي تعرف أنه معه السكر..

تنهد فارس وقال:حاضر وطلع..

وأما خالد سحبني لغرفتي وأنا جلست أترجاه يتركني وأحلف بربي أني ما سويت شيء
وصلني للغرفة ورماني ع السرير..وكسر الجوال قدامي وقال:والله لأربيك من جديد يا مشاعل..
وقرب مني وهو يسحب العقال..
صرخت بصرخات أنثى متألمة وأنا أضم بطني:لا خالد أرجوك أبوس أيدك أتركني ..أنا والله ما سويت شيء والله العظيم يا خالد..
لكن خالد ما رحمني وضربني وجلدني بالعقال مثل ما سوى فارس..لكن خالد كان أرحم من فارس لأنه ما كان يضرب بطني مثل فارس..

===============================

الفجر..كنت طايحة ع السرير وأنا متكورة ع بطني وأئن من الألم..ودموعي تنزل من الألم ومن القهر ومن الخوف على اللي في بطني..في اللحظة حسيت أني أكره فارس وأنااللي عمري ما كرهت حد..واللي تركني أكره أكثر هو أنها فضحني عن خالد وأنا بريئة..وبهاللحظة حسيت بالندم لأني حبيت فارس وأعطيته قلبي وهو ما يستاهله..ومن كثر التعب والبكي لا شعوريا نمت من دون ما أحس بعمري..

============================

صباح اليوم الثاني صحيت ع الساعة تسع وخذيت شاور وكان جسمي كله ضربات وكدمات بعد ما انتهيت لبست بلوفر سماوي بأكمام طويلة عشان ماتبان الكدمات وتنورة جينز..
ونزلت شعري عشان ما توضح الكدمة اللي ع خدي اليمين..ونزلت تحت وحصلت أمي اللي انصدمت من وجودي..
أمي:يماه مشاعل انتي متى جيتي..

بست رأسها:أمس..

انتبهت أمي لعيوني:بسم الله عليك ليه عيونك متورمة كذا..

جلست وقلت وعيوني بالأرض:فارس يماه طلقني..

شهقت امي: وليه..

:أنا وفارس من البداية مو مرتاحين مع بعض..عشان كذا كان الطلاق أحسن أحل..

أمي:كنت حاسة هالشيء من بداية زواجكم وكلما سألتك قلت لا الحمد لله مبسوطة ومرتاحة..

:يمـاه انا خايفة من ردة فعل أبوي لو يدري..

أمي:حتى أنا..ما راح يعديها لك أبوك على خير لكن ولا يهمك أنا معك أن شاء الله..


===============================

الساعة وحدة الظهر..وأنا بغرفتي ومتسندة بظهري بالسرير..
دخل أبوي وهو معصب ويصارخ:مشااااعل..

وقفت وبخوف:هلا يباه وش فيك..

تقدم مني أبوي وبسرعة..سحبني من شعري:أنا مو قايل لك لا تطلبين الطلاق وأنا طلبيته ماتلومين ألا نفسك..

مسكت يده:يباه والله ما طلبته فارس أهو اللي طلقني من نفسه..

أبوي وهو يشد على شعري:فارس ما طلاقك ألا أكيد مقصرة عليه..ألحين الناس وش تقول.. بنت سلطان ما طلاقها ولد عمها اللي من لحمه ودمه وهو ما كملوا سنة ألا شايف عليها شيء..

دخلت أمي وشافت أبوي ماسكني مع شعري ويصرخ..ومسكت يده وقالت:تكفى يابو خالد أنك تتركها طلبتك..

رماني عالسرير بعدما شال يده عن شعري:حسبي الله عليك فضحتينا..
طلع أبوي وأمي ضمتني..وبكيت على صدرها..وأنا أدخلي أتقطع من الحزن والألم..

=================================

صحيت بالليل من الألم بسبب الانقباضات اللي بطني..كنت راح أصرخ لكن كتمتها من الخوف..أخاف يسمعون أهلي ويأخذوني للمستشفى..وهناك أخاف يولدوني وأنا لسى بالثامن..لكن الانقباضات أخذت تزيد..وما قدرت أصبر وجلست أبكي وأصرخ من الألم:يماه عبير لحقوا علي بموت..وينكم بموت..آآآآه..

دخلوا أمي وعبير وبندر وشجون علي والخوف باين عليهم..

أمي وهي ترفعني:مشاعل بسم الله عليك وشفيك..

بندر:مشاعل قلبي ردي..

قلت وأنا أتنفس بصعوبة:شكلي بولد بولد..

بندر:بس أنتي توك مادخلتي التاسع..

أمي:بندر جهز سيارتك شكلها بتولد..

لبستني عبير عباتي ونزلوني تحت..
وأنا كلما لي أحس أني جالسة أفقد وعيي..

===========================

فتحت عيوني وشفت نورة وأمي ..وعيونهم مليانة دموع..
نزلت عيوني لبطني ومسكته:وينه..

قربت نورة ومسحت ع شعري:مشاعل أنتي مؤمنة بقضاء الله وقدره..

قلت بسرعة:نورة ليكون مات..

نورة:للأسف النزيف اللي حصلك كان شديد مما سبب وفاة للولد..

قلت ودموعي تنزل:لا ولدي ما مات أنتوا أكيد تمزحون..جيبوه نورة أنا أحبه وأنا متأكده أنه يحبني مثل ما أنا أحبه أنا أمها أكيد يحبني وما راح يتركني..أرجوكم قولوا لي ما مات..

أمي وأهي تهديني:استهدي بالله يا بنتي..

جلست وأنا منفعلة:ولدي مات يماه أنـ..

أمي وهي تقاطعني وتمسكني وبخوف:يا بنتي شوي شوي على عمرك عشان العملية..

:أي عمليه..

أمي وبتردد:استـ..ونزلت عيونها ولا قدرت تكمل..

طالعت نورة بنظرات متسائلة..
نورة بعد ما خذت لها نفس:الطبيبات ما قدروا يوقف النزيف اللي صار لك عشان كذا أضطروا يستئصلون رحمك..

حطيت يدي ع فمي مصدوم..هالخبر نزل علي مثل الصاعقة..
قلت بهدوء اللي يسبق العاصفة:يعني أنا مو أنثى كاملة..

نزلت نورة رأسها..
وبهاللحظة دخل خالد اللي لون وجهه مخطوف:حمد لله على سلامتك مشاعل..

أول ما شفته صرخت:أطلع برى أكرهك أكرهك أنت وفارس السبب حسبي الله عليكم حسبي الله..

ضمتني نورة:مشاعل بسم الله وش فيك على خالد..

:طلعوه ما أبي أشوفه أهو السبب..هو السبب..

طلع خالد بسرعة ودخلوا علي الممرضات وأنا أصرخ:هو وفارس السبب الله لا يوفقهم الله لا يوفقهم..
مسكوني الممرضات وأعطوني أبرة مهدئة..

==============================

طلعت من المستشفى وأول ما وصلنا القصر قلت لهم يطلعوني لغرفتي..
بعدما حطيت رأسي ع المخدة نزلت دموعي صعب أنك تعيش أنسان ناقص حسيت بهاللحظة أني مجرد بقايا أنثى ومو مجرد أنثى وبس أنثى مجروحة بجرح عمره ما راح يبرئ..تذكرت طفلي آآها يااما تخيلت شكل اللي بطني يااما تخيلته يقول ماما أحبك ويااما تخيلته وهو يركض لي ويضمني ويااما ويااما..وآآآها يافرحتي لما أطلع من عند الدكتورة وتطمني عليه..آآآها كم كنت أعد الأيام والأسابيع والشهور عشانه..آآآها كم تحملت الآلآم وأقول بكرة بيجي وبنسى الألآم اللي عانيتها..نفضت هالأفكار من رأسي وتعوذت من أبليس..قدر الله وما شاء فعل ..غمرتني راحة بعد ماقلت هالجملة..
دخلت الحمام بسرعة لم حسيت بغثيان..بعد ما غسلت طلعت للغرفة..وحصلت أمي ومعه الخدامة اللي معها طاولة الأكل..
أمي:خلاص سيتي خلي الأكل هنا وأطلعي..

:يماه ما له داعي مالي نفس..

أمي:ما تشوفين شكلك وشلون ضعفانة بتأكلين غصب عنك..

ابتسمت وجلست..وكانت أول مرة ابتسم من بعد طلاقي..
وما قدرت أكمل أكلي لأني حسيت بغثيان ورحت للحمام..ولحقتني أمي..
التفت عليها وأنا متسندة ع المغسلة ودموعي مجتمعة بعيني:ذبحني الغثيان يا يماه ذبحني..

أمي وهي تمسح ع شعري بحنان:هذا من آثار العملية..لا تخافين هي فترة وبترجعين مثل أول وأحسن أن شاء الله..

============================



كنت جالسة قدام المراية أمشط شعري ودخلت علي شجون طايرة..
:خير أن شاء الله داخلة علي طايرة ما تعرفين تضربين الباب قبل..
شجون:عندي لك خبر..

:وش الخبر..

شجون:الخايس خطب وملكته في الأجازة..

عقدت حواجبي:مين الخايس..

شجون:ومين غيره..فارس ولد عمنا المحترم..

صديت عنه أكمل تمشيط شعري وبرود قلت:الله يوفقه..

شجون:يعني عادي عندك..

طالعتها باستغراب:أيه عادي..تراه طليقي يعني ليه أغار..
أكيد توقعت بانصدام أو أبكي قهر..الأيام هذيك أيام الدموع والحب ولت وراحت..فارس ألحين ما عاد يعني لي شيء..وصدقوني هالخبر أبدا ما أثر علي..الشيء اللي أتمناه ألحين هو أني أنتقم من اللي تبلى علي ومن فارس اللي بسببه خسرت طفلي ورحمي..

==================================

كنت جالسة ع سريري وفاتحة دفتر خواطري الجديد اللي مسجلة فيه بداية أحزاني وكنت أسطر بعض الكلمات وأفرغ اللي في قلبي بقلمي وفيه..بقايا أنثى مجروحة..كنت أتمنى وكنت أطمح كنت كأية أنثى يملأها الابتهاج والسعادة ويختزن في عقلها الكثير والكثير من الآمال والأماني وفي قلبها الحب والحنان وتغدقه لمن يستحقها......قطع علي كتبتي صوت الباب..سكرت دفتري:تفضل

دخل أبوي..ونزلت من سريري:هلا يباه..حياك اجلس..

أبوي وبجفاف ومازال واقف:أنا جيت أبلغك أن زياد صديق أخوك أخطبك..وأنا وافقت..والنظرة الشرعية بعد بكرة أن شاء الله..وأبيك عاد تتجهزين..

طلع أبوي..وتركني مصدومة..وبعد ما ستوعبت..طلعت بسرعة من الغرفة وناديت أبوي قبل لايدخل أبوي جناحه ودموعي متجمعة بعيوني:يباه يباه..

لف أبوي علي..وقلت بسرعة:يباه أنا مو موافقة..أنا مأفكر أتزوج مرة ثانية..

أبوي وهو يصد عني ويدخل غرفته:احمدي ربك أن شاب ما تزوج فكر يخطبك بعد ماعافك ولد عمك لا وناقصة..

انغررت كلمات أبوي فقلبي مثل السكين..آآآآآآآآه ياقلبي شكل الجروح بتزيد طعونها فيك..
رجعت لغرفتي وأنا أسحب وراي جروح وهموم كلما لها تزيد ثقل على قلبي..شكل كلمة~جرح~بتظل في قاموس حياتي..
شافتني أمي اللي كانت طالعة من الإصنصير..
قربت مني وهي تمسك وجهي:بسم الله عليك ليه هالدموع
زادت دموعي وانطلقت مثل النهر:ليه أبوي يجبرني..هذا أهو جبرني على فارس ورجعلته مطلقة..ليه ليه..

وانهرت عالأرض..رفعتني أمي:خلاص حبيبتي أرضي بنصبيك..أنتي تعرفين أبوك أذا قال كلمة مايثنيها وهو قال للرجل أنه موافق وأنك موافقة..يعني خلاص مافي فايدة لهالدموع أرضي باللي مكتوب..

================================


الساعة ثمان المساء..
دخل خالد:شوفي مشاعل ما نبي فضايح عند زياد..والله وربي لو خنتي زياد مثل ما خنتي فارس..والله ليكون ذبحك على يدي..
:خالد أنا والله ما ســ..
خالد:بلا كثرة حكي ترى حذرتك..تصدقين عاد تستاهلين اللي صار لك لأنك خاينة..
قلت بصوت باكي:خالد بس تجريح..
ابتسم خالد بسخرية وطلع بعد ماسمعني كلمتين كالعادة جامدة وطلع..


===========================

يعطيك العافية على اختيار الموضوع
وحرصك على اختيارك مادة مفيدة

الله يكثر من أمثالك
وشكرا

نجم

سلمت يمناك
طرح جميل جدا

طرح متميز
راقي برقي روحك وجمال انتقائك
سلمت على مجهوداتك الجميله
وعلى كل ما يقدم منك بـ قصائد
لا خلا ولا عدم ي نقااء
كل الود

*،




آنتقاء مميز .. مَ ننحرم من جديدك

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

أسعد الله قلبك بكل ماتتمناه
مثل ما أسعدتني بصفحتك الجميله والرااقيه

يعطيك العااافيه
وشكرا لك مع تقديري

يسلمو ع المرور

تميز دائم في الاِنتقاء
وفي روعة الطرح
دمت بكل خير