 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
04-15-2017
|
#51 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
الجزء الأخير ،،
اليوم الكل فيه مبسوط ومشتط وفرحان.. اليوم الجو غير عن كل الاجواء .. اليوم يجمع العائلات كلها برحله تنقي فيها الروح والذهن والقلب .. مجموعه من الأهل تكونون من بيت أم عبدالله ويضم : ام عبدالله وعبدالله والجازي وطبعا نور .. بيت ابو محمد ويضم : ابو محمد وزوجته و وضحى وصافيه .. راشد وزوجته و ولدهم محمد الصغير .. محمد وندى وإبراهيم الصغير.. وبيت فيصل ويضم : فيصل واسماء وندى الصغيرة .. وبيت بو سالم ويضم : يعقوب والعنود وسالم ونور الصغيرة وموزة .. **** وياااااااااااااااااااااااااااااااااي على هالجو يهبل يجنن الله عليه الله .. صوت صافيه وهي تصارخ وتركض من غرفه لغرفه بالشاليه وتحاول تكتشف المكان .. كنت اراقب كل تحركاتها وانا اضحك على خبال اختي .. صج ان ابوي ما يطلعنا وايد بس مو لهدرجه اللي تحسس العالم ان احنا ما شفنا خير .. ابتسمت وانا اطلع الصاله الكبيرة واللي اكثرها كنب وكراسي وطاوله الطعام قريبه من المطبخ اللي نلقاه على جهه اليسار من الشاليه وجنبه "الله يعزكم "حمام وطبعا الباب الرئيسي بالوجه اول ما نفتحه يكون الشارع على طول .. طلعت من باب الشاليه رايحه شاليه ندى ومحمد .. لان المتزوجين بروحهم باستثناء نسيبنا عبدالله معاه نور وامه .. ابتسمت وانا احاول اتذكر أي صوب او أي رقم هو شاليه محمد اخوي .. وبالاخير قررت اروح على اليمين فتحت الباب وكان الهدوء يعم المكان استغربت وين العالم .. ولاحظت ان الشاليه واحد بالتصميم ما فيه أي اختلاف وانا احوس ادورهم رحت فوق الطابق الثاني ونزلت الطابق الارضي وطبعا ما لقيت احد رحت صوب المطبخ وفتحت الثلاجه وانا اسولف مع نفسي : هااه يا وضحى وش راح تسرقين من الغاليه ندى .. امممممممممم كنت افكر وقدامي عصير ندى برتقال والثاني كان غدير .. ابتسمت ومازلت اسولف مع نفسي : اكيد ندى بدون واحد او اثنين .. واول ما صكرت باب الثلاجه ولفيت طاحت عيوني بعيون كبار متكحله تراقبني وانا اسرق .. بس لحظه من هذا يا ويل حالي انا ايش هالفشيله ربي ستر اني حاطه الشيله زين وقلت بـ خوف : انت من ؟! ابتسم وهو يرد السؤال لي : انتي من !! يه صج هالولد غبي الصراحه مو ولد الا رجال يهز المجالس .. انتبهت اني اطالعه وهو بعد يطالعني استحيت على وجهي وقلت : اطلع برع مو عيب تدخل بيوت الناس وتراقبهم .. في هالثانيه كنت راح اذوب وانا اشوف ابتسامته مع صف من اللؤلؤ وهو يقول : اختي هذا الشاليه لزوج اختي اسماء .. انتي المفروض تطلعين صح !! انحرجت ونصبغ وجهي الألوان وصار اشارات مرور وانا اقول : بس هذا شاليه اخوي محمد !! شلون صار لفيصل ؟! كنت افكر بالدقيقه اللي هو رفع حاجبه المرسوم بدقه وقال : وانتي شلون تعرفين فيصل ؟! شفت ان السالفه راح تطول فـ قررت اني اخلص الموضوع وقلت : فيصل يصير اخو ندى مرت اخوي محمد من الرضاعه .. شفته يبتسم وعقبها قال وهو يرفع راسه لي وكان يطالعني من فوق لين تحت كانه يقيمني ويقول : اهاااا انتي اختي محمد .......... ال ....... ونعم الرجال والله .. طيب انا بدر اخو اسماء وتشرفت فيج يا ... بس انا قطعته وقلت : طولنا القصه وهي قصيرة .. مشيت جهه الباب واول ما شافني قربت صوبه بعد على طول وهو يقول : حياج الله .. ابتسمت على كلمته بعد ما عديته وطلعت ركض صوب الشاليه وانا اسمع صوت ندى تناديني من الشاليه اللي على اليسار .. رحت عندها وانا اتنفس بصعوبه من الركض .. شبلاج تركضين ..؟ ندى:وضحى شفيج وجهج صاير احمر ويه اسملى عليج اقعدي ..! قعدت وانا امسك قلبي وما اعرف ليش ادمعت عيني .. وقلت لندى : من بدر ..؟ طلعت عيون ندى على برع وهي تحط يدها على شفايفي وتراقب باب الحمام "عزكم الله " وقالت : عمى يعمي العدو شبلاج محمد بالحمام .. كانت تهمس وهي تكمل كلامها :أي بدر تقصدين لاني اعرف واحد بس و يصير اخو اسماء الصغير ... شفت ندى ترفع حاجبها نفس ما سوى بدر وهي تقول بكل استغراب: بس انتي شدراج ..؟ رفعت عيني على الباب اللي فيه محمد اخوي وقلت : صغير بعينج .. اللي شفته رجال يقول للباب قوم وانا اقعد هذا اولا .. وثانيا وين شفته هذي قصه طويله شرايج بالليل نتفاهم فيها .. هههههههههههههههههههههه ضحكت ندى على كلامي وهي تقول : شكل العصفور طاح وما احد سمى عليه .. ابتسمت لها وانا اقوم من مكاني وارد عليها : ليش شفتيني روميو اللي عندج .. ههههههههههههههههههههههه ضحكنا بالوقت اللي طلع محمد فيها من الحمام وحبيت اكون مؤدبه واستئذانت منهم وطلعت وانا مبسوطه على اللي صار .. *** تحط الاغراض بالثلاجه وترتب المكان يا داخله يا طالعه لين حسيت بـ الملل وقلت وانا منسدح على بطني على الكنب : طيب وين اليهال ..؟ لا تقولين نايمين !! لفت علي وهي ما زالت تشيل باقي الاغراض وتقول : يعقوب انت كسلان هالايام قوم سوي شي .. حرك الدورة الدمويه اللي عندك والا العمر له دور .. هههههههههههههههههههههههههههههه ضحكت من قلب على كلامها وهي معصبه تجنن هالبنت والله .. عدلت جلستي وانا اكلمها بصوت عالي لانها دخلت المطبخ تحط اخر شي بيدها وقلت : عرفتي ان بدر نسيبكم رجع بالسلامه وهذا هو عند فيصل ..؟ طلعت بسرعه من المطبخ وهي مبسوطه وتقول : من صجك .. قرت عين اسوووم برجعته !! انزين واذا قلت لج ان فيصل هو من جابه وطلب منه يرجع لمده اسبوع يريح قلب زوجته فيهم !! تكلمت وانا اشوف العنود تقعد على الكنب وهي تنظف بنطلونها وتقول : ما شاء الله على اخوي صاير رومانسي ويخاف على مشاعر المدام .. الصراحه كل يوم اكتشف شي جديد في فيصل .. شفتها وهي تحط راسها بحضني وتكمل كلامها : اليهال عن اسوم مطلعتهم الحديقه اللي وراء الشاليه مع فيصل .. واذا تبيهم روح وراهم انا جسمي متكسر وابي اريح شوي ..؟ عورت قلبي وانا اشوفها تغمض عيونها بحضني فـ حبيت اسوي نفسي رومانسي قعدت اقولها: حبيبتي ما تبين نتمشى برع انا وانتي على بحر .. هزت راسها بلا وهي تتثاؤب وتقول العنود: حبيبي والله تعبانه وحيلي مهدود من الصبح قايمه والطريج طويل لين وصلنا واليهال مسوين ازعاج .. وحتى يوم وصلنا اشتغلت ورتبت الاغراض خلني على حضنك شوي والا تعبان من راسي .. ههههههههههههههه ضحكت عليها وانا امسح على شعرها واشده بيدي وارد عليها : انا يا الظالمه حرام عليج .. انا اتمنى اليوم اللي تكونين فيه بحضني .. بس قولي لي متى ننزل لهم ونجتمع الحين الساعه 2 ونص الظهر .. تنهدت وهي تحاول تحط يدها على عينها علشان تمنع نور الشمس يدش عينها وتقول : قالوا بعد صلاة العصر يعني بعد ساعتين ونص .. لما يرتاحون راح يطلعون .. يعقوب اسكت شوي ابي انام !! كسرت خاطري وسكت عنها بس لاحظت انها ضعفانه الفترة اللي راحت فـ حبيت اكون طيب معاها عدلت نفسي علشان هي ترتاح بحضني وبديت اقول لها قصه وحبيت تكون من الواقع علشان ما تضحك علي فـ تذكرت قصه اعرفها من زمان وبدت فيها : (( كان يا مكان في قديم الزمان في قطر دوحه الخير عاشوا 3 شباب احلى قصه صداقه عرفتها الدنيا تعرفوا على بعضهم من الصغر .. اول واحد من هالشباب اسمه جاسم ولد تاجر كبير له سمعته بالبلد وفلوسه تعيش عايله من 20 شخص .. ويمكن اكثر .. سمعتها تقول وهي تعدل نفسها بحضني : طيب اسمعك كمل .. ابتسمت لها وانا امسح على شعرها واكمل : والثاني اسمه راكان شاب عادي وحالته الماديه زينه يعني متوسطه بس ولد جدي ماله بالمزح والابتسامه قليل ما تطلع او يشوفونها ربعه على شفايفه .. اما اخر واحد اسمه يعقوب انسان حالته الماديه تعبانه والحاله لله بس صابر وانسان صاحب ضحكه وبسمه مع ان اللي يعيشه مو شوي بس متوكل على الله ثم الله ثم الله .. كنت اتكلم والاحظ انها تستمع لكل كلمه وتفكر بكل الاحداث لدرجه انها تفاعلت مرة تعصب ومرة تضحك ومرة تصيح على اللي كنت اقوله .. لين اذان علينا العصر وقمنا نتوضأ ونصلي علشان نطلع ونرتب للقعده برع على العشب .. *** اشوف فيصل وهو يركض وراء اليهال صج مو صاحي كل ما اقوله اقعد يقولي لا وناسه احس اني رجعت بـ سنهم .. وعقبها راحت نور وسالم عنه صوب السياير يلعبون اما موزة فـ خذها خالها مني وقعد على الارض وهو يحذفها فجاءة بالهواء ويخليها تموت من الصياح وتصارخ باقوي ما عندها .. اما ندى الصغيرة فـ كانت عند الكبيرة ما رضت تطلع بالشمس .. خايفه عليها وما ترضى احد يزعجها صج دلوعه .. تكلمت وانا اسحب موزة بنت العنود عندي واقول: فيصل حرام عليك بتجيب لها ذبحه صدريه .. ههههههههههههههههههه ضحك فيصل وهو ما زال ماسك يد موزة ويعضها مرة ويبوسها مرة ويقول : فديت سميت امي ! حياتي هالصغيرة ياربي احبهااااااااااا .. سحبت موزة مرة وحده لحضني والصغيرة كانت تحضني بـ قوة من الخوف وقلت : حرام عليك شوف شلون خايفه منك ..؟ ابستم لي فيصل وهو يطالع وراي وهو يقول : قلبي خلج من موزة .. لو قلت لج ان السيد بدر ...... ال ....... وقف وراج ايش راح تعطيني .. !! هههههههههههههههههههههههه ضحكت من كل قلبي وانا اشوف حركات فيصل وكلامه اللي يعقد وقلت اسماء: حبيبي شبلاك مريض بدر ما راح يجي الا على الصيف .. واذا لفيت وما لقيت احد عادي اضربك في بنت اختك .. لفيت وانا ما زالت اضحك على فيصل وكنت اضم موزة بصدري عدل علشان احذفها على خالها بعد ما اتاكد .. بس لحظه !! مش عارفه كانت لحظه هدوء والهواء هو الوحيد اللي كان ينطق .. ما كنت اسمع صوت اليهال وهم يصارخون احس ان الدنيا وقفت باللحظه اللي كنت اشوفه أي اشوف بدر واقف وراي ويضحك لي وهو لابس بدله جينز غامق وتي شيرت ابيض نص كم ومكتوب عليه “Doha” بالازرق الغامض وشعره واصل نص كتفه وعارضه مرتب بشكل حلو .. ما كنت متخيله او مصدقه ان هذا بدر لين قال بدر: شدعوه ما راح تسلمين علي والا سي فيصل غط الجو علينا ..! يارب ارحمني صوته وربي صوته ما قدرت امشي والا حتى اقول شي وقف فيصل جنبي واخذ موزة مني وقال فيصل: هذي مفاجئتي لج روحي لاخوج .. اول ما تخلصين من الفلم الهندي احذفيني بـ موزة .. طيب .. بدون مقدمات انفجرت ضحك على كلام فيصل وانا اركض صوب بدر وحشني والله وحشني .. كان فاتح لي يده وهو يبتسم لي حضنته بقوة لصدري اغلى ما املك قدامي اخوي وصديقي وحبيب قلبي بحضني .. كنت اصيح وانا اضحك وبـ نفس الوقت اضمه لصدري .. تكلم بدر بعد ما بعدني عنه علشان يسلم على فيصل وهو يقول : اخبار النسيب ..؟ رد فيصل وهو يطالع ساعته ويقول فيصل: بخير جعلك بخير ..بس ليش تاخرت توقعت تكون هني من نص ساعه ..؟ ابتسم بدر وبينت بعينه نظرة غريبه علي وهو يقول: بدر: كنت بالشاليه كنت احسبكم هناك ..؟ بعد السلام واخذ الاخبار قعدنا على الارض وبدينا نسولف عن كل شي واي شي وخصوصا عن بدر واسبانيا واهل البحرين وخليفه الصديق الجديد لبدر لين جاوا باقي الاهل وهم مبسوطين بشوفه اخوي .. *** حركات يده مدروسه ومحفوظه وهو يتكلم .. انا اسعد انسانه بـهالعالم احبه احب كل شي فيه كنت اراقبه وهو يتكلم مع امه ونور ويشرح شلون كان الطواف وجو مكه .. احسه مرتاح ومبسوط وراضي وهذا اللي مخليني احس بالرضا مسكت بطني وانا متاكده ان هالبيبي راح يكون اسعد ما دام عبدالله هو ابوه .. ضربه خفيفه على كتفي خلتني اصحى من حلمي وانا اشوف ابتسامه نور لي وهي تقول بـ همس :الله على الحب اللي طالع من عيونج يالجازي .. ابتسمت لها وانا امسك يدها واقول : يالله يا جماعه ترى الكل ينطرنا برع .. الساعه الحين 4 ونص ..! وقف عبدالله وهو يساعد امه على الوقفه ويسند لها علشان تمشي وياه اما نور مشت جنبي وانا امسك يدها واقول بصوت هامس وعبدالله يمشي قدامنا : احبه يا نور .. ليش ما عرفته من قبل .. كنت غبيه يوم كنت البنت الطايشه .. بس الحمدالله ربي راضي علي وايد والدليل عبدالله واهله والبيبي .. هههههههههههههههههههههههههه ضحكت نور بصوت عالي وهي تشوف انفعالي الواضح وضحكت معاها وصلنا وشفت اسماء واليهال واثنين من الشباب بس ما عرفت من هم لين لف فيصل يسلم على خالته وعلى عبدالله وقفت البسمه بـ شفايفي ومسكت يد نور بقوة وضربات قلبي بدت تزيد بشكل غير طبيعي .. هذا فيصل اللي حبيته قبل او تجاهلت حبه مسكت نور يدي وهي تقرب مني اكثر وتقول : وقفي انفعالج ترى عبدالله مو طاير وشوي شوي على نظرات عيونج وخلي الرجال يعرف يعيش بدون احراج انتبهت لكلام نور وانا اقول لنفسي " الحمدالله انها ما تشوف شي ثاني " والكل كان يضحك على خالتي واسماء ونور رفعت عيني من جديد بس هالمرة لعيون عبدالله اللي كان يطالعني وهو يبتسم بكل حب لي .. بهالحظه عرفت ان الحب اللي شفته او حسيته ما كان الا لعبدالله رن جوالي بنغمه رساله مسكت الجوال وانا اسمع سوالف البنات وخالتي ام عبدالله اللي كانت تسال عن اهلي وانا ارد عليها : الحين جاين !! وبـ نفس الوقت افتح الرساله اللي كانت من عبدالله ومكتوب فيها كلام احرجني : كون يمك الف هنياله اليوم من قعد هالليله يمك .. انا احبك واحب كل حرف باسمك وانا احس يجرى سوى دمي ويا دمك .. وكون يمك ..كون احضنك كون ابوسك كون اشمك كون احط راسي على صدرك كون اظمك انا الي تمنيت ابوسك وانا الي تمنيت اشمك وانا الي تمنيت احط راسي على صدرك بلكي خدي يزيح همك ناري ما تطفى ولا نارك طفت ..وعيني قبلك تبجي إذا عينك بجت الي متى يا حبيب تظل من أيدي تشطر وألمك اليوم قلبي لبابكم بالليل أخذني واسمع اهلك كلهم ملطمين يمك .. انت بطرف لساني ولا اقدر اصيحك واهلك براحتهم يصيحون باسمك .. كون يمك والله لو تعرف بحالي قلبك يركض على الباب قبل جزمك .. اذكر ايام اسألتني من يحب محبوبه اكثر ومن اقلك انا اكثر تنقهر ويفور دمك .. كون يمك ..واذكر ايام على بابي جيتني محمل هموم ومن شفتني تبسمت وانزاح همك كون يمك ..وهسه جيتك من دموعي تخيل يمك .. اليوم روحي تعاندت وياي وتريدك حبيبي ..بيا طريقه اوصل إلك وشلون افهمك ..كون يمك الف هنياله الي قعد هالليله يمك ..كون يمك احبج يالجازي حسيت بكل انواع الاحراج وانا ارفع عيوني له من جديد وهو يطالعني ويبتسم وكل حركه منه او من شكله تخلي قلبي يضرب بالثانيه مليون ضربه .. ما انتبهت لاهلي اللي جاوا وقعدوا جنبي والا لندى اللي كانت تكلمني لاني عشت غرام عبدالله وانا اشوف عيونه بس .. *** كنت مرتبك وانا اشوفها ما بين البنات احس انفاسي تطلع مني حارة وجسمي يرتجف احاول ابعد نظراتي عنها بس مو قادر .. في شي يجذبني لها وبشكل كبير كنت اسرق النظرات لها وهي تضحك او تعدل شيلتها او حتى وهي سرحانه بنظراتها للارض كنت ابي اعرف اسمها حتى لو كان اول حرف منه وبـ نفس الوقت كنت خايف احد من اخوانها يشوفني وانا اراقبها .. ااااااااااااااه يا قلبي طلعت غصبن عني بـ نفس اللحظه اللي حط فيصل يده على كتفي وهو يهمس لي ويقول : سلامتك من الاه وانا اخوك ..؟ قول شفيك ! رفعت راسي له وانا مستحي ومنحرج من نفسي اليوم بس اليوم شفتها وانا مهزوز مش على بعضي وخفت أي احد يشك فيني وفقت وانا اقول : بعد اذنكم شباب شوي ابي فيصل بكلمه راس .. وقف فيصل بعد ما اذنوا لنا مشيت قبله وهو وراي كنت امشي صوب سور البحر وقفت انطر فيصل يجي جنبي واول ما حسيت فيها سكت لمده خمس دقايق وعقبها قلت بدر: تذكر يا فيصل يوم قلت لك واحنا على البحر ان اسوم تبي تزوجني وانا خايف على البنت اللي راح تاخذني وانا ما اقدر اجيب عيال والامل عندي ضعيف بشوفه ولد او بنت لي .. وقفت عن الكلام من جديد علشان ارتب اللي ابي اقوله وبديت : تذكر يوم طلبت منك توقف معاي وانت طلعت اخ لي وقدرت توقف اسماء عن طلبها !! اذكر أي اذكر يا بدر .. بس ايش اللي خلاك تقول هالكلام الحين .. ايش المناسبه ! تكلم فيصل وهو يطالعني بالوقت اللي كنت اطالع البحر تنهدت وقلت وانا احس بطعنات بقلبي لاني مش مصدق الاحساس اللي احسه : لقيتها ..! البنت اللي اتمناها لقيتها يا فيصل بس خايف والله خايف .. لفيت عليه وانا اشوف ابتسامه حلوة على شفايفه وهو يقول فيصل: توكل على الله .. وخل ايمانك بالله قوي والزواج نص الدين وانا اخوك .. ارتاح قلبي بكلامه الحلو والطيب لفيت اطالعه من جديد بس هالمرة وانا منحرج اكثر من قبل وقلت : تدري ليش تاخرت اليوم وما جيتك بالحديقه بدري .. هزا فيصل راسه بلا وهو ينطرني اكمل وقلت بعد فترة : رحت الشاليه احط الشنطه عند الباب بس حسيت بـ حركه غريبه بالمطبخ ابتسمت وانا رايح صوبه لاني توقعت اسوم واقفه فيه .. بس اللي شفتها كانت ..!! ايش اقولك يا فيصل كانت عذاب تسولف مع نفسها وتقرر ايش تاخذ من الثلاجه صوتها كان حلو وهادي وناعم .. تصدق بدل لا اطلع وقفت متخشب على الباب اللي تسندت عليه بكل ثقلي وانا اشوفها .. اول ما لفت انصدمت فيني بس انا انصدمت بعيونها و وجهها الملائكي .. فيصل ما اعرف ايش اقولك .. تكلم فيصل وهو يمسك كتفي ويقول : كنت تراقبها ..؟! تكلمت بسرعه علشان ما يفهم غلط وقلت : مو بيدي يا فيصل هي خافت مني وانا خفت من نفسي عليها .. ياما شفت بنات وخصوصا باسبانيا والا وحده حركه اللي بداخلي .. حاولت اكلمها صدتني ويوم سالتها انتي مين هاوشتني وقالت انت من ..؟ او ما عرفت ان اسماء اختي قالت انك نسيبهم بهالحظه كل اللي عرفته انها اخت محمد نسيبكم ؟؟ فتح فيصل عيونه وهو يمسك كتفي ويقول : ايش اخت محمد ! كنت حاس انه خايف بالوقت اللي وقف محمد عندنا وهو يقول : شفيها اختي ! لفينا صوبه والكل مرتبك وخصوصا فيصل اللي كان على وشك انه يتكلم بس وقفته بصوتي وانا اقول : ابي اقرب منك .. علشان جذي سالت فيصل وقلت له ايش شرايك اخطب اخت محمد ..! *** دخلت وانا متاكد اني تاخرت على الجماعه الساعه الحين 7 ونص بالليل والبواب قال ان رقم الشاليه الخاص بـ يعقوب 12 وقفت سيارتي بالمواقف ونزلت مع شنطتي الصغيرة ومشيت وانا اطالع الناس اللي يسوالفون واللي يلعبون مع عيالهم واللي يمشون على البحر.. ومع كل ضحكه اسمعها كنت اضحك معاها ما اعرف ليش بس كنت مستانس اني بـ قطر .. وقفت عند الشاليه رقم 12 وطالعت الباب المفتوح خذت جوالي وركبت الدرج وبديت اتصل بالعنود كنت اطالع الجوال ومش منتبه للي قدامي ضربت بـ جسم صغير وطاح الجوال من يدي ومسكت السور اللي قريب من يدي علشان ما اطيح واثبت نفسي عدل بس الجسم اللي ضربته ثقل حركتي لانه طاح فوقي وانا احاول امسك السور باقوى ما عندي .. كنت اخذ نفس قوي واحاول ابعد اللي بحضني بـ نفس الوقت اللي بحضني يحاول يخلص جمسه من يدي وفجاءة طاحت عيني بعيونها .. وقفت xxxxب الساعه عندي عقلي ما قدر يستوعب الفكرة وقلبي طلع من صدري وانفاسي ضاعت مع الهواء اللي سحبها من اقصى صدري !! نور كانت بحضني وبيدي نور !! طلعت اااه منها وهي تحاول تكون طبيعيه وهي تبتسم وتحاول تغير نظرات عيونها عني وقالت نور: عبدالعزيز .. الحمدالله على السلامه .. اممممممم شلونك ومتى جيت ..؟ كنت افكر ارد عليها او اسكت واخلي الوقت يمر وعيوني عليها اشتقت لها مووووت والشوق ذابحني .. تنحنحت وكحيت وكل شي سويته و بعد بعدت عنها ونزلت كم درجه علشان تفصل ما بينا وقلت عبد العزيز: الله يسلمج .. انا بخير ولله الحمد .. ومتى وصلت امممم اعتقد من ثواني بس ..! ابتسمت وهي تبتعد عن الباب وتقول : حياك ادري انك تعبان وتبي العنود الحين بناديها لك ..؟ دخلت الشاليه بـ نفس اللحظه اللي طلعت فيها نور صوب الحديقه كانت تمشي بكل ثقه وخطواتها ادل على شجاعه غير طبيعيه فيها .. ابتسمت لنفسي ودخلت وانا اراقب الشاليه وشلون تصميمه قعدت على اقرب كنب لاني فعلا تعبان من الطيارة والخط الطويل اللي جيت منه .. وااااااااااااااااااااااااو عزوز حياتي وحشتني .. صوت العنود وهي تدخل مع نور الصغيرة خلاني اضحك على خبالها .. ههههههههههههههههههههههه وانتي بعد وحشتيني وخصوصا هالقمر اللي وياج .. ضميت نور اللي كانت جايه صوبي وهي رافعه يدها وتضحك وتقول : بابا احبك وحشتني .. هههههههههههههههههه ضحكنا على دخلت فيصل اللي كان يراقب الاحداث وهو يضحك معانا وقال : حي الله بو الغاليه .. شلونك ..؟ نزلت نور وانا رايح صوبه حضنته ورديت : الله يحيك يا بو ندى .. انا بخير مادامكم بخير .. بلا سوالف فاضيه خالتي والجماعه كلهم برع ينطرونك يالله تعال بسرعه .. تكلمت العنود وهي تمسك يد نور وتطلع من الباب لحقتها مع فيصل واحنا نضحك على خبال العنود ونور .. *** على الساعه 10 ونص وبعد ما تعشوا وناموا اليهال وامي توزعنا الي مجموعتين البنات بـ صوب والشباب بـ صوب .. عند الحديقه كانت شلة البنات اللي كانوا يسولفون عن كل شي واي شي .. وصوت ضحكنا شايل المكان كله .. كنا قاعدين على شكل دائرة وانا اول من تكلم وقلت : لالالالالا من قال اصلا الحب شي حلو وانا متاكده الكل جربه .. تكلمت وانا اطالع العيون الزوجيه العشرة متوجه لي .. ههههههههههههههههه ضحكت وضحى وهي تقول : ندى يا قلبي الحب اللي تقصدينه ما عشته وانا متزوجه ولد عمي والا عرفت الحب معاه .. سكتت وضحى وهي تكمل وشكلها يكسر الخاطر : بس الحمدالله على كل حال .. لفت العنود صوبي وهي تقول : عيل انا ايش اقول .. اللي عشت كذبه الحب وما طلعت منها الا بمصيبه .. بعد الحمدالله على كل حال .. تنهدت وانا اسمع نور اللي قالت : وانا حبيت بس حبي طار بالهواء وشكلي بقعد طول عمري ادوره بالهواء .. لفيت صوب موضي اللي ضحكت وقالت : وانا حبيت زوجج واللي كنت اشوفه الكل بكل بس نصيبي ما جاء الا مع راشد .. الله كريم .. صوت اسماء قطع الكلام وهي تعبر عن مشاعرها : وانا بعد تزوجت عن حب من طليقي الاول بس الوضع والحاله اللي عشتها معاه كانت تكرهني فيه .. لين جاء فيصل وكل اللي عندي اشكر الله عليه .. وبالاخير انطقت الجازي وهي تقول : حالي مو احسن من حالكم بس الحمدالله .. ندى: باااااااااااااااااااال انتوا شبلاكم يعني الحين الحب اللي عندكم مو مكفيكم الصراحه ما عندكم قصه .. تكلمت وانا معصبه عليهم وقلت : انا ندى .. اعترف اني حبيت عزوز بس حبي له كان بالوقت الغلط والزمان الغلط .. بس الحمدالله محمد اخذ حيااااااااااتي كلها ولو يامر عليها اهديه اياها بدون تردد .. سكت وانا اشوف نظراتهم لي ابتسمت لهم وبديت اكلم وحده وحده وبديت بالعنود وقلت : يالعنود علاقتج اللي كانت انتهت من حسيتي بالحب جهه يعقوب يعني زوجج الحين هو سر سعادتج .. لفيت جهه نور وقلت لها : وانتي حبج ما زال موجود عيشي علشانه واثبتي لكل انج قد هالحب لا تضيعينه على شي تافه .. اما انتي وكنت اكلم الجازي : ربي عطاج اللي كل بنت تتمناه مو علشانه اخوي لا بس فعلا عبادي طيب ويستاهل الطيبه اللي ماخذته .. مسكت يد موضي وانا اقول : حب الطفوله مو عيب بس العيب انج تتمادين بالغلط وتركضين وراءه بس اللي اشوفه ان حب ولد العم والاخ هو اللي واضح بعيونج لـ محمد .. اسوم انتي ربي عوضج صبر الايام اللي كانت مع طليقج فـ لله الحمد صبرتي ونلتي .. خلصت من كلامي الموجه لاسماء ولفيت على وضحى وانا امسك يدها وقلت : الايام ما زالت معاج وانتي صغيرة وتوج على الهم وباجر راح تقولين ندى قالت .. لاحظت انهم سكتوا وهم يطالعوني وكل نظرة من نظرتهم تعني الشكر والامتنان ابتسمت وانا اغني اغنيه شيرين بطمنك واقول : امنتك عليا عشان لاقيتني مصدقاك ..وعدتك في وقت الجد جنبك هتلاقيني بسهر على راحتك وراضيه اتعب معاك.. وان متشيلكش الارض انا اشيلك في عيني.. بطمنك يا حبيبي من اولها..سكتنا لو عاندتنا هنكلملها دنيتنا لو تعبتنا من عمالها..بالصبر انا وانت هنستحملها على قدنا هنعيش مع بعضينا ..وحبنا من الدنيا دى يكفينا ده انت وانا ولا عمرنا اتمنينا..غير بيت صغير وباب مقفول علينا انا طول حياتي كنت بحلم لكي وبيك..ومابين ايديك كملت حاجة نقصة فيا من الدنيا مش طمعانة الافحبي ليك..واديني جايه بوعدك دلوقتي بيا انا طول حياتي كنت بحلم لكي وبيك..ومابين اديديك كملت حاجة نقصة فيا من الدنيا مش طمعانة الافحبي ليك..واديني جايه بوعدك دلوقتي بيا بطمنك يا حبيبي من اولها سكتنا عاندتنا هنكملها دنيتنا لو تعبتنا من عمايلها ..بالصبر انا وانت هنستحملها على قدنا هنعيش مع بعضينا..وحبنا من الدنيا دى يكفينا ده انت وانا ولا عمرنا اتمنينا..غير بيت صغير وباب مقفول علينا ضحكنا على بعض بعد ما كانوا يغنون معاي وبصوت واحد حسيت ان النفوس صارت احسن من قبل وخصوصا ان الكل كان يغني بضمير ربي يوفقهم .. في مكان ثاني ودوله غير الدوحه .. بـ ارض الابراج ديرة الدانه الكويت .. كنت انطرها تجي تنام جنبي بس هي خذت وقت طويل .. خفت صار فيها شي وخصوصا انها ادوخ بسرعه من الحمال نزلت من السرير ورحت صوب غرفه الملابس فتحت الباب وانا ادورها بـ عيوني .. لقيتها قاعده على السجاده ولابسه جلالها ورافعه يدها للسماء تدعي ربها .. ارتاح قلبي يوم شفتها بخير قعدت على كرسي التسريحه ونطرتها تخلص .. واول ما قامت قلت : تقبل الله ..؟ ردت وهي تبتسم لي : منا ومنكم صالح الاعمال والنيات .. فطوم:شفيك تراقبني ..؟! هههههههههههه ضحكت وقفت رايح صوبها وانا اكلمها : خفت عليج .. تاخرتي قلت يمكن صار لج شي .. بس الحمدالله انج بخير .. هههههههههههههه ضحكت ضحكه عذبه ناعمه اطيح الطير من السماء وهي تحط السجاده على الكرسي ورايحه صوب الغرفه وتقول : سعد شبلاك .. تراني بخير ولله الحمد .. ! لحقتها وانا اذوب بكل كلمه تقولها وكل تعليق وحركه وقلت : فطوم تدرين اني احبج ..؟ هههههههههههههههه بعد اضحكت وهي تعدل الملاحف وتقول بكل غرور : ادري ..؟ احسها تحاول تنرفزين بكلمه " ادري " قالت وهي تنسدح وترتب الوسايد تحت راسها : قول شي جديد .. ؟ هني انا انفجرت من الضحك عليها وقلت وانا انسدح جنبها واقربها مني ولحضني : تقهريني بس ايش اسوي احبج واحب الارض اللي تمشين عليها .. سكتنا لفترة طويله وكل واحد يعيش افكاره يمكن افكارنا وحده بس كل واحد وطريقته لفت فطوم صوبي وهي تحرك يدها على صدري وتقول فطوم: اليوم راح يجتمعون بالشاليه ... احس جمعتهم حلوة .. وتدري ان عبدالعزيز نزل الدوحه ؟ حضنتها وانا ارد وبـ عيوني نوم وقلت : ان شاء الله دوم فرحتهم عامرة .. واي ادري ان البوس عزيز راح قطر .. تكلمت مرة ثانيه وهي تبتسم لي : طيب متى راح نزور اهلي ..؟ رديت لها الابتسامه ورديت عليها : تونا جاين من عندهم حياتي ما شبعتي منهم ..؟ لا ما شبعت ابي اقعد معاهم اكثر من اسبوع .. ليش ما تخليني عندهم شهر ..؟ تكلمت وهي تقعد عدل وتراقبني وقلت: شهر يالظالمه شهر .. ليش ان شاء الله ..؟ والا ما تبين تشوفني ..؟ هههههههههههههههههه ضحكت وهي تنسدح مرة ثانيه جنبي وترد علي فطوم: سعد انت طول الوقت مشغول .. والحين عبدالعزيز بـ قطر يعني الشغل على راسك وما راح اشوفك الا وانت مهدود الحيل .. كملت وهي تمسك يدي وتقول: انا عندي لك اقتراح وانت فكر فيه على راحتك طيب ..!! سمعيني شنو اقتراحج ..؟ رديت عليها وانا ابوس يدها اللي بيدي وانطر منها تقول اللي تبي .. قالت بعد ما باست خدي : تخليني عن اهلي لفترة معينه علشان تشتاق لي اكثر شرايك ..؟ ههههههههههههه ضحكت عليها من كل قلبي ورديت وانا احضنها : يا قلبي انتي عندي وبين يدي ومشتاق لج عيل اذا رحتي ايش اسوي ..؟ ههههههههههههههههه ضحكنا مع بعض لفترة وعقبها سكتنا من جديد غمضت عيوني واسترخيت وبعد خمس دقايق بس تكلمت فطوم وهي تحط راسها على صدري وتقول : حبيبي ما فيني نوم .. لا تنام وتخليني بروحي ..؟ ما اذكر أيش قلت لاني رحت فيها ونمت بعمق .. **** اشرقت الشمس بـ يوم وحياه جديده على ابطال قصتنا اللي استمتعوا برحلتهم للشاليه الكل كان يعيش اللحظه .. كنت اراقب الجو شلون يا الله شكل السماء حلو ومنعش والهواء صج صج روعه والبحر بألوانه عجيب تنهدت بقوة وغمضت عيوني وانا اذكر لقاء امس بـ عبدالعزيز .. صوت جوالي العالي ازعجني وقف كل تخيلاتي رحت اخذه قبل لا يقيم امي " خالتي ام عبدالله " خذته بسرعه ورديت على المتصل بدون ما اشوف من وانا اطلع من الغرفه رايحه للصاله بالطابق الارضي .. نور:الو نعم ..؟ ...؟ صباح الخير .. شلونج دكتورة نور ..؟ رديت وانا ما زالت اركز على الصوت : نور: صباح النور .. بخير والحمدالله .. من معاي ..؟ صوت الضحكه البسيطه اللي جاتني على الخط الثاني اثارت فضولي وقال : جاسم الدكتور جاسم .. اكيد ما راح تعرفيني وانتي الحين عايشه الجو البحري .. ابتسمت على كلامه لانه يعرف شكثر انا احب البحر ,, صح الدكتور جاسم يعرف كل شي انا احبه يعرف عني اكثر من ما انا اعرف عنه تنهدت وقلت : وانت الصاج الجو عجيب يا دكتور جاسم .. رد علي وهو يقطع كلامي وقال : جاسم بس جاسم !! ومدام انتي هناك اكيد انتي اللي مغيره الجو .. ههههههههههههه ضحكت من قلبي يعرف شلون يغير مزاجي بـ ثانيه وقلت نور: اسفه على السؤال بس متصل بهالوقت 5 ونص الصبح ما عندك عمليه .. ؟! رد وهو ياخذ نفس قوي وقال : انبلا عندي بس تاجلت لين 9 ونص .. وسبب اتصالي النتائج الطبيه للمريضه ندى .. سكت شوي وعقبها تكلم وهو يقول : ندى مريضه سرطان بالدم وهذا الشي مو جديد علينا .. بس الجديد انها تتقبل العلاج بشكل جيد وخصوصا الادويه " الحبوب" والاهم من هذا نفسيتها الصحيه .. انتي تعرفين ايش يعني هذا ..اكيد اعرف .. اذا المريض مرتاح واللي حوله يقدم له الراحه والسعاده اللي يحتاجه راح يتغلب على أي مرض .. تكلمت وانا افتح باب الصاله اطلع من الشاليه رايحه صوب البحر وانا امشي واسولف مع الدكتور جاسم عن حاله ندى والا مهتمه حق احد وقفت عند سور البحر واشوفه شلون يضرب على السور يعلن احتجاجه ابتسمت وانا ارد على السؤال اللي توجه لي من الدكتور جاسم : أي اكيد قدم اوراقي معاك لاني ناويه اخلص دراستي ببريطانيا .. طيب ان شاء الله مع السلامه .. صكرت التلفون وانا ابتسم ما زال صوته وهو يضحك باذني سمعت اسمي لفيت على طول وشفت اخوي عبدالله والجازي جاين صوبي وهم يضحكون ويسالفون مع بعض .. نور:الله الله على الكناري ..؟ تكلمت واانا رايحه صوبهم قعدنا على السور واحنا نسولف .. عبدالله: نور مع من كنتي تتكلمين ..؟ سالني عبدالله وهو يمسك كوب النسكافيه بيده ويطالعني نظرة معناتها الجواب والا غيره .. ابتسمت ورديت: الدكتور جاسم .. كلمني لان نتائج ندى وصلت وظهرت بـ نفس المرض .. سكت وانا اشوف الحزن بـ عيون الجازي وكملت نور: احنا نعرف من زمان ان ندى مريضه بس اللي ما كنا نتوقعه ان العلاج والجو العائلي اللي هي تعيشه هو اللي مساعدها على الضحكه .. ولله الحمد ! طالعت ساعتي وقفت وانا اقول : والحين لازم اصحي امي واعطيها دواءها قبل لا تزعل علي .. *** كنت اطالعها وهي تمشي واثقه الخطى كانها اميرة تحكم العالم بيد من حديد .. بس من داخلها قلب مجروح وحزين الله يعينج يا نور .. الجازي:حبيبي عيونك لا تطيح .. لفيت صوب الجازي اللي كانت تكلمني وضحكت من كل قلبي يوم شفت الغيرة بـ عيونها وقلت : لا تخافين ما احد سكن هالقلب الا انتي .. بس نور تكسر خاطري .. ابي اسعدها بس للاسف مو قادر .. مسكت يد الجازي اللي بدت تتكلم وعيونها مليانه مشاعر الجازي: الحمدالله اللي ربي رزقني فيك وعطني بالدنيا فرصه واذا عن نور ربي راح ينور طريقها .. امين يارب امين .. عبدالله:المهم عرفتي انها راح تسافر تكمل دراستها برع .. تكلمت وصوت البحر يضرب بقوه على السور .. ردت الجازي وهي توقف وتمسك يدي علشان اقوم : أي عرفت امس خبرتنا وحزنا بس ايش نسوي البنت عنيده .. وقفت ومشينا على البحر نسولف ونضحك ونختار اسم الولد او البنت اللي بالطريق .. كنت احس بـ سعاده غير طيبعيه وما توصف ويدي بيد الجازي مشينا لين تعبت الجازي وبدت تتسند على كتفي وتترجاني ارجع .. كسرت خاطري وقررت ارد مع اني ابيها تمشي علشان تتعود وصلنا عند الشاليه ودخلنا ولقينا نور تترجى امي الا تاخذ الدواء وهي رافضه ضحكنا على امي اللي تتغلى علينا ورحت جنبها وقلت عبدالله: شدعوه يا ام عبدالله .. الحين البنت تحاول وانتي صادتها .. ؟! ههههههههههههه ضحكت نور وهي تقولي : بس هذا اللي قدرت عليه .. جاءت الجازي وهي تاخذ الدواء من يد نور وهي تبتسم لها وتقول : اصلا القمر ما راح ياكل الا من يدي صح يمه .. ههههههههههههههههههههه ضحكت امي علينا وهي تقول : مو ناقصتكم الا ندى ونخلص .. شفيها ندى يالله اعترفوا .. صوت ندى وهي تدخل من باب الشاليه وهي شايله ابراهيم ولابسه بيجامه ضحكنا كلنا .. تكلمت امي وهي تحرك يدها علشان يجيها ابراهيم : انا ما ابي الدواء .. وغصب يعطوني اياه ..؟ سلمت علينا ندى وقعدت جنب امي وهي تقول : والا انا ابي الدواء بس ايش نسوي يالغاليه .. على الاقل يساعدنا .. سكتنا لثواني واحنا نطالع بعض شكل امي وندى يكسر الخاطر بس ايش نسوي هذي حكمة ربنا .. : يا ام ابراهيم مو جنج نسيتيني برع .. صوت محمد وهو ينادي ندى رجعنا للواقع .. ندى:ههههههههههههههههه ويه نسيت محمد برع ..؟ تكلمت ندى وباللحظه اللي رحت فيها عند الباب ادخل الرجال اللي احترق بالشمس .. **** اليوم الغدى عندنا والكل كان مشتط ومستعجل علشان كل شي يكون مرتب وجاهز .. كنت مع امي و وضحى وصافيه وندى و اسماء ونور وحتى العنود بالمطبخ .. موضي روحي راشد يناديج ..؟ هذا صوت صافيه اللي واقفه عند باب المطبخ .. غسلت يدي ومسحتها وانا اكلم وضحى علشان تقطع السلطه .. طلعت من المطبخ رايحه الطابق الثاني للغرفه اللي تجمعني بـ راشد وكنت ابتسم وانا اسمع صوته وهو يهدي محمد الصغير ويقول : لا يا قلبي ليش تصيح الحين الماما راح تجي .. وقفت عند الباب وانا اسمع ايش يقول وكمل راشد : اغني لك حبيبي اغني لك .. ومحمد مازال معصب ويصيح وفجاءة سمعته يقول : حبيبي الله يخليك اسكت .. الله يهداج يا موضي .. ههههههههههههههههههههههههه ضحكت وفتحت الباب وانا اطالعهم وقلت لراشد : ليش ما غنيت له تراه يحب ماما زمنها جايه .. ابتسم لي راشد وهو يوقف جاي صوبي وشايل محمد : يوم انج واقفه عند الباب ليش ما جيتي تاخذينه .. سوى لي فلم عند الرجاجيل ما يبي يسكت .. لا يكون مريض ..؟ شفت الخوف بـ عيون راشد وهو يسالني يا ربي عليك تجنن .. رديت وانا اخذ منه حمود : لا مو مريض يمكن جوعان ويبي ينام .. روح للرجاجيل انا بتصرف معاه .. شفته ما زال واقف ويطالعني ويبتسم استغربت منه وكررت كلامي : راشد روح انا بقعد معاه ..؟ ومازال واقف رفعت حاجبي وتوني بـ تكلم الا انا ومحمد بحضنه !! راشد: قسم بالله مشتاق لكم مادري ليش .. احس اني فاقدكم من زمان ما اجتمعت وياكم .. تكلم راشد وهو يشد من حضنه لنا قلت وانا احاول ابعد عنه ومحمد الصغير يضحك موضي: راشد الله يهداك ثيابي وصخه وريحتي طباخ .. راح توصخ عمرك !! ابتعد عنا وهو يبتسم لي ويلعب بشعر حمود ويقول : ربي يخليكم لي .. طلع واستغربت منه أي اعرف انه يحبنا بس اليوم هو غريب او ان الحب عندها زايد شوي ابتسمت ونزلت محمد الصغير على السرير وطلعت له ملابس جديده من الشنطه واخذت فوطه وشليته ودخلت فيه الحمام " عزكم الله " اسبحه وعقبها ارضعه واخليه ينام عند عمتي " ام محمد " بعد ما خلصت نزلت تحت وحطيت محمد عند جدته ودخلت المطبخ وانا احس ان في شي صار بس الكل ساكت وندى مو موجوده ! عسى ما شر شبلاكم ساكتين .. ؟! تكلمت وانا مستغربه والكل يطالع بعض تكلمت اسماء وقالت : صدقوني انا ما ادري عن الموضوع حالي من حالكم ! لفيت صوب اسماء وقلت : شسالفه ابي اعرف .. ندى وين! لفيت اطالع العنود اللي تكلمت وقالت بصوت شبه واضح : مع محمد ..! بالشاليه الثاني ..!! *** الوحيده اللي مستانسه كانت ندى اما انا ومحمد كنا ساكتين ونطالع ندى ونرد نطالع بعض كنا نشوفها وهي توزع ابتسامات يمين ويسار مستانسه اكثر من الكل .. اووووووووه شبلاكم يعني الولد ما غلط يبي يتزوج وخطب وضحى .. يعني شي حلو !! تكلمت وانا احاول اوقف حماس ندى الواضح : يا قلبي الموضوع مو جذي .. البنت عندها عيال عم ! سكت باللحظه اللي تكلم فيها محمد وقال : يا عمري .. فيصل صح .. صج اني مستانس على بدر لانه رجال وراعي مواقف والكل يتمناه لاخته او بنته بس لا تنسين ان وضحى عندها عيال عم يمكن يخربون عليها ويقولون احنا احق من الغريب .. سكتنا واحنا نشوف شكل ندى اللي بدء يتغير وجهها ياخذ العصبيه ولونها الحنطي يتغير للون الاحمر وهي تقول : يعني لو انت خطبتني وجاء عبدالعزيز وقف هالكلام وقال انا احق منك يا محمد راح تسكت وتتفرج على الموقف والا راح تتصرف !! كلام ندى صدمني اكثر ما صدم محمد اللي حسيته زعل من كلام ندى وبـ نفس الوقت كلام ندى عدل .. احنا وين عايشين ولد العم يخرب على بنت عمه وبالاخير ياخذ غيرها بس ما قدرت اقول هالكلام خليته لنفسي خفت يزعل علي محمد .. ما قلت هالكلام علشان تفكر غلط بس فكر ان اختك مطلقه من ولد عمها والكل ما يعرف السبب .. محمد فكر هذا زواج وربي رزقها بالافضل وانت تدري انه احسن من عيال عمك .. انا ما اقصد انهم مو اوكي بس الزواج قسمه ونصيب ولو كانوا يبونها كان جاوءا بعد طلاقها من اخو موضي والا ما حلت بعينهم الا الحين يوم ربي وفقها وجاب لها نصيبها.. صدقني يا الغلا وضحى راح ترتاح وتنسى كل اللي مضى وبتكون مبسوطه اذا حست انكم معاها مو ضدها وان القرار بيدها .. بس انت كلم ابوي اليوم خلنا نستانس لا تحرمون وضحى الفرحه انكم شاورتوها محمد الله يخليك فرح قلبها تراها تستاهل .. تكلمت ندى وهي توقف علشان تطلع من الشاليه بـ نفس الوقت اللي وقف فيه محمد وقال : البنت هذي تجيب الكلام بالصميم .. واذا وضحى تبيه ما احد راح يوقف شي طيب .. قول لبدر يخطبها من ابوي اليوم بعد الغدى والكل بالمجلس راح يشهد له .. طلع محمد وراء ندى وقفت افكر بكلام الاثنين وانا ادعي ربي يخليهم لبعض .. رن جوالي ورفعته وانا اشوف اسم بدر على الشاشه : مرحبا النسيب ..؟ رد وهو شبه يركض : بشر ايش قال ..؟ تنهدت وانا اطلع من الشاليه رايح للمجلس : يقولك كلم ابوه اليوم بعد الغدى وابشر بعزك ؟ سكت بدر وسكت انا معاه وبعد صمت طويل قال : اسوووم اتصلت فيني وما خلت كلمه ما قلتها .. تصدق انها معصبه علي .. ههههههههههههههههههههههههههه ضحكت عليه وهو يشرح الكلام اللي نقال وقلت له : هذا انت اخوها حبيب قلبها ودلوعها عيل انا ايش راح تسوي فيني .. تطردني من البيت وتطلب الخلع .. ههههههههههههههههههههههههههههههه ضحكنا على اسماء وسوالفها .. وصكرت من بدر ورحت صوب المجلس بعد ما نادني عبدالله لانهم حطوا الغدى ... *** ...؟ يا بعد قلبي .. وانت بعد واحشني موت ومشتاقه اجي الدوحه علشان اشوفك ..؟ والله ما ادري انطر سعد يخبرني متى !! طيب يا قلبي مع السلامه .. صكرت التلفون بالوقت اللي سعد كان واقف على الطوفه ويطالعني وانا اسولف وقلت : تو ما نورت الشقه ..؟ من كنتي تكلمين .. من هذا اللي مشتاقه له لهدرجه ! فتحت عيوني مو مصدقه سعد يشك فيني والغيرة بـ عيونه حطيت نفسي غبيه وقلت : من تقصد ..؟ فاطمه لا تستعبطين انا سامعج وانتي تقولين له مشتاقه اجيك الدوحه ؟! من هذا ابي اعرف .. اول ما شفته قرب مني وهو معصب تكلمت بسرعه وقلت : عبادي كنت اكلم عبادي .. ! كنت قاعده على الكنب وما قدرت اوقف علشان أواجهه بس كنت خايفه من قلب انا بديت وانا استحمل .. والله العظيم ما اكذب .. روح المكالمات المستلمه وشوف ..؟ كلمته وملامح وجهه هدت شوي وتنهد وهو يبعد عني ويقعد على الكرسي اللي جنب الممر وقال سعد: ليش سويتي نفسج غبيه .. كان قلتي من اول ما سالت ..؟ رديت عليه ورجلي ترتجف من الخوف وقلت : يعني انت تتوقع اني اعرف غيرك والا تشك فيني ..؟ وبعدين شلون نسيت اني اهلي بـ قطر ! وقف وجاء صوبي وقعد على الكنب اللي انا قاعده على طرفها وقال : مو سالفه شك .. بس اول مرة اسمعج تكلمين عبدالله بهالطريقه .. يمكن هالشي اللي وترني وكنت ابي اتاكد بس لا اكثر والا اقل .. لف وجهه جهتي وهو يشوف المسافه اللي ما بينا وقرب مني شوي وانا لصقت بالكنبه من قلب وقرب اكثر وبعدها قام وقعد جنبي وهو يضمني وقال : ما ابيج تقولين هالكلام لغيري .. لي انا وبس ..؟ ضربات قلبي وصلت الحنجرة عندي وانفاسي كانت سريعه ودموعي بـ عيوني وقلت : ان شاء الله .. قعدنا تقريبا ربع ساعه على هالوضع وهو يحضني مرة ويبوسني مرة وعقبها قال : انا يوعان .. صدقيني بطني لاصق بـ ظهري ما تشوفين .. ههههههههههههههههههه ضحكت على وصفه وانا احاول اقوم من الكنب وقلت : كان قلت من الصبح ! مسك يدي ورجع قعدني وهو يقول : على وين !! استغربت ورفعت حاجبي وقلت : انت يوعان بروح احط لك غدى .. علشان تتغدى وتصلي العصر لان الحين بـ ياذن وعقبها تنام .. هههههههههههههههههههه ضحك وهو يقول صار لنا سنه ونص داشين على السنتين ولين الحين ما تعرفين ايش اقصد بالجوع اللي عندي .. انصبغ وجهي يوم عرفت ايش يقصد وانا ادزه واقوم من على الكنب بس هو اسرع وقف معاي وحضني وقال : بروح اصلي اول شي ولما ارجع راح اكل لاني صج يوعان .. ابتعد عني بعد ما باسني على خدي وطلع من الشقه وانا ما زالت مكاني اطلع الباب اللي تصكر .. يارب احفظه لي يارب طلبتك .. *** على المغرب تقريبا بعد الصلاة على الساعه 7 كنا مجتمعين بالصاله الكبيرة اللي بالشاليه وما في أي صوت من المجموعه اللي قاعده .. وضحى قعده جنب ندى و موضي والجازي قريبه من امي وصافيه جنب محمد اخوي وانا بالجهه الثانيه مجابل ابوي اللي قال : طيب الرجال ما ينرد بس البنت لها عيال عم ..؟ رد محمد بسرعه وقال : وينهم يوم تطلقت وضحى والا الحين راح يتكلمون .. يبه واللي يرحم والديك البنت كبيرة .. وانت قلت قبل يا تتزوج او تموت .. سكت ابوي وهو يطالع وضحى وقال : يا محمد وضحى بنتي .. ويومي قبل يومها وما في اب يتمنى لعياله الضر .. سكتنا باللحظه اللي تكلمت فيه وضحى وقالت : يبه اذا ما تبي مو لازم بس الله يخليك لا تقول جذي رضاك اهم شي .. تكلمت موضي وهي اطالعني : عمي الله يهداك عيال عمي كلهم متزوجين ما في الا الصغار وينهم وين وضحى بالعمر .. احس ان موضي تعمدت تقول هالكلام وهي اطلعني لاني اعرف عيال عمي عدل وقلت بعد ما فهمت الفكرة : وانتي الصاجه .. يعني نزوجها ياهل بدل ما يعيشها تعيشه هي .. الصورة وضحت براس ابوي اللي بدء يحك لحيته وقال : خلاص عيل الشور شور وضحى ومن بعد رايها انا مالي راي .. شفت الضحكه بـ عيون الكل تكلمت صافيه وهي توقف وتحط يدها على خصرها : يعني شنو .. عيال عمي بـ سني .. اذا كبروا راح يخطبوني .. ههههههههههههههههههه انفجرنا من الضحك على صافيه اللي عبرت عن رفض تام للزواج من عيال عمي .. تكلمت الجازي وهي تحذف صافيه بعلبه الفاين وتقول : انتي خلصي دراستج بالاول وعقبها قولي اللي تبين .. رفعت راسي اشوف مرت اخوي اللي كانت تراقب محمد بـ اعجاب وشفت نظرت وضحى اللي اطالع ندى بـحب ابتسمت وفهمت ان السالفه فيها قصه بس بدر يستاهل التضحيه .. يا الله يا جماعه العالم ينطرون برع واحنا هنا صوت صافيه اللي كانت تصارخ .. تكلمت امي وهي تقول : يالفشيله عيالنا الصغار عندهم قوموا يا بنات قوموا ... طلعنا برع وعلى طول توزعوا الجماعه اما انا مسكت موضي ودخلنا المطبخ لانه اقرب مكان وسالت: ابي افهم ..؟ شلون بدر شاف وضحى !! انصدمت موضي وهي تقول : انت شتقول ..؟ شلون يشوفها !! ابتسمت وانا اعيد السؤال : شلون شافها .. قولي ابي اعرف الموضوع ..؟ حسيت ان موضي خايفه وهي تحاول تبعد عني بس الوضع عجبني جدا انها بحضني وانا استجوبها وهي خايفه وقالت : اخت بدر هي اللي حطت وضحى براس اخوها .. اليوم خبرتنا و وضحى عصبت ..؟ كنت حاس انها تكذب علي رفعت حاجبي علامه على اني مو مقتنع وهي فهمت الحركه وقالت : راشد انا مالي خص .. اختك عندك .. والا تفكر ان وضحى تسوي الغلط والا تجيبه لاهلها .. ترى البنت عقلت وبدت تخاف الله قبل لا تخاف منكم ومن الناس افهم يا راشد افهم .. بدون شعور مني بستها على شفايفها وهي معصبه علي كان شكلها حلو لدرجه انها اغرتني بدون ما تحس .. موضي تخشبت بحضني وهي ادزني واول ما بعدت عنها قالت وهي تهمس : احنا بالمطبخ ..! ههههههههههههههه ضحكت وانا ابعد عنها واقول : احلى مكان !! *** جونا ربشه بعد ما صلينا العشاء عرفنا ان وضحى خطبها بدر بس البنت تفكر واصلا احنا متاكدين ان وضحى مواقفه بدون تفكير ... قعدنا على العشب وتكلمت خالتي ام عبدالله وهي تقول لوضحى : اسمعي لا تصيرين خبله سوي عرس وعزمي كل اللي يعز عليج لا تقولين مطلقه والا ارمله ترى والله ما احد يفكج من يدي احد .. هههههههههههههههههههههه انفجرنا ضحك على خالتي اللي تبي تسوي عرس وتخطط شلون بيكون وين راح يكون .. تكلمت ام محمد الكبيرة وقالت : ابشري عرس بنتي راح يكون احلى عرس .. مو جذي يا اسماء .. تكلمت اسماء اللي كنت مستانسه اكثر من العروس نفسها وقالت : انتي تامرين امر .. كم وضحى عندي وكم بدر .. ههههههههههههه ضحكنا مرة ثانيه يوم قالت ندى : يووووووووووووووه بدوا الحين شغل الحموات .. العنود شبلاج من الصبح سكرانه ضحك .. كلمتني موضي اللي كانت قريبه مني وقلت : من اللي اشوفه واللي احسه .. تبون الصج !! سكتوا كلهم يطالعوني وهم يبون الصج مني وقلت : يوم قررت نسوي هالطلعه مو علشان وضحى يخطبها بدر والا علشان نكتشف ان احنا اهل .. كنت مخططه .. سكت شوي وانا اطالع نور وقلت : كنت مخططه على نور ترد لعزيز .. سكت والجو صار هادي جدا والكل كان يطالعني وهم مستغربين من الفكرة قلت وانا احس اني راح اختنق : بس اللي صار اني جمعت قلوبنا مع بعض سوى كان بزواج او بـ جمعه اهل .. لا تقطعون وخلوا هالجمعه تتكرر مو شرط في الشاليهات .. كل خميس وجمعه في بيت احد حتى لو نطلع الكورنيش او حديقه او أي مكان بس نكون اهل ونشوف بعض ونشتاق لبعض .. تغير صوتي وبديت اصيح بقوة الكل كان حولي والكل يحاول يسكتني وتكلمت ندى وهي تقول : وصار الفلم الهندي لازم دموع لازم يعني نصيح ونجمع الجيران علينا .. هههههههههههههههههههههههههههههه ضحكنا مرة ثانيه بس هالمرة والكل راضي عن اللي صار واللي استوى وكملت ندى وقالت : والله يبي لنا نغني .. وناااااااااااااسه صوتنا بيطلع حلو ..؟ ههههههههههههههههههههه الضحك اللي سيطر علينا كنا حلو واليهال يركضون ويضحكون بس ما يعرفون شالموضوع .. قالت صافيه وهي ترفع يدها وتقول : انا انا عندي اغنيه حلوة .. تكلمت نور وقالت : شدعوه قاعده بالمدرسه ترفعين يدج ..؟ هههههههههههههههههههه ضحكنا وردت الجازي : اطربينا يا الخبله .. قالت صافيه بكل ثقه : سهرتنا الليلة خلوها صباحي حلوة محبتنا وفينا الهوى صاحي نعشق بعض واحنا في الحب مجتمعين من قدنا الليلة أنا ونور العين غنينا بكل حب لان كلمات الاغنيه راكبه على الوضع اللي نعيشه .. كنت قاصده شي بس اللي كتبه ربي صار واللي صار عكس اللي تمنيته بس الواحد يقول الحمدالله على كل حال .. كنت مبسوطه وانا معاهم ومبسوطه اكثر انهم يشوفوني اخت وصديقه وحبيبه لهم .. *** ااااااااااااااه يا ظهري .. كله من فيصل خلاني اشيل الكراتين وراء بعض .. ههههههههههههههه ضحكت علي وانا انسدح على السرير .. وقلت لها : تضحكين هاا طيب يا ندى بدل ما تقولين .. اسملى عليك يا قلبي تبيني اسوي لك مساج تبي شي حار يريح اعصابك .. هههههههههههههههه صوت ضحكتها زاد وعيونها بدت ادمع شكلها حلو وهي تضحك وبيجامتها عبارة عن شورت لين الفخذ مع بدي ضيق بدون اكمام لونه رمادي مرسوم عليها ميني موس معطتها شكل عجيب .. احسها طفله توها تتعلم الضحك كان ودي اضمها لصدري بس هي بعيد عني وبيدها ابراهيم اللي كان يرضع علشان ينام وقالت ندى: حبيبي انا ما اضحك عليك والله صدقني .. بس شكلك وانت تشرح يضحك .. ابتسمت لها وانا اعدل نفسي على السرير واقول محمد: خسارة باجر راح نمشي .. الصراحه الجمعه والجو والاهل والبحر شي حلو .. هزت راسها وهي تحط ابراهيم على السرير اللي قريب منها وهي تقول ندى: ادري والله حسيت اني عايشه بالجنه .. بس ان شاء الله نكررها بعدين .. سكتنا وكنت اراقبها وهي تنسدح جنبي وتلف جهتي علشان تشوفني وتكلمت وانا احس اني مسحور بـ عيونها وقلت : قبل لا نتزوج كنت اعرف بنت .. شفت شكل ندى تغير وهي اطالعني بـ نظرة تعني اسكت ما ابي اسمع بس انا كملت كلامي وقلت : أي اعرف بنت سرقت النوم من عيوني .. تصدقين حبيتها وانا ما اعرف هي من او ايش اسمها كل اللي عندي لها صورة قديمه .. شفت شكلها تغير وهي تبتسم وخدودها تحمر اكثر وقلت : كنت لما انام احلم فيها لدرجه اني كنت اشوفها معاي بالغرفه واتخيل اشياء مو موجوده .. كنت اناديها حياتي .. حبيبتي .. روحي او عمري لاني ما اعرف اسمها .. سكت وانا اقرب منها واحضنها بصدري وهي ساكته تسمع اللي اقوله : وجاء اليوم اللي شفتها فيها كانت في بيتنا وتكلم اختي منيرة .. اللي نادتها بـاسمها " ندى " ومن يومها وانا اسعد انسان على الارض ان البنت اللي ابيها وحبيتها 10 سنين من عمري قريبه مني وتصير صديقه اختي .. كنت استانس لما اسمعهم بالبيت يذكرون اسمها ويمدحونها كنت اقول هذي زوجتي .. وحبيبتي .. والحلم اللي حلمته صار حقيقه وانتي زوجتي وحبيبتي وام ولدي وبحضني وكل شي ابيه الحمدالله عايشه معاج .. سكت انطر منها رد بس البنت ساكته وما قالت أي شي .. ناديتها : ندى انتي معاي ! ضمتني بقوه وهي تقول ندى: أي معاك .. احب اسمع صوتك .. واحب اسمع نبض قلبك .. واحب احس بـ انفاسك تلعب بخصلات شعري .. احب وجودك محمد .. لاني احبك .. احبك ! ارتاحت ملائكتي وانا اسمع صوتها الهادي الناعم اللي يهز كل شعره بـ جسمي .. حضنته وانا ابوس راسها وانزل ابوس عيونها وابوس خدودها وخشمها وصلت عند شفايفه وقلت : ندى ابي اخت لابراهيم .. وقبل لا ترد بست شفايفها .. وبعدت عنها وانفاسي مو مضبوطه وقلت : وابيها تشبه امها !! *** دارت الدنيا والايام تركض من جد فيها وجد .. كبرنا وصارنا نشيل الهم من قلوب اهلنا صرنا رجاجيل البيت وبنات العاايله .. مرت 15 سنه على الكل سنين وشهور وايام مرت عشناها بحب وخوف واهتمام عرفنا من اهلنا ان الدنيا ما توقف عند موقف .. وعرفنا ان الحب هو اساس الحياه اذا حبيت اخلص لحبك وعيش علشانه بس تاكد ان حبك هو الصح .. *** عمتي الجازي وخالي عبدالله ربي رزقهم بـ توام سلطان و ناصر واعمارهم 15 سنه .. اذا لاحظتوا ان اسماءهم على المرحوم سلطان اخو خالتي نور والمرحوم ناصر على زوج خالتي فاطمه " فطوم " .. مزعجين من قلب ما احب اروح بيت جدتي والسبب هم يالله شباب مراهقين ما تعرف شلون توقفهم بس خالي عبدالله مخليهم يمشون على الصراط المستقيم .. *** عمي راشد و خالتي موضي بعد محمد جابوا 3 بنات .. طبعا محمد عمره 13 سنه وهو الكل بكل واحب اكون وياه يعجبني مريم 11سنه ومنال 9 سنين ومها 7 سنين .. هذول الخجل منهم وفيهم ما تقدر تسولف وياهم كلش مع اني تربيت معاهم وطول عمري اشوفهم بس ايش اسوي فيهم .. عمي راشد رباهم احسن تربيه وخل منهم الحكمه اللي تقول : اذا كبر ولدك خاوه .. *** عمتي وضحى وخالي بدر .. قصتهم قصه بعد زواجهم الاسطوري سافروا اسبانيا وما نشوفهم الا بالاجازات الصيفيه وربي ما رزقهم عيال ومع هذا حياتهم حلووووووووووووه حيل عوضهم رب العالمين بالعلاقه الطيبه والاحترام .. *** خالتي فاطمه وعمي سعد .. ربي رزقهم بـنتين و ولد سعاد عمرها 15 سنه وصديقه موزة الروح بروح ما يتفارقون الا بالشكل اما التفكير والروح والتصرف والجسد واحد .. و دانه عمرها 13 سنه هذي هاديه وبروحها ومش مع الناس تحب الهدوء وتعيش جو مو موجود بالدنيا اما عبدالله عمره 10 سنين سمته خالتي فطوم على خالي عبدالله .. شاطر وتحفه ولسانه طويل وما يحب البنات وكل يتهاوش مع خواته " الله يهديه بس " *** خالتي العنود وعمي يعقوب .. عندهم سالم طبعا تعرفونه وعمره حاليا 22 سنه يدرس بـ جامعه قطر قسم ادارة واعمال وشاطر جداا ومجتهد .. وبعد موزة وعمرها 15 سنه بالاعداديه وبعد شاطره ومتفوقه بدراستها وطموحها علمي تبي تصير مثل الدكتورة نور بكل شي .. وحياتهم فيها نوع من الاكشن والمرح تحس لما تكون عندهم انك في فلم جاكي شان .. *** خالي فيصل وخالتي اسماء .. طبعا تعرفون ندى الصغيرة عمرها الحين 15 سنه حلوة وهاديه دمها خفيف مرحه وتبون الصج احبها حيل واتمنى اذا كبرت تكون زوجه لي .. وربي رزقهم بولد وسموه بدر على عمي بدر وعمره 9 سنين .. *** اما عبدالعزيز فـ اهتم في بنته نور اللي عمرها 22 سنه وتدرس بالكويت بعد ادارة واعمال علشان تقدر تمسك شركات ابوها اللي رافض يتزوج او يفكر بزواج وعاش على ذكرى المرحومه لينا وندى ونور .. الله يعينه ويصبره .. *** الدكتورة نور او خالتي .. طبعا مازالت متمسكه بوظيفتها وتحاول توصل لاعلى المراكز مع انها رئيسه عياده خاصه مع الدكتور جاسم الي تعب وهو يخطبها ايام الدراسه .. ونال اللي يتمناه بعد طول انتظار وصار زوج خالتي نور .. عندهم بنت وحده بس اسمها "حور " عمرها 4 سنين طفله جميله .. *** ابوي محمد وامي ندى .. طبعا انا ولدهم الكبير ابراهيم عمري 17 سنه وبعد كم اسبوع بصير 18 وبـ نفس الوقت توني متخرج من الثانويه العامه بمجموع يرفع الراس .. وعندي اخت اصغر مني 4 سنين واسمها منيرة على المرحومه عمتي منيرة ترفع ضغطي بس علشان عيون امي استحمال الدنيا وما فيها .. *** ابراهيم يا ابراهيم .. صكرت الدفتر اللي كنت اكتب فيه وانا اطلع من غرفتي بعد ما سمعت صوت ابوي يناديني وقفت عند باب الصاله وقلت : سم يبه ناديتني ..؟ قال وهو يطالع الخبله منور وهي تصيح : أي روح لامك وقول لها ترى بنتها حلال لذبح .. هههههههههههههههههههههه انفجرت ضحك وانا اشوف منور توقف بكل عصبيه وتقول : اصلا انا ما احبكم .. يا بعد قلبي انتي ليش ما تحبين ابوج واخوج .. صوت امي وهي تنزل الدرج والتعب واضح عليها خلاني اخاف وابوي وقف وهو يقرب منها ويقول : ندى ليش نزلتي .. واذا عن بنتج راح نسوي اللي تبيه بس خلج مرتاحه .. ابتسمت امي لابوي وهي تقول : محمد تراني بخير وانا عندكم وما ارتاح الا وانا معك ومع عيالي .. ابتسمت من الغزل الحلو والناتج عن الحب ما بينهم .. تكلمت منور وهي تحضن ابوي : والله احبك انت وابراهيم بس احيانا ترفعون الضغط عندي .. هههههههههههه ضحك ابوي وهو يقول : امج عرفت تربيج عدل .. وعلمتج على الكلام اللي يرد الروح .. قربت من امي وبست راسها وحضتني وهي تقول : ابوك عرف يربيك عدل ويخليك رجال ترفع الراس وتهز المجلس .. كنت طاير من الفرحه لان امي دوم تشوفني البئر اللي تقط فيه مشاكلها .. والقصه اللي كتبتها في دفتر ذكرياتي الدليل على حبها لنا وعلى صدق مشاعرها وخوفها علينا .. قعدنا بالصاله الصغيرة واحنا ننطر باقي الاهل يجتمعون عندنا لان اليوم الخميس والكل راح يتواجد في بيتنا .. *** من يحبك كثـر مـا أحبـك أنـا و من بحبك حاول و ياما اجتهـد ومن في عينه شوفتك كل المنـى لا و رب العرش ما غيـري احـد انت شوفي و انت عمري و الهنا يا جسد بي روح و لروحي جسد و انت عيني و انت نوري و السنا و انت اسبابـي اذا حبـي خمـد و انت ميعادي و سهدي و العنـى و انت تعذيبي و صبري و الجلـد و انت راحاتي و روحي و الظنى و انت الاول ما به قبـل و بعـد لمنـا جـو المحبـه و ضمـنـا و من بعد قربك انا كيـف ابتعـد شوف ما كبر يا حبيبـي عشقنـا فاق كل العشق وحـده و انفـرد لو يوزع البسيـط حبنـا مابقـى حــد اذكــره كــره احــد تحيـــــاتي واحتـــرمي انت الغلا
|
|
 
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
