ديوان الشاعر / عبد الله بن ذويبان .. l

/




[ إستريحي ]








ياهواجيسي مع النسمات .. روحي
...... و أستحلي قلبها ثم أستبيحي




وزعي نفسي على الدنيا و نوحي
....... و عند مدخل قلبها..قومي و طيحي




أحكي اللي ما احكيت الها و بوحي
.... و قولي انها ((سيدة قلبي)) و..صيحي




صيحي بأعلى الصوت..ياقلبي و روحي
..... ياعواتي نسمتي.. يا صحو ريحي




يا أرتباك النطق فيني..يا وضوحي
..... دائماً واقف.. و في يدك.. مطيحي




كان عندك ما فرق جٌــدي..مزوحي
..... ما عرفتيني عدل..بس..أستريحي!!



تجرحيني و أفتخر بأغلى جروحي
..... و أجرحك و لا أتفاخر في جريحي




علميني وش كثر حبي..و بُوحي
..... ذوبي نفسك على صدري..و سيحي




عطري نفسي من أنفاسك..و فوحي
.... كانك انتي وردتي..فالشيح شيحي




أطلعي قلبي..تجلي به..و لُوحي
... الهدب كفني و في عينك..ضريحي




أهدمي اخر مباني في صروحي
.... و أبني أول منشئاتك..في قريحي



سولفي لقلبي و هو لا شك..يوحي
..... أنتي أسنادي كذا..و انتي صحيحي



يوم عاقبني الهوى و أعلن نزوحي
.... قلت يا نفسي عسى ماهو طريحي




علميني وش بقى ما ضم .. لوحي
.... ماني بقايل عن الضلعين..زيحي




سامحي عتمة شعوري قبل..ضوحي
..... حللي نفسي من ذنوبك..و بيحي




داخل عروقي..تعالي ثم روحي
... و ان تعبتي؟!..داخل القلب أستريحي




,

[ يا جارة الوادي ]





ياليت بعض الناس مثلي و تشتاق
...... (( يا جارة الوادي .. و أياك أعني ))




صدك ذبح فيني مفاهيم الاشواق
.... و اسقى عروقي للفراق .. و زرعني



ما غير واقف لك و اغني على ساق
..... ابعد بعيد من الخلايق سمعني




القرب دافي .. لكن البعد حراق
.... تكفى .. بعادك للكآبه .. دفعني



لا تنشد الدمعه عن .. أيام الاحداق
.... و لا عن الاحوال و البال .. طعني




ما عاد ياسعني مساحه و لا أفاق
.... من ضيقتي .. ما اشوف شيءً وسعني



كتبني التاريخ .. في صفحة فراق
..... و بصفحة الاحزان .. جار و طبعني




دخلت .. انا و الحزن .. (غيبوبة عناق)
... بعثرتني .. و الحزن عقبك جمعني




مانيب شاعر .. بس صادقت الاوراق
..... و أصبحت نجم .. و حزني اللي صنعني



لي معجبين .. و لي مكانه .. و عشاق
..... و لي وضعي اللي فيه ربي وضعني




و رغم اختلاف الناس في بعض الاذواق
..... انت الوحيد .. اللي بغيت و منعني




انا .. و ليلي .. و أثمن كنوز الأعماق
.... نشريك .. و انت تقول طالبك بعني




الله كتب بأنٌا نحبك .. و ننساق
.... أتركني أرضى بأمر ربي .. و دعني




انا و قلبي .. نأخذ لقلبك .. سباق
..... أنشد: وصلنا .. قال : يعني و يعني




و انا ادري انك تملك احساس و أخلاق
..... أحساسك اللي من عروقي نزعني



وش فيك؟ .. ما تفهم؟.. ترى جٌد مشتااااق
... سيف الثواني في غيابك .. قطعني

/




[ فديتك ْ ]







يامـا نــهــار أمــس القــريـٌب بـكـيـتــك
... يامـا ذبــحــت من الـــوله فــي تـحــريــك




باعــتــني الدنـــيا و جــيـت و شـريـتـك
.... و اليــوم .. يـمــكــن ما أحـبـك و لا أبـيـك



أضـما غــرام و لا لقـيــتــك .. رويـتـك
... سـبـحـان ربً فـــي ضــلـوعي .. معــلـيـك




يامـا و يامـا من حـــنانـي عــطــيــتــك
.... أزعــل عليك شـوي و أرجـع و أراضـيـك




و أطــــاولك مابـيـن (عـلك) و(لـيـتــك)
.... و اليا مـرضـــــت أقـــول فـيني .. و لا فـيـك



مـن كـثـر ما أحــبك .. أحــب اهــل بـيـتـك
... حتى الحديـقه .. و الغـرف .. و الشبابـيــك




و أحـب ديكـورك .. و فـرشة موكــيــتــك
.... و كل المــرايا .. و التـحــف .. و السرامـيـك




و كل الدروب اللي خـذتـــنـي .. و جـيـتـك
..... و كل الأمـور اللي فـ(بـيــتــك) .. تـســـلــيـــك




شـالك .. و مـكـياجك .. و حتى (جـكـيـتـك)
... و حـتى حـلـقـك اللي تـــحــطه فـ(أذانــيــك)




خــواطـــرك!.. شــعــرك! .. فنون أتـكـيـتـك
.... صـح الله لــــســانــك .. و تـســلم أيـاديــك



رســمت لي مـــوتـي .. و مـت .. و رثـيـتـك
.... و أبعـدتـنـي عن بـنـد ربـعــك و أهـــالـيــك




وجـلــست ادور فالضـــلوع ..و لـقـيــــتــك
.... ذكـرى مثل ذكــرى عــصــورالـمـمـالـيــك



و لو كـنـــت جـرحي يا مـماتي .. بـريـتـــك
.... مـيـر البـلا و الجـــرح .. فـي فـــقد غالـيـك




يا حــــزن .. تكـفى لا تـطــــول .. (فـديــتــك)
.... لا يجـــتـمـع لــيـل الغــــرام .. و لـــيـالـيـك




يامــا بديتك..و أنتهيت .. وبـكـيـتـــك
.... و الحين ابصـبــر و ابـكي الحزن و ابـكـيـك







’

[ الموت ْ ]





الموت !! شيءٍ يضيق به الفضاء نوبه
... و الموت!! روحه و لكنها بلا .. جيٌه



يا رب .. و عبادك بما صار .. منكوبه
... أحلامنا سود .. لا ماهيب ورديٌه



البيت .. مايه تنثر .. و أنكسر كوبه
.... و الحال واحد .. ترى الكيٌه هي الكيٌه


و النفس .. كنها على السلوان مغصوبه
.... و الناس تنسى .. و تبقى جروحنا حيٌه




والصبر .. كاساته من الناس مشروبه
..... حياة دنيا .. و كل الناس طرقيٌه



و أنا .. دموعي على الحرمان مسكوبه
.... و أقداح عيني .. على الحرمان .. مكفيٌه



و الضربه اللي تهز العاقل .. عقوبه
... كنت أحسب انها وحيده .. جات مثنيٌه



جيش المنايا .. خذو قلبي و قفو به
.... في ليلةٍ من رداها .. جت رماديٌه




يا ناعي الموت .. و الخطوات محسوبه
..... ما مات مسلم .. و له فالارض ذريٌه


تطلب له الله .. كريم العفو و التوبه
..... و تبر لأجله .. زكاة .. و صوم .. و ضحيٌه



فالضحكه .. اللي من الايام منهوبه
.... ما عاد تغني .. لو ان نفسي غناويٌه



طفل العرب .. ينولد .. في يديه(لعبوبه)
.... و أنا .. أنولدت و لعبت .. (بفركة أيديٌه)



ولدت طفلٍ تلبس .. حزنه و ثوبه
.... الحزن في دنيته .. تسعين بالميٌه



و الحزن .. لا من بغاني .. لطف أسلوبه
.... يضحك بوجهي .. و انا .. خابر وش النيٌه


لكني أصبر .. و اقول ان العمر .. نوبه
... و الناس بالصبر .. مأموره و منهيٌه




أشياء ما تنقرا .. و تكون مكتوبه
... و أشياء ما تنكتب .. و تصير مقريٌه









’