لذه طهر والصدق زود نقاها ~||

يا هيه جاك القاف مسيت بالخير ويسعد مساء اللي لفانا قراها اسوق لك بالقاف حلو التعابير ابيات شعرٍ تكتسي من بهاها في مجلسٍ ينخاه كل المناعير شعار من يبلغ علو مستواها واسقيك من صافي الدلال المباهير قهوة محبه والوله .. محتواها واميزك عن ناس غيرك مشاهير واعطيك من فيض المحبه صفاها غلاك صايبني بنشوه وتخدير واصبحت لريم الجفوله مناها تشهد على حبك دموعٍ محادير ويشهد عليه الليل يومه سراها تدري متى تلفي طيوفك مسايير واتذكرك والعين يكتض ماها وتزيد في عقلي هجوسٍ وتفكير واجر وناتي ويرجع صداها في تالي السهره وفي حزت اعصير تزيد اشواقي ويلهب سناها لا تحسب اني لا مدحت الشواعير اهتم باسماهم وادور رضاها في داخلي للقاف حشمه وتقدير وامدح بيوت الشعر وامدح بناها وشعارها يوم احسنوا بالتصاوير خلت مدايحنا تزود حلاها ماني بمن تتبع لنفّاخت الكير ولا ذيابه ليل تعوي جراها لاهل الهوى لذه وانا لذتي غير لذه طهر والصدق زود نقاها تفداك روحٍ ما احسبت للمخاسير وتفداك عينٍ قل شوفك عماها ويفداك قلب صار مثل العصافير لاسمع صوتك رف يطوي سماها ويفداك قاف جاء يسوق المعاذير ويرجي حروفه تبلغ اخر مداها هذا هو الواقع .. ولا فيه تغيير وهذي حروفي يوم حبك زهاها